Sa Bangkete kan Kagurangnan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Agosto 31-Septiembre 6, 2025. Basahon an Evangelio gikan sa Lucas 14,1,7-14 (Ika-22 na Domingo sa Ordinariong Panahón - C).

…                                                                                                                                                                 

An Evangelio nagpoón sa saróng bangkete kun saén naimbitarán an satóng Kagurangnan Jesu Cristo. Kaidto pa man parte na kan buhay nin tawo an mga karakanan, poón sa simpleng handaan nin pamilya hanggang sa darakulang fiesta. An burabod asín kaitaasan nin buhay Cristiano ináapód na “bangkete kan Eucaristía” kun saén si Cristo iyó an kagharóng asín kakanon. Asín an Eucaristía ináapód man na “panugâ kan máabót na kamurawayan,” an tandâ digdi sa dagâ kan bangkete nin mga akì kan Diós sa kalangitan.

Base sa obserbasyon ni Jesús kan mga gawè nin mga tawo dumán, ginamit Niyá an imahen nin bangkete sa duwáng parábola tanganing magtukdô, bakô saná dapít sa tamang pag-ugalì sa lamesa asín sa sociedad, kundî oróg na dapít sa Kahadean nin Diós.

1. Sa Kahadean nin Diós kaipohan an kapakumbabaan.

Sa Sirac 3,17 nasusurat: “Akì ko, sa kapakumbabaan giboha an saimong katongdan, asín mamómòtan ka oróg kisa pararegalo.”

An kapakumbabaan laen sa hababáng paghilíng sa sadiri o pagigin masinupgón – kundî pagpapakatotoo iní sa sadiri. An tawong totoo sa saiyang sadiri inaakò an saiyang mga karahayan asín kakayahan, patín mga kasâlan asín kakundian tanganing mapatawad asín mas magrahay. Huli ta sabi ni Jesús sa Lucas 5,32: “Daí Akó nagdigdi sa pag-apód kan mga mayong salà kundî kan mga parakasalà para magbaklî.”

An kapakumbabaan syempre kontra nanggad sa kapaabáw-abawan na pagpaoróg sa sadiri, mantang an kapakumbabaan pagigin matanos sa matá nin Diós. Kan nagpasuruhay an mga disipulos kun siisay sainda an pinakadakulà, tinokdoán sinda ni Jesús sa Lucas 22,26: “An oróg kadakulà saindo magin siring sa nguhód, asín an pamayó saindo siring sa naglilingkod.” Asín sinabi Niyá pa sa Lucas 14,11: “an gabós na nagpapalangkaw, papababaón; asín an nagpapakumbabâ, itataás.”

2. Sa Kahadean nin Diós kaipohan an pagkaherak.

Maski nganì hyperbolé o pagmamalabís an sinabi ni Jesús na kun mahandà kitá nin bangkete daí mangimbitár nin mga sadiring tawo asín mga kaugós, malinaw an mensahe kainí dapít sa pagpaoróg sa mga dukhâ asín pagkaherak sa mga nangangaipo.

Sa katunayan, nakisumarò si Cristo sa kasaradayán asín mga nangangaipo kan namundag Siyáng dukhâ asín maluya, dangan kan tinukdô Niyá sa Mateo 5 an mga Kapaladan (Beatitudes) sa Sermon sa Bukid. Sa Mateo 19, sinabi Niyá sa lalaking joven na mayaman na an huríng kaipohan tanganing makamtan an buhay na daíng kasagkoran iyó an pagpabakal kan gabós niyáng pagsadiri asín an kinabakalán ipanaó sa mga dukhâ. Asín sa Parabola kan Huríng Paghukóm sa Mateo 25,40 sinabi Niyá: “An anó man na ginibo nindo sa sarô kainíng mga tugang Kong oróg kasaradít, Sakô nindo iyán ginibo!”

Sa Kahadean nin Diós kaipohan an kapakumbabaan tanganing kitá magbaklî asín makaligtas; asín an pagigin maheherakon huli ta iní an kahulugán kan pagigin kabaíng nin Diós. An hinahanap satô nin Diós, sabi kan profeta sa Mica 6,8: “mayong ibá, kundî maggibo nin katanosan, mámoót sa pagkaherak, asín malodok na maglakáw kaiba an saindong Diós.”

…

GIYA SA PAGHIRÁS | Maghirás nin experiencia na saimong pinilì na magpakumbabà o inenot an pangangaipo nin kapwa kisa sadiri. | GIYA SA PAGHIRÔ | Bilang saróng komunidad/pamilya, anóng gibong pagkaherak na may kapakumbabaan an inaapod kitá nin Kagurangnan na gibohon niato ngonian?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

Pano Magin Tunay na Mayaman?

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Agosto 3-9, 2025. Basahon an Evangelio gikan sa Lucas 12,13-21 (Ika-18 Domingo sa Ordinariong Panahón - C)

…

Sa Evangelio may nagraní sa satóng Kagurangnan Jesu Cristo, nagpapatabang tanganing mákua niyá sa saiyang tugang an saiyang kahirasan sa pamana. Kaidtong panahón, an mga rabbí o maestro rináranihan para magpatabang dapít sa mga arog kainíng kaso. Ginibo ni Jesús iníng patugmadan tanganing magtukdò dapít sa tunay na kayamanan sa paagi kan parabola kan lolóng na mayaman. Pâno nanggad magin tunay na mayaman?

Enot, daí paglingkodán an kayamanan.

Sabi ni Jesús sa Mateo 6,24: “Mayò nin makakapaglingkod sa duwáng kagurangnan.” Kayâ tinukdò Niyá sa Lucas 12,15: “Magmaan kamó, maglikáy kamó sa gabós na kapasloán, huli ta, sa tahaw kan kasaganahan, an buhay nin saróng tawo daí nagdedepende sa karogaringan.”

Iní man an sinabi ni Qohelet sa Eclesiastico 1,2, na “hangáw kan mga hangáw” (vanity of vanities). Daíng saysay an buhay kun an gibo saná puro pagpayaman o paggasto nin yaman. Asín an mensaheng iní bakô saná para sa mga mayaman, ta maski nasa anoman na estado nin buhay pwedeng magin makikwarta, o lolóng sa kinâbanon na kayamanan.  

Ikaduwá, daí man paghonaon na maraot an kayamanan.

Linawon ta na daí sinabi ni Jesús na salâ an mangarap na mag-uswag an buhay o kasâlan an magin mayaman. Bakô kwarta an gikanan nin gabós na karâtan, kundî an sabi ni San Pablo sa 1 Timoteo 6,10: “An pagkamoot sa kwarta an gamót kan gabós na karâtan. Sa pagkamit kaiyán, igwa nin mga nalagalag suwáy sa pagtubód asín nagtusok sa sadiri nin dakúl na kulóg.”

Pag ginagamit sa tamà asín marhay an yaman, talì, asín kapangyarihan: napapakarhay an buhay nin pamilya, natatabangan an nangangaipo, napapauswag an sociedad, asín naaataman an kapalibotan.

