An Simbahan kan Espiritu Santo

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Mayo 28 – Hunyo 3, 2023. Basahon an Evangelio gikan sa Juan 20,19-23 (Solemnidad kan Pentecostes).

…

May duwáng versión an istorya kan paghilig kan Espiritu Santo. An sarô iyó ining pagbasa sa Evangelio ni San Juan. Ini nangyari kan si Jesús nagpahilíng sa Saiyang mga disipulos sa banggi kan mismong aldaw na Siya nabuhay-liwát. An ikaduwá iyó an istorya kan Pentecostes sa Gibo kan mga Apostoles 2,1-11.

An Pentecostes tataramon na Griego na boót sabihon ika-50 aldaw. Para sa mga Judío, ika-50 aldaw poón sa Pascua, fiesta nin tig-anihan o Shavout, asín pagromdom kan pagtaó nin Diós kan Saiyang Tugon sa banwaan Israel dumán sa bulód kan Sinai. 

Alagad para sa mga Cristiano, ika-50 aldaw poon sa Domingo de Resurrección na celebración kan paghilig kan Espiritu Santo sa mga disipulos asín pagkamundag kan Simbahan. Midbidón ta pa an Espiritu Santo asín kun natà sa aldaw nin Pentecostes namundag an Simbahan.

Espiritu nin Misyon. An misyon halè ki Cristo asín an Simbahan namundag kan tinâwan kan Espiritu Santo an mga disipulos nin manlaen-laen na mga biyayà para matupád an misyon. Sabi ni San Pablo sa 1 Corinto 12,7: “Sa lambang sarô itinátaó an pahilíng kan Espiritu para sa pakinabang kan gabós sa gabós.” Asín nagtaó siya nin mga halimbawà kainíng mga biyayà kan Espiritu para sa misyon: kadonongan, kaaramán, pagtubód, pagbulóng, darakulang gibo, profesía, pagkamidbid kan manlaen-laen na espiritu, pagtarám sa Espiritu, asín pagpaliwanag sa tinátarám sa Espiritu.

Aram asín akò ta na daw an particulár na biyayang tinaó sato kan Espiritu? Nagagamit ta daw iní sa misyon o sa karahayan nin kapwa asín komunidád?

Espiritu nin Pagkaherak. Tinaó ni Cristo sa Simbahan an katongdán na magín agihan nin pagkaherak asín pagpapatawad nin Diós huli kan Espiritu sa mga sacramento nin Pagbonyág asín Reconciliación. Sa Juan 20,23, kan tinaó ni Jesús an Espiritu sa Saiyang mga disipulos, tulos sinabi Niya: “An kiísay man na kasâlan na saindong patawadon, mapapatawad; an kiísay man na kasâlan na daí nindo patawadon, daí mapapatawad.”

Pag kita nagpapatawad sa kapwang nagkasalà sato nagigin instrumento kita nin pagkaherak nin Diós. Sa panahón nin pagkabarangâ asín pag-iriwal, an pagigin maheherakon an dalan pasiring sa tunay na pagkasararô asín pagkasinarabotan.

Espiritu nin Katotoohan. Nanugâ si Jesús sa Juan 16,13: “Pag-abót kan Espiritu nin katotoohan, tatabangan Niya kamo na masabotan an gabós na katotoohan”. Kayâ pag an Simbahan maigot na sinusunód an paggiya kan Espiritu asín maimbód sa pagsabuhay kan katotoohan kan Evangelio, minakusóg an saiyang pagsaksí sa kinâban asín an saiyang autoridád sa pagtukdô kan katotoohan ni Cristo minasaldang sa gabós na panahón asín sa manlaen-laen na contexto asín aspeto nin buhay.

Ining kapangyarihan kan katotoohan ni Cristo pinahilíng man sa Gibo 2,4-12, kan an mga disipulos nagpahayag kan Marhay na Baretà, nagkangaralás an mga tawo na halè pa sa manlaen-laen na lugár, nin huli ta nasabotan ninda an sinasabi nin mga disipulos maski ibá-ibá an saindang lenguahe. Nin huli ta an Evangelio universál, para sa gabós, tanganing an gabós magpasiring ki Jesus.

Siring man, sa panahon nin talamák na kaputikan asin sistematikong disinformación, pag kita nagtatarám nin katotoohan asín naglalaban sa kaputikan, nabubuhay kita sa Espiritu, asín dinádará ta an Saiyang liwanag sa diklom para sa kapwang naghahanap man nin liwanag.

…

GIYA SA PAGHIRÁS SA SADÍT NA KOMUNIDAD O PAMILYA • Ano sa hilíng mo an biyayà na tinaó saimo kan Espiritu? Pàno mo iní nagagamit sa saimong buhay? Anó an sinasabi kainí dapit sa misyon nin Dios sa saimo?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song.

 

 

Si Cristo Suminakat sa Kalangitan

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Mayo 21-27, 2023. Basahon an Evangelio gikan sa Mateo 28,16-20 (Domingo kan Pagsakát sa Langit kan Kagurangnan).

…

An pagbasa iyó an mga huríng versiculos kan Evangelio ni San Mateo. Yaon digdi an mga huríng panugón-tugon ni Jesús sa Saiyang mga disipulos alagad daíng sinabi dapit sa Saiyang pagsakát sa langit.  An istorya kan Ascensión yaon sa Evangelio ni San Marcos asín San Lucas, dangan sa libro kan mga Gibo kan mga Apostoles (1,1-11). Anó an kahalagahán kan Ascensión ni Cristo?

An Ascensión Katotoohan kan satong Pagtubód. Sa Credo satong pinapahayag na si Cristo “suminakát sa kalangitan asín nagtutukaw sa tóo kan Diós Amáng makakamhan”. An Ascensión iyó an pagpamuraway asin pag-entronar Saiya bilang hadè kan gabós, kayâ nganì sinabi Niya: “Itinaó Sako an gabós na autoridád sa langit asín dagâ”. Sabi pa ni San Pablo sa Efeso 1,22-23: “An gabós ibinugtak kan Diós sa irarom kan Saiyang mga bitís, asín labáw sa gabós, giníbo Siyang pamayó kan Simbahan, na Saiyang hawak, an kalubosan kan nagpapanò kan gabós sa gabós.”

An Ascensión Pagsugò sato sa Misyon. An pagbalík ni Cristo sa langit iyó an tandà kan katapusan kan Saiyang panahón sa dagâ. Alagad bakô iní katapusan kan Saiyang misyon nin huli ta sinusugò Niya an Saiyang mga disipulos kaidto asín kita ngonian na ipadagos iní. Sabi Niya sa Juan 20,21: “Siring na Ako sinugò kan Amâ, kamo man sinusugò Ko.”

