An Enot sa Gabos na Tugon

  

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Octobre 31-Noviembre 6, 2021. Basahon an Ebanghelyo gikan sa Marcos 12,28-34 (Ika-31 Domingo sa Ordinariong Panahon – B ).

…

Sa ebanghelyo, tinutukdo ni Jesus an “enot sa gabos na tugon” sa Kasuratan, bilang simbag sa honestong hapot nin sarong escriba. An paagi kan pagsimbag ni Jesus marhay man na tawan nin atensyon nin huli ta dai Siya nagpakahon sa categoria kan hapot Saiya.

Pagkamoot. Igwa daang 613 na tugon na nakasurat sa enot na limang libro sa Biblia (Genesis, Exodo, Levitico, Deuteronomio, asin mga BIlang) na inaapod kan mga Judio na Torah o mga Libro nin Tugon. Alagad imbes na magpili nin saro sa mga ini, pinili ni Jesus an sumada kan gabos na mga ini: pagkamoot.

Sabi ni San Pablo sa Roma 13,10: “An pagkamoot iyo an kaotoban kan Katugonan”. Asin bako sanang basang, o kabanga, o paminsan-minsan, na pagkamoot an maninigo para sa Dios kundi pagkamoot nin bilog na sadiri. Kaya paghorop-horopan ta: Namomotan ko na daw an Dios sa bilog kong pagkatawo? Susog sa 1 Juan 5,3, ini an tanda na namomotan ta Siya: “An namomoot sa Dios nagkukuyog kan Saiyang mga tugon”.

Pamibi. An hapot ki Jesus manunungod sa Tugon, alagad imbes na magpili nin sarong tugon o batas, an Saiyang simbag sarong pamibi, an Shema Yisrael. Ining pamibi aram nin lambang Judío asin pinapangadie ngani ninda nin nagkapirang beses sa sarong aldaw. Hale ini sa Deuteronomio 6,4-5: “Dangoga Israel, an Kagurangnan tang Dios iyo sana an Kagurangnan. Kamotan mo an Kagurangnan mong Dios sa bilog mong puso, bilog mong kalag, asin bilog mong kusog.”

Kun ano an paagi nin satong pagpamibi iyo man an satong pagtubod. Kun ano an satong pagtubod minaluwas sa satong tataramon asin gibo. Kaya paghorop-horopan ta: Ano an laog kan satong pamibi? Kadaklan daw kaini mga kahagadan sa satong mga pangangaipong materyal o kinabanon, o nag-oomaw, nagpapasalamat, asin naghahagad kan mga biyaya kan Espiritu siring sa kadunongan asin kusog ki boot?

Kan hinagad kan mga disipulos na tukdoan sinda ni Jesus kun pano mamibi, sa Mateo 6,9-13, tinugon Niya sinda na bago maghagad sa Ama kan kakanon (asin mga pangangaipo) sa aroaldaw, pabanalon nguna an Saiyang ngaran, hagadon an pagdatong kan Saiyang Kahadean, asin na kuyogon an boot Niya digdi sa daga nin siring sa langit.

Pakikapwa. Saro man sanang tugon an hinahagad ki Jesus, alagad duwa an tinao Niya. “An ikaduwa iyo ini: Kamotan mo an kapwa siring sa pagkamoot mo sa saimong sadiri”. Hale ini sa Levitico 19,18. Tinuyo ini ni Jesus tanganing ipasabot na dai puede isiblag an pagkamoot sa Dios asin sa kapwa. Asin na an sukol kaining pagkamoot bako kun gurano man kita namomotan nin kapwa o kun may pakinabang siya sato, kundi susog sa satong pagkamoot sa sadiri.

Sa 1 Juan 4,20 pinapagirumdom kita: “Putikon an siisay man na nagsasabi, ‘Namomotan ko an Dios’, alagad naoongis sa tugang niya. Kun dai niya namomotan an saiyang tugang na nahihiling niya, pano noya mamotan an Dios na dai niya nahihiling?”

Kaya paghorop-horopan ta:  Namomotan ta daw an satong kapwa susog sa tugon kan Kagurangnan? Sa Saiyang tataramon asin gibo, tinawan kita ni Jesu Cristo nin pangarogan nin tunay na pagkamoot. Sa Juan 15,13 sinabi Niya: “Mayong pagkamoot na mas dakula pa ki sa pagkamoot nin sarong tawo na minadusay nin saiyang buhay para sa mga katood niya.”

…

GIYA SA PAGHIRAS SA SADIT NA KOMUNIDAD O PAMILYA • Maghiras kun pano nagigibo an pagkamoot sa Dios sa bilog na buhay, asin pagkamoot sa kapwa siring kan pagkamoot sa sadiri.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Naherakan Tanganing Magmisyon

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Octobre 24-30, 2021. Basahon an Ebanghelyo gikan sa Marcos 10,46-52 (Ika-30 Domingo sa Ordinariong Panahon – B ).

…                                                                                                     

Sa Ebanghelyo ni San Marcos, an istorya kan pagbulong ki Bartimeo, sarong lalaking buta sa Jerico, iyo an huring milagro ni Jesus sa dalan sa Saiyang paglakbay, kaiba an Saiyang mga disipulos, pasiring sa Jerusalem.

Minsan ining istorya totoong pangyayari, an paagi nin pakaistorya panô nin mga simbolo nin pagigin disipulo ni Cristo. Kasunod ini kan mga istorya kan lalaking mayaman na naghapot kun pano makakamtan an buhay na daing kasagkoran (Marcos 10,17-31) asin an pabor na pighagad ni Santiago asin Juan na sindang duwa matukaw sa kataed Niya sa kamurawayan, an saro sa too asin an saro sa wala (Marcos 10,35-45).

Sa naenot na duwang istorya, pigtama ni Jesus an mga saláng pakasabot nin mga tawo, asin nin Saiyang mga disipulos mismo, manunungod sa Kahadean asin pagigin disipulo Niya. Sa istorya kan pagbulong ki Bartimeo, tinatawan kita nin ladawan nin tamang pagsunod ki Cristo: naherakan tanganing magmisyon.

An disipulong naherakan linaladawan ni Bartimeo. Enot, pigmidbid Niya si Jesus bilang saiyang tagapagligtas. Sa pagkurahaw niya nin “Jesus, aki ni David, kaheraki ako!”, pigmidbid niya si Jesus bilang Mesias, an pinanugang tagapagligtas kan Israel. Pwera sa mga demonyo, si Bartimeo an suminunod ki San Pedro sa pagmidbid kaini ki Jesus sa publiko.

Ikaduwa, kan inapod siya ni Cristo, tulos siyang naglukso sa pagrani, asin binayaan an alikboy – tanda kan pagtalikod sa lumang pagkatawo asin pag-ako kan Ebanghelyo. Ikatolo, kan narahay siya, tulos nagsunod ki Cristo sa dalan.

An disipulong nagmimisyon linaladawan ni Jesu Cristo mismo. Sa Saiyang mga tataramon asin gibo tinatawan Niya kita nin pangarogan kun pano darhon an Marhay na Bareta sa gabos na tawo.

Enot, dinangog Niya an kurahaw ni Bartimeo. Mantang an mga nasa palibot boot pasilensyohon ining buta, si Cristo tinawan siya nin halaga. Ini man an mensahe ni Papa Francisco sa pagpoon kan Sinodo nin Sinodalidad: na kita magin Simbahan na nagdadangog, sa agrangay nin katawohan orog na nin mga dukha asin mga nasa laylayan kan sociedad.

Ikaduwa, hinimo Niya na an buta makahiling giraray. Bako man kita gabos may kakayahan magbulong sa mga buta, pero an lambang Cristiano may misyon na darhon an katotoohan ni Cristo asin kan Ebanghelyo lalo na sa mga nabubuta nin kaputikan asin panlalanse, asin pag-ambisyon sa kayamanan asin kapangyarihan.

