Utobon an Tugon Tanganing Mabuhay

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Septiembre 1-7, 2024. Basahon an Evangelio gikan sa Marcos 7,1-8. 14-15. 21-23 (Ika-22 na Domingo sa Ordinariong Panahon - B)

…

Sa pagpaliwanag kan istorya sa Evangelio, enoton ta an mga bakô kainí mensahe.

Enot, daí digdi si Jesús nagtátaó nin opinión medicál.

Kan piglihis Niya an hapót kun natà daí nagháhanáw nin kamót an Saiyang mga disipulos bâgo magkakán, asín kan sinabi Niya na “mayong halè sa luwás nin tawo na minálaóg Saiya, makakaatî sa tawo. Alagad an naglúluwás na gikan sa tawo iyán an nakakapaatî” – bakô iní dapít sa salúd nin hawak, kundî sa salúd nin kalág nin tawo.

An Saiyang punto iyó na kadakul na ley o tugon an dinagdag kan mga Fariseos asín escribas para utobón nin mga tawo – kaiba na an kun anó an mga nakakaatî sa tawo – alagad binayaan ninda an tunay na tugon nin Diós. Kayâ pinaromdom Niya sainda an profesía sa Isaías 29,13: “An banwaan na iní sa ngimot naggagalang Sako, alagad an saindang pusò harayô Sako”.

Ikaduwá, daí sinabi ni Jesús na daíng saysay an mga tradición nin religion kun daí nasusurat sa biblia, nin huli daá ta iní mga “gibo saná nin tawo”.

Ginagamit iníng argumento kan mga nagtútukdô kan doctrina kan “Sola Scriptura” na nagsasabi na kun anó saná an nasusurat sa biblia, iyó saná an tunay na pagtubód. Alagad nin huli sa kanya-kanyang interpretación nin mga texto sa biblia, mas lalo sindang nagkabarangâ asín nagsurulpotan an manlaén-laen pang mga simbahan asín pastor.

An katukdoán kan Simbahan na tinogdas ni Cristo iyó na an Diósnon na Kapahayagan (Divine Revelation) makúkuá sa Banál na Kasuratán asín Banál na Tradición. An Banál na Kasuratán iyó an mga tataramon nin Diós na nasusurat sa mga libro sa biblia. An Banál na Tradicion iyó an mga oficiál na katukdoán kan Simbahan na daí nasusurat sa biblia na bunga nin pagtalubò sa pagtubód sa kapangyarihan kan Espiritu Santo. Halimbawà sa mga iní an Credo Apostolico, an mga sacramento, an autoridád kan mga obispo asín Santo Papa, patín na nganì an pagtipon kan mga libro sa Bâgong Tipan na ginibo sa autoridád kan suanoy na Simbahan.

An mga iní bakô mga basang na imbensyon saná kan Simbahan, kundî matanos na katukdoán dapít sa kabôtan nin Diós kan inapód ni San Pablo sa 1 Timoteo 3,15 na “iyó an Simbahan nin Diós na buháy, harigi asín patugmadan nin katotoohan.”

Anó pa an mensahe na boót ipaabot sato kan Evangelio?

Enoton ta sa gabós an pagkamoot sa Diós asín pag-utób sa Saiyang tugon ta iní an makákataó sato nin buhay asín kaligtasan.

Sabi ni Moises sa banwaan nin Israel sa Deuteronomio 4,1: “Magdangóg ka sa mga kabôtan asín patakarán na itinutukdò ko saindo tanganing isagibo: tanganing mabuhay kamo.”  Dangan sa Santiago 1,21-22 nasusurat: “Akoa sa kahuyoan an itinanom saindong tataramon nin katotoohan na makakaligtas kan saindong kalág. Mági kamong paragibo kan tataramon asín bakông paradangog saná sa pagloko sa sadiri.”

Akoon ta sa Cristo sa satong buhay.

Nin huli ta daí saná kita tinâwan kan Amâ nin mga tugon asín tataramon na magiya sato sa buhay. Kundî kabôtan Niya, sabi sa Juán 1,14, na “An Tataramon mani-tawo.” Siya an kapanoan kan mga Kasuratán, kan Tugon asín mga Profetas. Sa Saiya saná makúkuá an satong kaligtasan.

An tandâ na namomòtan ta si Cristo, sinabi Niya mismo sa Juán 14,15: “an mga tugon Ko saindong uutobón.” Kayâ maglikáy na daí makaarog sa mga Fariseos asín escribas ta tibaad nagsasamba man kita sa ngusò alagad harayô sa pusò.  Ta sinabi Niya man sa Mateo 7,21: “Bakô gabós na nagsasabi Sako, ‘Kagurangnan, Kagurangnan, makakalaóg sa Kahadean nin  langit, kundî an naggigibo kan boót kan Sakong Amâ na nasa langit.”

…

GIYA SA PAGHIRÁS SA SADÍT NA KOMUNIDAD O PAMILYA | Maghiras nin linya sa biblia o katukdoan kan Simbahan na daí mo pa sabot nin marhay. Maghapot sa padi o iresearch sa katekismo an paliwanag kainí.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Sa Kiisay Pa Kami Maduman?

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Agosto 25-31, 2024. Basahon an Evangelio gikan sa Juán 6,60-69 (Ika-21 Domingo sa Ordinariong Panahon - B).

…

An istorya sa Evangelio iyó an katapusan kan kabtang sa Juán 6 na pig-áapód na Katukdoán dapít sa Tinapay nin Buhay (Bread of Life Discourse). Nagpoón iní sa istorya kan milagro nin pagpakakán nin limáng ribo halè sa limáng tinapay asín duwang sirâ, asín nagpadagos sa pagpamidbid ni Jesús kan sadiri bilang Tinapay nin Buhay. Sa hurí, nasakitan an dakúl sa mga disipulos na nagdadangog ki Jesús asín binayaan ninda Siya, huli ta daí ninda nasabotan asín naakò an Saiyang katukdoan.

Ano iníng katukdoán na masakit para sainda? Sabi ni Jesús sa Juán 6,53: “Kun daí nindo kakánon an lamán kan Akì nin Tawo asín inomón an Saiyang dugô, mayò kamong buhay saindo.” Alagad para sa satong mga Cristiano, lalò na mga Catolico, iní dapít sa Eucaristía, kun saén dinádangóg ta an Saiyang Tataramon asín inaakò ta sa Comunión an Saiyang hawak asín dugô.