An Evangelio ni San Mateo nagpapahayag kan inaapód na Dakulang Pagsugò ni Jesús. An sabi Niya sa Mateo 28,19-20: “Lakáw kamo, gibohang disipulos an gabós na nación! Bonyagán sa ngaran kan Amâ, kan Akì, asín kan Espiritu Santo, tukdoán na mag-utób kan gabós na itinugon saindo.” Kayâ inaakò ta sa bonyag bakô saná an kapatawadán nin satong mga kasâlan, asín an dignidad nin pagigin mga akì kan Amâ, tugang ni Jesu Cristo, templo kan Espiritu Santo, miembros kan Simbahan, asín tagapagmana kan Kahadean – kundî an pag-akò man kan misyon ni Cristo bilang padì, profeta, asín hadè, sa bilog niatong buhay. An misyon na iní hinihiras ni Cristo bakô saná sa mga padì, o madre, o mga katekista, kundî para sa gabós na Cristianong binonyagán.

An Ascensión Panugâ nin Gracia.  Sa pagpadagos ta kan misyon ni Cristo, nanugâ Siya sa Mateo 20,28: “Kaiba nindo Ako gabós na aldaw, sagkod sa katapusan nin kinâban”. An kahulugán kainí iyó an pagpadará Niya kan Espiritu Santo, an satong Kasuróg asín Espiritu nin katotoohan, na danay na yaon sa Simbahan asín sa lambang Cristianong binonyagán.

Dangan an Ascensión panugâ man nin buhay na daíng kasagkoran para sato sa kalangitan. Huli ta kan si Cristo nag-ulî sa haróng kan Saiyang Amâ bilang Diós na nanitawo, an satong pagkatawo kaiba Niyang isinakát sa langit. Kaya binuksan man sato an paglaom na makakapasiring sa langit. Sa Juan 14,2, si Jesús nanugâ: “Sa haróng kan Sakong Amâ dakúl an dagosan… Málakaw Ako ta maandam nin lugar para saindo”.

Sa Liturgia sa Domingo kan Ascensión, an Prefacio I nagtátaó nin magayón na sumada kaining misterio na satong sinecelebrár: “Huli ta an  Kagurangnan na si Jesús, Hadê kan kamurawayan, kagdaóg kan kasâlan asín kagadanan; sa atubang kan mga nagngángalas na angeles, suminakát ngonian sa kaitaasan nin kalangitan – Pag-ultanan kan Diós asín mga tawo, Hukóm kan kinâban asín Kagurangnan kan mga kabagsikan – bakô tanganing talikdán an hamak ming kamugtakan kundî tanganing magsarig kaming mga kabtang Niya na másunód dumán, kun saen Siya nag-enot, samong pamayó asín giníkanan.”

…

GIYA SA PAGHIRÁS SA SADÍT NA KOMUNIDAD O PAMILYA • Maghirás kun pàno mo pinapadagos asín sinasabuhay an misyon na tinaó sato gabós ni Cristo na ibalangibog an Saiyang Marhay na Baretà.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song.

 

Pagkamoot na may Kondisyon?

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Mayo 14-20, 2023. Basahon an Evangelio gikan sa Juan 14,15-21 (Ikaanóm na Domingo kan Pascua kan Pagkabuhay-Liwát).

…                                                                                                                                                                 

Sa Evangelio, sa Juan 14,15, nagsabi si Jesús sa Saiyang mga disipulos: “Kun kamo namómoót sako, ootobón nindo an Sakong tugon.” Sa Juan 15,14, sinabi Niya man: “Mga katood Ko kamo kun gibohon nindo an mga pinagbóboót Ko saindo”. Asin sa Lucas 9,23: “Siisay man na boót magín disipulo Ko, kaipuhan lingawán niya an sadiri, magpàsan kan saiyang cruz aroaldaw asin magsunód Sako”.

Sabi daá an pagkamoot nin Diós daíng kondisyon. Natà ta garó igwa man giraray? Boót daw sabihon kainí kamomòtan saná kita nin Diós kun kita banál, maboot, asin masinunód-sunod? Bakô man. Sabi nganì ni San Pedro sa 1 Pedro 3,18: “Si Cristo makasarô nagtíos para sa mga kasâlan, an suripot para sa mga tampalasan, tanganing ikahatód kamo sa Diós.” Saboton ta kun ano an kahulugán kaining pagkamoot nin Diós na daíng kondisyon.

An pagkamoot nin Diós nagpapatalingkás sato. Si San Pablo nagtokdô sa Roma 5,8: “Pinahilíng nin Diós an Saiyang dakulang pagkámoót sato kan si Jesús nagadán para sato kan kita mga parakasalà pa”. Maski sa Saiyang minísterio publico, pigdolok asin pigsuróg ni Jesús an mga parakasalà asin mga siníkwál na nin sociedad bakô na kunsintihón sinda kundî tanganing patalingkasón sa kaoripnán nin kasâlan. An parabola kan masombikal na akì, istorya kan Amâ na inakò nin daíng kondisyon an aking nagkasalà asin nag-ulî tanganing iní magbàgong-buhay.

An pagkamoot nin Diós nagpapadanay sato. An Diós an naenot mámoót sato asin danay na yaon para sato – alagad kaipuhan man an satong pagmàwot na magbàgong-buhay tanganing maakò an kapanoan nin buhay na tinatao Niya. Kaya sa Marcos 1,15, an pirming mensahe ni Jesús sa Saiyang paglibot: “Uya na an Kahadean nin Diós! Magbaklê kamo asin magtubód sa Marhay na Baretà!”

Bilog na buhay iníng paglakbay, asin minsan kita napapadungkál, minsan nawawarâ pa sa dalan. Kayâ sa dakulang pagkamoot sato, pinadará ni Jesús an Saiyang Espiritu tanganing giyahan kita. Nanugâ Siya sa Juan 14,18: “Daí Ko kamo babayaan na mga ilo, mabalik Ako saindo”.

An pagkamoot nin Diós an naghihipnô sato. Sa Mateo 19, matapos na simbagón ni Jesús an joven na lalaki na naghapót kun pàno makamít an buhay na daíng kasagkoran, an mga disipulos naman ni Jesús an nagharapót kun siisay saná an makakaligtas nin huli sa magabát na hinahagad kan Kahadean. An simbag Niya sa Mateo 19,26: “Imposible iní para sa tawo alagad an gabós posible sa Diós”.

