An Enot na Principio asin Fundacion

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hulyo 31 - Agosto 6, 2022. Basahon an Evangelio gikan sa Lucas 12,13-21 (Ika-18 Domingo sa Ordinariong Panahon - C).

…

Sabi ni Jesu Cristo sa evangelio: “Mag-ingat kamo asin maglikáy sa gabos na klase nin kaimotan, huli ta an tunay na buhay nin tawo bakóng nasa kayamanan, dawà pa gurâno siya kayaman.”

Linawon ta na dai sinabi ni Jesus na salâ an mangarap na mag-uswag an buhay o kasâlan an magin mayaman. Kundi an pagpaoróg sa mga kinàbanon na kayamanan asin pagkamaimot an dapat niatong likayán nin huli ta ini magdadara sato sa karâtan. Sabi nganì ni San Pablo sa 1 Timoteo 6,10: “An pagkamoot sa cuarta iyo an gamót kan gabos na karâtan.”

Dangan bakô kinàbanon na kayamanan an magtatao sato nin kapanoan nin buhay kundi an katalingkasan asin kahulugan na makukua saná sa Kagurangnan. Sabi ni San Pablo sa Roma 14,7-8: “Daing siisay man na nabubuhay para sa sadiri lamang, daing siisay man na nagagadan para sa sadiri lamang. Kun kita nabubuhay, nabubuhay kita para sa Kagurangnan, kun kita nagagadan, nagagadan kita para sa Kagurangnan.”

Sayang kan buhay na mayaman, o makapangyarihan, o makusog, o halawig man kutâ, alagad dai idinodolot sa paglingkod sa Kagurangnan. Ini an sinasabi sa Eclesiastico 1,2, na “kasayangán nin mga kasayangán.”

Ano an tandâ na an kahulugan kan satong buhay nasa Kagurangnan?

Enot, an maimbod na pagsunód sa Saiyang kabòtan. Sabi ni Jesus sa Mateo 5,3: “Paladan an mga dukhâ sa Espiritu, nin huli ta sainda an Kahadean nin langit.” An mga dukhâ sa espiritu iyo an mga nagsasarig sa Kagurangnan maski nganì mag-abot sa punto na an pagsunod Saiya magdara sa kadificilan, kadukhaan, o pagsikwal nin kapwa. An Kahadean iyo an kapanoan kan gabos na gracia asin buhay na boot iwaras sa sato nin Dios. Herak man sa mga mas pinilì an mga bagay na kinàbanon kisa kan kayamanan kan Kahadean nin Dios.

Ikaduwá, an pagmidbid asin paglingkod sa Kagurangnan sa satong kapwa. Sabi ni Jesus sa Mateo 25,40: “Anoman na ginibo nindo sa sarô kan pinakasadit kong tugang, ginibo nindo iyan Sako!” Si Cristo nakisumaro sa katawohan, orog na sa pinakasadit asin nagtitios sa sato – kayâ baga maogma asin makahulugan an maglingkod asin magtabang sa kapwang nangangaipo.

Siring man kaini an mensahe ni San Ignacio de Loyola sa sinurat niyang “Enot na Principio asin Fundacion” bilang patugmadan kan espiritualidad na ambag niya sa Simbahan asin kinàban.

Sinurat niya: “An Dios linalang kita sa pagkamoot. Kaya maninigò lamang na kita mag-omaw, magsamba, asin maglingkod Saiya tanganing makamtan an kaligtasan asin katuyuhan kan satong buhay.

An gabos na bagay sa kinàban itinao sato tanganing tabangan kitang makaraní sa Saiya. Anoman na bagay na nakakatabang, gamiton ta. Alagad anoman na nakakaoláng sato sa Kagurangnan, sikwalón ta.

Kayâ bakô mahalaga na magmàwot na magin marhay an salud o maghelang, magin mayaman o dukhà, maglawig an buhay o halìpot saná, manggana o madaóg – kundi an satong solamenteng kamàwotan iyo na padagos na makaraní sa Saiya asin maotób sato an kabòtan Niya.”

…

GIYA SA PAGHIRÁS SA SADÍT NA KOMUNIDAD O PAMILYA • Maghiras nin experiencia dapit sa paggamit nin kinàbanon na kayamanan – kun ini nakaparaní o nakaparayô saimo sa Kagurangnan.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Nangangahás Kitang Magsabi

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hulyo 24-30, 2022. Basahon an Evangelio gikan sa Lucas 11,1-13 (Ika-17 Domingo sa Ordinariong Panahon - C).

…

“Kagurangnan, tukdoan Mo kaming mamìbì”, ini an hagad kan sarô sa mga disipulos ni Jesus. Kaugalian kaidtong panahon sa mga rabbi o maestro na tukdoan an saindang mga parasunod nin simpleng pamìbì na magagamit ninda. An itinukdò ni Jesus bakô saná kun pàno mamìbì, kundì kun ano asin natà kita namimìbì.

Nangangahás kitang magsabi. Pàno kita dapat na mamìbì? An paagi nin pamìbì na itinukdò ni Cristo iyo an pamìbì na nagkukusog-boot na magdolok sa Kagurangnan. Bàgo an Ama Niamo sa Banal na Misa, an padì minapatara-tará: “nangangahas kitang magsabi”.

Kayâ kan tinukdoán Niya sinda kun ano an sasabihon sa pamìbì, sinundan Niya ini kan parabola kan makulít na parabakal, asin ining panugâ sa Lucas 11,9: “Maghagad asin kamo tatàwan, maghanap asin saindong makukua, magtoktok asin kamo bubuksan”.

Sabi ni San Pablo sa 1 Tesalonica 5,17: “Dai mag-ontok sa pamibi”. Ini an hinahagad sato ni Jesus na gawè nin pagpamìbì nin huli sa masunod na punto.

Mangyari an boot Mo sa dagâ nin siring sa langit. Sinasabi niato ini sa Ama Niamo, alagad sa versión ni San Lucas dai kaiba an linyang ini. Minsan siring pinapahayag kaini ano an pagpamìbì: an danay na paghagad kan gracia asin kabòtan nin Dios.

Sa Genesis 18,20-32, may istorya na kan maaraman ni Abraham an plano nin Dios na tunawon an mga ciudad kan Sodom asin Gomorrah nin huli sa makuring karàtan asin kasâlan kan mga tawo digdi, nakipagtawadan siya sa Dios na kun igwa nin 50 banal na tawo digdi dai Niya tutunawon an mga ini, asin nanugâ an Dios na dai Niya tutunawon kun siring. Naghirit pa si Abraham na pàno kun 45, o 40, 0 30, o 20, o sampulong tawong banal sanà an yaon, giraray nanugâ an Dios na dai Niya tutunawon kun siring.

Boot sabihon napabàgo ni Abraham an isip nin Dios? Dai, nin huli ta an Dios perfecto, dai nang babàgohon pa sa Saiya. Kundi namidbid ni Abraham luway-luway an kadakulaan nin pagkaherak nin Dios. Dai kita nangangadiè tanganing bàgohon an isip nin Dios dapit sato, kundi na bàgohon an isip niato dapit sa Dios.

An danay na pagpamìbì na nagin parte na nin buhay (prayer life), minabukas sato sa gracia nin Dios, asin tinutukdoan an satong puso, linilinigan an satong mga intencion, pinaparà an mga saláng paghonà asin mga makasadiring kamàwotan, asin tinatàwan nin linaw an satong mga plano. Sa madaling sabi, an danay na pagpamìbì nagdadara sato pasiring sa buhay nin Dios.

Sabihon nindo: Ama Niamo. An pag-ayon kan satong isip asin puso sa isip asin puso nin Dios, iyo an katuyohán kan gabos na pagpamìbì – tanganing makalaog kita sa buhay Niya asin magtalubò sa kaibanan Niya. Kayâ nganì sa poon pa saná, tinukdoan kita ni Cristo na apodon an Dios bilang satong Ama.

