An Evangelio nin Pagkaherak

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Abril 27 – Mayo 3, 2025. Basahon an Evangelio gikan sa Juán 20,19-31 (Ikaduwáng Domingo nin Pasko nin Pagkabuhay-Liwát).

…                                                                                                                                   

An devoción sa Diósnon na Pagkaherak pinalakóp ni Sta. Faustina Kowalska, saróng madreng taga-Poland, na pinahilingán mismo kan satóng Kagurangnan Jesu Cristo nin huli ta boót Niyáng oróg na mamatean nin katawohan an biyayà kan Saiyang pagkaherak. Tinugon Niyá man an pagcelebrár kan Ikaduwáng Domingo nin Pasko nin Pagkabuhay-Liwát bilang Domingo nin Diósnon na Pagkaherak. Kayâ kan taón 2000, kasabáy kan canonización ni Sta. Faustina, pigdecreto ni Papa San Juán Paulo II an celebración kainí sa bilog na Simbahan.

An istorya sa Evangelio ni San Juán iyó an pagpahilíng ni Jesús sa Saiyang mga disipulos nin duwáng beses: enot sa banggi kan aldaw na Siyá nabuhay-liwát, dangan sa banggi giraray makalihis an walóng aldaw. Maninigò iníng istorya sa pagcelebrár kan Domingo nin Diósnon na Pagkaherak, nin huli ta an pagkabuhay-liwát ni Cristo iyó an kapangganahán kan pagkaherak na duminaóg sa pwersa nin karâtan asín kakurihan.

Dinaóg Niyá an takot asín sinalidahan nin katoninongan.

An saradong mga pintoan asín mga lanób kan haróng na pigtaguan kan mga disipulos, patín an saindang pusong tarakót asín suropóg (huli kan saindang pagdurulág kan si Jesús pigpapasakitan), daí nagin uláng sa kapangyarihan nin Saiyang pagkaherak.

An takot ginagamit nin mga makapangyarihan asín maraot tanganing, sa paagi nin pagsaksing-putik, madagit an kadakul sa mga pigpapamidbid saindang kaiwal asín magdolot nin pagkabarangâ sa sociedad – tanganing mamantenér an saindang pagkapót sa kapangyarihan asín mga gibong maraot. Alagad an mga maimbód aram na an katanosan na dará kan pagkaherak nin Diós saná an makákataó nin tunay na katoninongan asín kauswagán para sa gabós.

Dinaóg Niyá an pagduwa-duwa asín sinalidahan nin pagtubód.

Kan nagpahilíng giraray si Jesús, tinâwan Niyá nin atensyon si Sto. Tomás, asín pinarà an saiyang pagduwa-duwa. Nin huli sa gibong herak na iní, nasambit ni Sto. Tomás sa Juán 20,28, an sarô sa pinakamagayón na confesión nin pagtubód sa Biblia: “Kagurangnan ko, asín Diós ko!”

An ginibo ni Cristo na pagpahayag kan katotoohan kan pagkabuhay-liwát, na panô nin pakasabot sa kapurisawan asín krisis na inaagihan ni Sto. Tomás asín mga pag-iribang disipulos, nagtátaóng ehemplo sa paglaban niatò sa presenteng krisis nin disinformación asín kaputikan. Sabi ni Jesús sa Juán 8,32, “katotoohan an magpapatalingkas satô.” Kun arogon ta Siyá sa pagpahayag nin katotoohan na may pagkaherak, dakúl an kapwang madádará niatò halè sa diklom nin kaputikan pasiring sa liwanag nin katalingkasan.

Dinaóg Niyá an pagkamakasadiri asín sinalidahan Niyá nin pagdusay nin sadiri sa pagbalangibog kan Marhay na Baretà.

Sa Evangelio ni San Juán, an paghilig kan Espiritu Santo sa mga disipulos nangyare bakô sa aldaw kan Pentecostes kundî sa enot na banggi na nagpahilíng si Jesús sainda. Kan bangging itó, sinugò Niyá an mga disipulos sa misyon dangan hinangosan sinda kan Saiyang Espiritu. Sa Juán 20,22-23, sinabi Niyá: “Akoa nindo an Espiritu Santo. An kiisay man na kasâlan na saindong patawadon, mapapatawad; an daí nindo patawadon, daí mapapatawad”.

Ngonian na nagmomondò kitá sa pagkagadán ni Papa Francisco, lugód mas ma-apreciár ta an pagbalangibog niyá kan Evangelio nin pagkaherak, asín magin mga mahigós na parahirás man kan Diosnón na Pagkaherak lalò na sa kapwang nangangaipo kainí.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás kun pâno nagin parte kan saimong buhay pagtubód si Papa Francisco asín an saiyang mensahe nin pagkaherak sa katawohan.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Resurrección sa Satong Panahon

Giya sa Prayer-Meeting nin mga Saradít na Komunidad nin Pagtubód (SAKOP) para sa Octava kan Pasko kan Pagkabuhay-liwat, Abril 20-26, 2025. Basahon an Evangelio gikan sa Juán 20,1-9 (Pasko kan Pagkabuhay-Liwat - C).

…

Alleluia! An satóng Kagurangnan Jesu Cristo nabuhay-liwát! An Saiyang Pagkabuhay-liwát iyó an nagtátaóng kahulugán sa gabós, lalò na sa mga misterio kan satóng pagtubód. Huli kainí nautób an mga profesía ni Jesús dapít sa Saiyang sadiri. Sabi man ni San Pedro sa Gibo 2,31, huli kainí nautób an profesía ni Hadeng Davíd sa Psalmo 16,10, na si Jesús “daí pinabayaan sa Sheol, ni nakanamit an Saiyang lamán nin kalapaan.”

Kayâ nagsabi si San Pablo sa 1 Corinto 15,14: “Kun si Cristo daí binuhay-liwát, sayang an samóng pagtukdô, asín sayang an saindong pagtubód.” Kayâ an enot na aldaw kan semana kun nuarín nabuhay-liwát si Cristo, pigcecelebrar na kaidto pa man kan suanoy na Simbahan bilang bâgong Aldaw kan Kagurangnan; asín hanggang ngonian an cada Domingo sa bilog na taón, saróng sadít na celebracion kan Domingo de Resurrección.

Kan Viernes Santo, piggiromdom ta an Saiyang pagsakit asín pagkagadán. Kan Sabado de Gloria, an Saiyang paghilig sa mga gadán sa Sheol, kun saén dinará Niyá sa mga yaon dumán an Saiyang gracia. Asín sa Saiyang Resurrección, binuksan Niyá an pintoan nin langit para sainda asín para satô gabós.

Anó an maninigong simbag ta sa oróg kadakulang pagkamoot na iní nin Diós satuyà?

Pakusogón an satóng paglaom. 

Sabi ni San Pablo sa Roma 6,5: “Kun kitá nakisumarò sa Saiyang kagadanan, makakabaíng man kitá sa Saiyang pagkabuhay-liwát.” Daí hinahagad satô na magpapakò man sa cruz o maghampak kan sadiri, kundî na magpagadán kitá sa satóng mga kakundian asín pagkamakasadiri, dangan an mga kaiba kainíng mga kadipisilan asín pagsakit akoon sa ngaran ni Jesús. Iní an mga sacrificio na may paglaom, huli ta kaiba ta si Cristo sa gabós na iní ngonian pa saná, asín sa katapusan pinanugaán kitáng makakahirás sa Saiyang kamurawayan.

