Nin Huli ta si Cristo Binuhay-liwát

 

Giya sa Prayer-Meeting nin mga Saradít na Komunidad nin Pagtubód (SAKOP) para sa OCTAVA KAN PASKO KAN PAGKABUHAY-LIWÁT, Marzo 31-Abril 6, 2024. Basahon an Evangelio gikan sa Juán 20,1-9 (Domingo kan Pasko kan Pagkabuhay-liwát).

…

Allelúia! SI Jesu Cristo, satong Kagurangnan, nabuhay-liwát! Sabi sa Psalmo 118,24: “Iní an aldaw na ginibo nin Kagurangnan; mag-ogmá kita asín magrokyáw!” Kayâ an enot na aldaw kan semana kun noarín nabuhay-liwát si Cristo, pigcecelebrár na kaidto pa mán kan suanoy na Simbahan bilang bâgong Aldaw kan Kagurangnan; asín hanggang ngonian an cada celebración nin Domingo, saróng sadít na celebración kan Domingo kan Pasko kan Pagkabuhay-liwát.

An Pasko kan Pagkabuhay-liwát iyó an patugmadan na misterio kan satong kaligtasan, kayâ nganì nakapagsabi si San Pablo sa 1 Corinto 15,14: “Kun si Cristo daí binuhay-liwát, sayang an samong pagtukdô, asín sayang an saindong pagtubód”.

Kan Viernes Santo, piggiromdóm niato an Saiyang pagsakit, pagkagadán, asín paglubóng. Kan Sabado de Gloria, an Saiyang paghilig sa mga gadán, kun saen dinará Niya an Saiyang liwanag asín Marhay na Bareta sa mga naenot nang nagkagaradán na mga matanos asín banál. Asín sa Saiyang pagkabuhay-liwát, binuksán Niya an pintoan nin langit para sainda asín para sato gabós.

Nin huli ta si Cristo binuhay-liwát, anó an satong manínigóng simbag? Minákusóg an satong paglaom, minabàgo kita kan satong pagtubód, asín minádará kita kan Marhay na Baretà nin pagkámoót.

Minákusóg an satong paglaom.

Sabi ni San Pablo sa Roma 6,5: “Kun kita nakisumarò sa kagadanan na siring Saiya, makakabaíng man kita sa Saiyang pagkabuhay-liwát.” Makakalaom kita na kita man mabubuhay-liwát huli ki Cristo. Siring man tinatàwan kita nin paglaom na an satong mga inaagihan na pagsakit asín sacrificio matatapos man sa kamurawayan asín kaogmahan.

Para sa mga nasasakitan asín nagmumundò, sa mga nagtitios huli sa kadukhaán, sa mga naghehelang asín may kamatean, sa mga nabubuhay sa makuring takot huli kan violencia, sa mga nagpapagal na garó daí nin padumanan – an Pagkabuhay-liwát nagtátaóng paglaom na an satong mga sacrificio daí masasayang, asín an diklom na inaagihan siguradong may katapusan.

Minabàgo kita kan satong pagtubód.

Sa mga Misa sa Domingo de Resurrección, ginigibo an Pagbâgo kan Panugâ sa Bonyag. Igwa ini nin duwáng kabtang: an pagsikwál ki Satanás, sa saiyang mga padayà, asín mga gibong kasâlan; asín an pagpahayag nin pagtubód sa Diós Amà, Akì, asín Espiritu Santo, asín mga gibo kan Espiritu, kaiba na an satong Simbahan.

Kun kita naggibo kan mga disiplina kan Cuaresma asín mga pagsa-Diós sa Semana Santa, maninigò lamang na akoon ta an gracia nin bâgong buhay sa Pasko. Dangan sabi sa Colosas 3,1: “Kun binangon kamo kaiba ni Cristo, hanapon nindo an nasa itaas”.

Minádará kita kan Marhay na Baretà nin pagkámoót.

