An Anunciación ki San José

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 21-27, 2025. Basahon an Evangelio gikan sa Mateo 1,18-24 (Ikaapát na Domingo kan Adviento - A)

…

Sa Evangelio pig-iistorya an pagbaretà kan angel ki San José. Sa Evangelio ni San Lucas an anunciación nangyarì ki Santa María, alagad sa Evangelio ni San Mateo, iní nangyarì ki San José. May ibá pang anunciación sa laóg kan dakulang istorya kan pagkamundag ni Jesús: ki San Zacarías, sa mga pastores, asín sa mga mago.

Anó an itinutukdò satô kan anunciación ki San José?

Enot, an Diós an naenot na námoót asín nagraní sa tawo.

Igwa nin dakulang plano an Diós para sa katawohan: na ihâwas kitá sa kasâlan asín darhón sa Saiyang Kahadean. Sa sadiring kakayahan daí ta kayang iligtas an satóng sadiri sa kasâlan asín kagadanan, sa sadiring kaisipan daí ta maabót saboton an misterio kan Kahadean. Kayâ – siring ki San José na nariribongan kun anó an dapat na gibohon sa baretà saiya ni Sta. María na iní badós na asín an akì bakô gikan saiya – an Diós na mismo an nagráraní para itukdô satô an Kagurangnan Jesu Cristo, an Saiyang pagkamoot na nanitawo para sa katawohan. 

Sabi sa 1 Juán 4,19: “Kitá namómoót, huli ta Siyá enot Niyá kitáng namòtan.”

Ikaduwá, huli ki San José nautób an mga profesía dapít sa Mesías na madatong.

Sinabi saiya kan angel na nautób ki Sta. María an nasusurat sa Isaías 7,14: “Uya, an virgen mangingidam asín mangangakì nin lalaki, na aapodón Emmanuel.” Dangan sa pag-akò ni San José ki Sta. María bilang agóm asín kan aking nasa popònan bilang saiyang akì, nautób an panugâ nin Diós ki Hadeng Davíd sa 2 Samuel 7,12-13: “Gigibohon kong hadè an sarô kan saimong mga aking lalaki asín papakusogón Ko an saiyang kahadean. Siya an matugdok nin Templo para Sakô, asín papagdanayon ko an Saiyang trono sagkod pa man.”

Sa Mateo 1,1-17 nakalista an mga ngaran nin mga kapag-arakian poón ki Abrahám sagkod ki Hadeng Davíd, sagkod ki San José asín ki Jesu Cristo.

Ikatoló, nagsasaksi iníng istorya sa kadakulaan kan pusò ni San José.

Sa tahaw kan saiyang kapurisawan, pinilì niyang mámoót. Habô niyang ipasupog si Sta. María, ni iosip sa autoridád tanganing patawan nin padusa. Sa pasabóng kan angel, pinilì niyáng magtubód asín tulos sunodón an kabôtan nin Diós. Pakagimatá, tulos ginibo an ipinapagibo saiya kan angel: inakò si María bilang agóm, asín nagi siyang marhay na padre de familia.

Si Papa Francisco, sa saiyang Surat Apostolico Patris Corde (May Pusò nin Amâ), nagsabi dapít ki San José: “Maski sa tahaw nin mga takot ni José, nagtatrabaho an kabôtan, kasaysaysan, asín plano nin Diós. Kayâ tinutokdoán kitá ni José na kaiba sa pagtubód sa Diós iyó an pagtubód man na may mahahaman Siyá sa paagi niatò maski kadakul an satóng mga natatakotan asín kaluyahan. Tinutokdoán man niyá kitá na, sa tahaw nin mga bagyo sa satóng buhay, daí nanggad kitá matakot na pilíon an Diós na iyó an magiya satô.”

Siring ki San José, pirmi ta man lugód mahiling asín mamatean an pagkamoot nin Diós sa satóng buhay tanganing danay na hanapon an Saiyang kadonongan asín kabôtan, asín pakákuá kan mga iní, maogma tang sunodón asín isabuhay.

…

GIYA SA PAGHIRÁS | Maghirás nin experiencia kun pâno ka inapód nin Diós na magsarig Saiya asín gibohon an Saiyang kabôtan, sa tahaw nin mga katibaadan. | GIYA SA PAGHIRÔ | Bilang sararóng komunidad/pamilya, magpilì nin sarô o nagkapira sa komunidad para tabangan o pagíanon an inaagihan sa buhay.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

Naghahalat kan Maogmang Paglaom

Giya sa Prayer-Meeting nin mga Saradit na Komunidad nin Pagtubód (SAKOP) para sa semana kan Diciembre 14-20, 2025. Basahon an Evangelio gikan sa Mateo 11,2-11 (Ikatolóng Domingo kan Adviento - A).

…

An Ikatolóng Domingo kan Adviento ináapód Domingo de Gaudete. Halè iní sa Latín kan Filipo 4,4: “Gaudete in Domino semper: iterum dico gaudete” (Danay kamóng mag-ogma sa Kagurangnan: giraray sinasabi ko, mag-ogma kamó), na iyó an Antifona sa Pagpoón kan Misa sa Domingong iní. Natà ta mag-oogma kitá? Huli “ta an Kagurangnan haraní na” (Filipos 4,5).

Anó an mga nagdadará satô nin kaogmahan sa Pasko? An mga regalo para sa kaakian? An Christmas bonus asín 13th month pay nin mga nagtatrabaho? An masulong na benta sa negosyo? An mga dekorasyon asín pailaw sa Pasko, poón sa mga haróng sagkod sa mga pampublikong lugár? An mga pagtiripon nin mga mahál sa buhay? Pâno kun mawarà an mga iní, maogma pa daw an satuyang Pasko?

Sa istorya sa Evangelio nasa bilanggoan si San Juán Bautista. Bakô maogma an mapreso, mas lalò kun bakóng makatarungan. Iní gayód an nasa isip ni Hadeng Herodes kan pinadakóp niyá si Juán huli ta daí niyá nagustohán an sinabi kan profeta dapít sa paggibo niyáng sambay kan agóm kan saiyang tugang. An daí maisip kan mga siring ki Herodes iyó na mas hararom an burabod nin kaogmahan asín paglaom kan mga siring ki Juán na nagsasarig sa Kagurangnan. Nin huli ta, oróg sa gabós, an tunay na kaogmahan yaon sa satóng Kagurangnan Jesu Cristo.

Si Cristo an nagtátaóng kahulugán sa satóng buhay.

Kan nadangog ni Juán an simbag ni Jesús sa mga sinugò niyá, narumdoman niyá an mga tataramon sa mga profesía, sa Isaías 35,5-6: “mamumuklat an mga matá nin mga butá, asín mabubuksan an mga talinga nin mga bungóg. Dangan maglulukso siring sa osá an mga piláy, asín maawit an mga dilà nin mga púla.” An misyon ni Juán iyó na andamón an mga tawo sa pag-abót kan Mesías. Kan madangog niyá an mga sinabi kan mga disipulos, naogma siyáng maaraman na nautób na an saiyang misyon.

Kun an satóng mga gibo nagpapahilíng nin pakisumarò sa misyon ni Cristo bilang pading nagdadará sa kapwa parani sa Diós, profetang nagsasaksi sa katotoohan, asín hadeng naglilingkod – may kahulugán an satóng mga paghingowa, may kaogmahan an satóng mga pagpagál.

Si Cristo an satóng paglaom.

