Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Pebrero 12-18, 2023. Basahon an Evangelio gikan sa Mateo 5,17-37 (Ikaanóm na Domingo sa Ordinariong Panahón).
…
Sa evangelio si Jesus nagsabi : “Daí kamo maghonà na nagdigdi ako sa pagparà kan Tugon o mga Profeta; daí ako nagdigdi sa pagparà kundî sa pag-utób” (Mateo 5,17). Anó an boót Niyang sabihon kainí?
Na si Jesus an kapanoan kan pagpamidbíd
nin Diós. Nasusurat sa Hebreo 1,1-2: “Kaidtong panahón sa kadakul na beses asín
sa manlaen-laen na paagi, nagtarám an Diós sa satong mga ginikanan huli kan mga
profeta. Alagad sa mga huríng aldaw na iní nagtarám Siya sato huli sa Saiyang
Aki.”
An Saiyang katukdoán iyó nanggad an katotoohan
dapit sa kabòtan nin Diós para sa tawo asín sa Saiyang Kahadean. Sabi pa ni San
Pedro sa Juan 6,68: “Sa kiisay pa kami maduman, Kagurangnán? Yaon sa Saimo an
mga tataramon nin buhay na daíng kasagkoran.”
Sinabi iní ni Jesus nin huli ta may
mga nagsasabi na nagtutukdò Siya nin tumang sa nasusurat sa mga Tugon (Genesis,
Exodo, Levitico, Deuteronomio, asín mga Bilang) asín nin mga Profetas. Daí Niya
sinasalidahan an Banál na Kasuratán, kundî tinutukdò Niya an tunay na kahulugán
kainí – na nálingawan o nasasalâ sa katukdoán kan mga escribas asín Fariseos.
Kayâ sinabi Niya sa Mateo 5,20: “Kun
an saindong katanosan daí lumampás sa katanosan kan mga escribas asín Fariseos,
daí kamo makakalaóg sa Kahadean nin langit.” Anó namán an kahulugán kainí?
An katanosan na hinahanap ni Jesus daíng
ibá kundî an maimbod na pag-utób sa kabòtan kan Ama. An katanosan kan mga
escribas asín Fariseos iyó an paggamit ninda kan Banál na Kasuratán alagad
susog sa sadiri nindang kaisipan asín kabòtan. Matanos sinda sa sadiring paghonà
(self-righteous), alagad bakô sa matá nin Diós. Kun an satong katanosan
makaarog sainda, marháy giromdomón an madóon na sinabi ni Cristo sa Mateo 7,21:
“Bakô gabos na nag-aapod Sako, ‘Kagurangnán, Kagurangnán’, makakalaóg sa Kahadean
nin langit, kundî an naggigibo kan kabòtan kan Sakong Amâ na nasa langit.”
Kayâ pinakarháy Niya para sa mga tawo
an katukdoán dapit sa mga tugon na tinaó nin Diós ki Moises.
Sabi ni Moises, daí ka manggadán.
Sabi ni Jesus, daí magtanóm nin dagit, igalang an dignidad nin kapwa, asín
makipag-olian sa kalaban. Anó an sinasabi Niya sa pagsuporta nin kadakul na
Cristiano sa pulitika nin garadanan para daá sa seguridád nin saindang pamilya?
Sabi ni Moises, daí ka magsambáy.
Sabi ni Jesus, likayan an mga marigsók na pag-isip sa kapwa asín rayoan an mga tentación
sa lamán. Anó an sinasabi Niya sato ngonian dapit sa media asín sociedád na panô
nin imahe nin sexualidád asín imoralidád?
Sabi ni Moises, pwede an divorcio.
Sabi ni Jesus, daí pagraotón an pag-ibahan nin mag-agóm. Anó an sinasabi Niya sato
ngonian dapit sa pagsulong nin divorcio sa Congreso?
Sabi ni Moises, daí magsumpâ nin basang
asín utobón an panugâ sa Kagurangnán. Sabi ni Jesus, daí kaipohan magsumpâ kundî
magsabi pirmi nin katotoohan. Anó an sinasabi Niya sato ngonian na lakopon na an
paggamit nin fake news asín kaputikan sa social media asin nin mga opisyales
nin gobyerno?
Hanggang sa ngonian an Saiyang katotoohan padagos na inaagyat an satong mga kaisipan asín kultura tanganing tabangan kitang magpilì. Nin huli ta nasusurat sa Sirach 15,17: “Sa atubang nin tawo yaon an buhay asín kagadanan, itátao saiya kun arín an saiyang pipilion.”
…
GIYA SA PAGHIRÁS SA SADÍT NA
KOMUNIDAD O PAMILYA • Maghirás nin experiencia nin pag-utób nin arin man sa
mg ini: “Daí ka manggadán”; “Daí ka magduróg sa bakô mo agóm”; “Daí ka
magsaksing-putik”.
PASUNÓD-SUNÓD KAN WEEKLY SAKOP/FAMILY
PRAYER-MEETING • Kumustahan/Pamiridbidan • Disposition to Prayer / Silence •
Gathering Song • Opening Prayer • Gospel Reading • Reflection • Sharing • Prayers
of the Faithful • Closing Prayer (Spontaneous and Our Father) • Closing Song
No comments:
Post a Comment