Alleluia! Si Cristo Nabuhay-liwat!

 

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana kan Abril 5-10, 2026 sa laóg kan Octava kan Pagkabuhay-Liwát. Basahon an Evangelio gikan sa Juán 20,1-9 (Domingo de Resurrección).

…

An satóng Kagurangnan Jesu Cristo nabuhay-liwát susog sa sinabi Niyá! Alleluia! Sabi ni San Pablo sa 1 Corinto 15,14: “Kun si Cristo daí binuhay-liwát, sayang an samóng paghulit asín sayang an saindong pagtubód.” Iní an misteriong patugmadan kan satóng pagtubód.

Anó an boót sabihon kan Pagkabuhay-liwát sa mga gadán?

An Resurrección o Pagkabuhay-liwát ni Jesús sa mga gadán iba man sa mga istorya nin pagbuhay Niyá sa mga nagadán na sa mga Evangelio, siring bagá kan aking daragita ni Jairo, kan solong aking lalaki kan balo sa Naím, asín kan Saiyang amigong si Lazaro. An mga milagrong iní ináapód na “resusitación” nin huli ta sindang mga binuhay halè sa kagadanan, pag-abót kan saindang panahón, nagadán man giraray. Alagad an Resurrección iyó an pagkaigwa nin bâgong nivel nin existencia, nin kapanoan nin buhay na daíng kasagkoran, asín an daí na pag-agi sa kagadanan sagkod pa man.

Sabi sa Katekismo (CCC 646): “An pagkabuhay-liwát ni Jesús naiiba sa esencia. Sa Saiyang nabuhay na hawak, nag-agi Siyá halè sa estado nin kagadanan pasiring sa bâgong buhay na lampas sa kategorya nin panahón asín espacio. Sa pagkabuhay-liwát ni Jesús an Saiyang hawak napanô kan kapangyarihan kan Espiritu Santo: nakikihirás Siyá sa diósnon na buhay sa Saiyang kamurawayan.”

An Pagkabuhay-liwát ni Jesús iyó an pruweba asín panugâ kan satuyà man na pagkabuhay-liwát sa huríng aldaw. Sa Saiyang pagkabuhay-liwát, binâgo Niyá an ordén kan kinâban. An huríng padumanan nin tawo bakô na kagadanan, kundî buhay sa Kahadean nin Diós.

Dangan, sa paghilig Niyá sa mga gadán, dinumán Niyá an mga matanos asín banál na halóy nang nagháhalát nin kaligtasan, asín binuksan an langit para sainda asín para man sa gabós na katawohan.

Kayâ si San Pablo nagtukdô sa Colosas 1,18-20 na si Cristo “an payó kan Saiyang hawak na iyó an Simbahan; Siyá an kapinônan, an enot na binuhay-liwát sa mga gadán. Huli ta binoót nin Diós na an bilog Niyáng pagka-diós mapasa-Akì. Binoót man Niyá na sa paagi kan Saiyang Akì an gabós makipag-olían Saiya.”

Kun arog kainí kahalagá an Resurrección, anó man an hinahagad satô?

Na kitá magtubód tanganing maligtas. Sabi ni San Pablo sa Roma 10,9: “Kun pinapahayag mo sa saimong ngusò na si Jesús an Kagurangnan, asín minatubód ka sa saimong pusò na binuhay Siyá liwát kan Diós sa mga gadán, makakaligtas ka.”

An siguradong tandâ kan pagtubód na nakakaligtas, iyó an satóng pagsunód sa Saiyang kabôtan gurâno man kadakúl kan kaolangan o kakusóg kan tentación, siring na si Cristo nag-agi ngôna sa Pasión bâgo an kamurawayan kan Resurrección. Sabi giraray ni San Pablo sa Roma 6,8: “Kun kitá nagadán kaiba ni Cristo, kitá nagtútubód na mabubuhay man kitá kaiba Niyá”.

Kayâ saróng importanteng parte kan liturgía sa Domingo de Resurrección iyó an Pagbâgo kan mga Panugâ sa Bonyag. Igwa iní nin duwáng kabtang: an pagsikwal ki Satanás, sa saiyang mga maraot na gibo, asín mga padayà; dangan an pagpahayag nin pagtubód sa Diós Amâ na oróg na namoot satô, sa Diós Akì na nagligtas satô, asín sa Diós Espiritu Santo na danay na nagpapabanál satô. Kun isabuhay ta an satóng mga Panugâ sa Bonyag, makakamtan ta an graciang dolot kan pagkagadán asín Pagkabuhay-liwát ni Jesús: kaligtasan asín kapanoan nin buhay sa Saiyang Kahadean.

…

GIYA SA PAGHIRÁS | Sa pânong paagi mo naisasabuhay – o daí – an mga Panugâ sa Bonyag na satóng binabâgo cada taón sa Domingo de Resurrección? | GIYA SA PAGHIRÔ | Anó an pwede nindong magibo bilang komunidad/pamilya tanganing magtarabangán na isabuhay an mga Panugâ sa Bonyag?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

An Gracia nin Tamang Pagpili

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Febrero 15-21, 2026. Basahon an Evangelio gikan sa Mateo 5,17-37 (Ikaanóm na Domingo sa Ordinariong Panahón - A).

…

Sa Evangelio an satóng Kagurangnan Jesu Cristo nagsabi: “Daí kamó maghonà na nagdigdi Akó sa pagparà kan Tugon o mga Profetas; daí Akó nagdigdi sa pagparà kundî sa pag-utób.” Anó an boót Niyáng sabihon kainí?

Enot, na si Jesús an kapanoan kan pagpamidbíd nin Diós. Sabi sa Hebreo 1,1-2: “Sa dakúl na beses asín manlaen-laen na paagi kaidtong panahón, nagtarám an Diós sa satóng mga magurang sa mga profetas; sa kahuri-hurihi, ngonian na mga aldaw, nagtarám Siyá satô sa Akì.”

Ikaduwá, an Saiyang katukdoán iyó nanggad an katotoohan dapít sa Kahadean asín sa kabôtan nin Diós para sa tawo. Sabi nganì ni San Pedro sa Juán 6,68: “Sa kiísay pa kamí maduman, Kagurangnan? Yaon sa Saimo an mga tataramon nin buhay na daíng kasagkoran.”

Sinabi iní ni Jesús nin huli ta may mga nagsasabi na nagtutukdò Siyá nin tumang sa mga nasusurat sa mga libro nin mga Tugon asín mga Profetas. Daí Niyá sinasalidahan an Banál na Kasuratán, kundî tinutukdò Niyá an tunay na kahulugán kainí – na nálingawan o nasasalâ sa katukdoán kan mga escribas asín Fariseos.

Kayâ sinabi Niyá sa Mateo 5,20: “Kun daí makalampás an saindong kasuripotan nin labí sa mga escribas asín Fariseos, daí kamó makakalaóg sa Kahadean kan langit.” Anó namán an kahulugán kainí?

An kasuripotan o katanosan na sinasabi ni Jesús daíng ibá kundî an maimbod na pag-utób sa kabôtan kan Amâ. An mga escribas asín Fariseos ginagamit an Banál na Kasuratán susog sa sadiri nindang kaisipan asín kabôtan. Kayâ matanos sinda sa sadiring paghonà (self-righteous), alagad bakô sa matá nin Diós.

Kun an satóng katanosan makaarog sainda, giromdomón an madóon na sinabi ni Jesús sa Mateo 7,21: “Bakô gabós na nagsasabi Sakô, ‘Kagurangnán, Kagurangnán,’ makakalaóg sa Kahadean kan langit, kundî an naggigibo kan boót kan Amâ Kong yaon sa langit.”

Kayâ pinakarháy Niyá para satô an mga tugon na enot na tinaó nin Diós ki Moises.

