An mga Llave kan Kahadean

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Agosto 27 – Setyembre 2, 2023. Basahon an Evangelio gikan sa Mateo 16,13-20 (Ika-21 Domingo sa Ordinariong Panahon - A).

…

Siguro nadangog ta na an paghonà o sabi-sabi na daí na daá kaipuhan an Simbahan o relihiyon tanganing makaligtas. An dapat saná daá na may relationship kita ki Jesús asín akoon ta Siya bilang “personal Lord and Savior”. Kayâ an ibá, sinda daá “spiritual” alagad bakô "religious". May mga nagsasabi man na tanganing mapatawad asín makaligtas, daí kaipuhan magkumpisál pa sa padì, kundî magdiretso na sa Diós. 

Iníng pagbasa sa Evangelio minalinaw kainíng mga saláng paghonà dapit sa pagtubód.

Enot, tuyong tinogdás ni Jesu Cristo an Simbahan bilang paagi nin kaligtasan. Ikaduwá, may mga inapód Siya tanganing mamayó sa Simbahan, an Saiyang mga Apostoles, asín an lider ninda iyó si Simón Pedro, “an gapóng patugmadan kan Simbahan”. Poón kaidto sagkod ngonian ki Papa Francisco, danay na pinapamayohán an Simbahan kan mga kasalihid ni San Pedro asín kan mga Apóstoles. An apód kainí “apostolic succession”. Ikatoló, itinaó ki San Pedro an mga “llave kan Kahadean nin langit”.

Ano iníng mga llave kan Kahadean?

Susog sa Catechism of the Catholic Church (551-553), iní an “autoridad nin paggobyerno sa haróng nin Diós, an Simbahan”. Inotro pa ni Cristo iníng mandato Niya ki San Pedro kan sinabihan Niya iní sa Juan 21,15-17: “pakakaná an Sakong mga karnero”. Kaiba kainí an kapangyarihan nin “pagbugkos asín paghubád”, na boót sabihon: an pagpatawad nin mga kasâlan, an pagtukdô nin tamang doctrina, asín pagpautób nin disiplina sa Simbahan.

Pagpatawad nin mga Kasâlan. Sinabi ni Cristo sa Juan 20,23: “An kiisay man na kasâlan na saindong patawadon, napapatawad; an kiisay man na kasâlan na daí nindo patawadon, daí napapatawad.”

Pagpautób nin Disiplina. Halimbawà kainí an mga Tugon nin Simbahan (Commandments of the Church): an (1) pagpabanál kan Domingo asín mga Banál na Aldáw nin obligación sa pagsimbá asín pagpahingalò; (2) pag-ayuno asín abstinenciá sa mga aldáw na itinalaan; (3) pagkumpisál minsan saróng vez sa taón; (4) pagcomunión minsan sarong vez sa taón, lalo na sa panahón nin Pasko kan Pagkabuhay; (5) pagsuporta sa mga pangangaipo kan Simbahan; asín (6) pagsunód sa mga tugon kan Simbahan dapit sa kasál.

Pagtukdô nin Doctrina. Marhay balikán an pagpoón kan istorya kun saen hinapót ni Jesús an Saiyang mga disipulos kun siisay Siya sa paghonà nin mga tawo asín ninda. Kan nagsimbag si Simon Pedro nin tamà – “Ika an Mesías, an Akì kan Diós na buháy” – inomaw Siya ni  Jesús asín sinabihan na mismong an Amâ an nagtaó saiya kan kadunongan na iyán, dangan itinaó saiya an kapangyarihan kan mga llave kan Kahadean.

Sabi ni San Pablo sa 1 Timoteo 2,4: “boót nin Diós na an gabós makaligtas saká makamidbid kan katotoohan”. An satong kaligtasan nakapatugmád sa tamang pagkamidbid kun siisay an Diós na satong sinasamba asín kun anó an Saiyang kabôtan. An kapangyarihan kan mga llave kan Kahadean iyó an mandato na danay asín sagkod pa man na ipamidbid an Katotoohan ni Jesu Cristo asín kan Saiyang Evangelio, asín atamanon asín pamayohán an Simbahan na Inâ asín Maestra (Mater et Magistra) nin katawohan, oróg na nin mga disipulos ni Cristo.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás kan saimong pinakamemorable o importanteng experiencia nin pagigin miembro kan Simbahan. Natà mahalagá iní saimo?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

Bawal Judgmental

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Agosto 20-26, 2023. Basahon an Evangelio gikan sa Mateo 15,21-28 (Ika-20 Domingo sa Ordinariong Panahon – A).

…

Sa istorya sa Evangelio garó ibáng Jesús an satong nasásabatan – bakô su maboot, matinabang, asín madalíng ranihán na namidbidan ta. Enot, daí Niya tinîno an babaeng nagpaparasunod sainda sa paghagad Saiya nin tabang, asín garó nainsulto Niya pa nganì sa pagsabi na “bakóng tamà na ibahóg sa mga ayam an kakanon kan mga akì”, bàgo Niya tinaó an pighagad kainíng inâ na pahaleon an demonyo na yaon sa saiyang akì.

Anó an paliwanag kainí? Bakô man na daíng pakilabot si Jesús sa babaeng taga-Canaan o sa sitwasyon kan akì kainí, kundî na boót Niyang magtukdò sa mga nakapalibot Saiya patí man sa mga disipulos Niya – giraray dapit sa Saiyang Kahadean. An leksyón iyó iní: na kaipuhan bàgohon ninda an saláng kaisipán (mindset) na sinda saná bilang Piniling Banwaan an makakaligtas asín maninigò sa gracia nin Diós. Pigtàwan duon ni Jesús an saindang mga saláng paghonà sa paagi kan Saiyang mga sinabi sa mga disipulos asín sa babae, asín pinahilíng Niya na salâ an mga iní kan inomaw Niya an dakulang pagtubód kan babae asín tinaó an pighagad kainí.

Boót nin Diós na an gabós maligtas. An pagigin Piniling Banwaan kan Israel bakô boót sabihon na para sainda saná an gracia nin Diós kundî na sinda magín dalan nin kaligtasan nin bilog na kinâban. Sabi nganì sa profesía sa Isaias 56,7: “an Sakong haróng aapodón na haróng nin pamìbì kan gabós na banwaan”. Si San Pablo nagpahayag man sa Roma 11,13 na siya “sinugò sa mga pagano bilang Apostól nin mga Gentíl”.

Sa Evangelio pinaliwanagan ni Jesús an Saiyang mga kahimanwá kan saindang saláng paghonà. An apód ta kainí sa Ingles, prejudice, asín an paghusga sa kapwa base sa salâ o kulang na información, pagigin judgmental. Bakô marhay an pagigin prejudiced o judgmental nin huli ta nasisikwal ta an kapwa asín daí natátaó sainda an dapat na para sainda susog sa kabôtan nin Diós, o derechos ninda susog sa ley kan satong nación. Sabi nganì kan saróng popular na TV show: bawal judgmental. Hanggang ngonian kadakul pa an nagigin biktima nin prejudice nin huli kan saindang lahì, relihiyón, sexual orientation, o kamugtakan sa buhay. Kan panahón nin pandemia, kadakul na mga nagpositibo sa COVID-19, patí nganì medical frontliners, nakamatè nin diskriminasyón. Pàno kita makalikáy tanganing daí magkasalà man nin siring?

