An Eucaristia sa Emmaus

 

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana kan Abril 19-25, 2026. Basahon an Evangelio gikan sa Lucas 24,13-35 (Ikatolóng Domingo kan Pasko kan Pagkabuhay-Liwát - A).

…

An istorya sa Evangelio iyó an pag-ibá kan satóng Kagurangnan Jesu Cristo sa duwá Niyáng disipulos sa dalan pasiring sa Emmaus. Mantang totoong nangyari, isinurat man iní bilang alegoría, o istorya na may hararom na kahulugán sa paagi nin mga simbolóng ginamit. Iní saróng alegoría kan pagpamidbid satô ni Jesús, oróg na sa mga parte kan Eucaristía o Santa Misa.

Liturgía kan Tataramon an enot na kabtang kan Santa Misa.

Sa dalan, tinukdô ni Jesús sa duwáng disipulos an tamang interpretasyon kan mga profesía dapít Saiya sa mga libro nin mga Tugon asín Profetas. Kayâ nagtutubód kitá na an gabós na Kasuratán makúkuá an pinaka-kahulugán ki Jesu Cristo. Siyá an kapanoan kan pagpamidbid nin Diós, kayâ Siyá an llave sa pakasabot sa mga Kasuratán, sa kasaysayan nin kaligtasan nin bilog na kinâban, patín sa satóng personál na istorya nin kasâlan asín kapatawadán. Sabi sa 1 Pedro 1,21: “Huli Saiya nagtutubód kamó sa Diós na nagbangon Saiya halè sa mga gadán asín nagtaó Saiya nin kamurawayan; malà, an pagtubód nindo asín paglaom yaon sa Diós.”

Sa satóng pagsimba, nagdadangóg daw kitá nin maigot sa mga Babasahon? Pag-ulî, nabalô ta na lamang na balikán na basahon sa biblía an mga mga nadangog ta sa Santa Misa? Nagkaoras na lamang kitá sa paghorop-horop kan mga Babasahon susog sa mga experiencia ta sa buhay, o sa pag-adal pa nin hararom dapít sa tamang pagsabot kan mga iní? Paladan kitá kun nakagibo kitá maski sarô lamang sa mga iní. Nin huli ta an Banál na Kasuratán biyayà nin Diós sa katawohan.

Liturgía kan Eucaristía an ikaduwáng kabtang.

Kan sinda namamanggi, kinuá ni Jesús an tinapay, binaak, nagbendicion, asín binuksan an mga matá kan duwáng disipulos tanganing mamidbidan ninda Siyá. Hanggang ngonian, nagpapadagos an Saiyang presencia sa satóng buhay lalò na cada vez minacelebrár kitá kan Eucaristía.

An pagsimba ta cada Domingo, mas nahihilíng ta daw bilang obligación o mabiyayang pakipagtagpoan ki Cristo na tinátaó an Saiyang sadiri satô? Gurâno kahalagá satô an pag-akò Saiya sa comunión na nasa estado de gracia, boót sabihon, daí nakagibo nin kasâlan na mortál? Nasasabotan ta daw na an presencia asín participacion ta sa Santa Misa, nakakapakusóg man kan pagtubód kan lambang sarô na miembro kan Hawak ni Cristo?

An Misa minatapos sa misyon.

Kan si Jesús náwarà na, nag-istoryahan an duwáng disipulos. Sa Lucas 24,32 nagsabi sinda: “Bakóng naglalaad an satuyang pusò kan nagtátarám Siyá satô sa dalan asin binubuksan satô an mga Kasuratán?” Dangan nagbalík sinda sa Jerusalem para ihirás iníng marhay na baretà sa mga pag-iriba.

Sa pagtapos kan Misa, an padì minasabi, “Padumán, tapos na an Misa.” Alagad daí kitá minahalè na siring saná kan dati, na garó daíng nabâgo satuyà, nin huli ta nakaibahan ta si Cristo asín dara-dara ta na an Saiyang presencia asín Marhay na Baretà sa satóng mga sadiri. Sabi sa Psalmo 16,11, na iyó man an ipinahayag ni San Pedro sa Gibo kan Mga Apostoles 2,28: “Ipinaaram Mo sakô an mga dalan nin buhay; papanoón Mo akó nin kagaya-gayahan sa atubang Mo.”

Sa satóng pagsimba asin sa pagmisyon pakasimba, kitá nagigin Simbahan. Asín iní an satóng misyon: enot, na padagos pang bâgohon an sadiri susog sa kaimbodán ni Jesús tanganing makaarog pang lalò Saiya; ikaduwá, na ihirás an Saiyang pagkamoot sa laóg asín luwas kan satóng pamilya, lalò na sa panahón nin krisis siring ngonian, oróg na sa kapwang nangangaipo.

…

GIYA SA PAGHIRÁS | Maghirás kan saimong experiencia nin gracia, o kadipisilan, sa pagsimba. | GIYA SA PAGHIRÔ | Anóng paagi nin paghiras kan bunga kan saindong pagsimba an pwede nindong magibo bilang komunidad/pamilya sa panahón nin krisis sa kapwang nangangaipo sa saindong komunidad?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

An Diosnon na Pagkaherak

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana kan Abril 12-18, 2026. Basahon an Evangelio gikan sa Juán 20,19-31 (Ikaduwáng Domingo sa Octava kan Pasko kan Pagkabuhay-Liwát).

…

Kan taon 2000, binoót ni Papa San Juán Paolo II, na an Ikaduwáng Domingo sa Octava kan Pasko kan Pagkabuhay-Liwát icelebrar man bilang Domingo kan Diósnon na Pagkaherak. Duwá an pangapodan kainíng celebracion. Enot na danay kitáng maghagad nin asín magsarig sa pagkaherak nin Diós. Ikaduwá, na kitáng naherakan, magín maheherakón man sa satóng kapwa.

Ngonian na taón, kaipohan na iparomdom nanggad an mensahe nin pagkaherak. An gyera sa Irán asín an krisis sa bilog na kinâban nangyayari huli ta an mga makapangyarihan na pamayó asin mga tagasuporta ninda lulóng sa poder asín daíng herak sa kapwa.  

