An Walóng Paladan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 29 – Pebrero 4, 2023. Basahon an Evangelio gikan sa Mateo 5,1-12a (Ikaapát na Domingo sa Ordinariong Panahon).

…

An istorya iyó an kapinònan kan kabtang sa Evangelio ni San Mateo na inaapod na Sermon sa Bulód, na igwang tolóng capitulo (Mateo 5-7) kun saen mababasa an kadakul na mga katukdoán ni Jesus. An pinakamidbid sa mga iní iyó an “Walóng Paladan” (Eight Beatitudes).

Iní an paliwanag kan Catechism of the Catholic Church (no. 1716-1729) dapit sa Walóng Paladan.

Iní an bagong tugon dapit sa Kahadean nin langit. Sa Lumang Tipan tinaó nin Dios sa Piniling Banwaan an Saiyang tugon o ley tanganing sinda “mabuhay, mag-uswág, asín maglawig an buhay sa Dagáng Panugâ” (susog sa Deuteronomío 5,33). Pagdatóng ni Cristo tinukdô Niya ining Walóng Paladan tanganing pag-andamán niato an pagdatóng, bakô na sa Dagáng Panugâ, kundì kan Kahadean nin langit. An walóng iní an mga oróg na pinapahalagahan sa Kahadean nin langit.

Iní nakapatugmad sa kamàwotan nin tawo na magín maogma. An lambang gibo o hirô nin tawo ginigibo nin huli ta ini makakapaogmá satuya. Alagad an tentación dinadará an tawo sa mga saltóng pinaghahalean nin kaogmahan, siring kan pagpilì kun ano an facil, an conveniente, asín an komportable; asín an pagpaoróg sa kayamanan, kapangyarihan, asín kasikatan. Alagad an Walóng Paladan kadunongan na halè mismo ki Cristo na kun gigibohon niatong giya sa satong buhay, magtatao sato nin kaogmahan na dai matatao kan kinàban.

Iní dapit sa pagkamoot sa Dios. An Walóng Paladan iyó an kapahayagan nin Dios kun ano an Saiyang mga gaweng nawiwilihan. An mga iní an maninigong paagi kun pàno ta mauutób an pinakadakulang tugon: an kamòtan an Dios kan bilog niatong sadiri.

Sarô-saroon ta an kahulugan kan Walóng Paladan.

Paladan an mga dukhâ sa espiritu, sinda an daíng ibáng sinasarigan kundì an Kagurangnan, sinda an mga mapakumbabâ asín dai naaarà sa tuksó nin kayamanan asín kapangyarihan kundì ginagamit an mga iní sa paglingkod asín pagpamuraway sa Saiyang Ngaran.

Paladan an mga nagmumundò, an mga nagtitios, asin mga naghehelang, ta kaiba ninda an Kagurangnan, Siya mismo an mataong karangahan sainda.

Paladan an mga maboot, nin huli ta an kabootan, kahuyoan nin boot, asín halawig na pasensya, mga tandâ nin tunay na kabanalan.

Paladan an mga nagugutom asín napapahà sa katanosan, an mga naghihingowa na magín maimbód sa kabòtan nin Dios asin magtalubò sa kabanalan, asín dai pinapaoróg an sadiring katanosan, ta itátao sainda nin Dios an hinahagad kan saindang pusò.

Paladan an mga maheherakón, an mga tataó magpatawad asín magtabang sa kapwang nangangaipo, ta sinda an kagdará kan presencia nin Dios sa kinàban.

Paladan an mga malinig an pusò, an daíng maraot na boót sa kapwa, an bakô makasadiri, ngonian pa saná sinda an pinakaharaní sa Kahadean nin Dios.

Paladan an mga parapatoninong, an mga nagsusuróg sa mga inaapí asín nagagabatan, an mga naghihingowa na pakarayón an sociedád, alagad daí nagpapadará sa tentación nin violenciá asín kawàran nin pakiarám sa dignidád asin derechos nin kapwa.