Susog ki Moisés, daí ka manggadán. Sabi ni Jesús, daí magtanóm nin dagit, igalang an dignidad nin kapwa, asín makipag-olían sa kaiwal. Anó an sinasabi Niyá ngonian sa pagsuporta nin kadakul na Cristiano sa mga paragadan para daá sa seguridád nin saindang pamilya?

Susog ki Moisés, daí ka magsambáy. Sabi ni Jesús, likayán patí an pag-isip nin marigsok sa kapwa asín rayoán an mga tentación sa lamán. Anó an sinasabi Niyá satô ngonian dapít sa media asín sociedád na panô nin imahe nin sexualidád asín imoralidád?

Susog ki Moisés, pwede an divorcio. Sabi ni Jesús, daí pagraotón an pag-ibahan nin mag-agóm na pinagsarô nin Diós. Anó an sinasabi Niyá satô ngonian dapít sa pagsulong nin divorcio sa Congreso?

Susog ki Moisés, daí magsumpâ nin basang asín utobón an panugâ sa Kagurangnán. Sabi ni Jesús, oróg sa pagsumpâ dapat magsabi pirmi nin katotoohan. Anó an sinasabi Niyá satô ngonian na lakopon na an paggamit nin disinformación asín kaputikan? 

Sa hurí, an nakakaligtas na katotoohan ni Jesús nagháhalát kan satóng desisyon. Kitá an mapilì kun anó an gigibohon asín kun siísay an susunodón. Nasusurat sa Sirach 15,17: “Sa atubang nin tawo yaon an buhay asín kagadanan, asín kun arín an pilíon niyá, itátao saiya.” Hagadon ta an gracia na pilíon pirmi an tamà, marhay, asín mamomôton susog sa kabôtan nin Diós.

…

GIYA SA PAGHIRÁS | Maghirás nin experiencia nin pag-utób nin arin man sa mga ini: “Daí ka manggadán”; “Daí ka magduróg sa bakô mong agóm”; “Daí ka magsaksing-putik.” | GIYA SA PAGHIRÔ | Sa sitwasyon kan satóng komunidad/pamilya ngonian, anóng kabôtan nin Diós an dapat tang panindogan asín gibohon?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

Asin kan Daga, Ilaw kan Kinaban

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Febrero 8-14, 2026. Basahon an Evangelio gikan sa Mateo 5,13-16 (Ikalimáng Domingo sa Ordinariong Panahón).

…

Sa Evangelio sinabi kan satóng Kagurangnan Jesu Cristo sa mga disipulos Niyá kaidto asín sagkod pa man, asín sa satô ngonian: kamó an “asín kan dagâ, an ilaw kan kinâban.” Anó an kahulugán kainí?

Enot, an kahalagaán kan asín.

Kan panahón ni Jesús ginagamit an asín bakô sanáng pampanamit sa pagkaon, kundî mas sa pagigin preservative kainí o pampalawig kan pagkalâbas (freshness) nin mga karne asín ibá pang pagkaon, tanganing daí tulos máraot o malapâ.

Iní an paliwanag ni San Crisóstomo dapít sa pagigin asín kan dagâ nin mga Cristiano: “An mga binâgo asín pinatalingkás na ni Cristo sa karâtan, asín itinaó sa pangataman kan mga apóstoles, saindang inasínán asín pinapadanay sa pagbabâgo na tinaó kan Kagurangnan. Sa paagi saná kan kapangyarihan ni Cristo napapatalingkás an mga tawo sa karâtan nin huli sa kasâlan; an katongdan kan mga apóstoles, an saindang magabát na trabaho, iyó na papagdanayon na daí na an mga iní makabalík sa dating karâtan.”

Ikaduwá, an kahalagahán kan ilaw.

Dificil an paghirô asín paggibo sa diklom, kayâ an ilaw naggigiya, nagpapatalingkas, asín nagdadagdag kakayahán.

Pâno kitá nagigin ilaw kan kinâban? Sabi sa Isaías 58,9-10: “Kun haleon mo sa tahaw mo an pang-aapí, an pagsaksing-putik, asín an pagpakaraot, kun tâwan mo nin tinapay an nagugutom asín an kalág na nagtitios basogón, masirang sa diklom an saimong ilaw asín an saimong dolóm magigin siring sa kaodtohan.”

Ikatoló, dapít ini ki Cristo asín sa Saiyang misyon.

Siyá an ilaw na nagpaparà sa diklom nin kasâlan, an asín na nagpapadanay satô sa gracia pasiring sa buhay na panô.

Ikaapát, hinihirás satô ni Jesús an Saiyang misyon.

Pag kitá naghihingowang magin asín kan dagâ dangan ilaw kan kinâban, nagsasaksi kitá ki Cristo. Sabi ni San Pablo sa 1 Corinto 2,2: “Mayò akóng binoót aramon halè saindo, kundî Jesu Cristo, asín iníng ipinakò sa cruz.” Iní an kahulugán kan pagigin disipulo Niyá, na kitá magin siring Saiya, asín sa pagsaksi Saiya makadará nin dakul pa na malakaw sa dalan pasiring sa Saiyang Kahadean.

Ikalimá, dapít iní sa kaimbodán.

An asín dangan ilaw tanganing mapakinabangan kaipohan nagdadanay an asgad asín liwanag. Daí nang pakinabang an asín kun iní magtâbang asín an ilaw kun puropalsok. Siring man an Cristiano, dapat an paggibo nin marhay bakô paminsan-minsan saná, an paglikáy sa kasâlan bakô kun facil saná.

Ikaanóm, dapít iní sa kadonongan.

Sa paggamit nin asín dangan ilaw kaipohan tamà saná, bakô kulang o sobra. Kun kulang sa asín, matâbang; kun sobra, maasgadon man. Kun an ilaw nakatagò, daíng pakinabang sa diklom; kun sobra man, nakakasuríaw o nakakasulô pa nganì. Siring man an Cristiano, tinâwan nin Diós nin consciencia asín kakayahán maghorop-horop, tanganing an katanosan sa Diós kaibahan an pagmakulóg sa kapwa, an pagkamoót asín katotoohan kaipohan dungán, asín an katarungan balansehón nin pagkaherak.

Ikapitó, dapít iní sa pagdusay nin sadiri.

Natutunaw an asín, napupodpod an kandilà, napupundido an bumbilya, nagigin abó an kahoy na kinalayohan. Alagad bakô sayang kun nagagamit sa karahayan. Siring ki Jesús na nag-sacrificio kan sadiri sa pagligtas satô, an Cristiano kaipohan magdusay man kan sadiri sa pagtabang sa kapwa, pagpakarhay nin banwaan, asín pagmuknâ kan Kahadean sa dagâ.

…

GIYA SA PAGHIRÁS | Maghirás nin experiencia na naisabuhay mo an pagigin asín kan dagâ o ilaw kan kinâban. | GIYA SA PAGHIRÔ | Bilang saróng komunidad/pamilya, anóng konkretong gibo o gawè an pwede nindong pagtarabangan tanganing mautób an pagigin asín kan dagâ dangan ilaw kan kinâban?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

An Misterio kan Pagbonyag

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 11-17, 2026. Basahon an Evangelio gikan sa Mateo 3,13-17 (Fiesta kan Pagbonyag kan Kagurangnan - A).

…

An Evangelio nag-iistorya kan versión ni San Mateo kan pagbonyag sa satóng Kagurangnan Jesu Cristo. An pagromdom kainí iyó man an huríng aldaw kan Pasko kan Pagkamundag. Anó an kahulugán kan Pagbonyag?

An Pagpamidbid kan Diós

Si San Mateo nagsurat kan saiyang Evangelio para sa audience na kadaklan mga Judío kayâ mahalagá saiyang ipahayag na si Jesús an kautoban kan mga profesía sa Banál na Kasuratán dapít sa pinanugáng Mesías.

