An Pasko para sa Familia

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Disyembre 27, 2020-Enero 2, 2021. Basahon an Evangelio gikan sa Lucas 2,22-40 (Fiesta nin Sagrada Familia).

Sa evangelio an Sagrada Familia ni Jesus, Maria asin Jose nagpasiring sa Jerusalem para sa presentacion kan aking si Jesus sa Templo. An enot an Domingo sa Pasko celebracion kan Fiesta kan Sagrada Familia, na iyo an pangarogan nin mga Cristianong familia sa kabanalan asin kaimbodan sa kabotan nin Dios. Segun sa ladawan kan Sagrada Familia, an lambang Cristianong familia inaapodan nin Dios na magin Simbahan sa harong, eskwelahan nin pagkamoot, asin tanda nin paglaom.

Simbahan sa Harong. An pinakasadit na unit nin Banwaan nin Dios iyo an familia, kaya ini inaapod man na  Ecclesia domestica o Simbahan sa harong. Ini naipapahiling sa pagpamibi asin mga gawe nin pagtubod sa Dios nin mga miembro nin familia.

Siring ki San Jose asin Santa Maria na dinara si Jesus sa Templo sa Jerusalem asin tinukdoan Siya kan mga tradicion nin saindang pagtubod, an mision nin mga magurang na Cristiano iyo na ipamidbid  sa saindang mga aki an mahal na Dios – sa pagtukdo sainda sa mga pamibi asin  doctrina kan Simbahan, sa pagpatood sainda sa mga tradicion catolico, sa pagdara sainda sa mga sacramento, lalo na sa pagsimba sa  cada Domingo asin mga aldaw nin obligacion.

Eskwelahan nin Pagkamoot. Kan nakaaging Domingo nag-viral an video kan may sarong pulis na binadil-ginadan nin basang an duwang tawo na mag-ina. An naka-complicar kan situacion iyo na invuelto sa pangyayari an doce-años na aking babae kan nanggadan. Mantang kadakul an nagbatikos sa mag-ama, nakihuron naman an agom asin ama kan mag-ina na ginadan na dai na idamay an aki nin huli ta ini man victima nin saláng pagpadakula nin saiyang mga magurang asin dapat tâwan nin oportunidad na magtalubo nin normal. An pangyayaring ini nagin makusog alagad makulog na leccion sa satong nacion manungod sa pag-abuso sa kapangyarihan asin sa tamang pagpadakula sa mga aki.

Sabi ni San Pablo sa Colosas 3,13-14: “Magpatinios-tiosan asin magpatinawad-tawadan kun an saro may hinanakit sa saro man; kun pàno an Kagurangnan nagpatawad saindo, siring man kamo. Sa ibabaw kaini gabos iyo an pagkamoot na iyo an bugkos kan kalubosan.” Ini an pangapodan sa lambang familia lalo na sa mga nakakagurang na mga miembros kaini, nin huli ta may mga aki na nakakatangad sainda. Kun marhay an padara kan mga nakakagurang, marhay man an magigin ugali nin mga aki. Kun natatangadan an salâ, tibaad maghona an mga ini na an salâ tama, asin an tama salâ.  

Tandâ nin Paglaom.  Sa Sirach 3,3-4 nasusurat: “An naggagalang sa ama naghihipno sa kasâlan, asin an nagpapamuraway sa ini siring sa nagtitipon nin kayamanan.” Ini an hararom na kahulugan kan paggalang niato sa satong mga magurang: nakatakod ini sa paglaom kan madatong na kamurawayan.

An lambang familia kaiba sa dakulang familia kan Kahadean nin Dios. Kaya mantang nabubuhay digdi sa dagâ asin nasisibot sa mga pangangaipo sa aroaldaw, an familia nagtuturo man sa realidad kan maabot na buhay na daing kasagkoran. Naipapahiling ini sa pag-andam sa mga aki bako sana sa saindang pagmukna man nin sadiring familia kundi sa pag-andam nin lambang miembro sa buhay na daing kasagkoran; siring man sa pagrumdom asin pagpamibi sa mga miembros  kan familia na naenot na sa ikaduwang buhay. An devocion sa mga santos nagtutukdo man sa langitnon na padumanan kan lambang miembro kaini.

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun pano naisasabuhay kan saimong familia an pagigin Simbahan sa harong, o eskwelahan nin pagkamoot, o tanda nin paglaom..

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Mangyari Susog sa Saimong Itinaram

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Disyembre 20-26, 2020. Basahon an Evangelio gikan sa Lucas 1,26-38 (Ikaapat na Domingo nin Adviento).

An Anunciacion ni Angel Gabriel ki Virgen Maria na siya napili kan Dios na magin ina kan Aki kan Orog Kahalangkaw an tanda kan pagdatong kan bagong paglalang sa gracia nin Dios.

Sa naenot na paglalang an Dios nagtao nin orden sa karaotan, liwanag sa kadikloman, asin buhay sa lugar na daing buhay. Alagad an kasâlan an nagraot kan linalang. Ini sinisimbolo kan pagsuway sa kabotan nin Dios kan enot na mga tawo, si Eba asin Adan.

Si Virgen Maria nagsimbag sa Lucas 1,38: “Mangyari man lugod susog sa saimong itinaram”. Sa tataramon na ini binago ni Maria an kasaysayan nin kinaban, nin huli ta dahil kaini an Dios nanitawo.

An pag-iyo ni Virgen Maria sa kabotan Dios iyo man an satong pangaraogan nin maninigong pag-andam sa pagdatong kan Kagurangnan. Ano an boot sabihon kan saiyang pag-iyo?

Ini pagtugot na bàgohon kita nin Dios. Kan nag-iyo si Maria binago kan Dios an saiyang buhay. Siring man, babagohon nin Dios an satong buhay sa pag-ako ta sa Saiyang kabotan. Susog sa Isaias 55,8-9: “Nagsabi an Kagurangnan, ‘An sakong kaisipan bakong arog kan saindong kaisipan, asin an sakong mga paagi aiba man kan saindo. Kun paanong an kalangitan mas halangkaw ki sa daga, siring man an sakong mga paagi sa saindong mga paagi, asin an sakong kaisipan sa saindong kaisipan’.”

Kun paghona ta marhay an satong kamawotan asin mga gibo, idolot ta ini sa Dios asin hagadon na iwaras an Saiyang kadunongan, asin mas orog pa ining mapapakarhay sa lindong kan plano nin mahal na Dios. Siya an malinig kan mga hagad kan satong puso asin mapabunga kan mga gibo kan satong kamot.

Ini pagsayuma sa anoman na contra sa kabotan nin Dios. An pag-iyo ni Maria nangangahulogan man kan saiyang pagtalikod sa ibang mga plano ninda ni San Jose sa buhay, nin huli sa mas halangkaw na pangapodan nin Dios. An satong pagsunod sa Dios nangangaipo bako sana kan paggibo nin karahayan kundi kan satong pagtalikod sa kasâlan.

Ini an pangapodan ni Juan Bautista, asin ni Jesu Cristo kan Siya duminatong na. Sabi Niya sa Mateo 6,24: “Mayong makakapaglingkod sa duwang kagurangnan, huli ta ikakaongis niya an saro asin mamomotan an saro; magigin maimbod siya sa saro asin pag-oolog-ologon an saro.”

Ini panuga sa bilog niatong buhay. Kan si Maria nag-iyo sa sinabi ni angel Gabriel, bako ini sarong beses sana kundi saiya nang ginigibo dati pa bilang maimbod na aki kan Ama asin kan dumatong si Jesus, bilang mamomoton na ina.

Sabi ni Cristo sa Lucas 9,23: “An siisay na boot magsunod sako, kaipuhan lingawan niya an sadiri niyang buhay, magpasan kan saiyang cruz aroaldaw asin magsunod sako”. Aroaldaw. Nin huli ta an katuyuhan kan satong pagbabago iyo na kita magin kabaing ni Cristo, asin ini dai mangyayari nin sararoan, o sa madaling panahon sana, kundi sa bilog niatong pagkabuhay.

