An Misterio kan Pagbonyag

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 11-17, 2026. Basahon an Evangelio gikan sa Mateo 3,13-17 (Fiesta kan Pagbonyag kan Kagurangnan - A).

…

An Evangelio nag-iistorya kan versión ni San Mateo kan pagbonyag sa satóng Kagurangnan Jesu Cristo. An pagromdom kainí iyó man an huríng aldaw kan Pasko kan Pagkamundag. Anó an kahulugán kan Pagbonyag?

An Pagpamidbid kan Diós

Si San Mateo nagsurat kan saiyang Evangelio para sa audience na kadaklan mga Judío kayâ mahalagá saiyang ipahayag na si Jesús an kautoban kan mga profesía sa Banál na Kasuratán dapít sa pinanugáng Mesías.

An pagbonyag ki Jesús ni San Juán iyó an kautoban kan profesía sa Malakías 3,1 dapít sa ministerio ni Juán na “sinugò na mag-andam kan dalan kan Kagurangnan.” Iníng pagbonyag kumbagá turn-over ni Juán ki Jesús asín kapinônan kan bâgong kabanatè sa kasaysayan kan satóng kaligtasan. Iní man tandâ kan pagpoón ni Jesús kan ministerio bilang Halangkaw na Padì, siring na an mga padì sa Lumang Tipan naglilinig sa tubig bâgo kan saindang ministerio. Kumpará sa mga Evangelio ni San Marcos asín San Lucas, ki San Mateo may dagdag na paghuron si Jesús asín Juán na minatapos sa linya ni Jesús na “angay satô na utobàn an bilog na kasuripotan.”

An paghilig kan Espiritu Santo siring sa salampati iyó an pagpamidbid ki Jesús bilang surogoón asín profeta na mabalangibog kan Marhay na Baretà, susog sa mga profesía sa Isaías (11,1-2; 42,1; 61,1). Tandâ man iní kan bâgong paglaláng huli ki Cristo, siring na an Espiritu naglalayaw-layaw sa tubig sa panahón kan paglaláng, siring na saróng salampati pinalayog ni Noé sa pagtapos kan delubyo.

An tingog na halè sa langit – “Iyó iní an Sakóng Akì, na namomòtan, an minarhayán Ko” – kapahayagán na si Jesús an “Akì kan Diós.” An enot nang pinamidbid ni Mateo bilang “Akì ni David” (sa Mateo 1 sa paglatag kan genealogía ni Jesús asín sa pangaturogan ni San José) na maghahadè sagkod pa man, iyó man an Akì kan Diós.

Huli kainíng pagpamidbid ki Jesús sa kadakul na paagi, asín participación kan Espiritu Santo asín kan langitnon na Amâ, an apód kan mga Simbahan na Eastern Orthodox sa pangyayaring iní iyó an theophaneia, an pagpahayag nin Diós kan Saiyang sadiri sa katawohan.

An Pagtogdas kan Bonyag

Sa katapusan kan Evangelio ni Mateo, sa 28,19-20, bâgo si Jesús suminakát sa langit, sinugò Niyá an mga disipulos: “Lakáw kamó, gibohang disipulos an gabós na nación! Bonyagán sa ngaran kan Amâ, kan Akì, asín kan Espiritu Santo, tukdoán na mag-utób kan gabós Kong itinugon saindo.”

An pagbonyag na inakò Niyá ki Juán, na ginibo man Niyá kan Siya nag-ministerio publico asín pinabanál sa Espiritu, sa huri pinagibo man Niyá sa mga disipulos bilang sacramento para sa kapatawarán nin mga kasâlan asín kapinônan nin pag-akò kan buhay sa Diós.

An pag-akò kainíng sacramento tandâ kan pag-ayon ta sa kabôtan nin Diós, na pinapahayag sa mga Panugâ sa Bonyag, na may duwáng kabtang: pagsikwal ki Satanás, sa saiyang mga padayà, asín mga saláng gibo; dangan pagtubód sa Diós Amâ, Akì, asín Espiritu Santo.

Sa pagtapos kan Kapaskuhán, an Fiesta kan Pagbonyag siring sa Commencement Rites sa eskwelahan: mantang katapusan kan pagklase, kapinônan man nin bâgong kabtang sa buhay. An misyon na tinugon ni Jesús asín an mga Panugâ sa Bonyag, na pinakusóg kan gracia kan Pasko, iyó an isasabuhay ta sa enterong bâgong taón.

…

GIYA SA PAGHIRÁS | Maghirás kun pâno saimo enot na pinamidbid an Diós kan saimong mga magurang o kun siiísay man. Anó na an pagkamidbid mo na Saiya ngonian? | GIYA SA PAGHIRÔ | Bilang sararóng komunidad / pamilya, pâno ta matatabangan an lambang sarô na isabuhay an mga Panugâ sa Bonyag?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

An Pagpamidbid kan Kagurangnan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 4-10, 2026. Basahon an Evangelio gikan sa Mateo 2,1-12 (Epifanía kan Kagurangnan - A).

…

Sa Evangelio may mga mago halè sa sirangan na nagbisita sa omboy na satóng Kagurangnan Jesu Cristo. Inaawit ta iní sa Pasko: “Nang sa Kristo ay isilang, may tatlong haring nagsidalaw, at ang bawat isá ay nagsipaghandog ng tanging alay.” Inapód sindang mga hadè huli sa profesía sa Isaías 60,1-6 na máabót an Mesías siring sa ilaw asín maglálakáw an mga nación asín mga hadè sa bangraw kan Saiyang liwanag. Patí an daráng bulawan asín incienso naonabihán man.

Alagad bakô sinda mga hadè kundi mga mago, mga may inadalan sa mga sciencia asín kasuratán nin manlaen-laen na mga nación asín relihiyón. Sa pag-agi kan panahón, nagkaigwa sindang ngaran: Melchor, Gaspar, asín Baltasár. An pagsungkô ninda inaapód na Epifanía kan Kagurangnan, tataramon na Griego na an kahulugán “pagpahayag” o “pagpamidbid” nin Diós sa katawohan.

Natà ta kaipohan nin Diós na magpamidbid satô? Nin huli ta kun kitá saná daí kayang abotón kan satóng isip an misterio kan Saiyang pagka-Diós, minsan nganì an Saiyang kabôtan linaág na Niyá sa satóng pusò. Anó an ipinapamidbid o ipinapahayag satô kan Epifanía?

Enot, si Jesús an pinanugáng paraligtas.

Sa Evangelio ipinapamidbid si Jesús bilang hadè kan mga Judío asín Mesías (sa Hebreo) o Cristo (sa Griego) susog sa mga profesía. Siyá an kapanoan kan pagpamidbid kan Diós Amâ. Sabi sa Juán 1,18: “Sa Diós mayò nin nakáhilíng; an bogtong na Diós, na odók na yaon sa daghan kan Amâ, Siyá an nagpaliwanag.”

Alagad igwa man ki mga daí nagtubód asín nagsikwal pa nganì Saiya: si Hadeng Herodes asín an saiyang mga pag-iribang padì asín escribas. Nasusurat sa Juán 3,19: “Iní an paghukóm: an ilaw napadigdi sa kinâban, ugaring namòtan nin mga tawo an diklom, bakô an ilaw, ta mararaot an saindang mga gibo.” Kayâ kun habô tang magbâgo kan satóng mga saláng gibo, sinisikwal ta man si Jesús. Lugód pilíon ta an dalan kan mga mago na nagmâwot na mas lalò pang mamidbidan si Jesús, bakô an dalan ni Herodes asín mga pag-iriba niyá.

