Kun si Cristo an Satong Hade

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Noviembre 21-27, 2021. Basahon an Ebanghelyo gikan sa Juan 18,33-37 (Solemnidad ni Cristong Hade - B) .

…

Ining ebanghelyo sa Solemnidad ni Cristong Hade dai nag-iistorya ki Jesu Cristo bilang mamuraway na hade na nakatukaw sa Saiyang trono. Kundi bilang sarong preso na pinapasupog asin napapairarom sa interogacion sa korte ni Poncio Pilato. Ipinahayag Niya na Siya man nanggad hade, alagad bako siring sa kaisipan ni Poncio Pilato asin kan Imperio Romano. Kaya Siya hinukuman nin kagadanan, asin an saiyang krimen nakasurat sa pamayohan kan krus na pinagpakoan Saiya: INRI (Iesus Nazarenus Rex Iudaeorum, Jesus Nazareno Hade kan mga Judío).” Ano man nanggad an boot sabihon kan pagkahade ni Cristo?

Siya an Hade nin langit asin daga.  Sa ebanghelyo sinabi ni Jesus ki Pilato na an Saiyang kahadean bako sa kinaban na ini. Siya an hade nin langit. Asin sa Daniel 7,14, pigprofesía na sa Aki nin Tawo “itinao an kapangyarihan, kamurawayan, asin kahadean. Nagin surugoon niya an mga tawo sa  gabos na banwaan asin gabos na tataramon.” Sa Kapahayagan 1,5, inapod Siyang “hade kan mga hade sa daga”.

Alagad kan tinawan ni Pilato an mga Judío nin oportunidad na paluwason si Jesus na hade asin pinapili sinda, Siya o si Barrabas na mahabas, pinili kan mga tawo si Barrabas. Hanggang ngonian pinipili pa man giraray nin kadakul na tawo an mga mahabas, an mga parautik, asin an mga paragadan.

Kun si Cristo an satong hade, pipilion ta Siya asin an Saiyang Ebanghelyo bako an padagka asin panlalanse kan mga makapangyarihan sa satong rona. An Saiyang paarog asin kabotan iyo man lugod an magin mga basehan kan satong pagpipili sa mga pamayo sa satong banwaan.

Siya an Hade sa gabos na panahon. Sa Kapahayagan 1,8, sinabi, “’Ako an Alfa asin an Omega’, olay nin Dios na Kagurangnan, ‘na ngonian, kaidto, asin madatong, an Makakamhan’.” Yaon Siya sa paglalang kan kinaban. Sinabi sa Juan 1,1, “Sa kapinonan iyo an Tataramon; an Tataramon kaibahan nin Dios, an Tataramon Dios”. Sa Credo Niceno-Constantinopolitano, ipinapahayag niato na Siya “nagtutukaw sa too kan Ama. Asin mamuraway na mabalik sa paghukom sa mga buhay asin mga gadan, an Saiyang kahadean daing kasagkoran”.

Kitang mga nabubuhay sa panahon, namotan kan satong hade bago pa kita namundag asin tinatawan nin buhay na daing kasagkoran. Kun si Cristo an satong hade, tinatawan ta man daw Siya nin maninigong panahon sa pagsimba asin pamibi, sa pagmibid pa Saiya asin sa Saiyang kabotan sa pag-adal nin Biblia asin mga katukdoan kan Simbahan, asin sa pagkamoot sa kapwang nangangaipo?

Siya an Hade kan satong buhay. An Solemnidad ni Cristong Hade tinogdas ni Papa Pio XI kan taon 1925, panahon sa Europa kun kasuarin nagpopoon na an pagkusog kan mga ideolohiyang sinisikwal an Dios asin pinapaorog an mga kaisipan nin tawo asin kinabanon na kapangyarihan, siring kan secularismo, comunismo, asin fascismo. Sa saiyang surat na Quas Primas (33) sinabi ni Papa Pio XI: “Kaipuhan maghade Siya sa satong isip sa pagtubod sa mga katotoohan asin katukdoan ni Cristo. Maghade Siya sa satong boot sa pagsunod sa mga tugon asin kabotan nin Dios. Maghade Siya sa satong puso sa pagkamoot sa Dios orog sa gabos asin pakisumaro sa Saiya sana. Maghade Siya sa satong hawak sa pagigin kaining instrumento para sa kabanalan asin kan hustisya nin Dios.”

Kun si Cristo satong hade, andam daw kitang idusay an bilog tang sadiri sa paggibo kan Saiyang kabotan?

…

GIYA SA PAGHIRAS SA SADIT NA KOMUNIDAD O PAMILYA • Maghiras nin experiencia na pinaorog mo an pagsunod sa kabotan ni Jesu Cristong satong hade kisa sadiring kabotan o kinabanon na tentacion.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song