Adviento kan Satong Kaligtasan

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Noviembre 28 - Deciembre 4, 2021. Basahon an Ebanghelyo gikan sa Lucas 21,25-28.34-36 (Enot na Domingo kan Adviento - C).

…

An pinaghalean kan tataramon na Adviento iyo an Latin na advenire na an boot sabihon “pagdatong”. Ano o siisay an madatong? Daing iba kundi an satong Kagurangnan Jesu Cristo.  Asin bako sana saro, kundi duwang pagdatong an pig-aandaman kan Adviento: an enot na pagdatong ni Jesu Cristo kan Siya namundag digdi sa daga, asin an Saiyang Ikaduwang Pagdatong bilang mamuraway na Hade asin Hukom kan gabos na buhay asin mga gadan.

An tema sa ebanghelyo iyo an Ikaduwang Pagdatong. Kaya imbes na manunungod sa mga kaogmahan kan nagdadangadang na Kapaskuhan, ini manunungod sa mga calamidad asin kahorasaan na mangyayari sa kalangitan, kadagatan, asin dagâ, na magdadara nin takot sa mga tawo. Alagad susog sa Lucas 21,28, an dapat niatong gibohon, iyo na “magtingkalag  asin iitaas an payo ta harani na an (satong) kaligtasan”.

Garo baga an Biblia, an kalikasan, asin kasaysayan, parareho nagpapasabong na tanganing mangyari an makahulugan na pagbabago, kaipuhan ngunang mag-agi nin dakulang krisis o katibaadan. Bago an kamurawayan kan Resurreccion, kaipuhan nguna mag-agi si Cristo sa Saiyang Pasion. Kaiba kan kaogmahan kan Kapaskuhan iyo an mga makuring gibo kan mga makapangyarihan asin pagkagadan nin mga inocentes.

May krisis man na pig-aagihan an mga tawong nagmamawot na magbago asin mapakarhay an buhay, nin huli ta an mga kasâlan na boot talikdan nagpipirit na makabalik giraray sa saindang buhay. Ini an pig-aagihan nin mga recovering alcoholic asin mga adik sa droga. Nangyayari man ini sa buhay nin mga banal, siring ki San Agustin, San Francisco de Asis, San Igancio de Loyola, Sta. Teresa de Kolkata, asin iba pa. An kaligtasan asin kabanalan naghahagad nin sakripisyo.

Nangyayari man ini sa satong banwaan na nag-aagi nin krisis asin pagsakit nin huli sa labi-labing korupsyon asin harabasan, pagbaha nin kaputikan, asin mga pang-aapi asin garadanan. Lugod an krisis na ini magpamatè sato nin pagkagutom asin pagkapahà sa katanosan, asin tanyogon kita na maghingowa asin magtarabangan para sa pagbabago kan satong sociedad.

Ano an dapat niatong gibohon tanganing dai magpadaog sa krisis asin kasâlan kundi na manggana sa mga ini asin makamtan an satong kaligtasan?

Maglikay sa kasâlan. Sabi ni Cristo sa Lucas 21,34, “Magmaan kamo, tibaad an saindong puso magabatan kan bisyo, pag-inom, asin mga kapurisawan sa buhay”. Maglikay sa pagpaorog sa mga kaogmahan na minalipas asin kahugakan nin espiritu. Maglikay sa pagkabuyong sa kayamanan asin kapangyarihan. Maglikay sa mga kinabanon na ambisyon na minadara sato sa ibang dalan, parayo sa buhay na diosnon.

Magbantay na dai malanse nin kaputikan na ginagamit an satong takot tanganing magkabarangâ kita asin isikwal an kapwa. Kundi magdanay sa paninindogan sa katanosan, katotoohan, pagkamoot sa kapwa, asin pagkamaimbod sa Dios. Sabi ni Cristo sa Lucas 21,19, “Kun magdanay kamo, makakamtan nindo an buhay”.

Magpamibi sa paghagad nin kusog, nin huli ta kun kita sana, dai ta kakayanon an mga darakulang agyat nin buhay, lalo na an pagbabago nin satong sociedad. Sabi ni San Pablo sa Filipos 4,13, “An gabos magigibo ko huli ki Cristo na nagpapakusog sako”.

…

GIYA SA PAGHIRAS SA SADIT NA KOMUNIDAD O PAMILYA • Maghiras nin experiencia nin personal na krisis o inagihan na kadipisilan, asin kun pa’no namatean an presencia nin Dios sa mga panahon na ini.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song