Ikaduwá, an kaligtasan itinátaó sa gabós.

Sabi ni San Pablo sa Efeso 3,6: “an mga Gentíl kapwa paramana, kapwa hawak, kahirás sa panugâ, ki Cristo Jesús, huli kan Evangelio.” Boót sabihon kan Gentil, an mga bakô Judío, an kadaklan kan katawohan, kaiba na kitá. An mga magong Gentil na nákua an omboy nagpahayag kan kabôtan nin Diós na sinabi ni San Pablo sa 1 Timoteo 2,4: na “an gabós na tawo makaligtas asín makaabót sa pakamidbid kan katotoohan.”

Ikatoló, kahirás kita kan misyon nin kaligtasan ni Cristo.

An mga regalong dará kan mga mago nagsisimboló kan tolóng misyon ni Cristo para sa satóng kaligtasan. An bulawan huli ta Siyá hadè; an incienso huli ta Siyá padì; asín an mira (na gamit sa pag-embalsamár nin gadán) huli ta Siyá profeta. Sabi sa Katekismo: “An bilog na Banwaan nin Diós nagpaparticipár sa tolóng oficio ni Cristo asín nag-aakò kan responsibilidad sa misyon asín paglingkod na nagbubulos halè sa mga iní” (CCC 783).

Ginigibo ta an misyon sa pagkahadè pag kitá naglilingkod asín pig-eenot an kapwang nangangaipo kisa sadiri. An misyon sa pagkapadì pag kitá magpangadiè para sa lambang sarô, asín magdará sa kapwa parani sa Diós. An misyon sa pagkaprofeta pag nag-aadal kitá kan Tataramon nin Diós asín mga katukdoán kan Simbahan, asín nagsasaksi kitá sa mga iní sa tataramon asín gibo.

…

GIYA SA PAGHIRÁS | Maghirás nin experiencia kun pâno mo pigsasabuhay an pakisumarò sa misyon ni Cristo bilang hadè, padì, asín profeta. | GIYA SA PAGHIRÔ | Magplano nin mga simpleng aktibidad o programa tanganing isabuhay kan saindong SAKOP iníng tolóng Cristianong misyon sa bilog na taón.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

An Misyon nin Lambang Pamilya

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 28, 2025 – Enero 3, 2026. Basahon an Evangelio gikan sa Mateo 2,13-15,19-23 (Sagrada Familia - A).

…

An Domingo sa Octava kan Pasko sinecelebrar bilang Fiesta kan Sagrada Familia kan satóng Kagurangnan Jesu Cristo asín Saiyang mga magurang, Sta. María asín San José. Tamang-tamà ta an Pasko panahón man nin pagtiripon asín celebracion nin mga pamilya.

Alagad tibaad maghonà kitá na bakóng marhay an Pasko kun bakóng kumpleto an pamilya. O kun may problema. O na an pamilyang maimbod sa Diós dapat pirming maogma asín daí nag-aagi nin kadipisilan. Tulos pipahalè satô an mga salang paghonà na iyán sa istorya kan Banál na Pamilya sa Evangelio. Sa katunayan, nasa peligro an buhay kan omboy na si Jesús na boót ipagadán ni Hadeng Herodes kayâ kaipohan nindang magdulág pasiring sa Egipto.

An Sagrada Familia an pangarogan kan lambang pamilyang Cristiano. Sa tahaw nin mga pagbalô sa buhay, nagsaksi sinda sa pagigin maimbod sa kabôtan kan Diós Amâ bilang Simbahan sa haróng, eskwelahan nin pagkamoot, asín tandâ nin paglaom – na iyó man an misyon nin lambang pamilyang Cristiano.

An Pamilya Simbahan sa Haróng.

Sa Latín, ecclesia domestica, an pinakasadít na unit kan Simbahan. Boót sabihon, sa pamilya enot na pinapamidbid sa mga akì an mahál na Diós, sa paagi kan pagtukdô sainda nin mga pamîbî, pag-ibá sainda sa pagsimba, paghirás sainda kan mga istorya asín adal sa biblia, asín pagsaksi kun pâno magin marhay na Cristiano. An pagkamoot kan mga magurang sa lambang sarô asin sa mga akì, iyó an magigin ideya kan mga akì kun pâno namómoót an Diós. Sabi sa Efeso 5,25: “Mga agóm na lalaki, kamòtan nindo an agóm nindong babae, nin siring ki Cristo: namòtan Niyá an Simbahan asín idinusay an sadiri para saiya.”

An Pamilya Eskwelahán nin Pagkamoot.

Sa pamilya an gabós dapat nakakamatè asín nakakaukód nin tamang pagkamoot. Sabi ni San Pablo sa Colosas 3,18-21: “Mga agóm na babae, magpasakop kamó sa saindong mga agóm na lalaki, siring dapat, sa Kagurangnan. Mga agóm na lalaki, kamòtan nindo an saindong mga agóm na babae, daí kamó magpakapaít sainda. Mga akì, magkuyog kamó sa saindong mga magurang sa gabós na bagay, ta kagaya-gaya iyán sa Kagurangnan. Mga amâ, daí pagpa-uyamá an saindong mga akì, tanganing daí mawâran boót.” Bakô iní dapít sa kun siísay an may kapangyarihan sa laóg nin haróng, kundî kan katongdan nin lambang miembro sa pagkamoot, pag-ataman, asín paggalang sa lambang sarô.

An Pamilya Tandâ nin Paglaom.

Sa Sirach 3,3-4 nasusurat: “An naggagalang sa amâ naghihipnò sa kasâlan, asín an nagpapamuraway sa inâ siring sa nagtitipon nin kayamanan.” Iní an mas hararom na kahulugán kan paggalang sa satóng mga magurang: sinda an tandâ kan presencia kan Diós Amâ sa satóng buhay digdi sa dagâ, asín an pagkamoot ta sainda nakatakód sa satóng paglaom sa máabót na kamurawayan kan buhay na daíng kasagkoran.

Siring man an lambang pamilya gikanan nin paglaom sa pagpatalubò sa mga masunod na henerasyon. An futuro kan sociedád asín Simbahan, yaon sa mga aking nakaukod magtabang sa mga gibo sa haróng, magmakulóg sa mga nangangaipo, mag-akò nin salà asín magpatawad, magin honesto asín may takot sa Diós.

…

GIYA SA PAGHIRÁS | Maghirás nin pinakamemorable mong experiencia sa laóg nin pamilya – maogma man o mamundô, may malinaw na leksyon man o daí pa nasasabotan.| GIYA SA PAGHIRÔ | Bilang sararóng komunidad/pamilya, anó an pwedeng magibo tanganing mapakusóg pa an pag-iribahan bilang pamilya.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

An Diós Nagpapamidbid Sato

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 12-18, 2025. Basahon an Evangelio gikan sa Lucas 3,15-16,21-22 (Fiesta kan Pagbonyag kan Kagurangnan - C).

…

An Evangelio nag-iistorya kan versión ni San Lucas kan pagbonyag sa satóng Kagurangnan. An pagromdom kainí iyó man an huríng aldaw kan Panahón kan Pasko kan Pagkamundag. Anó an kahulugán kan Pagbonyag?

Pagpamidbid ki Jesús bilang Mesías.

Nagpapadagos an pagpamidbid ni Jesús asín pagbalangibog sa katawohan kan misterio kan pagkanitawo kan Diós, na enot nang pinahayag sa Pagbaretà kan angel, sa Saiyang Pagkamundag, asín sa Epifanía.