Pag giníbo ta na an gabós alagad kulang pa man giraray sa sukol nin karahayan asin katanosan nin Diós, romdomón na bakô man an sadiri tang katanosan an makakaligtas sato kundi an gracia nin Diós. An Saiyang pagkamoot iyó an gracia na naghihipnô sa satong kakulangán asin nagpapabunga sa satong mga paghingowa. Sabi ni San Pablo sa Efeso 2,8-9: “Huli sa gracia nin Diós nakaligtas kamo sa paagi nin pagtubód. Iyan bakóng sadiri nindong gibo kundî regalo nin Diós. Mayò saindong pwedeng mag-urgollo dapit kainí, huli ta bakô iníng bunga kan sadiri nindong gibo.”

An pagkamoot sato nin Diós iyó iní gabós: an kapinônan, an kusóg asin tabang sa dalan, asin an premio sa kataposan. Alagad kaipuhan an satong pag-akò asin pangataman kainí, nin huli ta an pagkamoot na sinasayang, daí nakakapagligtas. An pagkamoot sato nin Diós na daíng kondisyon, kapinônan saná kan daíng kasagkoran na graciang winawaras Niya sato. Kaya an pagsunód ta sa Saiyang kabòtan iyó an balós nin tawong namotan, balós na magdádará nin mas dakul pang gracia. Nin huli ta an Diós bakô interesado na makipagkontrata sato na may mga kondisyon, kundi na makipagtipan sato sa pagkamoot tanganing an Saiyang buhay magín satong buhay man.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia kun pàno mo namatean na namomòtan ka palán nin Kagurangnan, asin kun ano man an ibinalós mo sa Saiyang pagkamoot.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Dalan, Katoohan, asín Buhay

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Mayo 7-13, 2023. Basahon an Evangelio gikan sa Juan 14,1-12 (Ikalimáng Domingo kan Pascua kan Pagkabuhay-Liwát).

…

Sa Evangelio nagpapaaram na si Jesús sa Saiyang mga disipulos, asín sa pag-andam Niya sainda sa Saiyang nagráraníng paghalè, padagos na nagtokdô Siya dapit sa Saiyang sadiri. Sa Juan 14,6 sinabi Niya: “Ako an dalan, an katotoohan, asín an buhay. Daí nin makakadolok sa Amâ kun daí mag-agi Sakuya.” Boót sabihon: Siya an “kapanoan kan pagpamidbid kan Diós Amâ” asín an “tagapagultanan nin Diós asín nin mga tawo”.

Si Cristo an Dalan. Sa Saiya saná makúkuá an kaligtasan, Siya saná an solamenteng agihan pasiring sa Kahadean nin langit. Sabi ni San Pablo sa 1 Timoteo 2,5-6: “Huli ta sarô saná an Diós asín sarô saná an tagapagultanan nin Diós saká nin mga tawo – an tawo na si Cristo Jesús. Idinusay Niya an Saiyang buhay sa pagtubós nin gabós na tawo, na patunay nin Diós sa tamang panahón.”

Liniligtas kita ni Cristo sa duwáng paagi: enot, bilang Diós na totoo, Siya an Akì na pinadara kan Amâ sa katawohan; ikaduwá, bilang tawong totoo, pinapangenotan Niya an katawohan sa pagdolot kan satong sadiri asín pagbalík sa haróng kan Amâ. Kayâ sinabi Niya sa Juan 14,3-4: “Kun Ako makakalakáw asín makaandám nin lugár para saindo, mábalík Ako asín kukuahón Ko kamo para Sakuya, tanganing kun saén Ako dumán man kamo.”

Si Cristo an Katotoohan. Siya an kapanoan kan pagpamidbid sato kan Diós Amâ. An pagpamidbid nin Diós nagpoón pa sa paglaláng alagad inuláng nin tentación asín kasâlan. Kayâ sa Lumang Tipan mababasa an padagos na pagpamidbid giraray nin Diós sa katawohan sa paagi kan Saiyang Piniling Banwaan Israel – asín an kapanoan kainí makúkuá ki Jesús. Kayâ kadakul kan mga pasuruhay Saiya nin mga Fariséos asín escribas, nin huli ta sinasagwè asín tinatamà Niya an saindang mga saláng pakasabot, pagtokdô, asín pagsabuhay kan pagpamidbid sainda nin Diós.

Sabi ni San Pablo sa 1 Timoteo 2,4: an Diós “boót na an gabós na tawo makaligtás, asín makaabót sa pagkamidbid sa katotoohan”. An katotoohan na nakakaligtas iyó si Cristo. Sabi Niya sa Juan 14,11: “Magtubód kamo sako: Ako yaon sa Amâ, asín an Amâ yaon sako.” An tandà na kita nagtutubód iyó an satong pagpahayag kan Katotoohan ni Cristo sa satong mga tataramon asín gibo. Sabi pa ni Jesús sa Juan 14,12: “an minatubód sako magibo man kan mga ginigibo ko”.

Si Cristo an Buhay. Siya an burabod nin buhay. An paglakáw sa Saiyang dalan asín pagsunód sa Saiyang kabôtan an magdádará sato na mabuhay nin makahulugán, matalingkás, asín tunay na maogma. An pagsuway sa Saiyang kabôtan magdádará sato sa mga bisyo asín kasâlan na minaraót nin satong buhay.

Alagad mas pa sa marhay na buhay digdi sa dagâ an boót Niyang itaó sato. Nin huli ta yaon Saiya an buhay na daíng kasagkoran, asín pakatapos kan satong buhay digdi sa dagâ, may naghahalat na estaran sa ikaduwáng buhay. Sa Juan 14,2-3, nanugâ Siya: “Sa haróng kan sakong Amâ dakúl an dagosan… Málakáw ako ta máandam nin lugár para saindo.”

Alagad maskí an estadong iní bakô pa an pinanugâ Niyang kapanoan nin buhay. Nin huli ta an buhay na daíng kasagkoran bakô saná para sa satong kalág, kundî para sa satong bilog na pagkatawo na linaláng nin Diós na kabaíng Niya. Iní mangyayari sa huríng panahón, sa pagkabuhay-liwát nin mga gadán, kun nuarín an hawak asín kalág na pinagbulág nin kagadanan magigin sarô asín bilog giraray, asín daí na magágadán sagkod pa man. Sabi ni Jesús sa Juan 6,40: “Iyó iní an kabôtan  kan sakong Amâ, na an nakákahilíng sa Akì asín nagtútubód Saiya magkakaigwá nin buhay na daíng kasagkoran, asín bubuhayon Ko siya sa huríng aldaw.”