Paladan an mga pinapasakitan huli sa katanosan, huli ta si Cristo mismo nag-agi sa siring, asín sabi ni San Pablo sa Roma 8,17: “kun kaiba kita sa kasakitan ni Cristo, makakaibá man kita sa Saiyang kamurawayan”.

…

GIYA SA PAGHIRÁS SA SADÍT NA KOMUNIDAD O PAMILYA • Arin sa Walóng Paladan an saimo nang isinasabuhay? Arin man sa mga iní an kaipohan mo pang paghingowahon na utobón?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

Parasirà nin mga Tawo

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 22-28, 2023. Basahon an Evangelio gikan sa Mateo 4,12-17 (Ikatolóng Domingo sa Ordinariong Panahon).

…

An evangelio iyó an istorya kan pagpoón ni Jesu Cristo kan Saiyang ministerio publico na naghalóy nin máabot tolóng taon hanggang sa Saiyang pagsakit, pagkagadán, asín pagkabuhay-liwát sa Jerusalem. Kadaklán kan tolóng taon na iní yaon Siya sa Galilea.

“Magbaklê na kamo huli ta haraní na an Kahadean nin langit.”

Iní an mensahe ni Jesus sa Saiyang pagtukdò. An Kahadean nag-abót na sa pagkanitawo ni Jesus sa kinâban, asín an kapanoan kainí mangyayari sa Saiyang Ikaduwáng Pagdatóng.

Sa Isaias 9,1 nasusurat an profesía: “An banwaan na yaon sa kadikloman nakahiling nin dakulang liwanag; saróng liwanag suminirang sa mga nag-eerok sa dagâ asín anino nin kagadanan.” Iní dapit ki Jesus asín sa Saiyang ministerio sa ronâ nin Galilea.

An naoogma sa liwanag iyó idtong inaakò an saindang kadiklomán na dulot nin kasâlan. Sa Galilea kadakul an nag-akò ki Jesus asín nagbaklê – mga Judío asín pagano. Sa gabós na panahon, danay na inaagda ni Jesus an katawohan sa Saiyang Kahadean, asín an enot na gawè sa pag-akò kan Saiyang pag-agdá iyó an satong pagtalikod sa pamumuhay na makasâlan. Andam na daw kitang magbaklê asín talikdán an satong saláng pamumuhay?  

“Sumunód kamo Sako.”

Iní an sinabi ni Jesus sa enot Niyang mga disipulos: an magtugang na Simon Pedro asín Andres, asín an magtugang na Santiago asín Juan. Asín iní man an pangapodan Niya sa satong mga disipulos Niya ngonian. Boót sabihon kan tataramon na disipulo: parasunod. Iní an pagsaksíng ginibo kan mga enot na disipulos: tulos suminunód sinda Saiya asín binayaan an saindang mga pamilya asín trabaho.

Kun mga parasunod kita ni Cristo, Siya saná an susundan ta – bakô siisay man o ano man na bagay. Gabós tang desisyon dapat oyon sa Saiyang kabòtan, asín kun iní makakaparaní o makakaparayô sato Saiya.

Saróng tandâ kan satong pagigin disipulo, iyó an satong padagos na pagmidbid Saiya asín pag-adal kan Saiyang katukdoán sa Banál na Kasuratán. Sabi ni San Geronimo: “An daí pagkaisi sa Biblía, daí pagkamidbid sa Dios”. Nabasa ta na daw an Biblía asín naghingowa na mag-adal kainí? Kun daí pa, inaapod kita ni Jesus na padagos Siyang mamidbidan sa paagi kan Biblía. Kayâ si Papa Francisco ginibo an Ikatolóng Domingo Ordinario bilang Domingo kan Tataramon kan Dios.

“Gigibohon ko kamong mga parasirà nin mga tawo.”

Iní an sunód na sinabi ni Jesus sa mga enot na disipulos. Boót sabihon, inaapod kita bakô para sa sadiring kabanalan saná kundì, siring sa mga parasirà, maghanap asín magdará nin kapwa pasiring ki Cristo.