Nagpatotoo sa pagka-Mesías ni Jesús si San Juán Bautista sa pagnegár niyá na siyá mismo an Mesías asín sa pagsabi na an maabot mas oróg kisa saiya. Dangan sa Juán 1,29, tinurô niya si Jesús sa saiyang mga disipulos asín nagsabi: “Uya an Cordero kan Diós na nagpaparà kan mga kasâlan kan kinâban.”

Sa paghilig Saiya kan Espiritu siring sa salampati, pinamidbid man Siyá bilang profeta, asín an tingog kan Amâ pinamidbid Siyá bilang Akì kan Diós.

Pagpamidbid nin Diós bilang Santísima Trinidad.

Siring na daí paghonaon kan Israel na an pigháhalát nindang Mesías iyó an bogtong na Akì kan Diós, daí man ninda paghonaon na an Diós mapamidbid kan Saiyang sadiri bilang Akì na binobonyagan, bilang Espiritu Santo, asín bilang Amáng makakamhan.

Kayâ nganì an apód kan Simbahan na Eastern Orthodox sa pangyayaring iní iyó an theophaneia, an pagpahayag nin Diós kan Saiyang sadiri sa katawohan. Kayâ maninigò lamang na apodón si Jesu Cristo bilang kapanoan kan kapahayagan nin Diós. Sa Juán 14,9 sinabi pa Niya: “An nakahiling Sakô, nakahiling man sa Amâ.”

Pagpamidbid kan katotoohan kan satóng sadiri.

Sa Lucas 3,16, pinasabot ni Juán Bautista an pagkakaiba kan saiyang pagbonyag asín kan gigibohon na pagbonyag ni Jesús: “Akó nagbobonyag saindo sa tubig; alagad maabot na an oróg sakô kakusóg, asín bakô akóng manínigóng maghubád kan sintas kan Saiyang sandalyas; Siyá an mabonyag saindo sa Banal na Espiritu asín kalayo.” An pagbonyag ni Juán tandâ kan pagbaklè kan binobonyagan. An pagbonyag ni Jesús nagpapatawad nin mga kasâlan.

Natâ ta kaipuhan niatò iníng pagbonyag para sa kapatawarán nin mga kasâlan? Huli ta an katotoohan kan satóng pagkatawo na linaláng nin Diós na kabaíng Niyá, rinaót kan satóng pagkakasalà na iyó man an nagdará satô sa kagadanan. Kayâ binoót ni Jesús para satô an nakakaligtas na pagbonyag, susog sa sinabi Niya ki Nicodemo sa Juán 3,3: “Kun an saróng tawo daí mamundag giraray halè sa itaas, daí siyá makakahilíng kan Kahadean nin Diós.”

Sa tubig kan bonyag, nalinigan kitá sa kasâlan, dangan tinaó satô an dignidad nin pagigin Akì kan Amâ, Tugang ni Jesu Cristo, Templo kan Espiritu Santo, Miembro kan Simbahan, asín Tagapagmana kan Kahadean.

An katuyuhán kan pagpamidbid nin Diós.

Sabi ni San Pablo sa 1 Timoteo 2,4: “Boót nin Diós na an gabós makaligtas asín makamidbid sa katotoohan.” Boót Niyá na mamidbidan ta Siya bilang satóng Diós – Amâ, Tugang, asín Katood – tanganing sa satóng pakipag-ulían Saiya asín pagsunód sa dalan ni Cristo, makamtan ta an kapanoan nin búhay.

An bonyag na inakò ta an kapinônan kan satóng bâgong búhay sa Diós. Dangan sabi ni Jesús sa Juan 8,31-32: “Kun magpadagos kamó sa Sakóng tataramon, tunay Ko kamóng mga disipulos; mamimidbid nindo an katotoohan, asín itatalingkas kamó kan katotoohan.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás kun pâno saimo enot na pinamidbid an Diós kan saimong mga magurang o kun siisay man. Anó na an pagkamidbid mo Saiya ngonian?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Regalo kan Epifanía

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Enero 5-11, 2025. Basahon an Evangelio gikan sa Mateo 2,1-12 (Solemnidad kan Epifanía kan Kagurangnan - C).

…

Sa Evangelio, nagbisita an mga mago sa omboy na si Jesús na saindang nákua sa giya nin saróng maliwanag na bitóon. Susog sa tradisyon, ináapód man sindang tolóng hadè na may ngaran na Melchor, Gazpar, asín Baltazár. Alagad bakô sinda mga hadè kundî mga mago, mga madunong asín may inadalan na tawo. Daí man sa Biblía nabanggit an mga ngaran ninda, asín daí man sinabi na toló saná sinda, kundî na dará ninda tolóng klaseng regalo. Anó an kahulugán kan istoryang iní?

An pinakaregalo iyó mismo si Jesu Cristo.

May daráng regalo an mga mago, asín digdi halè an tradisyon nin pagregalo sa panahón kan Pasko. Alagad an omboy na saindang tuyo sa pagbisita iyó an pinakaregalo sa istorya. Nasusurat sa Juan 3,16: “Ta siring namòtan kan Diós an kinâban: an bogtong na Akì itinaó tanganing an gabós na nagtútubód Saiya daí mawarâ, kundî magkaigwa nin búhay na daíng kasagkoran.” Kayâ an pagbisita kan mga mago sinecelebrar bilang fiesta kan Epifanía, boót sabihon: an pagpahayag nin Diós sa katawohan kan pagdatóng kan satóng Paraligtas na iyó si Jesu Cristo.

Alagad bilang regalo, pwede man Siyang daí akoon, isikwal, asín kaongisán pa nganì. Sabi sa Mateo 2,3: “Pagkadangog kainí, napurisaw si Hadeng Herodes, asín man an bilog na Jerusalem kaiba niyá.” Natà ta an napurisaw sa baretàng iní bakô saná si Herodes, na an paghilíng ki Jesús karibál sa trono, kundî pati na an “bilog na Jerusalem”?

Sa Juán 3,19, sinabi: “Iní an paghukóm: an ilaw napadigdi sa kinâban, ugaring namòtan nin mga tawo an diklom, bakô an ilaw, ta mararaot an saindang mga gibo.” Kayâ maski pigcelebrar ta an mga tradisyon sa Pasko, kun daí man kitá magbaklî sa satóng mga kasâlan asín nasa pusò ta pa an pagkamakasadiri, pagkadagit, asín pagkaurí, siring pa kitá ki Herodes asín sa mga kampon niyá.

Dará ni Jesús an regalo nin kaligtasan.

Pinapahayag ta sa Credo Niceno-Constantinopolitano na si Jesu Cristo, “huli sa satóng mga tawo asín huli sa satóng kaligtasan, naghilig halè sa kalangitan.”

Sabi pa ni San Pablo sa Efeso 3,6: “an mga Gentil kapwa paramana, kapwa hawak, kahirás sa panugâ, ki Cristo Jesús huli kan Evangelio.” An mga Gentil iyó an apód kan mga Judío sa mga bakóng Judio, kabilang sainda an mga mago na halè sa harayóng lugár nin sirangan, asín kitá gabós na bakóng mga Judío. Kayâ an mga mago representante kan katawohan sa bilog na kinâban, asín si Cristo namundag bakô saná sa pagligtas kan mga Judío kundî kan gabós na tawo.

Hinirás satô ni Jesús an regalo nin misyon. 

