Dalan, Katoohan, asín Buhay

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Mayo 7-13, 2023. Basahon an Evangelio gikan sa Juan 14,1-12 (Ikalimáng Domingo kan Pascua kan Pagkabuhay-Liwát).

…

Sa Evangelio nagpapaaram na si Jesús sa Saiyang mga disipulos, asín sa pag-andam Niya sainda sa Saiyang nagráraníng paghalè, padagos na nagtokdô Siya dapit sa Saiyang sadiri. Sa Juan 14,6 sinabi Niya: “Ako an dalan, an katotoohan, asín an buhay. Daí nin makakadolok sa Amâ kun daí mag-agi Sakuya.” Boót sabihon: Siya an “kapanoan kan pagpamidbid kan Diós Amâ” asín an “tagapagultanan nin Diós asín nin mga tawo”.

Si Cristo an Dalan. Sa Saiya saná makúkuá an kaligtasan, Siya saná an solamenteng agihan pasiring sa Kahadean nin langit. Sabi ni San Pablo sa 1 Timoteo 2,5-6: “Huli ta sarô saná an Diós asín sarô saná an tagapagultanan nin Diós saká nin mga tawo – an tawo na si Cristo Jesús. Idinusay Niya an Saiyang buhay sa pagtubós nin gabós na tawo, na patunay nin Diós sa tamang panahón.”

Liniligtas kita ni Cristo sa duwáng paagi: enot, bilang Diós na totoo, Siya an Akì na pinadara kan Amâ sa katawohan; ikaduwá, bilang tawong totoo, pinapangenotan Niya an katawohan sa pagdolot kan satong sadiri asín pagbalík sa haróng kan Amâ. Kayâ sinabi Niya sa Juan 14,3-4: “Kun Ako makakalakáw asín makaandám nin lugár para saindo, mábalík Ako asín kukuahón Ko kamo para Sakuya, tanganing kun saén Ako dumán man kamo.”

Si Cristo an Katotoohan. Siya an kapanoan kan pagpamidbid sato kan Diós Amâ. An pagpamidbid nin Diós nagpoón pa sa paglaláng alagad inuláng nin tentación asín kasâlan. Kayâ sa Lumang Tipan mababasa an padagos na pagpamidbid giraray nin Diós sa katawohan sa paagi kan Saiyang Piniling Banwaan Israel – asín an kapanoan kainí makúkuá ki Jesús. Kayâ kadakul kan mga pasuruhay Saiya nin mga Fariséos asín escribas, nin huli ta sinasagwè asín tinatamà Niya an saindang mga saláng pakasabot, pagtokdô, asín pagsabuhay kan pagpamidbid sainda nin Diós.

Sabi ni San Pablo sa 1 Timoteo 2,4: an Diós “boót na an gabós na tawo makaligtás, asín makaabót sa pagkamidbid sa katotoohan”. An katotoohan na nakakaligtas iyó si Cristo. Sabi Niya sa Juan 14,11: “Magtubód kamo sako: Ako yaon sa Amâ, asín an Amâ yaon sako.” An tandà na kita nagtutubód iyó an satong pagpahayag kan Katotoohan ni Cristo sa satong mga tataramon asín gibo. Sabi pa ni Jesús sa Juan 14,12: “an minatubód sako magibo man kan mga ginigibo ko”.

Si Cristo an Buhay. Siya an burabod nin buhay. An paglakáw sa Saiyang dalan asín pagsunód sa Saiyang kabôtan an magdádará sato na mabuhay nin makahulugán, matalingkás, asín tunay na maogma. An pagsuway sa Saiyang kabôtan magdádará sato sa mga bisyo asín kasâlan na minaraót nin satong buhay.

Alagad mas pa sa marhay na buhay digdi sa dagâ an boót Niyang itaó sato. Nin huli ta yaon Saiya an buhay na daíng kasagkoran, asín pakatapos kan satong buhay digdi sa dagâ, may naghahalat na estaran sa ikaduwáng buhay. Sa Juan 14,2-3, nanugâ Siya: “Sa haróng kan sakong Amâ dakúl an dagosan… Málakáw ako ta máandam nin lugár para saindo.”

Alagad maskí an estadong iní bakô pa an pinanugâ Niyang kapanoan nin buhay. Nin huli ta an buhay na daíng kasagkoran bakô saná para sa satong kalág, kundî para sa satong bilog na pagkatawo na linaláng nin Diós na kabaíng Niya. Iní mangyayari sa huríng panahón, sa pagkabuhay-liwát nin mga gadán, kun nuarín an hawak asín kalág na pinagbulág nin kagadanan magigin sarô asín bilog giraray, asín daí na magágadán sagkod pa man. Sabi ni Jesús sa Juan 6,40: “Iyó iní an kabôtan  kan sakong Amâ, na an nakákahilíng sa Akì asín nagtútubód Saiya magkakaigwá nin buhay na daíng kasagkoran, asín bubuhayon Ko siya sa huríng aldaw.”

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia kun pàno mo isinabuhay an pag-akò ki Cristo bilang saimong dalan, katotoohan, asín buhay.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Magin Marhay na Pastor

 

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana kan Abril 30-Mayo 6, 2023. Basahon an Evangelio gikan sa Juan 10,1-10 (Ikaapát na Domingo kan Pascua kan Pagkabuhay-Liwát).

…

Sa evangelio nagpamidbid si Jesus bilang marhay na pastor asín pintoan sa toríl. Ano an kahulugán kan Saiyang pagigin pintoan? Na Siya saná an agihan nin kaligtasan nin gabós na tawo. Sabi ni San Pablo sa Colosas 1,14: “Siya an nagligtas sato saká nagpatawad kan satong mga kasâlan”.

Ano an kahulugán kan Saiyang pagigin marhay na pastor? Na dinadará Niya kita sa dalan nin kaligtasan nin huli kan pagsaksi kan bilog Niyang buhay – sa Saiyang mga katokdoán asín mga gibong milagro, sa pagtipon nin komunidád nin mga disipulos Niya, asín, oróg sa gabós, sa pagdusay Niya nin buhay para sa sato gabós.

Kun si Cristo an satong Marhay na Pastor, ano an dapat niatong gibohon? Ini man an hapót kan mga Judío na nagdangóg sa pagtokdô ni San Pedro. An saiyang simbag sa Gibo 2,38: “Magbaklê asin magpabonyag… asin aakoon nindo an balaog kan Espiritu Santo”.

Enot, magdangóg kita sa Saiyang boses. Napapalibotan kita nin kadakul na boses na naghahagad na sinda an dangogón. “Giboha iní asín magigin maogma ka; o masikat ka; o magigin mayaman asin makapangyarihan ka.” Alagad Siya saná an boses na minagiya sato sa mga tamang dalan. Sabi ni Jesus sa Juan 10,27-28: “Nagdádangóg Sako an mga karnero ko; midbid Ko sinda asin sinúsunód ninda Ako. Tinatàwan Ko sinda nin buhay na daing kataposan, asin daí nanggad sinda mawawarà.”

