An Eucaristia sa Emmaus

 

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana kan Abril 19-25, 2026. Basahon an Evangelio gikan sa Lucas 24,13-35 (Ikatolóng Domingo kan Pasko kan Pagkabuhay-Liwát - A).

…

An istorya sa Evangelio iyó an pag-ibá kan satóng Kagurangnan Jesu Cristo sa duwá Niyáng disipulos sa dalan pasiring sa Emmaus. Mantang totoong nangyari, isinurat man iní bilang alegoría, o istorya na may hararom na kahulugán sa paagi nin mga simbolóng ginamit. Iní saróng alegoría kan pagpamidbid satô ni Jesús, oróg na sa mga parte kan Eucaristía o Santa Misa.

Liturgía kan Tataramon an enot na kabtang kan Santa Misa.

Sa dalan, tinukdô ni Jesús sa duwáng disipulos an tamang interpretasyon kan mga profesía dapít Saiya sa mga libro nin mga Tugon asín Profetas. Kayâ nagtutubód kitá na an gabós na Kasuratán makúkuá an pinaka-kahulugán ki Jesu Cristo. Siyá an kapanoan kan pagpamidbid nin Diós, kayâ Siyá an llave sa pakasabot sa mga Kasuratán, sa kasaysayan nin kaligtasan nin bilog na kinâban, patín sa satóng personál na istorya nin kasâlan asín kapatawadán. Sabi sa 1 Pedro 1,21: “Huli Saiya nagtutubód kamó sa Diós na nagbangon Saiya halè sa mga gadán asín nagtaó Saiya nin kamurawayan; malà, an pagtubód nindo asín paglaom yaon sa Diós.”

Sa satóng pagsimba, nagdadangóg daw kitá nin maigot sa mga Babasahon? Pag-ulî, nabalô ta na lamang na balikán na basahon sa biblía an mga mga nadangog ta sa Santa Misa? Nagkaoras na lamang kitá sa paghorop-horop kan mga Babasahon susog sa mga experiencia ta sa buhay, o sa pag-adal pa nin hararom dapít sa tamang pagsabot kan mga iní? Paladan kitá kun nakagibo kitá maski sarô lamang sa mga iní. Nin huli ta an Banál na Kasuratán biyayà nin Diós sa katawohan.

Liturgía kan Eucaristía an ikaduwáng kabtang.

Kan sinda namamanggi, kinuá ni Jesús an tinapay, binaak, nagbendicion, asín binuksan an mga matá kan duwáng disipulos tanganing mamidbidan ninda Siyá. Hanggang ngonian, nagpapadagos an Saiyang presencia sa satóng buhay lalò na cada vez minacelebrár kitá kan Eucaristía.

An pagsimba ta cada Domingo, mas nahihilíng ta daw bilang obligación o mabiyayang pakipagtagpoan ki Cristo na tinátaó an Saiyang sadiri satô? Gurâno kahalagá satô an pag-akò Saiya sa comunión na nasa estado de gracia, boót sabihon, daí nakagibo nin kasâlan na mortál? Nasasabotan ta daw na an presencia asín participacion ta sa Santa Misa, nakakapakusóg man kan pagtubód kan lambang sarô na miembro kan Hawak ni Cristo?

An Misa minatapos sa misyon.

Kan si Jesús náwarà na, nag-istoryahan an duwáng disipulos. Sa Lucas 24,32 nagsabi sinda: “Bakóng naglalaad an satuyang pusò kan nagtátarám Siyá satô sa dalan asin binubuksan satô an mga Kasuratán?” Dangan nagbalík sinda sa Jerusalem para ihirás iníng marhay na baretà sa mga pag-iriba.

Sa pagtapos kan Misa, an padì minasabi, “Padumán, tapos na an Misa.” Alagad daí kitá minahalè na siring saná kan dati, na garó daíng nabâgo satuyà, nin huli ta nakaibahan ta si Cristo asín dara-dara ta na an Saiyang presencia asín Marhay na Baretà sa satóng mga sadiri. Sabi sa Psalmo 16,11, na iyó man an ipinahayag ni San Pedro sa Gibo kan Mga Apostoles 2,28: “Ipinaaram Mo sakô an mga dalan nin buhay; papanoón Mo akó nin kagaya-gayahan sa atubang Mo.”

Sa satóng pagsimba asin sa pagmisyon pakasimba, kitá nagigin Simbahan. Asín iní an satóng misyon: enot, na padagos pang bâgohon an sadiri susog sa kaimbodán ni Jesús tanganing makaarog pang lalò Saiya; ikaduwá, na ihirás an Saiyang pagkamoot sa laóg asín luwas kan satóng pamilya, lalò na sa panahón nin krisis siring ngonian, oróg na sa kapwang nangangaipo.

…

GIYA SA PAGHIRÁS | Maghirás kan saimong experiencia nin gracia, o kadipisilan, sa pagsimba. | GIYA SA PAGHIRÔ | Anóng paagi nin paghiras kan bunga kan saindong pagsimba an pwede nindong magibo bilang komunidad/pamilya sa panahón nin krisis sa kapwang nangangaipo sa saindong komunidad?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

An Diosnon na Pagkaherak

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana kan Abril 12-18, 2026. Basahon an Evangelio gikan sa Juán 20,19-31 (Ikaduwáng Domingo sa Octava kan Pasko kan Pagkabuhay-Liwát).

…

Kan taon 2000, binoót ni Papa San Juán Paolo II, na an Ikaduwáng Domingo sa Octava kan Pasko kan Pagkabuhay-Liwát icelebrar man bilang Domingo kan Diósnon na Pagkaherak. Duwá an pangapodan kainíng celebracion. Enot na danay kitáng maghagad nin asín magsarig sa pagkaherak nin Diós. Ikaduwá, na kitáng naherakan, magín maheherakón man sa satóng kapwa.

Ngonian na taón, kaipohan na iparomdom nanggad an mensahe nin pagkaherak. An gyera sa Irán asín an krisis sa bilog na kinâban nangyayari huli ta an mga makapangyarihan na pamayó asin mga tagasuporta ninda lulóng sa poder asín daíng herak sa kapwa.  

Sa istorya sa Evangelio nagtatagò an mga disipulos huli sa takot sa mga autoridad asín sa mga kapwa ninda Judío.  Nangyari iní sa banggi kan enot na aldaw kan semana asín sa banggi giraray kan suminunód na semana. Sa parehong okasyon, nagpahilíng sainda an satóng Kagurangnan Jesu Cristo na nabuhay-liwát.

An enot na aldaw kan semana iyó an nagin bâgong Aldaw kan Kagurangnán (Dies Domini sa Latín, Domingo sa Español) para sa mga disipulos, nin huli ta sa enot na aldaw nabuhay-liwát si Jesús. Kayâ embes na Sabado, Domingo na an Banál na Aldaw para sa mga Cristiano.

Alagad sa enot na aldaw na idto, takot asín pagkapurisaw an namatean kan mga disipulos. Pinarà ni Jesús an mga iní kan nagpahilíng Siyá sainda asín tinaó an Saiyang katoninongan.