Tolóng regalo an dará kan mga mago, na simbolo kan Saiyang misyon: bulawan nin huli ta Siya hadè, incienso nin huli ta Siya padì, asín mira nin huli ta Siya profeta. Kan kitá binonyagán ihinirás satô ni Cristo an Saiyang Espiritu asín man iníng tolóng misyon tanganing magin paagi sa pagpalakóp nin kaligtasan sa gabós na katawohan.

Sa lambang paggibo niatò nin karahayan asín pagtabang sa kapwang nangangaipo, ginigibo ta an misyon nin pagkahadè. Sa lambang pagpangadiê para sa kapwa asín pagdará sainda parani sa Diós, ginigibo ta an misyon nin pagkapadì. Sa lambang pagtukdô niatò kan Tataramon nin Diós asín Saiyang mga tugon, sa satóng tataramon asín gibo, nagsasaksi kitá sa misyon nin pagkaprofeta. Regalo ining tolóng misyon nin huli ta iní an nagtátaó nin kahulugán sa satóng búhay asín katuyohán sa satóng pagigin Cristiano.

…

GIYA SA PAGHIRÁS SA SADÍT NA KOMUNIDAD O PAMILYA | Ngonian na Banál na Taón sa Jubileo nin Paglaom, pâno mo gigibohon an misyon nin pagigin hadè, padì, asín profeta?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Pamilya Tandâ nin Paglaom

 

Giya sa Prayer-Meeting nin mga Saradit na Komunidad nin Pagtubód (SAKOP) para sa semana kan Diciembre 29, 2024 - Enero 4, 2025. Basahon an Evangelio gikan sa Lucas 2,41-52 (Fiesta kan Sagrada Familia)

…

Sa Evangelio, an Sagrada Familia kan satóng Kagurangnan Jesu Cristo, Santa María asín San José nagpasiring sa Jerusalem, bilang tradisyon ninda cada taón. An enot na Domingo sa Pasko celebración kan Fiesta kan Sagrada Familia, na iyó an pangarogan nin mga Cristianong pamilya sa kabanalan asín kaimbodán sa Diós. Según sa ladawan kan Sagrada Familia, an lambang Cristianong pamilya ináapód nin Diós na magin Simbahan sa haróng, eskwelahán nin pagkamoot, asín tandâ nin paglaom.

Simbahan sa Haróng

An pinakasadít na unit nin sociedad asín Simbahan iyó an pamilya, kayâ iní ináapód man na Ecclesia domestica o Simbahan sa haróng. Iní naipapahilíng sa pagsimba kan pamilya, sa pagpamîbî, asín sa mga gawè nin pagtubód sa Diós.

Siring ki San José asín Santa María na dinádará si Jesús sa Templo sa Jerusalem asín tinútokdoán Siyá kan mga tradisyon nin saindang pagtubód, an misyon nin mga magurang na Cristiano iyó na ipamidbid sa saindang mga akì an mahál na Diós – sa pagtukdô sainda sa mga pamîbî asín doctrina kan Simbahan, sa pagpatoód sainda sa mga Catolicong tradisyon, sa pagdará sainda sa mga sacramento, asín sa pagsimba sa cada Domingo asín mga aldaw nin obligasyon.

Eskwelahán nin Pagkamoot

Sa lindong ni San José asín Santa María, nakamatè si Jesús nin pagkamoot nin mga magurang digdi sa dagâ. Sa experiencia nin mga akì nin pagkamoot sa pamilya nakakáukód sinda kun páno mámoot man sa kapwa.

Mahalagá man na matukdoán sinda nin pagkamoot sa saindang mga magurang. Sabi sa Sirach 3,3-4: “An naggagalang sa amâ naghihipnò sa kasâlan, asín an nagpapamuraway sa inâ siring sa nagtitipon nin kayamanan.”

Dapít sa pagkamoot, lalò na sa laóg nin pamilya, iní man an hulit ni San Pablo sa Colosas 3,13-14: “Magpatiniós-tiosan asín magpatinawád-tawadan kun an sarô may hinanakít sa sarô man; kun pâno an Kagurangnan nagpatawad saindo, siring man kamó. Sa ibabaw kainí gabós, an pagkamoot na iyó an bugkos nin kalubosan.”

Tandâ nin Paglaom

Binuksán na ni Papa Francisco an celebración kan Jubileo nin Paglaom 2025. Sabi niyá sa saiyang decretong Spes Non Confundit: “Ngonian na Banál na Taón, ináapód kitáng magin mga tandâ nin paglaom na namamatean para sa mga tugang niatong nag-aagi nin anó man na kadipisilan.”

Nasasabuhay iní nin mga pamilya, enot sa pagigin bukás sa búhay asín sa pagpadakulà nin mga akì, asín sa pag-ataman sa mga guráng nang miembro kan pamilya. Dangan sa pagmangno, sa paagi nin pamîbî asín pagtabang sa mga dukhâ asín mga nangangaipo; mga naghehelang; mga nasa bilanggoan; mga apektado nin maraot na panahón; mga nagdúdulág sa violencia asín gera; siring man sa pangataman kan satóng kapalibotan; asín sa pagigin mga ciudadanong may pagmakulóg sa komunidad asín sociedad asín mga responsableng botante sa panahón nin eleksyon.

An lambang pamilya kaiba sa dakulang pamilya kan Kahadean nin Diós. Kayâ mantang nabubuhay digdi sa dagâ asín nasísibót sa mga pangangaipo sa aroaldaw, an lambang miembro nin pamilya ináapód na magin maimbod asín magdanay “sa maogmang paglaom asín pagdatóng kan satóng Paraligtas na si Jesu Cristo.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin mga tradisyon kan saindong pamilya sa panahón kan Pasko. Nahíhilíng daw sa mga iní an pagigin tandâ nin paglaom kan saindong pamilya?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Kaligtasan para sa Gabós

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 7-13, 2024. Basahon an Evangelio gikan sa Mateo 2,1-12 (Solemnidad kan Epifanía kan Kagurangnan - B).

…

Sa Evangelio, nagbisita an mga mago sa omboy na si Jesús gamit an saróng maliwanag na bitoon bilang giya.  Susog sa tradisyon, ináapód man sindang tolóng hadè na may ngaran na Melchor, Gazpar, asín Baltazár. Alagad bakô sinda mga hadè kundî mga mago, mga madunong asín may inadalan na tawo. Daí man sa Biblía nabanggit an mga pangaran ninda, asín dai man sinabi na toló saná sinda, kundî na dará ninda tolóng klaseng regalo. Anó an kahulugán kan istoryang iní?

An kaligtasan para sa gabós na tawo. An pagbisita kan mga mago sinecelebrár bilang fiesta kan Epifanía, boót sabihon an pagpahilíng kan satong Kagurangnan sa katawohan. An mga magong iní halè sa harayóng lugár sa sirangan. Bakô sinda kabilang sa Piniling Banwaan alagad sa saindang sadiring pag-aadal ipinasabóng man sainda kan Espiritu an katotoohan kan pagkamundag kan hadè na maligtas sa kinâban. Sabi sa profesía sa Isaias 60,3-4: “Malakaw an mga nación sa Saimong liwanag, asín an mga hadè sa bangraw kan Saimong pagsirang. Sinda gabós nagkatiripon, madyan na Saimo.”

Iní nin huli ta an kaligtasan para sa gabós na tawo. Sabi ni San Pablo sa Efeso 3,6: “an mga gentil kapwa paramana, kapwa hawak, kahirás sa panugâ ki Cristo Jesús huli kan Evangelio.” An mga gentil iyo an gabós na bakô Judío – boót sabihon kaiba kita. An pagbisita asín pagsamba kan mga gentil na mago sa omboy na si Jesús, tandâ na Siya namundag bakô saná para sa mga Judío kundî para man sa mga gentil, para sa sato gabós.