Ikatolo, uminiba Saiya si Bartimeo sa dalan. Madadara ta an kapwa pasiring ki Cristo kun kita man nahihiling na naglalakaw sa saiyang dalan – boot sabihon kun an satong mga gibo asin buhay nagsasaksi ki Cristo.

Sa Mateo 28,19-20 tinao ni Jesus an tugon sa pagmisyon: “Paduman kamo sa gabos na tawo, saen man na lugar; gibohon nindo sindang mga disipulo. Bonyagan nindo sinda sa ngaran kan Ama, kan Aki, asin kan Espiritu Santo. Tukdoan ninda sindadng magkuyog kan gabos na pinagboot Ko saindo.” Kaiba kaini an Saiyang panuga na Siya mismo danay na kaibahan ta sa dalan: “Girumdumon nindo ini: danay Akong kaiba nindo sagkod sa katapusan nin panahon.”

…

GIYA SA PAGHIRAS SA SADIT NA KOMUNIDAD O PAMILYA • Maghiras nin experiencia kun pano nagin marahayon saimo an Kagurangnan, o kun pano ika nakahiras sa kapwa kan pagkamarahayon nin Dios.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Bakong Arog Kaiyan an Dapat Saindo

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Octobre 17-23, 2021. Basahon an Ebanghelyo gikan sa Marcos 10,35-45 (Ika-29 Domingo sa Ordinariong Panahon – B )

…                                                                                                                    

Sa ebanghelyo nagdulok an magtugang na Santiago asin Juan tanganing hagadon ki Jesus na “pag-abot Niya sa kamurawayan”, sindang duwa magtukaw sa kataed Niya, an saro sa too, asin saro sa wala. Boot sabihon na sindang duwa an magin pinakaorog sa gabos na mga disipulos. Kan maaraman ini kan iba pang disipulos, nagkadaragit sinda sa magtugang.

An Gawe nin Kinaban. An pangyayaring ini ginibo ni Jesus na patugmadan sa pagtukdo sainda kan kun ano an mahalaga sa Kahadean, na iba sa gawe nin kinaban. Pinarumdom Niya sinda kun pa’no an mga pamayo kan mga pagano naghahade-hade asin dinadaog-daog an mga nasasakupan ninda. Ini nin huli ta dai ninda midbid an Dios asin dai aram an Saiyang Tugon. An gawe nin kinaban iyo na an kadakulaan nasa kapangyarihan.

Maski sa ngonian, napapanahon an pagirumdom na ini. Nin huli ta an mga pamayo kan satong banwaan na nagsasabing sinda nagtutubod sa Dios, kun dai ninda utobon an Saiyang mga Tugon, nagigin sindang hade-hade asin kagdaog kan saindang mga nasasakopan, asin naaabuso an kapangyarihan.

Kaya sa panahon nin eleksyon, marhay na gibohon na panukol asin panimbang an mga Tugon nin Dios kun siisay an maninigong botohan. Siisay daw sa mga kandidato an mapasar maski sa tolong mga Tugon na ini? Dai ka maggadan, o magsuporta sa polisiya nin panggagadan. Dai ka maghabon, o makinabang sa hinabonan lalo na sa kaban nin banwaan. Dai ka magsaksing-putik laban sa kapwa, asin magpauran nin fake news tanganing manlanse nin mga botante.

An Gawe kan Kahadean. Kaya sa Marcos 10,43-44, si Jesus nagtukdo sa Saiyang mga disipulos: “Alagad bakong arog kaiyan an dapat mangyari saindo. An siisay man saindo na boot magin dakula, dapat magin surugoon nindo; an siisay man saindo na boot magin enot, dapat magin oripon kan gabos.” An gawe kan Kahadean iyo na an kadakulaan nasa paglingkod.

An tunay na paglingkod mapakumbaba. An pagpakumbaba bako pagmenos kan sadiring kakayahan – kaluyahan iyan nin boot. An pagpakumbaba bako nanggad pag-silencio o dai pagsurog kun may inaapi o napapabayaan – pagigin cobarde iyan. Kundi an pagpakumbaba iyo an pag-enot kan karahayan kan kapwa kisa sadiri. An pagpakumbaba pagpapakatotoo sa sadiri nin huli ta kita linalang nin Dios sa pagkamoot, asin an totoong namomoot inienot an namomotan kisa sadiri.

An tunay na paglingkod nagdudusay kan sadiri – siring ki Jesu Cristo na pinahiling an sadiri bilang pangarogan kan Saiyang mga disipulos sa gabos na panahon. Sa Marcos 10,45, sinabi Niya: “Nin huli ta an Aki nin Tawo dai nagdigdi tanganing paglingkodan kundi tanganing maglingkod asin magdusay kan buhay Niya tanganing matubos an dakul na tawo.”

Sa huri, an satong mga desisyon sa buhay, sa pulitika man o sa iba pang aspeto, minapahiling kun arin na gawe an satong pinapaorog – an kinaban o an Kahadean. Kaya bago kita magpili kun siisay sa mga kandidatong pulitiko an tunay na mga pamayong-lingkod, pag-isipan ta nguna kun kita mismo boot man na magtalubo sa pagigin pamayong-lingkod.

…

GIYA SA PAGHIRAS SA SADIT NA KOMUNIDAD O PAMILYA • Maghiras nin ehemplo nin mga tawong nagin marhay na pamayong-lingkod, o personal na experiencia nin paggibo nin gawe nin sarong pamayong-lingkod.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Tunay na Kayamanan

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Octobre 10-16, 2021. Basahon an Evangelio gikan sa Marcos 10,17-30 (Ika-28 Domingo sa Ordinariong Panahon - B).

…

An istorya sa ebanghelyo manungod sa mayaman na lalaki na nagdulok ki Jesus asin naghapot kun ano an dapat niyang gibohon tanganing makamtan an buhay na daing kasagkoran.

Tama an saiyang paghapot. Nasa tama siyang direksyon pasiring sa Kahadean. An saiyang kamawotan siring sa sinabi sa Kadunungan 7,7: “Ako namibi asin pakasabot itinao sakuya. Ako nakimaherak asin an Espiritu nin kadunongan duminatong sako”.

An kadunungan na ini nagsasabi na linalang kita nin Dios bako sana para mabuhay sa presenteng kamugtakan niato. Kundi na an mga karahayan asin kakayahan na satong kinakaogmahan, darhon kita sa pagmidbid sa Kagtao kan mga ini asin pagmawot kun ano an Saiyang kabotan. Sabi ni San Juan Maria Vianney: “An natatanaw kan mata kan kinaban hanggang sa buhay sanang ini. Alagad an mata nin Cristiano natatanaw hanggang sa kairaroman kan buhay na daing kasagkoran.”

An simbag iyo an pagsunod sa Tugon. Tinutukdo ni Cristo saiya – asin sa satuya man ngonian – na an pagsunod sa kabotan nin Dios an enot asin fundamental na kaipuhan para sa buhay na daing kasagkoran. Tinao nin Dios an Tugon para mahusay an satong buhay asin maglakaw kita sa tamang dalan.

An Sampulong Tugon hale sa Exodo 20,1-17: “Dai kamo nin ibang dios na sasambahon kundi Ako sana. Dai nindo pagbasang-basangon an ngaran nin Dios. Girumdoma asin pakabanala an aldaw nin Kagurangnan. Galangan an saindong ama asin ina. Dai kamo maggadan. Dai kamo magdurog sa bako nindong agom. Dai kamo maghabon. Dai kamo magsaksing-putik laban sa kapwa. Dai kamo maara sa agom nin iba. Dai kamo maara sa rogaring nin iba.”

Dangan may saro pang kaipuhan. Kan nagsimbag an lalaki na inootob niya an mga Tugon poon kan siya aki pa, namotan siya ni Jesus dangan sinabihan na saro na sana an kulang: ipabakal an gabos na pagsadiri, itao an kabaklan sa mga dukha, dangan sumunod Saiya. Ining huring pighagad ni Cristo ikinamundo kan lalaki nin huli ta dai niya kayang talikdan an saiyang mga kayamanan.