An saradong haróng nagin taguán asín ligtas na lugar para sa mga disipulos, alagad nagi man ninda iníng kulungan kun saén an takot asín kapurisawan mas lalò pang nagdakulà asín nagkusóg.

Kitá man may mga siring na saradong haróng sa satóng buhay. Iní an mga ináapód tang “comfort zones” kun saén kitá ligtas asín harayô sa peligro, alagad nagpupugol satô na magin matalingkas, magtalubò, asín magbunga. Kun palaogón ta si Jesús sa satóng buhay, malagbas man Siyá sa satóng mga saradong pusò asín mapatalingkas sa satóng nalilibongan na isip asín nanluluyang boót.

Kan enot na magpahilíng sa Jesús sa saiyang mga disipulos, igwang daí nakasabáy: si Sto. Tomás. Kayâ daí siyá tulos nagtubód sa ibinaretà kan mga pag-iriba niyá. Sa ikaduwáng pagpahilíng, dinolok siyá ni Jesús asín kinahuron, dangan nasambit niyá an magayonon na kapahayagan nin pagtubód: “Kagurangnan ko asín Diós ko!” (Juán 20,28).

Kitá man pinapagiromdóm kan satóng pagmangno sa mga daí ta kaiba, sa mga nasa laylayan kan sociedád, asín sa mga nawawarà sa tamang dalan.

Sa halîpot na pagsabi, pinapahayag kainíng istorya an marhay na baretà kan Diósnon na Pagkaherak. Anó an pagkaherak? Iní an virtúd nin pangataman sa lambang sarô: an pagmakulóg sa kapwa, pagpatawad sa nagkasalà, asín pagtabang sa nangangaipo. 

Sa Hebreo sa Lumang Tipan, hesed an pinakagamitón na tataramon dapít sa pagkaherak, asín iní minatukoy sa pagkamaimbód asín pagkamapatinawad nin Diós maski pirming nagkakasalà an Saiyang Piniling Banwaan.

Sa Griego sa Bâgong Tipan, eleos an pinakagamitón na tataramon kainí, asín oróg na nahihilíng iní sa kaligtasan na dará ni Cristo. Sabi sa Efeso 2, 4-5: “Nagsusùpay an pagkaherak nin Diós, asín dakulà an Saiyang pagkamoot satô, kayâ maski kan gadán pa kitá huli sa kasombikalan, binuhay Niyá liwát kitá kaiba ni Cristo.”

Mamîbî kitá na maghadè na an Diósnon na Pagkaherak sa pusò nin lambang sarô sa kinâban asín kitá man magin agihan nin pagkaherak para sa kapwang nangangaipo.

…

GIYA SA PAGHIRÁS | Maghirás kun pâno nagin maheherakón saimo an Kagurangnan, o kan iká natâwan nin oportunidad na magín maheherakón man sa kapwa. | GIYA SA PAGHIRÔ | Anó an pwede nindong magibo bilang komunidad/pamilya sa pagpamatè kan Diósnon na Pagkaherak sa kapwang nangangaipo huli kainíng krisis?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

Alleluia! Si Cristo Nabuhay-liwat!

 

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana kan Abril 5-10, 2026 sa laóg kan Octava kan Pagkabuhay-Liwát. Basahon an Evangelio gikan sa Juán 20,1-9 (Domingo de Resurrección).

…

An satóng Kagurangnan Jesu Cristo nabuhay-liwát susog sa sinabi Niyá! Alleluia! Sabi ni San Pablo sa 1 Corinto 15,14: “Kun si Cristo daí binuhay-liwát, sayang an samóng paghulit asín sayang an saindong pagtubód.” Iní an misteriong patugmadan kan satóng pagtubód.

Anó an boót sabihon kan Pagkabuhay-liwát sa mga gadán?

An Resurrección o Pagkabuhay-liwát ni Jesús sa mga gadán iba man sa mga istorya nin pagbuhay Niyá sa mga nagadán na sa mga Evangelio, siring bagá kan aking daragita ni Jairo, kan solong aking lalaki kan balo sa Naím, asín kan Saiyang amigong si Lazaro. An mga milagrong iní ináapód na “resusitación” nin huli ta sindang mga binuhay halè sa kagadanan, pag-abót kan saindang panahón, nagadán man giraray. Alagad an Resurrección iyó an pagkaigwa nin bâgong nivel nin existencia, nin kapanoan nin buhay na daíng kasagkoran, asín an daí na pag-agi sa kagadanan sagkod pa man.

Sabi sa Katekismo (CCC 646): “An pagkabuhay-liwát ni Jesús naiiba sa esencia. Sa Saiyang nabuhay na hawak, nag-agi Siyá halè sa estado nin kagadanan pasiring sa bâgong buhay na lampas sa kategorya nin panahón asín espacio. Sa pagkabuhay-liwát ni Jesús an Saiyang hawak napanô kan kapangyarihan kan Espiritu Santo: nakikihirás Siyá sa diósnon na buhay sa Saiyang kamurawayan.”

An Pagkabuhay-liwát ni Jesús iyó an pruweba asín panugâ kan satuyà man na pagkabuhay-liwát sa huríng aldaw. Sa Saiyang pagkabuhay-liwát, binâgo Niyá an ordén kan kinâban. An huríng padumanan nin tawo bakô na kagadanan, kundî buhay sa Kahadean nin Diós.

Dangan, sa paghilig Niyá sa mga gadán, dinumán Niyá an mga matanos asín banál na halóy nang nagháhalát nin kaligtasan, asín binuksan an langit para sainda asín para man sa gabós na katawohan.

Kayâ si San Pablo nagtukdô sa Colosas 1,18-20 na si Cristo “an payó kan Saiyang hawak na iyó an Simbahan; Siyá an kapinônan, an enot na binuhay-liwát sa mga gadán. Huli ta binoót nin Diós na an bilog Niyáng pagka-diós mapasa-Akì. Binoót man Niyá na sa paagi kan Saiyang Akì an gabós makipag-olían Saiya.”

Kun arog kainí kahalagá an Resurrección, anó man an hinahagad satô?

Na kitá magtubód tanganing maligtas. Sabi ni San Pablo sa Roma 10,9: “Kun pinapahayag mo sa saimong ngusò na si Jesús an Kagurangnan, asín minatubód ka sa saimong pusò na binuhay Siyá liwát kan Diós sa mga gadán, makakaligtas ka.”

An siguradong tandâ kan pagtubód na nakakaligtas, iyó an satóng pagsunód sa Saiyang kabôtan gurâno man kadakúl kan kaolangan o kakusóg kan tentación, siring na si Cristo nag-agi ngôna sa Pasión bâgo an kamurawayan kan Resurrección. Sabi giraray ni San Pablo sa Roma 6,8: “Kun kitá nagadán kaiba ni Cristo, kitá nagtútubód na mabubuhay man kitá kaiba Niyá”.

Kayâ saróng importanteng parte kan liturgía sa Domingo de Resurrección iyó an Pagbâgo kan mga Panugâ sa Bonyag. Igwa iní nin duwáng kabtang: an pagsikwal ki Satanás, sa saiyang mga maraot na gibo, asín mga padayà; dangan an pagpahayag nin pagtubód sa Diós Amâ na oróg na namoot satô, sa Diós Akì na nagligtas satô, asín sa Diós Espiritu Santo na danay na nagpapabanál satô. Kun isabuhay ta an satóng mga Panugâ sa Bonyag, makakamtan ta an graciang dolot kan pagkagadán asín Pagkabuhay-liwát ni Jesús: kaligtasan asín kapanoan nin buhay sa Saiyang Kahadean.