Magraní kita sa Diós sa pamìbì na mapakumbabâ tanganing hagadon tang mautób an Saiyang kabôtan, bakô an sato. Sa Lucas 18,9-14 inistorya ni Jesús an parabola kan Fariseo asín Publicano na nangadyê sa Templo asín an tinâwan nin gracia nin Diós iyó an parakasalà na mapakumbabáng nangadyê.

Kamòtan ta nin tamà an satong sadiri. An halangkawon an paghilíng sa sadiri, hababâ an paghilíng sa kapwa. An hababâ man na gayo an paghilíng sa sadiri, madalíng maarà sa marhay na kamugtakan kan kapwa. Nin huli ta an tamà asín balanseng pagkamoot sa sadiri an basehán nin tamang pagkamoot man sa satong kapwa. Iyó iní an boót sabihon kan ikaduwáng pinakadakulang tugon sa Mateo 22,39: “Kamòtan mo an saimong kapwa siring sa pagkámoót mo sa saimong sadiri”.

Midbidón ta si Jesús sa satong kapwa. Si Sta. Teresa de Calcutta nagsabi: “Nahihilíng ko an Diós sa lambang tawo. Pag hináhanawán ko an lugad nin saróng leproso, namamatean ko na hináhanawán ko an Kagurangnán mismo.” An siring na ugalì oróg na mahalagá sa Kahadean, malà nganì sinabi sato ni Jesús na iní an llave para makalaóg sa Kahadean nin langit. Sabi Niya sa Mateo 25,40: “An anoman na ginibo mo sa pinakasadít kainíng sakong tugang, ginibo mo man Sako.”

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia kun pàno kita nakamatè nin saláng panghuhusgá o kan kita man nagín judgmental sa kapwa. Ano an nagin adal kainí satuya?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

Para sa mga Nagluluya an Pagtubód

Giya sa Prayer-Meeting nin mga Saradít na Komunidád nin Pagtubód (SAKOP) para sa semana kan Agosto 13-19, 2023. Basahon an Evangelio gikan sa Mateo 14,22-33 (Ika-19 Domingo sa Ordinariong Panahón).

…

Anó an mensahe sato kan istorya sa Evangelio kan paglakáw ni Jesús sa ibabaw nin tubig asín pagpatoninong sa doros? An istoryang iní nakagamót sa istorya kan paglaláng sa kapinônan kan panahón. Susog sa Genesis 1,2, an kinâban kaidto “mayò nin anó man na porma saká laóg. An nag-aalimbukay na kadagatan na minatahob kainí napápatós nin kadikloman”.

An paglaláng bakô saná paggibo nin mga bàgong bagay kundî paghusay kan kinâban halè sa karâtan (an apód kainí sa Griego “kaos”) pasiring sa tamang ordén kainí (sa Griego “kosmos”). Nagpapadagos an gibo nin paglaláng sa paghusay kan karâtan na dara nin kasâlan, asín an katapusan asín kapanoan kainí iyó an Kahadean.

An doros o subasko sa Danao nin Galilea simbolo man kan kaos o mga kahorasaan asín kadpisilan sa satong buhay. Asín bakô saná iní dapit sa mga pwersa o mga pangyayari sa luwás, kundî patí man kan mga nangyayari sa laóg, kan satong sadiri. Sabi nganì sa awit na One More Gift: “for the confusions around are mere reflections of what’s within me”.

Alagad siring sa istorya sa Evangelio, an Diós mas dakulà asín makapangyarihan kisa anó pa man na doros o bagyo sa satong buhay, asín dinadara Niya kita sa kosmos o kahusayan asín katoninongan, katalingkasan asín katanosan, kan Saiyang Kahadean. Pàno ta iní makakamtan? Kun kita magtubód.

Magtubód kita Saiya. Mápoón iní sa pagmidbid ta Saiya bilang satong Kagurangnán asín Paraligtás. Kan daí pa si Jesús namimidbidan kan Saiyang mga disipulos mantang naglálakáw sa ibabaw nin katubigan, nagkatarakot sinda asín pighonà na Siya saróng multo. Alagad si Jesús nagsabi: “Pakusogá an saindong boót. Ako iní, daí kamo matakot.” Sa tahaw nin mga kadipisilan sa buhay minsan naghohonà kita na pinabayaan na kita nin Diós, alagad Siya pirming yaon sa sato, kundî kita nganì pirmi an nakákalingáw kan Saiyang presencia.

Magmaimbód kita sa pagtubód. Si Pedro siring sa satong mga Cristiano na minsan paghonà basang saná an pagtubód, alagad pag inabotan na nin mga kagabatan sa buhay, nagluluya an pagtubód, o kun may oportunidad na magginhawa nin kadikít alagad sa saláng paagi, pinapasipara an Saiyang kabôtan. Kayâ nasabihan siya ni Jesús: “Kulang an pagtubód. Tâno ta nagduwa-duwa ka?” Sa tahaw nin mga tentación asín agyat nin buhay, mas lalò na dapat kitang magin maimbód Saiya nin huli ta Siya danay na maimbód sa satuya.

Sabi ni San Pablo sa Roma 8,37-39: “An gabós na iní madádaóg ta huli ki Cristo na namoot sato. Huli ta ako minatubód na maski an kagadanan, an buhay, an mga angeles, an mga principados, an mga uya na, an mga máabót pa, an mga kapangyarihan, an kahalangkawan, an kahararoman, o an anoman na linaláng daí puedeng makapasuhay sato sa pagkamoot nin Diós na yaon ki Cristo na satong Kagurangnán.”

Magtalubò kita sa pagtubód. An istorya nagtapos sa pagsamba ki Cristo kan mga disipulos asín pagpahayag: “Totoo man nanggad, Ika an Akì kan Diós.” Nadagdagan an saindang pagsarig asín pagkamidbid ki Cristo, nagtalubò sinda sa pagtubód. Alagad an mas ladawan ta nin pagtubód iyó an nasa enot na kabtang kan istorya, kan si Jesús tuminukád sa bukid asín dumán nabanggihan sa pagpamìbì sa Amâ. Iníng pagkaugós asín rarom nin pagkámoót ni Cristo sa Amâ iyó an hingowahon tang abotón. Sa pagmidbid ta Saiya bilang Akì kan Diós, arogon ta man an Saiyang pagtaóng oras sa pamìbì asín pagsunód sa kabôtan kan Amâ.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia nin doros sa buhay na nagbalô sa saimong pagtubód sa Diós, asín kun pàno mo namatean an Saiyang presencia.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song 

An Kamurawayan nin Pagkámoót

 

Giya sa Prayer-Meeting nin mga Saradít na Komunidád nin Pagtubód (SAKOP) para sa semana kan Agosto 6-12, 2023. Basahon an Evangelio gikan sa Mateo 17,1-9 (Fiesta kan Transfiguración kan Kagurangnan).

