Inaapod Kita ni Jesus

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 25-31, 2026. Basahon an Evangelio gikan sa Mateo 4,12-17 (Ikatolóng Domingo sa Ordinariong Panahón - A).

…

An Evangelio iyó an istorya kan pagpoón kan satóng Kagurangnan Jesu Cristo kan Saiyang ministerio publico sa Galilea. Siring na inapód Niyá kaidtong panahón an mga enot na disipulos, dagos na inaapod Niyá kitá ngonian na magin mga disipulos Niyá siring man.

“Magbaraklê kamó; ta haraní na an Kahadean kan langit.”

Iní an mensahe ni Jesús sa Saiyang paglibot sa pagtukdô kan Marhay na Baretà. An Kahadean nag-abót na sa kinâban sa pagkanitawo Niyá, asín an kapanoan kainí mangyayarì sa Saiyang Ikaduwáng Pagdatóng.

Sa Isaías 9,1 nasusurat an profesía: “An banwaan na naglálakáw sa kadiklomán nakáhilíng nin dakulang liwanag; sa mga nag-eerok sa dagâ kan anino nin kagadanan, an ilaw nagsirang.” Iní dapít ki Jesús asín sa Saiyang ministerio sa ronâ kan Galilea.

An tawong naoogma sa liwanag minapoón ngôna sa pag-akò kan saiyang kadiklomán na dulot nin kasâlan. Sa Galilea kadakul an mga nag-arakò ki Jesús asín nagbaraklê – mga Judío asín pagano. Sa gabós na panahón, danay na inaagda ni Jesús an katawohan sa Saiyang Kahadean, asín an enot na gawè sa pag-akò kan Saiyang pag-agdá iyó an pagtalikod sa mga makasâlan na gibo asín pamumuhay. Andam na daw kitáng magbaklê asín talikdán an satóng mga paboritong kasâlan?  

“Madya, magsunód kamó.”

Iní an sinabi ni Jesús sa enot Niyáng mga disipulos: an magtugang na Simon Pedro asín Andres, asín an magtugang na Santiago asín Juán. Iní man an pangapodan Niyá sa satóng mga disipulos Niyá ngonian. Boót sabihon kan tataramon na disipulo: parasunod. Iní an pagsaksíng ginibo kan mga enot na disipulos: tulos suminunód sinda Saiya asín binayaan an saindang mga pamilya asín trabaho.

Kun mga parasunod kitá ni Cristo, Siyá saná an susundan ta – bakô siísay man o anó man na bagay. Gabós tang gibo dapat oyon sa Saiyang kabôtan; asín an sukulán kan mga desisyon ta iyó kun makakaparaní iní satô Saiya.

Saróng tandâ kan pagigin disipulo iyó an kamâwotan na lalò pa Siyang mamidbidan sa pag-adal kan buháy na Tataramon sa Banál na Kasuratán. Sabi ni San Geronimo: “An daí pagkaisi sa Biblía, daí pagkamidbid sa Diós.” Nabasa ta na daw an Biblía asín naghingowa na mag-adal kainí? Kun daí pa, ináapód kitá ni Jesús na padagos Siyáng mamidbidan sa paagi kan Biblía. Kayâ si Papa Francisco ginibo an Ikatolóng Domingo Ordinario bilang Domingo kan Tataramon kan Diós.

“Gigibohon ko kamóng mga parasirà nin mga tawo.”

Iní an sunód na sinabi ni Jesús sa mga enot na disipulos. Boót sabihon, ináapód kitá bakô saná para sa sadiring kabanalan kundî, siring sa mga parasirà, para maghanap asín magdará nin kapwa ki Cristo.

Sarô sa mga saláng paghonà nin kadaklan na Catolico iyó an paghilíng sa sadiri bilang mga parasimbá o Mass-goers saná, bakô Evangelizers o paradara kan Marhay na Baretà.  Kulang an satóng pagigin disipulo kun daí kitá magdará sa kapwa pasiring ki Cristo. Sabi sa Roma 14,7 (na ginibong awit na nganì): “Daíng siísay man an nabubuhay para sa sadiri lamang, daíng siísay man an nagagadán para sa sadiri lamang.”

Gurâno iní kahalagá? Iní an tugon ni Cristo poón sa pag-apód Niyá kan pinakaenot na disipulos. Iní man an huring tugon Niyá sa gabós na disipulos kaidtong bâgo Siyá magsakát sa langit. Sinabi Niyá sa Mateo 28,19: “Lakáw kamó, gibohang disipulos an gabós na nación.” Iní man an tugon Niyá satô ngonian asín sagkod pa man.

…

GIYA SA PAGHIRÁS | Maghirás kan saimong gawè nin pagbasa nin Biblía asín paboritong verso biblico. | GIYA SA PAGHIRÔ | Bilang saróng komunidad/pamilya, pâno nindo mapapatalubò an pagkamoot sa pagbasa asín pag-adal nin Biblía?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

An Pinakadakula sa Kahadean

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 18-24, 2026. Basahon an Evangelio gikan sa Mateo 18,1-5,10 (Solemnidad kan Santo Niño - A).

…

“Siísay an pinakadakulà sa Kahadean kan langit?” Iní an hapót sa satóng Kagurangnan Jesu Cristo kan mga disipulos. Pinatindog Niyá sa tahaw ninda an saróng akì. “An siísay man magpapa-kumbabâ siring sa sadít na aking iní, iyán an pinakadakulà sa Kahadean kan langit.”

An pinakadakulà sa kahadean iyó an hadè.

An hadè nin langit duminatóng sa dagâ, halè sa kamurawayan nin pagkadiós nagpakumbabâ, nagín tawong dukhâ, nagín aking sadít. Iní an sinecelebrár ta sa fiesta kan Santo Niño. Igwa nin profesía sa Isaías 9,5: “Ta omboy namundag satô, aking lalaki itinao satô; an pagpamayó nasa Saiyang abaga; asín aapodón Siyá: Makangangalas na Parahatol, Diós-Mapangyari, Amâ-sagkod-pa-man, Principe nin Katoninongan.”

An fiesta kan Santo Niño nagpapagiromdom man kan kapinônan kan pagtubód na Cristiano sa Pilipinas. An imahen kan Santo Niño de Cebú iyó an orihinál na imahen na pigregalo ni Fernando Magallanes ki Hara Amihan, agóm ni Raja Humabon kan Cebú, kan sinda asín saindang mga nasasakopan nagpabonyág na mga Cristiano kan taón 1521.

An Diós kaiba niatò asín nagín siring sa satô.