…

GIYA SA PAGHIRÁS | Sa pânong paagi mo naisasabuhay – o daí – an mga Panugâ sa Bonyag na satóng binabâgo cada taón sa Domingo de Resurrección? | GIYA SA PAGHIRÔ | Anó an pwede nindong magibo bilang komunidad/pamilya tanganing magtarabangán na isabuhay an mga Panugâ sa Bonyag?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

Suminakat sa Kalangitan, Nagtutukaw sa Too kan Ama

Giya sa Prayer-Meeting nin mga Saradit na Komunidad nin Pagtubod (SAKOP) Para sa semana kan Junio 1-7, 2025. Basahon an Evangelio gikan sa Lucas 24,46-53 (Domingo de Ascensión - C).

…

An Evangelio iyó an istorya kan Ascensión o pagsakát sa langit kan satóng Kagurangnan Jesu Cristo, susog ki San Lucas. Inistorya giraray iní ni San Lucas, asín may mga dagdag pang detalye nganì, sa saiyang ikaduwáng libro, an Gibo kan mga Apostoles (1,1-11).

An Ascensión iyó an pag-ulî ni Jesús sa Saiyang haróng sa langit.

Nin huli ta Siyá Diós, an Akì nin Diós, an Ikaduwáng Persona kan Santissima Trinidad. Si Santa María, sa saiyang Asunción, isinakát sa langit sa gracia nin Diós, bakô sa sadiri niyang kakayahan, ta tawo man saná siyá. Alagad an Ascención kan satóng Kagurangnan huli sa Saiyang sadiring kapangyarihan.

An Ascensión iyó an kapanoan kan pagpamuraway ki Jesús kan Saiyang Amâ.

Kayâ pinapahayag ta sa Nagtutubod (Credo Apostolico), na Siyá “suminakát sa kalangitan, nagtutukaw sa tóo kan Diós Amáng makakamhan.” Sabi pa ni San Pablo sa Efeso 1,22-23: “An gabós ibinugták Niya sa irarom kan mga bitís ni Cristo, asín, labáw sa gabós, ginibo Siyáng pamayó kan Simbahan, na iyó an Saiyang hawak, an kalubosan kan nagpapanô kan gabós sa gabós.”

An Ascensión iyó man an panugâ kan satóng maabot na kamurawayan.

Sa Juán 14,2 nanugâ si Jesús sa Saiyang mga disipulos: “Sa haróng kan Sakóng Amâ dakúl an eerokan… Malakaw Ako ta maandam nin lugár para saindo.”

Alagad an mensahe kan Ascensión bakô saná dapít sa kamurawayan nin langit, kundî dapít man sa satóng pagigin mga disipulos Niya digdi sa dagâ. Nin huli ta sa pagsakát ni Cristo sa langit, winalat Niya satô an Saiyang Espiritu asín an Saiyang misyon. Nanugâ pa Siyá sa Gibo 1,8: “Aakoon nindo an kapangyarihan pagsangkob saindo kan Espiritu Santo, asín magigi Ko kamóng mga saksi sa Jerusalem, sa bilog na Judea, sa Samaria, sagkod sa kaporohán kan dagâ.”

Evangelización an apód kainíng misyon nin pagsaksi ki Cristo, an pagbalangibog kan Marhay na Baretà. Pâno ta iní gigibohon?

Magdangóg.

Sa Evangelio, hanggang sa bâgo Siyá magsakát sa langit, dagos pang nagtutukdò si Jesús sa mga disipulos. Hanggang sa ngonian padagos pa kitang ginigiyahan kan Saiyang Espiritu, sa paagi kan pagpastor kan mga namamayo sa Simbahan, sa Banál na Kasuratán, sa pagpangadyî, sa pagdangóg sa mga istorya asín agrangay nin kapwa. Bâgo kitá maka-evangelizár, dapat makaukod ngûna an satóng pusò sa pagdangog kan Tataramon nin Diós asín pasabóng kan Espiritu.

Magtubód.

Kan nahiling kan mga disipulos na si Jesús suminakát sa langit, tulos sindang nagtubód asín nagsambá Saiya, asín naghalát sa pagdatóng kan Espiritu Santo. An pagtubód na hinahagad satô iyó an pagtubód nin maimbod na pagsunód sa kabôtan nin Diós asín pagsarig sa Saiyang mga panugâ, lalò na kun may mga kagabatan asín pagbalò sa satóng buhay asín misyon.

Maghirás.

An pinakasimpleng kahulugán kan evangelización iyó an paghirás kan Marhay na Baretà na yaon na satô. An satóng hawak mismo Templo na kan Espiritu Santo sa gracia kan bonyag, asín may mga bunga na nganì Siyáng tinátaó sa satóng búhay. An satóng mga gibong karahayan, an pagsabi nin totoo na may pagkamoot, an paghirás kan istorya kun pâno an Diós naghihirò sa satóng búhay – gabós iní mga paagi nin pagsaksi ki Cristo asín pagdará sa kapwa pasiring Saiya.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin pagsaksi mo ki Cristo asín paghirás kan Marhay na Baretà sa kapwa.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Maabot na Espiritu Santo

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Mayo 25-31, 2025. Basahon an Evangelio gikan sa Juán 14,23-29 (Ikaanóm na Domingo kan Pasko kan Pagkabuhay-Liwát - C).

…

Duwáng semana bâgo an Domingo kan Pentecostes, sa Evangelio nagprofesía an satóng Kagurangnan Jesu Cristo dapít sa pag-abót kan Espiritu Santo. Iní sinabi Niyá sa Huríng Pamanggi bâgo kan Saiyang Pasión. Parte iní kan halawig na kabtang sa Evangelio ni San Juán (capitolo 13 hanggang 17) na ináapód na “Mga Katukdoán sa Huríng Pamanggi” (Last Supper Discourse).

Sa Juán 14,26, inapód ni Jesús an Espiritu Santo na “Parakletos (parasurog) na susugoon kan Amâ sa ngaran Ko.” An Espiritu Santo iyó an Espiritu ni Cristo, asín sinusugò man kan Diós Amâ siring ki Cristo. Susog sa Credo Niceno-Constantinopolitano, an “Espiritu Santo, Kagurangnan asín kagtaó nin buhay: na gikan sa Amâ asín sa Akì. Siyá kaiba kan Amâ asín kan Akì, sabáy na sinasamba asín pinapamuraway: Siyá nagtarám sa paagi nin mga profetas.”

Sa Evangelio, nanugâ si Jesús sa mga disipulos na an Espiritu Santo mádará sainda sa katotoohan, asín nin katoninongan asín pagkamoot.

Espiritu nin Katotoohan.

Nin huli ta daí tulos kayang saboton kan mga disipulos an gabós na itinutukdò sainda ni Jesús, sinabi Niyá sa Juán 16,13, na “pag mag-abót na Siyá na iyó an Espiritu nin katotoohan, aantabayan Niyá kamó sa gabós na katotoohan.”

