An Marhay na Samaritano

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Julio 13-19, 2025. Basahon an Evangelio gikan sa Lucas 9,25-37 (Ika-15 Domingo sa Ordinariong Panahón - C).

…

Ngonian na panahón pamilyar na gayo satô an imahe kan marhay na Samaritano. An tawong nagtatabang sa nangangaipo ináapód tang “good Samaritan.” Alagad kaidtong enot na pig-istorya kan satóng Kagurangnan Jesu Cristo iníng parabola sa mga Judío, kontrobersyal iní – nin huli ta an mga Samaritano kaiwal kan mga Judío. Hilnga kun may pagkaomagíd iní ngonian na panahón sa pag-iwal asín pang-aapí kan mga Judío sa mga Palestino.

Halawig asín hararom an saindang iriwal. Nagpoón pa kaidtong pag-urulî kan mga bihag na Israelita makalihis an 70 taón na destierro (exile) sa Babilonia. Kan taón 539 BC buminagsak an Imperiong Babilonia sa kamót kan Imperiong Persia. Nagtugot an hadè kan Persia, si Cyrus the Great, na mag-urulî sa mga sadiring banwaan an mga bihag kabilang na an mga halè sa dating kahadean nin Judah (kayâ mga Judío an apód sainda). 

An mga natadà sa Israel (na Samaría an capitál na ciudad, kayâ mga Samaritano an apód sainda), kontra sa pagbalík kan mga Judío asín pagtogdas ninda kan bàgong Jerusalém. Pigmemenos man kan mga Judío an mga Samaritano nin huli ta bakô puro an saindang dugóng Israelita huli sa pakipag-agoman sa mga kataed na paganong naciones, pag-arog sa mga gawè kan mga iní, asín an ibá sainda nagsasamba pa nganì sa mga diós-diósan.

An parabolang iní dapít sa pagkaherak nin Diós. Kaidto pa man hanggang sa ngonian, an pagkaherak nin Diós minabanggà sa mga makasadiring kaisipan (mindset), kaugalian (value system), asín kultura (cultural norms).

An pagkaherak an pangenot na katongdan.

Tibaad may dahilán na válido para sa mga Judío kun natà an padì asín clero o Levita daí nagtabang sa biktima, siring bagá kan paglikáy na tibaad maatián (unclean), lalò na ta sinda naglilingkod sa Templo. Susog kayâ sa Numero 19,11-13, an makákapót nin gadán na tawo magigin maatî sa laóg nin pitóng aldaw asín kaipuhan magrayô ngôna sa banwaan asín sa Templo. Tibaad kayâ garó gadán na paghilingón idtong biktima. Alagad malinaw an mensahe ni Jesús: an pagkaherak an oróg sa gabós na obligasyon asín mas oyon sa matá nin Diós. Sabi Niyá sa Mateo 9,13: “pagkaherak an hinahanap Ko, bakô sacrificio”.

An pagkaherak nin Diós daíng pinipilì kun siísay.

Sa parabola, an kaiwal iyó an may pagkaherak sa biktima, an kontrabida iyó an bida. Iní an ladawan nin tunay na pagkaherak: bakô mahalaga an lahì, relihiyon, kinatawo (gender), pulitika, o anó pa man na kategorya, kundî an dignidad asín búhay nin tawo. Siísay an mga madalî para satô na tabangan? Siísay an dipisil? Midbidón ta pa an satóng sadiri asín akóon an satóng mga pinapaoróg asín panghuhusga ta may impluwensya iní sa pagpilì ta kun magin maheherakón o daí sa kapwang nangangaipo.

An pagkaherak nin Diós daíng sukol.

Kanigoan na gayo an gibong-herak kan Samaritano – nagraní sa biktima, binulóng iní, dinará sa ligtas na lugar, inataman, nagwalat pa nin kwarta sa dinagosan tanganing dagos iníng atamanon. Siring kainí an tunay na pagkaherak: daíng sukol, bakô su “pwede na” o pakitang-tawo saná.

Sa hurí, iní an simbag ni Jesús sa abogadong naghapót: “Kun siring, lakáw. Iyó man an gibohon mo.” Iyó man an boót Niyang ipasabot satô ngonian: na an búhay na daíng kasagkoran makakamtan kun kitá, susog sa sinabi Niyá sa Lucas 6,36, “magín maheherakón, siring na an saindong Amâ maheherakón.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kun pâno ka natabangan nin sarong marhay na Samaritano o ika man nagin marhay na Samaritano sa kapwa.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Closing Prayer (Spontaneous and Our Father) • Closing Song

Poon Ngonian Dai Ka na Magkasala

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Abril 6-12, 2025. Basahon an Evangelio gikan sa Juán 8,1-11 (Ikalimáng Domingo nin Cuaresma - C). 

…

An istorya sa Evangelio dapít sa babaeng nadakop na nakikisambay (adulterio) na dinará kan mga escribas asín Fariseos sa satóng Kagurangnan Jesu Cristo tanganing tibaad may masabi Siyá na magagamit ninda laban Saiya. Iníng pagbalga sa Ikaanóm na Tugon, may padusang kagadanan. Alagad ginibo iníng patugmadan ni Jesús sa pagtukdô sainda – asín satô gabós – kun siisay an Diós Amâ asín an Saiyang kabôtan. Nin huli ta sabi Niyá sa Juán 14,9, “An nakáhilíng Sakô, nakáhilíng man sa Amâ.”

An Diós Amâ maheherakón.

Sa pagsuróg ni Jesús sa babae, pinahilíng Niyá na an Amâ maheherakón. Dapít sa pangyayaring iní, sabi ni Papa Francisco sa saiyang Surat Apostolico Misericordia et Misera (Pagkaherak asín Pagtios): “Isinusulít ni Jesús an Ley ni Moisés sa totoo asín orihinál na katuyuhán kainí. Digdi an centro bakô an ley o hustisyang legál, kundî an pagkamoot nin Diós, na kayang maghilíng sa pusò nin lambang tawo asín sa pinakahararom na kamâwotan na nakatagò diyán. An pagkamoot nin Diós an dapat paorogón sa gabós.”

May mga naghohonà na an pagkaherak na iní garó pagkunsinti sa salâ. Bakô lamang. Sa hurí sinabihan ni Jesús an babae: “Ni Akó daí nagkokondenár saimo; lakáw, poón ngonian daí ka na magkasalà.” Daí Niyá kitá pigkukunsinti sa saláng pamumuhay, kundî naheherakan Niyá kitá tanganing bâgohón ta an satóng buháy.

Sa atubang kan Amáng maheherakón, duwáng bagay an maninigò niatong gibohon: akoon an Saiyang pagkaherak asín kitá man magin maheherakón.

Akoon an pagkaherak nin Diós.

An Saiyang pagkaherak oróg kadakulà asín nagdadanay sagkod pa man, alagad daí ta iní makúkuá kun daíng udók sa pusong pagsolsol asín pagbaklî.