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia kun pàno mo isinabuhay an pag-akò ki Cristo bilang saimong dalan, katotoohan, asín buhay.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Magin Marhay na Pastor

 

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana kan Abril 30-Mayo 6, 2023. Basahon an Evangelio gikan sa Juan 10,1-10 (Ikaapát na Domingo kan Pascua kan Pagkabuhay-Liwát).

…

Sa evangelio nagpamidbid si Jesus bilang marhay na pastor asín pintoan sa toríl. Ano an kahulugán kan Saiyang pagigin pintoan? Na Siya saná an agihan nin kaligtasan nin gabós na tawo. Sabi ni San Pablo sa Colosas 1,14: “Siya an nagligtas sato saká nagpatawad kan satong mga kasâlan”.

Ano an kahulugán kan Saiyang pagigin marhay na pastor? Na dinadará Niya kita sa dalan nin kaligtasan nin huli kan pagsaksi kan bilog Niyang buhay – sa Saiyang mga katokdoán asín mga gibong milagro, sa pagtipon nin komunidád nin mga disipulos Niya, asín, oróg sa gabós, sa pagdusay Niya nin buhay para sa sato gabós.

Kun si Cristo an satong Marhay na Pastor, ano an dapat niatong gibohon? Ini man an hapót kan mga Judío na nagdangóg sa pagtokdô ni San Pedro. An saiyang simbag sa Gibo 2,38: “Magbaklê asin magpabonyag… asin aakoon nindo an balaog kan Espiritu Santo”.

Enot, magdangóg kita sa Saiyang boses. Napapalibotan kita nin kadakul na boses na naghahagad na sinda an dangogón. “Giboha iní asín magigin maogma ka; o masikat ka; o magigin mayaman asin makapangyarihan ka.” Alagad Siya saná an boses na minagiya sato sa mga tamang dalan. Sabi ni Jesus sa Juan 10,27-28: “Nagdádangóg Sako an mga karnero ko; midbid Ko sinda asin sinúsunód ninda Ako. Tinatàwan Ko sinda nin buhay na daing kataposan, asin daí nanggad sinda mawawarà.”

Ikaduwá, maglakáw kita sa Saiyang dalan. Madalíng magsunód ki Cristo pag an buhay facil asín maogma. Ligtas kutâ pirmi an gabós sa laóg nin toríl, alagad dai pwedeng pirming nasa laóg saná sinda ta magugutom. Kayâ an satong Marhay na Pastor dinádará kita sa luwás nin toríl, susog sa Psalmo 23,2: “sa mga berdeng sabsaban, sa mga tubig na malinaw”. Alagad may mga peligro sa luwás nin toríl. Tibaad kita makulgan, o mag-agi nin pagsakit, o magadán. Mabklay pa daw kita sa Saiyang dalan kun iní panô nin kadificilan, kun iní an dalan kan cruz?

Ikatoló, na kita magín siring man sa Saiya. An Kagurangnan nanugâ sa Jeremias 3,15: “Tatàwan ko kamo nin mga pastor susog sa sakong pusò, asín papamayohan ninda kamo nin may kadunongan asín pakasabot”. Iní bakô dapit sa mga padì saná, ni sa mga pamayó nin banwaan saná, kundî sa sato gabós. Aroaldaw nagpapastor kita nin mga tawo, bilang amo o empleyado, bilang pulitiko o ciudadano, bilang magurang, tugang, o amigo. An hapot: ginigibo ta daw iní siring ki Cristo na Marhay na Pastor?

Si Cristo nagtokdô kan pagkakaiba kan marhay asín maraot na pastor. Sabi Niya sa Juan 10,10: “An parahâbon minalaóg, daíng ibang tuyo kundî maghâbon, maggadán asín magraót. Ako napadigdi tanganing sinda mabuhay asín mapanô nin buhay.” An pagigin siring ki Cristo iyó an pagkaigwa kan “parong nin mga karnero”, boót sabihon nakikisumarò sa mga dukhâ, mga maluya, mga sinisikwal nin sociedad, asín mga biktima nin violencia. An pagigin siring ki Cristo iyó an pagpaoróg sa kapwang nangangaipo kisa sadiring karahayan, asín pagigin maogma sa pagsunód sa kabòtan kan Amâ.

Sa panahon nin krisis, an tentacion sato iyó na kita magkanya-kanya, na maurí o mag-isip nin maraot sa kapwa; asín sa mga may katongdan, na abusohon an saindang awtoridád. Mahalagá na tataó kita magmidbid kun siisay an mga marhay asín maraot na pamayó, tanganing midbid ta kun siisay an susundan o lilikayán. Alagad mas mahalagá na lambang sarô sato magin man lingkod na pastor, susog sa pusò kan Marhay na Pastor.

…

GIYA SA PAGHIRÁS SA SADÍT NA KOMUNIDAD O PAMILYA • Igwa ka nin midbid na sa hilíng mo may pusò nin Marhay na Pastor? Ano sa saindang gibo o buhay an boót mong arogon o gibohon man kan iba?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

An Pamanggi sa Emmaus

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana kan Abril 23-29, 2023. Basahon an Evangelio gikan sa Lucas 24,13-35 (Ikatolóng Domingo kan Pascua nin Pagkabuhay-Liwát).

…

An istorya sa Evangelio iyó an pag-ibá ni Jesús sa duwá Niyang disipulos mantang sinda nagbabaklay pasiring sa Emmaus. Mantang iní totoong nangyari, isinurat man iní bilang alegoría, o istorya na may hararom na kahulugán sa paagi nin mga simbolóng ginamit. Iní sarong alegoría kan pagpamidbid sato ni Cristo, orog na sa mga parte kan Eucaristía o Santa Misa.

Liturgía kan Tataramon an enot na kabtang kan Santa Misa. Sa dalan, tinukdô ni Jesús sa duwáng disipulos an tamang interpretasyon kan mga mga profesía dapit Saiya sa mga libro nin mga Tugon asín Profetas. Kayâ nagtutubód kita na an gabós na Kasuratán makukua an pinakakahulugan ki Jesu Cristo. Si Cristo an kapanoan kan pagpamidbid nin Diós, kayâ Siya an llave sa pakasabot sa mga Kasuratán, sa kasaysayan nin kaligtasan nin bilog na kinâban, patín sa satong personal na istorya nin kasâlan asín kapatawadán. Sabi sa 1 Pedro 1,21: “Huli Saiya nagtutubód kamo sa Diós na nagbangon Saiya halè sa mga gadán asín nagtaó Saiya nin kamurawayan,; malà an pagtubód nindo asín paglaom yaon sa Diós”.

