Bendicion asin Maldicion

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Febrero 16-22, 2025. Basahon an Evangelio gikan sa Lucas 6,17.20-26 (Ikaanóm na Domingo sa Ordinariong Panahón - C).

…

Sa Evangelio susog ki San Lucas tinutukdò ni Jesu Cristo an mga kapaladan o beatitudes. May nagkapirang pagkakaiba iní sa versión ni San Mateo. Embes na walóng paladan o bendición, apát saná an ki San Lucas na pigsusundan nin apát man na kaheherakan o maldición; asín embes na sa bulód (Sermon on the Mount), sa patag na lugár nagsermon si Jesús.

Iníng sermon ni Jesús siring sa mga paghulit nin mga profetas sa Lumang Tipan. Halimbawà, sa Jeremías 17,5-8, nasusurat na maldición an makúkua kan tawong “nagtitiwalà sa tawo, lamán an kinúkusogán, asín nagsusuway sa Kagurangnan an pusò,” alagad bendición para sa “nagtitiwalà sa Kagurangnan, an Kagurangnan magigi niyáng katiwalaan.” Sarô-saroón ta iníng mga bendición asín maldición.

Paladan an mga dukhâ, an mga nasa laylayan asín daíng boses sa kinâban—sa sainda an Kahadean nin Diós. Dinadangog nin Diós an saindang agrangay, haraní Siyá sainda, asín nakatagama man an Kahadean sa mga naggigibong-herak sa saindang kadaíhan digdi sa dagâ.

Paladan an mga nagugutom, an mga nawâran nin trabaho asín hanapbuhay—sinda papabasogón. Kan tinukdoán kitá ni Jesús na mamîbî, kaiba sa satóng pagsunód sa kabôtan kan Amâ asín pagpaoróg sa Saiyang Kahadean, an panugâ kan “satóng kakanon sa aroaldaw,” huli ta an Diós matinao sa satóng mga pangangaipo.

Paladan an mga nagtatangis, an mga nawâran nin mahál sa búhay, an mga nagsasakit nin huli sa inhustisya—an Diós mismo an saindang karangahan asín parasurog.

Paladan an mga kinakaongisán asín pinapakaraot nin huli sa Akì nin Tawo. Bakô kasusupgan kundî orgullo an isabuhay an Evangelio nin katotoohan asín pagkamoot sa panahón na an pagkaongís sa kapwa nasa pusò nin kadakul. Sabi ni San Pablo sa Roma 8,17: “Kun kaiba Niyá kitá sa kasakitan, makakaiba man kitá sa kamurawayan”.

Herak man sa mga mayaman na an kaogmahan yaon sa mga kinâbanon na bagay asín nakacentro an búhay sa pagpadakúl nin yaman. An mga iyán an magigi nindang kaulangan na makalaóg sa langitnon na Kahadean.

Herak man sa mga basóg ngonian mantang sa palibot ninda dakúl an nagugutom asín nagtitios—siring sa parabola kan lalaking mayaman asín ni Lazaro, huhukumán sinda huli kan daí nindang pakilabot asín pagkamoot sa kapwa. Sa Mateo 25,45, si Jesús nagsabi: “An anó man na daí nindo ginibo sa sarô kainíng oróg kasadít, daí nindo iyán Sakô ginibo.”

Herak man sa mga nag-oogma, lalò na idtong mga nanlálamáng sa kapwa asín nabubuhay sa hinâbasan, asín idtong mga nagpaparakpak mantang may mga ináapí asín ginágadán para daá sa saindang sadiring kaligtasan—an agrangay kan saindang mga inapí nakakaabót sa Diós.

Herak man sa mga pig-oomaw nin kadaklan nin huli kan saindang kapangyarihan, kayamanan, asín kasikatan, asín dinádará an banwaan sa mga saláng dalan—tinatalikdan ninda an pagigin mga akì kan Diós tanganing magin kampon kan Paralansé nin tawo.

Linawon ta na bakô iní katukdoán na kasâlan an paghingowa na magyaman o magginhawa an búhay, o na bakô marhay an magkapót nin kapangyarihan, o na daí dapat kitá mag-ogma—kundî kun anó asín siisay an mga paladan sa matá nin Diós. Anó man an satóng estado sa búhay—nasa kayamanan o kadaihan, kabasogan o kagutuman, kaogmahan o kamundoan, kaomawan o kasusupgan—paladan kitá kun kaiba ta an Kagurangnan asín nasasakopan kitá kan Kahadean.

…

GIYA SA PAGHIRÁS SA SADÍT NA KOMUNIDAD O PAMILYA | Ngonian na panahón nin eleksyon, arín man an mga bendición asín mga maldición sa mga track records asín mga posisyon sa mga isyu nin mga kandidato?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Inaapod Kita ni Jesus

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Febrero 9-15, 2025. Basahon an Evangelio gikan sa Lucas 5,1-11 (Ikalimáng Domingo sa Ordinariong Panahón - C).

…

An istorya sa Evangelio na pag-apód ni Jesús sa mga enot na disipulos, yaon sa tolóng Evangelio Sinoptico (Mateo, Marcos, asín Lucas). Sa versión na iní ni San Lucas daí naonabehan si Andres. Sa Evangelio ni San Juán, ibá an istorya: si Juán Bautista an nagturô sa saiyang mga disipulos ki Jesús, an “Cordero kan Diós,” asín si Andres an nagpamidbid ki Jesús sa tugang niyáng si Pedro. An pag-apód sa mga enot na disipulos tandâ na importanteng parte kan plano nin Diós sa kaligtasan nin katawohan an pagmuknâ kan komunidad nin mga disipulos ni Cristo. Pinapahayag man kan istoryang iní an duwáng kabtang kan misterio nin pagtubód: na iní gibo nin Diós asín simbag nin tawo.

Gibo nin Diós.

An pagtubód bakô siring sa paglukso sa diklom, kundî an Diós mismo an enot na nagtátaóng pruweba kan Saiyang pagkamarahayon asín pagkamoot.  Alagad anó man na biyayà asín karahayan na tinátaó Niyá, patanâ saná sa mas darakulà pang biyayà na máabót asín boót Niyáng itaó satuyà.  Kaya inaapód Niyá kitá sa mas hararom na pakisumarò Saiya asín paghirás sa misyon nin pagbalangibog kan Marhay na Baretà.

Iní an nangyarì kan inapód ni Jesús an Saiyang mga enot na disipulos. Pagkatapos na magdangóg sinda kan pagtukdô ni Jesús sa katawohan, daí ninda honaon na gigibohon para sainda an milagro nin dakulang dakóp nin mga sirâ. Alagad dakúl asín mas darakulà pang milagro an masasaksihan ninda kan pinilì nindang bayaan an gabós asín magsunód ki Jesús.

Simbag nin Tawo.

Anó man an maninigong simbag niatò sa biyayà nin pagtubód? An mga enot na disipulos nagtaóng halimbawà nin tamang pagsimbag sa Diós.

Magsarig sa Diós. Si Jesús an may gibo kan milagro nin dakulang dakóp nin mga sirâ, alagad iní nangyari huli kan pagsarig Saiya ni Simón Pedro. Sabi niyá: “Kagurangnan, bilog na banggi nin pagpagál mayò kamíng nákua; alagad sa tataramon Mo, itutunton ko an hikót.”