Kayâ naghapót si Jesús sa Doce Apostoles kun patí sinda babayaan man Siya. Marhay nganí ta yaon si Simón Pedro na nagsabi kan sarô sa pinakamagayón na pagpahayag nin pagtubód sa mga Evangelio. Sabi niya sa Juán 6,68: “Sa kiísay pa kami maduman, Kagurangnan, yaon Saimo an mga tataramon nin buhay na daíng kasagkoran”. Anó an boót sabihon kainí?

Enot, ki Cristo saná makúkuá an kaligtasan.

Siya an satong kaligtasan. Siya saná an Tinapay nin Buhay na makakabasóg kan satong mga kagutoman sa hawak asín espiritu, asín makákataó sato nin kapanoan nin buhay na daí matátaó nin mga kinâbanon na bagay.

Nasa Saiya an mga tataramon nin buhay na daíng kasagkoran. An Saiyang tataramon makapangyarihan – naglaláng kan kinâban, nagpatoninong sa duros, nagpatawad nin mga kasâlan, nagbulóng nin mga may helang, nagpahalè sa mga marumpot na espiritu, nagbuhay nin gadán. An Saiyang panugâ naóotób. An Saiyang katukdoán, giya pasiring sa Kahadean.

Ikaduwá, an Saiyang pagpamidbid naghahagad nin simbag halè sato.

Siring sa Doce Apostoles na daí nagbayà ki Jesús (liban ki Judas na nagpasaluib Saiya), siguro masabi man kita na pinipilì ta man Siya. Alagad an hinahagad Niyang pag-akò Saiya iyó idtong odók sa boot – sa bilog na pusò, kalág, asín kusóg. Anó an mga tandâ na bolanos man nanggad na pinipilì ta Siya?

Tinatalikdan ta an kasâlan.

Nin huli ta daí kita maliligtas sa pagsabi sanáng inaakò ta Siya bilang Kagurangnan asín Paraligtas pero dating gawè man giraray an gibo ta. An pirmi Niyang tinutukdô sa Marcos 1,15: “Magbaklê kamo asín magtubód sa Evangelio”.

Nagdadanay kitang maimbod Saiya.  

Nin huli ta an pagsunód Saiya asín pagsikwal sa kasâlan bakô sararoan sanáng gawè, bakô one-time big-time, kundî kaipuhan isabuhay aroaldaw. Sabi ni Jesús sa Lucas 9,23: “An siisay man na boót magsunód Sako, kaipuhan magsayuma siya kan sadiri, pâsanon an saiyang cruz aroaldaw, asín magsunód siya Sako.”

Nagsasaksi kita Saiya.

Nin huli ta inapód kita sa pagtubód bakô tanganing gibohon na pribadong bagay saná iní, kundî na ihirás sa kapwa an liwanag kan Evangelio sa satong tataramon asín gibo. Sa Josue 24,15, sinabi ni Josue, na pamayó kaidto sa Israel: “Ako asín sakong pamilya, maglilingkod kami sa Kagurangnan.” Sa mga tataramon na iní, nahirô an puso nin bilog na Israel asín nadará sinda sa pagpahayag man nin pagtubód sa Kagurangnan asín nin pagmâwot na maglingkod Saiya. Iní an pagtubód na nakakadará sa kapwa parani sa Diós.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia na nagkaigwa ka nin pagpilian kun masunod ki Cristo o magibo nin ibáng bagay. Anó an saimong pinilì?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Si Cristo Tunay na Presente sa Eucaristía

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Agosto 18-24, 2024. Basahon an Evangelio gikan sa Juán 6,51-58 (Ika-20 Domingo sa Ordinariong Panahon - B).

…

Nasa ikaapát na Domingo na kita na an Evangelio kinukuá sa Juán 6. Nagpoón iní sa istorya kan milagro nin pagpakakán sa limang ribo, asín nagdagos sa pagtukdô ni Jesús na Siya an Tinapay nin Buhay.

Sa Evangelio ngonian pinapahayag sato an tunay, totoo, asín bilog na presencia ni Cristo sa Eucaristía. An sabi ni Jesús sa Juán 6,54: “An nagkákakán kan sakong lamán asín nag-íinom kan sakong dugô, igwa nin buhay na daíng kasagkoran, asín bubuhayon Ko siya liwát sa huríng aldaw.”

Dapít sa presencia ni Cristo sa Eucaristía, may duwáng saláng gawè nin pagtubód. Enot, an mababaw asín materialisticong paghonà na siring iní sa pagkakán nin karne asín dugô nin hayop, o tawo na gibo nin mga caníbal (siring sa paghonà kan mga Judío sa Evangelio asín mga pagano kaidtong panahón). Ikaduwá, an paghonà na iní simbolico sanáng pagkakán kan hawak asín dugô ni Cristo (siring sa tinutukdò nin dakúl na mga bakóng Catolicong simbahan).

Alagad an katokdoán kaidto, ngonian, asín sagkod pa man, kan satong Simbahan, iyó mismo an sinabi ni Jesús sa Juán 6,55: “Ta an Sakong lamán tunay na kakánon asín an Sakong dugô tunay na inómon.”

Pâno iní nangyayari?

Sabi kan Catechism for Filipino Catholics (no. 1727): “Sa kapangyarihan kan Espiritu Santo, an kinâbanon na sustancia (substance) kan tinapay asín alak binabâgo na magin ibáng realidad: an pinamuraway na Hawak asín Dugô ni Jesu Cristo, na pinakò asín nabuhay-liwát.” An Concilio de Trento (na nagtipon kan mga taón 1545-1563) inapód iníng “transustanciación” (transubstantiation).

Natà ta ginigibo iní ni Cristo?

Nin huli ta namòtan Niya kita asín nanugâ Siya sa Mateo 28,20 na daí Niya kita pababayaan: “Uya, Ako kaiba nindo sa gabós na aldaw, sagkod sa katapusan nin kinâban”. Kayâ nganì an apód kan gaweng iní: Banál na Comunión. An presencia kan Espiritu ni Cristo na enot ta nang inakò sa Bonyag asín pinakusóg sa Kumpil, pinapadagos asín pinapayaman pa sa pag-akò ta Saiya sa Comunión. Kayâ maninigo lamang na itaó ki Cristong nakikisumarò sato an bilog, aktibo, asín tuyong participación niato sa Eucaristía.

Anó an epekto sato kan pag-akò kan Tinapay nin Buhay?