Linawon ta na bako literal na kaipuhan tulos pag-uli nindo sa harong na pasaon an saindong alkansya, o i-withdraw an saindong savings sa bangko, o ipabakal an saindong mga propriedades tanganing ipanao sa mga dukha. Kundi na hinahagad nin Dios na Siya an satong paorogon sa gabos. Asin handa kitang talikdan an anuman na yaman o kaogmahan digdi sa daga kun kaipuhan para sa Kahadean asin Ebanghelyo.

An mga pagraot sa kapalibotan asin korupsyon sa sociedad, sa negosyo asin gobyerno, dulot mismo kaining pagpaorog sa kinabanon na kayamanan ki sa kabotan nin Dios. Sabi ni Jesus sa Mateo 6,19-20: “Dai kamo magtipon nin kayamanan para saindo digdi sa daga, saen igwa nin bokbok asin takla na nagraraot, saka igwa nin mga parahabon. Kundi, magtipon kamo nin kayamanan sa langit, saen daing bokbok, takla, o parahabon. Huli ta kun haen an saindong kayamanan, yaon man an saindong puso.”

Lugod an satong puso dai magpadagka sa kinabanon na yaman, kundi magdanay sa Kagurangnan asin sa paggibo kan Saiyang kabotan, tanganing makamtan niato an bunga kan satong pagsakripisyo: na “an Dios sa langit an satong magigin kayamanan” (Marcos 10,21).

…

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia nin pagtalikod sa kinabanon na kaogmahan sa pagsunod sa kabotan nin Dios para sato.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

An Pinagsaro nin Dios

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Octobre 3-9, 2021. Basahon an Evangelio gikan sa Marcos 10,2-12 (Ika-27 Domingo sa Ordinariong Panahon - B).

…

May mga naghahapot kun ano daa an posisyon kan Simbahan sa giraray na pigbubusol na bill sa Congreso para sa absolute divorce. An posisyon kan Simbahan iyo an pagigin maimbod sa kabotan ni Jesu Cristong saiyang Kagurangnan. Sa evangelio malinaw an Saiyang kabotan: “Huli sa katagasan nin saindong puso, nagtugot si Moises, alagad sa kapinonan bakong siring kaiyan” (Marcos 10, 5-6). Dangan, “an pinagsaro nin Dios, dai pagsuhayon nin tawo” (Marcos 10,9).

Ano pa an katukdoan kan Simbahan manunungod sa pag-inagoman nin lalaki asin babae? Susog sa Katekismo (CCC 1601), an katuyuhan kan pag-agom iyo an karahayan kan mag-agom asin an pagpangaki dangan pagpadakula nin mga aki.

An Pagkaminootan nin Mag-Agom. Ini an enot na misyon nin mag-agom o an unitive na aspeto kan sacramento nin Matrimonio. Pinagirumdom ni Cristo sa evangelio an kabotan kan Dios na Kaglalang manunungod sa pag-agom. Susog sa Genesis 2,24: “binabayaan kan lalaki an saiyang ama asin ina, asin minasaro sa saiyang agom na babae asin sindang duwa nagigin sarong hawak.”

An pagkaminootan nin mag-agom hale mismo sa Dios na Pagkamoot. Ini isinasabuhay ninda, minsan dificil nin huli ta an tawo bako perpekto asin dakul an tentacion sa buhay may agom. Kaya nanggad kaipuhan na an mag-agom parehong tatao magpatawad asin magbago, magsabot asin magmaboot. Si San Pablo nagtukdo sa mga mag-aragom sa Efeso 5,21: “magkinuyog-kuyogan kamo bilang paggalang ki Cristo”.

An Pagpadakula nin mga Aki. An pagigin magurang an ikaduwang misyon nin mag-agom o an procreative na aspeto kan Matrimonio. An gabos na mga magurang may katongdan na itao an mga pangangaipo kan saindang mga aki asin padakulaon sinda nin tama. An mga Cristianong magurang, may saro pang particular na misyon: an ipamidbid an Dios sa saindang mga aki.

Magigibo ini kan mga magurang sa paagi kan pagtukdo sa saindang mga aki kan mga pamibi asin debosyon kan satong pagtubod, sa pagdara sainda sa Simbahan asin sa mga sacramento, sa pag-adal nin Biblia asin mga katukdoan kan Simbahan, asin sa pagtao nin marhay na padara sa buhay Cristiano.

Boot sabihon dapat ginigibo na an mga ini kan mga magurang. Ta kun dai, anong klaseng pagtubod an ipapasa ninda sa saindang mga aki? Si San Pablo may pagirumdom sa Efeso 6,4: “Mga magurang, dai nindo pagpadagiton an saindong mga aki, kundi padakulaon nindo sa Cristianong disiplina asin katukdoan.”

An Pagsaksi sa Pagkamoot nin Dios. Saro pang misyon nin mga mag-agom iyo na sinda magin “saksi sa maimbod na pagkamoot nin Dios” (CCC 1648). An pag-agom tanda kan pagkanisaroan ni Cristo asin kan Simbahan, kaya si San Pablo nagtukdo sa Efeso 5,25: “Mga lalaki, kamotan nindo an saindong agom siring kan pagkamoot ni Cristo sa Simbahan”.

Pag sinasabuhay nin mga mag-agom an saindang sinumpaan sa kasal – na “magin sarong puso asin sarong kalag, sa karahayan asin kasakitan, sa kayamanan asin kadukhaan, sa kahelangan asin sa kaginhawahan, sagkod na sinda magadan” – minakusog man an pagtubod kan komunidad sa palibot ninda, bako sana sa institusyon nin kasal asin pamilya, kundi sa mismong maimbod na pagkamoot nin Dios.

…

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia o observacion kun pano naisasabuhay nin mga mag-agom an “pagkinuyog-kuyogan ninda bilang paggalang ki Cristo” (Efeso 5,21)?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

 

Kun Magin Dahilan nin Pagkasala

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Septiembre 26 – Octobre 2, 2021. Basahon an Evangelio gikan sa Marcos 9,38-43.45.47-48 (Ika-26 na Domingo sa Ordinariong Panahon – B).

…                                                                                                                                   

Kaniguan an mga tataramon ni Jesu Cristo sa evangelio: kun an saimong kamot magin dahilan nin pagkasalà, putolá! Kun an saimong bitis, putolá! Kun an saimong mata, hulwatá! An tawong magin dahilan nin pagkasalà sa saro kaining mga saradit na nagtutubod, gakudán nin gapóng-gilingan sa liog dangan itapok sa lawód!

Linawon ta na bako ini literal na kasuguan ni Jesus. Sa literatura, an apod kaini hyperbolé o pagmamalabis. Ini an lohikal na padumanan kan Saiyang pangapodan sa Marcos 1,15: “Uya na an Kahadean nin Dios! Magbaklê kamo asin magtubod sa Marhay na Bareta!” 

Boot nin Dios na kita maligtas, magkaigwa nin buhay, asin makalaog sa Saiyang Kahadean. Alagad tanganing maakò ta ini, kaipuhan man an satong pagtalikod sa kasàlan. Pinapatanidan kita ni Jesus kan puedeng magin dahilan kan satong pagkasalà asin magdara sato sa infierno: an labi-labing pagpaorog sa sadiri.

An satong buhay, marhay na salud, mga kakayahan, patin mga kinabanon na karahayan, gabos tinatao sato nin Dios. Alagad kun dai ta gamiton an mga ini sa tama asin kita magin makasadiri,  an mga ini magigin dahilan kan satong pagkasalà asin kaulangan sa  pagkamit kan buhay na daing kasagkoran.

