An Tinapay nin Buhay sa Banal na Misa

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Agosto 8-14, 2021. Basahon an Evangelio gikan sa Juan 6,41-51 (Ika-19 Domingo sa Ordinariong Panahon - B).

…

An evangelio pagpadagos sa pagpamidbid ni Jesu Cristo kan Saiyang sadiri bilang tinapay nin buhay. Sa Juan 6,51, sinabi Niya: “Ako an tinapay nin buhay hale sa langit. An minakakan kan tinapay na ini mabubuhay sagkod pa man. An tinapay na itatao ko iyo an sakuyang laman, tanganing mabuhay an kinaban.” An maimbod na Catolicong nagbabasa o nakakadangog kaini, tulos asin malinaw na nasasabotan na ini nangyayari na sa lambang Banal na Misa.

Sinabi pa ni Jesus sa Juan 6,47: “Totoong sinasabi Ko saindo, an nagtutubod igwa nin buhay na daing kasagkoran”.   An Banal na Misa iyo an sacramentong nagpapakusog kan satong pagtubod para sa buhay na daing kasagkoran. Kaya nganì an satong Simbahan inaapod an Eucaristía na “burabod asin alituktok kan satong buhay Cristiano”. Sa pa’nong paagi?

1. Sa pagtiripon sa pagsamba. Sa pagtiripon pa saná kan banwaan nin Dios sa Eucaristía asin sarabay na pagsamba, napapabanal na kita. Sa Mateo 18,20 si Jesus nagsabi: “Kun may duwa o tolo katawo na nagtitiripon sa ngaran Ko, yaon Ako sa kaibahan ninda”. Kun odók sa boot an pagsimba, nakakatabang an presencia nin lambang saro sa pagpakusog nin pagtubod nin lambang saro asin nagtatalubò an komunidad nin mga paratubod.

2. Sa paghimate sa Tataramon. Susog sa Psalmo 119,105: “An Saimong tataramon, ilaw para sa sakong mga bitis, asin liwanag para sa sakong agihan”. Sa Liturgía kan Tataramon sa Santa Misa, an pagtubod minadatong sa paghinanyog  asin paghorop-horop hale sa mga libro nin Tugon asin mga Profetas sa Lumang Tipan (Enot na Babasahon), sa mga Psalmo (Responsorio), sa mga Surat ni San Pablo asin iba pang Apostoles sa Bagong Tipan (Ikaduwang Pagbasa), asin sa Evangelio, kaiba na an homilía.

3. Sa pagrumdom kan Sacrificio ni Cristo. Sa Lucas 22,19 si Cristo nagtugon sa Saiyang mga disipulos: “Giboha nindo ini sa pagrumdom sa Sako.” Sa lambang Misa pigrurumdom niato an saro asin solamenteng sacrificio na nagligtas sato sa kasâlan asin kagadanan. Kaya sa lambang Misa yaon man an cruz asin an imahe kan nakapako na Cristo tanganing darhon an satong isip asin puso, memorya asin kunsensya, sa pagkamoot asin pagtubod ki Cristo na nagbuwis nin buhay para sato.

4. Sa pag-akò Saiya sa comunión. An milagro kan lambang Santa Misa iyo na an Dios nagrarani sato asin tinatao an Saiyang sadiri bilang satong kakanon. Sa comunión si Cristo nagigin parte kan satong hawak minsan ngani kita parte kan Hawak ni Cristo. Si San Pablo nagtukdô sa 1 Corinto 10,16: “An tinapay na satong binabaak, bakong pakisumaro iyan sa hawak ni Cristo kun minakakan kita kaiyan?”