Sa istorya sa Evangelio nagtatagò an mga disipulos huli sa takot sa mga autoridad asín sa mga kapwa ninda Judío.  Nangyari iní sa banggi kan enot na aldaw kan semana asín sa banggi giraray kan suminunód na semana. Sa parehong okasyon, nagpahilíng sainda an satóng Kagurangnan Jesu Cristo na nabuhay-liwát.

An enot na aldaw kan semana iyó an nagin bâgong Aldaw kan Kagurangnán (Dies Domini sa Latín, Domingo sa Español) para sa mga disipulos, nin huli ta sa enot na aldaw nabuhay-liwát si Jesús. Kayâ embes na Sabado, Domingo na an Banál na Aldaw para sa mga Cristiano.

Alagad sa enot na aldaw na idto, takot asín pagkapurisaw an namatean kan mga disipulos. Pinarà ni Jesús an mga iní kan nagpahilíng Siyá sainda asín tinaó an Saiyang katoninongan.

An saradong haróng nagin taguán asín ligtas na lugar para sa mga disipulos, alagad nagi man ninda iníng kulungan kun saén an takot asín kapurisawan mas lalò pang nagdakulà asín nagkusóg.

Kitá man may mga siring na saradong haróng sa satóng buhay. Iní an mga ináapód tang “comfort zones” kun saén kitá ligtas asín harayô sa peligro, alagad nagpupugol satô na magin matalingkas, magtalubò, asín magbunga. Kun palaogón ta si Jesús sa satóng buhay, malagbas man Siyá sa satóng mga saradong pusò asín mapatalingkas sa satóng nalilibongan na isip asín nanluluyang boót.

Kan enot na magpahilíng sa Jesús sa saiyang mga disipulos, igwang daí nakasabáy: si Sto. Tomás. Kayâ daí siyá tulos nagtubód sa ibinaretà kan mga pag-iriba niyá. Sa ikaduwáng pagpahilíng, dinolok siyá ni Jesús asín kinahuron, dangan nasambit niyá an magayonon na kapahayagan nin pagtubód: “Kagurangnan ko asín Diós ko!” (Juán 20,28).

Kitá man pinapagiromdóm kan satóng pagmangno sa mga daí ta kaiba, sa mga nasa laylayan kan sociedád, asín sa mga nawawarà sa tamang dalan.

Sa halîpot na pagsabi, pinapahayag kainíng istorya an marhay na baretà kan Diósnon na Pagkaherak. Anó an pagkaherak? Iní an virtúd nin pangataman sa lambang sarô: an pagmakulóg sa kapwa, pagpatawad sa nagkasalà, asín pagtabang sa nangangaipo. 

Sa Hebreo sa Lumang Tipan, hesed an pinakagamitón na tataramon dapít sa pagkaherak, asín iní minatukoy sa pagkamaimbód asín pagkamapatinawad nin Diós maski pirming nagkakasalà an Saiyang Piniling Banwaan.

Sa Griego sa Bâgong Tipan, eleos an pinakagamitón na tataramon kainí, asín oróg na nahihilíng iní sa kaligtasan na dará ni Cristo. Sabi sa Efeso 2, 4-5: “Nagsusùpay an pagkaherak nin Diós, asín dakulà an Saiyang pagkamoot satô, kayâ maski kan gadán pa kitá huli sa kasombikalan, binuhay Niyá liwát kitá kaiba ni Cristo.”

Mamîbî kitá na maghadè na an Diósnon na Pagkaherak sa pusò nin lambang sarô sa kinâban asín kitá man magin agihan nin pagkaherak para sa kapwang nangangaipo.

…

GIYA SA PAGHIRÁS | Maghirás kun pâno nagin maheherakón saimo an Kagurangnan, o kan iká natâwan nin oportunidad na magín maheherakón man sa kapwa. | GIYA SA PAGHIRÔ | Anó an pwede nindong magibo bilang komunidad/pamilya sa pagpamatè kan Diósnon na Pagkaherak sa kapwang nangangaipo huli kainíng krisis?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

Alleluia! Si Cristo Nabuhay-liwat!

 

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana kan Abril 5-10, 2026 sa laóg kan Octava kan Pagkabuhay-Liwát. Basahon an Evangelio gikan sa Juán 20,1-9 (Domingo de Resurrección).

…

An satóng Kagurangnan Jesu Cristo nabuhay-liwát susog sa sinabi Niyá! Alleluia! Sabi ni San Pablo sa 1 Corinto 15,14: “Kun si Cristo daí binuhay-liwát, sayang an samóng paghulit asín sayang an saindong pagtubód.” Iní an misteriong patugmadan kan satóng pagtubód.

Anó an boót sabihon kan Pagkabuhay-liwát sa mga gadán?

An Resurrección o Pagkabuhay-liwát ni Jesús sa mga gadán iba man sa mga istorya nin pagbuhay Niyá sa mga nagadán na sa mga Evangelio, siring bagá kan aking daragita ni Jairo, kan solong aking lalaki kan balo sa Naím, asín kan Saiyang amigong si Lazaro. An mga milagrong iní ináapód na “resusitación” nin huli ta sindang mga binuhay halè sa kagadanan, pag-abót kan saindang panahón, nagadán man giraray. Alagad an Resurrección iyó an pagkaigwa nin bâgong nivel nin existencia, nin kapanoan nin buhay na daíng kasagkoran, asín an daí na pag-agi sa kagadanan sagkod pa man.

Sabi sa Katekismo (CCC 646): “An pagkabuhay-liwát ni Jesús naiiba sa esencia. Sa Saiyang nabuhay na hawak, nag-agi Siyá halè sa estado nin kagadanan pasiring sa bâgong buhay na lampas sa kategorya nin panahón asín espacio. Sa pagkabuhay-liwát ni Jesús an Saiyang hawak napanô kan kapangyarihan kan Espiritu Santo: nakikihirás Siyá sa diósnon na buhay sa Saiyang kamurawayan.”