Si Jesu Cristo an pinakaregalo sa Pasko. May daráng regalo an mga mago, asín sinasabi na digdi halè an tradisyon nin pagregalo sa panahón kan Pasko. Alagad an pinakaregalo iyó si Jesu Cristo na tinaó kan Diós Amâ sa gabós na tawo. Siya an nagpaogmáng gayo sa mga mago, an katuyuhan kan saindang halawig na paglakbay.

Alagad bilang regalo, pwede man Siyang daí akoon, isikwál, asín kaongisán pa nganì. Sabi sa Mateo 2,3: “Pakadangog kan baretà kan mga mago, napurisaw si Hadeng Herodes, asín man an bilog na Jerusalem kaiba niya.” Hilngá ta bakô saná si Herodes – na an paghilíng ki Jesús karibál sa trono – an napurisaw kundî patí na an saiyang mga kampón. Sabi sa Santiago 3,16: “Kun saén may pagkaurí saká ambisyón, yaon man an karibokan asín an gabós na kadaíng-datahan.” Siring ki Herodes asín saiyang mga kampón, kun kita makasadiri asín maurí, maski magcelebrár kita kan mga tradisyon sa Pasko, sinisikwal ta man giraray si Cristo.

Tinaó sato ni Cristo an regalo nin misyon.  Tolóng regalo an dará kan mga mago, na simbolo kan Saiyang misyon: bulawan nin huli ta Siya hadè, incenso nin huli ta Siya padì, asín mira nin huli ta Siya profeta. Kan kita binonyagán hinirás sato ni Cristo an Saiyang Espiritu asín iníng tolóng misyon.

An pagmisyon iyó an tandâ na satong sinasabuhay an pagigin Cristiano. Ngonian na Taón nin Partisipasyón sa satong diocesís, ináapodán an lambang sarô – laiko asín clero – na mas maigot tang isabuhay iníng tolóng misyon kaiba an satong parokya, oróg na sa mga Saradít na Komunidad nin Pagtubód (SAKOP). Bilang padì, magín maimbód sa pamìbì asín pagsimba, asín tabangan an kapwa na makaraní sa Diós. Bilang profeta, maghingowa na mag-adal kan Tataramon nin Diós asín magsaksi sa kapwa kan Evangelio sa satong tataramon asín gibo. Bilang hadè, maglingkod sa Simbahan asín komunidad, asín magtabang lalò na sa kapwang nangangaipo.

…

GIYA SA PAGHIRÁS SA SADÍT NA KOMUNIDAD O PAMILYA • Maggibo nin New Year’s Resolution asín maghirás kun pàno gigibohon an tolóng Cristianong misyon sa pagkapadì, pagkaprofeta, asín pagkahadè.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the Faithful • Closing Prayer (Spontaneous and Our Father) • Closing Song

 

An Pasko para sa Pamilya

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 31, 2023 – Enero 6, 2024. Basahon an Evangelio gikan sa Lucas 2,22-40 (Fiesta kan Sagrada Familia - B).

…                                                                                                                                   

Sa Evangelio, an Sagrada Familia ni Jesús, María asín José nagpasiring sa Jerusalem para sa presentación kan aking si Jesús sa Templo. An enot na Domingo sa Pasko celebración kan Fiesta kan Sagrada Familia, na iyó an ladawan nin lambang Cristianong pamilya kan pangapodan nin Diós na magin Simbahan sa haróng, eskwelahan nin pagkamoot, asín tandâ nin paglaom.

Simbahan sa Haróng

An pinakasadít na unit nin Banwaan nin Diós iyó an pamilya, kayâ iní inaapód man na Ecclesia domestica o Simbahan sa haróng. Iní naipapahilíng sa pagpamìbì asín mga gawè nin pagtubód sa Diós nin mga miembros nin pamilya.

Siring ki San José asín Santa María, na dinara si Jesús sa Templo sa Jerusalem asín tinukdoán nin mga tradisyón kan saindang pagtubód, an misyon nin mga magurang na Cristiano iyó na ipamidbid sa saindang mga akì an mahál na Diós – sa pagtukdô sainda sa mga pamìbì asín doctrina kan Simbahan, sa pagpatoód sainda sa satong mga banál na tradisyon, sa pagdará sainda sa mga sacramento, lalò na sa pagsimba cada Domingo asín mga aldaw nin obligación.

Eskwelahan nin Pagkámoót

Daí pa nahalóy nag-agi kita sa panahón nin eleksyon sa barangay. Base sa mga gawè asín gibo niatong mga botante, sa hilíng nindo natâwan ta daw nin marhay na edukasyon an satong mga kaakian dapit sa pagigin marhay na ciudadano? An pamilya eskwelahan nin pagkámoót sa Dios asin kapwa, patin na sa kapalibotan asin sa banwaan.

Kayâ kun may daí pagkasinabotan o iwal sa laóg nin pamilya, pâno nindo iní hinuhusay? Sabi ni San Pablo sa Colosas 3,13-14: “Magpatiníos-tiosan asín magpatinawád-tawadan, kun an sarô may hinanakít sa sarô man; kun pâno an Kagurangnan nagpatawad saindo, siring man kamo. Sa ibabaw kainí gabós, an pagkámoót na iyó an bugkos kan kalubosan.”

Iní an pangapodan sa lambang pamilya lalò na sa mga nakakaguráng na mga miembros kainí, nin huli ta may mga akì na nakakatangad sainda. Kun marhay an padara nin mga nakakaguráng, marhay man an magigin ugali nin mga akì. Kun natatangadan an salâ, tibaad honaon na an salâ tamà, asín an tamà salâ. 

Tandâ nin Paglaom

Sa Sirach 3,3-4 nasusurat: “An naggagalang sa amâ naghihipnò sa kasâlan, asín an nagpapamuraway sa inâ siring sa nagtitipon nin kayamanan.” Iní an mas hararom na kahulugán kan paggalang niato sa satong mga magurang: sinda an tandâ kan presencia kan Diós Amâ sa satong buhay digdi sa dagâ, asín an pagkamoot ta sainda nakatakód sa satong paglaom sa maabot na kamurawayan kan buhay na daing kasagkoran.

An lambang pamilya kaiba sa dakulang pamilya kan Kahadean nin Diós. Kayâ mantang nabubuhay digdi sa dagâ asín nasisibot sa mga pangangaipo sa aroaldaw, an pamilya nagtúturô man sa realidad kan maabot na buhay na daing kasagkoran. Naipapahilíng iní sa pag-andam sa mga akì bakô saná sa saindang pagmuknâ man nin sadiring pamilya kundî sa pag-andam nin lambang miembro sa buhay na daing kasagkoran; siring man sa pagrumdom asín pagpamìbì sa mga miembros  kan pamilya na naenot na sa ikaduwáng buhay. An devocion sa mga santos nagtutukdò man sa langitnon na padumanan kan lambang miembro kainí.

…

GIYA SA PAGHIRÁS SA SADÍT NA KOMUNIDAD O PAMILYA • Maghiràs nin experiencia kun pâno sinasabuhay kan saimong pamilya an pagigin Simbahan sa haróng, o eskwelahan nin pagkámoót, o tandâ nin paglaom.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Santa Maria Ina kan Dios

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Enero 1-7, 2023. Basahon an Evangelio gikan sa Lucas 2,16-21 (Solemnidad ni Maria Inâ kan Dios).