Siring na dinará ni Maria Magdalena an baretà kan Resurrección ki Pedro asín sa ibang mga disipulos; siring na dinará kan duwáng disipulos hale sa Emmaus an istorya kan encuentro ninda ki Cristo sa mga disipulos sa Jerusalém; kita man inaapód na darhon an Marhay na Baretà lalò sa kapwang nangangaipo asín nasasakitan.

Si Cristo nagtaóng bâgong tugon sa Juan 13,34: “magkaminoroót-mootan kamo siring na namòtan ko kamo”. Kayâ pinapakusóg Niya an satong paglaom asín binabàgo an satong pagtubód, bakô saná para sa satong sadiri kundì tanganing mahirasan ta man an kapwang nangangaipo nin paglaom asín pagtubód.

…

GIYA SA PAGHIRÁS SA SADÍT NA KOMUNIDAD O PAMILYA | Sa anóng paagi mo ikakapahayag sa kapwa an Marhay na Baretà kan Pagkabuhay-liwát? May naiisip kang kapwa na nangangaipo kaining Marhay na Baretà?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the Faithful • Closing Prayer (Spontaneous and Our Father) • Closing Song

 

An Kenosis kan Satong Kagurangnan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana Santa, Marzo 24-30, 2024. Basahon an Evangelio gikan sa Marcos 14,1 -15,47 (Domingo de Ramos - B).

…

An Evangelio iyó an version ni San Marcos kan Pasión ni Jesu Cristo, poón sa pamanggi sa Betania hanggang sa Saiyang pagkagadán sa cruz asín paglubóng. Iní an istorya kan mga aldaw sa Semana Santa. Lalò na pag-abót kan Jueves Santo, satong icecelebrár an Misterio Pascual ni Jesu Cristo: an Saiyang pagsakit, pagkagadán, asín pagkabuhay-liwát.

Anó an pinakamensahe sato kan Semana Santa? Iyó na an satong Diós namoot na gayo sato asín ilinigtas kita sa kaoripnán nin kasâlan sa paagi kan sacrificio ni Cristo. Sabi sa Filipos 2,6-7: “Dawà yaon sa forma nin pagaka-Diós, daí Siya nagpahonà na makapantáy an Diós, na sasalomón, kundî nagpakadaí sa sadiri, inakò an pagka-oripon, nagín siring sa mga tawo”.  

Kenosis sa Griego an apód kainíng pagpakadaí sa sadiri, iníng labi-labing pagpakumbabâ na ginibo ni Jesús.

Sa istorya kan Pasión lalò na mahíhilíng ta an mga pagpakadaíng iní:  an pagpasaluib ni Judas, an pagnegár ni Pedro, an pagdurulág kan mga disipulos, an pagdakóp asín pagpasakit Saiya, an mga insulto asín pasupog, an pagpâsan kan cruz asín pagpakò Saiya, hanggang sa maubos an Saiyang buhay dumán sa cruz.

Sa ibóng na lado, kabaligtarán nin kenosis an pinahilíng kan Saiyang mga kaiwal asín parapasakit. Panò-panò sinda kan saindang sadiri. An saindang palusót para ipagadán si Jesús: para daá sa “ikakaligtas kan banwaan” (iní an argumento ni Caifas sa Juán 11,50); an pagkaráw asín pagpasakit ki Jesús kan mga soldados na Romano asín mga tawohan kan mga poón na padì; an saindang pag-ológ-olog mantang Siya naghihingagdan sa cruz.

An pangapodan sato sa Semana Santa iyó na makisumarò sa pagpakadaí ni Jesús sa Saiyang sadiri.

Linawon ta na sa hampang kan istruktura nin kasâlan sa sociedád, kan mga  violencia, korupsyon, asín abuso sa kapangyarihan, an pagpakadaí sa sadiri bakô an pag-akò na normal asín daí na mababàgo an mga iní. Kundî an pagtubód sa Diós na nagpapangyari kan Saiyang kabôtan sa paagi kan kapakumbabaan asín katanosan kan Saiyang mga sorogoón.

