Kun Magin Dahilan nin Pagkasala

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Septiembre 26 – Octobre 2, 2021. Basahon an Evangelio gikan sa Marcos 9,38-43.45.47-48 (Ika-26 na Domingo sa Ordinariong Panahon – B).

…                                                                                                                                   

Kaniguan an mga tataramon ni Jesu Cristo sa evangelio: kun an saimong kamot magin dahilan nin pagkasalà, putolá! Kun an saimong bitis, putolá! Kun an saimong mata, hulwatá! An tawong magin dahilan nin pagkasalà sa saro kaining mga saradit na nagtutubod, gakudán nin gapóng-gilingan sa liog dangan itapok sa lawód!

Linawon ta na bako ini literal na kasuguan ni Jesus. Sa literatura, an apod kaini hyperbolé o pagmamalabis. Ini an lohikal na padumanan kan Saiyang pangapodan sa Marcos 1,15: “Uya na an Kahadean nin Dios! Magbaklê kamo asin magtubod sa Marhay na Bareta!” 

Boot nin Dios na kita maligtas, magkaigwa nin buhay, asin makalaog sa Saiyang Kahadean. Alagad tanganing maakò ta ini, kaipuhan man an satong pagtalikod sa kasàlan. Pinapatanidan kita ni Jesus kan puedeng magin dahilan kan satong pagkasalà asin magdara sato sa infierno: an labi-labing pagpaorog sa sadiri.

An satong buhay, marhay na salud, mga kakayahan, patin mga kinabanon na karahayan, gabos tinatao sato nin Dios. Alagad kun dai ta gamiton an mga ini sa tama asin kita magin makasadiri,  an mga ini magigin dahilan kan satong pagkasalà asin kaulangan sa  pagkamit kan buhay na daing kasagkoran.

An tawong makasadiri asin labí an pagpaorog sa sadiri, nagigin menos an paghiling sa kapwa. Pwedeng tàwan niya nin pagpahalaga an sadiring pamilya, barkada, o mga kaugos, bilang extension kan saiyang sadiri. Alagad dai siyang pakiarám o sinisikwal pa nganì an mga nasa luwás kan saiyang circulo.

Sa evangelio, kan binaretà ki Jesus na sinawáy kan Saiyang mga disipulos an sarong lalaki na bako ninda kaibahan alagad nagpapaluwas nin mga demonio sa Ngaran Niya, sinda an sinagwê ni Jesus asin sinabihan na dai pagsawayon an lalaki.

Sa katunayan, sa Saiyang ministerio publico, nagsaksi si Jesus sainda kun pâno magraní asin mag-ako kan mga sinisikwal nin sociedad. An mga Fariseos asin escribas, na mahilig mansikwal sa mga parakasalà, sinabihan Niya sa Mateo 9,13: “Pagkaherak an màwot Ko, bako atang. Dai Ako napadigdi sa pag-apod kan mga banal kundi kan mga parakasalà.”

An patanid na ini orog na kaipuhan madangog asin masabotan sa panahon ngonian na an mga naghahade-hadean sa satong sociedad, linalanse an mga tawo na magin butá asin púla sa mga panggagadan asin pag-abuso nin derechos sa mga pinagsususpetsaran na kriminal o adik sa ilegal na droga – sa ngaran nin kaligtasan nin sadiri, pamilya, asin publiko.  

Sa sainda, may patanid an Mga Talinhaga (Proverbs) 6,16-19: “Anom na bagay an ikinakauyam nin Kagurangnan, pito an Saiyang ikinakaongis: matang mapaabaw-abaw, dilang putikon, mga kamot na nanggagadan nin mga daing salà, pusong nagpaplano nin mga maraot, mga bitis na naghihidalì sa paggibo nin karàtan, an nagsasaksing-putik, asin an tawong dahilan nin pag-iriwal nin mga magkaratood.”

Sa huri, si Jesu Cristo man giraray an nagsaksi sato kan pagpaorog sa kabòtan kan Ama bako kan sadiri, asin tunay na pagkamoot sa kapwa. Sabi Niya sa Juan 6, 37-38: “An siisay man na magdulok Sako dai ko isisikwal, huli ta naghilig Ako hale sa langit nganing gibohon an kabòtan kan nagsugò Sako, bako an kabòtan Ko.”

…

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia na ika natentaran na paorogon an sadiri, bako an kabòtan nin Dios o karahayan nin kapwa. Pàno ka nagtalubò sa experienciang ini?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Patrona del Bicol, Gran Madre de Dios

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Septiembre 19-25, 2021. Basahon an Evangelio gikan sa Lucas 2,27-35 (Solemnidad ni Nstra. Sra. de Peñafrancia)

...

Cada ikatolóng Domingo kan Septiembre kitá digdí sa Bicol nagcecelebrar kan fiesta kan satóng Ina, Nuestra Señora de Peñafrancia. Sabi sa himnong Resuene Vibrante, “Patrona del Bicol, Gran Madre de Dios, se siempre la reina de nuestra region”.

An devocion na ini dinara sa Kabikolan ni Padre Miguel Robles de Covarrubias kan 1710. Sa mga nakaaging taon labi sa tres miliones katawo an nagpi-pilgrimage sa Naga City para magsungkô ki Ina sa mga aldaw na ini. Siring kan nakaaging taon, nin huli sa pandemia, cancelado giraray an mga actividades sa fiesta, alagad an devocion ki Ina nagpapadagos sa mga parokya, sa mga harong, asin sa gabos na ronâ sa kinàban kun saen yaon an saiyang mga devotos.

Sa tahaw kan gabós na iní, marhay na maghapót: Ano man nanggad an totoong devocion sa mahal na Ina? Ta may mga nagsasabi na ini daang devocion nin mga Catolico suway sa biblía, o sarong pagsamba ki Maria, o singkogan sa tunay na pagtubod.

May duwáng dokumento nin katukdoán kan Simbahan an pwede tang pagkuahan nin simbag: an "Marialis Cultus" na sinurat ni Papa San Paolo VI kan 1974 asin “Ang Mahal na Birhen" na sinurat kan CBCP kan 1975. Makua kita nin tolóng simbag hale sa mga iní.

1. An tunay na devocion ki Maria maimbod sa Biblía. Siya an virgen na mangangakì kan Mesías susog sa mga profesía sa Lumang Tipan. Sa Lucas 1,28, sabi ki Maria ni arcangel Gabriel: “paladan na babae. An Kagurangnan yaon saimo!” Sabi man ni Maria sa saiyang awit sa Lucas 1,48: “poon ngonian aapodon akong paladan kan gabos na kapag-arakian”. Kaya kaitó pa man sagkod ngonian an Simbahan maogmáng nag-ootob kan profesíang iní ni Maria.

Asin an enot niyang mga devotos iyo si San Jose, saiyang agom, asin si Jesu Cristo, saiyang aki. Sabi ni San Maximilian Kolbe: “Dai nanggad matakot na masobrahan nin pagkamoot ki Maria. Ta dai nindo kayang kamòtan siya labí pa sa pagkamoot ni Jesus.”

2. An tunay na devocion ki Maria dinadara kitá pasiring ki Cristo. Inoomaw si Maria nin huli ta siya an Ina kan Dios, o Theotokos, susog sa katukdoán kan Consejo kan Efeso kaitóng 431 AD. Siya an pinilì kan Ama na magin Ina kan Saiyang Akì. Namidbidan kan kinâban si Cristo sa paagi kan pagsunod ni Maria sa kabôtan kan Ama.

Kayâ si San Louis-Marie de Montfort nakapagsabi: “ad Jesum per Mariam”, pasiring ki Jesus sa paagi ni Maria. An pagdevocion ki Maria na daí nakakaparaní ki Jesus, ginigibo siyang idolo o dios-diosan. Kaya an satóng pagdevocion dapat dinadará kitá sa pagsimba asin sa Eucaristía, ta kun dai, kulang an satuyang pagtubod.