Asín kun mag-abót an panahón nin mga pagbalô, kun sinda pahampangón sa mga autoridad, sinabi ni Jesús sa Lucas 12,12, na daí maghâdit kun anó an sasabihon o isisimbag: “ta tutukdoán kamó kan Espiritu Santo sa oras man sanáng iyán kun anó an kaipuhan itarám.” Sa ngonian na panahón, sa paglaban sa disinformación asín fake news, bâgo an mga solusyon teknikál, sigurohon ta ngûna na kitá nasa lado kan Espiritu nin katotoohan.

Espiritu nin Katoninongan.

Sinabi man ni Jesús sa Juán 14,27: “Katoninongan iwinawalat Ko saindo. An Sakóng katoninongan itinátaó Ko saindo; bakô siring sa kinâban Akó nagtátaó saindo.” Kun pinapaoróg ta an mga bagay na kinâbanon asín sa lamán kisa sa Espiritu, dadarhon kitá sa karâtan nin mga bisyo, saláng relasyon, asín pagsarig sa mga kinâbanon na kapangyarihan. Alagad kun pilíon ta na magsunód sa pasabóng kan Espiritu Santo, mapapasatô an katoninongan.

Si San Pablo nagsurat sa Filipos 4,6-7: “Daí kamó mahâdit dapít sa anoman, kundî hagadon nindo sa Diós an saindong kaipuhan, sa paagi nin pamîbî na may pagpasalamat. Asín an katoninongan nin Diós na daí matugkad kan isip nin tawo iyó an mag-iingat kan saindong pusò saká isip ki Cristo Jesús.”

Espiritu nin Pagkamoot.

Sinabi pa ni Jesús sa Juán 14,23: “An namómoót Sakô, mag-óotób kan Sakóng tataramon; an Sakóng Amâ mamómoót saiya, saiya Kamí madalaw asín saiya magibo kan Samóng dagosan.” An Espiritu an minagiya sa lambang Cristiano asín sa bilog na Simbahan sa mga gibong pagkamoot.

Sa Gibo kan mga Apostoles 15, may istorya na naribók an Simbahan sa Antioquía kan may mga nagtukdô na kun daí daá magsunód an mga bâgong Cristiano sa mga tugon ni Moises sa mga Judío, siring kan circuncisión, daí sinda makakaligtas. Kayâ nagtipon an mga pamayó kan Simbahan sa paggiya kan Espiritu, dangan pinadará ninda si San Pablo asín mga pag-iriba sa Antioquía tanganing husayon an saláng katukdoán. Sa Gibo 15,28 sinabi ninda: “Naisipan kan Espiritu Santo asín man niamò na daí na kamó pagpagabatan...”

Kun magdanay kita sa Espiritu Santo, tutukdoán Niyá kitáng mámoót susog sa katotoohan asín katalingkasan nin Diós.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin paghirô kan Espiritu nin katotoohan, katoninongan, asín pagkamoot sa saimong buhay.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Bagong Tugon nin Pagkamoot

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Mayo 18-24, 2025. Basahon an Evangelio gikan sa Juán 13,31-35 (Ikalimáng Domingo kan Pasko kan Pagkabuhay-Liwát - C).

…

Sa Evangelio nagtukdô an satóng Kagurangnan Jesu Cristo sa mga disipulos: “Bâgong tugon itinátaó Ko saindo: magkaminorootan kamó; siring na namòtan ko kamó, kamó man magkaminorootan” (Juán 13,34).

Anó an bâgo sa tugon na iní? Dati na man kitáng pigtugon na magkaminorootan. Sa Mateo 7,12, tinukdô ni Jesús: “Gibohon nindo sa ibá an boót nindong gibohon ninda saindo. Iní an kahulugán kan Katugonán ni Moises asín mga katukdoán nin mga profetas.”

Iní an pig-áapód na “bulawan na tugon” (golden rule). Maski sa ibáng mga relihiyon asín kultura, may nasusurat man na siring na kadonongan. Patunay lamang iní na inaakò nin kadaklan an kaisipan na kun kitá nganì mâwot an karahayan kan satóng sadiri, maninigò lamang na respetohon ta man an satóng kapwa. Iyó man iní an sinasabi sa ikaduwá sa Pinakadakulang Tugon. Sabi ni Jesús sa Marcos 12,31: “Kamòtan mo an saimong kapwa arog kan pagkamóot mo sa saimo man saná.”

Alagad kun an sadiri ta saná an patugmadan nin pagkámoot asín hustisya, pwede iníng magbalík sa ináapód na “lex talionis” (law of the talon) nin Lumang Tipan. Susog sa Levitico 24,19-21: “An siísay man na makákulóg sa saiyang kapwa, kukulogán man siring kan ginibo niyá. Kun nakabarì siyá nin tôlang, babarían man siyá nin tôlang, matá sa matá, ngipon sa ngipon.  An ginibo niyá sa saiyang kapwa, iyó man an gigibohon saiya. An siísay man na magbunô nin hayop na bakô man saiya, mabayad kaiyán. An siísay man na maggadán nin tawo, gagadanón man.”

An bâgong tugon ni Jesús oróg sa mga naenot na tugon nin huli ta bakô na an sadiri an patugmadan asín sukulán kun anó an tamang pagkámoot sa kapwa, kundî an satóng Kagurangnan na mismo. Kayâ mámoot kitá siring na kitá namòtan Niyá. Pâno ipinahilíng asín itinukdô satô ni Jesús an Saiyang pagkamóot?

Maenot na mámoot.

Sabi ni San Pablo sa Roma 5,8: “Ipinahilíng nin Diós an Saiyang dakulang pagkámoot satô kan si Jesús nagadán para satô kan kitá mga parakasalà pa.”  Bâgo ta Siyá namidbidan, namòtan na Niyá kitá. Bâgo ta Siyá pinilì, pinilì na Niyá kitá.

Kamòtan an kaiwal.

Sa Mateo 5,44, tinukdô ni Jesús: “kamòtan nindo an saindong kaiwal, asín ipamîbî nindo an mga nagpapasakit saindo.” Nagsaksi Siyá kainí hanggang sa hurí, mantang naghihingagdan sa cruz, hinagad Niyá sa Amâ na patawadon an Saiyang mga paragadan asín an mga nag-oológ-olog Saiya.

Magpatawad sa nagkasalà.

Kan si San Pedro naghapót kun piráng beses dapat na patawadon an tugang na nagkasalà, sinimbag siyá ni Jesús sa Mateo 18,22: “Bakóng pitóng beses, kundî pitóng polò may pitóng beses.” Dangan tinukdoán Niyá kitáng mangadyè sa Amâ na patawadon kitá sa satóng mga kasâlan siring na pinapatawad niatò an mga nagkakasalà satuyà.

Idusay an sadiring búhay. 

Sa Marcos 10,45, sinabi man ni Jesús sa mga disipulos: “An Akì nin Tawo daí nagdigdi tanganing paglingkodán kundî tanganing maglingkod asín magdusay kan búhay Niyá tanganing matubós an dakúl na tawo.” An sukulán nin pagigin dakulà asín enot sa gabós, bakô an pagkapót nin kapangyarihan o pagpayaman sa sadiri, kundî an mapakumbabáng paglingkod, pag-enot sa karahayan nin kapwa, asín pagdusay kan sadiri.

