Limang Tinapay asin Duwang Sirâ

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Julio 28 - Agosto 3, 2024. Basahon an Evangelio gikan sa Juán 6,1-15 (Ika-17 Domingo sa Ordinariong Panahon - B).

…

Sa Evangelio pinakakán ni Jesu Cristo an limáng ribo halè sa limáng tinapay asín duwáng sirâ. An mga milagro sa Evangelio ni San Juán ináapód na mga tandâ.

Tandâ kan pagka-Diós ni Cristo.

An milagrong iní nagpapahayag kan diósnon na kapangyarihan asín autoridád ni Jesús. Sa Evangelio ni San Juán iníng istorya kapinònan kan kabtang na nagtatapos sa pagpamidbid Saiya bilang Tinapay nin Buhay. Bakô sanáng pagkaon na nakakabasóg nin tulák an Saiyang dará, kundî Siya mismo an kakanon nin buhay na daíng kasagkoran.

Igwang interpretasyon kan istoryang iní na nagsasabi na tibaad daá kan náhilíng kan ibá an pagtaó kan akì kan saiyang daráng balon, na-conciencia an may mga daráng balon sainda asín linuwás man an saindang dará. Dangan naghirirasan sinda kayâ nakakaon an gabós.

Maski garó magayón pag dangogón, bakô iní tamang interpretasyon nin huli ta hinahalè an milagrosong aspeto kan istorya asín an diósnon na gibo ni Jesús. May mga istorya sa Saiyang buhay na nasusurat sa sarô o duwáng Evangelio saná asín daí sa ibá. Alagad an istoryang iní yaon sa apát na Evangelio (Mateo, Marcos, Lucas, asín Juán), asín gabós sinda nagsasaksi na iní gibong milagro mismo ni Cristo, alagad daíng nasusurat sa tibaad na “milagro nin paghirirasan” nin mga tawo.

Tandâ kan pangapodan sato ni Cristo.

Sa Evangelio pigpaliwanag na an hapót ki Felipe kun saén makakabakál nin ipapakakán sa mga tawo saróng karáw man saná ni Jesús nin huli ta aram Niya an Saiyang gigibohon. Kun iisipon, daí Niya kaipuhan nin anoman halè sa tawo tanganing makagibo nin milagro alagad pigtuyo Niya na magin parte sinda kan Saiyang gibo. Kayâ mantang si Felipe napaisip kun anó an gigibohon, si Andres nagdará nin saróng akì na may balon, dangan an mga disipulos pinatabang ni Jesús sa pagpatukaw sa mga tawo, sa pagdistribuir nin mga kakanon, asín sa pagtipon kan mga natadà – doceng basket nin tadáng pagkaon!

Hanggang sa ngonian padagos kitang iniimbitaran ni Jesús na makisumarò sa Saiyang misyon nin paghirás kan Marhay na Baretà asín pagmuknâ kan Saiyang Kahadean. Sabi ni San Pablo sa Efeso 4,1-2: “Maglakáw kamo nin maninigò sa pangapodan na inapodán saindo: sa bilog na kapakumbabáan, saká kahuyoan, sa pasencia, nagpapatiniós-tiosan sa pagkamoot”. Pag an pagsimbag sa pangapodan ni Cristo iyó an patugmadan nin satong mga pangarap asín gibo, makúkuá ta an tunay na katuyuhan asín kahulugán nin satong buhay.

Tandâ kan satong ambag.

An limáng tinapay asín duwáng sirâ na voluntád na tinaó nin saróng akì tandâ kan satong pakisumarò sa dakulang plano nin Diós. Anó man an satong ambag sa Diós? Anó man an satong limáng tinapay asín duwáng sirâ? Sa pagsimbag kainíng hapót, marhay giromdomón an sinabi ni Jesús sa Mateo 9,13: “Pagkaherak an mâwot Ko, bakô sacrificio”.

An satong mga pangadyè asín devoción, kun tunay na pagsamba sa Diós asín bakóng pakitang-tawo saná, maninigong dolot sa Kagurangnan. An satong mga pagtabang sa kapwa – an pakidumamay sa panahón nin problema asín pagraní sa mga nangangaipo, siring kan satong programang TADA (Tanganing An Dukhâ Atamanon) asín mga community pantries – iní an satong ambag sa pagmuknâ kan Saiyang Kahadean.

Anó man kun sadít o dikít saná an kaya niatong iambag? An milagro kan limáng tinapay asín duwáng sirâ, pagiromdóm sato na an Diós an mahipnò, an makumpleto, asín mapabunga kan satong mga marhay na gibo asín paghingowa.

…

GIYA SA PAGHIRÁS SA SADÍT NA KOMUNIDAD O PAMILYA | Anó man an satong ambag na “limáng tinapay asín duwáng sirâ” sa satong Simbahan, komunidad, o pamilya – sa pagpadagos kan misyon ni Cristo sa kinâban?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Patanid dapit sa mga Maraot na Pastor

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Julio 21-27, 2024. Basahon an Evangelio gikan sa Marcos 6,30-34 (Ika-16 na Domingo sa Ordinariong Panahon - B).

…

Sa Evangelio inagda ni Jesu Cristo an Saiyang mga disipulos na magpahingalò ta halè pa saná an mga iní sa misión. Alagad Siya man saná mismo an nagdesisyon na tukdoán man giraray an naghaharalát na katawohan nin huli ta odók na naherak Siya kan máhilíng sinda na “garó mga karnero na mayong pastor”.

Si Jesús an marhay na Pastor, kaya nganì an saiyang presencia nagin singkogan para sa mga namámayó sa Israel. Dakúl na beses sa mga Evangelio binatikos ni Jesús an mga escribas, Fariseos, asín kapadean, nin huli sa saindang saláng pagpadára sa mga tawo. Sa lado kan gobyerno, kadakul man an mga abuso sa kapangyarihan ni Hadeng Herodes asín an saiyang mga alipores.