Sa satong pagsimba, nagdadangóg daw kita nin maigot sa mga Babasahon? Pag-ulî, nabalô ta na lamang na balikán na basahon sa biblía an mga mga nadangog ta sa Santa Misa? Nagkaoras na lamang kita sa paghorop-horop kan mga Babasahon susog sa mga experiencia ta sa buhay, o sa pag-adal pa nin hararom dapit sa tamang pagsabot kan mga iní? Paladan kita kun nakagibo kita maski sarô lamang sa mga iní. Nin huli ta an Banal na Kasuratan biyayà nin Dios sa katawohan.

Liturgía kan Eucaristia an ikaduwáng kabtang. Kan sinda namamanggi, kinuá ni Jesús an tinapay, binaak, nagbendicion, asín binuksan an mga matá kan duwáng disipulos tanganing mamidbidan ninda Siya. Hanggang ngonian, nagpapadagos an Saiyang presencia sa satong buhay lalò na cada vez minacelebrár kita kan Eucaristía.

An satong pagsimba cada Domingo, mas nahihilíng ta daw bilang obligación o mabiyayang pakipagtagpoan ki Cristo na tinatao an Saiyang sadiri sato? Gurâno kahalagá sato an pag-akò Saiya sa communión na nasa estado de graciá, boot sabihon, daí nakagibo nin kasâlan na mortál? Nahihilíng ta daw na nakakapakusóg kita nin pagtubód kan lambang sarô na miembro kan Hawak ni Cristo sa cada pagparticipár niato sa Santa Misa?

Pagpulî an katapusan kan Misa. Kan si Jesús nawarà na, nag-istoryahan an duwáng disipulos. Sa Lucas 24,32 nagsabi sinda: “Bakóng naglalaad an satong mga pusò kan nagtátarám Siya sato sa dalan asin binubuksan sato an mga Kasuratán?” Dangan nagdesisyón sinda na magbalík sa Jerusalem asín ihirás iníng marhay na baretà sa ibang mga disipulos. Sa katapusan kan Misa, an padi minasabi, “Paduman, tapos na an Misa”. Alagad daí kita minahalè na siring saná kan dati, na garó daíng nabàgo satuya, nin huli ta nakaibahan ta si Cristo asín dara-dara ta na an Saiyang presencia asín Marhay na Baretà sa satong mga sadiri.

Sa satong pagsimba asin sa pagmisyon pakasimba, kita nagigin Simbahan. Asin iní an satong misyon: enot, na padagos pang bàgohon an sadiri tanganing makaarog lalò ki Cristo; ikaduwá, na ihirás an Saiyang pagkamoot sa laog asín luwas kan satong pamilya, orog na sa kapwang nangangaipo. Sabi sa Psalmo 16,11, na iyó man an ipinahayag ni San Pedro sa Gibo kan Mga Apostoles 2,28: “Ipinaaram Mo sako an mga dalan nin buhay; papanoón Mo ako nin kaogmahan sa atubang Mo”. Iníng pagtukdô sa dalan nin buhay asin kaogmahan kan presencia ni Cristo an manínigong ihirás niato sa kapwa sa satong pagmisyon pakasimba.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás kan saimong experiencia nin gracia, o kadificilan, sa pagsimba, asin kun pa’no mo iní naisasabuhay asin naihihirás sa kapwa.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

An Diosnon na Pagkaherak

 

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana kan Abril 16-22, 2023. Basahon an Evangelio gikan sa Juan 20,19-31 (Ikaduwáng Domingo kan Pascua nin Pagkabuhay-Liwát).

…

An istorya sa evangelio may duwáng kabtang: an banggi kan enot na aldaw kan semana sa saróng haróng kun saén nagkakatiripon an mga disipulos ni Jesús, asín sa banggi giraray sa sunód na semana na kaiba na ninda an disipulong si Tomás. Sa parehong okasyon na iní, nagpahilíng sainda si Jesús na nabuhay-liwát.

An enot na aldaw kan semana iyo an nagin bàgong Aldaw kan Kagurangnán (Dies Dominí sa Latin, Domingo sa Español) para sa mga disipulos, nin huli ta sa enot na aldaw nabuhay-liwát si Cristo. Kayâ imbes na Sabado, Domingo na an Banál na Aldaw para sa mga Cristiano.

Alagad sa enot na aldaw na idto, takot asín pagkapurisaw an namatean kan mga disipulos. Kayâ pinarà ni Jesús an mga iní kan nagpahilíng Siya sainda asín tinaó an Saiyang katoninongan. Daí nakapugol Saiya an mga saradong pintoan asín lanób tanganing makaibahan Niya an Saiyang mga disipulos.

An saradong haróng nagtatao nin taguán asín ligtas na lugar para sa mga disipulos, alagad iní nagin man nindang kulungan kun saén an takot asín kapurisawan mas lalò pang nagdakulà asín nagkusóg. Kita man may mga siring na saradong haróng sa satong buhay. Iní an mga inaapod tang “comfort zones” kun saén kita ligtas asín harayô sa peligro, alagad nagpupugol sato na magín matalingkás, magtalubò, asín mabunga. Kun palaogón ta si Jesús sa satong buhay, malagbas man Siya sa satong mga saradong pusò asín mapatalingkás sa satong nalilibongan na isip asín nanluluyang boót.

Kan enot na magpahilíng sa Jesús sa saiyang mga disipulos, igwang daí nakasabáy, si Sto. Tomás, Kayâ iní daí tulos nagtubód sa ibinaretà saiya kan mga pag-iriba niya. Kayâ sa ikaduwáng pagpahilíng ni Jesús, dinolok Niya si Tomás asín kinahuron hanggang sa magpahayag iní kan saiyang pagtubód, an magayonon na “Kagurangnán ko asín Diós ko!” sa Juan 20,28.

Kita man pinapagirumdóm kan satong pagmangno sa mga daí ta kaiba, sa mga nasa laylayan kan sociedád, asín sa mga nawawarà sa tamang dalan. Nin huli ta sabi ni San Pablo sa 1 Timoteo 2,4: an Diós “nagmamawot na an gabós makaligtas, saka makamidbid kan katotoohan”.

Sa halîpot na pagsabi, pinapahayag kainíng istorya an marhay na baretà kan Diósnon na Pagkaherak. Ano an pagkaherak? Iní an virtúd nin pangataman sa lambang sarô, an paghingowa, maski magsacrificio, na magmakulóg sa kapwa, magpatawad sa nagkasalà, asín magtabang sa nangangaipo. 

