Lingkod, Pastor, Hukóm, Hadè

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Noviembre 26 – Diciembre 2, 2023. Basahon an Evangelio gikan sa Mateo 25,31-46 (Solemnidad ni Cristong Hade - A).

…

An Evangelio sa Solemnidad kan satong Kagurangnan Jesu Cristo, Hadè kan Gabós na Linaláng, iyo an Parábola kan Huríng Paghukóm, an huríng parábola sa Evangelio ni San Mateo.

Si Cristo satong hadè. Sa Saiyang ministerio publico tinukdô Niya an marhay na baretà kan pagdatóng kan Saiyang Kahadean sa paagi nin mga parábola asín mga gibong herak. Bâgo Siya suminakát sa langit, iní an sinabi Niya sa Mateo 28,18: “Itinaó Sako an gabós na autoridad sa langit asín sa dagâ.” Alagad an Saiyang pagkahadè bakóng siring sa tinòdan nin mga tawo kun anó an hadè.

An Hadè bilang Lingkod. An paghonà nin kadakul na mga Judío sa panahón ni Jesús iyó na an maabot na Mesías saróng matibay na lider militar na dadaogón an mananakop na Imperio Romano, alagad an duminatóng sarong mahuyong lingkod. Sa Isaías 53, may profesía pa nganì na ining lingkod maagi nin makuring pasakit.

Sinabi Niya sa Mateo 20,26-28, sa Saiyang mga disipulos na minsan nagpasuruhay kun siísay an pinakamatibay sainda: “An boót sa saindo magin dakulà, magin nindong paralingkod; asín an boót sa saindo magin enot, magin nindong oripon. Siring na an Akì nin Tawo daí nagdigdi para paglingkodan, kundî para maglingkod asín itaó an buhay niyang pantubós para sa dakúl.”

Kayâ sa Saiyang mga tataramon asín gibo, tinukdoán Niya kita na an tamang pagkapót nin kapangyarihan iyó an dalan nin paglingkod, asín an pagigin marhay na pamayó iyó an pagtalubò sa kapakumbabaan.

An Hadè bilang Pastor. Nagpamidbid man Siya bilang Pastor. Sinabi Niya sa Juan 10,11: “Ako an marhay na pastor. An marhay na pastor idinodolot niya an sadiri para sa mga karnero.” Sa Parábola kan Nawáwaráng Tupa, piglinaw Niya an Saiyang prioridad: an mga nawawarà. Sa Lucas 19,10 sinabi Niya: “An Akì nin Tawo nagdigdi sa paghanap asín pagligtas kan nawawarà.” Kayâ namidbidan Siyang haraní sa mga parakasalà asín sa mga sinisikwal nin sociedad, tanganing, sa pagkaherak asin katotoohan, darhon sinda sa katalingkasan.

Bilang Hadè si Cristo an sukolán kun sa karahayan o sa karâtan kita dinádará kan mga namámayó sato digdi sa dagâ. Kun sinda nagpapatubód na tanganing makamit an katoninongan asín seguridad, kaipuhan na isikwál asín gadanón an mga nawawarà sa dalan asín mga alegadong kriminál; o sa ngaran nin paglaban sa terorismo, maninigong isacrificio nin basang an mga buhay asín rogaring nin kadakul na inocentes – bakô sinda mga pamayó susog sa pusò kan Marhay na Pastor.

An Hadè bilang Hukóm.  Sa Saiyang Ikaduwáng Pagdatóng bilang hadè, huhukomán Niya an kinâban. Sa Credo Niceno-Constantinopolitano pinapahayag niato na si Cristo “nagtutukaw sa tóo kan Amâ. Asín mamuraway na mabalik sa paghukóm sa mga buháy asín mga gadán, an Saiyang kahadean daíng katapusan.”

Pagkaherak an sukolán Niya sa paghukóm sa katawohan. Sa Mateo 13,9 sinabi Niya: “Lakáw, kanòdan nindo kun anó an boót sabihon kainí: pagkaherak an mâwot Ko, bakô sacrificio”. Asín sa Mateo 25,40 sinabi man Niya: “An anó man na ginibo nindo sa sarô kainíng mga tugang Kong oróg kasadít, Sako nindo iyan ginibo.”

Kayâ pag-abót kan aldaw na iyan, huhukomán kita ni Cristo segun sa kun anó an ginibo ta sa biyayà nin kaligtasan na tinaó Niya sato, sa gabós na karahayan na winaras Niya sato, asín sa kapwang nangangaipo na binoót Niyang magin satong dalan sa kaligtasan.

Boót sabihon, huhukomán Niya kita kun gurâno kita nagin kabaíng sa Saiya sa pagkamaimbod, pagkaherak, asín pagkámoót. Viva el Cristo Rey!

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia na pinilì mong si Jesu Cristo nanggad an maghadè sa saimong pusò.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Maglaóg sa Kaogmahan kan Kagurangnan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Noviembre 19-25, 2023. Basahon an Evangelio gikan sa Mateo 25,14-30 (Ika-33 na Domingo sa Ordinariong Panahón - A).

…

Sa Evangelio ni San Mateo, an Parábola nin mga Talento kasunód sa Parábola kan mga Abay sa Kasal – kayâ may parehong tema nin pag-andam sa pagdatóng kan Kagurangnan. Kun ngonian mag-abót na giraray an Kagurangnan, andam daw kita?

Sa Ikaduwáng Pagdatóng kan Akì nin Tawo, may paghukóm na mangyayari. Sa parábola, an kagsadiri nagtaóng omaw asín premio sa duwang sorogoón na dinoble an ganansia kan pinamahalà saindang mga talento (na apód sa saróng sukol nin dakulang kantidad nin denario na pirak o silver coin na ginagamit sa Imperio Romano). Alagad tamuyaw asín padusa an nákua kan sorogoón na linubóng saná sa dagâ an talentong pinamahalà saiya. Ano an kahulugán kainí?

An Diós nagwawaras nin gracia sa gabós. Siring sa iba pang mga parábola asín kasabihan ni Jesús, dapit iní sa Kahadean nin langit asín sa marhay na bareta na an gabós inaapód nin Diós pasiring sa Saiyang Kahadean. Siring man, an Diós danay na nagwawaras nin gracia sa katawohan tanganing matabangan kitang makaabót sa satong langitnon na padumanan.

Susog sa Catechism of the Catholic Church (#1996-97): “An Gracia saróng pabór, an matalingkás asín daí maninigong tabang na tinátaó nin Diós sato tanganing magsimbag kita sa Saiyang pangapodan na magín mga akì kan Diós, inampon na mga akì, asín mga kahirás sa Diósnon na natura asín sa buhay na daíng kasagkoran. An Gracia iyó an participación sa buhay nin Diós.”