…

Sa Evangelio iyo an istorya kan mamuraway na Transfiguración ni Jesús sa halangkáw na bukid, kaiba an tolóng pinakaugós Niyang disipulos: si Pedro, Santiago, asín Juan. Cada Ikaduwáng Domingo kan Cuaresma an Evangelio dapit sa Transfiguración, alagad sa Agosto 6 iní sinecelebrár bilang Fiesta sa satong Simbahan. Iní man an ikaapát sa mga Misterio nin Liwanag sa Santo Rosario. Anó an kahulugán kan Transfiguración?

Pangapodan sa Pagtubód

An pangyayaring iní parte kan dakulang plano nin Diós na mismong nagráraní asín nagpapamidbid sato. Kabôtan nin Diós, sabi ni San Pablo sa 1 Timoteo 2,4, “na an gabós makaligtas asín makamidbid kan katotoohan”. Asín an maninigong simbag niato iyó an pagtubód. Nahíhilíng man digdi an duwáng kabtang nin pagtubód: an inisyatibo nin Diós dangan an simbag nin tawo.

An Diós enot nang nagpamidbid kan Saiyang sadiri ki Moisés sa bulód nin Horeb sa Exodo 3, asín ki Elías sa bulód nin Carmel sa 1 Hade 19.  Alagad an kapanoan kan pagpamidbid kan Amâ yaon ki Jesús. Nagsabi Siya sa Juan 14,9: “An nakáhilíng na sako, nakáhilíng na sa Amâ.” Sa Transfiguración, an presencia ni Moisés asín Elías nagtutukdò kainí. Si Jesu Cristo an kapanoan kan mga Kasuratán – kan mga Tugon na pinagrerepresentár ni Moisés, an kaggibo kan mga Libro nin Tugon (an enot na limáng libro sa Biblía), asín kan mga Profetas na nagsurat dapit sa Mesías na pinagrerepresentár ni Elías.

Tandâ nin Paglaom

Susog sa Catechism of the Catholic Church no. 568: “An Transfiguración ni Cristo tuyong pakusogón an pagtubód kan mga apostoles sa nagdadangadang Niyang Pasión: an pagsakát sa halangkaw na bulód nag-aandam sa pagsakát sa Calvario. Si Cristo, an Payó kan Simbahan, pinápahilíng kun anó an yaon sa Saiyang Hawak asín winawaras sa mga sacramento: an paglaom kan máabót na kamurawayan.”

Tinugon ni Jesús an tolóng disipulos na kaiba Niya na daí ipagsabi an saindang nasaksihan sagkod na “an Akì nin Tawo mabuhay-liwát sa mga gadán”. Daí ninda tulos nasabotan iníng tugon ni Jesús hanggang sa maotób an Saiyang mga sinabi: na an Transfiguración pasabóng kan kamurawayan kan Resurrección. Alagad maagi ngûna sinda sa makuring Pasión asín pagkagadán ni Cristo.

An Transfiguración saróng giya asín tandâ nin paglaom sa maabot na panahón nin satong kaligtasan asín kapangganahán. Kayâ maimbod na iayon ta an satong mga inaagihan na kadipisilan ngonian sa sacrificio ni Cristo, asín daí magpadaóg sa takot o sa mga padagká nin mga kaogmahan na minaagi saná. Huli ta sabi ni San Pablo sa Roma 8,17: “Kun kaiba kita ngonian sa kasakitan ni Cristo, makakaibá man kita sa Saiyang kamurawayan.”

Kamurawayan nin Pagkámoót

Oróg sa gabós, iní dapit sa pagkámoót. Siring sa mamomôton na mga magurang na naggigiya sa saindang mga akì pasiring sa tama asín  marhay, an Diós Amâ nagsabi halè sa panganoron: “Iní an Akì kong namomôtan na ikinakaogma kong gayo, dangogá nindo Siya.” Ipinadará kan Amâ an Saiyang namomòtan na Akì sa sato, na Saiyang namomòtan man, tanganing iligtas kita sa kasâlan asín kagadanan, asín  darhon kita sa Saiyang kamurawayan

Pinahayag ni Jesús an kadakulaan kan Saiyang pagkámoót sato duman sa cruz. Sabi pa Niya sa Juan 15,13: “Mayong pagkámoót na mas dakulà pa kisa pagkámoót nin saróng tawo na minadusay kan saiyang buhay para sa saiyang mga katood.”

Daíng ibáng maninigong simbag kundî na kita mámoót man sa Saiya, asín mámoót siring na kita namôtan Niya.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia na an bunga saimong namatean na an satong Diós maninigong tubodán, laoman, asín  kámôtan.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Siring sa Perlas na Oróg Kahalaga

Giya sa Prayer-Meeting nin mga Saradít na Komunidád nin Pagtubód (SAKOP) para sa semana kan Hulyo 30 - Agosto 5, 2023. Basahon an Evangelio gikan sa Mateo 13,44-52 (Ika-17 Domingo sa Ordinariong Panahón - A).

… 

Sa Evangelio, may tolóng parábola dapit sa Kahadean nin langit na inistorya ni Jesús sa katawohan. Iní an parábola kan yaman na nakatago sa lantad o sa omá, an parábola kan perlas na mamahalon, asín an parábola kan hikót na nakádakóp nin manlaen-laen na sirâ. Anó an sinasabi kan tolóng parábolang iní dapit sa Kahadean nin langit?

An Kahadean mahalagá oróg sa gabós. An Kahadean iyó an plano nin Diós para sa katawohan – na kita gabós maligtas asín makamít an kapanoan nin Saiyang buhay; na an Saiyang Ngaran maghadè sa pusò nin lambang sarô sa bilog na kinâban, asín an Saiyang kabôtan mangyari sa dagâ nin siring sa langit.

Asín tinátaó iní sato nin Dios nin huli ta mahalagá kita Saiya – lambang sarô sa sato. Sa Mateo 7,6, nagtukdô si Jesús sa mga disipulos na “daí ipagtaó an mga bagay na banál sa mga ayam, asín daí ipagtapok an mga perlas sa mga oríg”. Bakô kita mga ayam o oríg – linalang kita na kabaing Niya, asín kan kita nahulog sa kasâlan asín kagadanan, pinadarhín nin Paraligtas, an Saiyang Bogtong na Akì. Mahalagá kita Saiya kayâ tinatangrò Niya man sato an pinakamahalagá sa Saiya.  

Pag naapreciár ta an dakulang graciang iní nin Diós, dadarhon kita sa kapakumbabaan nin huli ta madidiskubre ta na bakô kita maninigò kainí alagad minsan siring itinátaó man giraray sato. Sabi ni San Pablo sa Roma 5,8: “Pinahilíng nin Diós an Saiyang dakulang pagkamoót sato kan si Jesús nagadán para sato kan kita parakasalà pa”.