An pagbonyag ki Jesús ni San Juán iyó an kautoban kan profesía sa Malakías 3,1 dapít sa ministerio ni Juán na “sinugò na mag-andam kan dalan kan Kagurangnan.” Iníng pagbonyag kumbagá turn-over ni Juán ki Jesús asín kapinônan kan bâgong kabanatè sa kasaysayan kan satóng kaligtasan. Iní man tandâ kan pagpoón ni Jesús kan ministerio bilang Halangkaw na Padì, siring na an mga padì sa Lumang Tipan naglilinig sa tubig bâgo kan saindang ministerio. Kumpará sa mga Evangelio ni San Marcos asín San Lucas, ki San Mateo may dagdag na paghuron si Jesús asín Juán na minatapos sa linya ni Jesús na “angay satô na utobàn an bilog na kasuripotan.”

An paghilig kan Espiritu Santo siring sa salampati iyó an pagpamidbid ki Jesús bilang surogoón asín profeta na mabalangibog kan Marhay na Baretà, susog sa mga profesía sa Isaías (11,1-2; 42,1; 61,1). Tandâ man iní kan bâgong paglaláng huli ki Cristo, siring na an Espiritu naglalayaw-layaw sa tubig sa panahón kan paglaláng, siring na saróng salampati pinalayog ni Noé sa pagtapos kan delubyo.

An tingog na halè sa langit – “Iyó iní an Sakóng Akì, na namomòtan, an minarhayán Ko” – kapahayagán na si Jesús an “Akì kan Diós.” An enot nang pinamidbid ni Mateo bilang “Akì ni David” (sa Mateo 1 sa paglatag kan genealogía ni Jesús asín sa pangaturogan ni San José) na maghahadè sagkod pa man, iyó man an Akì kan Diós.

Huli kainíng pagpamidbid ki Jesús sa kadakul na paagi, asín participación kan Espiritu Santo asín kan langitnon na Amâ, an apód kan mga Simbahan na Eastern Orthodox sa pangyayaring iní iyó an theophaneia, an pagpahayag nin Diós kan Saiyang sadiri sa katawohan.

An Pagtogdas kan Bonyag

Sa katapusan kan Evangelio ni Mateo, sa 28,19-20, bâgo si Jesús suminakát sa langit, sinugò Niyá an mga disipulos: “Lakáw kamó, gibohang disipulos an gabós na nación! Bonyagán sa ngaran kan Amâ, kan Akì, asín kan Espiritu Santo, tukdoán na mag-utób kan gabós Kong itinugon saindo.”

An pagbonyag na inakò Niyá ki Juán, na ginibo man Niyá kan Siya nag-ministerio publico asín pinabanál sa Espiritu, sa huri pinagibo man Niyá sa mga disipulos bilang sacramento para sa kapatawarán nin mga kasâlan asín kapinônan nin pag-akò kan buhay sa Diós.

An pag-akò kainíng sacramento tandâ kan pag-ayon ta sa kabôtan nin Diós, na pinapahayag sa mga Panugâ sa Bonyag, na may duwáng kabtang: pagsikwal ki Satanás, sa saiyang mga padayà, asín mga saláng gibo; dangan pagtubód sa Diós Amâ, Akì, asín Espiritu Santo.

Sa pagtapos kan Kapaskuhán, an Fiesta kan Pagbonyag siring sa Commencement Rites sa eskwelahan: mantang katapusan kan pagklase, kapinônan man nin bâgong kabtang sa buhay. An misyon na tinugon ni Jesús asín an mga Panugâ sa Bonyag, na pinakusóg kan gracia kan Pasko, iyó an isasabuhay ta sa enterong bâgong taón.

…

GIYA SA PAGHIRÁS | Maghirás kun pâno saimo enot na pinamidbid an Diós kan saimong mga magurang o kun siiísay man. Anó na an pagkamidbid mo na Saiya ngonian? | GIYA SA PAGHIRÔ | Bilang sararóng komunidad / pamilya, pâno ta matatabangan an lambang sarô na isabuhay an mga Panugâ sa Bonyag?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

Maglaog sa Hayakpit na Pintoan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Agosto 24-30, 2025. Basahon an Evangelio gikan sa Lucas 13,22-30 (Ika-21 Domingo sa Ordinariong Panahón - C).

…

“Kagurangnan, dikít saná an makakaligtas?” May saróng naghapót mantang nagtutukdò an satóng Kagurangnan Jesu Cristo.  An Saiyang simbag: “Mag-igot kamóng makalaóg sa hayakpit na pintoan.” Nakapatugmad iníng sinabi ni Jesús sa plano nin Diós sa katawohan asín an maninigong simbag nin katawohan sa plano nin Diós.

Anó an plano nin Diós para satô? Si San Pablo nagtukdô sa 1 Timoteo 2,4, na an Diós “boót na an gabós na tawo makaligtas asín makaabót sa pagkamidbid kan katotoohan.” Boót Niya na an gabós makaligtas sa kaoripnán nin kasâlan asín kagadanan. Sa Isaías 66,18, may tinaóng profesía an mahál na Diós: “Akó máabót sa pagtipon kan mga nacion saká tataramon; máabót sinda saká mahíhilíng an sakóng kamurawayan.” Sabi pa ni Jesús sa Lucas 13,29: “Máarabót an mga tawo halè sa sirangan saká sulnopan, halè sa amihan saká sa habagat, asín maturukaw sa Kahadean nin Diós.”

Kun an kaligtasan tinátaó nin Diós sa gabós, natà may hayakpit pang pintoan? An paglaóg sa hayakpit na agihan iyó an pag-ayon ta sa plano nin Diós.

Enot, dapít iní ki Jesu Cristo, an solamenteng Paraligtas kan kinâban.

Sabi Niya sa Juán 10,9: “Akó an pintoan; huli Sakô an maglaóg makakaligtas.” Dangan sa Juán 14,6: “Akó an dalan, an katotoohan, asín an buhay. Mayò nin makakadolok sa Amâ kundî huli Sakuyà.”

Anó an maninigong simbag ta ki Cristo na Diós na nanitawo sa pagligtas satô? Sa Juán 6, sa katapusan kan Saiyang pagtukdô dapít sa Saiyang sadiri bilang Tinapay nin Buhay, dakúl an mga nagharalè ta dipisil daá an Saiyang katukdoán. Kan hinapót ni Jesús an mga disipulos kun sinda maharalè man, nagsimbag si San Pedro sa Juán 6,68: “Sa kiísay pa kamí maduman, Kagurangnan? Yaon Saimo an mga tataramon nin buhay na daíng kasagkoran.” Lugód siring ki San Pedro an panindogan ta, asín bakô sa tataramon saná kundî sa gibo man.

Ikaduwá, dapít iní sa disiplina nin dayupot na pagpilì sa kabôtan nin Diós oróg sa gabós na bagay.

Sabi ni Jesús sa Mateo 19,24: “Pasil pa sa kamelyo maglusót sa matá nin dagom kisa sa mayaman maglaóg sa Kahadean nin Diós.” Hayakpit an pintoan kayâ kaipohan an disiplina (an paagi nin pagigin disipulo) na anoman na nakakaoláng sa buhay na daíng kasagkoran, bayaan; anoman na nakakapagabát, haleon; asín anoman na kasâlan, pondohón. May pagiromdom satô sa Hebreo 12,11: “An gabós na disiplina sa panahón kaiyán garó bakô para sa kaogmahan, kundî para sa kamundoan: alagad, pakatapos, nagbábalós kan matoninong na bunga nin kasuripotan sa mga pinatoód kaiyán.”