Sa Hebreo sa Lumang Tipan, “hesed” an pinakagamitón na tataramon dapit sa pagkaherak, asín iní  minatukoy sa pagkamaimbód asín pagkamapatinawad nin Diós maski pirming nagkakasalà an Saiyang Piníling Banwaan. Sa Griego sa Bagong Tipan, “eleos” an pinakagamitón na tataramon kainí, asín nahihilíng iní oróg sa gabós sa kaligtasan na dará ni Cristo. Sabi sa Efeso 2, 4-5: “Nagsusupay an pagkaherak nin Diós, asín dakula an Saiyang pagkamoot sato, kayâ maski kan gadán pa kita huli sa kasombikalan, binuhay Niya liwát kita kaiba ni Cristo.”

Kan taon 2000, binoot ni Papa San Juan Paolo II, na an Ikaduwáng Domingo kan Pascua kan Pagkabuhay-Liwát icelebrár man bilang Domingo kan Diósnon na Pagkaherak. Duwá an pangapodan kan celebración na iní. Enot na danay kitang maghagad nin asín magsarig sa pagkaherak nin Diós. Ikaduwá, na kitang naherakan, magín maheherakón man sa satong kapwa.

…

GIYA SA PAGHIRÁS SA SADÍT NA KOMUNIDAD O PAMILYA • Maghiras kun pano nagin maheherakón saimo an Kagurangnán, o kan ika natàwan nin oportunidad na magín maheherakón man sa kapwa.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

Alleluia! Si Cristo Nabuhay-Liwat!

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana kan Abril 9-15 sa laóg kan Octava kan Pagkabuhay-Liwát. Basahon an Evangelio gikan sa Juan 20,1-9 (Domingo de Resurrección).

…

Si Cristo nabuhay-liwát susog sa sinabi Niya! Alleluia! Sabi ni San Pablo sa 1 Corinto 15,14: “Kun si Cristo daí binuhay liwát, sayang an samong paghulit asín sayang an saindong pagtubód.” Iní an misteriong patugmadan kan satong pagtubód.

Ano an boót sabihon kan Pagkabuhay-liwát sa mga gadán? An Resurrección o Pagkabuhay-liwát ni Jesus sa mga gadán iba man kan mga istorya nin pagbuhay Niya kan nagadán na sa mga evangelio, siring bagá kan aking daragita ni Jairo, kan bogtong na aking lalaki kan balo sa Naim, asín kan Saiyang amigong si Lazaro. An mga milagrong ini inaapod man na “resusitación” nin huli ta sindang mga binuhay hale sa kagadanan, pag-abot kan saindang panahon, nagadán man giraray. Alagad an Resurrección iyo an pagkaigwa nin bâgong nivél nin existencia, nin kapanoan nin buhay na daíng kasagkoran, asín an daí na pag-agi sa kagadanan sagkod pa man.

Sabi sa Katekismo (CCC 646): “An pagkabuhay-liwát ni Jesus naiiba sa esencia. Sa Saiyang nabuhay na hawak, nag-agi Siya hale sa estado nin kagadanan pasiring sa bagong buhay na lampas sa categoria kan panahon asín espacio. Sa pagkabuhay liwát ni Jesus an Saiyang hawak napanô kan kapangyarihan kan Espiritu Santo: nakikihiras Siya sa diósnon na buhay sa Saiyang kamurawayan.”

An Pagkabuhay-liwát ni Jesus iyo an prueba asín panugâ kan satuya man na pagkabuhay-liwát sa huring aldaw. Sa Saiyang pagkabuhay-liwát, binâgo Niya an ordén kan kinâban. Bakô na kagadanan an huring padumanan nin tawo, kundi buhay sa Kahadean nin Diós.

Dangan, sa paghilig Niya sa mga gadán, dinumán Niya an mga matanos asín banál na halóy nang naghahalat nin kaligtasan, asín binuksan an langit para sainda asín para man sa satuya.

Kayâ si San Pablo nagtukdô sa Colosas 1,18-20 na si Cristo “an payo kan Saiyang hawak na iyo an Simbahan; Siya an kapinònan, an enot na binuhay-liwát sa mga gadán. Huli ta binoót nin Diós na an bilog Niyang pagka-Diós mapasa-Akì. Binoót man Niya na sa paagi kan Saiyang Akì an gabós makipag-olían Saiya.”

Kun arog kainí kahalagá an Resurrección, ano man an hinahagad sato? Na kita magtubód tanganing maligtas. Sabi ni San Pablo sa Roma 10,9: “Kun pinapahayag mo sa saimong ngusò na si Jesus an Kagurangnan, asín minatubód ka sa saimong pusò na binuhay Siya liwát nin Diós sa mga gadán, makakaligtas ka.”

An siguradong tandâ kan pagtubód na nakakaligtas, iyó an satong pagsunód sa Saiyang kabòtan gurâno man kadakúl kan oláng o kakusóg kan tentación, siring na si Cristo nag-agi ngûna sa Pasión bàgo an kamuwawayan kan Resurrección. Sabi giraray ni San Pablo sa Roma 6,8: “Kun kita nagadán kaiba ni Cristo, kita nagtutubod na mabubuhay man kita kaiba Niya”.

Kayâ saróng importanteng parte kan liturgía sa Domingo de Resurrección iyo an Pagbâgo kan mga Panugâ sa Bonyag. Igwa ini nin duwáng kabtang: an pagsikwal ki Satanás, sa saiyang mga maraot na gibo, asín mga padayà; dangan an pagpahayag nin pagtubód sa Diós Amâ na oróg na namoot sato, sa Diós Akì na nagligtas sato, asín sa Diós Espiritu Santo na danay na nagpapabanal sato. Kun isabuhay ta an satong panugâ sa Bonyag na an gracia nakamit ta sa pagkagadán asín Pagkabuhay-liwát ni Jesus, kita makakaligtas asín makukua an kapanoan nin buhay sa Saiyang Kahadean.

…

GIYA SA PAGHIRÁS SA SADÍT NA KOMUNIDAD O PAMILYA • Sa pa’nong paagi mo naisasabuhay – o dai – an mga Panugâ sa Bonyag na satong binabàgo cada taon sa Domingo de Resurrección?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

An Pasión ni Jesu Cristo

 

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana Santa (Abril 2-8, 2023). Basahon an Evangelio gikan sa Mateo 26,14–27,66 (Domingo de Ramos).

…

An halabang babasahon sa evangelio iyo an istorya kan Pasión kan satong Kagurangnán Jesu Cristo susog ki San Mateo. Iní nagsasabi na naglaóg na kita sa Semana Santa, an pinakabanál na mga aldaw sa satong Simbahan.

An Semana Santa ngonian na taón halos nakabalík na sa dating sitwasyon bàgo an pandemia kan COVID-19. Hinalè na an mga dating pinagbabawal, asín nakabalík na an mga pagtiripon asín mga prusisyon. Alagad namamatean pa man giraray kan banwaan an epekto kan pandemia lalò na sa ekonomiya asín sa mga nawàran nin buhay sa pamilya asín mga pag-iriba.