Sarô sa mga saláng paghonà niatong mga Catolico iyó na kadaklan sato an paghilíng sa sadiri mga Mass-goers o parasimbá saná, bako Evangelizers o paradara kan Marhay na Bareta.  Kulang an satong pagigin disipulo kun daí kita magdará sa kapwa pasiring ki Cristo. Sabi sa Roma 14,7 na ginibong awit na nganì: “Daíng siisay man an nabubuhay para sa sadiri lamang, daíng siisay man an nagagadan para sa sadiri lamang.”

Guràno iní kahalagá? Iní an tugon ni Cristo poón sa pag-apód Niya kan pinakaenot na disipulos. Iní man an tugon Niya sa gabós Niyang mga disipulos bàgo kan Saiyang pagsakát sa langit. Sinabi Niya sa Mateo 28,19: “Padumán kamo asín gibohon nindong mga disipulos an mga nación.”  Iní an Saiyang tugon sa sato kaidto, ngonian, asin sagkod pa man.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás kan saimong gawè nin pagbasa nin Biblía asín paboritong texto halè digdi, o experiencia nin pag-adal nin Biblía kaiba an saróng grupo.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

An Pinakadakulà sa Kahadean

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 15-21, 2023. Basahon an Evangelio gikan sa Mateo 18,1-5,10 (Solemnidad kan Santo Niño).

…

“Siisay an pinakadakulà sa Kahadean nin langit?” Iní an hapót ki Jesus kan Saiyang mga disipulos. Asín pigpresentár Niya sainda an saróng akì. “An siisay man na magpakumbabâ siring kan sadít na aking iní, iyo an pinakadakulà sa Kahadean nin langit” (Mateo 18,4).

An pinakadakulà sa kahadean iyo an hadè. An hadè nin langit nagdatóng sa dagâ, halè sa kamurawayan nin pagkadios nagpakumbabâ, nagín tawong dukhâ, nagín aking sadít. Ini an sinecelebrár ta sa fiesta kan Santo Niño. Igwa nin profesía sa Isaias 9,6: “Huli ta saróng akì an namundag para sato; an paghadè ibubugtak sa Saiyang abaga asín iní an ngaran na iaapod Saiya: Makangangalas na Parahatol, Makakamhan na Dios, Amáng daíng kasagkoran, Prinsipe nin katoninongan”.

An fiesta kan Santo Niño nagpapagiromdom man kan kapinònan kan pagtubód na Cristiano sa Pilipinas. An imahen kan Santo Niño de Cebu iyo an orihinal na imahen na pigregalo ni Fernando Magallanes ki Hara Amihan, agóm ni Raja Humabon kan Cebu, sa okasyon kan saindang pagpabonyág bilang mga Cristiano, kaiba an saindang mga nasasakopan, kan taon 1521.

Iní celebración kan Dios na kaiba niato asín nagín siring sa sato. An satong Kagurangnan nag-agi man syempre sa pagkaakì siring sa sato gabós. Kaya nganì maski an standard na imahen iyo na si Jesus nakabadò bilang aking hadè, may manlaen-laen pang porma an Santo Niño: may nakabadò páng-akì, may naka-uniporme nin pulís, may naka-basketball jersey. Iní an misteryo kan pakanitawo sa populár na imahinasyon.

Alagad igwa man nin mga piggigibong pampaswerte saná an imahen, pigdidisplay pa kaiba an nag-uulok na Buddha, an talapáng na may ugom na sinsilyo, asín an ikós na nagpapaypay an kamót. Iní saláng gawè nin huli ta ginigibo si Cristo na garó sanáng dios-diosan o anito.

