An Parabola kan Amang Maheherakon

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Marso 27 – Abril 2, 2022. Basahon an Evangelio gikan sa Lucas 15,1-3,11-32 (Ikaapat na Domingo nin Cuaresma - C)

…

An parabola sa evangelio aram niato bilang istorya kan prodigal son o aking masumbikal. Alagad pwedeng apodon man ining “Parabola kan Amang Maheherakon” nin huli ta an puso asin centro kan istorya iyo an ama kan duwang aking parehong may kakundian. Dangan nin huli ta gabos na parabola ni Jesus nagtutukdò kun ano an Kahadean, an ama sa istorya daing iba kundi an Dios Amang mamomòton asin maheherakon.

An Dios Ama mamomòton sa gabos Niyang mga aki. Sabi ni Jesus sa Mateo 5,45: “Parehong pinapasaldangan nin aldaw saka pinapauranan nin Dios an tawong marhay asin an maraot, an banal asin an parakasalà.” Kan nasa makuring pagtios asin gutom na an nguhod na aki narumdoman niya an pagkamarahayon kan saiyang ama, na sa saindang harong maski mga surogoon dai nagugutom. Nin huli kaini nagdesisyon siya na umulî na sa saindang haróng.

An Dios Ama maheherakon sa mga parakasalà. Kan natànaw kan ama an saiyang nguhod na aki na nagdadangadang sa harayô, tulos siyang duminalagan sa pagsabát kaini, kinugos, asin pinasùlot nin pinakamarhay na badò, singsing, asin sandalyas – mga tanda na binabalik niya an tinalikdan kaining dignidad nin pagigin saiyang aki. Sa Ezekiel 33,11 nasusurat: “Sabi kan Kagurangnan Dios na buhay, dai ako naoogma kun nagagadan an sarong parakasalà; kundi boot Kong mag-ontok siya sa pagkakasalà dangan mabuhay”.

Alagad ining parabola minasalming man sa satong mga gawè bilang mga aki kan satong Ama. Igwang apat na pag-uugali an pinapahiling kan magtugang sa parabola.

An satong pagigin masombikal. Kan hagadon kan nguhod na aki an saiyang kahirasan maski buhay pa an saiyang ama asin maglayas ini sa haróng, pinahilíng niya na mas mahalaga saiya an kayamanan kisa sa saiyang ama. Kita man nagigin masombikal sa Dios kun mas pinapaorog niato an an mga kinàbanon na kaogmahan asin kayamanan kisa sa Kagtao kaini sa satong buhay.

An satong paghagad-tawad. Kan ubos na an kayamanan patin an dignidad kan nguhod na aki, narumdoman niya an saiyang Amang mabooton asin nagdesisyon siyang mag-ulî, magpakumbabâ, asin maghagad nin tawad. Asin ano an saiyang nakua? Daing iba kundi an kapatawadan kan saiyang ama. Siring man kaiyan an satong Ama sa langit, pirming andam kitang patawadon kun kita magbaklè asin magbagong-buhay.

An satong pagkamaurí. Siring na nagluwás an pagkamaurí kan matuang aki kan nahiling niya an ginibong pag-akò kan saiyang ama sa tugang na masombikal, asin kan mga escribas asin Fariseos kan mahiling ninda si Jesus na nakikikakán asin nakikipag-ibahan sa mga parakasalà, kita man nagigin siring sainda kun kinukumpara ta an sadiring kamugtakan sa kapwa lalo na kun sa satóng paghonà bako man sinda siring an katanosan sa satò. O minsan sa satong pagkakasalà minagamit kita nin alibi na may mga mas orog pa nganì an kasâlan kisa sato.

An satong pagigin maimbod. An matuang aki sinasabing ladawan nin kaimbodan, alagad minsan siring kaipohan man giraray na siya magtalubò hale sa kaimbodan nin paggibo nin tamà asin paglikay sa salâ, pasiring sa kaimbodan nin hararom na pagkamoot sa Dios, hanggang sa pagigin siring sa pagkamaheherakon nin Dios. Sa Lucas 6,36, tinugon ni Jesus an Saiyang mga disipulos: “Magin maheherakon siring na an saindong Ama maheherakon”.

Sa hurí, winalat ni Jesus na open-ended an parabola. Dai ta aram kun inakò kan matuang aki an pakihuron kan saiyang ama, o kun dagos nang nagbàgong-buhay an nguhod na aki. Tibaad ginibo ini ni Jesus nin huli ta boot Niyang kita an magtapos kan istorya. Nin huli ta an istorya kan magtugang, istorya man niato gabos. Darhon lugód kita sa paghorop-horop niato sa buhay kaining magtugang pasiring sa paghingowa na kita magin siring sa satong Ama.

…

GIYA SA PAGHIRAS SA SADIT NA KOMUNIDAD O PAMILYA • Sa pa’nong paagi nakaomagid an satong buhay sa nguhod o matuang aki sa parabola? Sa pa’nong paagi man kita inaapod na magin siring sa Ama?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Magsolsol asin Magtubod sa Evangelio

 

Homilía Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Marso 20-26, 2022. Basahon an Evangelio gikan sa Lucas 13,1-9 (Ikatolong Domingo nin Cuaresma - C).

…

Sa evangelio, may maraot na bareta na pinaabot ki Jesus: may mga taga-Galilea na pinagadan si Poncio Pilato asin an mga dugo ninda sinalak sa atang na dolot sa Dios. Dai ta aram kun natà sinda ginaradan, alagad malinaw an ginibong injusticia asin sacrilegio ni Pilato. An simbag ni Jesus: kun dai kita magsolsol, kita man magagadan nin makuri.

An mensaheng ini tinao ni Jesus sa mga Judío na naghohonà na nin huli ta sinda an Piniling Banwaan – asin lalo na sa mga naghohonà na sinda matanos – ligtas na sinda sa paghukom. Nagdagdag pa Siya nin duwang istorya para pagdoonan ining mensahe: an aksidenteng pagkagadan nin 18 katawo na nabagsakan nin tore sa Siloe asin an parabola kan higera (balìgang an sinalidang poon nin kahoy sa pagbasa sa Misa sa Bikol ta daing higera sa Kabikolan) na dai nagbubunga.

An mensaheng ini para man sato sa ngonian na panahon. Nagpoon an Cuaresma kan nakaaging Miercoles de Ceniza sa paglaag nin abo sa satong payó, dangan sinabihan kita: “Magsolsol asin magtubod sa Evangelio.” An pagsolsol, iyo an paghagad nin tawad sa kasâlan asin pagpanugâ na mabàgo nin buhay. Natà ta kaipohan tang magsolsol?

An pagsolsol pag-ako kan katotoohan kan satong sadiri – na kita mga parakasalà. Kaya nganì ini an enot na kabtang sa Sacramento nin Reconciliacion. Dai ta pinapasa sa iba an responsibilidad nin kasâlan o kinukumpará sa iba an gabát kaini kundi inaako ta an satong sadiring pagkakasalà.

Kun dai kita magsolsol, madanay kita sa pagigin oripon nin kaputikan. Saro sa pinakadakulang kaolangan kan mga tawong nalulong sa fake news, idtong mga napanô an puso nin dagit sa kapwa nin huli ta naniwala sa fake news, iyo an pag-ako na sinda nasalà sa pigtubodan. Mantang dai ta naaako an saláng pagtubod asin gibo, padagos kitang oripon nin kaputikan. Kaya magsolsol nin huli ta sabi ni Jesus sa Juan 8,32, “an katotoohan an mapatalingkas saindo.”

An pagsolsol pagbukas sa pagkaherak nin Dios. Pag inako ta na kita parakasalà, mahihiling ta an mas dakulang katotoohan: na kita namòtan asin naherakan nin Dios. Sabi ni San Pablo sa Roma 5,8: “Pinahiling nin Dios an Saiyang dakulang pagkamoot sato kan si Jesus nagadán para sato kan kita mga parakasalà pa!”

