An Transfiguracion kan Kagurangnan

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Pebrero 28-Marso 6, 2021. Basahon an Evangelio gikan sa Marcos 9,2-10 (Ikaduwang Domingo nin Cuaresma).

Sa evangelio, pig-istorya an Transfiguracion ni Jesus sa halangkaw na bukid, kaiba an tolong pinakaugos Niyang disipulos, si Pedro, Santiago, asin Juan. Ini an ikaapat sa mga Misterio nin Liwanag sa Santo Rosario. Ano an kahulugan kan Transfiguracion kan Kagurangnan?

Revelacion. An pangyayaring ini pagpadagos kan pagpamidbid kan mahal na Dios sa paagi ni Jesu Cristo. An presencia ni Moises asin Elias na nakikipag-olay ki Jesus nagtutukdo kaini. Si Jesu Cristo an kapanoan kan mga Kasuratan – si Moises an kagibo kan mga Libro nin Batas (an enot na limang libro sa Biblia), asin si Elias nagrerepresentar sa mga profetas. Sa dikit na paagi, an Dios nagpamidbid man kan Saiyang sadiri ki Moises sa bulod nin Horeb sa Exodo 3, asin ki Elias sa bulod nin Carmel sa 1 Hade 19.  Alagad an kapanoan yaon ki Jesus. Nagsabi Siya sa Juan 14,9: “An nakahiling na sako, nakahiling na sa Ama.”

An mga katukdoan ni Jesus manungod sa Kahadean, an Saiyang mga pagbulong asin mga milagro, asin an Saiyang pagtipon nin mga disipulos – gabos ini nagpapamidbid sa Dios asin sa Saiyang plano. Sa paagi Niya nasasabotan niato an bilog na biblia. Nasusurat sa Hebreo 1,1: “Kaidtong panahon, sa kadakul na beses asin sa manlaen-laen na paagi, nagtaram an Dios sa satong mga kamagurangan huli kan mga profeta. Alagad sa mga huring aldaw na ini nagtaram Siya sato huli sa Saiyang Aki.”

Sacrificio. An Transfiguracion natapos sa tingog kan Ama hale sa panganoron na nagsabi, “Ini an Sakong namomotan na Aki. Himatea nindo Siya.” Sa Mateo 16,21, mahihimate niato ki Jesus an boot sabihon kan Saiyang pagigin Cristo o Mesías: na kaipuhan mag-agi Siya nin pagsakit, pagkagadan, asin pagkabuhay-liwat. 

Igwa pa nin sarong persona sa Lumang Tipan na katakod kan Transfiguracion: si Abraham na binalô nin Dios kun isasacrificio an saiyang aking si Isaac susog sa istorya sa Genesis 22. An kinatapusan kan istorya iyo an dai pagtugot nin Dios na gadanon ni Abraham si Isaac bilang sacrificio sa altar. An kinatapusan kan istorya iyo si Jesus na ginibong sacrificio kan Dios Ama para sato. Pagkatapos kan Transfiguracion, mababa sa bulod si Jesus asin mga pag-iriba, malakbay sinda pasiring sa Jerusalem kun saen Siya aarestohon, papasakitan, asin ipapako sa cruz. Sabi ni San Pablo sa Roma 8,32: “Dai pinagkanugonan kan Dios an Saiyang sadiring Aki, kundi itinao Niya sato gabos”.

Resurreccion. Tinugon ni Jesus an tolong disipulos na kaiba Niya na dai ipagsabi an saindang nasaksihan sagkod na “an Aki nin Tawo mabuhay-liwat sa mga gadan”. Dai ninda tulos nasabotan ining tugon ni Jesus alagad nasabotan man giraray ninda ngapit: na an Transfiguracion pasabong kan kamurawayan kan Resurreccion. Alagad maagi nguna sinda sa diklom kan pagsakit asin pagkagadan ni Cristo.

Sa panahon nin crisis asin pandemia, an Transfiguracion sarong giya asin tanda nin paglaom sa maabot na panahon nin satong kaligtasan asin kapangganahan. Kaya maimbod na iayon ta an satong mga kadificilan asin sacrificio sa pagsakit asin sacrificio ni Cristo, asin dai magpadaog sa tentacion nin mga kaogmahan na mababaw asin minaagi saná. Sabi ni San Pablo sa Roma 8,17: “Kun kaiba kita ngonian sa kasakitan ni Cristo, makakaiba man kita sa Saiyang kamurawayan”.

 

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun pa’no an Dios nagtatao saimo nin paglaom sa panahon na ini nin crisis asin pandemia.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

 

An Kahulugan asin Katuyuhan kan Cuaresma

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Pebrero 21-27, 2021. Basahon an Evangelio gikan sa Marcos 1,12-15 (Enot na Domingo nin Cuaresma).

Sa evangelio, pig-istorya an pagtener ni Jesus sa kadlagan o disierto sa laog nin cuarentang aldaw. Sa paglaog niato sa Cuaresma, magayon ining istorya na magin patugmadan sa paghorop-horop kan kahulugan asin katuyuhan kaining mabalaog na panahon.

An kahulugan kan Cuaresma iyo an satong pakisumaro ki Cristo. An tataramon na Cuaresma hale sa “cuarenta”. Siring na si Cristo nag-agi nin cuarentang aldaw nin pamibi asin pag-ayuno, kita man minaagi nin cuarentang aldaw na maigot na pagrani sa Dios asin pagtalikod sa sadiri o sa mga kaogmahan nin lawas. Sa satong pakisumaro ki Cristo matatagbuan ta an Dios na haloy nang nakikisumaro sato – alagad kita an dai nakakatao nin magkanigong atencion sa Saiyang presencia asin gracia.

Sa panahon nin pandemia garo man sana kita nag-aagi nin halawig na Cuaresma. Malà nganì an sarong paagi para makalikay sa paglakop kaining virus, an quarantina, siring sa Cuaresma, hale man sa parehong ugat o numero “cuarenta”. An pandemia asin quarantina nagdulot nin kadakul na problema sa katawohan – helang asin kagadanan, pagkawara nin hanapbuhay, kapurisawan sa isip, asin iba pa. Sa panahon na ini orog na kaipuhan an satong pakisumaro sa Kagurangnan na nanuga sa Mateo 28,20, na Siya danay niatong kaiba sagkod sa katapusan nin panahon.

Siring man, sa evangelio sinasabi na kaiba ni Jesus an mga hayop sa kadlagan asin mga angeles na naglilingkod Saiya. Kaidto pa man kadakul an ginigibo ining alegoria o simbolo: an mga hayop nagrerepresenta kan mga kaluyahan asin karigsokan nin tawo, asin an mga angeles, kan danay na pagtabang nin Dios sa buhay nin tawo. Boot sabihon si Jesus nakikisumaro sa kabilogan kan satong pagkatawo, kaiba na an mga kaluyahan asin kadificilan nin buhay, fuera  sa kasàlan. Sabi sa Hebreo 4,15: “An satong Halangkaw na Padi bako idtong dai nakakamate kan satong mga kaluyahan, huli ta Siya mismo nagtios nin gabos na klase nin sugot arog sato, alagad dai Siya nagkasala”.