3. An tunay na devocion ki Maria binabàgo an satóng buhay. Sabi ni Jesus sa Mateo 7,16: “Mamimidbid nindo sindá sa mga gibo ninda”. Pinapatalubò daw kitá kan satóng pagdevocion ki Maria sa kabanalan asin sa pagigin mas masinunod-sunod sa Dios, mas maboot, mas mamomòtón, asin mas matinabang sa kapwa?

Si Maria bako saná Ina ni Jesus kundî siya man an pangenot na disipulo kan saiyang Akì. Bilang Ina kan Simbahan, siya an modelo niatò nin pagigin disipulo. An pagigin disipulo iyo an pagsunod sa kabòtan kan Ama asin pakipag-amigo ki Jesus. Lugód makaarog kitá ki Maria sa saiyang pagigin maimbód sa Amâ asin pagkamoot ki Jesu Cristo. 

Viva la Virgen!

...

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kan saimong gawè nin devocion sa mahal na Ina ngonian na panahon nin pandemia.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Siisay Ako sa Paghona Nindo?

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Setyembre 12-18, 2021. Basahon an Evangelio gikan sa Marcos 8,27-35 (Ika-24 na Domingo sa Ordinariong Panahon - B).

…

An istorya sa evangelio may tolong kabtang. Enot, an paghapot ni Jesus kun siisay Siya sa paghona kan mga tawo asin kan Saiyang mga disipulos. Tuminama si San Pedro sa pagsimbag na Siya an Mesias. Ikaduwa, an pagpaliwanag Niya kun ano an kahulugan kan Saiyang pagigin Mesias. Nasala naman si San Pedro sa paghona na dai Siya dapat mag-agi nin pagsakit asin pagkagadan, kaya sinagwe Siya ni Jesus. Ikatolo, an pagtao Niya kan mga kaipuhan na gibohon kan mga boot magin disipulo Niya. Ano an mensahe kaini sato?

An Dios nagpapamidbid sato. Kun kita sana, dai ta mamimidbidan nin tama kun siisay an Dios. Hilnga an manlaen-laen na kultura sa kinaban na kun siisay-sisay asin kun anu-ano an pigsasaramba na mga dios-diosan. Nagpamidbid Siya ki Abraham, Isaac, asin Jacob, ki Moises asin sa mga profetas sa Lumang Tipan. Kaya an banwaan Israel namibidbid an Dios na kaglalang, kagtao nin mga karahayan, asin parasurog laban sa mga kaiwal. Siya man nanuga na mapadara nin paraligtas, sarong Mesias, para sa Saiyang banwaan.

Sa evangelio nagpapamidbid si Jesus bilang Mesias, alagad bako susog sa imahe na pighohona kan Saiyang mga kahimanwa, kundi bilang surugoon na papasakitan nin makuri, isisikwal, gagadanon, asin mabubuhay-liwat.

Bilang Mesias pinamidbid Niya an sadiri bilang Aki nin Dios – boot sabihon na Siya Dios man. Ini an rason kun nata sa Mateo 26,65, ginisi kan halangkaw na padi na si Caifas an saiyang bado asin hinatolan si Jesus nin paglalanghad (blasphemy), nin huli ta inako ni Jesus na Siya an Aki nin Dios. Sa Juan 10,30 si Jesus mismo nagsabi: “Ako asin an Ama saro.”

Nata ta an Dios nagboot na magpamidbid sato? Nin huli ta an saiyang plano, susog sa 1 Timoteo 2,4, “na an gabos makaligtas asin makamidbid kan katotoohan”. Asin si Jesus mismo nagsabi sa Juan 14,6: “Ako an dalan, an katotoohan, asin an buhay; dai nin makakaduman sa Ama, kun bakong huli Sako.”

Si Jesu Cristo an satong kaligtasan. Pano kita ikakaligtas kan satong pagkamidbid ki Cristo? An simbag sinabi Niya sa Marcos 8,34: “An boot na sumunod sako, magsayuma sa sadiri, pasanon an saiyang cruz, asin sumunod Sako.”

Sumunod kita ki Cristo. Boot sabihon, pilion ta si Cristo solamente asin orog sa gabos. Tapos na an panahon nin mga suanoy na dios-diosan, alagad may mga bagong dios-diosan man na nagsaralida sainda: kayamanan, kapangyarihan, kasikatan, kaogmahan sa laman, asin iba pa. Ining mga kinabanon na karahayan puede man na makatabang sa pagigin niatong marhay na tawo, alagad kun sinda an papaorogon ta sa gabos, sinda nagigin kaulangan sa pagrani ta sa Dios.

Magsayuma kita sa sadiri. Mas makusog ki sa tentacion hale sa luwas iyo an paorogon an sadiring kabotan. Ini an sinasabi ni Cristo sa Marcos 7,21, na “hale sa laog, hale sa puso nin tawo minagikan an mga maraot na isip, karumpotan, paggadan sa kapwa, pagsambay, kapasloan, kasombikalan, pagdaya, karigsokan, pagkauri, pagpakaraot, kapaabaw-abawan, karungawan” – an mga ini an kaipuhan niatong sayumahan tanganing bolanos na magsunod ki Cristo.

Pasanon ta an cruz. An sacrificio ni Jesu Cristo sa cruz iyo sana an magliligtas sato, kaya sa pagtao Niya sato kan kaligtasan hinihiras man Niya an dalan kan cruz.  An satong cruz iyo ini: an paggibo kan kun ano an tama, marhay, asin mamomoton sa ngaran ni Cristo, gurano man kadificil. Sabi sa Santiago 1,14,  “Anong pakinabang kun an sarong tawo nagsasabi na igwa siya nin pagtubod alagad mayo nin ipinapahiling na mga gibo?

…

GIYA SA PAGHIRAS SA SADIT NA KOMUNIDAD • Siisay si Jesu Cristo para saimo? Maghiras kan saimong mga paghingowa na akoon Siya bilang saimong Kagurangnan asin Paraligtas. 

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Magdangog sa Agrangay nin Kinaban asin Dukha

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Setyembre 5-11, 2021. Basahon an Evangelio gikan sa Marcos 7,31-37 (Ika-23 na Domingo sa Ordinariong Panahon - B ).

…

Sa evangelio pig-istorya an milagrosong pagbulong ni Jesu Cristo kan sarong lalaking bungóg asin púla. Ano an mensahe sato kan istoryang ini, lalo na sa paglaog niato sa Panahon nin Paglalang (Season of Creation) na satong sine-celebrar bilang Simbahan poon Setyembre 1 hanggang Oktubre 4, fiesta ni San Francisco de Asis?

1. Magtubod kita ki Cristo. An milagro tanda kan kapangyarihan ni Cristo bako sana na magbulong nin mga helang kundi magtao nin bagong buhay. Ini tanda kan Saiyang pagka-Dios. An istorya kan milagrong ini nakalakop sa dakul na banwaan, sabi ninda: “An gabos ginibo Niyang marhay, an mga bungog nakakadangog asin an mga pula nakakataram.”

Sa Isaias 35,5-6, pigpropesiya na sa pagdatong nin Dios “an mga butá makakahiling, an mga bungóg makakadangog, an mga pilay makakalukso, asin an mga púla makakaawit sa kaogmahan”.

2. Magdangog kita sa Saiyang Espiritu. An pagbukas nin talinga nagdadara nin husay na pagdangog sa tawong binulóng. Kitang mga may pandangog inaapod bako na mag-ako sana nin anuman na tanog o ribok sa kapalibotan, kundi na hanapon an mga tataramon na makahulugan, an tingog kan Espiritu ni Cristo. Sabi ni San Pablo sa Roma 10,17: “An pagtubod bunga kan pagdangog sa mensahe, an mensahe nadadangog nin huli sa tataramon ni Cristo.” Ini makukua niato pag tinatàwan ta nin panahon an pagpamibi asin pag-adal sa mga Kasuratan asin katukdoan kan Simbahan.