Ikatoló, dapít iní sa katapusan kan satóng buhay asín nin panahón.

Nin huli ta an pintoan bakô sanáng hayakpit kundî máabót an panahón na másará iní sa mga daí pa naglaóg digdi. Kayâ pilíon ta si Cristo asín maglakáw kitá sa Saiyang dalan, ngonian na! Bakô sa aga na, o kun nuarín saná conveniente, o kun magretiro na sa trabaho, o kun tapos na an mga kasibotan.

Daí man lugód mangyari na sa satóng pagpasipara sa pangapodan nin Diós, masarhan kitá kan pintoan asín daí na makalaóg sa Saiyang Kahadean. Kayâ sunodón ta an hulit sa Hebreo 3,15: “Kun ngonian mádangóg nindo an Saiyang tingog, haré pagpatagasá an saindong pusò.”

…

GIYA SA PAGHIRÁS | Maghirás nin experiencia kan saimong paglaóg sa hayakpit na pintoan. Anó an mga nagin bunga sa paggibo mo kaiyán? | GIYA SA PAGHIRÔ | Bilang saróng komunidad/pamilya, anóng particulár na “hayakpit na pintoan” an kaipohan tang sarabáy na agihan ngonian?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

Ilaw sa Diklom, Ilaw nin Paglaom

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero Febrero 2-8, 2025. Basahon an Evangelio gikan sa Lucas 2,22-40 (Fiesta kan Presentación kan Kagurangnan sa Templo).

…

Cada Febrero 2, sinecelebrár an Fiesta kan Presentación kan satóng Kagurangnan Jesu Cristo sa Templo. Iní an ika-40 aldaw pakatapos kan Aldaw kan Pasko kan Saiyang Pagkamundag, an talaan na panahón na susog sa Ley ni Moises sa Levitico 12 an lambang inâ na bâgong pangakì madolot nin atang para sa ritual nin purificación. Dangan iyó man iní an pag-utób kan sarô pang provision nin Ley sa Exodo 13,2 na an lambang matuáng aking lalaki iconsagra sa Diós. Anó an kahulugán kainíng fiesta?

Si Jesús dolot kan katawohan asín dolot kan Diós Amâ.

An purificación ki Virgen María nangangaipo nin dolot na atang, kayâ nagdolot sinda nin duwáng salampati (dolot nin mga dukhâ). Siring man an matuáng aking lalaki na pigconsagra, susog sa Numero 18,15-16, may mandatong dolot na limáng shekel na pirak (silver) tanganing pantubós (redemption) sa akì na ibinabalík sa saiyang mga magurang. Alagad daí nabanggit sa Evangelio na may dolot na pantubós para ki Jesús—boót sabihon, bilog Siyang dinolot sa Diós Amâ kan Saiyang mga magurang, an bilog Niyáng buhay atang kan katawohan sa Diós.

Alagad susog sa mga banál na guráng na Simeón asín Ana na yaon dumán sa Templo, si Jesús man an pinanugáng Paraligtás. Siyá an dolot kan Amâ sa katawohan. Kayâ si San Pablo nagsabi sa 1 Timoteo 2,5: “Ta sarô saná an Diós, sarô saná man an tagapagultanan kan Diós asín mga tawo, an tawo na iyó si Jesu Cristo.

Si Jesús an ilaw nin kinâban.

Pinadará Siyá kan Amâ tanganing magin ilaw na mádaóg sa diklom nin kasâlan asín karâtan sa kinâban. Sa Lucas 2,32, inapód man Siyá ni Simeón na: “ilaw para sa kapahayagán sa mga Gentíl asín kamurawayan kan banwaan Israel.”

Sa Juán 8,12, si Jesús mismo an mapahayag: “Akó an ilaw nin kinâban. An nagsúsunód Sakô daí maglálakáw sa kadiklomán, kundî magkakaigwa kan ilaw nin búhay.” Kayâ ináapód man an fiestang iní na Candelaria, kun nuarín benebendicionan an mga kandilà na minasimbolo ki Jesús.

Inaapod kitá ni Jesús na magin ilaw nin paglaom.

Sa Mateo 5,14-16, tinukdoán Niya an mga disipulos: “Kamó an ilaw nin kinâban. Daí matatagò an ciudad na yaon sa ibabaw nin bukid. Daí sinusuloán an lampará asín ibinubugtak sa irarom kan takadán, kundî sa talagáng bugtakan, tanganing magliwanag sa gabós sa haróng. Siring magliwanag an saindong ilaw sa atubang nin mga tawo, na máhiling ninda an mga magayón nindong trabaho asín pamurawayon an Amâ nindong nasa langit.”

Ngonian na taón na Jubileo nin Paglaom sa satóng Simbahan, nangangapodan an mga obispo sa Pilipinas na sa tahaw nin kadikloman—kapurisawan, pagraót sa kapalibotan, kadukhaán, korupsyon, mga calamidad, violencia, asín kaputikan—"tugotan an paglaom na maglaad sa satô”, asín magi kitáng “kalayo nin paglaom.” Nangangapodan sinda sa mga pamayó nin banwaan na maglingkod na may transparency asín accountability; sa mga jovenes na magkásararóng manindogan sa pagbabâgo asín responsableng pamámayó; asín sa gabós na Cristiano na nasa gobyerno, negosyo, asín manlaén-laen na mga komunidad, na magin mga saksi sa mga Cristianong kaugalian asín pagkadayupot sa consciencia.

…

GIYA SA PAGHIRÁS SA SADÍT NA KOMUNIDAD O PAMILYA | Basahon an CBCP Surat Pastoral “May Paglaom Pa Daw?” Maghirás nin experiencia o boót gibohon nin pagigin liwanag nin paglaom sa saimong kapwa.

EEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Diós Nagpapamidbid Sato

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Enero 12-18, 2025. Basahon an Evangelio gikan sa Lucas 3,15-16,21-22 (Fiesta kan Pagbonyag kan Kagurangnan - C).

…

An Evangelio nag-iistorya kan versión ni San Lucas kan pagbonyag sa satóng Kagurangnan. An pagromdom kainí iyó man an huríng aldaw kan Panahón kan Pasko kan Pagkamundag. Anó an kahulugán kan Pagbonyag?

Pagpamidbid ki Jesús bilang Mesías.

Nagpapadagos an pagpamidbid ni Jesús asín pagbalangibog sa katawohan kan misterio kan pagkanitawo kan Diós, na enot nang pinahayag sa Pagbaretà kan angel, sa Saiyang Pagkamundag, asín sa Epifanía.

Nagpatotoo sa pagka-Mesías ni Jesús si San Juán Bautista sa pagnegár niyá na siyá mismo an Mesías asín sa pagsabi na an maabot mas oróg kisa saiya. Dangan sa Juán 1,29, tinurô niya si Jesús sa saiyang mga disipulos asín nagsabi: “Uya an Cordero kan Diós na nagpaparà kan mga kasâlan kan kinâban.”

Sa paghilig Saiya kan Espiritu siring sa salampati, pinamidbid man Siyá bilang profeta, asín an tingog kan Amâ pinamidbid Siyá bilang Akì kan Diós.

Pagpamidbid nin Diós bilang Santísima Trinidad.

Siring na daí paghonaon kan Israel na an pigháhalát nindang Mesías iyó an bogtong na Akì kan Diós, daí man ninda paghonaon na an Diós mapamidbid kan Saiyang sadiri bilang Akì na binobonyagan, bilang Espiritu Santo, asín bilang Amáng makakamhan.

Kayâ nganì an apód kan Simbahan na Eastern Orthodox sa pangyayaring iní iyó an theophaneia, an pagpahayag nin Diós kan Saiyang sadiri sa katawohan. Kayâ maninigò lamang na apodón si Jesu Cristo bilang kapanoan kan kapahayagan nin Diós. Sa Juán 14,9 sinabi pa Niya: “An nakahiling Sakô, nakahiling man sa Amâ.”