Alagad guràno man kadakula o daing sukol an pagkaherak nin Dios, kun dai kita magsolsol, kita mismo an minasara sa satong puso sa pagkamoot nin Dios. Dangan an satong panahon may hangganan. Tibaad makaisip kitang magsolsol pag huri na – an luwas kaiyan pagbasol! Dai man lugod kita magin siring sa higera o balìgang na dai nagbubunga maski haloy nang inataman, ginudakán, asin inabonohan – kaya papaludón na.

An pagsolsol kaipohan sa pagpakarhay nin banwaan.  Kun kita magsolsol asin madadara ta an satong pamilya, barkada, asin iba pa, na magsolsol man asin magbàgong-buhay, maheherakan nin Dios an satong banwaan. Sa panahon nin eleksyon, bàgo kita maghagad nin mga kandidatong matanos, honesto, mahigos, asin matinabang, enoton ta ngùna an satong mga sadiri na magtalubò sa pagigin matanos, honesto, mahigos, asin matinabang man. Asin orog sa gabos, maki-Dios.

Sabi nin Dios sa 2 Mga Cronica 7,14: “Kun an Sakong banwaan magpakumbabà, mag-atubang Sako, mamìbì asin talikdan an saindang mga maraot na gibo, hale sa langit dadangogon Ko sinda, papatawadon an saindang kasâlan, asin papauswagón an saindang dagâ”.

…

GIYA SA PAGHIRAS SA SADIT NA KOMUNIDAD O PAMILYA • Maghiras nin experiencia nin pagsolsol o pagbàgo nin isip, gawè o ugalì, na inagihan mo sa saimong buhay.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Himatea Nindo Siya

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Marso 13-19, 2022. Basahon an Evangelio gikan sa Lucas 9,28b-36 (Ikaduwang Domingo nin Cuaresma - C)

…

An istorya sa evangelio iyo an Transfiguracion o an pagbàgong-anyo ni Jesu Cristo sa halangkaw na bukid kaiba an mga disipulos na si Pedro, Santiago, asin Juan.

Ano an kahulugan kaining Transfiguracion? Susog sa Catechism of the Catholic Church (568): “An Transfiguracion ni Cristo tuyong pakusogon an pagtubod kan mga apostoles sa nagdadangadang Niyang Pasion: an pagsakát sa halangkaw na bulod nag-aandam sa pagsakát sa Calvario. Si Cristo, an Payó kan Simbahan, pinapahiling kun ano an yaon sa Saiyang Hawak asin winawaras sa mga sacramento: an paglaom kan maabot na kamurawayan.”

An istorya kan Transfiguracion nasusurat sa mga evangelio ni Mateo, Marcos, asin Lucas. Sa version na ini ni San Lucas (9,31), si Moises asin Elías “nakipag-olay ki Jesus dapit kan Saiyang paghalè (exodo) na gigibohon Niya sa Jerusalem”.

Si Moises an tinàwan nin Dios kan katongdan na isurat asin itao sa banwaan nin Israel an Saiyang mga Tugon na yaon sa enot na limang libro kan biblia. Si Elías, saro sa pinakaimportanteng mga profetas sa kasaysayan kan Israel. An mga libro nin mga profetas nagtutukdò sa banwaan kan kabòtan nin Dios. Sa mga libro nin mga Tugon asin mga Profetas, may mga profesía kan maabot na Mesías na ipapadara nin Dios. An kahulugan kan mamuraway na presencia kaining duwang persona, iyo na si Jesu Cristo an kapanoan kan mga Tugon asin mga Profetas, asin Siya mismo an Mesías na pinadara nin Dios.

Alagad an central na mensahe kaining pangyayari sinabi mismo kan Dios Ama: “Ini an Sakuyang Aki, an Sakuyang  Pinili; HIMATEA NINDO SIYA” (Lucas  9,35).

Pàno niatò maninigong himateon si Jesu Cristo? Enot linawon ta na iba an paghimatè sa pagdangog. An pagdangog iyo an gamit kan satong talinga sa pagsagap nin manlaen-laen na tanog asin tingog sa palibot. Alagad an paghimatè iyo an pagtutok asin pagsabot sa nadadangog  nin huli ta interesado kita sa mensahe.

Tàwan ta nin magkakanigong panahon asin atencion si Jesu Cristo, lalo na ngonian na panahon nin Cuaresma, sa silencio asin pangadie, sa pagbasa asin pag-adal kan biblia asin mga katukdoan kan Simbahan, sa pagdulok Saiya sa mga sacramento nin kumpisal asin Santa Misa. Sabi sa Hebreo 3,15, “Kun ngonian madangog nindo an Saiyang tingog, hare pagpatagasá an saindong puso”.

Mahihimatè man niatò si Cristo sa satuyang kapwa, lalo na sa mga dukha. Sabi Niya sa Mateo 25,40, “Ano man na ginibo nindo sa mga pinakasaradit kaining sakong mga tugang, ginibo man nindo Sako.” An paghimatè ki Cristo sa kapwa, minadagos sa pagkamoot sa mas dakulang sociedad o banwaan, asin sa pagsimbag sa agrangay kan kapalibotan. Sabi nganì ni Papa Francisco sa saiyang surat na Laudato’ Si (49), maghimaté kita “sa agrangay kan kinàban asin agrangay kan mga dukha”.

Ano an makukua ta sa paghimatè ki Cristo? Sa Juan 6,68, sinabi ni Pedro, “Kagurangnan, sa kiisay pa kami maduman? Yaon sa Saimo an mga tataramon nin buhay na daing kasagkoran.” An pagdanay sa kaibahan ni Cristo iyo an paglakbay kaiba Niya sa dalan nin cruz, kaiba na an pagsakit sa Saiyang Ngaran kun kinakaipohan. Sa mga maimbod sa dalan na ini, sabi ni San Pablo sa Filipos 3,20-21;4,1: “Langit an satong banwaan, asin hale sa langit madatong an Paratubos na satong hinahalat, si Jesu Cristong Kagurangnan. Siya an maliwat kaining satong makaherak-herak na hawak, gigibohon Niyang mamurawayon arog kan Saiyang hawak. Kaya mga tugang, magsarig kamo sa Kagurangnan!”

…

GIYA SA PAGHIRAS SA SADIT NA KOMUNIDAD O PAMILYA • Maghiras kun ano an saimong ginigibo tanganing himateon si Cristo sa saimong buhay. Igwa man Siyang mensahe na pinasabóng na saimo?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An mga Tentacion sa Misyon

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Marso 6-12, 2022. Basahon an Evangelio gikan sa Lucas 4,1-13 (Enot na Domingo nin Cuaresma - C).

…                                                                       

An istorya sa evangelio iyo an pagsugót ki Jesus kan demonio. Masasabing an gabos na tentacion, panlalansé o kaputikan. Asin an demonio an pangenot na paralansé. Ano man an boot niyang lansehón ki Jesus? Boot kan demonio na raoton asin talikdan ni Jesus an Saiyang misyon. Ining tolóng tentacion pwedeng mahiling na tumang sa tolóng misyon ni Jesus: an Saiyang pagigin Hadè, Padì, asin Profeta. Ining tolóng misyon ni Cristo ihiniras sato kan kita nag-ako kan bonyag.

