Pano Magin Tunay na Mayaman?

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Agosto 3-9, 2025. Basahon an Evangelio gikan sa Lucas 12,13-21 (Ika-18 Domingo sa Ordinariong Panahón - C)

…

Sa Evangelio may nagraní sa satóng Kagurangnan Jesu Cristo, nagpapatabang tanganing mákua niyá sa saiyang tugang an saiyang kahirasan sa pamana. Kaidtong panahón, an mga rabbí o maestro rináranihan para magpatabang dapít sa mga arog kainíng kaso. Ginibo ni Jesús iníng patugmadan tanganing magtukdò dapít sa tunay na kayamanan sa paagi kan parabola kan lolóng na mayaman. Pâno nanggad magin tunay na mayaman?

Enot, daí paglingkodán an kayamanan.

Sabi ni Jesús sa Mateo 6,24: “Mayò nin makakapaglingkod sa duwáng kagurangnan.” Kayâ tinukdò Niyá sa Mateo 12,15: “Magmaan kamó, maglikáy kamó sa gabós na kapasloán, huli ta, sa tahaw kan kasaganahan, an buhay nin saróng tawo daí nagdedepende sa karogaringan.”

Iní man an sinabi ni Qohelet sa Eclesiastico 1,2, na “hangáw kan mga hangáw” (vanity of vanities). Daíng saysay an buhay kun an gibo saná puro pagpayaman o paggasto nin yaman. Asín an mensaheng iní bakô saná para sa mga mayaman, ta maski nasa anoman na estado nin buhay pwedeng magin makikwarta, o lolóng sa kinâbanon na kayamanan.  

Ikaduwá, daí man paghonaon na maraot an kayamanan.

Linawon ta na daí sinabi ni Jesús na salâ an mangarap na mag-uswag an buhay o kasâlan an magin mayaman. Bakô kwarta an gikanan nin gabós na karâtan, kundî an sabi ni San Pablo sa 1 Timoteo 6,10: “An pagkamoot sa kwarta an gamót kan gabós na karâtan. Sa pagkamit kaiyán, igwa nin mga nalagalag suwáy sa pagtubód asín nagtusok sa sadiri nin dakúl na kulóg.”

Pag ginagamit sa tamà asín marhay an yaman, talì, asín kapangyarihan: napapakarhay an buhay nin pamilya, natatabangan an nangangaipo, napapauswag an sociedad, asín naaataman an kapalibotan.

Ikatoló, magtipon nin kayamanan na langitnon.

An satóng Kagurangnan nagtukdò sa Mateo 6,19-20: “Daí kamó magrimpos nin mga kayamanan sa dagâ, saén an bukbok asín taklâ nangraraót asín an mga parahâbon nálaóg saká nanghahàbon. Magrimpos kamó nin kayamanan sa langit: saén mayong bukbok, ni taklâ, asín mayong parahâbon na makutkot saká mahàbon.”

An suanoy na mga Amâ kan Simbahan nagtukdò na an parabola kan lolóng na mayaman dapít sa obligasyon na daí pabayaan an mga dukhâ asín nangangaipo. Halimbawà, sabi ni San Beda: “An rasón kun natà tinuyaw kan Kagurangnan an lalaking nagpagabâ kan saiyang mga kamalig tanganing magpatindog nin mas darakulà, bakô na nagtrabaho siyá sa omá asín nagtipon kan mga ani kainí, kundî na daí siyá naghirás sa mga dukhâ kan sobra sa saiyang pangangaipo, kundî nagpatindog nin darakulang kamalig para magsaray nin mga ani para sa sadiri lamang.”

Sabi ni San Pablo sa Roma 14,7-8: “Daíng siísay man na nabubuhay para sa sadiri lamang, daíng siísay man na nagagadan para sa sadiri lamang. Kun kitá nabubuhay, nabubuhay kitá para sa Kagurangnan; asín kun kitá nagagadan, nagagadan kitá para sa Kagurangnan; kayâ, mabuhay o magadán, sa Kagurangnan kitá.”  Huli ta an kapanoan nin buhay asín tunay na katalingkasan makúkuá saná sa Kagurangnan.

…

GIYA SA PAGHIRÁS | Maghirás nin experiencia dapít sa paggamit nin kinâbanon na kayamanan – kun iní nakaparaní o nakaparayô saimo sa Kagurangnan. | GIYA SA PAGHIRÔ | Susog sa paghirás kan satóng mga pag-iriba sa komunidad/pamilya, anó an pwede tang pagtarabangan para sa satóng mga pag-iribang nangangaipo?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

Nangangahas Kitang Magsabi

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Julio 27-Agosto 2, 2025. Basahon an Evangelio gikan sa Lucas 11,1-13 (Ika-17 Domingo sa Ordinariong Panahón - C).

…

“Kagurangnan, tukdoé kamí magpamîbî,” iní an hagad kan sarô sa mga disipulos ni Jesu Cristo. Kaugalián kaidtong panahón sa mga rabbí o maestro na tukdoán an saindang mga disipulos nin pamîbî na magigin parte na kan pagkamidbid sa saindang grupo. An tinukdô ni Jesús iyó kun pâno mamîbî asín kun natà kitá namimîbî.

1. Nangángahás kitáng magsabi.

Pâno kitá dapat na mamîbî? An paagi nin pamîbî na tinukdô ni Jesús iyó an pamîbî na nagkukusóg-boót na magdolok sa Diós. Bâgo an Amâ Niamò sa Banál na Misa, an padì minapatara-tará: “nangángahás kitáng magsabi.”

Kayâ kan tinukdoán Niyá sinda kun anó an sasabihon sa pamîbî, sinundan Niyá iní kan parabola kan makulít na parabakal, asín iníng panugâ sa Lucas 11,9: “Maghagad kamó asín kamó tatàwan, maghanap asín makakákuá, magtoktok asín bubuksan.”

Nagtugon si San Pablo sa 1 Tesalonica 5,17: “Mayong patód na magpamîbî.” Iní an hinahagad satô ni Jesús na gawè nin pagpamîbî nin huli sa masunod na punto.

2. Mangyari an boót Mo sa dagâ nin siring sa langit.

Sinasabi ta iní sa pamîbing Amâ Niamò, alagad sa versión ni San Lucas daí iní kaiba. Minsan siring pinapahayag kan linyang iní kun anó an pagpamîbî: an danay na paghagad kan gracia asín kabôtan nin Diós.

Sa Genesis 18,20-32, may istorya na kan maaraman ni Abrahám an plano nin Diós na tunawon an mga ciudád kan Sodom asín Gomorrah nin huli sa makuring karâtan asín kasâlan kan mga tawo digdi, nakipagtawadán siyá sa Diós na kun igwa nin 50 banál na tawo digdi daí Niyá tutunawon an mga iní, asín nanugâ an Diós na daí Niyá tutunawon kun siring. Naghirit pa si Abraham na pâno kun 45, o 40, o 30, o 20, o sampulong tawong banál saná an yaon sa mga ciudád na idto? Giraray nanugâ an Diós na daí Niyá tutunawon kun siring.