Pagpamidbid kan katotoohan kan satóng sadiri.

Sa Lucas 3,16, pinasabot ni Juán Bautista an pagkakaiba kan saiyang pagbonyag asín kan gigibohon na pagbonyag ni Jesús: “Akó nagbobonyag saindo sa tubig; alagad maabot na an oróg sakô kakusóg, asín bakô akóng manínigóng maghubád kan sintas kan Saiyang sandalyas; Siyá an mabonyag saindo sa Banal na Espiritu asín kalayo.” An pagbonyag ni Juán tandâ kan pagbaklè kan binobonyagan. An pagbonyag ni Jesús nagpapatawad nin mga kasâlan.

Natâ ta kaipuhan niatò iníng pagbonyag para sa kapatawarán nin mga kasâlan? Huli ta an katotoohan kan satóng pagkatawo na linaláng nin Diós na kabaíng Niyá, rinaót kan satóng pagkakasalà na iyó man an nagdará satô sa kagadanan. Kayâ binoót ni Jesús para satô an nakakaligtas na pagbonyag, susog sa sinabi Niya ki Nicodemo sa Juán 3,3: “Kun an saróng tawo daí mamundag giraray halè sa itaas, daí siyá makakahilíng kan Kahadean nin Diós.”

Sa tubig kan bonyag, nalinigan kitá sa kasâlan, dangan tinaó satô an dignidad nin pagigin Akì kan Amâ, Tugang ni Jesu Cristo, Templo kan Espiritu Santo, Miembro kan Simbahan, asín Tagapagmana kan Kahadean.

An katuyuhán kan pagpamidbid nin Diós.

Sabi ni San Pablo sa 1 Timoteo 2,4: “Boót nin Diós na an gabós makaligtas asín makamidbid sa katotoohan.” Boót Niyá na mamidbidan ta Siya bilang satóng Diós – Amâ, Tugang, asín Katood – tanganing sa satóng pakipag-ulían Saiya asín pagsunód sa dalan ni Cristo, makamtan ta an kapanoan nin búhay.

An bonyag na inakò ta an kapinônan kan satóng bâgong búhay sa Diós. Dangan sabi ni Jesús sa Juan 8,31-32: “Kun magpadagos kamó sa Sakóng tataramon, tunay Ko kamóng mga disipulos; mamimidbid nindo an katotoohan, asín itatalingkas kamó kan katotoohan.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás kun pâno saimo enot na pinamidbid an Diós kan saimong mga magurang o kun siisay man. Anó na an pagkamidbid mo Saiya ngonian?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Siísay Ako sa Paghonà Nindo?

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Septiembre 15-20, 2024. Basahon an Evangelio gikan sa Marcos 8,27-35 (Ika-24 Domingo sa Ordinariong Panahon - B).

…

An istorya sa Evangelio may tolóng kabtang. Enot, an paghapót ni Jesús kun siísay Siyá sa paghonà nin mga tawo asín kan Saiyang mga disipulos. Tuminamà si San Pedro sa pagsimbag na Siyá an Cristo (o sa Hebreo, Mesías). Ikaduwá, an pagpaliwanag Niyá kan kahulugán kan Saiyang pagigin Cristo. Násalâ digdi si San Pedro sa paghonà na si Cristo daí dapat mag-agi nin pagsakit asín pagkagadán, kayâ sinagwè siyá ni Jesús. Ikatoló, an pagtaó Niyá kan mga kaipuhan na gibohon kan mga boót magin disipulo Niyá. Anó an mensahe kainí satô?

An Diós nagpapamidbid satô.

Kun kitá saná, daí ta mamimidbidan nin tamà kun siísay an Diós. Hilnga an manlaen-laen na kultura sa kinâban na kun siísay-sisay asín kun anú-ano an pigsasarambá na mga diós-diósan. Nagpamidbid Siyá ki Abrahám, Isaác, asín Jacób, ki Moisés asín sa mga profetas sa Lumang Tipan. Kayâ an banwaan Israel namibidbid an Diós bilang Kaglaláng nin gabós, kagtaó nin mga karahayan, asín parasurog laban sa mga kaiwal. Siyá man nanugâ na mapadará nin paraligtas, nin saróng Mesías, para sa Saiyang banwaan.

Sa Evangelio nagpapamidbid si Jesús bilang Mesías, alagad bakô susog sa imahe na pighohonà kan Saiyang mga kahimanwa, kundî bilang surogoón na papasakitan nin makuri, isisikwal, gagadanón, asín mabubuhay-liwát.

Bilang Mesías pinamidbid Niyá an sadiri bilang Akì kan Diós – boót sabihon na Siyá Diós man. Iní an razón kun natà sa Mateo 26,65, ginisì kan halangkáw na padì na si Caifás an saiyang badò asín hinatolan si Jesús nin paglalanghad (blasphemy) – nin huli ta inakò ni Jesús na Siyá an Akì kan Diós. Sa Juán 10,30 si Jesús mismo nagsabi: “Akó asín an Amâ sarô.”

Natà ta an Diós nagboót na magpamidbid satô? Nin huli ta an saiyang plano, susog sa 1 Timoteo 2,4, “na an gabós na tawo makaligtas asín makamidbid kan katotoohan”. Asín si Jesús mismo nagsabi sa Juán 14,6: “Akó an dalan, an katotoohan, asín an buhay; daí nin makakadumán sa Amâ, kun bakóng huli Sakô.”

Si Jesu Cristo an satông kaligtasan.

Pâno kitá maliligtas kan satóng pagkamidbid ki Cristo? Kun kitá magtubód asín magsunód Saiya. Dangan sinabi Niyá sa Marcos 8,34: “An boót magsunód Sakô, magsayuma sa sadiri, magpâsan kan saiyang cruz, asín magsunód Sakô.”

Magsunód kitá ki Cristo.

Boót sabihon, pilíon ta si Cristo solamente asín oróg sa gabós. Tapos na an panahón nin mga suanoy na diós-diósan, alagad may mga bâgong diós-diósan man na nagsaralida sainda: kayamanan, kapangyarihan, kasikatan, kaogmahan sa lamán, asín ibá pa. Iníng mga karahayan na kinâbanon bakóng maraot asín puedeng makatabang pa nganì satô sa pagigin marhay na tawo, alagad kun sinda an papaorogón ta sa gabós, sinda nagigin kaulangan sa satông pagraní sa Diós.

Magsayuma kitá sa sadiri.

Mas makusóg ki sa tentación halè sa luwás iyó an paorogón an sadiring kabôtan. Iní an sinasabi ni Cristo sa Marcos 7,21, na “halè sa laóg, sa pusò nin tawo minagikan an mga maraot na kaisipan, mga karumpotán, mga paggadán, mga pagsambay, mga kapasloán, mga kasómbikalan, pagdayà, karigsokán, pagkaurí, pagpakaraot, kapaabáw-abawan, karungawan” – an mga iní an kaipuhan tang sayumahan tanganing bolanos kitáng makasunód ki Cristo.

Magpâsan kita kan satong cruz.

Linigtas kitá ni Jesu Cristo sa Saiyang sacrificio sa cruz asín pagkabuhay-liwát, sa pagtaó Niyá satô nin kaligtasan hinirás man Niyá an dalan kan cruz.  An satông cruz iyó iní: an paggibo kan kun anó an tamà, marhay, asín mamomôton sa ngaran ni Cristo, gurâno man kadipisil. Sabi sa Santiago 1,14: “Anó an pakinabang, mga tugang ko,  kun may magsabi na igwa Siyá nin pagtubód alagad mayò nin gibo?”

