An Anunciación ki San Jose

 

Giya sa Prayer-Meeting nin mga Saradit na Komunidad nin Pagtubód (SAKOP) para sa semana kan Disyembre 18-24, 2022. Basahon an Evangelio gikan sa Mateo 1,18-24 (Ikaapát na Domingo kan Adviento).

…

Sa evangelio iniistorya an pagbaretà kan angel ki San Jose. Sa Evangelio ni San Lucas an anunciación nangyarì ki Santa Maria, alagad sa Evangelio ni San Mateo, ini nangyarì ki San Jose. May iba pang anunciación sa laog kan dakulang istorya kan pagkamundag ni Jesus: ki Zacarias, sa mga pastores, asin sa mga mago.

Ano an itinutukdò sato kan anunciación ki Jose?

Enot, an Dios an naenot na namoot asin nagraní sa tawo. Igwa nin dakulang plano an Dios para sa katawohan: na ihàwas kita sa kasâlan asin darhon sa Saiyang Kahadean. Sa sadiring kakayahan dai ta kayang iligtas an satong sadiri sa kasâlan asin kagadanan, sa sadiring kaisipan dai ta maabot saboton an misterio kan Kahadean. Kaya – siring ki Jose na nariribongan kun ano an dapat na gibohon sa baretà saiya ni Maria na ini badós na asin an akì bakô gikan saiya – an Dios na mismo an nagrarani para itukdô sato si Cristo, an Saiyang pagkamoot na nanitawo para sa katawohan. Sabi sa 1 Juan 4,19: “An Dios an enot na namoot sato, kayâ namomoot kita.”

Ikaduwá, sa pag-akò ni San Jose kan kabòtan nin Dios, naotób an mga profesía dapit sa Mesías na madatong. Sinabi saiya kan angel na naotób ki Maria an nasusurat sa Isaias 7,14: “may sarong virgen na mangingidam asin mangangaki nin lalaki, asin Emmanuel an ingangaran Saiya.” Dangan sa 2 Samuel 7,12-13, may panugâ an Dios ki Hadeng David: “Gigibohon kong hadè an sarô kan saimong mga aking lalaki asin papakusogón Ko an saiyang kahadean. Siya an matugdok nin Templo para Sako, asin papagdanayon ko an saiyang trono sagkod pa man.”

Sa Mateo 1,1-17 nakalista an mga ngaran nin mga kapag-arakian poon ki Abraham sagkod ki Hadeng David, sagkod ki Jose asin ki Jesu Cristo. An pag-akò ni Jose ki Maria bilang agóm, asin kan aking nasa popònan niya bilang saiyang akì, iyo an nagpabilang ki Jesus sa kapag-arakian ni David.

Ikatoló, nagsasaksi ining istorya sa kadakulaan kan pusò ni San Jose. Mahihiling ini sa mga pagpipilì na ginibo niya. Sa tahaw kan saiyang kapurisawan, pinili niyang mamoot. Habô niyang ipasupog si Maria, ni iosip sa autoridad tanganing patawan nin padusa. Sa pasabóng kan angel, pinilì niyang magtubod asin tulos sunodón an kabòtan nin Dios. Pagkagimatá, tulos ginibo an ipinapagibo saiya kan angel: inakò niya si Maria bilang saiyang agóm, asin sa bilog niyang buhay nagin marhay na padre de familia.

Si Papa Francisco, sa saiyang Surat Apostolico Patris Corde (May Pusò nin Amâ), nagsabi dapit ki Jose: “Maski sa tahaw nin mga takot ni Jose, nagtatrabaho an kabòtan, kasaysaysan, asin plano nin Dios. Kayâ tinutokdoan kita ni Jose na kaibahan sa pagtubód sa Dios an pagtubód man na may mahahaman Siya sa paagi niato maski kadakul an satong mga natatakotan asin kaluyahan. Tinutokdoan man niya kita na sa tahaw nin mga bagyo sa satong buhay, dai nanggad kita matakot na pilion an Dios na iyo an magiya sato.”