Boot nin Dios nin personal na relacion sa lambang sarô sa satuya. Sa pamìbì nangyayari an mamomòton na comunicacion na kaipohan para magtalubò an anoman na pag-iribanan. Sa gabos na naghahanap nin siring na buhay asin pag-iribanan, nanugà si Cristo sa Lucas 11,13, na an Dios Ama siguradong itatao an Saiyang Espiritu mismo sa mga naghahagad kaiyan.

…

GIYA SA PAGHIRÁS SA SADÍT NA KOMUNIDAD O PAMILYA • Maghiras kun ano an saimong mga pinapangadiè sa ngonian. Igwa nin mensahe o pasabóng an Kagurangnan sa saimong pagpamìbì.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Sarô Sanáng Bagay na Kaipohan

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hulyo 17-23, 2022. Basahon an Evangelio gikan sa Lucas 10,38-42 (Ika-16 na Domingo sa Ordinariong Panahon - C).

…

An evangelio iyo an pagbisita ni Jesu Cristo sa haróng ni Marta asin Maria. Sa Juan 11, nasambit na Betania an saindang barrio, asin igwa sindang sarô pang lalaking tugang, si Lazaro, na nagadan asin binuhay ni Jesus matapos an apat na aldaw sa lulobngan. Kan nakaaging taon, pinagsarô ni Papa Francisco an fiesta kaining tolóng magturugang sa Hulyo 29.

Nasisibot Ka sa Kadakul na Bagay. Saróng natòdan na interpretacion kaining istorya iyo na ini sarong alegoria. Si Maria representacion kan buhay na contemplativo, siring bagá kan mga nasa monasterio; asin si Marta representacion kan buhay na activo, siring kan kadaklan sa sato. An conclusión iyo na mas naooyonan nin Kagurangnan an buhay na contemplativo. Alagad bakô ini an mensahe kan evangelio, kundi na kun nasisibot daw kita sa tamang mga bagay.

Kadakul saná kan satong mga kasibotan. Halimbawa, an mga personal niatong pig-aagihan, an mga pangangaipo nin pamilya sa hampang kan naglalangkaw na presyo nin mga barakalon, an mga problemang dará kan pandemiang COVID-19, patin na an sitwasyon sa satong komunidad, nacion, asin kapalibutan. Namamatean ta an kasibotan asin kapurisawan ni Marta.

Magtrabaho para sa Dios o Maggibo kan Kabòtan nin Dios? Si Fr. Thomas Green, SJ., sa paghorop-horop niya sa istorya ni Marta asin Maria sa saiyang librong Darkness in the Marketplace, nagpaliwanag na iba an “working for God” (magtrabaho para sa Dios) sa “doing God’s work (maggibo kan kabòtan nin Dios).

An “magtrabaho para sa Dios” iyo an pagpili kun ano an boot niatong iatang sa Dios, kun ano an boot niatong magustuhan Niya. An “maggibo kan kabòtan nin Dios” iyo an paghagad ngùna na maaraman kun ano an Saiyang kabòtan para sato asin pagsunod kaini.

An Sarô Sanáng Bagay na Kaipohan. Sa huri, an pinaka mensahe kaining evangelio iyo an pangapodan na magpangadiè asin maghorop-horop tanganing madiskubre, sa pasabóng kan Espiritu, idtong pig-aapod na unum necessarium – an sarô sanáng bagay na kaipohan niato: na daing iba kundi si Cristo Jesus.

Sabi ni San Pablo sa 1 Corinto 1, 22-24: “An mga Judío naghahagad nin mga tandâ, an mga Griego naghahanap nin katotoohan. Alagad kami naghuhulit dapit ki Cristo na ipinakò sa cruz; sarong singkogan para sa mga Judío asin karungawan para sa mga pagano. Alagad para sa mga inapód nin Dios, Judío man o Griego, si Cristo iyo an kapangyarihan asin an kadunongan nin Dios.”

Kun masarig kita sa sadiri ta sanáng kakayahan, mahihiling ta na mas darakulà asin makukusog an mga kapurisawan sa buhay. Alagad ki Cristo igwa kita nin graciang masasarigan asin liwanag na magiya sa dalan.

Natà ta “mas oróg karahay” an pinilì ni Maria kisa ki Marta? Nin huli ta pinilì ni Maria kun ano an kabòtan ni Jesus. Dai man pigpugolan si Marta na mag-asikaso kan pagkaon kan mga bisita, alagad pinagirumdom siya – asin kita man – kun ano an pinakamahalaga: si Cristo mismo asin an Saiyang kabòtan para sato.

Bàgo mapanô an satong isip asin pusò nin manlaen-laen na kasibotan, enoton ta ngùna, oróg sa gabos, na mamidbidan si Cristo asin sunodón an Saiyang kabòtan. Dangan nanugâ Siya sa Mateo 6,33: “An Kahadean nin Dios enoton ta, siring man an katanosan, asin an gabos idudugang na saná”.

…

GIYA SA PAGHIRÁS SA SADÍT NA KOMUNIDAD O PAMILYA • Maghiras nin sarong importanteng kasibotan mo sa ngonian. Para saen o kiisay ini? Ano ini, pagtrabaho para sa Dios o paggibo kan Saiyang kabòtan?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

  

An Marhay na Samaritano

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hulyo 10-6, 2022. Basahon an Evangelio gikan sa Lucas 9,25-37 (Ika-15 Domingo sa Ordinariong Panahon - C).

…                                                                                                                                                                 

Ngonian na panahon popular asin pamilyar na gayo sato an imahe kan marhay na Samaritano. Inaapod ta nganì na “good Samaritan” an mga nagtatabang sa kapwang nangangaipo. Alagad kaidtong enot na pig-istorya ni Jesus ining parabola sa Saiyang audience na mga Judío, controversiál ini – nin huli ta an mga Samaritano kaiwal kan mga Judío.

Halawig asin hararom an saindang iriwal. Nagpoon pa kaidtong pag-urulî kan mga bihag na Israelita makalihis an 70 taon na destierro (exile) sa Babilonia. Kan taon 539 BC buminagsak an Imperiong Babilonia sa kamót kan Imperiong Persia. Nagtugot an hadè kan Persia, si Cyrus the Great, na mag-urulî sa mga sadiring banwaan an mga bihag kabilang na an mga halè sa dating kahadean nin Judah (kayà mga Judío an apód sainda). An mga natadà sa Israel (na Samaría an capitál na ciudad, kayà mga Samaritano an apód sainda), contra sa pagbalik kan mga Judío asin pagtogdas ninda kan bàgong Jerusalem. Pigmemenos man kan mga Judío an mga Samaritano nin huli ta bako puro an saindang dugong Israelita huli sa pakipag-agoman sa mga kataed na paganong naciones asin pag-arog sa mga gawè kan mga ini, asin an iba nagsamba pa sa mga dios-diosan.

An parabolang ini manunungod sa pagkaherak nin Dios. Kaidto pa man hanggang sa ngonian, an pagkaherak nin Dios minabanggà sa nagkapirang mga nangongorog na kaisipan (mindset), kaugalian (value system), asin kultura bakô saná sa Israel kundì sa bilog na kinaban.

An pagkaherak an pangenot na katongdan. Tibaad may dahilan na válido para sa mga Judío kun natà an padì asin clerigo o Levita dai nagtabang sa biktima, siring baga kan paglikay na tibaad maatian (unclean), lalo na ta sinda naglilingkod sa Templo. Susog kayâ sa Mga Bilang 19,11-13, an makakapot nin gadán na tawo magigin maatî sa laóg nin pitóng aldaw asin kaipohan magrayô ngùna sa banwaan asin sa Templo. Alagad malinaw an mensahe ni Jesus: an pagkaherak sa nangangaipo an oróg sa gabós na obligación asin mas naooyonan nin Dios. Sinabi pa Niya sa Mateo 9,13, “pagkaherak an hinahanap Ko, bako sacrificio”.