Ikaduwá, maglakáw kita sa Saiyang dalan. Madalíng magsunód ki Cristo pag an buhay facil asín maogma. Ligtas kutâ pirmi an gabós sa laóg nin toríl, alagad dai pwedeng pirming nasa laóg saná sinda ta magugutom. Kayâ an satong Marhay na Pastor dinádará kita sa luwás nin toríl, susog sa Psalmo 23,2: “sa mga berdeng sabsaban, sa mga tubig na malinaw”. Alagad may mga peligro sa luwás nin toríl. Tibaad kita makulgan, o mag-agi nin pagsakit, o magadán. Mabklay pa daw kita sa Saiyang dalan kun iní panô nin kadificilan, kun iní an dalan kan cruz?

Ikatoló, na kita magín siring man sa Saiya. An Kagurangnan nanugâ sa Jeremias 3,15: “Tatàwan ko kamo nin mga pastor susog sa sakong pusò, asín papamayohan ninda kamo nin may kadunongan asín pakasabot”. Iní bakô dapit sa mga padì saná, ni sa mga pamayó nin banwaan saná, kundî sa sato gabós. Aroaldaw nagpapastor kita nin mga tawo, bilang amo o empleyado, bilang pulitiko o ciudadano, bilang magurang, tugang, o amigo. An hapot: ginigibo ta daw iní siring ki Cristo na Marhay na Pastor?

Si Cristo nagtokdô kan pagkakaiba kan marhay asín maraot na pastor. Sabi Niya sa Juan 10,10: “An parahâbon minalaóg, daíng ibang tuyo kundî maghâbon, maggadán asín magraót. Ako napadigdi tanganing sinda mabuhay asín mapanô nin buhay.” An pagigin siring ki Cristo iyó an pagkaigwa kan “parong nin mga karnero”, boót sabihon nakikisumarò sa mga dukhâ, mga maluya, mga sinisikwal nin sociedad, asín mga biktima nin violencia. An pagigin siring ki Cristo iyó an pagpaoróg sa kapwang nangangaipo kisa sadiring karahayan, asín pagigin maogma sa pagsunód sa kabòtan kan Amâ.

Sa panahon nin krisis, an tentacion sato iyó na kita magkanya-kanya, na maurí o mag-isip nin maraot sa kapwa; asín sa mga may katongdan, na abusohon an saindang awtoridád. Mahalagá na tataó kita magmidbid kun siisay an mga marhay asín maraot na pamayó, tanganing midbid ta kun siisay an susundan o lilikayán. Alagad mas mahalagá na lambang sarô sato magin man lingkod na pastor, susog sa pusò kan Marhay na Pastor.

…

GIYA SA PAGHIRÁS SA SADÍT NA KOMUNIDAD O PAMILYA • Igwa ka nin midbid na sa hilíng mo may pusò nin Marhay na Pastor? Ano sa saindang gibo o buhay an boót mong arogon o gibohon man kan iba?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

An Pamanggi sa Emmaus

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana kan Abril 23-29, 2023. Basahon an Evangelio gikan sa Lucas 24,13-35 (Ikatolóng Domingo kan Pascua nin Pagkabuhay-Liwát).

…

An istorya sa Evangelio iyó an pag-ibá ni Jesús sa duwá Niyang disipulos mantang sinda nagbabaklay pasiring sa Emmaus. Mantang iní totoong nangyari, isinurat man iní bilang alegoría, o istorya na may hararom na kahulugán sa paagi nin mga simbolóng ginamit. Iní sarong alegoría kan pagpamidbid sato ni Cristo, orog na sa mga parte kan Eucaristía o Santa Misa.

Liturgía kan Tataramon an enot na kabtang kan Santa Misa. Sa dalan, tinukdô ni Jesús sa duwáng disipulos an tamang interpretasyon kan mga mga profesía dapit Saiya sa mga libro nin mga Tugon asín Profetas. Kayâ nagtutubód kita na an gabós na Kasuratán makukua an pinakakahulugan ki Jesu Cristo. Si Cristo an kapanoan kan pagpamidbid nin Diós, kayâ Siya an llave sa pakasabot sa mga Kasuratán, sa kasaysayan nin kaligtasan nin bilog na kinâban, patín sa satong personal na istorya nin kasâlan asín kapatawadán. Sabi sa 1 Pedro 1,21: “Huli Saiya nagtutubód kamo sa Diós na nagbangon Saiya halè sa mga gadán asín nagtaó Saiya nin kamurawayan,; malà an pagtubód nindo asín paglaom yaon sa Diós”.

Sa satong pagsimba, nagdadangóg daw kita nin maigot sa mga Babasahon? Pag-ulî, nabalô ta na lamang na balikán na basahon sa biblía an mga mga nadangog ta sa Santa Misa? Nagkaoras na lamang kita sa paghorop-horop kan mga Babasahon susog sa mga experiencia ta sa buhay, o sa pag-adal pa nin hararom dapit sa tamang pagsabot kan mga iní? Paladan kita kun nakagibo kita maski sarô lamang sa mga iní. Nin huli ta an Banal na Kasuratan biyayà nin Dios sa katawohan.

Liturgía kan Eucaristia an ikaduwáng kabtang. Kan sinda namamanggi, kinuá ni Jesús an tinapay, binaak, nagbendicion, asín binuksan an mga matá kan duwáng disipulos tanganing mamidbidan ninda Siya. Hanggang ngonian, nagpapadagos an Saiyang presencia sa satong buhay lalò na cada vez minacelebrár kita kan Eucaristía.

An satong pagsimba cada Domingo, mas nahihilíng ta daw bilang obligación o mabiyayang pakipagtagpoan ki Cristo na tinatao an Saiyang sadiri sato? Gurâno kahalagá sato an pag-akò Saiya sa communión na nasa estado de graciá, boot sabihon, daí nakagibo nin kasâlan na mortál? Nahihilíng ta daw na nakakapakusóg kita nin pagtubód kan lambang sarô na miembro kan Hawak ni Cristo sa cada pagparticipár niato sa Santa Misa?

Pagpulî an katapusan kan Misa. Kan si Jesús nawarà na, nag-istoryahan an duwáng disipulos. Sa Lucas 24,32 nagsabi sinda: “Bakóng naglalaad an satong mga pusò kan nagtátarám Siya sato sa dalan asin binubuksan sato an mga Kasuratán?” Dangan nagdesisyón sinda na magbalík sa Jerusalem asín ihirás iníng marhay na baretà sa ibang mga disipulos. Sa katapusan kan Misa, an padi minasabi, “Paduman, tapos na an Misa”. Alagad daí kita minahalè na siring saná kan dati, na garó daíng nabàgo satuya, nin huli ta nakaibahan ta si Cristo asín dara-dara ta na an Saiyang presencia asín Marhay na Baretà sa satong mga sadiri.