5. Sa paghale dará an Marhay na Bareta. Sa pagtapos kan Santa Misa dai puede kitang maghalè na daing dará – an experiencia kan banwaan na nagsasamba, an giya kan Tataramon, asin an hawak mismo ni Cristo na inako sa comunión. An mga ini tinao sato bako para sadirihon saná kundi tanganing ihiras sa kapwa sa pagsunod kan misyon na tinao ni Cristo sa gabos Niyang mga disipulos sa gabos na panahon, susog sa sinabi Niya sa Marcos 16,15: “Paduman kamo sa bilong na kinaban; ihulit nindo an Marhay na Bareta sa gabos na tawo.”

…

GIYA SA PAGHIRAS SA SADIT NA KOMUNIDAD • Bako sa gabos na panahon parareho an experiencia niato sa Misa, minsan namamatean ta an presencia nin kabanalan, minsan garo mará an satong espiritu. Maghiras kan saimong experiencia sa pagsimba sa ngonian sa laog man kan simbahan o sa media o online.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Tunay na Tinapay na halè sa Langit

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Agosto 1-7, 2021. Basahon an Evangelio gikan sa Juan 6,24-35 (Ika-18 Domingo sa Ordinariong Panahon – B ).

…

An istorya sa evangelio kasugpon kan istorya kan milagro nin pagpakakan sa limang ribo halè sa limang tinapay asin duwang sirâ sa Juan 6,1-15. Si Jesu Cristo, na nagpakakan sa limang ribo, nagpamidbid bilang “tinapay nin buhay”. An Dios dai sana nagtatao nin satong kakanon sa aroaldaw kundi buhay na daing kasagkoran.

Patin an istorya sa Exodo 16 na pagpadara nin Dios nin manna o tinapay na hale sa langit tanganing kakanon nin mga Israelita sa 40 taon ninda sa disyerto, pigtukdò ni Cristo na pasabóng sa pagdatong kan “tunay na tinapay na hale sa langit”, daing iba kundi Siya man saná mismo.

Mas paladan kita ngonian kisa sa mga Israelita kaidtong panahon. Nin huli ta tinatao sato nin Dios bilang kakanon an Saiyang Hawak sa Banal na Misa. Ano an maninigong simbag niato sa orog kadakulang biyayang ini?

“Dai kamo magpagal para sa kakanon na nalalapà, kundi para sa kakanon na nagdadanay sagkod sa buhay na daing katapusan, na itatao saindo kan Aki nin Tawo” (Juan 6,27).

An pagpamidbid ni Jesus naghahagad sato nin pagpipili: an mga kaogmahan asin biyaya sa buhay na ini o Siya mismo na kagtao nin biyaya asin buhay.

Si San Ignacio de Loyola nagtukdô: “An gabos na bagay sa kinàban, biyaya nin Dios tanganing matabangan kita na mamidbidan asin mamo’tan ta Siya. Alagad arin man sa mga kinàbanon na biyayang ini an magin centro na kan satong buhay, magigin uláng na iyan sa pagtalubò niato sa pagkamoot asin sinasalidahan pa nganì kaiyan an Dios sa satong buhay.”

Si San Pablo naghulit sa Efeso 4,22-24: “Talikdan an dating buhay: haleon an daan na tawo na naraot sa pagsunod kan madayang kamàwotan; bàgohon an espiritu nin saindong isip asin igubing nindo an Bagong Tawo na linalang susog sa Dios, linalang sa katanosan asin kabanalan nin katotoohan”.

 “An ipinapagibo saindo nin Dios iyo ini: magtubod kamo sa sinugò Niya” (Juan 6,29).

An pagtubod ki Cristo mapoon sa tamang pagkamidbid sa Saiya. Boot sabihon susog sa pagpamidbid Niya kan Saiyang sadiri asin kabòtan sa Biblia asin sa mga katukdoan kan Simbahan; bako susog sa satong sadiring kaisipan asin kabòtan saná. Dai man lugod mangyari na sinasambit ta man kutâ an Saiyang Ngaran alagad ibang dios na palán an satong sinasamba, dios susog sa satong sadiring kaisipan asin kagustohan.

