Maglaog sa Hayakpit na Pintoan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Agosto 24-30, 2025. Basahon an Evangelio gikan sa Lucas 13,22-30 (Ika-21 Domingo sa Ordinariong Panahón - C).

…

“Kagurangnan, dikít saná an makakaligtas?” May saróng naghapót mantang nagtutukdò an satóng Kagurangnan Jesu Cristo.  An Saiyang simbag: “Mag-igot kamóng makalaóg sa hayakpit na pintoan.” Nakapatugmad iníng sinabi ni Jesús sa plano nin Diós sa katawohan asín an maninigong simbag nin katawohan sa plano nin Diós.

Anó an plano nin Diós para satô? Si San Pablo nagtukdô sa 1 Timoteo 2,4, na an Diós “boót na an gabós na tawo makaligtas asín makaabót sa pagkamidbid kan katotoohan.” Boót Niya na an gabós makaligtas sa kaoripnán nin kasâlan asín kagadanan. Sa Isaías 66,18, may tinaóng profesía an mahál na Diós: “Akó máabót sa pagtipon kan mga nacion saká tataramon; máabót sinda saká mahíhilíng an sakóng kamurawayan.” Sabi pa ni Jesús sa Lucas 13,29: “Máarabót an mga tawo halè sa sirangan saká sulnopan, halè sa amihan saká sa habagat, asín maturukaw sa Kahadean nin Diós.”

Kun an kaligtasan tinátaó nin Diós sa gabós, natà may hayakpit pang pintoan? An paglaóg sa hayakpit na agihan iyó an pag-ayon ta sa plano nin Diós.

Enot, dapít iní ki Jesu Cristo, an solamenteng Paraligtas kan kinâban.

Sabi Niya sa Juán 10,9: “Akó an pintoan; huli Sakô an maglaóg makakaligtas.” Dangan sa Juán 14,6: “Akó an dalan, an katotoohan, asín an buhay. Mayò nin makakadolok sa Amâ kundî huli Sakuyà.”

Anó an maninigong simbag ta ki Cristo na Diós na nanitawo sa pagligtas satô? Sa Juán 6, sa katapusan kan Saiyang pagtukdô dapít sa Saiyang sadiri bilang Tinapay nin Buhay, dakúl an mga nagharalè ta dipisil daá an Saiyang katukdoán. Kan hinapót ni Jesús an mga disipulos kun sinda maharalè man, nagsimbag si San Pedro sa Juán 6,68: “Sa kiísay pa kamí maduman, Kagurangnan? Yaon Saimo an mga tataramon nin buhay na daíng kasagkoran.” Lugód siring ki San Pedro an panindogan ta, asín bakô sa tataramon saná kundî sa gibo man.

Ikaduwá, dapít iní sa disiplina nin dayupot na pagpilì sa kabôtan nin Diós oróg sa gabós na bagay.

Sabi ni Jesús sa Mateo 19,24: “Pasil pa sa kamelyo maglusót sa matá nin dagom kisa sa mayaman maglaóg sa Kahadean nin Diós.” Hayakpit an pintoan kayâ kaipohan an disiplina (an paagi nin pagigin disipulo) na anoman na nakakaoláng sa buhay na daíng kasagkoran, bayaan; anoman na nakakapagabát, haleon; asín anoman na kasâlan, pondohón. May pagiromdom satô sa Hebreo 12,11: “An gabós na disiplina sa panahón kaiyán garó bakô para sa kaogmahan, kundî para sa kamundoan: alagad, pakatapos, nagbábalós kan matoninong na bunga nin kasuripotan sa mga pinatoód kaiyán.”

Ikatoló, dapít iní sa katapusan kan satóng buhay asín nin panahón.

Nin huli ta an pintoan bakô sanáng hayakpit kundî máabót an panahón na másará iní sa mga daí pa naglaóg digdi. Kayâ pilíon ta si Cristo asín maglakáw kitá sa Saiyang dalan, ngonian na! Bakô sa aga na, o kun nuarín saná conveniente, o kun magretiro na sa trabaho, o kun tapos na an mga kasibotan.

Daí man lugód mangyari na sa satóng pagpasipara sa pangapodan nin Diós, masarhan kitá kan pintoan asín daí na makalaóg sa Saiyang Kahadean. Kayâ sunodón ta an hulit sa Hebreo 3,15: “Kun ngonian mádangóg nindo an Saiyang tingog, haré pagpatagasá an saindong pusò.”

…

GIYA SA PAGHIRÁS | Maghirás nin experiencia kan saimong paglaóg sa hayakpit na pintoan. Anó an mga nagin bunga sa paggibo mo kaiyán? | GIYA SA PAGHIRÔ | Bilang saróng komunidad/pamilya, anóng particulár na “hayakpit na pintoan” an kaipohan tang sarabáy na agihan ngonian?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

Simbahan na Nagmimisyon

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Julio 6-12, 2025. Basahon an Evangelio gikan sa Lucas 10,1-12,17-20 (Ika-14 Domingo sa Ordinariong Panahon - C).

…

An istorya kan pagsugò kan satóng Kagurangnan Jesu Cristo sa 72 na disipulos na magmisyon makúkuá saná sa Evangelio ni San Lucas, asín nakaomagid sa istorya kan pagtugon nin Diós ki Moisés, sa Mga Bilang 11, na magpilì nin 70 pamayó na hihirasán kan saiyang misyon na darhon an banwaan Israel pasiring sa Dagáng Panugâ.

Sarô pang kahulugán kainí makúkuá sa paagi kan tradisyon nin mga Judío sa numerología o pagtaóng kahulugán sa mga numero. Halimbawà, an 7 banál na numero nin Kagurangnan, asín an 12 tandâ kan banwaan Israel na may doceng tribu. Kun idagdag sa 72 an 12 apostoles, magigin 84 o pitóng docenang disipulos. Boót sabihon: iníng banál na misyon tinátaó ni Jesús bakô saná sa sadít na grupo nin mga pinilì kundî sa gabós na kabilang sa Banwaan nin Diós.

An lambang sarô satô ináapód ni Jesús bakô saná sa pagsimba kundî sa pagigin Simbahan na nagmimisyon. Mahalagá an pagsimba lalò na kun Domingo nin huli ta iní an “burabod asín kaitaasan nin búhay Cristiano.” Alagad an katuyohán kan satóng pagsimba iyó na kitá mabasóg asín mapakusóg sa misyon, asín ihirás sa kapwa an gracia nin Diós na nákua ta sa Santa Misa.

An istorya sa Evangelio nagtátaó man nin mga giya kun pâno ta gigibohon iníng misyon.

An satóng misyon pakihirás niatò sa misyon ni Cristo.

Pinônan ni Jesús an pagsubol sa misyon sa pagpamîbî na hagadon sa kagsadiri nin ani an dakúl pang mga paraaní. Kitá mga katabang saná sa dakulang anihán nin Diós. Kayâ kun kitá nakikihirás sa misyon ni Cristo mahihimò ta an gabós, kun bakô man tulos, sa ngapit na panahón. Sabi nganì ni San Pablo sa Filipos 4,13: “Gabós kaya ko sa Saiya na nagpapakusóg sakô.”

Binoót nin Diós na may mga kaibahan kitá sa dalan.

Pinadará ni Jesús an 72 na manduwá-duwá, bilang pagiromdom na bakóng solong esfuerzo an misyon kundî tinatâwan kitá nin mga pag-iriba sa pagbaklay. Sinda an mga nagtatabang satô na magin maimbod sa misyon asín magtalubò sa pagtubód, paglaom, asín pagkámoot. Asín kun sa pagmisyon, marayô kitá sa mga mahál sa buhay, daí man giraray kitá masolo: kaiba ta si Jesús, na nanugâ satô sa Mateo 28,20: “Uyá, kaiba nindo Akó gabós na aldaw, sagkod sa katapusan nin kinâban.”