Mâwotón ta oróg sa gabós an Kahadean. Iní an maninigong simbag sa tinátaó satong gracia nin Diós. Saróng makusóg na tandâ na mahalagá sato an Kahadean iyó na boót niatong magbayad o maggibo nin anoman para makamít iní – siring kan tawo na pinabakal an gabós na pagsadiri tanganing mákua an omá na may tagong yaman o an perlas na mamahalon. Kaya halangkáw an hinahagad ni Jesús sa mga boót magin disipulos. Sabi Niya sa Lucas 9,23: “kaipuhan lingawán niya an sadiri niyang buhay, magpâsan kan saiyang cruz aroaldaw, asín magsunód Sako”.

Kayâ maghidalî kita pasiring sa Kahadean siring kan tawong pinabakal tulos an mga pagsadiri tanganing mabakál niya an perlas na oróg kahalagá. Alagad kun pasíparahon ta iní, mawawarà iní sato siring kan enot na kagsadiri kan omá na may nakatagong yaman. Anó an mangyayari kun daí ta pilíon an Kahadean? Sa pag-abót kan paghukóm, naghahalát sato an luwás kan Kahadean, kun saén an kalayo daí napopondo, asín yaon an pagtangis asín pagragot nin ngipon.

Saróng ehemplo nin tamang pagpahalagá sa gracia nin Diós iyó si Hadeng Solomón. Sa 1 Hade 3,5-12, iniistorya kun pàno inalók siya nin Diós kun anó an saiyang gusto asín itátaó iní saiya. Pinilì niya an kadonongan tanganing mapamayóhan nin marhay an Kahadean nin Israel. Naogmá saiya an Diós nin huli ta daí niya pinilì an halabang buhay, o kayamanan, o buhay kan saiyang mga kaiwal, kundî kun anó an makakatabang saiya tanganing magín marhay na hadè. Kayâ tinaó saiya an saiyang hinagad asín mas pa.

Sa mga naghihingowang magín maimbód sa kabôtan kan Amâ, sa mga nagdadanay sa pagpapahalagá sa Kahadean, nanugâ si Jesús sa Mateo 6,33: “An Kahaden nin Diós enóta, siring man an Saiyang katanosan, asín an gabós idudugang na saná.”

…

GIYA SA PAGHIRÁS SA SADÍT NA KOMUNIDAD O PAMILYA • Anó na an pakasabot mo dapit sa Kahadean? Maghirás kun pàno ika naparayô asín nakabalik giraray sa Kahadean nin Kagurangnan.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

An mga Parabola kan Kahadean

Giya sa Prayer-Meeting nin mga Saradít na Komunidád nin Pagtubód (SAKOP) para sa semana kan Hulyo 23-29, 2023. Basahon an Evangelio gikan sa Mateo 13,24-43 (Ika-16 Domingo sa Ordinariong Panahon - A).

…

Sa Evangelio, nag-istorya si Jesús nin tolóng parabola sa katawohan: an mga paroy nin trigo asín mga awot (ináapód man na maróy-paróy o opí-opí), an pisóg nin mustasa, asín an levadura. Pinaliwanag Niya an enot na parabola saná, alagad iníng toló parareho dapit sa Kahadean nin langit. Anó an pinapahayag kan mga iní na “mga natatagò poón tugdasón an kinâban”?

An Kahadean oróg kadakulà alagad makúkuá sa kasaradayán.

Ginamit ni Jesús an mga imahe nin mga banhî, pisóg, asín levadura – mga saradít na bagay na minatalubò asín minadakulà – bilang kabaíng kan Kahadean. Siring man an Akì kan Diós na oróg kadakulà pinilì na mamundag sa kadukhaán asín kapakumbabaan.

Iní saróng mensahe sa kinâban na nae-engaño sa kapangyarihan asín kayamanan, asín napapasipara an mga kasaradayán. Patanid man iní sa mga nag-aabuso nin saindang kapangyarihan asín nagdudulot nin pagsakit sa kasaradayán. An Kagurangnan danay na yaon sainda – sa mga dukhâ, nagtitíos, asín ináapí. Si Jesús nagtukdô sa Mateo 25,40: “An anoman na ginibo nindo sa sarô kan pinakasadít Kong mga tugang, ginibo nindo iyan Sako!”

An karâtan nangyayari sa kinâban alagad an karahayan an manggagana sa Kahadean.

An tradisyon na Cristiano daí nagtútubód sa concepto nin balanse nin marhay asín maraot, “yin-yang”, liwanag asín diklom sa kinâban man o sa enterong universo. Kundî nagtútubód kita sa karahayan na yaon na sa kapinònan asin manggagana sa katapusan. Sa istorya nin paglaláng, sinabi sa Genesis 1,31: “Nahiling nin Diós na an gabós Niyang ginibo marahay”.

An kasâlan asin karâtan luminaóg sa kinâban nin huli sa demonio, asín hanggang ngonian padagos pang nanlalansé asin nagrarayô sa mga tawo sa Diós. Patín an satong mga marhay na intención asin pangarap sa buhay pwedeng laogán nin tentación. May kasabihán bagá: “The road to hell is paved with good intentions.”

Tanganing tataó kitang magpilì kan totóo, tamà, asin marhay, kaipuhan an duwáng bagay: magsunód kita sa satong conciencia asin pataluboon ta iní nin tamà sa paagi nin maimbod na pagpamìbì asín pagsabuhay kan Saiyang kabôtan, sa giya kan Saiyang Tataramon asín mga katukdoán kan Simbahan.

An Kahadean tinátaó sa gabós alagad may katapusan an pagtangrô.

May paghukóm na nagháhalát sa mga daí kainí nag-akò. An oróg kamuwaray na gracia nin Diós, an buhay na daíng kasagkoran, an pagkámoót na daí maladóp kan isip nin tawo, igwa man nin limitasyon: an pagpipilì nin tawo. Nin huli ta an kaligtasan daí man makúkuá kan habô magpaligtas.

Sabi ni Jesús sa Mateo 13,41-42: “Susugoon kan Akì nin Tawo an Saiyang mga angeles, halè sa Saiyang Kahadean titiponon ninda an gabós na dahilán nin pagkakasalà saká an mga paragibo nin kasombikalan, asin isasàpog sinda sa nag-aagabaab na horno; dumán an pagtangis asín pagragot nin mga ngipon.” Pagkatapos kan buhay ta digdi sa dagâ asín sa Ikaduwáng Pagdatóng, igwang paghukóm, asín kun an makukua ta kaligtasan o padusa, depende sa kun pinilì ta o daí an dalan kan Kahadean sa satong buhay.

“An igwang talinga, magdangóg.” An may tamang conciencia maglakáw sa Saiyang dalan.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia nin pag-agi sa tentación asín kun pàno ka nagiyahan kan saimong conciencia.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song.

 

But First Listen

 

Before we raise our voice for any

just cause, or on behalf of another,

first we need to listen: whether by

prayer (which is listening to God),

or study (which is listening to others

wiser, more knowledgeable than us),

and preferably straight from them

whose stories we dare to represent.

For only by the discipline of listening

that we validate our truth-telling.

An Tataramon kan Kagurangnan

 

Giya sa Prayer-Meeting nin mga Saradít na Komunidád nin Pagtubód (SAKOP) para sa semana kan Hulyo 16-22, 2023. Basahon an Evangelio gikan sa Mateo 13,1-23 (Ika-15 Domingo sa Ordinariong Panahon - A).