Boót sabihon napabâgo ni Abrahám an isip nin Diós? Daí, nin huli ta an Diós perpekto, daí nang babâgohon pa sa Saiya. Kundî namidbid ni Abrahám luway-luway an kadakulaan kan pagkaherak nin Diós. Daí kitá nangangadyè tanganing bâgohon an isip nin Diós dapít satô, kundî na bâgohon an isip niatò dapít sa Diós.

An danay na pagpamîbî na nagin parte na nin buhay (prayer life), minábukás satô sa gracia nin Diós, asín tinutukdoán an satóng pusò, linilinigan an satóng mga intensyon, pinaparà an mga saláng paghonà asín mga makasadiring kamâwotan, asín tinatàwan nin linaw an satóng mga plano. Sa madalíng sabi, an danay na pagpamîbî nagdádará satô pasiring sa búhay nin Diós

3. Sabihon nindo: Amâ Niamò.

An pag-ayon kan satóng isip asín pusò sa isip asín pusò nin Diós, iyó an katuyohán kan gabós na pagpamîbî – tanganing makalaóg kitá sa búhay Niyá asín magtalubò sa kaibanan Niyá. Kayâ nganì sa poón pa saná, tinukdoán na kitá ni Jesús na apodón an Diós bilang satóng Amâ.

Boót nin Diós nin personal na relasyon sa lambang sarô satuyà. Sa pamîbî nangyayari an mamomôton na komunikasyon na kaipohan para magtalubò an anoman na relasyon. Sa gabós na naghahanap nin siring na búhay asín pag-iribanan, nanugâ si Jesús sa Lucas 11,13, na an Diós Amâ siguradong itátaó an Saiyang Espiritu mismo sa mga naghahagad Saiya.

…

GIYA SA PAGHIRÁS | Maghirás kun anó an saimong mga pinapangadyê sa ngonian. | GIYA SA PAGHIRÔ | Bilang komunidad/pamilya, magkasundò kitá nin schedule nin regulár na pagtiripon sa pagpamîbî.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

An Saro Sanang Bagay na Kaipohan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Julio 20-26, 2025. Basahon an Evangelio gikan sa Lucas 10,38-42 (Ika-16 na Domingo sa Ordinariong Panahón - C).

…

An Evangelio iyó an pagbisita kan satóng Kagurangnan Jesu Cristo sa haróng ni Marta asín María. Sa Juán 11, nasambit na Betania an saindang barrio, asín igwa sindang sarô pang lalaking tugang, si Lazaro, na nagadán asín binuhay ni Jesús matapos an apát na aldaw sa lulobngán. Kan taón 2021, pinagsarô ni Papa Francisco an fiesta kainíng tolóng magturugang sa Julio 29.

1. Nasísibót ka sa kadakul na bagay.

Saróng natòdan na interpretasyon kainíng istorya iyó na iní saróng alegoría. Si María nagrerepresentar kan búhay na contemplativo, siring bagá kan mga nasa monasterio; asín si Marta nagrerepresentar kan búhay na activo, siring sa kadaklan satô. Asín an conclusión: mas naooyonan nin Kagurangnan an búhay na contemplativo. Alagad bakô iní an mensahe kan Evangelio, kundî: kun nasísibót daw kitá sa tamang bagay.

Kadakul saná kan satóng mga kasiribotan. Halimbawà, an personál tang mga pig-aagihan, an mga pangangaipo nin pamilya sa hampang kan naglalangkaw na presyo nin mga barakalon, patin na an mga sitwasyon sa satóng komunidad, nacion, asín kapalibotan. Namamatean ta an kasibotan asín kapurisawan ni Marta.

2. Magtrabaho para sa Diós o Maggibo kan kabôtan nin Diós?

Si Fr. Thomas Green, SJ, sa paghorop-horop niyá sa istorya ni Marta asín María sa saiyang librong Darkness in the Marketplace, nagpaliwanag na ibá an “working for God” (magtrabaho para sa Diós) sa “doing God’s work (maggibo kan kabôtan nin Diós).

An “magtrabaho para sa Diós” iyó an pagpilì kun anó an boót niatong iatang sa Diós, kun anó an boót niatong magustuhan Niyá. An “maggibo kan kabôtan nin Diós” iyó an paghagad ngôna na maaraman kun anó an Saiyang kabôtan para satô asín pagsunód kainí. An gibo ni Marta iyó an magtrabaho para sa Diós, mantang si María naggibo kan kabôtan nin Diós.

3. An sarô sanáng bagay na kaipohan.

Sa hurí, an pinakamensahe kainíng Evangelio iyó an pangapodan na magpangadyê asín maghorop-horop tanganing madiskubre, sa pasabóng kan Espiritu, idtong pig-áapód na unum necessarium – an sarô sanáng bagay na kaipohan ta: daíng ibá kundî si Cristo Jesús.

Sabi ni San Pablo sa 1 Corinto 1, 22-24: “Ta mantang an mga Judío mga tandâ an hinahagad, asín an mga Griego kadonongan an hinahanap: kamí, ihinaharubay mi si Cristo na ipinakò sa cruz: sa mga Judío padungkalan, sa mga Gentil kalulongán, alagad sa mga inapód – Judío o Griego – si Cristo, kapangyarihan nin Diós asín kadonongan nin Diós.”

Kun masarig kitá sa sadiri ta sanáng kakayahán, mahíhilíng ta na mas darakulà asín makukusog an mga kapurisawan sa búhay. Alagad ki Cristo igwa kitá nin graciang masasarigan asín liwanag na magiya sa dalan.

Natà ta “mas oróg karaháy” an pinilì ni María kisa ki Marta? Nin huli ta pinilì ni María kun anó an kabôtan ni Jesús. Daí man pigpugolan si Marta na mag-asikaso kan pagkaon kan mga bisita, alagad pinagiromdom siyá – asín kitá man – kun anó an pinakamahalagá: si Cristo mismo asín an Saiyang kabôtan para satô.

Bâgo kitá mapanô nin manlaen-laen na kasibotan, enoton ta ngôna, oróg sa gabós, na midbidón si Jesús asín sunodón an Saiyang kabôtan. Dangan nanugâ Siyá sa Mateo 6,33: “An Kahadean nin Diós enoton ta, siring man an katanosan, asín an gabos idudugang na saná.”

…

GIYA SA PAGHIRÁS | Maghirás nin saróng importanteng kasibotan mo sa ngonian. Para saén o kiísay iní? Anó iní, pagtrabaho para sa Diós o paggibo kan Saiyang kabôtan? | GIYA SA PAGHIRÔ | Halè sa satóng pangadyê, bilang komunidad/pamilya, anóng bagay an boót ipagibo satô nin Diós ngonian o na daí ta dapat pabayaan?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

An Marhay na Samaritano

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Julio 13-19, 2025. Basahon an Evangelio gikan sa Lucas 9,25-37 (Ika-15 Domingo sa Ordinariong Panahón - C).