Iníng misyon naghahagad nin pagdusay kan bilog tang isip, pusò, asín boót.

Tinugon man sinda ni Jesús na dai magdará nin kadakul na gamit, ni makipagparakahuron sa dalan, kundî na paorogón sa gabós an misyon. Anoman na nakakaoláng iwalat, anoman na nakakatabang akóon. Daí magpilì kun saén mas marhay an estaran, kakanon, o donasyon; an mahalagá iyó an misyon. Sa pagbaklay asín pagtukdò, sa pagbulóng asín pagpalayas nin mga demonio, gibohon an mga iní susog sa misyon na ipahayag an pagdatóng kan Kahadean.

An kaogmahan sa misyon balaog nin Kagurangnan.

Nag-urulî an mga disipulos na maogma nin huli kan saindang experiencia sa misyon. Sabi sa Psalmo 100,2: “Maogmang maglingkod sa Kagurangnan!” Minsan siring, pigtamà ni Jesús an saindang pakasabot dapít sa tunay na kaogmahan: bakô nin huli ta an mga espiritu nagpapasakop saindo, “kundî na an saindong mga ngaran nasusurat sa langit.” An Diós asín an Saiyang Kahadean an ginigikanan kan satóng kaogmahan.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kun pâno mo nasasabuhay asín nahihirás sa kapwa an gracia na nakukua mo sa pagsimba asín sa saimong SAKOP.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Bagong Tugon nin Pagkamoot

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Mayo 18-24, 2025. Basahon an Evangelio gikan sa Juán 13,31-35 (Ikalimáng Domingo kan Pasko kan Pagkabuhay-Liwát - C).

…

Sa Evangelio nagtukdô an satóng Kagurangnan Jesu Cristo sa mga disipulos: “Bâgong tugon itinátaó Ko saindo: magkaminorootan kamó; siring na namòtan ko kamó, kamó man magkaminorootan” (Juán 13,34).

Anó an bâgo sa tugon na iní? Dati na man kitáng pigtugon na magkaminorootan. Sa Mateo 7,12, tinukdô ni Jesús: “Gibohon nindo sa ibá an boót nindong gibohon ninda saindo. Iní an kahulugán kan Katugonán ni Moises asín mga katukdoán nin mga profetas.”

Iní an pig-áapód na “bulawan na tugon” (golden rule). Maski sa ibáng mga relihiyon asín kultura, may nasusurat man na siring na kadonongan. Patunay lamang iní na inaakò nin kadaklan an kaisipan na kun kitá nganì mâwot an karahayan kan satóng sadiri, maninigò lamang na respetohon ta man an satóng kapwa. Iyó man iní an sinasabi sa ikaduwá sa Pinakadakulang Tugon. Sabi ni Jesús sa Marcos 12,31: “Kamòtan mo an saimong kapwa arog kan pagkamóot mo sa saimo man saná.”

Alagad kun an sadiri ta saná an patugmadan nin pagkámoot asín hustisya, pwede iníng magbalík sa ináapód na “lex talionis” (law of the talon) nin Lumang Tipan. Susog sa Levitico 24,19-21: “An siísay man na makákulóg sa saiyang kapwa, kukulogán man siring kan ginibo niyá. Kun nakabarì siyá nin tôlang, babarían man siyá nin tôlang, matá sa matá, ngipon sa ngipon.  An ginibo niyá sa saiyang kapwa, iyó man an gigibohon saiya. An siísay man na magbunô nin hayop na bakô man saiya, mabayad kaiyán. An siísay man na maggadán nin tawo, gagadanón man.”

An bâgong tugon ni Jesús oróg sa mga naenot na tugon nin huli ta bakô na an sadiri an patugmadan asín sukulán kun anó an tamang pagkámoot sa kapwa, kundî an satóng Kagurangnan na mismo. Kayâ mámoot kitá siring na kitá namòtan Niyá. Pâno ipinahilíng asín itinukdô satô ni Jesús an Saiyang pagkamóot?

Maenot na mámoot.

Sabi ni San Pablo sa Roma 5,8: “Ipinahilíng nin Diós an Saiyang dakulang pagkámoot satô kan si Jesús nagadán para satô kan kitá mga parakasalà pa.”  Bâgo ta Siyá namidbidan, namòtan na Niyá kitá. Bâgo ta Siyá pinilì, pinilì na Niyá kitá.

Kamòtan an kaiwal.

Sa Mateo 5,44, tinukdô ni Jesús: “kamòtan nindo an saindong kaiwal, asín ipamîbî nindo an mga nagpapasakit saindo.” Nagsaksi Siyá kainí hanggang sa hurí, mantang naghihingagdan sa cruz, hinagad Niyá sa Amâ na patawadon an Saiyang mga paragadan asín an mga nag-oológ-olog Saiya.

Magpatawad sa nagkasalà.

Kan si San Pedro naghapót kun piráng beses dapat na patawadon an tugang na nagkasalà, sinimbag siyá ni Jesús sa Mateo 18,22: “Bakóng pitóng beses, kundî pitóng polò may pitóng beses.” Dangan tinukdoán Niyá kitáng mangadyè sa Amâ na patawadon kitá sa satóng mga kasâlan siring na pinapatawad niatò an mga nagkakasalà satuyà.

Idusay an sadiring búhay. 

Sa Marcos 10,45, sinabi man ni Jesús sa mga disipulos: “An Akì nin Tawo daí nagdigdi tanganing paglingkodán kundî tanganing maglingkod asín magdusay kan búhay Niyá tanganing matubós an dakúl na tawo.” An sukulán nin pagigin dakulà asín enot sa gabós, bakô an pagkapót nin kapangyarihan o pagpayaman sa sadiri, kundî an mapakumbabáng paglingkod, pag-enot sa karahayan nin kapwa, asín pagdusay kan sadiri.

Sa Kapahayagán 21,5, nagsabi an Kagurangnan: “Uya, ginigibo Kong bâgo an gabos.” An pag-utób sa bâgong tugon Niyá an dalan pasiring sa bâgong langit asín dagâ.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás kun pâno an satóng pagkamóot nakakabaing sa pagkamóot ni Jesús, o kun pâno kaipuhan ta pang magtalubò tanganing magin siring Saiya.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Inaapod Kita ni Jesus

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Febrero 9-15, 2025. Basahon an Evangelio gikan sa Lucas 5,1-11 (Ikalimáng Domingo sa Ordinariong Panahón - C).

…

An istorya sa Evangelio na pag-apód ni Jesús sa mga enot na disipulos, yaon sa tolóng Evangelio Sinoptico (Mateo, Marcos, asín Lucas). Sa versión na iní ni San Lucas daí naonabehan si Andres. Sa Evangelio ni San Juán, ibá an istorya: si Juán Bautista an nagturô sa saiyang mga disipulos ki Jesús, an “Cordero kan Diós,” asín si Andres an nagpamidbid ki Jesús sa tugang niyáng si Pedro. An pag-apód sa mga enot na disipulos tandâ na importanteng parte kan plano nin Diós sa kaligtasan nin katawohan an pagmuknâ kan komunidad nin mga disipulos ni Cristo. Pinapahayag man kan istoryang iní an duwáng kabtang kan misterio nin pagtubód: na iní gibo nin Diós asín simbag nin tawo.

Gibo nin Diós.

An pagtubód bakô siring sa paglukso sa diklom, kundî an Diós mismo an enot na nagtátaóng pruweba kan Saiyang pagkamarahayon asín pagkamoot.  Alagad anó man na biyayà asín karahayan na tinátaó Niyá, patanâ saná sa mas darakulà pang biyayà na máabót asín boót Niyáng itaó satuyà.  Kaya inaapód Niyá kitá sa mas hararom na pakisumarò Saiya asín paghirás sa misyon nin pagbalangibog kan Marhay na Baretà.