Patanid sa mga Maraot na Pastor. An kapangyarihan tinátaó nin Diós sa mga tawo para sa karahayan nin gabós. Kayâ an Diós daí naoogma sa mga ginagamit an saindang katongdan sa karâtan. Sa Jeremías 23,1 nasusurat: “Herak man sa mga pastor na nagpapabayà na an Sakong mga karnero mawarà asín mawarak, olay nin Kagurangnan.” Asín sinabi pa: “Papadusahan ko kamo huli kan saindong kapabayaan.”

Pinapatanidan kita na daí magpadará sa mga maraot na pastor. Mamimidbidan ta sinda sa nagkapirang tandâ.

Binabayaan ninda an saindang inaataman; an saindang pusò bakóng pusog sa pagtabang kundî sa pakinabang. Si Jesús nagsabi sa Juán 10,11: "An marhay na pastor dinodolot an sadiri para sa mga karnero.”

Minasuway sinda sa Diós. An saindang kagustuhan an saindang pinapaoróg, an kinâbanon na ambisyon an saindang sinúsunód. Si Cristo nagsabi sa Juan 6,38: “Huli ta naghilig Ako halè sa langit, bakô sa paggibo kan Sakuyang boót, kundî kan boót kan nagsugò Sako.”

Ineenot ninda an saindang sadiri, kisa kapwa o banwaan. Kayâ nagsasakit an banwaan asín kadakul an nasa pagtios nin huli sa pagkurakot asín pagpaoróg sa sadiri kan mga nasa kapangyarihan. Si Jesús nagsabi sa Mateo 20,26-28: “An boót saindo magin dakulà, magigi nindong paralingkod, asin an boót saindo magin enot, magigi nindong oripon. Siring, an Akì nin Tawo daí nagdigdi para paglingkodan, kundî para maglingkod asín itaó an buhay Niyang pantubós para sa dakúl.”

Inuutikán ninda an banwaan asín dinádará sa maraot. Rináraót ninda an tiwalà nin tawo sa mga institusyon nin sociedád, asín binabasang an katotoohan tanganing malanse an mga tawo sa saindang sadiring agenda. Si Cristo nagpatanid sa Mateo 18,6: “An siisay man na magin dahilan nin pagkakasalà kan sarô sa mga saradít na iní na minatubód Sako, mas marhay pang gakodán siya nin gapóng gilingan sa liog asín lunudon sa lawód.”

Pagpilì sa Marhay na Pastor. Kaipuhan tang magpilì kun arín na dalan an satong aagihan: an sa maraot na pastor o an sa satong Marhay na Pastor. Pâno ta pipilíon an dalan kan Marhay na Pastor?

Magpilì kita nin mga marhay na pamayó. Sa sunód na taón, eleksyon na naman sa satong nación. Pilion ta man lugód an pulitika nin prinsipyo asín paglingkod bakô an pulitika nin personalidad asín kwarta.

Suportahán ta an mga marhay na gibo asín plano kan satong mga pamayóng-lingkod. Magkasararô kita sa tamâ, sa katotoohan, asín sa karahayan kan kagabsán.

Hingowahon na kita mismo magtalubò na magin siring sa Marhay na Pastor – sa paglingkod, sa pagkamoot, asín paghirás kan Marhay na Baretà. Tanganing mautób sato an panugâ nin Diós sa Jeremías 3,15: “tatàwan ko Kamo nin mga pastor susog sa Sakong pusò”.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia kan epekto saimo nin saróng “maraot na pastor” o “marhay na pastor”; o kun pâno ika man nagin marhay na pastor sa kapwa.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Inapód, Sinugò, asin Tinugon para sa Misyon

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Julio 14-20, 2024. Basahon an Evangelio gikan sa Marcos 6,7-13 (Ika-15 Domingo sa Ordinariong Panahon - B).

…

Sa Evangelio, sinugò ni Jesu Cristo an Doce Apostoles sa pagmisyon. Siring sa mga apprentices o on-the-job (OJT) trainees, yaon si Jesús sa paggiya sainda mantang inaarog nindang gibohon an mga ginigibo Niya: magtukdô dapít sa Kahadean, magbulóng nin mga may helang, asín magpaluwás nin mga demonio.

Natà ta Doce an Saiyang pinilì? Siring na may doceng tribu an Piniling Banwaan na Israel, tinogdas ni Jesús an institusyon kan Doce Apostoles – bakô saná para magin mga enot na pamayó kan Saiyang Simbahan, kundì para magin tanda kan Simbahan mismo, an bâgong Banwaan nin Diós. Kayâ kan sinubol sinda ni Cristo sa pagmisyon, an sinugò Niya bakô saná an Doce (o once kan panahón kan Ascensión) kundî an bilog na Simbahan – an lambang miembro kainí, kaidto, ngonian, asín sagkod pa man.

Anó an mensahe para sa sato kan istoryang iní sa Evangelio? Paghorop-horopan ta iníng tolóng ginibo ni Jesús sainda: inapód Niya sinda, asín sinugò sa misyon, dangan tinâwan nin nagkapirang tugon.

Inapód kita na magin mga disipulos ni Cristo.

Lambang sarô sa Doce inapód ni Cristo na magin disipulo Niya. Kita man nagin mga disipulos Niya huli  sa bonyag. Sabi ni San Pablo sa Efeso 1,4-5: “Pinilì kita kan Amâ bâgo tugdasón an kinâban na magin banál asín mayong digtâ sa atubang Niya; sa pagkamoot itinakdâ Niya kita kan enot pa, para sa kamugtakan nin akì huli ki Cristo, para Saiya.”