Ikatoló, magtipon nin kayamanan na langitnon.

An satóng Kagurangnan nagtukdò sa Mateo 6,19-20: “Daí kamó magrimpos nin mga kayamanan sa dagâ, saén an bukbok asín taklâ nangraraót asín an mga parahâbon nálaóg saká nanghahàbon. Magrimpos kamó nin kayamanan sa langit: saén mayong bukbok, ni taklâ, asín mayong parahâbon na makutkot saká mahàbon.”

Pâno kitá makatipon nin kayamanan sa langit? An suanoy na mga Amâ kan Simbahan nagtukdò na an parabola kan lolóng na mayaman dapít sa obligasyon na daí pabayaan an mga dukhâ asín nangangaipo. Halimbawà, sabi ni San Beda: “An rasón kun natà tinuyaw kan Kagurangnan an lalaking nagpagabâ kan saiyang mga kamalig tanganing magpatindog nin mas darakulà, bakô na nagtrabaho siyá sa omá asín nagtipon kan mga ani kainí, kundî na daí siyá naghirás sa mga dukhâ kan sobra sa saiyang pangangaipo, kundî nagpatindog nin darakulang kamalig para magsaray nin mga ani para sa sadiri lamang.”

Sabi ni San Pablo sa Roma 14,7-8: “Daíng siísay man na nabubuhay para sa sadiri lamang, daíng siísay man na nagagadan para sa sadiri lamang. Kun kitá nabubuhay, nabubuhay kitá para sa Kagurangnan; asín kun kitá nagagadan, nagagadan kitá para sa Kagurangnan; kayâ, mabuhay o magadán, sa Kagurangnan kitá.” Huli ta an kapanoan nin buhay asín tunay na katalingkasan makúkuá saná sa Kagurangnan.

…

GIYA SA PAGHIRÁS | Maghirás nin experiencia dapít sa paggamit nin kinâbanon na kayamanan – kun iní nakaparaní o nakaparayô saimo sa Kagurangnan. | GIYA SA PAGHIRÔ | Susog sa paghirás kan satóng mga pag-iriba sa komunidad/pamilya, anó an pwede tang pagtarabangan para sa satóng mga pag-iribang nangangaipo?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

An Marhay na Samaritano

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Julio 13-19, 2025. Basahon an Evangelio gikan sa Lucas 9,25-37 (Ika-15 Domingo sa Ordinariong Panahón - C).

…

Ngonian na panahón pamilyar na gayo satô an imahe kan marhay na Samaritano. An tawong nagtatabang sa nangangaipo ináapód tang “good Samaritan.” Alagad kaidtong enot na pig-istorya kan satóng Kagurangnan Jesu Cristo iníng parabola sa mga Judío, kontrobersyal iní – nin huli ta an mga Samaritano kaiwal kan mga Judío. Hilnga kun may pagkaomagíd iní ngonian na panahón sa pag-iwal asín pang-aapí kan mga Judío sa mga Palestino.

Halawig asín hararom an saindang iriwal. Nagpoón pa kaidtong pag-urulî kan mga bihag na Israelita makalihis an 70 taón na destierro (exile) sa Babilonia. Kan taón 539 BC buminagsak an Imperiong Babilonia sa kamót kan Imperiong Persia. Nagtugot an hadè kan Persia, si Cyrus the Great, na mag-urulî sa mga sadiring banwaan an mga bihag kabilang na an mga halè sa dating kahadean nin Judah (kayâ mga Judío an apód sainda). 

An mga natadà sa Israel (na Samaría an capitál na ciudad, kayâ mga Samaritano an apód sainda), kontra sa pagbalík kan mga Judío asín pagtogdas ninda kan bàgong Jerusalém. Pigmemenos man kan mga Judío an mga Samaritano nin huli ta bakô puro an saindang dugóng Israelita huli sa pakipag-agoman sa mga kataed na paganong naciones, pag-arog sa mga gawè kan mga iní, asín an ibá sainda nagsasamba pa nganì sa mga diós-diósan.

An parabolang iní dapít sa pagkaherak nin Diós. Kaidto pa man hanggang sa ngonian, an pagkaherak nin Diós minabanggà sa mga makasadiring kaisipan (mindset), kaugalian (value system), asín kultura (cultural norms).

An pagkaherak an pangenot na katongdan.

Tibaad may dahilán na válido para sa mga Judío kun natà an padì asín clero o Levita daí nagtabang sa biktima, siring bagá kan paglikáy na tibaad maatián (unclean), lalò na ta sinda naglilingkod sa Templo. Susog kayâ sa Numero 19,11-13, an makákapót nin gadán na tawo magigin maatî sa laóg nin pitóng aldaw asín kaipuhan magrayô ngôna sa banwaan asín sa Templo. Tibaad kayâ garó gadán na paghilingón idtong biktima. Alagad malinaw an mensahe ni Jesús: an pagkaherak an oróg sa gabós na obligasyon asín mas oyon sa matá nin Diós. Sabi Niyá sa Mateo 9,13: “pagkaherak an hinahanap Ko, bakô sacrificio”.

An pagkaherak nin Diós daíng pinipilì kun siísay.

Sa parabola, an kaiwal iyó an may pagkaherak sa biktima, an kontrabida iyó an bida. Iní an ladawan nin tunay na pagkaherak: bakô mahalaga an lahì, relihiyon, kinatawo (gender), pulitika, o anó pa man na kategorya, kundî an dignidad asín búhay nin tawo. Siísay an mga madalî para satô na tabangan? Siísay an dipisil? Midbidón ta pa an satóng sadiri asín akóon an satóng mga pinapaoróg asín panghuhusga ta may impluwensya iní sa pagpilì ta kun magin maheherakón o daí sa kapwang nangangaipo.

An pagkaherak nin Diós daíng sukol.

Kanigoan na gayo an gibong-herak kan Samaritano – nagraní sa biktima, binulóng iní, dinará sa ligtas na lugar, inataman, nagwalat pa nin kwarta sa dinagosan tanganing dagos iníng atamanon. Siring kainí an tunay na pagkaherak: daíng sukol, bakô su “pwede na” o pakitang-tawo saná.

Sa hurí, iní an simbag ni Jesús sa abogadong naghapót: “Kun siring, lakáw. Iyó man an gibohon mo.” Iyó man an boót Niyang ipasabot satô ngonian: na an búhay na daíng kasagkoran makakamtan kun kitá, susog sa sinabi Niyá sa Lucas 6,36, “magín maheherakón, siring na an saindong Amâ maheherakón.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kun pâno ka natabangan nin sarong marhay na Samaritano o ika man nagin marhay na Samaritano sa kapwa.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Closing Prayer (Spontaneous and Our Father) • Closing Song

An mga Katotoohan kan Kahadean

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marzo 2-8, 2025. Basahon an Evangelio gikan sa Lucas 6,39-45 (Ikawalóng Domingo sa Ordinariong Panahón - C).