GIYA SA PAGHIRAS SA SADIT NA KOMUNIDAD O FAMILIA • Maghiras nin mga desisyon o bagay na sinayumahan niato nin huli sa pagsunod sa kun ano an tama asin marhay susog sa kabotan nin Dios.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Maogmang Paglaom

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Disyembre 13-19, 2020. Basahon an Evangelio gikan sa Juan 1,6-8,19-28 (Ikatolong Domingo nin Adviento)

Sa evangelio pig-istorya ni Juan Evangelista an pagdatong kan mga sugo kan mga poon na padi sa Jerusalem, asin sa paghapot ninda kun siisay si Juan Bautista mas nalinaw an misyon asin mensahe kaini.

Siya an tingog sa kalangtadan na nagkukurahaw na tanoson an dalan para sa Kagurangnan, susog sa profesía sa Isaias 40,3. Inaandam ni Juan Bautista an mga tawo kaidto sa enot na pagdatong ni Jesus asin ngonian sa ikaduwa Niyang pagdatong sa kamurawayan. Inaandam niya kita sa pag-ako kan kaogmahan kan Pasko.

Dakul an mga nakatakod na kaogmahan sa Pasko: an mga decoracion asin karakanan sa mga harong, an mga regalo para sa mga aki, an caroling na bawal ngonian nin huli sa pandemia, an bonus asin 13th month pay kan mga nagtatrabaho, an dakulang ganancia kan mga nagnenegosyo, asin iba pa.

Alagad bako an mga ini an tunay na kaogmahan kan Pasko, kundi an kaogmahan sa espiritu. Sabi sa Filipos 4,4-5: “Danay kamong mag-ogma sa Kagurangnan: giraray  sinasabi ko, mag-ogma kamo. Ta an Kagurangnan harani na.” An kaogmahan sa espiritu makukua sa nagkapirang bagay.

Pagpatawad. An Dios andam sa pagpatawad nin huli ta ini an mapatalingkas sato sa kasâlan. Sa kadakul na beses na si Jesus nagbolong, sinasabi Niya na pinatawad na an saindang kasâlan. Alagad nangangaipo ini kan satong pagsolsol asin pagbago nin buhay. Ini an sinasabi ni Juan Bautista na tanoson an dalan para sa Kagurangnan. Sabi sa Isaias 55,7: “Pabayaan na kan tampalason an maraot nindang pamumuhay asin an likô nindang mga kaisipan. Magbalik na sinda sa Kagurangnan, an satong Dios; maheherakon Siya asin madaling magpatawad.”

Presencia. An pagsolsol asin pagpatawad mga pag-andam sa pag-ako kan kaogmahan nin pagdatong kan Kagurangnan, an Saiyang presencia iyo an mismong gracia. An presencia kan Dios na nanitawo an pinakadakulang kaogmahan kan Pasko. An Saiyang presencia namamatean nin mga tawong may pagkamoot sa puso. Nin huli ta kun an puso panô nin pagkamakasadiri, pagkauri, asin pagkaongis sa kapwa, daing lugar para sa presencia nin Dios. Sabi sa 1 Juan 4,16: “An Dios pagkamoot, asin an tawong nagdadanay sa pagkamoot nagdadanay sa Dios, asin an Dios nagdadanay saiya.”

Paglaom. An gabos na kaogmahan sa dagâ, kaiba na an banal na celebracion kan Pasko asin Eucaristía, mga patanâ kan dakulang kaogmahan sa pagdatong kan kapanoan kan Kahadean. An maogmang paglaom na ini iyo an nagtataong-kusog sa mga bagyong minaagi sa buhay. Asin ini makukua sa tawong tatao magpasalamat nin huli ta sa pagpasalamat nahihiling an mga kaogmahan sa dagâ bilang biyaya asin an Dios bilang kagtao kan mga ini. Si San Pablo nagtukdò sa Roma 12,12: “Mag-ogma kamo sa saindong paglaom, magmatinios kamo sa kasakitan. Danay kamong mamibi.”

Pagpatawad, presencia, asin paglaom: an mga ini an kaogmahan sa espiritu, mantang kita “naghahalat kan maogmang paglaom asin pagdatong kan satong Kagurangnan na si Jesu Cristo”.

GIYA SA PAGHIRAS SA SADIT NA KOMUNIDAD O FAMILIA • Maghiras nin mga kaogmahan na namatean na o hinahalat pa ngonian na Adviento asin sa Pasko nin Pagkamundag ni Jesu Cristo.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Andama an Dalan para sa Kagurangnan

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Nobyembre 29-Disyembre 5, 2020. Basahon an Evangelio gikan sa Marcos 1,1-8 (Ikaduwang Domingo nin Adviento).

Sa enot na mga verso kan evangelio ni San Marcos, pinapamidbid si Juan Bautista bilang katupadan kan profesia sa Isaias 40,3 na “sarong tingog nagkukurahaw sa kadlagan”. An saiyang kurahaw: “Andama nindo an dalan para sa Kagurangnan, tanosa nindo an Saiyang aagihan.”

Pàno kita maandam para Saiya? Pàno an pagtanos kan Saiyang aagihan? Sa paagi nin pagbakle asin pagbago nin buhay. Sabi sa evangelio, an mga tawo na nagdadarangog ki Juan Bautista nagkurumpisal kan saindang mga kasàlan asin saiyang binoronyagan sa Salog Jordan bilang tanda kan saindang kamàwotan na magbago nin buhay.

Pagtanos nin isip. An kapinònan nin anoman na pagbabago iyo an pag-ako na kita nasalà sa pakasabot – naghona kita na makukua ta an kaogmahan sa mga saláng bagay, o naghona kita na an salâ tamà, asin an tamà salâ. Iyo ini an natura nin tentacion: na kita lansehon sa kun ano an tama asin marhay, an nakakapaogma asin nagdadanay.

An sunod iyo an pag-ayon kan satong isip asin boot sa kadunongan asin kabôtan kan mahal na Dios. Sabi sa 2 Pedro 3,9: “habo Niya na igwa nin mawara kundi na an gabos magbagong-buhay”. Ini an boot sabihon kan pagtanos kan Saiyang aagihan: na an satong kabôtan nakaayon na sa katanosan kan Kagurangnan.

Pagbago nin puso.  An pagbago bako sana sa isip, sa pagtubod  sa tamang doctrina o katukdoan moral, kundi sa pagpararom kan satong pakiibahan sa mahal na Dios. An pagbakle sarong reconciliacion (kaya ngani ini an ngaran kan sacramento nin pagkumpisal asin pagpatawad) asin pagrahay kan naraot na pag-ibanan niato asin nin Dios.

Sabi ni Cristo sa Juan 14,6: “Ako an dalan, an katotoohan, asin an buhay, dai nin makakaduman sa Ama kun bako Sako”. An Dios na nagpamidbid na Ama asin si Cristo na nagpamidbid na Aki, padagos na nagpapamate sato kan Saiyang pagkaherak asin nag-iimbitar sa mas hararom pang pag-iribanan sa paagi kan Espiritu na yaon nag-eerok na sa satong puso nin huli sa gracia nin bonyag na inako niato.

Paglingkod sa gibo. Si Juan Bautista nagsasaksi sa saiyang pangapodan bako sana sa tataramon kundi sa gibo. Sa saiyang kasikatan dai nawara saiya an saiyang mision: na ipamidbid si Cristo sa katawohan. Sabi niya sa Juan 3,30: “kaipuhan Siyang magdakula, lagad ako kaipuhan na magsadit”.

An saiyang paglingkod na mahigos asin mapakumbaba sarong makusog na pagsaksi laban sa kultura nin pagkamakasadiri, kapaabaw-abawan, asin pagkauri. Siring ki Cristo na  nagsaksi sa radical na pagsunod sa kabotan kan Ama, si Juan Bautista nag-atang man kan saiyang buhay bilang consequencia kan saiyang mision.