Iní an nangyarì kan inapód ni Jesús an Saiyang mga enot na disipulos. Pagkatapos na magdangóg sinda kan pagtukdô ni Jesús sa katawohan, daí ninda honaon na gigibohon para sainda an milagro nin dakulang dakóp nin mga sirâ. Alagad dakúl asín mas darakulà pang milagro an masasaksihan ninda kan pinilì nindang bayaan an gabós asín magsunód ki Jesús.

Simbag nin Tawo.

Anó man an maninigong simbag niatò sa biyayà nin pagtubód? An mga enot na disipulos nagtaóng halimbawà nin tamang pagsimbag sa Diós.

Magsarig sa Diós. Si Jesús an may gibo kan milagro nin dakulang dakóp nin mga sirâ, alagad iní nangyari huli kan pagsarig Saiya ni Simón Pedro. Sabi niyá: “Kagurangnan, bilog na banggi nin pagpagál mayò kamíng nákua; alagad sa tataramon Mo, itutunton ko an hikót.”

Sabi sa Jeremías 17,7-8, “Paladan an tawo na nagtitiwalà sa Kagurangnan, siring siyá sa kahoy na itinanóm sa may tubig, na an gamót nagkákanáp sagkod sa sapà.” Paladan kitá kun nahihiling niatò an mga gibong herak asín pagkamoot nin Diós sa satóng buhay. Alagad an tawo na daí tataó magsarig sa Diós, asín linilingawán an Saiyang kabôtan sa pagsunód sa tentación nin hidalíng kaogmahan, rinárayô an sadiri sa burabod nin biyayà.

Magpakumbabâ kan sadiri. Kan masaksihán ni Simón Pedro an milagro, tulos siyáng nagsabi: “Humarayô Ka sakô, huli ta ako parakasalà, Kagurangnan.” Bakô na sinisikwal niyá si Jesús, kundî náhilíng niyá an saiyang bakóng-pagkamaninigò sa Saiyang atubang. Siring iní sa mga istorya nin pag-apód kan mga profetas sa Lumang Tipan, na enot nagsasayuma sa Kagurangnan, alagad bakô sa pagsikwal Saiya kundî huli sa saindang kapakumbabaan.

An Diós naoogma sa mapakumbabâ, alagad an mga matanos sa sadiring paghonà, daíng pagkaherak na makukua ta sarado an saindang pusò. Sabi ni Jesús sa Lucas 5,32: “Daí Akó nagdigdi sa pag-apód kan mga mayong-salà, kundî kan mga parakasalà para magbaklî.”

Magparticipár sa misyon. Sa pag-apód ni Jesús ki Simón Pedro sinabi Niyá: “Daí ka matakot; poón ngonian mga tawo na an saimong pagdádakopón.” Asín bâgo Siyá sumakát sa langit, sa Mateo 28,19-20, sinugò Niyá an mga disipulos sa parehong misyon: “Lakáw kamó, gibohang disipulos an gabós na nación!” An tandâ kan satóng pagigin disipulo ni Cristo iyó an pakisumarò niatò Saiya asín paghirás kan biyayà na tinaó Niyá satô. Iní an Marhay na Baretà na pinapabalangibog satô tanganing dakúl pa an magtubód Saiya asín mag-akò kan kapanoan nin buhay sa Saiyang Kahadean.

...

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin pagkamarahayon saimo nin Diós asín kun saén ka Niyá inaapód na magmisyon.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

An Kahadean nin Langit siring sa Balo

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Noviembre 10-16, 2024. Basahon an Evangelio gikan sa Marcos 12,38-44 (Ika-32 Domingo sa Ordinariong Panahon - B).

…

An Kahadean nin langit siring sa saróng dukhang balong babae na nagdolot sa Templo nin sensilyo na may pinakahababáng halagá. Iní gayód an boót itukdô kan satong Kagurangnan Jesu Cristo, na kan sinda nasa Templo, itinurô Niyá sa mga disipulos an saróng balo asín nagsabi: “An dukhang balong iní naghulog nin oróg kadakulà kisa gabós na naghulog sa sarayán-yaman: ta an gabós nag-ambag kan labí ninda; alagad iní, sa saiyang katikapohan, an gabós na yaon Saiya inambag, an bilog niyáng ikabubuhay” (Marcos 12,43-44).

Kaidtong panahón an mga babaeng balo kaiba sa mga pinakadukhâ sa sociedád, nin huli ta daí sinda pwede magsadiri nin anoman na propriedád. Mas lalò kun sinda dati nang dukhâ asín may mga akì pang papadakulaon. Kayâ sa libro kan mga Gibo kan mga Apostoles, nasusurat na an suanoy na Simbahan nagtatabang sa mga balo asín mga ilo.

An extraordinariong gibo kaidtong balo – na kinumpará sa mga mayaman na nagtaó saná kan saindang sobra, asín sa mga escribas na mapaabaw-abaw, parasagin-sagin, asín parasamsam pa kan pagsadiri nin mga dukhâ – nagpapahayag na siya ladawan nin saróng tunay na disipulo, siring man ni Cristo mismo, asín kan Diós Amâ. 

Ladawan nin tunay na disipulo ni Cristo.

An pinahilíng kan babaeng balo na dakulang pagsarig sa Diós na kagtaó kan saiyang mga pangangaipo, tandâ nin saróng tunay na disipulo. Kun kitá may pagsarig sa Diós, gigibohon ta an tamà asín an susog sa Saiyang kabôtan maski magdulot iní satô nin kadipisilan asín kasakitan.

Sa 1 Hade 17 may istorya nin sarô man na balong babae sa Sarefta (banwa sa luwas kan teritorio kan Israel) sa panahón nin makuring taggutom, na hinirasán si profeta Elías kan huríng tinapay na kakaonon na kutâ niyá asín kan saiyang akì, dangan mahalat na saná sindang magadán sa rutoy. Alagad dakulang milagro an nangyarì sainda huli sa profeta: “an koron nin arina daí naubosan, an daod nin lana daí nahubasán” sagkod na matapos an panahón nin taggutom. An pagtubód niyá sa Diós asín sa profetang Saiyang sinugò an nagligtas sainda.

Ladawan ni Jesu Cristo.

Nakakabaíng man an pagdolot kan balo sa pagpakadaí sa sadiri ni Jesús bilang Diós na nanitawo sagkod sa Saiyang Pasión. Susog sa Hebreo 9,26: inatang Niyá an sadiring búhay “sa pagsikwal kan kasâlan sagkod lamang huli kan Saiyang sacrificio”. Tinurô Niyá sa saiyang mga disipulos an pagsaksi kan babaeng balo na sa saiyang kadaihan tinaó pa an gabós na kaipuhan niyá tanganing mabúhay. Maabot man an panahón na si Jesús mátaó nin siring na pagsaksi, asín mas oróg pa, sa pagdusay kan Saiyang búhay sa cruz tanganing maligtas an gabós.

Ladawan kan Diós Amâ.

Siring sa babaeng balo, tinaó man kan Diós Amâ an pinakamahalagá Saiya, an Saiyang pinakanamomòtan, bilang sacrificio para sa kaligtasan nin kinâban. Sa Juán 3,16 nasusurat: “Ta siring namòtan kan Diós an kinâban: an bogtong na Akì itinaó, tanganing an gabós na nagtútubód Saiya daí máwarâ, kundî magkaigwa nin búhay na daíng kasagkoran.”

