16 March 2024

Natà ta Kaipuhan pa ni Jesús Magadán?

 


Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marzo 17-23, 2024. Basahon an Evangelio gikan sa Juán 12,22-30 (Ikalimáng Domingo kan Cuaresma - B)

Sabi ni Jesu Cristo sa Juán 12,24: “Kun an tipasì nin trigo na nahulog sa dagâ daí magadán, padagos na iyó saná iyán; alagad kun magadán dakúl an ibinubunga.” Bâgo maglaóg an Semana Santa iníng Evangelio pinapalaóg na kita sa Misterio Pascuál ni Cristo: an Saiyang pagsakit, pagkagadán, asín pagkabuhay-liwát.

Natà ta kaipuhan pa ni Jesús magadán?

Nin huli ta iyó iní an binoót kan Diós Amâ na sacrificio tanganing maligtás kita sa kasâlan. Bilang tawong totoo, pigrerepresentár ni Jesús an katawohan sa hampang kan Amâ. Siya an satong Halangkáw na Padì na pagultanan kan Diós asín tawo. Bilang Diós na totoo, Siya an perfectong sacrificio na iyó saná an makakaparà kan mga kasâlan nin katawohan. Sabi sa Hebreo 5,9: “Kan Siya nalubós, nagi Siyang dahilán nin kaligtasan na daíng kasagkoran sa mga nagkukuyog Saiya.”

An tradisyon nin pagdolot nin sacrificio tinugon nin Diós ki Moisés para sa Saiyang banwaan. An mga tawo nag-aatang nin mga hayop sa Diós bilang kabayadán sa saindang kasâlan. Sa hurí, makukuá an pinaka-kahulugán kan tugon asín tradisyon na iní sa sacrificio ni Cristo na nagin kabayadán sa mga kasâlan niato gabós.

Sa paagi kan Saiyang sacrificio, tinutukdoán Niya kita kun anó an tunay na pagkámoót. Sabi Niya sa Juán 15,13: “Oróg kainíng pagkámoót mayò an siisay man: na idusay an saiyang kalág para sa mga katood.” Maski an Saiyang mga kaiwal namòtan Niya bilang katood. An mga nagplano kan Saiyang kagadanan asín nagpasakit Saiya, daí Niya binalsán nin kakurihan ni violencia, kundî kapatawadán asín pagkaherak. Kayâ si Cristo an sacrificio kan Amâ para sa katawohan, an pangenot na tandâ asín pagiromdóm sa gabós na kapag-arakian kan Saiyang oróg kadakulang pagkámoót asín pagkaherak.

Natà ta kaipuhan ta man magadán?

Nin huli ta kita mga disipulos ni Cristo. Sinabi Niya sa Juan 12,25-26: “An namómoót sa sadiring kalág, mawawàran kaiyan, alagad an naóongís sa sadiring kalág sa kinâban na iní, mapadanay kaiyán para sa buhay na daíng kasagkoran. An siisay man na naglilingkod Sako, Sakuya magsunód asín kun saén Ako, dumán man an Sakong paralingkod.” An hinahagad ni Jesús bakô an basang na paglaág sa sadiri sa peligro kundî an pagpagadán sa mga kasâlan.

Magadán kita sa satong kaluyahan nin boót, asín daí pagdulagán an satong mga problema asín katongdán. Akoon ta an mga iní bilang satong cruz, asín makúkuá ta si Cristo na kaibahan niato sa pagpâsan. Asín kun kaiba ta Siya, sabi ni San Pablo sa Filipos 4,13: “Gabós kaya ta sa Saiya na nagpapakusóg sato”.

Magadán kita sa satong sadiring katanosan asín pagsarig sa saláng kapangyarihan. An mga naghahadê-hadéan sa satong banwaan ngonian boót na isikwal ta an mga tugon nin Diós – daí ka maggadán, daí ka maghâbon, daí ka magsaksing-putik. Binabakál ninda an boót asín boses nin mga tawo nin kwartang bakô man sainda kundî sa kabán kan banwaan. Sabi sa Psalmo 146,3: “Daí kamo magsarig sa mga prinsipe, ni sa mga akì ni Adán na daí makakapagligtás”.

Magadán kita sa pagkaarà sa mga bagay na kinâbanon. Sabi nganì sa Mateo 16,26: “Anó an mapapakinabangan nin tawo kun ganahon niya an bilog na kinâban alagad mapierde an saiyang kalág?” Kundî magadán kita sa satong makasâlan na sadiri tanganing magin bâgong tawo susog sa graciang tinátaó ni Cristo. Makimaherak kita sa Diós Amâ, siring kan pamìbì sa Psalmo 51,12: “Pusong malinig lalalangá sako, O Diós, asín espiritung andam bâgohá sa boót ko.”

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin pagpagadán sa sadiri. Namatean mo si Jesús na kaiba mo sa pagpâsan?

PASUNOD-SUNOD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the Faithful • Closing Prayer (Spontaneous and Our Father) • Closing Song


09 March 2024

An Diós Námoót na Gayo sa Kinâban

 


Giya sa Prayer-Meeting nin mga Saradít na Komunidad nin Pagtubód (SAKOP) Para sa semana kan Marzo 10-16, 2024. Basahon an Evangelio gikan sa Juan 3,14-21 (Ikaapat na Domingo kan Cuaresma - B).

Sa Evangelio, sa istoryahan ni Jesu Cristo asín Nicodemo, saróng Fariseo asín poón nin banwaan, pigpaliwanag ni Jesús an misterio nin Diós na namoot sa sato. Nin huli ta namòtan kita nin Diós, an satong paghorop-horop sa pagsakit asín pagkagadan ni Cristo sa Cuaresma, aram niato na daí matatapos sa trahedya kundî sa panggana: sa Saiyang pagkabuhay-liwát asín sa satong kaligtasan.

Kayâ an Ikaapát na Domingo kan Cuaresma ináapód na Domingo de Laetare (boót sabihon “mag-ogma”) nin huli ta an pagsakit asín kamundoan minaagi saná, alagad an kaogmahan asín pagkámoót nin Diós magdadanay sagkod pa man. Anó an pinaliwanag ni Cristo dapít sa misterio kan pagkámoót nin Diós? Asín anóng mga saláng paghonà nin katawohan an boót Niyang itamà ta?

An pagkámoót nin Diós maimbod asín daí nagsusukò sato. Para sa mga naghohonà na nin huli sa saindang kasâlan, daí na nin pag-asa, iní an simbag ni Jesús sa Juan 3,16: “An Diós námoót na gayo sa kinâban, kayâ itinaó Niya an Bogtong Niyang Akì, tanganing an gabós na nagtutubod Saiya daí máwarâ, kundî magkamít nin buhay na daíng kasagkoran”. Sabi man ni San Pablo sa Efeso 2,4-5: “An Diós na mayaman sa karahayan, huli kan dakulang pagkámoót Niyang gayo sato, mantang kita gadán sa satong kalapasan, binuhay kita kaiba ni Cristo.”

Kayâ kun kita halóy na panahón nang narayô sa Kagurangnan, daí nakakapagsimba ni makapangadyî lamang; kun an satong buhay náraót nin kasâlan o nahulog sa addiction sa bisyo – giromdomón na may Diós na daí nag-oontok sa pagkámoót sato.

An satong kaligtasan itinaó nin Diós ki Cristo. Para sa mga naghohonà na an saindang sadiring katanosan tamà na para sa Kahadean nin langit, pinapagiromdóm na sa paagi saná ni Cristo makakamtan an kaligtasan. Sa Juan 3,14, si Jesús nagsabi ki Nicodemo: “Kun pâno ni Moisés initaas an halas sa desierto; siring kaipuhan iítaas an Akì nin Tawo, tanganing an gabós na nagtútubód Saiya, magkaigwa nin buhay na daíng kasagkoran.”