Enot na tentacion: gibohon na tinapay an mga gapo. Boot kan demonio na gamiton ni Jesus an Saiyang kapangyarihan tanganing tulos mahalè an Saiyang gutom, dangan na kun gibohon man Niya ini sa katawohan, madali sindang masurunod Saiya. Alagad bakô siring kaini an misyon nin pagkahadè ni Jesus. Siya hadè na maglilingkod, asin boot Niyang arogon ini kan Saiyang mga disipulos.  Sa Lucas 22,26, tinukdô Niya: “an boot mamayó dapat na magin siring sa naglilingkod”. Dangan an boot Niyang itao sa kinàban bakô saná tinapay na pag kinaon nakakabasog alagad magugutom man giraray, kundi an Saiyang sadiri mismo bilang Tinapay nin Buhay na daing kasagkoran.

Sa pagsabuhay niato kan misyon nin pagkahadè, maglikay kita sa tentacion nin kahugakan, na dai kita maglingkod sa kapwa o komunidad kundi magin makasadiri. Maglikay man sa tentacion nin pag-abuso sa kapangyarihan kun magkapót nin katongdan. Ngonian na eleksyon, midbidon ta an mga kurakot asin mahàbas, asin mag-ingat na dai magin kasabwat ninda, lalo na sa barakalan nin boto.

Ikaduwang tentacion: magsamba sa demonio katukal kan mga kahadean nin kinàban. Sabi sa 1 Timoteo 2,5, si Jesu Cristo an “tagapagultanan nin Dios asin tawo”. Kun si Jesus magsamba sa demonio, bakô na Siya an Halangkaw na Padì na tagapagultanan ta sa Ama. Kaya maninigo sanáng sawayón ni Jesus an demonio kan enot sa Sampulong Tugon: “Sambahon mo an Kagurangnan mong Dios, asin Siya saná an saimong paglilingkodan”.

Sa pagsabuhay niato kan misyon nin pagkapadì, maglikay kita sa tentacion na dai magtaó nin maninigong panahon sa pagpangadiè sa Dios. Ta kun kita nganì dai nin panahon sa Dios, pàno ta pa madadara an kapwa pasiring Saiya. Maglikay man na dai magsamba sa mga dios-diosan sa ngonian na panahon – kapangyarihan, kayamanan, kasikatan, kaogmahan sa laman, asin iba pa. Sabi sa Marcos 8,36: “Daing saysay sa tawo na makua an kinàban, asin mawarâ man an saiyang kalag.”

Ikatolong tentacion: maglukso hale sa tuktok kan Templo. Sasaluhon man saná daa Siya kan mga angeles. Kun gibohon ini ni Jesus, magigin Siyang sarong ngangalasan asin dakul an pwedeng magtubod na sinugo Siya kan Dios. Alagad bakô sa siring na paagi gigobohon ni Jesus an Saiyang pagkaprofeta. Matubod Saiya an bilog na kinàban bakô nin huli ta sinaralo Siya nin mga angeles kundi na initaas Siya sa cruz sa saro asin solamenteng sacrificio na magdadara nin kaligtasan sa gabos.

Sa pagsabuhay niato kan misyon nin pagkaprofeta, maglikay kita sa tentacion na matakot na mag-sacrificio para sa katotoohan asin katanosan ta tibaad pag-ulokan, iwalon, o isikwal. Maglikay man sa tentacion na paorogon an kapaabaw-abawan asin pagpasikat kan sadiri kisa pagsunod sa kabòtan nin Dios asin pagpamuraway Saiya.

An panggana ni Jesus sa mga tentacion kan demonio dai nangangahulugan na kaya ta man lampasan an tentacion sa sadiri niatong kusog asin kakayahan. Kundi na kaipuhan ta si Cristo sa hampang kan kadakul na sugót sa satong buhay, nin huli ta sabi nganì sa Filipos 4,13: “An gabos magigibo ko huli ki Cristo na nagpapakusog sako”.

…

GIYA SA PAGHIRAS SA SADIT NA KOMUNIDAD O PAMILYA • Maghiras nin experiencia nin sarong tentacion na inagihan mo sa buhay, asin kun pàno mo namatean an pagkaherak nin Dios.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An mga Katotoohan kan Kahadean

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Pebrero 27-Marso 5, 2022. Basahon an Evangelio gikan sa Lucas 6,39-45 (Ikawalong Domingo sa Ordinariong Panahon - C).

…

An evangelio pagpadagos kan mga katukdoan ni Jesu Cristo sa Saiyang “Sermon sa Patag” sa Lucas 6, na pingakuahan kan mga babasahon sa nakaaging duwang Domingo. Nagpoon ini sa kun siisay an mga paladan sa mata nin Dios (beatitudes), dangan sinundan kan kasugoan na kamòtan an kaiwal. Ngonian naman may nagkapirang mga kasabihan na nagtutukdò nin mga katotoohan kan Kahadean.

Si Jesu Cristo an katotoohan. Sa Juan 14,6, sinabi Niya: “Ako an dalan, an katotoohan, asin an buhay”. Kun bako Siya an satong giya sa buhay, garo kita nagsusunod sa butá na dai aram an tamang dalan. Kun talikdan ta an Saiyang kabòtan, garo kita mga estudyante na sa kadikit na kaaraman naghohonà na mas tataó na kisa saindang paratukdò, kaya dai minatalubò sa pakasabot.

Sa Lucas 11,23 sinabi pa Niya: “An dai Sako nagtitipon, nawawarak”, napapadumán sa mga saláng dalan. Kun bako si Cristo an pigsusundan niato, ibang tawo o bagay an pinipili niatong mag-influencia sato. Kun bako kita disipulos ni Cristo na katotoohan, tibaad magin kitang kampon nin parabsawag nin kaputikan.

Magpakatotoo kita sa satong sadiri. Mahalaga sa Kahadean an pag-ako kan katotoohan kan satong sadiri. Sabi sa 1 Juan 1,8-9: “Kun magsabi kita na mayò kitang kasâlan, dinadayà ta an sadiri ta, asin mayò sato an katotoohan. Alagad kun ikumpisal ta sa Dios an satong mga kasâlan, lilinigan Niya kita saka papatawadon; lilinigan kita kan gabos tang kasâlan.”

Alagad kun enoton ta an paghusga sa kapwa, si Cristo mismo an nagsasabi sato: “Halea ngùna an pasagi sa saimong mata, dangan makakahiling ka nin malinaw asin mahahale mo an mutà sa mata nin saimong tugang.” Sa panahon nin eleksyon kun naghahanap kita nin kandidatong matanos, bakong parautik, asin bakong mahàbás, dapat siguradohon ta na kita nguna matanos man, bakong parautik, asin bakong mahàbás. An mga kandidatong pinipili ta minapahiling kan mga pinapahalagahan ta sa buhay.

An katotoohan nin puso nahihiling sa tataramon asin gibo. Sabi ni Jesus sa Lucas 6,45: “Kun ano an nasa puso, minaluwas sa ngusò”. Kun an nagluluwas sa satong ngusò nagdadara nin karahayan sa kapwa, an Kahadean nasa satong puso. Kun kita paramudá, parautik, asin paragibo nin pagkabarangâ, karâtan an nasa laog kan satong puso. Sabi sa Sirach 27,6: “Mamimidbid kun pano inaataman an sarong kahoy nin huli sa mga bunga kaiyan, asin maaaraman an namamatean kan puso nin sarong tawo huli sa saiyang pagtaram.”

Ngonian na panahon nin eleksyon, marhay ining magin patugmadan sa pagpili nin mga kandidato. An responsableng botante minimidbid an mga kandidato susog sa saindang mga naginibohan o track record, mga posisyon sa mga isyu, asin plataforma de gobierno. Alagad maski an mga totoong gibo asin tataramon nababaliktad na ngonian nin huli sa maati na propaganda asin paggamit nin mga online trolls asin fake news.