…

An Evangelio pagpadagos kan mga katukdoán ni Jesu Cristo sa Saiyang “Sermon sa Patag” sa Lucas 6, na pigkuahán kan mga babasahon kainíng nakaaging duwáng Domingo. Nagpoón ini sa kun siisay an mga paladan sa matá nin Diós (beatitudes), dangan sinundan kan kasugoán na kamòtan an kaiwal. Ngonian namán may nagkapirang mga kasabihán na nagtutukdò nin mga katotoohan kan Kahadean.

Si Jesu Cristo an katotoohan.

Sa Juán 14,6, sinabi Niyá: “Akó an dalan, an katotoohan, asín an búhay”. Kun bakô Siyá an satóng giya sa búhay, garó kitá nagsúsunód sa butá na daí aram an tamang dalan. Kun talikdan ta an Saiyang kabôtan, garó kitá mga estudyante na sa kadikít na kaaramán naghohonà na mas tataó na kisa saindang maestro, kayâ daí minatalubò sa pakasabot.

Sa Lucas 11,23 sinabi pa Niyá: “An daí Ko kaibang nagtitipon, nagwawarak,” napapadumán sa mga saláng dalan. Kun bakô si Cristo an pigsusundan niatò, ibáng tawo o bagay an pinipilì niatong mag-influencia satô. Kun bakô kitá disipulos ni Cristo na katotoohan, tibaad magin kitáng kampon nin parabsawag nin kaputikan.

Magpakatotoo kitá sa satóng sadiri.

Mahalagá sa Kahadean an pag-akò kan katotoohan kan satóng sadiri. Sabi sa 1 Juán 1,8-9: “Kun magsabi kitá na mayò kitá nin kasâlan, dinadayà ta an sadiri, asín an katotoohan mayò satô. Kun ikumpisal ta an satóng mga kasâlan, maimbod Siyá asín suripot, papatawadon Niyá an satóng mga kasâlan asín lilinigan kitá sa gabós na katampalasan.”

Alagad kun enoton ta an paghusga sa kapwa, si Cristo mismo an nagsasabi satô: “Halea ngôna an pasagi sa saimong matá, dangan ka makakahilíng nin marhay tanganing mahalè mo an salugsog sa matá nin saimong tugang.” Sa panahón nin eleksyon, kun naghahanap kitá nin kandidatong matanos, bakóng parautik, asín bakóng mahâbas, dapat siguradohon ta na kitá ngôna matanos man, bakóng parautik, asín bakóng mahâbas. An mga kandidatong pinipilì ta minapahilíng kun anó an mga pinapahalagahán ta sa búhay.

An katotoohan nin pusò nahíhilíng sa tataramon asín gibo.

Sabi ni Jesus sa Lucas 6,45: “Ta sa sûpay kan pusò, nagtátarám an ngusò”. Kun an naglúluwás sa satóng ngusò nagdádará nin karahayan sa kapwa, an Kahadean nasa satóng pusò. Kun kitá paramudá, parautik, asín paragibo nin pagkabarangâ, karâtan an nasa laóg kan satóng pusò. Sabi sa Sirach 27,6: “Kun pâno inataman an kahoy nahihiling sa bunga; siring man kun anó an pagkatawo, sa pagtátarám kan saiyang kaisipan.”

Ngonian na panahón nin eleksyon, marhay iníng magin basehán sa pagpilì nin mga kandidato. An responsableng botante minimidbid an mga kandidato susog sa saindang mga naginibohan o track record, mga posisyon sa mga isyu, asín plataforma de gobierno. Alagad maski an mga totoong gibo asín tataramon nababaliktad na ngonian nin huli sa maatî na propaganda asín paggamit nin mga online trolls asín fake news.

Kayá nangapodan an mga obispo sa Pilipinas sa banwaan na “daí pagpabayaan na saná an lambang sarô asín an satóng nación, nin huli ta an Diós daí kitá pinapabayaan.” Sa saindang huring surat pastorál “May Pag-asa Pa Ba?,” sinabi ninda: “Manindogan sa katotoohan, sa karahayan, asín sa pamamayo kan batás. Hagadan nin paninimbagan an mga nasa poder. Danay na pilion an karahayan nin kagabsan kisa sadiring interes. Daí mapagal na na magmakulog sa mga pinakamaluya asín saradít na miembro kan satóng sociedad.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kun pâno nagin totoo sa saimong búhay an arín man sa mga kasabihán na naonambitan sa Evangelio.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Bendicion asin Maldicion

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Febrero 16-22, 2025. Basahon an Evangelio gikan sa Lucas 6,17.20-26 (Ikaanóm na Domingo sa Ordinariong Panahón - C).

…

Sa Evangelio susog ki San Lucas tinutukdò ni Jesu Cristo an mga kapaladan o beatitudes. May nagkapirang pagkakaiba iní sa versión ni San Mateo. Embes na walóng paladan o bendición, apát saná an ki San Lucas na pigsusundan nin apát man na kaheherakan o maldición; asín embes na sa bulód (Sermon on the Mount), sa patag na lugár nagsermon si Jesús.

Iníng sermon ni Jesús siring sa mga paghulit nin mga profetas sa Lumang Tipan. Halimbawà, sa Jeremías 17,5-8, nasusurat na maldición an makúkua kan tawong “nagtitiwalà sa tawo, lamán an kinúkusogán, asín nagsusuway sa Kagurangnan an pusò,” alagad bendición para sa “nagtitiwalà sa Kagurangnan, an Kagurangnan magigi niyáng katiwalaan.” Sarô-saroón ta iníng mga bendición asín maldición.

Paladan an mga dukhâ, an mga nasa laylayan asín daíng boses sa kinâban—sa sainda an Kahadean nin Diós. Dinadangog nin Diós an saindang agrangay, haraní Siyá sainda, asín nakatagama man an Kahadean sa mga naggigibong-herak sa saindang kadaíhan digdi sa dagâ.

Paladan an mga nagugutom, an mga nawâran nin trabaho asín hanapbuhay—sinda papabasogón. Kan tinukdoán kitá ni Jesús na mamîbî, kaiba sa satóng pagsunód sa kabôtan kan Amâ asín pagpaoróg sa Saiyang Kahadean, an panugâ kan “satóng kakanon sa aroaldaw,” huli ta an Diós matinao sa satóng mga pangangaipo.

Paladan an mga nagtatangis, an mga nawâran nin mahál sa búhay, an mga nagsasakit nin huli sa inhustisya—an Diós mismo an saindang karangahan asín parasurog.

Paladan an mga kinakaongisán asín pinapakaraot nin huli sa Akì nin Tawo. Bakô kasusupgan kundî orgullo an isabuhay an Evangelio nin katotoohan asín pagkamoot sa panahón na an pagkaongís sa kapwa nasa pusò nin kadakul. Sabi ni San Pablo sa Roma 8,17: “Kun kaiba Niyá kitá sa kasakitan, makakaiba man kitá sa kamurawayan”.

Herak man sa mga mayaman na an kaogmahan yaon sa mga kinâbanon na bagay asín nakacentro an búhay sa pagpadakúl nin yaman. An mga iyán an magigi nindang kaulangan na makalaóg sa langitnon na Kahadean.