Binabâgo kita na magin siring sa Saiya na satong kinákakán. Sa Ikatolóng Pamibi Eucaristico, sinasabi kan padì: “itugot Mo na kaming binabâgo kan Hawak asín Dugô kan saimong Akì, panô kan Saiyang Espiritu Santo, maabtan man lugód na saróng hawak asín saróng espiritu ki Cristo.” Sa padagos tang pagsimba, nahíhilíng daw sato an pagigin siring ki Cristo sa pagsunód sa kabôtan kan Amâ, sa pagpatawad sa nagkasalà sato, asín sa pagkaherak sa kapwang nangangaipo?

Para saén iníng pagtubód asín pag-ako ki Cristo bilang Tinapay nin Buhay?

Iní an panugâ kan satong Comunión ki Cristo: na kitang nag-akò kan Saiyang Hawak asín Dugô digdi sa dagâ, tanganing makasunód sa Saiyang dalan sa buhay na iní, sa kapanoan kan panahón, magigin kahiras sa mamurawayon na buhay mismo nin Diós, an Santisima Trinidád. Kayâ nganì sa Colosas 1,27 inapód ni San Pablo si Cristo na yaon sa lambang Cristiano bilang “paglaom kan maabot na kamurawayan”; asín sa Katekismo kan Simbahan tinutukdò na an Eucaristía iyó an “ginikanan asín padumanan kan buhay Cristiano”.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás kun pâno padagos na binabâgo an buhay mo kan saimong danay na pagsimba asín pagparticipár sa Eucaristía.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Seven Bible Verses every Catholic Needs to Know

1) 1 Timothy 3:15 on the Church, "the pillar and bulwark of the truth"

2) 2 Thessalonians 2:15 on "holding fast to traditions" (and translational bias by some non-Catholic translators)

3) 2 Peter 1:20 on Scriptures, versus Sola Scriptura because "no prophecy of Scripture is a matter of one's own interpretation"

4) John 20:23 on the Sacrament of Reconciliation and the priest's faculty to forgive and retain the sins of believers

5) Revelation 12:1-2, 5 on Blessed Virgin Mary, Queen of Heaven

6) 2 Kings 13:20 on relics and God's use of them to bless and heal

7) John 6:53 on the real presence of Christ in the Eucharist

 

An Tinapay nin Buhay sa Eucaristia

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Agosto 11-17, 2024. Basahon an Evangelio gikan sa Juán 6,41-51 (Ika-19 Domingo sa Ordinariong Panahon - B).

…

An Evangelio pagpadagos sa pagpamidbid ni Jesu Cristo kan Saiyang sadiri bilang tinapay nin buhay. Sa Juán 6,51, sinabi Niya: “Ako an tinapay nin buhay na naghilig halè sa langit; an minákakán kan tinapay na iní mabubuhay sagkod pa man, asín an tinapay na Sakuyang itátaó iyó an Sakong lamán para sa buhay kan kinâban.” An maimbod na Catolicong nagbabasa o nakákadangóg kainí, nasasabotan na iní nangyayari na sa lambang Banál na Misa.

Sinabi pa Niya sa Juán 6,47: “Amen, Amen, nagsasabi Ako saindo: An nagtútubód igwa nin buhay na daíng kasagkoran”.   An Banál na Misa iyó an sacramentong nagwawaras nin gracia sato para sa aroaldaw asín para sa buhay na daíng kasagkoran. Kayâ an satong Simbahan ináapód an Eucaristía na “pighalean asín padumanan nin buhay Cristiano”. Sa pânong paagi?

Sa pagtiripon sa pagsamba.

Sa pagtiripon pa saná kan banwaan nin Diós sa Eucaristía asín sarabáy na pagsamba, napapabanál na kita. Sa Mateo 18,20 si Jesús nagsabi: “Kun saén an duwá o toló magkatiripon sa Sakong ngaran, dumán Ako sa tahaw ninda”. Kun odók sa boót an pagsimba, nakakatabang an presencia nin lambang sarô sa pagpakusóg nin pagtubód nin lambang miembro kan Hawak ni Cristo, asín napapatalubò an komunidád nin mga paratubod.

Sa paghimatè sa Tataramon.

Sa Juán 6,45 binanggit ni Jesús iníng profesía: “Magigi sinda gabós mga tinukdoán-nin-Diós”. Sa Liturgía kan Tataramon sa Eucaristía, nagpapadagos iníng pagtukdô sato nin Diós, sa satong paghinanyog asín paghorop-horop sa mga pagbasa halè sa mga libro nin Tugon asín mga Profetas sa Lumang Tipan (Enot na Babasahon), sa mga Psalmo (Responsorio), sa mga Surat ni San Pablo asín iba pang Apostolés sa Bâgong Tipan (Ikaduwáng Pagbasa), asín sa Evangelio, kaiba na an homilía.

Sa pagromdom kan Sacrificio ni Cristo.

Sa Lucas 22,19 si Jesús nagtugon sa mga disipulos: “Iní paggibohon nindo sa pagromdom Sako.” Sa lambang Misa pigroromdom niato an sarô asín solamenteng sacrificio na nagligtas sato sa kasâlan asín kagadanan. Kayâ sa lambang Misa kaipuhan yaon an crucifijo (imahe ni Cristong nakapakò sa cruz) tanganing darhon an satong isip asín pusò, memoria asín conciencia, sa pagkamoot asín pagtubód ki Cristo na nagdusay nin buhay para sato.

Sa pag-akò Saiya sa comunión.

An milagro kan lambang Santa Misa iyó na an Diós nagráraní sato asín tinátaó an Saiyang sadiri bilang kakanon. Sa comunión si Cristo nagigin parte kan satong hawak minsan nganì kita parte kan Hawak ni Cristo. Si San Pablo nagtukdô sa 1 Corinto 10,16: “An tinapay na satong binabaák, bakóng paropakinabang sa hawak ni Cristo?”

Sa paghalè dará an Marhay na Baretà.

Sa 1 Hade 19,7, si profeta Elías dinarhan nin angel nin tinapay asín tubig dangan sinabihan: “Bangon, kakán! Ta labí saimo kahalawig an dalan.” Siring man kita sa pagtapos kan Santa Misa: mahalè kitang binasóg asín pinakusóg an espiritu sa gracia kan experiencia kan banwaan na nagsasamba, kan giya kan Tataramon, asín kan hawak mismo ni Cristo na inakò ta sa comunión. An mga iní tinaó sato bakô para sadirihon saná kundî tanganing ihirás sa kapwa sa pagsunód kan misión na tinaó ni Jesús sa gabós Niyang mga disipulos sa gabós na panahón.