Oróg sa gabós, tinátaó Niyá iní sa Sacramento kan Reconciliación. May limáng hakbang tanganing bolanos niatong makamít an Saiyang pagkaherak asín kapatawadán sa sacramento: an paghoróp-horop kan satóng conciencia (examination of conscience); an pagbasol sa satóng kasâlan (contrition); an pagkumpisál kan kasâlan (confession); an paggibo kan silot kan padì (satisfaction); asín an pagpakarhay kan mga náraot huli sa satóng salà asín daí na pagkasalà liwát (restitution).

Magin maheherakón siring na kitá naherakan.

An mga escribas asín Fariseos sa istorya, ladawan nin mga tawong daíng pagkaherak. Tamà sinda sa pagmidbid na an pakikiduróg sa bakóng agom saróng kasâlan, alagad nasalà sinda sa paghonà na an Diós naghahagad nin kagadanan. Garó man saná hinalean na ninda nin paglaom na magbâgong búhay an babaeng nagkasalà.

Kayâ sinimbag sinda ni Jesús nin paggurit sa dagâ asín pagsabi: “An mayò saindo nin kasâlan iyó an enot na maggapô saiya.” Daí ta aram kun anó an kinurit ni Jesús sa dagâ, alagad an epekto kainí iyó na luway-luway nagharalè idtong mga boót manggadán, poón sa pinakaguráng sagkod sa pinakaakì.

Romdomón ta an mga panahón na kitá man nawàran nin tiwalà sa kapwa na magbâgo asín maggibo nin karahayan. Dangan romdomón ta an satóng pangadiè sa Amâ Niamò: “patawadon Mo kamí sa samóng mga kasâlan siring na pinapatawad niamò an mga nagkakasalà samuyà.” Enot na kitáng naherakan asín pinatawad kan Amâ, kayâ kitá man dapat magpatawad sa kapwa. Sa Lucas 6,36, pinapamidbid ni Jesús satô an Amâ tanganing kita magtalubò na magin “maheherakón siring sa saindong Amâ na maheherakón.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kun pâno ka binâgo nin pagkaherak nin Diós halè sa kasâlan pasiring sa Saiyang búhay.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

An Parabola kan Amang Maheherakon

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marzo 30 – Abril 5, 2025. Basahon an Evangelio gikan sa Lucas 15,1-3,11-32 (Ikaapát na Domingo kan Cuaresma - C).

…

An parabola sa Evangelio aram niatò bilang istorya kan aking masumbikal o prodigal son. Alagad pwedeng apodón man iníng “Parabola kan Amáng Maheherakón” nin huli ta an pusò asín centro kan istorya iyó an amâ kan duwáng aking parehong may kakundîan. Dangan nin huli ta gabós na parabola kan satóng Kagurangnan Jesu Cristo nagtutukdò dapít sa Kahadean nin langit, an amâ sa istorya daíng ibá kundî an Diós Amáng maheherakón.

An Diós Amâ mamomòton sa gabós Niyáng mga akì.

Sabi ni Jesús sa Mateo 5,45: “An Saiyang aldaw pinapasirang Niyá sa mga maraot asín sa mga marhay, asín nagpapaurán Siyá sa mga suripot asín sa mga tampalasan.” Kan nasa makuring pagtios asín gutom na an ngohód na akì naromdoman niyá an pagkamarahayon kan saiyang amâ, na sa saindang haróng maski mga sorogoón daí nagugutom. Nin huli kainí nagdesisyon siyáng umulî na sa saindang haróng.

An Diós Amâ maheherakón sa mga parakasalà.

Kan natànaw kan amâ an saiyang ngohód na akì na nagdadangadang sa harayô, duminalagan siyá tulos sa pagsabát kainí, kinugos, asín pinasûlot nin pinakamarhay na badò, dangan singsing asín sandalyas—mga tandâ na ibinábalík niyá an tinalikdan kainíng dignidad nin pagigin saiyang akì. Sa Ezekiel 33,11 nasusurat an kabôtan nin Kagurangnan Diós na buháy: “Daí Ko muyá an kagadanan kan tampalasan, kundî na magbaklî an tampalasan halè sa saiyang dalan asín mabuhay.”

Alagad iníng parabola minasalming man sa satóng mga gawè bilang mga akì kan satóng Amâ. Igwang apát na pag-uugalì an pinapahilíng kan magtugang sa parabola.

An satóng pagigin masombikal.

Kan hagadon kan ngohód na akì an kahirasan niyá maski buháy pa an saiyang amâ, asín maglayas iní sa haróng, pinahilíng niyá na mas mahalagá saiya an kayamanan kisa saiyang amâ. Kitá man nagigin masombikal sa Diós kun mas pinapaoróg ta an an mga kinâbanon na kaogmahan asín kayamanan kisa sa Kagtaó kainí sa satóng búhay.

An satóng paghagad-tawad.

Kan ubós na an kayamanan patín an dignidad kan ngohód na akì, naromdoman niyá an saiyang amáng mabooton, asín nagdesisyon siyáng mag-ulî, magpakumbabâ, asín maghagad nin tawad. Asín anó an saiyang nákua? An kapatawadán asín pagkaherak kan saiyang amâ. Siring man kaiyan an satóng Amâ sa langit, pirming andam kitáng patawadon kun kitá magbaklî asín magbâgong-búhay.

An satóng pagkamaurí.

Nagluwás an pagkamaurí kan matuáng akì kan nahilíng niyá an pag-akò kan saiyang amâ sa tugang na masombikal, siring man kan mga escribas asín Fariseos kan mahilíng ninda si Jesús na nakikikakán asín nakikipag-ibahan sa mga parakasalà. Kitá man nagigin siring sainda kun matanos an paghilíng sa sadiri alagad hababâ sa kapwa. Oróg na makuri idtong mga tawong an paghilíng sa mga pigsususpetsaran pa sanáng adik o kriminal, menos na an dignidad o daí na nin derechong mabúhay—siring kan mga paragadan asín mga nag-ooyon sa panggagadán sa panahón kan Tokhang sagkod sa ngonian.

An satóng pagigin maimbod.

An matuáng akì sinasabing ladawan nin kaimbodán, alagad minsan siring kaipuhan man giraray na magtalubò siyá halè sa kaimbodán nin paggibo nin tamà asín paglikáy sa salâ, pasiring sa kaimbodán nin hararom na pagkamoot sa Diós, hanggang sa pagigin siring sa pagkamaheherakón Niyá. Sa Lucas 6,36, tinugon kitá ni Jesús: “Magin kamóng maheherakón siring sa saindong Amâ na maheherakón”.

…

GIYA SA PAGHIRÁS SA SADÍT NA KOMUNIDAD O PAMILYA | Sa pânong paagi nakaomagíd an saimong búhay sa ngohód o matuang akì sa parabola? Sa pânong paagi man ika ináapód na magin siring sa Diós Amâ?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Kapangyarihan nin Pagkaherak

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Febrero 11-17, 2024. Basahon an Evangelio gikan sa Marcos 1,40-45 (Ikaanóm na Domingo sa Ordinariong Panahón - B)

…

Sa Evangelio, binulóng ni Jesús an saróng daoton (may ketong) na nakimaherak Saiya: “Kun boót Mo, malilinigan Mo ako.” Anó an mensahe kan istoryang iní?