…                                                                                      

May duwáng fiesta na sinecelebrár cada Enero 1. An sarô seculár, an Aldaw kan Bàgong Taon; an sarô sagrado, an Solemnidad ni Santa Maria Inâ kan Dios. Sa paghilíng kan Simbahan bakô ini magkalaban na fiesta kundì oportunidad sa pagpabanál sa banwaan sa pagsalida kan taon. Sarô ining “maogmang pagsabayan” (happy concurrence), susog ki Papa San Paulo VI sa saiyang surat na Marialis Cultus. Siya man an nagbalík kan suanoy na tradisyon nin pagcelebrár sa ikawalóng aldaw sa Octava kan Pasko bilang Solemnidad kan Inâ kan Dios. Sa katunayan, an misterio kan Incarnación, an pagkanitawo kan Dios Akì, iyo an pinakaoróg na pagsabatan kan seculár asín sagrado, kan langitnón asín kinàbanon.

Si Maria Inâ kan Dios. Ano an kahalagahán kaining fiesta? An titulong Inâ kan Dios an pinakaoróg sa mga titulo ni Virgen Maria nin huli ta an dignidad na ini an pinaghahalean kan gabós na iba pang mga titulo nin debosyón saiya. Nagtutubod kita sa saiyang Inmaculada Concepción asín Asunción sa langit huli ta siya an Inâ kan Dios. Siya an Virgen de Fatima, Lourdes, Guadalupe, Peñafrancia, asín Salvación – huli ta siya an Inâ kan Dios.

An gabós na kaomawan ki Virgen Maria naghahalè sa saiyang Akì. Kan taon 431 AD sa Consejo kan Efeso, formál na piglinaw kan Simbahan an doctrina na si Jesu Cristo totoong Dios asín totoong tawo. Kaya si Maria bakô sanáng inâ kan Cristo na tawo, kundì inâ man kan Cristo na Dios. Bakô siya inâ kan Dios Amâ o kan Dios Espiritu Santo, kundì kan Dios Akì, an Ikaduwáng Persona sa Santissima Trinidad.

Kayâ tinaó ki Maria an titulo sa Griego na Theotokos, an nagdará sa Dios sa saiyang popònan. Siring man sa Latin inaapód siyang Dei genetrix, an nag-akì sa Dios, asín Mater Dei, Inâ kan Dios. Sa ikaduwáng kabtang kan pamìbing Tará Kagurangnan Maria, sinasambit ta: “Santa Maria, Inâ kan Dios, kaming mga makasâlan, ipamìbì mo kami ngonian sagkod sa paghingagdán niamò. Amen.”

Si Maria asín an Bàgong Taon. Sa pagcelebrár kan bàgong taon, kasabáy kan kamàwotan nin kadakul para sa pagbabàgo para sa ikakaraháy kan sadiri, pinepresentár kan Simbahan si Virgen Maria bilang arogán nin pagigin akì kan Amâ asín disipulo ni Cristo. Sabi nganì ni Jesus sa Mateo 12,50: “Siisay man na nag-ootób kan kabòtan kan sakong Amâ sa langit, iyo an sakong mga tugang asín sakong inâ.”

Arogon ta an saiyang kapakumbabaan. Darakulang bagay an nahimo huli ki Maria alagad nagpoón siya sa mga mapakumbabâ asín saradít na gibong pagkámoot asín karahayan. Sabi ni Sta. Teresa de Calcuta: “Bakô gabós sato makakagibo nin mga darakulang bagay, alagad kaya niatong makagibo nin mga saradít na bagay na may dakulang pagkamoot.”

Arogon ta an saiyang kaimbodán. Paladan si Maria bakô sa nagkapira niyang gibong karahayan kundì sa bilog niyang buhay siya nagin maimbód sa pagsunód sa kabòtan kan Amâ. Siring man an pagbàgo kan satong buhay asín pagkamít kan mga pangaturogan nakapatugmád bakô sa paminsan-minsan kundì sa danay na paggibo nin matanos asín marhay.

Arogon ta an pagrimpos niya sa pusò kan mga pangyayari sa saiyang buhay.  Siring na nahiling ni Maria an gracia nin Dios sa saiyang buhay kaya nagibo niya an kabòtan kan Amâ, kita man matatàwan nin malinaw na giya sa dalan kun tatàwan ta nin panahon asín lugár an Dios sa satong buhay – sa pagpangadiè asín pagsimba, sa pagbasa kan biblía asín pag-adal kan Saiyang tataramon asín katukdoán kan Simbahan.

…

GIYA SA PAGHIRÁS SA SADÍT NA KOMUNIDAD O PAMILYA • Sa pagpoón kan bàgong taon, ano an saimong mga papadagoson, mga popònan, asín mga popondohón tanganing mapakarhay an saimong buhay?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Tataramon Nanitawo

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Disyembre 25-31, 2022. Basahon an Evangelio gikan sa Juan 1,1-18 (Pasko kan Pagkamundag).

…

An mga Misa sa Pasko kan Pagkamundag may manlaen-laen na evangelio. Sa Misa sa Vigilia sa Disyembre 24, an evangelio susog ki San Mateo; sa Misa Pagkabanggi o Matangáng Banggi, ki San Lucas; sa Amay na Aga kan Disyembre 25, giraray ki San Lucas, asin sa mga masunod na Misa sa Aldaw kan Pasko, ki San Juan.

An lambang evangelio nag-iistorya kan buhay ni Jesus; may pagkaparareho sinda alagad may mga detalye man na man-iba-iba. Si San Mateo asin San Lucas may istorya kan pagkamundag ni Jesus, si San Marcos nagpoon kan si Jesus adulto na. Alagad si San Juan nagpoon bakô sa istorya kundi sa teología: “Sa kapinònan iyo an Tataramon, an Tataramon kaibahan kan Dios, asin an Tataramon Dios.”

Ano an kahulugan kaini?

Ini an ipinapahayag niato sa Credo Niceno-Constantipolitano na Siya: “namundag gikan sa Ama bàgo kan gabós na panahon. Dios na gikan sa Dios, ilaw na gikan sa ilaw, totoong Dios na gikan sa totoong Dios, ipinangakì, dai linaláng, sarô sa pagka-Dios sa Ama: huli Saiya nagkaigwa kan gabós.”

Si Jesu Cristo an Tataramon kan Dios Ama. Huli Saiya nagkaigwa nin liwanag sa suanoy na diklom, napakarhay an kinàban asin bilog na cosmos. Huli Saiya nakipagtipan an Dios ki Abraham, sinugò si Moises asin tinàwan kan Saiyang mga tugon, inapód an mga profetas sa pagparomdóm sa Piniling Banwaan kan Saiyang kabòtan. Sa Hebreo 1,1 nasusurat: “Sa dakúl asin manlaen-laen na paagi kaidtong panahon, an Dios nagtarám sa satong mga kamagurangan sa paagi kan mga profetas. Alagad sa mga huríng aldaw na ini nagtarám Siya sato sa paagi kan Saiyang Akì.”

Sa Juan 1,14 sinabi man: “An Tataramon nanitawo asin nag-erok sa kaibahan niato”. An Saiyang pagkamundag maogma tang sinecelebrár nin huli ta Siya nanggad an “Emmanuel, an Dios-na-uya-sato”, an tandà na kitá oróg na namomòtan kan Ama.

Kun si Cristo an Tataramon na nanitawo, ano an kahulugan kaini sa satong buhay?