An Pagkabuhay-liwát ni Jesús iyó an pruweba asín panugâ kan satuyà man na pagkabuhay-liwát sa huríng aldaw. Sa Saiyang pagkabuhay-liwát, binâgo Niyá an ordén kan kinâban. An huríng padumanan nin tawo bakô na kagadanan, kundî buhay sa Kahadean nin Diós.

Dangan, sa paghilig Niyá sa mga gadán, dinumán Niyá an mga matanos asín banál na halóy nang nagháhalát nin kaligtasan, asín binuksan an langit para sainda asín para man sa gabós na katawohan.

Kayâ si San Pablo nagtukdô sa Colosas 1,18-20 na si Cristo “an payó kan Saiyang hawak na iyó an Simbahan; Siyá an kapinônan, an enot na binuhay-liwát sa mga gadán. Huli ta binoót nin Diós na an bilog Niyáng pagka-diós mapasa-Akì. Binoót man Niyá na sa paagi kan Saiyang Akì an gabós makipag-olían Saiya.”

Kun arog kainí kahalagá an Resurrección, anó man an hinahagad satô?

Na kitá magtubód tanganing maligtas. Sabi ni San Pablo sa Roma 10,9: “Kun pinapahayag mo sa saimong ngusò na si Jesús an Kagurangnan, asín minatubód ka sa saimong pusò na binuhay Siyá liwát kan Diós sa mga gadán, makakaligtas ka.”

An siguradong tandâ kan pagtubód na nakakaligtas, iyó an satóng pagsunód sa Saiyang kabôtan gurâno man kadakúl kan kaolangan o kakusóg kan tentación, siring na si Cristo nag-agi ngôna sa Pasión bâgo an kamurawayan kan Resurrección. Sabi giraray ni San Pablo sa Roma 6,8: “Kun kitá nagadán kaiba ni Cristo, kitá nagtútubód na mabubuhay man kitá kaiba Niyá”.

Kayâ saróng importanteng parte kan liturgía sa Domingo de Resurrección iyó an Pagbâgo kan mga Panugâ sa Bonyag. Igwa iní nin duwáng kabtang: an pagsikwal ki Satanás, sa saiyang mga maraot na gibo, asín mga padayà; dangan an pagpahayag nin pagtubód sa Diós Amâ na oróg na namoot satô, sa Diós Akì na nagligtas satô, asín sa Diós Espiritu Santo na danay na nagpapabanál satô. Kun isabuhay ta an satóng mga Panugâ sa Bonyag, makakamtan ta an graciang dolot kan pagkagadán asín Pagkabuhay-liwát ni Jesús: kaligtasan asín kapanoan nin buhay sa Saiyang Kahadean.

…

GIYA SA PAGHIRÁS | Sa pânong paagi mo naisasabuhay – o daí – an mga Panugâ sa Bonyag na satóng binabâgo cada taón sa Domingo de Resurrección? | GIYA SA PAGHIRÔ | Anó an pwede nindong magibo bilang komunidad/pamilya tanganing magtarabangán na isabuhay an mga Panugâ sa Bonyag?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

Semana Santa sa Panahon nin Krisis

 

 

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana Santa, Marzo 29-Abril 4, 2026. Basahon an Evangelio gikan sa Mateo 26,14–27,66 (Domingo de Ramos - A).

…

An halabang babasahon sa Evangelio iyó an istorya kan Pasión kan satóng Kagurangnán Jesu Cristo susog ki San Mateo. Naglaóg na kitá sa Semana Santa, an pinakabanál na mga aldaw sa satóng Simbahan.

Nagcecelebrar kitá kan Semana Santa ngonian na nag-aagi na namán an kinâban asín an satóng banwaan nin krisis sa presyo nin barakalon huli kan gyera sa Irán.

Sa panahón nin krisis, nagpapagiromdóm an Semana Santa kun anó an pinakamahalagá: an pagkamoot nin Diós sa satô na pinahilíng sa pagdusay ni Jesús kan Saiyang buhay para matubós kitá sa kasâlan.

Sabi sa Juán 3,16: “Huli ta námoot na gayo an Diós sa kinâban kayâ itinaó Niyá an Saiyang bogtong na Akì, tanganing an siísay man na magtubód Saiya daí magadán kundî magkamít nin buhay na daíng kataposan.”

Si Cristo nakikisumarò sa satóng mga pagsakit.

Sa paaging ini pinapamatè nin Diós an Saiyang pagkamoot sa lambang sarô satô na nakakamatè nin kanya-kanyang kadipisilan. Halimbawà, an mga magurang na nahahandal kun pâno buhayon an pamilya, an mga nagtatrabaho na dai na kikaya nin sweldo an mga gastuson, asín an kadakul na nagtitios huli sa kurapsyon nin mga nasa kapangyarihan.

Sa enot na bungkaras pa saná kan Evangelio, yaon tulos an pagtraidór ni Judas, na sinundan kan violencia kan pagdakóp ki Jesús, an pagnegár Saiya ni Pedro, an kapaabáw-abawan kan mga pamayó kan Simbahan asín banwaan, an mga pasakit na inagihan Niyá sagkod sa kagadanan sa cruz. An gabós na iní inakò ni Jesús para satô, an pinakapakisumarò kan Saiyang Encarnacion sa inaagihan nin lambang sarô satô.

Si Cristo nagtátaó satô nin paglaom. 

Huli ta kaiba ta si Jesús sa satóng pagsakit, pinapakusóg Niyá kitá. Sabi ni San Pablo sa Filipos 4,13: “Gabós kaya ko huli Saiya na nagpapakusóg sakô.”

Huli Saiya, an mga kagabatan nagkakaigwang kahulugán. Giraray sabi ni San Pablo sa Roma 5,3-4: “Inoorgulyo ta an satóng kahorasaan, ta aram ta na an kahorasaan nagbubunga nin pagtiyagâ, asín an pagtiyagâ nin katunayan, asín an katunayan nin paglaom. An paglaom daí nagbibigô, huli ta ibinûbô an pagkamoot kan Diós sa satóng pusò huli kan Espiritu Santong itinaó satuyà.”