An pagkaherak nin Dios daing pinipili kun siisay. Sa parabola ni Jesus, an kaiwal an naherak sa biktima, an contrabida iyo an bida. Ini an ladawan nin tunay na pagkaherak: bako mahalaga an lahì, religíon, kinatawo (gender), pulitika, o ano pa man na categoria, kundi an dignidad asin buhay nin tawo. Siisay an mga madalî para sato na tabangan? Siisay an dificil? Midbidon ta pa an satong sadiri asin akoon an satong mga pinapaorog asin panghuhusga ta may influencia ini sa pagpilì ta kun magin maheherakon o dai sa kapwang nangangaipo.

An pagkaherak nin Dios daing sukol. Kaniguan na gayo an gibong-herak kan Samaritano – nagraní sa biktima, binulóng ini, dinara sa ligtas na lugar, inataman, nagtao pa nin cuarta sa dinagosan tanganing dagos ining atamanon. Siring kaini an tunay na pagkaherak: daing sukol, bako su “puede na” o pakitang-tao saná.

Sa huri ini an simbag ni Cristo sa abogadong naghapot: “Kun siring, lakaw. Iyo man an gibohon mo”. Iyo man an boot Niyang ipasabot sato ngonian: na an buhay na daing kasagkoran makakamtan niato kun kita, susog sa sinabi ni Cristo sa Lucas 6,36, “magin maheherakon, siring na an saindong langitnon na Ama maheherakon”.

…

GIYA SA PAGHIRÁS SA SADÍT NA KOMUNIDAD O PAMILYA • Maghiras nin experiencia kun pàno kita natabangan nin sarong marhay na Samaritano o kita man nagin marhay na Samaritano sa kapwa.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Simbahan na Nagmimisyon

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hulyo 3-9, 2022. Basahon an Evangelio gikan sa Lucas 10,1-12,17-20 (Ika-14 Domingo sa Ordinariong Panahon - C).

…

An istorya kan pagsugò ni Jesu Cristo sa Saiyang 72 na disipulos na magmisyon makukua saná sa Evangelio ni San Lucas, asin nakaomagid sa istorya kan pagtugon nin Dios ki Moises, sa Mga Bilang 11, na magpilì nin 70 gurang na hihirasán kan saiyang misyon na darhon an banwaan Israel pasiring sa Dagáng Panugâ.

Sarô pang kahulugan kaini makukua sa paagi kan tradisyon nin mga Judío sa numerología o pagtaóng kahulugan sa mga numero. Halimbawa, an 7 banal na numero nin Kagurangnan, asin an 12 tandà kan banwaan Israel na may doceng tribu. Kun idagdag sa 72 an 12 apostoles, magigin 84 o pitong docenang disipulos. Pwedeng sabihon na ining banal na misyon tinatao ni Jesus bakô saná sa sadít na grupo nin mga pinilì kundi sa gabós na kabilang sa Banwaan nin Dios.

An lambang sarô sato inaapod ni Cristo bakô saná sa pagsimbá kundi sa pagigin Simbahan na nagmimisyon. Mahalagá an pagsimba lalò na kun Domingo nin huli ta ini an “burabod asin kaitaasan nin buhay Cristiano”. Alagad an katuyohán kan satong pagsimba iyo na kita mabasóg asin mapakusóg sa misyon, asin ihirás sa kapwa an gracia nin Dios na nakua ta sa Santa Misa.

An istorya sa evangelio nagtatao man sato nin mga giya kun pàno gigibohon ining misyon.

An satong misyon pakihiras niato sa misyon ni Cristo. Pinònan ni Jesus an pagsubol sa misyon sa pagpamìbì na hagadon sa kagsadiri nin ani an dakúl pang mga paraaní. Kita mga katabang saná sa dakulang anihan nin Dios. Kaya kun kita nakikihirás sa misyon ni Cristo mahihimo ta an gabós, kun bakô man tulos, sa ngapit na panahon. Sabi sa Filipo 4,13: “Kaya kun mahimo an gabós nin huli ki Cristo na nagpapakusóg sako.”

Binoót nin Dios na may mga kaibahan kita sa dalan. Pinadará ni Jesus an 72 na manduwá-duwá, pagirumdom na bakóng solong esfuerzo an misyon kundi tinawan kita nin mga pag-iriba sa paglakbay. Sinda an mga nagtatabang sato na magin maimbod sa misyon asin magtalubò sa pagtubód, paglaom, asin pagkamoot. Asin kun sa pagmisyon, marayô kita sa mga mahal sa buhay, dai man giraray kita masolo: kaiba ta si Cristo, na nanugà sato sa Mateo 28,20: “Ako danay na kaibahan nindo sagkod sa katapusan nin panahon.”

Ining misyon naghahagad kan satong bilog na isip, pusò, asin boot. Tinugon man sinda ni Jesus na dai magdará nin kadakul na gamit, ni makipagparakahuron sa mga nasasabatan sa dalan, kundi na paorogón sa gabos an misyon. Anuman na nakakaoláng iwalat, anuman na nakakatabang akoon. Dai magpilì kun saen mas marhay an estaran o kakanon, an mahalaga iyo an misyon. Sa pagbaklay asin pagtukdò, sa pagbulóng asin pagpalayas nin mga demonio, gibohon an mga ini susog sa misyon na ipahayag an pagdatóng kan Kahadean.

An kaogmahan sa misyon balaog nin Kagurangnan. Nag-urulî  an mga disipulos na maogma nin huli kan saindang experiencia sa misyon. Sabi sa Psalmo 100,2: “Maogmang maglingkod sa Kagurangnan!” Minsan siring, pigtamà ni Jesus an saindang pakasabot kan tunay na kaogmahan: bakô nin huli ta an mga espiritu nagpapasakop saindo, “kundi na an saindong mga ngaran nasusurat sa langit”. An Kahadean nin Dios an ginigikanan kan satong kaogmahan.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia kun pàno mo nasasabuhay asin nahihirás sa kapwa an gracia nin pagsimba.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Mga Nakakaoláng sa Pagigin Disipulo

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hunyo 26 - Hulyo 2, 2022. Basahon an Evangelio gikan sa Lucas 9,51-62 (Ika-13 Domingo sa Ordinariong Panahon - C).

…

Sa evangelio, mantang nasa dalan si Jesus asin mga disipulos, pinahilíng Niya sa sainda – asin sa sato man – an mga nakakaoláng sa dalan nin pagigin tunay na disipulo, tanganing kita makalikáy asin magiyahan sa paglakbay. Daing disipulo na perfecto na tulos sa pagpoon pa saná. Kundi lambang disipulo naglalakbay sa dalan nin padagos na paglinig kan pusò, paglinaw kan isip, asin pagtalubò sa karahayan nin boot.

Enot, an Saláng Pagkamidbid sa Dios. An mga Samaritano na dai nag-ako sa saindang barrio ki Jesus asin mga pag-iriba nin huli na lamang ta sinda pasiring sa Jerusalem, an banal na ciudad nin mga Judío (huli ta an mga Samaritano asin mga Judío magkaiwal); siring man an magtugang na Santiago asin Juan na boot hagadon na an barrio pauranán nin kalayo halè sa langit – parareho sinda salâ an pagkamidbid sa Dios.

Sa kasaysayan kadakul na nin mga tawong ginamit an Dios asin religíon tanganing ibusol an saindang sadiring interes, maski mag-causa nin violencia, pagkabarangâ, asin pagsakit nin kapwa. Kun dai kita magmangno, tibaad an pagkamidbid ta sa Dios susog na sa sadiri tang kaisipan saná, bako susog sa pagpamidbid Niya sa paagi ni Cristo sa mga Kasuratan asin mga katukdoan kan Simbahan. Kun kita mga disipulos ni Cristo, Siya an satong susunodón, bakô an satong sadiring opinión.