Sa satong pagsimba asin sa pagmisyon pakasimba, kita nagigin Simbahan. Asin iní an satong misyon: enot, na padagos pang bàgohon an sadiri tanganing makaarog lalò ki Cristo; ikaduwá, na ihirás an Saiyang pagkamoot sa laog asín luwas kan satong pamilya, orog na sa kapwang nangangaipo. Sabi sa Psalmo 16,11, na iyó man an ipinahayag ni San Pedro sa Gibo kan Mga Apostoles 2,28: “Ipinaaram Mo sako an mga dalan nin buhay; papanoón Mo ako nin kaogmahan sa atubang Mo”. Iníng pagtukdô sa dalan nin buhay asin kaogmahan kan presencia ni Cristo an manínigong ihirás niato sa kapwa sa satong pagmisyon pakasimba.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás kan saimong experiencia nin gracia, o kadificilan, sa pagsimba, asin kun pa’no mo iní naisasabuhay asin naihihirás sa kapwa.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

An Diosnon na Pagkaherak

 

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana kan Abril 16-22, 2023. Basahon an Evangelio gikan sa Juan 20,19-31 (Ikaduwáng Domingo kan Pascua nin Pagkabuhay-Liwát).

…

An istorya sa evangelio may duwáng kabtang: an banggi kan enot na aldaw kan semana sa saróng haróng kun saén nagkakatiripon an mga disipulos ni Jesús, asín sa banggi giraray sa sunód na semana na kaiba na ninda an disipulong si Tomás. Sa parehong okasyon na iní, nagpahilíng sainda si Jesús na nabuhay-liwát.

An enot na aldaw kan semana iyo an nagin bàgong Aldaw kan Kagurangnán (Dies Dominí sa Latin, Domingo sa Español) para sa mga disipulos, nin huli ta sa enot na aldaw nabuhay-liwát si Cristo. Kayâ imbes na Sabado, Domingo na an Banál na Aldaw para sa mga Cristiano.

Alagad sa enot na aldaw na idto, takot asín pagkapurisaw an namatean kan mga disipulos. Kayâ pinarà ni Jesús an mga iní kan nagpahilíng Siya sainda asín tinaó an Saiyang katoninongan. Daí nakapugol Saiya an mga saradong pintoan asín lanób tanganing makaibahan Niya an Saiyang mga disipulos.

An saradong haróng nagtatao nin taguán asín ligtas na lugar para sa mga disipulos, alagad iní nagin man nindang kulungan kun saén an takot asín kapurisawan mas lalò pang nagdakulà asín nagkusóg. Kita man may mga siring na saradong haróng sa satong buhay. Iní an mga inaapod tang “comfort zones” kun saén kita ligtas asín harayô sa peligro, alagad nagpupugol sato na magín matalingkás, magtalubò, asín mabunga. Kun palaogón ta si Jesús sa satong buhay, malagbas man Siya sa satong mga saradong pusò asín mapatalingkás sa satong nalilibongan na isip asín nanluluyang boót.

Kan enot na magpahilíng sa Jesús sa saiyang mga disipulos, igwang daí nakasabáy, si Sto. Tomás, Kayâ iní daí tulos nagtubód sa ibinaretà saiya kan mga pag-iriba niya. Kayâ sa ikaduwáng pagpahilíng ni Jesús, dinolok Niya si Tomás asín kinahuron hanggang sa magpahayag iní kan saiyang pagtubód, an magayonon na “Kagurangnán ko asín Diós ko!” sa Juan 20,28.

Kita man pinapagirumdóm kan satong pagmangno sa mga daí ta kaiba, sa mga nasa laylayan kan sociedád, asín sa mga nawawarà sa tamang dalan. Nin huli ta sabi ni San Pablo sa 1 Timoteo 2,4: an Diós “nagmamawot na an gabós makaligtas, saka makamidbid kan katotoohan”.

Sa halîpot na pagsabi, pinapahayag kainíng istorya an marhay na baretà kan Diósnon na Pagkaherak. Ano an pagkaherak? Iní an virtúd nin pangataman sa lambang sarô, an paghingowa, maski magsacrificio, na magmakulóg sa kapwa, magpatawad sa nagkasalà, asín magtabang sa nangangaipo. 

Sa Hebreo sa Lumang Tipan, “hesed” an pinakagamitón na tataramon dapit sa pagkaherak, asín iní  minatukoy sa pagkamaimbód asín pagkamapatinawad nin Diós maski pirming nagkakasalà an Saiyang Piníling Banwaan. Sa Griego sa Bagong Tipan, “eleos” an pinakagamitón na tataramon kainí, asín nahihilíng iní oróg sa gabós sa kaligtasan na dará ni Cristo. Sabi sa Efeso 2, 4-5: “Nagsusupay an pagkaherak nin Diós, asín dakula an Saiyang pagkamoot sato, kayâ maski kan gadán pa kita huli sa kasombikalan, binuhay Niya liwát kita kaiba ni Cristo.”

Kan taon 2000, binoot ni Papa San Juan Paolo II, na an Ikaduwáng Domingo kan Pascua kan Pagkabuhay-Liwát icelebrár man bilang Domingo kan Diósnon na Pagkaherak. Duwá an pangapodan kan celebración na iní. Enot na danay kitang maghagad nin asín magsarig sa pagkaherak nin Diós. Ikaduwá, na kitang naherakan, magín maheherakón man sa satong kapwa.

…

GIYA SA PAGHIRÁS SA SADÍT NA KOMUNIDAD O PAMILYA • Maghiras kun pano nagin maheherakón saimo an Kagurangnán, o kan ika natàwan nin oportunidad na magín maheherakón man sa kapwa.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

Alleluia! Si Cristo Nabuhay-Liwat!

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana kan Abril 9-15 sa laóg kan Octava kan Pagkabuhay-Liwát. Basahon an Evangelio gikan sa Juan 20,1-9 (Domingo de Resurrección).

…

Si Cristo nabuhay-liwát susog sa sinabi Niya! Alleluia! Sabi ni San Pablo sa 1 Corinto 15,14: “Kun si Cristo daí binuhay liwát, sayang an samong paghulit asín sayang an saindong pagtubód.” Iní an misteriong patugmadan kan satong pagtubód.

Ano an boót sabihon kan Pagkabuhay-liwát sa mga gadán? An Resurrección o Pagkabuhay-liwát ni Jesus sa mga gadán iba man kan mga istorya nin pagbuhay Niya kan nagadán na sa mga evangelio, siring bagá kan aking daragita ni Jairo, kan bogtong na aking lalaki kan balo sa Naim, asín kan Saiyang amigong si Lazaro. An mga milagrong ini inaapod man na “resusitación” nin huli ta sindang mga binuhay hale sa kagadanan, pag-abot kan saindang panahon, nagadán man giraray. Alagad an Resurrección iyo an pagkaigwa nin bâgong nivél nin existencia, nin kapanoan nin buhay na daíng kasagkoran, asín an daí na pag-agi sa kagadanan sagkod pa man.

Sabi sa Katekismo (CCC 646): “An pagkabuhay-liwát ni Jesus naiiba sa esencia. Sa Saiyang nabuhay na hawak, nag-agi Siya hale sa estado nin kagadanan pasiring sa bagong buhay na lampas sa categoria kan panahon asín espacio. Sa pagkabuhay liwát ni Jesus an Saiyang hawak napanô kan kapangyarihan kan Espiritu Santo: nakikihiras Siya sa diósnon na buhay sa Saiyang kamurawayan.”