An satóng Kagurangnan nag-agi man syempre sa pagkaakì siring sa satô gabós. Kayâ nganì maski an standard na imahen iyó si Jesús na nakabadò bilang aking hadè, may manlaen-laen pang porma an Santo Niño: may nakabadò páng-akì, may naka-unipormeng pulís o bumbero, may nakapam-basketball, asín ibá pa. Iní an misterio kan pakanitawo o incarnación sa populár na imahinasyón!

Alagad igwa man nin mga piggigibong pampaswerte saná an imahen, pigdidisplay pa kaiba an nag-uulok na Buddha, an talapáng na may ugom na sinsilyo, asín an ikós na nagpapaypay an kamót. Iní saláng gawè nin huli ta ginigibo si Cristo na garó sanáng diós-diósan o anito.

Kan si Magallanes magadán sa Mactan, nakabalík an mga Kastilà kan taón 1565 na, sa pamámayó ni Miguél Lopez de Legazpi. Nagkaigwá nin ralaban asín dinaóg ninda an pwersa ni Raja Tupas, na iyó na kaidto an hadè kan Cebú. Nákua kan mga Kastilang soldados an imahe ni Santo Niño sa saróng nasulóng payag-payag kaiba an ibá pang mga imahe nin mga anito asín diós-diósan. Nagpatugdok sinda nin kapilya dumán asín nagpoón paglakóp an devoción ki Santo Niño kaiba kan paglakóp kan Cristianong pagtubód.

An Diós nag-aagda satô na magtalubò sa pagtubód sa Saiya.

Kaipohan ta man na pakarhayón an nagkapirang aspeto sa kulturang Pilipino na nag-uuláng satô na magtalubò sa pagtubód. Siring bagá kan kakulangán nin kadakul na mga magurang na ipasa an biyayà nin pagtubód sa mga akì; an daí pagpahalagá sa pag-adal kan Tataramon nin Diós sa biblía asín mga katukdoán kan Simbahan; an daí pagsaksí sa pagtubód sa pulitika, negosyo, teknolohiya, asín ibá pang lado nin buhay; asín an saláng paghonà na daí kaipohan sa kaligtasan an pagbâgong-buhay susog sa Evangelio. Si Jesús mismo nagsabi sa Evangelio: “Kun daí kamó magbirik asín magín siring sa mga sadít na akì, daí kamó makakalaóg sa Kahadean kan langit.”

Sa Lucas 2,40 nasusurat: “An sadít na akì nagtatalubò asín nagkukusóg, panô nin kadonongan, asín an gracia kan Diós yaon Saiya.” Iyó man lugód an magin pangarogan asín padumanan nin lambang sarô sa satóng mga devotos ni Santo Niño.

…

GIYA SA PAGHIRÁS | Maghirás kan saimong mga gaweng devoción ki Santo Niño. Pâno ka kainí pinapatalubò sa pagtubód asín pagkamoot. | GIYA SA PAGHIRÔ | Bilang sararóng komunidad / pamilya, pâno ta palakopón an devoción ki Santo Niño sa satóng komunidad asín isabuhay iní?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

An Misterio kan Pagbonyag

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 11-17, 2026. Basahon an Evangelio gikan sa Mateo 3,13-17 (Fiesta kan Pagbonyag kan Kagurangnan - A).

…

An Evangelio nag-iistorya kan versión ni San Mateo kan pagbonyag sa satóng Kagurangnan Jesu Cristo. An pagromdom kainí iyó man an huríng aldaw kan Pasko kan Pagkamundag. Anó an kahulugán kan Pagbonyag?

An Pagpamidbid kan Diós

Si San Mateo nagsurat kan saiyang Evangelio para sa audience na kadaklan mga Judío kayâ mahalagá saiyang ipahayag na si Jesús an kautoban kan mga profesía sa Banál na Kasuratán dapít sa pinanugáng Mesías.

An pagbonyag ki Jesús ni San Juán iyó an kautoban kan profesía sa Malakías 3,1 dapít sa ministerio ni Juán na “sinugò na mag-andam kan dalan kan Kagurangnan.” Iníng pagbonyag kumbagá turn-over ni Juán ki Jesús asín kapinônan kan bâgong kabanatè sa kasaysayan kan satóng kaligtasan. Iní man tandâ kan pagpoón ni Jesús kan ministerio bilang Halangkaw na Padì, siring na an mga padì sa Lumang Tipan naglilinig sa tubig bâgo kan saindang ministerio. Kumpará sa mga Evangelio ni San Marcos asín San Lucas, ki San Mateo may dagdag na paghuron si Jesús asín Juán na minatapos sa linya ni Jesús na “angay satô na utobàn an bilog na kasuripotan.”

An paghilig kan Espiritu Santo siring sa salampati iyó an pagpamidbid ki Jesús bilang surogoón asín profeta na mabalangibog kan Marhay na Baretà, susog sa mga profesía sa Isaías (11,1-2; 42,1; 61,1). Tandâ man iní kan bâgong paglaláng huli ki Cristo, siring na an Espiritu naglalayaw-layaw sa tubig sa panahón kan paglaláng, siring na saróng salampati pinalayog ni Noé sa pagtapos kan delubyo.

An tingog na halè sa langit – “Iyó iní an Sakóng Akì, na namomòtan, an minarhayán Ko” – kapahayagán na si Jesús an “Akì kan Diós.” An enot nang pinamidbid ni Mateo bilang “Akì ni David” (sa Mateo 1 sa paglatag kan genealogía ni Jesús asín sa pangaturogan ni San José) na maghahadè sagkod pa man, iyó man an Akì kan Diós.

Huli kainíng pagpamidbid ki Jesús sa kadakul na paagi, asín participación kan Espiritu Santo asín kan langitnon na Amâ, an apód kan mga Simbahan na Eastern Orthodox sa pangyayaring iní iyó an theophaneia, an pagpahayag nin Diós kan Saiyang sadiri sa katawohan.

An Pagtogdas kan Bonyag

Sa katapusan kan Evangelio ni Mateo, sa 28,19-20, bâgo si Jesús suminakát sa langit, sinugò Niyá an mga disipulos: “Lakáw kamó, gibohang disipulos an gabós na nación! Bonyagán sa ngaran kan Amâ, kan Akì, asín kan Espiritu Santo, tukdoán na mag-utób kan gabós Kong itinugon saindo.”

An pagbonyag na inakò Niyá ki Juán, na ginibo man Niyá kan Siya nag-ministerio publico asín pinabanál sa Espiritu, sa huri pinagibo man Niyá sa mga disipulos bilang sacramento para sa kapatawarán nin mga kasâlan asín kapinônan nin pag-akò kan buhay sa Diós.