Dangogón ta Siya. Sa istorya kan Transfiguración, an tingog kan Ama halè sa panganoron nagsabi sa mga disipulos na kaibahan ni Jesus: “Dangogón nindo Siya.” An Saiyang tataramon nagtotokdò kan mga misterio kan Kahadean asin giya sa satong buhay. Si Pedro nagsabi sa Juan 6,68, “Sa kiisay pa kami maduman, Kagurangnan? Yaon sa Saimo an mga tataramon nin buhay na daíng kaságkoran.”

Sunudón ta Siya. Si Jesus nagsabi sa mga disipulos sa Juan 14,15: “Kun kamo namomoot sako, ootobón nindo an Sakong mga tugon.” An pagsunód Saiya mádara sato sa dalan nin katalingkasan sa kasâlan, kaligtasan sa kagadanan, asin kapanoan nin buhay.

Ihirás ta Siya. Nin huli ta winaras sato an gracia kan Saiyang tataramon bako para sa sadiri lamang kundi para sa misyon nin evangelización. An misyon na ini kan mga disipulos ni Cristo sinabi sa profesía sa Isaias 52,7: “Magayón paghilingón sa ibabaw nin kabulodan an mga bitís kan nagdádara nin marhay na baretà, kan nagbabalangibog nin katoninongan, nagdodolot nin kagayagayahan, nagrorokyaw nin kaligtasan.”

…

GIYA SA PAGHIRÁS SA SADÍT NA KOMUNIDAD O PAMILYA • Maghirás kun pàno mo namamatean sa saimong buhay asin nahíhirás sa kapwa an Tataramon na nanitawo na an pagdatóng sinecelebár ta sa Pasko.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Regalo kan Epifanía

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Enero 2-8, 2022. Basahon an Ebanghelyo gikan sa Mateo 2,1-12 (Solemnidad kan Epifanía kan Kagurangnan).

...

Sa ebanghelyo, nagbisita an mga mago sa omboy na si Jesus na saindang nakua sa giya nin sarong maliwanag na bitoon.  Susog sa tradisyon, inaapod man sindang tolong hade na may ngaran na Melchor, Gazpar, asin Baltazar. Alagad bako sinda mga hade kundi mga mago, mga madunong asin may inadalan na tawo. Dai man sa Biblia nabanggit an mga pangaran ninda, asin dai man sinabi na tolo sana sinda, kundi na dara ninda tolong klaseng regalo. Ano an kahulugan kan istoryang ini?

An pinakaregalo iyo mismo si Jesu Cristo. May darang regalo an mga mago, asin digdi hale an tradisyon nin pagregalo sa panahon nin Pasko. Alagad an bogtong na Aki kan Ama na ipinadara sa pagligtas sa katawohan an pinakaregalo sa istorya. Sabi sa Juan 3,16: “Huli ta namoot na gayo an Dios sa kinaban kaya itinao Niya an Saiyang bogtong na Aki tanganing an siisay man na magtubod Saiya dai magadan kundi magkamit nin buhay na daing kataposan.” Kaya an pagbisita kan mga mago sinecelebrar bilang fiesta kan Epifanía, boot sabihon an pagpahayag nin Dios sa katawohan kan pagdatong kan satong Paraligtas na iyo si Jesu Cristo.

Alagad bilang regalo, pwede man Siyang dai akoon, isikwal, asin kaongisan pa ngani. Sabi sa Mateo 2,3: “Napurisaw  na gayo si  hadeng Herodes kan madangog niya  (an bareta kan mga mago), siring man an mga taga-Jerusalem.” Bako sana si Herodes, na an paghiling ki Jesus karibal sa trono, an napurisaw kundi pati na an saiyang mga kampon.

Sa Juan 3,19, sinabi: “Ini an hatol: nagdigdi an ilaw sa kinaban, alagad orog na namotan nin tawo an kadikloman kisa liwanag, huli ta maraot an mga gibo ninda.” Maski pigcelebrar ta an mga tradisyon sa Pasko, kun dai kita magbaklî sa satong mga kasàlan asin yaon pa man giraray sa satong puso an pagkamakasadiri, pagkauri, asin pagakadagit, siring kita ki Herodes asin saiyang mga kampon.

Dara ni Jesu Cristo an regalo nin kaligtasan. Bako gabos na mga Judio inako si Jesu Cristo alagad, sabi sa Juan 1,12, “an mga nag-ako saka nagtubod Saiya, tinawan niya nin derecho na magin mga aki nin Dios”. An gracia nin kaligtasan na ini tinatao Niya sa gabos.

Sabi ni San Pablo sa Efeso 3,6: “An misteryo iyo ini: huli kan Marhay na Bareta, an mga Gentil paramana man kan mga bendicion nin Dios, mga kabtang man kan parehong hawak, asin kahiras kan ipinanuga nin Dios ki Jesu Cristo.” An mga Gentil iyo an apod kan mga Judio sa mga bakong Judio, kabilang sainda an mga mago na hale sa harayong lugar nin sirangan, asin kita gabos na bakong mga Judio. Kaya an mga mago representante kan katawohan sa bilog na kinaban, asin si Cristo namundag man para sainda asin para sa sato.

Tinao sato ni Cristo an regalo nin misyon.  Tolong regalo an dara kan mga mago, na simbolo kan Saiyang misyon: bulawan nin huli ta Siya hade, incenso nin huli ta Siya padi, asin mira nin huli ta Siya propeta. Kan kita binonyagan ihiniras sato ni Cristo an Saiyang Espiritu asin ining tolong misyon tanganing ihiras an kaligtasan.

Sa lambang paggibo niato nin karahayan asin pagtabang sa kapwang nangangaipo, ginigibo ta an misyon nin pagkahade. Sa lambang pagpangadie para sa kapwa asin pagdara sainda parani sa Dios, ginigibo ta an misyon nin pagkapadi. Sa lambang pagtukdo niato kan Tataramon nin Dios asin Saiyang mga tugon, sa satong tataramon asin gibo, nagsasaksi kita sa misyon nin pagkapropeta. Regalo ining tolong misyon nin huli ta ini an nagtatao nin kahulugan sa satong buhay asin katuyohan sa satong pagigin Cristiano.

…

GIYA SA PAGHIRAS SA SADIT NA KOMUNIDAD O PAMILYA • Maggibo nin New Year’s Resolution asin isabay kun pàno gigibohon an misyon nin pagigin hade, padi, asin propeta, siring ki Cristo, sa bilog na taon.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

An Pasko para sa Pamilya

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Diciembre 26, 2021-Enero 1, 2022. Basahon an Evangelio gikan sa Lucas 2,41-52 (Fiesta kan Sagrada Familia).

…

Sa ebanghelyo, an Sagrada Familia ni Jesus, Maria asin Jose nagpasiring sa Jerusalem, sarong tradisyon na ginigibo ninda cada taon. An enot an Domingo sa Pasko celebracion kan Fiesta kan Sagrada Familia, na iyo an pangarogan nin mga Cristianong pamilya sa kabanalan asin kaimbodan sa kabotan nin Dios. Segun sa ladawan kan Sagrada Familia, an lambang Cristianong pamilya inaapodan nin Dios na magin Simbahan sa harong, eskwelahan nin pagkamoot, asin tanda nin paglaom.

Simbahan sa Harong. An pinakasadit na unit nin sociedad asin Simbahan iyo an pamilya, kaya ini inaapod man na Ecclesia Domestica o Simbahan sa harong. Ini naipapahiling sa pagsimba, sa pagpamibi, asin sa mga gawe nin pagtubod sa Dios.