Sa panahon nin Adviento an pangapodan sa pag-andam sa dalan para sa Kagurangnan nangangahulugan nin pagtanos  kan satong isip asin pag-ayon sa kabôtan nin Ama; nin pagbago kan satong  puso asin pagpakarhay kan naraot tang relacion sa Dios; asin pag-ayon  kan satong gibo na magin kasangkapan kan pagkamarahayon asin pagkaherak kan Kagurangnan.

   

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia nin pagkawara sa dalan asin pagbabago pasiring sa Kagurangnan.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Magbantay Kamo!

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Nobyembre 29-Disyembre 5, 2020. Basahon an Evangelio gikan sa Marcos 13,33-37 (Enot na Domingo nin Adviento).

Magbantay kamo!”Nagkapirang beses ini sinabi sa evangelio. Ano an satong babantayan? An pagdatong ni Jesu Cristo. Naglaog na kita sa panahon kan Adviento. Sa panahon na ini, may nagkapirang pagdatong si Jesu Cristo na satong sinecelebrar asin dapat bantayan.

An Adviento pag-andam sa celebracion kan Pasko nin Pagkamundag, an enot na pagdatong ni Jesu Cristo. Orog sa mga decoracion, pagkaon, o regalo, orog sa gabos na preparacion iyo an pag-andam kan satong puso asin espiritu sa maabot na Pasko.

An Adviento pag-andam sa ikaduwang pagdatong ni Jesu Cristo.

An Adviento pagpadagos kan satong pagtalubo tanganing magin siring ki Cristo.

Lingkod, Pastor, Hukom, Hade

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Nobyembre 22-28, 2020. Basahon an Evangelio gikan sa Mateo 25,31-46 (Solemnidad ni Cristong Hade).                                                                                                                                   

Ini an huring parabola sa Evangelio ni San Mateo, an parabola kan ikaduwang pagdatong kan Aki nin Tawo sa kamurawayan bilang hade asin hukom. Ini an pagbasa sa Solemnidad ni Cristong Hade.

Si Cristo satong hade. Sa Saiyang ministerio publico tinukdo Niya an marhay na bareta kan pagdatong kan Saiyang Kahadean sa paagi nin mga parabola asin mga gibong herak. Bago Siya suminakat sa langit, ini an sinabi Niya sa Mateo 28,18: “Itinao sako an gabos na kapangyarihan sa langit asin sa daga.” Alagad an Saiyang pagkahade bakong siring sa tinòdan nin mga tawo kun ano an hade.

An Hade bilang Lingkod. Naghona an dakul na mga Judio sa panahon ni Jesus na an maabot na Mesias sarong matibay na lider militar na dadaogon an mananakop na Imperio Romano, alagad an duminatong sarong mapakumbaba asin maimbod na lingkod. Sabi ni Jesus sa Marcos 10,45: “An Aki nin Tawo dai nagdigdi tanganing paglingkodan, kundi tanganing maglingkod asin magdusay kan buhay Niya tanganing matubos an dakul na tawo.”

Bilang lingkod, tinukdoan Niya kita kun pano magin marhay na pamayo. Sa saiyang mga disipulos na minsan nagpasuruhay kun siisay an pinakamatibay sainda, sinabi Niya sa Mateo 20,26-28: “Bakong arog kaiyan an dapat mangyari saindo. An siisay man saindo na boot magin dakula dapat magin surogoon nindo. An siisay man na boot magin enot, dapat magin oripon nin gabos; arog kan Aki nin Tawo.”

An Hade bilang Pastor. Siring man, nagpamidbid Siya bilang Pastor. Sinabi Niya sa Juan 10,11: “Ako an marhay na pastor. An marhay na pastor minadusay kan saiyang buhay para sa mga karnero.” Sa Parabola kan Nawawarang Tupa, inistorya ni Cristo an saiyang prioridad: an mga nawawara. Sa Lucas 19,10 sinabi Niya: “An Aki nin Tawo nagdigdi sa paghanap asin pagligtas kan nawawara.”

Bilang Hade si Cristo an sukolan kun sa karahayan o sa karatan kita dinadara kan mga namamayo sato digdi sa daga. Nin huli ta may mga naghahade-hadean sa ngonian na nagpapatubod na tanganing makamit an katoninongan asin seguridad kan mga ciudadano, kaipuhan na isikwal asin gadanon an mga nawawara asin bako pasado sa saindang moralidad.

An Hade bilang Hukom.  Bilang hade Siya saro man na hukom. Sa Nagtutubod, pinapahayag niato na si Cristo “nagtutukaw sa too kan Ama. Asin mamuraway na mabalik sa paghukom sa mga buhay asin mga gadan, an Saiyang kahadean daing katapusan.” Sa katunayan, may naenot nang paghukom sato an Dios sa paagi ni Jesu Cristo – sabi ni San Pablo sa 1 Timoteo 2,4: an Dios “nagmamawot na an gabos makaligtas saka makamidbid kan katotoohan”.

Kaya pagdatong kan aldaw na iyan, huhukoman kita ni Cristo segun sa kun ano an ginibo ta sa biyaya nin kaligtasan na tinao Niya, sa gabos na karahayan na winaras Niya sato, asin sa kapwang nangangaipo na binoot Niyang magin dalan niato sa kaligtasan. Huhukoman Niya kita kun gurano kita nagin kabaing sa Saiya sa pagkamaimbod asin pagkamoot.

Viva el Cristo Rey!

GIYA SA PAGHIRAS SA SADIT NA KOMUNIDAD O FAMILIA • Maghiras kun sa panong paagi masasabi na si Jesus naghahade sa saimong puso.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Kamotan an Dios nin Bilog na Sadiri

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Oktubre 25-31, 2020. Basahon an Evangelio gikan sa Mateo 22,34-40 (Ika-30 Domingo sa Ordinariong Panahon).

An pinakadakulang tugon simbag ni Jesus sa hapot nin sarong fariseo na boot Siyang baloon. Alagad an simbag ni Jesus bako sarong provision nin tugon o batas, kundi sarong pamibi – an pinakaimportanteng pamibi para sa mga Judio – an Shema Yisrael.

Makukua ini sa Deuteronomio 6,4-5: “Dangoga, O Israel! An Kagurangnan – asin an Kagurangnan sana – iyo an satuyang Dios. Kamotan nindo an Kagurangnan na saindong Dios sa bilog nindong puso, sa bilog nindong kalag, asin sa bilog nindong kusog.” Sa version ni San Mateo, kamotan ta an Dios sa bilog niatong puso, kalag, asin isip.

Ano an boot sabihon nin kamotan an Dios sa bilog na puso? Boot sabihon daing iba kitang dios na kamomotan asin sasambahon; Siya sana an laog kan satong puso. Ini an pinakaenot sa Sampulong Tugon sa Exodo 20,3. Kaitong panahon kadakul nin mga dios-diosan na sinasamba – si Baal, Astarte, Dagon, an bulawan na baka, an mga dios-diosan sa Egipto, Grecia, asin Roma. Ngonian na panahon, dai na an mga ini, pero dakul an mga nagsasamba sa mga dios-diosan nin kapangyarihan, kayamanan, kagadanan, kasikatan, asin iba pa.

Ano an boot sabihon nin kamotan an Dios sa bilog na kalag? An kalag iyo an parte kan satong pagkatawo na nagpapahiro asin nagtataong-buhay sato. Sabi sa Genesis 1,27, kitang mga tawo linalang na kabaing nin Dios. An satong espiritu an kabaing sa mahal na Dios. Kaya kun an satong espiritu nagtatalubo sa pagtubod, paglaom, asin pagkamoot, kita nagigin mas kabaing  nin Dios.  An katuyuhan nin gabos tang pagpamibi, pag-devocion, pagsimba iyo na kita magin siring sa satong Dios na sinasamba.