Naipapahiling man ini sa pagpasalamat sa mga biyayang tinatao Niya. An pusong tatao magpasalamat, pusong tatao magmidbid sa kagtao nin biyaya. Kaya ngani inaapod ta man an Banal na Misa na Eukaristiya, hale sa Griegong tataramon na eucharistein, na an boot sabihon “magpasalamat”. Sa cada niato pagsimba nagtitiripon kita sa pagpasalamat sa Kagurangnan.

An pagtubod ki Cristo orog na napapahiling sa pagigin niatong maimbod (faithful) sa Saiya. Nin huli ta an kaimbodan daing iba kundi pagtubod na nagdadanay. Sabi ni Cristo sa Juan 15,4: “Magdanay kamo Sako, siring na Ako nagdadanay saindo.” Pag inaako ta Siya sa comunión, Siya nagigin yaon sa Sato. Pag isinasabuhay ta an satong comunión, nagtatalubò kita na magin siring sa Saiya. Ini an padumanan kan satong pagtubod asin pagsamba: na kita magin siring sa satong tinutubod asin sinasamba, Siya na naglalang sato na kabaing Niya.

…

GIYA SA PAGHIRAS SA SADIT NA KOMUNIDAD • Maghiras nin experiencia kun pa’no isinasabuhay an satong comunión sa Hawak ni Cristo, an tinapay nin buhay.  

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Limang Tinapay asin Duwang Sirâ

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hulyo 25-31, 2021. Basahon an Evangelio gikan sa Juan 6,1-15 (Ika-17 na Domingo sa Ordinariong Panahon – B).

...

Sa evangelio pinakakan ni Jesu Cristo an limang ribo halè sa limang tinapay asin duwang sirâ. An mga milagro sa Evangelio ni San Juan inaapod na mga tandâ.

Tandâ kan Pagka-Dios ni Cristo. An milagrong ini nagpapahayag kan Saiyang diosnon na kapangyarihan asin autoridad. Sa Evangelio ni San Juan ining istorya kapinònan kan kabtang na nagtatapos sa pagpamidbid ni Jesus bilang Tinapay nin Buhay. Bako sanáng pagkaon na nakakabasog nin tulák an Saiyang dará, kundi Siya mismo an kakanon nin buhay na daing kasagkoran.

Igwang interpretasyon kan istoryang ini na nagsasabi na tibaad daa kan nahiling kan iba an pagtao kan aki kan saiyang daráng balon, nakunsensya sinda asin linuwas man kan iba pang may balon an saindang dará, asin naghirirás-hirasan sinda kaya nakakaon an gabos.

Maski magayon pag dangogon, bako ini tamang interpretasyon nin huli ta hinahalè an milagrosong aspeto kan istorya asin an diosnon na gibo ni Cristo. May mga istorya sa buhay ni Jesus na nasusurat sa saro o duwang Evangelio saná asin dai sa iba. Alagad an istoryang ini yaon sa apat na Evangelio (Mateo, Marcos, Lucas, asin Juan), asin gabos sinda nagsasaksi na ini gibong milagro mismo ni Cristo, alagad daing nasusurat sa tibaad na “milagro nin paghirirasan” nin mga tawo.

Tandâ kan Imbitasyon ni Cristo. Sa evangelio pigpaliwanag na an hapot ni Jesus ki Felipe kun saen makakabakal nin ipapakakan sa mga tawo sarong pagtukso (karáw) nin huli ta aram ni Jesus an Saiyang gigibohon. Kun iisipon, dai kaipuhan ni Cristo nin anuman hale sa tawo para maggibo nin milagro alagad pigtuyo Niya na magin parte sinda kan Saiyang gibo. Kaya si Felipe napaisip kun ano an gigibohon, si Andres nagdará nin sarong aki na may balon, asin an mga disipulos pinatabang Niya sa pagpatukaw sa mga tawo, sa pagdistribuir nin mga kakanon, asin sa pagtipon kan mga natadà – doceng basket nin tadáng pagkaon!