Sa Embolismo o an halabang Amen pagkatapos kan Amâ Niamò sa Misa, sinasambit na kitá nagháhalát “kan maogmang paglaom asín pagdatóng kan satóng Paraligtas, na si Jesu Cristo.” Gurâno man kakusóg an mga tentación na satóng hinahampang sa pagsunód sa Saiyang kabôtan, sigurado an kapangganahan kun kitá nasa lindong Niyá, huli ta sigurado man an Saiyang mamuraway na pagdatóng.

An mga kaogmahan na kaiba sa celebración kan Adviento asín Pasko, mga kinâbanon asín minalipas saná. An mga iní nagtátaó nin patanâ asín anino kan daí masukol na kaogmahan na naghahalát satô sa pagdatóng kan kapanoan kan Kahadean.

Si Cristo an satóng kalakbay sa dalan.

Bakô saná an madatong na kamurawayan an satóng kaogmahan, kundî ngonian pa saná, sa paglakaw ta sa Saiyang dalan, kaiba ta na Siyá. Huli ta an pigprofesía sa Mateo 1,23 na “Emmanuel, Diós na uya satô,” sa Mateo 28,20 nanugâ sa mga sinugò Niyá sa pagmisyon: “Uya kaiba nindo Akó gabós na aldaw, sagkod sa kataposan kan kinâban.”

Sabi nganì sa awit Pamasko kan Apo Hiking Society: “Ngunit kahit na anóng mangyari, ang pag-ibig sana’y magharì, sapát nang si Jesús ang kasama mo, tulóy na tulóy pa rin an Pasko.”

…

GIYA SA PAGHIRÁS | Anó an mga nagtatao saimo nin kaogmahan asín kahulugan sa buhay ngonian na panahon nin Adviento asín Pasko. | GIYA SA PAGHIRÔ | Bilang sararóng komunidad/pamilya, anó an pwede tang pagtarabangan tanganing maihiras an maogmang paglaom kan Adviento asín celebracion kan Pasko?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

Tingog na Nagkukurahaw sa Desierto

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 7-13, 2025. Basahon an Evangelio gikan sa Mateo 3,1-12 (Ikaduwáng Domingo kan Adviento -A).

…

Sa Evangelio madadangog niatò an mensahe ni San Juán Bautista: “Magbaraklê kamó; ta haraní na an Kahadean kan langit!” Siyá an nasusurat sa profesía sa Isaías 40,3 na “tingog na nagkukurahaw sa desierto: ‘Andamá an dalan kan Kagurangnan, patanosa an Saiyang mga agihán’.”

Sinabi niyá iní sa saiyang mga kapwa Judío bilang pag-andam sainda – bakô na sa pagkamundag ni Jesús nin huli ta sa panahón na idto pareho na sindang magpinsan gayód mga nasa 30 años na – kundi sa máabót na pagpamidbid ni Jesús sa Saiyang ministerio publico.

Sa satóng panahón an pangapodan ni San Juán mas pa sa pag-andam sa Ikaduwáng Pagdatóng kan Kagurangnan sa paghukóm sa mga buháy asín mga gadán. Huli ta an Adviento panahón nin pag-andam sa duwáng pagdatóng ni Jesús: an enot Niyáng pagdatóng na sinecelebrár sa Pasko kan Pagkamundag, asín an ikaduwá Niyáng pagdatóng sa huríng panahón.

Sabi ni San Juán sa Mateo 3,12, an Kagurangnan mádatóng “kapót Niyá an pantahóp, lilinigan an Saiyang giníkan, titiponon an Saiyang mga trigo sa tambobong, alagad an apá susuloón sa kalayong daí masisigbo.” Anó an dapat niatong gibohon tanganing magkanigong mag-andam sa Saiyang Ikaduwáng Pagdatóng?

Daí pagpaorogón an sadiring kabôtan.

Sa Griego an tataramon na ginagamit sa pagbaklê iyó an “metanoite”, na an boót sabihon, pagbâgo nin isip, o susog ki San Juán, pagbâgong-buhay. Nasusurat sa Proverbio 3,5-6: “Magtiwalà ka sa Kagurangnan sa bilog mong pusò, asín sa sadiri mong pakasabot daí ka magsandig. Sa gabós mong gawè midbidon mo Siyá, asín papatanoson Niyá an saimong mga agihán.” An tamang dalan iyó an pag-ayon kan satóng isip, boót, asín mga gibo, sa kabôtan nin Diós.

Daí maghonang ligtas na kitá maski daí magbaklê.

Sa Evangelio, pigsagwè ni San Juán an mga Fariseos asín Saduceos na yaraon kaiba sa mga nagdadarangóg asín boót man gayód magpabonyag, alagad daíng planong magbâgong-buhay, nin huli ta naghoronà na ligtas na sinda sa padusa sa bisa kan pagigi nindang mga akì ni Abrahám asín kabilang sa Piniling Banwaan. Minuda sinda ni San Juán: “mga ugbon nin mga rimoranon!”

Kun buháy pa si San Juán ngonian asín máhilíng niyá an sitwasyon ta – an mga autoridád na nag-aabuso kan saindang kapangyarihan, an mga pulitiko asín saindang mga kasabwat na naghahàbas sa kabán nin banwaan, an mga ginibong negosyo an pagpalakop nin disinformación, mantang kadakul an nagtitios asín turubodon sa saindang mga idolong utikón – mumudahon man niyá an mga iní asín aapodón: “mga ugbon nin mga rimoranon!”

May pagiromdom satô si Jesús, lalò na sa mga naghohonà na daí na daá kaipohan magbaklê asín magbâgo huli sa saltóng pagtubód na an Diós na mamomôton daí mátaóng paghukóm. Sinabi Niyá sa Mateo 7,21: “Bakô gabós na nagsasabi Sakô: ‘Kagurangnan, Kagurangnan,’ makákalaóg sa Kahadean kan langit, kundî an naggigibo kan boót kan Amá Kong yaon sa langit.”

Daí pagpahaloyón an pagbâgong-buhay.

Huli ta sabi nganì ni San Pablo sa 1 Tesalonica 5,2: “Ta aram nindong marhay na máabót an aldaw kan Kagurangnan siring sa parahâbon, banggi.” Bakô saná na dapat kitáng matakot sa padusa huli kan satóng mga kasâlan, na daí ta aram kun nuarín máabót, kundî an pagbâgong-buhay pagtamà asín pagpakarhay kan satóng buhay. Kun boót tang makatalingkás sa kaoripnán nin kasâlan, maglakáw na kitá tulos ngonian sa dalan nin Kagurangnan.

…

GIYA SA PAGHIRÁS | Maghirás kun arín sa saimong buhay an kaipohan mong pondohón, po’nan, asín padagoson tanganing magbâgong-buhay sa Kagurangnan. | GIYA SA PAGHIRÔ | Bilang sararóng komunidad/pamilya, pâno kitá magsusuroportahan sa kanya-kanya niatong paghingowang magbâgo?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

Buksan Ta asin Linigan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Noviembre 30-Diciembre 6, 2025. Basahon an Evangelio gikan sa Mateo 24,37-44 (Enot na Domingo kan Adviento - A).