An Pagkabuhay-liwát ni Jesus iyo an prueba asín panugâ kan satuya man na pagkabuhay-liwát sa huring aldaw. Sa Saiyang pagkabuhay-liwát, binâgo Niya an ordén kan kinâban. Bakô na kagadanan an huring padumanan nin tawo, kundi buhay sa Kahadean nin Diós.

Dangan, sa paghilig Niya sa mga gadán, dinumán Niya an mga matanos asín banál na halóy nang naghahalat nin kaligtasan, asín binuksan an langit para sainda asín para man sa satuya.

Kayâ si San Pablo nagtukdô sa Colosas 1,18-20 na si Cristo “an payo kan Saiyang hawak na iyo an Simbahan; Siya an kapinònan, an enot na binuhay-liwát sa mga gadán. Huli ta binoót nin Diós na an bilog Niyang pagka-Diós mapasa-Akì. Binoót man Niya na sa paagi kan Saiyang Akì an gabós makipag-olían Saiya.”

Kun arog kainí kahalagá an Resurrección, ano man an hinahagad sato? Na kita magtubód tanganing maligtas. Sabi ni San Pablo sa Roma 10,9: “Kun pinapahayag mo sa saimong ngusò na si Jesus an Kagurangnan, asín minatubód ka sa saimong pusò na binuhay Siya liwát nin Diós sa mga gadán, makakaligtas ka.”

An siguradong tandâ kan pagtubód na nakakaligtas, iyó an satong pagsunód sa Saiyang kabòtan gurâno man kadakúl kan oláng o kakusóg kan tentación, siring na si Cristo nag-agi ngûna sa Pasión bàgo an kamuwawayan kan Resurrección. Sabi giraray ni San Pablo sa Roma 6,8: “Kun kita nagadán kaiba ni Cristo, kita nagtutubod na mabubuhay man kita kaiba Niya”.

Kayâ saróng importanteng parte kan liturgía sa Domingo de Resurrección iyo an Pagbâgo kan mga Panugâ sa Bonyag. Igwa ini nin duwáng kabtang: an pagsikwal ki Satanás, sa saiyang mga maraot na gibo, asín mga padayà; dangan an pagpahayag nin pagtubód sa Diós Amâ na oróg na namoot sato, sa Diós Akì na nagligtas sato, asín sa Diós Espiritu Santo na danay na nagpapabanal sato. Kun isabuhay ta an satong panugâ sa Bonyag na an gracia nakamit ta sa pagkagadán asín Pagkabuhay-liwát ni Jesus, kita makakaligtas asín makukua an kapanoan nin buhay sa Saiyang Kahadean.

…

GIYA SA PAGHIRÁS SA SADÍT NA KOMUNIDAD O PAMILYA • Sa pa’nong paagi mo naisasabuhay – o dai – an mga Panugâ sa Bonyag na satong binabàgo cada taon sa Domingo de Resurrección?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

An Pasión ni Jesu Cristo

 

Giya sa Prayer-Meeting nin mga Saradít na Komunidad nin Pagtubód (SAKOP) para sa Semana Santa (Abril 2-8, 2023). Basahon an Evangelio gikan sa Mateo 26,14–27,66 (Domingo de Ramos).

…

An halabang babasahon sa evangelio iyo an istorya kan Pasión kan satong Kagurangnán Jesu Cristo susog ki San Mateo. Iní nagsasabi na naglaóg na kita sa Semana Santa, an pinakabanál na mga aldaw sa satong Simbahan.

An Semana Santa ngonian na taón halos nakabalík na sa dating sitwasyon bàgo an pandemia kan COVID-19. Hinalè na an mga dating pinagbabawal, asín nakabalík na an mga pagtiripon asín mga prusisyon. Alagad namamatean pa man giraray kan banwaan an epekto kan pandemia lalò na sa ekonomiya asín sa mga nawàran nin buhay sa pamilya asín mga pag-iriba.

Sa panahón nin pagbangon asín mga panibàgong agyat sa buhay, an Semana Santa nagpapagirumdóm sato kun ano an pinakamahalagá: an pagkamoot nin Diós sa sato na pinahilíng oróg na sa pagdusay nin buhay ni Jesús para matubós kita sa kasâlan. Sabi sa Juan 3,16: “Huli ta námoot na gayo an Diós sa kinâban kayâ itinaó Niya an Saiyang bogtong na Aki, tanganing an siisay man na magtubód Saiya daí magadán kundî magkamít nin buhay na daíng kataposan”.

Si Cristo nakikisumarò sa satong mga kadiklomán. Sa paaging ini pinapamatè nin Diós an Saiyang pagkamoot sa sato gabós na nakakamatè nin kanya-kanyang mga kadiklomán. Halimbawà idtong mga nagmumundò sa pagkagadán nin mga mahal sa buhay, asín an kadakul na nagtitios nin huli sa korupsyón asín kapabayaán kan mga nasa kapangyarihan. Sa enot na bungkaras pa saná kan evangelio, yaon tulos an pagtraidór ni Judas, na sinundan kan violencia kan pagdakóp ki Jesús, an pagnegár Saiya ni Pedro, an kapaabáw-abawan nin mga pamayó kan Simbahan asín banwaan, an mga pasakit na inagihan Niya hanggang sa kagadanan sa cruz. An gabós na iní inakò ni Jesús para sato, pakisumarò Niya sa inaagihan nin lambang sarô sato.

Si Cristo hiníhirás sato an Saiyang kamurawayan.  An apód kainí sa Hebreo kabod, sa Griego doxa, na an boot sabihon: an kapangyarihan nin Diós na nagbabàgo sa buhay nin mga tawo asín lawóg nin kinâban. Iní an kamurawayan na pinahayag ni Jesús sa gabós na tawo kan simbagón Niya nin kaimbodán, katótoohan, asín pagkamoot an gabós na fuerza nin kasâlan asín kakurihan na pinamatè Saiya. Naghonà an mga kaiwal ni Jesús na matatapos ninda Siya sa paagi kan cruz. Idto palán an Saiyang Pasión asín pagkagadán mapasiring sa pagkabuhay-liwát asín kapangganahán sa kasâlan asín kagadanan. An kamurawayan na iní an Saiyang panugâ sa satong mga naglalakbay sa Saiyang dalan. Sabi nin San Pablo sa Roma 8,17: “Kun kita nagsakit kaiba Niya, kita man papamurawayon sa kaibahan Niya”.

Kayâ sa pagcelebrár ta kan Semana Santa, makisumarò kita ki Cristo tanganing makahirás sa Saiyang kamurawayan sa paagi nin mga minasunod:

1.     Magdolot kita Saiya nin pusong nagsosolsol asín nagmamàwot na magbâgo nin buhay. Magkumpisál kita kan satong mga kasâlan sa sacramento nin Reconciliación.

2.     Magtipon kita bilang pamilya asín magsabáy kita sa komunidad nin pagtubód sa mga gawè nin debosyon sa Semana Santa sa satong parokya.