Hanggang sa ngonian padagos kitang iniimbitaran ni Cristo na makisumarò sa Saiyang misyon nin paghirás kan Saiyang Marhay na Bareta asin pagmuknâ kan Saiyang Kahadean. Pag an satong mga plano asin gibo inaayon niato sa kabòtan nin mahal na Dios, nagkakaigwa nin bàgong kahulugan an satong mga gibo. Si Cristo nagtukdô sa Mateo 10,39: “An nagpapahalaga sa saiyang buhay, mawawàran kaiyan; an nawawàran nin buhay huli Sako, magkakamit kaiyan”. Si Cristo an nagtataong kahulugan sa satong buhay.

Tandâ kan Satong Ambag. An limang tinapay asin duwang sirâ na voluntad na tinao nin sarong aki tandà kan satong pakisumaro sa dakulang plano nin Dios. Ano man an satong ambag sa Dios? Ano man an satong limang tinapay asin duwang sirâ? Sa pagsimbag kaining hapot, marhay girumdomon an sinabi ni Cristo sa Mateo 9,13: “Pagkaherak an màwot Ko, bakong atang”.

An satong mga pangadie asin debosyon, kun tunay na pagsamba sa Dios asin bakong pakitang-tao saná, maninigong dolot sa Kagurangnan. An satong mga pagtabang sa kapwa – an pakidumamay sa panahon nin problema asin pagraní sa mga nangangaipo, siring kan satong programang TADA (Tanganing An Dukha Atamanon) asin mga community pantries – ini an satong ambag sa pagmuknà kan Saiyang Kahadean.

Ano man kun sadít o dikít saná an kaya niatong iambag? An milagro kan limang tinapay asin duwang sirâ, pagirumdom sato na an Dios an mahipnò, an makumpleto, asin mapabunga kan satong mga marhay na gibo asin paghingowa.

…

GIYA SA PAGHIRAS SA SADIT NA KOMUNIDAD • Ano man an satong ambag na limang tinapay asin duwang sirâ sa pagpadagos kan misyon ni Cristo digdi sa kinàban?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Siring sa mga Karnero na Daing Pastor

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hulyo 18-24, 2021. Basahon an Evangelio gikan sa Marcos 6,30-34 (Ika-16 na Domingo sa Ordinariong Panahon – B )

…

Sa evangelio inagda ni Jesu Cristo an Saiyang mga disipulos na magpahingalo ta hale pa sana an mga ini sa misyon. Alagad Siya man sana mismo an nagdesisyon na tukdoan man giraray an naghaharalat na katawohan nin huli ta nahirô an Saiyang puso kan mahiling Niya sinda na “siring sa mga karnero na daing pastor”.

Si Cristo an marhay na Pastor, kaya nganì an saiyang presencia nagin singkogan para sa mga namamayo sa Israel. Dakul na beses sa mga Evangelio binatikos ni Jesus an mga escribas, fariseos, asin kapadean, nin huli sa saindang saláng pagpadára sa mga tawo. Sa lado kan gobyerno si Hadeng Herodes asin saiyang mga alipores kadakul an abuso sa saindang kapangyarihan.

Patanid sa mga Maraot na Pastor. An kapangyarihan tinatao nin Dios sa mga tawo para sa karahayan nin gabos. Kaya an Dios dai naoogma sa mga ginagamit an saindang katongdan sa karâtan. Sa Jeremias 23,1 nasusurat: “Herak man sa mga pastor na nagpapabayà na an Sakong mga karnero mawarà asin mawarak, olay nin Kagurangnan.” Asin sinabi pa: “Papadusahan ko kamo huli kan saindong kapabayaan.” May nagkapirang tandà nin mga maraot na pastor.

Binabayaan ninda an saindang inaataman; an saindang puso bakong pusog sa pagtabang kundi sa pakinabang. Si Cristo nagsabi sa Juan 10,11: "An marhay na pastor minadusay kan saiyang buhay para sa karnero.”