Ikaduwá, an Dai Pagpakatotoo sa Sadiri. Sabi ni Jesus sa Juan 8,32, “maaaraman nindo an katotoohan, asin an katotoohan an mapatalingkas saindo.” An kaputikan an talagang nagpapaoripon sa tawo sa kasâlan. Kayà an tawong parasagin-sagin asin parahambog bakô talingkas kundì oripon nin kaputikan.

Mas maraot kun dahil sa kaputikan dinadara pa an kapwa sa mga saláng dalan – siring kan mga parasagin-sagin na mga escribas asin Fariseos kan panahon ni Jesus, asin mga naghahasik nin disinformación asin fake news sa ngonian na panahon.

Si Cristo bakô nanggad arog sainda. Sa saróng nagsabi na boot magin disipulo, sinabihan Niya: “An mga amíd may maeestaran, an mga bayóng may salagan, alagad an Aki nin Tawo dai nin mahihigdaan” (Lucas 9,58). Dai si Cristo nanugâ nin facil asin comfortableng buhay para sa mga disipulos Niya, kundi katalingkasan sa kasâlan, kaligtasan sa kagadanan, asin kapanoan nin buhay na makukua sa pagpàsan nin cruz aroaldaw asin sa pagmisyon nin pagbalangibog kan Marhay na Baretà. Sabi ni San Pablo sa Galacia 5,1: “Tinubós kita ni Cristo nganing kita makaligtas. Kaya magdanay kamo, asin dai na liwát magpasakop sa sakal nin kaoripnan.”

Ikatoló, an Pagpaoróg sa mga Kinàbanon na Bagay kisa Dios. Kun an satong pagkamoot ki Cristo bakô pa oróg sa satong sadiring mga pangaturogan asin mga namomòtan, kulang pa an satong pagigin disipulo Niya. Kun mas mahalaga kisa pagsunod sa kabòtan nin Dios an satong mga mahal sa buhay asin ambisyon, sinda an satong kagurangnan, bakô an Dios.

Asin kun pinapaoróg ta an Dios sa gabos, Siya asin an Saiyang kabòtan an patugmadan na kan gabós tang desisyon sa buhay, patin kun pàno ki namomoot asin kun pàno kita maghingowa para aboton an satong mga pangarap. Sabi ni Jesus sa Mateo 6,33: “An Kahadean nin Dios enoton ta siring man an katanosan, asin an gabos idudugang na sana.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia kun pàno ka nakasabát nin mga kaolangan sa dalan nin pagigin disipulo ni Cristo, asin kun pàno ka nagtalubò huli kaini.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Benendicionan, Binaak, asin Itinaó

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hunyo 19-25, 2022. Basahon an Evangelio gikan sa Lucas 9,11-17 (Solemnidad kan Corpus Christi - C).

…

An Corpus Christi tataramon na Latín na an boot sabihon “Hawak ni Cristo”. May toló ining kahulugan.

Enot, ini an hawak mismo ni Jesu Cristo, an Dios na nanitawo, na pinangidam sa popònan ni Virgen Maria, namundag, nagdakulà, nagpagál, nagutom, nagsakit, nagadán, nabuhay-liwát, asin suminakát sa langit.

Ikaduwá, ini an Banwaan nin Dios, an Misticong Hawak ni Cristo; na si Cristo an pamayó asin kita gabos mga kabtang kan Saiyang hawak; na an pinakahalangkaw na expresión iyo an pagtiripon sa Banal na Misa.

Ikatoló, asin ini an pigcecelebrar niato sa Solemnidad kan Corpus Christi, ini an orog kabanal na Hawak asin Dugô ni Cristo na pigconsagrar sa Eucaristía hale sa dolot na tinapay (hostia) asin alak.

An evangelio iyo an istorya kan milagrosong pagpakakan ni Cristo sa limang ribong kalalakihan hale sa limang tinapay asin duwang sirâ. An istoryang ini may mga profesía asin elemento kan Eucaristía na itotogdas ni Cristo sa Huring Pamanggi.

An Pagtiripon. Nagpoon an istorya sa pagdará ni Cristo sa mga disipulos sa Betsaida, asin sinundan sinda kan katawohan na hinahanap an Saiyang presencia. Bakóng ini man an katuyohán kan satong pagtiripon sa Banal na Misa: na mamatean an presencia ni Cristo? Sinabi pa Niya sa Mateo 18,20: “Kun may duwá o toló na nagtitipon sa ngaran Ko, yaon Ako kaibahan ninda.”

An Liturgía kan Tataramon. Dangan tinukdoan sinda ni Jesus dapit sa kahadean nin Dios. Sa Banal na Misa naghihinanyog kita sa mga babasahon halè sa Lumang Tipan (Enot na Babasahon), sa mga Psalmo (Responsorio), sa Bàgong Tipan (Ikaduwáng Babasahon), asin sa mga Evangelio (Ikatolóng Babasahon), dangan sa homilía kan padì na nagpapaliwanag kan Tataramon.

An Liturgía kan Eucaristía. Minapoon an kabtang na ini sa Ofertorio, sa pagdolot nin atang. Sa evangelio an milagro nagpoon sa pagdolot nin limang tinapay asin duwang sirâ. Siring man sa Banal na Misa an simpleng hostia asin alak nagigin Hawak asin Dugô ni Cristo. An atang nin mga tawo ginigibo nin Dios na kakanon para sa buhay na daing kasagkoran. Bakóng iyo man ini an nangyayari sa satong pagkamoot asin paglingkod, na pag ginigibo niato sa ngaran nin Dios, Siya an naghihipnò asin nagpapabunga sa satong mga paghingowa?

Sa evangelio kinua ni Jesus an tinapay asin sirâ “nagtingkalag sa langit, benendicionan, binaak, asin itinaó sa mga disipulos tanganing ipakakán sa mga tawo” (Lucas 9,18). Nagpapagiromdom sato an mga tataramon na ini kan ginibo Niya sa Huring Pamanggi kan tinogdas Niya an Eucaristía, mga tataramon na inootro man kan padì sa Banal na Misa, sa pagsunód sa kasugoán Niya sa Lucas 22,19: “Giboha nindo ini sa pagromdom sa Sako.”

Sa hampang kaining oróg kadakulang balaog nin Dios sa Eucaristía, an satong simbag iyo an pagmidbid na kita bakòng maninigò alagad naherakan, kayà aakoon ta ini na panò nin kapakumbabaan.

Dangan sa pagsimba, dapat “bilog, tuyo, asin aktibo (full, conscious, and active) an satong participación sa mga celebración kan liturgía” (susog sa Sacronsanctum Concilium 14, an Constitucion sa Banal na Liturgía).

Sa pag-comunion, dapat nasa “estado nin gracia” kita, boot sabihon dai nakagibo nin kasâlan na mortal, o kun nakagibo man, napatawad na sa pagkumpisál.

Asin pagkatapos kan Misa, magin lugod kitang maimbod na mga paradara kan Saiyang gracia sa kapwa, orog na sa nangangaipo kan Saiyang maheherakon na presencia.

…

GIYA SA PAGHERÁS SA SADÍT NA KOMUNIDAD O PAMILYA • Magherás kun ano an saimong nakukuang biyayà sa pagsimba. O experiencia na naiherás mo sa kapwa an nakua mong biyayà sa Banal na Misa.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Tunay na Pagkasararò

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hunyo 12-18, 2022. Basahon an Evangelio gikan sa Juan 16,12-15 (Solemnidad kan Santísima Trinidad - C).