Sa Kapahayagán 21,5, nagsabi an Kagurangnan: “Uya, ginigibo Kong bâgo an gabos.” An pag-utób sa bâgong tugon Niyá an dalan pasiring sa bâgong langit asín dagâ.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás kun pâno an satóng pagkamóot nakakabaing sa pagkamóot ni Jesús, o kun pâno kaipuhan ta pang magtalubò tanganing magin siring Saiya.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Kagurangnan Iyan!

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Mayo 4-10, 2025. Basahon an Evangelio gikan sa Juán 21,1-19 (Ikatolóng Domingo nin Pasko nin Pagkabúhay-Liwát - C).

…

An istorya sa Evangelio susog ki San Juán iyó an ikatolóng pagpahilíng kan satóng Kagurangnan Jesu Cristo sa Saiyang mga disipulos. Igwa iníng duwáng kabtang. An enot iyó an pagsirâ kan mga disipulos asín an milagro nin dakulang dakóp nin mga sirâ. An ikaduwá iyó an istoryahan ni Jesús asín ni Simón Pedro kun saén makatolóng beses hinapót si Simón kun namomòtan niyá si Jesús oróg sa gabós.

Sa istoryang iní, na panô nin simbolismo asín koneksyon sa ibá pang mga istorya sa mga Evangelio, mahíhilíng ta man kun pâno maghirô an Diós sa búhay nin tawo. Asín pag an tawo magsimbag sa presencia nin Diós sa saiyang búhay, digdi minatalubò an pagtubód.

An Diós nagráraní sa tawo.

Pakatapos kan magdamlag na pagsirâ alagad daíng dakóp, amay na aga nag-abót si Jesús asín nagsabi na ihulog ninda sa too an hikót, asín nangyari an milagro. Kun pamilyar satô an istoryang iní, iyó nin huli ta may siring man na istorya sa Evangelio ni San Lucas, alagad nangyari sa pagpoón kan ministerio publico ni Jesús asín pag-apód sa mga enot na disipulos.

An bunga kan pagraní ni Cristo iyó an pagkamidbid Saiya kan mga disipulos. Sa Juán 21,7, sinabi ni Juán, an disipulong padangat ni Jesús, ki Pedro, “An Kagurangnan iyan!” Sa istorya ni San Lucas, an mga enot na inapód ni Jesús nagin mga disipulos Niyá.

An Diós nag-aagda sa pagtalubò sa komunidad.

Kan nakaabót sinda sa baybayon náhiling ninda si Jesús, may nakaandam na pamahawan asín nag-aagda saindang mamahaw. Iníng pagtiripon kan mga disipulos sa pagkarakán, patí na an paglibot ninda kaidto sa mga banwaan, sa pag-adal kan mga katukdoán ni Jesús, asín pagtabang sa ministerio – pinapatalubò an saindang pagtubód kaiba an komunidad na tinipon ni Cristo.

Pinapahilíng man kainí na an presencia nin Diós namamatean bakô saná sa mga darakulà asín makangangalas na mga bagay, kundî patín sa mga ordinariong iribahan asín saradít na gibo sa aroaldaw.

An Diós nagpapakarháy nin mga náraot na relasyon.

Nin huli ta parte sa experiencia nin pagigin disipulo an magkasalà, mapadungkal, o maglakáw sa saláng dalan – an Diós pinapahilíng na daí Siyá nawawàran nin paglaom sa satô. Danay Siyáng yaon asín andam na magpatawad sa tawong boót magbaklî asín magbâgo. Saróng populár na interpretasyon kun natà makatolóng beses hinapót ni Jesús si Simón Pedro kun namomòtan Siyá kainí, iyó na tanganing pakarayón an náraót nindang relasyon asín haleon an kasusupgan ni Simón Pedro sa makatolóng beses niyáng pagnegarán ki Jesús kan banggi na Siyá inaresto, bâgo pa man magturaok an manók.

An Diós nagsusugò sa misyon.

An cada simbag ni Simón Pedro, sisundan ni Jesús nin: “Atamana an Sakóng mga cordero;” “Pastorán mo an Sakóng mga karnero;” dangan “Atamana an Sakóng mga karnero.” Hinihirás ni Jesús an Saiyang pagigin marhay na pastor ki Pedro, asín an tinaó saiyang katongdan na mamayó sa komunidad nin mga disipulos, daí saiya hinalè maski nganì siyá nagkasalà, kundî binabàgo asín pinapadagos. Sa Mateo 16,18, sinabihan bagá siyá ni Jesús: “Ika Pedro, an gapô na iyó an tutugdokán Ko kan Sakóng Simbahan.”

Siring man sa Mateo 4,19, nagsabi si Jesús sa mga enot Niyáng inapód: “Sumunód kamó Sakô, asín gigibohon ko kamóng parasirà nin mga tawo.” Nin huli ta an presencia nin Diós tinátaó satô bakô para sa sadiri lamang kundî na ihirás sa kapwa, tanganing siring na kitá naherakan, makadará man lugód kitá nin kapwang parakasalà pasiring ki Cristo asín sa Saiyang Kahadean.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kun pâno mo namatean an presencia nin Kagurangnan sa saimong búhay, asín kun pâno mo iní nahíhirás man sa kapwa.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

An Evangelio nin Pagkaherak

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Abril 27 – Mayo 3, 2025. Basahon an Evangelio gikan sa Juán 20,19-31 (Ikaduwáng Domingo nin Pasko nin Pagkabuhay-Liwát).

…                                                                                                                                   

An devoción sa Diósnon na Pagkaherak pinalakóp ni Sta. Faustina Kowalska, saróng madreng taga-Poland, na pinahilingán mismo kan satóng Kagurangnan Jesu Cristo nin huli ta boót Niyáng oróg na mamatean nin katawohan an biyayà kan Saiyang pagkaherak. Tinugon Niyá man an pagcelebrár kan Ikaduwáng Domingo nin Pasko nin Pagkabuhay-Liwát bilang Domingo nin Diósnon na Pagkaherak. Kayâ kan taón 2000, kasabáy kan canonización ni Sta. Faustina, pigdecreto ni Papa San Juán Paulo II an celebración kainí sa bilog na Simbahan.

An istorya sa Evangelio ni San Juán iyó an pagpahilíng ni Jesús sa Saiyang mga disipulos nin duwáng beses: enot sa banggi kan aldaw na Siyá nabuhay-liwát, dangan sa banggi giraray makalihis an walóng aldaw. Maninigò iníng istorya sa pagcelebrár kan Domingo nin Diósnon na Pagkaherak, nin huli ta an pagkabuhay-liwát ni Cristo iyó an kapangganahán kan pagkaherak na duminaóg sa pwersa nin karâtan asín kakurihan.

Dinaóg Niyá an takot asín sinalidahan nin katoninongan.

An saradong mga pintoan asín mga lanób kan haróng na pigtaguan kan mga disipulos, patín an saindang pusong tarakót asín suropóg (huli kan saindang pagdurulág kan si Jesús pigpapasakitan), daí nagin uláng sa kapangyarihan nin Saiyang pagkaherak.