An pigtutukoy ni Jesús na halas iyo an bronzeng halas sa libro nin mga Numero 21,6-9, na pinagibo nin Diós ki Moisés tanganing iítaas sa tukón asín an mga Israelita na nakahilíng kainí nabulóng asín daí nagkagaradán. An mensahe iyó na iníng mga Israelitang nagrebelde sa Diós daí man kayang iligtas an saindang sadiri kundî an Diós an nagpadará kan saindang kaligtasan. Siring man, daíng siísay man – gurâno man katanos, kadunong, o kabanál – an kayang palaogón an sadiri sa langit, kundi an gracia nin Diós an nagliligtas sato. Sabi nganì ni San Pablo sa Efeso 2,8-9: “Ta sa gracia kamo mga ilinigtás huli kan pagtubód; tanganing mayò nin magpaabáw-abaw”.

An kaligtasan naghahagad kan satong pagbâgong-buhay.  Para sa mga naghohonà na an pag-akò ki Cristo basang saná asín daí naghahagad nin pagbâgo kan sadiri, pinapagiromdom na Siya duminatóng bilang ilaw na minaparà sa kadikloman nin kasâlan. Sabi ni Jesús sa Juan 3,20: “An gabós na naggigibo nin daíng-data, naóongis sa ilaw, asín daí nagdodolok sa ilaw, tanganing daí masudyâ an saindang mga gibo.”

Para sa mga nagtútubód alagad daí pa sinisikwal an kasâlan, may patanid si Cristo sa Mateo 7,21: “Bakô gabós na nagsasabi Sako: ‘Kagurangnan, Kagurangnan!’, makakalaóg sa Kahadean kan langit kundî an naggigibo kan boót kan Amâ kong yaon sa langit.”

GIYA SA PAGHIRÁS SA SADÍT NA KOMUNIDAD O PAMILYA | Maghiras nin experiencia kun pâno mo namatean an pagkámoót asín pagkaherak nin Kagurangnan.

PASUNOD-SUNOD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the Faithful • Closing Prayer (Spontaneous and Our Father) • Closing Song

 


02 March 2024

Si Jesu Cristo asín an Templo

 


Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marzo 3-9, 2024. Basahon an Evangelio gikan sa Juan 2,13-25 (Ikatolóng Domingo kan Cuaresma - B).

Garó ibáng klaseng Jesús an pig-iistorya sa Evangelio.  Garó bakô Siya su pig-aawit na “O heart of Jesús, meek and mild”.  Nadagit Siya, namakol gamit an binugkós na pisì, pinabalintok an mga lamesa kan mga pararibay nin kwarta, asín pinalayas an mga paratinda kaiba an mga hayop na pigpapabakal ninda sa lugár kan Templo sa Jerusalem. Natà ta ginibo Niya iní?

Nagtutukdò si Jesu Cristo dapít sa bolanos na pagsa-Diós.

Kan mahiling kan mga disipulos an ginibo ni Jesús naromdoman ninda an profesía sa Psalmo 69,9: “An pag-imón ko sa saimong haróng minatunaw sako”. Bakô saná na pigtuyaw Niya an mga saláng gibo sa sagradong lugár kan Templo kundî pigtamà Niya man an mga saláng pakasabot dapít sa bolanos na pagsa-Diós, lalò na an mga saláng pagpadára kan mga namámayó sa Israel.

Susog sa Ley ni Moisés, maninigò lamang na magdolot nin sacrificio para magpasalamat sa Kagurangnan asín maghagad nin kapatawadán. Alagad sa pag-agi nin mga panahón may mga saláng patakarán na dinagdag sa tugon na iní, siring bagá kan pagribay nin kwarta na dapat iatang sa Templo ta daí daá pwede an ordinariong kwarta nin huli ta an mga iní maatî. Sa negosyo nin pagribay may mga dayaán. Siring man an pagpabakal sa lugár kan Templo mismo nin mga hayop na pwedeng iatang, na monopolyo kan poón nin mga kapadian.

Iníng mga saláng pasunód nagin pang pagabát sa mga dukhang paratubod na boót magdolot nin atang sa Templo. Kayâ sinabihan sinda ni Jesús: “Daí nindo paggibohon na saodan an haróng kan sakong Amâ.” Sa ibáng mga Evangelio dinagitan man sinda ni Jesús ta ginibo ninda an Templo na “lungib nin mga parahâbon”.

Sa satong Simbahan, kaidto pang 1991, sa Ikaduwáng Concilio Plenario kan Pilipinas (PCP II), sinabing dapat haleon na an sistemang arancel, o an bayad sa lambang pagcelebrár nin sacramento, nin huli ta iní nakakauláng sa tamang pakasabot sa mga sacramento, asín sa pag-akò sa mga iní kan mga dukhâ. Sabi nganì sa Mateo 10,8: “Nag-akò kamo nin daíng bayad, kayâ magtaó man kamo nin daíng bayad.” Padagos an pasabóng asín paghirô kan Espiritu sa danay na pagpakarhay kan Simbahan.

Pâno an bolanos na pagsa-Diós asín pagdolot? Sabi sa Psalmo 51,18-19: “Ta daí Ka namumuya sa sacrificio, kun magdolot ako nin tinutóng na atang, daí Mo iyan mamarhayón. An sakong sacrificio, O Diós, espiritung nagsosolsol; pusong mahuyo asín nagsosolsol, O Diós, daí Mo hinahamak.”

Si Jesu Cristo an presencia nin Diós sa kinâban.

An istoryang iní yaon sa apát na Evangelio, alagad ki San Juan pinararom pa an mensahe kan nagsabi si Jesús: “Gabaá nindo an Templong iní asín sa tolóng aldaw babangonon Ko.” Asín pinaliwanag na Siya “nagsasabi dapít sa Templo na iyó an Saiyang hawak.” Oróg na mahalagá an Templo sa Jerusalem para sa mga Judío nin huli ta iní an tandâ kan presencia nin Diós sa saindang banwaan. Sa laóg kan Templo yaon an Arka kan Tipan, an tableta kun saén nakasurat an mga Tugon na tinaó nin Diós mismo ki Moisés. Alagad anóng sinabi kan saróng tandâ o simbolo kun an mismong Diós na nanitawo na an nasa tahaw ninda? Sayang ta sinikwal ninda Siya.

Sabi ni San Pablo sa 1 Corinto 1,22-24: “Ta, mantang an mga Judío mga tandâ an hinahagad, asín an mga Griego kadonongan an hinahanap: kami, ihinaharubay mi si Cristo na ipinakò sa cruz: sa mga Judío padungkalan, sa mga gentil kalolongán, alagad sa mga inapód – Judío o Griego – si Cristo, kapangyarihan nin Diós asín kadonongan nin Diós.”

Ngonian na Cuaresma, pinapahorop-horop kita sa satong consiencia kun bagá: inaako ta daw si Jesús sa bolanos na pagsa-Diós o nasisikwal ta man Siya sa pagpilì ta na paorogón an sadiring kabôtan kisa an matanos sa Saiyang ngaran? Napapahalagahán ta daw an Saiyang presencia sa lambang tabernaculo sa mga simbahan? Boót ta daw na magrarom pa an pakamidbid Saiya sa pag-adal nin Biblía asín pagpamìbì? Namomôtan ta man daw an Saiyang mga namomôtan? Naoongís man daw kita sa mga bagay na Saiyang kinakaongisán?

GIYA SA PAGHIRÁS SA SADÍT NA KOMUNIDAD O PAMILYA | Maghirás nin mga bagay na saimong kinakaongisán nin huli ta iní kontra sa Cristianong pagtubód o katanosan. Anó an ginibo mo dapít kainí?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the Faithful • Closing Prayer (Spontaneous and Our Father) • Closing Song

24 February 2024

Tandâ nin Sacrificio, Tandâ nin Paglaom

 



Giya sa Prayer-Meeting nin mga Saradít na Komunidad nin Pagtubod (SAKOP) para sa semana kan Febrero 25 – Marzo 2, 2024. Basahon an Evangelio gikan sa Marcos 9,2-10 (Ikaduwang Domingo kan Cuaresma - B).