Siring ki San Jose, pirmi ta man lugód mahiling asin mamatean an pagkamoot nin Dios sa satong buhay tanganing danay na hanapon an Saiyang kadunongan asin kabòtan, asin pakakua kan mga ini, maogma tang sunodón asin isabuhay.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia kun pa’no kita inapód nin Kagurangnan na magsarig Saiya asin gibohon an Saiyang kabòtan, sa tahaw nin mga katibaadan.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer/Silence • Gathering Song • Opening Prayer • Gospel Reading • Reflection • Sharing of Faith Experience • Prayers of the Faithful • Closing Prayer (Spontaneous and Our Father) • Closing Song

Mga Saradit na Kristiyanong Komunidad

HOMILIA

Misa de Aguinaldo, Disyembre 24, 2010

Hilngon ta an mga karakter sa mga pagbasa ta ngonyan na aldaw. Enot si David, hade nin Israel. Dangan si Zacarias, ama ni Juan Bautista na sa ebanghelyo nag-awit nin pag-omaw sa Kagurangnan nin huli ta sinda nagin paladan.

Ano pa an mahihiling niato? An mga paladan palan kan Kagurangnan, hinahagadan Niya na pararomon an pagtubod. Sa paagi ni propeta Nathan, ipinahayag ki David an kabotan kan Dios na ipagibo an templo, an simbolo kan presensya kan Dios sa tahaw kan banwaan.

Si Juan Bautista na inaawitan ni Zacarias, hahagadan man kan Kagurangnan pag-abot kaini sa tamang edad nin sarong dakulang partisipasyon sa Saiyang plano. Susog sa awit kan saiyang Ama, si Juan “aapodon na propeta kan Orog Kahalangkaw: ta mangengenotan siya sa atubang kan Kagurangnan sa pag-andam kan saiyang dalan.”

An Pamilya: Sadit na Simbahan

HOMILIA
Misa de Aguinaldo, Disyembre 23, 2010


An satong ebanghelyo ngonyan iyo an istorya kan pangaki ki Juan. Bago siya nagin Bautista, pinakaorog sa mga propeta asin boses na nagkukurahaw sa kadlagan, siya man saro ngunang omboy, nagdulot nin labi-labing kaogmahan sa saiyang mga magurang asin ngangalasan sa saindang pagtaraning.

1. An pamilya sadit na Simbahan. An pamilya ni Zacarias, Isabel asin Juan an saro pang pamilyang ipinapamidbid sato sa Adviento. Angay na marhay sa tema kan satong Misa ngonyan: “An Pamilya bilang Sadit na Simbahan”. Siring sa dakulang komunidad nin mga nagtutubod, an Simbahan sa pamilya o iglesia domestica, igwa man nin komunyon asin misyon.

Kan nginaranan ni Zacarias an saiyang aki na Juan, pinahayag niya man an dakulang katotoohan manungod sa satong Dios: “mabalaog si Yahweh”. Si Yahweh an burabod nin komunyon kan pamilya. Asin base sa mga elemento kan istorya, an pamilya ninda tinawan man nin mahalagang misyon: tabangan an kinaban sa pag-andam sa pag-abot kan Aki kan Dios.

An Pangapodan sa Pagbago

HOMILIA
Misa de Aguinaldo, Disyembre 22, 2010


Kan mga nakaaging aldaw naghorop-horop kita sa tema kan Simbahan bilang komunyon sa misyon. Bilang komunyon kita nahihirasan kan buhay kan Dios. Boot sabihon kan misyon hinihiras ta man sa iba an buhay na itinao sato kan Dios tanganing an kaligtasan makamtan nin kagabsan.

Tangani na mangyari an kapanoan kan satong komunyon asin misyon, may mga bagay na kaipuhan nguna mangyari. Saro sa mga ini iyo an pagbago kan satong sadiri pasiring sa tunay na katalingkasan.

An Mga Esensyal na Karakter kan Bagong Ebanghelisasyon

HOMILIA
Misa de Aguinaldo, Disyembre 21, 2010


An istorya kan satong ebanghelyo ngonyan na aldaw manungod sa pagsungko ni Maria sa harong kan pinsan niyang si Isabel para antabayan siya sa saiyang nagraraning pangaki. An istoryang ini midbid ta bilang an Visitacion, an ikaduwang Misteryong Maogma sa Santo Rosaryo. Digdi man sinambit ni Isabel an mga tataramon sa satong pamibi: "paladan ka sa mga babae gabos, asin paladan an saimong aking si Jesus".

Magayon na alegorya ini sa tema kan ebanghelisasyon. Si Maria dara an Tataramon sa saiyang tulak nagsungko sa pagtabang sa mas nangangaipo kisa saiya. Kan mahiling siya ni Isabel, tulos namidbidan siya asin an saiyang darang Marhay na Bareta, mala ngani pati an aki sa laog kan saiyang tulak naglukso man sa kaogmahan.