…

An Adviento halè sa adventus, tataramon na Latín na boót sabihon “pagdatóng.” An panahón kan Adviento, panahón nin pag-andam sa pagdatóng kan satóng Kagurangnan Jesu Cristo – sa duwá Niyáng pagdatóng. An enot na pagdatóng iyó kan Siyá ipinangidam ni Virgen María asín namundag sa kinâban. An ikaduwá Niyáng pagdatóng iyó an sa huríng panahón nin paghukóm sa mga buháy asín mga gadán asín kapanoan kan Saiyang Kahadean.

Sa Santa Misa, iní an sinasabi sa enot na Prefacio kan Adviento: “Sa enot na pagdatóng sa kapakumbabaan kan inakong lamán, inutób Niyá an katongdan kan daan na patakarán, asín binuksan para samô an dalan nin kaligtasan na daíng kasagkoran; tanganing sa ikaduwá Niyáng pagdatóng sa kamurawayan kan Saiyang kamahalan, ikapahilíng na gayo an nahamán Niyáng gibo, makamtan mi an panugâ na ngonian sa pagbantay, pinapangahasán ming halatón.”

Kayâ an Adviento nabábangâ sa duwáng kabtang. An enot na kabtang, na minápoón sa enot na Domingo hanggang Diciembre 16, iyó an pag-andam sa ikaduwáng pagdatóng ni Cristo. An ikaduwáng kabtang, sa Diciembre 17 hanggang 24, iyó an pag-andam sa Pasko kan Saiyang Pagkamundag.

Sa Pilipinas, an preparasyon sa Pasko minápoón sa Diciembre 16, sa mga Misa novenario na ináapód na Misa Aguinaldo, o Misa de Gallo, o Simbang Gabi.

Anó an tamà asín maninigong pag-andam niatò sa pagdatóng kan Kagurangnan? May saróng awit sa Adviento na pwedeng makatabang magsimbag: “Buksan ta asín linigan pusong may kakundían, ta máabót na si Cristo satuyang Kagurangnan.”

Buksan an Pusò

An pusong bukás, pusong namómoót. An pusong sarado, dai namómoót kundî pinapaoróg an sadiri. Kun minsan sarado an pusò huli ta nakulgan dati asín takót nang makulgan giraray. Alagad kun panô nin pagkamakasadiri asín takot an pusò, pâno iní mabubuksan asín mag-akò ki Jesús?

Sabi sa Kapahayagan 3,20: “Uya, nakatindog Akó sa may pintoan asín nagtututoktok. Kun igwa nin makádangóg sa Sakóng tingog asín magbukás kan pintoan, makikidagos Akó asín makikipamanggi, Akó Saiya asín siyá Sakô.” Sa tahaw kan Saiyang enot asín ikaduwáng pagdatóng, ngonian mismo nagtutoktok si Jesús sa satóng pusò na palaogón ta Siyá tanganing makamtan ta an gracia kan Saiyang presencia.

Linigan an Pusò

Siring na linilinig ta an haróng tanganing marhay pag-estaran asín presentable sa mga bisita, iyó man an dapat sa pusò na nagmamàwot sa Diós. Si San Pablo nagtukdô sa Roma 13,13: “Siring kun aldaw, maglakáw kitá susog sa dapat, bakô sa maatíng hurolnakan asín bururatan, bakô sa kaóragan asín karigsokán, bakô sa padaraóg-daogan asín irinoman.”

Natà kaipohan na malinig an satóng pusò? Nin huli ta kun panô iní nin atî nin kasâlan, pâno ta pa maaakò an gracia kan Kagurangnan kun daí nang lugár sa satóng pusò para Saiya? Sa satóng paglakbay sa Adviento, an satong mga pusong binuksan asín lininigan, magtalubò lugod sa gracia asín pagkamoot nin Diós.

…

GIYA SA PAGHIRÁS | Pâno mo bubuksan asín lilinigan an saimong pusò sa pag-andam sa Pasko kan Pagkamundag asín sa Ikaduwáng Pagdatóng kan Kagurangnan? | GIYA SA PAGHIRÔ | Bilang sararóng komunidad/pamilya anóng gawè nin espirituál na pag-andam an boót nindong gibohon sa laóg kainíng Adviento?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

Pinaoróg Karaháy sa mga Babae Gabós

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Diciembre 22-28, 2024. Basahon an Evangelio gikan sa Lucas 1,39-45 (Ikaapát na Domingo kan Adviento - C).

…

An istorya sa Evangelio iyó an pagsungkô ni Virgen María sa saiyang pinsan na si Sta. Isabél. Midbid man iní bilang Visitación, an ikaduwá sa mga Misteriong Maogmahon sa Santo Rosario. Anó an kahalagahán kainí sa kasaysayan nin satóng kaligtasan?

Pinapahayag kainí an pagkamarahayon ni Virgen María.

Garó bagá iní pruweba na daí nanggad násalâ an Diós Amâ sa pagpilì saiya na magin Inâ kan Saiyang Bogtong na Akì. Kaibá sa binaretà ki Virgen María kan angél na si Gabriel an pagbadós kan saiyang pinsan na si Isabél sa pagkagurang kainí asín kaidto nasa ikaanóm na bulan na. Huli kainí, daí nahalóy naghidalíng naglakbay si María sa kabubuldán kan Juda pasiring sa haróng ni Zacarías asín Isabél tanganing magtabang sainda.

Kayâ nganì kaidto pa man rinaranihán na si María nin mga henerasyón nin mga Cristiano nin huli ta aram nin kadakul na siya madodolokan sa saindang mga pangangaipo. Sa satóng diocesís, an devoción ta ki Virgen de Salvación minádará satô sa pagsabi: “An devotos mo surogón, sa mga sakit agawon.”

Alagad bakô saná intercesión ni María an mensahe kainí, kundî iní man nagin inspirasyon satô na arogon an saiyang pagkamarahayon asín pagkamatinabang. Nasusurat sa Hebreo 13,16: “Daí nindo paglingawán an paggibo nin karahayan asín pag-alay kapwa; an siring na mga sacrificio kagaya-gaya sa Diós.”

An darakulang destroso asín makuring pagsakit na dará kan minaagi pa sanáng mga bagyo sa satóng ronâ, patin an nagdadanay na kadukhaán kan satóng mga kahimanwá na pig-aaprobitsarán nin mga poderoso sa satóng sociedád, padagos na nagtátaó satô nin oportunidad na isabuhay, lalò na ngonian na Adviento asín Pasko, an pagtarabangán na iní.

Pinapahayag kainí na dará ni María an Emmanuel, Diós na yaon satô.

Siya an pigprofesía sa Isaías 7,14 na: “Uya, an virgen mangingidam, mangangakì nin lalaki, na ngangaranan niyang Emmanuel.” Kan si María nagbisita ki Isabél, ipinapangidam na niya si Jesús, asín an Saiyang presencia namatean kan mag-inang Isabél asín Juán (na nagluksó sa kaogmahan sa laóg kan popônan kan saiyang inâ). Kayâ sinabi ni Isabél an mga tataramon na nagin parte na kan pamîbî ki María: “Pinaoróg ka karaháy sa mga babae gabós, asín oróg pa karaháy an saimong Aking si Jesús (an bunga kan saimong popônan)”.

Sa saiyang pagsungkô asín pagtabang ki Isabél, bakô saná an saiyang sadiri an dará ni María kundî kaiba niya si Jesús. An pagigin Inâ kan Oróg Kahalangkaw especiál na privilegio ni María, alagad lambang sarô satóng mga Cristiano, sa gracia kan pagbonyag satô, dará man pirmi an Espiritu ni Cristo.