3.     Magmangnó sa kapwang oróg na nangangaipo. An daí nagasto sa pag-ayuno, gibohon na pang-ayuda.

…

GIYA SA PAGHIRÁS SA SADÍT NA KOMUNIDAD O PAMILYA • Ihirás kun ano an mga ginigibo kan saindong pamilya pag Semana Santa tanganing mapabanal an mga aldaw na ini.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

An Pagbuhay ki Lazaro

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marso 26 – Abril 1, 2023. Basahon an Evangelio gikan sa Juan 11,1-45 (Ikalimáng Domingo kan Cuaresma).

…

An istorya sa evangelio iyo an pagbuhay ni Jesu Cristo kan Saiyang amigong nagadán na si Lazaro. Anó an ipinapahayag kan pangyayaring iní dapit ki Cristo, sa Saiyang misyon, asín sa pag-andam ta sa Semana Santa?

Iní kapahayagán nin kapangyarihan. Iní dakulang tandâ kan diósnon na kapangyarihan ni Jesús. Sa poón pa saná, sa Juan 11,4, sinabi na ni Jesús an kahulugán kan istorya: “Iníng helang na iní bakô para sa kagadanan, kundî para sa kamurawayan nin Diós, tanganing huli kainí mapamuraway an Akì kan Diós”.

Malinaw an mensahe sa mga nakasaksi kainí: igwang kapangyarihan si Jesús na magbuhay nin gadán. May profesía sa Ezekiel 37,13: “Maáaraman nindo na Ako an Kagurangnan pagbukás Ko kan saindong mga puntod, asín paghâwas ko sa saindong mga lulobngán, banwaan Ko”. Sa Juan 11,45, sinabi na dakúl sa mga Judío na “nakahiling kan gibo Niya an nagtubód Saiya”.

Alagad linawon ta na an ginibo ni Jesús ki Lazaro bakô pa an “resurrección” o an pagkabuhay-liwát nin mga gadán sa huríng panahón, kundî inaapod iníng “resusitación” o pagbuhay nin nagadán. Mahalagá an pagkakaibá na iní, nin huli ta an resusitación ki Lazaro pasabóng sa maabot na kamurawayan kan resurrección.

Iní kapahayagán man nin kaluyahan. Sa ibóng na lado, pinahilíng man ni Jesús sa istorya an Saiyang pakisumarò sa mga kaluyahan nin tawo, an Saiyang pagigin vulnerablé. Enot inakò Niya an mga saláng paghonà nin mga tawo, patín na an pagsudyâ kan Saiyang mga kaugós – an magtugang na Marta asín María. Pareho sinda nagsabi Saiya: “Kagurangnan, kun yaon Ka digdi, daí kutâ na nagadán an sakong tugang!” Asín mantang si Marta tulos na nagsabát Saiya, si María nagtenér ngûna sa laóg kan haróng, habô Siyang tìnohón, nagtatampò Saiya.

Dangan kan máhiling na ni Jesús sa María na naghihibî sa may Saiyang pamitisán, asín an mga Judíong nag-iribá na naghihiribî man, “naribaraw Siya sa Espiritu asín napurisaw”, asín napaluhà man. Maski aram ni Jesús an Saiyang kapangyarihan asín an sunód Niyang gigibohon, nahirô man giraray Siya kan kamondoan sa palibot Niya.

Asín an Saiyang pakisumarò nagdádara nin pagranga. Sa Mateo 5,4 sinabi Niya: “Paladan an mga nagmumondò, huli ta sinda rarangahon!” Boót sabihon: an Diós mismo an maranga sato sa panahón na maagi kita nin pagtangis asín kamondoan.

Iní kapahayagán nin dakulang pagkaherak nin Diós sa katawohan. Oróg sa gabós, an pinahilíng ni Jesús na kapangyarihan iyó an kapangyarihan nin pagkamoot. May particulár na Prefacio an Misa sa Ikalimáng Domingo kan Cuaresma pag an evangelio iyo an istorya ni Lazaro, na nagsusumada man kan mensahe kaini: “Huli ta tawong totoo, nagtangis siya sa katood niyang si Lazaro, asín Diós na daíng sagkod, siya binangon Niya sa lulobngán; naherak sa katawohan, kita dinará Niya sa bàgong buhay huli kan mga banál na misterio.”

An pagkabuhay ni Lazaro temporario saná. Pag-abót kan saiyang panahón, nagadán man giraray siya. Alagad an dakulang pagkaherak nin Diós oróg na pinahilíng sa pag-akò ni Cristo kan Misterio Pascual – an  Saiyang pagsakit, pagkagadán, asín pagkabuhay-liwát tanganing tubosón kita sa padusa nin kasâlan – na icecelebrár ta sa nagdadangadang na Semana Santa.

An kapanoan kainíng pagkaherak mamamatean sa huríng panahón, sa pagkabuhay-liwát nin mga gadán – kun nuarín dai na nin anoman na kapangyarihan an kagadanan sa katawohan, asín an mga maimbód asín banál mabubuhay sa Saiyang gracia sagkod pa man.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia nin kamondoan o kapurisawan. Sa pag-agi mo kainí, namatean mo an pakisumarò asin pagranga kan Kagurangnan?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Mag-Ogma, mga Aki nin Liwanag

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marso 19-25, 2023. Basahon an Evangelio gikan sa Juan 9,1-41 (Ikaapát na Domingo kan Cuaresma).

…

An Ikaapát na Domingo kan Cuaresma inaapod na Domingo de Laetare. An laetare tataramon na Latín na an kahulugan “mag-ogmá”. Hale iní sa Isaias 66,10: “Mag-ogmá, Jerusalem, asin magkaboronyóg, kamong nagmundô, ta kamo magrorokyaw”. Iní pagirumdóm na an penitencia kan Cuaresma minabunga nin gracia; an kadiklomán daí madanay kundî tatapuson kan liwanag kan Kagurangnán; asín an pagsakit sa Saiyang ngaran magdádará sato sa kaogmahan asín kamurawayan.  

An evangelio sa Domingong iní iyo an istorya kan pagbolóng ni Jesu Cristo kan lalaking namundag na butá. Minsan totoóng nangyari, iní sarô man na alegoría o istorya na panô nin mga simbolismo na nagpapahayag nin mga mas hararom pang katotoohan.

Halimbawà: an pagkabúta iyo an kadiklomán nin kasâlan, asín an pagbolóng iyo an liwanag nin kaligtasan. An lalaking butá iyo an mga nagtútubód, an mga makasâlan alagad naherakan. An mga Fariséos, bakô saná an mga daí nagtútubód kundî idtong mga nag-óoláng sa saindang kapwa na makaraní sa Kagurangnán.

Ano an kabôtan nin Diós segun sa istorya kan butáng nabolóng? Na boót itaó sato ni Cristo an gracia na kita magín mga akì nin liwanag asín bayaan an dating pagkabuhay sa diklom. Sabi ni San Pablo sa Efeso 5,8-9: “Kamo kaidto kadiklomán, alagad ngonian kamo liwanag sa Kagurangnán. Mabuhay kamo bilang mga akì nin liwanag, huli ta an mga ibinubunga kan liwanag mahíhilíng sa marhay asín matanos na pagkabuhay asín katotoohan.” Ano pa an mga tandâ na kita nabubuhay na bilang mga mga akì nin liwanag ki Cristo?