Sabi sa Jeremías 17,7-8, “Paladan an tawo na nagtitiwalà sa Kagurangnan, siring siyá sa kahoy na itinanóm sa may tubig, na an gamót nagkákanáp sagkod sa sapà.” Paladan kitá kun nahihiling niatò an mga gibong herak asín pagkamoot nin Diós sa satóng buhay. Alagad an tawo na daí tataó magsarig sa Diós, asín linilingawán an Saiyang kabôtan sa pagsunód sa tentación nin hidalíng kaogmahan, rinárayô an sadiri sa burabod nin biyayà.

Magpakumbabâ kan sadiri. Kan masaksihán ni Simón Pedro an milagro, tulos siyáng nagsabi: “Humarayô Ka sakô, huli ta ako parakasalà, Kagurangnan.” Bakô na sinisikwal niyá si Jesús, kundî náhilíng niyá an saiyang bakóng-pagkamaninigò sa Saiyang atubang. Siring iní sa mga istorya nin pag-apód kan mga profetas sa Lumang Tipan, na enot nagsasayuma sa Kagurangnan, alagad bakô sa pagsikwal Saiya kundî huli sa saindang kapakumbabaan.

An Diós naoogma sa mapakumbabâ, alagad an mga matanos sa sadiring paghonà, daíng pagkaherak na makukua ta sarado an saindang pusò. Sabi ni Jesús sa Lucas 5,32: “Daí Akó nagdigdi sa pag-apód kan mga mayong-salà, kundî kan mga parakasalà para magbaklî.”

Magparticipár sa misyon. Sa pag-apód ni Jesús ki Simón Pedro sinabi Niyá: “Daí ka matakot; poón ngonian mga tawo na an saimong pagdádakopón.” Asín bâgo Siyá sumakát sa langit, sa Mateo 28,19-20, sinugò Niyá an mga disipulos sa parehong misyon: “Lakáw kamó, gibohang disipulos an gabós na nación!” An tandâ kan satóng pagigin disipulo ni Cristo iyó an pakisumarò niatò Saiya asín paghirás kan biyayà na tinaó Niyá satô. Iní an Marhay na Baretà na pinapabalangibog satô tanganing dakúl pa an magtubód Saiya asín mag-akò kan kapanoan nin buhay sa Saiyang Kahadean.

...

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin pagkamarahayon saimo nin Diós asín kun saén ka Niyá inaapód na magmisyon.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Ilaw sa Diklom, Ilaw nin Paglaom

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero Febrero 2-8, 2025. Basahon an Evangelio gikan sa Lucas 2,22-40 (Fiesta kan Presentación kan Kagurangnan sa Templo).

…

Cada Febrero 2, sinecelebrár an Fiesta kan Presentación kan satóng Kagurangnan Jesu Cristo sa Templo. Iní an ika-40 aldaw pakatapos kan Aldaw kan Pasko kan Saiyang Pagkamundag, an talaan na panahón na susog sa Ley ni Moises sa Levitico 12 an lambang inâ na bâgong pangakì madolot nin atang para sa ritual nin purificación. Dangan iyó man iní an pag-utób kan sarô pang provision nin Ley sa Exodo 13,2 na an lambang matuáng aking lalaki iconsagra sa Diós. Anó an kahulugán kainíng fiesta?

Si Jesús dolot kan katawohan asín dolot kan Diós Amâ.

An purificación ki Virgen María nangangaipo nin dolot na atang, kayâ nagdolot sinda nin duwáng salampati (dolot nin mga dukhâ). Siring man an matuáng aking lalaki na pigconsagra, susog sa Numero 18,15-16, may mandatong dolot na limáng shekel na pirak (silver) tanganing pantubós (redemption) sa akì na ibinabalík sa saiyang mga magurang. Alagad daí nabanggit sa Evangelio na may dolot na pantubós para ki Jesús—boót sabihon, bilog Siyang dinolot sa Diós Amâ kan Saiyang mga magurang, an bilog Niyáng buhay atang kan katawohan sa Diós.

Alagad susog sa mga banál na guráng na Simeón asín Ana na yaon dumán sa Templo, si Jesús man an pinanugáng Paraligtás. Siyá an dolot kan Amâ sa katawohan. Kayâ si San Pablo nagsabi sa 1 Timoteo 2,5: “Ta sarô saná an Diós, sarô saná man an tagapagultanan kan Diós asín mga tawo, an tawo na iyó si Jesu Cristo.

Si Jesús an ilaw nin kinâban.

Pinadará Siyá kan Amâ tanganing magin ilaw na mádaóg sa diklom nin kasâlan asín karâtan sa kinâban. Sa Lucas 2,32, inapód man Siyá ni Simeón na: “ilaw para sa kapahayagán sa mga Gentíl asín kamurawayan kan banwaan Israel.”

Sa Juán 8,12, si Jesús mismo an mapahayag: “Akó an ilaw nin kinâban. An nagsúsunód Sakô daí maglálakáw sa kadiklomán, kundî magkakaigwa kan ilaw nin búhay.” Kayâ ináapód man an fiestang iní na Candelaria, kun nuarín benebendicionan an mga kandilà na minasimbolo ki Jesús.

Inaapod kitá ni Jesús na magin ilaw nin paglaom.

Sa Mateo 5,14-16, tinukdoán Niya an mga disipulos: “Kamó an ilaw nin kinâban. Daí matatagò an ciudad na yaon sa ibabaw nin bukid. Daí sinusuloán an lampará asín ibinubugtak sa irarom kan takadán, kundî sa talagáng bugtakan, tanganing magliwanag sa gabós sa haróng. Siring magliwanag an saindong ilaw sa atubang nin mga tawo, na máhiling ninda an mga magayón nindong trabaho asín pamurawayon an Amâ nindong nasa langit.”

Ngonian na taón na Jubileo nin Paglaom sa satóng Simbahan, nangangapodan an mga obispo sa Pilipinas na sa tahaw nin kadikloman—kapurisawan, pagraót sa kapalibotan, kadukhaán, korupsyon, mga calamidad, violencia, asín kaputikan—"tugotan an paglaom na maglaad sa satô”, asín magi kitáng “kalayo nin paglaom.” Nangangapodan sinda sa mga pamayó nin banwaan na maglingkod na may transparency asín accountability; sa mga jovenes na magkásararóng manindogan sa pagbabâgo asín responsableng pamámayó; asín sa gabós na Cristiano na nasa gobyerno, negosyo, asín manlaén-laen na mga komunidad, na magin mga saksi sa mga Cristianong kaugalian asín pagkadayupot sa consciencia.

…

GIYA SA PAGHIRÁS SA SADÍT NA KOMUNIDAD O PAMILYA | Basahon an CBCP Surat Pastoral “May Paglaom Pa Daw?” Maghirás nin experiencia o boót gibohon nin pagigin liwanag nin paglaom sa saimong kapwa.

EEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Tataramon kan Kagurangnan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 26-Febrero 1, 2025. Basahon an Evangelio gikan sa Lucas 1,1-4;4,14-21 (Ikatolóng Domingo sa Ordinariong Panahon).

…

An babasahon sa Evangelio igwa nin duwáng kabtang. An enot iyó an pagpapahayag kan katuyohán kan pagsurat kan Evangelio ni San Lucas: na iní para ki Teofilo “tanganing matalastas an katotoohan kan mga itinukdô saiya”. Si Teofilo, pwede nganing bakóng saróng tawo kundî an kabilogan kan mga nagtútubód, nin huli ta an kahulugán kan Griegong ngaran na Theophilos, “namomòtan nin Diós”.

An ikaduwáng kabtang iyó an pagbasa ni Jesu Cristo kan profesía na nasusurat sa Isaías 61,1-2, sa sinogoga sa Nazaret. Asín an saiyang mga kahimanwa na nakasaksi kaidto nagngaralás, lalò na kan sinabi Niyá na “Ngonian nautób na an kasuratán na iní na nadangog nindo.”