…

Ngonian na panahón pamilyar na gayo satô an imahe kan marhay na Samaritano. An tawong nagtatabang sa nangangaipo ináapód tang “good Samaritan.” Alagad kaidtong enot na pig-istorya kan satóng Kagurangnan Jesu Cristo iníng parabola sa mga Judío, kontrobersyal iní – nin huli ta an mga Samaritano kaiwal kan mga Judío. Hilnga kun may pagkaomagíd iní ngonian na panahón sa pag-iwal asín pang-aapí kan mga Judío sa mga Palestino.

Halawig asín hararom an saindang iriwal. Nagpoón pa kaidtong pag-urulî kan mga bihag na Israelita makalihis an 70 taón na destierro (exile) sa Babilonia. Kan taón 539 BC buminagsak an Imperiong Babilonia sa kamót kan Imperiong Persia. Nagtugot an hadè kan Persia, si Cyrus the Great, na mag-urulî sa mga sadiring banwaan an mga bihag kabilang na an mga halè sa dating kahadean nin Judah (kayâ mga Judío an apód sainda). 

An mga natadà sa Israel (na Samaría an capitál na ciudad, kayâ mga Samaritano an apód sainda), kontra sa pagbalík kan mga Judío asín pagtogdas ninda kan bàgong Jerusalém. Pigmemenos man kan mga Judío an mga Samaritano nin huli ta bakô puro an saindang dugóng Israelita huli sa pakipag-agoman sa mga kataed na paganong naciones, pag-arog sa mga gawè kan mga iní, asín an ibá sainda nagsasamba pa nganì sa mga diós-diósan.

An parabolang iní dapít sa pagkaherak nin Diós. Kaidto pa man hanggang sa ngonian, an pagkaherak nin Diós minabanggà sa mga makasadiring kaisipan (mindset), kaugalian (value system), asín kultura (cultural norms).

An pagkaherak an pangenot na katongdan.

Tibaad may dahilán na válido para sa mga Judío kun natà an padì asín clero o Levita daí nagtabang sa biktima, siring bagá kan paglikáy na tibaad maatián (unclean), lalò na ta sinda naglilingkod sa Templo. Susog kayâ sa Numero 19,11-13, an makákapót nin gadán na tawo magigin maatî sa laóg nin pitóng aldaw asín kaipuhan magrayô ngôna sa banwaan asín sa Templo. Tibaad kayâ garó gadán na paghilingón idtong biktima. Alagad malinaw an mensahe ni Jesús: an pagkaherak an oróg sa gabós na obligasyon asín mas oyon sa matá nin Diós. Sabi Niyá sa Mateo 9,13: “pagkaherak an hinahanap Ko, bakô sacrificio”.

An pagkaherak nin Diós daíng pinipilì kun siísay.

Sa parabola, an kaiwal iyó an may pagkaherak sa biktima, an kontrabida iyó an bida. Iní an ladawan nin tunay na pagkaherak: bakô mahalaga an lahì, relihiyon, kinatawo (gender), pulitika, o anó pa man na kategorya, kundî an dignidad asín búhay nin tawo. Siísay an mga madalî para satô na tabangan? Siísay an dipisil? Midbidón ta pa an satóng sadiri asín akóon an satóng mga pinapaoróg asín panghuhusga ta may impluwensya iní sa pagpilì ta kun magin maheherakón o daí sa kapwang nangangaipo.

An pagkaherak nin Diós daíng sukol.

Kanigoan na gayo an gibong-herak kan Samaritano – nagraní sa biktima, binulóng iní, dinará sa ligtas na lugar, inataman, nagwalat pa nin kwarta sa dinagosan tanganing dagos iníng atamanon. Siring kainí an tunay na pagkaherak: daíng sukol, bakô su “pwede na” o pakitang-tawo saná.

Sa hurí, iní an simbag ni Jesús sa abogadong naghapót: “Kun siring, lakáw. Iyó man an gibohon mo.” Iyó man an boót Niyang ipasabot satô ngonian: na an búhay na daíng kasagkoran makakamtan kun kitá, susog sa sinabi Niyá sa Lucas 6,36, “magín maheherakón, siring na an saindong Amâ maheherakón.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kun pâno ka natabangan nin sarong marhay na Samaritano o ika man nagin marhay na Samaritano sa kapwa.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Closing Prayer (Spontaneous and Our Father) • Closing Song

Simbahan na Nagmimisyon

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Julio 6-12, 2025. Basahon an Evangelio gikan sa Lucas 10,1-12,17-20 (Ika-14 Domingo sa Ordinariong Panahon - C).

…

An istorya kan pagsugò kan satóng Kagurangnan Jesu Cristo sa 72 na disipulos na magmisyon makúkuá saná sa Evangelio ni San Lucas, asín nakaomagid sa istorya kan pagtugon nin Diós ki Moisés, sa Mga Bilang 11, na magpilì nin 70 pamayó na hihirasán kan saiyang misyon na darhon an banwaan Israel pasiring sa Dagáng Panugâ.

Sarô pang kahulugán kainí makúkuá sa paagi kan tradisyon nin mga Judío sa numerología o pagtaóng kahulugán sa mga numero. Halimbawà, an 7 banál na numero nin Kagurangnan, asín an 12 tandâ kan banwaan Israel na may doceng tribu. Kun idagdag sa 72 an 12 apostoles, magigin 84 o pitóng docenang disipulos. Boót sabihon: iníng banál na misyon tinátaó ni Jesús bakô saná sa sadít na grupo nin mga pinilì kundî sa gabós na kabilang sa Banwaan nin Diós.

An lambang sarô satô ináapód ni Jesús bakô saná sa pagsimba kundî sa pagigin Simbahan na nagmimisyon. Mahalagá an pagsimba lalò na kun Domingo nin huli ta iní an “burabod asín kaitaasan nin búhay Cristiano.” Alagad an katuyohán kan satóng pagsimba iyó na kitá mabasóg asín mapakusóg sa misyon, asín ihirás sa kapwa an gracia nin Diós na nákua ta sa Santa Misa.

An istorya sa Evangelio nagtátaó man nin mga giya kun pâno ta gigibohon iníng misyon.

An satóng misyon pakihirás niatò sa misyon ni Cristo.

Pinônan ni Jesús an pagsubol sa misyon sa pagpamîbî na hagadon sa kagsadiri nin ani an dakúl pang mga paraaní. Kitá mga katabang saná sa dakulang anihán nin Diós. Kayâ kun kitá nakikihirás sa misyon ni Cristo mahihimò ta an gabós, kun bakô man tulos, sa ngapit na panahón. Sabi nganì ni San Pablo sa Filipos 4,13: “Gabós kaya ko sa Saiya na nagpapakusóg sakô.”

Binoót nin Diós na may mga kaibahan kitá sa dalan.