…

GIYA SA PAGHIRÁS SA SADÍT NA KOMUNIDAD O PAMILYA | Siísay si Jesu Cristo para saimo? Maghirás kan saimong mga paghingowa na akoon Siyá bilang saimong Kagurangnan asín Paraligtas.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Si Cristo Tunay na Presente sa Eucaristía

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Agosto 18-24, 2024. Basahon an Evangelio gikan sa Juán 6,51-58 (Ika-20 Domingo sa Ordinariong Panahon - B).

…

Nasa ikaapát na Domingo na kita na an Evangelio kinukuá sa Juán 6. Nagpoón iní sa istorya kan milagro nin pagpakakán sa limang ribo, asín nagdagos sa pagtukdô ni Jesús na Siya an Tinapay nin Buhay.

Sa Evangelio ngonian pinapahayag sato an tunay, totoo, asín bilog na presencia ni Cristo sa Eucaristía. An sabi ni Jesús sa Juán 6,54: “An nagkákakán kan sakong lamán asín nag-íinom kan sakong dugô, igwa nin buhay na daíng kasagkoran, asín bubuhayon Ko siya liwát sa huríng aldaw.”

Dapít sa presencia ni Cristo sa Eucaristía, may duwáng saláng gawè nin pagtubód. Enot, an mababaw asín materialisticong paghonà na siring iní sa pagkakán nin karne asín dugô nin hayop, o tawo na gibo nin mga caníbal (siring sa paghonà kan mga Judío sa Evangelio asín mga pagano kaidtong panahón). Ikaduwá, an paghonà na iní simbolico sanáng pagkakán kan hawak asín dugô ni Cristo (siring sa tinutukdò nin dakúl na mga bakóng Catolicong simbahan).

Alagad an katokdoán kaidto, ngonian, asín sagkod pa man, kan satong Simbahan, iyó mismo an sinabi ni Jesús sa Juán 6,55: “Ta an Sakong lamán tunay na kakánon asín an Sakong dugô tunay na inómon.”

Pâno iní nangyayari?

Sabi kan Catechism for Filipino Catholics (no. 1727): “Sa kapangyarihan kan Espiritu Santo, an kinâbanon na sustancia (substance) kan tinapay asín alak binabâgo na magin ibáng realidad: an pinamuraway na Hawak asín Dugô ni Jesu Cristo, na pinakò asín nabuhay-liwát.” An Concilio de Trento (na nagtipon kan mga taón 1545-1563) inapód iníng “transustanciación” (transubstantiation).

Natà ta ginigibo iní ni Cristo?

Nin huli ta namòtan Niya kita asín nanugâ Siya sa Mateo 28,20 na daí Niya kita pababayaan: “Uya, Ako kaiba nindo sa gabós na aldaw, sagkod sa katapusan nin kinâban”. Kayâ nganì an apód kan gaweng iní: Banál na Comunión. An presencia kan Espiritu ni Cristo na enot ta nang inakò sa Bonyag asín pinakusóg sa Kumpil, pinapadagos asín pinapayaman pa sa pag-akò ta Saiya sa Comunión. Kayâ maninigo lamang na itaó ki Cristong nakikisumarò sato an bilog, aktibo, asín tuyong participación niato sa Eucaristía.

Anó an epekto sato kan pag-akò kan Tinapay nin Buhay?

Binabâgo kita na magin siring sa Saiya na satong kinákakán. Sa Ikatolóng Pamibi Eucaristico, sinasabi kan padì: “itugot Mo na kaming binabâgo kan Hawak asín Dugô kan saimong Akì, panô kan Saiyang Espiritu Santo, maabtan man lugód na saróng hawak asín saróng espiritu ki Cristo.” Sa padagos tang pagsimba, nahíhilíng daw sato an pagigin siring ki Cristo sa pagsunód sa kabôtan kan Amâ, sa pagpatawad sa nagkasalà sato, asín sa pagkaherak sa kapwang nangangaipo?

Para saén iníng pagtubód asín pag-ako ki Cristo bilang Tinapay nin Buhay?

Iní an panugâ kan satong Comunión ki Cristo: na kitang nag-akò kan Saiyang Hawak asín Dugô digdi sa dagâ, tanganing makasunód sa Saiyang dalan sa buhay na iní, sa kapanoan kan panahón, magigin kahiras sa mamurawayon na buhay mismo nin Diós, an Santisima Trinidád. Kayâ nganì sa Colosas 1,27 inapód ni San Pablo si Cristo na yaon sa lambang Cristiano bilang “paglaom kan maabot na kamurawayan”; asín sa Katekismo kan Simbahan tinutukdò na an Eucaristía iyó an “ginikanan asín padumanan kan buhay Cristiano”.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás kun pâno padagos na binabâgo an buhay mo kan saimong danay na pagsimba asín pagparticipár sa Eucaristía.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Limang Tinapay asin Duwang Sirâ

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Julio 28 - Agosto 3, 2024. Basahon an Evangelio gikan sa Juán 6,1-15 (Ika-17 Domingo sa Ordinariong Panahon - B).

…

Sa Evangelio pinakakán ni Jesu Cristo an limáng ribo halè sa limáng tinapay asín duwáng sirâ. An mga milagro sa Evangelio ni San Juán ináapód na mga tandâ.

Tandâ kan pagka-Diós ni Cristo.

An milagrong iní nagpapahayag kan diósnon na kapangyarihan asín autoridád ni Jesús. Sa Evangelio ni San Juán iníng istorya kapinònan kan kabtang na nagtatapos sa pagpamidbid Saiya bilang Tinapay nin Buhay. Bakô sanáng pagkaon na nakakabasóg nin tulák an Saiyang dará, kundî Siya mismo an kakanon nin buhay na daíng kasagkoran.

Igwang interpretasyon kan istoryang iní na nagsasabi na tibaad daá kan náhilíng kan ibá an pagtaó kan akì kan saiyang daráng balon, na-conciencia an may mga daráng balon sainda asín linuwás man an saindang dará. Dangan naghirirasan sinda kayâ nakakaon an gabós.

Maski garó magayón pag dangogón, bakô iní tamang interpretasyon nin huli ta hinahalè an milagrosong aspeto kan istorya asín an diósnon na gibo ni Jesús. May mga istorya sa Saiyang buhay na nasusurat sa sarô o duwáng Evangelio saná asín daí sa ibá. Alagad an istoryang iní yaon sa apát na Evangelio (Mateo, Marcos, Lucas, asín Juán), asín gabós sinda nagsasaksi na iní gibong milagro mismo ni Cristo, alagad daíng nasusurat sa tibaad na “milagro nin paghirirasan” nin mga tawo.

Tandâ kan pangapodan sato ni Cristo.

Sa Evangelio pigpaliwanag na an hapót ki Felipe kun saén makakabakál nin ipapakakán sa mga tawo saróng karáw man saná ni Jesús nin huli ta aram Niya an Saiyang gigibohon. Kun iisipon, daí Niya kaipuhan nin anoman halè sa tawo tanganing makagibo nin milagro alagad pigtuyo Niya na magin parte sinda kan Saiyang gibo. Kayâ mantang si Felipe napaisip kun anó an gigibohon, si Andres nagdará nin saróng akì na may balon, dangan an mga disipulos pinatabang ni Jesús sa pagpatukaw sa mga tawo, sa pagdistribuir nin mga kakanon, asín sa pagtipon kan mga natadà – doceng basket nin tadáng pagkaon!