An babaeng balo sa Evangelio padagos na nagsasaksi para sa Kahadean nin langit, lalò na sa panahón ngonian na an natatangadan asín inoomaw nin kadakul iyó an mga nag-aabuso sa kapangyarihan asín mga nagpayaman halè sa korupsyon asín hinâbasan. Pilíon ta na magin siring saiya tanganing mapasatô man an bendición na sinabi ni Jesús sa Mateo 5,3: “Paladan an mga dukhâ sa espiritu, ta sainda an Kahadean nin langit.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin pagsarig sa Diós asín pagsunód sa Saiyang kabôtan maski nagdulot nin kadipisilan o daí pagkasinabotan.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Nakahiling asin Suminunod Saiya sa Dalan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Octubre 27-Noviembre 2, 2024. Basahon an Evangelio gikan sa Marcos 10,46-52 (Ika-30 Domingo sa Ordinariong Panahon - B).

…

Sa Evangelio ni San Marcos, an istorya kan pagbulóng ki Bartimeo, saróng lalaking butá sa Jerico, iyó an huríng milagro kan satóng Kagurangnan Jesu Cristo sa dalan, sa paglakbay Niya asín mga disipulos, pasiring sa Jerusalem.

An pakaistorya kainí panô nin mga simbolo kun pâno magin disipulo ni Jesús. Kasunód iní kan mga istorya kan lalaking mayaman na naghapót kun pâno makamtan an buhay na daíng kasagkoran (Marcos 10,17-31) asín kan paghagad ni Santiago asín Juán kan pabór na sindang magtugang magtukaw sa kataed Niyá sa kamurawayan, an sarô sa too asín an sarô sa walá (Marcos 10,35-45).

Sa naenot na duwáng istorya, pigtamà ni Jesús an mga saláng pakasabot nin mga tawo, patín nin Saiyang mga disipulos mismo, dapít sa Kahadean asín sa pagigin disipulo Niyá. Sa istorya kan pagbulóng ki Bartimeo, tinutukdò satô an dalan nin tamang pagsunód ki Cristo: inapód asín naherakan, kayâ nagsunód asín nagmisyon.

Si Bartimeo an ladawan kan pagkaherak nin Diós sa katawohan.

Enot, pigmidbid niyá si Jesús bilang saiyang tagapagligtas. Sa pagkurahaw niya nin “Jesús, akì ni Davíd, kaheraki akó!”, pigmidbid niyá si Jesús bilang Mesías, an pinanugáng tagapagligtas kan Israel. Sa Evangelio ni San Marcos, pwera sa mga demonio, si Bartimeo an suminunód ki San Pedro sa pagmidbid kainí ki Jesús sa publico.

Ikaduwá, kan inapód siya ni Jesús, tulos siyang nagluksó sa pagraní, asín binayaan an alikboy – tandà kan pagtalikód sa lumang pagkatawo asín pag-akò kan Evangelio. Iní an danay na mensahe ni Jesus sa paglibot Niya sa lambang ciudad, banwaan, asin barrio, na nasusurat sa Marcos 1,15: “Magbaklê kamó asín magtubód sa Evangelio.” Ikatoló, kan nakáhilíng na siyá, sinabi na “tulos suminunód Saiya sa dalan”, boót sabihon, si Bartimeo nagin disipulo ni Cristo.

Si Jesu Cristo an satóng pangarogan sa pagmisyon.

Sa Marcos 16,15 tinaó ni Jesús an tugon sa pagmisyon: “Lakáw kamó sa bilog na kinâban, iharubay nindo an Evangelio sa gabós na linaláng.” An Saiyang mga tataramon asín gibo an satong pangarogan kun pâno darhon an Marhay na Baretà sa gabós na tawo.

Enot, dinangóg Niya an kurahaw ni Bartimeo. Mantang an mga nasa palibot boót pasilensyohon iníng butá, si Jesús tinâwan siyá nin pagpahalagá. Iní man an mensahe ni Papa Francisco sa Sinodo nin Sinodalidád: na kitá magin Simbahan na nagdádangóg sa agrangay nin katawohan oróg na nin mga dukhâ asín mga nasa gilid kan sociedád. Kan nakaagi pa sanáng bagyo, maogmang maaraman an kadakul na mga parokya na nagbukas nin pintoan para sa mga evacuees asín an mga manlaen-laen na grupong hanggang ngonian padagos na nagtatabang sa mga naapektohan kan bagyo asín bahâ.

Ikaduwá, ginibò Niyá na an butá makáhilíng giraray. Bakô man kitá gabós may kakayahán magbulóng sa mga butá, pero an lambang Cristiano may misyon na darhon an katotoohan kan Evangelio ni Cristo lalò na sa mga nabubuta nin kaputikan asín panlalansé, asín sobrang ambisyon sa kayamanan asín kapangyarihan. Kaiba kaini an pagbusol sa paninimbagan (accountability) kan mga nagkakapot nin poder, asín mga namamahalà kan pondo kan banwaan asín mga proyekto kan gobyerno.

Ikatoló, uminibá Saiya si Bartimeo sa dalan. Madádará ta an kapwa pasiring ki Cristo kun kitá man nahíhilíng na naglalakaw sa Saiyang dalan, kun an satóng mga gibo asín enterong buhay nagsasaksi sa satóng Kagurangnan.

…

GIYA SA PAGHIRÁS SA SADÍT NA KOMUNIDAD O PAMILYA | Kaining nakaaging bagyo, maghirás kun pâno nagin marahayon saimo an Kagurangnan, o kun pâno ka man nakahirás sa kapwa kan pagkamarahayon nin Diós.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Bakong Arog Kaiyan an Dapat Saindo

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Octubre 20-26, 2024. Basahon an Evangelio gikan sa Marcos 10,35-45 (Ika-29 Domingo sa Ordinariong Panahón - B).

…

Sa Evangelio nagdolok an magtugang na Santiago asín Juán sa satong Kagurangnan Jesu Cristo tanganing hagadon na pag-abót Niya sa kamurawayan, sindang duwá magtukaw sa kataed Niya, an sarô sa tóo, asín sarô sa walá. Boót sabihon na sindang magtugang an magin pinakaoróg sa gabós na mga disipulos. Kan maaraman iní kan mga pag-iriba sa Doce, nagkadaragit sinda sa duwá.

An Gawè nin Kinâban.

An sitwasyon na iní ginibo ni Jesús na patugmadan sa pagtukdô sainda kun anó an mahalagá sa Kahadean, na ibá sa gawè nin kinâban. Tinugon Niyá sinda na daí mag-arog sa mga pamayó kan mga pagano na naghahadê-hadean asín dinadaóg-daog an mga nasasakopan ninda, sa saláng paghonà na an kadakulaan nasa kapangyarihan.

Napapanahón ngonian an pagiromdóm na iní. Lalò na ta dakúl na mga pamayó kan satóng banwaan an garó na mga hadè-hadè sa mga tawong dapat kutâ nindang piglilingkodán; ginigibong normál na an korupsyón asín pag-abuso sa kapangyarihan; ginagamit an batás asín mga ahensya kan gobyerno para haleon an mga kalaban sa pulitika; asín sinasadiri an mga ayuda halè sa gobyerno para bakalón an boót nin mga botante.

Kayâ sa panahón nin eleksyon, marhay gibohon na panukol asín panimbang an mga Tugon nin Diós kun siisay an maninigong botohan. Siisay daw sa mga kandidato an mapasár maski na saná sa tolóng Tugon na mga iní? Daí ka manggadán, o magsuporta sa mga paragadan, o pugolan na makamít an hustisya para sa mga ginaradán. Daí ka maghâbon, o makinabang sa hinâbasan lalò na kun halè sa kabán nin banwaan. Daí ka magsaksing-putik laban sa kapwa, o magpalakóp nin disinformación, kaputikan, asín panlalansé.