An Misyon kan Simbahan

HOMILIA
Misa de Aguinaldo, Disyembre 20, 2010


Sa ebanghelyo ngonyan pig-iistorya an pagbareta kan anghel ki Maria na pinili kan Kagurangnan na magin ina kan Saiyang Aki. Aram ta na an simbag ni Maria: "mangyari man lugod susog sa saimong tataramon".

Nagkapirang bagay an magayon tawan na atensyon sa pamilyar na istoryang ini. Enot, an dakulang plano nin Dios para sa satong kaligtasan. Ikaduwa, an partisipasyon nin tawo digdi. Dangan, yaon man an enot na initiatibo hale sa Dios; asin an simbag nin tawo sa initiatibo kan Dios.

Mga Fundamental na Katongdan kan Simbahan

HOMILIA
Misa de Aguinaldo, Disyembre 19, 2010
Ikaapat na Domingo kan Adviento


An babasahon hale sa ebanghelyo ngonyan na Domingo pareho kan sa kasuodma: susog ki Mateo, manungod sa pagpahiling kan anghel ki San Jose sa pangaturugan. An halipot na paliwanag kaini iyo na iba an cycle kan mga babasahon na ginagamit para sa Domingo, iba man para sa ibang aldaw kan semana. Kaya minsan, siring ngonyan, nagkakasunodan na magkapareho an babasahon.

An tema kan satong Misa de Aguinaldo manungod sa mga fundamental na katongdan kan Simbahan. Ini iyo an pagkapadi, pagkapropeta asin pagkahade. Sa enot na pagbasa an istorya manungod sa pag-oolay ni Hadeng Ahaz asin Propeta Isaias. Nagtatao nin insght an istorya manungod sa papel na ginagampanan kan hade asin propeta sa suanoy na Israel.

Mga Tanda nin Comunion sa Simbahan

HOMILIA
Misa de Aguinaldo, Disyembre 18, 2010

Aram ta baga an Anunciacion, ini an pagbareta ni anghel Gabriel ki Maria na sya magigin Ina ni Jesus. Pero aram nindo na igwa pa nin ibang anunciacion na manungod sa pagkamundag si Jesus?

Si Gabriel nagpahiling man ki Zacarias asin nagbareta na siya asin an saiyang agaom magkakaigwa nin aki sa saindang pagkagurang. An mga anghel nagpahiling man sa mga pastores asin nagbareta kan inaki na Paraligtas kan kinaban. Pwede man masabing may pasabong na itinao sa mga mago, alagad ini bako sa direkta hale sa mga anghel kundi sa paagi kan saindang pag-aadal. Ngonyan na aga, nadangog niato an istorya kan saro sa mga anunciacion na ini: an pagpahiling kan anghel ki Jose sa saiyang pangaturugan.

Mga Nibel nin Comunion sa Simbahan

HOMILIA
Misa de Aguinaldo, Disyembre 17, 2010


Ano daw an marhay na bareta hale sa pagpresentar kan sarong lista nin mga pangaran? Sa pinakaenot na mga versos sa Bagong Tipan piglista ni Mateo an mga ninuno ni Jesus poon ki Abraham. Duwang bagay an pwede niatong maguno digdi:

Enot, ini pagpamidbid na an Dios nagin tunay na tawo. Siya nagin uya sato. Kapamilya Siya kan kapag-arakian hale ki Abraham.

Ikaduwa, an Dios nagin miembro kan Piniling Banwaan, Siya an sentro kan saindang kasaysayan. Tuyo kan Dios na gamiton an komunidad nin mga nagtutubod para sa satong kaligtasan.

Simbahan bilang Pakisumaro sa Plano nin Kaligtasan

HOMILIA
Misa de Aguinaldo, 16 Disyembre 2010


Sa pagpoon niato kan mga Misa de Aguinaldo, an satong paghorop-horop gibohon tang introduccion kan nagkapirang mahalagang okasyon sa satong rona:

Enot, syempre an Pasko kan Pagkamundag ni Jesus. An satong mga Misa de Aguinaldo, mga Misa novenario sa pag-andam sa celebracion kan Pasko. Boot sabihon sa lambang pagsimba niato, mawot niatong mas lalong iayon an satong mga espiritu sa espiritu kan Pasko. An mga karakter sa mga istorya sa ebanghelyo na madadangog ta sa mga Misang ini, mga pagirumdom asin guia niato kun pa'no magkakanigong sabaton si Jesus sa Pasko. Orog sa mga karakter na ini iyo sa Virgen Maria asin Juan Bautista.