Sa panahón kan eleksyon, giromdomón ta na an pagpagál asín pagsakit para sa katanosan, katotoohan, asín pusog na paglingkod sa banwaan, may panugáng kamurawayan ki Cristo. An magdádará nin paglaom sa satóng banwaan bakô kapangyarihan, kayamanan, o popularidad, kundî an pag-arog sa pagdusay nin búhay ni Jesús na, susog sa Mateo 20,28, “napadigdi bakô tanganing paglingkodan, kundî na maglingkod.”

Panibâgohon an satóng panugâ sa pagtubód.

Sa mga Misa sa Domingo de Resurrección, ginigibo an Pagbâgo kan Panugâ sa Bonyag. Igwa iní nin duwáng kabtang: an pagsikwal ki Satanás, sa saiyang mga padayà, asín mga maraot na gibo; asín an pagpahayag nin pagtubód sa Diós Amâ, Akì, asín Espiritu Santo, patín sa mga gibo kan Espiritu, kaiba na an satóng Simbahan.

Sa panahón kan eleksyon, may pagpipilì kitáng dapat gibohon na oróg pa kisa pagpilì nin mga kandidato—an pagpilì kun ano an tamà asín marhay sa matá nin Diós. Asín pagsikwal sa mga gibo kan demonio—an pagsamantalá sa mga dukhâ; asín paggamit nin kwarta, ayuda, violencia, kaputikan asín disinformacion.

Darhon an Marhay na Baretà nin pagkamoot.

Siring na dinará ni María Magdalena an baretà kan Pagkabuhay-liwát sa mga disipulos, kitá man ináapód na darhon an Marhay na Baretà sa kapwa sa gabós na panahón asín lugar, patín sa pulitika asín paglingkod sa banwaan.

Sa panahón kan eleksyon, an Evangelio an sukolán ta sa pagpilì nin mga kandidato. Aramon ta kun naaayon sa Evangelio an saindang mga ginibohan, plataporma, asín personál na búhay.  Tabangan ta an mga kapwa botante na magiyahan kan liwanag kan Evangelio sa pagboto.

…

GIYA SA PAGHIRÁS SA SADÍT NA KOMUNIDAD O PAMILYA | Ihirás kun pâno mo ipapahayag sa kapwa an Marhay na Baretà kan Pagkabuhay-liwát ngonian na panahón kan eleksyon.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Semana Santa nin Paglaom

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana Santa – Abril 13-19, 2025. Basahon an Evangelio gikan sa Lucas 22,14-23,56 (Domingo de Ramos - C).

…

Sa pagpoón kan Semana Santa, binabasa an halawig na istorya kan Pasión kan satóng Kagurangnan Jesu Cristo, poón sa Huríng Pamanggi sagkod sa Saiyang pagkagadán sa cruz. Sa Evangelio ni San Lucas, an tema kan istorya kan Pasión iyó an pagigin daíng salà ni Cristo.

Si Cristo an daíng salang biktima. An Saiyang pagsakit pakisumarò sa mga nagtitios asín biktima nin inhustisya.

Makatolóng beses na sinambit ni Poncio Pilato na daí siyáng nákuang salà ki Jesús. Siring man si Herodes Antipas, an nagsolsol na mahâbas na nakapakò sa cruz, asín an centurion na náhilíng an pagkagadán Niyá. An mga tawong nakasaksi kan mga pangyayari sa Calvario—an ibá sainda kaiba pa nganì gayód sa mga nagkurahaw na ipakò Siyá sa cruz—nag-urulî na “tinutubtob an saindang daghan,” tandâ nin pagbasol sa saindang pagigin parte sa pagkagadán ni Jesús.

Sabi ni San Pablo sa 2 Corinto 5,21: “Siyá na mayong aram na kasâlan, ginibong kasâlan para satuyà, tanganing kitá magin kasuripotan nin Diós sa Saiya.” Iníng gracia nin kasuripotan (righteousness) asín ehemplo nin sacrificio ni Jesús iyó nanggad an kaipuhan nin katawohan na ngonian nasa “oras nin kapangyarihan nin kadikloman,” siring kan sinabi Niyá sa Lucas 22,53.

An Semana Santa ngonian na taón sinecelebrar ta sa panahón nin eleksyon asín pag-aresto kan International Criminal Court ki dating Presidente Duterte huli sa kadakul na ginaradán sa saiyang War on Drugs. Panahón iní nin kadakul na iriwal asín pagkabarangâ bakô saná nin huli sa pulitika kundî huli sa kadakul na nabiktima nin sistematikong kaputikan asín disinformación.

Mismong si Jesús biktima nin disinformación. An sentencia nin kagadánan na hinatol Saiya nakapatugmad sa disinformación. May mga nagsaksing-putik, may mga nagpakalat nin fake news, dapít Saiya tanganing idtong mga tawong nagkurahaw nin “Hosanna sa akì ni Davíd!” sa paglaóg Niyá sa Jerusalem, nagbarâgong-isip makalihis saná nin nagkapirang aldaw, asín pinilì si Barabás na tulisan kisa Saiya. Hanggang sa ngonian, dakulon pa man giraray an mas pigpipilì an mga Barabás sa satóng banwaan kisa ki Jesús.

Si Cristo oróg na maheherakón. An Saiyang pagkaherak iyó an satóng paglaom.

Sa gabós na pagsaksing-putik, saláng paghatol, pagtuyâ-tuyâ, asín pagpasakit Saiya, an simbag ni Jesús sa Lucas 22,34: “Amâ patawada sinda, ta daí ninda aram kun anó an ginigibo ninda.” Iní an enot sa mga huríng tataramon ni Jesús sa cruz bâgo Siyá mautsan. Maski naghihingagdan na Siyá, daí Siyá nawâran nin paglaom asín pagkaherak sa katawohan—sagkod sa Saiyang mga kaiwal, asín sa mga parakasalà sa gabós na panahón, patín sa satuyà ngonian.

An Saiyang pagkaherak iyó an satóng giya asín paglaom sa paghampang sa agyat nin pagkabarangà, kaputikan, asín karâtan sa satóng banwaan ngonian. Kayâ, daí pa nahalóy, kan nagpaluwás an satóng Obispo asín mga kapadean kan satóng diocesis kan Surat Pastoral na “Saróng Pangapodan sa Paglaom,” sarô sa mga pangapodan iyó na daí kitá mawâran nin paglaom.

“Padagos saná sa paggibo nin tamà maski daí pa nahíhilíng an bunga. Padagos sa pagsabot asín pagsabi nin katotoohan lalò na kun kadakul an nalilibongan huli sa disinformación, o napatubód nin kaputikan. Padagos sa pagkaherak asín pagpatawad sa atubang kan kadakul na nagpadaóg sa saindang takot asín dagit. Padagos na maghingowa asín magpagál, bakô para sa sadiri, kundî para sa mga daíng boses asín kakayahán, asín para sa mga masunod na kapag-arakian.”