Sa panahón nin pagbangon asín mga panibàgong agyat sa buhay, an Semana Santa nagpapagirumdóm sato kun ano an pinakamahalagá: an pagkamoot nin Diós sa sato na pinahilíng oróg na sa pagdusay nin buhay ni Jesús para matubós kita sa kasâlan. Sabi sa Juan 3,16: “Huli ta námoot na gayo an Diós sa kinâban kayâ itinaó Niya an Saiyang bogtong na Aki, tanganing an siisay man na magtubód Saiya daí magadán kundî magkamít nin buhay na daíng kataposan”.

Si Cristo nakikisumarò sa satong mga kadiklomán. Sa paaging ini pinapamatè nin Diós an Saiyang pagkamoot sa sato gabós na nakakamatè nin kanya-kanyang mga kadiklomán. Halimbawà idtong mga nagmumundò sa pagkagadán nin mga mahal sa buhay, asín an kadakul na nagtitios nin huli sa korupsyón asín kapabayaán kan mga nasa kapangyarihan. Sa enot na bungkaras pa saná kan evangelio, yaon tulos an pagtraidór ni Judas, na sinundan kan violencia kan pagdakóp ki Jesús, an pagnegár Saiya ni Pedro, an kapaabáw-abawan nin mga pamayó kan Simbahan asín banwaan, an mga pasakit na inagihan Niya hanggang sa kagadanan sa cruz. An gabós na iní inakò ni Jesús para sato, pakisumarò Niya sa inaagihan nin lambang sarô sato.

Si Cristo hiníhirás sato an Saiyang kamurawayan.  An apód kainí sa Hebreo kabod, sa Griego doxa, na an boot sabihon: an kapangyarihan nin Diós na nagbabàgo sa buhay nin mga tawo asín lawóg nin kinâban. Iní an kamurawayan na pinahayag ni Jesús sa gabós na tawo kan simbagón Niya nin kaimbodán, katótoohan, asín pagkamoot an gabós na fuerza nin kasâlan asín kakurihan na pinamatè Saiya. Naghonà an mga kaiwal ni Jesús na matatapos ninda Siya sa paagi kan cruz. Idto palán an Saiyang Pasión asín pagkagadán mapasiring sa pagkabuhay-liwát asín kapangganahán sa kasâlan asín kagadanan. An kamurawayan na iní an Saiyang panugâ sa satong mga naglalakbay sa Saiyang dalan. Sabi nin San Pablo sa Roma 8,17: “Kun kita nagsakit kaiba Niya, kita man papamurawayon sa kaibahan Niya”.

Kayâ sa pagcelebrár ta kan Semana Santa, makisumarò kita ki Cristo tanganing makahirás sa Saiyang kamurawayan sa paagi nin mga minasunod:

1.     Magdolot kita Saiya nin pusong nagsosolsol asín nagmamàwot na magbâgo nin buhay. Magkumpisál kita kan satong mga kasâlan sa sacramento nin Reconciliación.

2.     Magtipon kita bilang pamilya asín magsabáy kita sa komunidad nin pagtubód sa mga gawè nin debosyon sa Semana Santa sa satong parokya.

3.     Magmangnó sa kapwang oróg na nangangaipo. An daí nagasto sa pag-ayuno, gibohon na pang-ayuda.

…

GIYA SA PAGHIRÁS SA SADÍT NA KOMUNIDAD O PAMILYA • Ihirás kun ano an mga ginigibo kan saindong pamilya pag Semana Santa tanganing mapabanal an mga aldaw na ini.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

An Pagbuhay ki Lazaro

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marso 26 – Abril 1, 2023. Basahon an Evangelio gikan sa Juan 11,1-45 (Ikalimáng Domingo kan Cuaresma).

…

An istorya sa evangelio iyo an pagbuhay ni Jesu Cristo kan Saiyang amigong nagadán na si Lazaro. Anó an ipinapahayag kan pangyayaring iní dapit ki Cristo, sa Saiyang misyon, asín sa pag-andam ta sa Semana Santa?

Iní kapahayagán nin kapangyarihan. Iní dakulang tandâ kan diósnon na kapangyarihan ni Jesús. Sa poón pa saná, sa Juan 11,4, sinabi na ni Jesús an kahulugán kan istorya: “Iníng helang na iní bakô para sa kagadanan, kundî para sa kamurawayan nin Diós, tanganing huli kainí mapamuraway an Akì kan Diós”.

Malinaw an mensahe sa mga nakasaksi kainí: igwang kapangyarihan si Jesús na magbuhay nin gadán. May profesía sa Ezekiel 37,13: “Maáaraman nindo na Ako an Kagurangnan pagbukás Ko kan saindong mga puntod, asín paghâwas ko sa saindong mga lulobngán, banwaan Ko”. Sa Juan 11,45, sinabi na dakúl sa mga Judío na “nakahiling kan gibo Niya an nagtubód Saiya”.

Alagad linawon ta na an ginibo ni Jesús ki Lazaro bakô pa an “resurrección” o an pagkabuhay-liwát nin mga gadán sa huríng panahón, kundî inaapod iníng “resusitación” o pagbuhay nin nagadán. Mahalagá an pagkakaibá na iní, nin huli ta an resusitación ki Lazaro pasabóng sa maabot na kamurawayan kan resurrección.

Iní kapahayagán man nin kaluyahan. Sa ibóng na lado, pinahilíng man ni Jesús sa istorya an Saiyang pakisumarò sa mga kaluyahan nin tawo, an Saiyang pagigin vulnerablé. Enot inakò Niya an mga saláng paghonà nin mga tawo, patín na an pagsudyâ kan Saiyang mga kaugós – an magtugang na Marta asín María. Pareho sinda nagsabi Saiya: “Kagurangnan, kun yaon Ka digdi, daí kutâ na nagadán an sakong tugang!” Asín mantang si Marta tulos na nagsabát Saiya, si María nagtenér ngûna sa laóg kan haróng, habô Siyang tìnohón, nagtatampò Saiya.

Dangan kan máhiling na ni Jesús sa María na naghihibî sa may Saiyang pamitisán, asín an mga Judíong nag-iribá na naghihiribî man, “naribaraw Siya sa Espiritu asín napurisaw”, asín napaluhà man. Maski aram ni Jesús an Saiyang kapangyarihan asín an sunód Niyang gigibohon, nahirô man giraray Siya kan kamondoan sa palibot Niya.