An babaeng nag-ulà nin mahál na olór sa payó ni Jesús huli sa pagkamoot Saiya, nagrerepresentar sa mga tawong nagmamàwot magpakadaí siring ki Jesús sa saindang sadiring paagi. An inagihan ni Pedro – poón sa saiyang kahambogan, sa pagnegár ki Jesús, sa pagtangis sa saiyang kasâlan, hanggang sa pag-akò giraray kan misyon na pamayohán an Simbahan na winalat ni Cristo – pangarogan siring man sa dalan nin kenosis.

Sa paghorop-horop niato kan Pasión ni Jesu Cristo, makisumarò kita sa Saiyang sacrificio, asín gibohon an satong sadiring mga kadificilan, paghingowa, asín pangaturogan sa buhay na satong atang sa Amâ na halè sa malinig na pusò asín boót. Daí lugód kita madagka sa dalan nin pagkamakasadiri asín kapangyarihan. Asín daí matakot na mag-agi sa pagsakit o kagadanan man kun para sa Kagurangnan asín sa Saiyang Kahadean.

Sabi ni San Pablo sa Roma 6,3-5: “Daí nindo naiintindihan na kita gabós na binonyagan ki Cristo Jesús, binonyagán sa Saiyang kagadanan? Kun siring, huli kan bonyag ilinubóng kita damay Saiya sa kagadanan, tanganing siring na binangon si Cristo halè sa mga gadán huli kan kamurawayan kan Amâ, kita man maglakáw sa kabâgohan nin buhay. Ta, kun nagi Niya kitang katubò sa kagadanan na siring kan Saiya, talagáng makakahirás man kita sa pagkabuhay-liwát.”

…

GIYA SA PAGHIRÁS SA SADÍT NA KOMUNIDAD O PAMILYA | Sa panahon kan Semana Santa, anóng mga inaagihan tang pagsakit o kadificilan an boót tang iayon sa sacrificio na ginibo ni Jesu Cristo?

PASUNOD-SUNOD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the Faithful • Closing Prayer (Spontaneous and Our Father) • Closing Song

The Voice of Evil

 

Homily on John 11, 45-56 (Saturday in the Fifth Week of Lent)

...

If there is a top bible passage that represents evil in this world, I submit John 11,49-50, which says: "But one of them, Caiaphas, who was high priest that year, said to them, “You know nothing, nor do you consider that it is better for you that one man should die instead of the people, so that the whole nation may not perish.”

His was not a voice of reason, rather it was a rationalization, and one that would solidify the Sanhedrin's plan to eliminate Jesus. Finally they have a pseudo-moral argument to cover up their insecurities and disdain of Jesus, a clear and simple messag to communicate to their audience of supporters and dependents.

It would be the whereas clause to their order "that if anyone knew where he was, he should inform them, so that they might arrest him" (John 11,57) -- which Judas Iscariot would pick up. It would then be tweaked into a slightly different angle for Pontius Pilate, in order to pressure him to impose on Jesus the death sentence reserved for those who would dare challenge the empire and the emperor.

This is the voice of evil. Across generations we would hear the same voice in the mouths of terrible despots and dictators justifying the massacre and economic destruction of many; in legislators using lofty social goals in laws that allow their kind to commit corruption and plunder of public funds; in petty tyrants and power-tripping functionaries imposing their will on those below them; in Church leaders using ministry for personal gain; in parents, elders, and superiors exploiting children and the vulnerable under their care.

And then there was the voice of Jesus who remained mostly silent at the onslaught of disinformation and violence heaped upon him. This voice which commanded evil spirits to flee, the blind to see, the deaf to hear, the lame to walk, the dead to rise; this voice through whom everything was created -- at that moment chose to be silent. Except for when he would confess that he was indeed the Son of God. And then, as he was dying on the cross, his choice words for his persecutors were of mercy and compassion: "Father, forgive them, they know not what they do" (Luke 23,34).

The temptation for many of us, myself included, is to fight evil with evil. They started it after all. We delight in witty repartees that score points over opponents, rather than reconcile. And so we listen not to understand, but in order to respond.