An katuyuhan kan Cuaresma iyo an satong pakihiras sa kamurawayan kan Pagkabuhay-liwat. Pagkatapos kan Saiyang cuarentang aldaw sa kadlagan, nagpoon na si Jesus sa Saiyang ministerio publico na nagtapos sa Misterio Pascual, an misterio kan Saiyang pagsakit, pagkagadan, asin pagkabuhay-liwat. Siring man, an katuyuhan kan Cuaresma mahihiling sa katapusan kaini: an celebracion kan Misterio Pascual. Sabi sa Roma 6,15: “Kun kita makisumaro ki Cristo sa kagadanan, makikisumaro man kita sa Saiyang pagkabuhay-liwat”.

Tanganing magkanigò kitang magcelebrar kan pagkabuhay-liwat, tinatao sato bilang giya an mga disiplina kan Cuaresma: pagpamibi, pag-ayuno, asin pagtabang sa kapwa, asin an hulit sa Mateo 1,15, na sinasambit man sa Miercoles de Ceniza: “Magsolsol asin magtubod sa Marhay na Bareta”. An siring na mensahe yaon man sa Domingo de Resurreccion, sa Pagbago kan Panuga sa Bonyag, kun saen hinahagad an satong pagsikwal ki Satanas asin sa saiyang mga padaya, asin pagpahayag kan satong pagtubod sa Dios Ama, Aki, asin Espiritu Santo na namomoot sato.

Boot sabihon an gabos na gawe asin ritual sa Cuaresma nagpapagirumdom sato kan mga dapat na gibohon tanganing makamit an kaligtasan na tinatao ni Cristo: magbàgo kita nin buhay asin talikdan an kasàlan.

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun pa’no nag-agi man kita nin sadiring “panahon sa disierto” – puedeng espiritual na gawe o panahon nin kadificilan asin pagbalô.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

An Kapangyarihan nin Pagkaherak

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Pebrero 14-20, 2021. Basahon an Evangelio gikan sa Marcos 1,40-45 (Ikaanom na Domingo sa Ordinariong Panahon).

Sa evangelio, binulong ni Jesus an sarong daoton (may ketong) na nakimaherak Saiya: “Kun boot mo, malilinigan ako.” Ano an napapanahon na mensahe sato kan istoryang ini?

An Kapangyarihan nin Dios.  Enot, na an Dios makapangyarihan. An daot o ketong iyo an pinakakinakatakutan na helang sa haloy na panahon. An may helang kaini minaagi nin halawig asin makuring pagsakit, asin makusog ining makaulakit. Kaya kan binulong ni Jesus an lalaking daoton, dai Niya sana binulong an sarong helang kundi tinawan Niya ini nin bagong buhay.

Kun an Dios makapangyarihan, pinapahiling man kaini an kaluyahan nin tawo. Sa halawig na panahon dai nin solusyon sa daot, dai pa nahaloy kan nagkaigwa nin masasarigan na combinacion nin mga bulong para sa helang na ini. Hanggang sa ngonian kadakul pa man giraray nin mga helang na daing siguradong bulong. Ining pandemia dulot kan COVID-19, nagpagirumdom sato kan satong kaluyahan sa hampang nin mga darakulang problema asin misteryo nin kinaban.

Alagad igwa kita nin Dios na mas makapangyarihan sa anuman na helang, problema, o makuring kasàlan. Sabi ni Cristo sa Marcos 10,27: “Sa tawo imposible iyan, alagad sa Dios bako, huli ta an gabos posible Saiya”. An satong Dios masasarigan.

An Pagkaherak nin Dios. Ikaduwa, an kapangyarihan nin Dios mas namamatean nin tawo nin huli kan Saiyang pagkaherak. Kun si Jesus an kapanoan kan pagpamidbid kan Ama, an ipinapamidbid Niya sarong Dios na mayaman sa pagkaherak. Kan nakimaherak an lalaking daoton tulos naherakan siya ni Jesus. Kan nagrani saiya an mga parakasala, pinapatawad Niya sinda. Pag nahihiling Niya an katawohan na gutom sa mga Tataramon nin Dios, naheherakan Niya sinda siring sa pag-ataman nin pastor sa saiyang kawan.

Kun an Dios maheherakon, pinapagirumdom man kita kan kakulangan kan satong pagkaherak. Sa Levitico 13 nasusurat kun ano an magkakanigong simbag sa mga tawong naghehelang nin daot: isiblag sa katawohan, mag-erok sa luwas kan banwa, magbadò nin sa may helang, asin magkurahaw na maati sinda kun may magrani. Bakong siring man kaini an ginigibo pag may helang na COVID-19? Quarantine, isolation, lockdown.

Alagad aram niato na minsan ginigibo ini tanganing dai makaulakit sa mas dakulang populacion, nasa-sacrificio man an kamugtakan kan may helang asin nagka-causa man an mga gaweng ini nin iba pang problema sa mga maluluya, mga gurang, asin mga may pig-aagihan na issue sa mental health.

Siring na an satong Dios maheherakon, pagkaherak man an pangapodan sato sa mga panahon nin crisis; pagkaherak bako pagsikwal sa kapwa na dulot nin takot o pagkamakasadiri.

Sabi ni Cristo sa Mateo 9,13: “Pagkaherak an mawot ko, bakong atang. Dai ako nagdigdi sa pag-apod kan mga banal kundi kan mga parakasalà.” Kitang mga naherakan, makaukod man lugod magin mas maheherakon, asin dai paurogon an sadiring katanosan kundi an kadunongan na hale sa maheherakon na puso nin Dios.

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun pa’no namatean an pagkaherak nin Dios, o kun pa’no kita man nagin istrumento nin pagkaherak sa kapwa.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Evangelio nin Pagkamoot

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Pebrero 7-13, 2021. Basahon an Evangelio gikan sa Marcos 1,29-39 (Ikalimang Domingo sa Ordinariong Panahon).

Sa evangelio, matapos magbulong nin kadakul na may helang asin magpaluwas nin mga demonio, sinabi ni Jesus an katuyuhan kan Saiyang pagpadigdi sa kinaban: an magtukdo kan Marhay na Bareta sa katawohan. Ini man an sinabi ni San Pablo sa 1 Corinto 9,16: “Herak man sako kun dai ko irokyaw an Evangelio!”

Ano ining Marhay na Bareta? Na igwa kitang Dios na namomoot sato, na maski kita parakasala dai kita pinabayaan kundi pinadarhan pa ngani nin Paraligtas nin satong kasàlan, asin tinàwan nin buhay na panô asin daing kasagkoran sa kaibahan Niya.

Sa evangelio, pig-istorya man kun pa’no pigsabuhay ni Jesus ining Marhay na Bareta sa pagtao Niya nin prioridad sa tolong lado – tanganing magin pangarogan niato. Nin huli ta sabi ni Jesus sa Juan 20,21: “Siring na ako sinugo kan Ama, kamo man sinusugo Ko.”