Tinatâwan kita nin Dios kan mga gracia nin pagtubód, paglaom, pagkámoót, kapatawadán sa satong mga kasâlan, an mga bunga kan Espiritu, asín oróg sa gabós, pinadará Niya an Saiyang Bogtong na Akì sa pagligtas sato. Tinatâwan Niya man kita nin mga kakayahan asín kayamanan digdi sa kinâban.

Minsan napapahapót kita kun natà mas dakúl an yaon sa ibá kisa sato. Sa parabola, sinabi na an lambang sarô tinâwan nin talento “susog sa sadiring kakayahán”. Si San Pablo nagpaliwanag na manlaen-laen an mga balaog na winawaras kan Espiritu sa lambang miembro kan Hawak ni Cristo tanganing magibo kan Simbahan an saiyang misyon.

Sa 1 Corinto 12,4-6 sinabi niya: “May manlaen-laen na carisma, alagad iyó man sanang Esiritu; manlaen-laen na paglingkod, alagad iyó man sanáng Kagurangnan; manlaen-laen na gibo-gibo alagad iyó man sanang Diós na nananrabaho kan gabós sa gabós.”

Boót nin Diós na gamiton ta nin tamà an graciang Saiyang tinátaó. Nin huli ta iníng mga graciang espirituál asín mga talentong kinâbanon, mga instrumento asín patanâ saná kan mas darakulang biyayà na naghahalat sato sa kapanoan kan Kahadean.

Sa parábola, sinabi kan saindang kagurangnan sa duwáng “marhay, asín maimbod” na sorogoón: “Sa dikít nagi kang maimbod; sa dakúl taka papamahalaon: maglaóg ka sa kaogmahan kan saimong kagurangnan.” Ano an sukolán o criteria na kita man “makakalaóg sa kaogmahan nin satong Kagurangnan”?

Sa Proverbio 31,10-31 (sa Enot na Pagbasa), nasusurat an Eshet Chayil, “Maninigong Babae”, saróng tradisyonal na awit sa pagpoón kan Pamanggi sa Sabbath nin mga Judío. Minápoón iní sa linyang “Maninigong babae siisay saiya an makakakua?” Asín minapadagos sa pag-omaw sa saiyang mga virtudes: an saiyang kabootan sa agóm asín kahigosan sa laóg asín luwás nin haróng, karahayan sa mga dukhâ asín pagkatakot sa Kagurangnan.

Para sa dakúl na mga Judío, iní himno nin pag-omaw sa mga ina asín kababaehan, alagad para sa mga Cristiano na binabasa an enterong Banál na Kasuratán susog ki Cristo, dapít man iní sa kun siisay an maninigò sa Kahadean. Sa pagpadagos kan tema kan naenot na Parábola nin mga Abay sa Kasál, dapít man iní sa mga manínigóng virtudes nin mga miembros kan Simbahan, an nobyang banál ni Jesu Cristo.

Kayâ daí ta pagsayangon an mga biyayang tinátaó sato nin Diós sa kahugakan, o sa mababaw na kaogmahan, o sa hayakpit na pansadiring interes lamang. Sabi ni San Pablo sa Roma 14,7-8: “Daíng siisay man na nabubuhay para sa sadiri lamang, daíng siisay man na nagágadán para sa sadiri lamang. Ta, kun kita nabubuhay, para sa Kagurangnan kita nabubuhay; asín kun kita nagágadán, para sa Kagurangnan kita nagágadán; kayâ, mabuhay o magadán, sa Kagurangnan kita.”

…

GIYA SA PAGHIRÁS SA SADÍT NA KOMUNIDAD O PAMILYA • Anó sa saimong time, talent, asín treasure an nagagamit mo na ngonian sa paglingkod sa Kagurangnan asín pagtabang sa kapwa? Arín an daí pa?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

An Parábola kan Sampolong Abay sa Kasál

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Noviembre 12-18, 2023. Basahon an Evangelio gikan sa Mateo 25,1-13 (Ika-32 na Domingo sa Ordinariong Panahón - A).

…

An mensahe kan Parábola kan Sampolong Virgenes o Abay sa kasál, nasusurat sa Mateo 24,42: “Magbantáy asín maghandâ ta daí nindo aram kun noarín an Akì nin Tawo mádatóng”. Alagad tanganing mas masabotan ta pa an mayaman na mga detalye kan parábola, marhay na aramon ta an mga costumbres sa kasál sa kultura kan mga Judío kan panahón ni Jesús.

An kasál sa kultura ninda minapoón sa pagsayod o pamalaye kan nobyo sa haróng kan nobya, na ináapód sa Ingles na betrothal – na mas matimbang kisa sa custombre nin engagement ngonian na panahón, nin huli ta minimidbid na kaidto an nobyo asín nobya bilang mag-agóm na maski daí pa nagsasaroan (siring sa panahón kan Anunciación ki Virgen María asín San José). Iní minatagál nin nagkapirang bulan sagkod saróng taón, asín panahón man na inaandam nin nobyo an magigin estaran nindang mag-agóm asín magigin pamilya.

Dangan sa talaan na panahón, mahalè an nobyo sa saiyang haróng, o sa haróng kan saiyang amâ, para sundoón an saiyang esposa, siring sa nasusurat sa Genesis 2,24: “Kayâ binabayaan kan lalaki an saiyang amâ asín inâ asín minasarô sa babae, asín nagigi sindang saróng lamán”.

Kadaklan na beses, nababanggihan an pagsundô asín pagdatóng kan mag-agóm sa saindang haróng – kayâ nangangaipo nin mga abay na may daráng lampará o karaba para magtaóng ilaw sa dalan. Pagdatóng kan grupo kan mag-agóm, sinasará an pintoan kan haróng asín minapoón an bangkete na minatagál nin nagkapirang aldaw sagkod saróng semana. Pagsará kan pintoan, daí na ki ibáng bisita na makakalaóg pa.

Sa parábola, an nobyo iyó si Cristo; an nobya iyó an Simbahan; asín an mga abay, kitáng mga disipulos Niya. Boót sabihon: inaagda kita ni Cristo na makisumarò sa Saiyang misyon na darhon an katawohan sa kaogmahan kan bangkete kan Kahadean – bilang mga abay na may daráng ilawan, siring kan tinugon Niya sato sa Mateo 5,14: “Kamo an ilaw nin kinâban”.

An mga madonong o matadóng na abay iyó an mga maimbód na Cristiano, asín an mga mangmang o lolóng na abay iyó an mga masombikal.