Hanggang sa ngonian padagos kitang iniimbitaran ni Jesús na makisumarò sa Saiyang misyon nin paghirás kan Marhay na Baretà asín pagmuknâ kan Saiyang Kahadean. Sabi ni San Pablo sa Efeso 4,1-2: “Maglakáw kamo nin maninigò sa pangapodan na inapodán saindo: sa bilog na kapakumbabáan, saká kahuyoan, sa pasencia, nagpapatiniós-tiosan sa pagkamoot”. Pag an pagsimbag sa pangapodan ni Cristo iyó an patugmadan nin satong mga pangarap asín gibo, makúkuá ta an tunay na katuyuhan asín kahulugán nin satong buhay.

Tandâ kan satong ambag.

An limáng tinapay asín duwáng sirâ na voluntád na tinaó nin saróng akì tandâ kan satong pakisumarò sa dakulang plano nin Diós. Anó man an satong ambag sa Diós? Anó man an satong limáng tinapay asín duwáng sirâ? Sa pagsimbag kainíng hapót, marhay giromdomón an sinabi ni Jesús sa Mateo 9,13: “Pagkaherak an mâwot Ko, bakô sacrificio”.

An satong mga pangadyè asín devoción, kun tunay na pagsamba sa Diós asín bakóng pakitang-tawo saná, maninigong dolot sa Kagurangnan. An satong mga pagtabang sa kapwa – an pakidumamay sa panahón nin problema asín pagraní sa mga nangangaipo, siring kan satong programang TADA (Tanganing An Dukhâ Atamanon) asín mga community pantries – iní an satong ambag sa pagmuknâ kan Saiyang Kahadean.

Anó man kun sadít o dikít saná an kaya niatong iambag? An milagro kan limáng tinapay asín duwáng sirâ, pagiromdóm sato na an Diós an mahipnò, an makumpleto, asín mapabunga kan satong mga marhay na gibo asín paghingowa.

…

GIYA SA PAGHIRÁS SA SADÍT NA KOMUNIDAD O PAMILYA | Anó man an satong ambag na “limáng tinapay asín duwáng sirâ” sa satong Simbahan, komunidad, o pamilya – sa pagpadagos kan misyon ni Cristo sa kinâban?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Kun Kita man an Magsikwal sa Kagurangnan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Julio 7-13, 2024. Basahon an Evangelio gikan sa Marcos 6,1-6 (Ika-14 Domingo sa Ordinariong Panahon - B).

…

Sa Evangelio nagbalík si Jesu Cristo sa Nazareth, Saiyang sadiring banwa, alagad sinikwal Siya kan Saiyang mga kahimanwa. Embes na ika-urgollo, daí ninda maakò na an saróng karpintero na nagdakulà sa saindang lugár, na an pamilya midbid ninda, makatarám asín makatukdô nin may siring na autoridád sainda.

Sinayang ninda an dakulang gracia na mamidbidan kutâ sa saindang buhay an Akì kan Diós. Alagad daí tulos maghonà na mas marhay kita kisa sainda. Ta siring sa mga taga-Nazareth kaidto, tibaad pamilyar na kitang marhay sa satong pagigin Cristiano, kayâ pinapasipara ta na si Cristo asín an Saiyang Evangelio. An pagsikwal Saiya ngonian na panahón nagigibo sa nagkapirang paagi.

Sobrang pagtubód sa sadiring kadonongan asín katanosan.

Pag pinipilì ta an sadiring kagustohan maski malinaw an kabôtan ni Cristo sa Banál na Kasuratán o sa katukdoán kan Simbahan – sinisikwal ta Siya sa satong buhay. Pag dinagos-dagos ta iní, tibaad mag-abót an panahón na maghonà kita na nagtutubód pa kita sa Diós alagad nagsasamba na palán kita nin ibang diós, na gibo na sa sadiri niatong imahe asín katanosan.

Romdomón ta an sabi sa Proverbio 9,10: “An kapinônan nin kadonongan iyó an pagkatakot sa Kagurangnan.”

Saláng pagtubód sa mga kinâbanon na bagay.

Pag an satong kaogmahan mas yaon sa mga kinâbanon: kayamanan, kapangyarihan, asín kasikatan; asín pag mas sinusunód ta an kabôtan nin mga makapangyarihan digdi sa dagâ kisa kan satong langitnon na Amâ – sinisikwal ta man si Cristo.

Nagtukdô si Jesus sa Mateo 6,19-21: “Daí kamo magtipon nin kayamanan digdi sa dagâ saén may bukbok asín taklâ na nangráraót, asín may parahâbon. Magtipon kamo nin kayamanan sa langit, dumán daíng bukbok, ni taklâ, ni parahâbon.”

Maluyang pagtubód sa hampang nin mga agyat sa buhay.

Pag nawawàran tulos kita nin paglaom pag-abót nin masakit na panahón, kayâ mapadaog na saná sa tentación, o madulag sa problema, daí pa talagá kita nagtutubód sa Diós na nanugâ na daí kita papabayaan, asín maigot na nakikisumarò sa satong pig-aagihan.

Sa Mateo 28,20, nanugâ si Jesús sa mga disipulos: “Uya, kaiba nindo Ako sa gabós na aldaw, sagkod sa katapusan kan kinâban.” Kaya si San Pablo nakapagsabi sa 2 Corinto 12,10: “Ikinakaogma ko an mga kaluyahan, an mga pagtuyâ-tuyâ, an mga kasakitan, an mga pagtugis, asín an mga kahorasaan, huli ki Cristo, ta pag ako nagluluya, dangan ako makusóg.”

Anó an dapat na gibohon tanganing daí kita másalâ o magkulang o magluya sa pagtubód?

Enot, magpangadyî kita asín maghagad kan gracia nin pagtubód, siring kaidtong amâ, sa Marcos 9,24, na rinaní ki Jesus an saiyang aking may marumpot na espiritu: “Nagtútubód ako! Tabangi an kulang kong pagtubód.”

Ikaduwá, magdanay kita Saiya. Sabi ni Jesus sa Juan 8,31-32: “Kun magpadagos kamo sa sakong tataramon, tunay Ko kamong mga disipulos; mamimidbid nindo an katotoohan, asín itatalingkas kamo kan katototoohan.”

Ikatoló, pirming mámoót, ta an pagkámoót sa kapwa, minabuhay sa pagtubód. An apostól nagtukdô sa Santiago 2,17: “Siring man an pagtubód, kun mayò nin gibo, gadán sa katunayan.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia na binalô an saimong pagtubód. Arín an saimong pinilì, an kabôtan nin Kagurangnan o padagka kan kinâban?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Narahay Ka kan Saimong Pagtubod

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Junio 30 – Julio 6, 2024. Basahon an Evangelio gikan sa Marcos 5,21-43 (Ika-13 Domingo sa Ordinariong Panahon - B).

…

Sa Evangelio may duwáng istorya nin milagro: an pagbulóng sa babaeng doceng taón nang naghehelang nin pagdugô asín an pagbuhay sa doce años na daragitang nagadán pa saná. Sa duwáng istoryang iní, padagos na pinapamidbid sato ni Jesu Cristo an Diós asín an Saiyang kabôtan. Aramon ta iní sa paghorop-horop sa mga linyang sinabi Niya sa Evangelio.

“Talitha qum (Daragita, sinasabihan taká, bangon!)”

Sa tataramon ni Jesús nabuhay an gadán asín pinahayag an Saiyang Diósnon na kapangyarihan. Diós saná an may kapangyarihan sa buhay, asín pagtaó nin buhay an Saiyang kabôtan. Sa Kadonongan 1,13-14 mababasa niato: “Daí ginibo nin Diós an kagadanan, ni ikinakaogma niya an pagkaparà nin mga nabubuhay. Linaláng Niya tanganing mag-existir an gabós.”

Alagad maski nganì daí nagtarám asín nakaisi, nabulóng ni Jesús itong babaeng nagtikwil kan Saiyang gubing. Ta iní an Saiyang misyon sa dagâ. Sa Juán 10,10 sinabi Niya: “Ako nagdigdi tanganing magkaigwa sinda nin buhay sagkod na magsûpay.”