Kayâ pag kitá naggigibo nin karahayan, o nagsasabi nin totoo, o namómoót nin bolanos, o nagpapatawad sa mga nagkasalà satuyà – bakô saná an satóng sadiri an minagibo kainí kundî kaiba ta an Espiritu Santo na nagpapabunga kan satóng mga gibong herak asín naghihipnò sa satóng mga saradít na esfuerzo.

Sa Banál na Misa, may parte na sinasadól kitá na magpatinaraohan nin katoninongan. Gibohon ta man iní sa luwás kan Misa asín ihirás an Saiyang Espiritu sa paagi kan satóng mga gibong karahayan asín tabang.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin paghirás sa kapwa kan gracia nin Diós sa paagi kan satóng gibong karahayan o pagtabang.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Maogma kitá sa Kagurangnan!

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 15-21, 2024. Basahon an Evangelio gikan sa Lucas 3,10-18 (Ikatolóng Domingo kan Adviento - C).

…

An istorya sa Evangelio pwedeng basahon sa contexto kan Ikatolóng Domingo kan Adviento na inaapod man na Domingo kan Gaudete. An “gaudete” tataramon na Latín na an boót sabihon, “mag-ogma”. Huli ta an pag-andam sa Adviento saróng maogmang pag-andam.

Sa Evangelio, namamatean an pagkadagka asín paglaom kan mga tawong naghihinanyog sa mensahe ni San Juán Bautista.  Tinutukdò man niyá kun saén niatò makúkuá an tunay na kaogmahan.

Enot, an kaogmahan yaon sa katanosan.

May tolóng grupo na nagharapót ki San Juán kun anó an dapat nindang gibohon. Sa katawohan sinabi niyá: an may kakayahán na magtabang sa kapwang nangangaipo, gibohon iyán.  Sa mga parasíngil nin buwís: daí mandayà asín mangurakot. Sa mga soldados: daí mangotong asín maggamit nin dahás, asín makuntento sa sweldo.

An katanosan iyó an paglakáw sa dalan nin Diós asín pagsunód sa Saiyang kabôtan. Matanos an mga maimbod sa Diós asín matinabang sa kapwa; yaon sainda an Saiyang kaogmahan. Alagad an mga makasadiri asín maimot, asín an mga nagpapasakit sa kapwa huli sa korupsyon o pang-aapí – mababaw asin madaling maglipas an kinâbanon nindang kaogmahan.

Ikaduwá, an kaogmahan yaon sa katotoohan.

Tanganing máwarâ an mga saláng paghonà nin mga tawo, tulos nagpahayag si San Juán na bakô siyá an hináhalát na Mesías, asín sinabi pang bakô siyáng maninigò na maghubád kan sandalyas kan Mesías. Daí niyá kaipuhan mag-utík o maghambog, kayâ yaon saiya an kaogmahan nin Diós.

Si Jesús nagtukdô sa Juán 8,31-32: “Kun magpadagos kamó sa Sakóng tataramon, tunay Ko kamóng mga disipulos; mamimidbid nindo an katotoohan, asín itatalingkas kamó kan katotoohan”. An mga tawong naninindogan sa katotoohan, maski magabatan, nabubuhay na may katoninongan asín katalingkasan. Alagad an mga parautik, paralansé, asín nagpapalakóp nin saláng baretà, bakô talingkas kundî oripon kan prinsipe nin kaputikan, si Satanás, na an dará palsong kaogmahan, mga karâtan, pagbasol, asín kamundoan.

Ikatoló, asín oróg sa gabós, an kaogmahan yaon sa Kagurangnan.

Sabi ni San Pablo sa Filipos 4,4-5: “Danay kamóng mag-ogma sa Kagurangnan. Haraní na an Kagurangnan!” Tibaad magsabi kita: may saysay pa daw an pag-ogma sa máabót na Pasko, kun nag-aagi akó sa ngonian nin krisis asín kadiklomán; kun nawâran akó nin mahál sa búhay, o nin trabaho o negosyo; kun napápagál na ta sa halóy na panahón daí ko pa nakakamít an mga pangarap sa búhay?

An simbag: iyó, maninigò asín dapat na icelebrár an Pasko asín mag-ogma sa Kagurangnan. Nin huli na mismo sa satóng kadiklomán kayâ Siyá napadigdi bilang liwanag. Sa tahaw kan mga bagyo sa satóng búhay, Siyá an pailihan. Sa paghampang ta sa mga kadipisilan asín agyat nin búhay, Siyá an masasarigan.

Sabi ni Jesús sa Mateo 11,28-30: “Madya kamó Sakô, gabós na napapagal asín nagagabatan, asín tatàwan Ko kamó nin kahingaloan. Sûngayá an Sakóng sakal asín makánood kamó Sakô, huli ta Akó mahuyò asín mapakumbabâ sa pusò, asín makakákuá kamó nin kahingaloan para sa saindong kalág. Ta an Sakóng sakal masayon asín an Sakóng pâsan magián.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin pagtabang sa kapwa, o panindogan sa katotoohan, o paglingkod sa Diós – na mapagál o dipisil, alagad maogma.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Andamá an Dalan kan Kagurangnan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 8-14, 2024. Basahon an Evangelio gikan sa Lucas 3,1-6 (Ikaduwáng Domingo kan Adviento - C).

…

Sa Evangelio, si San Juán Bautista “naghaharubay kan bonyag nin pagbaklê para sa kapatawadán nin mga kasâlan”. An “pagbaklê” sa orihinál na Griego iyó an tataramon na “metanoia”, na an kahulugán “pagbâgo nin isip” pasiring sa pagbâgong-búhay. Iní an pangenot na mensahe kan panahón kan Adviento. Anó an mga kaipuhan niatong bâgohón asín gibohon?

Bâgohon an mga saláng kaisipan.

Lalò na an satóng pagkaarà sa kapangyarihan asín kayamanan. An istorya sa Evangelio nagpoón sa pagpamidbid sa pitóng pinakamakapangyarihan na mga tawo kan panahón asín lugár na idto: si Tiberio Cesár, emperadór kan Roma; si Poncio Pilato, gobernadór kan Judea; an mga tetrarcas na si Herodes, Felipe, asín Lisaniás; asín an duwáng halangkáw na padì, si Anas asín Caiafas.

Alagad kan dumatóng an tataramon nin Diós, itinaó bakô sa mga iní kundî ki Juán, akì ni Zacarías. An pagkákaibá ni Juán sainda, tinuyo tanganing ipahilíng an kasaditan asín kababawan kan saindang kapangyarihan kumpará sa kadakulaan asín kahalagahán kan mensahe nin kaligtasan na dará ni Juán para sa bilog na kinâban.

Kaipuhan na salidahan an satóng lumang kaisipan tanganing maakò an Marhay na Baretà. Kun an tentación panlalansé tanganing an tawo magkasalà, an Marhay na Baretà iyó an katotoohan na mátalingkas sa tawo sa kaoripnán nin kasâlan.

Iayon an boót sa kabôtan nin Diós. 

Iní an kabôtan kan Diós Amâ: na an Saiyang Akì manitawo “huli sa satóng mga tawo asín huli sa satóng kaligtasan”. Sabi ni San Pablo sa Roma 5,8: “Alagad ipinamidbid nin Diós an Saiyang dakulang pagkamoot satô:  kaidto pang parakasalà kitá, nagadán na si Cristo para satô.”