…

Sarong vez sa taon nagce-celebrar asin naghohorop-horop an Simbahan kan pinakahararom na misterio nin pagtubod: an Santísima Trinidad, an doctrina nin sarong Dios sa tolong Persona.

Nagtutubod kita sa Santísima Trinidad nin huli ta ini an pagpamidbid nin Dios kan Saiyang sadiri.

Enot nagpamidbid sato an Ama bilang kaglalang nin gabos, tagapagligtas sa kaoripnan, asin kagtao nin gabos na karahayan. Dangan kan pagdatong ni Cristo, nag-abot an kapanoan kan Saiyang pagpamidbid. Sabi ni Jesus sa Juan 10,30: “Ako asin an Ama saro”; asin sa Juan 14,9: “An nakahiling sako, nakahiling na kan Ama”.

Dangan sa Juan 16,14-15, sinabi man Niya: “Pag-oomawon Ako kan Espiritu. Huli ta Siya makua kan halè Sako asin ipapahayag Niya saindo. An gabos na sadiri kan Ama sadiri Ko man, kayâ sinabi Ko na makua Siya kan hale Sako asin ipapahayag Niya saindo.” Ini an Espiritu kan Ama asin Aki, an Espiritu nin katotoohan.

An pagkasararò kan Santísima Trinidad ladawan kan pagkasararò kan Saiyang banwaan.

Sa satong banwaan na nauuso asin naaabuso an mensahe nin pagkasararò, an Santísima Trinidad nagtutukdò kan tunay na kahulogan nin pagkasararò. An Simbahan an Banwaan nin Dios kaya dapat lamang na magsaksi kan pagkasararòng ini sa bilog na kinàban.

Kasabay kan Solemnidad kan Santísima Trinidad, sinecelebrar man an Domingo nin mga Basic Ecclesial Communites (BEC). Sa Diocesis kan Legazpi, an apod sainda Saradit na Komunidad nin Pagtubod (SAKOP). Pa’no nagigin saksi an mga BEC asin SAKOP kan pagkasararò kan Santísima Trinidad sa katawohan?

Pagkasararò sa Kabanalan. An pagkasararò para sa Cristiano orog sa gabos iyo an pakisumarô sa Dios. Ini man an pamìbì ni Jesus sa Juan 17,21: “na magkasararò sinda gabos; siring na Ika Ama, yaon Sako, asin Ako yaon Saimo, asin sinda man magin sarô sa Satuya”.

An kabanalan nahihiling sa pagpangadiè asin debosyon, orog na sa Eucaristía, asin pagdará sa kapwa pasiring sa Dios. Alagad an pinakapadumanan kaini iyo na kita magtalubò na magin kabaing nin Dios na satong sinasamba. An pagsaksing ini iyo an misyon sa pagkapadi nin mga komunidad nin pagtubod.

Pagkasararò sa Katotoohan. An tunay na pagkasararò nakapatugmad sa katotoohan. Ta kun dai, ini nagigin sabwatan, pagkaoroyon sa mga gibong kasâlan asin kaputikan. Asin kun ini an talamak na sitwasyon sa satong sociedad, giromdomon na si Cristo namìbì sa Ama sa Juan 14,16-17, “na itao saindo an saro pang Parasurog na magigin kaiba nindo sagkod pa man. Siya an Espiritu nin katotoohan na dai maaako kan kinàban”.

An panindogan sa katotoohan asin katanosan, pagsuróg sa mga kasaradayan, asin pagsagwè sa abuso asin kaputikan kan mga makapangyarihan – ini an misyon sa pagka-profeta nin mga komunidad nin pagtubod.

Pagkasararò sa Pagkamoot. An tunay na pagkasararò may dalisay na pagkamoot. Ta kun dai, pekè o pakitang-tao sana ini nin huli ta pinapaorog an interes kan sadiri, o pamilya, o partido, o grupo, bako an karahayan kan kagabsan.

Si Cristo nagsabi sa Juan 15,9: “Siring na Ako namomòtan kan Ama, kamo man namomòtan Ko. Magdanay kamo sa Sakong pagkamoot.” An pagsaksi niato sa pagkamoot ni Cristo sa paagi nin pagdusay kan sadiri sa paglingkod sa kapwa – ini an misyon sa pagkahade nin mga komunidad nin pagtubod.

…

GIYA SA PAGHIRAS SA SADIT NA KOMUNIDAD • Ano para saimo an kahulugan nin pagkasararò? Maghiras nin experiencia kun pa’no ka nakatabang (o nakaulang) sa pagkasararò nin komunidad o Simbahan.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song kami.

 

Espiritu nin Pagkaherak asin Katotoohan

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hunyo 5-11, 2022. Basahon an Evangelio gikan sa Juan 20,19-23 (Domingo de Pentecostes - C).

…

May duwang versión an istorya kan paghilig kan Espiritu Santo. An sarò iyo an sa Evangelio ni San Juan. Ini nangyari kan si Jesus nagpahiling sa Saiyang mga disipulos sa banggi kan mismong aldaw na Siya nabuhay-liwat. An ikaduwa iyo an istorya kan Pentecostes sa Gibo kan mga Apostoles (2,1-11).

An Pentecostes tataramon na Griego na boot sabihon ika-50 aldaw. Para sa mga Judío, ika-50 aldaw poon sa Pascua, fiesta nin tig-anihan, asin pagrumdom kan pagtao nin Dios kan Saiyang Tugon sa banwaan Israel duman sa bulód kan Sinai. Para sa mga Cristiano, ika-50 aldaw poon sa Domingo de Resurrección asin celebración kan paghilig kan Espiritu Santo sa mga disipulos – kaiba si Virgen Maria – asin pagkamundag kan Simbahan.

An Simbahan namundag kan tinàwan kan Espiritu Santo an mga disipulos nin kapangyarihan sa misyon, asin pinabanal an mga sacramento. Sa Juan 20,21-22, si Jesus nagsabi: “Siring na Ako sinugò kan Ama, kamo man sinusugò Ko.” Dangan hinayopán Niya sinda asin sinabihan: “Ako nindo an Espiritu Santo.”

Kadakul an balaog kan Espiritu asin manlaen-laen an Saiyang paagi sa pagtabang sa misyon kan Simbahan. Matutok kita sa duwang aspeto na mahalaga sa panahon ngonian.

Espiritu nin Pagkaherak. Kan tinao ni Jesus an Espiritu sa Saiyang mga disipulos, tulos sinabi Niya sa Juan 20,23: “An kiisay man na kasàlan na saindong patawadon, mapapatawad; an kiisay man na kasàlan na dai nindo patawadon, dai mapapatawad.” Tinao ni Cristo sa Simbahan an katongdan na magpatawad sa kapangyarihan kan Espiritu sa sacramento nin Pagbonyag asin Reconciliación.

Kun kita nagpapatawad sa kapwang nagkasalà sato nagigin kitang instrumento nin pagkaherak nin Dios. Sa panahon nin pagkabarangâ asin pag-iriwal, an pagkaherak nagigin agihán nin pagkasararô asin pagkasinarabotan. Sa hampang kan kultura nin pagsikwal sa kapwa asin pagmenos sa dignidad nin tawo, an pagkaherak minapakusog kan kultura nin pagmangno sa mga nangangaipo asin pagtaas kan dignidad kan mga inaapi asin mga nasa laylayan.

Espiritu nin Katotoohan. Nanugâ si Jesus sa Juan 16,13: “Pag-abot kan Espiritu nin katotoohan, tatabangan Niya kamo na masabotan an gabos na katooohan”. An katotoohan na ini daing iba kundi an Evangelio ni Cristo – an Marhay na Bareta na an Dios namomoot sato, asin linigtas kita sa kasâalan, asin hanggang sa ngonian pinapabanal kita.