…

GIYA SA PAGHIRÁS SA SADÍT NA KOMUNIDAD O PAMILYA | Bakô sa gabós na panahón namamatean ta an presencia nin Diós sa Santa Misa, minsan garó mará an satong espiritu. Maghirás kan saimong experiencia nin pagsimba o pagtiripon sa “Comunión na may Liturgía nin Tataramon” kainíng mga nakaaging Domingo.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

An Tinapay nin Buhay

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Agosto 4-10, 2024. Basahon an Evangelio gikan sa Juán 6,24-35 (Ika-18 Domingo sa Ordinariong Panahon - B).

…

An istorya sa Evangelio kasugpon kan istorya kan milagro nin pagpakakán sa limáng ribo halè sa limáng tinapay asín duwáng sirâ sa Juán 6,1-15. Si Jesu Cristo, na nagpakakán sa limáng ribo, nagpamidbid sa katawohan bilang “tinapay nin buhay” na mabasóg kan saindang gutom asín pahà sagkod sa buhay na daíng kasagkoran.

Patín an istorya sa Exodo 16 kan pagpadará nin Diós nin manna tanganing magin kakanon nin mga Israelita sa 40 taón ninda sa desierto, pigtukdô ni Jesús na pasabóng sa pagdatóng kan “tunay na tinapay na halè sa langit”, daíng iba kundî Siya man saná mismo.

Mas paladan kita ngonian kisa sa mga Israelita kaidtong panahón. Nin huli ta tinátaó sato nin Diós bilang kakanon an Saiyang Hawak sa Banál na Misa. Anó an maninigong simbag niato sa oróg kadakulang biyayang ini?

Magdolok kita Saiya.

Kan naghagad an katawohan – Kagurangnan, danay mo kaming tâwan kan tinapay na iyán” – si Jesús nagsimbag: “An minadolok Sako, daí na lamang magugutom, asín an minatubód Sako daí na lamang mapapahà sagkod pa man.”

An pagdolok ta ki Jesús, bakô saná sa pagsimba o sa pamîbî, kundî sa pagtalikod man sa satong mga kasâlan asín pagbayà sa satong makasâlan na pamumuhay. Sa katunayan, iní an pirmi asín enot Niyang pangapodan sa paglibot Niya sa mga banwaan. Sabi Niya sa Marcos 1,15: “Magbaraklê kamo asín magtubod sa Evangelio!”

Si San Pablo naghulit sa Efeso 4,22-24: “Iapón an lumang pagkatawo kan enot nindong pagkabuhay, na nalalapâ sa mga dayang kamâwotan; na magpakabâgo sa espiritu kan saindong isip asín isûlot an bâgong pagkatawo na linaláng susog sa Diós sa kasuripotan asín kabanalan nin katotoohan.”

Magtubód kita Saiya.

Kan naghapót an katawohan – “Anó an gigibohon niamo tanganing magtrabaho kan mga trabaho nin Diós?” – an simbag ni Jesús: “Iní an trabaho nin Diós: magtubód kamo sa Saiyang sinugò”.

An mga tawo sa istorya madalion magturubód ki Jesús huli ta, sabi Niya nganì, “nagkarakán sinda nin tinapay asín nagkabarasóg”. Malà nganì, biyô Siyang boót gibohon nindang hadè, kayâ nagdulág Siya sainda. Bakô iní an klase nin pagtubód na boót Niya.

An pagtubód na hinahagad ni Jesús, sinabi Niya sa Juán 8,31-32: “Kun magpadagos kamo sa Sakong tataramon, tunay Ko kamong mga disipulos; mamimidbid nindo an katotoohan, asín itatalingkas kamo kan katotoohan.” Kun tunay kitang nagtutubód Saiya, magdadanay kita Saiya asín mabubuhay susog sa Saiyang katotoohan – daí na kita masarig pa sa mga kinâbanon na bagay o kapangyarihan, daí na papaorogón an sadiring kabôtan.

Magsunód kita Saiya.

Pag minadolok asín minatubód kita ki Jesu Cristo, nasa tamang dalan na an satong buhay, may maninigong kahulugán na an satong mga pagpagál. Sabi Niya sa Juán 6,27: “Magtrabaho kamo, bakô para sa kakanon na nawawarà, kundî para sa kakanon na mapadagos sa buhay na daíng kasagkoran, na itatao saindo kan Akì nin Tawo.”

An Eucaristía tinátaó sato bilang kakanon na nag-aandam sa buhay na daíng kasagkoran asín nagpapakusóg sa satong pagsunód Saiya digdi sa dagâ. Pag inaakò ta si Cristo sa Banál na Comunión, Siya nagigin yaon sa sato. Pag sinasabuhay ta iníng Comunión, nagtatalubò kita na magin siring sa Saiya. Iní an padumanan kan satong pagsunód asín pagtubód: na kita magin siring sa satong sinusunód asín tinutubodán, Siya na naglaláng sato na kabaing Niya.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kun pàno mo sinasabuhay an satong comunión sa Hawak ni Cristo, an tinapay nin buhay.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Limang Tinapay asin Duwang Sirâ

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Julio 28 - Agosto 3, 2024. Basahon an Evangelio gikan sa Juán 6,1-15 (Ika-17 Domingo sa Ordinariong Panahon - B).

…

Sa Evangelio pinakakán ni Jesu Cristo an limáng ribo halè sa limáng tinapay asín duwáng sirâ. An mga milagro sa Evangelio ni San Juán ináapód na mga tandâ.

Tandâ kan pagka-Diós ni Cristo.

An milagrong iní nagpapahayag kan diósnon na kapangyarihan asín autoridád ni Jesús. Sa Evangelio ni San Juán iníng istorya kapinònan kan kabtang na nagtatapos sa pagpamidbid Saiya bilang Tinapay nin Buhay. Bakô sanáng pagkaon na nakakabasóg nin tulák an Saiyang dará, kundî Siya mismo an kakanon nin buhay na daíng kasagkoran.

Igwang interpretasyon kan istoryang iní na nagsasabi na tibaad daá kan náhilíng kan ibá an pagtaó kan akì kan saiyang daráng balon, na-conciencia an may mga daráng balon sainda asín linuwás man an saindang dará. Dangan naghirirasan sinda kayâ nakakaon an gabós.

Maski garó magayón pag dangogón, bakô iní tamang interpretasyon nin huli ta hinahalè an milagrosong aspeto kan istorya asín an diósnon na gibo ni Jesús. May mga istorya sa Saiyang buhay na nasusurat sa sarô o duwáng Evangelio saná asín daí sa ibá. Alagad an istoryang iní yaon sa apát na Evangelio (Mateo, Marcos, Lucas, asín Juán), asín gabós sinda nagsasaksi na iní gibong milagro mismo ni Cristo, alagad daíng nasusurat sa tibaad na “milagro nin paghirirasan” nin mga tawo.