Minasuway sinda sa Dios. An saindang kagustuhan an saindang pinapaorog, an kinàbanon na ambisyon an saindang sinusunod. Si Cristo nagsabi sa Juan 6,38: “Naghilig Ako hale sa langit nganing gibohon an kabòtan kan nagsugò Sako, bakong an kabòtan Ko.”

Ineenot ninda an saindang sadiri, kisa kapwa o banwaan. Kaya hanggang ngonian nagsasakit an banwaan asin kadakul an nasa pagtios nin huli sa pagkurakot asin pagpaorog sa sadiri kan mga namamayo. Si Cristo nagsabi sa Mateo 20,26-28: “An siisay man saindo na boot magin dakula dapat magin surugoon nindo. An siisay man na boot magin enot dapat magin oripon nin gabos; arog kan Aki nin Tawo, na dai nagdigdi tanganing paglingkodan kundi tanganing maglingkod.”

Inuutikan ninda an banwaan asin dinadara sa maraot. Rinaraot ninda an tiwala nin tawo sa mga institusyon nin sociedad, asin binabasang an katotoohan tanganing malansé an mga tawo sa saindang sadiring agenda. Si Cristo nagpatanid sa Mateo 18,6: “An siisay man na magin dahilan nin pagkakasalà kan saro sa mga saradit na ini na minatubod sako, mas marhay pang gakudan siya nin gapong gilingan sa liog asin lunudon sa lawod.”

Pagpilì sa Marhay na Pastor. Igwa kita nin pagpipilì na kaipuhan gibohon: an dalan kan mga maraot na pastor o an dalan kan satong Marhay na Pastor. Magigibo ta ini sa nagkapirang paagi.

Magpilì kita nin mga marhay na pamayó. Dai mahaloy eleksyon na naman sa satong nacion. Pilion ta man lugod an pulitika nin prinsipyo asin paglingkod bako an pulitika nin personalidad asin kwarta.

Suportahan ta an mga marhay na gibo asin plano kan satong mga pamayong-lingkod. Magkasararò kita sa tama, sa katotoohan, asin karahayan kan kagabsan.

Pilion ta na kita mismo magtalubò na magin siring sa Marhay na Pastor. Nin huli ta lambang saro sato inaapod sa paglingkod, sa pagkamoot, asin paghiras kan Marhay na Bareta. Tanganing mautob sato an panuga nin Dios sa Jeremias 3,15: “tatàwan ko Kamo nin mga pastor susog sa Sakong puso”.

…

GIYA SA PAGHIRAS SA SADIT NA KOMUNIDAD • Maghiras nin experiencia kun pa’no naapektohan nin sarong “maraot na pastor” o “marhay na pastor”; o kun pa’no ika man nagin marhay na pastor sa kapwa.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Inapód, Sinugò, asin Tinugon para Sa Misyon

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hulyo 11-17, 2021. Basahon an Evangelio gikan sa Marcos 6,7-13 (Ika-15 Domingo sa Ordinariong Panahon - B)

…

Sa evangelio sinugo ni Jesu Cristo an Saiyang Doce Apostoles sa pagmisyon. Siring sa mga apprentice o on-the-job (OJT) trainees, yaon si Cristo sa paggiya sainda mantang inaarog nindang gibohon an mga ginigibo Niya: magtukdô manungod sa Kahadean, magbulóng nin mga may helang, asin magpaluwás nin mga demonio.

Natà ta Doce an Saiyang pinili? An institusyon kan Doce Apostoles siring sa doceng tribu kan Piniling Banwaan na Israel. Bako saná sinda mga pamayó o mga enot na obispo kan Simbahan na tinogdás ni Cristo, kundì an Doce nagrerepresenta sa Simbahan mismo, an bàgong Banwaan nin Dios. Kaya kan sinubol sinda ni Cristo sa pagmisyon susog sa istorya sa evangelio, asin bago kan Saiyang pagsakat sa langit, bako man saná an Doce (o an natadang once sa panahon kan Ascension) an sinusugo Niya kundi an bilog na Simbahan asin an lambang miembro kaini.