Katakód sa kabôtan na iní kan Amâ an profesía sa Lumang Tipan, sa Isaias 40,3, dapít sa “tingog na nagkukurahaw sa desierto,” na tandâ na daí nin Diós pinabayaan an Saiyang banwaan. Iní sinurat kan mga panahón na kadakul na Judío an nabihag asín nasa destierro (exile) sa Babilonia, kayâ an marhay na baretà kan saindang katalingkasan mahalè sa desierto, bakô na sa Jerusalém. Nagkatotoo iní kan buminagsak an Babilonia sa kamót kan imperiong Persia, asín an bâgong hadè tinugotan sindang makabalík sa Israel.

Alagad an kapanoan kainíng profesía nangyari sa Bâgong Tipan: ki Juán Bautista. Asín bakô na iní dapít sa mga kinâbanon na paraligtas laban sa mga kinâbanon man na kaiwal, kundî sa pagligtas ni Jesu Cristo kan gabós na linaláng. Kun iní an kabôtan kan Diós Amâ, an maninigong pag-andam kan dalan kan Kagurangnan iyó an pag-utób kan sinasabi kan tingog ni Juán asín pag-ayon kan satóng boót sa kabôtan kan satóng Paraligtas.

Akoon an bâgong búhay ki Cristo.

Anó an mangyayari kun sikwalón ta an kasâlan asín akoon an kaligtasan? Makakamtan ta an bâgong búhay ki Cristo. Giraray sabi sa profesía (Lucas 3,5-6; Isaías 40,4-5): “an gabós na kabâban papanoón, an gabós na bukid saká bulód papatagon, an mga tirikô magigin tanos, asín an mga lubák-lubák magigin pantay na dalan.”

Bakô iní dapít sa literál na mga kabâban, bulód, asín dalan, kundî sa bunga kan kaligtasan ni Cristo sa satóng búhay. Babangonon Niyá kitá sa satóng pagkabagsak sa kasâlan, rurumpagón Niyá an satóng kapaabaw-abawan, tatanoson Niya an satóng búhay – tanganing makacelebrár kitáng maninigò kan Pasko kan Saiyang Pagkamundag, asín maakò kitá sa Saiyang Kahadean sa aldaw kan paghukóm.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kun pâno binâgo nin Diós an saimong saláng kaisipan dapít sa saimong sadiri, o sa kapwa, o sa Saiya, o sa Saiyang kabôtan.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Adviento nin Paglaom

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 1-7, 2024. Basahon an Evangelio gikan sa Lucas 21,25-28.34-36 (Enot na Domingo kan Adviento - C).

…

An pighalean kan tataramon na Adviento iyó an Latín na advenire na an boót sabihon “pagdatóng”. Siísay an mádatóng? Daíng ibá kundî an satóng Kagurangnan Jesu Cristo, asin pig-aandamán ta an Saiyang duwáng pagdatóng: an enot Niyang pagdatóng kan Siya namundag digdi sa dagâ na sinecelebrár ta sa Pasko, asín an Saiyang Ikaduwáng Pagdatóng bilang mamuraway na Hadè asín Hukóm kan gabós. Idagdag ta pang pag-andaman an Jubileo nin Paglaom sa 2025.

An tema sa Evangelio iyó an Ikaduwáng Pagdatóng. Kayâ embes na dapít sa mga kaogmahan kan Kapaskuhán na nagdadangadang, an mensahe kainí dapit sa mga calamidád asín kahorasaan na mangyayari sa kalangitan, kadagatan, asín dagâ, na magdádará nin takot sa mga tawo. Alagad para sa mga Cristiano, iní dapat pag-andamán sa maogmang paglaom. Sabi ni Jesús sa Lucas 21,28: “magtindog kamo nin tiso, iítaas an mga payó, ta haraní na an pagtubós saindo.”

Garó bagá an Biblía, an kalikasan, asín kasaysayan, parareho nagpapasabóng na tanganing mangyari an makahulugán na pagbabâgo, kaipuhan ngûnang mag-agi nin dakulang krisis o katibaadan. Bâgo an kamurawayan kan Resurrección, kaipuhan ngûna mag-agi si Cristo sa Saiyang Pasión. Kaiba kan kaogmahan kan Kapaskuhan iyó an mga makuring gibo kan mga makapangyarihan asín pagkagadan nin mga inocentes.

May krisis man na pig-aagihan an mga tawong nagmamawot na magbâgo asín mapakarhay an buhay, nin huli ta an mga kasâlan na boót talikdan nagpipirit na makabalík giraray sa saindang búhay. Iní an pig-aagihan nin mga recovering alcoholic asín mga adik sa droga. Nangyayari man iní patí mga banál, siring ki San Agustín, San Francisco de Asis, San Ignacio de Loyola, asín ibá pa. An kaligtasan asín kabanalan naghahagad nin sacrificio.

Nangyayari man iní sa satóng banwaan na nag-aagi nin krisis asín pagsakit nin huli sa labi-labing korupsyon asín harâbasan, pagbahâ nin kaputikan, asín mga pang-aapí asín garadanan. Lugód an krisis na iní magpamatè satô nin pagkagutom asín pagkapahà sa katanosan, asín tanyogón kitá na maghingowa asín magtarabangán para sa pagbabâgo kan satóng sociedád.

Anó an dapat tang gibohon tanganing daí magpadaóg sa karâtan asín kasâlan, kundî mangoróg satô an paglaom asín magin maimbod sagkod sa panugáng kaligtasan?

Talikdán an kasâlan.

Pareho an mensahe kan Adviento asín Cuaresma dapít sa dapat niatong gibohon. Sabi ni Cristo sa Lucas 21,34, “Mag-ingat kamó, tibaad maggabát an saindong mga pusò huli kan ribong nin payó, pagkaburát, asín kahâditan kan aroaldaw na pagkabúhay”. Kayâ maglikáy sa pagpaoróg sa mga kaogmahan na minalipas; sa espiritual na kahugakan; asín sa pagkaarà sa kayamanan asín kapangyarihan.

Magbantay na daí malanse nin kaputikan.

An mga nagpapakalat nin disinformación na ginagamit an satóng mga takot asín kaluyahan tanganing magkabarangâ kitá asín isikwal an kapwa. Kayâ magdanay kitá sa paninindogan sa katanosan, katotoohan, pagkamoot sa kapwa, asín pagkamaimbod sa Diós. Sabi ni Cristo sa Lucas 21,19, “Kun magdanay kamó, makakamtan nindo an búhay”.

Magpamîbî sa paghagad nin Gracia.

Nin huli ta kun kitá saná, daí ta kakayanon an mga darakulang agyat nin búhay. Maghagad kita sa Diós siring kan hinagad ni San Pablo sa Tesalonica 3,12: “pataluboon asín pasúpayón kamó kan Kagurangnan sa pagkaminoroót-mootan asín sa pagkamoot sa gabós.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin personál na krisis o inagihan na kadipisilan, asín kun pàno namatean an presencia nin Diós sa mga panahón na iní.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Mangyari Sako susog sa Saimong Itinarám

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 17-23, 2023. Basahon an Evangelio gikan sa Lucas 1,26-38 (Ikaapát na Domingo kan Adviento - B).