Ining paglaom an mádara satô sa kamurawayan. Sabi pa nin San Pablo sa Roma 8,17: “Kun kitá nagsakit kaiba Niyá, kitá man papamurawayon sa kaibahan Niyá.” Kayâ sa pagcelebrár ta kan Semana Santa, makisumarò kitá ki Cristo tanganing makahirás sa Saiyang kamurawayan sa paagi nin mga minasunod:

Magdolot kitá Saiya nin pusong nagsosolsol asín nagmamàwot na magbâgo nin buhay: magkumpisál kitá asín akóon an sacramento nin Reconciliación.

Magtipon kitá bilang pamilya asín magsabáy sa komunidad nin pagtubód sa mga gawè nin devocion sa Semana Santa sa satóng parokya.

Maski nadidipisilan man, daí makalingaw magmangno sa kapwa. An daí nagasto sa pag-ayuno, gibohon na pang-ayuda sa mas nangangaipo.

…

GIYA SA PAGHIRÁS | Ihirás kun anó an mga ginigibo kan saindong pamilya pag Semana Santa tanganing mapabanál an mga aldaw na iní. | GIYA SA PAGHIRÔ | Ngonian na Semana Santa, anó an pwede nindong magibo bilang komunidad/pamilya tanganing makatabang sa pagsa-Diós kan komunidad sa mga aldaw na iní?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

Mag-ogma, Mga Aki nin Liwanag!

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marzo 15-21, 2026. Basahon an Evangelio gikan sa Juán 9,1-41 (Ikaapát na Domingo kan Cuaresma - A).

…

An Ikaapát na Domingo kan Cuaresma ináapód na Domingo de Laetare, tataramon na Latín na an kahulugan “mag-ogmá.” Halè iní sa Isaías 66,10: “Mag-ogmá, Jerusalém, asín magkaboronyóg… kamóng nagmundô, ta kamó magrorokyaw.” Iní pagiromdom na an penitencia kan Cuaresma minabunga nin gracia; na daí madanay an kadiklomán kundî manggagana an liwanag; na an mga nagsasakit huli sa Saiyang ngaran, makakahirás man sa Saiyang kamurawayan.  

An Evangelio iyó an istorya kan pagbolóng kan satóng Kagurangnan Jesu Cristo kan lalaking namundag na butá. Maski totoóng nangyari, iní sarô man na alegoría o istorya na panô nin mga simbolismo na nagpapahayag nin mga mas hararom pang katotoohan.

Halimbawà: an pagkabúta iyó an kadiklomán nin kasâlan, asín an pagbolóng iyó an liwanag nin kaligtasan. An lalaking butá iyó an mga nagtútubód, na mga makasâlan alagad naherakan. An mga Fariséos, bakô saná an mga daí nagtútubód kundî idtong mga nag-óoláng sa saindang kapwa na makaraní sa Kagurangnan.

Anó an kabôtan nin Diós segun sa istorya kan butáng nabolóng?

Na boót itaó sato ni Jesús an gracia na kitá magín mga akì nin liwanag.

Sabi ni San Pablo sa Efeso 5,8-9: “Kamó kaidto kadiklomán, alagad ngonian kamó liwanag sa Kagurangnán. Mabuhay kamó bilang mga akì nin liwanag, huli ta an mga ibinubunga kan liwanag mahíhilíng sa marhay asín matanos na pagkabuhay asín katotoohan.”

Anó pa an mga tandâ na kitá nabubuhay na bilang mga mga akì nin liwanag ki Cristo?

Enot, mahíhilíng ta an Diós.

Maski pigtuyâ-tuyâ kan mga Fariséos asín pinatapok pa nganì sa luwás, an dating butá daí nanggad nagtonóng sa pagpahayag nin pagtubód sa nagbolóng saiya, asín huli kainí luway-luway na mas namidbidan pa niya si Jesús – enot bilang saróng profeta, dangan bilang “halè sa Diós,” hanggang sa nagpahayag na siyá sa Juán 9,41: “Minátubód akó, Kagurangnan.”

Kayâ kun tataó kitáng magpasalamat sa mga biyayà nin Diós sa satóng buhay, padagos na mas mákusóg pa an satóng pagkamidbid asín pagtubód Saiya. Asín an Saiyang presencia iyó an minataóng kusóg satô sa paghampang sa mga kadipisilan asín agyat nin buhay.

Ikaduwá, makakáhilíng kitá siring sa paghilíng nin Diós.

May duwáng dakulang saláng paghonà an mga Fariséos sa istorya: na an pagkabutá kan lalaki tandâ na iní makasâlan, asín na an pagbolóng ni Jesús sa aldaw nin Sabbath tandâ na Siya parakasalà man. Kayâ sinda an butá sa dignidad kan lalaking binolóng asín sa mismong presencia nin Diós ki Cristo Jesús.

Pâno kitá nahíhilíng nin Diós? Sa 1 Samuel 16,7, an Diós mismo an nagsabi ki profeta Samuel: “Daí Akó naghíhilíng siring sa tawo, ta an tawo naghíhilíng kan minásabát sa mga matá, alagad an Kagurangnán, naghíhilíng sa pusò.” Kayâ pag naglálakáw kitá sa liwanag ni Cristo, tinátaó satô an biyayá na máhilíng an kinâban asín an kapwa siring sa pagkáhilíng nin Diós.

Ikatoló, madádará ta an kapwa na máhilíng man an Diós.

An pagsaksi kan lalaking binolóng nagdará sa kadakul na magtubód man ki Jesús. Siring man inapód Niyá an mga disipulos na magin ilaw kan kinâban, na mádara sa katawohan sa lindong kan Amâ. Iní an Saiyang tugon sa Mateo 5,16: “Siring magliwanag an saindong ilaw sa atubang nin mga tawo, na máhiling ninda an mga magayón nindong trabaho asín pamuwarayon an Amâ nindong yaon sa langit.”