An tawong makasadiri asin labí an pagpaorog sa sadiri, nagigin menos an paghiling sa kapwa. Pwedeng tàwan niya nin pagpahalaga an sadiring pamilya, barkada, o mga kaugos, bilang extension kan saiyang sadiri. Alagad dai siyang pakiarám o sinisikwal pa nganì an mga nasa luwás kan saiyang circulo.

Sa evangelio, kan binaretà ki Jesus na sinawáy kan Saiyang mga disipulos an sarong lalaki na bako ninda kaibahan alagad nagpapaluwas nin mga demonio sa Ngaran Niya, sinda an sinagwê ni Jesus asin sinabihan na dai pagsawayon an lalaki.

Sa katunayan, sa Saiyang ministerio publico, nagsaksi si Jesus sainda kun pâno magraní asin mag-ako kan mga sinisikwal nin sociedad. An mga Fariseos asin escribas, na mahilig mansikwal sa mga parakasalà, sinabihan Niya sa Mateo 9,13: “Pagkaherak an màwot Ko, bako atang. Dai Ako napadigdi sa pag-apod kan mga banal kundi kan mga parakasalà.”

An patanid na ini orog na kaipuhan madangog asin masabotan sa panahon ngonian na an mga naghahade-hadean sa satong sociedad, linalanse an mga tawo na magin butá asin púla sa mga panggagadan asin pag-abuso nin derechos sa mga pinagsususpetsaran na kriminal o adik sa ilegal na droga – sa ngaran nin kaligtasan nin sadiri, pamilya, asin publiko.  

Sa sainda, may patanid an Mga Talinhaga (Proverbs) 6,16-19: “Anom na bagay an ikinakauyam nin Kagurangnan, pito an Saiyang ikinakaongis: matang mapaabaw-abaw, dilang putikon, mga kamot na nanggagadan nin mga daing salà, pusong nagpaplano nin mga maraot, mga bitis na naghihidalì sa paggibo nin karàtan, an nagsasaksing-putik, asin an tawong dahilan nin pag-iriwal nin mga magkaratood.”

Sa huri, si Jesu Cristo man giraray an nagsaksi sato kan pagpaorog sa kabòtan kan Ama bako kan sadiri, asin tunay na pagkamoot sa kapwa. Sabi Niya sa Juan 6, 37-38: “An siisay man na magdulok Sako dai ko isisikwal, huli ta naghilig Ako hale sa langit nganing gibohon an kabòtan kan nagsugò Sako, bako an kabòtan Ko.”

…

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia na ika natentaran na paorogon an sadiri, bako an kabòtan nin Dios o karahayan nin kapwa. Pàno ka nagtalubò sa experienciang ini?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Patrona del Bicol, Gran Madre de Dios

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Septiembre 19-25, 2021. Basahon an Evangelio gikan sa Lucas 2,27-35 (Solemnidad ni Nstra. Sra. de Peñafrancia)

...

Cada ikatolóng Domingo kan Septiembre kitá digdí sa Bicol nagcecelebrar kan fiesta kan satóng Ina, Nuestra Señora de Peñafrancia. Sabi sa himnong Resuene Vibrante, “Patrona del Bicol, Gran Madre de Dios, se siempre la reina de nuestra region”.

An devocion na ini dinara sa Kabikolan ni Padre Miguel Robles de Covarrubias kan 1710. Sa mga nakaaging taon labi sa tres miliones katawo an nagpi-pilgrimage sa Naga City para magsungkô ki Ina sa mga aldaw na ini. Siring kan nakaaging taon, nin huli sa pandemia, cancelado giraray an mga actividades sa fiesta, alagad an devocion ki Ina nagpapadagos sa mga parokya, sa mga harong, asin sa gabos na ronâ sa kinàban kun saen yaon an saiyang mga devotos.

Sa tahaw kan gabós na iní, marhay na maghapót: Ano man nanggad an totoong devocion sa mahal na Ina? Ta may mga nagsasabi na ini daang devocion nin mga Catolico suway sa biblía, o sarong pagsamba ki Maria, o singkogan sa tunay na pagtubod.

May duwáng dokumento nin katukdoán kan Simbahan an pwede tang pagkuahan nin simbag: an "Marialis Cultus" na sinurat ni Papa San Paolo VI kan 1974 asin “Ang Mahal na Birhen" na sinurat kan CBCP kan 1975. Makua kita nin tolóng simbag hale sa mga iní.

1. An tunay na devocion ki Maria maimbod sa Biblía. Siya an virgen na mangangakì kan Mesías susog sa mga profesía sa Lumang Tipan. Sa Lucas 1,28, sabi ki Maria ni arcangel Gabriel: “paladan na babae. An Kagurangnan yaon saimo!” Sabi man ni Maria sa saiyang awit sa Lucas 1,48: “poon ngonian aapodon akong paladan kan gabos na kapag-arakian”. Kaya kaitó pa man sagkod ngonian an Simbahan maogmáng nag-ootob kan profesíang iní ni Maria.

Asin an enot niyang mga devotos iyo si San Jose, saiyang agom, asin si Jesu Cristo, saiyang aki. Sabi ni San Maximilian Kolbe: “Dai nanggad matakot na masobrahan nin pagkamoot ki Maria. Ta dai nindo kayang kamòtan siya labí pa sa pagkamoot ni Jesus.”

2. An tunay na devocion ki Maria dinadara kitá pasiring ki Cristo. Inoomaw si Maria nin huli ta siya an Ina kan Dios, o Theotokos, susog sa katukdoán kan Consejo kan Efeso kaitóng 431 AD. Siya an pinilì kan Ama na magin Ina kan Saiyang Akì. Namidbidan kan kinâban si Cristo sa paagi kan pagsunod ni Maria sa kabôtan kan Ama.

Kayâ si San Louis-Marie de Montfort nakapagsabi: “ad Jesum per Mariam”, pasiring ki Jesus sa paagi ni Maria. An pagdevocion ki Maria na daí nakakaparaní ki Jesus, ginigibo siyang idolo o dios-diosan. Kaya an satóng pagdevocion dapat dinadará kitá sa pagsimba asin sa Eucaristía, ta kun dai, kulang an satuyang pagtubod.

3. An tunay na devocion ki Maria binabàgo an satóng buhay. Sabi ni Jesus sa Mateo 7,16: “Mamimidbid nindo sindá sa mga gibo ninda”. Pinapatalubò daw kitá kan satóng pagdevocion ki Maria sa kabanalan asin sa pagigin mas masinunod-sunod sa Dios, mas maboot, mas mamomòtón, asin mas matinabang sa kapwa?

Si Maria bako saná Ina ni Jesus kundî siya man an pangenot na disipulo kan saiyang Akì. Bilang Ina kan Simbahan, siya an modelo niatò nin pagigin disipulo. An pagigin disipulo iyo an pagsunod sa kabòtan kan Ama asin pakipag-amigo ki Jesus. Lugód makaarog kitá ki Maria sa saiyang pagigin maimbód sa Amâ asin pagkamoot ki Jesu Cristo. 

Viva la Virgen!

...

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kan saimong gawè nin devocion sa mahal na Ina ngonian na panahon nin pandemia.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Siisay Ako sa Paghona Nindo?

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Setyembre 12-18, 2021. Basahon an Evangelio gikan sa Marcos 8,27-35 (Ika-24 na Domingo sa Ordinariong Panahon - B).

…

An istorya sa evangelio may tolong kabtang. Enot, an paghapot ni Jesus kun siisay Siya sa paghona kan mga tawo asin kan Saiyang mga disipulos. Tuminama si San Pedro sa pagsimbag na Siya an Mesias. Ikaduwa, an pagpaliwanag Niya kun ano an kahulugan kan Saiyang pagigin Mesias. Nasala naman si San Pedro sa paghona na dai Siya dapat mag-agi nin pagsakit asin pagkagadan, kaya sinagwe Siya ni Jesus. Ikatolo, an pagtao Niya kan mga kaipuhan na gibohon kan mga boot magin disipulo Niya. Ano an mensahe kaini sato?