…

An istorya kan Anunciación nakatakód sa istorya kan paglaláng kan kinâban. Susog sa Genesis, sa kapinônan, an kinâban nasa kadiklomán, nalalantupan nin tubig bahâ, asín daíng nabubuhay. Sa paglaláng, an Diós nagtaó nin ordén sa karaotan, liwanag sa kadiklomán, asín buhay sa lugár na daíng buhay. Sa lambang aldaw nin paglaláng, nahiling nin Diós na marhay an Saiyang mga gibo. Alagad nag-abót an kasâlan, asín rinaót an bilog na linaláng. Iní sinisimboló kan pagsuway sa Diós kan enot na mga tawo, si Eva asín Adán.

Sa Anunciación, kan binaretà ni Angel Gabriel ki Virgen María na siya an napilì nin Diós na magin inâ kan Akì kan Oróg Kahalangkáw, nagsimbag siya sa Lucas 1,38: “Mangyari sako susog sa saimong itinarám”. Sa pagsunód ni María sa kabôtan kan Amâ, na kabaliktaran kan pagsuway ni Eva, an Diós nanitawo asín nagpoón an proceso kan bâgong paglaláng asín pagtubós sa mga inoripon nin kasâlan.

Anó pa an kahulugán kan pag-iyó ni María sa Diós na maninigò asín dapat na pangarogan niato sa maimbod na pagtubód sa Saiyang kabôtan asín pag-andám sa pagdatóng kan saiyang Akì?

Pagtugot na bâgohon kita nin Diós. Kan nag-iyó si María binâgo nin Diós an saiyang buhay, ginibo siyang parte sa oróg kadakulang plano nin pagligtas sa bilog na kinâban halè sa kaoripnan nin kasâlan asín kagadanan pasiring sa kapanoan nin buhay sa Saiyang Kahadean. Siring man, sa pagsunód ta sa Saiyang kabôtan, babàgohón Niya man an satong buhay.

Sabi ni San Pablo sa Filipos 1,6: “Tiwalà ako na an nagpoón saindo kan marhay na gibo, mapadagos kaiyan sagkod na matapos, sa aldaw ni Cristo Jesús.” Kayâ kun sa puntong iní kan satong buhay, naghahanap kita nin direksyon, pônan ta sa pag-iyó sa kabôtan nin Diós. O kun nawawarâ man kita sa dalan, balikán ta an mga naenot niatong pag-agi sa dalan nin Kagurangnan.

Pagsayuma sa anoman na kontra sa kabôtan nin Diós. An pag-iyó ni María nangangahulugán man kan saiyang pagtalikód sa ibáng mga plano ninda ni San José sa buhay, nin huli sa mas halangkaw na pangapodan nin Diós. An satong pagsunód sa Diós nangangaipo bakô saná kan paggibo nin karahayan kundî kan satong pagtalikód sa kasâlan.

Iní an pangapodan ni Juan Bautista, asín ni Jesu Cristo kan Siya duminatong na. Kaya kun inakò ta na si Cristo, sabi ni San Pablo sa Efeso 4,22-24: “iapón na an lumang pagkatawo kan enot nindong pagkabuhay, na nalálapâ sa madayang kamâwotan; magpakabâgo sa Espiritu kan saindong isip, asín isûlot an bâgong pagkatawo na linaláng susog sa Diós.”

Panugâ nin pagdusay sa bilog niatong buhay. Kan si María nag-iyó sa sinabi ni angel Gabriel, bako iní sarong vez saná kundî saiya nang ginigibo dati pa bilang maimbod na akì kan Amâ asín kan pag-abót ni Jesús, bilang mamomôton Niyang inâ.

Sabi ni Cristo sa Lucas 9,23: An boót na magín disipulos Ko, “maglingáw sa sadiri, magpâsan kan saiyang cruz aroaldaw, asín magsunód Sako”. Aroaldaw. Nin huli ta an katuyuhán kan satong pagbabâgo iyó na kita magin kabaing ni Cristo, asín iní daí mangyayari nin sararoan, o sa madalíng panahón saná, kundî sa aroaldaw tang pagpilì kan Saiyang kabôtan sa bilog niatong buhay.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás kun pàno binâgo o padagos pang binabâgo nin Diós an satong buhay kan pinilì tang magbalík sa paglakáw sa Saiyang dalan.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Nagháhalát kan Maogmang Paglaom

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 17-23, 2023. Basahon an Evangelio gikan sa Juan 1,6-8,19-28 (Ikatolóng Domingo kan Adviento - B).

…

Sa Evangelio pig-istorya an pagdatóng kan mga sugò na mga padì asín mga Levita halè sa Jerusalem, asín sa paghapót ninda ki Juán Bautista kun siisay siya, mas nálinaw pa sa gabós an saiyang misyon asín mensahe. Siya an tingog sa kalantadán na nagkukurahaw na tanoson an dalan para sa Kagurangnan, susog sa profesía sa Isaias 40,3. Inaandam ni Juán Bautista an mga tawo kaidto sa enot na pagdatóng ni Jesús, asín ngonian sa ikaduwá Niyang pagdatóng sa kamurawayan. Inaandam niya man kita sa pag-akò kan kaogmahan kan Pasko.

Dakúl an mga nakatakód na kaogmahan sa Pasko: an mga pailaw asín dekorasyón, an mga tiripon asín karaonán, an mga regalo para sa mga akì, an caroling na nakabalík na giraray pakatapos kan pandemia, an bonus asín 13^th month pay kan mga empleyado, an dakulang ganancia kan mga nagnenegosyo, asín iba pa. Alagad bakô an mga iní an tunay na kaogmahan kan Pasko. Pâno kun máwarâ an mga iní sa panahón kan Pasko, may kaogmahan pa daw kita?

Kayâ minabalík kita ki Juán Bautisa bilang tandâ nin kaogmahan – maski garó daí honaon. Nin huli ta bakô siya mahilig sa mga handaan, kundî pirming nag-aayuno asín daí nag-iinóm nin alak; bakô siya mahilig sa mga kinâbanon na bagay, kundî bolanos sa saiyang misyon. Alagad daí manenegarán na yaon saiya an kaogmahan nin Kagurangnan. Sabi sa Filipos 4,4-5 (na iyó an pighalean kan tataramon na “Gaudete”, na apód sa Ikatolóng Domingo kan Adviento): “Danay kamong mag-ogmá sa Kagurangnan: giraray sinasabi ko, mag-ogmá kamo. Ta an Kagurangnan haraní na.” An kaogmahan kan Pasko nasa Kagurangnan.

Sa Pagpatawad nin Diós. Makusóg an boót ni Juán Bautista na mangapodan sa mga tawo na magbaklî sa saindang kasâlan nin huli ta aram niya na an Diós pirming nagpapatawad sa siisay man na maghagad nin kapatawadán asín boót magbâgo. Sabi pa sa Isaías 55,7: “Bayaan kan tampalasan an saiyang dalan, asín kan tawong daíng data an saiyang honà-honà; balikán an Kagurangnan na maheherak Saiya, an satong Diós, ta mayaman sa pagpatawad.”

Sa Presencia nin Diós. An pagsolsol asín pagpatawad mga pag-andám sa pag-akò kan kaogmahan kan pagdatóng kan Kagurangnan, an Saiyang presencia iyó mismo an gracia nin Diós. Kayâ an presencia kan Diós na nanitawo iyó an pinakadakulang kaogmahan kan Pasko. An Saiyang presencia namamatean nin mga tawong may pagkámoót sa pusò. Nin huli ta kun an pusò panô nin pagkamakasadiri, pagkaurí, asín pagkaongís sa kapwa, daíng lugár para sa presencia nin Diós. Sabi sa 1 Juán 4,16: “An Diós pagkámoót, an nagdadanay sa pagkámoót nagdadanay sa Diós, asín an Diós nagdadanay saiya.”