1. Pagkamoot sa Nagkapira. Nagbisita si Jesus sa harong ni Simon Pedro asin Andres, kaibahan Niya man an magtugang na Santiago asin Juan. Duman sa harong binulong ni Jesus an panugangan na babae ni Simon Pedro na may calentura. Sa saiyang ministerio publico pinahiling ni Jesus na mahalaga Saiya an komunidad nin mga pag-iriba na tinipon Niya. Sa sainda tinukdo ni Jesus an kahulugan kan Saiyang mga parabola, asin an sadit na grupong ini kaiba Niya man sa mga darakulang misterio kan Saiyang buhay. Igwa pa si Jesus nin iba pang mga kaugos, siring kan magturugang na sinda Maria, Martha, asin Lazaro.

Kita man pinapagirumdom na an enot niatong misyon sa pagrokyaw kan Marhay na Bareta iyo na an satong pamilya, barkada, asin mga tawong harani sato. Natatawan ta daw sinda nin magkakanigong atensyon asin pagsabot sa saindang pig-aagihan? Natatawan ta daw sinda nin oras sa pakicelebrar sa saindang kaogmahan asin pagmakulog sa saindang kadificilan?

2. Pagkamoot sa Kadaklan. Kan maaraman kan mga tawo na yaon si Jesus sa harong na Simon Pedro, dinara ninda Saiya an mga may helang asin may mga demonio, asin an mga ini gabos binulong ni Jesus, an mga demonio Saiyang pinalayas. Minsan ngani banggi na asin pagal naman Siya, dai ni Jesus pinahale an mga nangangaipo kundi pinamate an Saiyang pagkaherak.

Kita man inaapodan na mamoot bako sana sa mga kaugos asin kapamilya niato kundi mamoot man sa mas dakulang komunidad asin sociedad, sa pagpaorog kan karahayan nin kagabsan asin pag-ataman sa kapalibutan, susog sa tugon ni Cristo sa Marcos 12,31: “kamòtan mo an saimong kapwa”.

Sa panahon nin pandemia, ini napapahiling sa pagsunod sa mga protocols na minalikay sa sadiri asin kapwa sa peligro kan COVID-19, siring kan pagsulot nin face mask, pag-social distancing, paghugas nin kamot, asin (dai man lugod mahaloy) pagpabakuna.

3. Pagkamoot sa Dios. Matapos an halawig na banggi nin pagbulong, pagkaaga sa pagsirang nin aldaw, tulos nagbuhat si Jesus asin nagpasiring sa lugar na daing tawo para magpamibi sa Ama. Mahalagang parte kan Saiyang buhay sa dagâ an danay Niyang pakiolay sa Ama sa pamibi, asin kita ngani tinukdoan man Niya na magrani asin magpamibi sa Ama.

Natatawan ta daw nin magkanigong panahon an Dios sa satuyang aldaw? Napapabanal ta daw an saiyang aldaw na Domingo sa pagsimba? Naghihingowa daw kita na hanapon an Saiyang kabòtan sa paagi nin paghorop-horop asin pag-adal kan Saiyang Tataramon?

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun pa’no natàwan nin oportunidad na ihiras an Marhay na Bareta sa sadiring pamilya o barkada, o sa mga dai kamidbid.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Katukdoan na May Kapangyarihan

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Enero 31 - Pebrero 6, 2021. Basahon an Evangelio gikan sa Marcos 1,21-28 (Ikaapat na Domingo sa Ordinariong Panahon).

Sa evangelio, pigngalasan an paagi nin pagtukdo ni Jesus na “may kapangyarihan” asin bako siring sa mga escribas. Mas lalo pa sindang nagngalas kan pahaleon Niya an demonio sa laog nin sarong lalake sa paagi kan Saiyang tataramon.

An mga tawo kaidto dai masabotan kun anong kapangyarihan an yaon ki Jesus. Alagad kita, aram na niato: Siya an Paratukdo kan misterio kan Kahadean nin langit, an kapanoan kan pagpamidbid kan Ama.

Aki kan Dios. Sa istoria, inapod kan demonio si Jesu Cristo na “an Banal kan Dios”, boot sabihon pinapamidbid Niya kun siisay an Dios asin kun ano an Saiyang kabotan. Sa Juan 1,1-3 sinabi: “Sa kapinonan iyo an Tataramon; an Tataramon kaibahan nin Dios, asin an Tataramon Dios. Poon pa sa kapinonan an Tataramon kaibahan nan in Dios. Sa paagi Niya ginibo nin Dios an gabos; dai nin anoman na linalang na bako sa paagi Niya.” Siya an Aki nin Dios, Siya Dios na nanitawo para sato. Kaya an pagpahale nin demonio sa lawas nin tawo sarong sadit na bagay sana para Saiya na may kapangyarihan sa paglalang asin buhay.

Profeta.  Si Jesus nagtutukdo bilang profeta, susog sa tradicion nin mga profeta sa Israel na maimbod na binabalangibog an inaapod sa Hebreo na dabar Yahweh­, an Tataramon ni Yahweh. Ini an profesía ni Moises sa Deuteronomio 18,15-20. Asin an Dios mismo an masingil sa mga dai mahimate kan Saiyang tataramon sa paagi nin mga profeta. Siring sa mga profetang naenot Saiya, an buhay asin pagtukdo ni Jesus nagtatanyog sa mga makapangyarihan asin mapaabaw-abaw, alagad nagpapakusog-boot asin nagraranga sa mga mapakumbaba asin nagagabatan.

Mesias. An Saiyang pagtukdo parte kan Saiyang misyon bilang Mesias, an pinanugang Paraligtas. Si Sto. Tomas de Aquino nagsurat: “Nata ta kaipuhan kan Dios Aki na magsakit para sato? May dakulang pangangaipo na gibohon Niya ini, na maipapaliwanag sa duwang paagi: enot, sa pabulóng nin kasàlan, ikaduwa, sa pagtukdo sato kun pa’no mamoot.” Sabi sa Juan 15,13: “Daing pagkamoot na mas dakula pa kisa pagkamoot nin tawong minadusay kan saiyang buhay para sa mga katood niya”. Sa cruz itinukdo ni Cristo an tunay na pagkamoot. Siisay ining mga katood na nakamate kan pagkamoot asin pagkaherak ni Cristo? An mga dukha, parakasala, may helang, asin mga sinikwal nin sociedad.

Alagad bako gabos na nakadangog ki Jesus asin nakahiling kan Saiyang mga gibo nagturubod. Kita man ngani may mga panahon na minasuway sa Saiyang mga katukdoan. Kaya an pagirumdom kan Psalmo 95,7 angay nanggad sa gabos na panahon: “Kun ngonian madangog nindo an Saiyang tingog, hare pagpatagasa an saindong puso”.

Sa pa’anong mga paagi nagigin matagas an satong mga puso? Mahiras kita nin nagkapira. Enot, kun dai ta Siya tinatawan nin magkakanigong panahon sa pamibi asin pag-adal kan Saiyang Tataramon. Ikaduwa, kun pinapaorog ta an sadiring kabotan, o sadiring paghona nin tama asin sala, kisa Saiyang katanosan. Ikatolo, kun sa satong pagsuway, nadadara ta pa an kapwa parayo sa Dios. Sabi ni Jesus sa Mateo 9,42: “An siisay na magin dahilan nin pagkasala kan saro sa mga saradit na ini na minatubod sako, mas marhay pang gakodan an liog niya nin gapong-gilingan dangan iapon sa dagat”. Kaya kun ngonian madangog ta an Saiyang tingog, hare man lugod magmatagas an satong puso!