Pinadará ni Jesús an 72 na manduwá-duwá, bilang pagiromdom na bakóng solong esfuerzo an misyon kundî tinatâwan kitá nin mga pag-iriba sa pagbaklay. Sinda an mga nagtatabang satô na magin maimbod sa misyon asín magtalubò sa pagtubód, paglaom, asín pagkámoot. Asín kun sa pagmisyon, marayô kitá sa mga mahál sa buhay, daí man giraray kitá masolo: kaiba ta si Jesús, na nanugâ satô sa Mateo 28,20: “Uyá, kaiba nindo Akó gabós na aldaw, sagkod sa katapusan nin kinâban.”

Iníng misyon naghahagad nin pagdusay kan bilog tang isip, pusò, asín boót.

Tinugon man sinda ni Jesús na dai magdará nin kadakul na gamit, ni makipagparakahuron sa dalan, kundî na paorogón sa gabós an misyon. Anoman na nakakaoláng iwalat, anoman na nakakatabang akóon. Daí magpilì kun saén mas marhay an estaran, kakanon, o donasyon; an mahalagá iyó an misyon. Sa pagbaklay asín pagtukdò, sa pagbulóng asín pagpalayas nin mga demonio, gibohon an mga iní susog sa misyon na ipahayag an pagdatóng kan Kahadean.

An kaogmahan sa misyon balaog nin Kagurangnan.

Nag-urulî an mga disipulos na maogma nin huli kan saindang experiencia sa misyon. Sabi sa Psalmo 100,2: “Maogmang maglingkod sa Kagurangnan!” Minsan siring, pigtamà ni Jesús an saindang pakasabot dapít sa tunay na kaogmahan: bakô nin huli ta an mga espiritu nagpapasakop saindo, “kundî na an saindong mga ngaran nasusurat sa langit.” An Diós asín an Saiyang Kahadean an ginigikanan kan satóng kaogmahan.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kun pâno mo nasasabuhay asín nahihirás sa kapwa an gracia na nakukua mo sa pagsimba asín sa saimong SAKOP.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Siisay si Jesus para Saimo?

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Junio 29–Julio 5, 2025. Basahon an Evangelio gikan sa Mateo 16,13-19 (Solemnidad ni San Pedro asín Pablo, Mga Apostoles).

…

Cada Junio 29 sinecelebrar ta an Solemnidad ni San Pedro, an Prinsipe kan mga Apostoles, asín ni San Pablo, an Apostol sa mga Gentil. Kan taón 2023, sa sermon ni Papa Francisco sa fiestang iní, sinabi niyá na an enot asín pinakamahalagáng hapót sa paghorop-horop sa búhay kainíng duwáng apostoles iyó an hapót man ni Jesús sa Evangelio: “Siísay Akó sa paghonà nindo?”

Siísay si Jesús para satô?

An simbag ni San Pedro sa Mateo 16,16: “Iká an Mesías, an Akì kan Diós na búhay.” Iní an pinakatamang simbag, bunga kan saiyang maigot na pagigin katood sa ministerio ni Jesús—na nagsabi na iní pasabóng mismo kan Saiyang Amâ sa langit.

Sa istorya kan conversión ni San Pablo, na makúkuá sa Gibo kan mga Apostoles (capitolos 9, 22, asín 26), siyá an naghapót, “Siísay ka, Kagurangnan?” Asín sinimbag, “Akó si Jesús na pinapasakitan mo.”  Nagpamidbid si Jesús halè sa langit ki San Pablo bilang Diós na nakikisumarò sa pagsakit kan Saiyang mga disipulos.

Siísay si Jesús sa satóng búhay? Siring ki San Pedro asín San Pablo, an satóng pagkamidbidid Saiya minapahayag kan estado kan satóng relasyon Saiya, asín kan Saiyang pangapodan sa satô.

Para saén kitá ináapód ni Jesús?

Sa istorya kan pag-apód sa enot na mga disipulos, sa Mateo 4,19, nagsabi si Jesús sa magtugang na si San Pedro asín San Andres: “Sumunód kamó Sakô, asín gigibohon Ko kamóng mga parasirà nin mga tawo.”

Si San Pablo sinugò man ni Jesús sa Gibo 22,21: “Lakáw, ta isusubol taká sa mga Gentil.” An pangapodan saiya iyó an pagbalangibog kan Marhay na Baretà sa mga Gentil kaidto, asín sa katawohan sa pag-agi kan mga panahón. Susog sa tradisyon, nagpadará siyá nin 13 surat sa Simbahan sa manlaén-laen na lugár asín sa nagkapirang kapwa disipulos, bâgo pa man naisurat an mga Evangelio, asín an mga iní minidbid kan Simbahan na maninigong magin parte kan Bâgong Tipan.

Kayâ ináapód sindang Apostoles ta parehong sinugò ni Jesús, ta an tataramon na Griegong “apostolos”, an kahulugán “tawong sinugò.” Sa hurí, pareho man na nagtaóng pinakahalangkaw na pagsaksi kan dinusay ninda an saindang búhay, si San Pedro sa pagpakò man sa cruz, asín si San Pablo sa paagi nin espada.

Kitá man, náhapót ta na si Jesús kun para saén Niyá kitá inaapód? Kun bubuksan ta an satóng pusò asín isip sa Saiya, dadarhon Niyá kitá sa particulár na misyon na magtátaóng kahulugán asín katuyuhán sa satóng búhay, asín sa pinakamabungang versión kan satóng sadiri.

Pâno kitá masimbag sa pangapodan ni Jesús?

Sindang duwá bakô mga perpektong tawo. Maski nganì naomaw ni Jesús si San Pedro sa saiyang tamang simbag, alagad sa Mateo 16,23, nadagitan man nin: “Rumayô ka sakô, Satanás!” Romdomon ta man an makatolóng beses na pagnegár niyá ki Jesús bâgo magturaok an manók. Alagad sa gabós na iní, sa saiyang paglakáw sa dalan ni Cristo, danay siyáng inaantabayan kan gracia nin Diós.

Si San Pablo, maski inapód asín nagbâgo halè sa pagigin paratugis nin mga Cristiano pasiring sa pagigin apostol ni Cristo, nag-agi man nin kadakul na pasakit asín kadipisilan sa pagmisyon. Naisurat niyá na tinâwan siyá nin “tunók sa lamán, sugò ni Satanás” sa pagpatios saiya na hinagad niyá na haleon saiya. An simbag saiya kan Kagurangnan sa 2 Corinto 12,9: “An Sakóng gracia tamà na para saimo; huli ta an Sakóng kapangyarihan oróg na makusóg kun iká maluya.”  

Kayâ pâno kitá maninigong magsunód sa pangapodan ni Jesús? Sa cooperación ta sa gracia nin Diós na minatalingkas satô sa kasâlan, minahipnò sa satóng mga kakulangán, asín minapakusóg sa satóng kaluyahan.

…

GIYA SA PAGHIRÁS SA SADÍT NA KOMUNIDAD O PAMILYA | Siísay si Jesús para saimo? Siísay Siyá sa búhay mo?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Benendicionan, Binaak, asin Itinao

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Junio 22-28, 2025. Basahon an Evangelio gikan sa Lucas 9,11-17 (Solemnidad kan Corpus Christi - C).