An Dios nagpapamidbid sato. Kun kita sana, dai ta mamimidbidan nin tama kun siisay an Dios. Hilnga an manlaen-laen na kultura sa kinaban na kun siisay-sisay asin kun anu-ano an pigsasaramba na mga dios-diosan. Nagpamidbid Siya ki Abraham, Isaac, asin Jacob, ki Moises asin sa mga profetas sa Lumang Tipan. Kaya an banwaan Israel namibidbid an Dios na kaglalang, kagtao nin mga karahayan, asin parasurog laban sa mga kaiwal. Siya man nanuga na mapadara nin paraligtas, sarong Mesias, para sa Saiyang banwaan.

Sa evangelio nagpapamidbid si Jesus bilang Mesias, alagad bako susog sa imahe na pighohona kan Saiyang mga kahimanwa, kundi bilang surugoon na papasakitan nin makuri, isisikwal, gagadanon, asin mabubuhay-liwat.

Bilang Mesias pinamidbid Niya an sadiri bilang Aki nin Dios – boot sabihon na Siya Dios man. Ini an rason kun nata sa Mateo 26,65, ginisi kan halangkaw na padi na si Caifas an saiyang bado asin hinatolan si Jesus nin paglalanghad (blasphemy), nin huli ta inako ni Jesus na Siya an Aki nin Dios. Sa Juan 10,30 si Jesus mismo nagsabi: “Ako asin an Ama saro.”

Nata ta an Dios nagboot na magpamidbid sato? Nin huli ta an saiyang plano, susog sa 1 Timoteo 2,4, “na an gabos makaligtas asin makamidbid kan katotoohan”. Asin si Jesus mismo nagsabi sa Juan 14,6: “Ako an dalan, an katotoohan, asin an buhay; dai nin makakaduman sa Ama, kun bakong huli Sako.”

Si Jesu Cristo an satong kaligtasan. Pano kita ikakaligtas kan satong pagkamidbid ki Cristo? An simbag sinabi Niya sa Marcos 8,34: “An boot na sumunod sako, magsayuma sa sadiri, pasanon an saiyang cruz, asin sumunod Sako.”

Sumunod kita ki Cristo. Boot sabihon, pilion ta si Cristo solamente asin orog sa gabos. Tapos na an panahon nin mga suanoy na dios-diosan, alagad may mga bagong dios-diosan man na nagsaralida sainda: kayamanan, kapangyarihan, kasikatan, kaogmahan sa laman, asin iba pa. Ining mga kinabanon na karahayan puede man na makatabang sa pagigin niatong marhay na tawo, alagad kun sinda an papaorogon ta sa gabos, sinda nagigin kaulangan sa pagrani ta sa Dios.

Magsayuma kita sa sadiri. Mas makusog ki sa tentacion hale sa luwas iyo an paorogon an sadiring kabotan. Ini an sinasabi ni Cristo sa Marcos 7,21, na “hale sa laog, hale sa puso nin tawo minagikan an mga maraot na isip, karumpotan, paggadan sa kapwa, pagsambay, kapasloan, kasombikalan, pagdaya, karigsokan, pagkauri, pagpakaraot, kapaabaw-abawan, karungawan” – an mga ini an kaipuhan niatong sayumahan tanganing bolanos na magsunod ki Cristo.

Pasanon ta an cruz. An sacrificio ni Jesu Cristo sa cruz iyo sana an magliligtas sato, kaya sa pagtao Niya sato kan kaligtasan hinihiras man Niya an dalan kan cruz.  An satong cruz iyo ini: an paggibo kan kun ano an tama, marhay, asin mamomoton sa ngaran ni Cristo, gurano man kadificil. Sabi sa Santiago 1,14,  “Anong pakinabang kun an sarong tawo nagsasabi na igwa siya nin pagtubod alagad mayo nin ipinapahiling na mga gibo?

…

GIYA SA PAGHIRAS SA SADIT NA KOMUNIDAD • Siisay si Jesu Cristo para saimo? Maghiras kan saimong mga paghingowa na akoon Siya bilang saimong Kagurangnan asin Paraligtas. 

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Magdangog sa Agrangay nin Kinaban asin Dukha

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Setyembre 5-11, 2021. Basahon an Evangelio gikan sa Marcos 7,31-37 (Ika-23 na Domingo sa Ordinariong Panahon - B ).

…

Sa evangelio pig-istorya an milagrosong pagbulong ni Jesu Cristo kan sarong lalaking bungóg asin púla. Ano an mensahe sato kan istoryang ini, lalo na sa paglaog niato sa Panahon nin Paglalang (Season of Creation) na satong sine-celebrar bilang Simbahan poon Setyembre 1 hanggang Oktubre 4, fiesta ni San Francisco de Asis?

1. Magtubod kita ki Cristo. An milagro tanda kan kapangyarihan ni Cristo bako sana na magbulong nin mga helang kundi magtao nin bagong buhay. Ini tanda kan Saiyang pagka-Dios. An istorya kan milagrong ini nakalakop sa dakul na banwaan, sabi ninda: “An gabos ginibo Niyang marhay, an mga bungog nakakadangog asin an mga pula nakakataram.”

Sa Isaias 35,5-6, pigpropesiya na sa pagdatong nin Dios “an mga butá makakahiling, an mga bungóg makakadangog, an mga pilay makakalukso, asin an mga púla makakaawit sa kaogmahan”.

2. Magdangog kita sa Saiyang Espiritu. An pagbukas nin talinga nagdadara nin husay na pagdangog sa tawong binulóng. Kitang mga may pandangog inaapod bako na mag-ako sana nin anuman na tanog o ribok sa kapalibotan, kundi na hanapon an mga tataramon na makahulugan, an tingog kan Espiritu ni Cristo. Sabi ni San Pablo sa Roma 10,17: “An pagtubod bunga kan pagdangog sa mensahe, an mensahe nadadangog nin huli sa tataramon ni Cristo.” Ini makukua niato pag tinatàwan ta nin panahon an pagpamibi asin pag-adal sa mga Kasuratan asin katukdoan kan Simbahan.

Segun ki Papa Francisco, sa saiyang Surat Encyclical na Laudato Si’, sa panahon ngonian madadangog ta man an Espiritu sa “agrangay nin kinaban asin agrangay nin mga dukha”. An Espiritu nangangapodan na maghidali kita sa pag-ataman sa kinaban na estaran niato gabos, asin magmangno sa kapwang nangangaipo lalo na idtong nagtitios nin huli sa mga calamidad na dara nin nagbabagong clima asin pag-init nin kinaban.

3. Magbalangibog kan Marhay na Bareta. An dila na may kakayahan magtaram, may katongdan na dai magsilensyo sa hampang nin injusticia asin karâtan, kundi na magbalangibog kan Marhay na Bareta. Sa Talinhaga 31,8-9, pinapagirumdom kita na “Magpahayag para sa mga tawong dai nakakapahayag kan saindang sadiri. Ipakilaban an derechos kan gabos na dai kayang makilaban. Magpahayag para sainda asin maghukom nin matanos. Ipakilaban an derechos kan dukha asin kan mayong sukat.”

May kasabihan na pigsasabing hale ki San Francisco de Asis: “Magbalangibog kan Marhay na Bareta sa gabos na panahon, minsan maggamit nin mga tataramon.” Boot sabihon, sa kadaklan na beses an pagsaksi sa gibo asin buhay an pinakamarhay na paagi nin evangelizacion.