GIYA SA PAGHIRAS SA SADIT NA KOMUNIDAD O FAMILIA • Maghiras nin mga katukdoan ni Jesu Cristo na nakatabang sato o nagin mahalaga sa satong buhay.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Marhay na Bareta kan Kagurangnan

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Enero 24-30, 2021. Basahon an Evangelio gikan sa Marcos 1,14-20 (Ikatolong Domingo sa Ordinariong Panahon).

Sa evangelio, pig-iistorya an ministerio publico ni Jesu Cristo. An ministerio publico iyo an maabot tolong taon nin paglibot ni Jesus sa Galilea asin mga kataed na lugar, bago an Saiyang pagsakit, pagkagadan, pagkabuhay-liwat, asin pagsakat sa langit.

Sa Saiyang ministerio publico pigbalangibog Niya an Marhay na Bareta sa tataramon asin sa gibo – sa pagtukdo manungod sa Kahadean, pagbulong nin mga may helang, pagpalayas nin mga marumpot na espiritu, paggibo nin mga milagro, asin pagtipon nin comunidad nin mga disipulos Niya.

Ano ining Marhay na Bareta, o Evangelio sa Griego? Ini an bareta na igwa kitang Dios na namomoot sato, asin nagpamidbid sato sa paagi ni Cristo. Si Jesu Cristo mismo an Marhay na Bareta. Kun Siya an Marhay na Bareta na nagdadara sato sa Kahadean, ano man ini para sato?

1. Magsolsol. Si Jesus nagsabi sa Marcos 1,15: “Magsolsol asin magtubod sa Marhay na Bareta.” An pagsolsol boot sabihon pag-ako nin kasalan, paghagad nin tawad, asin paghingowa na magbago. Kaipuhan ining gawe tanganing makua an kaligtasan ni Cristo, ta dai puedeng pig-ako ta na si Cristo alagad padagos man giraray kita sa pagsuway sa Saiyang kabotan.

Segun sa Efeso 4,22-24: “Kaya sanglean na nindo an daan na pagkatawo na pinaraot kan saindong marumpot na kamawotan. Kaipuhan magin bago an saindong puso asin isip. Bagong pagkatawo na an isalida nindo, pagkatawo na linalang sa ladawan nin Dios, sa katanosan asin kabanalan.”

2. Magtubod sa Marhay na Bareta. Kan panahon ni Jesus, mantang dakul an nagtubod Saiya, dakul man an dai. Sabi sa Juan 1,11-12: “Nag-abot Siya sa sadiri Niyang banwa, alagad dai Siya inako kan mga tawong sadiri Niya. Alagad an mga nag-ako asin nagtubod Saiya, tinawan Niya nin derecho na magin mga akin in Dios.” An bunga kan pagtubod iyo an satong kaligtasan.

Alagad tanganing makaligtas, an satong pagtubod ki Cristo bako sana pagmidbid kan Saiyang katotoohan kundi pagsabuhay man kaini. Nagpatanid si Cristo sa Mateo 7,21: “Bako gabos na nagkukurahaw, ‘Kagurangnan, Kagurangnan’, makakalaog sa Kahadean nin langit, kundi itong nag-ootob kan kabotan kan Sakong Ama sa langit.”

3. Magsunod ki Cristo. Sa Juan 1,17, sinabihan ni Jesus an enot na apat Niyang mga disipulos: “Sumonod kamo Sako asin gigibohon Ko kamong mga paradakop nin mga tawo.” Boot sabihon, sa kapinònan pa sana, malinaw na an katuyohan kan satong pagigin disipulo Niya iyo an paglakaw sa Saiyang dalan asin pagdara sa kapwa pasiring sa Saiyang lindong kun saen yaon an kaligtasan. An satong espiritualidad bako para sa sadiri lamang kundi para ihiras tanganing an gabos maligtas.

4. Maghidali. Sa pagbasa sa evangelio, an pagsolsol, pagtubod, asin pagsunod Saiya, pirming may elemento nin paghidali. Kan inapod an enot na mga disipulos, tulos sindang nagsunod asin binayaan an pagkabuhay asin pamilya. Sa Jonas 3,1-5,10, kan si profeta Jonas naglibot sa ciudad nin Nineveh para patanidan sinda kan pagkarompag kaini kun dai sinda magsolsol, tulos an mga tawo nagsunod, nag-ayuno, asin naghagad nin tawad sa Kagurangnan – kaya dai nadagos an pagkarompag kan ciudad.  Kaya kita man maghidali sa satong kaligtasan sa fuerza kan kadikloman asin kagadanan pasiring sa gracia kan Kahadean nin Dios.

GIYA SA PAGHIRAS SA SADIT NA KOMUNIDAD O FAMILIA • Maghiras nin mga gawe nin devocion sa pag-adal nin biblia asin Marhay na Bareta, asin kun ano man an tabang na naidulot kaini sa saimong buhay.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

500 Taon nin Devocion ki Santo Niño

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Enero 17-23, 2021. Basahon an Evangelio gikan sa Marcos 10,13-16 (Fiesta kan Santo Niño).

 

Sa evangelio, pinapahiling kun gurano karani an puso ni Jesus sa mga aki. Si Jesus mismo, na totoong Dios asin totoong tawo, nag-agi man sa pagkaaki asin sinecelebrar ta ini sa devocion ki Santo Niño.

May especial ining katakod sa ika-500 na aniversario nin Cristianismo sa Pilipinas, nin huli ta an Santo Niño an saro sa duwang pinakaenot na Cristianong simbolo na nakaabot sa Pilipinas. An saro iyo an cruz na tinogdok ni Magellan sa Cebu. Sarong imagen kan Santo Niño an pigregalo ni Magellan ki Hara Amihan kan ini asin an saiyang agom na hade kan Cebu na si Rajah Homabon, asin kadakul nindang pag-iriba, nagpabonyag bilang mga Cristiano kan taon 1521.

An devocion ki Santo Niño pangapodan sa danay na pagsarig sa Dios. An titulong Santo Niño hale sa sinabi ni angel Gabriel ki Maria sa Lucas 1,35: “Banal an ipapangaki mo na aapodon Aki kan Dios”, o sa Español “Asi que al santo niño que va a nacer lo llamaran Hijo de Dios.” An kaligtasan sa kinaban duminatong nin huli sa dakulang pagsarig ni Maria sa mahal na Dios. Sa Marcos 19,15, sinabi ni Jesus: “Totoong sinasabi ko saindo: an siisay man na dai mag-ako kan kahadean nin Dios arog kaining aki, dai iyan makakalaog”. An yaon sa mga aki na dapat niatong arogon iyo an saindang maigot na pagsarig sa saindang mga magurang.

An satong pagsarig sa Dios dai sana napapahiling sa pagsarig na itatao Niya an satong mga pangangaipo, kundi sa pagsunod sa Saiyang kabotan, maski dificil o inconveniente ini. Ta kan tinukdoan kita ni Cristo na magpamibi, bago ta sambiton an paghagad kan satong kakanon sa aroaldaw, minasabi nguna kita na mangyari an boot Niya sa dagâ nin siring sa langit.