Kaya nangapodan an mga obispo sa Pilipinas sa banwaan na “manindogan para sa katotoohan”. Sa saindang pinakahuring surat pastoral sinabi ninda: “Magkakambal an katotoohan asin katalingkasan (Juan 8,32). Kun basang-basangon ta an katotoohan, binabasang-basang ta man an katalingkasan. An pagbale-wala kan katotoohan pagbale-wala man kan katongdan na manimbagan (accountability). Madadaog ta daw an corruption kun mayo nin katotoohan?”

…

GIYA SA PAGHIRAS SA SADIT NA KOMUNIDAD O PAMILYA • Maghiras nin experiencia kun pano nagin totoo sa satong buhayan an arin man sa mga kasabihan na naonambitan sa evangelio.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Kamòtan Mo an Saimong Kaiwal

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Pebrero 20-26, 2022. Basahon an Evangelio gikan sa Lucas 6,27-38 (Ikapitong Domingo sa Ordinariong Panahon - C).

…

Ining evangelio saro sa mga pinakadipisil na tugon ni Jesu Cristo: kamôtan ta an satong kaiwal. Alagad hararom ini sa kadunongan asin napapanahon pa nganì ngonian sa satong banwaan na kadakul an nag-iiriwal nin huli sa pulitika kan eleksyon. Natà ta hinahagad ini sato kan Kagurangnan? Nin huli ta lambang Cristiano inaapod sa mas halangkaw pang nivel nin pagkamoot.

An pagkamoot sa kaiwal pagigin mas marhay na tawo. May istorya sa 1 Samuel 26 na sa pagkaurí ni Hadeng Saul ki David pigtugis niya ini tanganing gadanon – kaiba an tolong ribong soldados! Alagad pagkabanggi, mantang tururog an gabos, nakalaog si David sa saindang campo asin nagkaigwang oportunidad na gadanon si Hadeng Saul. An kaibahan ni David, nagtentar man saiya na gadanon an hade. Alagad dai ini ginibo ni David kundi kinua na sana an espada kan hade asin ginibong resibo kan pagpili niya na dai gadanon an “linahidan nin Kagurangnan”. Nasupog si Hadeng Saul asin naghagad nin tawad ki David. Dakul pa an nangyari kasunod alagad sa huri nagin hade si David, an pinakadakula sa gabos na hade kan Israel.

Sabi ni Cristo sa Lucas 6,33: “Kun kamo magbalós nin karahayan sa mga naggibo nin karahayan saindo, anong halaga kaiyan para saindo? An mga parakasalà naggigibo man kaiyan.” Ining pagpili kan dalan nin pagigin mas marhay na tawo asin active non-violence, napatunayan sa adal nin kasaysayan na mabisang paagi tanganing makamtan an pigmamawot na pagbabàgo. Nagkapirang halimbawa iyo an ginibo ni Mahatma Gandhi sa India, ni Nelson Mandela sa South Africa, asin kan satong banwaan sa matoninong na rebolusyon sa EDSA kan 1986 na nagtapos sa makuring diktadurya kan mga Marcos.

An pagkamoot sa kaiwal paghiras kan pagkaherak nin Dios. Sa Lucas 11,4, si Jesus nagtukdo na hagadon sa satong Ama na kita patawadon siring sa pagpatawad niato sa mga nagkasalà satuya. Sa Roma 5,8, sinabi ni San Pablo, “Ipinahiling nin Dios an Saiyang dakulang pagkamoot sato kan si Jesus nagadan para sato kan kita mga parakasalà pa”. Kaya kun kita magpatawad sa tawong nagkasalà sato, bako ini nin huli ta maninigo siyang patawadon – lalo na kun habô man maghagad nin tawad – kundi nin huli ta kita naenot nang naherakan asin pinatawad nin Dios.

Kaya nganì an pagkamoot sa kaiwal asin pagpatawad sa nagkasalà bako kontra sa pagmàwot na makamtan an justicia asin mahusay an daños na dará nin kasâlan, kundi linilinig kaini an isip tanganing justicia, bako venganza, an magin tunay na kamàwotan, asin binubuksan an puso sa pagbulong asin pagpakarhay kan mga naraot. Siring man an paglaban sa kaputikan sa paagi nin katotoohan, mas dinadangog kun pinapahayag na may pagkamoot.

An pagkamoot sa kaiwal pagigin siring ki Cristo. Sa Lucas 23,43, mantang naghihingagdan sa cruz, an hagad ni Jesus sa mga nagpapasakit Saiya: “Ama patawada sinda ta dai ninda aram an saindang ginigibo”. Para ki Cristo talagang radical an pagkamoot. Bilang mga disipulos Niya, inaapod man kita na mamoot nin siring. Nasasangkoban kaini an balanseng pagkamoot sa sadiri; an maigot na pagkamoot sa pamilya asin mga kaugós; an dakulang pagkamoot sa banwaan, orog na sa mga dukha, asin sa kapalibotan; asin an kaipohan na pagkamoot sa kaiwal.

Nin huli ta sa pagkamoot niato sa kaiwal, nakakalaog kita sa misterio kan pagkaherak kan Ama na “marahayon sa mga ingrato asin mga maraot” asin ni Cristo na napadigdi para sa mga parakasalà tanganing darhon sa pagbaklî sa saindang kasâlan. Sa pagtalubò ta sa pagkaherak masasabotan niato an kahulugan nin pagigin Cristiano: na magin kabaing ni Cristo. 

…

GIYA SA PAGHIRAS SA SADIT NA KOMUNIDAD O PAMILYA • Maghiras nin experiencia kan kita nagkaigwa nin kaiwal o may nakagibo nin maraot sa sato, asin kun ano an satong nagin simbag sa pagtubod.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Bendición asin Maldición

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Pebrero 13-19, 2022. Basahon an Evangelio gikan sa Lucas 6,17,20-26 (Ikaanom na Domingo sa Ordinariong Panahon-  C).

…

Sa evangelio susog ki San Lucas tinutukdô ni Jesu Cristo an mga kapaladan o beatitudes. May nagkapirang pagkakaiba ini sa versión ni San Mateo. Imbes na walong paladan o bendición, apat sana an ki San Lucas na pigsusundan nin apat na kaheherakan o maldición; asin imbes na sa bulod (Sermon on the Mount), sa patag na lugar nagsermon si Jesus.

Ining sermon ni Jesus arog sa mga paghulit nin mga profetas sa Lumang Tipan. Sa Jeremias 17,5-8, nasusurat na maldición an makukua kan tawong “nagsasarig sa tawo, naglalaom sa mga bagay nin laman, na an puso talikod sa Kagurangnan”, alagad bendición para sa tawong “nagsasarig sa Kagurangnan, na an paglaom yaon sa Saiya”. Sarô-saroon ta ining mga bendición asin maldición.

Paladan an mga dukha, an mga nasa laylayan asin daing boses sa kinâban – sa sainda an Kahadean nin Dios. Ano an Kahadean nin Dios? Ini an kabilogan kan gracia asin buhay na boot itao nin Dios sa gabos na nagtutubod Saiya asin nag-ootob kan Saiyang kabôtan.

Paladan an mga nagugutom, an mga nawàran nin trabaho asin hanapbuhay nin huli kan pandemia asin an iba nin huli kan pang-aapi nin kapwa – sinda pakababasogon. Si Cristo nagtugon na kita mangadie sa Dios Ama asin hagadon na “an satong kakanon sa aroaldaw itao satuya ngonian”. Ini man panugâ na dai kita papabayaan nin satong Amang maheherakon.

Paladan an mga nagtatangis, an mga nawàran nin mahal sa buhay o nagsasakit nin huli sa injusticia – an Dios mismo an saindang karangahan asin parasurog.