Sa Nehemías 8, may nakaomagíd na istorya nin kahalagahán kan tataramon nin Diós. Iní nangyari kan panahón na minabaralík pa saná an mga natadà sa banwaan Israel halè sa 70 taón na destierro (exile) ninda sa Babilonia. Tinipon an gabós na mga adulto patín an mga aking may pakasabot na sa plaza asín binasa sainda ni Esdras na escriba an Torah o mga Libro nin Tugon (an enot na limáng libro sa Biblia), poón pagkaaga hanggang pagkaodto. Gabós nagtarangis mantang binabasa sainda an Kasuratán, kayâ nagtarám pareho si Nehemías asín Esdras na daí sinda magtangis kundî mag-ogma nin huli ta “An aldaw na iní banál para sa Kagurangnan”.

Anó an kahalagahán para satô kan Tataramon nin Diós?

An Tataramon nin Diós biyayà kan Amâ.

Tinaó nin Diós an Tataramon sa Saiyang banwaan tanganing matâwan sinda nin giya kun pâno magin Saiyang banwaan. Sa Psalmo 19,8-9 sinabi: “An tugon nin Kagurangnan mayong kakundían, nakakapaginhawa sa kalág; an patotoo nin Kagurangnan masasarigan, nakakapadonong sa mapakumbabâ. An pasunód nin Kagurangnan matanos, nakakapaógma sa pusò; an tugon nin Kagurangnan malinaw, nakakapaliwanag nin mga matá.”

Sa Banál na Misa, pakatapos kan Enot asín Ikaduwáng Pagbasa, an satóng simbag: “Salamat sa Diós.” Magpasalamat kitá sa Amâ sa paagi nin pag-akò asín pagbasa kan Saiyang Tataramon sa Biblia.

An Tataramon nin Diós sinurat sa kapangyarihan kan Espiritu Santo.

Sabi ni San Pablo sa 2 Timoteo 3,16: “An gabós na Kasuratán pasabóng-nin-Diós asín mapapakinabangan sa pagtukdô, pagsudyâ, pagsagwê, asín pagpatoód sa kasuripotan.” An Espiritu Santo an naggiya sa mga tawong nagsurat kan mga libro sa Kasuratán. An mga profetas sa Lumang Tipan, tanganing ipaaram na an saindang mensahe bakô sadiri saná ninda kundî halè mismo sa Kagurangnan, minakurahaw nin “dabar Yahweh!”, “an tataramon ni Yahweh!” Kan binibilog an Bâgong Tipan, an pagpilì kan mga pamayó kan Simbahan kun arín sa mga literatura kaidtong panahón an tunay na pinasabóng nin Diós asín arín an nagtutukdô nin salâ, ginibo man sa irarom kan Espiritu.

Kaya hingowahon ta na adalan asín pararomon pa an satóng pakasabot sa Tataramon nin Diós sa giya kan mga katukdoán kan satóng Simbahan asín kan Espiritu Santo, na pinanugâ ni Jesús sa Juán 16,13, “na magiya sa gabós na katotoohan”.

An Tataramon nin Diós iyó si Jesu Cristo.

Siyá an kautoban kan mga profesía asín kapanoan kan mga tugon. Sabi sa Juán 1,1: “Sa kapinônan an Tataramon; an Tataramon yaon sa Diós; Diós an tataramon.” Siyá an tataramon na nanitawo na nag-aagda sató sa mas hararom na pakipagrelasyon sa Saiya asín pagsabuhay kan Saiyang Tataramon. Sa mga panahón na makusóg an tentación asín dipisil an pagsunód sa Saiyang tugon, marumdoman ta man lugód an mga tataramon ni San Pedro sa Juán 6,68: “Sa kiísay pa kamí maduman, Kagurangnan? Yaon sa Saimo an mga tataramon nin búhay na daíng kasagkoran.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás kan paborito mong verso o istorya sa Biblia. Ano man an kabtang sa Biblia na dipisil para saimong saboton o gibohon?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Magtalubo Kita Kaiba si Santo Niño

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 19-25, 2025. Basahon an Evangelio gikan sa Lucas 2,41-52 (Fiesta ni Santo Niño - C).

…

Sa Evangelio, an mga tataramon kan doce años na si Jesús, pigngalasán kan mga maestro sa Templo sa Jerusalem asín rinimpos sa pusò kan Saiyang inâ. Sa Fiesta ni Santo Niño inaagda man kitá na rimposón sa satóng pusò an kahulugán kainíng devoción.

An devoción ki Santo Niño nagpapagiromdom kan ginikanan kan satóng pagtubód.

An imahen kan Santo Niño an sarô sa duwáng pinakaenot na Cristianong simboló na nakaabót sa Pilipinas. An sarô iyó an cruz na tinogdok ni Fernando Magallanes (Magellan) sa Cebu. Saróng imahen kan Santo Niño an pigregalo ni Magellan ki Hara Amihan kan iní asín an saiyang agóm na hadè kan Cebu na si Rajah Homabon, asín kadakul nindang pag-iriba, nagpabonyag na Cristiano kan 1521.

Kan si Magellan magadán sa Mactan, nagharalè an mga Kastilà. Nakabalík saná sinda kan 1565, sa expedición na pinamayohán ni Miguel Lopez de Legazpi. Nagkaigwa nin ralaban asín dinaóg ninda an pwersa ni Raja Tupas, na iyó kaidto an hadè kan Cebu. Nákua nin saróng Kastilà an imahen ni Santo Niño sa saróng nasulóng payág kaiba an mga imahen nin mga anito. Nagpatugdok para Saiya nin kapilya, na sa pag-agi nin mga panahón nagin dakulang simbahan, na ngonian iyó na an Basilica Minore de Santo Niño sa Cebu. Kaiba kan paglakóp kan pagtubód na Cristiano an paglakóp man devoción ki Santo Niño.

An devoción ki Santo Niño nagtutukdò kan misterio nin Pagkanitawo kan Diós.

Pag nahíhilíng an imahen kan Santo Niño, nagpaparomdom iní kan Diós na uya satô. Siring sa hadè an badò Niyá nin huli ta Siyá an kapanoan kan profesía sa Isaías 9,5: “Ta omboy namundag satô, aking lalaki itinaó satô; an pagpamayó nasa Saiyang abaga; asín aapodón Siyá sa ngaran na Makangangalas na Parahatol, Diós-Mapangyari, Amâ sagkod-pa-man, Principe nin Katoninongan.”

Sa kulturang Pilipino may manlaén-laen pang porma an Santo Niño: may naka-unipormeng pulís asín soldados, may nakapang-aking badò, asín nakapam-basketball. Iní an misterio kan pakanitawo sa populár na imahinasyon.

Alagad igwa man nin populár na saláng gawè kainí: an paggibo sa Orog-kahalangkaweng Diós na pampaswerte saná, dini-display pa sa mga tindahan kaiba an nag-uulok na Buddha, talapáng na may ugom sinsilyo, asín ikós na nagpapaypay an tóong kamót. Kaipuhan iníng bâgohon nin huli ta iní sacrilegio, an kasâlan nin pagbasáng-basang asín daí paggalang sa Diós.

An devoción ki Santo Niño pangapodan sa pagtalubò sa pagtubód.

Kaipuhan na bantayán asín bâgohon ta an nagkapirang elemento sa kulturang Pilipino na nag-uuláng satô na magtalubò sa pagtubód.