An takot ginagamit nin mga makapangyarihan asín maraot tanganing, sa paagi nin pagsaksing-putik, madagit an kadakul sa mga pigpapamidbid saindang kaiwal asín magdolot nin pagkabarangâ sa sociedad – tanganing mamantenér an saindang pagkapót sa kapangyarihan asín mga gibong maraot. Alagad an mga maimbód aram na an katanosan na dará kan pagkaherak nin Diós saná an makákataó nin tunay na katoninongan asín kauswagán para sa gabós.

Dinaóg Niyá an pagduwa-duwa asín sinalidahan nin pagtubód.

Kan nagpahilíng giraray si Jesús, tinâwan Niyá nin atensyon si Sto. Tomás, asín pinarà an saiyang pagduwa-duwa. Nin huli sa gibong herak na iní, nasambit ni Sto. Tomás sa Juán 20,28, an sarô sa pinakamagayón na confesión nin pagtubód sa Biblia: “Kagurangnan ko, asín Diós ko!”

An ginibo ni Cristo na pagpahayag kan katotoohan kan pagkabuhay-liwát, na panô nin pakasabot sa kapurisawan asín krisis na inaagihan ni Sto. Tomás asín mga pag-iribang disipulos, nagtátaóng ehemplo sa paglaban niatò sa presenteng krisis nin disinformación asín kaputikan. Sabi ni Jesús sa Juán 8,32, “katotoohan an magpapatalingkas satô.” Kun arogon ta Siyá sa pagpahayag nin katotoohan na may pagkaherak, dakúl an kapwang madádará niatò halè sa diklom nin kaputikan pasiring sa liwanag nin katalingkasan.

Dinaóg Niyá an pagkamakasadiri asín sinalidahan Niyá nin pagdusay nin sadiri sa pagbalangibog kan Marhay na Baretà.

Sa Evangelio ni San Juán, an paghilig kan Espiritu Santo sa mga disipulos nangyare bakô sa aldaw kan Pentecostes kundî sa enot na banggi na nagpahilíng si Jesús sainda. Kan bangging itó, sinugò Niyá an mga disipulos sa misyon dangan hinangosan sinda kan Saiyang Espiritu. Sa Juán 20,22-23, sinabi Niyá: “Akoa nindo an Espiritu Santo. An kiisay man na kasâlan na saindong patawadon, mapapatawad; an daí nindo patawadon, daí mapapatawad”.

Ngonian na nagmomondò kitá sa pagkagadán ni Papa Francisco, lugód mas ma-apreciár ta an pagbalangibog niyá kan Evangelio nin pagkaherak, asín magin mga mahigós na parahirás man kan Diosnón na Pagkaherak lalò na sa kapwang nangangaipo kainí.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás kun pâno nagin parte kan saimong buhay pagtubód si Papa Francisco asín an saiyang mensahe nin pagkaherak sa katawohan.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Resurrección sa Satong Panahon

Giya sa Prayer-Meeting nin mga Saradít na Komunidad nin Pagtubód (SAKOP) para sa Octava kan Pasko kan Pagkabuhay-liwat, Abril 20-26, 2025. Basahon an Evangelio gikan sa Juán 20,1-9 (Pasko kan Pagkabuhay-Liwat - C).

…

Alleluia! An satóng Kagurangnan Jesu Cristo nabuhay-liwát! An Saiyang Pagkabuhay-liwát iyó an nagtátaóng kahulugán sa gabós, lalò na sa mga misterio kan satóng pagtubód. Huli kainí nautób an mga profesía ni Jesús dapít sa Saiyang sadiri. Sabi man ni San Pedro sa Gibo 2,31, huli kainí nautób an profesía ni Hadeng Davíd sa Psalmo 16,10, na si Jesús “daí pinabayaan sa Sheol, ni nakanamit an Saiyang lamán nin kalapaan.”

Kayâ nagsabi si San Pablo sa 1 Corinto 15,14: “Kun si Cristo daí binuhay-liwát, sayang an samóng pagtukdô, asín sayang an saindong pagtubód.” Kayâ an enot na aldaw kan semana kun nuarín nabuhay-liwát si Cristo, pigcecelebrar na kaidto pa man kan suanoy na Simbahan bilang bâgong Aldaw kan Kagurangnan; asín hanggang ngonian an cada Domingo sa bilog na taón, saróng sadít na celebracion kan Domingo de Resurrección.

Kan Viernes Santo, piggiromdom ta an Saiyang pagsakit asín pagkagadán. Kan Sabado de Gloria, an Saiyang paghilig sa mga gadán sa Sheol, kun saén dinará Niyá sa mga yaon dumán an Saiyang gracia. Asín sa Saiyang Resurrección, binuksan Niyá an pintoan nin langit para sainda asín para satô gabós.

Anó an maninigong simbag ta sa oróg kadakulang pagkamoot na iní nin Diós satuyà?

Pakusogón an satóng paglaom. 

Sabi ni San Pablo sa Roma 6,5: “Kun kitá nakisumarò sa Saiyang kagadanan, makakabaíng man kitá sa Saiyang pagkabuhay-liwát.” Daí hinahagad satô na magpapakò man sa cruz o maghampak kan sadiri, kundî na magpagadán kitá sa satóng mga kakundian asín pagkamakasadiri, dangan an mga kaiba kainíng mga kadipisilan asín pagsakit akoon sa ngaran ni Jesús. Iní an mga sacrificio na may paglaom, huli ta kaiba ta si Cristo sa gabós na iní ngonian pa saná, asín sa katapusan pinanugaán kitáng makakahirás sa Saiyang kamurawayan.

Sa panahón kan eleksyon, giromdomón ta na an pagpagál asín pagsakit para sa katanosan, katotoohan, asín pusog na paglingkod sa banwaan, may panugáng kamurawayan ki Cristo. An magdádará nin paglaom sa satóng banwaan bakô kapangyarihan, kayamanan, o popularidad, kundî an pag-arog sa pagdusay nin búhay ni Jesús na, susog sa Mateo 20,28, “napadigdi bakô tanganing paglingkodan, kundî na maglingkod.”

Panibâgohon an satóng panugâ sa pagtubód.

Sa mga Misa sa Domingo de Resurrección, ginigibo an Pagbâgo kan Panugâ sa Bonyag. Igwa iní nin duwáng kabtang: an pagsikwal ki Satanás, sa saiyang mga padayà, asín mga maraot na gibo; asín an pagpahayag nin pagtubód sa Diós Amâ, Akì, asín Espiritu Santo, patín sa mga gibo kan Espiritu, kaiba na an satóng Simbahan.

Sa panahón kan eleksyon, may pagpipilì kitáng dapat gibohon na oróg pa kisa pagpilì nin mga kandidato—an pagpilì kun ano an tamà asín marhay sa matá nin Diós. Asín pagsikwal sa mga gibo kan demonio—an pagsamantalá sa mga dukhâ; asín paggamit nin kwarta, ayuda, violencia, kaputikan asín disinformacion.

Darhon an Marhay na Baretà nin pagkamoot.