Segun ki Papa Francisco, sa saiyang Surat Encyclical na Laudato Si’, sa panahon ngonian madadangog ta man an Espiritu sa “agrangay nin kinaban asin agrangay nin mga dukha”. An Espiritu nangangapodan na maghidali kita sa pag-ataman sa kinaban na estaran niato gabos, asin magmangno sa kapwang nangangaipo lalo na idtong nagtitios nin huli sa mga calamidad na dara nin nagbabagong clima asin pag-init nin kinaban.

3. Magbalangibog kan Marhay na Bareta. An dila na may kakayahan magtaram, may katongdan na dai magsilensyo sa hampang nin injusticia asin karâtan, kundi na magbalangibog kan Marhay na Bareta. Sa Talinhaga 31,8-9, pinapagirumdom kita na “Magpahayag para sa mga tawong dai nakakapahayag kan saindang sadiri. Ipakilaban an derechos kan gabos na dai kayang makilaban. Magpahayag para sainda asin maghukom nin matanos. Ipakilaban an derechos kan dukha asin kan mayong sukat.”

May kasabihan na pigsasabing hale ki San Francisco de Asis: “Magbalangibog kan Marhay na Bareta sa gabos na panahon, minsan maggamit nin mga tataramon.” Boot sabihon, sa kadaklan na beses an pagsaksi sa gibo asin buhay an pinakamarhay na paagi nin evangelizacion.

Sabi sa Santiago 2,1, “kun kita may pagtubod ki Jesu Cristo, akoon ta an gabos na tawo nin daing pinapalaen.” Gabos na tawo mahalaga, gabos na buhay sa kinaban marhay sa mata nin Dios na Kaglalang. An kabaliktadan kaini iyo an pig-aapod ni Papa Francisco sa Laudato Si’ na “kultura nin basura” (throwaway culture) na daing pagpahalaga sa karahayan nin kagabsan asin kalinigan nin kapalibotan; na kun pighohonà an sarong bagay (minsan pati tawo) dai na nin pakinabang, basta na sana tinatapok siring sa basura na nakakaatî sa kinaban.

Danay kitang magdolok ki Jesu Cristo satong Kagurangnan, na nagtaong pandangog sa bungóg asin boses sa púla, tanganing kita man danay na makadangog kan Saiyang tingog asin an satong buhay magin saksi sa Saiyang Marhay na Bareta.

…

GIYA SA PAGHIRAS SA SADIT NA KOMUNIDAD • Kun nadadangog mo an “agrangay kan kinaban asin agrangay nin mga dukha” ngonian, ano an sinasabi ninda saimo?  Ano an puede mong maginibo?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

 

Utobon an Tugon Tanganing Mabuhay

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Agosto 29 - Setyembre 4, 2021. Basahon an Evangelio gikan sa Marcos 7,1-8,14-15,21-23 (Ika-22 na Domingo sa Ordinariong Panahon - B)

…

Sa pagpaliwanag kan istorya sa evangelio, enoton ta an mga bako kaini mensahe.

Enot, dai digdi si Jesus nagtatao nin opinion medical. Marhay ining linawon lalo na sa panahon nin pandemia dulot kan COVID-19. Kan piglihis Niya an hapot kun nata dai naghahanaw nin kamot an Saiyang mga disipulos bago magkakan, asin kan sinabi Niya na “an hale sa luwas na minalaog sa tawo dai nakakaati saiya, kundi an hale sa laog iyo an nakakaati” – bako ini katukdoan manunungod sa salud nin hawak nin tawo, kundi sa salud nin kalag nin tawo.

An Saiyang punto iyo na kadakul na ley o tugon an dinagdag kan mga Fariseos asin escribas para utobon nin mga tawo – kaiba na an kun ano an mga nakakaati sa tawo – alagad binayaan ninda an tunay na tugon nin Dios. Kaya pinarumdom Niya sainda an mga tataramon ni profeta Isaias: “Minaomaw Sako an banwaan na ini sa nguso, alagad harayo an saindang puso”.

Ikaduwa, dai sinabi ni Jesus na daing saysay an mga tradicion nin religion kun dai nasusurat sa biblia, nin huli daa ta ini mga “gibo sana nin tawo”. Ginagamit ining argumento kan mga nagtutubod sa doctrina kan “Sola Scriptura” o pagtubod na kun ano sana an nasusurat sa biblia, iyo sana an tunay na pagtubod.

An katukdoan kan Simbahan na tinogdas ni Cristo iyo na an Diosnon na Kapahayagan (Divine Revelation) makukua sa Banal na Kasuratan asin Banal na Tradicion. An Banal na Kasuratan iyo an mga tataramon nin Dios na nasusurat sa mga libro sa biblia. An Banal na Tradicion iyo an mga oficial na katukdoan kan Simbahan na dai nasusurat sa biblia na bunga nin pagtalubo sa pagtubod sa kapangyarihan kan Espiritu Santo. Halimbawa sa mga ini an Credo Apostolico, an mga sacramento, an autoridad kan mga obispo asin Santo Papa, patin na ngani an pagtipon kan mga libro sa Bagong Tipan na ginibo sa autoridad kan suanoy na Simbahan.

An mga ini bako mga basang na imbensyon sana kan Simbahan huli ta si Jesu Cristo mismo an nagsabi sa Juan 16,12-13: “Dakul pa an sasabihon Ko saindo, alagad dai pa nindo masasabotan sa ngonian. Pag-abot kan Espiritu nin katotoohan, tatabangan Niya kamo nganing masabotan nindo an gabos na katotoohan.”

Ano pa an mensahe na boot ipaabot sato kan evangelio?

Magbalik kita sa kapinonan: an pagkamoot sa Dios asin pag-utob sa Saiyang tugon ta ini an makakatao sato nin buhay asin kaligtasan. Sabi ni Moises sa banwaan nin Israel sa Deuteronomio 4,1: “Hinanyoga an mga tugon asin pagboot na itinutukdo saimo. Utobon mo iyan tanganing mabuhay ka.”  Asin sa Santiago 1,21-22 nasusurat: “Mapakumbabang akoa an tataramon na tinanom sa saindo, tataramon na makakaligtas saindo. An tataramon gibohon, bako sanang dangogon.”

Akoon ta sa Cristo sa satong buhay. Siya an kapanoan kan mga kasuratan, kan Tugon asin mga Profeta. Siya sana an makakaligtas sato. Sa Juan 14,6, sinabi Niya: Ako an  dalan, an katotoohan, asin an buhay”.

Alagad sa pagsamba ki Cristo, maglikay na dai makaarog sa mga Fariseos asin escribas na nagsasamba sa nguso alagad harayo sa puso. Sa danay niatong pamibi asin pag-adal kan Saiyang tataramon, tutubodon ta an Saiyang pagpamidbid kan sadiri asin uutubon an Saiyang kabotan, bako an satong sadiring kabotan. Dai man lugod mangyari na sinasambit ta man kuta an Saiyang ngaran alagad ibang dios na palan an satong sinasamba

…

GIYA SA PAGHIRAS SA SADIT NA KOMUNIDAD • Maghiras nin linya sa biblia o katukdoan kan Simbahan na dai mo pa sabot nin marhay. Maghapot sa saindong padi o sarabay na iresearch sa katekismo an paliwanag kaini.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Sa Kiisay Pa Kami Maduman?

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Agosto 22-28, 2021. Basahon an Evangelio gikan sa Juan 6,60-69 (Ika-21 Domingo sa Ordinariong Panahon - B).

…

An istorya sa evangelio iyo an katapusan kan kabtang sa Juan 6 na pig-aapod na Katukdoan sa Tinapay nin Buhay (Bread of Life Discourse). Nagpoon ini sa istorya kan milagro nin pagpakaon nin limang ribong kalalakihan hale sa limang tinapay asin duwang sirâ, asin nagpadagos sa pagpamidbid ni Jesus kan sadiri bilang Tinapay nin Buhay. Sa huri nasakitan an kadakul Niyang disipulos asin binarayaan Siya nin huli ta dai ninda nasabotan asin naako an Saiyang katukdoan.