Sa Evangelio, pig-istorya an Transfiguración ni Jesús sa halangkaw na bukid, kaiba an tolóng pinakaugós Niyang disipulos: si Pedro, Santiago, asín Juán. Anó an kahulugán kainíng Transfiguración kan Kagurangnan?

Padagos na Revelación

An pangyayaring iní pagpadagos kan pagpamidbid kan mahál na Diós sa paagi ni Jesu Cristo. An presencia ni Moisés asín Elías na nakikipag-olay ki Jesús nagtutukdò kainí. Si Jesu Cristo an kapanoan kan mga Kasuratán – kan mga Tugon o Batás na pigrerepresentar ni Moisés, an kagibo kan mga Libro nin mga Tugon (an enot na limang libro sa Biblía), asín kan mga profesías dapít sa Mesías na pigrerepresentar ni Elías. Sa dikít na paagi, an Diós nagpamidbid man kan Saiyang sadiri ki Moisés sa bulód kan Horeb sa Exodo 3, asín ki Elías sa bulód kan Carmel sa 1 Hade 19.  Alagad an kapanoan yaon ki Jesús. Sabi Niya sa Juán 14,9: “An nakáhilíng Sako, nakáhilíng man sa Amâ.”

An mga katukdoán ni Jesús dapít sa Kahadean, an Saiyang mga pagbulóng asín mga milagro, asín an Saiyang pagtipon nin mga disipulos – gabós iní nagpapamidbid sa Diós asín sa Saiyang plano. Sa paagi Niya nasasabotan niato an bilog na Biblía. Nasusurat sa Hebreo 1,1: “Sa dakúl na beses asín sa manlaen-laen na paagi, kaidtong panahón nagtarám an Diós sa satong mga magurang sa mga profetas; sa kahuri-hurihi, ngonian na mga aldaw, nagtaram Siya sato sa Akì.”

Tandâ nin Sacrificio

An Transfiguración natapos sa tingog kan Amâ halè sa panganoron: “Iní an Sakong Akì, an namomôtan: magdangóg kamo Saiya.” Sa Marcos 8,31-32, anóm na aldaw bâgo an Transfiguración, sinabi ni Jesús sa mga disipulos an boót sabihon kan Saiyang pagigin Cristo o Mesías: na kaipuhan mag-agi Siya nin pagsakit, pagkagadán, asín pagkabuhay-liwát.  

Igwa pa nin saróng persona sa Lumang Tipan na katakód kan Transfiguración: si Abrahám na binalô nin Diós kun isasacrificio an saiyang aking si Isaac susog sa istorya sa Genesis 22. An kinatapusan kan istorya iyó an daí pagtugot nin Diós na gadanón ni Abraham si Isaac bilang sacrificio sa altar. Alagad sa mga Evangelio si Jesús an ginibong sacrificio kan Diós Amâ para sato. Pagkatapos kan Transfiguración, mábabâ sa bulód si Jesús asín mga pag-iriba, malakbay sinda pasiring sa Jerusalem kun saén Siya aarestohón, papasakitan, asín ipapakò sa cruz. Sabi ni San Pablo sa Roma 8,32: “Siya na an sadiring Akì daí ipinangilin kundî ipinaubayà para sato gabós”.

Paglaom sa Resurrección

Tinugon ni Jesús an tolóng disipulos na kaiba Niya na daí ipagsabi an saindang nasaksihan sagkod “pag mabuhay-na-liwát an Akì nin Tawo halè sa mga gadán”. Daí ninda tulos nasabotan iníng tugon ni Jesús alagad nasabotan man giraray ninda ngapit: na an Transfiguración pasabóng sa kamurawayan kan Resurrección. Iní an magtátaóng paglaom sa pag-agi ninda sa diklom kan pagsakit asín pagkagadán ni Cristo.

Kaidtong Febrero 1986 nagkaigwa nin nakaumagid sa Transfiguración para sa satong banwaan: an Rebolusyon sa EDSA. Sa mga aldaw na idto pinahilíng kan mga Pilipino sa kinâban kun pàno manindogan sa katotoohan asín katalingkasan, asín pabagsakón an diktadurya sa matoninong na paagi. Sa pag-agi kan panahón garó nasalidahan na an paglaom kan EDSA kan kultura nin korupsyón, kaputikan, asín abuso sa kapangyarihan. Kayâ dapat ipadagos ta an mapagál alagad kaipuhan na Pasión para sa katotoohan sa pagpahayag asín integridad sa paglingkod tanganing makamtan na an tunay na pagbabâgo kan satong banwaan, an pangarap na resurrección kan satong nación.

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kun pàno an Diós nagtatao saimo nin paglaom sa tahaw nin mga kadipisilan asín mga agyat nin buhay.

PASUNOD-SUNOD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the Faithful • Closing Prayer (Spontaneous and Our Father) • Closing Song

 


18 February 2024

An Kahulugan asin Katuyohan kan Cuaresma



Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Febrero 18-24, 2024. Basahon an Evangelio gikan sa Marcos 1,12-15 (Enot na Domingo kan Cuaresma - B).

Anó an kahulugán kan pagtenér ni Jesús sa desierto o kadlagán sa laóg nin cuarentang aldaw? Kun susugon an tradisyon kan mga Hebreo, an numero cuarenta dapít sa kapanoan o katapusan nin saróng panahón asín pagpoón kan masunód na panahón. Sa pag-abót ni Jesús natapos na an Daan na Tipan asín duminatóng na an kapanoan kan mga profesía. Sa Evangelio ini an sabi Niya kan mag-abot Siya sa Galilea: “Nautób na an panahón asín haraní na an Kahadean nin Diós!”

Anó an katuyuhán kan cuarentang aldaw nin pag-ayuno asín pagpamìbì ni Jesús? Inì an pag-andam Niya sa pag-utòb kan kabôtan kan Amâ sa Saiyang ministerio publico hanggang sa Pasión asín Pagkabuhay-lIwat.

Anó man an kahulugán asín katuyuhán kan panahón kan Cuaresma?

An kahulugán kan Cuaresma iyó an satong pakisumarò sa misyon ni Cristo.

An tataramon na Cuaresma halè sa cuarenta. Siring na si Cristo namìbì asín nag-ayuno nin cuarentang aldaw, kita man minaagi nin cuarentang aldaw nin pagraní sa Diós asín pagsayuma sa sadiri asín sa mga kinâbanon na kaogmahan. Sa satong pakisumarò ki Cristo matatagboán ta an Diós na halóy nang nakikisumarò sato – alagad kita an daí nakakataó nin maninigong atensyon sa Saiyang presencia asín gracia.

Naunambitan man sa Evangelio na kaiba ni Jesús an mga hayop sa kadlagán asín mga angelés na naglilingkod Saiya. Kaidto pa ginigibo na ining alegoría o simboló: an mga hayop nagrerepresentár sa mga kaluyahan asín karigsokan nin tawo, asín an mga angelés, kan danay na pagtabang nin Diós sa buhay nin tawo. Boót sabihon nakisumarò si Jesús sa kabilogan kan satong pagkatawo, kaiba an mga kaluyahan niato asín kadificilan nin buhay, pwera sa kasâlan.

Sabi sa Hebreo 4,15: “Ta mayò kita nin Poón na Padì na daí tataó makidumamay sa satong kaluyahan, kundî saróng sinugotán siring sato, sa gabós na bagay, mayò saná nin kasâlan”. Kayâ siring na sinikwal ni Jesús an tentación ni Satanás, iyó man an hinahagad sa satong mga disipulos Niya: makaukod na mibdidón an satong mga tentación tanganing sikwalón an mga iní sa tabang kan gracia ni Jesús. Sabi nganì ni San Pablo sa Filipos 4,13: “Gabós kaya ko sa Saiya na nagpapakusóg sako”.