Tandâ kan pangapodan sato ni Cristo.

Sa Evangelio pigpaliwanag na an hapót ki Felipe kun saén makakabakál nin ipapakakán sa mga tawo saróng karáw man saná ni Jesús nin huli ta aram Niya an Saiyang gigibohon. Kun iisipon, daí Niya kaipuhan nin anoman halè sa tawo tanganing makagibo nin milagro alagad pigtuyo Niya na magin parte sinda kan Saiyang gibo. Kayâ mantang si Felipe napaisip kun anó an gigibohon, si Andres nagdará nin saróng akì na may balon, dangan an mga disipulos pinatabang ni Jesús sa pagpatukaw sa mga tawo, sa pagdistribuir nin mga kakanon, asín sa pagtipon kan mga natadà – doceng basket nin tadáng pagkaon!

Hanggang sa ngonian padagos kitang iniimbitaran ni Jesús na makisumarò sa Saiyang misyon nin paghirás kan Marhay na Baretà asín pagmuknâ kan Saiyang Kahadean. Sabi ni San Pablo sa Efeso 4,1-2: “Maglakáw kamo nin maninigò sa pangapodan na inapodán saindo: sa bilog na kapakumbabáan, saká kahuyoan, sa pasencia, nagpapatiniós-tiosan sa pagkamoot”. Pag an pagsimbag sa pangapodan ni Cristo iyó an patugmadan nin satong mga pangarap asín gibo, makúkuá ta an tunay na katuyuhan asín kahulugán nin satong buhay.

Tandâ kan satong ambag.

An limáng tinapay asín duwáng sirâ na voluntád na tinaó nin saróng akì tandâ kan satong pakisumarò sa dakulang plano nin Diós. Anó man an satong ambag sa Diós? Anó man an satong limáng tinapay asín duwáng sirâ? Sa pagsimbag kainíng hapót, marhay giromdomón an sinabi ni Jesús sa Mateo 9,13: “Pagkaherak an mâwot Ko, bakô sacrificio”.

An satong mga pangadyè asín devoción, kun tunay na pagsamba sa Diós asín bakóng pakitang-tawo saná, maninigong dolot sa Kagurangnan. An satong mga pagtabang sa kapwa – an pakidumamay sa panahón nin problema asín pagraní sa mga nangangaipo, siring kan satong programang TADA (Tanganing An Dukhâ Atamanon) asín mga community pantries – iní an satong ambag sa pagmuknâ kan Saiyang Kahadean.

Anó man kun sadít o dikít saná an kaya niatong iambag? An milagro kan limáng tinapay asín duwáng sirâ, pagiromdóm sato na an Diós an mahipnò, an makumpleto, asín mapabunga kan satong mga marhay na gibo asín paghingowa.

…

GIYA SA PAGHIRÁS SA SADÍT NA KOMUNIDAD O PAMILYA | Anó man an satong ambag na “limáng tinapay asín duwáng sirâ” sa satong Simbahan, komunidad, o pamilya – sa pagpadagos kan misyon ni Cristo sa kinâban?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Patanid dapit sa mga Maraot na Pastor

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Julio 21-27, 2024. Basahon an Evangelio gikan sa Marcos 6,30-34 (Ika-16 na Domingo sa Ordinariong Panahon - B).

…

Sa Evangelio inagda ni Jesu Cristo an Saiyang mga disipulos na magpahingalò ta halè pa saná an mga iní sa misión. Alagad Siya man saná mismo an nagdesisyon na tukdoán man giraray an naghaharalát na katawohan nin huli ta odók na naherak Siya kan máhilíng sinda na “garó mga karnero na mayong pastor”.

Si Jesús an marhay na Pastor, kaya nganì an saiyang presencia nagin singkogan para sa mga namámayó sa Israel. Dakúl na beses sa mga Evangelio binatikos ni Jesús an mga escribas, Fariseos, asín kapadean, nin huli sa saindang saláng pagpadára sa mga tawo. Sa lado kan gobyerno, kadakul man an mga abuso sa kapangyarihan ni Hadeng Herodes asín an saiyang mga alipores.

Patanid sa mga Maraot na Pastor. An kapangyarihan tinátaó nin Diós sa mga tawo para sa karahayan nin gabós. Kayâ an Diós daí naoogma sa mga ginagamit an saindang katongdan sa karâtan. Sa Jeremías 23,1 nasusurat: “Herak man sa mga pastor na nagpapabayà na an Sakong mga karnero mawarà asín mawarak, olay nin Kagurangnan.” Asín sinabi pa: “Papadusahan ko kamo huli kan saindong kapabayaan.”

Pinapatanidan kita na daí magpadará sa mga maraot na pastor. Mamimidbidan ta sinda sa nagkapirang tandâ.

Binabayaan ninda an saindang inaataman; an saindang pusò bakóng pusog sa pagtabang kundî sa pakinabang. Si Jesús nagsabi sa Juán 10,11: "An marhay na pastor dinodolot an sadiri para sa mga karnero.”

Minasuway sinda sa Diós. An saindang kagustuhan an saindang pinapaoróg, an kinâbanon na ambisyon an saindang sinúsunód. Si Cristo nagsabi sa Juan 6,38: “Huli ta naghilig Ako halè sa langit, bakô sa paggibo kan Sakuyang boót, kundî kan boót kan nagsugò Sako.”

Ineenot ninda an saindang sadiri, kisa kapwa o banwaan. Kayâ nagsasakit an banwaan asín kadakul an nasa pagtios nin huli sa pagkurakot asín pagpaoróg sa sadiri kan mga nasa kapangyarihan. Si Jesús nagsabi sa Mateo 20,26-28: “An boót saindo magin dakulà, magigi nindong paralingkod, asin an boót saindo magin enot, magigi nindong oripon. Siring, an Akì nin Tawo daí nagdigdi para paglingkodan, kundî para maglingkod asín itaó an buhay Niyang pantubós para sa dakúl.”

Inuutikán ninda an banwaan asín dinádará sa maraot. Rináraót ninda an tiwalà nin tawo sa mga institusyon nin sociedád, asín binabasang an katotoohan tanganing malanse an mga tawo sa saindang sadiring agenda. Si Cristo nagpatanid sa Mateo 18,6: “An siisay man na magin dahilan nin pagkakasalà kan sarô sa mga saradít na iní na minatubód Sako, mas marhay pang gakodán siya nin gapóng gilingan sa liog asín lunudon sa lawód.”