Sarô kainí an pagigin Catolico sa ngaran saná (nominal Catholicism); pagkabonyag daí nang gayong edukasyon sa pagtubód asín bihirà pa maglaóg sa simbahan. Yaon man an folk Catholicism o paghalò sa pagtubód na Cristiano nin mga pamahiin asín mga sagugurang na gaweng bakô man Cristiano. May mga piggigibong garó carinderia o turô-turò an pagtubód, pigpipilì saná an tutubodán o susunodón sa Biblía asín mga katukdoán kan Simbahan; su mga facil saná asín daí nangangaipong bâgohon an sadiri. Yaon man an pagkakaigwa nin “split-level Christianity” o pagtubód na daí nahihiling sa gibo asín daí naisasabuhay.

Sa Lucas 2,52, sinabi na “si Jesús nagtalubò sa kadonongan, edád, asín gracia, sa atubang kan Diós asín mga tawo.” An tunay na devoción Saiya dinádará kitá na magtalubò man siring Saiya.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás kun anó an mga gawè nin devoción sa Santo Niño sa saimong pamilya. Anó para saimo an kahulugán kan devoción ki Santo Niño?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Diós Nagpapamidbid Sato

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 12-18, 2025. Basahon an Evangelio gikan sa Lucas 3,15-16,21-22 (Fiesta kan Pagbonyag kan Kagurangnan - C).

…

An Evangelio nag-iistorya kan versión ni San Lucas kan pagbonyag sa satóng Kagurangnan. An pagromdom kainí iyó man an huríng aldaw kan Panahón kan Pasko kan Pagkamundag. Anó an kahulugán kan Pagbonyag?

Pagpamidbid ki Jesús bilang Mesías.

Nagpapadagos an pagpamidbid ni Jesús asín pagbalangibog sa katawohan kan misterio kan pagkanitawo kan Diós, na enot nang pinahayag sa Pagbaretà kan angel, sa Saiyang Pagkamundag, asín sa Epifanía.

Nagpatotoo sa pagka-Mesías ni Jesús si San Juán Bautista sa pagnegár niyá na siyá mismo an Mesías asín sa pagsabi na an maabot mas oróg kisa saiya. Dangan sa Juán 1,29, tinurô niya si Jesús sa saiyang mga disipulos asín nagsabi: “Uya an Cordero kan Diós na nagpaparà kan mga kasâlan kan kinâban.”

Sa paghilig Saiya kan Espiritu siring sa salampati, pinamidbid man Siyá bilang profeta, asín an tingog kan Amâ pinamidbid Siyá bilang Akì kan Diós.

Pagpamidbid nin Diós bilang Santísima Trinidad.

Siring na daí paghonaon kan Israel na an pigháhalát nindang Mesías iyó an bogtong na Akì kan Diós, daí man ninda paghonaon na an Diós mapamidbid kan Saiyang sadiri bilang Akì na binobonyagan, bilang Espiritu Santo, asín bilang Amáng makakamhan.

Kayâ nganì an apód kan Simbahan na Eastern Orthodox sa pangyayaring iní iyó an theophaneia, an pagpahayag nin Diós kan Saiyang sadiri sa katawohan. Kayâ maninigò lamang na apodón si Jesu Cristo bilang kapanoan kan kapahayagan nin Diós. Sa Juán 14,9 sinabi pa Niya: “An nakahiling Sakô, nakahiling man sa Amâ.”

Pagpamidbid kan katotoohan kan satóng sadiri.

Sa Lucas 3,16, pinasabot ni Juán Bautista an pagkakaiba kan saiyang pagbonyag asín kan gigibohon na pagbonyag ni Jesús: “Akó nagbobonyag saindo sa tubig; alagad maabot na an oróg sakô kakusóg, asín bakô akóng manínigóng maghubád kan sintas kan Saiyang sandalyas; Siyá an mabonyag saindo sa Banal na Espiritu asín kalayo.” An pagbonyag ni Juán tandâ kan pagbaklè kan binobonyagan. An pagbonyag ni Jesús nagpapatawad nin mga kasâlan.

Natâ ta kaipuhan niatò iníng pagbonyag para sa kapatawarán nin mga kasâlan? Huli ta an katotoohan kan satóng pagkatawo na linaláng nin Diós na kabaíng Niyá, rinaót kan satóng pagkakasalà na iyó man an nagdará satô sa kagadanan. Kayâ binoót ni Jesús para satô an nakakaligtas na pagbonyag, susog sa sinabi Niya ki Nicodemo sa Juán 3,3: “Kun an saróng tawo daí mamundag giraray halè sa itaas, daí siyá makakahilíng kan Kahadean nin Diós.”

Sa tubig kan bonyag, nalinigan kitá sa kasâlan, dangan tinaó satô an dignidad nin pagigin Akì kan Amâ, Tugang ni Jesu Cristo, Templo kan Espiritu Santo, Miembro kan Simbahan, asín Tagapagmana kan Kahadean.

An katuyuhán kan pagpamidbid nin Diós.

Sabi ni San Pablo sa 1 Timoteo 2,4: “Boót nin Diós na an gabós makaligtas asín makamidbid sa katotoohan.” Boót Niyá na mamidbidan ta Siya bilang satóng Diós – Amâ, Tugang, asín Katood – tanganing sa satóng pakipag-ulían Saiya asín pagsunód sa dalan ni Cristo, makamtan ta an kapanoan nin búhay.

An bonyag na inakò ta an kapinônan kan satóng bâgong búhay sa Diós. Dangan sabi ni Jesús sa Juan 8,31-32: “Kun magpadagos kamó sa Sakóng tataramon, tunay Ko kamóng mga disipulos; mamimidbid nindo an katotoohan, asín itatalingkas kamó kan katotoohan.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás kun pâno saimo enot na pinamidbid an Diós kan saimong mga magurang o kun siisay man. Anó na an pagkamidbid mo Saiya ngonian?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Regalo kan Epifanía

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Enero 5-11, 2025. Basahon an Evangelio gikan sa Mateo 2,1-12 (Solemnidad kan Epifanía kan Kagurangnan - C).

…

Sa Evangelio, nagbisita an mga mago sa omboy na si Jesús na saindang nákua sa giya nin saróng maliwanag na bitóon. Susog sa tradisyon, ináapód man sindang tolóng hadè na may ngaran na Melchor, Gazpar, asín Baltazár. Alagad bakô sinda mga hadè kundî mga mago, mga madunong asín may inadalan na tawo. Daí man sa Biblía nabanggit an mga ngaran ninda, asín daí man sinabi na toló saná sinda, kundî na dará ninda tolóng klaseng regalo. Anó an kahulugán kan istoryang iní?

An pinakaregalo iyó mismo si Jesu Cristo.

May daráng regalo an mga mago, asín digdi halè an tradisyon nin pagregalo sa panahón kan Pasko. Alagad an omboy na saindang tuyo sa pagbisita iyó an pinakaregalo sa istorya. Nasusurat sa Juan 3,16: “Ta siring namòtan kan Diós an kinâban: an bogtong na Akì itinaó tanganing an gabós na nagtútubód Saiya daí mawarâ, kundî magkaigwa nin búhay na daíng kasagkoran.” Kayâ an pagbisita kan mga mago sinecelebrar bilang fiesta kan Epifanía, boót sabihon: an pagpahayag nin Diós sa katawohan kan pagdatóng kan satóng Paraligtas na iyó si Jesu Cristo.