“Siísay an nagdoót sa sakong gubing?”

An simpleng hapót na iní nagdulot nin takot asín takig sa babaeng narahay pa saná ni Jesús. Natà? Nin huli ta, susog sa Tugon, bawal sa mga arog niyang “maatî” (unclean) na makiibahan sa mga tawo o magkapót sa kiisay man nin huli ta nakakaulakit an saiyang pagkamaatî. Alagad sa pag-akò niya kan saiyang ginibo kinumpleto ni Jesús an pagbulóng saiya asín minidbid siya sa katawohan na bakô nang maatî. Tinâwan siya nin bâgong buhay.

Si Jairo, bilang sarô sa mga poón nin sinagoga, nagkusóg man nin boót na magraní ki Jesús, maski aram niyang daí iní magugustohan kan mga pag-iriba niyang daí nagtútubód ki Jesús. Huli ta siya nagtubód, nákuá niya an saiyang hinahagad asín mas pa.

Kita man inaapod ni Cristo na magraní asín magsarig Saiya na daí nang ibang sinasarigan pa. Itaó ta an bilog na sadiri sa Kagurangnan na enot nang nagtaó kan Saiyang sadiri sato – sa Saiyang pagigin Diós na nanitawo asín sa pagdusay kan Saiyang buhay sa cruz. Sabi ni San Pablo sa 2 Corinto 8,9: “Ta aram nindo an gracia kan Kagurangnan tang si Jesu Cristo: huli saindo nagi Siyang dukhâ, siya na mayaman, tanganing huli kan Saiyang kadukhaán magyaman kamo.”

“Daí ka matakot; magtubód ka saná!”

Sa pagsabi kainí pinakusóg ni Jesús an boót ni Jairo, na binaretaan na gadán na an saiyang akì. Iyó man iní an sinasabi sato kan Espiritu sa satong pagbaklay sa dalan ni Cristo asín pagpâsan kan satong cruz. Aram nin Diós na an Saiyang mga inapód, maagi nin pagduwa-duwa, pagkatakot, pagkadapâ, minsan nganì pagkawarâ pa sa tamang dalan nin huli sa mga tentación. Kayâ an Saiyang balaog yaon para sa mga naghahagad kainí. Sa katunayan, an linyang “Daí matakot”, sinambit labí 100 na beses sa Lumang Tipan; asín 44 beses sa Bâgong Tipan, kadaklan kainí si Jesús mismo an nagsabi sa Saiyang mga disipulos.

Anó an nákuá kan babae asín ni Jairo na parehong nagraní asín nagsarig ki Cristo? Buhay para sa sadiri asín sa namomòtan. Makua ta man lugód an adal kainíng Evangelio tanganing siring sa babaeng nagdoót sa Saiyang gubing, pasabongán kita ni Cristo: “An saimong pagtubód iyó saimo an nagtaóng kaligtasan; lakáw sa katoninongan asín magdanay sa saimong pagkarahay.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin pagbalô sa saimong pagtubód, asín kun pâno mo namatean an presencia nin Diós sa buhay mo sa panahón nin pagbalô.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Dios Pinapatoninong an Satong mga Duros

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Junio 23-29, 2024. Basahon an Evangelio gikan sa Marcos 4,35-41 (Ika-12 Domingo sa Ordinariong Panahon - B)

…

An istorya sa Evangelio iyó an pagpatoninong ni Jesu Cristo kan duros sa Danáw kan Galilea. May nagkapirang paagi para mákua an kahulugán kainíng istorya nin milagro. Sarô kainí an literál o historicál na pakasabot na iní saróng tunay na pangyayari. Sarô pa iyó an paghilíng kainí bilang alegoría, na an mga elemento sa istorya simboló nin iba pang mga bagay.

Bilang literál o historicál na pangyayari, pinapahayag kan istorya na si Cristo may kapangyarihan sa mga pwersa nin kalikasan. Kayâ nganì nagharapót an mga disipulos Niya: “Siísay iní, ta sagkod an duros asín an dagat nagkukuyog Saiya?”

Para sa mga Judío, Diós saná an may kapangyarihan na maggibo kainí, siring kan ginibo Niya sa istorya kan paglaláng sa Genesis 1, kan tinâwan Niya nin orden an langit asín dagâ, asín an naghahagubuhob na kadagatan nagkaigwa nin mamaráng dagâ. Siring man kan ginibo nin Diós sa paagi ni Moisés sa Exodo 14, kan binangâ Niya an Dagat na Pulá tanganing makaagi an Saiyang Piniling Banwaan.

Sa Job 38,8-9 nagsabi an Diós ki Job: “Siísay an nagpintô kan dagat, kan magbulwak iyán halè sa tulák, kan badoan Ko an panganoron asín patosón nin lampin an mahîbog na diklom?” Kayâ an pagpatoninong ni Cristo kan duros sa danáw tandâ kan Saiyang pagka-Diós. Asín an Saiyang Diósnon na kapangyarihan ginamit Niya sa pagkaherak asín pagligtas sa Saiyang mga disipulos.

Bilang istoryang alegoricál, may suanoy na tradisyon na an sakayán na nagsasapar nin duros simbolo kan Simbahan bilang “sakayán ni Pedro”. May tradisyon man na an duros nagre-representar kan mga bagyo sa buhay nin tawo. Siring sa istorya, sa tahaw kan satong mga bagyo sa buhay, minsan daí ta namamatean an presencia nin Diós. Hapót nganì sa sikát na awit ni Gary Valenciano: “Natutulog ba ang Diyós?” Alagad an mensahe kan istorya iyó na magraní kita sa Diós asín Siya an mapatoninong kan duros asín dagat sa satong buhay. Sa pânong paagi Niya kita tinatabangan sa paghampang niato sa mga problema sa buhay?

Bilang Diós Amâ, tinátaó Niya an satong mga pangangaipo. Balikán ta an istorya kan satong buhay asín mahíhilíng ta na sa kadakul na problemang nag-aragi, daí Niya kita pinabayaan. Kayâ si Cristo nagtukdô sa Mateo 6,31-33: “Daí kamo magparahâdit kun saén kamo makua nin kakanon o inomon o gubing. Aram kan saindong langitnon na Amâ na kaipuhan nindo an mga bagay na iní. Alagad hanapa ngûna nindong enot sa gabós an Kahadean nin Diós saká an Saiyang katanosan, asín mapapasaindo man an mga bagay na iní.”

Bilang Diós Akì, iniimbitaran Niya kita sa Lucas 9,23: na “lingawán an sadiri, magpâsan kan cruz aroaldaw, asín magsunód Saiya”. An satong cruz iyó an mga kadipisilan na inaagihan ta sa ngaran ni Cristo. Pag inaako ta an satong pagsakit para sa katanosan bilang cruz, pinapakisumarò kita sa misyon nin kaligtasan ni Cristo, kayâ kaiba ta Siya sa pagpâsan, asín pinapabanál kita pasiring sa Saiyang Kahadean.

Bilang Diós Espiritu Santo, sa mga andam sa pagdangóg sa Saiyang kadunongan asín pag-utób kan Saiyang kabôtan, pinapasabóng Niya an kaliwanagan sa tahaw nin kapurisawan, asín ilaw sa madiklom na dalan. Sa Isaias 11,2 nanugâ an Diós na itátaó sato “an Espiritu nin kadunongan saká pakasabot, an Espiritu nin marhay na hatol saká kusóg, an Espiritu nin pakaaram saká pagkatakot sa Kagurangnan.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin duros sa buhay na inaagihan mo ngonian o nalampasan na, asín kun haen an Kagurangnan sa mga panahon na iní.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song