An devocion ki Santo Niño pangapodan sa pagtalubo sa pagtubod. Saro pang mahihiling sa mga aki iyo na sinda minatalubo. Sa Lucas 2,52 sinabi na “nagtalubo si Jesus asin nagdagdag an saiyang kadunongan. Nawilihan Siya nin Dios asin nin mga tawo.” An niño Jesus nagin Mesias na nagligtas kan kinaban sa cruz, nabuhay-liwat asin ngonian naghahade sa kamurawayan. An pagtubod na nakua ta sa satong pagkaaki kaipuhan na pataluboon tanganing magbunga asin maihiras sa kapwa.

Sa laog nin 500 na taon bilang banwaan na Cristiano, kadakul pa an dapat niatong italubo sa pagtubod. Kadakul na mga Catolico an hanggang sa ngaran sana; dai nang pakaisi sa pagtubod matapos bonyagan. Yaon an pagsalak nin mga pamahiin asin sa tawong tradicion na nakakaulang sa tunay na pagtubod. Yaon an pagpaorog nin mga personal na hilig, o ideología, o paboritong pulitiko, kisa sa Evangelio. Yaon an pagkakaigwa nin “split-level Christianity” o pagtubod na dai nahihiling sa gibo asin dai naisasabuhay.

An devocion ki Santo Niño pangapodan sa misyon. Sa evangelio sinagwe ni Jesus an Saiyang mga disipulos na dai pag-ulangon an mga aki na magrani Saiya. An lambang devoto kan Santo Niño inaapodan na darhon an kapwa pasiring ki Cristo asin dai magin ulang para rumayo an mga tawo sa Dios.

An mga nakakagurang, lalo na an mga magurang, nagigibo an misyon na ini sa pagtukdo sa mga aki nin mga marhay na gawè asin mga pamibi asin tradicion kan satong Simbahan; pag-adal nin Biblia; asin pagdara sainda sa Banal na Misa asin mga sacramento. Kun dai ini naitutukdo sa mga aki, dai ninda mamimidbidan an Dios o maaaraman an pagigin marhay na Cristiano.

 

GIYA SA PAGHIRAS SA SADIT NA KOMUNIDAD O FAMILIA • Maghiras kun ano an mga gawe nin devocion sa Santo Niño sa saimong familia, o kun ano man para saimo an kahulugan kan devocion ki Santo Niño.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

An Bonyag ni Jesu Cristo

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Enero 10-16, 2021. Basahon an Evangelio gikan sa Marcos 1,7-11 (Fiesta kan Pagbonyag kan Kagurangnan).

An evangelio nag-iistoria kan version ni San Marcos kan pagbonyag ki Jesu Cristo. An pagrumdom kaini iyo man an huring aldaw kan Panahon kan pasko nin Pagkamondag. Ano an kahulugan kaining Pagbonyag?

Pagpamidbid ni Cristo bilang Mesias. Nagpapadagos an pagpahayag sa katawohan kan misterio nin pagkanitawo kan Dios na enot nang pinahayag sa Pag-anuncio kan angel, sa Pagkamundag, asin sa Epifanía. Sa pagbonyag ki Jesus nagpamidbid Siya bako bilang mabagsik na hade kundi bilang Mesias na maboot asin mapakumbaba. Dai man Niya kaipuhan magpabonyag nin huli ta ini para sa pagpatawad nin mga kasàlan, asin dai man Siyang kasàlan. Alagad hinagad Niya ini ki Juan Bautista sa pakisumaro sa makasàlan na kamugtakan nin katawohan.

Sa paghilig kan Espiritu, pinamidbid man Siyang profeta na magbabalangibog kan marhay na Bareta kan Kahadean. Sa pag-omaw Saiya kan tingog kan Ama bilang Aking namomotan, pinamidbid man Siya bilang Aki kan Dios.

Pagpamidbid kan Dios bilang Santissima Trinidad. Siring na dai paghonaon kan banwaan na Israel na an pighahalat nindang Mesias bogtong na Aki kan Dios, dai man ninda paghonaon na an Dios mapamidbid kan Saiyang sadiri bilang Aki na binobonyagan, bilang Espiritu, asin bilang Amang makakamhan.

Kaya ngani an apod kan Simbahan na Eastern Orthodox sa pangyayaring ini, theofanía, an pagpahayag nin Dios. Kaya maninigo lamang na apodon si Jesu Cristo bilang kapanoan kan kapahayagan nin Dios ta nin huli Saiya namimidbidan ta an Dios asin an Saiyang kabotan.

Pagpahayag kan Sacramento nin Pagbonyag. Matapos na si Cristo mabonyagan, pinônan na Niya an saiyang ministerio publico, asin nagpoon na man Siya sa pagbonyag. Asin bago Siya sumakat sa langit, sa Mateo 28,19, sinugo Niya an Saiyang mga disipulos kaidto hanggang ngonian: “Paduman kamo sa gabos na tawo saen man na lugar; gibohon nindo sindang mga disipulos Ko. Bonyagan nindo sinda sa ngaran kan Ama, kan Aki, asin kan Espiritu Santo.”

Sa pagbonyag ki Jesus sa salog Jordan an gabos na tubig napapabanal asin maninigo nang gamiton sa sacramento nin Bonyag sa pagpatawad nin mga kasàlan. Huli man sa Bonyag, tinatao sa lambing saro sato an dignidad nin pagigin Aki kan Ama, Tugang ni Jesu Cristo, Templo kan  Espiritu Santo, Miembro kan Simbahan, asin Tagapagmana kan Kahadean.

An pagbonyag iyo an pagsabatan kan kabotan nin Dios asin tawo. Sa pagbonyag inaako kan tawo an Dios sa saiyang buhay asin minaayon siya sa kabotan nin Dios. Kaya ngani sa Rito nin Pagbonyag, hinahagad an satong panuga na isikwal si Satanas, asin an mga padaya asin maraot kaining gibo; siring man na minatubod sa Dios Ama, Aki, asin Espiritu Santo. Ini an kabòtan kan satong Dios para sato na dapat niatong isabuhay, asin magigin sukol  kan  paghukom sato pag-abot kan panahon kun kita makakalaog sa Saiyang Kahadean sa langit.

 

GIYA SA PAGHIRAS SA SADIT NA KOMUNIDAD O FAMILIA • Maghiras kun pano sato enot na pinamidbid an Dios kan satong mga magurang o kun siisay man, asin kun pano ta Siya danay na namimidbidan sa ngonian.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

An Epifanía sa Katawohan

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Enero 3-9, 2021. Basahon an Evangelio gikan sa Lucas 2,1-12 (Solemnidad kan Epifanía kan Kagurangnan).

Sa evangelio, nagbisita an mga mago sa omboy na si Jesus gamit an sarong maliwanag na bitoon bilang guia.  Susog sa tradicion, inaapod man sindang tolong hade na may ngaran na Melchor, Gazpar, asin Baltazar. Alagad bako sinda mga hade kundi mga mago, mga madunong asin may inadalan na tawo. Dai man sa Biblia nabanggit an mga pangaran ninda, asin dai man sinabi na tolo sana sinda, kundi na dara ninda tolong klaseng regalo. Ano an kahulugan kan istoriang ini?