Enot, na an satong Diós oróg na makapangyarihan.

An daot o ketong iyó an pinaka-kinakatakutan na helang sa halóy na panahón. An tawong may helang kainí minaagi nin halawig asín makuring pagsakit. Makusóg pa iníng makaulakit. Kayâ kan binulóng ni Jesús an lalaking daoton, daí Niya saná binulóng an saiyang helang kundî tinâwan Niya siya nin bâgong buhay.

Kun an Diós makapangyarihan, pinapahilíng man kainí an kaluyahan nin tawo. Sa halawig na panahón daí nin solusyón sa daot. Daí pa nahalóy kan nagkaigwa nin masasarigan na combinación nin mga bulóng para sa helang na iní. Hanggang sa ngonian kadakul pa man giraray nin mga helang na daíng siguradong bulóng. An nakaagi pa sanáng pandemiang dulot kan COVID-19 nagpahilíng kan satong kaluyahan sa hampang nin mga darakulang problema asín misterio nin kinâban.

Alagad igwa kita nin Diós na mas makapangyarihan sa anoman na helang, problema, o makuring kasâlan. Sabi ni Jesús sa Marcos 10,27: “Sa tawo imposible, alagad bakô sa Diós, ta an gabós posible sa Diós”. An satong Diós danay na masasarigan niato.

Ikaduwá, an kapangyarihan nin Diós mas namamatean nin tawo sa Saiyang pagkaherak.

Kun si Jesús an kapanoan kan pagpamidbid kan Amâ, an ipinapamidbid Niya sato saróng Diós na mayaman sa pagkaherak. Kan nakimaherak an lalaking daoton, tulos naherakan Niya siya. Kan nagraní Saiya an mga parakasalà, pinatawad Niya sinda. Pag nahilíng Niya an katawohan na gutóm sa mga Tataramon nin Diós, naherakan Niya sinda siring sa pastór na nag-aataman sa saiyang kawan.

Kun an Diós maheherakón, pinapagiromdóm man kita kan kakulangán kan satong pagkaherak. Sa Levitico 13 nasusurat kun anó an magkakanigong aksyón sa mga tawong may daot: isiblág sa katawohan, i-obligár na mag-erok sa luwás kan banwa, magbadò nin sa may helang, asín magkurahaw sa pagpatanid kun may magraní sainda. Alagad aram niato na minsan ginigibo iní tanganing daí makaulakit sa mas dakulang populasyon, dakulang pagsakit asín kamundoan an dulot kainí sa mga may helang asín sa saindang pamilya. Kan nakaaging pandemia kadakul sato an naka-experiencia man nin nakaumagíd na pagsakit bakô saná sa mga restricción kan gobyerno kundî sa diskriminasyón nin mga tawo.

Kan pinaluwás kan Dicastery for the Doctrine of the Faith an deklarasyon na Fiducia Supplicans, dapít sa pagwaras nin bendición maski sa mga tawong nasa iregulár na sitwasyon nin pag-ibahan, kaiba na an mga nasa same-sex na relasyon – kadakul na Catolico an harabô na an mga iní matâwan man nin bendición, maski na nganì piglilinaw na iníng bendición bakô pagtugot na sa mga relasyon na nasa estado nin kasâlan, kundî nagmamàwot na sa paagi nin pagkaherak darhon sinda sa katotoohan kan Evangelio.

Garó nagkarilingawan na kan mga harabô sa paliwanag kan Fiducia Supplicans an Evangelio nin pagkaherak ni Jesús. Sinabi Niya sa Mateo 9,13: “Pagkaherak an mâwot ko, bakóng sacrificio. Ta daí Ako nagdigdi sa pag-apód sa mga mayong salà, kundî sa mga parakasalà.”

Kitang mga naherakan lugód magin mas mahéherakón, asín daí paorogón an sadiring katanosan kundî an kadonongan na halè sa mahéherakón na pusò nin Diós.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kun pàno mo namatean an pagkaherak nin Diós, o kun pàno ka man nagin istrumento nin Saiyang pagkaherak sa kapwa.

PASUNOD-SUNOD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the Faithful • Closing Prayer (Spontaneous and Our Father) • Closing Song

 

Kun an Saimong Tugang Nagkasalà

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Setyembre 10-16, 2023. Basahon an Evangelio gikan sa Mateo 18,15-20 (Ika-23 na Domingo sa Ordinariong Panahon - A).

…                                                                                                     

Kun an satong tugang nagkasalà, anó an dapat niatong gibohon?

May nagkapirang tugon si Jesús sato dapit kainí. Alagad bàgo an anó asin kun pàno, aramon ta ngùna an natà. Sabi sa Ezekiel 33,8: kun “daí ka magtarám sa pagpatanid sa tampalasan laban sa saiyang dalan, an tampalasan na iyán magágadán sa saiyang salà, alagad an saiyang dugô sa saimong kamót Ko sisingilón.”

Natà ta siring kagabát an katongdan na patanidan an tawong nagkakasalà?

Nin huli ta sa pagligtas sa katawohan sa kasâlan kayâ si Jesu Cristo napadigdi sa kinâban. Sabi ni San Pablo sa Roma 6,23: “an kabayadán  nin kasâlan iyó an kagadanan, alagad an regalo nin Diós iyó an buhay na daíng katapusan ki Cristo na satong Kagurangnan”. Hiníhirás ni Cristo sa lambang Cristiano asín sa Simbahan an Saiyang misyon na iligtas an tawo sa kasâlan asín kagadanan.

Pàno ta iní gigibohon?

An Simbahan may tradisyon na inaapod na mga Gibong Herak sa Espiritu (Spiritual Works of Mercy): (1) tukdoán an daíng pakaisi; (2) paliwanagan an nagduduwa-duwa; (3) patanidan an nagkakasalà; (4) patawadon an mga pagkakasalà; (5) magpasencia pag nagibohan nin maraot; (6) makidumamay sa nagtitios; asín (7) ipamìbì an mga buháy asín mga gadán. Gamiton ta an toló sa mga iní.

Patanidan an nagkakasalà.

Susog sa Evangelio, may tolóng kabtang pa nganì ining pagpatanid, depende sa pagigin bukás o sarado sa pagbàgo kan nagkakasalà, asín pirming may pagrespeto, pagmakulóg, asín pagkámoót.

Patawadon an mga pagkakasalà.

May duwáng nivél nin pagpapatawad digdi: an personál asín an sacramentál. An personál iyó an pag-akò giraray sa nagkasalà asín paghusay kan náraót na pag-ibahan. Kan tinukdoán kita ni Jesús na magpamìbì, tinugon Niya man kita na hagadon na patawadon kita kan Amâ siring na pinapatawad niato an mga nagkakasalà satuya.