An pag-akò kainíng sacramento tandâ kan pag-ayon ta sa kabôtan nin Diós, na pinapahayag sa mga Panugâ sa Bonyag, na may duwáng kabtang: pagsikwal ki Satanás, sa saiyang mga padayà, asín mga saláng gibo; dangan pagtubód sa Diós Amâ, Akì, asín Espiritu Santo.

Sa pagtapos kan Kapaskuhán, an Fiesta kan Pagbonyag siring sa Commencement Rites sa eskwelahan: mantang katapusan kan pagklase, kapinônan man nin bâgong kabtang sa buhay. An misyon na tinugon ni Jesús asín an mga Panugâ sa Bonyag, na pinakusóg kan gracia kan Pasko, iyó an isasabuhay ta sa enterong bâgong taón.

…

GIYA SA PAGHIRÁS | Maghirás kun pâno saimo enot na pinamidbid an Diós kan saimong mga magurang o kun siiísay man. Anó na an pagkamidbid mo na Saiya ngonian? | GIYA SA PAGHIRÔ | Bilang sararóng komunidad / pamilya, pâno ta matatabangan an lambang sarô na isabuhay an mga Panugâ sa Bonyag?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

An Pagpamidbid kan Kagurangnan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 4-10, 2026. Basahon an Evangelio gikan sa Mateo 2,1-12 (Epifanía kan Kagurangnan - A).

…

Sa Evangelio may mga mago halè sa sirangan na nagbisita sa omboy na satóng Kagurangnan Jesu Cristo. Inaawit ta iní sa Pasko: “Nang sa Kristo ay isilang, may tatlong haring nagsidalaw, at ang bawat isá ay nagsipaghandog ng tanging alay.” Inapód sindang mga hadè huli sa profesía sa Isaías 60,1-6 na máabót an Mesías siring sa ilaw asín maglálakáw an mga nación asín mga hadè sa bangraw kan Saiyang liwanag. Patí an daráng bulawan asín incienso naonabihán man.

Alagad bakô sinda mga hadè kundi mga mago, mga may inadalan sa mga sciencia asín kasuratán nin manlaen-laen na mga nación asín relihiyón. Sa pag-agi kan panahón, nagkaigwa sindang ngaran: Melchor, Gaspar, asín Baltasár. An pagsungkô ninda inaapód na Epifanía kan Kagurangnan, tataramon na Griego na an kahulugán “pagpahayag” o “pagpamidbid” nin Diós sa katawohan.

Natà ta kaipohan nin Diós na magpamidbid satô? Nin huli ta kun kitá saná daí kayang abotón kan satóng isip an misterio kan Saiyang pagka-Diós, minsan nganì an Saiyang kabôtan linaág na Niyá sa satóng pusò. Anó an ipinapamidbid o ipinapahayag satô kan Epifanía?

Enot, si Jesús an pinanugáng paraligtas.

Sa Evangelio ipinapamidbid si Jesús bilang hadè kan mga Judío asín Mesías (sa Hebreo) o Cristo (sa Griego) susog sa mga profesía. Siyá an kapanoan kan pagpamidbid kan Diós Amâ. Sabi sa Juán 1,18: “Sa Diós mayò nin nakáhilíng; an bogtong na Diós, na odók na yaon sa daghan kan Amâ, Siyá an nagpaliwanag.”

Alagad igwa man ki mga daí nagtubód asín nagsikwal pa nganì Saiya: si Hadeng Herodes asín an saiyang mga pag-iribang padì asín escribas. Nasusurat sa Juán 3,19: “Iní an paghukóm: an ilaw napadigdi sa kinâban, ugaring namòtan nin mga tawo an diklom, bakô an ilaw, ta mararaot an saindang mga gibo.” Kayâ kun habô tang magbâgo kan satóng mga saláng gibo, sinisikwal ta man si Jesús. Lugód pilíon ta an dalan kan mga mago na nagmâwot na mas lalò pang mamidbidan si Jesús, bakô an dalan ni Herodes asín mga pag-iriba niyá.

Ikaduwá, an kaligtasan itinátaó sa gabós.

Sabi ni San Pablo sa Efeso 3,6: “an mga Gentíl kapwa paramana, kapwa hawak, kahirás sa panugâ, ki Cristo Jesús, huli kan Evangelio.” Boót sabihon kan Gentil, an mga bakô Judío, an kadaklan kan katawohan, kaiba na kitá. An mga magong Gentil na nákua an omboy nagpahayag kan kabôtan nin Diós na sinabi ni San Pablo sa 1 Timoteo 2,4: na “an gabós na tawo makaligtas asín makaabót sa pakamidbid kan katotoohan.”

Ikatoló, kahirás kita kan misyon nin kaligtasan ni Cristo.

An mga regalong dará kan mga mago nagsisimboló kan tolóng misyon ni Cristo para sa satóng kaligtasan. An bulawan huli ta Siyá hadè; an incienso huli ta Siyá padì; asín an mira (na gamit sa pag-embalsamár nin gadán) huli ta Siyá profeta. Sabi sa Katekismo: “An bilog na Banwaan nin Diós nagpaparticipár sa tolóng oficio ni Cristo asín nag-aakò kan responsibilidad sa misyon asín paglingkod na nagbubulos halè sa mga iní” (CCC 783).

Ginigibo ta an misyon sa pagkahadè pag kitá naglilingkod asín pig-eenot an kapwang nangangaipo kisa sadiri. An misyon sa pagkapadì pag kitá magpangadiè para sa lambang sarô, asín magdará sa kapwa parani sa Diós. An misyon sa pagkaprofeta pag nag-aadal kitá kan Tataramon nin Diós asín mga katukdoán kan Simbahan, asín nagsasaksi kitá sa mga iní sa tataramon asín gibo.

…

GIYA SA PAGHIRÁS | Maghirás nin experiencia kun pâno mo pigsasabuhay an pakisumarò sa misyon ni Cristo bilang hadè, padì, asín profeta. | GIYA SA PAGHIRÔ | Magplano nin mga simpleng aktibidad o programa tanganing isabuhay kan saindong SAKOP iníng tolóng Cristianong misyon sa bilog na taón.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

An Misyon nin Lambang Pamilya

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 28, 2025 – Enero 3, 2026. Basahon an Evangelio gikan sa Mateo 2,13-15,19-23 (Sagrada Familia - A).

…

An Domingo sa Octava kan Pasko sinecelebrar bilang Fiesta kan Sagrada Familia kan satóng Kagurangnan Jesu Cristo asín Saiyang mga magurang, Sta. María asín San José. Tamang-tamà ta an Pasko panahón man nin pagtiripon asín celebracion nin mga pamilya.