…

An Corpus Christi tataramon na Latín na an boót sabihon “Hawak ni Cristo.” May toló iníng kahulugán.

Enot, iní an hawak mismo kan satóng Kagurangnan Jesu Cristo, an Diós na nanitawo, na pinangidam sa popônan ni Virgen María, namundag, nagdakulà, nagpagál, nagutom, nagsakit, nagadán, nabuhay-liwát, asín suminakát sa langit.

Ikaduwá, iní an Banwaan nin Diós, an Misticong Hawak ni Cristo; na si Cristo an pamayó asín kitá gabós mga kabtang kan Saiyang hawak; na an pinakahalangkaw na expresión iyó an pagtiripon sa Banál na Misa.

Ikatoló, asín iní an pigcecelebrar niatò sa Domingo kan Corpus Christi, iní an oróg kabanál na Hawak asín Dugô ni Cristo na pigconsagrar sa Eucaristía halè sa dolot na tinapay (hostia) asín alak.

An Evangelio sa Solemnidad na iní iyó an istorya kan milagrosong pagpakakán ni Jesús sa limáng ribong kalalakihan halè sa limáng tinapay asín duwáng sirâ. An istoryang iní may mga profesía asín elemento kan Eucaristía na itotogdas ni Jesús sa Huríng Pamanggi.

An Pagtiripon

Nagpoón an istorya sa pagdará ni Jesús sa mga disipulos sa Betsaida, asín sinundan sinda kan katawohan na hinahanap an Saiyang presencia. Bakóng iní man an katuyohán kan satóng pagtiripon sa Banál na Misa: na mamatean an presencia ni Cristo? Sinabi pa Niyá sa Mateo 18,20: “Kun saén igwang duwá o tolóng natipon sa Sakuyang ngaran, yaon Akó sa tahaw ninda.”

An Liturgía kan Tataramon

Dangan tinukdoán sinda ni Jesús dapít sa kahadean nin Diós. Sa Banál na Misa naghihinanyog kitá sa mga babasahon halè sa Lumang Tipan (Enot na Babasahon), sa mga Psalmo (Responsorio), sa Bâgong Tipan (Ikaduwáng Babasahon), asín sa mga Evangelio (Ikatolóng Babasahon), dangan sa homilía kan padì na nagpapaliwanag kan Tataramon.

An Liturgía kan Eucaristía

Minapoón an kabtang na iní sa Ofertorio, sa pagdolot nin atang. Sa Evangelio an milagro nagpoón sa pagdolot nin limáng tinapay asín duwáng sirâ. Siring man sa Banál na Misa an simpleng hostia asín alak nagigin Hawak asín Dugô ni Cristo. An atang nin mga tawo ginigibo nin Diós na kakanon para sa buhay na daíng kasagkoran. Bakóng iyó man iní an nangyayari sa satóng pagkamoot asín paglingkod na, pag ginigibo niatò sa ngaran nin Diós, Siyá an naghihipnò asín nagpapabunga sa satóng mga paghingowa?

Sa Evangelio kinuá ni Jesús an tinapay asín sirâ “nagtangad sa langit, benendicionán, asín binaak, dangan itinaraó sa Saiyang mga disipulos tanganing ilatag sa katawohan” (Lucas 9,18). Nagpapagiromdom satô an mga tataramon na iní kan ginibo Niyá sa Huríng Pamanggi kan tinogdas Niyá an Eucaristía, mga tataramon na inootro man kan padì sa Santa Misa, sa pagsunód sa kasugoán Niyá sa Lucas 22,19: “Iní paggibohon nindo sa pagromdom Sakô.”

Sa hampang kainíng oróg kadakulang balaog nin Diós sa Eucaristía, an satóng simbag iyó an pagmidbid na kitá bakóng maninigò alagad naherakan, kayâ aakoon ta iní na panò nin kapakumbabaan.

Dangan sa pagsimba, dapat “bilog, tuyo, asín aktibo (full, conscious, and active) an satóng participación sa mga celebración kan liturgía” (susog sa Sacronsanctum Concilium 14, an Constitución sa Banál na Liturgía).

Sa pag-comunión, dapat nasa “estado nin gracia” kitá, boót sabihon daí nakagibo nin kasâlan na mortal, o kun nakagibo man, napatawad na sa pagkumpisál.

Asín pagkatapos kan Misa, magin lugód kitáng maimbod na mga paradara kan Saiyang gracia sa kapwa, oróg na sa nangangaipo kan Saiyang maheherakón na presencia.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás kun anó an nakúkuá mong biyayà sa pagsimba, o experiencia kun pâno mo naihirás sa kapwa an nákua mong biyayà sa Banál na Misa.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

An Tunay na Pagkasararo

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Junio 15-21, 2025. Basahon an Evangelio gikan sa Juán 16,12-15 (Solemnidad kan Santísima Trinidad - C).

…

Saróng vez sa taón nagcecelebrar an Simbahan kan pinakahararom na misterio nin pagtubód: an Santísima Trinidad, an doctrina kan saróng Diós sa tolóng Persona.

Nagtútubód kitá sa Santísima Trinidad nin huli ta iní an pagpamidbid kan Diós kan Saiyang sadiri.

Enot nagpamidbid satô an Diós Amâ bilang kaglaláng nin gabós, tagapagligtas sa kaoripnan, asín kagtaó nin gabós na karahayan. Kan pagdatóng kan satong Kagurangnan Jesu Cristo, uminabot man an kapanoan kainíng Diósnon na pagpamidbid. Sabi Niyá sa Juán 10,30: “Akó asín an Amâ sarô;” asín sa Juán 14,9: “An nakáhilíng sakô, nakáhilíng man sa Amâ.”

Dangan sa Juán 16,14-15, sinabi man Niyá: “An Espiritu Santo Sakô an mapamuraway, huli ta sa Sakô Siyá mákua asín ipapahayag saindo. An gabós na sadiri kan Amâ Sakuyà; kayâ nagsabi Akó na sa Sakô Siyá mákua asín ipapahayag saindo.” Iní an Espiritu kan Amâ asín Akì, an Espiritu nin katotoohan.

An pagkasararò kan Santísima Trinidad ladawan kan pagkasararò kan Saiyang banwaan.

Sa satóng banwaan na halos náraot na an mensahe nin pagkasararò, an Santísima Trinidad nagtutukdò kan tunay na kahulogán nin pagkasararò. An Simbahan an Banwaan nin Diós kayâ dapat lamang na magsaksi kan pagkasararóng iní sa bilog na kinâban.

Kasabáy kan Solemnidad kan Santísima Trinidad, sinecelebrar man an Domingo kan mga Basic Ecclesial Communites (BEC). Sa Diocesís kan Legazpi, an apód sainda Saradít na Komunidad nin Pagtubód (SAKOP). Pâno nagigin saksi an mga BEC asín SAKOP kan pagkasararò kan Santísima Trinidad sa katawohan?