An sacramentál na pagpatawad tinaó ni Cristo sa mga namámayó sa Simbahan sa Sacramento nin Reconciliación susog sa Saiyang tugon sa Mateo 18,18 asín Juan 20,23: “An kiisay man na kasâlan na saindong patawadon, napapatawad; an kiisay man na kasâlan na daí nindo patawadon, daí napapatawad.”

Alagad anó man iníng kapangyarihan na “daí magpatawad” asín tugon na “ibilang na Gentil o parasingil nin buwis” an saróng matagás an pusò? 

Boót sabihon kainí, may panahón na daí tinatào an absolución o kapatawadán nin kasâlan sa Sacramento nin Reconciliacion, nin huli ta nahiling kan padì na an nagkukumpisal daí nin pagmâwot na magbàgo o magpondó sa ginigibong kasâlan.

Kun magabát na gayo an kasâlan, yaon pa an penalidad nin excomunión (excommunication) o an pagbawal sa saróng Catolico na magparticipár sa mga sacramento kan Simbahan. Iní bakô tanganing magpasakit kundî tanganing magbulóng sa espiritu kan parakasalà, na sa paagi kainí mamatean niya an gabát kan saiyang kasâlan, asín madará man lugód siya sa pagbàgo nin buhay.

Ipamìbì an kapwang nagkakasalà.

Namimìbì kita bakô nin huli ta pinapasa-Diós ta na saná an parakasâlang habô magbàgo, kundî sa lambang kabtang sa dalan nin pagbaklè sa kasâlan asín pagbàgong-buhay, kaibahan ta an Kagurangnan. Kita Saiyang kasangkapan; Siya an nagpapabunga kan satong gibong-herak.

Alagad minsan nasabotan na niato kun natà asín pàno, bakô pa man giraray facil an gibong iní. Tibaad kayâ masabihan kita na nakikiarám, o na kita man nganì may mga kakundian man. O daí pa handâ na mag-akò nin salà o magbàgo an tawong boót niatong tabangan. Digdi málaóg an satong pagsarig sa gracia nin Diós. Magtabang kita na may pagkamoót, pagmakulóg, asín pagpakumbabâ, asín an Espiritu ni Cristo na nagtugon sato an mátanóm nin banhî nin pagbàgo sa pusò.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia kun pàno ka nagmangnó sa kapwang nagkakasalà, o kun ika man an naka-recibe nin siring na pagmangnó halè sa kapwa.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

An Sakal kan Kagurangnan

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hulyo 9-15, 2023. Basahon an Evangelio gikan sa Mateo 11,25-30 (Ika-14 Domingo sa Ordinariong Panahon - A).

…

Sa Evangelio madadangog niato an pinakanakakaranga sa mga tataramon ni Jesús, sa Mateo 11,28: “Madya kamo Sako, gabós na napapagal asín nagagabatan, asín tatàwan Ko kamo nin kahingaloan”. Para iní sa mga napápagál, sa mga nakakamatè nin gabát nin problema o responsibilidad sa saindang abaga, sa mga nag-aagi nin kadificilan – boót sabihon, para sa sato gabós.

Dangan sinundan ni Jesús kainí: “sûngayá an Sakong sakal”. An sakal iyó bagá idtong sinúsûngay sa abaga nin karabáw sa pag-araro sa omá o pagguyod nin pababá. An sakal gamit sa pagtrabaho, bakô sa pagpahingalò. Alagad iyó iní an tinukdô ni Jesús, asín sinabi pa Niya na “makánood kamo Sako”. Anó iníng Saiyang sakal?

Sa Biblía an sakal tanda nin pagpasakit nin tawo sa kapwa tawo. Sa Levitico 26,13 nasusurat: “Ako an Kagurangnan na saindong Diós, na nagkuá saindo halè sa Egipto tanganing dai na kamo magin mga oripon. Binarì ko na an saindong sakal asín pinalakáw ko kamo na daíng sukat ikasupog.”

Sa pag ministerio publico ni Jesús pinadagos Niya iníng pagbarì nin sakal nin katawohan sa pagbulóng nin mga naghehelang, sa pagpalayas nin mga demonio, sa pagpatawad sa mga kasâlan. Tinuyaw Niya man an mga pamayó nin banwaan na nagpapataw nin mga dagdag na kagabatan sa mga tawo. Sinabi Niya sa Mateo 23,4: “Minabugkos sinda nin mga magabát na darahon asín ipinapapâsan sa ibá, alagad maski sarô nindang murô habô nindang hirôon sa pagtabang sa pag-alsa kaiyan.”

Para sa mga nagkákapôt nin katongdan o autoridád, marhay paghorop-horopan kun an lambang gibo o pagsugò niato nagdádará sa kapwa sa karahayan o nagdádagdag saná nin pagabát na bakô man kaipuhan. Mas maraot kun an satong kaginhawahan bungang halè sa pagsakit asín kagabatan nin satong kapwa.

Alagad sa kadaklan na beses, may nakasûngay satong ibang sakal bakô nin huli ta may mga ibang tawo o sistemang nagpapasakit sato kundî huli ta pinilì tang sunodón an tentación nin kinâban – sa pagsuway sa tugon nin Diós para saná makamít an satong ambisyon, sa pagbukod sa mga kaogmahan na bakô susog sa Saiyang kabôtan, asín sa pagtipon nin mga kinâbanon na kayamanan. Ini an sakal nin kasâlan.

Alagad an sakal kan Kagurangnan iyó an Saiyang pangataman na naggigiya sa mga tamang dalan. Daí iní maakò nin mga tawong napápanô an isip asín pusò nin pansadiring interes – an mga madonong asín matalì sa kinâban – kundî nin mga kasaradayán na tataó magsarig sa Diós. An Saiyang kabôtan iyó an saindang kadonongan, asín an Saiyang pagkamarahayon iyó an saindang kaogmahan.

An sakal kan Kagurangnan iyó an misyon sa pagdará kan Marhay na Baretà sa kapwa. Iní an nagtátaó sato nin kahulugán asín katuyuhán sa buhay, lalò na kun an satong mga talento, kakayahán, asín kayamanan, ginagamit niato sa paglingkod sa Diós. Sabi ni San Pablo sa Roma 8,28: “Aram ta na sa gabós na bagay an Diós naggigibo para sa karahayan kan mga namómoót Saiya – an mga inapód Niya susog sa Saiyang katuyohán.”

Sa huri, an sakal kan Kagurangnan iyó an cruz na enot na Niyang pinâsan, na sinusugò Niyang pàsanón man nin mga boót magin disipulos Niya. Pag pinapàsan ta an satong cruz, an satong mga gibong marhay asín matanos nagigin paagi nin pagtalubò sa kabanalan asín pag-akò nin kaligtasan pasiring sa buhay na daíng kasagkoran.

An sakal nin kasâlan magdádará sato sa karâtan asin kagadanan. Alagad an sakal kan Kagurangnan nagtátaó nin kahulugán sa satong kapagalan, asín kapanoan nin buhay, ngonian pa saná asín sagkod pa man.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia kan saimong paagi nin pagsûngay kan sakal ni Cristo. Anó an naidolot kainí sa saimong buhay?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

Inapod asin Sinugo

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hunyo 18-24, 2023. Basahon an Evangelio gikan sa Mateo 9,36–10,8 (Ika-11 Domingo sa Ordinariong Panahon - A).