Alagad tibaad maghonà kitá na bakóng marhay an Pasko kun bakóng kumpleto an pamilya. O kun may problema. O na an pamilyang maimbod sa Diós dapat pirming maogma asín daí nag-aagi nin kadipisilan. Tulos pipahalè satô an mga salang paghonà na iyán sa istorya kan Banál na Pamilya sa Evangelio. Sa katunayan, nasa peligro an buhay kan omboy na si Jesús na boót ipagadán ni Hadeng Herodes kayâ kaipohan nindang magdulág pasiring sa Egipto.

An Sagrada Familia an pangarogan kan lambang pamilyang Cristiano. Sa tahaw nin mga pagbalô sa buhay, nagsaksi sinda sa pagigin maimbod sa kabôtan kan Diós Amâ bilang Simbahan sa haróng, eskwelahan nin pagkamoot, asín tandâ nin paglaom – na iyó man an misyon nin lambang pamilyang Cristiano.

An Pamilya Simbahan sa Haróng.

Sa Latín, ecclesia domestica, an pinakasadít na unit kan Simbahan. Boót sabihon, sa pamilya enot na pinapamidbid sa mga akì an mahál na Diós, sa paagi kan pagtukdô sainda nin mga pamîbî, pag-ibá sainda sa pagsimba, paghirás sainda kan mga istorya asín adal sa biblia, asín pagsaksi kun pâno magin marhay na Cristiano. An pagkamoot kan mga magurang sa lambang sarô asin sa mga akì, iyó an magigin ideya kan mga akì kun pâno namómoót an Diós. Sabi sa Efeso 5,25: “Mga agóm na lalaki, kamòtan nindo an agóm nindong babae, nin siring ki Cristo: namòtan Niyá an Simbahan asín idinusay an sadiri para saiya.”

An Pamilya Eskwelahán nin Pagkamoot.

Sa pamilya an gabós dapat nakakamatè asín nakakaukód nin tamang pagkamoot. Sabi ni San Pablo sa Colosas 3,18-21: “Mga agóm na babae, magpasakop kamó sa saindong mga agóm na lalaki, siring dapat, sa Kagurangnan. Mga agóm na lalaki, kamòtan nindo an saindong mga agóm na babae, daí kamó magpakapaít sainda. Mga akì, magkuyog kamó sa saindong mga magurang sa gabós na bagay, ta kagaya-gaya iyán sa Kagurangnan. Mga amâ, daí pagpa-uyamá an saindong mga akì, tanganing daí mawâran boót.” Bakô iní dapít sa kun siísay an may kapangyarihan sa laóg nin haróng, kundî kan katongdan nin lambang miembro sa pagkamoot, pag-ataman, asín paggalang sa lambang sarô.

An Pamilya Tandâ nin Paglaom.

Sa Sirach 3,3-4 nasusurat: “An naggagalang sa amâ naghihipnò sa kasâlan, asín an nagpapamuraway sa inâ siring sa nagtitipon nin kayamanan.” Iní an mas hararom na kahulugán kan paggalang sa satóng mga magurang: sinda an tandâ kan presencia kan Diós Amâ sa satóng buhay digdi sa dagâ, asín an pagkamoot ta sainda nakatakód sa satóng paglaom sa máabót na kamurawayan kan buhay na daíng kasagkoran.

Siring man an lambang pamilya gikanan nin paglaom sa pagpatalubò sa mga masunod na henerasyon. An futuro kan sociedád asín Simbahan, yaon sa mga aking nakaukod magtabang sa mga gibo sa haróng, magmakulóg sa mga nangangaipo, mag-akò nin salà asín magpatawad, magin honesto asín may takot sa Diós.

…

GIYA SA PAGHIRÁS | Maghirás nin pinakamemorable mong experiencia sa laóg nin pamilya – maogma man o mamundô, may malinaw na leksyon man o daí pa nasasabotan.| GIYA SA PAGHIRÔ | Bilang sararóng komunidad/pamilya, anó an pwedeng magibo tanganing mapakusóg pa an pag-iribahan bilang pamilya.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

An Anunciación ki San José

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 21-27, 2025. Basahon an Evangelio gikan sa Mateo 1,18-24 (Ikaapát na Domingo kan Adviento - A)

…

Sa Evangelio pig-iistorya an pagbaretà kan angel ki San José. Sa Evangelio ni San Lucas an anunciación nangyarì ki Santa María, alagad sa Evangelio ni San Mateo, iní nangyarì ki San José. May ibá pang anunciación sa laóg kan dakulang istorya kan pagkamundag ni Jesús: ki San Zacarías, sa mga pastores, asín sa mga mago.

Anó an itinutukdò satô kan anunciación ki San José?

Enot, an Diós an naenot na námoót asín nagraní sa tawo.

Igwa nin dakulang plano an Diós para sa katawohan: na ihâwas kitá sa kasâlan asín darhón sa Saiyang Kahadean. Sa sadiring kakayahan daí ta kayang iligtas an satóng sadiri sa kasâlan asín kagadanan, sa sadiring kaisipan daí ta maabót saboton an misterio kan Kahadean. Kayâ – siring ki San José na nariribongan kun anó an dapat na gibohon sa baretà saiya ni Sta. María na iní badós na asín an akì bakô gikan saiya – an Diós na mismo an nagráraní para itukdô satô an Kagurangnan Jesu Cristo, an Saiyang pagkamoot na nanitawo para sa katawohan. 

Sabi sa 1 Juán 4,19: “Kitá namómoót, huli ta Siyá enot Niyá kitáng namòtan.”

Ikaduwá, huli ki San José nautób an mga profesía dapít sa Mesías na madatong.

Sinabi saiya kan angel na nautób ki Sta. María an nasusurat sa Isaías 7,14: “Uya, an virgen mangingidam asín mangangakì nin lalaki, na aapodón Emmanuel.” Dangan sa pag-akò ni San José ki Sta. María bilang agóm asín kan aking nasa popònan bilang saiyang akì, nautób an panugâ nin Diós ki Hadeng Davíd sa 2 Samuel 7,12-13: “Gigibohon kong hadè an sarô kan saimong mga aking lalaki asín papakusogón Ko an saiyang kahadean. Siya an matugdok nin Templo para Sakô, asín papagdanayon ko an Saiyang trono sagkod pa man.”

Sa Mateo 1,1-17 nakalista an mga ngaran nin mga kapag-arakian poón ki Abrahám sagkod ki Hadeng Davíd, sagkod ki San José asín ki Jesu Cristo.