Ano an boot sabihon nin kamotan an Dios sa bilog na isip? Mapoon ini gabos sa pag-ako kan katotoohan na dara ni Cristo. Sabi ni Jesus sa Juan 8,31-32: “Kun danay na magsunod kamo kan Sakong katukdoan, tunay ko kamong mga disipulo; maaaraman nindo an katotoohan, asin an katotoohan an mapatalingkas saindo.” Dangan sa Juan 16,13, nanuga Siya:  “Pag-abot kan Espiritu nin Katotoohan, tatabangan Niya kamo nganing masabotan nindo an gabos na katotoohan.” Duwang kabtang kaining katotoohan an kaipuhan tang hanapon asin akoon:  an mas mamidbidan pa an Dios asin maaraman an Saiyang kabotan -  sa p g-adal kan Saiyang Tataramon sa Biblia, sa mga katukdoan kan Simbahan, asin sa paghorop-horop asin pamibi.

Ano an boot sabihon nin kamotan an kapwa siring sa pagkamoot sa sadiri? Bako sana na gibohon tang sukol an pagkamoot sa sadiri kun gurano ta kamomotan an kapwa, kundi girumdomon na kita gabos namotan nin Dios, asin Siya harani sa kapwang dukha asin nangangaipo. Sa katunayan, ginibo ni Cristong sukol asin patugmadan kun makakalaog kita sa Kahadean nin langit o dai, an satong patratar sa kapwang nangangaipo. Sinabi Niya sa Mateo 25,40: “An anoman na ginibo nindo sa saro kan pinakasadit kong mga tugang, ginibo nindo iyan Sako!”

An Dios na nakikisumaro sa satong condicion nin pagkatawo, naghahagad na makisumaro man kita Saiya asin sa satong  kapwa.  Mamoot kita siring na an Dios namomoot sa sato.

GIYA SA PAGHIRAS SA SADIT NA KOMUNIDAD O FAMILIA • Maghiras kun pano naisasabuhay an bolanos na pagkamoot sa Dios sa bilog na puso, o kalag, o isip.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Itao sa Dios an sa Dios

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Oktubre 18-24, 2020. Basahon an Evangelio gikan sa Mateo 22,15-21 (Ika-29 Domingo sa Ordinariong Panahon).

“Itao nindo ki Cesar an ki Cesar, asin sa Dios an sa Dios”. Ano an boot sabihon kaini? Ini an simbag ni Jesus sa hapot saiya kan mga naghahanap nin ikakaparaot Niya. An saindang hapot: “Tugot daw na magbayad nin buwis ki Cesar o dai?”

Ining hapot sarong patibong. Nin huli ta kun magsimbag si Jesus na dapat magbayad nin buwis, ipapalakop kan mga ini – an mga parasunod kan mga poon na padi asin ni Herodes – na traidor Siya sa banwaan na Judio nin huli ta nagsusuporta Siya sa mananakop na Imperio Romano. Kun sabihon Niya man na dai dapat magbayad, ioosip kan mga ini sa mga autoridad kan Imperio na Siya nagrerebelde asin nagtutukdo sa mga tawo na magsuway sa Imperio, kaya pwede Siyang ipadakop asin padusahan. Alagad ginamit ni Jesus an saindang patibong tanganing magtukdo manungod sa autoridad asin Kahadean.

An Dios an paorogon sa gabos. Bako ini sa pagbanga kan material o secular na mga bagay sa lado kan gobierno asin an espiritual sa lado kan Simbahan. Kundi na an maninigong itao sa Dios iyo an gabos. An pinakahalangkaw na batas, an pinakadakulang tugon susog ki Jesus sa Mateo 22,37, iyo ini: “Kamotan mo an Kagurangnan mong Dios sa bilog mong puso, sa bilog mong kalag, sa bilog mong isip.”

An Dios an nagwawaras nin kapangyarihan sa daga. Sa Isaias 45,1-6, pig-istorya kun pano ginibo nin Dios na kasangkapan si Cyrus the Great, emperador kan Persia, para matapos na an pagsakit kan mga Judio sa  irarom kan Imperiong Babilonia asin makauli na an mga na-destiero (exile) sa Israel.

An Dios an sukol kan satong pagsunod sa mga autoridad sa kinaban. Sa Mateo 28,18, bago isubol ni Jesus an Saiyang mga disipulos sa mision, ini an sinabi Niya: “Itinao sako an gabos na kapangyarihan sa langit asin sa daga.” Kun marhay an pasunod nin mga pamayo sa gobyerno asin susog sa kabotan nin Dios an saindang pigpapatupad na batas, maninigo lamang an pagsunod nin mga ciudadano ta para sa ikakarahay man sana ini nin gabos.

Sabi ni San Pablo sa Roma 13,1: “Dapat magpasakop sa mga namamayo kan gobyerno, huli ta mayong autoridad na bakong tugot nin Dios. An mga autoridad sa ngonian na panahon ibinugtak nin Dios.”

Alagad pano kun bako marhay an gibo kan mga namamayo? Marhay na girumdomon na susog sa satong Constitucion, an pinakahalangkaw na autoridad (o sovereign) sa satong democracia iyo an  mga ciudadano (people) bako an mga pulitiko o militar.  Dai puede gamiton an Roma 13,1 tanganing magin buta o daing isip na parasunod an mga tawo kun lakop an karatan asin corupcion sa gobierno.

Sa hampang kan mga maraot na pamayo, si Jesus nagtukdo sa Mateo 20,26: “Bakong arog kaiyan an dapat na mangyari saindo. An siisay man na boot magin dakula dapat magin surogoon nindo.”

Asin kun may pang-aabuso sa kapangyarihan, ini an pagirumdom kan Talinhaga 31,8-9: “ Magpahayag ka para sa mga tawo na dai nin boses. Ipakilaban mo an  derecho kan gabos na dai kayang makilaban. Magpahayag ka para sainda asin magin saro kan matanos na hukom. Ipakilaban mo an derecho kan mga dukha asin daing sukat.”

GIYA SA PAGHIRAS SA SADIT NA KOMUNIDAD O FAMILIA • Maghiras nin satong mga ginigibong pag-cooperar o pakipagtabangan sa gobierno ngonian na panahon nin pandemia para sa ikakarahay kan gabos.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Dakul an Inaapod, Dikit an Napipili

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Oktubre 11-17, 2020. Basahon an Evangelio gikan sa Mateo 22,1-14 (Ika-28 Domingo sa Ordinariong Panahon).

An parabola kan Bangkete sa Kasal may parehong tema sa duwang parabola na sinundan kaini sa evangelio ni San Mateo, an parabola kan Duwang Magtugang asin an parabola kan mga Maraot na Tumatawo. Yaon an plano nin Dios, an pagsikwal nin Saiyang mga pinili, asin an paghukom sa huri.

An Plano nin Dios iyo na an gabos maligtas asin makalaog sa Saiyang Kahadean. Sabi sa 1 Timoteo 2,4: an Dios “nagmamawot na an gabos makaligtas, saka makamidbid sa katotoohan”. Sa parabola piglaladawan ini kan bangkete sa kasal na may mga naenot na imbitado dangan sinunod imbitaran an gabos sa tinampo, an mga marhay asin maraot.

Sa Bagong Tipan, nagkapirang beses piglaladawan an pagkamoot nin Dios siring sa sarong kasalan kun saen si Jesu Cristo an novio asin an Simbahan an Saiyang novia. Kaya ngani sa Efeso 5,25 tinutukdo sa mga agom na lalaki: “Mga esposo, kamoton nindo an saindong agom siring kan pagkamoot ni Cristo sa Simbahan; idinusay Niya an Saiyang buhay para sa Simbahan.” Asin an padumanan kan Simbahan na kasaro ki Cristo iyo an kapanoan kan Kahadean.

An Pagsikwal kan mga Saiyang mga Pinili. Siring kan aki na nag-iyo sa sugo kan saiyang ama alagad dai nag-otob kaini, asin kan mga maraot na tumatawo, sa duwang naenot na parabola, an mga imbitado dai pig-honra an invitacion kan hade sainda. Mas pinili ninda an pagpayaman (oma asin negocio) o posisyon sa sociedad (kaya kinulgan asin ginadan an mga profetang sinugo nin Dios) kisa sa Kahadean.