An katuyuhán kan Cuaresma iyó an satong pakihirás sa kamurawayan kan Pagkabuhay-liwát.

Pakatapos kan cuarentang aldaw sa kadlagán, pinônan na ni Jesús an Saiyang ministerio publico na nagtapos sa Misterio Pascual, an misterio kan Saiyang pagsakit, pagkagadán, asín pagkabuhay-liwát. Siring man, an katuyuhán kan Cuaresma mahihiling sa katapusan kainì: an celebración kan Misterio Pascual. Sabi sa Roma 6,5: “Kun nagi Niya kitang kahirás sa kagadanan na siring kan Saiya, talagang makakahiras man kita sa pagkabuhay-liwat”.

Tanganing magkanigò kitang magcelebrár kan pagkabuhay-liwát, tinataó sato bilang giya an mga disiplina kan Cuaresma: pagpamìbì, pag-ayuno, asín pagtabang sa kapwa, asín an hulit ni Jesús sa Evangelio, na siring sa sinasabi sa pangurús nin abó sa Miercoles de Ceniza: “Magsolsól asín magtubód sa Marhay na Baretà”. Iníng mensahe yaon man sa Domingo de Resurrección, sa Pagbâgo kan mga Panugâ sa Bonyag, kun saén pinapahayag niato an pagsikwál ki Satanás asín sa saiyang mga padayà, asín pagpahayag kan satong pagtubód sa Diós Amâ, Akì, asín Espiritu Santo.

An gabós na mga gawè asín rituál sa Cuaresma satong pakisumarò sa misyon asín pakihirás sa Pasión asin kamurawayan kan satong Kagurangnan Jesu Cristo.

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin pag-agi man nin sadiring “panahón sa desierto” – pwedeng espirituál na gawè o panahón nin kadificilan asín pagbalô.

PASUNOD-SUNOD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the Faithful • Closing Prayer (Spontaneous and Our Father) • Closing Song


10 February 2024

An Kapangyarihan nin Pagkaherak

 


Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Febrero 11-17, 2024. Basahon an Evangelio gikan sa Marcos 1,40-45 (Ikaanóm na Domingo sa Ordinariong Panahón - B)

Sa Evangelio, binulóng ni Jesús an saróng daoton (may ketong) na nakimaherak Saiya: “Kun boót Mo, malilinigan Mo ako.” Anó an mensahe kan istoryang iní?

Enot, na an satong Diós oróg na makapangyarihan.

An daot o ketong iyó an pinaka-kinakatakutan na helang sa halóy na panahón. An tawong may helang kainí minaagi nin halawig asín makuring pagsakit. Makusóg pa iníng makaulakit. Kayâ kan binulóng ni Jesús an lalaking daoton, daí Niya saná binulóng an saiyang helang kundî tinâwan Niya siya nin bâgong buhay.

Kun an Diós makapangyarihan, pinapahilíng man kainí an kaluyahan nin tawo. Sa halawig na panahón daí nin solusyón sa daot. Daí pa nahalóy kan nagkaigwa nin masasarigan na combinación nin mga bulóng para sa helang na iní. Hanggang sa ngonian kadakul pa man giraray nin mga helang na daíng siguradong bulóng. An nakaagi pa sanáng pandemiang dulot kan COVID-19 nagpahilíng kan satong kaluyahan sa hampang nin mga darakulang problema asín misterio nin kinâban.

Alagad igwa kita nin Diós na mas makapangyarihan sa anoman na helang, problema, o makuring kasâlan. Sabi ni Jesús sa Marcos 10,27: “Sa tawo imposible, alagad bakô sa Diós, ta an gabós posible sa Diós”. An satong Diós danay na masasarigan niato.

Ikaduwá, an kapangyarihan nin Diós mas namamatean nin tawo sa Saiyang pagkaherak.

Kun si Jesús an kapanoan kan pagpamidbid kan Amâ, an ipinapamidbid Niya sato saróng Diós na mayaman sa pagkaherak. Kan nakimaherak an lalaking daoton, tulos naherakan Niya siya. Kan nagraní Saiya an mga parakasalà, pinatawad Niya sinda. Pag nahilíng Niya an katawohan na gutóm sa mga Tataramon nin Diós, naherakan Niya sinda siring sa pastór na nag-aataman sa saiyang kawan.

Kun an Diós maheherakón, pinapagiromdóm man kita kan kakulangán kan satong pagkaherak. Sa Levitico 13 nasusurat kun anó an magkakanigong aksyón sa mga tawong may daot: isiblág sa katawohan, i-obligár na mag-erok sa luwás kan banwa, magbadò nin sa may helang, asín magkurahaw sa pagpatanid kun may magraní sainda. Alagad aram niato na minsan ginigibo iní tanganing daí makaulakit sa mas dakulang populasyon, dakulang pagsakit asín kamundoan an dulot kainí sa mga may helang asín sa saindang pamilya. Kan nakaaging pandemia kadakul sato an naka-experiencia man nin nakaumagíd na pagsakit bakô saná sa mga restricción kan gobyerno kundî sa diskriminasyón nin mga tawo.

Kan pinaluwás kan Dicastery for the Doctrine of the Faith an deklarasyon na Fiducia Supplicans, dapít sa pagwaras nin bendición maski sa mga tawong nasa iregulár na sitwasyon nin pag-ibahan, kaiba na an mga nasa same-sex na relasyon – kadakul na Catolico an harabô na an mga iní matâwan man nin bendición, maski na nganì piglilinaw na iníng bendición bakô pagtugot na sa mga relasyon na nasa estado nin kasâlan, kundî nagmamàwot na sa paagi nin pagkaherak darhon sinda sa katotoohan kan Evangelio.

Garó nagkarilingawan na kan mga harabô sa paliwanag kan Fiducia Supplicans an Evangelio nin pagkaherak ni Jesús. Sinabi Niya sa Mateo 9,13: “Pagkaherak an mâwot ko, bakóng sacrificio. Ta daí Ako nagdigdi sa pag-apód sa mga mayong salà, kundî sa mga parakasalà.”

Kitang mga naherakan lugód magin mas mahéherakón, asín daí paorogón an sadiring katanosan kundî an kadonongan na halè sa mahéherakón na pusò nin Diós.

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kun pàno mo namatean an pagkaherak nin Diós, o kun pàno ka man nagin istrumento nin Saiyang pagkaherak sa kapwa.

PASUNOD-SUNOD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the Faithful • Closing Prayer (Spontaneous and Our Father) • Closing Song

 


03 February 2024

An Evangelio nin Pagkamoot

 


Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Febrero 4-10, 2024. Basahon an Evangelio gikan sa Marcos 1,29-39 (Ikalimáng Domingo sa Ordinariong Panahón – B).

Sa Evangelio, matapos magbulóng nin kadakul na may helang asín magpaluwás nin mga demonio, sinabi ni Jesús an katuyuhán kan Saiyang pagpadigdi sa kinâban: an pagbalangibog kan Marhay na Baretà sa katawohan. Iní man an sinabi ni San Pablo sa 1 Corinto 9,16: “Herak man sako kun daí ko ipaghulit an Evangelio!”

Anó iníng Marhay na Baretà? Na igwa kitang Diós na namómoót sato, na maski kita parakasalà daí kita pinabayaan kundî pinadarhán pa nganì nin Paraligtás sa satong kasâlan, asín tinâwan nin buhay na panô asín daíng kasagkoran sa kaibahan Niya.

Sa Evangelio, pig-istorya man kun pàno pigsabuhay ni Jesús iníng Marhay na Baretà sa pagtaó Niya nin prioridád sa tolóng lado nin mga namomòtan– tanganing magin pangarogan niato. Nin huli ta sabi Niya sa Juan 20,21: “Siring na Ako sinugò kan Amâ, kamo man sinusugò Ko.”