An Gawè kan Kahadean.

Sa Marcos 10,43-44, si Jesús nagtukdô sa Saiyang mga disipulos: “Bakóng arog kaiyán an dapat mangyari saindo, kundî an boót magin dakulà sa saindo, magigi nindong paralingkod, asín an boót magin enot sa saindo, magigin oripon nin gabós.” An gawè kan Kahadean nin Diós iyó na an kadakulaan nasa paglingkod na bakóng makasadiri.

An tunay na paglingkod mapakumbabâ. An pagpakumbabâ bakô pagmenos kan sadiring kakayahan – kaluyahan iyán nin boót. An pagpakumbabâ bakô pag-silencio o daí pagsuróg kun may inaapi o napapabayaan – pagigin cobarde saná iyán. Kundî an pagpakumbabâ iyó an pag-enot kan karahayan kan kapwa kisa sadiri. An pagpakumbabâ pagpapakatotoo sa sadiri nin huli ta kita linaláng nin Diós sa pagkamoot, asín an totoong namomoot inienot an namomòtan kisa sadiri.

An tunay na paglingkod nagdudusay kan sadiri – siring kan pagsaksi ni Jesús tanganing magin pangarogan kan Saiyang mga disipulos sa gabós na panahón. Sa Marcos 10,45, sinabi Niyá: “An Akì nin Tawo daí nagdigdi tanganing paglingkodan, kundi tanganing maglingkod asín idusay an buhay Niyáng pantubós sa dakúl.”

Sa hurí, an satong mga desisyon sa buhay, sa pulitika man o sa ibá pang mga aspeto, minapahilíng kun arín na gawè an satong pinapaoróg – an sa kinâban o an sa Kahadean nin Diós. Sabi pa ni Jesús sa Mateo 6,33: “An Kahadean nin Diós enoton ta, siring man an Saiyang katanosan, asín an gabós idudugang na saná.” Kayâ bâgo pa kitá magpilì kun siisay sa mga kandidato an tunay na mga pamayóng-lingkod, pilíon ta ngûna na magtalubò kitá na magin siring sa satong Kagurangnan na nagpakumbabâ, naglingkod, asín nagdusay kan sadiri.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin ehemplo nin mga tawong nagin marhay na pamayóng-lingkod, o personál na experiencia nin paggibo nin gawè nin sarong pamayóng-lingkod.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Parábola kan Sampolong Abay sa Kasál

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Noviembre 12-18, 2023. Basahon an Evangelio gikan sa Mateo 25,1-13 (Ika-32 na Domingo sa Ordinariong Panahón - A).

…

An mensahe kan Parábola kan Sampolong Virgenes o Abay sa kasál, nasusurat sa Mateo 24,42: “Magbantáy asín maghandâ ta daí nindo aram kun noarín an Akì nin Tawo mádatóng”. Alagad tanganing mas masabotan ta pa an mayaman na mga detalye kan parábola, marhay na aramon ta an mga costumbres sa kasál sa kultura kan mga Judío kan panahón ni Jesús.

An kasál sa kultura ninda minapoón sa pagsayod o pamalaye kan nobyo sa haróng kan nobya, na ináapód sa Ingles na betrothal – na mas matimbang kisa sa custombre nin engagement ngonian na panahón, nin huli ta minimidbid na kaidto an nobyo asín nobya bilang mag-agóm na maski daí pa nagsasaroan (siring sa panahón kan Anunciación ki Virgen María asín San José). Iní minatagál nin nagkapirang bulan sagkod saróng taón, asín panahón man na inaandam nin nobyo an magigin estaran nindang mag-agóm asín magigin pamilya.

Dangan sa talaan na panahón, mahalè an nobyo sa saiyang haróng, o sa haróng kan saiyang amâ, para sundoón an saiyang esposa, siring sa nasusurat sa Genesis 2,24: “Kayâ binabayaan kan lalaki an saiyang amâ asín inâ asín minasarô sa babae, asín nagigi sindang saróng lamán”.

Kadaklan na beses, nababanggihan an pagsundô asín pagdatóng kan mag-agóm sa saindang haróng – kayâ nangangaipo nin mga abay na may daráng lampará o karaba para magtaóng ilaw sa dalan. Pagdatóng kan grupo kan mag-agóm, sinasará an pintoan kan haróng asín minapoón an bangkete na minatagál nin nagkapirang aldaw sagkod saróng semana. Pagsará kan pintoan, daí na ki ibáng bisita na makakalaóg pa.

Sa parábola, an nobyo iyó si Cristo; an nobya iyó an Simbahan; asín an mga abay, kitáng mga disipulos Niya. Boót sabihon: inaagda kita ni Cristo na makisumarò sa Saiyang misyon na darhon an katawohan sa kaogmahan kan bangkete kan Kahadean – bilang mga abay na may daráng ilawan, siring kan tinugon Niya sato sa Mateo 5,14: “Kamo an ilaw nin kinâban”.

An mga madonong o matadóng na abay iyó an mga maimbód na Cristiano, asín an mga mangmang o lolóng na abay iyó an mga masombikal.

Segun ki San Jeronimo, an mga lampará iyó an pagtubód, asín an lana iyó an mga marhay na gibo. Segun man ki San Juan Crisostomo, an lana simboló nin pagkámoót, pagkaherak, asín mga marhay na gibo. Sa Santiago 2,22 nasusurat: “An pagtubód nagtatabang sa mga marhay na gibo, asín sa mga gibo an pagtubód nalúlubós.”

Kayâ magi kitang maimbod sa pagtubód asín sa mga marhay na gibo tanganing danay na magliwanag an satong lampará sa paggiya sa kapwa sa dalan, asín sa pagdatóng nin paghukóm maabtan kitang andam asín maninigò sa Saiyang Kahadean.

An kabôtan ni Cristo, nobyo kan Simbahan, an sunudón ta, asín magtalubò kita sa kadonongan na makúkuá saná Saiya. Sabi sa Kadonongan 6,15: “An paghorop-horop sa kadonongan lubós na katadongan, asín an nagpupuká huli Saiya madalíng magigin matiwasay.”

Herak man sato, kun matapos kitang bonyagán asín apodón na mga Cristiano, nin huli kan satong kamangmangán asín pagkalolóng sa kasâlan, kita lugód an daí makalaóg sa Kahadean. Siring sa parábola, may patanid si Jesús sa Mateo 7,21: “Bakô gabós na nagsasabi Sako, ‘Kagurangnan, Kagurangnan’, makakalaóg sa Kahadean nin langit, kundî an naggigibo kan boót kan Amâ kong yaon sa langit.”

…

GIYA SA PAGHIRÁS SA SADÍT NA KOMUNIDAD O PAMILYA • Sa saimong paghorop-horop, anóng gibong karahayan, pagkamoot, o pagkaherak, an laóg na lana kan saimong lampará ngonian?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Para sa mga Nagluluya an Pagtubód

Giya sa Prayer-Meeting nin mga Saradít na Komunidád nin Pagtubód (SAKOP) para sa semana kan Agosto 13-19, 2023. Basahon an Evangelio gikan sa Mateo 14,22-33 (Ika-19 Domingo sa Ordinariong Panahón).

…

Anó an mensahe sato kan istorya sa Evangelio kan paglakáw ni Jesús sa ibabaw nin tubig asín pagpatoninong sa doros? An istoryang iní nakagamót sa istorya kan paglaláng sa kapinônan kan panahón. Susog sa Genesis 1,2, an kinâban kaidto “mayò nin anó man na porma saká laóg. An nag-aalimbukay na kadagatan na minatahob kainí napápatós nin kadikloman”.