An kaligtasan para sa gabos na tawo. An pagbisita kan mga mago sinecelebrar bilang fiesta kan Epifanía, boot sabihon an pagpahiling kan satong Kagurangnan sa katawohan. An mga magong ini hale sa harayong lugar sa sirangan. Bako sinda kabilang sa Piniling Banwaan, dai sainda itinao an Kasuratan kan mga Judio: an mga Tugon ni Moises, an mga katukdoan nin mga Profetas, asin mga Psalmos ni David. Alagad sa saindang sadiring pag-aadal ipinasabong man sainda kan Espiritu an katotoohan kan pagkamundag kan hade na maligtas sa kinaban. Sabi sa profesía sa Isaias 6,3-4: “Malakaw an mga nacion sa saimong liwanag, asin an mga hade sa bangraw kan saimong pagsirang. Sinda gabos nagkatiripon, madyan na saimo.”

Ini nin huli ta an kaligtasan para sa gabos na tawo. Sabi ni San Pablo sa Efeso 3,6: “An misterio iyo ini: huli kan Marhay na Bareta, an mga pagano paramana man kan mga bendicion nin Dios, mga kabtang man kan parehong hawak, asin kahiras kan ipinanuga nin Dios ki Jesu Cristo.” An mga mago representante kan katawohan sa bilog na kinaban, asin si Cristo namundag man para sainda asin para sa sato.

Si Jesu Cristo an pinakaregalo sa Pasko. May darang regalo an mga mago, asin digdi hale an tradicion nin pagregalo sa panahon nin Pasko. Alagad an pinakaregalo iyo si Jesu Cristo na tinatao kan Dios Ama sa gabos na tawo. Siya an nagpaogmang gayo sa mga mago kan makua na ninda Siya sa halawig nindang paglakbay. Alagad bilang regalo, puede man Siyang dai akoon, isikwal, asin kaongisan pa ngani.

Sabi sa Mateo 2,3: “Napurisaw  na gayo si  hadeng Herodes kan madangog niya  (an bareta kan mga mago), siring man an mga taga-Jerusalem.” Bako sana si Herodes, na an paghiling ki Jesus karibal sa trono, an napurisaw kundi pati na an saiyang mga kampon. Sabi sa Santiago 3,16: “Kun saen an pag-ori asin kapasloan, yaon man an karàtan asin  gabos na gibong maraot.” Siring ki Herodes asin saiyang mga  parasunod, kun kita makasadiri asin maori, maski magcelebrar kita kan mga tradicion sa  Pasko, sinisikwal ta man giraray si Cristo.

Tinao sato ni Cristo an regalo nin mision.  Tolong regalo an dara kan mga mago, na simbolo kan Saiyang misyon: bulawan nin huli ta Siya hade, incenso nin huli ta Siya padi, asin mira nin huli ta Siya profeta. Kan kita binonyagan ihiniras sato ni Cristo an Saiyang Espiritu asin ining tolong misyon.

Sabi sa 1 Pedro 4,10: “An lambang tawo na tinawan nin especial na balaog nin Dios dapat maggamit kan balaog na iyan para sa karahayan kan kapwa niya, bilang marhay na katiwala nin mga biyaya nin Dios.” Ngonian na taon 2021, sinecelebrar ta an Taon nin Misyon ad Gentes (sa gabos na tawo) asin ika-500 na aniversario kan Cristianong pagtubod sa satong nacion. An tema kan satong celebracion, Gifted to Give, sarong pagirumdom kan regalo kan misyon na tinao sato ni Cristo:  na magin padi, profeta, asin hade kita sa satong kapwa, susog sa Saiyang  paarog  asin gracia.

GIYA SA PAGHIRAS SA SADIT NA KOMUNIDAD O FAMILIA • Maggibo nin New Year’s Resolution asin isabay kun pàno gigibohon an mision na ihiras an balaog ni Cristo sa kapwa.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

An Pasko para sa Familia

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Disyembre 27, 2020-Enero 2, 2021. Basahon an Evangelio gikan sa Lucas 2,22-40 (Fiesta nin Sagrada Familia).

Sa evangelio an Sagrada Familia ni Jesus, Maria asin Jose nagpasiring sa Jerusalem para sa presentacion kan aking si Jesus sa Templo. An enot an Domingo sa Pasko celebracion kan Fiesta kan Sagrada Familia, na iyo an pangarogan nin mga Cristianong familia sa kabanalan asin kaimbodan sa kabotan nin Dios. Segun sa ladawan kan Sagrada Familia, an lambang Cristianong familia inaapodan nin Dios na magin Simbahan sa harong, eskwelahan nin pagkamoot, asin tanda nin paglaom.

Simbahan sa Harong. An pinakasadit na unit nin Banwaan nin Dios iyo an familia, kaya ini inaapod man na  Ecclesia domestica o Simbahan sa harong. Ini naipapahiling sa pagpamibi asin mga gawe nin pagtubod sa Dios nin mga miembro nin familia.

Siring ki San Jose asin Santa Maria na dinara si Jesus sa Templo sa Jerusalem asin tinukdoan Siya kan mga tradicion nin saindang pagtubod, an mision nin mga magurang na Cristiano iyo na ipamidbid  sa saindang mga aki an mahal na Dios – sa pagtukdo sainda sa mga pamibi asin  doctrina kan Simbahan, sa pagpatood sainda sa mga tradicion catolico, sa pagdara sainda sa mga sacramento, lalo na sa pagsimba sa  cada Domingo asin mga aldaw nin obligacion.

Eskwelahan nin Pagkamoot. Kan nakaaging Domingo nag-viral an video kan may sarong pulis na binadil-ginadan nin basang an duwang tawo na mag-ina. An naka-complicar kan situacion iyo na invuelto sa pangyayari an doce-años na aking babae kan nanggadan. Mantang kadakul an nagbatikos sa mag-ama, nakihuron naman an agom asin ama kan mag-ina na ginadan na dai na idamay an aki nin huli ta ini man victima nin saláng pagpadakula nin saiyang mga magurang asin dapat tâwan nin oportunidad na magtalubo nin normal. An pangyayaring ini nagin makusog alagad makulog na leccion sa satong nacion manungod sa pag-abuso sa kapangyarihan asin sa tamang pagpadakula sa mga aki.

Sabi ni San Pablo sa Colosas 3,13-14: “Magpatinios-tiosan asin magpatinawad-tawadan kun an saro may hinanakit sa saro man; kun pàno an Kagurangnan nagpatawad saindo, siring man kamo. Sa ibabaw kaini gabos iyo an pagkamoot na iyo an bugkos kan kalubosan.” Ini an pangapodan sa lambang familia lalo na sa mga nakakagurang na mga miembros kaini, nin huli ta may mga aki na nakakatangad sainda. Kun marhay an padara kan mga nakakagurang, marhay man an magigin ugali nin mga aki. Kun natatangadan an salâ, tibaad maghona an mga ini na an salâ tama, asin an tama salâ.  