Segun ki San Jeronimo, an mga lampará iyó an pagtubód, asín an lana iyó an mga marhay na gibo. Segun man ki San Juan Crisostomo, an lana simboló nin pagkámoót, pagkaherak, asín mga marhay na gibo. Sa Santiago 2,22 nasusurat: “An pagtubód nagtatabang sa mga marhay na gibo, asín sa mga gibo an pagtubód nalúlubós.”

Kayâ magi kitang maimbod sa pagtubód asín sa mga marhay na gibo tanganing danay na magliwanag an satong lampará sa paggiya sa kapwa sa dalan, asín sa pagdatóng nin paghukóm maabtan kitang andam asín maninigò sa Saiyang Kahadean.

An kabôtan ni Cristo, nobyo kan Simbahan, an sunudón ta, asín magtalubò kita sa kadonongan na makúkuá saná Saiya. Sabi sa Kadonongan 6,15: “An paghorop-horop sa kadonongan lubós na katadongan, asín an nagpupuká huli Saiya madalíng magigin matiwasay.”

Herak man sato, kun matapos kitang bonyagán asín apodón na mga Cristiano, nin huli kan satong kamangmangán asín pagkalolóng sa kasâlan, kita lugód an daí makalaóg sa Kahadean. Siring sa parábola, may patanid si Jesús sa Mateo 7,21: “Bakô gabós na nagsasabi Sako, ‘Kagurangnan, Kagurangnan’, makakalaóg sa Kahadean nin langit, kundî an naggigibo kan boót kan Amâ kong yaon sa langit.”

…

GIYA SA PAGHIRÁS SA SADÍT NA KOMUNIDAD O PAMILYA • Sa saimong paghorop-horop, anóng gibong karahayan, pagkamoot, o pagkaherak, an laóg na lana kan saimong lampará ngonian?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Dapit sa mga Nagtataram alagad Dai Naggigibo

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Noviembre 6-11, 2023. Basahon an Evangelio gikan sa Mateo 23,1-12 (Ika-31 Domingo sa Ordinariong Panahón - A).

…                                                                       

Sa Evangelio nasabi ni Jesús an sarô sa mga dakulang rasón kun natà nasasagwè Niya an mga padì, escribas asín Fariséos kaidtong panahón na napadìgdi Siya sa dagâ: huli ta bakô sinda mga marhay na pangarogan kayâ dinádará ninda an banwaan sa mga saláng dalan.

Sa Malakias 2,8 igwa nin profesía dapit sa mga padì kan Israel: “Kamo nagsiblag sa dalan, pinadungkál nindo an dakúl sa katukdoán, asín rinaót an tipan ki Levi.” Anó iníng tipan ki Levi? An sabi kan Kagurangnan nin mga hukbô sa Malakias 2,5: “An tipan Ko ki Levi: tipan nin buhay saká katoninongan, asín tinaó Ko iní saiya; tipan nin pagkatakot, asín natatakotan niya Ako, asín sa atubang kan Sakong Ngaran nangaláng-alang.”

Iní an sinuway kan mga padì, escribas, asín Fariséos kan panahón ni Jesús – náwarâ na sainda an pagkatakot sa Diós. Kayâ nagtukdô Siya sa mga tawo sa Mateo 23,3: “An gabós na isabi ninda saindo, giboha asín utobá nindo, alagad daí kamo maggawè susog sa saindang paarog: ta nagtataram sinda alagad daí naggigibo.”

An mensaheng iní angay nanggad sa satong panahón, lalò na ta kadakul an disinformation asin korupsyon nin mga nasa kapangyarihan – kaya kadakul an nalilibongan kun anó o siisay an tutubodán. Siring man halos maski siisay pwedeng maggibo nin content o magin influencer sa social media. Anó an mga saláng paarog na dapat tang likayán? Anó man an mga dapat niatong gibohon?

Gibohon an tinataram, isabuhay an tinutukdò.

An pagigin ipokrito nin mga Cristiano, para sa kadakul na tawo, nakakapawarâ nin tiwalà sa Simbahan asín nakakapaluya sa pagtubód sa Diós.  Alagad an mga Cristianong sinasabuhay an saindang pagtubód asin totoo sa saindang tataramon, nagsasaksi sa karahayan nin tawo asin pagkamoot nin Diós. Sabi sa Surat ni Santiago 1,22: “Mági kamong paragibo kan tataramon asín bakô paradangog saná sa pagloko kan sadiri.”

Kan nakaaging eleksyon, anong klaseng paarog daw an nátangadán kan mga kaakian sa mga gibo-gibo kan mga nakakaguráng sainda?

Magpakatotoo, bakô pakitang-tao.

An mapaabaw-abaw nabubuhay sa kaputikan, alagad an mapakumbabâ nabubuhay sa katotoohan. Sabi sa Juan 8,32, an katotoohan an mátaó sato nin tunay na katalingkasan. Kayâ an mga pakitang-tao, oripon kan saindang kaputikan, insecurities, asín pagkaarà sa kapwa.

Sabi ni Jesús sa Mateo 6,1: “Magmaan kamo laban sa paggibo nin saindong karahayan sa atubang nin mga tawo, para ipadayaw sainda; ta kun daí, mayo kamo nin balós sa Amâ nindong yaon sa langit.” Sinabi pa Niya sa Mateo 23,11 na “an magpalangkaw, ibababâ; alagad an magpakumbabâ, ilalangkaw.”

Sa gabós na bagay an Diós ipagmuraway.

Daí naman kitang maidadagdag pa sa kamurawayan nin Diós, kayâ natà dapat ta pa Siyang ipagmuraway? Nin huli ta sa pagkamarahayon kan mga nagtútubód, mamimidbidan nin katawohan an Diós na satong tinútubód. An mga marhay tang gibo, tandâ kan Saiyang pagkamarahayon. An satong mga gibong herak nagpapamatè sa satong kapwa kan Saiyang pagkamaheherakon.

Sabi ni Jesús sa Mateo 5,16: “Siring magliwanag an saindong ilaw sa atubang nin mga tawo, na mahiling ninda an mga magayón nindong trabaho asin pamurawayon an Diós Amâ nindong yaon sa langit.” Si Jesús an pinakanagpamuraway sa Amâ sa pagsunod Niya hanggang sa hurí sa kabôtan kan Amâ. Kayâ kitang mga disipulos Niya, Siya an pangarogan ta.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia na daí mo nagibo an saimong tinataram, o nin paghingowa na magin bolanos an saimong pagtubód sa tataramon asín sa gibo.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Kamòtan an Diós sa bilog na Sadiri

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Octubre 29 – Noviembre 5, 2023. Basahon an Evangelio gikan sa Mateo 22,34-40 (Ika-30 Domingo sa Ordinariong Panahón - A).