The response of Jesus to the voice of evil is an invitation to follow his path. It is one of silence as a prelude to real listening and dialogue. It is one of mercy to break the cycle of violence. For only by the Word made flesh, who models for us the greatest love, will we win over evil -- words, deeds, structures, histories -- in this world.

 

Natà ta Kaipuhan pa ni Jesús Magadán?

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marzo 17-23, 2024. Basahon an Evangelio gikan sa Juán 12,22-30 (Ikalimáng Domingo kan Cuaresma - B)

…

Sabi ni Jesu Cristo sa Juán 12,24: “Kun an tipasì nin trigo na nahulog sa dagâ daí magadán, padagos na iyó saná iyán; alagad kun magadán dakúl an ibinubunga.” Bâgo maglaóg an Semana Santa iníng Evangelio pinapalaóg na kita sa Misterio Pascuál ni Cristo: an Saiyang pagsakit, pagkagadán, asín pagkabuhay-liwát.

Natà ta kaipuhan pa ni Jesús magadán?

Nin huli ta iyó iní an binoót kan Diós Amâ na sacrificio tanganing maligtás kita sa kasâlan. Bilang tawong totoo, pigrerepresentár ni Jesús an katawohan sa hampang kan Amâ. Siya an satong Halangkáw na Padì na pagultanan kan Diós asín tawo. Bilang Diós na totoo, Siya an perfectong sacrificio na iyó saná an makakaparà kan mga kasâlan nin katawohan. Sabi sa Hebreo 5,9: “Kan Siya nalubós, nagi Siyang dahilán nin kaligtasan na daíng kasagkoran sa mga nagkukuyog Saiya.”

An tradisyon nin pagdolot nin sacrificio tinugon nin Diós ki Moisés para sa Saiyang banwaan. An mga tawo nag-aatang nin mga hayop sa Diós bilang kabayadán sa saindang kasâlan. Sa hurí, makukuá an pinaka-kahulugán kan tugon asín tradisyon na iní sa sacrificio ni Cristo na nagin kabayadán sa mga kasâlan niato gabós.

Sa paagi kan Saiyang sacrificio, tinutukdoán Niya kita kun anó an tunay na pagkámoót. Sabi Niya sa Juán 15,13: “Oróg kainíng pagkámoót mayò an siisay man: na idusay an saiyang kalág para sa mga katood.” Maski an Saiyang mga kaiwal namòtan Niya bilang katood. An mga nagplano kan Saiyang kagadanan asín nagpasakit Saiya, daí Niya binalsán nin kakurihan ni violencia, kundî kapatawadán asín pagkaherak. Kayâ si Cristo an sacrificio kan Amâ para sa katawohan, an pangenot na tandâ asín pagiromdóm sa gabós na kapag-arakian kan Saiyang oróg kadakulang pagkámoót asín pagkaherak.

Natà ta kaipuhan ta man magadán?

Nin huli ta kita mga disipulos ni Cristo. Sinabi Niya sa Juan 12,25-26: “An namómoót sa sadiring kalág, mawawàran kaiyan, alagad an naóongís sa sadiring kalág sa kinâban na iní, mapadanay kaiyán para sa buhay na daíng kasagkoran. An siisay man na naglilingkod Sako, Sakuya magsunód asín kun saén Ako, dumán man an Sakong paralingkod.” An hinahagad ni Jesús bakô an basang na paglaág sa sadiri sa peligro kundî an pagpagadán sa mga kasâlan.

Magadán kita sa satong kaluyahan nin boót, asín daí pagdulagán an satong mga problema asín katongdán. Akoon ta an mga iní bilang satong cruz, asín makúkuá ta si Cristo na kaibahan niato sa pagpâsan. Asín kun kaiba ta Siya, sabi ni San Pablo sa Filipos 4,13: “Gabós kaya ta sa Saiya na nagpapakusóg sato”.