Paladan an mga kinakaongisan asin pinapakaraot nin huli sa Aki nin Tawo; tanda bako nin kasusupgan kundi kaogmahan an saindang pakisumaro ki Cristo na nagtios man nin pagsakit asin kagadanan sa kamót nin mga maraot. Asin dakulà an saindang balós sa langit.

Herak man sa mga mayaman na an kaogmahan yaon sa mga kinâbanon na bagay asin nakacentro an buhay sa pagpadakul nin yaman. Sabi sa Mateo 19,24: “Mas facil pa sa kamelyo na makaagi sa mata nin dagom kisa sa mayaman na makalaog sa Kahadean nin Dios.”

Herak man sa mga basóg ngonian mantang sa palibot ninda dakul an nagugutom asin nagtitios – siring sa parabola kan lalaking mayaman asin si Lazaro, huhukuman sinda kan saindang daing pakiaram sa kapwa. Sa Mateo 25,45, si Jesus nagsabi: “Ano man na dai nindo ginibo sa pinakasadit kaining mga tugang Ko, iyo man an dai nindo ginibo sa Sako.”

Herak man sa mga nag-oogma lalo na idtong mga nanlamang sa kapwa asin nabubuhay sa hinâbasan – an agrangay kan saindang mga inapí nakakaabot sa Dios.

Herak man sa mga pig-oomaw nin kadaklan nin huli kan saindang kapangyarihan, kayamanan, asin kasikatan, asin dinadara an banwaan sa mga saláng dalan – tinatalikdan ninda an pagigin mga aki nin Dios tanganing magin kampon nin paralansé nin tawo.

Linawon ta na bako ini katukdoan na kasâlan an paghingowa na magyaman o magginhawa an buhay, o na bako marhay an magkapót nin kapangyarihan, o na dai dapat kita mag-ogma – kundi kun ano asin siisay an mga paladan sa mata nin Dios. Ano man an satong sitwasyon – kayamanan o kadaihan, kabasogan o kagutuman, kaogmahan o kamundoan, kaomawan o kasusupgan – dai ta talikdan an Kagurangnan. Sabi nganì ni San Pablo sa Roma 8,17: “Kun kita nakihiras ki Cristo sa kasakitan, kita man makakahiras sa Saiyang kamurawayan”.

…

GIYA SA PAGHIRAS SA SADIT NA KOMUNIDAD O PAMILYA • Ngonian na panahon nin eleksyon, arin an bendición asin arin an maldición sa mga track records asin mga posisyon sa mga isyu nin mga kandidato?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Inaapod Kita ni Jesus na Magin Disipulos Niya

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Febrero 6-12, 2022. Basahon an Evangelio gikan sa Lucas 5,1-11 (Ikalimang Domingo sa Ordinariong Panahon).

…

An istorya sa evangelio iyo an pag-apod ni Jesus sa mga enot na disipulos. An istoryang ini yaon sa mga evangelio ni Mateo, Marcos, asin Lucas. Sa version na ini ni San Lucas dai naonabehan si Andres. Sa evangelio ni San Juan, si Juan Bautista an nagturo sa mga disipulos niya ki Jesus bilang “Cordero nin Dios”, dangan si Andres an nagpamidbid ki Jesus sa saiyang tugang na si Pedro.

An pag-apod sa mga enot na disipulos tanda na importanteng parte kan plano nin Dios sa kaligtasan nin katawohan an pagmukna kan komunidad nin mga disipulos ni Cristo. Pinapahayag man kan istoryang ini an duwang kabtang kan misteryo nin pagtubod: na ini gibo nin Dios asin simbag nin tawo.

Gibo nin Dios. An pagtubod bako siring sa paglukso sa diklom, kundi an Dios mismo an enot na nagtataong prueba kan Saiyang pagkamarahayon asin pagkamoot.  Alagad ano man na biyaya asin karahayan na tinatao Niya, patanâ sana sa mas darakula pang biyaya na maabot asin boot Niyang itao satuya.  Kaya inaapod Niya kita sa mas hararom na pakisumaro Saiya asin paghiras sa misyon nin pagbalangibog kan Marhay na Bareta.

Ini an nangyari kan inapod ni Jesus an Saiyang mga enot na disipulos. Pagkatapos na magdangog sinda kan pagtukdo ni Jesus sa katawohan, dai ninda honaon na gigibohon para sainda an milagro nin dakulang dakop nin mga sirâ. Alagad dakul asin mas darakula pang milagro an masasaksihan ninda kan pinili nindang bayaan an gabos asin magsunod ki Jesus.

Simbag nin Tawo. Ano man an maninigong simbag niato sa biyaya nin pagtubod? An mga enot na disipulos nagtaong halimbawa nin tamang pagsimbag sa Dios.

Magsarig sa Dios. Si Jesus an may kagibohan kan milagro nin dakulang dakop nin mga sirâ, alagad ini nangyari nin huli kan pagsarig Saiya ni Simon Pedro. Sabi niya: “Maestro, nagdamlag kaming daing nadakop, alagad sa tataramon Mo, itutunton ko an hikot.”

Sabi sa Jeremias 17,7-8, “Paladan an tawo na nagsasarig sa Kagurangnan, arog siya sa kahoy na nagtatalubo harani sa sapà, na an mga gamot pasiring sa tubig”. Paladan kita kun nahihiling niato an mga gibong herak asin pagkamoot nin Dios sa satong buhay. Alagad an tawo na dai tatao magsarig sa Dios, asin linilingawan an Saiyang kabotan sa pagsunod sa tentacion nin hidaling kaogmahan, rinarayo an sadiri sa burabod nin biyaya.

Magpakumbaba. Kan masaksihan ni Simon Pedro an milagro, tulos siya nagsabi: “Rumayô ka sako, Kagurangnan; ta ako sarong parakasala”. Bako na sinisikwal niya si Jesus, kundi nahiling niya an saiyang bakong pagkamaninigo sa Saiyang hampang.

An Dios naoogma sa mapakumbaba, alagad sa mapaabaw-abaw, sinabi ni Jesus sa Lucas 5,32: “Dai Ako napadigdi sa pag-apod kan mga matanos kundi kan mga parakasalà tanganing magsolsol”. An mga matanos sa sadiring paghonà, sarado an puso, kaya dai makakamtan an pagkaherak nin Dios.

Magmisyon. Sa pag-apod ni Jesus ki Simon sinabi Niya: “Dai ka matakot, poon ngonian mga tawo na an saimong pagdadakopon”. Asin bago siya suminakat sa langit sa Mateo 28,19-20, sinugo Niya an Saiyang mga disipulos sa parehong misyon: “Paduman kamo sa gabos na banwaan, gibohon nindo sindang mga disipulos ko.”

An katuyohan kan satong pagigin disipulo ni Cristo iyo an pakisumaro niato Saiya asin paghiras kan biyaya na tinao Niya sato. Ini an Marhay na Bareta na pinapabalangibog sato tanganing dakul pa an magtubod Saiya asin mag-ako kan kapanoan nin buhay sa Saiyang Kahadean.

...

GIYA SA PAGHIRAS SA SADIT NA KOMUNIDAD O PAMILYA • Maghiras nin experiencia nin pagkamarahayon nin Dios asin kun saen Niya kita inaapod na magmisyon.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Orog sa Gabos an Pagkamoot

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Enero 30-Febrero 5, 2022. Basahon an Evangelio gikan sa Lucas 4,21-30 (Ikaapat na Domingo sa Ordinariong Panahon).