Pagkasararò sa Kabanalan.

An pagkasararò para sa Cristiano oróg sa gabós iyó an pakisumarò sa Diós. Iní man an pamìbì ni Jesús sa Juán 17,21: “na an gabós magin sarô. Siring na Iká, Amâ, yaon Sakô, asín Akó yaon Saimo, magi man sindang sarô sa Satuyà.”

An kabanalan nahihiling sa pagpangadyê asín devoción, oróg na sa Eucaristía, asín pagdará sa kapwa pasiring sa Diós. Alagad an pinakapadumanan kainí iyó na kitá magtalubò na magin kabaing nin Diós na satóng sinasamba. An pagsaksing iní iyó an misyon sa pagkapadì nin mga komunidad nin pagtubód.

Pagkasararò sa Katotoohan.

An tunay na pagkasararò nakapatugmad sa katotoohan. Ta kun daí, iní nagigin sabwatan o pagkaoroyon sa mga gibong maraot. Asín kun iní an talamak na sitwasyon sa satóng sociedad, giromdomón na si Jesús namîbî sa Amâ sa Juán 14,16-17 na “tatàwan Niyá kamó nin sarô man na Paraclito, tanganing makaibanan nindo sagkod pa man: an Espiritu nin katotoohan na daí maaakò kan kinàban.”

An panindogan sa katotoohan asín katanosan, pagsuróg sa mga kasaradayan, asín pagsagwè sa abuso asín kaputikan nin mga makapangyarihan – iní an misyon sa pagka-profeta nin mga komunidad nin pagtubód.

Pagkasararò sa Pagkámoot.

An tunay na pagkasararò may dalisay na pagkámoot. Ta kun daí, pekè o pakitang-tawo saná iní nin huli ta pinapaoróg an interes kan sadiri, o pamilya, o grupo, bakô an karahayan kan kagabsan.

Si Jesús nagsabi sa Juán 15,9: “Siring na namòtan Akó kan Amâ, kamó man namòtan Ko. Magdanay kamó sa Sakong pagkamoot.” An pagsaksi ta sa pagkámoot ni Cristo sa paagi nin paglingkod sa kapwa – iní an misyon sa pagkahadè nin mga komunidad nin pagtubód.

…

GIYA SA PAGHIRÁS SA SADÍT NA KOMUNIDAD O PAMILYA | Anó para saimo an kahulugan nin pagkasararò? Maghirás nin experiencia kun pâno ka nakatabang (o nakauláng) sa pagkasararò nin komunidad o Simbahan.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Espiritu nin Pagkaherak asin Katotoohan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Junio 8-14, 2025. Basahon an Evangelio gikan sa Juán 20,19-23 (Domingo de Pentecostes - C).

…

May duwáng versión an istorya kan paghilig kan Espiritu Santo. An sarô nasa Evangelio ni San Juán na nangyari kan an satóng Kagurangnan Jesu Cristo nagpahilíng sa mga disipulos sa banggi kan aldaw na Siyá nabuhay-liwát. An ikaduwá iyó an istorya kan Pentecostes sa Gibo kan mga Apostoles (2,1-11).

An Pentecostes tataramon na Griego na boót sabihon ika-50 aldaw. Para sa mga Judío, ika-50 aldaw poón sa Pascua, fiesta nin tig-anihan, asín pagromdom kan pagtaó nin Diós kan Saiyang Tugon sa banwaan Israel dumán sa bulód kan Sinai. Para sa mga Cristiano, ika-50 aldaw poón sa Domingo de Resurección asín celebración kan paghilig kan Espiritu Santo sa mga disipulos – kaiba si Virgen María – asín pagkamundag kan Simbahan.

An Simbahan namundag kan tinâwan kan Espiritu Santo an mga disipulos nin kapangyarihan sa misyon, asín pinabanál an mga sacramento. Sa Juán 20,21-22 si Jesús nagsabi: “Siring na Akó sinugò kan Amâ, kamó man sinusugò Ko.” Dangan hinayopán Niyá sinda asín sinabihan: “Akoa an Espiritu Santo.”

Kadakul an balaog kan Espiritu asín manlaén-laen an Saiyang paagi sa pagtabang sa misyon kan Simbahan. Matutok kitá sa duwáng aspeto na mahalagá sa panahón ngonian.

Espiritu nin Pagkaherak.

Kan tinaó ni Jesús an Espiritu sa Saiyang mga disipulos, tulos sinabi Niyá sa Juán 20,23: “An kiísay man na kasâlan na saindong patawadon, mapapatawad; an kiísay man na kasâlan na daí nindo patawadon, daí mapapatawad.” Tinaó ni Jesús sa Simbahan an katongdan na magpatawad sa kapangyarihan kan Espiritu Santo sa mga sacramento kan Pagbonyag asín Reconciliación.

Kun kitá nagpapatawad sa kapwang nagkasalà satô nagigi kitáng instrumento nin pagkaherak nin Diós. Sa panahón nin pagkabarangâ asín pag-iriwal, an pagkaherak nagigin agihán nin pagkásararô asín pagkasinarabotan. Sa hampang kan kultura nin pagsikwal sa kapwa asín pagmenos sa dignidad nin tawo, an pagkaherak minapakusóg kan kultura nin pagmangno sa mga nangangaipo asín pagtaás kan dignidad nin mga ináapí asín mga nasa laylayan.

Espiritu nin Katotoohan.

Nanugâ si Jesús sa Juán 16,13: “Pag mag-abót na, Siyá na iyó an Espiritu nin katotoohan, aantabayan Niyá kamó sa gabós na katotoohan.” An katotoohan na iní daíng ibá kundî an Evangelio ni Cristo – an Marhay na Baretà na an Diós namómoót satô, asín linigtas kitá sa kasâlan asín kagadanan, asín danay na pinápabanál kitá.

An kapangyarihan nin katotoohan pinahilíng sa Gibo 2,4-12, kan an mga disipulos nagpahayag kan Marhay na Baretà, nagkángaralás an mga tawo na halè pa sa manlaén-laen na lugár, nin huli ta nasabotan ninda an sinasabi nin mga disipulos maski ibá-ibá an saindang lengwahe. Iní nin huli ta an katotoohan kan Evangelio universál, para sa gabós.

Sa panahón na talamák an disinformación asín an mga naghahadè-hadean piglalansé an banwaan, oróg na kaipuhan an mga Cristiano na naninindogan sa katotoohan, asín daí mápadará sa sugót nin kaputikan. Sinda ilaw sa diklom sa ngonian na panahón; an saindang liwanag halè sa Espiritu Santo.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin saimong paglingkod sa Simbahan o komunidad na pinakusóg, o pinauswag, o pinabunga kan Espiritu Santo.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Suminakat sa Kalangitan, Nagtutukaw sa Too kan Ama

Giya sa Prayer-Meeting nin mga Saradit na Komunidad nin Pagtubod (SAKOP) Para sa semana kan Junio 1-7, 2025. Basahon an Evangelio gikan sa Lucas 24,46-53 (Domingo de Ascensión - C).