…

GIYA SA PAGHIRÁS | Maghirás nin experiencia nin kadiklomán sa buhay asín kun nákua mo na, o daí pa, an liwanag kan Kagurangnan? | GIYA SA PAGHIRÔ | Ngonian na Cuaresma, anó an pwede nindong magibo bilang komunidad/pamilya tanganing daí makaoláng kundî makatabang sa kapwa na makaraní pa ki Jesús?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

An Babae sa may Bubon

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marzo 8-14, 2026. Basahon an Evangelio gikan sa Juán 4,5-42 (Ikatolóng Domingo kan Cuaresma - A).

…

An Evangelio iyó an istorya kan naabotan kan satóng Kagurangnan Jesu Cristo an saróng babaeng Samaritana sa may bubón, sa saróng ciudad kan Samaría na ináapód Sicar. An istoryang iní pwedeng magín alegoría kun pâno an Kagurangnán naghihirô asín nagwawaras kan Saiyang gracia sa satóng buhay.

Iní saróng diósnon na encuentro asín diálogo na nagdádará nin pagbabâgo.

Encuentro

Sa pagsabatan pa saná ni Jesús asín kan babae, pinaliwanag kan evangelista na si San Juán an contexto kan mga halóy nang iriwal asín pagkabarangâ kan mga Judío asín mga Samaritano. Kaiba pa kainí an tradisyón sa saindang kultura na an babae daí pwede makipag-olay nin basta sa ibáng lalaki liban sa saiyang agóm asín kapamilya.

Alagad an mga iní bakô kaolangan ki Jesús. Sa paghagad Niyá nin tubig na maiinom halè sa bubón, Siyá mismo an nagpoón kan saindang tagboan asín pag-oláy-olay.

Sa siring man na paagi nagpópoón an satóng relasyon sa mahál na Diós – Siyá an enot na námoot satô asín nag-aagda satô na akóon an tubig nin buhay na mápanô kan satóng mga pagkapahà asin mátao satô nin buhay na daíng kasagkoran.

Diálogo

Sa saindang pag-oláy-olay, nagpamidbíd si Jesús bilang iyó na an Mesías na hinahalát pareho kan mga Judío asín mga Samaritano. Pinahilíng Niyá man sa babae an katotoohan kan saiyang buhay: na siyá odto nang nagsasakdo nin tubig sa bubón huli ta naglilikay siyá sa matawo ta tibaad siyá pagtsismisan o mapasupgan, huli ta siyá midbid na parakasalà, na may limá nang nagín kasaroan na lalaki, asín na an presente niyáng kasaroan bakô niyáng agóm.

Hanggang sa ngonian padagos na nagpapamidbid satô si Jesús – sa pag-adal nin biblía, sa pagpamìbì, asín sa kapwang nangangaipo. Asín mantang namimidbidan ta Siyá asín an Saiyang misyon, mas nadidiskubre ta man an katotoohan kan satóng sadiri asín katuyohán kan satóng buhay digdi sa dagâ.

Pagbabâgo

Sa encuentro kan babae ki Jesús, namatean niyá an pagkaherak nin Diós: na mamomôton alagad daí nangungunsinté sa kasâlan, makatotoohan alagad daí nagpapasupog. Kayâ an pagkaherak ni Jesús nagpabâgo asín nagpatalingkás kan saiyang buhay.

Asín siyá nagín pang literál na tagadará kan Marháy na Baretà sa saiyang mga kahimanwá. An dating kasusupgán nagín makusóg na saksí kan kapangyarihan ni Cristo. Nagpahayag an babae sa saiyang mga kahimanwá: “Isinabi Niyá sakô an gabós kong ginibo” – asín sinda gabós nagturubód.

An panahón kan Cuaresma, panahón nin pagromdom kun gurâno kita namomòtan nin Diós. Sabi ni San Pablo sa Roma 5,8: “Ipinamidbid nin Diós an pagkámoót Niyáng gayo satô: kaidto pang parakasalà kita, nagadán na si Cristo para satô.”

Lugód an Saiyang pagkámoót asín pagkaherak magdará satô sa dalan nin katalíngkasan asin pagbabâgo. Boót nin Diós na laogón kan Saiyang Espiritu an kariribokan asin kapurisawan kan satóng pusò tanganing patoninongon sa pagkámoót. Boót Niyáng pakarhayón an satóng buhay na rinaót nin kasâlan asín kaputikan.

Kayâ daí na maghinugák o masupog: magsakdó kitá sa bubón kan satóng Simbahan – sa Banál na Kasuratán, mga sacramento, mga katukdoán, mga pagsaksí nin mga santos, asín mga gaweng kabanalan – kan tubig ni Cristo nin buhay na daíng kasagkoran.

…

GIYA SA PAGHIRÁS | Maghirás nin experiencia nin pagkapahà sa Kagurangnan. Pâno mo nákua an Saiyang presencia o gracia sa saimong buhay? | GIYA SA PAGHIRÔ | Bilang saróng komunidad/pamilya ngonian na Cuaresma, anó an pwede tang matabang sa satóng kapwa sa saindang pagkapahà man sa Espiritu?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

Magdangog Kita ki Jesus

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marzo 1-7, 2026. Basahon an Evangelio gikan sa Mateo 17,1-9 (Ikaduwáng Domingo kan Cuaresma - A).

…

An istorya sa Evangelio iyó an Transfiguración kan satóng Kagurangnan Jesu Cristo. Anó an kahulugán kainí, lalò na sa panahón kan Cuaresma? An Transfiguración saróng tandâ asín patunay kan diósnon na kamurawayan na yaon ki Jesús, asín pasabóng sa máabót Niyáng Resurrección. An mga kabtang sa pangyayari kan Transfiguración pwedeng gibohon na mga tandâ kan satóng pagbaklay sa Cuaresma asín sa buhay Cristiano.

Magtukád pasiring sa kamurawayan.

Enot, inagdá ni Jesús si Pedro, Santiago, asín Juán, na magtukád sa halangkaw na bulód pasiring sa lugár kan Transfiguración. Kita man inaagda Niyá na makisumarò sa Saiyang kamurawayan.

An patukad na dalan tandâ kan pag-ági ta man sa kapagalan, pagsakit, patín kasusupgán, sa ngaran ni Jesús. An mga disiplina espirituál sa Cuaresma – pamîbî, ayuno asín abstinencia, paglimós o pagtabang sa kapwa – mga pagiromdóm asín pag-andám satô sa patukad na dalan pasiring sa kamurawayan nin buhay ki Cristo.