Ano an mensahe kan istoryang ini sato sa panahon ngonian? Paghorop-horopan niato ining tolong ginibo ni Jesus sainda: inapód Niya sinda, asin sinugò sa misyon, dangan tinàwan nin nagkapirang tugon.

Inapód na magin mga disipulos ni Cristo. Lambang sarô sa Doce, inapód ni Cristo halè sa manlaen-laen nindang kamugtakan sa buhay, tanganing magin mga disipulos Niya. Kita man nagin mga disipulos ni Cristo salamat sa gracia kan sacramento kan bonyag.

Sa taon kan ika-500 na aniversario kan Cristianismo sa Pilipinas, marhay na girumdumon kun pa’no ining pag-apod ni Cristo nakaabot sato halè sa Jerusalem, sa paagi kan Roma, dangan España. Kan taon 1521 napadpad si Magellan sa mga isla na aapodon Pilipinas, alagad an evangelización nagpoon sana kan 1565 sa pagbalik kan mga Kastila sa pamamayo ni Miguel Lopez de Legazpi. Sa Bicol, nagpoon an Simbahan kan 1573 sa expedicion ni Juan de Salcedo asin pagtogdas niya kan enot na parokya sa Bicol, an Santiago de Libon. Enot nag-abót an mga fraileng Agustino alagad an mga Franciscano an nagpadagos asin nagpalakóp kan pagtubod sa region.

Sinugò sa misyon nin evangelización. An gracia nin pagtubod dai tinao sato para sa sadiri lamang, kundi para ihirás. Sa Mateo 28, 19-20, sinugo ni Jesu Cristo an Simbahan na “padumán sa gabos na tawo saen man na lugar; gibohon sindang mga disipulos Ko. Bonyagan sinda sa ngaran kan Ama, kan Aki, asin kan Espiritu Santo. Tukdoan sindang magkuyog kan gabos na pinagboot Ko saindo.” An Cristiano inapod bakô saná na magsimba kundi na magin Simbahan, na nagmimisyon.

Sa saindang pagmisyon an mga Apostoles nagbalangibog kan Marhay na Bareta sa manlaen-laen na paagi. Kita man inaapod na magmisyon susog sa graciang tinaó sato kan Espiritu. Si San Pablo nagtukdô 1 Corinto 12,4-5: “Manlaen-laen an mga balaog, alagad saro sana an Espiritu. Manlaen-laen an paagi nin paglingkod, alagad saro sana an Kagurangnan. Igwa nin manlaen-laen na kakayahan sa pagtrabaho alagad saro sana an Dios na nagtatao kan mga kakayahan na iyan sa gabos na tawo.”

Tinugon na danay na magsarig sa Dios. Alagad minsan magabat na an misyon, may dinagdag pang tugon si Cristo: dai magdara nin anuman na bagay kundi an pinakadikit na kaipuhan. May razón kun natà hinagad ini ni Cristo sa mga Apostoles: tanganing dai sinda – asin kita man – magsarig sa mga bagay na kinàbanon kundi sa Dios saná. Kun an Dios dai kita pinapabayaan sa aroaldaw niatong pangangaipo, ano pa daw kun kita naggigibo kan Saiyang misyon na tinao sato?

…

GIYA SA PAGHIRAS SA SADIT NA KOMUNIDAD • Ano sa hilíng mo an balaog o kakayahan na tinao saimo nin Dios para sa misyon? Maghirás kun pa’no mo nagamit ini sa pagbalangibog kan Marhay na Bareta.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Profeta Dai Inaako sa Sadiring Banwa

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hulyo 4-10, 2021. Basahon an Evangelio gikan sa Marcos 6,1-6 (Ika-14 Domingo sa Ordinariong Panahon – B ).