Ikatoló, nagsasaksi iníng istorya sa kadakulaan kan pusò ni San José.

Sa tahaw kan saiyang kapurisawan, pinilì niyang mámoót. Habô niyang ipasupog si Sta. María, ni iosip sa autoridád tanganing patawan nin padusa. Sa pasabóng kan angel, pinilì niyáng magtubód asín tulos sunodón an kabôtan nin Diós. Pakagimatá, tulos ginibo an ipinapagibo saiya kan angel: inakò si María bilang agóm, asín nagi siyang marhay na padre de familia.

Si Papa Francisco, sa saiyang Surat Apostolico Patris Corde (May Pusò nin Amâ), nagsabi dapít ki San José: “Maski sa tahaw nin mga takot ni José, nagtatrabaho an kabôtan, kasaysaysan, asín plano nin Diós. Kayâ tinutokdoán kitá ni José na kaiba sa pagtubód sa Diós iyó an pagtubód man na may mahahaman Siyá sa paagi niatò maski kadakul an satóng mga natatakotan asín kaluyahan. Tinutokdoán man niyá kitá na, sa tahaw nin mga bagyo sa satóng buhay, daí nanggad kitá matakot na pilíon an Diós na iyó an magiya satô.”

Siring ki San José, pirmi ta man lugód mahiling asín mamatean an pagkamoot nin Diós sa satóng buhay tanganing danay na hanapon an Saiyang kadonongan asín kabôtan, asín pakákuá kan mga iní, maogma tang sunodón asín isabuhay.

…

GIYA SA PAGHIRÁS | Maghirás nin experiencia kun pâno ka inapód nin Diós na magsarig Saiya asín gibohon an Saiyang kabôtan, sa tahaw nin mga katibaadan. | GIYA SA PAGHIRÔ | Bilang sararóng komunidad/pamilya, magpilì nin sarô o nagkapira sa komunidad para tabangan o pagíanon an inaagihan sa buhay.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

Naghahalat kan Maogmang Paglaom

Giya sa Prayer-Meeting nin mga Saradit na Komunidad nin Pagtubód (SAKOP) para sa semana kan Diciembre 14-20, 2025. Basahon an Evangelio gikan sa Mateo 11,2-11 (Ikatolóng Domingo kan Adviento - A).

…

An Ikatolóng Domingo kan Adviento ináapód Domingo de Gaudete. Halè iní sa Latín kan Filipo 4,4: “Gaudete in Domino semper: iterum dico gaudete” (Danay kamóng mag-ogma sa Kagurangnan: giraray sinasabi ko, mag-ogma kamó), na iyó an Antifona sa Pagpoón kan Misa sa Domingong iní. Natà ta mag-oogma kitá? Huli “ta an Kagurangnan haraní na” (Filipos 4,5).

Anó an mga nagdadará satô nin kaogmahan sa Pasko? An mga regalo para sa kaakian? An Christmas bonus asín 13th month pay nin mga nagtatrabaho? An masulong na benta sa negosyo? An mga dekorasyon asín pailaw sa Pasko, poón sa mga haróng sagkod sa mga pampublikong lugár? An mga pagtiripon nin mga mahál sa buhay? Pâno kun mawarà an mga iní, maogma pa daw an satuyang Pasko?

Sa istorya sa Evangelio nasa bilanggoan si San Juán Bautista. Bakô maogma an mapreso, mas lalò kun bakóng makatarungan. Iní gayód an nasa isip ni Hadeng Herodes kan pinadakóp niyá si Juán huli ta daí niyá nagustohán an sinabi kan profeta dapít sa paggibo niyáng sambay kan agóm kan saiyang tugang. An daí maisip kan mga siring ki Herodes iyó na mas hararom an burabod nin kaogmahan asín paglaom kan mga siring ki Juán na nagsasarig sa Kagurangnan. Nin huli ta, oróg sa gabós, an tunay na kaogmahan yaon sa satóng Kagurangnan Jesu Cristo.

Si Cristo an nagtátaóng kahulugán sa satóng buhay.

Kan nadangog ni Juán an simbag ni Jesús sa mga sinugò niyá, narumdoman niyá an mga tataramon sa mga profesía, sa Isaías 35,5-6: “mamumuklat an mga matá nin mga butá, asín mabubuksan an mga talinga nin mga bungóg. Dangan maglulukso siring sa osá an mga piláy, asín maawit an mga dilà nin mga púla.” An misyon ni Juán iyó na andamón an mga tawo sa pag-abót kan Mesías. Kan madangog niyá an mga sinabi kan mga disipulos, naogma siyáng maaraman na nautób na an saiyang misyon.

Kun an satóng mga gibo nagpapahilíng nin pakisumarò sa misyon ni Cristo bilang pading nagdadará sa kapwa parani sa Diós, profetang nagsasaksi sa katotoohan, asín hadeng naglilingkod – may kahulugán an satóng mga paghingowa, may kaogmahan an satóng mga pagpagál.

Si Cristo an satóng paglaom.

Sa Embolismo o an halabang Amen pagkatapos kan Amâ Niamò sa Misa, sinasambit na kitá nagháhalát “kan maogmang paglaom asín pagdatóng kan satóng Paraligtas, na si Jesu Cristo.” Gurâno man kakusóg an mga tentación na satóng hinahampang sa pagsunód sa Saiyang kabôtan, sigurado an kapangganahan kun kitá nasa lindong Niyá, huli ta sigurado man an Saiyang mamuraway na pagdatóng.

An mga kaogmahan na kaiba sa celebración kan Adviento asín Pasko, mga kinâbanon asín minalipas saná. An mga iní nagtátaó nin patanâ asín anino kan daí masukol na kaogmahan na naghahalát satô sa pagdatóng kan kapanoan kan Kahadean.

Si Cristo an satóng kalakbay sa dalan.

Bakô saná an madatong na kamurawayan an satóng kaogmahan, kundî ngonian pa saná, sa paglakaw ta sa Saiyang dalan, kaiba ta na Siyá. Huli ta an pigprofesía sa Mateo 1,23 na “Emmanuel, Diós na uya satô,” sa Mateo 28,20 nanugâ sa mga sinugò Niyá sa pagmisyon: “Uya kaiba nindo Akó gabós na aldaw, sagkod sa kataposan kan kinâban.”

Sabi nganì sa awit Pamasko kan Apo Hiking Society: “Ngunit kahit na anóng mangyari, ang pag-ibig sana’y magharì, sapát nang si Jesús ang kasama mo, tulóy na tulóy pa rin an Pasko.”