Alagad bilang regalo, pwede man Siyang daí akoon, isikwal, asín kaongisán pa nganì. Sabi sa Mateo 2,3: “Pagkadangog kainí, napurisaw si Hadeng Herodes, asín man an bilog na Jerusalem kaiba niyá.” Natà ta an napurisaw sa baretàng iní bakô saná si Herodes, na an paghilíng ki Jesús karibál sa trono, kundî pati na an “bilog na Jerusalem”?

Sa Juán 3,19, sinabi: “Iní an paghukóm: an ilaw napadigdi sa kinâban, ugaring namòtan nin mga tawo an diklom, bakô an ilaw, ta mararaot an saindang mga gibo.” Kayâ maski pigcelebrar ta an mga tradisyon sa Pasko, kun daí man kitá magbaklî sa satóng mga kasâlan asín nasa pusò ta pa an pagkamakasadiri, pagkadagit, asín pagkaurí, siring pa kitá ki Herodes asín sa mga kampon niyá.

Dará ni Jesús an regalo nin kaligtasan.

Pinapahayag ta sa Credo Niceno-Constantinopolitano na si Jesu Cristo, “huli sa satóng mga tawo asín huli sa satóng kaligtasan, naghilig halè sa kalangitan.”

Sabi pa ni San Pablo sa Efeso 3,6: “an mga Gentil kapwa paramana, kapwa hawak, kahirás sa panugâ, ki Cristo Jesús huli kan Evangelio.” An mga Gentil iyó an apód kan mga Judío sa mga bakóng Judio, kabilang sainda an mga mago na halè sa harayóng lugár nin sirangan, asín kitá gabós na bakóng mga Judío. Kayâ an mga mago representante kan katawohan sa bilog na kinâban, asín si Cristo namundag bakô saná sa pagligtas kan mga Judío kundî kan gabós na tawo.

Hinirás satô ni Jesús an regalo nin misyon. 

Tolóng regalo an dará kan mga mago, na simbolo kan Saiyang misyon: bulawan nin huli ta Siya hadè, incienso nin huli ta Siya padì, asín mira nin huli ta Siya profeta. Kan kitá binonyagán ihinirás satô ni Cristo an Saiyang Espiritu asín man iníng tolóng misyon tanganing magin paagi sa pagpalakóp nin kaligtasan sa gabós na katawohan.

Sa lambang paggibo niatò nin karahayan asín pagtabang sa kapwang nangangaipo, ginigibo ta an misyon nin pagkahadè. Sa lambang pagpangadiê para sa kapwa asín pagdará sainda parani sa Diós, ginigibo ta an misyon nin pagkapadì. Sa lambang pagtukdô niatò kan Tataramon nin Diós asín Saiyang mga tugon, sa satóng tataramon asín gibo, nagsasaksi kitá sa misyon nin pagkaprofeta. Regalo ining tolóng misyon nin huli ta iní an nagtátaó nin kahulugán sa satóng búhay asín katuyohán sa satóng pagigin Cristiano.

…

GIYA SA PAGHIRÁS SA SADÍT NA KOMUNIDAD O PAMILYA | Ngonian na Banál na Taón sa Jubileo nin Paglaom, pâno mo gigibohon an misyon nin pagigin hadè, padì, asín profeta?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Pamilya Tandâ nin Paglaom

 

Giya sa Prayer-Meeting nin mga Saradit na Komunidad nin Pagtubód (SAKOP) para sa semana kan Diciembre 29, 2024 - Enero 4, 2025. Basahon an Evangelio gikan sa Lucas 2,41-52 (Fiesta kan Sagrada Familia)

…

Sa Evangelio, an Sagrada Familia kan satóng Kagurangnan Jesu Cristo, Santa María asín San José nagpasiring sa Jerusalem, bilang tradisyon ninda cada taón. An enot na Domingo sa Pasko celebración kan Fiesta kan Sagrada Familia, na iyó an pangarogan nin mga Cristianong pamilya sa kabanalan asín kaimbodán sa Diós. Según sa ladawan kan Sagrada Familia, an lambang Cristianong pamilya ináapód nin Diós na magin Simbahan sa haróng, eskwelahán nin pagkamoot, asín tandâ nin paglaom.

Simbahan sa Haróng

An pinakasadít na unit nin sociedad asín Simbahan iyó an pamilya, kayâ iní ináapód man na Ecclesia domestica o Simbahan sa haróng. Iní naipapahilíng sa pagsimba kan pamilya, sa pagpamîbî, asín sa mga gawè nin pagtubód sa Diós.

Siring ki San José asín Santa María na dinádará si Jesús sa Templo sa Jerusalem asín tinútokdoán Siyá kan mga tradisyon nin saindang pagtubód, an misyon nin mga magurang na Cristiano iyó na ipamidbid sa saindang mga akì an mahál na Diós – sa pagtukdô sainda sa mga pamîbî asín doctrina kan Simbahan, sa pagpatoód sainda sa mga Catolicong tradisyon, sa pagdará sainda sa mga sacramento, asín sa pagsimba sa cada Domingo asín mga aldaw nin obligasyon.

Eskwelahán nin Pagkamoot

Sa lindong ni San José asín Santa María, nakamatè si Jesús nin pagkamoot nin mga magurang digdi sa dagâ. Sa experiencia nin mga akì nin pagkamoot sa pamilya nakakáukód sinda kun páno mámoot man sa kapwa.

Mahalagá man na matukdoán sinda nin pagkamoot sa saindang mga magurang. Sabi sa Sirach 3,3-4: “An naggagalang sa amâ naghihipnò sa kasâlan, asín an nagpapamuraway sa inâ siring sa nagtitipon nin kayamanan.”

Dapít sa pagkamoot, lalò na sa laóg nin pamilya, iní man an hulit ni San Pablo sa Colosas 3,13-14: “Magpatiniós-tiosan asín magpatinawád-tawadan kun an sarô may hinanakít sa sarô man; kun pâno an Kagurangnan nagpatawad saindo, siring man kamó. Sa ibabaw kainí gabós, an pagkamoot na iyó an bugkos nin kalubosan.”

Tandâ nin Paglaom

Binuksán na ni Papa Francisco an celebración kan Jubileo nin Paglaom 2025. Sabi niyá sa saiyang decretong Spes Non Confundit: “Ngonian na Banál na Taón, ináapód kitáng magin mga tandâ nin paglaom na namamatean para sa mga tugang niatong nag-aagi nin anó man na kadipisilan.”

Nasasabuhay iní nin mga pamilya, enot sa pagigin bukás sa búhay asín sa pagpadakulà nin mga akì, asín sa pag-ataman sa mga guráng nang miembro kan pamilya. Dangan sa pagmangno, sa paagi nin pamîbî asín pagtabang sa mga dukhâ asín mga nangangaipo; mga naghehelang; mga nasa bilanggoan; mga apektado nin maraot na panahón; mga nagdúdulág sa violencia asín gera; siring man sa pangataman kan satóng kapalibotan; asín sa pagigin mga ciudadanong may pagmakulóg sa komunidad asín sociedad asín mga responsableng botante sa panahón nin eleksyon.

An lambang pamilya kaiba sa dakulang pamilya kan Kahadean nin Diós. Kayâ mantang nabubuhay digdi sa dagâ asín nasísibót sa mga pangangaipo sa aroaldaw, an lambang miembro nin pamilya ináapód na magin maimbod asín magdanay “sa maogmang paglaom asín pagdatóng kan satóng Paraligtas na si Jesu Cristo.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin mga tradisyon kan saindong pamilya sa panahón kan Pasko. Nahíhilíng daw sa mga iní an pagigin tandâ nin paglaom kan saindong pamilya?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Pinaoróg Karaháy sa mga Babae Gabós

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Diciembre 22-28, 2024. Basahon an Evangelio gikan sa Lucas 1,39-45 (Ikaapát na Domingo kan Adviento - C).