Nin huli sa sacramento kan bonyag kita nagigin mga akì kan Amâ, asín poón digdi minatalubò kita sa pagigin mga disipulos ni Jesús. Para sa mga Cristianong nabonyagán na akì pa, kaipuhan na magkaigwa nin tuyong pagpilì sa Diós asín paglingkod Saiya pag nasa hustong isip asín boót na. May nagkapira kitang mga programang renewal na nakakatabang tanganing magibo iní, siring kan Youth Encounter, Parish Renewal Experience, Marriage Encounter, Cursillo, New Evangelization Pastorale, Christian Life Program, Life in the Spirit Seminar, asín iba pa. Dangan ipadagos sa pagigin miembro nin mga Saradít na Komunidad nin Pagtubód, o Basic Ecclesial Communities, o arín man sa manlaén-laen na mga movimientos asín komunidad sa satong Simbahan.

Sinugò kita sa misyon nin Evangelización.

An gracia nin pagtubod daí tinaó sato para sa sadiri lamang, kundî para ihirás. Sa Mateo 28, 19-20, sinugò ni Jesús an Simbahan: “lakáw, gibohang disipulos an gabós na nación; bonyagán sa ngaran kan Amâ, kan Akì, asín kan Espiritu Santo; tukdoán na mag-utób kan gabós Kong itinugon saindo.” An mga Cristiano inaapód bakô saná na magsirimba kundî na magin Simbahan na nagmimisyon.

Sa saindang pagmisyon an mga Apostoles nagbalangibog kan Marhay na Baretà sa manlaén-laen na paagi. Kita man inaapód na magmisyon susog sa balaog na tinaó sato kan Espiritu. Si San Pablo nagtukdô 1 Corinto 12,4-5: “Manlaen-laen an mga balaog, alagad sarô saná an Espiritu. Manlaen-laen an paagi nin paglingkod, alagad sarô saná an Kagurangnan. Igwa nin manlaen-laen na kakayahán sa pagtrabaho alagad sarô saná an Diós na nagtátaó kan mga kakayahan na iyán sa gabós na tawo.”

Tinugon kita na danay na magsarig sa Diós.

Alagad maski nganì magabát na an misyon, may dinagdag pang tugon si Jesús: daí magdará nin anoman na bagay kundî an pinakadikít na kaipuhan saná. May razón kun natà hinagad Niya iní sa mga Apostoles: tanganing daí sinda – asín kita man – magsarig sa mga bagay na kinâbanon kundi sa Diós saná. Kun an Diós daí kita pinapabayaan sa aroaldaw niatong pangangaipo, anó pa daw kun kita naggigibo kan misyon na tinaó Niya sato?

…

GIYA SA PAGHIRÁS SA SADÍT NA KOMUNIDAD O PAMILYA | Anó an mga balaog o kakayahan na tinaó saimo nin Diós? Anó man sa hilíng mo an misyon na tinataó saimo nin Diós?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

Kun Kita man an Magsikwal sa Kagurangnan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Julio 7-13, 2024. Basahon an Evangelio gikan sa Marcos 6,1-6 (Ika-14 Domingo sa Ordinariong Panahon - B).

…

Sa Evangelio nagbalík si Jesu Cristo sa Nazareth, Saiyang sadiring banwa, alagad sinikwal Siya kan Saiyang mga kahimanwa. Embes na ika-urgollo, daí ninda maakò na an saróng karpintero na nagdakulà sa saindang lugár, na an pamilya midbid ninda, makatarám asín makatukdô nin may siring na autoridád sainda.

Sinayang ninda an dakulang gracia na mamidbidan kutâ sa saindang buhay an Akì kan Diós. Alagad daí tulos maghonà na mas marhay kita kisa sainda. Ta siring sa mga taga-Nazareth kaidto, tibaad pamilyar na kitang marhay sa satong pagigin Cristiano, kayâ pinapasipara ta na si Cristo asín an Saiyang Evangelio. An pagsikwal Saiya ngonian na panahón nagigibo sa nagkapirang paagi.

Sobrang pagtubód sa sadiring kadonongan asín katanosan.

Pag pinipilì ta an sadiring kagustohan maski malinaw an kabôtan ni Cristo sa Banál na Kasuratán o sa katukdoán kan Simbahan – sinisikwal ta Siya sa satong buhay. Pag dinagos-dagos ta iní, tibaad mag-abót an panahón na maghonà kita na nagtutubód pa kita sa Diós alagad nagsasamba na palán kita nin ibang diós, na gibo na sa sadiri niatong imahe asín katanosan.

Romdomón ta an sabi sa Proverbio 9,10: “An kapinônan nin kadonongan iyó an pagkatakot sa Kagurangnan.”

Saláng pagtubód sa mga kinâbanon na bagay.

Pag an satong kaogmahan mas yaon sa mga kinâbanon: kayamanan, kapangyarihan, asín kasikatan; asín pag mas sinusunód ta an kabôtan nin mga makapangyarihan digdi sa dagâ kisa kan satong langitnon na Amâ – sinisikwal ta man si Cristo.

Nagtukdô si Jesus sa Mateo 6,19-21: “Daí kamo magtipon nin kayamanan digdi sa dagâ saén may bukbok asín taklâ na nangráraót, asín may parahâbon. Magtipon kamo nin kayamanan sa langit, dumán daíng bukbok, ni taklâ, ni parahâbon.”

Maluyang pagtubód sa hampang nin mga agyat sa buhay.

Pag nawawàran tulos kita nin paglaom pag-abót nin masakit na panahón, kayâ mapadaog na saná sa tentación, o madulag sa problema, daí pa talagá kita nagtutubód sa Diós na nanugâ na daí kita papabayaan, asín maigot na nakikisumarò sa satong pig-aagihan.