…

Anó an pinakadakulang tugon kan Ley? Iní an hapót nin saróng abogadong Fariseo ki Jesús sa pagsugót Saiya. Alagad an Saiyang simbag bakô saróng provisión nin Ley, kundî saróng pamìbì – an pinakaimportanteng pamìbì para sa mga Judío – an Shema Yisrael.

Makukua iní sa Deuteronomio 6,4-5: “Dangogá, O Israel! An Kagurangnán – asín an Kagurangnán saná – iyó an satuyang Diós. Kamòtan nindo an Kagurangnán nindong Diós sa bilog nindong pusò, sa bilog nindong kalág, asín sa bilog nindong kusóg.” Sa versión ni San Mateo, kamòtan ta an Diós sa bilog niatong pusò, kalág, asín isip.

Anó an boót sabihon kan kamòtan an Diós sa bilog na pusò?

Daíng ibáng Diós kitang kamomòtan asín sasambahón; Siya an pinapaoróg sa gabós kan satong pusò. Iní an pinakaenot sa Sampulong Tugon sa Exodo 20,3. Kaitóng panahón kadakul nin mga diós-diósan na sinasamba – si Baal, Astarte, Dagon, an bulawan na baka, an mga diós-diósan sa Egipto, Grecia, asín Roma. Ngonian na panahón, daí na an mga iní, pero dakul an mga nagsasamba sa mga diós-diósan nin kapangyarihan, kayamanan, kagadanan, kasikatan, asín iba pa.

Ngonian na eleksyon, dai pag diosón an kwarta. Dakúl an sa paghalát kan “biyayà”, biyô patíng nagvi-vigilia. Mag-ingat sa pagpilì susog sa paipít, huli ta kun manggana an kurakot, an balík sa komunidad siguradong pasakit.

Ano an boót sabihon kan kamòtan an Diós sa bilog na kalág?

An kalág iyó an parte kan satong pagkatawo na nagpapahirô asín nagtátaóng-buhay sato. Sabi sa Genesis 1,27, kitang mga tawo linaláng na kabaíng nin Diós. An satong espiritu an kabaíng sa mahál na Diós. Kayâ kun an satong espiritu nagtatalubò sa pagtubód, paglaom, asín pagkamoot, kita nagigin mas kabaíng nin Diós.  An katuyuhan nin gabós tang pagpamìbì, pag-devoción, asín pagsimba, iyó na kita magin siring sa Diós na satong sinasamba.

Ano an boót sabihon kan kamòtan an Diós sa bilog na isip?

Mápoón iní gabós sa pag-akò kan katotoohan na dará ni Cristo. Sabi ni Jesús sa Juan 8,31-32: “Kun danay na magsunód kamo kan Sakong katukdoán, tunay ko kamong mga disipulos; maaaraman nindo an katotoohan, asín an katotoohan an mapatalingkás saindo.” Duwáng kabtang kainíng katotoohan an kaipuhan tang akoon, isabuhay, asín ipagtalubò:  an pagpamidbid nin Diós kan Saiyang sadiri asín kan Saiyang kabôtan – sa pag-adal kan Saiyang Tataramon sa Biblía, sa mga katukdoán kan Simbahan, asín sa pamìbì.

Ano an boót sabihon kan kamòtan an kapwa siring sa pagkamoot sa sadiri?

Maski daí hinagad sa hapót, tulos sinundán ni Jesús an Saiyang simbag nin sarô pang tugon – tandâ na boót nin Diós na bakô sanáng kamòtan ta Siya sa bilog tang sadiri kundî pati man an kapwa. Dangan bakô saná na gibohon tang sukol an pagkamoot sa sadiri kun gurâno ta kamomòtan man an kapwa, kundî giromdomón na kita gabós namòtan nin Diós, asín Siya haraní sa kapwang dukhâ asín nangangaipo. Sa katunayan, ginibo ni Cristong sukol asín patugmadan kun makakalaóg kita sa Kahadean nin langit, o daí, an satong patratár sa kapwang nangangaipo. Sinabi Niya sa Mateo 25,40: “An ano man na ginibo nindo sa sarô kan pinakasadít kong mga tugang, ginibo nindo iyan Sako!”

Pàno ta isasabuhay iníng ikaduwáng pinakadakulang tugon ngonian na eleksyon? Sabi ni Papa Francisco: “An pulitika an sarô sa pinakahalangkáw na porma nin pagkamoot, nin huli ta naglilingkod iní sa karahayan kan kagabsán.” Kayâ ngonian na eleksyon marhay giromdomón na an responsableng pagboto, pagkamoot sa komunidád asín kapwa tawo.

…

GIYA SA PAGHIRÁS SA SADÍT NA KOMUNIDAD O PAMILYA • Maghiras kun pàno mo naisabuhay an bolanos na pagkamoot sa Diós sa bilog na pusò, kalág, asín isip sa eleksyon ngonian na taon.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

An Evangelio sa Panahón nin Eleksyon

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Octubre 22-28, 2023. Basahon an Evangelio gikan sa Mateo 22,15-21 (Ika-29 Domingo sa Ordinariong Panahon - A).

…

“Tâwan ki Cesár an ki Cesár, asín sa Diós an sa Diós.” Tamang-tamà iníng kasabihán mantang haraní na an eleksyon nin mga oficiales sa mga barangáy asín SK. Iní an simbag ni Jesús sa patibóng na hapót Saiya kan mga naghahanap nin ikakaparaót Niya: “Tugot magbuwís ki Cesár o bawal?”

Kun magsimbag si Jesús na dapat magbayad nin buwís, ipapalakóp kaining mga parasunod kan mga Fariseos asín ni Herodes na traidor Siya sa banwaan na Judío nin huli ta nagsusuporta Siya sa mananakop na Imperio Romano. Kun sabihon Niya man na daí dapat magbayad, ioosip ninda sa mga autoridád na Romano na Siya nagrerebelde asín nagtutukdò sa mga tawo na magsuway sa Imperio, kayâ dapat Siyang padusahan. Alagad ginamit ni Jesús an saindang patibóng tanganing magtukdô dapít sa autoridád asín Kahadean.

Siisay palán iníng Cesár sa kasabihán? Ini si Tiberio Cesár, an Emperador kan Roma kan panahón ni Jesús. Daí man kita pinapamayohán ngonian nin saróng Cesár, alagad may mensahe an Evangelio sa satong mga botante asin kandidato ngonian na nagdadangadang an eleksyon.