Herak man sa mga basóg ngonian mantang sa palibot ninda dakúl an nagugutom asín nagtitios—siring sa parabola kan lalaking mayaman asín ni Lazaro, huhukumán sinda huli kan daí nindang pakilabot asín pagkamoot sa kapwa. Sa Mateo 25,45, si Jesús nagsabi: “An anó man na daí nindo ginibo sa sarô kainíng oróg kasadít, daí nindo iyán Sakô ginibo.”

Herak man sa mga nag-oogma, lalò na idtong mga nanlálamáng sa kapwa asín nabubuhay sa hinâbasan, asín idtong mga nagpaparakpak mantang may mga ináapí asín ginágadán para daá sa saindang sadiring kaligtasan—an agrangay kan saindang mga inapí nakakaabót sa Diós.

Herak man sa mga pig-oomaw nin kadaklan nin huli kan saindang kapangyarihan, kayamanan, asín kasikatan, asín dinádará an banwaan sa mga saláng dalan—tinatalikdan ninda an pagigin mga akì kan Diós tanganing magin kampon kan Paralansé nin tawo.

Linawon ta na bakô iní katukdoán na kasâlan an paghingowa na magyaman o magginhawa an búhay, o na bakô marhay an magkapót nin kapangyarihan, o na daí dapat kitá mag-ogma—kundî kun anó asín siisay an mga paladan sa matá nin Diós. Anó man an satóng estado sa búhay—nasa kayamanan o kadaihan, kabasogan o kagutuman, kaogmahan o kamundoan, kaomawan o kasusupgan—paladan kitá kun kaiba ta an Kagurangnan asín nasasakopan kitá kan Kahadean.

…

GIYA SA PAGHIRÁS SA SADÍT NA KOMUNIDAD O PAMILYA | Ngonian na panahón nin eleksyon, arín man an mga bendición asín mga maldición sa mga track records asín mga posisyon sa mga isyu nin mga kandidato?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Kahadean nin Langit siring sa Balo

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Noviembre 10-16, 2024. Basahon an Evangelio gikan sa Marcos 12,38-44 (Ika-32 Domingo sa Ordinariong Panahon - B).

…

An Kahadean nin langit siring sa saróng dukhang balong babae na nagdolot sa Templo nin sensilyo na may pinakahababáng halagá. Iní gayód an boót itukdô kan satong Kagurangnan Jesu Cristo, na kan sinda nasa Templo, itinurô Niyá sa mga disipulos an saróng balo asín nagsabi: “An dukhang balong iní naghulog nin oróg kadakulà kisa gabós na naghulog sa sarayán-yaman: ta an gabós nag-ambag kan labí ninda; alagad iní, sa saiyang katikapohan, an gabós na yaon Saiya inambag, an bilog niyáng ikabubuhay” (Marcos 12,43-44).

Kaidtong panahón an mga babaeng balo kaiba sa mga pinakadukhâ sa sociedád, nin huli ta daí sinda pwede magsadiri nin anoman na propriedád. Mas lalò kun sinda dati nang dukhâ asín may mga akì pang papadakulaon. Kayâ sa libro kan mga Gibo kan mga Apostoles, nasusurat na an suanoy na Simbahan nagtatabang sa mga balo asín mga ilo.

An extraordinariong gibo kaidtong balo – na kinumpará sa mga mayaman na nagtaó saná kan saindang sobra, asín sa mga escribas na mapaabaw-abaw, parasagin-sagin, asín parasamsam pa kan pagsadiri nin mga dukhâ – nagpapahayag na siya ladawan nin saróng tunay na disipulo, siring man ni Cristo mismo, asín kan Diós Amâ. 

Ladawan nin tunay na disipulo ni Cristo.

An pinahilíng kan babaeng balo na dakulang pagsarig sa Diós na kagtaó kan saiyang mga pangangaipo, tandâ nin saróng tunay na disipulo. Kun kitá may pagsarig sa Diós, gigibohon ta an tamà asín an susog sa Saiyang kabôtan maski magdulot iní satô nin kadipisilan asín kasakitan.

Sa 1 Hade 17 may istorya nin sarô man na balong babae sa Sarefta (banwa sa luwas kan teritorio kan Israel) sa panahón nin makuring taggutom, na hinirasán si profeta Elías kan huríng tinapay na kakaonon na kutâ niyá asín kan saiyang akì, dangan mahalat na saná sindang magadán sa rutoy. Alagad dakulang milagro an nangyarì sainda huli sa profeta: “an koron nin arina daí naubosan, an daod nin lana daí nahubasán” sagkod na matapos an panahón nin taggutom. An pagtubód niyá sa Diós asín sa profetang Saiyang sinugò an nagligtas sainda.

Ladawan ni Jesu Cristo.

Nakakabaíng man an pagdolot kan balo sa pagpakadaí sa sadiri ni Jesús bilang Diós na nanitawo sagkod sa Saiyang Pasión. Susog sa Hebreo 9,26: inatang Niyá an sadiring búhay “sa pagsikwal kan kasâlan sagkod lamang huli kan Saiyang sacrificio”. Tinurô Niyá sa saiyang mga disipulos an pagsaksi kan babaeng balo na sa saiyang kadaihan tinaó pa an gabós na kaipuhan niyá tanganing mabúhay. Maabot man an panahón na si Jesús mátaó nin siring na pagsaksi, asín mas oróg pa, sa pagdusay kan Saiyang búhay sa cruz tanganing maligtas an gabós.

Ladawan kan Diós Amâ.

Siring sa babaeng balo, tinaó man kan Diós Amâ an pinakamahalagá Saiya, an Saiyang pinakanamomòtan, bilang sacrificio para sa kaligtasan nin kinâban. Sa Juán 3,16 nasusurat: “Ta siring namòtan kan Diós an kinâban: an bogtong na Akì itinaó, tanganing an gabós na nagtútubód Saiya daí máwarâ, kundî magkaigwa nin búhay na daíng kasagkoran.”

An babaeng balo sa Evangelio padagos na nagsasaksi para sa Kahadean nin langit, lalò na sa panahón ngonian na an natatangadan asín inoomaw nin kadakul iyó an mga nag-aabuso sa kapangyarihan asín mga nagpayaman halè sa korupsyon asín hinâbasan. Pilíon ta na magin siring saiya tanganing mapasatô man an bendición na sinabi ni Jesús sa Mateo 5,3: “Paladan an mga dukhâ sa espiritu, ta sainda an Kahadean nin langit.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin pagsarig sa Diós asín pagsunód sa Saiyang kabôtan maski nagdulot nin kadipisilan o daí pagkasinabotan.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

An Tunay na Kayamanan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Octubre 13-19, 2024. Basahon an Evangelio gikan sa Marcos 10,17-30 (Ika-28 Domingo sa Ordinariong Panahon - B).

…                                                                                                                                   

An istorya sa Evangelio dapít sa mayaman na lalaki na nagdolok ki Jesús asín naghapót kun anó an dapat niyang gibohon para makamtan an búhay na daíng kasagkoran.

Nasa tamang lugár an saiyang pusò.