Sa Mateo 28,20, nanugâ si Jesús sa mga disipulos: “Uya, kaiba nindo Ako sa gabós na aldaw, sagkod sa katapusan kan kinâban.” Kaya si San Pablo nakapagsabi sa 2 Corinto 12,10: “Ikinakaogma ko an mga kaluyahan, an mga pagtuyâ-tuyâ, an mga kasakitan, an mga pagtugis, asín an mga kahorasaan, huli ki Cristo, ta pag ako nagluluya, dangan ako makusóg.”

Anó an dapat na gibohon tanganing daí kita másalâ o magkulang o magluya sa pagtubód?

Enot, magpangadyî kita asín maghagad kan gracia nin pagtubód, siring kaidtong amâ, sa Marcos 9,24, na rinaní ki Jesus an saiyang aking may marumpot na espiritu: “Nagtútubód ako! Tabangi an kulang kong pagtubód.”

Ikaduwá, magdanay kita Saiya. Sabi ni Jesus sa Juan 8,31-32: “Kun magpadagos kamo sa sakong tataramon, tunay Ko kamong mga disipulos; mamimidbid nindo an katotoohan, asín itatalingkas kamo kan katototoohan.”

Ikatoló, pirming mámoót, ta an pagkámoót sa kapwa, minabuhay sa pagtubód. An apostól nagtukdô sa Santiago 2,17: “Siring man an pagtubód, kun mayò nin gibo, gadán sa katunayan.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia na binalô an saimong pagtubód. Arín an saimong pinilì, an kabôtan nin Kagurangnan o padagka kan kinâban?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Narahay Ka kan Saimong Pagtubod

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Junio 30 – Julio 6, 2024. Basahon an Evangelio gikan sa Marcos 5,21-43 (Ika-13 Domingo sa Ordinariong Panahon - B).

…

Sa Evangelio may duwáng istorya nin milagro: an pagbulóng sa babaeng doceng taón nang naghehelang nin pagdugô asín an pagbuhay sa doce años na daragitang nagadán pa saná. Sa duwáng istoryang iní, padagos na pinapamidbid sato ni Jesu Cristo an Diós asín an Saiyang kabôtan. Aramon ta iní sa paghorop-horop sa mga linyang sinabi Niya sa Evangelio.

“Talitha qum (Daragita, sinasabihan taká, bangon!)”

Sa tataramon ni Jesús nabuhay an gadán asín pinahayag an Saiyang Diósnon na kapangyarihan. Diós saná an may kapangyarihan sa buhay, asín pagtaó nin buhay an Saiyang kabôtan. Sa Kadonongan 1,13-14 mababasa niato: “Daí ginibo nin Diós an kagadanan, ni ikinakaogma niya an pagkaparà nin mga nabubuhay. Linaláng Niya tanganing mag-existir an gabós.”

Alagad maski nganì daí nagtarám asín nakaisi, nabulóng ni Jesús itong babaeng nagtikwil kan Saiyang gubing. Ta iní an Saiyang misyon sa dagâ. Sa Juán 10,10 sinabi Niya: “Ako nagdigdi tanganing magkaigwa sinda nin buhay sagkod na magsûpay.”

“Siísay an nagdoót sa sakong gubing?”

An simpleng hapót na iní nagdulot nin takot asín takig sa babaeng narahay pa saná ni Jesús. Natà? Nin huli ta, susog sa Tugon, bawal sa mga arog niyang “maatî” (unclean) na makiibahan sa mga tawo o magkapót sa kiisay man nin huli ta nakakaulakit an saiyang pagkamaatî. Alagad sa pag-akò niya kan saiyang ginibo kinumpleto ni Jesús an pagbulóng saiya asín minidbid siya sa katawohan na bakô nang maatî. Tinâwan siya nin bâgong buhay.

Si Jairo, bilang sarô sa mga poón nin sinagoga, nagkusóg man nin boót na magraní ki Jesús, maski aram niyang daí iní magugustohan kan mga pag-iriba niyang daí nagtútubód ki Jesús. Huli ta siya nagtubód, nákuá niya an saiyang hinahagad asín mas pa.

Kita man inaapod ni Cristo na magraní asín magsarig Saiya na daí nang ibang sinasarigan pa. Itaó ta an bilog na sadiri sa Kagurangnan na enot nang nagtaó kan Saiyang sadiri sato – sa Saiyang pagigin Diós na nanitawo asín sa pagdusay kan Saiyang buhay sa cruz. Sabi ni San Pablo sa 2 Corinto 8,9: “Ta aram nindo an gracia kan Kagurangnan tang si Jesu Cristo: huli saindo nagi Siyang dukhâ, siya na mayaman, tanganing huli kan Saiyang kadukhaán magyaman kamo.”

“Daí ka matakot; magtubód ka saná!”

Sa pagsabi kainí pinakusóg ni Jesús an boót ni Jairo, na binaretaan na gadán na an saiyang akì. Iyó man iní an sinasabi sato kan Espiritu sa satong pagbaklay sa dalan ni Cristo asín pagpâsan kan satong cruz. Aram nin Diós na an Saiyang mga inapód, maagi nin pagduwa-duwa, pagkatakot, pagkadapâ, minsan nganì pagkawarâ pa sa tamang dalan nin huli sa mga tentación. Kayâ an Saiyang balaog yaon para sa mga naghahagad kainí. Sa katunayan, an linyang “Daí matakot”, sinambit labí 100 na beses sa Lumang Tipan; asín 44 beses sa Bâgong Tipan, kadaklan kainí si Jesús mismo an nagsabi sa Saiyang mga disipulos.