…

Sa evangelio nagbalik si Jesus sa Nazareth, Saiyang sadiring banwa, alagad sinikwal Siya kan Saiyang mga kahimanwa. Imbes na ika-urgollo, dai ninda maako na an sarong karpintero na nagdakula sa saindang lugar, na an pamilya midbid ninda, makataram asin makatukdo nin may autoridad siring sa ginigibo Niya.

An istoryang ini nagpapagirumdom man sato nin mga experiencia na kita man hinabuan, sinikwal, pinasipara, linibak, pigsalaan, pinakaraot, o ginibohan pa ngani nin maraot. Ano an Cristianong simbag sa mga ini?

Arogon ta si Cristo. Saro man sana an Saiyang paagi nin pagsimbag sa makuring pangyayaring ini: pagkamoot. Maski dai pa Siya maako kan Saiyang mga kahimanwa, dai Siya nagtunong sa pagkamoot sainda. May nagkapirang paagi an satong mamomòton na simbag.

Enot maghingowa na makasabot. Pag kita pighabuan o nagibohan nin maraot, an tentacion iyo na madagit asin magbalós sa kapwang naggibo kaini sato. Alagad pinapagirumdom kita sa Santiago 1,19: “An lambang saro saindo kaipuhan maliksing maghinanyog, maingat sa pagtaram, saka maluya sa pagdagit.”

Kun baloón tang saboton an kapwa, tibaad maaaraman ta kun natà nagibo niya an siring, o ano man an saiyang pig-aagihan, o tibaad may razon o sentimiento man siya na kaipuhan dangogon. Dangan magtao man kita nin panahon na paghorop-horopan an satong sadiri. Natà ta ako nakulgan nin marhay? Malinig man daw an sakong intencion? Tibaad igwa man ako nin pagkukulang?

Pilion na makipag-ulian. Sa Mateo 5,23-24, si Jesus nagtukdo: “Kun madara ka nin dolot sa altar, dangan marumduman mo na dagit saimo an saimong tugang, iwalat mo ngûna an dolot sa atubang kan altar, dangan makiulian ka saiya. Saka ka magbalik tanganing magdolot sa Dios.”

Sa halos gabos na panahon, an pagpatawad an pinakamarhay asin mamomòton na magigibo niato sa kapwang nagkasalà. An pinaka ladawan kaini daing iba kundi si Cristo mismo na maski naghihingagdan na sa cruz nakua pang ipagkaulian sa Ama an mga nagpapasakit Saiya. Sa Lucas 23,34 sinabi Niya: “Ama, patawada sinda ta dai ninda aram an saindang ginigibo”.

Siring man an paghagad nin kapatawadan, kun kita nakakulog o nakagibo nin maraot. Asin an pakipag-ulian nakukumpleto kun may pagmàwot na magbàgo na magin mas marhay asin mamomòton na kapwa tawo.

Magdanay sa katanosan. Sinabi ni Jesus sa evangelio na siring sa mga profetang pinadara sa banwaan Israel, Siya man pighabuan nin saiyang mga kahimanwa. Ano an yaon sa mga profeta ta nagdadanay sinda sa saindang misyon maski sa hampang nin kadakul na pasakit asin oposisyon? Yaon sainda an katanosan.

An katanosan iyo an pagsunod sa kabòtan nin Dios. Sa Juan 6,38, si Jesus nagsabi: “naghilig Ako hale sa langit nganing gibohon an kabòtan kan nagsugo Sako, bakong an kabòtan Ko”. Minsan naghuhonà kita na kita an tama, alagad kun ini bako susog sa kabòtan nin Dios, kita matanos sa sadiri saná (self-righteous).

An gracia kan Espiritu na tinatao nin Dios sa mga matanos iyo an magpapanggana sato laban sa fuerza nin kasàlan asin kagadanan. Kaya si San Pablo nakapagsabi sa 2 Corinto 12,10: “Ikinakaogma ko an sakuyang kaluyahan, an mga kamudahan, an persecucion, asin kasakitan na tinios nin huli sa pagkamoot ki Cristo. Huli ta ako makusog sa panahon na ako maluya.”