Sa Paglaom sa Diós. An gabós na kaogmahan sa dagâ, kaiba na an mga banál na celebración kan Pasko asín Eucaristía, mga patanâ kan dakulang kaogmahan sa pagdatóng kan kapanoan kan Kahadean. Siring man sa mga nag-aagi nin kadikloman asin kadipisilan sa buhay, an Diós nagtataóng paglaom na an diklom matatapos sa pagdatóng kan aldaw. Kayâ si San Pablo nagtukdô sa Roma 12,12: “Mag-ogmá kamo sa paglaom, magmatinios sa kasakitan, magmaimbód sa pamibi.”

Pagpatawad, presencia, asín paglaom: an mga iní an kaogmahan sa Kagurangnan, mantang kita “nagháhalát kan maogmang paglaom asín pagdatóng kan satong Kagurangnan na si Jesu Cristo”.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás kan saimong mga kaogmahan na namatean na o hinahalat pa ngonian na Adviento asín sa Pasko.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Andamá an Dalan kan Kagurangnan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 10-16, 2023. Basahon an Evangelio gikan sa Marcos 1,1-8 (Ikaduwáng Domingo kan Adviento - B).

…

Sa enot na mga verso kan Evangelio ni San Marcos, pinapamidbid si Juán Bautista bilang katupadan kan profesía sa Isaías 40,3: na siya idtóng “saróng tingog na nagkukurahaw sa kadlagán”. An saiyang kurahaw: “Andamá an dalan kan Kagurangnan, patanosa an Saiyang mga agihan.”

Pàno ta aandamón an dalan kan Kagurangnan? Pàno ta tatanoson an Saiyang mga agihan? Siring sa mga tawo kaidto na nagdarangog ki Juán Bautista, nagkurumpisál kan saindang mga kasâlan, asín nagpaboronyag sa Salog Jordan bilang tandâ kan saindang kamâwotan na magbâgong-buhay – siring sainda, sa pagbaklè asín pagbâgong-buhay man niato.

Pagtanos nin isip. An kapinônan nin pagbâgong-buhay iyó an pag-akò na kita násalâ sa pakasabot – tibaad naghonà kita na makukua ta an kaogmahan sa mga saláng bagay, o naghonà kita na an salâ tamà, asín an tamà salâ. Ta iyó iní an natura kan tentación: na kita lansehón sa kun anó an tamà asín marhay.

Pag inakò ta ná an satong mga saláng paghonà, an sunód iyó an pag-ayon kan satong isip asín boót sa kabôtan nin mahál na Diós. Asín anó an Saiyang kabôtan? Sabi sa 2 Pedro 3,9: “habô Niya na may máwarâ kundî na gabós makapagbaklè”. An pag-ayon kan satong isip asín boót sa katanosan nin Kagurangnan – iyan an pagtanos kan Saiyang aagihan.

Pagbâgo nin pusò.  An pagbâgo bakô saná sa isip, bakô saná sa pagtubód sa tamang doctrina o katukdoán morál, kundî sa pagpararom kan satong pakiibahan o relación sa mahál na Diós. An pagbaklè iyó an reconciliación – an pagraháy kan náraót na relación – niato asín nin Diós. Kayâ bagá reconciliación an ngaran kan sacramento nin pagkumpisál kan satong mga kasâlan asín pag-akò kan Saiyang kapatawadán.

Sabi ni Cristo sa Juán 14,6: “Ako an dalan, an katotoohan, asín an buhay, daí nin makakaduman sa Amâ kun bakô Sako”. An Diós na nagpamidbid na Amâ asín si Cristo na nagpamidbid na Akì, padagos na nagpapamatè sato kan Saiyang pagkaherak asín nag-aagda sa mas hararom pang pag-iribanan sa Espiritu na nag-eerok na sa satong pusò nin huli sa gracia kan bonyag asín mga sacramentong inakò niato.

Pagsaksi sa gibo. Si Juán Bautista nagsaksi mismo sa saiyang pangapodan sa mga tawo, bakô saná sa tataramon kundî man sa gibo. Sa saiyang kasikatan daí náwarâ saiya an saiyang misyon: na ipamidbid si Cristo sa katawohan. Sabi niya nganì sa Juán 3,30: “Siya kaipuhan magdakulà, ako magsadít”.

An saiyang paglingkod na mahigós asín mapakumbabâ saróng makusóg na pagsaksi sa hampang kan kultura ngonian na panahón nin pagkamakasadiri, kapaabáw-abawan, asín pagkaurí. Siring ki Cristo na nagsaksi sa radikál na pagsunód sa kabôtan kan Amâ, si Juán Bautista nag-atang man kan saiyang buhay bilang kapanoan kan saiyang misyon.

Sa panahón kan Adviento, an pag-andám nin dalan para sa Kagurangnan iyó an pagtanos kan satong isip asín pag-ayon kan satong boót sa kabôtan kan Amâ; an pagbâgo kan satong pusò asín pagpakarhay kan náraót tang relación sa Diós; asín an pagsaksi kan satong mga marhay na gibo bilang kasangkapan kan pagkamarahayon asín pagkaherak nin Kagurangnan.

…

GIYA SA PAGHIRÁS SA SADÍT NA KOMUNIDAD O FAMILIA • Maghirás nin experiencia nin pagkáwarâ sa dalan asín pagbâgo pabalik sa Kagurangnan.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Magpúka asin Mag-Andam

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 3-9, 2023. Basahon an Evangelio gikan sa Marcos 13,33-37 (Enot na Domingo kan Adviento - B)

…

“Magpúka kamo!” Iní an sinabi kan satong Kagurangnan sa kapinônan asín katapusan kainíng Evangelio. Daí na gayo ginagamit an tataramon na iní sa aroaldaw, asín nadadangog na saná kadaklan na beses sa laóg nin simbahan. An kahulugán kainí: magdanay na matá, o daí magkaturog, o magbantáy (stay awake, be vigilant).

Sa paglaóg ta sa Panahón kan Adviento, anó an satong pagpúpukahan o pagbabantayán, asín pag-aandamán? An pagdatóng ni Jesu Cristo. Sa katunayan, an Adviento halè sa “adventus”, tataramon na Latín na an kahulugán “pagdatóng”. Asín bakô sanáng saró, kundî duwáng pagdatóng an satong pig-aandamán sa Adviento: an enot Niyang pagdatóng na an Saiyang pagkamundag pigcecelebrár ta sa Pasko, asín an Saiyang ikaduwáng pagdatóng sa paghukóm kan mga buháy asín mga gadán.

Pàno kita maninigong magpúka asín magbantay sa duwáng pagdatóng kan satong Kagurangnan?

Bantayán an sadiring pusò. Sabi ni Jesús sa Mateo 6,14: “Kun saén an saray mong yaman, diyan man an saimong pusò.” Boót sabihon, kun anó an satong namomòtan asín pinapahalagahán, iyán an laóg kan satong pusò.

Kun boót tang magpúka asin mag-andam sa pagdatóng kan Kagurangnan, minamàwot man daw kan satong pusò an mga mahalagá sa Kahadean, o napapanô pa iní nin mga kinâbanon na bagay? Para ki San Ignacio de Loyola: “Kaipuhan aram ta an satong mga tentación asín mga pagkatakot, an mga consolación asín mga liwanag na tinaó sato nin Diós, asín an manlaen-laen na mga paghirô sa laóg kan satong puso.”