Enot, mahíhilíng ta an Diós. Maski pigtuyâ-tuyâ kan mga Fariséos asín pinatapok pa nganì sa luwás, daí siya nagtonóng sa pagpahayag nin pagtubód sa nagbolóng saiya, asín huli kainí luway-luway na mas namidbidan niya si Jesús – enot bilang saróng profeta, dangan bilang “halè sa Diós”, hanggang sa nagpahayag siya sa Juan 9,41, “Minátubód ako, Kagurangnán”.

Kayâ kun tataó kitang magpasalamat huli sa mga biyayà nin Diós sa satong buhay, siring sa butáng nabolóng, padagos na málinaw an satong pagkamidbid Saiya asín mákusóg an satong pagtubód. Asín an Saiyang presencia an magtátaóng kusóg sato tanganing manggana sa mga kadificilan asín agyat nin buhay.

Ikaduwá, makakáhilíng kita siring sa paghilíng nin Diós. May duwáng dakulang saláng paghonà an mga Fariséos sa istorya: na an pagkabutá kan lalaki tandâ na iní makasâlan, asín na an pagbolóng ni Jesús sa aldaw nin Sabbath tandâ na Siya parakasalà man. Kayâ sinda an butá sa dignidad kan lalaking binolóng asín sa mismong presencia nin Diós ki Cristo Jesús.

Pàno kita nahíhilíng nin Diós? Sa 1 Samuel 16,7, an Diós mismo an nagsabi ki profeta Samuel: “Daí ako naghíhilíng siring sa tawo, ta an tawo naghíhilíng kan minásabát sa mga matá, alagad an Kagurangnán, naghíhilíng sa pusò.” Kayâ pag naglálakáw kita sa liwanag ni Cristo, tinátaó sato an biyayá na máhilíng an kinâban asín an kapwa siring sa pagkáhilíng nin Diós.

Ikatoló, madádará ta an kapwa na máhilíng man an Diós. Sigurado an pagsaksi kan lalaking binolóng nagdará sa kadakul na magtubód man ki Cristo. Sa Juan 12, may istorya nin sarong grupo nin mga Griego na nagsabi ki Felipe asín Andres na boót nindang máhilíng si Jesús, asín dinará sinda kan duwáng disipulos Saiya. Siring sainda, ináapód man kitang darhón an liwanag ni Cristo sa kapwang nasa kadiklomán tanganing gabós kita makaligtás asín mabuhay bilang mga akì nin liwanag.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia nin kadiklomán sa buhay. Nakua mo na an liwanag kan Kagurangnán? Igwa ka nin bàgong paghilíng sa buhay nin huli kaini?

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

An Babae sa may Bubón

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marso 12-18, 2023. Basahon an Evangelio gikan sa Juan 4,5-42 (Ikatolóng Domingo kan Cuaresma).

…

An evangelio iyó an istorya ni Jesús asín kan saróng babaeng Samaritana na naabotan Niya sa may bubón sa banwa nin Sicar sa teritoryo nin Samaría. An istoryang iní pwedeng magín alegoría kun pâno an Kagurangnán naghihirò asín nagwawaras kan Saiyang gracia sa satong buhay. Iní saróng diósnon na encuentro asín diálogo na nagdádará nin pagbabâgo.

Encuentro. Sa pagsabatan pa saná ni Jesús asín kan babae, pinaliwanag kan evangelista na si San Juan an contexto nin mga halóy nang iriwal asín pagkabarangâ nin mga Judío asín Samaritano. Kaiba pa kainí an tradisyón sa saindang kultura na an babae daí pwede makipag-olay nin basta sa ibáng lalaki liban sa saiyang agóm asín kapamilya. Alagad an mga iní bakô kaolangan ki Jesús. Sa paghagad Niya nin tubig na maiinom halè sa bubón, Siya mismo an nagpoón kan saindang tagboan asín pag-oláy-olay.

Sa siring man na paagi nagpópoón an satong relasyon sa mahal na Diós – Siya an enot na námoot sato asín nag-aagda sato na akoon an tubig nin buhay na mápanô kan satong mga pagkapahà asin mátao sato nin buhay na daíng kasagkoran.

Diálogo. Sa saindang pag-oláy-olay, nagpamidbíd si Jesús bilang iyó na an Mesías na hinahalát pareho kan mga Judío asín Samaritano. Pinahilíng Niya man sa babae an katotoohan kan saiyang buhay: na siya odto nang nagsasakdo nin tubig sa bubón nin huli ta naglilikay siya sa matawo ta tibaad siya pagtsismisan o pasupugon, huli ta siya midbid na parakasalà, na may limá nang nagín kasaroan na lalaki, asín an presenteng kasaroan bakô niyang agóm.

Hanggang sa ngonián padagos na nagpapamidbid sato si Jesús – sa pag-adal nin biblía, sa pagpamìbì, asín sa kapwang nangangaipo. Asín mantang namimidbidan ta Siya asín an Saiyang misyon, mas nadidiskubre ta man an katotoohan kan satong sadiri asín katuyohán kan satong buhay digdi sa dagâ.

Pagbabâgo. Sa encuentro kan babae ki Jesús, namatean niya an pagkaherak nin Dios: na mamomôton alagad daí nangungunsinté sa kasâlan, makatotoohan alagad daí nagpapasupog. Kayâ an pagkaherak ni Jesús nagpabâgo asín nagpatalingkás kan saiyang buhay. Asín siya nagín pang literál na tagadará kan Marháy na Baretà sa saiyang mga kahimanwá. An dating kasusupgán nagín makusóg na saksí kan kapangyarihan ni Cristo. “Sinabi Niya sako an gabós kong naginibo”, sabi kan babae sa saiyang mga kahimanwá – asín sinda gabós nagturubód.

An panahón kan Cuaresma, panahón nin pagrumdóm kun gurâno kita namomòtan nin Diós. Sabi ni San Pablo sa Roma 5,8: “Ipinamidbid nin Diós an pagkámoót Niyang gayo sato: kaidto pang parakasalà kita, nagadán na si Cristo para sato”. Lugód an Saiyang pagkámoót asín pagkaherak magdará sato sa dalan nin katalíngkasan asin pagbabâgo.

Boót nin Diós na laogón kan Saiyang Espiritu an kariribokan asin kapurisawan kan satong pusò tanganing patoninongon sa pagkámoót. Boót Niyang pakarayón an satong buhay na rinaót nin kasâlan asin kaputikan. Sabi ni San Pablo sa Roma 5,5: “An paglaom daí nabibigô, huli ta ibinûbô an pagkámoót nin Dios sa satong mga pusò huli kan Espiritu Santong itinaó satuya”.