Magadán kita sa satong sadiring katanosan asín pagsarig sa saláng kapangyarihan. An mga naghahadê-hadéan sa satong banwaan ngonian boót na isikwal ta an mga tugon nin Diós – daí ka maggadán, daí ka maghâbon, daí ka magsaksing-putik. Binabakál ninda an boót asín boses nin mga tawo nin kwartang bakô man sainda kundî sa kabán kan banwaan. Sabi sa Psalmo 146,3: “Daí kamo magsarig sa mga prinsipe, ni sa mga akì ni Adán na daí makakapagligtás”.

Magadán kita sa pagkaarà sa mga bagay na kinâbanon. Sabi nganì sa Mateo 16,26: “Anó an mapapakinabangan nin tawo kun ganahon niya an bilog na kinâban alagad mapierde an saiyang kalág?” Kundî magadán kita sa satong makasâlan na sadiri tanganing magin bâgong tawo susog sa graciang tinátaó ni Cristo. Makimaherak kita sa Diós Amâ, siring kan pamìbì sa Psalmo 51,12: “Pusong malinig lalalangá sako, O Diós, asín espiritung andam bâgohá sa boót ko.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin pagpagadán sa sadiri. Namatean mo si Jesús na kaiba mo sa pagpâsan?

PASUNOD-SUNOD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the Faithful • Closing Prayer (Spontaneous and Our Father) • Closing Song

An Diós Námoót na Gayo sa Kinâban

 

Giya sa Prayer-Meeting nin mga Saradít na Komunidad nin Pagtubód (SAKOP) Para sa semana kan Marzo 10-16, 2024. Basahon an Evangelio gikan sa Juan 3,14-21 (Ikaapat na Domingo kan Cuaresma - B).

…

Sa Evangelio, sa istoryahan ni Jesu Cristo asín Nicodemo, saróng Fariseo asín poón nin banwaan, pigpaliwanag ni Jesús an misterio nin Diós na namoot sa sato. Nin huli ta namòtan kita nin Diós, an satong paghorop-horop sa pagsakit asín pagkagadan ni Cristo sa Cuaresma, aram niato na daí matatapos sa trahedya kundî sa panggana: sa Saiyang pagkabuhay-liwát asín sa satong kaligtasan.

Kayâ an Ikaapát na Domingo kan Cuaresma ináapód na Domingo de Laetare (boót sabihon “mag-ogma”) nin huli ta an pagsakit asín kamundoan minaagi saná, alagad an kaogmahan asín pagkámoót nin Diós magdadanay sagkod pa man. Anó an pinaliwanag ni Cristo dapít sa misterio kan pagkámoót nin Diós? Asín anóng mga saláng paghonà nin katawohan an boót Niyang itamà ta?

An pagkámoót nin Diós maimbod asín daí nagsusukò sato. Para sa mga naghohonà na nin huli sa saindang kasâlan, daí na nin pag-asa, iní an simbag ni Jesús sa Juan 3,16: “An Diós námoót na gayo sa kinâban, kayâ itinaó Niya an Bogtong Niyang Akì, tanganing an gabós na nagtutubod Saiya daí máwarâ, kundî magkamít nin buhay na daíng kasagkoran”. Sabi man ni San Pablo sa Efeso 2,4-5: “An Diós na mayaman sa karahayan, huli kan dakulang pagkámoót Niyang gayo sato, mantang kita gadán sa satong kalapasan, binuhay kita kaiba ni Cristo.”

Kayâ kun kita halóy na panahón nang narayô sa Kagurangnan, daí nakakapagsimba ni makapangadyî lamang; kun an satong buhay náraót nin kasâlan o nahulog sa addiction sa bisyo – giromdomón na may Diós na daí nag-oontok sa pagkámoót sato.

An satong kaligtasan itinaó nin Diós ki Cristo. Para sa mga naghohonà na an saindang sadiring katanosan tamà na para sa Kahadean nin langit, pinapagiromdóm na sa paagi saná ni Cristo makakamtan an kaligtasan. Sa Juan 3,14, si Jesús nagsabi ki Nicodemo: “Kun pâno ni Moisés initaas an halas sa desierto; siring kaipuhan iítaas an Akì nin Tawo, tanganing an gabós na nagtútubód Saiya, magkaigwa nin buhay na daíng kasagkoran.”