An saiyang paghapót siring kan pagmàwot na nasa Kadonongan 7,7: “Nangadyî akó asín an pakasabot itinaó; nangapodan, asín nag-abót sakô an espiritu nin kadonongan.”

An kadonongan na iní nagsasabi na linaláng kitá nin Diós bakô saná para mabuhay na kontento na sa presente niatong kamugtakan. Kundî na an mga karahayan na satóng kinakaogmahán, darhon kitá sa pagmidbid sa Kagtaó kan mga iní asín pagmâwot kun anó an Saiyang kabôtan. Sabi ni San Juán María Vianney: “An natatànaw kan matá kan kinâban hanggang sa búhay sanáng iní. Alagad an matá nin Cristiano natatànaw hanggang sa kairaroman kan búhay na daíng kasagkoran.”

An simbag iyó an pagsunód sa mga Tugon.

Tinutukdò ni Jesús na an pagsunód sa kabôtan nin Diós an enot asín fundamentál na kaipuhan para sa búhay na daíng kasagkoran. Tinaó nin Diós an mga Tugon tanganing mapakarhay an satóng búhay asín maglakáw kitá sa tamang dalan.

An Sampulong Tugon halè sa Exodo 20,1-17: “Daí ka nin ibáng diós na sasambahon kundî Akó saná. Daí mo pagbasáng-basangon an ngaran nin Diós. Giromdomá an aldaw nin Kagurangnan, na mapabanál mo. Galangan mo an saimong amâ asín inâ. Daí ka manggadán. Daí ka magsambay. Daí ka manghâbon. Daí ka magsaksing putik laban sa saimong kapwa. Daí ka maarà sa haróng kan saimong kapwa. Daí ka maarà sa agóm kan saimong kapwa, o sa anó man na bagay na sadiri kan ibá.”

Dangan may sarô pang kaipuhan. 

Kan nagsimbag an lalaki na inuutób niya an mga Tugon poón kan siya akì pa, namòtan siya ni Jesús dangan sinabihan na sarô na saná an kulang: ipabakal an gabós na pagsadiri, itaó an kabaklán sa mga dukhâ, dangan sumunód Saiya. Ikinamundò kan lalaki iníng huríng pighagad ni Jesús nin huli ta siyá mayamanon.

Linawon ta na bakô literál na kaipuhan na pag-ulî nindo tulos pasaón an saindong alkansya, o i-withdraw an gabós nindong savings sa bangko, o ipabakal an gabós nindong pagsadiri para ipanaó sa mga dukhâ. Kundî boót Niyang ipasabot na an tunay na kayamanan, asín dapat niatong pahalagahán oróg sa gabós, iyó an Gracia nin Diós na yaon ki Cristo Jesús, na an bunga iyó an kapanoan nin búhay digdi sa dagâ sagkod sa búhay na daíng kasagkoran sa Saiyang Kahadean.

Daí nin siisay man na tawo, gurâno man kaboot o kabanál, an kayang tâwan an saiyang sadiri nin búhay na daíng kasagkoran. Pâno pa daw kitáng mga makasâlan? Kayâ nganì napahapót an mga disipulos: “Kun siring, siísay an makakaligtas?” An simbag ni Jesús iyó an patotoo na an Diós saná an makakataóng búhay na daíng kasagkoran sa kiisay man, nin huli ta: “Sa tawo imposible, alagad bakô sa Diós; ta an gabós posible sa Diós.”

Kun malinaw na iní satô, masasabotan ta na an mga kinâbanon na kayamanan mga patanâ saná kan maabot na kamurawayan, asín an tamang paggamit kan mga iní – siring kan pagtabang sa mga dukhâ asín paglingkod sa komunidad – iyó an paagi tanganing makatipon nin tunay na kayamanan. Sabi nganì ni Jesús sa Mateo 6,19-20: “Daí kamo magtipon nin kayamanan sa dagâ, saén an bukbok asín taklâ nangráraót, saká may mga parahâbon; magtipon kamó nin kayamanan sa langit, duman mayong bukbok, ni takla, ni parahâbon; ta kun saén an saray na yaman, dumán man an saimong pusò.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin pagtalikod sa kinâbanon na kaogmahan sa pagsunód sa kabôtan nin Diós para satô.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

An Dios nin mga Saradít na Bagay

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Junio 16-22, 2024. Basahon an Evangelio gikan sa Marcos 4,26-34 (Ika-11 Domingo sa Ordinariong Panahon - B).

…

Sa Evangelio, pigtukdô ni Jesu Cristo sa katawohan an duwang parábola dapít sa banhî. An mga parábola mga istorya ni Jesús na halè sa mga bagay asín sitwasyon nin buhay nin mga tawong naghihinanyog Saiya.

Sa mga hababaw an pakasabot o sa mga may ibáng katuyuhán sa pagdangóg Saiya (siring bagá sa Saiyang mga kaiwal), garó iní mga istorya saná na may mapupurot na adal sa buhay. Alagad para sa mga maimbod na disipulos, sa paagi kan mga iní tinutukdò ni Cristo an mga misterio kan Kahadean nin Diós. Anó an mensahe sato kan duwáng parábolang iní?

An kamurawayan kan Kahadean yaon sa mga saradít na bagay.

Si Jesús nagtukdô na an Kahadean nin Diós nakakabaíng sa pisóg nin mustasa, pinakasadít sa mga pisóg alagad pag nagtalubò mas dakulà pa kisa ibang poón nin kahoy. Sa kinâban na iní na kadakul an nagmamàwot nin kapangyarihan asín kayamanan, an Diós nagpahayag na an Saiyang kamurawayan yaon sa mga kasaradayán.

Para labanan an imperio kan Egipto asín patalingkasón an Piniling Banwaan, inapód Niya an saróng nagdulág sa sadiring banwaan, si Moisés. Para labanan an higanteng si Goliath asín magin hadè kan Israel, pinilì Niya an saróng joven na pastor, si Davíd. An Saiyang bogtong na Akì namundag bakô sa pamilyang mayaman, kundî sa dukhang mag-agóm na si María asín José. Sa mga milagro ni Jesús, an dugî ginamit tanganing makahilíng giraray an mga butá; an limáng tinapay asín duwáng sirâ, ginamit tanganing pakakanón an labí limáng ribong tawo; asín an tinapay asín alak nagigin Saiyang Hawak asín Dugô na nagtátaó nin buhay na daíng kasagkoran.

An pagmuknâ kan Kahadean gibo nin Diós na hinihirás Niya sato.

Kita siring sa paraoma sa parábola na nagsabwag nin banhî, alagad an Diós an nagpapatalubò kan mga iní sagkod sa pag-ani. Sa paghirás sa gibo nin Diós, may sinabi si Sta. Teresa de Calcutta: “Bakô gabós sato kayang maggibo nin mga darakulang bagay, alagad kaya niatong maggibo nin mga saradít na bagay na may dakulang pagkamoot.”