Kan si Magallanes magadán sa Mactan, nakabalík an mga Kastilà kan taon 1565 na, sa pamamayo ni Miguel Lopez de Legazpi. Nagkaigwá nin ralaban asín dinaóg ninda an pwersa ni Raja Tupas, na iyo na kaitdo an hadè kan Cebu. Pagkatapos kan ralaban, nakua kan mga Kastilang soldados an imahe ni Santo Niño sa saróng nasulóng payag-payag kaiba an iba pang mga imahe nin mga anito asín dios-diosan. Nagpatugdok sinda nin kapilya dumán, hinalè an mga anito, asín linaág an Santo Niño sa maninigong lugar, asín nagpoón an debosyon kaiba kan paglakóp kan pagtubód na Cristiano.

Iní celebración kan Dios na nag-aagda sato na magtalubò sa pagtubód kaiba Siya asín sa Saiya. Kayâ kaipohan man niatong midbidón asin pakarayón an nagkapirang aspeto sa satong kulturang Pilipino na nag-uuláng sato na magtalubò sa pagtubód. Siring bagá kan kakulangán nin dakul na magurang na ipasa an biyayà nin pagtubód sa saindang mga akí; an daí pagpahalagá sa pag-adal kan Tataramon nin Dios sa biblía asin mga katukdoán kan Simbahan; an daí pagsaksí sa pagtubód sa iba pang lado nin buhay siring kan trabaho, negosyo, pulitika, asin teknolohiya; asín an saláng paghonà na an kaligtasan dai nangangaipo nin pagbagong-buhay susog sa Evangelio. Si Jesus mismo nagsabi sa Mateo 18,3: “kun daí kamo magbaklè asín magín siring sa mga aking sadít, daí kamo makakalaóg sa Kahadean nin langit.”

Sa Lucas 2,52 nasusurat: “Nagtalubò si Jesus asín nagdagdag an Saiyang kadunongan, asín nawilihan Siya kan Dios asín nin mga tawo.” Iyo man lugód an magin pangarogan asin padumanan nin lambang sarô sa satong mga debotos ni Santo Niño.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás kan saimong mga gaweng debosyón sa Santo Niño, asín kun pàno ka kaini pinapatalubò sa pagtubód asín pagkamoot.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

An Pagpamidbid kan Kagurangnan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 8-14, 2023. Basahon an Evangelio gikan sa Mateo 2,1-12 (Epifanía kan Kagurangnan).

…                                                                                                                                   

Sa evangelio may mga mago halè sa sirangan na nagbisita sa omboy na si Jesus. Inaawit ta ini sa “Ang Pasko ay Sumapit”: “Nang sa Kristo ay isilang, may tatlong haring nagsidalaw, at ang bawat isa ay nagsipaghandog ng tanging alay”. Alagad bakô sinda mga hadè kundi mga mago, mga madunong na tawo na nag-aadal nin mga sciencia asín kasuratan nin manlaen-laen na mga nacion asín relihiyon. Sa pag-agi kan panahon, nagkaigwa sinda nin ngaran: Melchor, Gaspar, asín Baltasar.

An makahulugán na pagbisitang ini inaapod na Epifanía kan Kagurangnan, tataramon na Griego na an kahulugán “pagpahilíng” o “pagpamidbid” nin Dios sa katawohan. Natà ta kaipohan nin Dios na magpamidbid sato? Nin huli ta kun kita saná daí kayang abotón kan satong isip an misterio kan Saiyang pagka-Dios, minsan nganì an Saiyang kabòtan linaág na Niya sa satong pusò. Ano an ipinapamidbid o ipinapahayag sato kan Epifanía?

Enot, si Jesus an pinanugáng paraligtas. Sa evangelio ipinapamidbid si Jesus bilang hadè kan mga Judío, asín an Mesías (sa Hebreo) o Cristo (sa Griego) susog sa mga profesía. Siya an kapanoan kan pagpamidbid kan Dios Amâ. Sabi sa Gibo 4,12: “An kaligtasan makukua saná ki Jesu Cristo; dai na nin ibáng ngaran na itinaó an Dios sa kinàban na makakaligtas sato.”