Kayâ daí na maghinugák o masupog: magsakdó kita sa bubón kan satong Simbahan – sa Banál na Kasuratán, mga sacramento, mga katukdoán, mga pagsaksí nin mga santos, asín mga gaweng kabanalan – kan tubig ni Cristo nin buhay na daíng kasagkoran.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia nin pagkapahà sa Kagurangnán, asín kun pâno mo nakua an Saiyang presencia o gracia sa saimong buhay.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Magdangog Kita ki Jesus

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Marso 5-11, 2023. Basahon an Evangelio gikan sa Mateo 17,1-9 (Ikaduwang Domingo kan Cuaresma).

…

An istorya sa evangelio iyo an Transfiguración. Ano an kahulugán kainí sa istorya kan satong kaligtasan asín lalò na sa panahón kan Cuaresma? An Transfiguración saróng tandâ asín patunay kan Diósnón na kamurawayan na yaon ki Jesu Cristo. An mga kabtang sa pangyayari kan Transfiguración pwedeng gibohon na mga tandâ kan satong paglakbay sa Cuaresma asín sa buhay Cristiano.

Magtukád pasiring sa kamurawayan. Enot, inagdá ni Jesus si Pedro, Santiago, asín Juan, na magtukád sa halangkaw na bulód pasiring sa lugár kan Transfiguración. Kita man inaagda Niya na makisumarò sa Saiyang kamurawayan.

An patukad na dalan tandà kan pag-ági ta man sa kapagalan, kadificilan, pagsakit, patí kasusupgán, sa ngaran ni Jesus. An mga disiplina espirituál sa tradisyon na Cristiano, na tinatàwan duon sa Cuaresma – pamìbì, ayuno asín abstinencia, paglimós o pagtabang sa kapwa – mga pagiromdóm asín pag-andám sato sa patukad na dalan pasiring sa kamurawayan nin buhay ki Cristo.

Siring na an Transfiguración ni Cristo pasabóng sa Saiyang maabot na Resurrección, an pagtukád sa bulód tandà man kan nagdadangadang Niyang dalan nin cruz. An dalan na iní kaipohan agihan nin lambang Cristiano. Sabi ni Jesus sa Mateo 16,24: “An siisay man na boót sumunód Sako kaipohan na sayumahan an sadiri, pàsanon an saiyang cruz, asín magsunód Sako.”

Magsaksí sa gracia nin Diós, asín magdangóg ki Cristo. Pag-abót ninda sa tuktok kan bulód, saká sinda nagín saksí sa oróg kamuraway na presencia nin Diós. An pagliwanag ni Jesus siring sa saldang pagpahayag na Siya nanggad an liwanag na maparà sa diklom nin kasâlan asín kagadanan. An pagpahilíng ni Moises asín Elias sa kaibahan Niya pagpahayag na Siya an kapanoan kan mga Kasuratán, kan mga Tugon asín mga Profetas. An boses mismo kan Diós Amâ, halè sa maliwanag na panganoron, nagpahayag asín nagtugon: “Iní an Akì kong namomòtan, an padangat Ko; magdangóg kamo Saiya”.

Dangogón ta si Cristo, bakô an satong sadiring tingog, bakô siring sa gibo ni Pedro na dai aram an saiyang mga sinasabi. Dangogón ta si Cristo sa pagtaó nin panahón asín espacio sa pamìbì asín pagbasa nin biblía asín iba pang babasahon espirituál. Dangogón ta Siya sa mga panahón na mabalaog an satong pagpamìbì, asín sa mga panahón na garo nasa desierto an satong espiritu. An pagdangóg Saiya iyó an pagsunód kan Saiyang kabòtan asín paggibong giya kainí sa satong buhay.

Maglugsót asin makisumarò sa misyon. Dai sinda naghalóy sa tuktok nin bulód, kundì tulos na naglugsót. Nakihuron si Jesus sa tolóng disipulos na dai ngùna ipag-osip sa kiisay man an saindang nasaksihán “sagkod na bangonon an Akì nin Tawo halè sa mga gadán”, boót sabihon sagkod sa Saiyang Resurrección. Sa tahaw kan Transfiguración asín Resurrección mangyayarì an Pasión: an Saiyang pagsakit asín pagkagadán. Iní an naghahalat sainda sa ibabâ kan bulód, na iyo man an kapanoan kan misyon ni Cristo sa kinâban. Sa paghampáng kan tolóng disipulos sa diklom kan Pasión dará ninda an paglaom kan Transfiguración.

Maglugsót kita halè sa satong mga gaweng espirituál asín makisumarò sa Saiyang misyon. Sabi ni San Pablo sa 2 Timoteo 1,8: “Makidamay ka sa pagtios para sa evangelio, sa kusóg na halè sa Diós”. Ano man na pagbalô asín kadificilan, problema asín kagabatan, basta dapit sa karahayan asín katanosan, na hinahampang ta ngonian – iyan an satong pakisumarò sa misyon ni Cristo.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia nin pakisumarò sa misyon ni Cristo – sa ano man na katongdán, responsibilidád, problema, o kadificilan na inaagihan mo ngonian.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

 

Haré Kami Pagdarahá sa Sugót

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Pebrero 26-Marso 4, 2023. Basahon an Evangelio gikan sa Mateo 4,1-11 (Enot na Domingo nin Cuaresma).

…
Sa evangelio si Jesús nagpasiring sa disierto sa pag-ayuno asín pagpamìbì sa laóg nin 40 aldaw bàgo Siya magpoón kan Saiyang ministerio publico. Sa siring man na espiritu asín mga gaweng espiritwal kita minálaog sa panahón nin Cuaresma na may 40 aldaw (pag dinagdag an anóm na Domingo, 46 na aldaw poón Miercoles de Ceniza hanggang Miercoles Santo).

Mantang si Jesús gutóm sa pag-ayuno, dinolok Siya kan Diablo tanganing sugotán, alagad daí iní nanggana. An istoryang iní kinukumpará sa istorya sa libro kan Genesís (3,1-7) kan pagsugót ki Adán asín Eva sa paraiso, alagad dumán nanggana an parasúgot.

Si San Pablo ipinaliwanag iní sa Roma 5,18-19: “Kayâ huli sa kasâlan nin saróng tawo, pinadusahan an gabós na tawo; siring man huli sa katanosan nin saróng tawo, itinaó sa gabós an buhay asín an gabós nagín matanos. Huli sa daí pagkuyog nin saróng tawo, dakúl nagín mga parakasalà; siring man huli sa pagkuyog nin saróng tawo, dakúl an nagín mga matanos.”

Si Adán an naglaladawan kan lumang pagkatawo na oripon nin kasâlan. Si Jesús an ladawan kan bàgong pagkatawo na panô nin gracia. Sa paglaóg ta sa Cuaresma, pinapagiromdóm kita na mantang kita nabubuhay sa kinàban na iní, igwa kita nin pagpipilian:  akoon an bàgong buhay ki Jesu Cristo o magdanay sa pagkakasalà. Malinaw man kun arín an tamà, marháy, asín dapat na pilion; alagad natà daw ta sa dakúl na beses, pinipilì ta an bakô dapat?

Nin huli ta iyó iní an natura kan tentación o sugót: panlalansé. Sa enotan kan panlalansé, may nakakadagkáng panugâ, alagad sa likodán may nakatagong patibóng.