An kapangyarihan kan katotoohan pinahiling sa Gibo 2,4-12, kan an mga disipulos nagpahayag kan Marhay na Bareta, nagkangaralas an mga tawo na hale pa sa manlaen-laen na lugar, nin huli ta nasabotan ninda an sinasabi nin mga disipulos maski iba-iba an saindang lenguaje. Ini nin huli ta an katotoohan kan Evangelio universal, para sa gabos.

Sa panahon na talamak an kaputikan asin an mga naghahade-hadean piglalanse an banwaan, orog na kaipuhan an mga Cristiano na naninindogan sa katotoohan, asin dai mapadará sa sugót nin kaputikan. Sinda liwanag sa diklom sa ngonian na panahon; an saindang ilaw iyo an Espiritu Santo.

…

GIYA SA PAGHIRAS SA SADIT NA KOMUNIDAD O PAMILYA • Maghiras nin experiencia nin paglingkod sa Simbahan na pinakusog, pinauswag, o pinabunga kan Espiritu Santo.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Suminakát sa Kalangitan, Nagtutukaw sa Too kan Ama

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Mayo 29 - Hunyo 4, 2022. Basahon an Evangelio gikan sa Lucas 24,46-53 (Domingo de Ascensión - C).

…

An evangelio iyo an istorya kan Ascensión o pagsakát ni Jesu Cristo sa langit, susog ki San Lucas. Igwang sarò pang version kaining istorya si San Lucas, asin may mga dagdag na detalye pa nganì, sa saiyang ikaduwáng libro, an Gibo kan mga Apostoles (1,1-11).

An Ascensión iyo an pag-ulî ni Cristo sa Saiyang haróng sa langit, nin huli ta Siya Dios, an Aki nin Dios, an Ikaduwang Persona kan Santissima Trinidad. Si Santa Maria, sa saiyang Asunción, isinakát sa langit sa gracia nin Dios, bakò sa sadiri niyang kakayahan, ta tawo man saná siya. Alagad an Asunción kan satong Kagurangnan huli sa Saiyang sadiring kapangyarihan.

An Ascensión iyo an kapanoan kan pagpamuraway kan Ama ki Jesu Cristo. Kaya sinasambit niato sa Nagtutubod, na Siya “suminakát sa kalangitan, nagtutukaw sa too kan Dios Amang makakamhan”. Sabi pa ni San Pablo sa Efeso 1,22-23: “An gabós na bagay Saiyang ibinugták sa irarom kan mga bitís ni Cristo, na ginibong hadè kan gabós, pamayó kan Simbahan na iyó an Saiyang hawak.”

An Ascensión iyo man an panugâ kan satong maabot na kamurawayan. Sa Juan 14,2 nanugâ si Cristo sa Saiyang mga disipulos: “Sa haróng kan Sakong Ama dakúl an mga estaran; maduman Ako sa pag-andam nin lugár para saindo”.

Alagad an mensahe kan Ascensión bakò saná manunungod sa kamurawayan nin kalangitan, kundì manunungod man sa satong pagigin mga disipulos Niya digdi sa dagâ. Nin huli ta sa pagsakát ni Cristo sa langit, winalat Niya sa sato an Saiyang Espiritu asin an Saiyang misyon. Nanugâ pa si Cristo sa Gibo 1,8: “Aakoon nindo an saróng kusóg, an Espiritu Santo mahilig saindo tanganing kamo magin Sakong mga saksi sa Jerusalem, sa bilog na Judea, sa Samaria, sagkod sa mga puró kan kinàban.”

Evangelización an apód kaining misyon nin pagsaksi ki Cristo, an pagbalangibog kan Marhay na Baretà. Pàno ta ini gigibohon?

Magdangóg. Sa evangelio, hanggang sa bàgo Siya magsakát sa langit, dagos pang nagtutukdò si Jesus sa mga disipulos. Hanggang sa ngonian padagos pa kitang ginigiyahan kan Saiyang Espiritu, sa pagpastor kan mga namamayó sa Simbahan, sa Banál na Kasuratán, sa pagpangadiè, sa pagdangóg niato kan mga istorya asin agrangay kan kapwa. Bàgo kita makapag-evangelizár, dapat makaukod ngùna an satong pusò sa pagdangog kan Tataramon nin Dios asin pasabóng kan Espiritu.

Magtubód. Kan nahiling kan mga disipulos na si Jesus suminakát sa langit, tulos sindang nagtubód asin nagsambá Saiya, asin naghalat sa pagdatóng kan Espiritu Santo. An pagtubód na hinahagad sato iyo an pagtubód nin maimbod na pagsunod sa kabòtan nin Dios asin pagsarig sa Saiyang mga panugâ, lalò na kun may mga kagabatan asin pagbalò sa buhay asin misyon.

Maghirás. An pinakasimpleng kahulugan kan evangelización iyo an paghirás kan Marhay na Baretà na yaon na sato. An satong hawak mismo Templo na kan Espiritu Santo sa gracia kan bonyag, asin may mga bunga na nganì Siyang tinatao sa satong buhay. An satong mga gibong karahayan, an pagsabi nin totoo na may pagkamoot, an paghirás kan istorya nin Dios na naghihirò sa satong buhay – gabos ini mga paagi nin pagsaksi ki Cristo asin pagdará sa kapwa pasiring Saiya.

…

GIYA SA PAGHIRÁS SA SADIT NA KOMUNIDAD O PAMILYA • Maghirás nin experiencia nin pagsaksi niato ki Cristo asin paghirás kan Marhay na Baretà sa kapwa.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

An Maabot na Espiritu Santo

 

Giya sa Prayer-Meeting nin mga Saradit na Komunidad nin Pagtubod (SAKOP) Para sa semana kan Mayo 22-28, 2022. Basahon an Evangelio gikan sa Juan 14,23-29 (Ikaanom na Domingo nin Pasko nin Pagkabuhay-Liwát - C).

…

Duwang semana bàgo an Domingo kan Pentecostes, an evangelio iyo an profesía ni Jesu Cristo kan pag-abót kan Espiritu Santo. Ini sinabi Niya sa Huring Pamanggi bàgo kan Saiyang Pasion. Parte ini kan halawig na kabtang sa Evangelio ni San Juan (capitolo 13 hanggang 17) na inaapod na “Mga Katukdoan sa Huring Pamanggi” (Last Supper Discourse).

Sa Juan 14,26, inapód ni Jesus an Espiritu Santo na “parasurog na ipapadará kan Ama sa ngaran Ko”. An Espiritu Santo iyo an Espiritu ni Cristo, asin sinusugò man kan Dios Ama siring ki Cristo.

Susog sa Credo Niceno-Constantinopolitano, an “Espiritu Santo, Kagurangnan asin kagtaó nin buhay: na gikan sa Ama asin sa Aki. Siya kaiba kan Ama asin kan Aki, sabáy na sinasamba asin pinapamuraway: Siya nagtaram sa aagi nin mga profetas.”

Sa evangelio, nanugà si Cristo sa mga disipulos na an Espiritu Santo, na ipapadará kan Ama sa Saiyang paghalè, mádara sainda sa katotoohan, asin nin katoninongan asin pagkamoot.

Espiritu nin Katotoohan. Nin huli ta dai tulos kayang saboton kan mga disipulos an gabós na itinutukdò sainda ni Cristo, sinabi Niya sa Juan 16,13, na an “Espiritu nin katotoohan, tatabangan Niya kamo nganing masabotan nindo an gabós na katotoohan”.

Asin kun mag-abót an panahon nin mga pagbalô, kun sinda pahampangón sa mga autoridad, sinabi ni Jesus sa Lucas 12,12, na dai maghàdit kun ano an sasabihon o isisimbag: “huli ta sa oras na iyan, tutukdoán kamo kan Espiritu Santo kan dapat nindong sabihon”. Sa ngonian na panahon siring man, sa paglaban sa pwersa kan disinformation asin fake news, bàgo an mga solusyon teknikal, sigurohon ta ngùna na kita danay na nasa lindong kan Espiritu nin katotoohan.