Alagad sa istorya, igwa man ki mga dai nagtubód asín nagsikwal pa nganì Saiya: si hadeng Herodes asín an saiyang mga pag-iribang padì asín escribas. Nasusurat sa Juan 3,19: “Iní an paghukóm: an ilaw napadigdi sa kinàban, ugaring namòtan kan mga tawo an diklom, ta maraot an saindang mga gibo.”

Madalíng magsabi na inaakò ta si Cristo bilang satong Kagurangnan asín paraligtas, alagad sarô man saná an tandà na totoo ini: an satong maimbod na pagsunód sa Saiyang kabòtan. Lugód pilion ta an dalan kan mga mago na nagtubód asín inakò si Jesu Cristo kan ipinamidbid sainda, bakô an dalan ni Herodes asín mga pag-iriba niya.

Ikaduwá, an kaligtasan itinatao sa gabós. Sabi sa Juan 4,22, “an kaligtasan gikan sa mga Judío”. Alagad bakô exclusivo para sa mga Judio saná, kundì maghahalè sainda an paraligtas nin gabós na katawohan. Na an mga mago bakô mga Judío alagad nakua an omboy sa giya kan bitoon, nagpapahayag kan kabòtan nin Dios na sinabi ni San Pablo sa 1 Timoteo 2,4: na “an gabós makaligtas asín makamidbid kan katotoohan”.

Sabi pa sa Efeso 3,6: “an mga Gentíl (boót sabihon, mga bakô Judio) kapwa tagapagmana, kapwa kabtang kan saróng Hawak, asín kahirás sa panugâ, ki Cristo Jesus, huli kan evangelio”.

Ikatoló, kahirás kita kan misyon nin kaligtasan ni Jesu Cristo. An mga regalong dará kan mga mago nagsisimbolo kan tolóng misyon ni Cristo para sa satong kaligtasan. An bulawan nin huli ta Siya hadè; an incenso nin huli ta Siya padì; asín an mira (na gamit sa pag-embalsamár nin gadán) nin huli ta Siya profeta. Sabi sa Catechism of the Catholic Church: “An bilog na Banwaan nin Dios nagpaparticipár sa tolóng oficio ni Cristo asín nag-aakò kan responsibilidad sa misyon asín paglingkod na nagbubulos halè sa mga ini” (CCC 783).

Ginigibo ta an misyon sa pagkahadè cada vez kita mapakumbabáng naglilingkod asín inienot an kapwang nangangaipo kisa sadiri. Ginigibo ta an misyon sa pagkapadì cada vez kita magpangadiè para sa lambang sarô, asín magdará sa kapwa parani sa Dios. Ginigibo ta an misyon sa pagkaprofeta cada vez nag-aadal kita kan Tataramon nin Dios asín mga katukdoan kan Simbahan, asín nagsasaksi kita kaini sa satong tataramon asín gibo.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia kun pa’no mo isinasabuhay an saimong pakisumarò sa misyon ni Cristo bilang hadè, padì, asín profeta.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Santa Maria Ina kan Dios

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Enero 1-7, 2023. Basahon an Evangelio gikan sa Lucas 2,16-21 (Solemnidad ni Maria Inâ kan Dios).

…                                                                                      

May duwáng fiesta na sinecelebrár cada Enero 1. An sarô seculár, an Aldaw kan Bàgong Taon; an sarô sagrado, an Solemnidad ni Santa Maria Inâ kan Dios. Sa paghilíng kan Simbahan bakô ini magkalaban na fiesta kundì oportunidad sa pagpabanál sa banwaan sa pagsalida kan taon. Sarô ining “maogmang pagsabayan” (happy concurrence), susog ki Papa San Paulo VI sa saiyang surat na Marialis Cultus. Siya man an nagbalík kan suanoy na tradisyon nin pagcelebrár sa ikawalóng aldaw sa Octava kan Pasko bilang Solemnidad kan Inâ kan Dios. Sa katunayan, an misterio kan Incarnación, an pagkanitawo kan Dios Akì, iyo an pinakaoróg na pagsabatan kan seculár asín sagrado, kan langitnón asín kinàbanon.