An paglaláng bakô saná paggibo nin mga bàgong bagay kundî paghusay kan kinâban halè sa karâtan (an apód kainí sa Griego “kaos”) pasiring sa tamang ordén kainí (sa Griego “kosmos”). Nagpapadagos an gibo nin paglaláng sa paghusay kan karâtan na dara nin kasâlan, asín an katapusan asín kapanoan kainí iyó an Kahadean.

An doros o subasko sa Danao nin Galilea simbolo man kan kaos o mga kahorasaan asín kadpisilan sa satong buhay. Asín bakô saná iní dapit sa mga pwersa o mga pangyayari sa luwás, kundî patí man kan mga nangyayari sa laóg, kan satong sadiri. Sabi nganì sa awit na One More Gift: “for the confusions around are mere reflections of what’s within me”.

Alagad siring sa istorya sa Evangelio, an Diós mas dakulà asín makapangyarihan kisa anó pa man na doros o bagyo sa satong buhay, asín dinadara Niya kita sa kosmos o kahusayan asín katoninongan, katalingkasan asín katanosan, kan Saiyang Kahadean. Pàno ta iní makakamtan? Kun kita magtubód.

Magtubód kita Saiya. Mápoón iní sa pagmidbid ta Saiya bilang satong Kagurangnán asín Paraligtás. Kan daí pa si Jesús namimidbidan kan Saiyang mga disipulos mantang naglálakáw sa ibabaw nin katubigan, nagkatarakot sinda asín pighonà na Siya saróng multo. Alagad si Jesús nagsabi: “Pakusogá an saindong boót. Ako iní, daí kamo matakot.” Sa tahaw nin mga kadipisilan sa buhay minsan naghohonà kita na pinabayaan na kita nin Diós, alagad Siya pirming yaon sa sato, kundî kita nganì pirmi an nakákalingáw kan Saiyang presencia.

Magmaimbód kita sa pagtubód. Si Pedro siring sa satong mga Cristiano na minsan paghonà basang saná an pagtubód, alagad pag inabotan na nin mga kagabatan sa buhay, nagluluya an pagtubód, o kun may oportunidad na magginhawa nin kadikít alagad sa saláng paagi, pinapasipara an Saiyang kabôtan. Kayâ nasabihan siya ni Jesús: “Kulang an pagtubód. Tâno ta nagduwa-duwa ka?” Sa tahaw nin mga tentación asín agyat nin buhay, mas lalò na dapat kitang magin maimbód Saiya nin huli ta Siya danay na maimbód sa satuya.

Sabi ni San Pablo sa Roma 8,37-39: “An gabós na iní madádaóg ta huli ki Cristo na namoot sato. Huli ta ako minatubód na maski an kagadanan, an buhay, an mga angeles, an mga principados, an mga uya na, an mga máabót pa, an mga kapangyarihan, an kahalangkawan, an kahararoman, o an anoman na linaláng daí puedeng makapasuhay sato sa pagkamoot nin Diós na yaon ki Cristo na satong Kagurangnán.”

Magtalubò kita sa pagtubód. An istorya nagtapos sa pagsamba ki Cristo kan mga disipulos asín pagpahayag: “Totoo man nanggad, Ika an Akì kan Diós.” Nadagdagan an saindang pagsarig asín pagkamidbid ki Cristo, nagtalubò sinda sa pagtubód. Alagad an mas ladawan ta nin pagtubód iyó an nasa enot na kabtang kan istorya, kan si Jesús tuminukád sa bukid asín dumán nabanggihan sa pagpamìbì sa Amâ. Iníng pagkaugós asín rarom nin pagkámoót ni Cristo sa Amâ iyó an hingowahon tang abotón. Sa pagmidbid ta Saiya bilang Akì kan Diós, arogon ta man an Saiyang pagtaóng oras sa pamìbì asín pagsunód sa kabôtan kan Amâ.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia nin doros sa buhay na nagbalô sa saimong pagtubód sa Diós, asín kun pàno mo namatean an Saiyang presencia.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song 

Pàno Magín Maninigong Cristiano?

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hulyo 2-8, 2023. Basahon an Evangelio gikan sa Mateo 10,37-42 (Ika-13 Domingo sa Ordinariong Panahon - A).

…

An istorya sa Evangelio pagpadagos kan istorya kan pagsugò ni Jesús sa Doce Apostoles na magmisyon. Bàgo sinda magdagos sa dalan nin pagigin disipulos, linatag ni Jesús an mga hinahagad Niya. Kun daí ta Siya kamòtan oróg kisa satong pamilya, kun daí kita magpàsan kan satong cruz, kun daí ta kayang magdusay kan satong buhay – bakô kitang maninígò na magín disipulos Niya.

Magabát palán an magín disipulo ni Jesús. Tibaad maghapót nganì kita: Bakóng daíng kondisyon an pagkamoot nin Diós? Bakóng Siya mismo an nagsabi: “Madya Sako kamong mga napapagal asín nagagabatan, tatàwan Ko kamong kahingaloan… ta an Sakong sakal facil asín an sakong pàsanon magián” (Mateo 11,28-30).

Totoong namomòtan kita nin Diós na daíng kondisyon asín pinapatalingkas Niya kita sa magabát na pàsanon nin kasâlan asín padusang kagadanan – alagad iní kapinònan saná kan gracia na tinatao sato nin Diós. Kun boót tang makamít an kapanoan kan Saiyang buhay asín makaabót sa Saiyang Kahadean, an kaipuhan niatong gibohon sinabi ni Jesús sa Mateo 5,48: “Magín perpekto kamo, siring na perpekto an saindong Amâ sa langit.”

Marhay na paromdomón kita kainí nin huli ta kaidto pa man hanggang ngonian, may mga boót magsabot kan pagigin Cristiano susog sa saindang sadiring kaisipan. May iba-ibang klase nin pagigin Cristiano.

May mga Cristiano saná sa ngaran. Sinda an mga nag-akò kan bonyag ni Cristo alagad daí na gayo nagtalubò sa buhay pagtubód. Cultural Catholics minsan an apód sainda, mga nagdakulà sa kultura nin pagtubód, may dikit na pakaisi sa nagkapirang doctrina, nagcecelebrár nin mga fiesta, alagad hanggang diyan na saná. Inaapód man na Catolico cerrado – sarado kutâ sa influencia nin ibang relihiyon pero sarado man an pusò sa pasabóng kan Espiritu asin imbitasyon kan Simbahan.

May mga Cristiano paminsan-minsan. Iní an mga daí nahíhilíng an halagá kan regulár na pagsimba sa Domingo; máraní sa Diós pag may kaipuhan saná asín pagkatapos lingáw na namán Siya. Namimilì man nin mga linya sa biblía o katukdoán kan Simbahan na tutubodón – kun dificil o bakô conveniente, babayaan o iiwasan maski iní an kabôtan nin Diós.

Alagad an Cristiano sa dalan nin Kagurangnan hinahanap asín inuutób an Saiyang kabôtan – nin huli ta yaon digdi an kahulugán asín kaogmahan nin saiyang buhay, siring sa sinabi ni San Pedro sa Juan 6,68: “Sa kiisay pa kami maduman, Kagurangnan? Yaon Saimo an mga tataramon nin buhay na daíng kasagkoran.”

An pagigin disipulo ni Cristo iyó an pagsunód sa Saiya tanganing sa hurí magín nanggad kabaíng Niya. Sabi sa 1 Pedro 2, 21: “Para sa bagay na iní inapód kamo nin Diós, huli ta si Cristo nagtíos dahil saindo asín nagwalat nin arogan na dapat nindong arogon”. Kan hinagad ni Jesús na paorogón ta an Diós sa gabós, maski sa sadiring magurang, pinahilíng Niya iní kan binayaan Niya an Saindang haróng tanganing gibohon an Saiyang misyon. Kan hinagad ni Jesús na kita magpâsan kan cruz, enot nang pinâsan Niya iní para sato gabós. Kan hinagad Niyang magdusay kita kan sadiring buhay, Siya mismo nagdusay kan Saiyang buhay para sa satong kaligtasan.