Espiritu nin Katoninongan. Sinabi man ni Jesus sa Juan 14,27: “Katoninongan iwinawalat ko saindo. An sakong katoninongan itinatao ko saindo, bakóng siring sa itinatao kan kinàban.” Kun pinapaoróg ta an mga bagay na kinàbanon asin sa lamán kisa sa espiritu, dadarhon kita sa karâtan nin mga bisyo, saláng relasyon, asin pagsarig sa mga kinàbanon na kapangyarihan. Alagad kun pilion ta na magsunod sa pasabong kan Espiritu Santo, mapapasato an katoninongan.

Si San Pablo nagsurat sa Filipos 4,6-7: “Dai kamo mahàdit dapít sa anoman, kundì hagadon nindo sa Dios an saindong kaipohan, sa paagi nin pamìbì na may pagpasalamat. Asin an katoninongan nin Dios na dai matugkád kan isip nin tawo iyo an mag-iingat kan saindong pusò saka isip ki Cristo.”

Espiritu nin Pagkamoot. Sinabi pa ni Cristo sa Juan 14,23: “An namomoot Sako maotob kan Sakuyang  tataramon; an tataramon na saindong nadangog bakóng gikan Sakuya kundì sa Ama na nagsugò Sako. Mamomòtan siya kan Sakong Ama; an Ama asin Ako maerok sa kaibahan niya.” An Espiritu nagpapatalubò sa pagkamoot sa mga nag-ootob kan kabòtan nin Dios.

Oróg sa gabós na tugon nin Dios iyo an pagkamoot. Kun kita magdanay sa pagkamoot, an Espiritu Santo an mapakusóg kan satong maluyang pusò, mahipnò sa satong mga paghingowa, asin mapabunga kan satong mga gibong pagkamoot. Susog sa 1 Juan 4,12: “Dai pa nin nakahiling sa Dios, alagad kun kita nagkakaminootan, nagdadanay sato an Dios asin an kapanoan kan Saiyang pagkamoot naootob sato.

…

GIYA SA PAGHIRAS SA SADIT NA KOMUNIDAD O FAMILIA • Maghirás nin experiencia nin paghirô kan Espiritu nin katotoohan, katoninongan, asin pagkamoot sa satong buhay.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

An Bàgong Tugon nin Pagkamoot

 

Homilía sa Prayer-Meeting nin mga Saradit na Komunidad nin Pagtubod (SAKOP) para sa semana kan Mayo 15-21, 2022. Basahon an Evangelio gikan sa Juan 13,31-35 (Ikalimang Domingo nin Pasko nin Pagkabuhay-Liwát - C).

…                                                                                                                                   

Sa evangelio nagtukdò si Jesu Cristo: “Bàgong tugon itinatao Ko saindo: na magkaminootan kamo. Siring na Ako namoot saindo, siring man an pagkaminorootan nindo” (Juan 13,34).

Ano an bàgo sa tugon na ini? Dati na man na pigtugon sato na kita magkaminorootan. Sa Mateo 7,12, tinukdò ni Jesus: “Kaya gibohon nindo sa iba an boot nindong gibohon ninda saindo. Ini an kahulugan kan Katugonan ni Moises asin mga katukdoan nin mga profetas.”

Ini an pig-aapod na “bulawan na tugon” (golden rule). Maski sa ibang relihiyon asin kultura, may nasusurat man na siring na kadunongan. Patunay ini na inaakò nin kadaklan an kaisipan na siring na boot niato an karahayan kan satong sadiri, maninigo lamang na respetohon ta man an satong kapwa. Iyo man ini an sinasabi sa ikaduwa sa Pinakadakulang Tugon. Sabi ni Jesus sa Marcos 12,31: “Kamòtan mo an saimong kapwa arog kan pagkamoot mo sa saimo man saná.”

Alagad kun an sadiri saná an patugmadan nin pagkamoot asin hustisya, pwede ining magbalik sa inaapod na “lex talionis” (law of the talon) kan Lumang Tipan. Susog sa Levitico 24,19-21: “An siisay man na makakulog sa saiyang kapwa, kukulogán man siring kan ginibo niya. Kun nakabarì siya nin tòlang, babarian man siya nin tòlang, mata sa mata, ngipon sa ngipon.  An ginibo niya sa saiyang kapwa, iyo man an gigibohon saiya. An siisay man na magbunô nin hayop na bakô man saiya, mabayad kaiyan. An siisay man na maggadán nin tawo, gagadanón man.”

An bàgong tugon ni Cristo oróg sa mga naenot na tugon nin huli ta bakò na an sadiri an patugmadan asin sukulán kun ano an tamang pagkamoot sa kapwa, kundì si Cristo na. Kaya mamoot kita siring na kita namòtan ni Cristo. Pano ipinahiling asin itinukdò sato ni Cristo an Saiyang pagkamoot?

Maenót na mamoot. Sabi ni San Pablo sa Roma 5,8: “Ipinahiling nin Dios an Saiyang dakulang pagkamoot sato kan si Jesus nagadán para sato kan kita mga parakasalà pa.”  Bàgo ta Siya namidbidan, namòtan na Niya kita. Bàgo ta Siya pinilì, pinilì na Niya kita.

Kamòtan an kaiwal. Sa Mateo 5,44, tinukdò ni Jesus: “kamòtan nindo an saindong kaiwal, asin ipamìbì nindo an mga nagpapasakit saindo.” Nagsaksi Siya kaini hanggang sa hurí, mantang naghihingagdan sa cruz, hinagad niya sa Ama na patawadon an Saiyang mga paragadan asin an mga nag-oolog-olog Saiya.

Magpatawad sa nagkasalà satuya. Kan si San Pedro naghapot kun pirang beses dapat na patawadon an tugang na nagkasalà, sinimbag siya ni Jesus sa Mateo 18,22, “Bakóng pitóng beses, kundì pitóng polò may pitóng beses.” Dangan tinukdoán Niya kitang mangadiè na hagadon sa Ama na patawadon kita sa satong mga kasâlan siring na pinapatawad niatò an mga nagkakasalà satuya.

Idusay an sadiring buhay. Sa Marcos 10,45, sinabi ni Jesus sa mga disipulos: “An Akì nin Tawo dai nagdigdi tanganing paglingkodan kundi tanganing maglingkod asin magdusay kan buhay Niya tanganing matubós an dakúl na tawo.” An sukulán kan pagigin dakulà asin pagigin enot sa gabós, bakô an pagkapót nin kapangyarihan o pagpayaman sa sadiri, kundì an mapakumbabang paglingkod, pag-enot sa  karahayan kan kapwa, asin pagdusay kan sadiri.

…

GIYA SA PAGHIRAS SA SADIT NA KOMUNIDAD O FAMILIA • Magherás kun pàno an satong pagkamoot nakakabaing sa pagkamoot ni Cristo, o kun pàno kaipohan pang magtalubò tanganing magin siring ki Cristo.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Maghimatè sa Tingog kan Marhay na Pastor

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Mayo 8-14, 2022. Basahon an Evangelio gikan sa Juan 10,27-30 (Ikaapat na Domingo nin Pasko nin Pagkabuhay-Liwát - C).

…

Sa evangelio nagpapamidbid si Jesu Cristo bilang satong Marhay na Pastor. Sa Jeremias 3,15, may panugà an Dios sa Saiyang banwaan: “Tatàwan ko kamo nin mga pastores susog sa Sakong puso, na papamayohan kamo na may kadunongan asin pakasabot.” Sa Juan 10,30, sinabi ni Jesus: “Ako asin an Ama sarò saná”. Siya an kapanoan kan profesía kan Marhay na Pastor, na matao nin buhay na daing kasagkoran sa mga naghihimatè sa Saiyang tingog.