Pagpilì sa Marhay na Pastor. Kaipuhan tang magpilì kun arín na dalan an satong aagihan: an sa maraot na pastor o an sa satong Marhay na Pastor. Pâno ta pipilíon an dalan kan Marhay na Pastor?

Magpilì kita nin mga marhay na pamayó. Sa sunód na taón, eleksyon na naman sa satong nación. Pilion ta man lugód an pulitika nin prinsipyo asín paglingkod bakô an pulitika nin personalidad asín kwarta.

Suportahán ta an mga marhay na gibo asín plano kan satong mga pamayóng-lingkod. Magkasararô kita sa tamâ, sa katotoohan, asín sa karahayan kan kagabsán.

Hingowahon na kita mismo magtalubò na magin siring sa Marhay na Pastor – sa paglingkod, sa pagkamoot, asín paghirás kan Marhay na Baretà. Tanganing mautób sato an panugâ nin Diós sa Jeremías 3,15: “tatàwan ko Kamo nin mga pastor susog sa Sakong pusò”.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kan epekto saimo nin saróng “maraot na pastor” o “marhay na pastor”; o kun pâno ika man nagin marhay na pastor sa kapwa.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Inapód, Sinugò, asin Tinugon para sa Misyon

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Julio 14-20, 2024. Basahon an Evangelio gikan sa Marcos 6,7-13 (Ika-15 Domingo sa Ordinariong Panahon - B).

…

Sa Evangelio, sinugò ni Jesu Cristo an Doce Apostoles sa pagmisyon. Siring sa mga apprentices o on-the-job (OJT) trainees, yaon si Jesús sa paggiya sainda mantang inaarog nindang gibohon an mga ginigibo Niya: magtukdô dapít sa Kahadean, magbulóng nin mga may helang, asín magpaluwás nin mga demonio.

Natà ta Doce an Saiyang pinilì? Siring na may doceng tribu an Piniling Banwaan na Israel, tinogdas ni Jesús an institusyon kan Doce Apostoles – bakô saná para magin mga enot na pamayó kan Saiyang Simbahan, kundì para magin tanda kan Simbahan mismo, an bâgong Banwaan nin Diós. Kayâ kan sinubol sinda ni Cristo sa pagmisyon, an sinugò Niya bakô saná an Doce (o once kan panahón kan Ascensión) kundî an bilog na Simbahan – an lambang miembro kainí, kaidto, ngonian, asín sagkod pa man.

Anó an mensahe para sa sato kan istoryang iní sa Evangelio? Paghorop-horopan ta iníng tolóng ginibo ni Jesús sainda: inapód Niya sinda, asín sinugò sa misyon, dangan tinâwan nin nagkapirang tugon.

Inapód kita na magin mga disipulos ni Cristo.

Lambang sarô sa Doce inapód ni Cristo na magin disipulo Niya. Kita man nagin mga disipulos Niya huli  sa bonyag. Sabi ni San Pablo sa Efeso 1,4-5: “Pinilì kita kan Amâ bâgo tugdasón an kinâban na magin banál asín mayong digtâ sa atubang Niya; sa pagkamoot itinakdâ Niya kita kan enot pa, para sa kamugtakan nin akì huli ki Cristo, para Saiya.”

Nin huli sa sacramento kan bonyag kita nagigin mga akì kan Amâ, asín poón digdi minatalubò kita sa pagigin mga disipulos ni Jesús. Para sa mga Cristianong nabonyagán na akì pa, kaipuhan na magkaigwa nin tuyong pagpilì sa Diós asín paglingkod Saiya pag nasa hustong isip asín boót na. May nagkapira kitang mga programang renewal na nakakatabang tanganing magibo iní, siring kan Youth Encounter, Parish Renewal Experience, Marriage Encounter, Cursillo, New Evangelization Pastorale, Christian Life Program, Life in the Spirit Seminar, asín iba pa. Dangan ipadagos sa pagigin miembro nin mga Saradít na Komunidad nin Pagtubód, o Basic Ecclesial Communities, o arín man sa manlaén-laen na mga movimientos asín komunidad sa satong Simbahan.

Sinugò kita sa misyon nin Evangelización.

An gracia nin pagtubod daí tinaó sato para sa sadiri lamang, kundî para ihirás. Sa Mateo 28, 19-20, sinugò ni Jesús an Simbahan: “lakáw, gibohang disipulos an gabós na nación; bonyagán sa ngaran kan Amâ, kan Akì, asín kan Espiritu Santo; tukdoán na mag-utób kan gabós Kong itinugon saindo.” An mga Cristiano inaapód bakô saná na magsirimba kundî na magin Simbahan na nagmimisyon.

Sa saindang pagmisyon an mga Apostoles nagbalangibog kan Marhay na Baretà sa manlaén-laen na paagi. Kita man inaapód na magmisyon susog sa balaog na tinaó sato kan Espiritu. Si San Pablo nagtukdô 1 Corinto 12,4-5: “Manlaen-laen an mga balaog, alagad sarô saná an Espiritu. Manlaen-laen an paagi nin paglingkod, alagad sarô saná an Kagurangnan. Igwa nin manlaen-laen na kakayahán sa pagtrabaho alagad sarô saná an Diós na nagtátaó kan mga kakayahan na iyán sa gabós na tawo.”

Tinugon kita na danay na magsarig sa Diós.

Alagad maski nganì magabát na an misyon, may dinagdag pang tugon si Jesús: daí magdará nin anoman na bagay kundî an pinakadikít na kaipuhan saná. May razón kun natà hinagad Niya iní sa mga Apostoles: tanganing daí sinda – asín kita man – magsarig sa mga bagay na kinâbanon kundi sa Diós saná. Kun an Diós daí kita pinapabayaan sa aroaldaw niatong pangangaipo, anó pa daw kun kita naggigibo kan misyon na tinaó Niya sato?

…

GIYA SA PAGHIRÁS SA SADÍT NA KOMUNIDAD O PAMILYA | Anó an mga balaog o kakayahan na tinaó saimo nin Diós? Anó man sa hilíng mo an misyon na tinataó saimo nin Diós?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Kun Kita man an Magsikwal sa Kagurangnan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Julio 7-13, 2024. Basahon an Evangelio gikan sa Marcos 6,1-6 (Ika-14 Domingo sa Ordinariong Panahon - B).

…

Sa Evangelio nagbalík si Jesu Cristo sa Nazareth, Saiyang sadiring banwa, alagad sinikwal Siya kan Saiyang mga kahimanwa. Embes na ika-urgollo, daí ninda maakò na an saróng karpintero na nagdakulà sa saindang lugár, na an pamilya midbid ninda, makatarám asín makatukdô nin may siring na autoridád sainda.