…

GIYA SA PAGHIRÁS SA SADÍT NA KOMUNIDAD O PAMILYA | Ihirás kun pàno nagtao saimo nin gracia asín paglaom an mga nakaaging Semana Santa sa saimong buhay, lalo na sa panahón nin kadipisilan.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Poon Ngonian Dai Ka na Magkasala

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Abril 6-12, 2025. Basahon an Evangelio gikan sa Juán 8,1-11 (Ikalimáng Domingo nin Cuaresma - C). 

…

An istorya sa Evangelio dapít sa babaeng nadakop na nakikisambay (adulterio) na dinará kan mga escribas asín Fariseos sa satóng Kagurangnan Jesu Cristo tanganing tibaad may masabi Siyá na magagamit ninda laban Saiya. Iníng pagbalga sa Ikaanóm na Tugon, may padusang kagadanan. Alagad ginibo iníng patugmadan ni Jesús sa pagtukdô sainda – asín satô gabós – kun siisay an Diós Amâ asín an Saiyang kabôtan. Nin huli ta sabi Niyá sa Juán 14,9, “An nakáhilíng Sakô, nakáhilíng man sa Amâ.”

An Diós Amâ maheherakón.

Sa pagsuróg ni Jesús sa babae, pinahilíng Niyá na an Amâ maheherakón. Dapít sa pangyayaring iní, sabi ni Papa Francisco sa saiyang Surat Apostolico Misericordia et Misera (Pagkaherak asín Pagtios): “Isinusulít ni Jesús an Ley ni Moisés sa totoo asín orihinál na katuyuhán kainí. Digdi an centro bakô an ley o hustisyang legál, kundî an pagkamoot nin Diós, na kayang maghilíng sa pusò nin lambang tawo asín sa pinakahararom na kamâwotan na nakatagò diyán. An pagkamoot nin Diós an dapat paorogón sa gabós.”

May mga naghohonà na an pagkaherak na iní garó pagkunsinti sa salâ. Bakô lamang. Sa hurí sinabihan ni Jesús an babae: “Ni Akó daí nagkokondenár saimo; lakáw, poón ngonian daí ka na magkasalà.” Daí Niyá kitá pigkukunsinti sa saláng pamumuhay, kundî naheherakan Niyá kitá tanganing bâgohón ta an satóng buháy.

Sa atubang kan Amáng maheherakón, duwáng bagay an maninigò niatong gibohon: akoon an Saiyang pagkaherak asín kitá man magin maheherakón.

Akoon an pagkaherak nin Diós.

An Saiyang pagkaherak oróg kadakulà asín nagdadanay sagkod pa man, alagad daí ta iní makúkuá kun daíng udók sa pusong pagsolsol asín pagbaklî.

Oróg sa gabós, tinátaó Niyá iní sa Sacramento kan Reconciliación. May limáng hakbang tanganing bolanos niatong makamít an Saiyang pagkaherak asín kapatawadán sa sacramento: an paghoróp-horop kan satóng conciencia (examination of conscience); an pagbasol sa satóng kasâlan (contrition); an pagkumpisál kan kasâlan (confession); an paggibo kan silot kan padì (satisfaction); asín an pagpakarhay kan mga náraot huli sa satóng salà asín daí na pagkasalà liwát (restitution).

Magin maheherakón siring na kitá naherakan.

An mga escribas asín Fariseos sa istorya, ladawan nin mga tawong daíng pagkaherak. Tamà sinda sa pagmidbid na an pakikiduróg sa bakóng agom saróng kasâlan, alagad nasalà sinda sa paghonà na an Diós naghahagad nin kagadanan. Garó man saná hinalean na ninda nin paglaom na magbâgong búhay an babaeng nagkasalà.

Kayâ sinimbag sinda ni Jesús nin paggurit sa dagâ asín pagsabi: “An mayò saindo nin kasâlan iyó an enot na maggapô saiya.” Daí ta aram kun anó an kinurit ni Jesús sa dagâ, alagad an epekto kainí iyó na luway-luway nagharalè idtong mga boót manggadán, poón sa pinakaguráng sagkod sa pinakaakì.

Romdomón ta an mga panahón na kitá man nawàran nin tiwalà sa kapwa na magbâgo asín maggibo nin karahayan. Dangan romdomón ta an satóng pangadiè sa Amâ Niamò: “patawadon Mo kamí sa samóng mga kasâlan siring na pinapatawad niamò an mga nagkakasalà samuyà.” Enot na kitáng naherakan asín pinatawad kan Amâ, kayâ kitá man dapat magpatawad sa kapwa. Sa Lucas 6,36, pinapamidbid ni Jesús satô an Amâ tanganing kita magtalubò na magin “maheherakón siring sa saindong Amâ na maheherakón.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kun pâno ka binâgo nin pagkaherak nin Diós halè sa kasâlan pasiring sa Saiyang búhay.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

An Parabola kan Amang Maheherakon

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marzo 30 – Abril 5, 2025. Basahon an Evangelio gikan sa Lucas 15,1-3,11-32 (Ikaapát na Domingo kan Cuaresma - C).

…

An parabola sa Evangelio aram niatò bilang istorya kan aking masumbikal o prodigal son. Alagad pwedeng apodón man iníng “Parabola kan Amáng Maheherakón” nin huli ta an pusò asín centro kan istorya iyó an amâ kan duwáng aking parehong may kakundîan. Dangan nin huli ta gabós na parabola kan satóng Kagurangnan Jesu Cristo nagtutukdò dapít sa Kahadean nin langit, an amâ sa istorya daíng ibá kundî an Diós Amáng maheherakón.

An Diós Amâ mamomòton sa gabós Niyáng mga akì.

Sabi ni Jesús sa Mateo 5,45: “An Saiyang aldaw pinapasirang Niyá sa mga maraot asín sa mga marhay, asín nagpapaurán Siyá sa mga suripot asín sa mga tampalasan.” Kan nasa makuring pagtios asín gutom na an ngohód na akì naromdoman niyá an pagkamarahayon kan saiyang amâ, na sa saindang haróng maski mga sorogoón daí nagugutom. Nin huli kainí nagdesisyon siyáng umulî na sa saindang haróng.

An Diós Amâ maheherakón sa mga parakasalà.

Kan natànaw kan amâ an saiyang ngohód na akì na nagdadangadang sa harayô, duminalagan siyá tulos sa pagsabát kainí, kinugos, asín pinasûlot nin pinakamarhay na badò, dangan singsing asín sandalyas—mga tandâ na ibinábalík niyá an tinalikdan kainíng dignidad nin pagigin saiyang akì. Sa Ezekiel 33,11 nasusurat an kabôtan nin Kagurangnan Diós na buháy: “Daí Ko muyá an kagadanan kan tampalasan, kundî na magbaklî an tampalasan halè sa saiyang dalan asín mabuhay.”

Alagad iníng parabola minasalming man sa satóng mga gawè bilang mga akì kan satóng Amâ. Igwang apát na pag-uugalì an pinapahilíng kan magtugang sa parabola.

An satóng pagigin masombikal.