…

An Evangelio iyó an istorya kan Ascensión o pagsakát sa langit kan satóng Kagurangnan Jesu Cristo, susog ki San Lucas. Inistorya giraray iní ni San Lucas, asín may mga dagdag pang detalye nganì, sa saiyang ikaduwáng libro, an Gibo kan mga Apostoles (1,1-11).

An Ascensión iyó an pag-ulî ni Jesús sa Saiyang haróng sa langit.

Nin huli ta Siyá Diós, an Akì nin Diós, an Ikaduwáng Persona kan Santissima Trinidad. Si Santa María, sa saiyang Asunción, isinakát sa langit sa gracia nin Diós, bakô sa sadiri niyang kakayahan, ta tawo man saná siyá. Alagad an Ascención kan satóng Kagurangnan huli sa Saiyang sadiring kapangyarihan.

An Ascensión iyó an kapanoan kan pagpamuraway ki Jesús kan Saiyang Amâ.

Kayâ pinapahayag ta sa Nagtutubod (Credo Apostolico), na Siyá “suminakát sa kalangitan, nagtutukaw sa tóo kan Diós Amáng makakamhan.” Sabi pa ni San Pablo sa Efeso 1,22-23: “An gabós ibinugták Niya sa irarom kan mga bitís ni Cristo, asín, labáw sa gabós, ginibo Siyáng pamayó kan Simbahan, na iyó an Saiyang hawak, an kalubosan kan nagpapanô kan gabós sa gabós.”

An Ascensión iyó man an panugâ kan satóng maabot na kamurawayan.

Sa Juán 14,2 nanugâ si Jesús sa Saiyang mga disipulos: “Sa haróng kan Sakóng Amâ dakúl an eerokan… Malakaw Ako ta maandam nin lugár para saindo.”

Alagad an mensahe kan Ascensión bakô saná dapít sa kamurawayan nin langit, kundî dapít man sa satóng pagigin mga disipulos Niya digdi sa dagâ. Nin huli ta sa pagsakát ni Cristo sa langit, winalat Niya satô an Saiyang Espiritu asín an Saiyang misyon. Nanugâ pa Siyá sa Gibo 1,8: “Aakoon nindo an kapangyarihan pagsangkob saindo kan Espiritu Santo, asín magigi Ko kamóng mga saksi sa Jerusalem, sa bilog na Judea, sa Samaria, sagkod sa kaporohán kan dagâ.”

Evangelización an apód kainíng misyon nin pagsaksi ki Cristo, an pagbalangibog kan Marhay na Baretà. Pâno ta iní gigibohon?

Magdangóg.

Sa Evangelio, hanggang sa bâgo Siyá magsakát sa langit, dagos pang nagtutukdò si Jesús sa mga disipulos. Hanggang sa ngonian padagos pa kitang ginigiyahan kan Saiyang Espiritu, sa paagi kan pagpastor kan mga namamayo sa Simbahan, sa Banál na Kasuratán, sa pagpangadyî, sa pagdangóg sa mga istorya asín agrangay nin kapwa. Bâgo kitá maka-evangelizár, dapat makaukod ngûna an satóng pusò sa pagdangog kan Tataramon nin Diós asín pasabóng kan Espiritu.

Magtubód.

Kan nahiling kan mga disipulos na si Jesús suminakát sa langit, tulos sindang nagtubód asín nagsambá Saiya, asín naghalát sa pagdatóng kan Espiritu Santo. An pagtubód na hinahagad satô iyó an pagtubód nin maimbod na pagsunód sa kabôtan nin Diós asín pagsarig sa Saiyang mga panugâ, lalò na kun may mga kagabatan asín pagbalò sa satóng buhay asín misyon.

Maghirás.

An pinakasimpleng kahulugán kan evangelización iyó an paghirás kan Marhay na Baretà na yaon na satô. An satóng hawak mismo Templo na kan Espiritu Santo sa gracia kan bonyag, asín may mga bunga na nganì Siyáng tinátaó sa satóng búhay. An satóng mga gibong karahayan, an pagsabi nin totoo na may pagkamoot, an paghirás kan istorya kun pâno an Diós naghihirò sa satóng búhay – gabós iní mga paagi nin pagsaksi ki Cristo asín pagdará sa kapwa pasiring Saiya.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin pagsaksi mo ki Cristo asín paghirás kan Marhay na Baretà sa kapwa.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Maabot na Espiritu Santo

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Mayo 25-31, 2025. Basahon an Evangelio gikan sa Juán 14,23-29 (Ikaanóm na Domingo kan Pasko kan Pagkabuhay-Liwát - C).

…

Duwáng semana bâgo an Domingo kan Pentecostes, sa Evangelio nagprofesía an satóng Kagurangnan Jesu Cristo dapít sa pag-abót kan Espiritu Santo. Iní sinabi Niyá sa Huríng Pamanggi bâgo kan Saiyang Pasión. Parte iní kan halawig na kabtang sa Evangelio ni San Juán (capitolo 13 hanggang 17) na ináapód na “Mga Katukdoán sa Huríng Pamanggi” (Last Supper Discourse).

Sa Juán 14,26, inapód ni Jesús an Espiritu Santo na “Parakletos (parasurog) na susugoon kan Amâ sa ngaran Ko.” An Espiritu Santo iyó an Espiritu ni Cristo, asín sinusugò man kan Diós Amâ siring ki Cristo. Susog sa Credo Niceno-Constantinopolitano, an “Espiritu Santo, Kagurangnan asín kagtaó nin buhay: na gikan sa Amâ asín sa Akì. Siyá kaiba kan Amâ asín kan Akì, sabáy na sinasamba asín pinapamuraway: Siyá nagtarám sa paagi nin mga profetas.”

Sa Evangelio, nanugâ si Jesús sa mga disipulos na an Espiritu Santo mádará sainda sa katotoohan, asín nin katoninongan asín pagkamoot.

Espiritu nin Katotoohan.

Nin huli ta daí tulos kayang saboton kan mga disipulos an gabós na itinutukdò sainda ni Jesús, sinabi Niyá sa Juán 16,13, na “pag mag-abót na Siyá na iyó an Espiritu nin katotoohan, aantabayan Niyá kamó sa gabós na katotoohan.”

Asín kun mag-abót an panahón nin mga pagbalô, kun sinda pahampangón sa mga autoridad, sinabi ni Jesús sa Lucas 12,12, na daí maghâdit kun anó an sasabihon o isisimbag: “ta tutukdoán kamó kan Espiritu Santo sa oras man sanáng iyán kun anó an kaipuhan itarám.” Sa ngonian na panahón, sa paglaban sa disinformación asín fake news, bâgo an mga solusyon teknikál, sigurohon ta ngûna na kitá nasa lado kan Espiritu nin katotoohan.

Espiritu nin Katoninongan.