Tandâ nin Paglaom.  Sa Sirach 3,3-4 nasusurat: “An naggagalang sa ama naghihipno sa kasâlan, asin an nagpapamuraway sa ini siring sa nagtitipon nin kayamanan.” Ini an hararom na kahulugan kan paggalang niato sa satong mga magurang: nakatakod ini sa paglaom kan madatong na kamurawayan.

An lambang familia kaiba sa dakulang familia kan Kahadean nin Dios. Kaya mantang nabubuhay digdi sa dagâ asin nasisibot sa mga pangangaipo sa aroaldaw, an familia nagtuturo man sa realidad kan maabot na buhay na daing kasagkoran. Naipapahiling ini sa pag-andam sa mga aki bako sana sa saindang pagmukna man nin sadiring familia kundi sa pag-andam nin lambang miembro sa buhay na daing kasagkoran; siring man sa pagrumdom asin pagpamibi sa mga miembros  kan familia na naenot na sa ikaduwang buhay. An devocion sa mga santos nagtutukdo man sa langitnon na padumanan kan lambang miembro kaini.

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun pano naisasabuhay kan saimong familia an pagigin Simbahan sa harong, o eskwelahan nin pagkamoot, o tanda nin paglaom..

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Mangyari Susog sa Saimong Itinaram

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Disyembre 20-26, 2020. Basahon an Evangelio gikan sa Lucas 1,26-38 (Ikaapat na Domingo nin Adviento).

An Anunciacion ni Angel Gabriel ki Virgen Maria na siya napili kan Dios na magin ina kan Aki kan Orog Kahalangkaw an tanda kan pagdatong kan bagong paglalang sa gracia nin Dios.

Sa naenot na paglalang an Dios nagtao nin orden sa karaotan, liwanag sa kadikloman, asin buhay sa lugar na daing buhay. Alagad an kasâlan an nagraot kan linalang. Ini sinisimbolo kan pagsuway sa kabotan nin Dios kan enot na mga tawo, si Eba asin Adan.

Si Virgen Maria nagsimbag sa Lucas 1,38: “Mangyari man lugod susog sa saimong itinaram”. Sa tataramon na ini binago ni Maria an kasaysayan nin kinaban, nin huli ta dahil kaini an Dios nanitawo.

An pag-iyo ni Virgen Maria sa kabotan Dios iyo man an satong pangaraogan nin maninigong pag-andam sa pagdatong kan Kagurangnan. Ano an boot sabihon kan saiyang pag-iyo?

Ini pagtugot na bàgohon kita nin Dios. Kan nag-iyo si Maria binago kan Dios an saiyang buhay. Siring man, babagohon nin Dios an satong buhay sa pag-ako ta sa Saiyang kabotan. Susog sa Isaias 55,8-9: “Nagsabi an Kagurangnan, ‘An sakong kaisipan bakong arog kan saindong kaisipan, asin an sakong mga paagi aiba man kan saindo. Kun paanong an kalangitan mas halangkaw ki sa daga, siring man an sakong mga paagi sa saindong mga paagi, asin an sakong kaisipan sa saindong kaisipan’.”

Kun paghona ta marhay an satong kamawotan asin mga gibo, idolot ta ini sa Dios asin hagadon na iwaras an Saiyang kadunongan, asin mas orog pa ining mapapakarhay sa lindong kan plano nin mahal na Dios. Siya an malinig kan mga hagad kan satong puso asin mapabunga kan mga gibo kan satong kamot.

Ini pagsayuma sa anoman na contra sa kabotan nin Dios. An pag-iyo ni Maria nangangahulogan man kan saiyang pagtalikod sa ibang mga plano ninda ni San Jose sa buhay, nin huli sa mas halangkaw na pangapodan nin Dios. An satong pagsunod sa Dios nangangaipo bako sana kan paggibo nin karahayan kundi kan satong pagtalikod sa kasâlan.

Ini an pangapodan ni Juan Bautista, asin ni Jesu Cristo kan Siya duminatong na. Sabi Niya sa Mateo 6,24: “Mayong makakapaglingkod sa duwang kagurangnan, huli ta ikakaongis niya an saro asin mamomotan an saro; magigin maimbod siya sa saro asin pag-oolog-ologon an saro.”

Ini panuga sa bilog niatong buhay. Kan si Maria nag-iyo sa sinabi ni angel Gabriel, bako ini sarong beses sana kundi saiya nang ginigibo dati pa bilang maimbod na aki kan Ama asin kan dumatong si Jesus, bilang mamomoton na ina.

Sabi ni Cristo sa Lucas 9,23: “An siisay na boot magsunod sako, kaipuhan lingawan niya an sadiri niyang buhay, magpasan kan saiyang cruz aroaldaw asin magsunod sako”. Aroaldaw. Nin huli ta an katuyuhan kan satong pagbabago iyo na kita magin kabaing ni Cristo, asin ini dai mangyayari nin sararoan, o sa madaling panahon sana, kundi sa bilog niatong pagkabuhay.

GIYA SA PAGHIRAS SA SADIT NA KOMUNIDAD O FAMILIA • Maghiras nin mga desisyon o bagay na sinayumahan niato nin huli sa pagsunod sa kun ano an tama asin marhay susog sa kabotan nin Dios.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Maogmang Paglaom

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Disyembre 13-19, 2020. Basahon an Evangelio gikan sa Juan 1,6-8,19-28 (Ikatolong Domingo nin Adviento)

Sa evangelio pig-istorya ni Juan Evangelista an pagdatong kan mga sugo kan mga poon na padi sa Jerusalem, asin sa paghapot ninda kun siisay si Juan Bautista mas nalinaw an misyon asin mensahe kaini.

Siya an tingog sa kalangtadan na nagkukurahaw na tanoson an dalan para sa Kagurangnan, susog sa profesía sa Isaias 40,3. Inaandam ni Juan Bautista an mga tawo kaidto sa enot na pagdatong ni Jesus asin ngonian sa ikaduwa Niyang pagdatong sa kamurawayan. Inaandam niya kita sa pag-ako kan kaogmahan kan Pasko.

Dakul an mga nakatakod na kaogmahan sa Pasko: an mga decoracion asin karakanan sa mga harong, an mga regalo para sa mga aki, an caroling na bawal ngonian nin huli sa pandemia, an bonus asin 13th month pay kan mga nagtatrabaho, an dakulang ganancia kan mga nagnenegosyo, asin iba pa.

Alagad bako an mga ini an tunay na kaogmahan kan Pasko, kundi an kaogmahan sa espiritu. Sabi sa Filipos 4,4-5: “Danay kamong mag-ogma sa Kagurangnan: giraray  sinasabi ko, mag-ogma kamo. Ta an Kagurangnan harani na.” An kaogmahan sa espiritu makukua sa nagkapirang bagay.

Pagpatawad. An Dios andam sa pagpatawad nin huli ta ini an mapatalingkas sato sa kasâlan. Sa kadakul na beses na si Jesus nagbolong, sinasabi Niya na pinatawad na an saindang kasâlan. Alagad nangangaipo ini kan satong pagsolsol asin pagbago nin buhay. Ini an sinasabi ni Juan Bautista na tanoson an dalan para sa Kagurangnan. Sabi sa Isaias 55,7: “Pabayaan na kan tampalason an maraot nindang pamumuhay asin an likô nindang mga kaisipan. Magbalik na sinda sa Kagurangnan, an satong Dios; maheherakon Siya asin madaling magpatawad.”