… 

An babasahon sa Evangelio may tolóng parte. An enot iyó an Parabola kan Parasabwág nin banhî.

Sa ikaduwáng parte, ipinaliwanag ni Jesús kun natà Siya nagtotokdò sa paagi nin mga parabola – nin huli ta bakô gabós na naghihinanyóg Saiya boót magdangóg, magsabot, asín magbàgo nin buhay. Alagad sa mga boót magsunód Saiya, tinátaó Niya an Saiyang Tataramon.

Sa ikatolóng parte itinokdô ni Jesús kun ano an boót sabihon kan parabola. An parasabwág iyó an Kagurangnan asín an banhî iyó an Tataramon kan Kahadean.  An apát na klaseng dagâ na nasabwagán nagrerepresentar kan apát na klaseng disposisyón nin pusò sa pag-akò kan Tataramon.

An dagâ sa gilid kan dalan iyó an pusong daí minaakò kan Tataramon. Iní an mga tawong naghohonà na daí ninda kaipuhan an Diós, siring man an mga pinapaoróg an sadiring donong asín kabôtan kisa sa donong asín kabôtan nin Diós.

An dagáng magapô iyó an pusong hababaw asín madalíng magsukò sa kadificilan kan pagsunód sa Tataramon. Iní an mga tawong namimilì nin mga facil na tugon saná asin habô magbàgo nin buhay o magpàsan kan saindang cruz.

An dagáng matonók iyó an pusong panô nin mga kinâbanon na kasibotan asín kahandalan. Iní an mga tawong nagtitipon nin mga kayamanan na materyál asín kinâbanon kisa kayamanan na espiritwál asín langitnon.

An marhay na dagâ iyó an pusò na an Tataramon inaakò asín isinasabuhay, kayâ minabunga nin kadakul. Iní an mga tawong an kaogmahan yaon sa Saiyang kabôtan, asín an pagtubód nahíhilíng sa gibo asín bilog na buhay.

Sa puntong iní kan satong buhay, arín sa apát na klaseng dagâ nakakaarog an satong pusò? May pagiromdom sato sa Hebreo 3,15: “Kun ngonian madangog mo an Saiyang tingog, haré pagpatagasá an saimong pusò.”

Anó man iníng Tataramon kan Kagurangnan na sinasabwag Niya sa satong mga pusò?

An Tataramon na iní makapangyarihan. Iní an tingog sa kapinônan na sa pagtarám nalaláng an gabós. Iní an tingog na nagsugò ki Abraham, ki Moises, asín sa mga profetas. Sa Isaias 55,11, nasusurat na an Tataramon na mináluwás sa ngusò nin Diós “daí minábalík na daí nin bunga, sagkod na daí mautób an Saiyang kabôtan, asín mahamán an Saiyang ipinapagibo”. Sa Bàgong Tipan, sa Juan 1,14, iníng “Tataramon nanitawo” – huli Saiya an butá na naghagad nakáhilíng, an naghehelang na nagraní narahay, asín an parakasalà na nagsolsól naligtas sa kapangyarihan nin kasâlan asín kagadanan.

An Tataramon tinátaó siring sa banhî na nangangaipong atamanon tanganing magtalubò asín magbunga. Para sa kadaklan sato na nag-akò kainí kan kita binonyagán na mga omboy pa, kaipuhan na sa tamang edád malinaw asín makusóg kitang magmàwot na akóon asín isabuhay an pagtubód. Tinatabangan kitang magibo iní sa pag-agi ta nin mga katekesis bàgo kan Primera Comunión asín Kumpil, siring man kan Youth Encounter, PREX, Cursillo, Christian Life Program, Bible study, asín iba pa.

An Tataramon na iní tinátaó sa gabós, nin huli ta boót nin Diós na maligtas an gabós. Sabi sa Mateo 5,45, “parehong pinapasaldangán saká pinapauranan nin Diós an tawong marhay asín an maraot, an banál asín an parakasalà”. Alagad an mga nag-aakò sa Tataramon asín nagsasabuhay kaiyán, iyó saná an makakalaóg sa Kahadean nin langit.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin mga Tataramon sa biblía na mahalagá saimo, nin huli ta nagtaóng inspiración sa buhay o nagtaóng giya sa mga panahón nin kadificilan.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

An Sakal kan Kagurangnan

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hulyo 9-15, 2023. Basahon an Evangelio gikan sa Mateo 11,25-30 (Ika-14 Domingo sa Ordinariong Panahon - A).

…

Sa Evangelio madadangog niato an pinakanakakaranga sa mga tataramon ni Jesús, sa Mateo 11,28: “Madya kamo Sako, gabós na napapagal asín nagagabatan, asín tatàwan Ko kamo nin kahingaloan”. Para iní sa mga napápagál, sa mga nakakamatè nin gabát nin problema o responsibilidad sa saindang abaga, sa mga nag-aagi nin kadificilan – boót sabihon, para sa sato gabós.

Dangan sinundan ni Jesús kainí: “sûngayá an Sakong sakal”. An sakal iyó bagá idtong sinúsûngay sa abaga nin karabáw sa pag-araro sa omá o pagguyod nin pababá. An sakal gamit sa pagtrabaho, bakô sa pagpahingalò. Alagad iyó iní an tinukdô ni Jesús, asín sinabi pa Niya na “makánood kamo Sako”. Anó iníng Saiyang sakal?

Sa Biblía an sakal tanda nin pagpasakit nin tawo sa kapwa tawo. Sa Levitico 26,13 nasusurat: “Ako an Kagurangnan na saindong Diós, na nagkuá saindo halè sa Egipto tanganing dai na kamo magin mga oripon. Binarì ko na an saindong sakal asín pinalakáw ko kamo na daíng sukat ikasupog.”

Sa pag ministerio publico ni Jesús pinadagos Niya iníng pagbarì nin sakal nin katawohan sa pagbulóng nin mga naghehelang, sa pagpalayas nin mga demonio, sa pagpatawad sa mga kasâlan. Tinuyaw Niya man an mga pamayó nin banwaan na nagpapataw nin mga dagdag na kagabatan sa mga tawo. Sinabi Niya sa Mateo 23,4: “Minabugkos sinda nin mga magabát na darahon asín ipinapapâsan sa ibá, alagad maski sarô nindang murô habô nindang hirôon sa pagtabang sa pag-alsa kaiyan.”

Para sa mga nagkákapôt nin katongdan o autoridád, marhay paghorop-horopan kun an lambang gibo o pagsugò niato nagdádará sa kapwa sa karahayan o nagdádagdag saná nin pagabát na bakô man kaipuhan. Mas maraot kun an satong kaginhawahan bungang halè sa pagsakit asín kagabatan nin satong kapwa.

Alagad sa kadaklan na beses, may nakasûngay satong ibang sakal bakô nin huli ta may mga ibang tawo o sistemang nagpapasakit sato kundî huli ta pinilì tang sunodón an tentación nin kinâban – sa pagsuway sa tugon nin Diós para saná makamít an satong ambisyon, sa pagbukod sa mga kaogmahan na bakô susog sa Saiyang kabôtan, asín sa pagtipon nin mga kinâbanon na kayamanan. Ini an sakal nin kasâlan.