1. Pagkámoót sa Nagkapira.

Nagbisita si Jesús sa haróng ni Simón Pedro asín Andrés, kaiba an magtugang na Santiago asín Juán. Tinuyo Niya dumán para bulongón an panugangan na babae ni Simon Pedro na may kalentura. Sa Saiyang minísterio publico pinahilíng ni Jesús an especial na relasyon Niya sa komunidad nin mga disipulos na tinipon Niya. Sa sainda saná (bakô sa katawohan) tinukdô Niya an kahulugán kan mga parabola, asín iníng sadít na grupong kaiba Niya man sa mga darakulang misterio kan Saiyang buhay. Igwa pa Siya nin iba pang mga kaugós, siring kan magturugang na María, Martha, asín Lazaro; asín an mga babaeng sinda María Magdalena, Juana, asín Susanna; asín ibá pa.

Kita man pinapagiromdóm na an enot niatong misyon sa paghirás kan Marhay na Baretà iyó an satong pamilya, barkada, asín mga tawong haraní sato. Natatàwan ta daw sinda nin magkakanigong atensyon asín pagsabot sa kanya-kanya nindang pig-aagihan? Natatâwan ta daw sinda nin oras sa pakicelebrár sa saindang kaogmahan asín pakisumarò sa saindang kadificilan?

2. Pagkámoót sa Kadaklan.

Kan maaraman kan mga tawo na yaon si Jesús sa haróng ni Simon Pedro, dinará ninda Saiya an mga may helang asín mga may demonio, dangan sinda gabós binulóng Niya asín an mga demonio pinalayas Niya. Maski nganì banggi na asín pagál na man si Jesús, daí Niya pinahalè an mga nangangaipo kundî pinamatè sainda an Saiyang pagkaherak.

Kita man inaapodán na mámoót bakô saná sa satong mga kaugós asín kapamilya kundî sa mas dakulang komunidad asín sociedad man, susog sa tugon ni Cristo sa Marcos 12,31: “kamòtan mo an saimong kapwa siring saimo man saná”. Nagmamakulóg daw kita sa satong kapwa, kaiba na an mga bakô niato kamidbid o kapareho, siring kan mga biktima nin inhustisya kan nakaaging Giyera sa Droga, o sa mga Palestino na dekada nang ináapí asín inuubos kan gobyerno kan Israel? Nag-aambag man daw kita sa pag-ataman sa kapalibotan?

3. Pagkámoót sa Diós.

Matapos an halawig na banggi nin pagbulóng, pagkaagang amay, madiklom pa, nagbuhát na si Jesús asín nagpasiring sa lugár na daíng tawo para magpamîbì sa Amâ. Mahalagáng parte kan Saiyang buhay sa dagâ an danay Niyang pakiolay sa Amâ, asín kita nganì tinukdoan man Niya na magpamîbì sa Amâ.

Natatàwan ta daw nin magkanigong panahón an Diós sa satuyang aldaw? Napapabanál ta daw an Domingo, Saiyang aldaw, sa pagsimbá? Naghihingowa daw kita na hanapon an Saiyang kabôtan sa pagbasa asín pag-adal kan Saiyang Tataramon?

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kun pàno mo naihirás an Evangelio nin pagkámoót sa sadiring pamilya o barkada, o sa bakô kamidbid, o sa kapalibotan.

PASUNOD-SUNOD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the Faithful • Closing Prayer (Spontaneous and Our Father) • Closing Song

 


27 January 2024

Si Jesu Cristo Paratukdo

 


Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 28 - Febrero 3, 2024. Basahon an Evangelio gikan sa Marcos 1,21-28 (Ikaapat na Domingo sa Ordinariong Panahon - B)

Sa Evangelio, pigngalasán an paagi nin pagtukdô ni Jesús na “igwang autoridad” asín bakô siring sa mga escribas. Mas lalò pa sindang nagngalás kan pahalèon Niya an demonio na yaon sa saróng lalake sa paagi saná kan Saiyang tataramon. Daí pa masabotan kan mga tawo kaidto an kapangyarihan na yaon Saiya. Alagad kita, aram na niato: Siya an Paratukdô dapít sa Kahadean nin langit, an kapanoan kan pagpamidbid kan Amâ.

An Saiyang autoridad iyo an pagigin Banál kan Diós.

Sa Marcos 1,24, inapód Siya kan demonio na “an Banál kan Diós”, boót sabihon: Siya halè sa Diós, Siya an Akì kan Diós. Sa Lucas 1,35, sinabi ni Angel Gabriel ki Virgen María: “an mamumundag aapodón na banál, Akì kan Diós.” Asín sa Marcos 3,11 nasusurat: “An mga maatíng espiritu, pag Siya natatànaw, naglulukmô sa atubang Niya asín nagkukurahaw: “Ika an Akì kan Diós!”

Sa Credo Niceno-Constantinopolitano, pinapahayag ta na “huli Saiya nagkaigwa kan gabós. Huli sa satong mga tawo asín huli sa satong kaligtasan naghilig Siya halè sa kalangitan.” Kayâ an pagpairarom kan mga demonio sa Saiyang autoridad saróng sadit na bagay saná para Saiya na may kapangyarihan sa paglaláng asín buhay.

Nagtutukdô Siya bilang pinakadakulà sa mga Profetas. 

Si Jesús nagtukdô bilang profeta, susog sa tradisyon nin mga profetas sa Israel na maimbod na binabalangibog an dabar Yahweh­, an Tataramon ni Yahweh. Siya an sinasabi sa profesía sa Deuteronomio 18,18: “Mabangon Ako para sainda nin saróng profeta halè sa tahaw kan saindang kadugô, itátaó Ko an an Sakong tataramon sa Saiyang ngosò, asín itátarám Niya saindo an gabós na itutugon Ko.” Sa Juan 12,49, sasabihon man ni Jesús: “Huli ta Ako daí sadiring nagtarám kundî si nagsugò Sako, an Amâ, Siya Sako an tuminugon kun anó an isasabi Ko asín kun anó an itátarám.”

Siring sa mga profetang naenot Saiya, an buhay asín pagtukdô ni Jesús nagtatanyog sa mga makapangyarihan asín mapaabaw-abaw, alagad nagpapakusóg-boót asín nagraranga sa mga mapakumbabâ asín nagagabatan.

Alagad oróg Siya sa gabós na mga profetas nin huli ta bakô sana Siya tagadará kan tataramon nin Diós, kundî susog sa Juan 1,14, Siya mismo an “Tataramon na nanitawo, asín nag-erok sa tahaw niato”, asín sa Juan 10,30, itutukdô Niya: “Ako asín an Amâ sarô.”

An pagtukdô kaiba sa Saiyang misyon bilang Mesías.

Si Sto. Tomas de Aquino nagsurat: “Natà ta kaipuhan kan Diós Akì na magsakit para sato? Kaipuhan na gayo na gibohon Niya iní, na maipapaliwanag sa duwáng paagi: enot, sa pagbulóng nin kasâlan; ikaduwá, sa pagtukdô sato kun pàno mámoót.”

An pinakahalangkáw na gawè nin pagtukdô dapít sa pagkámoót ginibo ni Jesús sa cruz. Sabi Niya sa Juan 15,13: “Oróg kainíng pagkámoót mayò an siísay man na idusay an saiyang buhay para sa Saiyang mga katood”. Siísay iníng mga katood na nakamatè kan pagkámoót asín pagkaherak ni Cristo? An mga dukhâ, parakasalà, may helang, asín mga sinikwal nin sociedad.

Kun si Jesús an pinakadakulang Paratukdô, anó an maninigong simbag ta Saiya? Sabi kan Psalmo 95,7: “Kun ngonian madangog nindo an Sakong tingog, haré pagpatagasá an saindong pusò”. Magdangog kita Saiya – sa pagpamibi asin pag-adal kan Biblía. Magtubód kita Saiya: Siya an satong Kagurangnan asín Paraligtas. Magsunód kita sa Saiyang kabôtan nin huli ta Siya saná an dalan pasiring sa Kahadean kan Diós Amâ.