Si Maria Inâ kan Dios. Ano an kahalagahán kaining fiesta? An titulong Inâ kan Dios an pinakaoróg sa mga titulo ni Virgen Maria nin huli ta an dignidad na ini an pinaghahalean kan gabós na iba pang mga titulo nin debosyón saiya. Nagtutubod kita sa saiyang Inmaculada Concepción asín Asunción sa langit huli ta siya an Inâ kan Dios. Siya an Virgen de Fatima, Lourdes, Guadalupe, Peñafrancia, asín Salvación – huli ta siya an Inâ kan Dios.

An gabós na kaomawan ki Virgen Maria naghahalè sa saiyang Akì. Kan taon 431 AD sa Consejo kan Efeso, formál na piglinaw kan Simbahan an doctrina na si Jesu Cristo totoong Dios asín totoong tawo. Kaya si Maria bakô sanáng inâ kan Cristo na tawo, kundì inâ man kan Cristo na Dios. Bakô siya inâ kan Dios Amâ o kan Dios Espiritu Santo, kundì kan Dios Akì, an Ikaduwáng Persona sa Santissima Trinidad.

Kayâ tinaó ki Maria an titulo sa Griego na Theotokos, an nagdará sa Dios sa saiyang popònan. Siring man sa Latin inaapód siyang Dei genetrix, an nag-akì sa Dios, asín Mater Dei, Inâ kan Dios. Sa ikaduwáng kabtang kan pamìbing Tará Kagurangnan Maria, sinasambit ta: “Santa Maria, Inâ kan Dios, kaming mga makasâlan, ipamìbì mo kami ngonian sagkod sa paghingagdán niamò. Amen.”

Si Maria asín an Bàgong Taon. Sa pagcelebrár kan bàgong taon, kasabáy kan kamàwotan nin kadakul para sa pagbabàgo para sa ikakaraháy kan sadiri, pinepresentár kan Simbahan si Virgen Maria bilang arogán nin pagigin akì kan Amâ asín disipulo ni Cristo. Sabi nganì ni Jesus sa Mateo 12,50: “Siisay man na nag-ootób kan kabòtan kan sakong Amâ sa langit, iyo an sakong mga tugang asín sakong inâ.”

Arogon ta an saiyang kapakumbabaan. Darakulang bagay an nahimo huli ki Maria alagad nagpoón siya sa mga mapakumbabâ asín saradít na gibong pagkámoot asín karahayan. Sabi ni Sta. Teresa de Calcuta: “Bakô gabós sato makakagibo nin mga darakulang bagay, alagad kaya niatong makagibo nin mga saradít na bagay na may dakulang pagkamoot.”

Arogon ta an saiyang kaimbodán. Paladan si Maria bakô sa nagkapira niyang gibong karahayan kundì sa bilog niyang buhay siya nagin maimbód sa pagsunód sa kabòtan kan Amâ. Siring man an pagbàgo kan satong buhay asín pagkamít kan mga pangaturogan nakapatugmád bakô sa paminsan-minsan kundì sa danay na paggibo nin matanos asín marhay.

Arogon ta an pagrimpos niya sa pusò kan mga pangyayari sa saiyang buhay.  Siring na nahiling ni Maria an gracia nin Dios sa saiyang buhay kaya nagibo niya an kabòtan kan Amâ, kita man matatàwan nin malinaw na giya sa dalan kun tatàwan ta nin panahon asín lugár an Dios sa satong buhay – sa pagpangadiè asín pagsimba, sa pagbasa kan biblía asín pag-adal kan Saiyang tataramon asín katukdoán kan Simbahan.

…

GIYA SA PAGHIRÁS SA SADÍT NA KOMUNIDAD O PAMILYA • Sa pagpoón kan bàgong taon, ano an saimong mga papadagoson, mga popònan, asín mga popondohón tanganing mapakarhay an saimong buhay?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song