Sa panahon nin eleksyon, ano an sinasabi sato kan tingog kan satong Marhay na Pastor?

Sa Juan 10,10, sinabi Niya: “An parahàbon minalaog, daing ibang tuyo kundi maghàbon, maggadán asin magraót. Ako napadigdi tanganing sinda mabuhay asin mapanô nin buhay.” Kaya maglikay sa mga boot mamayó sa banwaan na nagsasagin-sagin na marhay asin maboot pero karâtan palán an katuyohán. Maglikáy kita sa mga utikón asin parahàbon.

An marhay na pastor dinadara sa karahayan asin katanosan an banwaan. Siring Siya sa Kagurangnan sa Psalmo 23,2, na dinadara an karnero “sa mga berdeng sabsaban, sa mga tubig na malinaw”. An maraot na pastor dinadara sa karâtan asin kasâlan an banwaan. Ining mga nakaaging taon nahiling ta kun pàno an mismong mga pamayó kan satong nacion ginibong normal an kadustaan, an kaputikan, asin an panggagadan – asin kadakul an saindang napatubód na an salâ tamà, asin an tamà nagin salâ.

An marhay na pastor may pagmangno sa saiyang nasasakopan, lalo na sa mga nasa laylayan nin sociedad. May pigpapamatè man na pagmangno sa banwaan an mga maraot na pamayó – alagad an tabang na tinatao ninda sa saindang mga constituentes, tinapyasan na nin mas dakulà para sa saindang sadiri. Dangan pag-abot kan eleksyon, ginigibong pambakal nin boto. Asin an mga botanteng pinatood sa barakalan nin boto, hinahaboan na pati an mga kandidatong matanos asin may kakayahan, sa saláng paghonà na an pagmakulog sainda nasusukol sa kun siisay an pinakahalangkaw an pigtatao para iboto.

An marhay na pastor sinusurog an saiyang kawan na inaataman. Alagad an pastor na kwarta saná an habol, susog sa Juan 10,12, “minadulág kun nakakahilíng nin lobo, binabayaan an mga karnero”. An maraot na pastor kasabwat pa kan may mga maraot na plano – an mga nagraraot nin kapalibotan sa saindang pagpayaman, an mga mahàbas sa pondo kan gobyerno, asin an mga lulóng sa kapangyarihan.

Susog sa Talinhaga 29,2: “Kun an matanos iyo an nagkakapot kan kapangyarihan, nag-oogma an banwaan; alagad kun an maraot iyo an namamayo, nag-aagrangay an katawohan.”

Dai man ki perpektong kandidato alagad dakul man an mga matanos asin totoo. Pilion ta an mga pamayó na nagtutubod sa kapangyarihan nin pagkamoot, bako an pagkamoot sa kapangyarihan; an mga nagdudusay kan saindang sadiri, bako itong mga nagpapayaman sa sadiri. Sa panahon nin pirilian, maghimatè kita sa Marhay na Baretà kan satong Marhay na Pastor, bakò sa pekeng baretà (fake news) kan mga utikón na boot mamayó sato.

…           

GIYA SA PAGHIRAS SA SADIT NA KOMUNIDAD O FAMILIA • Magherás nin experiencia nin mga tentacion asin biyayà sa pagsunód niato sa tingog kan Marhay na Pastor sa panahon nin eleksyon.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

An Kagurangnan Iyan!

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Mayo 1-7, 2022. Basahon an Evangelio gikan sa Juan 21,1-19 (Ikatolong Domingo nin Pasko nin Pagkabuhay-Liwát - C)

…                                                                                                                    

An istorya sa evangelio iyo an ikatolong pagpahiling ni Jesu Cristo sa Saiyang mga disipulos, susog ki San Juan. Igwa ining duwang kabtang. An enot iyo an pagsirâ kan mga disipulos asin an milagro nin dakulang dakop nin mga sirâ. An ikaduwa iyo an istoryahan ni Jesus asin ni Simon Pedro kun saen makatolong beses hinapot si Simon kun namomôtan niya si Jesus orog sa gabos.

Sa istoryang ini, na panô nin simbolismo asin koneksyon sa iba pang mga istorya sa mga evangelio, mahihiling ta man kun pàno maghirô an Dios sa buhay nin tawo. Asin kun an tawo magsimbag sa presencia nin Dios sa saiyang buhay, digdi nangyayari an pagtubod.

An Dios nagrarani sa tawo. Pagkatapos an magdamlag na pagsirâ, nag-abot si Jesus amay na aga asin nagsabi na ihulog ninda sa too an hikot, asin nangyari an milagro. Kun pamilyar sato an istoryang ini, iyo nin huli ta may siring man na istorya sa Evangelio ni San Lucas, alagad nangyari sa pagpoon kan ministerio publico ni Jesus, sa pag-apod kan mga enot na disipulos.

An bunga kan pagraní ni Jesu Cristo iyo an pagkamidbid Saiya kan mga disipulos. Sa Juan 21,7, sinabi ni Juan, an disipulong padangat ni Jesus, ki Pedro, “An Kagurangnan iyan!” Sa istorya ni San Lucas, an mga enot na inapod ni Jesus nagin mga disipulos Niya.

An Dios nag-aagda sa pagtalubò sa komunidad. Kan nakaabot sinda sa baybayon nahiling ninda si Jesus, may nakaandam na pamahawan asin nag-aagda saindang mamahaw. Ining pagtiripon kan mga disipulos sa pagkakan, sa paglibot sa mga banwaan, sa pag-adal kan mga katukdoan ni Jesus, asin pagtabang sa ministerio – pinapatalubò an saindang pagtubod kaiba an komunidad na tinipon ni Cristo.

Pinapahiling man kaini na an presencia nin Dios namamatean bako saná sa mga darakulà asin makangangalas na mga bagay, kundi patin sa mga ordinario asin saradit na gibo sa aroaldaw.

An Dios nagrarahay nin mga naraot na relasyon. Nin huli ta parte sa experiencia nin pagtalubò sa pagigin disipulo an magkasalà, mapadungkal, o maglakaw sa ibang dalan – an Dios pinapahiling na dai Siya nawawran nin paglaom sa sato.  Sarong popular na interpretasyon kun natà ta makatolong beses hinapot ni Jesus si Simon Pedro kun namomòtan Siya kaini, iyo na pakarayon an naraot nindang relasyon asin haleon an kasusupgan ni Simon Pedro sa makatolong beses niyang pagnegaran ki Jesus kan banggi na Siya inaresto, bago pa man magturaok an manok.

An Dios nagsusugò sa misyon. An cada simbag ni Simon Pedro, sisundan ini ni Jesus nin “Pakakaná an Sakong mga cordero”, “Atamana an Sakong mga karnero”, asin “Pakakaná an Sakong mga karnero”. Hinihiras ni Cristo an Saiyang pagigin marhay na pastor ki Pedro, asin pinagirumdom ini na dagos man giraray an saiyang katongdan na mamayo sa komunidad nin mga disipulos ni Cristo. Sa Mateo 16,18, sinabi ni Jesus: “Ika si Pedro, saro kang gapò asin sa ibabaw kan gapong ini papatindogon ko an Sakong simbahan.”

Siring man sa Mateo 4,19, nagsabi si Jesus sa mga enot Niyang inapod: “Sumunod kamo Sako, asin gigibohon ko kamong parasirà nin mga tawo”. Nin huli ta an presencia nin Dios tinatao sato bako para sa sadiri lamang kundi na ihiras sa kapwa, tanganing siring na kita naherakan, makadará man lugod kita nin kapwang parakasalà pasiring ki Cristo asin sa Saiyang Kahadean.