Kan hagadon kan ngohód na akì an kahirasan niyá maski buháy pa an saiyang amâ, asín maglayas iní sa haróng, pinahilíng niyá na mas mahalagá saiya an kayamanan kisa saiyang amâ. Kitá man nagigin masombikal sa Diós kun mas pinapaoróg ta an an mga kinâbanon na kaogmahan asín kayamanan kisa sa Kagtaó kainí sa satóng búhay.

An satóng paghagad-tawad.

Kan ubós na an kayamanan patín an dignidad kan ngohód na akì, naromdoman niyá an saiyang amáng mabooton, asín nagdesisyon siyáng mag-ulî, magpakumbabâ, asín maghagad nin tawad. Asín anó an saiyang nákua? An kapatawadán asín pagkaherak kan saiyang amâ. Siring man kaiyan an satóng Amâ sa langit, pirming andam kitáng patawadon kun kitá magbaklî asín magbâgong-búhay.

An satóng pagkamaurí.

Nagluwás an pagkamaurí kan matuáng akì kan nahilíng niyá an pag-akò kan saiyang amâ sa tugang na masombikal, siring man kan mga escribas asín Fariseos kan mahilíng ninda si Jesús na nakikikakán asín nakikipag-ibahan sa mga parakasalà. Kitá man nagigin siring sainda kun matanos an paghilíng sa sadiri alagad hababâ sa kapwa. Oróg na makuri idtong mga tawong an paghilíng sa mga pigsususpetsaran pa sanáng adik o kriminal, menos na an dignidad o daí na nin derechong mabúhay—siring kan mga paragadan asín mga nag-ooyon sa panggagadán sa panahón kan Tokhang sagkod sa ngonian.

An satóng pagigin maimbod.

An matuáng akì sinasabing ladawan nin kaimbodán, alagad minsan siring kaipuhan man giraray na magtalubò siyá halè sa kaimbodán nin paggibo nin tamà asín paglikáy sa salâ, pasiring sa kaimbodán nin hararom na pagkamoot sa Diós, hanggang sa pagigin siring sa pagkamaheherakón Niyá. Sa Lucas 6,36, tinugon kitá ni Jesús: “Magin kamóng maheherakón siring sa saindong Amâ na maheherakón”.

…

GIYA SA PAGHIRÁS SA SADÍT NA KOMUNIDAD O PAMILYA | Sa pânong paagi nakaomagíd an saimong búhay sa ngohód o matuang akì sa parabola? Sa pânong paagi man ika ináapód na magin siring sa Diós Amâ?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Magsolsol asin Magtubod sa Evangelio

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marzo 23-29, 2025. Basahon an Evangelio gikan sa Lucas 13,1-9 (IkatoLóng Domingo kan Cuaresma - C).

…

Sa Evangelio, may maraot na baretà na ipinaabót ki Jesús: may mga taga-Galilea na pinagadán si Poncio Pilato asín an dugô ninda isinalák sa sacrificio sa Diós. Daí ta aram kun natà sinda sinentensyahán nin kagadanan, alagad malinaw an ginibong inhustisya asín sacrilegio ni Pilato. An simbag ni Jesús: kun daí kitá magsolsol, kitá man magágadán nin makuri.

An mensaheng iní tinukdó ni Jesús sa mga Judío na naghohonà na tamili sinda an Piniling Banwaan, sinda matanos na asín ligtas na sa paghukóm. Nagdagdag pa nganì Siya nin duwáng istorya para pagdoonan iníng mensahe: an aksidenteng pagkagadán nin 18 katawo na natumbahan nin torre sa Siloe asín an parabola kan higera (fig tree) na daí nagbubunga.

An mensaheng iní para man satô sa ngonian na panahón. Kan nagpoón an Cuaresma kan nakaaging Miercoles de Ceniza, linâgán kitáng abó sa angog, dangan sinabihan: “Magsolsol asín magtubód sa Evangelio.” An pagsolsol iyó an paghagad nin tawad sa kasâlan asín pagpanugâ na mabàgo nin búhay. Natà kaipohan tang magsolsol?

An pagsolsol pag-akò nin katotoohan kan satóng sadiri—na kitá mga parakasalà.

Kayâ nganì iní an enot na kabtang sa Sacramento nin Reconciliación. Daí ta pinapasa sa ibá an responsibilidad nin kasâlan o kinukumpará sa iba an gabát kainí kundî inaakò ta an satóng sadiring pagkakasalà.

Kun daí kitá magsolsol, madanay kitá sa pagigin oripon nin kaputikan. Sarô sa pinakadakulang kaolangan kan mga tawong nalulóng sa fake news—idtong mga napanô an pusò nin dagit sa kapwa nin huli ta naniwalà sa disinformación—iyó an pag-akò na sinda nasalà sa pigtubodán. Mantang daí ta naaakò an saláng pagtubód asín gibo, padagos kitáng oripon nin kaputikan. Kayâ magsolsol nin huli ta sabi ni Jesús sa Juán 8,32, “itatalingkas kamó kan katotoohan.”

An pagsolsol pagbukás sa pagkaherak nin Diós.

Pag inakò ta na kitá parakasalà, mahíhilíng ta an mas dakulang katotoohan: na kitá namòtan asín naherakan nin Diós. Sabi ni San Pablo sa Roma 5,8: “Ipinamidbid nin Diós an Saiyang dakulang pagkamoot satô: kaidto pang parakasalà kitá, nagadán na si Cristo para satô.”

Alagad gurâno man kadakulà an pagkaherak nin Diós, kun daí kitá magsolsol, kitá mismo an minásará sa satóng pusò sa pagkamoot nin Diós. Dangan an satóng panahón may hangganan. Tibaad makaisip kitá pag huri na—tibaad embes na pagsolsol, an mangyarì satô pagbasol! Daí man lugód kitá magin siring sa higera na daí nagbubunga maski halóy nang inataman, ginudakán, asín inabonohan—kayâ dapat lamang paludón.

An pagsolsol kaipohan sa pagpakarhay nin banwaan.  

Kun kitá magsolsol asín madará ta an satóng pamilya, barkada, asín kapwa, na magsolsol man asín magbâgong-búhay, maheherakan nin Diós an satóng banwaan. Sa panahón nin eleksyon, bâgo kitá magpilì nin mga kandidatong matanos, honesto, mahigós, asín matinabang, enoton ta ngòna an satóng mga sadiri na magtalubò man sa pagigin matanos, honesto, mahigós, matinabang, asín maki-Diós. An mga kandidatong pigsusuportahán ta, ladawan kan kun siísay man kitá.

Sabi nin Diós sa 2 Mga Cronica 7,14: “Kun sa pagpakumbabâ kan Sakóng banwaan na ináapodán kan Sakóng ngaran, magpamîbî sinda, maghanap kan Sakóng lalawgon asín magbayà sa saindang mga maraot na gawè: dadangogón Ko sinda sa langit, papatawadon Ko an saindang mga kasâlan, asín papakarhayón Ko an saindang dagâ.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin pagsolsol o pagbâgo nin saimong isip, gawè o ugalì, na inagihan mo sa búhay.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Magdangóg Kamo Saiya

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marzo 16-22, 2025. Basahon an Evangelio gikan sa Lucas 9,28-36 (Ikaduwáng Domingo kan Cuaresma - C).