GIYA SA PAGHIRÁS SA SADÍT NA KOMUNIDAD O PAMILYA | Arín sa mga katukdoán ni Jesu Cristo – tataramon man o gibo – an oróg na nakatabang saimo o ginigibo mong giya kan saimong buhay?

PASUNOD-SUNOD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song


22 January 2024

An Satong Devocion ki Santo Niño

 


Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 21-27, 2024. Basahon an Evangelio gikan sa Mateo 18,1-5.10 (Fiesta kan Santo Niño).

Sa Evangelio, pinapahilíng kun gurâno karaní an pusò ni Jesús sa mga akì. Si Jesús mismo, na totoong Diós asín totoong tawo, nag-agi man sa pagkaakì asín sinecelebrár ta iní sa devoción ki Santo Niño.

Nagpoón ining devoción sa Pilipinas kan taón 1521 kan nagregalo si Fernando Magallanes ki Hara Amihan nin saróng imahen ni Santo Niño, kan siya asín an saiyang agóm na hadè kan Cebu na si Rajah Homabon, patín kadaklan sa saindang mga nasasakopan, nagpabonyag bilang mga Cristiano. Kan magbalík giraray an mga Kastilà sa pamámayó na ni Miguel Lopez de Legazpi kan taón 1565, nákuá ninda an imahen sa saróng kubo na nasusulô. Kan magpoón na an Evangelización sa Pilipinas, nakalakóp man an devoción ki Santo Niño.

An devoción ki Santo Niño pangapodan sa danay na pagsarig sa Diós.

An titulong Santo Niño halè sa sinabi ni angel Gabriel ki María sa Lucas 1,35: “an mamumundag aapodón na banál, Akì kan Diós”, o sa Español “Asi que al santo niño que va a nacer lo llamarán Hijo de Diós.” An kaligtasan duminatóng sa kinâban nin huli sa dakulang pagsarig ni María sa mahal na Diós.

Sa Mateo 18,3, sinabi ni Jesús: “Kun daí kamo magbirik asín magin siring sa mga sadít na akì, daí kamo makakalaóg sa Kahadean kan langit.” Anó an yaon sa mga akì na dapat tang arogon? Iyán an saindang maigot na pagsarig sa saindang mga magurang. An satong pagsarig sa Diós bakô saná an pagtubód na itátaó Niya an satong mga pangangaipo, kundî an pagsunód sa Saiyang kabôtan, maski dificil o inconveniente iní.

An devoción ki Santo Niño pangapodan sa pagtalubò sa pagtubód.

Sarô pang mahihiling sa mga akì iyó na sinda minatalubò. Sa Lucas 2,52 sinabi na “si Jesús nagtatalubò sa kadonongan, edad, asín gracia sa atubang nin Diós asín mga tawo.” An niño Jesús nagtalubò asín pag-abót kan panahón nagin Mesías na paraligtás kan kinâban. Siring man an pagtubód na nákuá ta sa satong pagkaakì, kaipuhan na patalubóon tanganing magbunga kan panugáng kaligtasan asín kapanoan nin buhay.

Kadakul pa an dapat niatong ikatalubò sa pagtubód. Kadakul na mga Catolico an hanggang sa ngaran saná; daí nang pakaisi sa pagtubód pakatapos bonyagán. Yaon an pagsalák nin mga pamahiin asín sa-tawong tradisyón na nakakauláng sa tunay na pagtubód. Yaon an pagpaoróg nin mga personal na hilig, o ideología, o paboritong pulitiko, kisa sa Evangelio. Yaon an pagkakaigwa nin “split-level Christianity” o pagtubód na daí nahíhilíng sa gibo o daí naisasabuhay.

An devoción ki Santo Niño pangapodan sa misyon.

May sarô pang istorya dapít sa mga akì na yaon sa mga Evangelio: na minsan sinagwê ni Jesús an Saiyang mga disipulos na daí pag-ulangón an mga akì na magraní Saiya. Siring man an lambang devoto kan Santo Niño inaapodán na darhon an kapwa pasiring ki Cristo asín daí magin uláng para rumayô an mga tawo sa Diós.

An mga magurang na Cristiano lalò na, may misyon na ipamidbid an Diós sa saindang mga akì sa paagi nin pagtukdô sainda kan mga pamìbì asín mga doctrina kan satong pagtubód; pagpasa kan mga banál na tradisyon kan satong Simbahan; pag-adal nin Biblía; asín pagpatoód sainda sa Banál na Misa asín pagdará sainda sa mga sacramento. Kun daí iní naitutukdò sa mga akì, daí ninda mamimidbidan an Diós, daí ninda maaaraman an pagigin marhay na Cristiano. 

Pabungahon lugód ni Señor Santo Niño an satong pagmisyon.

GIYA SA PAGHIRAS SA SADÍT NA KOMUNIDAD O PAMILYA • Maghirás kun anó an mga gawè nin devoción sa Santo Niño sa saimong pamilya, o kun anó man para saimo an kahulugán kan devoción ki Santo Niño.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 


06 January 2024

An Kaligtasan para sa Gabós

































Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 7-13, 2024. Basahon an Evangelio gikan sa Mateo 2,1-12 (Solemnidad kan Epifanía kan Kagurangnan - B).

Sa Evangelio, nagbisita an mga mago sa omboy na si Jesús gamit an saróng maliwanag na bitoon bilang giya.  Susog sa tradisyon, ináapód man sindang tolóng hadè na may ngaran na Melchor, Gazpar, asín Baltazár. Alagad bakô sinda mga hadè kundî mga mago, mga madunong asín may inadalan na tawo. Daí man sa Biblía nabanggit an mga pangaran ninda, asín dai man sinabi na toló saná sinda, kundî na dará ninda tolóng klaseng regalo. Anó an kahulugán kan istoryang iní?

An kaligtasan para sa gabós na tawo. An pagbisita kan mga mago sinecelebrár bilang fiesta kan Epifanía, boót sabihon an pagpahilíng kan satong Kagurangnan sa katawohan. An mga magong iní halè sa harayóng lugár sa sirangan. Bakô sinda kabilang sa Piniling Banwaan alagad sa saindang sadiring pag-aadal ipinasabóng man sainda kan Espiritu an katotoohan kan pagkamundag kan hadè na maligtas sa kinâban. Sabi sa profesía sa Isaias 60,3-4: “Malakaw an mga nación sa Saimong liwanag, asín an mga hadè sa bangraw kan Saimong pagsirang. Sinda gabós nagkatiripon, madyan na Saimo.”

Iní nin huli ta an kaligtasan para sa gabós na tawo. Sabi ni San Pablo sa Efeso 3,6: “an mga gentil kapwa paramana, kapwa hawak, kahirás sa panugâ ki Cristo Jesús huli kan Evangelio.” An mga gentil iyo an gabós na bakô Judío – boót sabihon kaiba kita. An pagbisita asín pagsamba kan mga gentil na mago sa omboy na si Jesús, tandâ na Siya namundag bakô saná para sa mga Judío kundî para man sa mga gentil, para sa sato gabós.

Si Jesu Cristo an pinakaregalo sa Pasko. May daráng regalo an mga mago, asín sinasabi na digdi halè an tradisyon nin pagregalo sa panahón kan Pasko. Alagad an pinakaregalo iyó si Jesu Cristo na tinaó kan Diós Amâ sa gabós na tawo. Siya an nagpaogmáng gayo sa mga mago, an katuyuhan kan saindang halawig na paglakbay.