Ano ining katukdoan na masakit para sainda? Sabi ni Jesus sa Juan 6,53: “Kun dai kamo magkakan kan hawak kan Aki kan Tawo asin mag-inom kan dugo Niya, dai kamo magkakaigwa nin buhay”. Alagad para sa satong mga Cristiano, lalo na mga Catolico, ini manunungod sa Eucaristía, kun saen nagdadangog kita sa Saiyang Tataramon asin inaako ta an Saiyang hawak asin dugo.

Kaya naghapot si Jesus sa Doce Apostoles kun pati sinda babayaan man Siya. Marhay ngani ta yaon si Simon Pedro na nagsabi kan saro sa pinakamagayon na pagpahayag nin pagtubod sa mga evangelio. Sabi niya sa Juan 6, 68: “Sa kiisay pa kami maduman, Kagurangnan, yaon sa Saimo an mga tataramon nin buhay na daing kasagkoran”. Ano an boot sabihon kaining pahayag ni San Pedro?

Enot, ki Cristo sana makukua an kaligtasan. Siya an satong kaligtasan. Siya an Tinapay nin Buhay na makakabasog kan satong mga kagutuman sa hawak asin espiritu, asin makakatao sato nin kapanoan nin buhay na dai matatao nin mga kinàbanon na bagay.

Nasa Saiya an mga tataramon nin buhay na daing kasagkoran. An Saiyang tataramon makapangyarihan – naglalang kan kinaban, nagpatoninong sa duros, nagpatawad nin mga kasàlan, nagbulóng nin mga helang, nagpahalè sa mga marumpot na espiritu, nagbuhay nin gadan. An Saiyang panugâ naootob. An Saiyang katukdoan, giya pasiring sa Kahadean.

Ikaduwa, an Saiyang pagpamidbid naghahagad nin simbag halè sato. Siring sa Doce Apostoles na dai nagbayà ki Jesus (liban ki Judas na nagpasaluib Saiya), siguro masabi man kita na pinipili ta man Siya. Alagad an hinahagad Niyang pag-ako Saiya todok sa boot, sa bilog na puso, kalag, asin kusog. Ano an mga tanda na bolanos man nanggad na pinipili ta Siya?

Tinatalikdan ta an kasàlan. Nin huli ta dai kita maliligtas sa pagsabi sanáng inaako ta Siya bilang Kagurangnan asin Paraligtas pero dating gawè man giraray kita. Sa Saiyang pagtukdo an sabi Niya sa Marcos 1,15: “Magbaklê kamo asin magtubod sa Marhay na Bareta”.

Nagdadanay kitang maimbod Saiya.  Nin huli ta an pagsunod Saiya asin pagsikwal sa kasàlan bako sararoan sanang gawè, bako one-time big-time, kundi kaipuhan isabuhay aroaldaw. Sabi ni Jesus sa Lucas 9,23: “An siisay man na boot magin disipulo Ko, dapat talikdan an sadiri, asin pàsanon an sadiring cruz aroaldaw”. Aroaldaw.

Nagsasaksi kita Saiya. Nin huli ta inapod kita bako na gibohon na pribadong bagay an espiritualidad kundi na ihirás an liwanag kan evangelio sa satong tataramon asin gibo. Sa Josue 24,15, sinabi ini ni Josue, na pamayo kaidto sa Israel: “Para sako asin sa sakong harong, kami maglilingkod sa Kagurangnan.” Sa mga tataramon na ini, nahirô an puso nin bilog na Israel asin nadará sinda sa pagpahayag man nin pagtubod sa Kagurangnan asin kamàwotan na maglingkod Saiya. Ini an pagtubod na nakakadará sa kapwa parani sa Dios

…

GIYA SA PAGHIRAS SA SADIT NA KOMUNIDAD • Maghiras nin experiencia na nagkaigwa kita nin pagkakataon na pigpapapili kita na magsunod ki Cristo o maggibo nin ibang bagay. Ano an satong pinili?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

An Pagsakát sa Langit ki Virgen Maria

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Agosto 15-21, 2021. Basahon an Evangelio gikan sa Lucas 1,39-56 (Solemnidad kan Asuncion ni Virgen Maria).

…

Sa evangelio pig-istorya an pagbisita ni Virgen Maria sa saiyang pinsan na si Isabel matapos na sabihon saiya kan angel na si Gabriel na ini, sa saiyang pagkagurang, badós na nin anom na bulan. Sa pagsabát saiya ni Isabel, sinabihan siya: “Paladan ka sa gabos na babae asin paladan an akì na dinadara mo sa saimong tulák!”

Saro sa pinakahalangkaw na kapaladan ni Maria iyo na pagkatapos kan buhay niya digdi sa dagâ, sinakát siya, hawak asin kalag, sa langitnon na kamurawayan. Ini an misteryo kan saiyang Asuncion.

Kan 1950, dineklara ini bilang dogma nin satong pagtubod ni Papa Pio XII sa Constitucion Apostolico Munificentissimus Deus. An dogma boot sabihon katotoohan na pinahayag nin Dios, asin oficiál na pinapaliwanag asin pigdeklara kan nagtutukdong Simbahan na dapat niatong tubodán.

Linawon ta na dai nagpoon kan 1950 saná an pagtukdô kaini kan Simbahan. Sa katunayan an Asuncion an pinaka-suanoy sa mga fiesta ki Virgen Maria. Pigta’wan lamang nin magkakanigong pagmidbid ni Papa Pio XII an halóy nang pigtutubodan nin ginatós na kapag-arakian nin mga Cristiano. Sa Lucas 1,48, si Maria nag-awit: “Poon ngonian aapodon akong paladan kan gabos na kapag-arakian!”

Pa’no ta pa maipapaliwanag an Asuncion?

1. Gabos na fiesta ni Maria katakod kan pagtubos ni Cristo. Nin huli ta inakò ni Maria an pagigin Ina kan Dios na nanitawo, siya an Inmaculada Concepcion o ipinangidam na daing digtâ nin kasàlan; siya man an Inang Virgen susog sa mga profesía sa Kasuratan; siya an winalat ni Cristo na magin Ina kan Saiyang mga disipulos asin kan Simbahan.

Siring man siya isinakát sa langit. Alagad iba an Asuncion ni Virgen Maria sa Asencion ni Jesu Cristo. Si Maria sinakát sa langit bako sa sadiri niyang kakayahan kundi nin huli sa kapangyarihan nin Dios. Si Jesu Cristo, Aki kan Dios, Ikaduwang Persona kan Santissima Trinidad, suminakat sa langit sa Saiyang sadiring diosnon na kapangyarihan.

2. An Asuncion ni Maria tandâ kan satong maabot na kamurawayan. Sabi sa Juan 6,40: “Ini an kabòtan kan Ama, na an nakakahiling sa Aki asin nagtutubod Saiya magkakaigwa nin buhay na daing kasagkoran asin bubuhayon Ko siya sa huring aldaw.” Si Maria an enot na nata’wan huli ki Cristo kan balaog nin buhay na daing kasagkoran, pagkabuhay-liwat sa mga gadan, asin kamurawayan sa Kahadean.

An Asuncion ni Maria iyo an tandâ kan panugáng estaran asin estado para sa gabos na nagtutubod ki Jesu Cristo. Nin huli kaini, kita may pagtubod asin paglaom na bako kagadanan an satong katapusan, bako lulobngan an satong huring padumanan, kundi buhay na daing kasagkoran sa Saiyang Kahadean.

3. Si Maria an satong ladawan nin pagigin disipulo ni Cristo. Tinutukdô sato kan misteryo kan Asuncion na arogon ta si Maria sa maimbod na pagsunod sa kabòtan kan Ama, sa pagkamoot ki Cristo, sa pagtalikod sa kasàlan, asin sa paglakbay kaiba an Simbahan sa dalan nin cruz.

An Asuncion an tandâ kan satong destinasyon, nasa sato na an paglakaw sa dalan paduman.

…

GIYA SA PAGHIRAS SA SADIT NA KOMUNIDAD • Sa panahon nin pandemia, lalo na sa experiencia nin helang asin pagkagadan nin mga kamidbid o mahal sa buhay, ano an sinasabi saimo kan Asuncion ni Virgen Maria?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Tinapay nin Buhay sa Banal na Misa

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Agosto 8-14, 2021. Basahon an Evangelio gikan sa Juan 6,41-51 (Ika-19 Domingo sa Ordinariong Panahon - B).