Anó an nákuá kan babae asín ni Jairo na parehong nagraní asín nagsarig ki Cristo? Buhay para sa sadiri asín sa namomòtan. Makua ta man lugód an adal kainíng Evangelio tanganing siring sa babaeng nagdoót sa Saiyang gubing, pasabongán kita ni Cristo: “An saimong pagtubód iyó saimo an nagtaóng kaligtasan; lakáw sa katoninongan asín magdanay sa saimong pagkarahay.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia nin pagbalô sa saimong pagtubód, asín kun pâno mo namatean an presencia nin Diós sa buhay mo sa panahón nin pagbalô.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Dios Pinapatoninong an Satong mga Duros

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Junio 23-29, 2024. Basahon an Evangelio gikan sa Marcos 4,35-41 (Ika-12 Domingo sa Ordinariong Panahon - B)

…

An istorya sa Evangelio iyó an pagpatoninong ni Jesu Cristo kan duros sa Danáw kan Galilea. May nagkapirang paagi para mákua an kahulugán kainíng istorya nin milagro. Sarô kainí an literál o historicál na pakasabot na iní saróng tunay na pangyayari. Sarô pa iyó an paghilíng kainí bilang alegoría, na an mga elemento sa istorya simboló nin iba pang mga bagay.

Bilang literál o historicál na pangyayari, pinapahayag kan istorya na si Cristo may kapangyarihan sa mga pwersa nin kalikasan. Kayâ nganì nagharapót an mga disipulos Niya: “Siísay iní, ta sagkod an duros asín an dagat nagkukuyog Saiya?”

Para sa mga Judío, Diós saná an may kapangyarihan na maggibo kainí, siring kan ginibo Niya sa istorya kan paglaláng sa Genesis 1, kan tinâwan Niya nin orden an langit asín dagâ, asín an naghahagubuhob na kadagatan nagkaigwa nin mamaráng dagâ. Siring man kan ginibo nin Diós sa paagi ni Moisés sa Exodo 14, kan binangâ Niya an Dagat na Pulá tanganing makaagi an Saiyang Piniling Banwaan.

Sa Job 38,8-9 nagsabi an Diós ki Job: “Siísay an nagpintô kan dagat, kan magbulwak iyán halè sa tulák, kan badoan Ko an panganoron asín patosón nin lampin an mahîbog na diklom?” Kayâ an pagpatoninong ni Cristo kan duros sa danáw tandâ kan Saiyang pagka-Diós. Asín an Saiyang Diósnon na kapangyarihan ginamit Niya sa pagkaherak asín pagligtas sa Saiyang mga disipulos.

Bilang istoryang alegoricál, may suanoy na tradisyon na an sakayán na nagsasapar nin duros simbolo kan Simbahan bilang “sakayán ni Pedro”. May tradisyon man na an duros nagre-representar kan mga bagyo sa buhay nin tawo. Siring sa istorya, sa tahaw kan satong mga bagyo sa buhay, minsan daí ta namamatean an presencia nin Diós. Hapót nganì sa sikát na awit ni Gary Valenciano: “Natutulog ba ang Diyós?” Alagad an mensahe kan istorya iyó na magraní kita sa Diós asín Siya an mapatoninong kan duros asín dagat sa satong buhay. Sa pânong paagi Niya kita tinatabangan sa paghampang niato sa mga problema sa buhay?

Bilang Diós Amâ, tinátaó Niya an satong mga pangangaipo. Balikán ta an istorya kan satong buhay asín mahíhilíng ta na sa kadakul na problemang nag-aragi, daí Niya kita pinabayaan. Kayâ si Cristo nagtukdô sa Mateo 6,31-33: “Daí kamo magparahâdit kun saén kamo makua nin kakanon o inomon o gubing. Aram kan saindong langitnon na Amâ na kaipuhan nindo an mga bagay na iní. Alagad hanapa ngûna nindong enot sa gabós an Kahadean nin Diós saká an Saiyang katanosan, asín mapapasaindo man an mga bagay na iní.”

Bilang Diós Akì, iniimbitaran Niya kita sa Lucas 9,23: na “lingawán an sadiri, magpâsan kan cruz aroaldaw, asín magsunód Saiya”. An satong cruz iyó an mga kadipisilan na inaagihan ta sa ngaran ni Cristo. Pag inaako ta an satong pagsakit para sa katanosan bilang cruz, pinapakisumarò kita sa misyon nin kaligtasan ni Cristo, kayâ kaiba ta Siya sa pagpâsan, asín pinapabanál kita pasiring sa Saiyang Kahadean.

Bilang Diós Espiritu Santo, sa mga andam sa pagdangóg sa Saiyang kadunongan asín pag-utób kan Saiyang kabôtan, pinapasabóng Niya an kaliwanagan sa tahaw nin kapurisawan, asín ilaw sa madiklom na dalan. Sa Isaias 11,2 nanugâ an Diós na itátaó sato “an Espiritu nin kadunongan saká pakasabot, an Espiritu nin marhay na hatol saká kusóg, an Espiritu nin pakaaram saká pagkatakot sa Kagurangnan.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin duros sa buhay na inaagihan mo ngonian o nalampasan na, asín kun haen an Kagurangnan sa mga panahon na iní.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

An Dios nin mga Saradít na Bagay

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Junio 16-22, 2024. Basahon an Evangelio gikan sa Marcos 4,26-34 (Ika-11 Domingo sa Ordinariong Panahon - B).

…

Sa Evangelio, pigtukdô ni Jesu Cristo sa katawohan an duwang parábola dapít sa banhî. An mga parábola mga istorya ni Jesús na halè sa mga bagay asín sitwasyon nin buhay nin mga tawong naghihinanyog Saiya.

Sa mga hababaw an pakasabot o sa mga may ibáng katuyuhán sa pagdangóg Saiya (siring bagá sa Saiyang mga kaiwal), garó iní mga istorya saná na may mapupurot na adal sa buhay. Alagad para sa mga maimbod na disipulos, sa paagi kan mga iní tinutukdò ni Cristo an mga misterio kan Kahadean nin Diós. Anó an mensahe sato kan duwáng parábolang iní?

An kamurawayan kan Kahadean yaon sa mga saradít na bagay.