Kita man pwedeng magibo an siring na pagsikwal kun pinipili ta an mga kinabanon na kaogmahan kisa sa Kahadean. Sabi sa awit sa Misa na hale sa Mateo 6,33: “an Kahadean nin Dios enoton ta siring man an katanosan, asin an gabos idudugang na sana.”

Igwa pa nin sarong pagsikwal sa hade sa laog kan parabola: itong lalaki na dai nakabado pangkinasal. Sa paggibo nin siring, minsan nagpa-honra siya sa invitacion, pinili niya man giraray an saiyang kabotan kisa kun ano an maninigo sa Kahadean. Siring ini sa satong naglalakaw sa dalan nin Kagurangnan alagad nakakagibo nin mga bagay na tumang sa Dios asin pagpaorog kan sadiring kabotan.

An paghukom nin Dios. An gabos na pagsikwal sa Kagurangnan, magdudulot nin paghukom: an pagtapok paluwas sa Kahadean. Sa parabola, an pagsugo kan hade sa saiyang hukbo na gadanon an mga paragadan asin suluon an saindang mga banwaan sarong profesia sa maabot na pagsakit kan Israel na kan taon 70 AD sinakyada asin rinumpag an Jerusalem asin palibot na mga banwaan kan fuerza kan Imperio Romano.

Sabi sa katapusan kan parabola sa Mateo 22,14: “kadakul an inaapod alagad dikit an napipili”. Totoo na may paghukom na gigibohon sa katapusan kan satong buhay sa daga asin sa Ikaduwang Pagdatong ni Cristo. Alagad bago an paghukom nin Kagurangnan, kita nguna an enot na mahukom o mapili: an akoon an invitacion kan Dios pasiring sa Saiyang Kahadean o pilion na sundon an sadiri tang kabotan asin mga kinabanon na kaogmahan.

Pilion ta man lugod an “totoong maninigo asin dapat, an matanos asin nakakaligtas”.

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun pano ta sinunod o dai an particular na kabotan o plano nin Dios sa satong buhay, asin kun ano an nagin bunga kaini.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Si Cristo an Gapong Isinikwal

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Oktubre 4-10, 2020. Basahon an Evangelio gikan sa Mateo 21, 33-43 (Ika-27 Domingo sa Ordinariong Panahon).

Sa evangelio pig-istoria ni Jesus an parabola kan mga maraot na tumatawo. An ubasan iyo an harong nin Israel. An kagsadiri iyo an mahal na Dios. An mga maraot na tumatawo iyo an mga pamayo nin banwaan asin kapadian na dai nagin maimbod sa saindang katongdan na atamanon an Israel. An mga surugoon iyo an mga profeta na pinadara nin Kagurangnan. Asin an aki kan kagsadiri, daing iba kundi si Jesu Cristo na nagprofesia kan Saiyang maabot na pagsakit asin pagkagadan sa kamot kan mga poon nin banwaan asin kapadian.

Sinikwal ninda si Jesus siring sa profesia kan gapong sinikwal nin mga paratugdok. Kaya hinale sainda an Kahadean asin itinao sa banwaan nin pagtubod na minukna ni Cristo, an Simbahan na pinatugmad ki Pedro asin nabubuhay sa Espiritu Santo.

Nalingawan kan mga kapadian asin kamagurangan sa banwaan an boot sabihon kan saindang pagigin Piniling Banwaan – bako kaomawan o kapangyarihan, kundi pagigin kasangkapan kan Kahadean sa kinaban. Alagad kun sinikwal ninda si Jesus kaidtong panahon, bako man imposible na kitang mga kabtang kan Saiyang Hawak sikwalon man si Cristo sa satong buhay.

Kun habo tang magtalikod sa kasalan, sinisikwal ta si Cristo. Kan si Jesus naglibot sa pagtukdo kan Kahadean ining sa Mateo 4,17 an pirming sinasabi Niya: “Magbakle na kamo huli ta harani na an Kahadean nin langit!” Boot nin Dios na an gabos maligtas asin makalaog sa saiyang Kahadean alagad ini nangangaipo man kan satong pag-ako kaiyan sa paagi enot kan satong pagbagong-buhay.

May patanid si Cristo sa Mateo 7,21: “Bako gabos na nagkukurahaw, ‘Kagurangnan, Kagurangnan’, makakalaog sa Kahadean nin langit kundi itong nag-ootob kan kabotan kan sakong Ama sa langit.”

Kun nagdudulag kita sa cruz nin sacrificio, sinisikwal ta si Cristo. Sa Lucas 9,23 ini an pighagad ni Jesus sa mga boot magin disipulo Niya: “lingawan an sadiri niyang buhay, magpasan kan saiyang cruz aroaldaw, asin magsunod sa Sako”.

An cruz na pinapapâsan sato bako an pagsakit na padusang-balik kan satong mga gibong sala, kundi an pagsunod sa kabotan nin Dios sa mga gibong marhay. Si San Pablo may hulit sa Filipos 4,8: “Panoa an saindong isip kan gabos na totoo, gabos na maninigong kamotan asin galangan, gabos na marahayon asin maninigong omawon.”

Kun liningawan ta an satong Cristianong mision, sinisikwal ta si Cristo. Ini an mision na winalat Niya sato sa Marcos 16,15: “Paduman kamo sa bilog na kinaban, ibalangibog an Marhay na Bareta sa gabos na tawo!” Sa mga nagkakampante na huli sa paghona na nagibo na ninda an saindang obligacion espiritual o na igwa man sinda nin mga devocion, girumdomon na kita inapod ni Cristo bako sana sa pagsimba kundi na magin Simbahan. Bilang Simbahan inaapod kita na magtalubo sa pagtubod na bakong pansadiri kundi nakahiras sa mision nin kaligtasan nin kinaban.

Sabi sa Roma 14,7: “Daing siisay man na nabubuhay para sa sadiri lamang, daing siisay man na nagagadan para sa sadiri lamang.” Mabuhay asin magadan, kita para sa Kagurangnan asin sa Saiyang kabotan.

 

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun pano ta nasikwal si Cristo sa paagi kan satong mga salang gibo asin kun pano kita nakabalik Saiya.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Kapaabaw-abawan nin Espiritu

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Setyembre 27-Oktubre 3, 2020. Basahon an Evangelio gikan sa Mateo 21, 28-32 (Ika-26 na Domingo sa Ordinariong Panahon).

Sa evangelio pig-istoria ni Jesus an parabola kan duwang magtugang na pigsugo kan saindang ama. An aki na naghabo sa enot alagad nagtubod sa huri iyo an mga parakasala sa panahon ni Jesus na nagtubod sa pangapodan ni Juan Bautista asin nagbagong buhay. Asin an aki na nag-iyo alagad dai naghiro iyo an Saiyang mga kahampang (audience) na mga kapadian asin kamagurangan kan banwaan, na sa panluwas maimbod sa pagtubod alagad sa panlaog matagas an puso sa kabotan nin Dios.

Sabi ni Jesus sa Mateo 9,13: “Pagkaherak an mawot ko, bakong atang. Dai ako nagdigdi sa pag-apod kan mga banal kundi kan mga parakasala.” Ini an mensahe kan parabola sa evangelio.

Magbagong-buhay an parakasala ta ini kaogmahan sa mata nin Dios. Sabi ni San Pablo sa Roma 5,8: “pinahiling nin Dios an Saiyang dakulang pagkamoot sato kan si Jesus nagadan para sato kan kita mga parakasala pa”. Namomotan kita nin Dios maski kita mga parakasala, bako tanganing kunsintihon kita sa kasalan, kundi tanganing darhon kita sa pagbago. Susog sa  Ezekiel 18,27: “Kun an parakasala magtalikod sa kasalan, maggibo nin tama asin matanos, siya maninigo na mabuhay. Tinalikdan niya an gabos na kasalan na saiyang  ginibo, siya totoong mabubuhay; dai siya magagadan.”