…

An istorya sa evangelio pagdapadagos kan pagbasa kan nakaaging Domingo. Matapos na basahon ni Jesus an profesía sa Isaias 61, nahampang si Jesus sa dagit kan Saiyang mga kahimanwa sa Nazaret. Pinaluwas Siya ninda sa sinagoga asin diit pang gadanon. An rason: nin huli ta dai ninda nagustuhan an Saiyang katukdoan na an dakulang biyaya asin kaligtasan nin Dios nautob na sa saindang hampangan asin ini bako sana para sainda kundi para sa gabos, maski sa saindang mga kaiwal. Dai maako kan mga kahimanwa ni Jesus na bako sana sinda an especial sa mata nin Dios. Dangan siisay man Siya na magsabi kaini sainda, Siya na midbid nindang aki sana nin karpintero na nagdakula sa kaibahan ninda.

Pinapahiling kan istorya an pagkakaiba kan plano nin Dios asin kaisipan nin tawo. Sa Isaias 55,8, sinabi kan Kagurangnan: “An sakong kaisipan bako siring sa saindong kaisipan, asin an saindong mga paagi bako siring sa Sakong mga paagi”.

May kasugpon pa na verso an profesía sa Isaias 61,2, alagad ini dai na binasa ni Jesus: “an pagpahayag kan aldaw nin kapangganahan laban sa mga kaiwal, asin pagranga sa nagmumundong Israel”. Ini tanganing ipasabot na an gracia asin pagsurog nin Dios bako exclusivo sana sa banwaan kan Israel. Ano an plano nin Dios? Si San Pablo nagtukdo sa 1 Timoteo 2,4 na an Dios “boot na an gabos na tawo makaligtas asin maaraman an katotoohan”.

Pigduonan pa ni Jesus ining mensahe nin kaligtasan para sa gabos kan tinao Niyang halimbawa an mga tinabangan kan duwang dakulang profeta kan Israel. Si Elias tinabangan an sarong babaeng balo na bako Israelita kundi taga-Sarepta harani sa Sidon. Si Eliseo binulong an daoton na si Naaman, sarong heneral kan Siria na kaiwal kan Israel.

An mga kahimanwa ni Jesus sa Nazaret representante kan bilog na katawohan. Asin kun kita maghonà na bako kita siring sainda, magluway asin maghiling kan nangyayari sa satong kapalibotan.

Bakong danay pa man giraray na yaon an mga hayakpit an kaisipan? Hilnga an mga madaling napapatubod sa fake news asin conspiracy theories, asin an mga sarado na an kaisipan maski pirang facts o katotoohan pa an ihampang sainda. Dangan sa kadakul, an tama nagin salâ, asin an salâ nagin tama.

Bakong danay pa man giraray an may mga pusong makasadiri? Kan dakulon an piggagaradan sa giyera sa droga, dakul an dai naggirom o nag-uyon pa ngani, nin huli ta napatubod na itong mga ginaradan peligro sa buhay kan saindang pamilya. Sa nagdadangadang na eleksyon, dakul pa man giraray an nagsasabing bobotohan ninda su matao sainda nin kwarta o pabor, kaya dai na sinda mahingowang midbidon pa kun siisay talaga an maglilingkod nin tama sa banwaan.

Sa huri, pagkamoot an mangongorog sa gabos. Dai nalawos an planong paggadan ki Jesus nin huli ta Siya “naglakaw sa tahaw ninda asin naghale”. Sa Griego, “dielthon” an tataramon na ginamit na an boot sabihon, pag-agi o paglampas. Linampasan ni Jesus an saindang marumpot na puso asin hayakpit na kaisipan sa kapangyarihan kan Saiyang pagkamoot.

Ini an boot Niyang ihiras sa Saiyang mga kahimanwa kaidto asin sa bilog na katawohan sa gabos na panahon: na an kaisipan nin tawo magigin siring sana sa kaisipan nin Dios kun ini may pagkamoot. Sa 1 Corinto 13,13, sinabi ni San Pablo: “Ining tolo nagdadanay sagkod pa man: pagtubod, paglaom, asin pagkamoot. An pinakaorog sainda iyo an pagkamoot.”

…

GIYA SA PAGHIRAS SA SADIT NA KOMUNIDAD O PAMILYA • Maghiras nin experiencia kun pa’no kita nagin hayakpit man an kaisipan o makasadiri an puso, asin kun pano kita nadara sa pagkamoot asin katotoohan.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

An Tataramon nin Kagurangnan

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Enero 23-29, 2022. Basahon an Evangelio gikan sa Lucas 1,1-4;4,14-21  (Ikatolong Domingo sa Ordinariong Panahon).

…

An babasahon sa evangelio igwa nin duwang kabtang. An enot iyo an pagpapahayag kan katuyohan kan pagsurat kan Evangelio ni San Lucas: na ini para ki Teofilo “tanganing maaraman an bilog na katotoohan dapit sa gabos na tinukdô”. Si Teofilo, pwede nganing bakong sarong tawo kundi an kabilogan kan mga nagtutubod, nin huli ta an kahulugan kan Griegong ngaran na Theophilos, “namomotan nin Dios”. An ikaduwang kabtang iyo an pagbasa ni Jesu Cristo kan Kasuratan, particular an profesía sa Isaias 61,1-2, sa sinogoga sa Nazaret. Asin an saiyang mga kahimanwa na nakasaksi kaidto nagngaralas, lalo na kan sinabi Niya na “Ngonian nautob ining kasuratan na nadangog nindong binasa”.

Sa Nehemias 8, may nakaomagid na istorya nin kahalagahan kan tataramon nin Dios. Ini nangyari kan panahon na minabaralik pa sana an mga natadà sa banwaan Israel hale sa 70 taon na destierro (exile) ninda sa Babilonia. Tinipon an gabos na mga adulto patin an mga aking may pakasabot na sa plaza asin binasa sainda ni Esdras na escriba an mga Libro nin Tugon (an enot na limang libro sa Biblia), poon pagkaaga hanggang pagkaodto. Gabos nagtatangis mantang binabasa sainda an Kasuratan, kaya nagtaram pareho si Nehemias asin Esdras na dai sinda magtangis kundi mag-ogma nin huli ta “An aldaw na ini banal para sa Kagurangnan”.

Ano an kahalagahan kan tataramon nin Dios sa buhay niatong mga tawo?

An tataramon nin Dios biyaya kan Ama. Tinao nin Dios an tataramon sa Saiyang banwaan tanganing matawan sinda nin giya kun pàno magin Saiyang banwaan. Sa Psalmo 19,8-9 sinabi: “An tugon nin Kagurangnan dalisay, nagtataong buhay sa kalag; an tugon nin Kagurangnan masasarigan, nagtataong dunong sa mga mapakumbaba. An pagboot nin Kagurangnan matanos, nagtataong kaogmahan sa puso; an pagboot nin Kagurangnan malinaw, nagtataong liwanag sa mga mata”.

Sa Banal na Misa pakatapos kan Enot asin Ikaduwang Pagbasa, an satong simbag: “Salamat sa Dios.” Magpasalamat kita sa Ama sa paagi nin pag-ako asin pagbasa kan Saiyang tataramon sa Biblia.

An tataramon nin Dios sinurat sa kapangyarihan kan Espiritu Santo. Sabi ni San Pablo sa 2 Timoteo 3,16: “An gabos na Kasuratan pinasabóng nin Dios; magagamit iyan sa pagtukdô kan katotoohan, pagtuyaw kan salâ, pagtanos nin ugali, saka pagtukdô nin matanos na pamumuhay.” An Espiritu Santo an naggiya sa mga tawong nagsurat kan mga libro sa Kasuratan. An mga profeta sa Lumang Tipan, tanganing ipaaram na an saindang mensahe bako sadiri ninda kundi hale mismo sa Kagurangnan, minakurahaw nin “dabar Yahweh!”, an tataramon ni Yahweh! Kan binibilog an Bagong Tipan, an pagpili kan mga pamayo kan Simbahan kun arin sa mga literatura kaidtong panahon an tunay na pinasabóng nin Dios asin arin an nagtutukdô nin salâ, ginibo man sa irarom kan Espiritu.