An pagtabang kan mga akì sa mga gibo sa haróng; an pagtukdô nin mga lolo asin lola sa mga kaakian kan mga pamîbî asín devoción; an pag sacrificio nin mga amâ asín inâ para sa mga pangangaipo nin pamilya; an honestong pagtrabaho nin mga empleyado; an matanos na paglingkod nin mga namámayó – gabós iní mga saradít na gibo na pag tiniripon nagigin mga darakulang bagay: pagkamoot, katoninongan, katanosan, pasiring sa pagmuknâ kan Kahadean.

Asín kun mag-abót an panahón na makamatè kita nin kagabatan sa paggibo nin marhay, o garó daing padumanan an satong mga paghigós, giromdomón an sinabi ni Jesús sa Mateo 17,20: “Kun kamo igwa nin pagtubód na arog kan pisóg nin mustasa, pwedeng sabihon nindo sa bulód, ‘Dumumán ka sa saróng lugár, asín maduman iyán!’ Daíng magigin imposible saindo.” Bakô nin huli ta sa satong sadiri kita makapangyarihan, kundî, kun an satong gibo susog sa Saiyang kabôtan, an Diós an mahipnò sa satong kakulangan, an mapakusóg sa satong kaluyahan, asin mapabunga satong kahigosan. Sabi nganì ni San Pablo sa Filipo 4,13: “An gabós magigibo ko huli ki Cristo na nagpapakusóg sako.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin sadít na bagay na saimong nagibo o ginigibo ngonian para sa mga namomòtan, o para sa kapwa, o para sa Kahadean nin Diós.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Maglaóg sa Kaogmahan kan Kagurangnan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Noviembre 19-25, 2023. Basahon an Evangelio gikan sa Mateo 25,14-30 (Ika-33 na Domingo sa Ordinariong Panahón - A).

…

Sa Evangelio ni San Mateo, an Parábola nin mga Talento kasunód sa Parábola kan mga Abay sa Kasal – kayâ may parehong tema nin pag-andam sa pagdatóng kan Kagurangnan. Kun ngonian mag-abót na giraray an Kagurangnan, andam daw kita?

Sa Ikaduwáng Pagdatóng kan Akì nin Tawo, may paghukóm na mangyayari. Sa parábola, an kagsadiri nagtaóng omaw asín premio sa duwang sorogoón na dinoble an ganansia kan pinamahalà saindang mga talento (na apód sa saróng sukol nin dakulang kantidad nin denario na pirak o silver coin na ginagamit sa Imperio Romano). Alagad tamuyaw asín padusa an nákua kan sorogoón na linubóng saná sa dagâ an talentong pinamahalà saiya. Ano an kahulugán kainí?

An Diós nagwawaras nin gracia sa gabós. Siring sa iba pang mga parábola asín kasabihan ni Jesús, dapit iní sa Kahadean nin langit asín sa marhay na bareta na an gabós inaapód nin Diós pasiring sa Saiyang Kahadean. Siring man, an Diós danay na nagwawaras nin gracia sa katawohan tanganing matabangan kitang makaabót sa satong langitnon na padumanan.

Susog sa Catechism of the Catholic Church (#1996-97): “An Gracia saróng pabór, an matalingkás asín daí maninigong tabang na tinátaó nin Diós sato tanganing magsimbag kita sa Saiyang pangapodan na magín mga akì kan Diós, inampon na mga akì, asín mga kahirás sa Diósnon na natura asín sa buhay na daíng kasagkoran. An Gracia iyó an participación sa buhay nin Diós.”

Tinatâwan kita nin Dios kan mga gracia nin pagtubód, paglaom, pagkámoót, kapatawadán sa satong mga kasâlan, an mga bunga kan Espiritu, asín oróg sa gabós, pinadará Niya an Saiyang Bogtong na Akì sa pagligtas sato. Tinatâwan Niya man kita nin mga kakayahan asín kayamanan digdi sa kinâban.

Minsan napapahapót kita kun natà mas dakúl an yaon sa ibá kisa sato. Sa parabola, sinabi na an lambang sarô tinâwan nin talento “susog sa sadiring kakayahán”. Si San Pablo nagpaliwanag na manlaen-laen an mga balaog na winawaras kan Espiritu sa lambang miembro kan Hawak ni Cristo tanganing magibo kan Simbahan an saiyang misyon.

Sa 1 Corinto 12,4-6 sinabi niya: “May manlaen-laen na carisma, alagad iyó man sanang Esiritu; manlaen-laen na paglingkod, alagad iyó man sanáng Kagurangnan; manlaen-laen na gibo-gibo alagad iyó man sanang Diós na nananrabaho kan gabós sa gabós.”

Boót nin Diós na gamiton ta nin tamà an graciang Saiyang tinátaó. Nin huli ta iníng mga graciang espirituál asín mga talentong kinâbanon, mga instrumento asín patanâ saná kan mas darakulang biyayà na naghahalat sato sa kapanoan kan Kahadean.

Sa parábola, sinabi kan saindang kagurangnan sa duwáng “marhay, asín maimbod” na sorogoón: “Sa dikít nagi kang maimbod; sa dakúl taka papamahalaon: maglaóg ka sa kaogmahan kan saimong kagurangnan.” Ano an sukolán o criteria na kita man “makakalaóg sa kaogmahan nin satong Kagurangnan”?

Sa Proverbio 31,10-31 (sa Enot na Pagbasa), nasusurat an Eshet Chayil, “Maninigong Babae”, saróng tradisyonal na awit sa pagpoón kan Pamanggi sa Sabbath nin mga Judío. Minápoón iní sa linyang “Maninigong babae siisay saiya an makakakua?” Asín minapadagos sa pag-omaw sa saiyang mga virtudes: an saiyang kabootan sa agóm asín kahigosan sa laóg asín luwás nin haróng, karahayan sa mga dukhâ asín pagkatakot sa Kagurangnan.

Para sa dakúl na mga Judío, iní himno nin pag-omaw sa mga ina asín kababaehan, alagad para sa mga Cristiano na binabasa an enterong Banál na Kasuratán susog ki Cristo, dapít man iní sa kun siisay an maninigò sa Kahadean. Sa pagpadagos kan tema kan naenot na Parábola nin mga Abay sa Kasál, dapít man iní sa mga manínigóng virtudes nin mga miembros kan Simbahan, an nobyang banál ni Jesu Cristo.

Kayâ daí ta pagsayangon an mga biyayang tinátaó sato nin Diós sa kahugakan, o sa mababaw na kaogmahan, o sa hayakpit na pansadiring interes lamang. Sabi ni San Pablo sa Roma 14,7-8: “Daíng siisay man na nabubuhay para sa sadiri lamang, daíng siisay man na nagágadán para sa sadiri lamang. Ta, kun kita nabubuhay, para sa Kagurangnan kita nabubuhay; asín kun kita nagágadán, para sa Kagurangnan kita nagágadán; kayâ, mabuhay o magadán, sa Kagurangnan kita.”