…

GIYA SA PAGHIRÁS | Anó an mga nagtatao saimo nin kaogmahan asín kahulugan sa buhay ngonian na panahon nin Adviento asín Pasko. | GIYA SA PAGHIRÔ | Bilang sararóng komunidad/pamilya, anó an pwede tang pagtarabangan tanganing maihiras an maogmang paglaom kan Adviento asín celebracion kan Pasko?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

Tingog na Nagkukurahaw sa Desierto

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 7-13, 2025. Basahon an Evangelio gikan sa Mateo 3,1-12 (Ikaduwáng Domingo kan Adviento -A).

…

Sa Evangelio madadangog niatò an mensahe ni San Juán Bautista: “Magbaraklê kamó; ta haraní na an Kahadean kan langit!” Siyá an nasusurat sa profesía sa Isaías 40,3 na “tingog na nagkukurahaw sa desierto: ‘Andamá an dalan kan Kagurangnan, patanosa an Saiyang mga agihán’.”

Sinabi niyá iní sa saiyang mga kapwa Judío bilang pag-andam sainda – bakô na sa pagkamundag ni Jesús nin huli ta sa panahón na idto pareho na sindang magpinsan gayód mga nasa 30 años na – kundi sa máabót na pagpamidbid ni Jesús sa Saiyang ministerio publico.

Sa satóng panahón an pangapodan ni San Juán mas pa sa pag-andam sa Ikaduwáng Pagdatóng kan Kagurangnan sa paghukóm sa mga buháy asín mga gadán. Huli ta an Adviento panahón nin pag-andam sa duwáng pagdatóng ni Jesús: an enot Niyáng pagdatóng na sinecelebrár sa Pasko kan Pagkamundag, asín an ikaduwá Niyáng pagdatóng sa huríng panahón.

Sabi ni San Juán sa Mateo 3,12, an Kagurangnan mádatóng “kapót Niyá an pantahóp, lilinigan an Saiyang giníkan, titiponon an Saiyang mga trigo sa tambobong, alagad an apá susuloón sa kalayong daí masisigbo.” Anó an dapat niatong gibohon tanganing magkanigong mag-andam sa Saiyang Ikaduwáng Pagdatóng?

Daí pagpaorogón an sadiring kabôtan.

Sa Griego an tataramon na ginagamit sa pagbaklê iyó an “metanoite”, na an boót sabihon, pagbâgo nin isip, o susog ki San Juán, pagbâgong-buhay. Nasusurat sa Proverbio 3,5-6: “Magtiwalà ka sa Kagurangnan sa bilog mong pusò, asín sa sadiri mong pakasabot daí ka magsandig. Sa gabós mong gawè midbidon mo Siyá, asín papatanoson Niyá an saimong mga agihán.” An tamang dalan iyó an pag-ayon kan satóng isip, boót, asín mga gibo, sa kabôtan nin Diós.

Daí maghonang ligtas na kitá maski daí magbaklê.

Sa Evangelio, pigsagwè ni San Juán an mga Fariseos asín Saduceos na yaraon kaiba sa mga nagdadarangóg asín boót man gayód magpabonyag, alagad daíng planong magbâgong-buhay, nin huli ta naghoronà na ligtas na sinda sa padusa sa bisa kan pagigi nindang mga akì ni Abrahám asín kabilang sa Piniling Banwaan. Minuda sinda ni San Juán: “mga ugbon nin mga rimoranon!”

Kun buháy pa si San Juán ngonian asín máhilíng niyá an sitwasyon ta – an mga autoridád na nag-aabuso kan saindang kapangyarihan, an mga pulitiko asín saindang mga kasabwat na naghahàbas sa kabán nin banwaan, an mga ginibong negosyo an pagpalakop nin disinformación, mantang kadakul an nagtitios asín turubodon sa saindang mga idolong utikón – mumudahon man niyá an mga iní asín aapodón: “mga ugbon nin mga rimoranon!”

May pagiromdom satô si Jesús, lalò na sa mga naghohonà na daí na daá kaipohan magbaklê asín magbâgo huli sa saltóng pagtubód na an Diós na mamomôton daí mátaóng paghukóm. Sinabi Niyá sa Mateo 7,21: “Bakô gabós na nagsasabi Sakô: ‘Kagurangnan, Kagurangnan,’ makákalaóg sa Kahadean kan langit, kundî an naggigibo kan boót kan Amá Kong yaon sa langit.”

Daí pagpahaloyón an pagbâgong-buhay.

Huli ta sabi nganì ni San Pablo sa 1 Tesalonica 5,2: “Ta aram nindong marhay na máabót an aldaw kan Kagurangnan siring sa parahâbon, banggi.” Bakô saná na dapat kitáng matakot sa padusa huli kan satóng mga kasâlan, na daí ta aram kun nuarín máabót, kundî an pagbâgong-buhay pagtamà asín pagpakarhay kan satóng buhay. Kun boót tang makatalingkás sa kaoripnán nin kasâlan, maglakáw na kitá tulos ngonian sa dalan nin Kagurangnan.

…

GIYA SA PAGHIRÁS | Maghirás kun arín sa saimong buhay an kaipohan mong pondohón, po’nan, asín padagoson tanganing magbâgong-buhay sa Kagurangnan. | GIYA SA PAGHIRÔ | Bilang sararóng komunidad/pamilya, pâno kitá magsusuroportahan sa kanya-kanya niatong paghingowang magbâgo?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

Buksan Ta asin Linigan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Noviembre 30-Diciembre 6, 2025. Basahon an Evangelio gikan sa Mateo 24,37-44 (Enot na Domingo kan Adviento - A).

…

An Adviento halè sa adventus, tataramon na Latín na boót sabihon “pagdatóng.” An panahón kan Adviento, panahón nin pag-andam sa pagdatóng kan satóng Kagurangnan Jesu Cristo – sa duwá Niyáng pagdatóng. An enot na pagdatóng iyó kan Siyá ipinangidam ni Virgen María asín namundag sa kinâban. An ikaduwá Niyáng pagdatóng iyó an sa huríng panahón nin paghukóm sa mga buháy asín mga gadán asín kapanoan kan Saiyang Kahadean.

Sa Santa Misa, iní an sinasabi sa enot na Prefacio kan Adviento: “Sa enot na pagdatóng sa kapakumbabaan kan inakong lamán, inutób Niyá an katongdan kan daan na patakarán, asín binuksan para samô an dalan nin kaligtasan na daíng kasagkoran; tanganing sa ikaduwá Niyáng pagdatóng sa kamurawayan kan Saiyang kamahalan, ikapahilíng na gayo an nahamán Niyáng gibo, makamtan mi an panugâ na ngonian sa pagbantay, pinapangahasán ming halatón.”