Alagad an sakal kan Kagurangnan iyó an Saiyang pangataman na naggigiya sa mga tamang dalan. Daí iní maakò nin mga tawong napápanô an isip asín pusò nin pansadiring interes – an mga madonong asín matalì sa kinâban – kundî nin mga kasaradayán na tataó magsarig sa Diós. An Saiyang kabôtan iyó an saindang kadonongan, asín an Saiyang pagkamarahayon iyó an saindang kaogmahan.

An sakal kan Kagurangnan iyó an misyon sa pagdará kan Marhay na Baretà sa kapwa. Iní an nagtátaó sato nin kahulugán asín katuyuhán sa buhay, lalò na kun an satong mga talento, kakayahán, asín kayamanan, ginagamit niato sa paglingkod sa Diós. Sabi ni San Pablo sa Roma 8,28: “Aram ta na sa gabós na bagay an Diós naggigibo para sa karahayan kan mga namómoót Saiya – an mga inapód Niya susog sa Saiyang katuyohán.”

Sa huri, an sakal kan Kagurangnan iyó an cruz na enot na Niyang pinâsan, na sinusugò Niyang pàsanón man nin mga boót magin disipulos Niya. Pag pinapàsan ta an satong cruz, an satong mga gibong marhay asín matanos nagigin paagi nin pagtalubò sa kabanalan asín pag-akò nin kaligtasan pasiring sa buhay na daíng kasagkoran.

An sakal nin kasâlan magdádará sato sa karâtan asin kagadanan. Alagad an sakal kan Kagurangnan nagtátaó nin kahulugán sa satong kapagalan, asín kapanoan nin buhay, ngonian pa saná asín sagkod pa man.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia kan saimong paagi nin pagsûngay kan sakal ni Cristo. Anó an naidolot kainí sa saimong buhay?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

Pàno Magín Maninigong Cristiano?

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hulyo 2-8, 2023. Basahon an Evangelio gikan sa Mateo 10,37-42 (Ika-13 Domingo sa Ordinariong Panahon - A).

…

An istorya sa Evangelio pagpadagos kan istorya kan pagsugò ni Jesús sa Doce Apostoles na magmisyon. Bàgo sinda magdagos sa dalan nin pagigin disipulos, linatag ni Jesús an mga hinahagad Niya. Kun daí ta Siya kamòtan oróg kisa satong pamilya, kun daí kita magpàsan kan satong cruz, kun daí ta kayang magdusay kan satong buhay – bakô kitang maninígò na magín disipulos Niya.

Magabát palán an magín disipulo ni Jesús. Tibaad maghapót nganì kita: Bakóng daíng kondisyon an pagkamoot nin Diós? Bakóng Siya mismo an nagsabi: “Madya Sako kamong mga napapagal asín nagagabatan, tatàwan Ko kamong kahingaloan… ta an Sakong sakal facil asín an sakong pàsanon magián” (Mateo 11,28-30).

Totoong namomòtan kita nin Diós na daíng kondisyon asín pinapatalingkas Niya kita sa magabát na pàsanon nin kasâlan asín padusang kagadanan – alagad iní kapinònan saná kan gracia na tinatao sato nin Diós. Kun boót tang makamít an kapanoan kan Saiyang buhay asín makaabót sa Saiyang Kahadean, an kaipuhan niatong gibohon sinabi ni Jesús sa Mateo 5,48: “Magín perpekto kamo, siring na perpekto an saindong Amâ sa langit.”

Marhay na paromdomón kita kainí nin huli ta kaidto pa man hanggang ngonian, may mga boót magsabot kan pagigin Cristiano susog sa saindang sadiring kaisipan. May iba-ibang klase nin pagigin Cristiano.

May mga Cristiano saná sa ngaran. Sinda an mga nag-akò kan bonyag ni Cristo alagad daí na gayo nagtalubò sa buhay pagtubód. Cultural Catholics minsan an apód sainda, mga nagdakulà sa kultura nin pagtubód, may dikit na pakaisi sa nagkapirang doctrina, nagcecelebrár nin mga fiesta, alagad hanggang diyan na saná. Inaapód man na Catolico cerrado – sarado kutâ sa influencia nin ibang relihiyon pero sarado man an pusò sa pasabóng kan Espiritu asin imbitasyon kan Simbahan.

May mga Cristiano paminsan-minsan. Iní an mga daí nahíhilíng an halagá kan regulár na pagsimba sa Domingo; máraní sa Diós pag may kaipuhan saná asín pagkatapos lingáw na namán Siya. Namimilì man nin mga linya sa biblía o katukdoán kan Simbahan na tutubodón – kun dificil o bakô conveniente, babayaan o iiwasan maski iní an kabôtan nin Diós.

Alagad an Cristiano sa dalan nin Kagurangnan hinahanap asín inuutób an Saiyang kabôtan – nin huli ta yaon digdi an kahulugán asín kaogmahan nin saiyang buhay, siring sa sinabi ni San Pedro sa Juan 6,68: “Sa kiisay pa kami maduman, Kagurangnan? Yaon Saimo an mga tataramon nin buhay na daíng kasagkoran.”

An pagigin disipulo ni Cristo iyó an pagsunód sa Saiya tanganing sa hurí magín nanggad kabaíng Niya. Sabi sa 1 Pedro 2, 21: “Para sa bagay na iní inapód kamo nin Diós, huli ta si Cristo nagtíos dahil saindo asín nagwalat nin arogan na dapat nindong arogon”. Kan hinagad ni Jesús na paorogón ta an Diós sa gabós, maski sa sadiring magurang, pinahilíng Niya iní kan binayaan Niya an Saindang haróng tanganing gibohon an Saiyang misyon. Kan hinagad ni Jesús na kita magpâsan kan cruz, enot nang pinâsan Niya iní para sato gabós. Kan hinagad Niyang magdusay kita kan sadiring buhay, Siya mismo nagdusay kan Saiyang buhay para sa satong kaligtasan.

Sa mga natatakot sa kun anó an mawáwarâ sainda, o kun anong kadificilan an aagihan ninda, sa pagsunód ki Cristo, rumdomón na Diós an mabalos. Kun sa mga nagtatabang sato sa misyon, nanugâ na Siya nin balós susog sa saindang karahayan nin boót, anó pa daw sa mga maimbod na nag-uutób sa Saiyang kabôtan? Sa Mateo 28,20 nanugâ Siyang magigin kaibahan niato sa dalan sagkod pa man, dangan, sa huríng panahón, kapanoan nin buhay asin gracia sa Saiyang Kahadean.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia nin mga kadificilan, siring man mga kaogmahan, sa pagsunod ki Cristo asín paglakbay sa Saiyang dalan.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Dai Matakot Ihiras an Evangelio

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hunyo 25-Hulyo 1, 2023. Basahon an Evangelio gikan sa Mateo 10,26-33 (Ika-12 Domingo sa Ordinariong Panahon - A).