…

An istorya sa Evangelio iyó an Transfiguración o an pagbâgong-anyo ni Jesu Cristo sa halangkáw na bukid kaiba an mga disipulos na si Pedro, Santiago, asín Juán.

Anó an kahulugán kan Transfiguración ni Cristo?

Susog sa Katekismo (CCC 568): “tuyo kainíng pakusogón an pagtubód kan mga apostoles sa pag-andam sa Saiyang Pasion: an pagsakát sa halangkaw na bulód nag-aandam sa pagsakát sa Calvario. Si Cristo, an Payó kan Simbahan, pinapahilíng kun anó an yaon sa Saiyang Hawak asín winawaras sa mga sacramento: an paglaom kan maabot na kamurawayan.”

An istorya kan Transfiguración nasusurat sa mga Sinopticong Evangelio (Mateo, Marcos, asín Lucas). Sa versión ni San Lucas, si Moisés asín Elías nakiki-olay ki Jesús dapít sa “exodo” (paghalè) na ootobón Niyá sa Jerusalem. Segun sa Prefacio ngonian na Domingo, iní “tanganing, patí sa mga pagsaksi kan Tugon asín mga Profetas, ipasabot na huli sa Pasion, makakamtan an kamurawayan nin pagkabuhay-liwát.”

Si Moisés an namayó sa pagsurat kan mga libro nin mga Tugon (Ley)—an enot na limáng libro kan Biblia. Si Elías, sarô sa mga importanteng profetas sa Banál na Kasuratán. Sa mga libro nin mga Tugon asín mga Profetas, may mga profesía dapít sa maabot na Mesías na ipapadará nin Diós. An kahulugán kan presencia nindang duwá iyó na si Jesús an kapanoan kan mga Tugon asín mga Profetas, asín na Siyá an Mesías nin Diós.

Alagad an centrál na mensahe kainíng pangyayari sinabi mismo kan Diós Amâ sa Lucas 9,35: “Iní an Sakóng Akì, na pinilì; magdangóg kamó Saiya.”

Pâno kitá maninigong magdangóg ki Jesús?

Enot, linawon ta na ibá an pagdangóg (hearing) na nagsasagap saná nin manlaen-laen na tingog asín tanóg sa palibot. Kundî an pagdangóg (listening) na hinahagad kan Amâ iyó an pagtutok asín pagsabot sa mensahe kan Saiyang Akì, pasiring sa pagtubód asín pagsunód Saiya.

Tâwan ta nin panahón asín atensyon si Jesús, lalò na ngonian na panahón kan Cuaresma, sa pagsilencio asín pagpamîbî, sa pagbasa asín pag-adal kan Biblia asín mga katukdoán kan Simbahan, sa pagdolok Saiya sa mga sacramento kan Kumpisál asín Santa Misa. Sabi sa Hebreo 3,15, “Ngonian kun madangóg nindo an Saiyang tingog, daí kamó magpatagás kan saindong mga pusò.”

Mahihimatè man niatò si Cristo sa satóng kapwa, lalò na sa mga dukhâ. Sabi Niyá sa Mateo 25,40: “An anó man na ginibo nindo sa sarô kainíng mga tugang Kong oróg kasadít, Sakô nindo iyán ginibo.” An paghimatè ki Cristo sa kapwa, minadagos sa pagkamoot sa mas dakulang komunidad asín sociedád, dangan sa pagsimbag sa agrangay kan kapalibotan. Sabi nganì ni Papa Francisco sa saiyang surat na Laudato’ Si (49), maghimaté kita “sa agrangay nin dagâ asín agrangay nin mga dukha”.

Anó an makúkuá ta sa pagdangóg ki Jesús?

Kun bakô Siyá an satóng dinádangóg, ibáng kagurangnan an satóng sinúsunód. Kayâ may mga nabubudol na magsuporta sa karâtan, huli ta an katotoohan ni Cristo saindang tinalikdán. Sabi ni San Pedro sa Juán 6,68: “Sa kiísay pa kamí maduman, Kagurangnan? Yaon sa Saimo an mga tataramon nin búhay na daíng kasagkoran.” 

An pagdanay sa kaibahan ni Cristo iyó an pagbaklay kaiba Niyá sa dalan nin cruz, kaiba na an pagsakit sa Saiyang Ngaran kun kinakaipohan. Sa mga maimbod sa dalan na iní, sabi ni San Pablo sa Filipos 3,20-21: “Langit an satóng banwaan, asín hale man dumán an Paraligtas na satóng linalaoman, an Kagurangnan na si Jesu Cristo. Liliwatón Niyá an hamak tang hawak na makabaíng sa mamurawayon Niyáng hawak.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás kun anó an saimong ginigibo tanganing magdangóg ki Cristo sa saimong buhay. Igwa Siyáng mensahe na pinasabóng na saimo?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An mga Tentación sa Misyon

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Marzo 9-15, 2025. Basahon an Evangelio gikan sa Lucas 4,1-13 (Enot na Domingo kan Cuaresma - C).

…

An istorya sa Evangelio iyó an pagsugót sa satóng Kagurangnan Jesu Cristo kan Diablo. Masasabing an gabós na tentación, panlalansé o kaputikan. Asín an Diablo an pangenot na paralansé. Anó man an boót niyáng lansehón ki Jesús? Boót kan Diablo na raotón asín talikdan ni Jesús an Saiyang misyon. Iníng tolóng tentación tumang sa tolóng misyon ni Jesús: an Saiyang pagigin Hadè, Padì, asín Profeta—na ihinirás man satô kan kitá binonyagán.

Enot na tentación: gibohon na tinapay an mga gapô.

Boót kan demonio na gamiton ni Jesús an Saiyang kapangyarihan tanganing tulos mahalè an Saiyang gutom, dangan na kun gibohon man Niyá iní sa katawohan, madalî sindang másurunód Saiya. Alagad bakô siring kainí an misyon nin pagkahadè ni Jesús. Siyá hadè na naglilingkod, asín boót Niyáng arogon iní kan Saiyang mga disipulos.  Sa Lucas 22,26, tinukdô Niyá: “an boót mamayó saindo magin siring sa naglilingkod.” Dangan an boót Niyáng itaó sa kinâban bakô saná tinapay na pag kinakán nakakabasóg alagad magugutom man giraray, kundî an Saiyang sadiri mismo bilang Tinapay nin Búhay na daíng kasagkoran.

Sa pagsabuhay niatò kan misyon nin pagkahadè, maglikáy kitá sa tentación nin kahugakan sa paglingkod asín paggamit sa pagtios nin kapwa para sa sadiring interés. Maglikáy man sa tentación nin pag-abuso sa kapangyarihan kun magkapót nin katongdan. Ngonian na eleksyon, midbidón ta kun siisay an mga kurakot, asín daí magin kasabwat ninda, lalò na sa barakalan nin boto.

Ikaduwáng tentación: magsamba sa Diablo katukal kan mga kahadean nin kinâban.

Sabi sa 1 Timoteo 2,5, si Jesu Cristo an “tagapagultanan kan Diós asín tawo”. Kun si Jesús magsamba sa Diablo, bakô na Siyá an Halangkaw na Padì na tagapagultanan ta sa Amâ. Kayâ maninigò sanáng sawayón ni Jesús an Diablo sa paagi kan enot sa Sampulong Tugon: “An Kagurangnan mong Diós an sasambahón mo, asín Siyá saná an lilingkodán mo.”