Kayâ an Adviento nabábangâ sa duwáng kabtang. An enot na kabtang, na minápoón sa enot na Domingo hanggang Diciembre 16, iyó an pag-andam sa ikaduwáng pagdatóng ni Cristo. An ikaduwáng kabtang, sa Diciembre 17 hanggang 24, iyó an pag-andam sa Pasko kan Saiyang Pagkamundag.

Sa Pilipinas, an preparasyon sa Pasko minápoón sa Diciembre 16, sa mga Misa novenario na ináapód na Misa Aguinaldo, o Misa de Gallo, o Simbang Gabi.

Anó an tamà asín maninigong pag-andam niatò sa pagdatóng kan Kagurangnan? May saróng awit sa Adviento na pwedeng makatabang magsimbag: “Buksan ta asín linigan pusong may kakundían, ta máabót na si Cristo satuyang Kagurangnan.”

Buksan an Pusò

An pusong bukás, pusong namómoót. An pusong sarado, dai namómoót kundî pinapaoróg an sadiri. Kun minsan sarado an pusò huli ta nakulgan dati asín takót nang makulgan giraray. Alagad kun panô nin pagkamakasadiri asín takot an pusò, pâno iní mabubuksan asín mag-akò ki Jesús?

Sabi sa Kapahayagan 3,20: “Uya, nakatindog Akó sa may pintoan asín nagtututoktok. Kun igwa nin makádangóg sa Sakóng tingog asín magbukás kan pintoan, makikidagos Akó asín makikipamanggi, Akó Saiya asín siyá Sakô.” Sa tahaw kan Saiyang enot asín ikaduwáng pagdatóng, ngonian mismo nagtutoktok si Jesús sa satóng pusò na palaogón ta Siyá tanganing makamtan ta an gracia kan Saiyang presencia.

Linigan an Pusò

Siring na linilinig ta an haróng tanganing marhay pag-estaran asín presentable sa mga bisita, iyó man an dapat sa pusò na nagmamàwot sa Diós. Si San Pablo nagtukdô sa Roma 13,13: “Siring kun aldaw, maglakáw kitá susog sa dapat, bakô sa maatíng hurolnakan asín bururatan, bakô sa kaóragan asín karigsokán, bakô sa padaraóg-daogan asín irinoman.”

Natà kaipohan na malinig an satóng pusò? Nin huli ta kun panô iní nin atî nin kasâlan, pâno ta pa maaakò an gracia kan Kagurangnan kun daí nang lugár sa satóng pusò para Saiya? Sa satóng paglakbay sa Adviento, an satong mga pusong binuksan asín lininigan, magtalubò lugod sa gracia asín pagkamoot nin Diós.

…

GIYA SA PAGHIRÁS | Pâno mo bubuksan asín lilinigan an saimong pusò sa pag-andam sa Pasko kan Pagkamundag asín sa Ikaduwáng Pagdatóng kan Kagurangnan? | GIYA SA PAGHIRÔ | Bilang sararóng komunidad/pamilya anóng gawè nin espirituál na pag-andam an boót nindong gibohon sa laóg kainíng Adviento?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

Dai Kitang Ibang Hade, si Cristo Saná

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Noviembre 23-29, 2025. Basahon an Evangelio gikan sa Lucas 23,35-43 (Solemnidad ni Cristong Hadè - C).

…

Ngonian na taón sinecelebrar an ika-100 na aniversario kan pagtogdas kan Solemnidad kan Satóng Kagurangnan Jesu Cristo, Hadè kan Gabós na Linaláng, o mas midbid sa Solemnidad kan Cristo Rey. An fiestang iní tinogdas ni Papa Pio XI kan taón 1925, panahón sa Europa kun kasuarín nagpopoón na an pagkusóg kan mga ideolohiyang sinisikwal an Diós asín pinapaoróg an mga kaisipán nin tawo asín kinâbanon na kapangyarihan, siring kan secularismo, comunismo, asín fascismo.

Sinabi ni Papa Pio XI sa saiyang surat na Quas Primas (33): “Kaipohan maghadè Siyá sa satóng isip sa pagtubód sa mga katotoohan asín katukdoán ni Cristo. Maghadè Siyá sa satóng boót sa pagsunód sa mga tugon asín kabôtan nin Diós. Maghadè Siyá sa satóng pusò sa pagkamoot sa Diós oróg sa gabós asín pakisumarò sa Saiya saná. Maghadè Siyá sa satóng hawak sa pagigin instrumento para sa kabanalan asín hustisya nin Diós.”

Natà ta kaipohan maghadè si Jesu Cristo sa satóng isip, pusò, boót, asín hawak? Huli ta yaon Saiya saná an kaligtasan asín kapanoan nin buhay. Sabi ni San Pablo sa Colosas 1,14: “sa kahadean kan Aking namomòtan, igwa kitá nin katubosán, kapatawarán nin mga kasâlan.”

Magpasakop kitá sa satóng Hadè.  

An pinakatandâ na inaakò ta si Cristo bilang satóng hadè iyó na sinúsunód ta an Saiyang kabôtan, bakô an satóng sadiring kagustohan. Sinabi Niyá sa Lucas 5,32: “Daí akó nagdigdi sa pag-apód kan mga suripot, kundî kan mga parakasalà para magbaklî.” An sinasabi Niyáng mga suripot iyó idtong mga matanos sa saindang sadiring paghonà, alagad bakô sa matá nin Diós.

Kun bakô si Cristo an nakakasakop satô, may ibang tinutugotan kitáng sakopon an satóng sadiri – pwedeng an satóng mga ambisyon, mga bisyo, mga minalipas na kaogmahan, pwede nganing mga mahál sa buhay, o mga makapangyarihan sa kinâban. Iníng mga imbwelto sa presenteng eskandalo nin kurapsyon, iyó nanggad an halimbawà nin mga nagpasakop bakô ki Cristo, kundî sa mga diós-diosan nin kayamanan asín kapangyarihan. Herak man saindang nagsusunód sa mga diós-diosan na iní, huli ta an kaligtasan makúkuá ki Cristo saná. Susog sa Gibo 4,12: “mayò kiísay pa man an kaligtasan, ta mayong ibáng ngaran sa sirong kan langit na itinaó sa mga tawo, na kaipohan para kitá makaligtas.”

Maglakáw kitá sa dalan kan Hadè.