Si Jesús nagtukdô na an Kahadean nin Diós nakakabaíng sa pisóg nin mustasa, pinakasadít sa mga pisóg alagad pag nagtalubò mas dakulà pa kisa ibang poón nin kahoy. Sa kinâban na iní na kadakul an nagmamàwot nin kapangyarihan asín kayamanan, an Diós nagpahayag na an Saiyang kamurawayan yaon sa mga kasaradayán.

Para labanan an imperio kan Egipto asín patalingkasón an Piniling Banwaan, inapód Niya an saróng nagdulág sa sadiring banwaan, si Moisés. Para labanan an higanteng si Goliath asín magin hadè kan Israel, pinilì Niya an saróng joven na pastor, si Davíd. An Saiyang bogtong na Akì namundag bakô sa pamilyang mayaman, kundî sa dukhang mag-agóm na si María asín José. Sa mga milagro ni Jesús, an dugî ginamit tanganing makahilíng giraray an mga butá; an limáng tinapay asín duwáng sirâ, ginamit tanganing pakakanón an labí limáng ribong tawo; asín an tinapay asín alak nagigin Saiyang Hawak asín Dugô na nagtátaó nin buhay na daíng kasagkoran.

An pagmuknâ kan Kahadean gibo nin Diós na hinihirás Niya sato.

Kita siring sa paraoma sa parábola na nagsabwag nin banhî, alagad an Diós an nagpapatalubò kan mga iní sagkod sa pag-ani. Sa paghirás sa gibo nin Diós, may sinabi si Sta. Teresa de Calcutta: “Bakô gabós sato kayang maggibo nin mga darakulang bagay, alagad kaya niatong maggibo nin mga saradít na bagay na may dakulang pagkamoot.”

An pagtabang kan mga akì sa mga gibo sa haróng; an pagtukdô nin mga lolo asin lola sa mga kaakian kan mga pamîbî asín devoción; an pag sacrificio nin mga amâ asín inâ para sa mga pangangaipo nin pamilya; an honestong pagtrabaho nin mga empleyado; an matanos na paglingkod nin mga namámayó – gabós iní mga saradít na gibo na pag tiniripon nagigin mga darakulang bagay: pagkamoot, katoninongan, katanosan, pasiring sa pagmuknâ kan Kahadean.

Asín kun mag-abót an panahón na makamatè kita nin kagabatan sa paggibo nin marhay, o garó daing padumanan an satong mga paghigós, giromdomón an sinabi ni Jesús sa Mateo 17,20: “Kun kamo igwa nin pagtubód na arog kan pisóg nin mustasa, pwedeng sabihon nindo sa bulód, ‘Dumumán ka sa saróng lugár, asín maduman iyán!’ Daíng magigin imposible saindo.” Bakô nin huli ta sa satong sadiri kita makapangyarihan, kundî, kun an satong gibo susog sa Saiyang kabôtan, an Diós an mahipnò sa satong kakulangan, an mapakusóg sa satong kaluyahan, asin mapabunga satong kahigosan. Sabi nganì ni San Pablo sa Filipo 4,13: “An gabós magigibo ko huli ki Cristo na nagpapakusóg sako.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin sadít na bagay na saimong nagibo o ginigibo ngonian para sa mga namomòtan, o para sa kapwa, o para sa Kahadean nin Diós.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

An Kasâlan Tumang sa Espiritu Santo

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Junio 9-15, 2024. Basahon an Evangelio gikan sa Marcos 3,20-35 (Ika-10 Domingo sa Ordinariong Panahon - B).

…

Sa Evangelio, sinabi ni Jesús sa mga escribas na halè pa sa Jerusalem: “An siísay man na maglanghad tumang sa Espiritu Santo, mayong kapatawadán sagkod noarín man; pâsan niya an daíng tapos na kasâlan.” Anó iníng kasâlan tumang sa Espiritu Santo?

Según sa Katekismo kan Simbahan (CCC 1864): “Daíng kasagkoran an pagkaherak nin Diós, alagad siísay man na tuyong habô mag-akò kan Saiyang pagkaherak sa pagsolsol, minasayuma sa kapatawadán kan saiyang mga kasâlan asín sa kaligtasan na tinátaó kan Espiritu Santo. Iníng katagasan nin pusò minádará sa huríng kasutilan asín daíng kagsakoran na kawâran.”

Si Papa San Pio X, sa saiyang Katekismo, nagtukdô na may anóm na kasâlan tumang sa Espiritu Santo.

1. Kawâran nin paglaom sa kaligtasan

Iní an maghonà na bakô kita maninigò sa kaligtasan na dará ni Cristo. Tandâ iní nin kakulangán sa pagtubód sa pagkaherak, pagkamoot, asín karahayan nin Diós.

2. Basang na paghonà sa kaligtasan

Sa ibong na lado man iní, asín huli sa kasâlan nin kapaabaw-abawan. Iní an saláng paghonà na sigurado na an satong kaligtasan asín paglaóg sa kalangitan kayâ daí na daa kaipuhan pa magbaklê asín magbâgo sa makasâlan na pamumuhay.

3. Pagsuway sa tinokdóng katotoohan

Iní an daí pag-akò sa katokdoan kan Simbahan dapit sa mga misterio nin satong pagtubód. Sa hilíng kan tawong nagkakasalà kaini, mas tamà an saiyang pakasabot kisa sa Simbahan asín sa Espiritu Santo na naggigiya sa Magisterio kan Simbahan. Herejía o heresy an apód sa kasâlan na iní.

4. Pagkaarà sa karahayan espirituál kan kapwa

Iní an pagkaurí sa karahayan o gracia na yaon sa kapwa, kaiba na an pagmâwot kan bakô marhay para sa kapwa. Paghusga asín pagrebelde iní sa pagkamoot nin Diós sa lambang tawo asín sa tugon na kamòtan an kapwa.