Sa pagsabuhay niatò kan misyon nin pagkapadì, maglikáy kitá sa tentación na daí magtaó nin maninigong pagsamba sa Diós asín pagpamuraway sa Saiyang ngaran. Maglikáy man na daí magsamba sa mga diós-diósan sa ngonian na panahón – kapangyarihan, kayamanan, kasikatan, kaogmahan sa lamán, asín ibá pa. Sabi ni Jesús sa Marcos 8,36: “Ta anó an pakinabang nin tawong ginana an kinâban, alagad napierde an kalág?”

Ikatolóng tentación: maglukso halè sa tuktok kan Templo.

Ta sasaluhón man saná daá Siyá nin mga angeles. Kun gibohon iní ni Jesús, siguradong masikat Siyá asín dakúl an matubód na sinugò nanggad Siyá kan Diós. Alagad bakô sa siring na paagi gigobohon ni Jesús an Saiyang pagkaprofeta. Mátubód Saiya an bilog na kinâban bakô nin huli sa ngangalasan na sinaraló Siyá nin mga angeles kundî na initaas Siyá sa cruz sa sarô asín solamenteng sacrificio na maligtas sa gabós.

Sa pagsabuhay niatò kan misyon nin pagkaprofeta, maglikáy kitá sa tentación na matakot na mag-sacrificio para sa katotoohan asín katanosan ta tibaad pag-ulokan, iwalon, o isikwal. Maglikáy sa tentación na paorogón an kapaabaw-abawan asín pagpasikat kan sadiri kisa pagsunód sa kabôtan nin Diós asín pagpamuraway Saiya.

Linawon ta na an panggana ni Jesús sa mga tentación kan Diablo daí nangangahulugán na kaya ta man daogón an tentación sa sadiri niatòng kusog asín kakayahán. Kundî na kaipuhan ta si Cristo sa hampang kan kadakul na sugót sa satóng buhay, nin huli ta sabi nganì sa Filipos 4,13: “Gabós kaya ko sa Saiya na nagpapakusóg sakô.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin saróng tentación na inagihan mo sa búhay, asín kun pàno mo namatean an tabang asín pagkaherak nin Diós.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An mga Katotoohan kan Kahadean

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marzo 2-8, 2025. Basahon an Evangelio gikan sa Lucas 6,39-45 (Ikawalóng Domingo sa Ordinariong Panahón - C).

…

An Evangelio pagpadagos kan mga katukdoán ni Jesu Cristo sa Saiyang “Sermon sa Patag” sa Lucas 6, na pigkuahán kan mga babasahon kainíng nakaaging duwáng Domingo. Nagpoón ini sa kun siisay an mga paladan sa matá nin Diós (beatitudes), dangan sinundan kan kasugoán na kamòtan an kaiwal. Ngonian namán may nagkapirang mga kasabihán na nagtutukdò nin mga katotoohan kan Kahadean.

Si Jesu Cristo an katotoohan.

Sa Juán 14,6, sinabi Niyá: “Akó an dalan, an katotoohan, asín an búhay”. Kun bakô Siyá an satóng giya sa búhay, garó kitá nagsúsunód sa butá na daí aram an tamang dalan. Kun talikdan ta an Saiyang kabôtan, garó kitá mga estudyante na sa kadikít na kaaramán naghohonà na mas tataó na kisa saindang maestro, kayâ daí minatalubò sa pakasabot.

Sa Lucas 11,23 sinabi pa Niyá: “An daí Ko kaibang nagtitipon, nagwawarak,” napapadumán sa mga saláng dalan. Kun bakô si Cristo an pigsusundan niatò, ibáng tawo o bagay an pinipilì niatong mag-influencia satô. Kun bakô kitá disipulos ni Cristo na katotoohan, tibaad magin kitáng kampon nin parabsawag nin kaputikan.

Magpakatotoo kitá sa satóng sadiri.

Mahalagá sa Kahadean an pag-akò kan katotoohan kan satóng sadiri. Sabi sa 1 Juán 1,8-9: “Kun magsabi kitá na mayò kitá nin kasâlan, dinadayà ta an sadiri, asín an katotoohan mayò satô. Kun ikumpisal ta an satóng mga kasâlan, maimbod Siyá asín suripot, papatawadon Niyá an satóng mga kasâlan asín lilinigan kitá sa gabós na katampalasan.”

Alagad kun enoton ta an paghusga sa kapwa, si Cristo mismo an nagsasabi satô: “Halea ngôna an pasagi sa saimong matá, dangan ka makakahilíng nin marhay tanganing mahalè mo an salugsog sa matá nin saimong tugang.” Sa panahón nin eleksyon, kun naghahanap kitá nin kandidatong matanos, bakóng parautik, asín bakóng mahâbas, dapat siguradohon ta na kitá ngôna matanos man, bakóng parautik, asín bakóng mahâbas. An mga kandidatong pinipilì ta minapahilíng kun anó an mga pinapahalagahán ta sa búhay.

An katotoohan nin pusò nahíhilíng sa tataramon asín gibo.

Sabi ni Jesus sa Lucas 6,45: “Ta sa sûpay kan pusò, nagtátarám an ngusò”. Kun an naglúluwás sa satóng ngusò nagdádará nin karahayan sa kapwa, an Kahadean nasa satóng pusò. Kun kitá paramudá, parautik, asín paragibo nin pagkabarangâ, karâtan an nasa laóg kan satóng pusò. Sabi sa Sirach 27,6: “Kun pâno inataman an kahoy nahihiling sa bunga; siring man kun anó an pagkatawo, sa pagtátarám kan saiyang kaisipan.”

Ngonian na panahón nin eleksyon, marhay iníng magin basehán sa pagpilì nin mga kandidato. An responsableng botante minimidbid an mga kandidato susog sa saindang mga naginibohan o track record, mga posisyon sa mga isyu, asín plataforma de gobierno. Alagad maski an mga totoong gibo asín tataramon nababaliktad na ngonian nin huli sa maatî na propaganda asín paggamit nin mga online trolls asín fake news.

Kayá nangapodan an mga obispo sa Pilipinas sa banwaan na “daí pagpabayaan na saná an lambang sarô asín an satóng nación, nin huli ta an Diós daí kitá pinapabayaan.” Sa saindang huring surat pastorál “May Pag-asa Pa Ba?,” sinabi ninda: “Manindogan sa katotoohan, sa karahayan, asín sa pamamayo kan batás. Hagadan nin paninimbagan an mga nasa poder. Danay na pilion an karahayan nin kagabsan kisa sadiring interes. Daí mapagal na na magmakulog sa mga pinakamaluya asín saradít na miembro kan satóng sociedad.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kun pâno nagin totoo sa saimong búhay an arín man sa mga kasabihán na naonambitan sa Evangelio.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Kamòtan Mo an Saimong Kaiwal

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Febrero 23 - Marzo 1, 2025. Basahon an Evangelio gikan sa Lucas 6,27-38 (Ikapitóng Domingo sa Ordinariong Panahón - C).