Siring na dinará ni María Magdalena an baretà kan Pagkabuhay-liwát sa mga disipulos, kitá man ináapód na darhon an Marhay na Baretà sa kapwa sa gabós na panahón asín lugar, patín sa pulitika asín paglingkod sa banwaan.

Sa panahón kan eleksyon, an Evangelio an sukolán ta sa pagpilì nin mga kandidato. Aramon ta kun naaayon sa Evangelio an saindang mga ginibohan, plataporma, asín personál na búhay.  Tabangan ta an mga kapwa botante na magiyahan kan liwanag kan Evangelio sa pagboto.

…

GIYA SA PAGHIRÁS SA SADÍT NA KOMUNIDAD O PAMILYA | Ihirás kun pâno mo ipapahayag sa kapwa an Marhay na Baretà kan Pagkabuhay-liwát ngonian na panahón kan eleksyon.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Sarong Hawak asin Sarong Espiritu ki Cristo

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Mayo 19-25, 2024. Basahon an Evangelio gikan sa Juan 20,19-23 (Solemnidad kan Pentecostes).

…

An Evangelio iyó an versión ni San Juán kan paghilig kan Espiritu Santo na nangyari sa banggi kan aldaw na si Jesús nabuhay-liwát asín nagpahilíng sa Saiyang mga disipulos. Alagad an istorya kan Pentecostes yaon sa ikaduwáng capitolo kan mga Gibo kan mga Apostolés.

An Pentecostes tataramon na Griego na boót sabihon ika-50 aldaw. Para sa mga Judío, ika-50 aldaw poón sa Pascua, asín fiesta nin pag-ani asín pagromdom kan pagtaó nin Diós kan Tugon ki Moisés para sa Saiyang Banwaan. Para sa mga Cristiano, ika-50 aldaw poón sa Domingo de Resurreccion asín celebración kan paghilig kan Espiritu Santo sa mga disipulos asín pagtaó sainda nin labi-labing gracia para sa misyon – kayâ iní man an aldaw kan pagtogdás kan Simbahan. Kadakul an gibo kan Espiritu sa Simbahan, matutok kita sa toló.

Espiritu nin Kapatawadán

Sabi ni Jesús sa Juan 20,22-23: “Akoa an Espiritu Santo. An kiísay man na mga kasâlan na patawadon nindo, para sainda pinatawad iyán; an kiísay man na mga kasâlan na daí nindo patawadon, daí iyán pinatawad.” Tinaó ni Cristo sa Simbahan an katongdan na magpatawad sa kapangyarihan kan Espiritu. Iní ginigibo kan Simbahan sa mga sacramento kan Bonyag asín Reconciliación.

Saróng tandâ na nabubuhay kita sa Espiritu iyó an satong pagpatawad sa mga nagkasalà satuya – siring na sigurado an Saiyang kapatawadán sato kun kita magbaklê, magtalikod sa kasâlan, asín magbâgong-buhay.

Espiritu nin Katotoohan

Nanugâ si Jesús sa Juán 16,13: “Pag mag-abót na, Siya na iyó an Espiritu nin katotoohan, aantabayan Niya kamo sa gabós na katotoohan”. An katotoohan na iní iyó an Marhay na Baretà kan kabôtan asín pagkámoot nin Diós sato na nautób sa Misterio Pascual ni Jesu Cristo asín sa pag-abót kan Espiritu.

Dangan tinatàwan man kita nin isog para ihirás iníng katotoohan asín darhón an kapwa sa tunay na pagtubód. Sa satong panahón na panô nin disinformación asín kaputikan, an lambang Cristiano ináapód na magin matanos asín maisog sa pagpahayag kan katotoohan.

Sa istorya kan Pentecostes sa mga Gibo kan mga Apostoles, kan an mga disipulos nagpahayag kan Marhay na Baretà, nagkangaralás an mga tawo na halè pa sa mga manlaén-laen na lugár, nin huli ta nasabotan ninda an sinasabi kan mga disipulos maski man-ibá-ibá an saindang mga lenguaje. Iní an plano nin Diós susog sa 1 Timoteo 2,4: “An Diós boót na an gabós na tawo makaligtás, saká makamidbid kan katotoohan”.

Espiritu nin Pagkasararô

Sabi ni San Pablo sa 1 Corinto 12,4: “May manlaen-laen na carisma, alagad iyó man sanáng Espiritu; manlaen-laen na paglingkod alagad iyó man sanáng Kagurangnan; manlaen-laen na gibo-gibo, alagad iyó man sanáng Diós na nagháhamán nin gabós sa gabós”. An Espiritu Santo an nagboboronyóg kan Simbahan. Siya an nagtutukdò sato sa pamîbî, an nagcoconsagrár sa Eucaristía kan Hawak asín Dugô ni Cristo, tanganing kita magin “saróng hawak asin saróng espiritu ki Cristo”.

Sa satong diocesís, igwa na kitang siyám na comisión nin mga ministerio (Worship, Christian Education, Social Concerns, Temporalities, Ecclesial Communities, Family and Life, Youth, Clergy and Consecrated Persons, asín Media and Communication) na nagtatarabang sa paggibo kan pinanibâgong pangkabilogan na Evangelización asín pagmuknâ kan sararô asín saradít na komunidad nin pagtubód (SAKOP). Darhon man lugód kita kan Espiritu Santo sa pagmisyon asin paglingkod sa Banwaan nin Diós sa paagi kan arín man sa mga ministeriong iní.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin saimong experiencia sa ministerio o paglingkod sa Simbahan na pinakusóg, pinauswag, o pinabunga kan Espiritu Santo.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Bagong Tugon Tinatao Ko Saindo

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Mayo 5-11, 2024. Basahon an Evangelio gikan sa Juán 15,9-17 (Ikaanóm na Domingo kan Pasko kan Pagkabuhay-Liwát - B).

…

Sa Evangelio tinaó ni Jesús iníng tugon: “Magkaminootan kamo siring sa pagkamoot Ko saindo.” Sa Juán 13,34, inapód Niya iní na Saiyang “bâgong tugon” nin pagkamoot.

Kun iní an bâgo, anó an lumang tugon? Sabi ni Jesús sa Mateo 5,43: “Nadangog nindo na sinabi kaidto, ‘Kamòtan mo an saimong katood asín kaongisán an kaiwal’.” Masasabi man na parte pa kan lumang tugon an inaapód na “golden rule” na yaon man sa Mateo 7,12: “gibohon nindo sa ibá an boót nindong gibohon ninda saindo”; o daí mo paggibohon sa kapwa an habô mong gibohon man saimo.

Anó an pagkakaiba kan bâgo sa lumà? Sa lumang tugon an satong sadiri an patugmadan asín sukol nin pagkámoot; alagad sa bâgong tugon si Cristo an patugmadan asín sukol nin pagkamoot. Asín pàno si Cristo námoot? Sa mga Evangelio pinamidbid Niya an Diós nin pagkamoot sa Saiyang mga tataramon asín gibo, tanganing magín satong giya asín pangarogan.

Si Cristo an naenot námoót.