Ano man an maraot kun gibohon ni Jesús na tinapay an mga gapô? O kun mahiling Siya kan mga tawo na nagbababà halè sa atóp kan Templo na napapalibotan nin mga angeles? O kun magín makapangyarihan Siyang pamayó nin gabós na mga nación?

Boót raotón kan parasúgot an misterio kan Pagkanitawo o Encarnación ni Jesús, nin huli ta kun gagamiton Niya an diósnón na kapangyarihan para matapos na an Saiyang pagkagútom, daí na masasabi na inagihan Niya an gabós na aspeto nin pagkatawo pwera sa kasâlan. 

Boót raotón kan parasúgot an plano nin Diós na Misterio Pascual – an pagsakit, pagkagadán, asin pagkabuhay-liwát ni Cristo na mátubos sato sa kasâlan asin máligtas sato sa kagadanan – sa paagi nin hiláw asin mababaw na pagtubód nin mga tawo sa makangangalas na palabás nin saróng profetang linigtas nin mga angeles. 

Asín boót raotón an pagsunód ni Cristo sa kabòtan kan Amâ, patin an Saiyang pagigin dalan, katotoohan, asin buhay para sa katawohan, kun masamba saná Siya sa Diablo para lamang sa kayamanan asin kapangyarihan nin kinàban. 

Sa madalíng sabi, boót kan parasúgot na daí si Jesús magpakatotoo sa Saiyang sadiri, lingawán an Saiyang misyon, asín rumayô sa Amâ. Iyó man bagá iní an gibong pagsugót sa mga tawo kan demonio.  Tenetentarán kitang paorogón sa gabós an sadiri, daí kamòtan nin tamà an kapwa, asín maggibo nin sadiring versión nin diós – su diós na minaayon sa satong kabòtan, bakô na kita an minasunod sa Saiya.

An paglakbay ta sa panahón nin Cuaresma ladawan kan paglakbay ta sa buhay pasiring sa Kahadean nin Diós. Hagadon ta Saiya, susog man saná sa pamìbì na tinukdô asin tinugon sato ni Jesu Cristo, na irayô kita sa sugót asín agawon sa maraot tanganing daí mawarà sa tamang dalan, an dalan kan cruz.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia nin pinakahurí o pinakadakulang tentación na uminabót sa saimong buhay, asín kun pàno mo iní inagihan o nalampasán.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song

Kamòtan an Kaiwal

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Pebrero 19-25, 2023. Basahon an Evangelio gikan sa Mateo 5,38-48 (Ikapitóng Domingo sa Ordinariong Panahón)

…

Sa evangelio nagtutukdò si Jesus kan sarô sa gayód pinakadificil Niyang tugon: kamòtan an kaiwal.

1. Siisay an satong kaiwal?

An siisay man na boót mangulóg o magraót sato iyó an satong kaiwal. Asin kadaklán, kun bakô man gabos sato, may mga midbid na mga tawong arog kainí sa satong buhay.

Sa kasaysayan kan Israel, may pinagmimidbid sindang mga kaiwal, siring kan mga kataraning na nacion na may bakô marhay na relasyón  sainda. Oróg sa mga iní an mga imperio na suminakop asin nagpasakit nin makuri sainda: an Asiria, Babilonia, mga Griego, asin, kan panahón ni Jesus, an Imperio Romano.

Alagad daíng ano man na sinabi sa Lumang Tipan na “kaongisán an kaiwal”. Kan sinabi ni Jesus sa Mateo 5,43 na “Nadangog nindo na isinabi: kamòtan mo an saimong kapwa asin kaongisán an kaiwal” – Saiyang tinatamà an saláng katukdoán kan mga escribas asin Fariseos na laen sa kabòtan nin Diós.

2.  Natà ta kaipohan kamòtan an kaiwal?

Nin huli ta iní an kabòtan nin Diós para sato: na kita makabalík sa pagigin kabaíng Niya, an Dios nin pagkamoot. Kayâ sinabi ni Jesus sa Mateo 5,48: “Magpakamarahayon kamo arog kan saindong langitnón na Ama na marahayon.”

Kamòtan ta an satong kaiwal siring na namòtan kita nin Diós. Sabi ni San Pablo sa Roma 5,8: “Ipinahilíng nin Diós an Saiyang dakulang pagkamoot sato kan si Jesus nagadán para sato kan kita mga parakasalà pa.”

3. Pàno kita dapat mamoot sa kaiwal?

Ipamìbì an mga nagpapasakit satuya. Minsan may kulóg pa sa boót, o daí pa nakakabalík an tiwalà sa tawong nakagibo sato nin maraot, pwede ta na siyang ipamìbì. Ipasa-Diós ta siya, boót sabihon hagadon ta sa Diós an pinakamarahay na balaog tanganing mapakarhay man an saindang buhay. An pagpamìbì sainda iyó an pagbukas kan satong pusò sa Espiritu nin Diós tanganing bulongón kita.

Sabi sa 1 Pedro 3,9: “Daí kamo magbalós nin maraot sa naggigibo saindo nin maraot, o mag-olog-olog sa nag-oolog-olog saindo; kundi bendicionán nindo saná, huli ta inapód kamo para sa bagay na iní tanganing bendicionán kamo nin Diós.”

Patawadon an nagkakasalà satuya. Iní susog mismo sa pamìbi na tinukdo sato ni Cristo, siring na kita pinapatawad kan Diós Ama. An pagpatawad sa kapwang nagkasalà iyó an paghilíing saiya susog sa pagkahiling sato gabos nin Diós.

An kabaliktadán kainí iyó an pagtanóm nin dagit asin pagbalós. Kayâ maski may elemento nin hustisya an tugon ni Moises na “matá sa matá, ngipon sa ngipon” – boot sabihon pagbalós nin tamà saná, bakóng sobra – kun boót niatong makabalÍk sa pagigin kabaíng nin Diós, likayán ta an tentacion nin pagbalós.

Tabangan an kaiwal na nangangaipo. An nakasurat sa Lumang Tipan dapit sa tamang pagtrato sa kaiwal makukua sa Proverbio 25,21-22. Iyó man iní an inotro ni San Pablo sa Roma 12,20: “Kun an saimong kaiwal nagugutom, pakakaná; kun siya napapahà, painomá. Sa siring na paagi, binubugtakan mong baga an saiyang payó (mapapasopog siya), asin babalosán ka nin Kagurangnan.”

An pagtabang sa kaiwal iyó an pagigin instrumento nin pagkaherak nin Diós asin pagdará sa kapwa kan presencia nin Diós sa panahón na labi niya kaipohan. Pag naggigibo kita nin siring nababàgo man kita pasiring sa katanosan asin pagkamarahayon nin Diós.

…

GIYA SA PAGHIRÁS SA SADÍT NA KOMUNIDAD O PAMILYA • Maghirás nin experiencia nin pagkamoot sa kaiwal o pagpatawad sa tawong nakagibo saimo nin salà.

PASUNÓD-SUNÓD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Prayers of the Faithful • Closing Prayer (Spontaneous and Our Father) • Closing Song