…

An evangelio pagpadagos sa pagpamidbid ni Jesu Cristo kan Saiyang sadiri bilang tinapay nin buhay. Sa Juan 6,51, sinabi Niya: “Ako an tinapay nin buhay hale sa langit. An minakakan kan tinapay na ini mabubuhay sagkod pa man. An tinapay na itatao ko iyo an sakuyang laman, tanganing mabuhay an kinaban.” An maimbod na Catolicong nagbabasa o nakakadangog kaini, tulos asin malinaw na nasasabotan na ini nangyayari na sa lambang Banal na Misa.

Sinabi pa ni Jesus sa Juan 6,47: “Totoong sinasabi Ko saindo, an nagtutubod igwa nin buhay na daing kasagkoran”.   An Banal na Misa iyo an sacramentong nagpapakusog kan satong pagtubod para sa buhay na daing kasagkoran. Kaya nganì an satong Simbahan inaapod an Eucaristía na “burabod asin alituktok kan satong buhay Cristiano”. Sa pa’nong paagi?

1. Sa pagtiripon sa pagsamba. Sa pagtiripon pa saná kan banwaan nin Dios sa Eucaristía asin sarabay na pagsamba, napapabanal na kita. Sa Mateo 18,20 si Jesus nagsabi: “Kun may duwa o tolo katawo na nagtitiripon sa ngaran Ko, yaon Ako sa kaibahan ninda”. Kun odók sa boot an pagsimba, nakakatabang an presencia nin lambang saro sa pagpakusog nin pagtubod nin lambang saro asin nagtatalubò an komunidad nin mga paratubod.

2. Sa paghimate sa Tataramon. Susog sa Psalmo 119,105: “An Saimong tataramon, ilaw para sa sakong mga bitis, asin liwanag para sa sakong agihan”. Sa Liturgía kan Tataramon sa Santa Misa, an pagtubod minadatong sa paghinanyog  asin paghorop-horop hale sa mga libro nin Tugon asin mga Profetas sa Lumang Tipan (Enot na Babasahon), sa mga Psalmo (Responsorio), sa mga Surat ni San Pablo asin iba pang Apostoles sa Bagong Tipan (Ikaduwang Pagbasa), asin sa Evangelio, kaiba na an homilía.

3. Sa pagrumdom kan Sacrificio ni Cristo. Sa Lucas 22,19 si Cristo nagtugon sa Saiyang mga disipulos: “Giboha nindo ini sa pagrumdom sa Sako.” Sa lambang Misa pigrurumdom niato an saro asin solamenteng sacrificio na nagligtas sato sa kasâlan asin kagadanan. Kaya sa lambang Misa yaon man an cruz asin an imahe kan nakapako na Cristo tanganing darhon an satong isip asin puso, memorya asin kunsensya, sa pagkamoot asin pagtubod ki Cristo na nagbuwis nin buhay para sato.

4. Sa pag-akò Saiya sa comunión. An milagro kan lambang Santa Misa iyo na an Dios nagrarani sato asin tinatao an Saiyang sadiri bilang satong kakanon. Sa comunión si Cristo nagigin parte kan satong hawak minsan ngani kita parte kan Hawak ni Cristo. Si San Pablo nagtukdô sa 1 Corinto 10,16: “An tinapay na satong binabaak, bakong pakisumaro iyan sa hawak ni Cristo kun minakakan kita kaiyan?”

5. Sa paghale dará an Marhay na Bareta. Sa pagtapos kan Santa Misa dai puede kitang maghalè na daing dará – an experiencia kan banwaan na nagsasamba, an giya kan Tataramon, asin an hawak mismo ni Cristo na inako sa comunión. An mga ini tinao sato bako para sadirihon saná kundi tanganing ihiras sa kapwa sa pagsunod kan misyon na tinao ni Cristo sa gabos Niyang mga disipulos sa gabos na panahon, susog sa sinabi Niya sa Marcos 16,15: “Paduman kamo sa bilong na kinaban; ihulit nindo an Marhay na Bareta sa gabos na tawo.”

…

GIYA SA PAGHIRAS SA SADIT NA KOMUNIDAD • Bako sa gabos na panahon parareho an experiencia niato sa Misa, minsan namamatean ta an presencia nin kabanalan, minsan garo mará an satong espiritu. Maghiras kan saimong experiencia sa pagsimba sa ngonian sa laog man kan simbahan o sa media o online.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Tunay na Tinapay na halè sa Langit

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Agosto 1-7, 2021. Basahon an Evangelio gikan sa Juan 6,24-35 (Ika-18 Domingo sa Ordinariong Panahon – B ).

…

An istorya sa evangelio kasugpon kan istorya kan milagro nin pagpakakan sa limang ribo halè sa limang tinapay asin duwang sirâ sa Juan 6,1-15. Si Jesu Cristo, na nagpakakan sa limang ribo, nagpamidbid bilang “tinapay nin buhay”. An Dios dai sana nagtatao nin satong kakanon sa aroaldaw kundi buhay na daing kasagkoran.

Patin an istorya sa Exodo 16 na pagpadara nin Dios nin manna o tinapay na hale sa langit tanganing kakanon nin mga Israelita sa 40 taon ninda sa disyerto, pigtukdò ni Cristo na pasabóng sa pagdatong kan “tunay na tinapay na hale sa langit”, daing iba kundi Siya man saná mismo.

Mas paladan kita ngonian kisa sa mga Israelita kaidtong panahon. Nin huli ta tinatao sato nin Dios bilang kakanon an Saiyang Hawak sa Banal na Misa. Ano an maninigong simbag niato sa orog kadakulang biyayang ini?

“Dai kamo magpagal para sa kakanon na nalalapà, kundi para sa kakanon na nagdadanay sagkod sa buhay na daing katapusan, na itatao saindo kan Aki nin Tawo” (Juan 6,27).

An pagpamidbid ni Jesus naghahagad sato nin pagpipili: an mga kaogmahan asin biyaya sa buhay na ini o Siya mismo na kagtao nin biyaya asin buhay.

Si San Ignacio de Loyola nagtukdô: “An gabos na bagay sa kinàban, biyaya nin Dios tanganing matabangan kita na mamidbidan asin mamo’tan ta Siya. Alagad arin man sa mga kinàbanon na biyayang ini an magin centro na kan satong buhay, magigin uláng na iyan sa pagtalubò niato sa pagkamoot asin sinasalidahan pa nganì kaiyan an Dios sa satong buhay.”

Si San Pablo naghulit sa Efeso 4,22-24: “Talikdan an dating buhay: haleon an daan na tawo na naraot sa pagsunod kan madayang kamàwotan; bàgohon an espiritu nin saindong isip asin igubing nindo an Bagong Tawo na linalang susog sa Dios, linalang sa katanosan asin kabanalan nin katotoohan”.

 “An ipinapagibo saindo nin Dios iyo ini: magtubod kamo sa sinugò Niya” (Juan 6,29).

An pagtubod ki Cristo mapoon sa tamang pagkamidbid sa Saiya. Boot sabihon susog sa pagpamidbid Niya kan Saiyang sadiri asin kabòtan sa Biblia asin sa mga katukdoan kan Simbahan; bako susog sa satong sadiring kaisipan asin kabòtan saná. Dai man lugod mangyari na sinasambit ta man kutâ an Saiyang Ngaran alagad ibang dios na palán an satong sinasamba, dios susog sa satong sadiring kaisipan asin kagustohan.

Naipapahiling man ini sa pagpasalamat sa mga biyayang tinatao Niya. An pusong tatao magpasalamat, pusong tatao magmidbid sa kagtao nin biyaya. Kaya ngani inaapod ta man an Banal na Misa na Eukaristiya, hale sa Griegong tataramon na eucharistein, na an boot sabihon “magpasalamat”. Sa cada niato pagsimba nagtitiripon kita sa pagpasalamat sa Kagurangnan.