…

An istorya sa Evangelio nagpoón sa pagkaherak ni Jesu Cristo kan nahiling Niya an katawohan na naghahalat Saiya. Iní pinahilíng Niya, enot, sa pagsadól sa Saiyang mga disipulos na magpangadyî sa Kagurangnán na magpadará nin mga paraaní sa Saiyang aanihon; dangan, sa pagsubol sa doce na magmisyón sa “mga nawáwaráng karnero kan Israel”. Anó an mensahe sato kainí?

Enot, an Diós mahéherakón. Iní pinahayag mismo ni Jesús sa Saiyang ministerio público, sa Saiyang pagtukdô sa mga dukhâ, pagbulóng sa mga naghehelang, asín pagpatawad sa mga parakasalà. Oróg sa gabós, sa pagdusay kan Saiyang sadiri sa cruz para sa gabós na tawo – sa mga naglalakaw sa matanos na dalan asín sa mga nawáwarâ, sa mga disipulos Niya patín sa mga kaiwal Siya. Nasusurat sa Roma 5,8: “Pinamidbid na gayo nin Diós an Saiyang pagkámoót sato: kaidto pang parakasalà kita, nagadán na si Cristo para sato.”

Ikaduwá, hinirás ni Jesús an misyon nin pagkaherak sa Saiyang mga disipulos. Sabi Niya sa Lucas 6,36: “Magín maheherakón kamo, siring na an saindong Amâ maheherakón.” Kayâ inapód Niya an doce, tinâwan nin kapangyarihan, asín sinugò na maggibo nin siring sa Saiyang mga gibong herak. Siring man sa Evangelio inapód an doce na mga “apóstoles”, sa Griego apostoloi, “an mga sinugo” – sa pagdará nin pagkaherak.

An Doce Apóstoles iyo sinda: Simón na inaapód man na Pedro, Andres, Santiago, Juan, Felipe, Bartolomé, Tomás, Mateo, Santiago na aki ni Alfeo, Tadeo, Simón na Cananeo, asín Judas Iscariote. Sa Evangelio ni San Juan, isinabáy an ngaran na Natanael sa Doce, kaya pinagtutubodán na iní asín si Bartolomé parehóng tawo man saná. An nagsalida ki Judas Iscariote sa Doce iyo si Matías. Sa Bàgong Tipan igwa nin mga ináapód man na apóstoles maski bakô kasabay sa Doce, siring ki Pablo, Bernabé, Timoteo, Tito, Apolos, asín Santiago na ináapód na “tugang ni Jesús”.

An mga apóstoles minimidbid na tinâwan nin katongdán na mamayó sa pagbalangibog kan Marháy na Baretà asín pag-ataman sa mga komunidád nin pagtubód. Sa pag-agi kan panahón an mga kasalida ninda inapód na mga obispo na may katongdán sa pangataman sa Simbahan. An mga obispo hiníhirásan man an mga padì asín diakono kan saindang katongdán o oficio na maglingkod sa Simbahan. An pakikihirás nin mga clero – mga obispo, padì, asín diakono – sa misyon ni Cristo ináapód na pagkapading ministeriál (ministerial priesthood).

Alagad bakô man saná an mga clero an hinirasán ni Cristo na magpadagos kan Saiyang misyon nin pagkaherak, kundî an gabós Niyang disipulos sa gabós na panahón. An istorya sa Evangelio nin pagsubol sa misyon sa mga apóstoles, pasabóng asín pag-andam saná sa Dakulang Pagsugò na itátaó ni Jesús sa gabós Niyang mga disipulos bàgo kan Saiyang Ascensión sa langit. Sa Mateo 28,19-20 nagsugò Siya: “Lakáw kamo, gibohang disipulos an gabós na nación! Bonyagán sa ngaran kan Amâ, kan Akì, asín kan Espiritu Santo. Tukdoán na mag-utób kan gabós Kong itinugon saindo.”

An pakíkihirás nin gabós na binónyagán sa misyon ni Cristo ináapód na pagkapading común (common priesthood). Sa Lumang Tipan may profesía na nganì dapit kainí, kan an Diós makipagtipan sa Israel sa bulód Sinai. Sa Exodo 19,6 nasusurat: “Magigi Ko kamong kahadean nin mga padì asín banál na nación.” Boót sabihon an pagigin Cristiano, bakô saná an pagigin paratubod asín parasunod ni Cristo, kundî sinusugò Niya man kita sa paggibong herak asín paghirás kan Marhay na Baretà sa satong kapwa, tanganing nin huli kainí madará sinda – asín kita gabós – sa Kahadean nin Diós.

…

GIYA SA PAGHIRÁS SA SADÍT NA KOMUNIDAD O PAMILYA • Sa panahón ngonian nin krisis sa ekonomiya (patin na nin huli kan pagtuga kan bulkan), pàno mo ihíhirás sa kapwa an pagkaherak ni Cristo?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

An Babae sa may Bubón

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marso 12-18, 2023. Basahon an Evangelio gikan sa Juan 4,5-42 (Ikatolóng Domingo kan Cuaresma).

…

An evangelio iyó an istorya ni Jesús asín kan saróng babaeng Samaritana na naabotan Niya sa may bubón sa banwa nin Sicar sa teritoryo nin Samaría. An istoryang iní pwedeng magín alegoría kun pâno an Kagurangnán naghihirò asín nagwawaras kan Saiyang gracia sa satong buhay. Iní saróng diósnon na encuentro asín diálogo na nagdádará nin pagbabâgo.

Encuentro. Sa pagsabatan pa saná ni Jesús asín kan babae, pinaliwanag kan evangelista na si San Juan an contexto nin mga halóy nang iriwal asín pagkabarangâ nin mga Judío asín Samaritano. Kaiba pa kainí an tradisyón sa saindang kultura na an babae daí pwede makipag-olay nin basta sa ibáng lalaki liban sa saiyang agóm asín kapamilya. Alagad an mga iní bakô kaolangan ki Jesús. Sa paghagad Niya nin tubig na maiinom halè sa bubón, Siya mismo an nagpoón kan saindang tagboan asín pag-oláy-olay.

Sa siring man na paagi nagpópoón an satong relasyon sa mahal na Diós – Siya an enot na námoot sato asín nag-aagda sato na akoon an tubig nin buhay na mápanô kan satong mga pagkapahà asin mátao sato nin buhay na daíng kasagkoran.

Diálogo. Sa saindang pag-oláy-olay, nagpamidbíd si Jesús bilang iyó na an Mesías na hinahalát pareho kan mga Judío asín Samaritano. Pinahilíng Niya man sa babae an katotoohan kan saiyang buhay: na siya odto nang nagsasakdo nin tubig sa bubón nin huli ta naglilikay siya sa matawo ta tibaad siya pagtsismisan o pasupugon, huli ta siya midbid na parakasalà, na may limá nang nagín kasaroan na lalaki, asín an presenteng kasaroan bakô niyang agóm.