Kaya hingowahon ta na adalan asin pararomon pa an satong pakasabot sa tataramon nin Dios sa giya kan mga katukdoan kan satong Simbahan asin kan Espiritu Santo, na pinanuga ni Jesu Cristo sa Juan 16,13, “na magiya sa gabos na katotoohan”.

An tataramon nin Dios iyo si Jesu Cristo. Siya an kautoban kan mga profesía asin kapanoan kan mga tugon. Sabi sa Juan 1,1: “Sa kapinònan an tataramon; asin an tataramon kaiba nin Dios; asin an tataramon, Dios.” Siya an tataramon na nanitawo na nag-aagda sato sa mas hararom na pakipagrelasyon sa Saiya asin pagsabuhay kan Saiyang tataramon. Sa mga panahon na makusog an tentacion asin dificil an pagsunod sa Saiyang tugon, marumdoman ta man lugod an mga tataramon ni San Pedro sa Juan 6,68:  “Sa kiisay pa kami maduman, Kagurangnan? Yaon sa saimo an mga tataramon nin buhay na daing kasagkoran.”

…

GIYA SA PAGHIRAS SA SADIT NA KOMUNIDAD O PAMILYA • Maghiras kan saimong paboritong verso o istorya sa Biblia. Ano man an kabtang sa Biblia na dificil para saimong saboton o gibohon?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Magtalubo Kita sa Pagtubod kaiba si Santo Niño

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Enero 16-22, 2022. Basahon an Evangelio gikan sa Lucas 2,41-52 (Fiesta kan Santo Niño).

…

Sa evangelio, an mga tataramon kan doce años na si Jesus, pinagngalasan kan mga maestro sa Templo sa Jerusalem asin rinimpos sa puso kan Saiyang Ina. Siring man kaini an imbitasyon kan Fiesta kan Santo Niño: na rimposon ta sa puso an kahulugan kaining debosyon.

An debosyon ki Santo Niño nagpapagirumdom kan ginikanan kan satong pagtubod. An imahen kan Santo Niño an saro sa duwang pinakaenot na Cristianong simbolo na nakaabot sa Pilipinas. An saro iyo an cruz na tinogdok ni Fernando Magallanes (Magellan) sa Cebu. Sarong imahen kan Santo Niño an pigregalo ni Magellan ki Hara Amihan kan ini asin an saiyang agom na hade kan Cebu na si Rajah Homabon, asin kadakul nindang pag-iriba, nagpabonyag bilang mga Cristiano kan taon 1521.

Kan si Magellan magadan sa Mactan, nagharale an mga Kastila. Nakabalik sana sinda kan taon 1565, sa expedicion na pinamayohan ni Miguel Lopez de Legazpi. Nagkaigwa nin ralaban asin dinaog ninda an pwersa ni Raja Tupas, na iyo na kaitdo an hade kan Cebu. Pagkatapos kan ralaban, nakua nin sarong Kastilang soldado an imahen ni Santo Niño sa sarong nasulóng payag-payag kaiba an iba pang mga imahen nin mga anito. Nagpatugdok sinda nin kapilya para Saiya, na sa pag-agi nin mga panahon nagin dakulang simbahan, na ngonian iyo na an Basilica Minore de Santo Niño sa Cebu. Kaiba kan paglakop kan pagtubod na Cristiano an particular na debosyon sa Santo Niño.

An debosyon ki Santo Niño nagtutukdo kan misteryo nin Pagkanitawo kan Dios. Pag nahihiling an imahen kan Santo Niño, nagpaparumdom ini kan Dios na uya sato. Siring sa hade an badò Niya nin huli ta Siya an kapanoan kan profesía sa Isaias 9,5: “Huli ta sarong aki namundag para sato; an paghade ibubugtak sa Saiyang abaga asin ini an ngaran na iaapod Saiya: Makangangalas na Parahatol, Makakamhan na Dios, Amang daing kasagkoran, Prinsipe nin katoninongan”. Sa kulturang Pilipino may manlaen-laen pang porma an Santo Niño: may nakapang-aking bado; may naka-uniporme nin pulis, soldados, doktor, asin iba pa; may naka-basketball jersey. Ini an misteryo kan pakanitawo sa popular na imahinasyon.

Alagad igwa man nin popular na salang gawè kaini: an paggibo sa Orog-kahalangkaweng Dios na pampaswerte saná, dini-display pa sa mga tindahan kaiba an nag-uulok na Buddha, an talapang na may ugom sinsilyo, asin an ikos na naghihiro an toong kamot. Kaipuhan ining bàgohon nin huli ta ini sacrilegio, an kasàlan nin pagbasang-basang asin dai paggalang sa Dios asin sa mga banal.

An debosyon ki Santo Niño pangapodan sa pagtalubo sa pagtubod. Alagad kaipuhan na bantayan asin bàgohon ta an nagkapirang elemento sa satong kulturang Pilipino na nag-uulang sato na magtalubo sa pagtubod.

Saro kaini an pagigin Catolico sa ngaran sana (nominal Catholicism); pagkabonyag dai nang gayong edukasyon sa pagtubod asin bihira pa maglaog sa simbahan. Yaon man an folk Catholicism o paghalo sa pagtubod na Cristiano nin mga pamahiin asin mga sagugurang na gaweng bako man Cristiano. May mga piggigibong garo carinderia o turo-turo an pagtubod, pigpipili sana an tutubodan o susunodon sa Biblia asin mga katukdoan kan Simbahan, su mga facil sana asin dai nangangaipong bàgohon an sadiri. Yaon man an pagkakaigwa nin “split-level Christianity” o pagtubod na dai nahihiling sa gibo asin dai naisasabuhay.

Sa Lucas 2,52, sinabi na “si Jesus nagdakula sa pagkasabot, sa lawas, asin sa biyaya, sa atubang nin Dios asin nin mga tawo.” An tunay na debosyon Saiya dinadara kita na magtalubò man siring sa Saiya.

…

GIYA SA PAGHIRAS SA SADIT NA KOMUNIDAD O PAMILYA • Maghiras kun ano an mga gawe nin debosyon sa Santo Niño sa saimong pamilya. Ano man para saimo an kahulugan kan debosyon ki Santo Niño?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Dios Nagpapamidbid Sato

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Enero 9-15, 2022. Basahon an Evangelio gikan sa Lucas 3,15-16,21-22 (Fiesta kan Pagbonyag kan Kagurangnan).

…

An evangelio nag-iistorya kan versión ni San Lucas kan pagbonyag ki Jesu Cristo. An pagrumdom kaini iyo man an huring aldaw kan Panahon kan Pasko nin Pagkamundag. Ano an kahulugan kan Pagbonyag?

Pagpamidbid ki Jesus bilang Mesias. Nagpapadagos an pagpahayag sa katawohan kan misteryo nin pagkanitawo kan Dios na enot nang pinahayag sa Pag-anuncio kan angel, sa Pagkamundag, asin sa Epifanía. Si Juan Bautista nagpatotoo sa pagka-Mesias ni Jesus sa pagnegar na siya an Mesias asin pagsabi na an maabot mas orog kisa saiya. Dangan sa Juan 1,29, tinurô niya si Jesus sa saiyang mga disipulos asin nagsabi: “Uya an Cordero kan Dios na nagpaparà kan mga kasàlan kan kinàban.”

Sa paghilig Saiya kan Espiritu siring sa salampati, pinamidbid man Siya bilang profeta, asin an tingog kan Ama pinamidbid Siya bilang Aki kan Dios.

Pagpamidbid nin Dios bilang Santissima Trinidad. Siring na dai paghonaon kan Israel na an pighahalat nindang Mesias iyo an bogtong na Aki kan Dios, dai man ninda paghonaon na an Dios mapamidbid kan Saiyang sadiri bilang Aki na binobonyagan, bilang Espiritu Santo, asin bilang Amang makakamhan.