An pagtubod ki Cristo orog na napapahiling sa pagigin niatong maimbod (faithful) sa Saiya. Nin huli ta an kaimbodan daing iba kundi pagtubod na nagdadanay. Sabi ni Cristo sa Juan 15,4: “Magdanay kamo Sako, siring na Ako nagdadanay saindo.” Pag inaako ta Siya sa comunión, Siya nagigin yaon sa Sato. Pag isinasabuhay ta an satong comunión, nagtatalubò kita na magin siring sa Saiya. Ini an padumanan kan satong pagtubod asin pagsamba: na kita magin siring sa satong tinutubod asin sinasamba, Siya na naglalang sato na kabaing Niya.

…

GIYA SA PAGHIRAS SA SADIT NA KOMUNIDAD • Maghiras nin experiencia kun pa’no isinasabuhay an satong comunión sa Hawak ni Cristo, an tinapay nin buhay.  

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Limang Tinapay asin Duwang Sirâ

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hulyo 25-31, 2021. Basahon an Evangelio gikan sa Juan 6,1-15 (Ika-17 na Domingo sa Ordinariong Panahon – B).

...

Sa evangelio pinakakan ni Jesu Cristo an limang ribo halè sa limang tinapay asin duwang sirâ. An mga milagro sa Evangelio ni San Juan inaapod na mga tandâ.

Tandâ kan Pagka-Dios ni Cristo. An milagrong ini nagpapahayag kan Saiyang diosnon na kapangyarihan asin autoridad. Sa Evangelio ni San Juan ining istorya kapinònan kan kabtang na nagtatapos sa pagpamidbid ni Jesus bilang Tinapay nin Buhay. Bako sanáng pagkaon na nakakabasog nin tulák an Saiyang dará, kundi Siya mismo an kakanon nin buhay na daing kasagkoran.

Igwang interpretasyon kan istoryang ini na nagsasabi na tibaad daa kan nahiling kan iba an pagtao kan aki kan saiyang daráng balon, nakunsensya sinda asin linuwas man kan iba pang may balon an saindang dará, asin naghirirás-hirasan sinda kaya nakakaon an gabos.

Maski magayon pag dangogon, bako ini tamang interpretasyon nin huli ta hinahalè an milagrosong aspeto kan istorya asin an diosnon na gibo ni Cristo. May mga istorya sa buhay ni Jesus na nasusurat sa saro o duwang Evangelio saná asin dai sa iba. Alagad an istoryang ini yaon sa apat na Evangelio (Mateo, Marcos, Lucas, asin Juan), asin gabos sinda nagsasaksi na ini gibong milagro mismo ni Cristo, alagad daing nasusurat sa tibaad na “milagro nin paghirirasan” nin mga tawo.

Tandâ kan Imbitasyon ni Cristo. Sa evangelio pigpaliwanag na an hapot ni Jesus ki Felipe kun saen makakabakal nin ipapakakan sa mga tawo sarong pagtukso (karáw) nin huli ta aram ni Jesus an Saiyang gigibohon. Kun iisipon, dai kaipuhan ni Cristo nin anuman hale sa tawo para maggibo nin milagro alagad pigtuyo Niya na magin parte sinda kan Saiyang gibo. Kaya si Felipe napaisip kun ano an gigibohon, si Andres nagdará nin sarong aki na may balon, asin an mga disipulos pinatabang Niya sa pagpatukaw sa mga tawo, sa pagdistribuir nin mga kakanon, asin sa pagtipon kan mga natadà – doceng basket nin tadáng pagkaon!

Hanggang sa ngonian padagos kitang iniimbitaran ni Cristo na makisumarò sa Saiyang misyon nin paghirás kan Saiyang Marhay na Bareta asin pagmuknâ kan Saiyang Kahadean. Pag an satong mga plano asin gibo inaayon niato sa kabòtan nin mahal na Dios, nagkakaigwa nin bàgong kahulugan an satong mga gibo. Si Cristo nagtukdô sa Mateo 10,39: “An nagpapahalaga sa saiyang buhay, mawawàran kaiyan; an nawawàran nin buhay huli Sako, magkakamit kaiyan”. Si Cristo an nagtataong kahulugan sa satong buhay.

Tandâ kan Satong Ambag. An limang tinapay asin duwang sirâ na voluntad na tinao nin sarong aki tandà kan satong pakisumaro sa dakulang plano nin Dios. Ano man an satong ambag sa Dios? Ano man an satong limang tinapay asin duwang sirâ? Sa pagsimbag kaining hapot, marhay girumdomon an sinabi ni Cristo sa Mateo 9,13: “Pagkaherak an màwot Ko, bakong atang”.

An satong mga pangadie asin debosyon, kun tunay na pagsamba sa Dios asin bakong pakitang-tao saná, maninigong dolot sa Kagurangnan. An satong mga pagtabang sa kapwa – an pakidumamay sa panahon nin problema asin pagraní sa mga nangangaipo, siring kan satong programang TADA (Tanganing An Dukha Atamanon) asin mga community pantries – ini an satong ambag sa pagmuknà kan Saiyang Kahadean.

Ano man kun sadít o dikít saná an kaya niatong iambag? An milagro kan limang tinapay asin duwang sirâ, pagirumdom sato na an Dios an mahipnò, an makumpleto, asin mapabunga kan satong mga marhay na gibo asin paghingowa.

…

GIYA SA PAGHIRAS SA SADIT NA KOMUNIDAD • Ano man an satong ambag na limang tinapay asin duwang sirâ sa pagpadagos kan misyon ni Cristo digdi sa kinàban?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Siring sa mga Karnero na Daing Pastor

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hulyo 18-24, 2021. Basahon an Evangelio gikan sa Marcos 6,30-34 (Ika-16 na Domingo sa Ordinariong Panahon – B )

…

Sa evangelio inagda ni Jesu Cristo an Saiyang mga disipulos na magpahingalo ta hale pa sana an mga ini sa misyon. Alagad Siya man sana mismo an nagdesisyon na tukdoan man giraray an naghaharalat na katawohan nin huli ta nahirô an Saiyang puso kan mahiling Niya sinda na “siring sa mga karnero na daing pastor”.

Si Cristo an marhay na Pastor, kaya nganì an saiyang presencia nagin singkogan para sa mga namamayo sa Israel. Dakul na beses sa mga Evangelio binatikos ni Jesus an mga escribas, fariseos, asin kapadean, nin huli sa saindang saláng pagpadára sa mga tawo. Sa lado kan gobyerno si Hadeng Herodes asin saiyang mga alipores kadakul an abuso sa saindang kapangyarihan.

Patanid sa mga Maraot na Pastor. An kapangyarihan tinatao nin Dios sa mga tawo para sa karahayan nin gabos. Kaya an Dios dai naoogma sa mga ginagamit an saindang katongdan sa karâtan. Sa Jeremias 23,1 nasusurat: “Herak man sa mga pastor na nagpapabayà na an Sakong mga karnero mawarà asin mawarak, olay nin Kagurangnan.” Asin sinabi pa: “Papadusahan ko kamo huli kan saindong kapabayaan.” May nagkapirang tandà nin mga maraot na pastor.

Binabayaan ninda an saindang inaataman; an saindang puso bakong pusog sa pagtabang kundi sa pakinabang. Si Cristo nagsabi sa Juan 10,11: "An marhay na pastor minadusay kan saiyang buhay para sa karnero.”

Minasuway sinda sa Dios. An saindang kagustuhan an saindang pinapaorog, an kinàbanon na ambisyon an saindang sinusunod. Si Cristo nagsabi sa Juan 6,38: “Naghilig Ako hale sa langit nganing gibohon an kabòtan kan nagsugò Sako, bakong an kabòtan Ko.”