Hanggang sa ngonián padagos na nagpapamidbid sato si Jesús – sa pag-adal nin biblía, sa pagpamìbì, asín sa kapwang nangangaipo. Asín mantang namimidbidan ta Siya asín an Saiyang misyon, mas nadidiskubre ta man an katotoohan kan satong sadiri asín katuyohán kan satong buhay digdi sa dagâ.

Pagbabâgo. Sa encuentro kan babae ki Jesús, namatean niya an pagkaherak nin Dios: na mamomôton alagad daí nangungunsinté sa kasâlan, makatotoohan alagad daí nagpapasupog. Kayâ an pagkaherak ni Jesús nagpabâgo asín nagpatalingkás kan saiyang buhay. Asín siya nagín pang literál na tagadará kan Marháy na Baretà sa saiyang mga kahimanwá. An dating kasusupgán nagín makusóg na saksí kan kapangyarihan ni Cristo. “Sinabi Niya sako an gabós kong naginibo”, sabi kan babae sa saiyang mga kahimanwá – asín sinda gabós nagturubód.

An panahón kan Cuaresma, panahón nin pagrumdóm kun gurâno kita namomòtan nin Diós. Sabi ni San Pablo sa Roma 5,8: “Ipinamidbid nin Diós an pagkámoót Niyang gayo sato: kaidto pang parakasalà kita, nagadán na si Cristo para sato”. Lugód an Saiyang pagkámoót asín pagkaherak magdará sato sa dalan nin katalíngkasan asin pagbabâgo.

Boót nin Diós na laogón kan Saiyang Espiritu an kariribokan asin kapurisawan kan satong pusò tanganing patoninongon sa pagkámoót. Boót Niyang pakarayón an satong buhay na rinaót nin kasâlan asin kaputikan. Sabi ni San Pablo sa Roma 5,5: “An paglaom daí nabibigô, huli ta ibinûbô an pagkámoót nin Dios sa satong mga pusò huli kan Espiritu Santong itinaó satuya”.

Kayâ daí na maghinugák o masupog: magsakdó kita sa bubón kan satong Simbahan – sa Banál na Kasuratán, mga sacramento, mga katukdoán, mga pagsaksí nin mga santos, asín mga gaweng kabanalan – kan tubig ni Cristo nin buhay na daíng kasagkoran.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia nin pagkapahà sa Kagurangnán, asín kun pâno mo nakua an Saiyang presencia o gracia sa saimong buhay.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Si Zakeo asin an Pagkaherak nin Dios

 

Giya sa Prayer-Meeting nin mga Saradit na Komunidad nin Pagtubód (SAKOP) para sa semana kan Oktubre 30 – Nobyembre 5, 2022. Basahon an Evangelio gikan sa Lucas 19,1-10 (Ika-31 Domingo sa Ordinariong Panahon - C)

…

An istorya ni Zakeo sa evangelio istorya kan kapangyarihan kan pagkaherak nin Dios sa pagbàgo nin buhay nin tawo. An pagkaherak nin Dios iyo ini: na dai Niya kita pinabayaan na magdanay sa sitwasyon nin kasâlan asin kagadanan kundi ilinigtas Niya kita huli kan sakripisyo ni Cristo asin katotoohan kan Evangelio.

Si Jesus nagtukdò sa Juan 8,32: “Maaaraman nindo an katotoohan, asin an katotoohan an mapatalingkás saindo”. An pagkaherak an paagi tanganing mangyari iyan. An pagkaherak an minalagbas sa matagás na pusò, minapahiwas kan hayakpit na kaisipan, asin minatamà kan satong mga saláng paghonà asin panghuhusgá sa kapwa, tanganing mabuhay na matalingkás na tunay.

An pagkaherak an magdadará sato pasiring sa Dios. Nin huli ta hababâ, naggibo nin paagi si Zakeo tanganì sanáng mahiling si Jesus: nagdalagan sa enotan kan mga tawo asin nagsakát sa kahoy nin sikomoro. Boot Niyang mamidbidan an Kagurangnan alagad, sa tahaw kan mga tawong hababâ an paghilíng saiya, si Jesus an enot na nagmidbid saiya – asin inapód siya sa saiyang ngaran!

Kita man minaabot an panahon – tibaad pagkatapos kan paghanap ta nin kahulugán asin kaogmahan sa buhay sa mga kinàbanon asin minalipas na bagay – na hinahanap ta na an presencia nin Dios sa satong buhay. Alagad an totoo, Siya an naghahanap sato, Siya an enot na nagdolok asin namoot sato. Dai ta na Siya kaipohan hanapon sa kun saen-saen na lugar asin sa kun anu-anong mga paagi, kundi buksan ta an satong mga matá asin pusò sa realidad kan Saiyang presencia sa satong buhay. Sa Roma 5,8, sinabi ni San Pablo: “Ipinahilíng nin Dios an Saiyang dakulang pagkamoot sato kan si Jesus nagadán para sato kan kita mga parakasalà pa.”

An pagkaherak an dalan sa tamang pagkamidbid sa satong sadiri. Kan inapód ni Jesus si Zakeo, pinababâ sa sikomoro, asin sinabihan na madagos sa saiyang harong, minidbid siya ni Jesus asin tinàwan nin dignidad. Siya na saróng parakasalà asin sinisikwal kan saiyang mga kahimanwa, inapód ni Jesus na “akì man ni Abraham” asin mismong rasón kan Saiyang misyon. Sabi Niya sa Lucas 19,10: “Huli ta an Akì nin Tawo nagdigdi sa paghanap asin pagligtas sa nawawarà.”

Kita man kadakul na beses salâ an paghilíng sa sadiri – minsan mapaabaw-abaw asin nagmemenos nin kapwa, minsan naman hababâ an paghiling sa sadiri kumpará sa iba – alagad kun akoon ta an Dios sa satong buhay, aakoon ta man an totoong kita: parakasalà alagad naherakan asin daing ontok na namomòtan.

An pagkaherak an magpapatalingkás sato sa kasâlan. Mantang sinda nagkakakan, nag-anunsyo si Zakeo na itatao niya an kabangâ kan saiyang yaman sa mga dukhà, asin ibabalik makaapat na beses kun siya may dinayà. Ini an bunga kan pag-akò niya kan pagkaherak nin Dios: bakô saná siya nagin matinao kundi pinapatalingkás na niya an sadiri sa kaoripnán kan kayamanan o kapásloan.

Nasusurat sa Kadonongan 12,2: “Luway-luway na Saimong tinatanos an mga nagkakasalà, Saimong pinagigiromdom asin pinatatanidan kan mga bagay na saindang pinagkasalaan, tanganing maglikáy sinda sa karâtan asin maglaom saimo, Kagurangnan.”