…

An istorya sa Evangelio iyó an pagsungkô ni Virgen María sa saiyang pinsan na si Sta. Isabél. Midbid man iní bilang Visitación, an ikaduwá sa mga Misteriong Maogmahon sa Santo Rosario. Anó an kahalagahán kainí sa kasaysayan nin satóng kaligtasan?

Pinapahayag kainí an pagkamarahayon ni Virgen María.

Garó bagá iní pruweba na daí nanggad násalâ an Diós Amâ sa pagpilì saiya na magin Inâ kan Saiyang Bogtong na Akì. Kaibá sa binaretà ki Virgen María kan angél na si Gabriel an pagbadós kan saiyang pinsan na si Isabél sa pagkagurang kainí asín kaidto nasa ikaanóm na bulan na. Huli kainí, daí nahalóy naghidalíng naglakbay si María sa kabubuldán kan Juda pasiring sa haróng ni Zacarías asín Isabél tanganing magtabang sainda.

Kayâ nganì kaidto pa man rinaranihán na si María nin mga henerasyón nin mga Cristiano nin huli ta aram nin kadakul na siya madodolokan sa saindang mga pangangaipo. Sa satóng diocesís, an devoción ta ki Virgen de Salvación minádará satô sa pagsabi: “An devotos mo surogón, sa mga sakit agawon.”

Alagad bakô saná intercesión ni María an mensahe kainí, kundî iní man nagin inspirasyon satô na arogon an saiyang pagkamarahayon asín pagkamatinabang. Nasusurat sa Hebreo 13,16: “Daí nindo paglingawán an paggibo nin karahayan asín pag-alay kapwa; an siring na mga sacrificio kagaya-gaya sa Diós.”

An darakulang destroso asín makuring pagsakit na dará kan minaagi pa sanáng mga bagyo sa satóng ronâ, patin an nagdadanay na kadukhaán kan satóng mga kahimanwá na pig-aaprobitsarán nin mga poderoso sa satóng sociedád, padagos na nagtátaó satô nin oportunidad na isabuhay, lalò na ngonian na Adviento asín Pasko, an pagtarabangán na iní.

Pinapahayag kainí na dará ni María an Emmanuel, Diós na yaon satô.

Siya an pigprofesía sa Isaías 7,14 na: “Uya, an virgen mangingidam, mangangakì nin lalaki, na ngangaranan niyang Emmanuel.” Kan si María nagbisita ki Isabél, ipinapangidam na niya si Jesús, asín an Saiyang presencia namatean kan mag-inang Isabél asín Juán (na nagluksó sa kaogmahan sa laóg kan popônan kan saiyang inâ). Kayâ sinabi ni Isabél an mga tataramon na nagin parte na kan pamîbî ki María: “Pinaoróg ka karaháy sa mga babae gabós, asín oróg pa karaháy an saimong Aking si Jesús (an bunga kan saimong popônan)”.

Sa saiyang pagsungkô asín pagtabang ki Isabél, bakô saná an saiyang sadiri an dará ni María kundî kaiba niya si Jesús. An pagigin Inâ kan Oróg Kahalangkaw especiál na privilegio ni María, alagad lambang sarô satóng mga Cristiano, sa gracia kan pagbonyag satô, dará man pirmi an Espiritu ni Cristo.

Kayâ pag kitá naggigibo nin karahayan, o nagsasabi nin totoo, o namómoót nin bolanos, o nagpapatawad sa mga nagkasalà satuyà – bakô saná an satóng sadiri an minagibo kainí kundî kaiba ta an Espiritu Santo na nagpapabunga kan satóng mga gibong herak asín naghihipnò sa satóng mga saradít na esfuerzo.

Sa Banál na Misa, may parte na sinasadól kitá na magpatinaraohan nin katoninongan. Gibohon ta man iní sa luwás kan Misa asín ihirás an Saiyang Espiritu sa paagi kan satóng mga gibong karahayan asín tabang.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin paghirás sa kapwa kan gracia nin Diós sa paagi kan satóng gibong karahayan o pagtabang.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Maogma kitá sa Kagurangnan!

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 15-21, 2024. Basahon an Evangelio gikan sa Lucas 3,10-18 (Ikatolóng Domingo kan Adviento - C).

…

An istorya sa Evangelio pwedeng basahon sa contexto kan Ikatolóng Domingo kan Adviento na inaapod man na Domingo kan Gaudete. An “gaudete” tataramon na Latín na an boót sabihon, “mag-ogma”. Huli ta an pag-andam sa Adviento saróng maogmang pag-andam.

Sa Evangelio, namamatean an pagkadagka asín paglaom kan mga tawong naghihinanyog sa mensahe ni San Juán Bautista.  Tinutukdò man niyá kun saén niatò makúkuá an tunay na kaogmahan.

Enot, an kaogmahan yaon sa katanosan.

May tolóng grupo na nagharapót ki San Juán kun anó an dapat nindang gibohon. Sa katawohan sinabi niyá: an may kakayahán na magtabang sa kapwang nangangaipo, gibohon iyán.  Sa mga parasíngil nin buwís: daí mandayà asín mangurakot. Sa mga soldados: daí mangotong asín maggamit nin dahás, asín makuntento sa sweldo.

An katanosan iyó an paglakáw sa dalan nin Diós asín pagsunód sa Saiyang kabôtan. Matanos an mga maimbod sa Diós asín matinabang sa kapwa; yaon sainda an Saiyang kaogmahan. Alagad an mga makasadiri asín maimot, asín an mga nagpapasakit sa kapwa huli sa korupsyon o pang-aapí – mababaw asin madaling maglipas an kinâbanon nindang kaogmahan.

Ikaduwá, an kaogmahan yaon sa katotoohan.

Tanganing máwarâ an mga saláng paghonà nin mga tawo, tulos nagpahayag si San Juán na bakô siyá an hináhalát na Mesías, asín sinabi pang bakô siyáng maninigò na maghubád kan sandalyas kan Mesías. Daí niyá kaipuhan mag-utík o maghambog, kayâ yaon saiya an kaogmahan nin Diós.

Si Jesús nagtukdô sa Juán 8,31-32: “Kun magpadagos kamó sa Sakóng tataramon, tunay Ko kamóng mga disipulos; mamimidbid nindo an katotoohan, asín itatalingkas kamó kan katotoohan”. An mga tawong naninindogan sa katotoohan, maski magabatan, nabubuhay na may katoninongan asín katalingkasan. Alagad an mga parautik, paralansé, asín nagpapalakóp nin saláng baretà, bakô talingkas kundî oripon kan prinsipe nin kaputikan, si Satanás, na an dará palsong kaogmahan, mga karâtan, pagbasol, asín kamundoan.

Ikatoló, asín oróg sa gabós, an kaogmahan yaon sa Kagurangnan.

Sabi ni San Pablo sa Filipos 4,4-5: “Danay kamóng mag-ogma sa Kagurangnan. Haraní na an Kagurangnan!” Tibaad magsabi kita: may saysay pa daw an pag-ogma sa máabót na Pasko, kun nag-aagi akó sa ngonian nin krisis asín kadiklomán; kun nawâran akó nin mahál sa búhay, o nin trabaho o negosyo; kun napápagál na ta sa halóy na panahón daí ko pa nakakamít an mga pangarap sa búhay?