An Diós an paorogón sa gabós.

Iníng kasabihán bakô sa pagbangâ kan materiál o seculár na mga bagay sa lado kan gobyerno asín an espirituál sa lado kan Simbahan. Kundî na an maninigong itaó sa Diós iyó an gabós. Sa Mateo 22 kan hinapót si Jesús nin saróng abogado kun anó an pinakadakulà sa mga batás, sinimbag Niya kaining linya sa pamìbì na Shema Israel sa Deuteronomio 6,5: “Kamòtan mo an Kagurangnan mong Diós sa bilog mong pusò, sa bilog mong kalág, asín sa bilog mong isip.”

An Diós an nagwawaras nin kapangyarihan sa dagâ.

Sa Isaías 45,1-6, iniistorya kun pàno ginibo nin Diós na kasangkapan si Emperadór Ciro (Cyrus the Great) kan Persia para matapos na an pagsakit kan mga Judío sa  irarom kan Imperiong Babilonia asín makaulî sa Israel an mga destiero (exile).

Sabi pa ni San Pablo sa Roma 13,1: “Dapat magpasakop sa mga namámayó kan gobyerno, huli ta mayong autoridád na bakóng tugot nin Diós. An mga autoridád sa ngonian na panahón ibinugtak nin Diós.” Alagad pàno kun bakô marhay an gibo kan mga namámayó?

An Diós an sukol kan satong pagsunód sa mga autoridád sa kinâban.

Daí pwede gamiton an Roma 13,1 tanganing magin butá o daíng isip na parasunod an mga tawo kun lakóp an karâtan asín korupsyón sa gobyerno. Sa Mateo 28,18, iní an sinabi Niya: “Itinaó sako an gabós na kapangyarihan sa langit asín sa dagâ.”

Kun susog sa kabôtan nin Diós an mga pinapapatupad na batás asin marhay an pasunód nin mga pamayó sa gobyerno, maninigò lamang an pagsunód nin mga ciudadano ta para sa ikakaraháy man saná iní nin gabós.

Ngonian na eleksyón, an kabôtan nin Diós iyó an satong paorogón, bakô an mga kinâbanon na tentación. Sa pangangampanya, ipahayag saná an katotoohan, daí magpalakóp nin kaputikan. Sa pagboto, dangogón an dikta kan consciencia bakô an dikta kan kwarta.

Pag tinataó ta an tamà asín maninigò sa Diós, tinataó ta man an marhay asín magayón para sa satong komunidad. Sabi nganì sa Proverbio 29,2: “Kun an matanos an nagkákapót nin kapangyarihan, nag-oogma an banwaan; alagad kun namámayó an tampalasan, nag-aagrangay an katawohan.”

…

GIYA SA PAGHIRÁS SA SADÍT NA KOMUNIDAD O PAMILYA • Ngonian na pirilían, pàno mo isasabuhay iníng kasabihán: “Tawan ki Cesar an ki Cesar, asín sa Diós an sa Diós”?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

Gabós Imbitado sa Bangkete nin Diós

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Octubre 15-21, 2023. Basahon an Evangelio gikan sa Mateo 22,1-14 (Ika-28 Domingo sa Ordinariong Panahon - A).

…

An parábola kan Bangkete sa Kasál may parehong tema asín mga kabtang sa duwáng parábola na sinundán kainí sa Evangelio ni San Mateo: an mga parábola kan Duwáng Magtugang asín kan mga Maraot na Tumatawo. Yaon an plano nin Diós, an pagsikwál kan Saiyang mga pinilì, asín an paghukóm sa hurí.

An Plano nin Diós

Sabi ni San Pablo sa 1 Timoteo 2,4: an Diós “nagmamàwot na an gabós makaligtas, saká makamidbid sa katotoohan”. Sa parábola linaladawan iní kan bangkete sa kasál na may mga naenot na imbitado dangan sinunod imbitarán an gabós na masumpongan sa dalan, an mga marhay saká maraot.

Sa Bàgong Tipan, nagkapirang beses linaladawan an pagkámoót nin Diós siring sa bangkete nin kasál kun saen si Jesu Cristo an nobyo asín an Simbahan an Saiyang nobya. Kayâ nganì sa Efeso 5,25 tinutukdò sa mga agóm na lalaki: “Mga esposo, kamòtan nindo an saindong agóm siring kan pagkámoót ni Cristo sa Simbahan; idinusay Niya an Saiyang buhay para sa Simbahan.”

An padumanan kan Simbahan na kasarô ki Cristo iyó an kapanoan kan Kahadean, an langitnon na bangkete kan mga akì kan Diós. Asín digdi pa saná sa dagâ pinapatanâ na kita kan gracia kainíng langitnon na bangkete sa bangkete kan Eucaristía.

An Pagsikwál kan mga Saiyang mga Pinilì

Siring kan akì na nag-iyó alagad daí nag-utób sa pagsugò kan saiyang amâ asín kan mga maraot na tumatawo sa duwáng naenot na parábola, an mga imbitado daí pig-honra an invitación kan hadè sainda. Mas pinilì ninda kisa sa Kahadean an pagpayaman (umá asín negosyo) o pagmantenér nin kapangyarihan (kayâ kinulgán asín ginadán an mga sinugò kan hadè). Kita man pwedeng magibo an siring na pagsikwál kun pinipilì ta an makasadiring interés asín mga kinâbanon na kaogmahan kisa pagsunod sa kabôtan nin Kagurangnan.

Igwa pa nin saróng pagsikwal sa hadè sa laóg kan parábola: itóng lalaki na daí nakabadò pangkinasál. Maski nagpa-honra siya sa invitación, pinilì niya man giraray an saiyang kabôtan kisa kun anó an maninigò sa Kahadean. Siring iní sa tawong nagsasabi na nagtútubód siya sa Diós alagad naggigibo nin mga bagay na tumang sa kabôtan nin Diós. May patanid dapít kainí si Jesús sa Mateo 7,21: “Bakô gabós na nagkukurahaw Sako, ‘Kagurangnan, Kagurangnan!’, makakalaóg sa Kahadean nin langit kundî itóng mga nag-uutób kan kabôtan kan Sakong Amâ sa langit.”

An Paghukóm nin Diós

Sa parábola, an pagsugò kan hadè sa saiyang hukbô na gadanón an mga paragadan asín suluón an saindang mga banwaan saróng profesía sa maabot na pagsakit kan Israel na kan taón 70 AD sinakyada asín rinompág an Jerusalem asín palibot na mga banwaan kan Imperio Romano. Alagad may mas makuring paghukóm na maabot sa mga minasikwal sa Kagurangnan: an pagtapok paluwas sa Kahadean.