…

“Kamòtan nindo an saindong mga kaiwal.” Iní an sarô sa mga pinakadipisil na tugon ni Jesu Cristo. Alagad hararom iní sa kadonongan asín napápanahón pa nganì ngonian sa satóng banwaan na kadakúl an nag-iiriwal nin huli sa pulitika kan eleksyon. Natà ta hinahagad iní satô kan Kagurangnan? Nin huli ta lambang Cristiano ináapód sa mas halangkaw pang level nin pagkamoot.

An pagkamoot sa kaiwal pagigin mas marhay na tawo.

May istorya sa 1 Samuel 26 na sa pagkaurí ki Davíd ni Hadeng Saúl pigtugis siyá kainí tanganìng gadanón – kaiba an tolóng ribong soldados! Alagad pagkabanggi, mantang tururóg an gabós, nakalaóg si Davíd sa saindang campo asín nagkaigwang oportunidad na gadanón si Hadeng Saúl. Si Abisai, na kaibahan ni Davíd, nagtentar man saiya na gadanón na an hadè. Alagad daí iní ginibo ni Davíd kundî kinuá na saná an garód kan hadè asín ginibong resibo kan pagpilì niyá na daí gadanón an “linahidán nin Kagurangnan.” Nasupog si Hadeng Saúl asín naghagad nin tawad ki Davíd. Dakúl pang mga nangyari kasunód kainí, alagad sa hurí nagin hadè si Davíd, an pinakadakulà sa gabós na hadè kan Israel.

Sabi ni Jesús sa Lucas 6,33: “Kun gibohan nindo nin karahayan an mga naggibo saindo nin karahayan, anóng gracia iyán saindo? Dawà an mga parakasalà iyó man ginigibo.” Iníng pagpilì kan dalan nin pagigin mas marhay na tawo asín active non-violence, napatunayan sa adal nin kasaysayan na mabisang paagi tanganing makamtan an pigmamàwot na pagbabâgo. Nagkapirang halimbawa iyó an ginibo ni Mahatma Gandhi sa India, ni Nelson Mandela sa South Africa, asín kan satóng banwaan sa matoninong na rebolusyon sa EDSA kan 1986 na nagtapos sa makuring diktadurya kan mga Marcos.

An pagkamoot sa kaiwal paghirás kan pagkaherak nin Diós.

Sa Lucas 11,4, si Jesús nagtukdô na hagadon sa satóng Amâ na kitá patawadon siring sa pagpatawad niatò sa mga nagkasalà satuyà. Sa Roma 5,8, sinabi ni San Pablo: “Ipinamidbid nin Diós an Saiyang gayong pagkamoot satô: kaidto pang parakasalà kitá, nagadán na si Cristo para satô.” Kayâ kun kitá magpatawad sa tawong nagkasalà satô, bakô iní nin huli ta maninigò siyáng patawadon – lalò na kun habô man maghagad nin tawad – kundî nin huli ta kitá naenot nang naherakan asín pinatawad nin Diós.

Kayâ nganì an pagkamoot sa kaiwal asín pagpatawad sa nagkasalà bakô kontra sa pagmàwot na makamtan an hustisya asín mahusay an daños na dará nin kasâlan, kundî piglilinig kainí an isip tanganìng hustisya—bakô pagbalós—an magin tunay na kamâwotan, asín binubuksan an pusò sa pagbulóng asín pagpakarhay kan mga náraót. Siring man an pagsabi nin katotoohan, mas dinadangog kun may pagkamoot.

An pagkamoot sa kaiwal pagigin siring ki Cristo.

Sa Lucas 23,34, mantang naghihingagdan sa cruz, an hagad ni Jesús sa mga nagpapasakit Saiya: “Amâ, patawada sinda ta daí ninda aram kun anó an ginigibo ninda.” Kayâ bilang mga disipulos Niya, ináapód man kitáng mamoot nin radikal siring Saiya. Nasasangkobán kainí an hustong pagkamoot sa sadiri; an maigot na pagkamoot sa pamilya asín mga kaugós; an dakulang pagkamoot sa banwaan, oróg na sa mga dukhâ, asín sa kapalibotan; asín an kaipuhan na pagkamoot sa kaiwal.

Nin huli ta sa pagkamoot niatò sa kaiwal, nakakalaóg kitá sa misterio nin pagkaherak kan Amâ na “maboot sa mga mayong utang na boót asín mga maraot” asín ni Cristo na napadigdi para sa mga parakasalà tanganìng darhon sa pagbaklî sa saindang kasâlan. Sa pagtalubò ta sa pagkaherak masasabotan niatò an kahulugán nin pagigin Cristiano: na magin kabaíng ni Cristo.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kan iká nagkaigwa nin kaiwal o may nakagibo nin maraot sa saimo, asín kun anó man an saimong nagin simbag bilang Cristiano.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Bendicion asin Maldicion

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Febrero 16-22, 2025. Basahon an Evangelio gikan sa Lucas 6,17.20-26 (Ikaanóm na Domingo sa Ordinariong Panahón - C).

…

Sa Evangelio susog ki San Lucas tinutukdò ni Jesu Cristo an mga kapaladan o beatitudes. May nagkapirang pagkakaiba iní sa versión ni San Mateo. Embes na walóng paladan o bendición, apát saná an ki San Lucas na pigsusundan nin apát man na kaheherakan o maldición; asín embes na sa bulód (Sermon on the Mount), sa patag na lugár nagsermon si Jesús.

Iníng sermon ni Jesús siring sa mga paghulit nin mga profetas sa Lumang Tipan. Halimbawà, sa Jeremías 17,5-8, nasusurat na maldición an makúkua kan tawong “nagtitiwalà sa tawo, lamán an kinúkusogán, asín nagsusuway sa Kagurangnan an pusò,” alagad bendición para sa “nagtitiwalà sa Kagurangnan, an Kagurangnan magigi niyáng katiwalaan.” Sarô-saroón ta iníng mga bendición asín maldición.

Paladan an mga dukhâ, an mga nasa laylayan asín daíng boses sa kinâban—sa sainda an Kahadean nin Diós. Dinadangog nin Diós an saindang agrangay, haraní Siyá sainda, asín nakatagama man an Kahadean sa mga naggigibong-herak sa saindang kadaíhan digdi sa dagâ.

Paladan an mga nagugutom, an mga nawâran nin trabaho asín hanapbuhay—sinda papabasogón. Kan tinukdoán kitá ni Jesús na mamîbî, kaiba sa satóng pagsunód sa kabôtan kan Amâ asín pagpaoróg sa Saiyang Kahadean, an panugâ kan “satóng kakanon sa aroaldaw,” huli ta an Diós matinao sa satóng mga pangangaipo.

Paladan an mga nagtatangis, an mga nawâran nin mahál sa búhay, an mga nagsasakit nin huli sa inhustisya—an Diós mismo an saindang karangahan asín parasurog.

Paladan an mga kinakaongisán asín pinapakaraot nin huli sa Akì nin Tawo. Bakô kasusupgan kundî orgullo an isabuhay an Evangelio nin katotoohan asín pagkamoot sa panahón na an pagkaongís sa kapwa nasa pusò nin kadakul. Sabi ni San Pablo sa Roma 8,17: “Kun kaiba Niyá kitá sa kasakitan, makakaiba man kitá sa kamurawayan”.