…

An evangelio ginonò sa Mateo 10 – an capitulong iní nagpoón sa pag-apód ni Jesús sa doceng disipulos dangan sa pagsugò sainda sa misyon. Kayâ kan nagsabi Siya na daí matakot, iní sa contexto kan pagbalangibog kan Marhay na Baretà. Kadaklan sa satong Cristiano inaakò na kita “paratubod” (believers), dakúl man sato an “parasimbá” (church-goers). Alagad pirá daw sato an minasabing kita man “parabalangibog kan Marhay na Baretà” (evangelizers)?

Kadakul saná kan mga natatakotan ta sa pagpahayag kan Evangelio – dakúl an takot mapasupgán, ma-reject, o mapasalâ, patin na an magtarám sa hampang nin dakúl.

Sa ibóng na lado, bakô man maraot magkaigwá nin tamang takot. Sabi sa Talinhaga 9,10: “An pagkatakot sa Kagurangnan an kapinonan nin kadonongan”. Dapit iní sa tamang paggalang asín pagsamba sa satong Diós.

Sa aroaldaw na buhay, an takot garó preno sa sasakyán na minatabang satong makalikáy sa diskwido. Alagad, siring na an behikulo daí madalagan kun pirming nakapreno an nagmamaneho, an sobrang takot pinupugolan man kitang mabuhay na matalingkás asín mabunga. Kayâ sa Evangelio, tolóng beses na sinabihan ni Jesús an mga disipulos na daí matakot sa pagmisyon.

Daí matakot maglakáw sa dalan kan cruz. Bàgo kita magbalangibog kan Evangelio, kaipuhan naghihingowa na kitang isabuhay iní. An satong pagpàsan kan cruz aroaldaw, boót sabihon an pagsunód sa paarog asin kabôtan ni Cristo, an paggibo nin tamà asin marhay, maski mapagál o dificil, iyó an enot na gawè nin pagsaksi sa Evangelio.

Daí matakot na makísumarò sa sacrificio ni Jesús, ta Siya man an satong kusóg asin kaiba sa pagpàsan kan satong cruz. Sabi sa Filipos 4,13: “An gabós magigibo ko huli ki Cristo na nagpapakusóg sako.”

Daí matakot magdangóg. Kun naghihingowa na kitang maglakáw sa dalan kan cruz, an sunód na hakbang sa paghirás kan Marhay na Baretà sa kapwa iyó an magdangóg. Kan pinònan ni Papa Francisco an mga proceso kan Sínodo nin Sinodalidád, an enot niyang hinagad iyó na kita magin Simbahan na nagdadangog.

Minsan natatakot kitang magdangóg sa kapwa huli ta dificil akóon an saindang katotoohan, asín habô tang matanyog an mga sadiring posisyon. Alagad kaipuhan an kusóg ki boót na magdangóg sa manlaen-laen na boses tanganing mamatean nanggad kan satong ka-dialogo na kita tunay na may pagmakulóg sainda.

Daí matakot na magsabatan an katotoohan kan Evangelio sa realidad nin buhay nin mga tawo. Si Cristo mismo an satong pangarogan kainí. Sa Saiyang ministerio público, dinolok Niya an mga tawo, hinapót kun ano an saindang kaipuhan; maski mga kaiwal dinangóg Niya, tinókdoán, asín naherakan.

Daí matakot mámoót. Madalíng kamòtan an mga tawong marhay sato. Siring man, dificil kamòtan an mga bakô marhay sato, dangan an bakô tang kamidbid o an naiiba sato. May peligro man sa pagbukás kan satong pusò sa kapwa: tibaad abusohon an satong tiwalà o lokohon kita. Alagad sabi sa 1 Juan 4,18: “an pagkatakot hinahalè kan tunay na pagkámoót”.

Si Cristo mismo an nagsaksi sato kainíng tunay na pagkámoót, kaya sa Juan 13,34, ini man an bàgong tugon Niya sato: “magkaminorootan kamo siring na Ako námoot saindo”. Namòtan kita nin Dios, mahalagá kita Saiya. Kayâ mámoót man kita asin magmakulóg sa kapwa siring na kita namòtan Niya. Sa paaging iní kita magigin tunay na parabalangibog kan Marhay na Baretà sa kapwang oróg na nangangaipo kainí.

…

GIYA SA PAGHIRÁS SA SADÍT NA KOMUNIDAD O PAMILYA • Ano an saimong mga kinakatakotan? Nadará mo na iní sa Diós sa pamibi? Pàno mo iní nalampasan (o padagos pang linalabanan)?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Inapod asin Sinugo

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hunyo 18-24, 2023. Basahon an Evangelio gikan sa Mateo 9,36–10,8 (Ika-11 Domingo sa Ordinariong Panahon - A).

…

An istorya sa Evangelio nagpoón sa pagkaherak ni Jesu Cristo kan nahiling Niya an katawohan na naghahalat Saiya. Iní pinahilíng Niya, enot, sa pagsadól sa Saiyang mga disipulos na magpangadyî sa Kagurangnán na magpadará nin mga paraaní sa Saiyang aanihon; dangan, sa pagsubol sa doce na magmisyón sa “mga nawáwaráng karnero kan Israel”. Anó an mensahe sato kainí?

Enot, an Diós mahéherakón. Iní pinahayag mismo ni Jesús sa Saiyang ministerio público, sa Saiyang pagtukdô sa mga dukhâ, pagbulóng sa mga naghehelang, asín pagpatawad sa mga parakasalà. Oróg sa gabós, sa pagdusay kan Saiyang sadiri sa cruz para sa gabós na tawo – sa mga naglalakaw sa matanos na dalan asín sa mga nawáwarâ, sa mga disipulos Niya patín sa mga kaiwal Siya. Nasusurat sa Roma 5,8: “Pinamidbid na gayo nin Diós an Saiyang pagkámoót sato: kaidto pang parakasalà kita, nagadán na si Cristo para sato.”

Ikaduwá, hinirás ni Jesús an misyon nin pagkaherak sa Saiyang mga disipulos. Sabi Niya sa Lucas 6,36: “Magín maheherakón kamo, siring na an saindong Amâ maheherakón.” Kayâ inapód Niya an doce, tinâwan nin kapangyarihan, asín sinugò na maggibo nin siring sa Saiyang mga gibong herak. Siring man sa Evangelio inapód an doce na mga “apóstoles”, sa Griego apostoloi, “an mga sinugo” – sa pagdará nin pagkaherak.

An Doce Apóstoles iyo sinda: Simón na inaapód man na Pedro, Andres, Santiago, Juan, Felipe, Bartolomé, Tomás, Mateo, Santiago na aki ni Alfeo, Tadeo, Simón na Cananeo, asín Judas Iscariote. Sa Evangelio ni San Juan, isinabáy an ngaran na Natanael sa Doce, kaya pinagtutubodán na iní asín si Bartolomé parehóng tawo man saná. An nagsalida ki Judas Iscariote sa Doce iyo si Matías. Sa Bàgong Tipan igwa nin mga ináapód man na apóstoles maski bakô kasabay sa Doce, siring ki Pablo, Bernabé, Timoteo, Tito, Apolos, asín Santiago na ináapód na “tugang ni Jesús”.