5. Katagasan nin pusò sa kasâlan

Daíng paniroan sa Diós asín sa Saiyang tinátaóng kaligtasan an tawong nagkakasalà kainí. Mas pigsusunód niya an sadiring katanosan kisa an katanosan nin Diós kaya nagdadanay sa saláng gibo maski pinaliwanagan asín tinabangan na kan Espiritu Santo.

6. Huring kasutilan

Iní an resulta kan natoód na sa pagsikwal sa Diós sa bilog na buhay. Kayâ hanggang sa paghingagdan habô na magpakumbabâ sa pagdolok sa Amâ asín sarado sa imbistayon kan Espiritu.

Kun an mga iní an dapat niatong likayán, pâno man an tamang pag-akò sa Espiritu Santo?

Enot, akoon ta an satong pagkakasalà asín magbaklê, asín magtubód sa Evangelio. Iní an pangapodan ni Jesús sa Marcos 1,15.

Ikaduwá, akoon ta si Jesu Cristo, an satong Kagurangnan asín Paraligtas. Sabi ni San Pablo sa Efeso 1,8: “Sa Saiya igwa kita nin katubosan huli kan Saiyang dugô, an kapatawarán nin mga kasâlan huli kan Saiyang Gracia.”

Ikatoló, an tandâ na inakò ta Siya sa satong buhay iyó an pagsunód sa Saiyang tugon asín sa kabôtan kan Amâ. Sabi niya sa Juan 14,15: “Kun namomòtan nindo Ako, utobón nindo an Sakong tugon.” Asín sa Marcos 3,35: “An siísay man na mag-utób kan kabôtan kan Diós, sinda an Sakong mga tugang asín inâ.”

…

GIYA SA PAGHIRÁS SA SADÍT NA KOMUNIDAD O PAMILYA | Maghirás nin experiencia na nagluya an saimong pagtubód sa pagkaherak nin Diós? Anó an nakapakusóg giraray kan saimong pagtubód?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

 

Ini an Sakong Hawak

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Junio 2-8, 2024. Basahon an Evangelio gikan sa Marcos 14,12-16,22-26 (Solemnidad kan Corpus Christi).

…

Sa Evangelio, sinabi ni Jesús sa mga disipulos sa Huríng Pamanggi: “Akoa, iní an Sakong hawak” dangan “Iní an Sakong dugô kan tipan, na pinapabulos para sa dakúl”. Itinukdô ni Jesús an tinutubodán niatong misterio poón pa kaidto sagkod ngonian: na Siya totoong presente sa Eucaristía asín an satong inaakò sa comunión na hostia asín alak totoong Saiyang hawak asín dugô.

Ano an Eucaristía? Sabi sa Catechism of the Catholic Church (CCC 1324) iní an “burabod asín kaitaasan kan buhay Cristiano”. Si Jesús nagtukdô sa Juán 6,54: “An nagkákakán kan sakong lamán asín nag-íinóm kan sakong dugô, igwa nin buhay na daíng kasagkoran, asín bubuhayon ko siya liwát sa huríng aldaw”. Sabi man sa Catechism for Filipino Catholics (CFC) an Eucaristía sacramento nin sacrificio, comunión, asín presencia.

An Eucaristía Sacramento nin Sacrificio nin huli ta iní “representación asín pagromdom kan sacrificio ni Cristo sa cruz, asín ginagamit kainí an bunga kan sacrificio sa cruz” (CFC 1690). Anoman na gibong marhay na pig-aatang sa Kagurangnan, napapabanál, nagigin sacrificio. Sa banál na Misa dinádará ta an satong mga intención, pangangaipo, dolot na atang, asín an sato mismong sadiri – iní mga sacrificio na pinakikisumarò ta sa oróg kadakulang sacrificio ni Cristo na “padì, atang, asín altar nin sacrificio”.

Bilang satong sacrificio nin pasalamat, an Banál na Misa naghahagad kan satong “bilog, tuyo, asín aktibong (full, conscious, and active) participación sa mga celebración kan liturgía”, susog sa Sacrosanctum Concilium (SC 14), an Constitución kan Banál na Liturgía halè sa Vatican II.

An Eucaristía Sacramento nin Comunión niato ki Cristo asín sa lambang sarô, nin huli ta iní sacramento nin pagkamoot, tandâ nin pagkasararô, bugkos nin pagmakulóg, asín bangkete Pascuál (CFC 1702; SC 47). Sa Santa Misa sa Ikatolóng Pamîbî sa Eucaristía, an padì minasabi: “itugot Mo na kaming binabâgo kan Hawak asín Dugô kan Saimong Akì, panô kan Saiyang Espiritu Santo, maabtan man lugód na saróng hawak asín saróng espiritu ki Cristo”.

An minimum na hinahagad sato sa pag-akò ki Cristo sa comunión iyó na kita dapat nasa “estado nin gracia” o daíng nacomitir na kasâlan na mortál.

An Eucaristía Sacramento kan Presencia ni Cristo na “presente sa celebración Eucarística sa mga nagtitiripon sa Saiyang ngaran, sa persona kan ministro, sa Saiyang Tataramon, asín sa sa Banál na Hostia na bolanos asín daí natatapos” (CFC 1722; SC 7).

Dapít sa maninigong gawè nin pag-ako sa banál na presencia ni Cristo sa pagcomunión, lalò na sa kamót, iní  an sabi ni San Cirilo de Jerusalem: “Mag-ingat na daí ki masayang sa sagradong hawak. An pagkawarâ kaiyán siring sa pagputól nin parte kan saimong lawas. Kun tinâwan ka nin pinong bulawan, bakóng maingat ka nanggad ki marhay, tanganing daí ki mahulog sa saimong kamot? Ano pa daw kaingat ka dapat sa pagbantay na daí ki máwarâ maski rakdag kainí na oróg na mahalagá kisa bulawan o brillantes?”