…

GIYA SA PAGHIRÁS SA SADÍT NA KOMUNIDAD O PAMILYA • Anó sa saimong time, talent, asín treasure an nagagamit mo na ngonian sa paglingkod sa Kagurangnan asín pagtabang sa kapwa? Arín an daí pa?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

An Parábola kan Sampolong Abay sa Kasál

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Noviembre 12-18, 2023. Basahon an Evangelio gikan sa Mateo 25,1-13 (Ika-32 na Domingo sa Ordinariong Panahón - A).

…

An mensahe kan Parábola kan Sampolong Virgenes o Abay sa kasál, nasusurat sa Mateo 24,42: “Magbantáy asín maghandâ ta daí nindo aram kun noarín an Akì nin Tawo mádatóng”. Alagad tanganing mas masabotan ta pa an mayaman na mga detalye kan parábola, marhay na aramon ta an mga costumbres sa kasál sa kultura kan mga Judío kan panahón ni Jesús.

An kasál sa kultura ninda minapoón sa pagsayod o pamalaye kan nobyo sa haróng kan nobya, na ináapód sa Ingles na betrothal – na mas matimbang kisa sa custombre nin engagement ngonian na panahón, nin huli ta minimidbid na kaidto an nobyo asín nobya bilang mag-agóm na maski daí pa nagsasaroan (siring sa panahón kan Anunciación ki Virgen María asín San José). Iní minatagál nin nagkapirang bulan sagkod saróng taón, asín panahón man na inaandam nin nobyo an magigin estaran nindang mag-agóm asín magigin pamilya.

Dangan sa talaan na panahón, mahalè an nobyo sa saiyang haróng, o sa haróng kan saiyang amâ, para sundoón an saiyang esposa, siring sa nasusurat sa Genesis 2,24: “Kayâ binabayaan kan lalaki an saiyang amâ asín inâ asín minasarô sa babae, asín nagigi sindang saróng lamán”.

Kadaklan na beses, nababanggihan an pagsundô asín pagdatóng kan mag-agóm sa saindang haróng – kayâ nangangaipo nin mga abay na may daráng lampará o karaba para magtaóng ilaw sa dalan. Pagdatóng kan grupo kan mag-agóm, sinasará an pintoan kan haróng asín minapoón an bangkete na minatagál nin nagkapirang aldaw sagkod saróng semana. Pagsará kan pintoan, daí na ki ibáng bisita na makakalaóg pa.

Sa parábola, an nobyo iyó si Cristo; an nobya iyó an Simbahan; asín an mga abay, kitáng mga disipulos Niya. Boót sabihon: inaagda kita ni Cristo na makisumarò sa Saiyang misyon na darhon an katawohan sa kaogmahan kan bangkete kan Kahadean – bilang mga abay na may daráng ilawan, siring kan tinugon Niya sato sa Mateo 5,14: “Kamo an ilaw nin kinâban”.

An mga madonong o matadóng na abay iyó an mga maimbód na Cristiano, asín an mga mangmang o lolóng na abay iyó an mga masombikal.

Segun ki San Jeronimo, an mga lampará iyó an pagtubód, asín an lana iyó an mga marhay na gibo. Segun man ki San Juan Crisostomo, an lana simboló nin pagkámoót, pagkaherak, asín mga marhay na gibo. Sa Santiago 2,22 nasusurat: “An pagtubód nagtatabang sa mga marhay na gibo, asín sa mga gibo an pagtubód nalúlubós.”

Kayâ magi kitang maimbod sa pagtubód asín sa mga marhay na gibo tanganing danay na magliwanag an satong lampará sa paggiya sa kapwa sa dalan, asín sa pagdatóng nin paghukóm maabtan kitang andam asín maninigò sa Saiyang Kahadean.

An kabôtan ni Cristo, nobyo kan Simbahan, an sunudón ta, asín magtalubò kita sa kadonongan na makúkuá saná Saiya. Sabi sa Kadonongan 6,15: “An paghorop-horop sa kadonongan lubós na katadongan, asín an nagpupuká huli Saiya madalíng magigin matiwasay.”

Herak man sato, kun matapos kitang bonyagán asín apodón na mga Cristiano, nin huli kan satong kamangmangán asín pagkalolóng sa kasâlan, kita lugód an daí makalaóg sa Kahadean. Siring sa parábola, may patanid si Jesús sa Mateo 7,21: “Bakô gabós na nagsasabi Sako, ‘Kagurangnan, Kagurangnan’, makakalaóg sa Kahadean nin langit, kundî an naggigibo kan boót kan Amâ kong yaon sa langit.”

…

GIYA SA PAGHIRÁS SA SADÍT NA KOMUNIDAD O PAMILYA • Sa saimong paghorop-horop, anóng gibong karahayan, pagkamoot, o pagkaherak, an laóg na lana kan saimong lampará ngonian?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Gabós Imbitado sa Bangkete nin Diós

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Octubre 15-21, 2023. Basahon an Evangelio gikan sa Mateo 22,1-14 (Ika-28 Domingo sa Ordinariong Panahon - A).

…

An parábola kan Bangkete sa Kasál may parehong tema asín mga kabtang sa duwáng parábola na sinundán kainí sa Evangelio ni San Mateo: an mga parábola kan Duwáng Magtugang asín kan mga Maraot na Tumatawo. Yaon an plano nin Diós, an pagsikwál kan Saiyang mga pinilì, asín an paghukóm sa hurí.

An Plano nin Diós

Sabi ni San Pablo sa 1 Timoteo 2,4: an Diós “nagmamàwot na an gabós makaligtas, saká makamidbid sa katotoohan”. Sa parábola linaladawan iní kan bangkete sa kasál na may mga naenot na imbitado dangan sinunod imbitarán an gabós na masumpongan sa dalan, an mga marhay saká maraot.

Sa Bàgong Tipan, nagkapirang beses linaladawan an pagkámoót nin Diós siring sa bangkete nin kasál kun saen si Jesu Cristo an nobyo asín an Simbahan an Saiyang nobya. Kayâ nganì sa Efeso 5,25 tinutukdò sa mga agóm na lalaki: “Mga esposo, kamòtan nindo an saindong agóm siring kan pagkámoót ni Cristo sa Simbahan; idinusay Niya an Saiyang buhay para sa Simbahan.”

An padumanan kan Simbahan na kasarô ki Cristo iyó an kapanoan kan Kahadean, an langitnon na bangkete kan mga akì kan Diós. Asín digdi pa saná sa dagâ pinapatanâ na kita kan gracia kainíng langitnon na bangkete sa bangkete kan Eucaristía.

An Pagsikwál kan mga Saiyang mga Pinilì

Siring kan akì na nag-iyó alagad daí nag-utób sa pagsugò kan saiyang amâ asín kan mga maraot na tumatawo sa duwáng naenot na parábola, an mga imbitado daí pig-honra an invitación kan hadè sainda. Mas pinilì ninda kisa sa Kahadean an pagpayaman (umá asín negosyo) o pagmantenér nin kapangyarihan (kayâ kinulgán asín ginadán an mga sinugò kan hadè). Kita man pwedeng magibo an siring na pagsikwál kun pinipilì ta an makasadiring interés asín mga kinâbanon na kaogmahan kisa pagsunod sa kabôtan nin Kagurangnan.