An simbag: iyó, maninigò asín dapat na icelebrár an Pasko asín mag-ogma sa Kagurangnan. Nin huli na mismo sa satóng kadiklomán kayâ Siyá napadigdi bilang liwanag. Sa tahaw kan mga bagyo sa satóng búhay, Siyá an pailihan. Sa paghampang ta sa mga kadipisilan asín agyat nin búhay, Siyá an masasarigan.

Sabi ni Jesús sa Mateo 11,28-30: “Madya kamó Sakô, gabós na napapagal asín nagagabatan, asín tatàwan Ko kamó nin kahingaloan. Sûngayá an Sakóng sakal asín makánood kamó Sakô, huli ta Akó mahuyò asín mapakumbabâ sa pusò, asín makakákuá kamó nin kahingaloan para sa saindong kalág. Ta an Sakóng sakal masayon asín an Sakóng pâsan magián.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin pagtabang sa kapwa, o panindogan sa katotoohan, o paglingkod sa Diós – na mapagál o dipisil, alagad maogma.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Andamá an Dalan kan Kagurangnan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 8-14, 2024. Basahon an Evangelio gikan sa Lucas 3,1-6 (Ikaduwáng Domingo kan Adviento - C).

…

Sa Evangelio, si San Juán Bautista “naghaharubay kan bonyag nin pagbaklê para sa kapatawadán nin mga kasâlan”. An “pagbaklê” sa orihinál na Griego iyó an tataramon na “metanoia”, na an kahulugán “pagbâgo nin isip” pasiring sa pagbâgong-búhay. Iní an pangenot na mensahe kan panahón kan Adviento. Anó an mga kaipuhan niatong bâgohón asín gibohon?

Bâgohon an mga saláng kaisipan.

Lalò na an satóng pagkaarà sa kapangyarihan asín kayamanan. An istorya sa Evangelio nagpoón sa pagpamidbid sa pitóng pinakamakapangyarihan na mga tawo kan panahón asín lugár na idto: si Tiberio Cesár, emperadór kan Roma; si Poncio Pilato, gobernadór kan Judea; an mga tetrarcas na si Herodes, Felipe, asín Lisaniás; asín an duwáng halangkáw na padì, si Anas asín Caiafas.

Alagad kan dumatóng an tataramon nin Diós, itinaó bakô sa mga iní kundî ki Juán, akì ni Zacarías. An pagkákaibá ni Juán sainda, tinuyo tanganing ipahilíng an kasaditan asín kababawan kan saindang kapangyarihan kumpará sa kadakulaan asín kahalagahán kan mensahe nin kaligtasan na dará ni Juán para sa bilog na kinâban.

Kaipuhan na salidahan an satóng lumang kaisipan tanganing maakò an Marhay na Baretà. Kun an tentación panlalansé tanganing an tawo magkasalà, an Marhay na Baretà iyó an katotoohan na mátalingkas sa tawo sa kaoripnán nin kasâlan.

Iayon an boót sa kabôtan nin Diós. 

Iní an kabôtan kan Diós Amâ: na an Saiyang Akì manitawo “huli sa satóng mga tawo asín huli sa satóng kaligtasan”. Sabi ni San Pablo sa Roma 5,8: “Alagad ipinamidbid nin Diós an Saiyang dakulang pagkamoot satô:  kaidto pang parakasalà kitá, nagadán na si Cristo para satô.”

Katakód sa kabôtan na iní kan Amâ an profesía sa Lumang Tipan, sa Isaias 40,3, dapít sa “tingog na nagkukurahaw sa desierto,” na tandâ na daí nin Diós pinabayaan an Saiyang banwaan. Iní sinurat kan mga panahón na kadakul na Judío an nabihag asín nasa destierro (exile) sa Babilonia, kayâ an marhay na baretà kan saindang katalingkasan mahalè sa desierto, bakô na sa Jerusalém. Nagkatotoo iní kan buminagsak an Babilonia sa kamót kan imperiong Persia, asín an bâgong hadè tinugotan sindang makabalík sa Israel.

Alagad an kapanoan kainíng profesía nangyari sa Bâgong Tipan: ki Juán Bautista. Asín bakô na iní dapít sa mga kinâbanon na paraligtas laban sa mga kinâbanon man na kaiwal, kundî sa pagligtas ni Jesu Cristo kan gabós na linaláng. Kun iní an kabôtan kan Diós Amâ, an maninigong pag-andam kan dalan kan Kagurangnan iyó an pag-utób kan sinasabi kan tingog ni Juán asín pag-ayon kan satóng boót sa kabôtan kan satóng Paraligtas.

Akoon an bâgong búhay ki Cristo.

Anó an mangyayari kun sikwalón ta an kasâlan asín akoon an kaligtasan? Makakamtan ta an bâgong búhay ki Cristo. Giraray sabi sa profesía (Lucas 3,5-6; Isaías 40,4-5): “an gabós na kabâban papanoón, an gabós na bukid saká bulód papatagon, an mga tirikô magigin tanos, asín an mga lubák-lubák magigin pantay na dalan.”

Bakô iní dapít sa literál na mga kabâban, bulód, asín dalan, kundî sa bunga kan kaligtasan ni Cristo sa satóng búhay. Babangonon Niyá kitá sa satóng pagkabagsak sa kasâlan, rurumpagón Niyá an satóng kapaabaw-abawan, tatanoson Niya an satóng búhay – tanganing makacelebrár kitáng maninigò kan Pasko kan Saiyang Pagkamundag, asín maakò kitá sa Saiyang Kahadean sa aldaw kan paghukóm.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kun pâno binâgo nin Diós an saimong saláng kaisipan dapít sa saimong sadiri, o sa kapwa, o sa Saiya, o sa Saiyang kabôtan.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Adviento nin Paglaom

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 1-7, 2024. Basahon an Evangelio gikan sa Lucas 21,25-28.34-36 (Enot na Domingo kan Adviento - C).

…

An pighalean kan tataramon na Adviento iyó an Latín na advenire na an boót sabihon “pagdatóng”. Siísay an mádatóng? Daíng ibá kundî an satóng Kagurangnan Jesu Cristo, asin pig-aandamán ta an Saiyang duwáng pagdatóng: an enot Niyang pagdatóng kan Siya namundag digdi sa dagâ na sinecelebrár ta sa Pasko, asín an Saiyang Ikaduwáng Pagdatóng bilang mamuraway na Hadè asín Hukóm kan gabós. Idagdag ta pang pag-andaman an Jubileo nin Paglaom sa 2025.

An tema sa Evangelio iyó an Ikaduwáng Pagdatóng. Kayâ embes na dapít sa mga kaogmahan kan Kapaskuhán na nagdadangadang, an mensahe kainí dapit sa mga calamidád asín kahorasaan na mangyayari sa kalangitan, kadagatan, asín dagâ, na magdádará nin takot sa mga tawo. Alagad para sa mga Cristiano, iní dapat pag-andamán sa maogmang paglaom. Sabi ni Jesús sa Lucas 21,28: “magtindog kamo nin tiso, iítaas an mga payó, ta haraní na an pagtubós saindo.”

Garó bagá an Biblía, an kalikasan, asín kasaysayan, parareho nagpapasabóng na tanganing mangyari an makahulugán na pagbabâgo, kaipuhan ngûnang mag-agi nin dakulang krisis o katibaadan. Bâgo an kamurawayan kan Resurrección, kaipuhan ngûna mag-agi si Cristo sa Saiyang Pasión. Kaiba kan kaogmahan kan Kapaskuhan iyó an mga makuring gibo kan mga makapangyarihan asín pagkagadan nin mga inocentes.