Sabi sa Santiago 2,1, “kun kita may pagtubod ki Jesu Cristo, akoon ta an gabos na tawo nin daing pinapalaen.” Gabos na tawo mahalaga, gabos na buhay sa kinaban marhay sa mata nin Dios na Kaglalang. An kabaliktadan kaini iyo an pig-aapod ni Papa Francisco sa Laudato Si’ na “kultura nin basura” (throwaway culture) na daing pagpahalaga sa karahayan nin kagabsan asin kalinigan nin kapalibotan; na kun pighohonà an sarong bagay (minsan pati tawo) dai na nin pakinabang, basta na sana tinatapok siring sa basura na nakakaatî sa kinaban.

Danay kitang magdolok ki Jesu Cristo satong Kagurangnan, na nagtaong pandangog sa bungóg asin boses sa púla, tanganing kita man danay na makadangog kan Saiyang tingog asin an satong buhay magin saksi sa Saiyang Marhay na Bareta.

…

GIYA SA PAGHIRAS SA SADIT NA KOMUNIDAD • Kun nadadangog mo an “agrangay kan kinaban asin agrangay nin mga dukha” ngonian, ano an sinasabi ninda saimo?  Ano an puede mong maginibo?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

 

Utobon an Tugon Tanganing Mabuhay

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Agosto 29 - Setyembre 4, 2021. Basahon an Evangelio gikan sa Marcos 7,1-8,14-15,21-23 (Ika-22 na Domingo sa Ordinariong Panahon - B)

…

Sa pagpaliwanag kan istorya sa evangelio, enoton ta an mga bako kaini mensahe.

Enot, dai digdi si Jesus nagtatao nin opinion medical. Marhay ining linawon lalo na sa panahon nin pandemia dulot kan COVID-19. Kan piglihis Niya an hapot kun nata dai naghahanaw nin kamot an Saiyang mga disipulos bago magkakan, asin kan sinabi Niya na “an hale sa luwas na minalaog sa tawo dai nakakaati saiya, kundi an hale sa laog iyo an nakakaati” – bako ini katukdoan manunungod sa salud nin hawak nin tawo, kundi sa salud nin kalag nin tawo.

An Saiyang punto iyo na kadakul na ley o tugon an dinagdag kan mga Fariseos asin escribas para utobon nin mga tawo – kaiba na an kun ano an mga nakakaati sa tawo – alagad binayaan ninda an tunay na tugon nin Dios. Kaya pinarumdom Niya sainda an mga tataramon ni profeta Isaias: “Minaomaw Sako an banwaan na ini sa nguso, alagad harayo an saindang puso”.

Ikaduwa, dai sinabi ni Jesus na daing saysay an mga tradicion nin religion kun dai nasusurat sa biblia, nin huli daa ta ini mga “gibo sana nin tawo”. Ginagamit ining argumento kan mga nagtutubod sa doctrina kan “Sola Scriptura” o pagtubod na kun ano sana an nasusurat sa biblia, iyo sana an tunay na pagtubod.

An katukdoan kan Simbahan na tinogdas ni Cristo iyo na an Diosnon na Kapahayagan (Divine Revelation) makukua sa Banal na Kasuratan asin Banal na Tradicion. An Banal na Kasuratan iyo an mga tataramon nin Dios na nasusurat sa mga libro sa biblia. An Banal na Tradicion iyo an mga oficial na katukdoan kan Simbahan na dai nasusurat sa biblia na bunga nin pagtalubo sa pagtubod sa kapangyarihan kan Espiritu Santo. Halimbawa sa mga ini an Credo Apostolico, an mga sacramento, an autoridad kan mga obispo asin Santo Papa, patin na ngani an pagtipon kan mga libro sa Bagong Tipan na ginibo sa autoridad kan suanoy na Simbahan.

An mga ini bako mga basang na imbensyon sana kan Simbahan huli ta si Jesu Cristo mismo an nagsabi sa Juan 16,12-13: “Dakul pa an sasabihon Ko saindo, alagad dai pa nindo masasabotan sa ngonian. Pag-abot kan Espiritu nin katotoohan, tatabangan Niya kamo nganing masabotan nindo an gabos na katotoohan.”

Ano pa an mensahe na boot ipaabot sato kan evangelio?

Magbalik kita sa kapinonan: an pagkamoot sa Dios asin pag-utob sa Saiyang tugon ta ini an makakatao sato nin buhay asin kaligtasan. Sabi ni Moises sa banwaan nin Israel sa Deuteronomio 4,1: “Hinanyoga an mga tugon asin pagboot na itinutukdo saimo. Utobon mo iyan tanganing mabuhay ka.”  Asin sa Santiago 1,21-22 nasusurat: “Mapakumbabang akoa an tataramon na tinanom sa saindo, tataramon na makakaligtas saindo. An tataramon gibohon, bako sanang dangogon.”

Akoon ta sa Cristo sa satong buhay. Siya an kapanoan kan mga kasuratan, kan Tugon asin mga Profeta. Siya sana an makakaligtas sato. Sa Juan 14,6, sinabi Niya: Ako an  dalan, an katotoohan, asin an buhay”.

Alagad sa pagsamba ki Cristo, maglikay na dai makaarog sa mga Fariseos asin escribas na nagsasamba sa nguso alagad harayo sa puso. Sa danay niatong pamibi asin pag-adal kan Saiyang tataramon, tutubodon ta an Saiyang pagpamidbid kan sadiri asin uutubon an Saiyang kabotan, bako an satong sadiring kabotan. Dai man lugod mangyari na sinasambit ta man kuta an Saiyang ngaran alagad ibang dios na palan an satong sinasamba

…

GIYA SA PAGHIRAS SA SADIT NA KOMUNIDAD • Maghiras nin linya sa biblia o katukdoan kan Simbahan na dai mo pa sabot nin marhay. Maghapot sa saindong padi o sarabay na iresearch sa katekismo an paliwanag kaini.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Sa Kiisay Pa Kami Maduman?

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Agosto 22-28, 2021. Basahon an Evangelio gikan sa Juan 6,60-69 (Ika-21 Domingo sa Ordinariong Panahon - B).

…

An istorya sa evangelio iyo an katapusan kan kabtang sa Juan 6 na pig-aapod na Katukdoan sa Tinapay nin Buhay (Bread of Life Discourse). Nagpoon ini sa istorya kan milagro nin pagpakaon nin limang ribong kalalakihan hale sa limang tinapay asin duwang sirâ, asin nagpadagos sa pagpamidbid ni Jesus kan sadiri bilang Tinapay nin Buhay. Sa huri nasakitan an kadakul Niyang disipulos asin binarayaan Siya nin huli ta dai ninda nasabotan asin naako an Saiyang katukdoan.

Ano ining katukdoan na masakit para sainda? Sabi ni Jesus sa Juan 6,53: “Kun dai kamo magkakan kan hawak kan Aki kan Tawo asin mag-inom kan dugo Niya, dai kamo magkakaigwa nin buhay”. Alagad para sa satong mga Cristiano, lalo na mga Catolico, ini manunungod sa Eucaristía, kun saen nagdadangog kita sa Saiyang Tataramon asin inaako ta an Saiyang hawak asin dugo.

Kaya naghapot si Jesus sa Doce Apostoles kun pati sinda babayaan man Siya. Marhay ngani ta yaon si Simon Pedro na nagsabi kan saro sa pinakamagayon na pagpahayag nin pagtubod sa mga evangelio. Sabi niya sa Juan 6, 68: “Sa kiisay pa kami maduman, Kagurangnan, yaon sa Saimo an mga tataramon nin buhay na daing kasagkoran”. Ano an boot sabihon kaining pahayag ni San Pedro?

Enot, ki Cristo sana makukua an kaligtasan. Siya an satong kaligtasan. Siya an Tinapay nin Buhay na makakabasog kan satong mga kagutuman sa hawak asin espiritu, asin makakatao sato nin kapanoan nin buhay na dai matatao nin mga kinàbanon na bagay.