An pagtukád sa bulód tandâ man kan nagdadangadang Niyáng dalan kan cruz. An dalan na iní kaipohan agihan man nin lambang Cristiano. Sabi ni Jesús sa Mateo 16,24: “An boót digdi sa hudyan Ko, maglingáw kan sadiri, magpâsan kan saiyang cruz, asín Sakô siyá magsunód.”

Magsaksí sa gracia nin Diós, asín magdangóg ki Cristo.

Pag-abót ninda sa itaas kan bulód, saká sinda nagín saksí sa oróg kamuraway na presencia kan Diós. An pagliwanag ni Jesús siring sa saldang, pagpahayag na Siyá nanggad an liwanag na maparà sa diklom nin kasâlan asín kagadanan. An pagpahilíng ni Moisés asín Elías sa kaibahan Niyá, pagpahayag na Siyá an kapanoan kan mga Tugon asín mga Profetas sa Banál na Kasuratán.

An boses mismo kan Diós Amâ, halè sa maliwanag na panganoron, nagsabi asín nagtugon: “Iní iyó an Akì Kong namomòtan, an padangat Ko; magdangóg kamo Saiya.”

Kayâ dangogón ta si Jesús, bakô an sadiri tang tingog, bakô siring ki Pedro sa istorya na daí aram an mga pigsasabi. Dangogón ta si Jesús sa pagtaó nin panahón asín espacio sa pamìbì asín devoción sa biblía asín iba pang babasahon espirituál. Dangogón ta Siyá sa mga panahón na mabalaog an satóng pagpamîbî, asín sa mga panahón na garó nasa desierto an satóng espiritu.

An pagdangóg Saiya iyó an pagsunód sa Saiyang kabôtan asín paggibong giya kainí sa satóng buhay.

Maglugsot asín makisumarò sa misyon.

Daí sinda naghalóy sa itaas kan bulód, kundì tulos na naglugsot pababà. Nakihuron si Jesús sa tolóng disipulos na daí ngôna ipag-osip sa kiísay man an saindang nasaksihán “sagkod na bangonon an Akì nin Tawo halè sa mga gadán,” boót sabihon sagkod sa Saiyang Resurrección.

Sa tahaw kan Transfiguración asín Resurrección mangyayarì an Pasión: an Saiyang pagsakit asín pagkagadán. Iní an naghahalat sainda sa ibabâ kan bulód, na iyó man an kapanoan kan misyon ni Jesús sa kinâban. Sa paghampáng kan tolóng disipulos sa diklom kan Pasión dará ninda an paglaom kan Transfiguración.

Maglugsót kita siring na an satóng mga gaweng espirituál dapat magdará satô pasiring sa pakisumarò sa Saiyang misyon. Sabi ni San Pablo sa 2 Timoteo 1,8: “Makidamay ka sa pagtíos para sa Evangelio, sa kusóg na halè sa Diós.” Anó man na hinahampang tang problema asín kagabatan, basta dapít sa pagkamoot, susog sa katotoohan, karahayan, asín katanosan – iyan an satóng pakisumarò sa misyon ni Cristo.

…

GIYA SA PAGHIRÁS | Maghirás nin experiencia nin pakisumarò sa misyon ni Cristo – sa responsibilidád, o problema, o kadipisilan na inaagihan mo ngonian. | GIYA SA PAGHIRÔ | Ngonian na Cuaresma, anóng gaweng pagsaksi o pagdangóg ki Cristo an pwedeng gibohon ta bilang saróng komunidad/pamilya?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

Hare Kami Pagdaraha sa Sugot

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Febrero 22-28, 2026. Basahon an Evangelio gikan sa Mateo 4,1-11 (Enot na Domingo kan Cuaresma – A)

…

Sa Evangelio an satóng Kagurangnan Jesu Cristo nagpasiring sa desierto sa pag-ayuno asín pagpamîbî sa laóg nin 40 aldaw. Sa siring man na espiritu asín mga gaweng espirituál kitá minálaog sa panahón kan Cuaresma na may 40 aldaw poón Miercoles de Ceniza sagkod Sabado de Gloria (daí pigbilang an anóm na Domingo). Minatapos an Cuaresma sa Triduo Pascual, sa huríng tolóng aldaw, poón sa banggi kan Jueves Santo sagkod Sabadong banggi sa Vigilia Pascual.

Mantang si Jesús gutóm sa pag-ayuno, binalô Siyáng sugotán kan Diablo alagad daí iní nanggana. Iníng istorya pigkukumpará sa pagsugót ki Adán asín Eva sa paraiso sa Genesís 3,1-7, alagad dumán nanggana an parasugot.

Pinaliwanag iní ni San Pablo sa Roma 5,18-19: “Kayâ, siring na huli kan paglapas nin sarô napa sa gabós na tawo an padusa; siring man huli kan katanosan nin sarô napapa sa gabós na tawo an katanosan nin buhay. Ta, siring na huli kan daí pagkuyog kan sarô nahimong parakasalà an dakúl, siring man huli kan pagkuyog kan sarô hihimoon na mayong-salà an dakúl.”

Si Adán an ladawan kan lumang pagkatawo na oripon nin kasâlan. Si Jesús an ladawan kan bâgong pagkatawo na panô nin gracia. Sa Cuaresma pinapagiromdom kitá na mantang nabubuhay sa kinâban na iní, igwa kitá nin pagpipilían:  akoon an bâgong buhay ki Cristo o magdanay sa pagkakasalà.

Malinaw man kun arín an tamà, marháy, asín dapat na pillion. Alagad natà daw ta sa dakúl na beses, pigpipilì ta an bakô dapat? Huli ta iyó iní an natura kan tentación o sugót: panlalansé. Sa enotan may nakakadagkáng panugâ, alagad sa likodán may nakatagong patibóng.

Anó man an maraot kun gibohon ni Jesús na tinapay an mga gapô? O kun máhilíng Siyá nin mga tawo na nagbababà halè sa atóp kan Templo asín napapalibotan nin mga ángeles? O kun magín makapangyarihan Siyáng pamayó nin gabós na mga nación?