Kaya ngani an apod kan Simbahan na Eastern Orthodox sa pangyayaring ini iyo an theofanía, an pagpahayag nin Dios. Kaya maninigo lamang na apodon si Jesu Cristo bilang kapanoan kan kapahayagan nin Dios. Sa Juan 14,9 sinabi pa Niya: “An nakahiling Sako, nakahiling na sa Ama.”

Pagpamidbid kan katotoohan kan satong sadiri. Sa Lucas 3,16, pinasabot ni Juan Bautista an pagkakaiba kan saiyang pagbonyag asin kan gigibohon na pagbonyag ni Jesus: “Ako nagbobonyag sa tubig, alagad may sarong maabot na mabonyag saindo sa Espiritu Santo asin sa kalayo.” An pagbonyag ni Juan tanda kan pagbaklè kan binobonyagan. Alagad an pagbonyag ni Jesus nagpapatawad nin mga kasàlan. Asin nagpapamidbid man ini kan katotoohan kan satong pagkatawo: na kita linalang nin Dios na kabaing Niya; alagad rinaot an imahen na ini kan satong pagkakasalà, alagad bako kasàlan an satong katapusan nin huli ta linigtas kita ni Jesu Cristo sa kaoripnan nin kasàlan asin kagadanan.

Kan kita binonyagan inako niato ining kaligtasan ni Cristo kaya maninigo lamang na apodon kitang mga Cristiano, mga parasunod ki Cristo. Dangan tinao sato an dignidad nin pagigin Aki kan Ama, Tugang ni Jesu Cristo, Templo kan  Espiritu Santo, Miembro kan Simbahan, asin Tagapagmana kan Kahadean.

An katuyuhan kan pagpamidbid nin Dios sa sato iyo na boot Niyang magkaigwa kita nin relasyon sa Saiya bilang satong Dios – Ama,  Tugang, asin Katood. Sabi ni Jesus sa Juan 15,15: “Dai Ko na kamo aapodon na mga  sorogoon, huli ta an sorogoon dai aram an ginigibo kan saiyang amo. Aapodon ko kamong mga katood huli ta sinabi Ko saindo an gabos Kong nadangog sa Sakong Ama.”

An tanda kan satong pakipagkatood sa Dios iyo an satong pagkamoot Saiya. Sa 1 Juan 5,3, sinabi man, “an namomoot sa Dios nagsusunod sa Saiyang tugon”. Sa pagkamoot asin pagsunod sa Saiyang tugon naisasabuhay niato an gracia nin kaligtasan na tinao sato kan kita binonyagan.

…

GIYA SA PAGHIRAS SA SADIT NA KOMUNIDAD O FAMILIA • Maghiras kun pàno sato enot na pinamidbid an Dios kan satong mga magurang o kun siisay man, asin kun ano na an pagkamidbid ta Saiya ngonian.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Regalo kan Epifanía

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Enero 2-8, 2022. Basahon an Ebanghelyo gikan sa Mateo 2,1-12 (Solemnidad kan Epifanía kan Kagurangnan).

...

Sa ebanghelyo, nagbisita an mga mago sa omboy na si Jesus na saindang nakua sa giya nin sarong maliwanag na bitoon.  Susog sa tradisyon, inaapod man sindang tolong hade na may ngaran na Melchor, Gazpar, asin Baltazar. Alagad bako sinda mga hade kundi mga mago, mga madunong asin may inadalan na tawo. Dai man sa Biblia nabanggit an mga pangaran ninda, asin dai man sinabi na tolo sana sinda, kundi na dara ninda tolong klaseng regalo. Ano an kahulugan kan istoryang ini?

An pinakaregalo iyo mismo si Jesu Cristo. May darang regalo an mga mago, asin digdi hale an tradisyon nin pagregalo sa panahon nin Pasko. Alagad an bogtong na Aki kan Ama na ipinadara sa pagligtas sa katawohan an pinakaregalo sa istorya. Sabi sa Juan 3,16: “Huli ta namoot na gayo an Dios sa kinaban kaya itinao Niya an Saiyang bogtong na Aki tanganing an siisay man na magtubod Saiya dai magadan kundi magkamit nin buhay na daing kataposan.” Kaya an pagbisita kan mga mago sinecelebrar bilang fiesta kan Epifanía, boot sabihon an pagpahayag nin Dios sa katawohan kan pagdatong kan satong Paraligtas na iyo si Jesu Cristo.

Alagad bilang regalo, pwede man Siyang dai akoon, isikwal, asin kaongisan pa ngani. Sabi sa Mateo 2,3: “Napurisaw  na gayo si  hadeng Herodes kan madangog niya  (an bareta kan mga mago), siring man an mga taga-Jerusalem.” Bako sana si Herodes, na an paghiling ki Jesus karibal sa trono, an napurisaw kundi pati na an saiyang mga kampon.

Sa Juan 3,19, sinabi: “Ini an hatol: nagdigdi an ilaw sa kinaban, alagad orog na namotan nin tawo an kadikloman kisa liwanag, huli ta maraot an mga gibo ninda.” Maski pigcelebrar ta an mga tradisyon sa Pasko, kun dai kita magbaklî sa satong mga kasàlan asin yaon pa man giraray sa satong puso an pagkamakasadiri, pagkauri, asin pagakadagit, siring kita ki Herodes asin saiyang mga kampon.

Dara ni Jesu Cristo an regalo nin kaligtasan. Bako gabos na mga Judio inako si Jesu Cristo alagad, sabi sa Juan 1,12, “an mga nag-ako saka nagtubod Saiya, tinawan niya nin derecho na magin mga aki nin Dios”. An gracia nin kaligtasan na ini tinatao Niya sa gabos.

Sabi ni San Pablo sa Efeso 3,6: “An misteryo iyo ini: huli kan Marhay na Bareta, an mga Gentil paramana man kan mga bendicion nin Dios, mga kabtang man kan parehong hawak, asin kahiras kan ipinanuga nin Dios ki Jesu Cristo.” An mga Gentil iyo an apod kan mga Judio sa mga bakong Judio, kabilang sainda an mga mago na hale sa harayong lugar nin sirangan, asin kita gabos na bakong mga Judio. Kaya an mga mago representante kan katawohan sa bilog na kinaban, asin si Cristo namundag man para sainda asin para sa sato.

Tinao sato ni Cristo an regalo nin misyon.  Tolong regalo an dara kan mga mago, na simbolo kan Saiyang misyon: bulawan nin huli ta Siya hade, incenso nin huli ta Siya padi, asin mira nin huli ta Siya propeta. Kan kita binonyagan ihiniras sato ni Cristo an Saiyang Espiritu asin ining tolong misyon tanganing ihiras an kaligtasan.

Sa lambang paggibo niato nin karahayan asin pagtabang sa kapwang nangangaipo, ginigibo ta an misyon nin pagkahade. Sa lambang pagpangadie para sa kapwa asin pagdara sainda parani sa Dios, ginigibo ta an misyon nin pagkapadi. Sa lambang pagtukdo niato kan Tataramon nin Dios asin Saiyang mga tugon, sa satong tataramon asin gibo, nagsasaksi kita sa misyon nin pagkapropeta. Regalo ining tolong misyon nin huli ta ini an nagtatao nin kahulugan sa satong buhay asin katuyohan sa satong pagigin Cristiano.

…

GIYA SA PAGHIRAS SA SADIT NA KOMUNIDAD O PAMILYA • Maggibo nin New Year’s Resolution asin isabay kun pàno gigibohon an misyon nin pagigin hade, padi, asin propeta, siring ki Cristo, sa bilog na taon.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song