Siring ki San Jose asin Santa Maria na dinara si Jesus sa Templo sa Jerusalem asin tinukdoan Siya kan mga tradisyon nin saindang pagtubod, an misyon nin mga magurang na Cristiano iyo na ipamidbid  sa saindang mga aki an mahal na Dios – sa pagtukdo sainda sa mga pamibi asin  doctrina kan Simbahan, sa pagpatood sainda sa mga Catolicong tradisyon, sa pagdara sainda sa mga sacramento, asin sa pagsimba sa cada Domingo asin mga aldaw nin obligasyon.

Eskwelahan nin Pagkamoot. Sa lindong ni Jose asin Maria, nakamatè si Jesus nin pagkamoot nin mga magurang sa daga. An experiencia nin mga aki nin pagkamoot sa pamilya magigin dakulang influencia sa paghiras man ninda nin pagkamoot sa luwas kan pamilya, asin kun sinda na man matogdas nin sadiring pamilya. Manunungod sa pagkamoot, lalo na sa laog nin pamilya, ini an hulit ni San Pablo sa Colosas 3,13-14: “Magpatinios-tiosan asin magpatinawad-tawadan kun an saro may hinanakit sa saro man; kun pàno an Kagurangnan nagpatawad saindo, siring man kamo. Sa ibabaw kaini gabos iyo an pagkamoot na iyo an bugkos kan kalubosan.”

Sa ngonian na panahon, marhay man na tawan nin atensyon nin mga pamilya an pagkamoot sa banwaan, na naipapahiling sa pagtabang sa komunidad, sa pagigin marhay na ciudadano, asin paghongowa na itama an mga salâ sa sociedad. Orog na kaipuhan ngonian na an lambang miembro nin pamilya – gurang asin aki man – na magsaksi sa pagsikwal sa kultura nin garadanan asin pang-aapi sa derechos humanos, sa paninindogan sa katotoohan lalo na kun may mga kapamilya na nagpapalakop nin fake news, sa dai pagpabakal nin boto, asin sa responsableng pagpili nin mga kandidato.

Tandâ nin Paglaom.  Sa Sirach 3,3-4 nasusurat: “An naggagalang sa ama naghihipno sa kasâlan, asin an nagpapamuraway sa ina siring sa nagtitipon nin kayamanan.” Ini an hararom na kahulugan kan paggalang niato sa satong mga magurang: nakatakod ini sa paglaom kan madatong na kamurawayan.

An lambang pamilya kaiba sa dakulang pamilya kan Kahadean nin Dios. Kaya mantang nabubuhay digdi sa dagâ asin nasisibot sa mga pangangaipo sa aroaldaw, an pamilya nagtuturo man sa realidad kan maabot na buhay na daing kasagkoran. Naipapahiling ini sa pag-andam sa mga aki sa buhay na daing kasagkoran; siring man sa pagrumdom asin pagpamibi sa mga miembros  kan pamilya na naenot na sa ikaduwang buhay.

…

GIYA SA PAGHIRAS SA SADIT NA KOMUNIDAD O PAMILYA • Maghiras nin mga tradisyon kan saindong pamilya sa panahon kan Pasko. Nahihiling daw sa mga ini an pagigin Simbahan sa harong, o eskwelahan nin pagkamoot, o tanda nin paglaom kan saindong pamilya?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Bonyag ni Jesu Cristo

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Enero 10-16, 2021. Basahon an Evangelio gikan sa Marcos 1,7-11 (Fiesta kan Pagbonyag kan Kagurangnan).

An evangelio nag-iistoria kan version ni San Marcos kan pagbonyag ki Jesu Cristo. An pagrumdom kaini iyo man an huring aldaw kan Panahon kan pasko nin Pagkamondag. Ano an kahulugan kaining Pagbonyag?

Pagpamidbid ni Cristo bilang Mesias. Nagpapadagos an pagpahayag sa katawohan kan misterio nin pagkanitawo kan Dios na enot nang pinahayag sa Pag-anuncio kan angel, sa Pagkamundag, asin sa Epifanía. Sa pagbonyag ki Jesus nagpamidbid Siya bako bilang mabagsik na hade kundi bilang Mesias na maboot asin mapakumbaba. Dai man Niya kaipuhan magpabonyag nin huli ta ini para sa pagpatawad nin mga kasàlan, asin dai man Siyang kasàlan. Alagad hinagad Niya ini ki Juan Bautista sa pakisumaro sa makasàlan na kamugtakan nin katawohan.

Sa paghilig kan Espiritu, pinamidbid man Siyang profeta na magbabalangibog kan marhay na Bareta kan Kahadean. Sa pag-omaw Saiya kan tingog kan Ama bilang Aking namomotan, pinamidbid man Siya bilang Aki kan Dios.

Pagpamidbid kan Dios bilang Santissima Trinidad. Siring na dai paghonaon kan banwaan na Israel na an pighahalat nindang Mesias bogtong na Aki kan Dios, dai man ninda paghonaon na an Dios mapamidbid kan Saiyang sadiri bilang Aki na binobonyagan, bilang Espiritu, asin bilang Amang makakamhan.

Kaya ngani an apod kan Simbahan na Eastern Orthodox sa pangyayaring ini, theofanía, an pagpahayag nin Dios. Kaya maninigo lamang na apodon si Jesu Cristo bilang kapanoan kan kapahayagan nin Dios ta nin huli Saiya namimidbidan ta an Dios asin an Saiyang kabotan.

Pagpahayag kan Sacramento nin Pagbonyag. Matapos na si Cristo mabonyagan, pinônan na Niya an saiyang ministerio publico, asin nagpoon na man Siya sa pagbonyag. Asin bago Siya sumakat sa langit, sa Mateo 28,19, sinugo Niya an Saiyang mga disipulos kaidto hanggang ngonian: “Paduman kamo sa gabos na tawo saen man na lugar; gibohon nindo sindang mga disipulos Ko. Bonyagan nindo sinda sa ngaran kan Ama, kan Aki, asin kan Espiritu Santo.”

Sa pagbonyag ki Jesus sa salog Jordan an gabos na tubig napapabanal asin maninigo nang gamiton sa sacramento nin Bonyag sa pagpatawad nin mga kasàlan. Huli man sa Bonyag, tinatao sa lambing saro sato an dignidad nin pagigin Aki kan Ama, Tugang ni Jesu Cristo, Templo kan  Espiritu Santo, Miembro kan Simbahan, asin Tagapagmana kan Kahadean.

An pagbonyag iyo an pagsabatan kan kabotan nin Dios asin tawo. Sa pagbonyag inaako kan tawo an Dios sa saiyang buhay asin minaayon siya sa kabotan nin Dios. Kaya ngani sa Rito nin Pagbonyag, hinahagad an satong panuga na isikwal si Satanas, asin an mga padaya asin maraot kaining gibo; siring man na minatubod sa Dios Ama, Aki, asin Espiritu Santo. Ini an kabòtan kan satong Dios para sato na dapat niatong isabuhay, asin magigin sukol  kan  paghukom sato pag-abot kan panahon kun kita makakalaog sa Saiyang Kahadean sa langit.

 

GIYA SA PAGHIRAS SA SADIT NA KOMUNIDAD O FAMILIA • Maghiras kun pano sato enot na pinamidbid an Dios kan satong mga magurang o kun siisay man, asin kun pano ta Siya danay na namimidbidan sa ngonian.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song