Igwa pa nin saróng pagsikwal sa hadè sa laóg kan parábola: itóng lalaki na daí nakabadò pangkinasál. Maski nagpa-honra siya sa invitación, pinilì niya man giraray an saiyang kabôtan kisa kun anó an maninigò sa Kahadean. Siring iní sa tawong nagsasabi na nagtútubód siya sa Diós alagad naggigibo nin mga bagay na tumang sa kabôtan nin Diós. May patanid dapít kainí si Jesús sa Mateo 7,21: “Bakô gabós na nagkukurahaw Sako, ‘Kagurangnan, Kagurangnan!’, makakalaóg sa Kahadean nin langit kundî itóng mga nag-uutób kan kabôtan kan Sakong Amâ sa langit.”

An Paghukóm nin Diós

Sa parábola, an pagsugò kan hadè sa saiyang hukbô na gadanón an mga paragadan asín suluón an saindang mga banwaan saróng profesía sa maabot na pagsakit kan Israel na kan taón 70 AD sinakyada asín rinompág an Jerusalem asín palibot na mga banwaan kan Imperio Romano. Alagad may mas makuring paghukóm na maabot sa mga minasikwal sa Kagurangnan: an pagtapok paluwas sa Kahadean.

Sabi sa katapusan kan parábola sa Mateo 22,14: “Dakúl an inapód alagad dikit an napilì”. May paghukóm na maabot sa katapusan kan satong buhay sa dagâ asín sa Ikaduwáng Pagdatóng ni Cristo. Alagad bâgo an paghukóm nin Diós sa sato, kita ngûna an enot na mahukóm o mapilì: an akoon an invitación nin Diós pasiring sa Saiyang Kahadean o pilion an sadiri tang kabôtan asín mga kinâbanon na kaogmahan.

Lugód pilion ta an “totoong maninigò asín dapat, an matanos asín nakakaligtas”. Sabi sa awit sa Misa na halè sa Mateo 6,33: “An Kahadean nin Diós enoton ta, siring man an katanosan, asín an gabós idudugang na saná.”

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia na napa-honrahan mo an invitación saimo nin Kagurangnan. Anó an nagin bunga kainí sa saimong buhay?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

Bakô Makatarungan an Kagurangnan?

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Septiembre 24-30, 2023. Basahon an Evangelio gikan sa Mateo 20,1-16a (Ika-25 Domingo sa Ordinariong Panahon - A).

…

Iníng Parábola kan mga Trabahador sa Ubasán makukua saná sa Evangelio ni San Mateo; daí kainí sa ibáng mga Evangelio. Alagad an kaipuhan gayód na tulos ihapót iyó iní: Patas daw o makatarungan an pagpasweldo kan kagsadiri kan ubasán nin pararehong kantidad sa gabós na trabahador, naenot man o nahudyan magtrabaho sa aldaw?

Bàgo ta iyán simbagón, romdomón ta ngûna na iníng parábola – siring kan gabós na mga parábola asín katukdoán ni Jesu Cristo – dapít sa Kahadean nin langit.  

An Diós oróg na marahayon asín matinao.

Iní an pangenot na mensahe kan parábola. Siya an nagtaóng trabaho sa mga daíng trabaho. Según ki Papa San Juan Paulo II sa saiyang surat encyclicál na Laborem Exercens: “An trabaho nagtataong dignidad sa tawo.”

Siring sa kagsadiri kan ubasán na daí nag-oontok sa paghanap pa nin mga trabahador sa bilog na aldaw, an Diós daí nag-oontok sa paghanap kan mga nawáwarâ tanganing darhon sinda sa Saiyang lindong asín tâwan kan dignidad nin pagigin Saiyang mga akì.

An Saiyang gracia tinátaó Niya sa gabós. An satong pagka-makasâlan daí mapugol Saiya na kita kaherakan asin kamòtan. Sabi ni Jesús sa Mateo 5,45: “Parehong pinapasaldangán saká pinapauranan nin Diós an tawong marhay asín maraot, an banál asín an parakasalà.”

An nagtatrabaho dapat sweldohan nin matanos.

Nagkulóg an boót kan mga trabahador na naenot nin huli ta sa saindang paghilíng bakô patas na an nagpagál nin dikít pareho an makúkuá sa mga nagpagál nin dakúl. An saindang punto valido asín tamà kun iní dapít sa derechos nin mga trabahadór. An sweldo asín mga benepisyo dapat maninigò sa halagá nin trinabaho. Kayâ iníng parábola bakô pag-oyon ni Cristo sa pagpasweldo nin kulang sa mga empleyado – huli ta iyan nanggad bakô makatarungan.

Alagad iníng parábola bakô dapít sa kinâbanon na trabaho kundî sa langitnon na trabaho nin kaligtasan nin katawohan. An "sweldo" para sa mga nagsimbag kan pangapodan na magtrabaho sa ubasán bakô aldawan kundî buhay na daing kasagkoran.

Dapít sa graciang iní, nagtukdò si San Pablo sa Efeso 2,8-9: “Huli sa biyayà nin Diós, nakaligtas kamo sa paagi nin pagtubód. Iyán bakóng sadiri nindong gibo kundî regalo nin Diós. Mayò saindong pwedeng maghambog dapít kainí, huli ta bakô iníng bunga kan sadiri nindong gibo.”

Kun siring kainí an mensahe kan parábola, anó an maninigong simbag niato sa pagkamarahayon nin Diós?

Iayon ta an satong kadonongan sa kabôtan nin Diós.

Tinâwan kita nin Diós nin isip asín boót, tanganing pilíon an tamà, marhay, asín matanos. Alagad bakô perpekto an satong kaisipán, bakô pirming matanos an satong kabôtan. An tunay na kadonongan makúkuá sa pag-akò kan kabôtan nin Diós. Nasusurat sa Isaías 55,8-9: “Ta bakô Kong kaisipán an saindong kaisipán, asín bakô nindong paagi an Sakong mga paagi. Olay kan Kagurangnan. Ta siring na halangkaw an langit sa dagâ, halangkaw man an Sakong mga paagi sa saindong mga paagi asín an Sakong kaisipán sa saindong kaisipán.”

Daí maurí sa biyayà na nakamtan nin kapwa.

Kundî makisumarò kita sa saindang kaogmahan nin huli ta iyán tamang gawè nin pagkámoót sa kapwa asín pagmidbid kan pagkamarahayon nin Diós. Daí magluya an pagtubód kun daí pa nag-áabót an hinahagad na biyayà ta an Dios itátaó an pinakamarhay para sato sa tamang panahón.

“Maogmáng maglingkod sa Kagurangnan” (Salmo 100,1).

An paglingkod sa Saiyang ngaran asín pagdará sa kapwa parani Saiya, pribelihiyo asín kaogmahan kan mga ngonian pa saná nasa lindong na kan Saiyang Kahadean.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia na nahapót mo an Diós nin huli ta daí mo nasasabotan an mga nangyayari sa saimong buhay. Anó an nakua mong simbag?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song