Sabi sa katapusan kan parábola sa Mateo 22,14: “Dakúl an inapód alagad dikit an napilì”. May paghukóm na maabot sa katapusan kan satong buhay sa dagâ asín sa Ikaduwáng Pagdatóng ni Cristo. Alagad bâgo an paghukóm nin Diós sa sato, kita ngûna an enot na mahukóm o mapilì: an akoon an invitación nin Diós pasiring sa Saiyang Kahadean o pilion an sadiri tang kabôtan asín mga kinâbanon na kaogmahan.

Lugód pilion ta an “totoong maninigò asín dapat, an matanos asín nakakaligtas”. Sabi sa awit sa Misa na halè sa Mateo 6,33: “An Kahadean nin Diós enoton ta, siring man an katanosan, asín an gabós idudugang na saná.”

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia na napa-honrahan mo an invitación saimo nin Kagurangnan. Anó an nagin bunga kainí sa saimong buhay?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

Si Jesús an Gapóng Sinikwál

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Octubre 8-14, 2023. Basahon an Evangelio gikan sa Mateo 21, 33-43 (Ika-27 Domingo sa Ordinariong Panahón - A).

…

Iníng parábola kan mga maraot na tumatawo, siring kan parábola kan nakaaging Domingo, inistorya ni Jesu Cristo giraray sa hampang kan mga poón na padì asín mga pamayó kan banwaan. Sinda idtong mga maraot na tumatawo sa parábola na daí nagin maimbod sa saindang katongdan na atamanon an banwaan Israel.

An ubasán iyó an Banwaan Israel. An kagsadiri iyó an mahál na Diós. An mga sorogoon iyó an mga profetas na pinadará nin Diós sa Saiyang banwaan. Asín an akì kan kagsadiri, daíng ibá kundî si Jesús na nagprofesía kan Saiyang maabot na pagsakit asín pagkagadán sa kamót kaidtong mga kahampang Niya mismo.

Sinikwál ninda si Jesús siring sa profesía kan gapóng sinikwál nin mga paratugdók. Kayâ hinalè sainda an Kahadean asín tinaó sa bâgong banwaan na minuknâ ni Cristo, an Simbahan na pinatugmád ki Pedro asín nabubuhay sa Espiritu Santo, na kaidto pa man, ngonian, asín sagkod pa man, yaon sa Santa Iglesia Catolica.

Nálingawán kaidtong mga kapadian asín kamagurangan sa banwaan an boót sabihon kan saindang pagigin Piniling Banwaan – bakô kaomawan o kapangyarihan, kundî pagigin kasangkapan kan Kahadean sa kinâban. Alagad kun an mga pamayó asín miembros kan Piniling Banwaan sinikwál si Jesús kaidtong panahón, bakô imposible na kita na mga kabtang kan Saiyang Hawak ngonian sikwalón man si Cristo sa satong buhay.

Kun habô tang magtalikod sa kasâlan, sinisikwál ta si Cristo. Kan si Jesús naglibot sa pagtukdô kan Kahadean, iníng sa Mateo 4,17 an pirming sinasabi Niya: “Magbaklè na kamo huli ta haraní na an Kahadean nin langit!” Boót nin Diós na an gabós maligtas asín makalaóg sa Saiyang Kahadean alagad iní nangangaipo man kan satong pag-akò kaiyán sa paagi enot kan satong pagbâgong-buhay.

Dapít kainí may pagiromdom si San Pablo sa Roma 6,23: “An kabayadán nin kasâlan kagadanan; alagad an biyayà nin Diós buhay na daíng kasagkoran ki Cristo Jesús na satong Kagurangnan.”

Kun nagdúdulág kita sa cruz nin sacrificio, sinísikwál ta si Cristo. Sa Lucas 9,23 iní an pighagad ni Jesús sa mga boót magin disipulo Niya: “lingawán an sadiri niyang buhay, magpâsan kan saiyang cruz aroaldaw, asín magsunód sa Sako”.

An cruz na pinapapâsan sato iyó an pagsunód sa kabôtan nin Diós, sa ano man na sitwasyon nin satong buhay, gurâno man kadipisil, nin huli ta iní matanos asín marhay. Naghulit si San Pablo sa Filipos 4,8: “An ano man na suripot, matubís, kahangà-hangà, noble, kun igwa nin mabansáy asín maninigong omawon, iyán an isipa.”

Kun linílingawán ta an satong Cristianong misyon, sinísikwál ta si Cristo. Iní an misyon na winalat Niya sato sa Marcos 16,15: “Padumán kamo sa bilog na kinâban, ibalangibog an Marhay na Baretà sa gabós na tawo!” Sa mga nagkakampante na huli sa paghonà na nagibo na ninda an saindang obligación espirituál o na igwa man sinda nin mga devoción, giromdomón na kita inapód ni Cristo bakô saná sa pagsimba kundî na magin Simbahan – asín an misyon na tinaó sato ni Cristo iyó an nagtátaóng kahulugán kan satong pagigin Simbahan.

Susog sa Mateo 5,13-16, inapód kita na magin ilaw nin kinâban dangan asín nin dagâ. Sabi pa ni San Pablo sa Roma 14,7: “Daíng siisay man na nabubuhay para sa sadiri lamang, daíng siisay man na nagágadán para sa sadiri lamang.” Kayâ daí ta sadirihon saná o sayangon an graciang tinaó sato nin Diós kundî ihirás tanganing makadará man kita nin kapwa pasiring Saiya dangan an kinâban maglakáw sa Saiyang dalan.  

Kitang mga tinubós ni Cristo: talikdán an kasâlan, pâsanón an cruz, padagoson an misyon.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia kun pàno mo nasikwál man si Cristo sa paagi nin mga saláng paghonà o gibo asín kun pàno ka nakabalík Saiya.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Maglikáy sa Spiritual Pride

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Octubre 1-7, 2023. Basahon an Evangelio gikan sa Mateo 21, 28-32 (Ika-26 na Domingo sa Ordinariong Panahón - A).

…

An Evangelio iyó an parábola kan duwáng aking lalaki na sinugò kan saindang amâ. An akì na naghabô sa enot alagad nagtubód sa hurí iyó an mga parakasalà sa panahón ni Jesús na nagtubód sa pangapodan ni Juan Bautista asín nagbâgong buhay. Asín an akì na nag-iyó alagad daí naghirô iyó an Saiyang mga kahampang (audience) kaidto na mga poón na padì asín mga pamayó nin banwaan, na sa panluwás maimbod sa pagtubód alagad sa panlaóg matagás an pusò sa kabôtan nin Diós.