Enot, boót raotón kan parasugot an misterio kan Pagkanitawo ni Jesús. Huli ta kun gagamiton Niyá an diósnón na kapangyarihan para mahalè an Saiyang pagkagutom, daí na masasabi na inagihan Niyá an gabós na aspeto nin pagkatawo pwera sa kasâlan.

Ikaduwá, boót raotón kan parasugot an plano nin Diós na Misterio Pascual – an pagsakit, pagkagadán, asín pagkabuhay-liwát ni Cristo na mátubós satô sa kasâlan asin máligtas satô sa kagadanan – sa paagi nin hiláw asin mababaw na pagtubód nin mga tawo sa makangangalas na pasale nin saróng profetang linigtas nin mga ángeles.

Ikatoló, boót raotón kan parasugot an pagsunód ni Jesús sa kabôtan kan Amâ, patín an pagigi Niyáng dalan, katotoohan, asín buhay para sa katawohan, kun masamba saná Siyá sa Diablo para lamang sa kinâbanon na kayamanan asin kapangyarihan.

Sa madalíng sabi, boót kan parasugot na si Jesús daí magpakatotoo sa sadiri, lingawán an Saiyang misyon, asín rumayô sa Amâ. Iyó man bagá iní an pagsugót satô kan Diablo.  Tenetentarán kitáng paorogón sa gabós an sadiri, daí kamòtan nin tamà an kapwa, asín maggibo nin sadiring versión nin diós – idtong diós na minaayon sa satong kabôtan, bakô na kitá an minasunod sa Saiya.

Hagadon ta sa Diós Amâ na haré kitá pagdarahá sa sugót kundî agawon sa maraot tanganing daí mawarà sa tamang dalan, an dalan kan cruz pasiring sa Kahadean.

…

GIYA SA PAGHIRÁS | Maghirás nin experiencia nin pinakahurí o pinakadakulang tentación sa saimong buhay, asín kun pâno mo iní inagihan o nalampasán. | GIYA SA PAGHIRÔ | Anóng mga sugót o tentación an pighahampang kan satóng komunidad/pamilya ngonian asín pâno ta iní pagtarabangan na malampasán?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

An Gracia nin Tamang Pagpili

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Febrero 15-21, 2026. Basahon an Evangelio gikan sa Mateo 5,17-37 (Ikaanóm na Domingo sa Ordinariong Panahón - A).

…

Sa Evangelio an satóng Kagurangnan Jesu Cristo nagsabi: “Daí kamó maghonà na nagdigdi Akó sa pagparà kan Tugon o mga Profetas; daí Akó nagdigdi sa pagparà kundî sa pag-utób.” Anó an boót Niyáng sabihon kainí?

Enot, na si Jesús an kapanoan kan pagpamidbíd nin Diós. Sabi sa Hebreo 1,1-2: “Sa dakúl na beses asín manlaen-laen na paagi kaidtong panahón, nagtarám an Diós sa satóng mga magurang sa mga profetas; sa kahuri-hurihi, ngonian na mga aldaw, nagtarám Siyá satô sa Akì.”

Ikaduwá, an Saiyang katukdoán iyó nanggad an katotoohan dapít sa Kahadean asín sa kabôtan nin Diós para sa tawo. Sabi nganì ni San Pedro sa Juán 6,68: “Sa kiísay pa kamí maduman, Kagurangnan? Yaon sa Saimo an mga tataramon nin buhay na daíng kasagkoran.”

Sinabi iní ni Jesús nin huli ta may mga nagsasabi na nagtutukdò Siyá nin tumang sa mga nasusurat sa mga libro nin mga Tugon asín mga Profetas. Daí Niyá sinasalidahan an Banál na Kasuratán, kundî tinutukdò Niyá an tunay na kahulugán kainí – na nálingawan o nasasalâ sa katukdoán kan mga escribas asín Fariseos.

Kayâ sinabi Niyá sa Mateo 5,20: “Kun daí makalampás an saindong kasuripotan nin labí sa mga escribas asín Fariseos, daí kamó makakalaóg sa Kahadean kan langit.” Anó namán an kahulugán kainí?

An kasuripotan o katanosan na sinasabi ni Jesús daíng ibá kundî an maimbod na pag-utób sa kabôtan kan Amâ. An mga escribas asín Fariseos ginagamit an Banál na Kasuratán susog sa sadiri nindang kaisipan asín kabôtan. Kayâ matanos sinda sa sadiring paghonà (self-righteous), alagad bakô sa matá nin Diós.

Kun an satóng katanosan makaarog sainda, giromdomón an madóon na sinabi ni Jesús sa Mateo 7,21: “Bakô gabós na nagsasabi Sakô, ‘Kagurangnán, Kagurangnán,’ makakalaóg sa Kahadean kan langit, kundî an naggigibo kan boót kan Amâ Kong yaon sa langit.”

Kayâ pinakarháy Niyá para satô an mga tugon na enot na tinaó nin Diós ki Moises.

Susog ki Moisés, daí ka manggadán. Sabi ni Jesús, daí magtanóm nin dagit, igalang an dignidad nin kapwa, asín makipag-olían sa kaiwal. Anó an sinasabi Niyá ngonian sa pagsuporta nin kadakul na Cristiano sa mga paragadan para daá sa seguridád nin saindang pamilya?

Susog ki Moisés, daí ka magsambáy. Sabi ni Jesús, likayán patí an pag-isip nin marigsok sa kapwa asín rayoán an mga tentación sa lamán. Anó an sinasabi Niyá satô ngonian dapít sa media asín sociedád na panô nin imahe nin sexualidád asín imoralidád?

Susog ki Moisés, pwede an divorcio. Sabi ni Jesús, daí pagraotón an pag-ibahan nin mag-agóm na pinagsarô nin Diós. Anó an sinasabi Niyá satô ngonian dapít sa pagsulong nin divorcio sa Congreso?