Sa mga natatakot sa kun anó an mawáwarâ sainda, o kun anong kadificilan an aagihan ninda, sa pagsunód ki Cristo, rumdomón na Diós an mabalos. Kun sa mga nagtatabang sato sa misyon, nanugâ na Siya nin balós susog sa saindang karahayan nin boót, anó pa daw sa mga maimbod na nag-uutób sa Saiyang kabôtan? Sa Mateo 28,20 nanugâ Siyang magigin kaibahan niato sa dalan sagkod pa man, dangan, sa huríng panahón, kapanoan nin buhay asin gracia sa Saiyang Kahadean.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia nin mga kadificilan, siring man mga kaogmahan, sa pagsunod ki Cristo asín paglakbay sa Saiyang dalan.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Dai Matakot Ihiras an Evangelio

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hunyo 25-Hulyo 1, 2023. Basahon an Evangelio gikan sa Mateo 10,26-33 (Ika-12 Domingo sa Ordinariong Panahon - A).

…

An evangelio ginonò sa Mateo 10 – an capitulong iní nagpoón sa pag-apód ni Jesús sa doceng disipulos dangan sa pagsugò sainda sa misyon. Kayâ kan nagsabi Siya na daí matakot, iní sa contexto kan pagbalangibog kan Marhay na Baretà. Kadaklan sa satong Cristiano inaakò na kita “paratubod” (believers), dakúl man sato an “parasimbá” (church-goers). Alagad pirá daw sato an minasabing kita man “parabalangibog kan Marhay na Baretà” (evangelizers)?

Kadakul saná kan mga natatakotan ta sa pagpahayag kan Evangelio – dakúl an takot mapasupgán, ma-reject, o mapasalâ, patin na an magtarám sa hampang nin dakúl.

Sa ibóng na lado, bakô man maraot magkaigwá nin tamang takot. Sabi sa Talinhaga 9,10: “An pagkatakot sa Kagurangnan an kapinonan nin kadonongan”. Dapit iní sa tamang paggalang asín pagsamba sa satong Diós.

Sa aroaldaw na buhay, an takot garó preno sa sasakyán na minatabang satong makalikáy sa diskwido. Alagad, siring na an behikulo daí madalagan kun pirming nakapreno an nagmamaneho, an sobrang takot pinupugolan man kitang mabuhay na matalingkás asín mabunga. Kayâ sa Evangelio, tolóng beses na sinabihan ni Jesús an mga disipulos na daí matakot sa pagmisyon.

Daí matakot maglakáw sa dalan kan cruz. Bàgo kita magbalangibog kan Evangelio, kaipuhan naghihingowa na kitang isabuhay iní. An satong pagpàsan kan cruz aroaldaw, boót sabihon an pagsunód sa paarog asin kabôtan ni Cristo, an paggibo nin tamà asin marhay, maski mapagál o dificil, iyó an enot na gawè nin pagsaksi sa Evangelio.

Daí matakot na makísumarò sa sacrificio ni Jesús, ta Siya man an satong kusóg asin kaiba sa pagpàsan kan satong cruz. Sabi sa Filipos 4,13: “An gabós magigibo ko huli ki Cristo na nagpapakusóg sako.”

Daí matakot magdangóg. Kun naghihingowa na kitang maglakáw sa dalan kan cruz, an sunód na hakbang sa paghirás kan Marhay na Baretà sa kapwa iyó an magdangóg. Kan pinònan ni Papa Francisco an mga proceso kan Sínodo nin Sinodalidád, an enot niyang hinagad iyó na kita magin Simbahan na nagdadangog.

Minsan natatakot kitang magdangóg sa kapwa huli ta dificil akóon an saindang katotoohan, asín habô tang matanyog an mga sadiring posisyon. Alagad kaipuhan an kusóg ki boót na magdangóg sa manlaen-laen na boses tanganing mamatean nanggad kan satong ka-dialogo na kita tunay na may pagmakulóg sainda.

Daí matakot na magsabatan an katotoohan kan Evangelio sa realidad nin buhay nin mga tawo. Si Cristo mismo an satong pangarogan kainí. Sa Saiyang ministerio público, dinolok Niya an mga tawo, hinapót kun ano an saindang kaipuhan; maski mga kaiwal dinangóg Niya, tinókdoán, asín naherakan.

Daí matakot mámoót. Madalíng kamòtan an mga tawong marhay sato. Siring man, dificil kamòtan an mga bakô marhay sato, dangan an bakô tang kamidbid o an naiiba sato. May peligro man sa pagbukás kan satong pusò sa kapwa: tibaad abusohon an satong tiwalà o lokohon kita. Alagad sabi sa 1 Juan 4,18: “an pagkatakot hinahalè kan tunay na pagkámoót”.

Si Cristo mismo an nagsaksi sato kainíng tunay na pagkámoót, kaya sa Juan 13,34, ini man an bàgong tugon Niya sato: “magkaminorootan kamo siring na Ako námoot saindo”. Namòtan kita nin Dios, mahalagá kita Saiya. Kayâ mámoót man kita asin magmakulóg sa kapwa siring na kita namòtan Niya. Sa paaging iní kita magigin tunay na parabalangibog kan Marhay na Baretà sa kapwang oróg na nangangaipo kainí.

…

GIYA SA PAGHIRÁS SA SADÍT NA KOMUNIDAD O PAMILYA • Ano an saimong mga kinakatakotan? Nadará mo na iní sa Diós sa pamibi? Pàno mo iní nalampasan (o padagos pang linalabanan)?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Inapod asin Sinugo

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hunyo 18-24, 2023. Basahon an Evangelio gikan sa Mateo 9,36–10,8 (Ika-11 Domingo sa Ordinariong Panahon - A).

…

An istorya sa Evangelio nagpoón sa pagkaherak ni Jesu Cristo kan nahiling Niya an katawohan na naghahalat Saiya. Iní pinahilíng Niya, enot, sa pagsadól sa Saiyang mga disipulos na magpangadyî sa Kagurangnán na magpadará nin mga paraaní sa Saiyang aanihon; dangan, sa pagsubol sa doce na magmisyón sa “mga nawáwaráng karnero kan Israel”. Anó an mensahe sato kainí?

Enot, an Diós mahéherakón. Iní pinahayag mismo ni Jesús sa Saiyang ministerio público, sa Saiyang pagtukdô sa mga dukhâ, pagbulóng sa mga naghehelang, asín pagpatawad sa mga parakasalà. Oróg sa gabós, sa pagdusay kan Saiyang sadiri sa cruz para sa gabós na tawo – sa mga naglalakaw sa matanos na dalan asín sa mga nawáwarâ, sa mga disipulos Niya patín sa mga kaiwal Siya. Nasusurat sa Roma 5,8: “Pinamidbid na gayo nin Diós an Saiyang pagkámoót sato: kaidto pang parakasalà kita, nagadán na si Cristo para sato.”

Ikaduwá, hinirás ni Jesús an misyon nin pagkaherak sa Saiyang mga disipulos. Sabi Niya sa Lucas 6,36: “Magín maheherakón kamo, siring na an saindong Amâ maheherakón.” Kayâ inapód Niya an doce, tinâwan nin kapangyarihan, asín sinugò na maggibo nin siring sa Saiyang mga gibong herak. Siring man sa Evangelio inapód an doce na mga “apóstoles”, sa Griego apostoloi, “an mga sinugo” – sa pagdará nin pagkaherak.