An mga apóstoles minimidbid na tinâwan nin katongdán na mamayó sa pagbalangibog kan Marháy na Baretà asín pag-ataman sa mga komunidád nin pagtubód. Sa pag-agi kan panahón an mga kasalida ninda inapód na mga obispo na may katongdán sa pangataman sa Simbahan. An mga obispo hiníhirásan man an mga padì asín diakono kan saindang katongdán o oficio na maglingkod sa Simbahan. An pakikihirás nin mga clero – mga obispo, padì, asín diakono – sa misyon ni Cristo ináapód na pagkapading ministeriál (ministerial priesthood).

Alagad bakô man saná an mga clero an hinirasán ni Cristo na magpadagos kan Saiyang misyon nin pagkaherak, kundî an gabós Niyang disipulos sa gabós na panahón. An istorya sa Evangelio nin pagsubol sa misyon sa mga apóstoles, pasabóng asín pag-andam saná sa Dakulang Pagsugò na itátaó ni Jesús sa gabós Niyang mga disipulos bàgo kan Saiyang Ascensión sa langit. Sa Mateo 28,19-20 nagsugò Siya: “Lakáw kamo, gibohang disipulos an gabós na nación! Bonyagán sa ngaran kan Amâ, kan Akì, asín kan Espiritu Santo. Tukdoán na mag-utób kan gabós Kong itinugon saindo.”

An pakíkihirás nin gabós na binónyagán sa misyon ni Cristo ináapód na pagkapading común (common priesthood). Sa Lumang Tipan may profesía na nganì dapit kainí, kan an Diós makipagtipan sa Israel sa bulód Sinai. Sa Exodo 19,6 nasusurat: “Magigi Ko kamong kahadean nin mga padì asín banál na nación.” Boót sabihon an pagigin Cristiano, bakô saná an pagigin paratubod asín parasunod ni Cristo, kundî sinusugò Niya man kita sa paggibong herak asín paghirás kan Marhay na Baretà sa satong kapwa, tanganing nin huli kainí madará sinda – asín kita gabós – sa Kahadean nin Diós.

…

GIYA SA PAGHIRÁS SA SADÍT NA KOMUNIDAD O PAMILYA • Sa panahón ngonian nin krisis sa ekonomiya (patin na nin huli kan pagtuga kan bulkan), pàno mo ihíhirás sa kapwa an pagkaherak ni Cristo?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

An Hawak ni Cristo

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hunyo 11-17, 2023. Basahon an Evangelio gikan sa Juan 6,51-58 (Solemnidad kan Corpus Christi).

...

Sa Evangelio itinukdô ni Jesús an tinútubodán niatong misterio poón kaidto hanggang ngonian: na Siya totoong presente sa Eucaristía asín an satong inaakò sa comunión totoong Saiyang hawak asín dugô. Kayâ sinecelebrár kan Simbahan an Solemnidad kan Oróg Kabanál na Hawak asín Dugô ni Jesu Cristong Kagurangnán, o sa halîpot, Corpus Christi.

Igwa na nin fiesta sa Eucaristía na sinecelebrár sa Jueves Santo sa Misa nin Huríng Pamanggi. Alagad nin huli ta kadakul an sinecelebrár sa aldaw na idto nin Semana Santa, pinagmarhay ni Papa Urban IV kan taón 1264 na magkaigwa nin sarô pang fiesta na magtátaóng magkakanigong atensyón digdi.

Anó an Eucaristía? Sabi sa Catechism of the Catholic Church (CCC 1324) iní an “burabod asín kaitaasan kan buhay Cristiano”. Si Jesús nagtukdô sa Juan 6,54: “An minákakán kan sakuyang lamán asín mináinóm kan sakuyang dugô igwa nin buhay na daíng kasagkoran, asín bubuhayon ko sa huríng aldaw”. Sabi sa Catechism for Filipino Catholics (CFC) an Eucaristía sacramento nin sacrificio, comunión, asín presencia.

An Eucaristía Sacramento nin Sacrificio nin huli ta iní “representación asín pagromdóm kan sacrificio ni Cristo sa cruz, asín ginagamit kainí an bunga kan sacrificio sa cruz” (CFC 1690). Sabi ni San Pablo sa 1 Corinto 10,16: “An kopa kan bendición na benebendicionán ta, bakóng paropakinabang iyán sa dugô ni Cristo? An tinapay na binabaak ta, bakóng paropakinabang iyán sa hawak ni Cristo?” Sa Eucaristía an gracia nin kaligtasan na bunga kan sacrificio sa cruz itinatao sato bilang pagkaon.

An satong hamak na simbag sa oróg kadakulang graciang iní iyo an pagtaó kan satong “bilog, tuyo, asín aktibong (full, conscious, and active) participación sa mga celebración kan liturgía.” (Iní susog sa Sacronsanctum Concilium no. 14, an Constitución kan Banál na Liturgía.)

An Eucaristía Sacramento nin Comunión niato ki Cristo asín sa lambang sarô, nin huli ta iní sacramento nin pagkámoót, tandâ nin pagkasararô, bugkos nin pagmakulóg, asín bangkete Pascuál (CFC 1702; SC 47). Sabi ni San Pablo sa 1 Corinto 10,17: “Huli ta sarô saná an tinapay, sarô saná kitang hawak, kita na dakúl, ta kita gabós nakikisalo sa sarô sanáng tinapay.”

Pag-inaakò ta Siya sa comunión, Siya nagigin parte kan satong hawak, minsan nganì kita kabtang na kan Saiyang Hawak. Kayâ an minímum na hinahagad sato sa pag-comuniòn iyó na kita dapat nasa “estado nin gracia” o daíng nagibong kasâlan na mortal. Ta daíng saysay an satong pag-comunión kun sinisikwal ta an Saiyang kabôtan sa paggibo nin kasâlan na nakakagadán sa espiritu. Siring man sayang an satong pag-comunión kun sinisikwal o pinapasipara ta an kapwang nangangaipo.

An Eucaristía Sacramento nin Presencia. “Si Cristo presente sa celebración Eucaristico sa mga nagtitiripon sa Saiyang ngaran, sa persona kan minístro, sa Saiyang Tataramon, asín sa sa Banál na Hostia na bolanos asín daí natatapos” (CFC 1722; SC 7).

Sa pagtapos kan Misa, sinusubol kita kan padì na maglakáw asín magmisyon. Nin huli ta kitang mga halè sa pagsimbá, dara-dara na an presencia ni Cristo saén man kita magdumán, lalò na pag kita bilang Simbahan “nangangadyì, naggigibong-herak, naglalakbay pasiring sa buhay na daíng kasagkoran, nagbabalangibog kan tataramon nin Dios, asín namámayó sa Banwaan nin Dios” (CFC 1721).

…

GIYA SA PAGHIRÁS SA SADÍT NA KOMUNIDAD O PAMILYA • Anó an saimong pinakamemorableng experiencia nin pagsimba? Anó man an mga kadificilan mo sa pagsimba?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song