Maglikay sa kapaabaw-abawan nin espiritu o spiritual pride. Ini an kasalan kan mga escribas, farisesos, saduceos, asin gabos na sarado an mga puso asin sinikwal si Jesu Cristo.

Sarong tanda kaini iyo na kun an satong pagtubod nagigin pansadiri lamang siring kan mga naghohona na an pagpamibi asin pag-omaw ninda sa Dios tama na, asin lingaw na an pagmangno sa kapwang nangangaipo asin pagbalangibog kan evangelio.

Saro pang tanda iyo an halangkaw na gayong paghiling sa sadiring katanosan asin hibaba an paghiling sa kapwang parakasala. An hulit sa Filipos 2,3: “Dai maggibo nin anoman na makasadiri o para maghambog, kundi sa kapakumbabaan, ibilang na mas marhay an iba kisa saindo”.

Tanda man nin spiritual pride an pag-overspiritualize nin mga bagay minsan an kaipuhan iyo na pabungahon an pamibi sa mga marhay na gibo. May mga naghuhusga na kulang sa pagtubod an mga nag-aagi nin depression o nakakamate na mag-suicide, imbes na magsabot o mag-antabay sa mga ini na malinawan sa saindang mga kapurisawan.

Spiritual pride man an paghona na dai na kaipuhan magbago sa salang pamumuhay nin huli ta sabi daa an Dios pagkamoot. Siring man an pagpasipara kan  pagtalubo sa espiritu arog kan paglingaw sa pamibi, pagrayo sa Simbahan asin mga sacramento, asin dai pag-adal kan Tataramon nin Dios.

Magpakumbaba sa Kagurangnan. Sabi sa Mateo 5,3: “paladan an dukha sa espiritu”, nin huli ta an kapakumbabaan nagdadara sa pagsarig sa Dios asin pag-ako nin mga kasalan, dangan kapatawadan, pasiring sa katalingkasan asin kapanoan nin buhay. Alagad sa tawong mapaabaw-abaw sa espiritu, may pagirumdom si Jesus sa Mateo 7,21: “Bako gabos na nag-aapod sako ‘Kagurangnan, Kagurangnan’, makakalaog sa kahadean nin langit, kundi an naggigibo kan kabotan kan sakong  Ama sa langit.”

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun pano man nag-agi nin kapaabaw-abawan sa espiritu asin kun pano nadara sa pagbago nin buhay.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Resuene Vibrante

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Setyembre 20-26, 2020. Basahon an Evangelio gikan sa Lucas 2,27-35 (Solemnidad ni Nstra. Sra. de Peñafrancia).

 

Cada ikatolóng Domingo kan Setyembre kitá digdí sa Bicol nagcecelebrar kan fiesta kan satóng Inâ, Nuestra Señora de Peñafrancia. Sabi sa himnong Resuene Vibrante, “Patrona del Bicol, Gran Madre de Dios, se siempre la reina de nuestra region”.

An devocion na ini dinara sa Kabikolan ni Padre Miguel Robles de Covarrubias kan 1710. Sa mga nakaaging taon labi sa 3 miliones katawo an nagpi-pilgrimage sa Naga City para magsungkô ki Inâ sa mga aldaw na ini. Ngonian na taon, sa tahaw kaining pandemia, cancelado an mga actividad sa fiesta, alagad an devocion ki Inâ nagpapadagos sa mga parokya asin mga harong, sa gabos na rona sa kinàban na yaon an saiyang mga devotos.

Sa tahaw kan gabós na iní, marhay na maghapót: Ano man nanggad an totoong devocion sa mahal na Inâ? May duwáng documento nin katukdoán kan Simbahan an pwede tang pagkuahan nin simbag: an "Marialis Cultus" na sinurat ni Pope St. John Paul II kan 1974 asin “Ang Mahal na Birhen" na sinurat kan CBCP kan 1975. Makua kita nin tolóng simbag hale sa duwáng documentong iní.

1. An tunay na devocion ki Maria maimbod sa Biblía. Sabi sa awit ni Maria sa Lucas 1,48: “poon ngonyan aapodon akong paladan kan gabos na kapag-arakian”. Kaya kaitó pa man sagkod ngonyan an Simbahan maogmáng nag-ootob kan profesíang iní ni Maria. Siya man an virgen na mangangakì kan Mesías susog sa mga profesía sa Lumang Tipan. Siya an pinilì kan Amâ na magin Inâ kan Saiyang Akì. Sabi saiya ni arcangel Gabriel sa Lucas 1,28: “paladan na babae. An Kagurangnan yaon saimo!”

2. An tunay na devocion ki Maria dinadara kitá pasiring ki Cristo. Inoomaw si Maria nin huli ta siya an Inâ nin Dios, o Theotokos susog sa katukdoán kan Consejo kan Efeso kaitóng 431 AD. Bilang Ina, an saiyang Aki an pangenot na devoto ni Maria. Sabi ni San Maximilian Kolbe: “Dai nanggad matakot na masobrahan nin pagkamoot ki Maria. Ta dai nindo kayang kamòtan siya labí pa sa pagkamoot ni Jesus.”

Namidbidan kan kinâban si Cristo sa paagi kan pagsunod ni Maria sa kabôtan kan Amâ. Kayâ si St. Louis-Marie de Montfort nakapagsabi: “ad Jesum per Mariam”, pasiring ki Jesus sa paagi ni Maria. Pero kun an satóng pagdevocion ki Maria daí nakakaparaní satô ki Jesus, ginigibo ta siyang idolo o dios-diosan. Kun an satóng pagdevocion daí kitá dinadará sa pagsimbá asin devocion sa Eucaristía, kulang an satuyang pagtubod.

3. An tunay na devocion ki Maria binabàgo an satóng buhay. Sabi ni Jesus sa Mateo 7,16: “Mamimidbid nindo sindá sa mga gibo ninda”. An satóng pagdevocion ki Maria pinapatalubò daw kitá sa kabanalan asin sa pagigin mas maboot, mas mamomòtón, asin mas matinabang sa kapwa?

Si Maria bako saná Inâ ni Jesus kundî siya man an pangenot na disipulo kan saiyang Akì. Bilang Inâ kan Simbahan, siya man an modelo niatò nin pagigin disipulo. An pagigin disipulo iyo an pagsunod sa kabòtan kan Amâ asin pakipag-amigo ki Jesus. Lugód makaarog kitá ki Maria sa saiyang pagigin maimbód sa Amâ asin pagkamoot ki Jesu Cristo.

Viva la Virgen! Viva an satóng mahal na Inâ!

 

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kan saimong gawe nin devocion sa mahal na Inâ ngonian na panahon nin pandemia.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Pitong Polo May Pitong Beses

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Setyembre 13-19, 2020. Basahon an Evangelio gikan sa Mateo 18,21-35 (Ika-24 Domingo sa Ordinariong Panahon).

Pirang beses man nanggad kita tama sanang magpatawad?  Sa paghona ni San Pedro an “sagkod pitong beses” maninigo na sa Kagurangnan. Para sa sarong Judio, bako sanang dakul na kundi diosnon pa an numero 7. Alagad para ki Jesus, “pitong polo may pitong beses”. Bako literal na 490 beses kundi na kita magpatawad sagkod kaipuhan kan satong tugang. 

Sa babasahon hale sa Evangelio mahihiling an diferencia nin pag-isip nin tawo asin kabotan nin Dios. Kadakul sana an nag-oolang sato na magpatawad.

Natatakot kita na tibaad basang-basangon sana an kulog o sakit na inagihan ta. Kadakul an takot magpatawad ta tibaad mapasipara na su salang gibo o maotro pa su abuso. Alagad an pagpatawad bako pagnegar kan kulog, kundi pag-ako kaini asin pagtalubo digdi. Dai man an pagpatawad minakontra sa aban para makamit an justicia. Sa katunayan, kaipuhan an pagpatawad para makumpleto an justicia tanganing magbunga nin pagbulong asin pagpakarhay nin mga naraot. Sabi ni Sto. Tomas de Aquino: “Justice without mercy is cruelty. Mercy without justice is the mother of all dissolution.”