Nasa Saiya an mga tataramon nin buhay na daing kasagkoran. An Saiyang tataramon makapangyarihan – naglalang kan kinaban, nagpatoninong sa duros, nagpatawad nin mga kasàlan, nagbulóng nin mga helang, nagpahalè sa mga marumpot na espiritu, nagbuhay nin gadan. An Saiyang panugâ naootob. An Saiyang katukdoan, giya pasiring sa Kahadean.

Ikaduwa, an Saiyang pagpamidbid naghahagad nin simbag halè sato. Siring sa Doce Apostoles na dai nagbayà ki Jesus (liban ki Judas na nagpasaluib Saiya), siguro masabi man kita na pinipili ta man Siya. Alagad an hinahagad Niyang pag-ako Saiya todok sa boot, sa bilog na puso, kalag, asin kusog. Ano an mga tanda na bolanos man nanggad na pinipili ta Siya?

Tinatalikdan ta an kasàlan. Nin huli ta dai kita maliligtas sa pagsabi sanáng inaako ta Siya bilang Kagurangnan asin Paraligtas pero dating gawè man giraray kita. Sa Saiyang pagtukdo an sabi Niya sa Marcos 1,15: “Magbaklê kamo asin magtubod sa Marhay na Bareta”.

Nagdadanay kitang maimbod Saiya.  Nin huli ta an pagsunod Saiya asin pagsikwal sa kasàlan bako sararoan sanang gawè, bako one-time big-time, kundi kaipuhan isabuhay aroaldaw. Sabi ni Jesus sa Lucas 9,23: “An siisay man na boot magin disipulo Ko, dapat talikdan an sadiri, asin pàsanon an sadiring cruz aroaldaw”. Aroaldaw.

Nagsasaksi kita Saiya. Nin huli ta inapod kita bako na gibohon na pribadong bagay an espiritualidad kundi na ihirás an liwanag kan evangelio sa satong tataramon asin gibo. Sa Josue 24,15, sinabi ini ni Josue, na pamayo kaidto sa Israel: “Para sako asin sa sakong harong, kami maglilingkod sa Kagurangnan.” Sa mga tataramon na ini, nahirô an puso nin bilog na Israel asin nadará sinda sa pagpahayag man nin pagtubod sa Kagurangnan asin kamàwotan na maglingkod Saiya. Ini an pagtubod na nakakadará sa kapwa parani sa Dios

…

GIYA SA PAGHIRAS SA SADIT NA KOMUNIDAD • Maghiras nin experiencia na nagkaigwa kita nin pagkakataon na pigpapapili kita na magsunod ki Cristo o maggibo nin ibang bagay. Ano an satong pinili?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

An Pagsakát sa Langit ki Virgen Maria

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Agosto 15-21, 2021. Basahon an Evangelio gikan sa Lucas 1,39-56 (Solemnidad kan Asuncion ni Virgen Maria).

…

Sa evangelio pig-istorya an pagbisita ni Virgen Maria sa saiyang pinsan na si Isabel matapos na sabihon saiya kan angel na si Gabriel na ini, sa saiyang pagkagurang, badós na nin anom na bulan. Sa pagsabát saiya ni Isabel, sinabihan siya: “Paladan ka sa gabos na babae asin paladan an akì na dinadara mo sa saimong tulák!”

Saro sa pinakahalangkaw na kapaladan ni Maria iyo na pagkatapos kan buhay niya digdi sa dagâ, sinakát siya, hawak asin kalag, sa langitnon na kamurawayan. Ini an misteryo kan saiyang Asuncion.

Kan 1950, dineklara ini bilang dogma nin satong pagtubod ni Papa Pio XII sa Constitucion Apostolico Munificentissimus Deus. An dogma boot sabihon katotoohan na pinahayag nin Dios, asin oficiál na pinapaliwanag asin pigdeklara kan nagtutukdong Simbahan na dapat niatong tubodán.

Linawon ta na dai nagpoon kan 1950 saná an pagtukdô kaini kan Simbahan. Sa katunayan an Asuncion an pinaka-suanoy sa mga fiesta ki Virgen Maria. Pigta’wan lamang nin magkakanigong pagmidbid ni Papa Pio XII an halóy nang pigtutubodan nin ginatós na kapag-arakian nin mga Cristiano. Sa Lucas 1,48, si Maria nag-awit: “Poon ngonian aapodon akong paladan kan gabos na kapag-arakian!”

Pa’no ta pa maipapaliwanag an Asuncion?

1. Gabos na fiesta ni Maria katakod kan pagtubos ni Cristo. Nin huli ta inakò ni Maria an pagigin Ina kan Dios na nanitawo, siya an Inmaculada Concepcion o ipinangidam na daing digtâ nin kasàlan; siya man an Inang Virgen susog sa mga profesía sa Kasuratan; siya an winalat ni Cristo na magin Ina kan Saiyang mga disipulos asin kan Simbahan.

Siring man siya isinakát sa langit. Alagad iba an Asuncion ni Virgen Maria sa Asencion ni Jesu Cristo. Si Maria sinakát sa langit bako sa sadiri niyang kakayahan kundi nin huli sa kapangyarihan nin Dios. Si Jesu Cristo, Aki kan Dios, Ikaduwang Persona kan Santissima Trinidad, suminakat sa langit sa Saiyang sadiring diosnon na kapangyarihan.

2. An Asuncion ni Maria tandâ kan satong maabot na kamurawayan. Sabi sa Juan 6,40: “Ini an kabòtan kan Ama, na an nakakahiling sa Aki asin nagtutubod Saiya magkakaigwa nin buhay na daing kasagkoran asin bubuhayon Ko siya sa huring aldaw.” Si Maria an enot na nata’wan huli ki Cristo kan balaog nin buhay na daing kasagkoran, pagkabuhay-liwat sa mga gadan, asin kamurawayan sa Kahadean.

An Asuncion ni Maria iyo an tandâ kan panugáng estaran asin estado para sa gabos na nagtutubod ki Jesu Cristo. Nin huli kaini, kita may pagtubod asin paglaom na bako kagadanan an satong katapusan, bako lulobngan an satong huring padumanan, kundi buhay na daing kasagkoran sa Saiyang Kahadean.

3. Si Maria an satong ladawan nin pagigin disipulo ni Cristo. Tinutukdô sato kan misteryo kan Asuncion na arogon ta si Maria sa maimbod na pagsunod sa kabòtan kan Ama, sa pagkamoot ki Cristo, sa pagtalikod sa kasàlan, asin sa paglakbay kaiba an Simbahan sa dalan nin cruz.

An Asuncion an tandâ kan satong destinasyon, nasa sato na an paglakaw sa dalan paduman.

…

GIYA SA PAGHIRAS SA SADIT NA KOMUNIDAD • Sa panahon nin pandemia, lalo na sa experiencia nin helang asin pagkagadan nin mga kamidbid o mahal sa buhay, ano an sinasabi saimo kan Asuncion ni Virgen Maria?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Tinapay nin Buhay sa Banal na Misa

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Agosto 8-14, 2021. Basahon an Evangelio gikan sa Juan 6,41-51 (Ika-19 Domingo sa Ordinariong Panahon - B).

…

An evangelio pagpadagos sa pagpamidbid ni Jesu Cristo kan Saiyang sadiri bilang tinapay nin buhay. Sa Juan 6,51, sinabi Niya: “Ako an tinapay nin buhay hale sa langit. An minakakan kan tinapay na ini mabubuhay sagkod pa man. An tinapay na itatao ko iyo an sakuyang laman, tanganing mabuhay an kinaban.” An maimbod na Catolicong nagbabasa o nakakadangog kaini, tulos asin malinaw na nasasabotan na ini nangyayari na sa lambang Banal na Misa.

Sinabi pa ni Jesus sa Juan 6,47: “Totoong sinasabi Ko saindo, an nagtutubod igwa nin buhay na daing kasagkoran”.   An Banal na Misa iyo an sacramentong nagpapakusog kan satong pagtubod para sa buhay na daing kasagkoran. Kaya nganì an satong Simbahan inaapod an Eucaristía na “burabod asin alituktok kan satong buhay Cristiano”. Sa pa’nong paagi?