Kita, ano man an mga kasâlan na nag-ooripon sato? Iraní ta sa Kagurangnan sa paagi nin pamìbì asin pagkumpisál ta Siya naghahalat saná sato tanganing kita patawadon asin darhon sa kapanoan kan Saiyang buhay.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia nin pagpatawad asin pagkaherak nin Kagurangnan na nagdará saimo sa pagbàgong-buhay.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer/Silence • Gathering Song • Opening Prayer • Gospel Reading • Reflection • Sharing of Faith Experience • Prayers of the Faithful • Closing Prayer (Spontaneous and Our Father) • Closing Song

 

Para sa mga Nawawarà

 

Giya sa Prayer-Meeting nin mga Saradit na Komunidad nin Pagtubód (SAKOP) para sa semana kan Setyembre 11-17, 2022. Basahon an Evangelio gikan sa Lucas 15,1-32 (Ika-24 Domingo sa Ordinariong Panahon - C).

…

Sa evangelio nagtukdô si Jesu Cristo nin tolóng parabola: an nawáwarang karnero, an nawáwarang sinsilyo, asin an nawáwarang akì (o parabola kan aking masombikal). Kaiba sa mga nagdadangog Saiya an mga Fariseos asin escribas na nagrereklamo nin huli ta haraní Siya sa mga parasingil nin buwís asin mga parakasalà. Sa tolóng parabolang ini, ano an tinutokdò Niya sato dapit sa Kahadean nin Dios?

An pagkaherak sa mga nawawarà an pinakadakulang tandà kan Kahadean nin Dios. Saboton ta ngùna an pinaghahalean kan mga Fariseos. Sinda mga istriktong parasunod kan Katugonan asin, kaiba kan mga escribas (na mga paratukdô kan Katugonan), mibdid sinda bilang pangarogan nin pagigin matanos sa matá nin Dios. Kayâ eskandalo para sainda an mahiling sa pag-iriba nin mga parakasalà – na iyo nanggad an ginigibo ni Jesus.

Alagad pinapakarhay ni Jesus an mga saláng pakasabot ninda dapit sa Dios asin sa Saiyang Kahadean. Imbes na pagsikwál sa kapwang parakasalà, pinapahiling Niya na gabós mahalagá sa matá nin Dios. Sa Lucas 19,10, sinabi ni Jesus: “An Akì nin Tawo napadigdi sa paghanap asin pagligtas kan mga nawawarà.”

Ini an dakulang pagkakaiba kan pagtubód na Cristiano sa ibang mga relihiyon: bakô an tawo an naghahanap sa Dios kundi an Dios an enot na namoot asin naghahanap sa tawo. Sa Saiyang mga tataramon asin gibo, pinamatè ni Cristo sa katawohan an pagkaherak nin Dios.

An Dios inaapod kitang mga nawawarà. Bàgo kita mag-isip kun siisay sa mga kamidbid ta an kabilang sa mga “nawawarà”, maghorop-horop kita asin magromdom kan mga panahón na kita man nawawarà sa dalan.

Kita nawawarà pag pinipilì ta kun ano an conveniente kisa pagsunod sa kabòtan nin Dios; pag pinapaoróg ta an mga kinàbanon na kayamanan kisa sa Kagtaó kan satong buhay asin kaogmahan; pag an satong kaogmahan mas naka-centro sa satong sadiri kisa sa Dios asin kapwa. An mas mamundò iyo kun dai ta aram na kita palán nawawarà na – ta mas dificil hanapon an dai aram o habô mag-akò na siya palán nawawarà na.

Si San Pablo sarong ehemplo nin tawong inakò an saiyang pagkawarà, dangan an gracia nin Dios. Sa 1 Timoteo 1,13, sinabi niya: “Kaidto nagtarám ako nin maraot dapit Saiya, nagpasakit asin naglanghad Saiya. Alagad naherak sako an Dios, huli ta bakô pa akong paratubod kaidto asin dai ko aram an sakong ginigibo.”

Inaapod kita na magtabang sa paghanap sa mga nawawarà. Ini an dai masabotan kan mga Fariseos asin escribas. An pagraní ni Cristo sa mga parakasalà pinaghonà ninda na pagkunsinte kan saindang mga saláng gibo. Alagad an sainda mismong pagsikwál – sa mga tawong dai nakaabot sa saindang sukolán nin kabanalan – an nakakaoláng sa kadakul na makaraní sa Dios. Kayâ sinabi ni Cristo sa Lucas 5,32: “Dai ako nagdigdi sa pag-apód kan mga matanos, kundì kan mga parakasalà tanganing sinda magsolsol.”

Kitang mga naherakan nin mahal na Dios – kitang mga namomòtan maski pirming nakakalingáw Saiya, kitang pinatawad nin kadakul na beses sa satong mga kasâlan, kitang natàwan nin kadakul na biyaya maski bakô maninigò – kita inaapod na magin man maheherakon sa kapwang parakasalà. Sa Lucas 6,36, sinasadol kita ni Cristo: “Magin maheherakón kamo, arog kan saindong Amang maheherakón.”

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia na ika nawarà sa dalan asin kun pàno naherakan asin nakabalík o naghihingowang makabalík sa lindong nin Dios.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer/Silence • Gathering Song • Opening Prayer • Gospel Reading • Reflection • Sharing of Faith Experience • Prayers of the Faithful • Closing Prayer (Spontaneous and Our Father) • Closing Song

 

An Marhay na Samaritano

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hulyo 10-6, 2022. Basahon an Evangelio gikan sa Lucas 9,25-37 (Ika-15 Domingo sa Ordinariong Panahon - C).

…                                                                                                                                                                 

Ngonian na panahon popular asin pamilyar na gayo sato an imahe kan marhay na Samaritano. Inaapod ta nganì na “good Samaritan” an mga nagtatabang sa kapwang nangangaipo. Alagad kaidtong enot na pig-istorya ni Jesus ining parabola sa Saiyang audience na mga Judío, controversiál ini – nin huli ta an mga Samaritano kaiwal kan mga Judío.

Halawig asin hararom an saindang iriwal. Nagpoon pa kaidtong pag-urulî kan mga bihag na Israelita makalihis an 70 taon na destierro (exile) sa Babilonia. Kan taon 539 BC buminagsak an Imperiong Babilonia sa kamót kan Imperiong Persia. Nagtugot an hadè kan Persia, si Cyrus the Great, na mag-urulî sa mga sadiring banwaan an mga bihag kabilang na an mga halè sa dating kahadean nin Judah (kayà mga Judío an apód sainda). An mga natadà sa Israel (na Samaría an capitál na ciudad, kayà mga Samaritano an apód sainda), contra sa pagbalik kan mga Judío asin pagtogdas ninda kan bàgong Jerusalem. Pigmemenos man kan mga Judío an mga Samaritano nin huli ta bako puro an saindang dugong Israelita huli sa pakipag-agoman sa mga kataed na paganong naciones asin pag-arog sa mga gawè kan mga ini, asin an iba nagsamba pa sa mga dios-diosan.