Sinayang ninda an dakulang gracia na mamidbidan kutâ sa saindang buhay an Akì kan Diós. Alagad daí tulos maghonà na mas marhay kita kisa sainda. Ta siring sa mga taga-Nazareth kaidto, tibaad pamilyar na kitang marhay sa satong pagigin Cristiano, kayâ pinapasipara ta na si Cristo asín an Saiyang Evangelio. An pagsikwal Saiya ngonian na panahón nagigibo sa nagkapirang paagi.

Sobrang pagtubód sa sadiring kadonongan asín katanosan.

Pag pinipilì ta an sadiring kagustohan maski malinaw an kabôtan ni Cristo sa Banál na Kasuratán o sa katukdoán kan Simbahan – sinisikwal ta Siya sa satong buhay. Pag dinagos-dagos ta iní, tibaad mag-abót an panahón na maghonà kita na nagtutubód pa kita sa Diós alagad nagsasamba na palán kita nin ibang diós, na gibo na sa sadiri niatong imahe asín katanosan.

Romdomón ta an sabi sa Proverbio 9,10: “An kapinônan nin kadonongan iyó an pagkatakot sa Kagurangnan.”

Saláng pagtubód sa mga kinâbanon na bagay.

Pag an satong kaogmahan mas yaon sa mga kinâbanon: kayamanan, kapangyarihan, asín kasikatan; asín pag mas sinusunód ta an kabôtan nin mga makapangyarihan digdi sa dagâ kisa kan satong langitnon na Amâ – sinisikwal ta man si Cristo.

Nagtukdô si Jesus sa Mateo 6,19-21: “Daí kamo magtipon nin kayamanan digdi sa dagâ saén may bukbok asín taklâ na nangráraót, asín may parahâbon. Magtipon kamo nin kayamanan sa langit, dumán daíng bukbok, ni taklâ, ni parahâbon.”

Maluyang pagtubód sa hampang nin mga agyat sa buhay.

Pag nawawàran tulos kita nin paglaom pag-abót nin masakit na panahón, kayâ mapadaog na saná sa tentación, o madulag sa problema, daí pa talagá kita nagtutubód sa Diós na nanugâ na daí kita papabayaan, asín maigot na nakikisumarò sa satong pig-aagihan.

Sa Mateo 28,20, nanugâ si Jesús sa mga disipulos: “Uya, kaiba nindo Ako sa gabós na aldaw, sagkod sa katapusan kan kinâban.” Kaya si San Pablo nakapagsabi sa 2 Corinto 12,10: “Ikinakaogma ko an mga kaluyahan, an mga pagtuyâ-tuyâ, an mga kasakitan, an mga pagtugis, asín an mga kahorasaan, huli ki Cristo, ta pag ako nagluluya, dangan ako makusóg.”

Anó an dapat na gibohon tanganing daí kita másalâ o magkulang o magluya sa pagtubód?

Enot, magpangadyî kita asín maghagad kan gracia nin pagtubód, siring kaidtong amâ, sa Marcos 9,24, na rinaní ki Jesus an saiyang aking may marumpot na espiritu: “Nagtútubód ako! Tabangi an kulang kong pagtubód.”

Ikaduwá, magdanay kita Saiya. Sabi ni Jesus sa Juan 8,31-32: “Kun magpadagos kamo sa sakong tataramon, tunay Ko kamong mga disipulos; mamimidbid nindo an katotoohan, asín itatalingkas kamo kan katototoohan.”

Ikatoló, pirming mámoót, ta an pagkámoót sa kapwa, minabuhay sa pagtubód. An apostól nagtukdô sa Santiago 2,17: “Siring man an pagtubód, kun mayò nin gibo, gadán sa katunayan.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia na binalô an saimong pagtubód. Arín an saimong pinilì, an kabôtan nin Kagurangnan o padagka kan kinâban?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Narahay Ka kan Saimong Pagtubod

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Junio 30 – Julio 6, 2024. Basahon an Evangelio gikan sa Marcos 5,21-43 (Ika-13 Domingo sa Ordinariong Panahon - B).

…

Sa Evangelio may duwáng istorya nin milagro: an pagbulóng sa babaeng doceng taón nang naghehelang nin pagdugô asín an pagbuhay sa doce años na daragitang nagadán pa saná. Sa duwáng istoryang iní, padagos na pinapamidbid sato ni Jesu Cristo an Diós asín an Saiyang kabôtan. Aramon ta iní sa paghorop-horop sa mga linyang sinabi Niya sa Evangelio.

“Talitha qum (Daragita, sinasabihan taká, bangon!)”

Sa tataramon ni Jesús nabuhay an gadán asín pinahayag an Saiyang Diósnon na kapangyarihan. Diós saná an may kapangyarihan sa buhay, asín pagtaó nin buhay an Saiyang kabôtan. Sa Kadonongan 1,13-14 mababasa niato: “Daí ginibo nin Diós an kagadanan, ni ikinakaogma niya an pagkaparà nin mga nabubuhay. Linaláng Niya tanganing mag-existir an gabós.”

Alagad maski nganì daí nagtarám asín nakaisi, nabulóng ni Jesús itong babaeng nagtikwil kan Saiyang gubing. Ta iní an Saiyang misyon sa dagâ. Sa Juán 10,10 sinabi Niya: “Ako nagdigdi tanganing magkaigwa sinda nin buhay sagkod na magsûpay.”

“Siísay an nagdoót sa sakong gubing?”

An simpleng hapót na iní nagdulot nin takot asín takig sa babaeng narahay pa saná ni Jesús. Natà? Nin huli ta, susog sa Tugon, bawal sa mga arog niyang “maatî” (unclean) na makiibahan sa mga tawo o magkapót sa kiisay man nin huli ta nakakaulakit an saiyang pagkamaatî. Alagad sa pag-akò niya kan saiyang ginibo kinumpleto ni Jesús an pagbulóng saiya asín minidbid siya sa katawohan na bakô nang maatî. Tinâwan siya nin bâgong buhay.

Si Jairo, bilang sarô sa mga poón nin sinagoga, nagkusóg man nin boót na magraní ki Jesús, maski aram niyang daí iní magugustohan kan mga pag-iriba niyang daí nagtútubód ki Jesús. Huli ta siya nagtubód, nákuá niya an saiyang hinahagad asín mas pa.