Pagkatapos kan Misa, kitang mga nagsirimbá dara-dara na an presencia ni Cristo saen man kita magdumán, lalò na pag kita bilang Simbahan “nangangadyè, naggigibong herak, naglalakbay pasiring sa buhay na daíng kasagkoran, nagbabalangibog kan tataramon nin Diós, asín namámayó sa Banwaan nin Diós” (CFC 1721).

…

GIYA SA PAGHIRÁS SA SADÍT NA KOMUNIDAD O PAMILYA | Natà ka nagsisimba? Maghirás kan saimong pinakamemorableng experiencia sa pag-ayon sa Banál na Eucaristía.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song

An Dios Nagpamidbid bilang Santisima Trinidad

 

Giya sa Prayer-Meeting nin mga Saradít na Komunidad nin Pagtubód (SAKOP) Para sa semana kan Mayo 26-Junio 1, 2024. Basahon an Evangelio gikan sa Mateo 28,16-20 (Solemnidad kan Santisima Trinidád).

…                                                                                                                                   

Saróng vez sa taón nagcecelebrár asín naghorop-horop an Simbahan kan pinakahararom na misterio kan satong pagtubód: an Santisima Trinidád. Para masabotan iní, mápoon kita sa kun anó iní bakô. Bakô iní dapít sa mathematics, ta bakô man 1+1+1=1. Bakô iní falta razón, ta daíng imposible sa Diós. Bakô iní gibo saná nin tawo o imbento kan Simbahan, nin huli ta daí iní nagpoón saná sa Consejo kan Nicea kan taón 325 AD, kundî piglinaw kaining Consejo an tunay asín dati nang pagtubód kan Simbahan tanganing labanan an saláng katukdoán.

Nagtútubód kita sa Santisima Trinidád nin huli ta iní an pagpamidbid nin Diós kan Saiyang sadiri.

Enot, nagpamidbid Siya sato bilang Amâ, kaglaláng nin gabós, asín tagapagligtas sa kaoripnán kan Saiyang Piniling Banwaan. Dangan kan pagdatóng ni Jesu Cristo, nag-abót an kapanoan kan Saiyang pagpamidbid. Sabi ni Jesús sa Juán 10,30: “Ako asín an Amâ sarô”; asín sa Juán 14,9: “An nakahiling sako, nakahiling man sa Amâ”.

Dangan sa Juan 14,16-17, sinabi man Niya: “Ako man mahagad sa Amâ, tatàwan Niya kamo nin sarô man na Paraclito, tanganing makaibanan nindo sagkod pa man. Siya an Espiritu nin katotoohan.” Iní an Espiritu kan Amâ asín Akì na pinadará sa kinâban asín huminilig sa mga disipulos kan Pentecostes kayâ natogdas an Simbahan.

Kayâ kan sinubol ni Jesús sa pagmisyon an Saiyang mga disipulos bâgo Siya suminakát sa langit, sa Mateo 28,19 tinugon Niya sindang pumadumán sa mga banwaan, gibohon an mga iníng disipulos Niya, asín bonyagán “sa ngaran kan Amâ, asín kan Akì, asín kan Espiritu Santo”.

Naliligtas kita nin huli sa satong pagtubód sa Diós na nagpapamidbid sato.

Sabi ni Jesús sa Juán 3,16: “Ta siring namòtan nin Diós kinâban: an bogtong na Akì itinaó, tanganing an gabós na nagtútubód Saiya daí máwarâ, kundî magkaigwa nin buhay na daíng kasagkoran.”

Alagad an pagtubód na iní bakô saná pakasabot asín pag-oyon sa mga doctrina. An pag-akò ki Cristo bilang Kagurangnan asín Paraligtas, iyó an pag-arog sa Saiyang maimbod na pagsunód sa kabôtan kan Amâ. Asín an satong pagsunód minádará sato na magin kabaing Niya. Nin huli ta an huríng padumanan nin pagsamba iyó na kita nagigin siring sa satong pigsasamba.

Sabi sa Genesis 1,27: “linaláng nin Diós an tawo sa Saiyang ladawan”. Kun an Diós nagpamidbid bilang Santisima Trinidád, an misteriong iní nagtutukdò sato sa pinakatotoong versión kan satong sadiri.

Pag kita nagtútubód sa Diós Amáng mamomòton asín maheherakón, matanos asín maimbod, kita man minatalubò sa pagigin mamomòton asín maheherakón, matanos asín maimbod.

Pag kita nagtútubód sa Diós Akì, kita minatalubò sa tunay na pagkamoot, sa pagmangno sa kapwa, oróg na sa mga nawáwarâ asín sa mga pinakasaradít satuya, sa pakipag-amigo sa mga kaiwal asín pagpatawad sa mga nagkasalà satuya, asín sa pagdusay kan sadiri para sa mga namomòtan.

Pag kita nagtútubód sa Diós Espiritu Santo, kita minatalubò sa kabanalan asín katotoohan, asín padagos na pagbâgo sa sadiri, tanganing magin dalan man nin pagbâgo kan sadiring pamilya, banwaan, asín kinâban.

Sa hurí, an Santisima Trinidád saróng misterio bakô nin huli ta daí ta iní masasabotan, kundî nin huli ta iní an pagpamidbid nin Diós sato kan Saiyang sadiri, asín sa satong pagtubód Saiya kita makakaligtas asín makamit kan kapanoan nin buhay sa kaibahan Niya.

…

GIYA SA PAGHIRÁS SA SADÍT NA KOMUNIDAD O PAMILYA | Maghirás kan saimong pakasabot sa Santisima Trinidád, asín saimong experiencia kan pagsabuhay kan pagtubód sa Diós Amâ, Akì, asín Espiritu Santo.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Prayers of the People • Closing Prayer • (Spontaneous and Our Father) • Closing Song