Alagad bilang regalo, pwede man Siyang daí akoon, isikwál, asín kaongisán pa nganì. Sabi sa Mateo 2,3: “Pakadangog kan baretà kan mga mago, napurisaw si Hadeng Herodes, asín man an bilog na Jerusalem kaiba niya.” Hilngá ta bakô saná si Herodes – na an paghilíng ki Jesús karibál sa trono – an napurisaw kundî patí na an saiyang mga kampón. Sabi sa Santiago 3,16: “Kun saén may pagkaurí saká ambisyón, yaon man an karibokan asín an gabós na kadaíng-datahan.” Siring ki Herodes asín saiyang mga kampón, kun kita makasadiri asín maurí, maski magcelebrár kita kan mga tradisyon sa Pasko, sinisikwal ta man giraray si Cristo.

Tinaó sato ni Cristo an regalo nin misyon.  Tolóng regalo an dará kan mga mago, na simbolo kan Saiyang misyon: bulawan nin huli ta Siya hadè, incenso nin huli ta Siya padì, asín mira nin huli ta Siya profeta. Kan kita binonyagán hinirás sato ni Cristo an Saiyang Espiritu asín iníng tolóng misyon.

An pagmisyon iyó an tandâ na satong sinasabuhay an pagigin Cristiano. Ngonian na Taón nin Partisipasyón sa satong diocesís, ináapodán an lambang sarô – laiko asín clero – na mas maigot tang isabuhay iníng tolóng misyon kaiba an satong parokya, oróg na sa mga Saradít na Komunidad nin Pagtubód (SAKOP). Bilang padì, magín maimbód sa pamìbì asín pagsimba, asín tabangan an kapwa na makaraní sa Diós. Bilang profeta, maghingowa na mag-adal kan Tataramon nin Diós asín magsaksi sa kapwa kan Evangelio sa satong tataramon asín gibo. Bilang hadè, maglingkod sa Simbahan asín komunidad, asín magtabang lalò na sa kapwang nangangaipo.

GIYA SA PAGHIRÁS SA SADÍT NA KOMUNIDAD O PAMILYA • Maggibo nin New Year’s Resolution asín maghirás kun pàno gigibohon an tolóng Cristianong misyon sa pagkapadì, pagkaprofeta, asín pagkahadè.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the Faithful • Closing Prayer (Spontaneous and Our Father) • Closing Song

 


30 December 2023

An Pasko para sa Pamilya

 


Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 31, 2023 – Enero 6, 2024. Basahon an Evangelio gikan sa Lucas 2,22-40 (Fiesta kan Sagrada Familia - B).

                                                                                                                                   

Sa Evangelio, an Sagrada Familia ni Jesús, María asín José nagpasiring sa Jerusalem para sa presentación kan aking si Jesús sa Templo. An enot na Domingo sa Pasko celebración kan Fiesta kan Sagrada Familia, na iyó an ladawan nin lambang Cristianong pamilya kan pangapodan nin Diós na magin Simbahan sa haróng, eskwelahan nin pagkamoot, asín tandâ nin paglaom.

Simbahan sa Haróng

An pinakasadít na unit nin Banwaan nin Diós iyó an pamilya, kayâ iní inaapód man na Ecclesia domestica o Simbahan sa haróng. Iní naipapahilíng sa pagpamìbì asín mga gawè nin pagtubód sa Diós nin mga miembros nin pamilya.

Siring ki San José asín Santa María, na dinara si Jesús sa Templo sa Jerusalem asín tinukdoán nin mga tradisyón kan saindang pagtubód, an misyon nin mga magurang na Cristiano iyó na ipamidbid sa saindang mga akì an mahál na Diós – sa pagtukdô sainda sa mga pamìbì asín doctrina kan Simbahan, sa pagpatoód sainda sa satong mga banál na tradisyon, sa pagdará sainda sa mga sacramento, lalò na sa pagsimba cada Domingo asín mga aldaw nin obligación.

Eskwelahan nin Pagkámoót

Daí pa nahalóy nag-agi kita sa panahón nin eleksyon sa barangay. Base sa mga gawè asín gibo niatong mga botante, sa hilíng nindo natâwan ta daw nin marhay na edukasyon an satong mga kaakian dapit sa pagigin marhay na ciudadano? An pamilya eskwelahan nin pagkámoót sa Dios asin kapwa, patin na sa kapalibotan asin sa banwaan.

Kayâ kun may daí pagkasinabotan o iwal sa laóg nin pamilya, pâno nindo iní hinuhusay? Sabi ni San Pablo sa Colosas 3,13-14: “Magpatiníos-tiosan asín magpatinawád-tawadan, kun an sarô may hinanakít sa sarô man; kun pâno an Kagurangnan nagpatawad saindo, siring man kamo. Sa ibabaw kainí gabós, an pagkámoót na iyó an bugkos kan kalubosan.”

Iní an pangapodan sa lambang pamilya lalò na sa mga nakakaguráng na mga miembros kainí, nin huli ta may mga akì na nakakatangad sainda. Kun marhay an padara nin mga nakakaguráng, marhay man an magigin ugali nin mga akì. Kun natatangadan an salâ, tibaad honaon na an salâ tamà, asín an tamà salâ. 

Tandâ nin Paglaom

Sa Sirach 3,3-4 nasusurat: “An naggagalang sa amâ naghihipnò sa kasâlan, asín an nagpapamuraway sa inâ siring sa nagtitipon nin kayamanan.” Iní an mas hararom na kahulugán kan paggalang niato sa satong mga magurang: sinda an tandâ kan presencia kan Diós Amâ sa satong buhay digdi sa dagâ, asín an pagkamoot ta sainda nakatakód sa satong paglaom sa maabot na kamurawayan kan buhay na daing kasagkoran.

An lambang pamilya kaiba sa dakulang pamilya kan Kahadean nin Diós. Kayâ mantang nabubuhay digdi sa dagâ asín nasisibot sa mga pangangaipo sa aroaldaw, an pamilya nagtúturô man sa realidad kan maabot na buhay na daing kasagkoran. Naipapahilíng iní sa pag-andam sa mga akì bakô saná sa saindang pagmuknâ man nin sadiring pamilya kundî sa pag-andam nin lambang miembro sa buhay na daing kasagkoran; siring man sa pagrumdom asín pagpamìbì sa mga miembros  kan pamilya na naenot na sa ikaduwáng buhay. An devocion sa mga santos nagtutukdò man sa langitnon na padumanan kan lambang miembro kainí.

GIYA SA PAGHIRÁS SA SADÍT NA KOMUNIDAD O PAMILYA • Maghiràs nin experiencia kun pâno sinasabuhay kan saimong pamilya an pagigin Simbahan sa haróng, o eskwelahan nin pagkámoót, o tandâ nin paglaom.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 


23 December 2023

Mangyari Sako susog sa Saimong Itinarám

 


Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 17-23, 2023. Basahon an Evangelio gikan sa Lucas 1,26-38 (Ikaapát na Domingo kan Adviento - B).

An istorya kan Anunciación nakatakód sa istorya kan paglaláng kan kinâban. Susog sa Genesis, sa kapinônan, an kinâban nasa kadiklomán, nalalantupan nin tubig bahâ, asín daíng nabubuhay. Sa paglaláng, an Diós nagtaó nin ordén sa karaotan, liwanag sa kadiklomán, asín buhay sa lugár na daíng buhay. Sa lambang aldaw nin paglaláng, nahiling nin Diós na marhay an Saiyang mga gibo. Alagad nag-abót an kasâlan, asín rinaót an bilog na linaláng. Iní sinisimboló kan pagsuway sa Diós kan enot na mga tawo, si Eva asín Adán.

Sa Anunciación, kan binaretà ni Angel Gabriel ki Virgen María na siya an napilì nin Diós na magin inâ kan Akì kan Oróg Kahalangkáw, nagsimbag siya sa Lucas 1,38: “Mangyari sako susog sa saimong itinarám”. Sa pagsunód ni María sa kabôtan kan Amâ, na kabaliktaran kan pagsuway ni Eva, an Diós nanitawo asín nagpoón an proceso kan bâgong paglaláng asín pagtubós sa mga inoripon nin kasâlan.