Sa Juán 14,6, an satóng Hadè nagsabi: “Akó an dalan, an katotoohan, asín an buhay.” Sa Fiesta kan Cristong Hadè an Evangelio iyo an pagtuyâ-tuyâ ki Cristo – mantang naghihingagdan Siyá sa cruz – kan mga pamayó kan banwaan, mga soldados, patin kan sarô sa mga kaiba Niyáng nakapakò man. An dalan kan cruz iyó an dalan ni Cristong Hadè.

Sa panahón na an mga naghahadê-hadean na dinastiya sa satóng nacion, asín saindang mga kampon, nag-iiriwal para sa pansadiring interes, romdomón na igwa kitá nin Hadè na nagsabi sa Marcos 10,45 na Siyá “daí nagdigdi nganing paglingkodán, kundî nganing maglingkod asín itaó an buhay Niyáng pantubós para sa dakûl.”

Kadakul an namómoót sa kapangyarihan, alagad si Jesús ipinahilíng an kapangyarihan nin pagkamoot. Kadakul an nagmamàwot na magyaman, alagad Siyá nagpakadukhâ asín nakisumarò sa mga dukhâ asín karadayán.

An mga nagturuyâ-tuyâ ki Jesús uro-otro sa pagtarám na iligtas Niyá an Saiyang sadiri sa cruz. Iní tandâ kan saindang saláng kaisipan dapít sa kapangyarihan. Alagad malinaw sa satóng Hadè kun natà nakapakò Siyá sa cruz: tanganing iligtas kitá gabós. Iyán an pusò nin tunay na hadè. Magin siring lugód an pusò ta. 

Viva El Cristo Rey!

…

GIYA SA PAGHIRÁS | Pâno mo masasabi na si Cristo an saimong hadè? | GIYA SA PAGHIRÔ | Anóng paglingkod o pagtabang sa kapwa an pwede nindong sararóng gibohon sa pag-utób kan saindong misyon sa pagkahadè?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

Pano Mag-andam para sa Huring Panahon?

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Noviembre 16-22, 2025. Basahon an Evangelio gikan sa Lucas 21,5-19 (Ika-33 na Domingo sa Ordinariong Panahón - C).

…

Sa Evangelio may nagkapirang profesía an satóng Kagurangnan Jesu Cristo dapít sa mga máabót na pangyayari: an pagkarompág kan Templo, mga ralaban, calamidád, persekusyon asín pagsakit. Lalò na an mga gyera asín persekusyon, pig-agihan nanggad kan suanoy na Simbahan. Dangan an Templo sa Jerusalem rinompág nanggad kan taón 70 AD kan mga pwersa kan Imperiong Romano. Sa katunayan, an mga iní nangyari na bâgo pa man nasurat an Evangelio ni San Lucas.

Asín an mensahe sa mga disipulos kaidto sa tahaw nin mga calamidád, naturál man asín kagibohán nin tawo: daí matakot. Kaiba ta an Diós. Siyá an satóng parasurog.

Siring man, iníng mensahe angay sa gabós na panahón. Nin huli ta an profesía ni Jesús dapít man sa mga mangyayari bâgo kan katapusan kan panahón, o sa Griego eschaton. Escatología an apód sa pag-adal dapít sa mga huríng bagay: kagadanan, paghukóm, langit, impierno, purgatorio, pagkabuhay-liwát, asín buhay na daíng kasagkoran. Sa mga huríng Domingo sa calendario liturgico kan Simbahan, iní an mga pinapahoróp-horopan satô, lalò na an dapít sa paghukóm.

Igwa nin duwáng paghukóm na aagihan an lambang sarô satô: enot, an Particulár na Paghukóm sa satóng pagkagadán. Sabi sa Hebreo 9,27: “Itinalagâ sa mga tawo na makasarô sanáng magadán, pero pakatapos kainí an paghukóm.” Dangan, an Huríng Paghukóm sa Ikaduwáng Pagdatóng ni Jesu Cristo. Sa Malakías 3,19-20 nasusurat: “Uya, an aldaw máabót na, naglalaad siring sa pugón. An gabós na mapaabáw-abaw asín gabós na paragibo nin katampalasan magigin dagami, susuloón sinda kan aldaw na máabót na.” Alagad para sa mga matanos “masirang an aldaw nin kasuripotan.”

Pâno ta man nanggad pag-andamán an huríng panahón, asín an aagihan tang paghukóm?

Magdanay kitá sa Diós.

Nagsabi si Jesús sa Lucas 21,19: “Sa saindong pagtagal makakamtan nindo an saindong mga kalág.” Kayâ magdanay kitá sa pag-utób kan Saiyang kabôtan, sa pagtalubò sa pagkamidbid asín pagkamoot Saiya, asín sa mga gibong herak sa kapwa. Nasusurat sa Santiago 2,14: “Anó an pakinabang, mga tugang ko, kun may magsabi na igwa siyá nin pagtubód alagad mayò nin gibo? Maligtas daw siyá kan pagtubód na iyán?”

Gibohon an misyon na tinugon satô ni Cristo.

An pagdatóng kan Kahadean nin Diós iyó an kapanoan kan misyon ni Cristo na winalat asín hinirás Niyá satô. Dakulang privilegio an magpadagos kan Saiyang misyon. Minsan kan nagbalík ki Jesús an mga disipulos matapos na isubol Niyá sinda sa misyon, asín maogmang pig-istorya ninda an saindang mga ginibo, sa Lucas 10,20 sinabihan Niyá sinda: “Daí kamó mag-ogma na an mga maraot na espiritu nasasakop nindo, kundî mag-ogma kamó na an saindong mga ngaran nasusurat sa langit.”

Mag-ingat sa mga nagpapatubód nin mga saláng katukdoán.

Sa panahón ngonian, mag-ingat kitá sa mga naghahasik nin disinformación; sa mga pinapaluwás na tamà an salâ, asín salâ an tamà; sa mga nag-iinfluencia sa publiko na magsuporta sa mga kurakot asín maraot na pulitiko asín negosyante.

Alagad may sarô pang mas dapat tang likayán: na kitá mismo an magdará sa kapwa sa kasâlan. Sa Lucas 17,2, nagpatanid si Jesús: “Marhay pa saiya kun, gakodán sa líog nin gapóng gilingán, na itapok na sa dagat, dai niyá lamang mapadungkal an sarô kainíng saradít.”

…

GIYA SA PAGHIRÁS | Maghirás nin experiencia kan inaagihan mong kadipisilan o tentación sa ngonian. Anó an saimong naginibo dapít kainí? | GIYA SA PAGHIRÔ | Bilang saróng komunidad/pamilya, anó an pwede nindong pagtarabangan tanganing mapagián an dinádaráng problema kan maski sarô sa saindong pag-iriba?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song