Herak man sa mga mayaman na an kaogmahan yaon sa mga kinâbanon na bagay asín nakacentro an búhay sa pagpadakúl nin yaman. An mga iyán an magigi nindang kaulangan na makalaóg sa langitnon na Kahadean.

Herak man sa mga basóg ngonian mantang sa palibot ninda dakúl an nagugutom asín nagtitios—siring sa parabola kan lalaking mayaman asín ni Lazaro, huhukumán sinda huli kan daí nindang pakilabot asín pagkamoot sa kapwa. Sa Mateo 25,45, si Jesús nagsabi: “An anó man na daí nindo ginibo sa sarô kainíng oróg kasadít, daí nindo iyán Sakô ginibo.”

Herak man sa mga nag-oogma, lalò na idtong mga nanlálamáng sa kapwa asín nabubuhay sa hinâbasan, asín idtong mga nagpaparakpak mantang may mga ináapí asín ginágadán para daá sa saindang sadiring kaligtasan—an agrangay kan saindang mga inapí nakakaabót sa Diós.

Herak man sa mga pig-oomaw nin kadaklan nin huli kan saindang kapangyarihan, kayamanan, asín kasikatan, asín dinádará an banwaan sa mga saláng dalan—tinatalikdan ninda an pagigin mga akì kan Diós tanganing magin kampon kan Paralansé nin tawo.

Linawon ta na bakô iní katukdoán na kasâlan an paghingowa na magyaman o magginhawa an búhay, o na bakô marhay an magkapót nin kapangyarihan, o na daí dapat kitá mag-ogma—kundî kun anó asín siisay an mga paladan sa matá nin Diós. Anó man an satóng estado sa búhay—nasa kayamanan o kadaihan, kabasogan o kagutuman, kaogmahan o kamundoan, kaomawan o kasusupgan—paladan kitá kun kaiba ta an Kagurangnan asín nasasakopan kitá kan Kahadean.

…

GIYA SA PAGHIRÁS SA SADÍT NA KOMUNIDAD O PAMILYA | Ngonian na panahón nin eleksyon, arín man an mga bendición asín mga maldición sa mga track records asín mga posisyon sa mga isyu nin mga kandidato?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Inaapod Kita ni Jesus

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Febrero 9-15, 2025. Basahon an Evangelio gikan sa Lucas 5,1-11 (Ikalimáng Domingo sa Ordinariong Panahón - C).

…

An istorya sa Evangelio na pag-apód ni Jesús sa mga enot na disipulos, yaon sa tolóng Evangelio Sinoptico (Mateo, Marcos, asín Lucas). Sa versión na iní ni San Lucas daí naonabehan si Andres. Sa Evangelio ni San Juán, ibá an istorya: si Juán Bautista an nagturô sa saiyang mga disipulos ki Jesús, an “Cordero kan Diós,” asín si Andres an nagpamidbid ki Jesús sa tugang niyáng si Pedro. An pag-apód sa mga enot na disipulos tandâ na importanteng parte kan plano nin Diós sa kaligtasan nin katawohan an pagmuknâ kan komunidad nin mga disipulos ni Cristo. Pinapahayag man kan istoryang iní an duwáng kabtang kan misterio nin pagtubód: na iní gibo nin Diós asín simbag nin tawo.

Gibo nin Diós.

An pagtubód bakô siring sa paglukso sa diklom, kundî an Diós mismo an enot na nagtátaóng pruweba kan Saiyang pagkamarahayon asín pagkamoot.  Alagad anó man na biyayà asín karahayan na tinátaó Niyá, patanâ saná sa mas darakulà pang biyayà na máabót asín boót Niyáng itaó satuyà.  Kaya inaapód Niyá kitá sa mas hararom na pakisumarò Saiya asín paghirás sa misyon nin pagbalangibog kan Marhay na Baretà.

Iní an nangyarì kan inapód ni Jesús an Saiyang mga enot na disipulos. Pagkatapos na magdangóg sinda kan pagtukdô ni Jesús sa katawohan, daí ninda honaon na gigibohon para sainda an milagro nin dakulang dakóp nin mga sirâ. Alagad dakúl asín mas darakulà pang milagro an masasaksihan ninda kan pinilì nindang bayaan an gabós asín magsunód ki Jesús.

Simbag nin Tawo.

Anó man an maninigong simbag niatò sa biyayà nin pagtubód? An mga enot na disipulos nagtaóng halimbawà nin tamang pagsimbag sa Diós.

Magsarig sa Diós. Si Jesús an may gibo kan milagro nin dakulang dakóp nin mga sirâ, alagad iní nangyari huli kan pagsarig Saiya ni Simón Pedro. Sabi niyá: “Kagurangnan, bilog na banggi nin pagpagál mayò kamíng nákua; alagad sa tataramon Mo, itutunton ko an hikót.”

Sabi sa Jeremías 17,7-8, “Paladan an tawo na nagtitiwalà sa Kagurangnan, siring siyá sa kahoy na itinanóm sa may tubig, na an gamót nagkákanáp sagkod sa sapà.” Paladan kitá kun nahihiling niatò an mga gibong herak asín pagkamoot nin Diós sa satóng buhay. Alagad an tawo na daí tataó magsarig sa Diós, asín linilingawán an Saiyang kabôtan sa pagsunód sa tentación nin hidalíng kaogmahan, rinárayô an sadiri sa burabod nin biyayà.

Magpakumbabâ kan sadiri. Kan masaksihán ni Simón Pedro an milagro, tulos siyáng nagsabi: “Humarayô Ka sakô, huli ta ako parakasalà, Kagurangnan.” Bakô na sinisikwal niyá si Jesús, kundî náhilíng niyá an saiyang bakóng-pagkamaninigò sa Saiyang atubang. Siring iní sa mga istorya nin pag-apód kan mga profetas sa Lumang Tipan, na enot nagsasayuma sa Kagurangnan, alagad bakô sa pagsikwal Saiya kundî huli sa saindang kapakumbabaan.

An Diós naoogma sa mapakumbabâ, alagad an mga matanos sa sadiring paghonà, daíng pagkaherak na makukua ta sarado an saindang pusò. Sabi ni Jesús sa Lucas 5,32: “Daí Akó nagdigdi sa pag-apód kan mga mayong-salà, kundî kan mga parakasalà para magbaklî.”

Magparticipár sa misyon. Sa pag-apód ni Jesús ki Simón Pedro sinabi Niyá: “Daí ka matakot; poón ngonian mga tawo na an saimong pagdádakopón.” Asín bâgo Siyá sumakát sa langit, sa Mateo 28,19-20, sinugò Niyá an mga disipulos sa parehong misyon: “Lakáw kamó, gibohang disipulos an gabós na nación!” An tandâ kan satóng pagigin disipulo ni Cristo iyó an pakisumarò niatò Saiya asín paghirás kan biyayà na tinaó Niyá satô. Iní an Marhay na Baretà na pinapabalangibog satô tanganing dakúl pa an magtubód Saiya asín mag-akò kan kapanoan nin buhay sa Saiyang Kahadean.

...

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin pagkamarahayon saimo nin Diós asín kun saén ka Niyá inaapód na magmisyon.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song