Presencia. An pagsolsol asin pagpatawad mga pag-andam sa pag-ako kan kaogmahan nin pagdatong kan Kagurangnan, an Saiyang presencia iyo an mismong gracia. An presencia kan Dios na nanitawo an pinakadakulang kaogmahan kan Pasko. An Saiyang presencia namamatean nin mga tawong may pagkamoot sa puso. Nin huli ta kun an puso panô nin pagkamakasadiri, pagkauri, asin pagkaongis sa kapwa, daing lugar para sa presencia nin Dios. Sabi sa 1 Juan 4,16: “An Dios pagkamoot, asin an tawong nagdadanay sa pagkamoot nagdadanay sa Dios, asin an Dios nagdadanay saiya.”

Paglaom. An gabos na kaogmahan sa dagâ, kaiba na an banal na celebracion kan Pasko asin Eucaristía, mga patanâ kan dakulang kaogmahan sa pagdatong kan kapanoan kan Kahadean. An maogmang paglaom na ini iyo an nagtataong-kusog sa mga bagyong minaagi sa buhay. Asin ini makukua sa tawong tatao magpasalamat nin huli ta sa pagpasalamat nahihiling an mga kaogmahan sa dagâ bilang biyaya asin an Dios bilang kagtao kan mga ini. Si San Pablo nagtukdò sa Roma 12,12: “Mag-ogma kamo sa saindong paglaom, magmatinios kamo sa kasakitan. Danay kamong mamibi.”

Pagpatawad, presencia, asin paglaom: an mga ini an kaogmahan sa espiritu, mantang kita “naghahalat kan maogmang paglaom asin pagdatong kan satong Kagurangnan na si Jesu Cristo”.

GIYA SA PAGHIRAS SA SADIT NA KOMUNIDAD O FAMILIA • Maghiras nin mga kaogmahan na namatean na o hinahalat pa ngonian na Adviento asin sa Pasko nin Pagkamundag ni Jesu Cristo.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Andama an Dalan para sa Kagurangnan

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Nobyembre 29-Disyembre 5, 2020. Basahon an Evangelio gikan sa Marcos 1,1-8 (Ikaduwang Domingo nin Adviento).

Sa enot na mga verso kan evangelio ni San Marcos, pinapamidbid si Juan Bautista bilang katupadan kan profesia sa Isaias 40,3 na “sarong tingog nagkukurahaw sa kadlagan”. An saiyang kurahaw: “Andama nindo an dalan para sa Kagurangnan, tanosa nindo an Saiyang aagihan.”

Pàno kita maandam para Saiya? Pàno an pagtanos kan Saiyang aagihan? Sa paagi nin pagbakle asin pagbago nin buhay. Sabi sa evangelio, an mga tawo na nagdadarangog ki Juan Bautista nagkurumpisal kan saindang mga kasàlan asin saiyang binoronyagan sa Salog Jordan bilang tanda kan saindang kamàwotan na magbago nin buhay.

Pagtanos nin isip. An kapinònan nin anoman na pagbabago iyo an pag-ako na kita nasalà sa pakasabot – naghona kita na makukua ta an kaogmahan sa mga saláng bagay, o naghona kita na an salâ tamà, asin an tamà salâ. Iyo ini an natura nin tentacion: na kita lansehon sa kun ano an tama asin marhay, an nakakapaogma asin nagdadanay.

An sunod iyo an pag-ayon kan satong isip asin boot sa kadunongan asin kabôtan kan mahal na Dios. Sabi sa 2 Pedro 3,9: “habo Niya na igwa nin mawara kundi na an gabos magbagong-buhay”. Ini an boot sabihon kan pagtanos kan Saiyang aagihan: na an satong kabôtan nakaayon na sa katanosan kan Kagurangnan.

Pagbago nin puso.  An pagbago bako sana sa isip, sa pagtubod  sa tamang doctrina o katukdoan moral, kundi sa pagpararom kan satong pakiibahan sa mahal na Dios. An pagbakle sarong reconciliacion (kaya ngani ini an ngaran kan sacramento nin pagkumpisal asin pagpatawad) asin pagrahay kan naraot na pag-ibanan niato asin nin Dios.

Sabi ni Cristo sa Juan 14,6: “Ako an dalan, an katotoohan, asin an buhay, dai nin makakaduman sa Ama kun bako Sako”. An Dios na nagpamidbid na Ama asin si Cristo na nagpamidbid na Aki, padagos na nagpapamate sato kan Saiyang pagkaherak asin nag-iimbitar sa mas hararom pang pag-iribanan sa paagi kan Espiritu na yaon nag-eerok na sa satong puso nin huli sa gracia nin bonyag na inako niato.

Paglingkod sa gibo. Si Juan Bautista nagsasaksi sa saiyang pangapodan bako sana sa tataramon kundi sa gibo. Sa saiyang kasikatan dai nawara saiya an saiyang mision: na ipamidbid si Cristo sa katawohan. Sabi niya sa Juan 3,30: “kaipuhan Siyang magdakula, lagad ako kaipuhan na magsadit”.

An saiyang paglingkod na mahigos asin mapakumbaba sarong makusog na pagsaksi laban sa kultura nin pagkamakasadiri, kapaabaw-abawan, asin pagkauri. Siring ki Cristo na  nagsaksi sa radical na pagsunod sa kabotan kan Ama, si Juan Bautista nag-atang man kan saiyang buhay bilang consequencia kan saiyang mision.

Sa panahon nin Adviento an pangapodan sa pag-andam sa dalan para sa Kagurangnan nangangahulugan nin pagtanos  kan satong isip asin pag-ayon sa kabôtan nin Ama; nin pagbago kan satong  puso asin pagpakarhay kan naraot tang relacion sa Dios; asin pag-ayon  kan satong gibo na magin kasangkapan kan pagkamarahayon asin pagkaherak kan Kagurangnan.

   

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia nin pagkawara sa dalan asin pagbabago pasiring sa Kagurangnan.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Magbantay Kamo!

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Nobyembre 29-Disyembre 5, 2020. Basahon an Evangelio gikan sa Marcos 13,33-37 (Enot na Domingo nin Adviento).

Magbantay kamo!”Nagkapirang beses ini sinabi sa evangelio. Ano an satong babantayan? An pagdatong ni Jesu Cristo. Naglaog na kita sa panahon kan Adviento. Sa panahon na ini, may nagkapirang pagdatong si Jesu Cristo na satong sinecelebrar asin dapat bantayan.

An Adviento pag-andam sa celebracion kan Pasko nin Pagkamundag, an enot na pagdatong ni Jesu Cristo. Orog sa mga decoracion, pagkaon, o regalo, orog sa gabos na preparacion iyo an pag-andam kan satong puso asin espiritu sa maabot na Pasko.

An Adviento pag-andam sa ikaduwang pagdatong ni Jesu Cristo.

An Adviento pagpadagos kan satong pagtalubo tanganing magin siring ki Cristo.