Sa Evangelio sinabi Niya: “daí nindo Ako pinilì; kamo an pinilì Ko”. Kun kita maenot na mámoot pwede kitang isikwál o daí akoon siring na si Jesús siníkwal nin kadakul kan Siya napadigdi sa dagâ. Kadakul sato an natatakot isikwal asín makulgan, alagad kun nagpadaóg si Jesús sa takot na iní, daí kutâ nakaabót sato an kaligtasan.

An pagkámoót ni Cristo pig-eenot an karahayan kan namomòtan.

Sa Evangelio sinabi Niya na hinihirás Niya an Saiyang bâgong tugon tanganing maihirás man an Saiyang kaogmahan sa mga disipulos. Dangan itinaás Niya an saindang dignidad: bakô sinda mga sorogoón o oripon, kundî Saiyang mga katood o amigo. Iní an kabôtan nin Diós: na ibalik sato an dignidad na rinaót nin kasâlan. Kayâ sa paagi kan bonyag, kita nagigin mga akì kan Amâ, tugang ni Jesu Cristo, templo kan Espiritu Santo. Kita man nakakabaíng ki Cristo kun an satong pagkámoot minamàwot an karahayan kan kapwa, bakô na ginagamit sinda para sa sadiring interes.

An pagkámoót ni Cristo nagpapatawad.

Sa Lucas 23,34, kan naghihingagdán na Siya sa cruz, sarô sa Saiyang huríng “siete palabras” iyó iní: “Amâ, patawada sinda huli ta daí ninda aram an saindang ginigibo.” Kayâ tinukdoán Niya man kitang mamîbì sa Amâ na “patawadon an satong mga kasâlan, siring na pinapatawad ta an mga nagkakasalà satuya”.

An pagkámoót ni Cristo para sa gabós, maski sa kaiwal.

Sinabi Niya sa Mateo 5,44: “Kamòtan nindo an saindong mga kaiwal asín ipamîbì nindo an mga nagpapasakit saindo”. An Diós na nagpapaurán asín nagpapasaldáng nin aldaw sa maraot asín marhay, namómoót sa gabós: katood man o kaiwal niato. Asín an lambang kaiwal, potenciál na katood asín pag-iriba sa paglakbay sa dalan pasiring sa Kahadean.

Si Cristo idinusay an buhay sa pagkámoót satuya.

Sabi Niya sa Juán 15,13: “Oróg kainíng pagkámoót mayo an siisay man: na itayâ an saiyang kalág para sa saiyang mga katood.” An pagdusay nin buhay bakô saná sa paagi nin pagigin martir sa pagtubód o ano man na halangkaw na causa, kundî sa aroaldaw na pagpagadán sa satong pagkamakasadiri, pagkaurí, kapaabaw-abawan, halîpot na paciencia, panghuhusga, asín ibá pa – tanganing mámoót siring n akita namòtan ni Cristo.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kun pàno mo naisabuhay an pagkaminoót-mootan siring sa pagkámoót ni Cristo, sa laóg kan saimong pamilya o komunidad nin pagtubód.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People Closing Prayer • (Spontaneous and Our Father) • Closing Song

 

Siya an Balagon, Kita an mga Sanga

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Abril 28-Mayo 4, 2024. Basahon an Evangelio gikan sa John 15,1-8 (Ikalimáng Domingo kan Pasko kan Pagkabuhay-Liwát-B).

…

Sa Evangelio nagpahayag an satong Kagurangnan Jesu Cristo na Siya an poón nin balagon asín kita an mga sangá. Anó an kahulugán kainí?

Bakô kitang solo kundî parte kita kan Hawak ni Cristo.

Minsan sa satong buhay namamatean ta na garó solong pinapàsan ta an mga problema. Alagad an Kagurangnan nagpapagiromdom sato: daí kita nagsosoló-solo; dai Niya kita pinapabayaan; mahalagá kita Saiya; nin huli ta kabtang kita kan Saiyang hawak. Sabi ni San Pablo sa 1 Corinto 12,12: “Ta, siring na an hawak sarô asín dakúl an kabtang, alagad an gabós na kabtang kan hawak, minsan dakúl, sarô sanáng hawak, siring man si Cristo.”

An Simbahan an Misticong Hawak ni Cristo digdi sa dagâ. Alagad may mga nagsasabi na daí daá kaipuhan an Simbahan o relihiyon, kundî si Jesús saná tamà na. Salâ iníng paghonà. Nin huli ta an kabôtan ni Cristo iyó na kita magkakasararô sa Saiya, bakô magkaranya-kanya. An Simbahan nag-aataman kan satong pagtalubò sa buhay-pagtubód, tanda kan pagkaherak nin Dios sa katawohan, asín pag-iriba sa dalan pasiring sa Kahadean.

Si Cristo an satong kusóg asín buhay.

An gabós na bagay linaláng sa paagi Niya. Sa saiyang pagkagadán asín pagkabuhay-liwát, binuksan para sato an pintoan nin kalangitan; asín ngonian pa saná sa lambang Misa pinapakakán Niya kita kan tinapay na nagtátaó nin buhay na daing kasagkoran.

Sabi sa Filipos 4,13: “Gabós kaya ko sa Saiya na nagpapakusóg sako”. Bakô boót sabihon kainí na an gabós pwede tang gibohon ta si Cristo nagsusuporta satuya. Kundî nin huli ta inakò ta Siyang Kagurangnan asín Paraligtas, ginibo ta an Saiyang tugon na giya kan satong buhay, an Saiyang dalan satong linálakawán, asín an Saiyang cruz satong pinapàsan – kayâ sa siring na kahulugán, magigibo ta an gabós.

Sinugò kita ni Cristo na magbunga.

An katuyohán kan satong pagigin sangá ki Cristo, iyó na kita magbunga. Sabi Niya sa Juan 15,16: “Bakô kamo an nagpilì Sako; kundî Ako an nagpilì asín itinalagâ Ko kamo na maglakáw asín magbunga, asín an bunga nindo magpadagos.” An bungang iní nahíhilíng sa satong mga gibo asín bilog na buhay. Sabi sa 1 Juan 3,18: “Daí kita mámoot sa tataramon ni sa dilà, kundî sa gibo asín katotoohan.”

Alagad tanganing magbunga nin dakúl kaipuhan linigon asín putolón sato an mga sangá-sangáng daí kaipuhan asín nakakauláng, lalò na an satong kapaabáw-abawan, pagkamakasadiri, kahugakan, asin mga pagkatakot. An pagputól na iní pwedeng gibohon sa pagdisiplina sa sadiri alagad minsan nangyayari man sa pag-agi ta sa mga pagbalô sa buhay.

Kun an kaimbodán magdádará sato sa kapanoan nin buhay, an buhay na makasâlan minaputol sato tanganing isiblag kita ki Cristo. Iní an pagputól na nakakagadán, nin huli ta an sangá na tinapyas sa poón, naaaláng asín daíng ibáng pakinabang kundî panggatong. Daí kita inapód ni Cristo tanganing isugba saná sa kalayo kundî tanganing magbunga. Kayâ magdanay kita Saiya asín magbunga nin dakúl.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin pagigin maimbod sa satong poón na balagon na iyó si Cristo o experiencia nin pagkatapyas sa Saiya nin huli sa kasâlan asín sugót.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People Closing Prayer • (Spontaneous and Our Father) • Closing Song