An Doce Apóstoles iyo sinda: Simón na inaapód man na Pedro, Andres, Santiago, Juan, Felipe, Bartolomé, Tomás, Mateo, Santiago na aki ni Alfeo, Tadeo, Simón na Cananeo, asín Judas Iscariote. Sa Evangelio ni San Juan, isinabáy an ngaran na Natanael sa Doce, kaya pinagtutubodán na iní asín si Bartolomé parehóng tawo man saná. An nagsalida ki Judas Iscariote sa Doce iyo si Matías. Sa Bàgong Tipan igwa nin mga ináapód man na apóstoles maski bakô kasabay sa Doce, siring ki Pablo, Bernabé, Timoteo, Tito, Apolos, asín Santiago na ináapód na “tugang ni Jesús”.

An mga apóstoles minimidbid na tinâwan nin katongdán na mamayó sa pagbalangibog kan Marháy na Baretà asín pag-ataman sa mga komunidád nin pagtubód. Sa pag-agi kan panahón an mga kasalida ninda inapód na mga obispo na may katongdán sa pangataman sa Simbahan. An mga obispo hiníhirásan man an mga padì asín diakono kan saindang katongdán o oficio na maglingkod sa Simbahan. An pakikihirás nin mga clero – mga obispo, padì, asín diakono – sa misyon ni Cristo ináapód na pagkapading ministeriál (ministerial priesthood).

Alagad bakô man saná an mga clero an hinirasán ni Cristo na magpadagos kan Saiyang misyon nin pagkaherak, kundî an gabós Niyang disipulos sa gabós na panahón. An istorya sa Evangelio nin pagsubol sa misyon sa mga apóstoles, pasabóng asín pag-andam saná sa Dakulang Pagsugò na itátaó ni Jesús sa gabós Niyang mga disipulos bàgo kan Saiyang Ascensión sa langit. Sa Mateo 28,19-20 nagsugò Siya: “Lakáw kamo, gibohang disipulos an gabós na nación! Bonyagán sa ngaran kan Amâ, kan Akì, asín kan Espiritu Santo. Tukdoán na mag-utób kan gabós Kong itinugon saindo.”

An pakíkihirás nin gabós na binónyagán sa misyon ni Cristo ináapód na pagkapading común (common priesthood). Sa Lumang Tipan may profesía na nganì dapit kainí, kan an Diós makipagtipan sa Israel sa bulód Sinai. Sa Exodo 19,6 nasusurat: “Magigi Ko kamong kahadean nin mga padì asín banál na nación.” Boót sabihon an pagigin Cristiano, bakô saná an pagigin paratubod asín parasunod ni Cristo, kundî sinusugò Niya man kita sa paggibong herak asín paghirás kan Marhay na Baretà sa satong kapwa, tanganing nin huli kainí madará sinda – asín kita gabós – sa Kahadean nin Diós.

…

GIYA SA PAGHIRÁS SA SADÍT NA KOMUNIDAD O PAMILYA • Sa panahón ngonian nin krisis sa ekonomiya (patin na nin huli kan pagtuga kan bulkan), pàno mo ihíhirás sa kapwa an pagkaherak ni Cristo?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Asín kan Dagâ, Ilaw kan Kinâban

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Pebrero 5-11, 2023. Basahon an Evangelio gikan sa Mateo 5,13-16 (Ikalimang Domingo sa Ordinariong Panahon).

…

Sabi ni Jesus sa Saiyang mga disipulos: kamo an “asín kan dagâ, an ilaw kan kinâban”. Ano an kahulugán kainí?

Enot, an kahalagaán kan asín kan panahón ni Jesus bakô saná sa pagtaóng namit sa pagkaon, kundì mas pa sa pagigin preservative kainí o pampalawig kan pagkalàbas (freshness) nin mga karne asín iba pang pagkaon, tanganing daí tulos máraot o malapâ.

Iní an paliwanag ni San Crisóstomo dapit sa pagigin asín kan dagâ nin mga Cristiano: “An mga binâgo asín pinatalingkás na ni Cristo sa karâtan, asín itinaó sa pangataman kan mga apóstoles, saindang inasinán asín pinapadanay sa pagbabâgo na tinaó kan Kagurangnan. Sa paagi saná kan kapangyarihan ni Cristo napapatalingkás an mga tawo sa karâtan nin huli sa kasâlan; an katongdan kan mga apóstoles, an saindang magabát na trabaho, iyo na papagdanayon na daí na an mga iní makabalík sa dating karâtan.”

Ikaduwá, an kahalagahán kan ilaw sa buhay nin tawo daí na nangangaipo nin halawig pang paliwanag. Pag daíng ilaw dificil an paggibo nin mga bagay sa diklom.

Pano kita nagigin ilaw kan kinâban? Sabi sa Isaias 58,7-8: “Iní an sabi kan Kagurangnan:  hirasán mo kan saimong tinapay an nagugutom, an daíng haróng pasakatón mo sa saimong haróng. Kun makahiling ka nin tawong daíng gubing, gubingan mo, asín daí mo pagtalikdan an saimong kadugô. Huli kainí an saimong ilaw maliwanag siring sa kaagahan.”

Ikatoló, pangapodan iní sa padagos na pagkamidbid ki Cristo asin sa Saiyang misyon. Sabi ni San Pablo sa 1 Corinto 2,2: “Daíng ibá akong boót na maaraman kundì dapit ki Jesus: na iní an Cristo na pinakò sa cruz.” Siya an ilaw na nagpaparà sa diklom nin kasâlan, an asín na nagpapadanay sato sa gracia pasiring sa kapanoan nin buhay. An satong misyon pakihirás sa Saiyang misyon.

Ikaapát, an mga disipulos na tinàwan Niya nin siring na misyon bakô man an mga makapangyarihan, mayaman, asín halangkaw an inadalan kaidtong panahón, kundì kadaklan sainda dukhâ, may helang, asin makasâlan. Boót sabihon, maski sa satong kaluyahan asin kadaihan, naniniwalà sato si Cristo na kaya tang gibohon an oróg kadakulang responsibilidad na iní.

Ikalimá, dapit iní sa kaimbodán. An asín dangan ilaw tanganing mapakinabangan kaipohan nagdadanay an asgad asín liwanag. Daí nang pakinabang an asín kun iní magtàbang asín an ilaw kun puropalsok. Siring man an Cristiano, dapat an paggibo nin marhay bakô paminsan-minsan saná, an paglikáy sa kasâlan bakô kun facil saná.

Ikaanóm, dapit iní sa kadunongan. Sa paggamit nin asín dangan ilaw kaipohan tamà saná, bakô kulang o sobra. Kun kulang sa asín, matàbang; kun sobra, maasgadon man. Kun an ilaw nakatagò, daíng pakinabang sa diklom; kun sobra man, nakakasuríaw, minsan nakakasulô pa. Siring man an Cristiano, tinàwan nin Dios nin consciencia asín kakayahán maghorop-horop, tanganing an katanosan sa Dios kaibahan an pagmakulóg sa kapwa, an pagkamoót asin katotoohan kaipohan dungán, asin an katarungan balansehón nin pagkaherak.

Ikapitó, dapit iní sa pagdusay nin sadiri. Natutunaw an asín, napupodpod an kandilà, napupundido an bumbilya, nagigin abó an kahoy na kinalayohan. Alagad bakô sayang kun nagagamit sa karahayan. Siring ki Cristo na nag-sacrificio kan sadiri sa pagligtas sato, an Cristiano kaipohan magdusay man kan sadiri sa pagtabang sa kapwa, pagpakarhay kan banwaan, asín pagmuknâ kan Kahadean sa dagâ.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia na naisabuhay mo an pagigin asín kan daga o ilaw kan kinâban.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song