Sabi ngani ni Jesús sa Mateo 9,13: “Pagkaherak an mâwot Ko, bakóng atang. Daí ako nagdigdi sa pag-apód kan mga banál kundî kan mga parakasalà.” Anó pa an mensahe sato kan parábola sa Evangelio?

Magbâgong-buhay an parakasalà. Sinabi ni Jesus sa Evangelio na an mga parakasalà (an mga parasingil nin buwís asin mga maraot na babae) maeenot sa Kahadean nin langit nin huli ta sinda nagtubód ki Juan Bautista asín nagbaklè. Linawon ta na an pagkámoót nin Diós sa satong mga parakasalà daí nagkukunsinte sa kasâlan kundî nagdádará sato sa pagbâgo nin buhay asín tunay na katalingkasan.

Susog sa Ezekiel 18,27-28: “Kun magbalík an tampalasan halè sa ginibo niyang katampalasan asín maggibo nin tamà saká matanos, siya mabubuhay; huli ta nagtalikod siya sa gabós na ginibo niyang kasombikalan, mabubuhay siya ta mabubuhay, daí magágadán.”

Maglikáy sa kapaabaw-abawan nin espiritu o spiritual pride. Iní an kasâlan kan mga escribas, Fariseos, asin Saduceos na nagsikwal ki Jesús, asín gabós na sarado an mga pusò.

Saróng tandâ kainí iyó na kun an satong pagtubód nagigin pansadiri lamang siring kan mga naghohonà na daí sindang pakilabot sa ibáng tawo basta sa saindang paghilíng matanos sinda sa matá nin Diós. Nakakalingáw an mga iní kan Cristianong misyon nin pagigin ilaw nin kinâban. An satong espiritualidad bakô para sa sadiri lamang kundî kaipuhan ihirás sa kapwa tanganing sinda man makaraní sa Kagurangnan.

Sarô pang tandâ iyó an halangkáw na gayong paghilíng sa sadiring katanosan asín hababâ na paghilíng sa kapwang parakasalà. An hulit sa Filipos 2,3: “Daí maggibo nin anoman na makasadiri o para maghambog, kundî sa kapakumbabaan, ibilang na mas marhay an ibá kisa saindo”.

Tandâ man nin spiritual pride an pag-overspiritualize nin mga bagay maski an kaipuhan iyó na pabungahon an pamìbì sa mga marhay na gibo. May mga madalion maghusga na kulang saná sa pangadyê o pagtubód an mga nag-aagi nin depression o nakakamatè na mag-suicide, imbes na magsabot o mag-antabay sa saindang kapwa na nakakamatè nin kapurisawan.

Spiritual pride man an paghonà na daí na kaipuhan magbâgo sa saláng pamumuhay nin huli ta sabi daá “an Diós pagkámoót". Siring man an pagpasipara kan  pagtalubò sa espiritu arog kan paglingáw sa pamìbì, pagrayô sa Simbahan asín mga sacramento, asín daí pag-adal kan Tataramon nin Diós.

Magpakumbabâ sa Kagurangnan. Sabi sa Mateo 5,3: “paladan an dukhâ sa espiritu”, nin huli ta an kapakumbabaan nagdádará sa pagsarig sa Diós asín pag-akò nin mga kasâlan, dangan kapatawadán, pasiring sa katalingkasan asín kapanoan nin buhay. Alagad sa mga tawong mapaabaw-abaw sa espiritu, may pagiromdom si Jesús sa Mateo 7,21: “Bakô gabós na nag-áapód Sako ‘Kagurangnan, Kagurangnan’, makakalaóg sa Kahadean nin langit, kundî an naggigibo kan kabôtan kan sakong  Amâ sa langit.”

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia kun pàno ka nag-agi nin kapaabaw-abawan sa espiritu asín kun pàno nadará sa pagbâgo nin buhay.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Bakô Makatarungan an Kagurangnan?

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Septiembre 24-30, 2023. Basahon an Evangelio gikan sa Mateo 20,1-16a (Ika-25 Domingo sa Ordinariong Panahon - A).

…

Iníng Parábola kan mga Trabahador sa Ubasán makukua saná sa Evangelio ni San Mateo; daí kainí sa ibáng mga Evangelio. Alagad an kaipuhan gayód na tulos ihapót iyó iní: Patas daw o makatarungan an pagpasweldo kan kagsadiri kan ubasán nin pararehong kantidad sa gabós na trabahador, naenot man o nahudyan magtrabaho sa aldaw?

Bàgo ta iyán simbagón, romdomón ta ngûna na iníng parábola – siring kan gabós na mga parábola asín katukdoán ni Jesu Cristo – dapít sa Kahadean nin langit.  

An Diós oróg na marahayon asín matinao.

Iní an pangenot na mensahe kan parábola. Siya an nagtaóng trabaho sa mga daíng trabaho. Según ki Papa San Juan Paulo II sa saiyang surat encyclicál na Laborem Exercens: “An trabaho nagtataong dignidad sa tawo.”

Siring sa kagsadiri kan ubasán na daí nag-oontok sa paghanap pa nin mga trabahador sa bilog na aldaw, an Diós daí nag-oontok sa paghanap kan mga nawáwarâ tanganing darhon sinda sa Saiyang lindong asín tâwan kan dignidad nin pagigin Saiyang mga akì.

An Saiyang gracia tinátaó Niya sa gabós. An satong pagka-makasâlan daí mapugol Saiya na kita kaherakan asin kamòtan. Sabi ni Jesús sa Mateo 5,45: “Parehong pinapasaldangán saká pinapauranan nin Diós an tawong marhay asín maraot, an banál asín an parakasalà.”

An nagtatrabaho dapat sweldohan nin matanos.

Nagkulóg an boót kan mga trabahador na naenot nin huli ta sa saindang paghilíng bakô patas na an nagpagál nin dikít pareho an makúkuá sa mga nagpagál nin dakúl. An saindang punto valido asín tamà kun iní dapít sa derechos nin mga trabahadór. An sweldo asín mga benepisyo dapat maninigò sa halagá nin trinabaho. Kayâ iníng parábola bakô pag-oyon ni Cristo sa pagpasweldo nin kulang sa mga empleyado – huli ta iyan nanggad bakô makatarungan.

Alagad iníng parábola bakô dapít sa kinâbanon na trabaho kundî sa langitnon na trabaho nin kaligtasan nin katawohan. An "sweldo" para sa mga nagsimbag kan pangapodan na magtrabaho sa ubasán bakô aldawan kundî buhay na daing kasagkoran.