May krisis man na pig-aagihan an mga tawong nagmamawot na magbâgo asín mapakarhay an buhay, nin huli ta an mga kasâlan na boót talikdan nagpipirit na makabalík giraray sa saindang búhay. Iní an pig-aagihan nin mga recovering alcoholic asín mga adik sa droga. Nangyayari man iní patí mga banál, siring ki San Agustín, San Francisco de Asis, San Ignacio de Loyola, asín ibá pa. An kaligtasan asín kabanalan naghahagad nin sacrificio.

Nangyayari man iní sa satóng banwaan na nag-aagi nin krisis asín pagsakit nin huli sa labi-labing korupsyon asín harâbasan, pagbahâ nin kaputikan, asín mga pang-aapí asín garadanan. Lugód an krisis na iní magpamatè satô nin pagkagutom asín pagkapahà sa katanosan, asín tanyogón kitá na maghingowa asín magtarabangán para sa pagbabâgo kan satóng sociedád.

Anó an dapat tang gibohon tanganing daí magpadaóg sa karâtan asín kasâlan, kundî mangoróg satô an paglaom asín magin maimbod sagkod sa panugáng kaligtasan?

Talikdán an kasâlan.

Pareho an mensahe kan Adviento asín Cuaresma dapít sa dapat niatong gibohon. Sabi ni Cristo sa Lucas 21,34, “Mag-ingat kamó, tibaad maggabát an saindong mga pusò huli kan ribong nin payó, pagkaburát, asín kahâditan kan aroaldaw na pagkabúhay”. Kayâ maglikáy sa pagpaoróg sa mga kaogmahan na minalipas; sa espiritual na kahugakan; asín sa pagkaarà sa kayamanan asín kapangyarihan.

Magbantay na daí malanse nin kaputikan.

An mga nagpapakalat nin disinformación na ginagamit an satóng mga takot asín kaluyahan tanganing magkabarangâ kitá asín isikwal an kapwa. Kayâ magdanay kitá sa paninindogan sa katanosan, katotoohan, pagkamoot sa kapwa, asín pagkamaimbod sa Diós. Sabi ni Cristo sa Lucas 21,19, “Kun magdanay kamó, makakamtan nindo an búhay”.

Magpamîbî sa paghagad nin Gracia.

Nin huli ta kun kitá saná, daí ta kakayanon an mga darakulang agyat nin búhay. Maghagad kita sa Diós siring kan hinagad ni San Pablo sa Tesalonica 3,12: “pataluboon asín pasúpayón kamó kan Kagurangnan sa pagkaminoroót-mootan asín sa pagkamoot sa gabós.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin personál na krisis o inagihan na kadipisilan, asín kun pàno namatean an presencia nin Diós sa mga panahón na iní.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Kun si Jesu Cristo an Satong Hade

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Noviembre 24-30, 2024. Basahon an Evangelio gikan sa Juán 18,33-37 (Solemnidad ni Cristong Hadè - B).

…

Iníng Evangelio sa Solemnidad ni Cristong Hadè daí nag-iistorya ki Jesu Cristo bilang mamuraway na hadè na nakatukaw sa Saiyang trono. Kundî bilang saróng preso na pinapasupog asín napapairarom sa interogasyón sa korte ni Poncio Pilato. 

Ipinahayag Niyá na Siyá man nanggad Hadè, alagad bakô siring sa kaisipán ni Poncio Pilato asín kan Imperio Romano. Kayâ Siyá hinukumán nin kagadanan, asín an Saiyang krimen nakasurat sa pamayohán kan cruz na pinagpakoan Saiya: INRI (Iesus Nazarenus Rex Iudaeorum, na an kahulugán: Jesús Nazareno Hadè kan mga Judío). Anó man nanggad an boót sabihon kan pagkahadè ni Cristo?

Siyá an Hadè nin langit asín dagâ. 

Sa Evangelio sinabi ni Jesús ki Pilato na an Saiyang pagkahadè bakóng gikan sa kinâban na iní – nin huli ta Siyá an Hadè nin langit. Asín sa Daniel 7,14, pigprofesía na an Akì nin Tawo “tinâwan nin kapangyarihan, kamurawayan, asín kahadèan; asín an gabós na banwaan, nación, asín lengguahe nagi Niyáng lingkod.” Sa Kapahayagan 1,5, inapód Siyáng “hadè kan mga hadè sa dagâ”.

Alagad kan tinâwan ni Pilato an mga Judío nin oportunidad na paluwasón si Jesús na Hadè asín pinapilì sinda, Siyá o si Barrabás na mahâbas, pinilì kan mga tawo si Barrabás. Hanggang ngonian pinipilì pa man giraray nin kadakul na tawo an mga mahâbas, mga parautik, asín mga paragadan. 

Kun si Cristo an satóng Hadè, pipilion ta Siyá asín an Saiyang Evangelio, bakô an mga padagka asín panlalanse kan mga makapangyarihan sa satóng ronâ. An Saiyang paarog asín kabôtan iyó lugód an magin mga basehan kan satóng pagpipilì sa mga pamayó kan satóng banwaan pag-abót kan eleksyón.

Siyá an Hadè sa gabós na panahón.

Sa Kapahayagan 1,8, nasusurat: “’Akó an Alfa asín an Omega’, olay kan Kagurangnan, na iyó an Diós, an Danay, an Dati, asín an Mádatóng, an makakamhan sa gabós.” Yaon Siyá kan paglaláng nin kinâban, susog sa Juán 1,1: “Sa kapinônan, an Tataramon; an Tataramon yaon sa Diós; Diós an Tataramon.” Sa Credo Niceno-Constantinopolitano, ipinapahayag ta na si Jesu Cristo, satóng Kagurangnan, “nagtutukaw sa tóo kan Amâ. Asín mamuraway na mábalík, sa paghukóm sa mga buháy asín mga gadán, an Saiyang kahadèan daíng katapusan.”

Kitáng mga nabubuhay sa panahón, namòtan kan satóng Hadè bágo pa kitá namundag asín tinàwan nin búhay na daíng kasagkoran. Kun si Cristo an satóng Hadè, tinatàwan ta man daw Siyá nin maninigong panahón sa pagsimba asín pamîbî, sa pag-adal kan Biblía asín mga katukdoán kan Simbahan tanganing padagos pa Siyáng mamidbidan asín maaraman an Saiyang kabôtan, asín sa pagkamoot sa kapwang nangangaipo?

Siyá an Hadè kan satóng búhay.

An Solemnidad ni Cristong Hadè tinogdas ni Papa Pio XI kan taón 1925, panahón sa Europa kun kasuarín nagpopoón na an pagkusog kan mga ideolohiyang sinisikwal an Diós asín pinapaoróg an mga kaisipán nin tawo asín kinâbanon na kapangyarihan, siring kan secularismo, comunismo, asín fascismo. 

Sa saiyang surat na Quas Primas (33) sinabi ni Papa Pio XI: “Kaipuhan maghadè Siyá sa satóng isip sa pagtubód sa mga katotoohan asín katukdoán ni Cristo. Maghadè Siyá sa satóng boót sa pagsunód sa mga tugon asín kabôtan nin Diós. Maghadè Siyá sa satóng pusò sa pagkamoot sa Diós oróg sa gabós asín pakisumarò sa Saiya saná. Maghadè Siyá sa satóng hawak sa pagigin instrumento para sa kabanalan asín hustisya nin Diós.”

Kun si Cristo satóng Hadè, andam daw kitang idusay an bilog tang sadiri sa paggibo kan Saiyang kabôtan?

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia na pinaoróg mo an pagsunód sa kabôtan ni Jesu Cristo satóng Hadè kisa sadiring kabôtan o kinâbanon na tentación.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song