Sabi ni Jesus sa Lucas 21,34: “Mag-ingat kamo, tibaad maggabát an saindong pusò sa karigsokán, pagkaburát, asín kasibotan kan aroaldaw na pagkabuhay asín biglaón kamo kan aldaw na iyan.” Sa Panahón kan Adviento, mag-ingat kita na daí madará sa mga kasibotan sa palibot, lalo na sa talamák na comercialismo sa Kapaskuhán, ta tibaad daí ta lugód mákua an tunay na kahulugán asín gracia kan Pasko.

Magmuklat sa mga pasabóng nin Diós sa satong buhay. An Diós daí nagpopondo sa pagwaras sato nin biyayà asín paggiya sato sa mga tamang dalan. Kayâ pirming imuklát an satong mga matá asín buksan an mga talinga.

Sa Panahón kan Adviento asín Pasko masasabatan niato an mga “Anunciacion” nin mga tawong nagin bukás sa pangapodan nin Diós na magin parte kan Saiyang dakulang plano para sa katawohan – si María, Zacarías, José, patín mga mago asín pastores.

Sa kanya-kanya nindang mga paagi nagpúka sinda para sa Kagurangnan – sa saindang kaimbodán man, o kabanalan, o katanosan, o kadonongan, o kadukhaán. Kayâ kan uminabót an pasabóng nin Diós, tulos sinda nagtubód asín nagsimbag sa pangapodan. Kun kita apodón man sa anoman na misyon, makaarog man lugód kita ki Virgen María, na sa Lucas 2,38 nakasabi sa angel: “Uya an sorogoón nin Kagurangnan, mangyari man lugód susog sa saimong itinarám”.

Magmangno sa kapwang kaiba sa pagbaklay. An Adviento siring sa saróng pagbaklay na sinisimbolo kan mga kandilà sa Corona de Adviento na pasarô-saróng pinápaláadan cada Domingo sa panahón na iní. Igwa kitang mga kairiba sa dalan, asín an satong pagpúka asín pagbantay dapít man sa pagmangno sa satong kapwa.

Daí man lugód kita maabtan na nagkakaturog mantang may kapwang nangangaipo, kundi sinasabuhay an pagsadól ni San Pablo sa 1 Tesalonica 5,11: “Pakusogá nindo an boót nin lambang sarô, asín magpatinarabang-tabangan na mag-uswag.”

…

GIYA SA PAGHIRÁS SA SADÍT NA KOMUNIDAD O PAMILYA • Sa Panahón kan Adviento, anó an saimong mga boót gibohon, o dating ginigibo na, tanganing mag-andam sa pag-abót kan Kagurangnan?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

 

An Anunciación ki San Jose

 

Giya sa Prayer-Meeting nin mga Saradit na Komunidad nin Pagtubód (SAKOP) para sa semana kan Disyembre 18-24, 2022. Basahon an Evangelio gikan sa Mateo 1,18-24 (Ikaapát na Domingo kan Adviento).

…

Sa evangelio iniistorya an pagbaretà kan angel ki San Jose. Sa Evangelio ni San Lucas an anunciación nangyarì ki Santa Maria, alagad sa Evangelio ni San Mateo, ini nangyarì ki San Jose. May iba pang anunciación sa laog kan dakulang istorya kan pagkamundag ni Jesus: ki Zacarias, sa mga pastores, asin sa mga mago.

Ano an itinutukdò sato kan anunciación ki Jose?

Enot, an Dios an naenot na namoot asin nagraní sa tawo. Igwa nin dakulang plano an Dios para sa katawohan: na ihàwas kita sa kasâlan asin darhon sa Saiyang Kahadean. Sa sadiring kakayahan dai ta kayang iligtas an satong sadiri sa kasâlan asin kagadanan, sa sadiring kaisipan dai ta maabot saboton an misterio kan Kahadean. Kaya – siring ki Jose na nariribongan kun ano an dapat na gibohon sa baretà saiya ni Maria na ini badós na asin an akì bakô gikan saiya – an Dios na mismo an nagrarani para itukdô sato si Cristo, an Saiyang pagkamoot na nanitawo para sa katawohan. Sabi sa 1 Juan 4,19: “An Dios an enot na namoot sato, kayâ namomoot kita.”

Ikaduwá, sa pag-akò ni San Jose kan kabòtan nin Dios, naotób an mga profesía dapit sa Mesías na madatong. Sinabi saiya kan angel na naotób ki Maria an nasusurat sa Isaias 7,14: “may sarong virgen na mangingidam asin mangangaki nin lalaki, asin Emmanuel an ingangaran Saiya.” Dangan sa 2 Samuel 7,12-13, may panugâ an Dios ki Hadeng David: “Gigibohon kong hadè an sarô kan saimong mga aking lalaki asin papakusogón Ko an saiyang kahadean. Siya an matugdok nin Templo para Sako, asin papagdanayon ko an saiyang trono sagkod pa man.”

Sa Mateo 1,1-17 nakalista an mga ngaran nin mga kapag-arakian poon ki Abraham sagkod ki Hadeng David, sagkod ki Jose asin ki Jesu Cristo. An pag-akò ni Jose ki Maria bilang agóm, asin kan aking nasa popònan niya bilang saiyang akì, iyo an nagpabilang ki Jesus sa kapag-arakian ni David.

Ikatoló, nagsasaksi ining istorya sa kadakulaan kan pusò ni San Jose. Mahihiling ini sa mga pagpipilì na ginibo niya. Sa tahaw kan saiyang kapurisawan, pinili niyang mamoot. Habô niyang ipasupog si Maria, ni iosip sa autoridad tanganing patawan nin padusa. Sa pasabóng kan angel, pinilì niyang magtubod asin tulos sunodón an kabòtan nin Dios. Pagkagimatá, tulos ginibo an ipinapagibo saiya kan angel: inakò niya si Maria bilang saiyang agóm, asin sa bilog niyang buhay nagin marhay na padre de familia.

Si Papa Francisco, sa saiyang Surat Apostolico Patris Corde (May Pusò nin Amâ), nagsabi dapit ki Jose: “Maski sa tahaw nin mga takot ni Jose, nagtatrabaho an kabòtan, kasaysaysan, asin plano nin Dios. Kayâ tinutokdoan kita ni Jose na kaibahan sa pagtubód sa Dios an pagtubód man na may mahahaman Siya sa paagi niato maski kadakul an satong mga natatakotan asin kaluyahan. Tinutokdoan man niya kita na sa tahaw nin mga bagyo sa satong buhay, dai nanggad kita matakot na pilion an Dios na iyo an magiya sato.”

Siring ki San Jose, pirmi ta man lugód mahiling asin mamatean an pagkamoot nin Dios sa satong buhay tanganing danay na hanapon an Saiyang kadunongan asin kabòtan, asin pakakua kan mga ini, maogma tang sunodón asin isabuhay.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia kun pa’no kita inapód nin Kagurangnan na magsarig Saiya asin gibohon an Saiyang kabòtan, sa tahaw nin mga katibaadan.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer/Silence • Gathering Song • Opening Prayer • Gospel Reading • Reflection • Sharing of Faith Experience • Prayers of the Faithful • Closing Prayer (Spontaneous and Our Father) • Closing Song