An pigtutukoy ni Jesús na halas iyo an bronzeng halas sa libro nin mga Numero 21,6-9, na pinagibo nin Diós ki Moisés tanganing iítaas sa tukón asín an mga Israelita na nakahilíng kainí nabulóng asín daí nagkagaradán. An mensahe iyó na iníng mga Israelitang nagrebelde sa Diós daí man kayang iligtas an saindang sadiri kundî an Diós an nagpadará kan saindang kaligtasan. Siring man, daíng siísay man – gurâno man katanos, kadunong, o kabanál – an kayang palaogón an sadiri sa langit, kundi an gracia nin Diós an nagliligtas sato. Sabi nganì ni San Pablo sa Efeso 2,8-9: “Ta sa gracia kamo mga ilinigtás huli kan pagtubód; tanganing mayò nin magpaabáw-abaw”.

An kaligtasan naghahagad kan satong pagbâgong-buhay.  Para sa mga naghohonà na an pag-akò ki Cristo basang saná asín daí naghahagad nin pagbâgo kan sadiri, pinapagiromdom na Siya duminatóng bilang ilaw na minaparà sa kadikloman nin kasâlan. Sabi ni Jesús sa Juan 3,20: “An gabós na naggigibo nin daíng-data, naóongis sa ilaw, asín daí nagdodolok sa ilaw, tanganing daí masudyâ an saindang mga gibo.”

Para sa mga nagtútubód alagad daí pa sinisikwal an kasâlan, may patanid si Cristo sa Mateo 7,21: “Bakô gabós na nagsasabi Sako: ‘Kagurangnan, Kagurangnan!’, makakalaóg sa Kahadean kan langit kundî an naggigibo kan boót kan Amâ kong yaon sa langit.”

…

GIYA SA PAGHIRÁS SA SADÍT NA KOMUNIDAD O PAMILYA | Maghiras nin experiencia kun pâno mo namatean an pagkámoót asín pagkaherak nin Kagurangnan.

PASUNOD-SUNOD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the Faithful • Closing Prayer (Spontaneous and Our Father) • Closing Song

 

Si Jesu Cristo asín an Templo

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marzo 3-9, 2024. Basahon an Evangelio gikan sa Juan 2,13-25 (Ikatolóng Domingo kan Cuaresma - B).

…

Garó ibáng klaseng Jesús an pig-iistorya sa Evangelio.  Garó bakô Siya su pig-aawit na “O heart of Jesús, meek and mild”.  Nadagit Siya, namakol gamit an binugkós na pisì, pinabalintok an mga lamesa kan mga pararibay nin kwarta, asín pinalayas an mga paratinda kaiba an mga hayop na pigpapabakal ninda sa lugár kan Templo sa Jerusalem. Natà ta ginibo Niya iní?

Nagtutukdò si Jesu Cristo dapít sa bolanos na pagsa-Diós.

Kan mahiling kan mga disipulos an ginibo ni Jesús naromdoman ninda an profesía sa Psalmo 69,9: “An pag-imón ko sa saimong haróng minatunaw sako”. Bakô saná na pigtuyaw Niya an mga saláng gibo sa sagradong lugár kan Templo kundî pigtamà Niya man an mga saláng pakasabot dapít sa bolanos na pagsa-Diós, lalò na an mga saláng pagpadára kan mga namámayó sa Israel.

Susog sa Ley ni Moisés, maninigò lamang na magdolot nin sacrificio para magpasalamat sa Kagurangnan asín maghagad nin kapatawadán. Alagad sa pag-agi nin mga panahón may mga saláng patakarán na dinagdag sa tugon na iní, siring bagá kan pagribay nin kwarta na dapat iatang sa Templo ta daí daá pwede an ordinariong kwarta nin huli ta an mga iní maatî. Sa negosyo nin pagribay may mga dayaán. Siring man an pagpabakal sa lugár kan Templo mismo nin mga hayop na pwedeng iatang, na monopolyo kan poón nin mga kapadian.