Anó pa an kahulugán kan pag-iyó ni María sa Diós na maninigò asín dapat na pangarogan niato sa maimbod na pagtubód sa Saiyang kabôtan asín pag-andám sa pagdatóng kan saiyang Akì?

Pagtugot na bâgohon kita nin Diós. Kan nag-iyó si María binâgo nin Diós an saiyang buhay, ginibo siyang parte sa oróg kadakulang plano nin pagligtas sa bilog na kinâban halè sa kaoripnan nin kasâlan asín kagadanan pasiring sa kapanoan nin buhay sa Saiyang Kahadean. Siring man, sa pagsunód ta sa Saiyang kabôtan, babàgohón Niya man an satong buhay.

Sabi ni San Pablo sa Filipos 1,6: “Tiwalà ako na an nagpoón saindo kan marhay na gibo, mapadagos kaiyan sagkod na matapos, sa aldaw ni Cristo Jesús.” Kayâ kun sa puntong iní kan satong buhay, naghahanap kita nin direksyon, pônan ta sa pag-iyó sa kabôtan nin Diós. O kun nawawarâ man kita sa dalan, balikán ta an mga naenot niatong pag-agi sa dalan nin Kagurangnan.

Pagsayuma sa anoman na kontra sa kabôtan nin Diós. An pag-iyó ni María nangangahulugán man kan saiyang pagtalikód sa ibáng mga plano ninda ni San José sa buhay, nin huli sa mas halangkaw na pangapodan nin Diós. An satong pagsunód sa Diós nangangaipo bakô saná kan paggibo nin karahayan kundî kan satong pagtalikód sa kasâlan.

Iní an pangapodan ni Juan Bautista, asín ni Jesu Cristo kan Siya duminatong na. Kaya kun inakò ta na si Cristo, sabi ni San Pablo sa Efeso 4,22-24: “iapón na an lumang pagkatawo kan enot nindong pagkabuhay, na nalálapâ sa madayang kamâwotan; magpakabâgo sa Espiritu kan saindong isip, asín isûlot an bâgong pagkatawo na linaláng susog sa Diós.”

Panugâ nin pagdusay sa bilog niatong buhay. Kan si María nag-iyó sa sinabi ni angel Gabriel, bako iní sarong vez saná kundî saiya nang ginigibo dati pa bilang maimbod na akì kan Amâ asín kan pag-abót ni Jesús, bilang mamomôton Niyang inâ.

Sabi ni Cristo sa Lucas 9,23: An boót na magín disipulos Ko, “maglingáw sa sadiri, magpâsan kan saiyang cruz aroaldaw, asín magsunód Sako”. Aroaldaw. Nin huli ta an katuyuhán kan satong pagbabâgo iyó na kita magin kabaing ni Cristo, asín iní daí mangyayari nin sararoan, o sa madalíng panahón saná, kundî sa aroaldaw tang pagpilì kan Saiyang kabôtan sa bilog niatong buhay.

GIYA SA PAGHIRÁS SA SADÍT NA KOMUNIDAD O PAMILYA • Maghirás kun pàno binâgo o padagos pang binabâgo nin Diós an satong buhay kan pinilì tang magbalík sa paglakáw sa Saiyang dalan.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

16 December 2023

Nagháhalát kan Maogmang Paglaom


 


Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 17-23, 2023. Basahon an Evangelio gikan sa Juan 1,6-8,19-28 (Ikatolóng Domingo kan Adviento - B).

Sa Evangelio pig-istorya an pagdatóng kan mga sugò na mga padì asín mga Levita halè sa Jerusalem, asín sa paghapót ninda ki Juán Bautista kun siisay siya, mas nálinaw pa sa gabós an saiyang misyon asín mensahe. Siya an tingog sa kalantadán na nagkukurahaw na tanoson an dalan para sa Kagurangnan, susog sa profesía sa Isaias 40,3. Inaandam ni Juán Bautista an mga tawo kaidto sa enot na pagdatóng ni Jesús, asín ngonian sa ikaduwá Niyang pagdatóng sa kamurawayan. Inaandam niya man kita sa pag-akò kan kaogmahan kan Pasko.

Dakúl an mga nakatakód na kaogmahan sa Pasko: an mga pailaw asín dekorasyón, an mga tiripon asín karaonán, an mga regalo para sa mga akì, an caroling na nakabalík na giraray pakatapos kan pandemia, an bonus asín 13th month pay kan mga empleyado, an dakulang ganancia kan mga nagnenegosyo, asín iba pa. Alagad bakô an mga iní an tunay na kaogmahan kan Pasko. Pâno kun máwarâ an mga iní sa panahón kan Pasko, may kaogmahan pa daw kita?

Kayâ minabalík kita ki Juán Bautisa bilang tandâ nin kaogmahan – maski garó daí honaon. Nin huli ta bakô siya mahilig sa mga handaan, kundî pirming nag-aayuno asín daí nag-iinóm nin alak; bakô siya mahilig sa mga kinâbanon na bagay, kundî bolanos sa saiyang misyon. Alagad daí manenegarán na yaon saiya an kaogmahan nin Kagurangnan. Sabi sa Filipos 4,4-5 (na iyó an pighalean kan tataramon na “Gaudete”, na apód sa Ikatolóng Domingo kan Adviento): “Danay kamong mag-ogmá sa Kagurangnan: giraray sinasabi ko, mag-ogmá kamo. Ta an Kagurangnan haraní na.” An kaogmahan kan Pasko nasa Kagurangnan.

Sa Pagpatawad nin Diós. Makusóg an boót ni Juán Bautista na mangapodan sa mga tawo na magbaklî sa saindang kasâlan nin huli ta aram niya na an Diós pirming nagpapatawad sa siisay man na maghagad nin kapatawadán asín boót magbâgo. Sabi pa sa Isaías 55,7: “Bayaan kan tampalasan an saiyang dalan, asín kan tawong daíng data an saiyang honà-honà; balikán an Kagurangnan na maheherak Saiya, an satong Diós, ta mayaman sa pagpatawad.”

Sa Presencia nin Diós. An pagsolsol asín pagpatawad mga pag-andám sa pag-akò kan kaogmahan kan pagdatóng kan Kagurangnan, an Saiyang presencia iyó mismo an gracia nin Diós. Kayâ an presencia kan Diós na nanitawo iyó an pinakadakulang kaogmahan kan Pasko. An Saiyang presencia namamatean nin mga tawong may pagkámoót sa pusò. Nin huli ta kun an pusò panô nin pagkamakasadiri, pagkaurí, asín pagkaongís sa kapwa, daíng lugár para sa presencia nin Diós. Sabi sa 1 Juán 4,16: “An Diós pagkámoót, an nagdadanay sa pagkámoót nagdadanay sa Diós, asín an Diós nagdadanay saiya.”

Sa Paglaom sa Diós. An gabós na kaogmahan sa dagâ, kaiba na an mga banál na celebración kan Pasko asín Eucaristía, mga patanâ kan dakulang kaogmahan sa pagdatóng kan kapanoan kan Kahadean. Siring man sa mga nag-aagi nin kadikloman asin kadipisilan sa buhay, an Diós nagtataóng paglaom na an diklom matatapos sa pagdatóng kan aldaw. Kayâ si San Pablo nagtukdô sa Roma 12,12: “Mag-ogmá kamo sa paglaom, magmatinios sa kasakitan, magmaimbód sa pamibi.”

Pagpatawad, presencia, asín paglaom: an mga iní an kaogmahan sa Kagurangnan, mantang kita “nagháhalát kan maogmang paglaom asín pagdatóng kan satong Kagurangnan na si Jesu Cristo”.

GIYA SA PAGHIRÁS SA SADÍT NA KOMUNIDAD O PAMILYA • Maghirás kan saimong mga kaogmahan na namatean na o hinahalat pa ngonian na Adviento asín sa Pasko.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song