1. Sa pagtiripon sa pagsamba. Sa pagtiripon pa saná kan banwaan nin Dios sa Eucaristía asin sarabay na pagsamba, napapabanal na kita. Sa Mateo 18,20 si Jesus nagsabi: “Kun may duwa o tolo katawo na nagtitiripon sa ngaran Ko, yaon Ako sa kaibahan ninda”. Kun odók sa boot an pagsimba, nakakatabang an presencia nin lambang saro sa pagpakusog nin pagtubod nin lambang saro asin nagtatalubò an komunidad nin mga paratubod.

2. Sa paghimate sa Tataramon. Susog sa Psalmo 119,105: “An Saimong tataramon, ilaw para sa sakong mga bitis, asin liwanag para sa sakong agihan”. Sa Liturgía kan Tataramon sa Santa Misa, an pagtubod minadatong sa paghinanyog  asin paghorop-horop hale sa mga libro nin Tugon asin mga Profetas sa Lumang Tipan (Enot na Babasahon), sa mga Psalmo (Responsorio), sa mga Surat ni San Pablo asin iba pang Apostoles sa Bagong Tipan (Ikaduwang Pagbasa), asin sa Evangelio, kaiba na an homilía.

3. Sa pagrumdom kan Sacrificio ni Cristo. Sa Lucas 22,19 si Cristo nagtugon sa Saiyang mga disipulos: “Giboha nindo ini sa pagrumdom sa Sako.” Sa lambang Misa pigrurumdom niato an saro asin solamenteng sacrificio na nagligtas sato sa kasâlan asin kagadanan. Kaya sa lambang Misa yaon man an cruz asin an imahe kan nakapako na Cristo tanganing darhon an satong isip asin puso, memorya asin kunsensya, sa pagkamoot asin pagtubod ki Cristo na nagbuwis nin buhay para sato.

4. Sa pag-akò Saiya sa comunión. An milagro kan lambang Santa Misa iyo na an Dios nagrarani sato asin tinatao an Saiyang sadiri bilang satong kakanon. Sa comunión si Cristo nagigin parte kan satong hawak minsan ngani kita parte kan Hawak ni Cristo. Si San Pablo nagtukdô sa 1 Corinto 10,16: “An tinapay na satong binabaak, bakong pakisumaro iyan sa hawak ni Cristo kun minakakan kita kaiyan?”

5. Sa paghale dará an Marhay na Bareta. Sa pagtapos kan Santa Misa dai puede kitang maghalè na daing dará – an experiencia kan banwaan na nagsasamba, an giya kan Tataramon, asin an hawak mismo ni Cristo na inako sa comunión. An mga ini tinao sato bako para sadirihon saná kundi tanganing ihiras sa kapwa sa pagsunod kan misyon na tinao ni Cristo sa gabos Niyang mga disipulos sa gabos na panahon, susog sa sinabi Niya sa Marcos 16,15: “Paduman kamo sa bilong na kinaban; ihulit nindo an Marhay na Bareta sa gabos na tawo.”

…

GIYA SA PAGHIRAS SA SADIT NA KOMUNIDAD • Bako sa gabos na panahon parareho an experiencia niato sa Misa, minsan namamatean ta an presencia nin kabanalan, minsan garo mará an satong espiritu. Maghiras kan saimong experiencia sa pagsimba sa ngonian sa laog man kan simbahan o sa media o online.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Tunay na Tinapay na halè sa Langit

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Agosto 1-7, 2021. Basahon an Evangelio gikan sa Juan 6,24-35 (Ika-18 Domingo sa Ordinariong Panahon – B ).

…

An istorya sa evangelio kasugpon kan istorya kan milagro nin pagpakakan sa limang ribo halè sa limang tinapay asin duwang sirâ sa Juan 6,1-15. Si Jesu Cristo, na nagpakakan sa limang ribo, nagpamidbid bilang “tinapay nin buhay”. An Dios dai sana nagtatao nin satong kakanon sa aroaldaw kundi buhay na daing kasagkoran.

Patin an istorya sa Exodo 16 na pagpadara nin Dios nin manna o tinapay na hale sa langit tanganing kakanon nin mga Israelita sa 40 taon ninda sa disyerto, pigtukdò ni Cristo na pasabóng sa pagdatong kan “tunay na tinapay na hale sa langit”, daing iba kundi Siya man saná mismo.

Mas paladan kita ngonian kisa sa mga Israelita kaidtong panahon. Nin huli ta tinatao sato nin Dios bilang kakanon an Saiyang Hawak sa Banal na Misa. Ano an maninigong simbag niato sa orog kadakulang biyayang ini?

“Dai kamo magpagal para sa kakanon na nalalapà, kundi para sa kakanon na nagdadanay sagkod sa buhay na daing katapusan, na itatao saindo kan Aki nin Tawo” (Juan 6,27).

An pagpamidbid ni Jesus naghahagad sato nin pagpipili: an mga kaogmahan asin biyaya sa buhay na ini o Siya mismo na kagtao nin biyaya asin buhay.

Si San Ignacio de Loyola nagtukdô: “An gabos na bagay sa kinàban, biyaya nin Dios tanganing matabangan kita na mamidbidan asin mamo’tan ta Siya. Alagad arin man sa mga kinàbanon na biyayang ini an magin centro na kan satong buhay, magigin uláng na iyan sa pagtalubò niato sa pagkamoot asin sinasalidahan pa nganì kaiyan an Dios sa satong buhay.”

Si San Pablo naghulit sa Efeso 4,22-24: “Talikdan an dating buhay: haleon an daan na tawo na naraot sa pagsunod kan madayang kamàwotan; bàgohon an espiritu nin saindong isip asin igubing nindo an Bagong Tawo na linalang susog sa Dios, linalang sa katanosan asin kabanalan nin katotoohan”.

 “An ipinapagibo saindo nin Dios iyo ini: magtubod kamo sa sinugò Niya” (Juan 6,29).

An pagtubod ki Cristo mapoon sa tamang pagkamidbid sa Saiya. Boot sabihon susog sa pagpamidbid Niya kan Saiyang sadiri asin kabòtan sa Biblia asin sa mga katukdoan kan Simbahan; bako susog sa satong sadiring kaisipan asin kabòtan saná. Dai man lugod mangyari na sinasambit ta man kutâ an Saiyang Ngaran alagad ibang dios na palán an satong sinasamba, dios susog sa satong sadiring kaisipan asin kagustohan.

Naipapahiling man ini sa pagpasalamat sa mga biyayang tinatao Niya. An pusong tatao magpasalamat, pusong tatao magmidbid sa kagtao nin biyaya. Kaya ngani inaapod ta man an Banal na Misa na Eukaristiya, hale sa Griegong tataramon na eucharistein, na an boot sabihon “magpasalamat”. Sa cada niato pagsimba nagtitiripon kita sa pagpasalamat sa Kagurangnan.

An pagtubod ki Cristo orog na napapahiling sa pagigin niatong maimbod (faithful) sa Saiya. Nin huli ta an kaimbodan daing iba kundi pagtubod na nagdadanay. Sabi ni Cristo sa Juan 15,4: “Magdanay kamo Sako, siring na Ako nagdadanay saindo.” Pag inaako ta Siya sa comunión, Siya nagigin yaon sa Sato. Pag isinasabuhay ta an satong comunión, nagtatalubò kita na magin siring sa Saiya. Ini an padumanan kan satong pagtubod asin pagsamba: na kita magin siring sa satong tinutubod asin sinasamba, Siya na naglalang sato na kabaing Niya.

…

GIYA SA PAGHIRAS SA SADIT NA KOMUNIDAD • Maghiras nin experiencia kun pa’no isinasabuhay an satong comunión sa Hawak ni Cristo, an tinapay nin buhay.  

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song