Napatubod kita na an pagpatawad gibo nin mga tawong maluya. Alagad an pagpatawad magigibo sana nin mga tawong makusog, asin kun paghona ta kita maluya, sabi sa Psalmo 46,1: “An Dios an satong pailihan asin kusog”. Ano an nakakapaluya asin nag-oolang sato na magin tunay na matalingkas asin maogma? An pagtanom nin dagit asin pagpadanay kan nainsultong pagmate. Alagad kun an Kagurangnan an satong kusog, dai ta na kaipuhan na halaton pa na maghagad nin tawad an nakagibo sato nin maraot para kita magpatawad.

Naghohona kita na pag may kulog pa nin boot asin rumdom pa an ginibong maraot sato, dai pa kita makakapagpatawad. An kulog asin pagrumdom dai kita gayong control, alagad an pagpatawad tuyong gibo niato. An pagpatawad sarong proceso, an bunga kaini minaabot bako hora mismo kundi sa pag-agi nin panahon. Sabi sa Catechism of the Catholic Church no. 2843: “It is not in our power not to feel or to forget an offense; but the heart that offers itself to the Holy Spirit turns injury into compassion and purifies the memory in transforming the hurt into intercession.”

Ano ngonian an kaisipan nin Dios na laen sa tawo pag-abot sa pagpatawad?

Sabi ni Jesus sa Juan 13,34: “Bagong tugon  itinatao Ko saindo: na magkaminootan kamo siring na Ako namoot saindo.” An sukol nin satong pagkamoot sa lambang saro, bako sa kun pano kita namotan nin kapwa kundi kun pano kita namotan ni Cristo. Siring man tinukdoan Niya kita na mamibi sa Ama nin siring: “patawadon Mo kami sa samong mga kasalan siring na pinapatawad niamo an mga nagkakasala samuya.” An kapatawadan nin Dios, graciang daing kabayadan, alagad naghahagad na kita man magin maheherakon sa kapwa.

Sa parabola na inistorya ni Jesus, sinudya kan hade an surogoon: “Daing supog na surugoon. Huli ta ika nakimaherak an gabos mong utang sakuyang pinatawad. Bako daw na dapat ka man maherak sa kapwa mo surogoon, siring na  ako naherak saimo?” Kaipuhan kitang magpatawad bako sana para sa karahayan nin mga nagkakasala satuya, kundi para man sa satong kaligtasan. Nin huli ta kun sarado an satong puso sa pagpatawad, sarado man ini sa gracia nin Dios.  Magin maheherakon kita, siring na kita naherakan.

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun pàno kita nagpatawad nin kapwang nagkasala satuya o kan kita man pinatawad sa satong kasalan.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Kun an Saimong Tugang Nagkasala

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Setyembre 6-12, 2020. Basahon an Evangelio gikan sa Mateo 18,15-20 (Ika-23 na Domingo sa Ordinariong Panahon).

...

Kun an satong tugang nagkasalà, may nagkapirang tugon si Jesus kun ano an satong gigibohon. Alagad bago an kun pàno, marhay man maaraman kun natà. Sabi sa  Ezekiel 33,8: kun “dai mo pinatanidan an sarong tampalasan na talikdan an saiyang maraot na gibo, an siring na tampalasan magagadan sa saiyang karàtan, asin an saiyang dugo sisingilon saimo.”

Natà ta siring kagabat an katongdan na patanidan an sarong nagkakasala? Nin huli ta sa pagligtas sa katawohan sa kasàlan kaya si Jesu Cristo napadigdi sa kinaban. Sabi ni San Pablo sa Roma 6,23: “an kabayadan  nin kasàlan iyo an kagadanan, alagad an regalo nin Dios iyo an buhay na daing katapusan ki Cristo na satong Kagurangnan”. Hinihiras ni Cristo sa lambang Cristiano asin sa Simbahan an Saiyang misyon na iligtas an tawo sa kasàlan asin kagadanan.

Pàno ta daw ini gigibohon? An Simbahan may tradicion na inaapod na mga  Gibong Herak sa Espiritu (Spiritual Works of Mercy): (1) tukdoan an daing pakaisi; (2) paliwanagan an nagduduwa-duwa; (3) patanidan an nagkakasala; (4) magpatawad nin kasàlan; (5) magpasencia kun nagibohan nin maraot; (6) makidumamay sa nagtitios; asin (7) ipamibi an mga buhay asin mga gadan. Gamiton ta an tolo sa mga ini.

Patanidan an nagkakasala. May tolong kabtang pa ngani an tugon ni Jesus tanganing sa lambang kabtang may kaibang pagrespeto an pagpatanid na magbago.

Patawadon an nakagibo nin sala. May duwang level nin pagapapatawad digdi: an personal asin sacramental. An personal iyo an pag-ako giraray kan nagkasala asin paghusay sa naraot na pag-ibahan. An sacramental na pagpatawad tinao ni Cristo sa mga namamayo sa Simbahan sa Sacramento nin Reconciliacion susog sa Saiyang tugon sa Mateo 18,18 asin Juan 20,23: “An kiisay man na kasàlan na saindong patawadon, napapatawad; an kiisay man na kasàlan na dai nindo patawadon, dai napapatawad.”

Alagad ano man ining kapangyarihan na “dai magpatawad” asin tugon na “ibilang na pagano o publicano” an sarong matagas an puso? Boot sabihon kaini, may panahon na dai tinatào an absolucion o kapatawadan nin kasàlan sa Sacramento nin Reconciliacion, nin huli ta nahiling kan padi na an nagkukumpisal dai nin pagmawot na magbago o magpondo sa ginigibong kasàlan. Kun magabat na gayo an kasàlan, yaon man an penalidad nin excomunion (excommunication), an pagsikwal sa sarong Catolico na magparticipar sa mga sacramento kan Simbahan. Ini bako para magpasakit kundi magtaong bulong sa espiritu na mamatean an gabat kan kasàlan na naginibo asin madara sa pagbago nin buhay.

Ipamibi an kapwang nagkakasala. Namimibi kita bako nin huli ta pinapasa-Dios ta na sana an parakasàlang habo magbago, kundi sa lambang kabtang sa dalan nin pagbakle sa kasàlan asin pagbagong-buhay kaibahan ta an Kagurangnan. Kita Saiyang kasangkapan; Siya an nagpapabunga kan satong gibong-herak.

Alagad minsan nasabotan na niato kun natà asin pàno, bako pa man giraray facil an gibong ini. Tibaad kaya masabihan kita na nakikiaram, o na kita man ngani may mga kakundian man. O dai pa handa na mag-ako nin sala o magbago an satong boot tabangan. Digdi malaog an satong pagsarig sa gracia nin Dios. Magtabang kita na may pagkamoot, pagmakulog, asin pagpakumbaba, asin an Dios na nagsugo sato an matanom nin banhi nin pagbabago sa puso.

...

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun pàno kita nagtao nin patanid sa kapwang nagkakasala, o kun kita an naka-recibe nin siring na patanid sa kapwa.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Bagohon Niato an Satong Kaisipan

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Agosto 30-Setyembre 5, 2020. Basahon an Evangelio gikan sa Mateo 16,21-27 (Ika-22 Domingo sa Ordinariong Panahon).

 

Ining babasahon sa Evangelio kasugpon kan istorya sa Mateo 16,13-20. Alagad mantang sa enot na kabtang, tinawan nin honra asin dakulang katongdan si Pedro, digdi nasagwe siya ni Jesus nin “Duman ka sa likod, Satanas! Inuulang mo ako!” Garo baga an sinabi ni Pedro nakakaagid sa ginibo kan demonio kan nagtentar idto ki Jesus duman sa kadlagan matapos an Saiyang 40 dias nin pamibi asin ayuno.