Asín an Saiyang pakisumarò nagdádara nin pagranga. Sa Mateo 5,4 sinabi Niya: “Paladan an mga nagmumondò, huli ta sinda rarangahon!” Boót sabihon: an Diós mismo an maranga sato sa panahón na maagi kita nin pagtangis asín kamondoan.

Iní kapahayagán nin dakulang pagkaherak nin Diós sa katawohan. Oróg sa gabós, an pinahilíng ni Jesús na kapangyarihan iyó an kapangyarihan nin pagkamoot. May particulár na Prefacio an Misa sa Ikalimáng Domingo kan Cuaresma pag an evangelio iyo an istorya ni Lazaro, na nagsusumada man kan mensahe kaini: “Huli ta tawong totoo, nagtangis siya sa katood niyang si Lazaro, asín Diós na daíng sagkod, siya binangon Niya sa lulobngán; naherak sa katawohan, kita dinará Niya sa bàgong buhay huli kan mga banál na misterio.”

An pagkabuhay ni Lazaro temporario saná. Pag-abót kan saiyang panahón, nagadán man giraray siya. Alagad an dakulang pagkaherak nin Diós oróg na pinahilíng sa pag-akò ni Cristo kan Misterio Pascual – an  Saiyang pagsakit, pagkagadán, asín pagkabuhay-liwát tanganing tubosón kita sa padusa nin kasâlan – na icecelebrár ta sa nagdadangadang na Semana Santa.

An kapanoan kainíng pagkaherak mamamatean sa huríng panahón, sa pagkabuhay-liwát nin mga gadán – kun nuarín dai na nin anoman na kapangyarihan an kagadanan sa katawohan, asín an mga maimbód asín banál mabubuhay sa Saiyang gracia sagkod pa man.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia nin kamondoan o kapurisawan. Sa pag-agi mo kainí, namatean mo an pakisumarò asin pagranga kan Kagurangnan?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Mag-Ogma, mga Aki nin Liwanag

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marso 19-25, 2023. Basahon an Evangelio gikan sa Juan 9,1-41 (Ikaapát na Domingo kan Cuaresma).

…

An Ikaapát na Domingo kan Cuaresma inaapod na Domingo de Laetare. An laetare tataramon na Latín na an kahulugan “mag-ogmá”. Hale iní sa Isaias 66,10: “Mag-ogmá, Jerusalem, asin magkaboronyóg, kamong nagmundô, ta kamo magrorokyaw”. Iní pagirumdóm na an penitencia kan Cuaresma minabunga nin gracia; an kadiklomán daí madanay kundî tatapuson kan liwanag kan Kagurangnán; asín an pagsakit sa Saiyang ngaran magdádará sato sa kaogmahan asín kamurawayan.  

An evangelio sa Domingong iní iyo an istorya kan pagbolóng ni Jesu Cristo kan lalaking namundag na butá. Minsan totoóng nangyari, iní sarô man na alegoría o istorya na panô nin mga simbolismo na nagpapahayag nin mga mas hararom pang katotoohan.

Halimbawà: an pagkabúta iyo an kadiklomán nin kasâlan, asín an pagbolóng iyo an liwanag nin kaligtasan. An lalaking butá iyo an mga nagtútubód, an mga makasâlan alagad naherakan. An mga Fariséos, bakô saná an mga daí nagtútubód kundî idtong mga nag-óoláng sa saindang kapwa na makaraní sa Kagurangnán.

Ano an kabôtan nin Diós segun sa istorya kan butáng nabolóng? Na boót itaó sato ni Cristo an gracia na kita magín mga akì nin liwanag asín bayaan an dating pagkabuhay sa diklom. Sabi ni San Pablo sa Efeso 5,8-9: “Kamo kaidto kadiklomán, alagad ngonian kamo liwanag sa Kagurangnán. Mabuhay kamo bilang mga akì nin liwanag, huli ta an mga ibinubunga kan liwanag mahíhilíng sa marhay asín matanos na pagkabuhay asín katotoohan.” Ano pa an mga tandâ na kita nabubuhay na bilang mga mga akì nin liwanag ki Cristo?

Enot, mahíhilíng ta an Diós. Maski pigtuyâ-tuyâ kan mga Fariséos asín pinatapok pa nganì sa luwás, daí siya nagtonóng sa pagpahayag nin pagtubód sa nagbolóng saiya, asín huli kainí luway-luway na mas namidbidan niya si Jesús – enot bilang saróng profeta, dangan bilang “halè sa Diós”, hanggang sa nagpahayag siya sa Juan 9,41, “Minátubód ako, Kagurangnán”.

Kayâ kun tataó kitang magpasalamat huli sa mga biyayà nin Diós sa satong buhay, siring sa butáng nabolóng, padagos na málinaw an satong pagkamidbid Saiya asín mákusóg an satong pagtubód. Asín an Saiyang presencia an magtátaóng kusóg sato tanganing manggana sa mga kadificilan asín agyat nin buhay.

Ikaduwá, makakáhilíng kita siring sa paghilíng nin Diós. May duwáng dakulang saláng paghonà an mga Fariséos sa istorya: na an pagkabutá kan lalaki tandâ na iní makasâlan, asín na an pagbolóng ni Jesús sa aldaw nin Sabbath tandâ na Siya parakasalà man. Kayâ sinda an butá sa dignidad kan lalaking binolóng asín sa mismong presencia nin Diós ki Cristo Jesús.

Pàno kita nahíhilíng nin Diós? Sa 1 Samuel 16,7, an Diós mismo an nagsabi ki profeta Samuel: “Daí ako naghíhilíng siring sa tawo, ta an tawo naghíhilíng kan minásabát sa mga matá, alagad an Kagurangnán, naghíhilíng sa pusò.” Kayâ pag naglálakáw kita sa liwanag ni Cristo, tinátaó sato an biyayá na máhilíng an kinâban asín an kapwa siring sa pagkáhilíng nin Diós.

Ikatoló, madádará ta an kapwa na máhilíng man an Diós. Sigurado an pagsaksi kan lalaking binolóng nagdará sa kadakul na magtubód man ki Cristo. Sa Juan 12, may istorya nin sarong grupo nin mga Griego na nagsabi ki Felipe asín Andres na boót nindang máhilíng si Jesús, asín dinará sinda kan duwáng disipulos Saiya. Siring sainda, ináapód man kitang darhón an liwanag ni Cristo sa kapwang nasa kadiklomán tanganing gabós kita makaligtás asín mabuhay bilang mga akì nin liwanag.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia nin kadiklomán sa buhay. Nakua mo na an liwanag kan Kagurangnán? Igwa ka nin bàgong paghilíng sa buhay nin huli kaini?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song