Sinabi man ni Jesús sa Juán 14,27: “Katoninongan iwinawalat Ko saindo. An Sakóng katoninongan itinátaó Ko saindo; bakô siring sa kinâban Akó nagtátaó saindo.” Kun pinapaoróg ta an mga bagay na kinâbanon asín sa lamán kisa sa Espiritu, dadarhon kitá sa karâtan nin mga bisyo, saláng relasyon, asín pagsarig sa mga kinâbanon na kapangyarihan. Alagad kun pilíon ta na magsunód sa pasabóng kan Espiritu Santo, mapapasatô an katoninongan.

Si San Pablo nagsurat sa Filipos 4,6-7: “Daí kamó mahâdit dapít sa anoman, kundî hagadon nindo sa Diós an saindong kaipuhan, sa paagi nin pamîbî na may pagpasalamat. Asín an katoninongan nin Diós na daí matugkad kan isip nin tawo iyó an mag-iingat kan saindong pusò saká isip ki Cristo Jesús.”

Espiritu nin Pagkamoot.

Sinabi pa ni Jesús sa Juán 14,23: “An namómoót Sakô, mag-óotób kan Sakóng tataramon; an Sakóng Amâ mamómoót saiya, saiya Kamí madalaw asín saiya magibo kan Samóng dagosan.” An Espiritu an minagiya sa lambang Cristiano asín sa bilog na Simbahan sa mga gibong pagkamoot.

Sa Gibo kan mga Apostoles 15, may istorya na naribók an Simbahan sa Antioquía kan may mga nagtukdô na kun daí daá magsunód an mga bâgong Cristiano sa mga tugon ni Moises sa mga Judío, siring kan circuncisión, daí sinda makakaligtas. Kayâ nagtipon an mga pamayó kan Simbahan sa paggiya kan Espiritu, dangan pinadará ninda si San Pablo asín mga pag-iriba sa Antioquía tanganing husayon an saláng katukdoán. Sa Gibo 15,28 sinabi ninda: “Naisipan kan Espiritu Santo asín man niamò na daí na kamó pagpagabatan...”

Kun magdanay kita sa Espiritu Santo, tutukdoán Niyá kitáng mámoót susog sa katotoohan asín katalingkasan nin Diós.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin paghirô kan Espiritu nin katotoohan, katoninongan, asín pagkamoot sa saimong buhay.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Bagong Tugon nin Pagkamoot

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Mayo 18-24, 2025. Basahon an Evangelio gikan sa Juán 13,31-35 (Ikalimáng Domingo kan Pasko kan Pagkabuhay-Liwát - C).

…

Sa Evangelio nagtukdô an satóng Kagurangnan Jesu Cristo sa mga disipulos: “Bâgong tugon itinátaó Ko saindo: magkaminorootan kamó; siring na namòtan ko kamó, kamó man magkaminorootan” (Juán 13,34).

Anó an bâgo sa tugon na iní? Dati na man kitáng pigtugon na magkaminorootan. Sa Mateo 7,12, tinukdô ni Jesús: “Gibohon nindo sa ibá an boót nindong gibohon ninda saindo. Iní an kahulugán kan Katugonán ni Moises asín mga katukdoán nin mga profetas.”

Iní an pig-áapód na “bulawan na tugon” (golden rule). Maski sa ibáng mga relihiyon asín kultura, may nasusurat man na siring na kadonongan. Patunay lamang iní na inaakò nin kadaklan an kaisipan na kun kitá nganì mâwot an karahayan kan satóng sadiri, maninigò lamang na respetohon ta man an satóng kapwa. Iyó man iní an sinasabi sa ikaduwá sa Pinakadakulang Tugon. Sabi ni Jesús sa Marcos 12,31: “Kamòtan mo an saimong kapwa arog kan pagkamóot mo sa saimo man saná.”

Alagad kun an sadiri ta saná an patugmadan nin pagkámoot asín hustisya, pwede iníng magbalík sa ináapód na “lex talionis” (law of the talon) nin Lumang Tipan. Susog sa Levitico 24,19-21: “An siísay man na makákulóg sa saiyang kapwa, kukulogán man siring kan ginibo niyá. Kun nakabarì siyá nin tôlang, babarían man siyá nin tôlang, matá sa matá, ngipon sa ngipon.  An ginibo niyá sa saiyang kapwa, iyó man an gigibohon saiya. An siísay man na magbunô nin hayop na bakô man saiya, mabayad kaiyán. An siísay man na maggadán nin tawo, gagadanón man.”

An bâgong tugon ni Jesús oróg sa mga naenot na tugon nin huli ta bakô na an sadiri an patugmadan asín sukulán kun anó an tamang pagkámoot sa kapwa, kundî an satóng Kagurangnan na mismo. Kayâ mámoot kitá siring na kitá namòtan Niyá. Pâno ipinahilíng asín itinukdô satô ni Jesús an Saiyang pagkamóot?

Maenot na mámoot.

Sabi ni San Pablo sa Roma 5,8: “Ipinahilíng nin Diós an Saiyang dakulang pagkámoot satô kan si Jesús nagadán para satô kan kitá mga parakasalà pa.”  Bâgo ta Siyá namidbidan, namòtan na Niyá kitá. Bâgo ta Siyá pinilì, pinilì na Niyá kitá.

Kamòtan an kaiwal.

Sa Mateo 5,44, tinukdô ni Jesús: “kamòtan nindo an saindong kaiwal, asín ipamîbî nindo an mga nagpapasakit saindo.” Nagsaksi Siyá kainí hanggang sa hurí, mantang naghihingagdan sa cruz, hinagad Niyá sa Amâ na patawadon an Saiyang mga paragadan asín an mga nag-oológ-olog Saiya.

Magpatawad sa nagkasalà.

Kan si San Pedro naghapót kun piráng beses dapat na patawadon an tugang na nagkasalà, sinimbag siyá ni Jesús sa Mateo 18,22: “Bakóng pitóng beses, kundî pitóng polò may pitóng beses.” Dangan tinukdoán Niyá kitáng mangadyè sa Amâ na patawadon kitá sa satóng mga kasâlan siring na pinapatawad niatò an mga nagkakasalà satuyà.

Idusay an sadiring búhay. 

Sa Marcos 10,45, sinabi man ni Jesús sa mga disipulos: “An Akì nin Tawo daí nagdigdi tanganing paglingkodán kundî tanganing maglingkod asín magdusay kan búhay Niyá tanganing matubós an dakúl na tawo.” An sukulán nin pagigin dakulà asín enot sa gabós, bakô an pagkapót nin kapangyarihan o pagpayaman sa sadiri, kundî an mapakumbabáng paglingkod, pag-enot sa karahayan nin kapwa, asín pagdusay kan sadiri.

Sa Kapahayagán 21,5, nagsabi an Kagurangnan: “Uya, ginigibo Kong bâgo an gabos.” An pag-utób sa bâgong tugon Niyá an dalan pasiring sa bâgong langit asín dagâ.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás kun pâno an satóng pagkamóot nakakabaing sa pagkamóot ni Jesús, o kun pâno kaipuhan ta pang magtalubò tanganing magin siring Saiya.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song