Ineenot ninda an saindang sadiri, kisa kapwa o banwaan. Kaya hanggang ngonian nagsasakit an banwaan asin kadakul an nasa pagtios nin huli sa pagkurakot asin pagpaorog sa sadiri kan mga namamayo. Si Cristo nagsabi sa Mateo 20,26-28: “An siisay man saindo na boot magin dakula dapat magin surugoon nindo. An siisay man na boot magin enot dapat magin oripon nin gabos; arog kan Aki nin Tawo, na dai nagdigdi tanganing paglingkodan kundi tanganing maglingkod.”

Inuutikan ninda an banwaan asin dinadara sa maraot. Rinaraot ninda an tiwala nin tawo sa mga institusyon nin sociedad, asin binabasang an katotoohan tanganing malansé an mga tawo sa saindang sadiring agenda. Si Cristo nagpatanid sa Mateo 18,6: “An siisay man na magin dahilan nin pagkakasalà kan saro sa mga saradit na ini na minatubod sako, mas marhay pang gakudan siya nin gapong gilingan sa liog asin lunudon sa lawod.”

Pagpilì sa Marhay na Pastor. Igwa kita nin pagpipilì na kaipuhan gibohon: an dalan kan mga maraot na pastor o an dalan kan satong Marhay na Pastor. Magigibo ta ini sa nagkapirang paagi.

Magpilì kita nin mga marhay na pamayó. Dai mahaloy eleksyon na naman sa satong nacion. Pilion ta man lugod an pulitika nin prinsipyo asin paglingkod bako an pulitika nin personalidad asin kwarta.

Suportahan ta an mga marhay na gibo asin plano kan satong mga pamayong-lingkod. Magkasararò kita sa tama, sa katotoohan, asin karahayan kan kagabsan.

Pilion ta na kita mismo magtalubò na magin siring sa Marhay na Pastor. Nin huli ta lambang saro sato inaapod sa paglingkod, sa pagkamoot, asin paghiras kan Marhay na Bareta. Tanganing mautob sato an panuga nin Dios sa Jeremias 3,15: “tatàwan ko Kamo nin mga pastor susog sa Sakong puso”.

…

GIYA SA PAGHIRAS SA SADIT NA KOMUNIDAD • Maghiras nin experiencia kun pa’no naapektohan nin sarong “maraot na pastor” o “marhay na pastor”; o kun pa’no ika man nagin marhay na pastor sa kapwa.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Inapód, Sinugò, asin Tinugon para Sa Misyon

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hulyo 11-17, 2021. Basahon an Evangelio gikan sa Marcos 6,7-13 (Ika-15 Domingo sa Ordinariong Panahon - B)

…

Sa evangelio sinugo ni Jesu Cristo an Saiyang Doce Apostoles sa pagmisyon. Siring sa mga apprentice o on-the-job (OJT) trainees, yaon si Cristo sa paggiya sainda mantang inaarog nindang gibohon an mga ginigibo Niya: magtukdô manungod sa Kahadean, magbulóng nin mga may helang, asin magpaluwás nin mga demonio.

Natà ta Doce an Saiyang pinili? An institusyon kan Doce Apostoles siring sa doceng tribu kan Piniling Banwaan na Israel. Bako saná sinda mga pamayó o mga enot na obispo kan Simbahan na tinogdás ni Cristo, kundì an Doce nagrerepresenta sa Simbahan mismo, an bàgong Banwaan nin Dios. Kaya kan sinubol sinda ni Cristo sa pagmisyon susog sa istorya sa evangelio, asin bago kan Saiyang pagsakat sa langit, bako man saná an Doce (o an natadang once sa panahon kan Ascension) an sinusugo Niya kundi an bilog na Simbahan asin an lambang miembro kaini.

Ano an mensahe kan istoryang ini sato sa panahon ngonian? Paghorop-horopan niato ining tolong ginibo ni Jesus sainda: inapód Niya sinda, asin sinugò sa misyon, dangan tinàwan nin nagkapirang tugon.

Inapód na magin mga disipulos ni Cristo. Lambang sarô sa Doce, inapód ni Cristo halè sa manlaen-laen nindang kamugtakan sa buhay, tanganing magin mga disipulos Niya. Kita man nagin mga disipulos ni Cristo salamat sa gracia kan sacramento kan bonyag.

Sa taon kan ika-500 na aniversario kan Cristianismo sa Pilipinas, marhay na girumdumon kun pa’no ining pag-apod ni Cristo nakaabot sato halè sa Jerusalem, sa paagi kan Roma, dangan España. Kan taon 1521 napadpad si Magellan sa mga isla na aapodon Pilipinas, alagad an evangelización nagpoon sana kan 1565 sa pagbalik kan mga Kastila sa pamamayo ni Miguel Lopez de Legazpi. Sa Bicol, nagpoon an Simbahan kan 1573 sa expedicion ni Juan de Salcedo asin pagtogdas niya kan enot na parokya sa Bicol, an Santiago de Libon. Enot nag-abót an mga fraileng Agustino alagad an mga Franciscano an nagpadagos asin nagpalakóp kan pagtubod sa region.

Sinugò sa misyon nin evangelización. An gracia nin pagtubod dai tinao sato para sa sadiri lamang, kundi para ihirás. Sa Mateo 28, 19-20, sinugo ni Jesu Cristo an Simbahan na “padumán sa gabos na tawo saen man na lugar; gibohon sindang mga disipulos Ko. Bonyagan sinda sa ngaran kan Ama, kan Aki, asin kan Espiritu Santo. Tukdoan sindang magkuyog kan gabos na pinagboot Ko saindo.” An Cristiano inapod bakô saná na magsimba kundi na magin Simbahan, na nagmimisyon.

Sa saindang pagmisyon an mga Apostoles nagbalangibog kan Marhay na Bareta sa manlaen-laen na paagi. Kita man inaapod na magmisyon susog sa graciang tinaó sato kan Espiritu. Si San Pablo nagtukdô 1 Corinto 12,4-5: “Manlaen-laen an mga balaog, alagad saro sana an Espiritu. Manlaen-laen an paagi nin paglingkod, alagad saro sana an Kagurangnan. Igwa nin manlaen-laen na kakayahan sa pagtrabaho alagad saro sana an Dios na nagtatao kan mga kakayahan na iyan sa gabos na tawo.”

Tinugon na danay na magsarig sa Dios. Alagad minsan magabat na an misyon, may dinagdag pang tugon si Cristo: dai magdara nin anuman na bagay kundi an pinakadikit na kaipuhan. May razón kun natà hinagad ini ni Cristo sa mga Apostoles: tanganing dai sinda – asin kita man – magsarig sa mga bagay na kinàbanon kundi sa Dios saná. Kun an Dios dai kita pinapabayaan sa aroaldaw niatong pangangaipo, ano pa daw kun kita naggigibo kan Saiyang misyon na tinao sato?

…

GIYA SA PAGHIRAS SA SADIT NA KOMUNIDAD • Ano sa hilíng mo an balaog o kakayahan na tinao saimo nin Dios para sa misyon? Maghirás kun pa’no mo nagamit ini sa pagbalangibog kan Marhay na Bareta.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Profeta Dai Inaako sa Sadiring Banwa

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hulyo 4-10, 2021. Basahon an Evangelio gikan sa Marcos 6,1-6 (Ika-14 Domingo sa Ordinariong Panahon – B ).

…

Sa evangelio nagbalik si Jesus sa Nazareth, Saiyang sadiring banwa, alagad sinikwal Siya kan Saiyang mga kahimanwa. Imbes na ika-urgollo, dai ninda maako na an sarong karpintero na nagdakula sa saindang lugar, na an pamilya midbid ninda, makataram asin makatukdo nin may autoridad siring sa ginigibo Niya.

An istoryang ini nagpapagirumdom man sato nin mga experiencia na kita man hinabuan, sinikwal, pinasipara, linibak, pigsalaan, pinakaraot, o ginibohan pa ngani nin maraot. Ano an Cristianong simbag sa mga ini?

Arogon ta si Cristo. Saro man sana an Saiyang paagi nin pagsimbag sa makuring pangyayaring ini: pagkamoot. Maski dai pa Siya maako kan Saiyang mga kahimanwa, dai Siya nagtunong sa pagkamoot sainda. May nagkapirang paagi an satong mamomòton na simbag.