Dapít sa graciang iní, nagtukdò si San Pablo sa Efeso 2,8-9: “Huli sa biyayà nin Diós, nakaligtas kamo sa paagi nin pagtubód. Iyán bakóng sadiri nindong gibo kundî regalo nin Diós. Mayò saindong pwedeng maghambog dapít kainí, huli ta bakô iníng bunga kan sadiri nindong gibo.”

Kun siring kainí an mensahe kan parábola, anó an maninigong simbag niato sa pagkamarahayon nin Diós?

Iayon ta an satong kadonongan sa kabôtan nin Diós.

Tinâwan kita nin Diós nin isip asín boót, tanganing pilíon an tamà, marhay, asín matanos. Alagad bakô perpekto an satong kaisipán, bakô pirming matanos an satong kabôtan. An tunay na kadonongan makúkuá sa pag-akò kan kabôtan nin Diós. Nasusurat sa Isaías 55,8-9: “Ta bakô Kong kaisipán an saindong kaisipán, asín bakô nindong paagi an Sakong mga paagi. Olay kan Kagurangnan. Ta siring na halangkaw an langit sa dagâ, halangkaw man an Sakong mga paagi sa saindong mga paagi asín an Sakong kaisipán sa saindong kaisipán.”

Daí maurí sa biyayà na nakamtan nin kapwa.

Kundî makisumarò kita sa saindang kaogmahan nin huli ta iyán tamang gawè nin pagkámoót sa kapwa asín pagmidbid kan pagkamarahayon nin Diós. Daí magluya an pagtubód kun daí pa nag-áabót an hinahagad na biyayà ta an Dios itátaó an pinakamarhay para sato sa tamang panahón.

“Maogmáng maglingkod sa Kagurangnan” (Salmo 100,1).

An paglingkod sa Saiyang ngaran asín pagdará sa kapwa parani Saiya, pribelihiyo asín kaogmahan kan mga ngonian pa saná nasa lindong na kan Saiyang Kahadean.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia na nahapót mo an Diós nin huli ta daí mo nasasabotan an mga nangyayari sa saimong buhay. Anó an nakua mong simbag?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

Patrona del Bicol, Gran Madre de Diós

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Septiembre 17-23, 2023. Basahon an Evangelio gikan sa Lucas 2,27-35 (Solemnidad ni Nstra. Sra. de Peñafrancia).

…

Cada ikatolóng Domingo kan Septiembre kita digdi sa Bicol nagcecelebrár kan fiesta kan satong Inâ, Nuestra Señora de Peñafrancia. Sabi sa himnong Resuene Vibrante, siya an “Patrona del Bicol, Gran Madre de Diós, se siempre la reina de nuestra region”.

An devoción na iní dinará sa Kabikolan ni Padre Miguel Robles de Covarrubias kan 1710. Labí daá tres miliones katawo an nagpi-pilgrimage sa Naga City cada taon para magsungkô ki Inâ sa mga aldaw na iní. Maski kan panahón kan pandemia na cancelado an mga actividades sa fiesta, an devoción ki Inâ nagpadagos sa mga parokya, mga haróng, asín manlaen-laen na ronâ sa kinâban kun saén yaon an saiyang mga devotos.

Sa tahaw kan gabós na iní, marhay na maghapót: Anó man nanggad an totoong devoción sa mahál na Inâ? Ta may mga nagsasabi na iní daáng devoción niatong mga Catolico suwáy sa biblía, o pagsamba na ki María, o singkogan sa tunay na pagtubód.

May duwáng dokumento nin katukdoán kan Simbahan an pwede tang pagkuahan nin simbag: an "Maríalis Cultus" na sinurat ni Papa San Paolo VI kan 1974 asín “Ang Mahal na Birhen" na sinurat kan CBCP kan 1975. Makua kita nin tolóng simbag halè sa mga iní.

1. An tunay na devoción ki María maimbód sa Biblía.

Siya an virgen na mangangakì kan Mesías susog sa mga profesía sa Lumang Tipan. Sa Lucas 1,28, sabi saiya ni arcangel Gabriel: “paladan na babae. An Kagurangnan yaon saimo!” Nag-awit man siya sa Lucas 1,48: “poón ngonian aapodón akong paladan kan gabós na kapag-arakian”. Kayâ kaidtó pa man an Simbahan maogmáng nag-óotób kan profesíang iní ni María.

Asín an enot niyang mga devotos iyo si San Jose, saiyang agóm, asín si Jesu Cristo, saiyang Akì. Sabi ni San Maximilian Kolbe: “Daí nanggad matakot na masobrahan nin pagkámoót ki María. Ta daí nindo kayang kamòtan siya labí pa sa pagkámoót ni Jesús.”

2. An tunay na devoción ki María dinádará kitá pasiring ki Cristo.

Inoomaw si María nin huli ta siya an Inâ kan Diós, o Theotokos, susog sa katukdoán kan Consejo kan Efeso kaidtóng 431 AD. Siya an pinilì kan Amâ na magin Inâ kan Saiyang Akì. Namidbidan kan kinâban si Cristo sa paagi kan pagsunód ni María sa kabôtan kan Amâ.

Kayâ si San Louis-Marie de Montfort nakapagsabi: “ad Jesum per Maríam”, pasiring ki Jesús sa paagi ni María. An devoción ki María na daí nakakaparaní ki Jesús, ginigibo siyang idolo o diós-diósan. Kayâ an satóng devoción ki María dapat dinádará kitá sa devoción man sa Eucaristía, ta kun daí, kulang an satuyang pagtubód.

3. An tunay na devoción ki María binabàgo an satóng buhay.

Sabi ni Jesús sa Mateo 7,16: “Mamimidbid nindo sindá sa mga gibo ninda”. Pinapatalubò daw kitá kan satóng pagdevoción ki María sa kabanalan asín sa pagigin mas masínunod-sunod sa Diós, mas maboot, mas mamomòtón, asín mas matinabang sa kapwa?

Si María bakô saná Inâ ni Jesús kundî siya man an pangenot na disipulo kan saiyang Akì. Bilang Inâ kan Simbahan, siya an modelo niatò nin pagigin disipulo. An pagigin disipulo iyo an pagsunod sa kabôtan kan Amâ asín paglakáw sa dalan kan cruz ni Jesús. Lugód makaarog kitá ki María sa saiyang pagigin maimbód sa Amâ asín pagkámoót ki Jesu Cristo.

Viva la Virgen!

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia kan saimong gawè nin devoción sa mahal na Inâ. Paano ka kainí natatabangan na magtalubò sa pagsa-Dios asin pakipagkapwa?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song