Susog ki Moisés, daí magsumpâ nin basang asín utobón an panugâ sa Kagurangnán. Sabi ni Jesús, oróg sa pagsumpâ dapat magsabi pirmi nin katotoohan. Anó an sinasabi Niyá satô ngonian na lakopon na an paggamit nin disinformación asín kaputikan? 

Sa hurí, an nakakaligtas na katotoohan ni Jesús nagháhalát kan satóng desisyon. Kitá an mapilì kun anó an gigibohon asín kun siísay an susunodón. Nasusurat sa Sirach 15,17: “Sa atubang nin tawo yaon an buhay asín kagadanan, asín kun arín an pilíon niyá, itátao saiya.” Hagadon ta an gracia na pilíon pirmi an tamà, marhay, asín mamomôton susog sa kabôtan nin Diós.

…

GIYA SA PAGHIRÁS | Maghirás nin experiencia nin pag-utób nin arin man sa mga ini: “Daí ka manggadán”; “Daí ka magduróg sa bakô mong agóm”; “Daí ka magsaksing-putik.” | GIYA SA PAGHIRÔ | Sa sitwasyon kan satóng komunidad/pamilya ngonian, anóng kabôtan nin Diós an dapat tang panindogan asín gibohon?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

Asin kan Daga, Ilaw kan Kinaban

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Febrero 8-14, 2026. Basahon an Evangelio gikan sa Mateo 5,13-16 (Ikalimáng Domingo sa Ordinariong Panahón).

…

Sa Evangelio sinabi kan satóng Kagurangnan Jesu Cristo sa mga disipulos Niyá kaidto asín sagkod pa man, asín sa satô ngonian: kamó an “asín kan dagâ, an ilaw kan kinâban.” Anó an kahulugán kainí?

Enot, an kahalagaán kan asín.

Kan panahón ni Jesús ginagamit an asín bakô sanáng pampanamit sa pagkaon, kundî mas sa pagigin preservative kainí o pampalawig kan pagkalâbas (freshness) nin mga karne asín ibá pang pagkaon, tanganing daí tulos máraot o malapâ.

Iní an paliwanag ni San Crisóstomo dapít sa pagigin asín kan dagâ nin mga Cristiano: “An mga binâgo asín pinatalingkás na ni Cristo sa karâtan, asín itinaó sa pangataman kan mga apóstoles, saindang inasínán asín pinapadanay sa pagbabâgo na tinaó kan Kagurangnan. Sa paagi saná kan kapangyarihan ni Cristo napapatalingkás an mga tawo sa karâtan nin huli sa kasâlan; an katongdan kan mga apóstoles, an saindang magabát na trabaho, iyó na papagdanayon na daí na an mga iní makabalík sa dating karâtan.”

Ikaduwá, an kahalagahán kan ilaw.

Dificil an paghirô asín paggibo sa diklom, kayâ an ilaw naggigiya, nagpapatalingkas, asín nagdadagdag kakayahán.

Pâno kitá nagigin ilaw kan kinâban? Sabi sa Isaías 58,9-10: “Kun haleon mo sa tahaw mo an pang-aapí, an pagsaksing-putik, asín an pagpakaraot, kun tâwan mo nin tinapay an nagugutom asín an kalág na nagtitios basogón, masirang sa diklom an saimong ilaw asín an saimong dolóm magigin siring sa kaodtohan.”

Ikatoló, dapít ini ki Cristo asín sa Saiyang misyon.

Siyá an ilaw na nagpaparà sa diklom nin kasâlan, an asín na nagpapadanay satô sa gracia pasiring sa buhay na panô.

Ikaapát, hinihirás satô ni Jesús an Saiyang misyon.

Pag kitá naghihingowang magin asín kan dagâ dangan ilaw kan kinâban, nagsasaksi kitá ki Cristo. Sabi ni San Pablo sa 1 Corinto 2,2: “Mayò akóng binoót aramon halè saindo, kundî Jesu Cristo, asín iníng ipinakò sa cruz.” Iní an kahulugán kan pagigin disipulo Niyá, na kitá magin siring Saiya, asín sa pagsaksi Saiya makadará nin dakul pa na malakaw sa dalan pasiring sa Saiyang Kahadean.

Ikalimá, dapít iní sa kaimbodán.

An asín dangan ilaw tanganing mapakinabangan kaipohan nagdadanay an asgad asín liwanag. Daí nang pakinabang an asín kun iní magtâbang asín an ilaw kun puropalsok. Siring man an Cristiano, dapat an paggibo nin marhay bakô paminsan-minsan saná, an paglikáy sa kasâlan bakô kun facil saná.

Ikaanóm, dapít iní sa kadonongan.

Sa paggamit nin asín dangan ilaw kaipohan tamà saná, bakô kulang o sobra. Kun kulang sa asín, matâbang; kun sobra, maasgadon man. Kun an ilaw nakatagò, daíng pakinabang sa diklom; kun sobra man, nakakasuríaw o nakakasulô pa nganì. Siring man an Cristiano, tinâwan nin Diós nin consciencia asín kakayahán maghorop-horop, tanganing an katanosan sa Diós kaibahan an pagmakulóg sa kapwa, an pagkamoót asín katotoohan kaipohan dungán, asín an katarungan balansehón nin pagkaherak.

Ikapitó, dapít iní sa pagdusay nin sadiri.

Natutunaw an asín, napupodpod an kandilà, napupundido an bumbilya, nagigin abó an kahoy na kinalayohan. Alagad bakô sayang kun nagagamit sa karahayan. Siring ki Jesús na nag-sacrificio kan sadiri sa pagligtas satô, an Cristiano kaipohan magdusay man kan sadiri sa pagtabang sa kapwa, pagpakarhay nin banwaan, asín pagmuknâ kan Kahadean sa dagâ.

…

GIYA SA PAGHIRÁS | Maghirás nin experiencia na naisabuhay mo an pagigin asín kan dagâ o ilaw kan kinâban. | GIYA SA PAGHIRÔ | Bilang saróng komunidad/pamilya, anóng konkretong gibo o gawè an pwede nindong pagtarabangan tanganing mautób an pagigin asín kan dagâ dangan ilaw kan kinâban?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song