An parabolang ini manunungod sa pagkaherak nin Dios. Kaidto pa man hanggang sa ngonian, an pagkaherak nin Dios minabanggà sa nagkapirang mga nangongorog na kaisipan (mindset), kaugalian (value system), asin kultura bakô saná sa Israel kundì sa bilog na kinaban.

An pagkaherak an pangenot na katongdan. Tibaad may dahilan na válido para sa mga Judío kun natà an padì asin clerigo o Levita dai nagtabang sa biktima, siring baga kan paglikay na tibaad maatian (unclean), lalo na ta sinda naglilingkod sa Templo. Susog kayâ sa Mga Bilang 19,11-13, an makakapot nin gadán na tawo magigin maatî sa laóg nin pitóng aldaw asin kaipohan magrayô ngùna sa banwaan asin sa Templo. Alagad malinaw an mensahe ni Jesus: an pagkaherak sa nangangaipo an oróg sa gabós na obligación asin mas naooyonan nin Dios. Sinabi pa Niya sa Mateo 9,13, “pagkaherak an hinahanap Ko, bako sacrificio”.

An pagkaherak nin Dios daing pinipili kun siisay. Sa parabola ni Jesus, an kaiwal an naherak sa biktima, an contrabida iyo an bida. Ini an ladawan nin tunay na pagkaherak: bako mahalaga an lahì, religíon, kinatawo (gender), pulitika, o ano pa man na categoria, kundi an dignidad asin buhay nin tawo. Siisay an mga madalî para sato na tabangan? Siisay an dificil? Midbidon ta pa an satong sadiri asin akoon an satong mga pinapaorog asin panghuhusga ta may influencia ini sa pagpilì ta kun magin maheherakon o dai sa kapwang nangangaipo.

An pagkaherak nin Dios daing sukol. Kaniguan na gayo an gibong-herak kan Samaritano – nagraní sa biktima, binulóng ini, dinara sa ligtas na lugar, inataman, nagtao pa nin cuarta sa dinagosan tanganing dagos ining atamanon. Siring kaini an tunay na pagkaherak: daing sukol, bako su “puede na” o pakitang-tao saná.

Sa huri ini an simbag ni Cristo sa abogadong naghapot: “Kun siring, lakaw. Iyo man an gibohon mo”. Iyo man an boot Niyang ipasabot sato ngonian: na an buhay na daing kasagkoran makakamtan niato kun kita, susog sa sinabi ni Cristo sa Lucas 6,36, “magin maheherakon, siring na an saindong langitnon na Ama maheherakon”.

…

GIYA SA PAGHIRÁS SA SADÍT NA KOMUNIDAD O PAMILYA • Maghiras nin experiencia kun pàno kita natabangan nin sarong marhay na Samaritano o kita man nagin marhay na Samaritano sa kapwa.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Magpulî, asin Dai na Magkasalà Liwát

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Abril 3-9, 2022. Basahon an Evangelio gikan sa Juan 8,1-11 (Ikalimang Domingo nin Cuaresma – C).

…

Sa evangelio nadangog niato an istorya kan babaeng nadakop na nakiduróg sa bakô niyang agóm. Ining pagbalga sa Ikaanom na Tugon may padusang kagadanan. Dinará an babae kan mga escribas asin Fariseos ki Jesu Cristo tanganing tibaad may masabi Siya na magagamit ninda laban Saiya.

Alagad ginibo ining patugmadan ni Jesus sa pagtukdô sainda – asin satô gabos – kun siisay an Dios Ama asin an Saiyang kabòtan sa paagi kan Saiyang mga tataramon asin gibo. Nin huli ta sabi Niya sa Juan 14,9, “An siisay man na nakakahiling Sako, nakakahiling man sa Ama”.

An Dios Ama maheherakon. Sa pagsuróg ni Cristo sa babae asin sa Saiyang pagkaherak, pinahiling Niya na an Ama maheherakon. Segun sa Ezekiel 33,11, “Habo Ko na an parakasalà magadán, olay nin Kagurangnan, kundi bumalík sako asin mabuhay”. Hararom an pakasabot kan Ama sa satong hamak na kamugtakan asin dakulà an Saiyang pagkamoot sato.

May mga naghohonà na an pagkaherak garo man saná pangungunsinti. Bako lamang. Sa hurí sinabihan ni Jesus an babae: “Dai ta ka man hahatolan. Magpulî ka na, asin dai ka na magkasalà liwát.” Dai kita kinukunsinti nin Dios sa satong saláng pamumuhay, kundi kita Saiyang naheherakan tanganing bàgohon an satong buhay.

Sa hampang kan Amang maheherakon, duwang bagay an boot Niyang gibohon niato: hagadon an Saiyang pagkaherak asin kita man magin maheherakon.

Hagadon ta an pagkaherak nin Dios. An Saiyang pagkaherak orog kadakulà asin nagdadanay sagkod pa man, alagad dai ta ini makukua kun dai ta hagadon sa paagi nin udok sa pusong pagsolsol asin pagbaklè.

Orog sa gabos, tinatao Niya ini sa Sacramento nin Reconciliacion. May limang hakbang para makamit niato nin bolanos an Saiyang pagkaherak asin kapatawadan sa sacramento: An paghorop-horop kan satong consciencia (examination of conscience); an pagbasol sa satong kasâlan (contrition); an pakumpisal kan kasalàn (confession); an paggibo kan silot kan padì (satisfaction); asin an pagpakarhay kan mga naraot huli sa salà asin dai na pagkasalà liwát (restitution).

Magin maheherakon siring na kita naherakan. An mga escribas asin Fariseos sa istorya, ladawan nin mga tawong daing pagkaherak. Tama sinda sa pagmidbid na an pakikidurog sa bakóng agom saróng kasâlan, alagad nasalà sinda sa paghonà na an katanosan nin Dios naghahagad nin kagadanan. Garo man saná hinalean na ninda nin paglaom na magbàgong buhay an babaeng nagkasalà. Kaya sinimbag sinda ni Jesus nin paggurit sa dagâ asin pagsabi: “An siisay man saindo na daing kasâlan iyo an enot na maggapò saiya.” Dai ta aram kun ano an kinurit ni Jesus sa dagâ, alagad an epekto kaini iyo na luway-luway nagharalè idtong mga boot manggadán, poon sa pinakaguráng sagkod sa pinakaakì.

Rumdomón ta an mga panahon na kita man nawàran nin tiwalà sa kapwa na magbàgo asin maggibo nin karahayan. Dangan rumdomón ta an satong pangadiè sa Ama Niamo: “patawadon Mo kami sa samong mga kasâlan siring na pinapatawad niamo an mga nagkakasalà samuya.” Papatawadon kita kan Ama susog sa satong pagpatawad asin pagkaherak sa kapwa.

Pinapamidbid ni Cristo sato an Ama tanganing kita magtalubò na “magin maheherakón, siring na an saindong Ama maheherakón” (Lucas 6,36).

…

GIYA SA PAGHIRAS SA SADIT NA KOMUNIDAD O PAMILYA • Maghiras nin experiencia kun pa’no kita binàgo kan pagkaherak nin Dios halè sa kasâlan.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song