Kita man inaapod ni Cristo na magraní asín magsarig Saiya na daí nang ibang sinasarigan pa. Itaó ta an bilog na sadiri sa Kagurangnan na enot nang nagtaó kan Saiyang sadiri sato – sa Saiyang pagigin Diós na nanitawo asín sa pagdusay kan Saiyang buhay sa cruz. Sabi ni San Pablo sa 2 Corinto 8,9: “Ta aram nindo an gracia kan Kagurangnan tang si Jesu Cristo: huli saindo nagi Siyang dukhâ, siya na mayaman, tanganing huli kan Saiyang kadukhaán magyaman kamo.”

“Daí ka matakot; magtubód ka saná!”

Sa pagsabi kainí pinakusóg ni Jesús an boót ni Jairo, na binaretaan na gadán na an saiyang akì. Iyó man iní an sinasabi sato kan Espiritu sa satong pagbaklay sa dalan ni Cristo asín pagpâsan kan satong cruz. Aram nin Diós na an Saiyang mga inapód, maagi nin pagduwa-duwa, pagkatakot, pagkadapâ, minsan nganì pagkawarâ pa sa tamang dalan nin huli sa mga tentación. Kayâ an Saiyang balaog yaon para sa mga naghahagad kainí. Sa katunayan, an linyang “Daí matakot”, sinambit labí 100 na beses sa Lumang Tipan; asín 44 beses sa Bâgong Tipan, kadaklan kainí si Jesús mismo an nagsabi sa Saiyang mga disipulos.

Anó an nákuá kan babae asín ni Jairo na parehong nagraní asín nagsarig ki Cristo? Buhay para sa sadiri asín sa namomòtan. Makua ta man lugód an adal kainíng Evangelio tanganing siring sa babaeng nagdoót sa Saiyang gubing, pasabongán kita ni Cristo: “An saimong pagtubód iyó saimo an nagtaóng kaligtasan; lakáw sa katoninongan asín magdanay sa saimong pagkarahay.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin pagbalô sa saimong pagtubód, asín kun pâno mo namatean an presencia nin Diós sa buhay mo sa panahón nin pagbalô.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Dios Pinapatoninong an Satong mga Duros

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Junio 23-29, 2024. Basahon an Evangelio gikan sa Marcos 4,35-41 (Ika-12 Domingo sa Ordinariong Panahon - B)

…

An istorya sa Evangelio iyó an pagpatoninong ni Jesu Cristo kan duros sa Danáw kan Galilea. May nagkapirang paagi para mákua an kahulugán kainíng istorya nin milagro. Sarô kainí an literál o historicál na pakasabot na iní saróng tunay na pangyayari. Sarô pa iyó an paghilíng kainí bilang alegoría, na an mga elemento sa istorya simboló nin iba pang mga bagay.

Bilang literál o historicál na pangyayari, pinapahayag kan istorya na si Cristo may kapangyarihan sa mga pwersa nin kalikasan. Kayâ nganì nagharapót an mga disipulos Niya: “Siísay iní, ta sagkod an duros asín an dagat nagkukuyog Saiya?”

Para sa mga Judío, Diós saná an may kapangyarihan na maggibo kainí, siring kan ginibo Niya sa istorya kan paglaláng sa Genesis 1, kan tinâwan Niya nin orden an langit asín dagâ, asín an naghahagubuhob na kadagatan nagkaigwa nin mamaráng dagâ. Siring man kan ginibo nin Diós sa paagi ni Moisés sa Exodo 14, kan binangâ Niya an Dagat na Pulá tanganing makaagi an Saiyang Piniling Banwaan.

Sa Job 38,8-9 nagsabi an Diós ki Job: “Siísay an nagpintô kan dagat, kan magbulwak iyán halè sa tulák, kan badoan Ko an panganoron asín patosón nin lampin an mahîbog na diklom?” Kayâ an pagpatoninong ni Cristo kan duros sa danáw tandâ kan Saiyang pagka-Diós. Asín an Saiyang Diósnon na kapangyarihan ginamit Niya sa pagkaherak asín pagligtas sa Saiyang mga disipulos.

Bilang istoryang alegoricál, may suanoy na tradisyon na an sakayán na nagsasapar nin duros simbolo kan Simbahan bilang “sakayán ni Pedro”. May tradisyon man na an duros nagre-representar kan mga bagyo sa buhay nin tawo. Siring sa istorya, sa tahaw kan satong mga bagyo sa buhay, minsan daí ta namamatean an presencia nin Diós. Hapót nganì sa sikát na awit ni Gary Valenciano: “Natutulog ba ang Diyós?” Alagad an mensahe kan istorya iyó na magraní kita sa Diós asín Siya an mapatoninong kan duros asín dagat sa satong buhay. Sa pânong paagi Niya kita tinatabangan sa paghampang niato sa mga problema sa buhay?

Bilang Diós Amâ, tinátaó Niya an satong mga pangangaipo. Balikán ta an istorya kan satong buhay asín mahíhilíng ta na sa kadakul na problemang nag-aragi, daí Niya kita pinabayaan. Kayâ si Cristo nagtukdô sa Mateo 6,31-33: “Daí kamo magparahâdit kun saén kamo makua nin kakanon o inomon o gubing. Aram kan saindong langitnon na Amâ na kaipuhan nindo an mga bagay na iní. Alagad hanapa ngûna nindong enot sa gabós an Kahadean nin Diós saká an Saiyang katanosan, asín mapapasaindo man an mga bagay na iní.”

Bilang Diós Akì, iniimbitaran Niya kita sa Lucas 9,23: na “lingawán an sadiri, magpâsan kan cruz aroaldaw, asín magsunód Saiya”. An satong cruz iyó an mga kadipisilan na inaagihan ta sa ngaran ni Cristo. Pag inaako ta an satong pagsakit para sa katanosan bilang cruz, pinapakisumarò kita sa misyon nin kaligtasan ni Cristo, kayâ kaiba ta Siya sa pagpâsan, asín pinapabanál kita pasiring sa Saiyang Kahadean.

Bilang Diós Espiritu Santo, sa mga andam sa pagdangóg sa Saiyang kadunongan asín pag-utób kan Saiyang kabôtan, pinapasabóng Niya an kaliwanagan sa tahaw nin kapurisawan, asín ilaw sa madiklom na dalan. Sa Isaias 11,2 nanugâ an Diós na itátaó sato “an Espiritu nin kadunongan saká pakasabot, an Espiritu nin marhay na hatol saká kusóg, an Espiritu nin pakaaram saká pagkatakot sa Kagurangnan.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin duros sa buhay na inaagihan mo ngonian o nalampasan na, asín kun haen an Kagurangnan sa mga panahon na iní.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song