Inomaw ni Jesus si Pedro asin sinabihan na mismong an Ama an nagtao saiya kan pakaaram na si Jesus iyo “an Cristo, an Aki nin Dios na buhay”. Alagad sinagwe siya na an saiyang “iniisip bakong sa Dios, kundi sa tawo” kan kinontra niya an profesia sa maabot na pagsakit, pagkagadan, asin pagkabuhay liwat kan Cristo.

Sabi ni San Pablo sa Roma 12,2: “Dai kamo mag-oyon sa kinaban na ini, kundi bagohon nindo an saindong kaisipan, tanganing matalastas kun ano an kabotan nin Dios, kun ano an marhay, maninigo, asin matanos.”

Ano an kaisipan nin Dios na laen sa tawo o kinaban? Makukua ta ini ki Cristo, an Tataramon na nanitawo asin sa Saiyang Evangelio, na kaito pa man hanggang sa ngonian danay na inaagyat an kaisipan nin mga tawo asin kinaban tanganing madara sa katotoohan asin tunay na katalingkasan. Ini an nagkapirang halimbawa.

Kapalibotan. Sinabi sa Genesis 1,31 na nahiling nin Dios an gabos Niyang nilalang na “orog karahay”, asin sa 1,28, sinugo Niya an tawo na “magmabinunga asin magdakul, panoon an bilog na kinaban asin pamahalaan iyan”. Alagad an tawo an paghiling sa daga asin sa ibang linalang saiyang pagsadiri na pwedeng gibohan kun ano an saiyang gusto, o kaya bako niyang pagsadiri kaya daing pakiaram kun maraot o mag-ati ini. Pag abot kan Setyembre 1 hanggang Oktubre 4, sinecelebrar an Season of Creation sa Simbahan, panahon nin pagbalik asin pag-otob sa kaisipan nin Dios sa satong responsibilidad na atamanon an kinaban.

Katawohan. Sinabi nin Dios sa 1 Samuel 16,7 na Siya “dai naghuhukom siring sa paghukom nin tawo. Hinihiling kan tawo an panluwas na itsura, alagad an hinihiling nin Dios iyo an puso”. Kaya kan si Jesus duminatong, harani an Saiyang boot sa mga parakasala asin sinikwal kan sociedad, sa mga maluluya asin may helang, sa mga nagtitios asin kasaradayan. Alagad an tawo madaling maghusga sa kapwa, madaling mapatubod na kun inacusaran na pusher o adik pwede nang gadanon. Sabi sa Efeso 2,4-5: “Nagsusupay an pagkaherak nin Dios, asin dakula an Saiyang pagkamoot sato, kaya maski kan gadan pa kita sa kasombikalan, binuhay Niya liwat kita kaiba ni Cristo.” Kitang naherakan, lugod magin maheherakon man.

Pagsakit. Digdi nasala si Pedro, paghona niya gabos na pagsakit daing saysay asin dai dapat agihan. Iba an plano asin kaisipan nin Dios. Sa hampang nin pagsakit asin kadificilan, kadakul an boot dulagan, o negaran, o hidalion ini – na minadulot nin dakul pang pagsakit. Alagad sabi ni Jesus sa Mateo 16,24: “An siisay man na boot sumunod sako, kaipuhan lingawan an sadiring buhay, magpasan kan saiyang cruz, asin magsunod Sako.” An cruz an ginamit na simbolo nin Dios nin pagsakit na nagtataong kaligtasan. Kaya ano man na inaagihan tang pagsakit o kagabatan, gibohon tang pakisumaro sa cruz ni Cristo, asin sa pagpasan kaini makukua ta an satong Kagurangnan, kaibahan ta sa pagpasan. Sabi ngani sa Filipo 4,13: “an gabos magigibo ko huli ki Cristo na nagpapakusog sako”.

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun pano nabago nin Dios an saimong paghiling sa buhay asin pagtubod.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

An Mga Llave kan Kahadean

Siguro nadangog ta na an paghona o sabi-sabi na dai na daa kaipuhan an Simbahan o religion tanganing makaligtas. An dapat sana daa na may relationship kita ki Jesus asin akoon ta Siya bilang “personal Lord and Savior”. Kaya su iba, sinda daa “spiritual” pero bako "religious". May mga nagsasabi man na tanganing mapatawad asin maligtas, dai na kaipuhan magkumpisal sa padi, kundi magdiretso na sa Dios.  

Ining pagbasa hale sa Mateo 16,13-20, minalinaw kaining mga salang paghona sa pagtubod. Enot, tuyong tinogdas ni Jesu Cristo an Simbahan bilang paagi nin kaligtasan. Ikaduwa, may mga inapod Siya tanganing mamayo sa Simbahan, an Saiyang mga Apostoles, asin an lider ninda si Simon Pedro, “an gapo na patugmadan kan Simbahan”. Poon kaidto sagkod ngonian ki Papa Francisco, danay na pinapamayohan an Simbahan kan mga kasalihid ni San Pedro asin kan mga Apostoles. An apod kaini “apostolic succession”. Ikatolo, itinao ki Pedro an mga “llave kan Kahadean nin langit”.

Ano ining mga llave kan Kahadean? Susog sa Catechism of the Catholic Church (551-553), ini an “autoridad nin paggobierno sa harong nin Dios, an Simbahan”. Inotro pa ni Cristo ining mandato Niya ki Pedro kan sinabihan Niya ini sa Juan 21,15-17: “pakakana an Sakong mga karnero”. Kaiba kaini an kapangyarihan  nin “pagbugkos asin paghubad”,  na boot sabihon: an pagpatawad nin mga kasalan, an pagtukdo nin tamang doctrina, asin pagpasunod nin disiplina sa Simbahan.

Pagpatawad nin Kasalan. Sinabi ni Cristo sa Juan 20,23: “An kiisay man na kasalan na saindong patawadon, napapatawad; an kiisay man na kasalan na dai nindo patawadon, dai napapatawad.”

Pagpasunod nin Disiplina. Halimbawa kaini an mga Tugon nin Simbahan (Commandments of the Church): an (1) pagpabanal kan Domingo asin mga Banal na Aldaw nin obligacion sa pagsimba asin pagpahingalo; (2) pag-ayuno asin abstinencia sa mga aldaw na itinalaan; (3) pagkumpisal minsan sarong vez sa taon; (4) pagcomunon minsan sarong vez sa taon, lalo na sa panahon nin Pasko nin Pagkabuhay; (5) pagsuporta sa mga pangangaipo kan Simbahan; asin (6) pagsunod sa mga tugon kan Simbahan manungod sa kasal.

Pagtukdo nin Doctrina. Marhay balikan an pagpoon kan istorya kun saen hinapot ni Jesus an Saiyang mga disipulos kun siisay Siya sa paghona nin mga tawo asin ninda. Kan nagsimbag si Simon Pedro nin tama – “Ika an Mesias, an Aki kan Dios na buhay” – inomaw Siya ni  Jesus asin sinabihan na mismong an Ama an nagtao saiya kan kadunongan na iyan, dangan itinao an kapangyarihan kan mga llave kan Kahadean.

Sabi ni San Pablo sa 1 Timoteo 2,4: “mawot nin Dios na an gabos makaligtas saka makamidbid kan katotoohan”. An satong kaligtasan nakapatugmad sa tamang pagkamidbid kun siisay an Dios na satong sinasamba asin kun ano an Saiyang kabotan. An kapangyarihan kan mga llave kan Kahadean iyo an mandato na danay asin sagkod pa man na ipamidbid an Katotoohan ni Jesu Cristo asin kan Saiyang Evangelio, asin atamanon asin pamayohan an Simbahan na Ina asin Maestra (Mater et Magistra) nin katawohan, orog na nin mga disipulos ni Cristo.

 

GIYA SA PAGHIRAS SA SADIT NA KOMUNIDAD O FAMILIA • Maghiras kan saimong pinakamemorable o importanteng experiencia nin pagigin miembro kan Simbahan. Nata mahalaga ini saimo?

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Agosto 23-30, 2020. Basahon an Evangelio gikan sa Mateo 16,13-20 (Ika-21 Domingo sa Ordinariong Panahon).