Enot maghingowa na makasabot. Pag kita pighabuan o nagibohan nin maraot, an tentacion iyo na madagit asin magbalós sa kapwang naggibo kaini sato. Alagad pinapagirumdom kita sa Santiago 1,19: “An lambang saro saindo kaipuhan maliksing maghinanyog, maingat sa pagtaram, saka maluya sa pagdagit.”

Kun baloón tang saboton an kapwa, tibaad maaaraman ta kun natà nagibo niya an siring, o ano man an saiyang pig-aagihan, o tibaad may razon o sentimiento man siya na kaipuhan dangogon. Dangan magtao man kita nin panahon na paghorop-horopan an satong sadiri. Natà ta ako nakulgan nin marhay? Malinig man daw an sakong intencion? Tibaad igwa man ako nin pagkukulang?

Pilion na makipag-ulian. Sa Mateo 5,23-24, si Jesus nagtukdo: “Kun madara ka nin dolot sa altar, dangan marumduman mo na dagit saimo an saimong tugang, iwalat mo ngûna an dolot sa atubang kan altar, dangan makiulian ka saiya. Saka ka magbalik tanganing magdolot sa Dios.”

Sa halos gabos na panahon, an pagpatawad an pinakamarhay asin mamomòton na magigibo niato sa kapwang nagkasalà. An pinaka ladawan kaini daing iba kundi si Cristo mismo na maski naghihingagdan na sa cruz nakua pang ipagkaulian sa Ama an mga nagpapasakit Saiya. Sa Lucas 23,34 sinabi Niya: “Ama, patawada sinda ta dai ninda aram an saindang ginigibo”.

Siring man an paghagad nin kapatawadan, kun kita nakakulog o nakagibo nin maraot. Asin an pakipag-ulian nakukumpleto kun may pagmàwot na magbàgo na magin mas marhay asin mamomòton na kapwa tawo.

Magdanay sa katanosan. Sinabi ni Jesus sa evangelio na siring sa mga profetang pinadara sa banwaan Israel, Siya man pighabuan nin saiyang mga kahimanwa. Ano an yaon sa mga profeta ta nagdadanay sinda sa saindang misyon maski sa hampang nin kadakul na pasakit asin oposisyon? Yaon sainda an katanosan.

An katanosan iyo an pagsunod sa kabòtan nin Dios. Sa Juan 6,38, si Jesus nagsabi: “naghilig Ako hale sa langit nganing gibohon an kabòtan kan nagsugo Sako, bakong an kabòtan Ko”. Minsan naghuhonà kita na kita an tama, alagad kun ini bako susog sa kabòtan nin Dios, kita matanos sa sadiri saná (self-righteous).

An gracia kan Espiritu na tinatao nin Dios sa mga matanos iyo an magpapanggana sato laban sa fuerza nin kasàlan asin kagadanan. Kaya si San Pablo nakapagsabi sa 2 Corinto 12,10: “Ikinakaogma ko an sakuyang kaluyahan, an mga kamudahan, an persecucion, asin kasakitan na tinios nin huli sa pagkamoot ki Cristo. Huli ta ako makusog sa panahon na ako maluya.”

…

GIYA SA PAGHIRAS SA SADIT NA KOMUNIDAD • Maghiras nin experiencia na minsan ika naggigibo nin tama, pighabuan ka o piggibohan nin maraot. Ano an laog kan saimong mga pangadie sa mga panahon na ini?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Narahay Ka kan Saimong Pagtubod

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hunyo 27-Hulyo 3, 2021. Basahon an Evangelio gikan sa Marcos 5,21-43 (Ika-13 Domingo sa Ordinariong Panahon - B).

…

Sa evangelio may duwang istorya nin milagro: an pagbulong sa babaeng doceng taon nang nagtitios nin pagdugo asin an pagbuhay sa doce años na daragitang nagadan sa helang. Minsan may kahalagahan an numero doce sa Piniling Banwaan nin Dios (Doceng Tribu nin Israel, Doce Apostoles ni Cristo), an duwang istoryang ini padagos na nagpapamidbid sato sa Dios: kun siisay Siya asin kun ano an pangapodan Niya sato – sa paagi kan mga tataramon asin gibo ni Jesu Cristo.

“Talitha kumi (Daragita sinasabi ko saimo, tumindog ka).” Ining tataramon ni Jesu Cristo nakakabuhay sa gadan asin nagpapahayag kan Saiyang diosnon na kapangyarihan. Dios sana an may kapangyarihan sa buhay, asin pagtao nin buhay an Saiyang kabotan. Sa Kadunongan 1,13-14 mababasa niato: “An kagadanan bakong gibo nin Dios. Dai Niya ikinaogma na an mga buhay Magadan. An gabos na bagay linalang Niya nganing mabuhay.”

Minsan ngani dai magtaram, nabulong ni Jesus itong babaeng nagtikwil kan Saiyang gubing. Ta ini an Saiyang misyon sa daga. Sa Juan 10,10 sinabi Niya: “Nagdigdi Ako tanganing magkaigwa sinda nin kapanoan nin buhay.”

“Siisay an nagtikwil sako?” An simpleng hapot na ini nagdulot nin takot asin takig sa babaeng narahay pa sana ni Jesus. Nata? Nin huli ta bawal sa mga arog niyang “maati” (unclean) sa saindang tradisyon an makiibahan sa mga tawo o magkapot sa kiisay man nin huli ta an mga ini saiyang mauulakitan kan saiyang pagkamaati. Alagad sa pag-ako niya kan saiyang gibo kinumpleto ni Jesus an pagbulong saiya asin minidbid siya sa katawohan na bako nang maati. Tinawan siya nin bagong buhay.

Kita man inaapod ni Cristo na magrani asin magsarig Saiya na dai nang ibang sinasarigan. Itao ta an bilog na sadiri sa Kagurangnan na enot nang nagtao kan Saiyang sadiri sato – sa Saiyang pagigin Dios na nanitawo asin sa pagdusay kan Saiyang buhay sa cruz. Sabi ni San Pablo sa 2 Corinto 8,9: “Aram nindo an pagkamatinao ni Jesu Cristo na satong Kagurangnan. Siya mayaman alagad nagpakadukha, tanganing kamo mapayaman kan Saiyang kadukhaan.”

“Dai ka mahandal; magtubod ka sana.” Sa mga tataramon na ini pinakusog ni Jesus an boot kan amang si Jairo sa hampang kan bareta na gadan na an saiyang aki. Iyo man ini an sinasabi sato kan Espiritu sa satong paglakbay sa dalan ni Cristo asin pagpasan kan satong cruz. Aram nin Dios na an Saiyang mga inapod, maagi nin pagduwa-duwa, pagkatakot, pagkadapa, minsan ngani pagkawara pa sa tamang dalan nin huli sa mga tentacion. Kaya an Saiyang balaog yaon para sa mga naghahagad kaini. Sa katunayan, an linyang “Dai matakot”, sinambit labi 100 na beses sa Lumang Tipan; asin 44 beses sa Bagong Tipan, an kadaklan kaini si Jesus mismo an nagsabi sa Saiyang mga disipulos.

Ano an nakua ni Jairo sa pagrani asin pagsarig ki Cristo? An buhay kan saiyang aki. Ano an nakua kan babaeng naghehelang sa halawig na panahon sa pagkapot niya sa gubing ni Cristo? Natawan siya nin bagong buhay.

Makua ta man lugod an adal kaining evangelio, orog na sa panahon na ini nin crisis asin pandemia, tanganing siring sa babaeng nagkapot sa Saiyang gubing, pasabongan kita ni Cristo: “Narahay ka kan saimong pagtubod. Mapasaimo an katoninongan asin magdanay ka sa saimong pagkarahay.”

…

GIYA SA PAGHIRAS SA SADIT NA KOMUNIDAD • Maghiras nin experiencia nin pagbalo sa satong pagtubod, asin kun haen an presencia nin Dios sa buhay mo sa panahon na idto.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song