Iníng mga saláng pasunód nagin pang pagabát sa mga dukhang paratubod na boót magdolot nin atang sa Templo. Kayâ sinabihan sinda ni Jesús: “Daí nindo paggibohon na saodan an haróng kan sakong Amâ.” Sa ibáng mga Evangelio dinagitan man sinda ni Jesús ta ginibo ninda an Templo na “lungib nin mga parahâbon”.

Sa satong Simbahan, kaidto pang 1991, sa Ikaduwáng Concilio Plenario kan Pilipinas (PCP II), sinabing dapat haleon na an sistemang arancel, o an bayad sa lambang pagcelebrár nin sacramento, nin huli ta iní nakakauláng sa tamang pakasabot sa mga sacramento, asín sa pag-akò sa mga iní kan mga dukhâ. Sabi nganì sa Mateo 10,8: “Nag-akò kamo nin daíng bayad, kayâ magtaó man kamo nin daíng bayad.” Padagos an pasabóng asín paghirô kan Espiritu sa danay na pagpakarhay kan Simbahan.

Pâno an bolanos na pagsa-Diós asín pagdolot? Sabi sa Psalmo 51,18-19: “Ta daí Ka namumuya sa sacrificio, kun magdolot ako nin tinutóng na atang, daí Mo iyan mamarhayón. An sakong sacrificio, O Diós, espiritung nagsosolsol; pusong mahuyo asín nagsosolsol, O Diós, daí Mo hinahamak.”

Si Jesu Cristo an presencia nin Diós sa kinâban.

An istoryang iní yaon sa apát na Evangelio, alagad ki San Juan pinararom pa an mensahe kan nagsabi si Jesús: “Gabaá nindo an Templong iní asín sa tolóng aldaw babangonon Ko.” Asín pinaliwanag na Siya “nagsasabi dapít sa Templo na iyó an Saiyang hawak.” Oróg na mahalagá an Templo sa Jerusalem para sa mga Judío nin huli ta iní an tandâ kan presencia nin Diós sa saindang banwaan. Sa laóg kan Templo yaon an Arka kan Tipan, an tableta kun saén nakasurat an mga Tugon na tinaó nin Diós mismo ki Moisés. Alagad anóng sinabi kan saróng tandâ o simbolo kun an mismong Diós na nanitawo na an nasa tahaw ninda? Sayang ta sinikwal ninda Siya.

Sabi ni San Pablo sa 1 Corinto 1,22-24: “Ta, mantang an mga Judío mga tandâ an hinahagad, asín an mga Griego kadonongan an hinahanap: kami, ihinaharubay mi si Cristo na ipinakò sa cruz: sa mga Judío padungkalan, sa mga gentil kalolongán, alagad sa mga inapód – Judío o Griego – si Cristo, kapangyarihan nin Diós asín kadonongan nin Diós.”

Ngonian na Cuaresma, pinapahorop-horop kita sa satong consiencia kun bagá: inaako ta daw si Jesús sa bolanos na pagsa-Diós o nasisikwal ta man Siya sa pagpilì ta na paorogón an sadiring kabôtan kisa an matanos sa Saiyang ngaran? Napapahalagahán ta daw an Saiyang presencia sa lambang tabernaculo sa mga simbahan? Boót ta daw na magrarom pa an pakamidbid Saiya sa pag-adal nin Biblía asín pagpamìbì? Namomôtan ta man daw an Saiyang mga namomôtan? Naoongís man daw kita sa mga bagay na Saiyang kinakaongisán?

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin mga bagay na saimong kinakaongisán nin huli ta iní kontra sa Cristianong pagtubód o katanosan. Anó an ginibo mo dapít kainí?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the Faithful • Closing Prayer (Spontaneous and Our Father) • Closing Song