…

GIYA SA PAGHIRAS SA SADIT NA KOMUNIDAD • Maghiras nin experiencia na minsan ika naggigibo nin tama, pighabuan ka o piggibohan nin maraot. Ano an laog kan saimong mga pangadie sa mga panahon na ini?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Narahay Ka kan Saimong Pagtubod

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hunyo 27-Hulyo 3, 2021. Basahon an Evangelio gikan sa Marcos 5,21-43 (Ika-13 Domingo sa Ordinariong Panahon - B).

…

Sa evangelio may duwang istorya nin milagro: an pagbulong sa babaeng doceng taon nang nagtitios nin pagdugo asin an pagbuhay sa doce años na daragitang nagadan sa helang. Minsan may kahalagahan an numero doce sa Piniling Banwaan nin Dios (Doceng Tribu nin Israel, Doce Apostoles ni Cristo), an duwang istoryang ini padagos na nagpapamidbid sato sa Dios: kun siisay Siya asin kun ano an pangapodan Niya sato – sa paagi kan mga tataramon asin gibo ni Jesu Cristo.

“Talitha kumi (Daragita sinasabi ko saimo, tumindog ka).” Ining tataramon ni Jesu Cristo nakakabuhay sa gadan asin nagpapahayag kan Saiyang diosnon na kapangyarihan. Dios sana an may kapangyarihan sa buhay, asin pagtao nin buhay an Saiyang kabotan. Sa Kadunongan 1,13-14 mababasa niato: “An kagadanan bakong gibo nin Dios. Dai Niya ikinaogma na an mga buhay Magadan. An gabos na bagay linalang Niya nganing mabuhay.”

Minsan ngani dai magtaram, nabulong ni Jesus itong babaeng nagtikwil kan Saiyang gubing. Ta ini an Saiyang misyon sa daga. Sa Juan 10,10 sinabi Niya: “Nagdigdi Ako tanganing magkaigwa sinda nin kapanoan nin buhay.”

“Siisay an nagtikwil sako?” An simpleng hapot na ini nagdulot nin takot asin takig sa babaeng narahay pa sana ni Jesus. Nata? Nin huli ta bawal sa mga arog niyang “maati” (unclean) sa saindang tradisyon an makiibahan sa mga tawo o magkapot sa kiisay man nin huli ta an mga ini saiyang mauulakitan kan saiyang pagkamaati. Alagad sa pag-ako niya kan saiyang gibo kinumpleto ni Jesus an pagbulong saiya asin minidbid siya sa katawohan na bako nang maati. Tinawan siya nin bagong buhay.

Kita man inaapod ni Cristo na magrani asin magsarig Saiya na dai nang ibang sinasarigan. Itao ta an bilog na sadiri sa Kagurangnan na enot nang nagtao kan Saiyang sadiri sato – sa Saiyang pagigin Dios na nanitawo asin sa pagdusay kan Saiyang buhay sa cruz. Sabi ni San Pablo sa 2 Corinto 8,9: “Aram nindo an pagkamatinao ni Jesu Cristo na satong Kagurangnan. Siya mayaman alagad nagpakadukha, tanganing kamo mapayaman kan Saiyang kadukhaan.”

“Dai ka mahandal; magtubod ka sana.” Sa mga tataramon na ini pinakusog ni Jesus an boot kan amang si Jairo sa hampang kan bareta na gadan na an saiyang aki. Iyo man ini an sinasabi sato kan Espiritu sa satong paglakbay sa dalan ni Cristo asin pagpasan kan satong cruz. Aram nin Dios na an Saiyang mga inapod, maagi nin pagduwa-duwa, pagkatakot, pagkadapa, minsan ngani pagkawara pa sa tamang dalan nin huli sa mga tentacion. Kaya an Saiyang balaog yaon para sa mga naghahagad kaini. Sa katunayan, an linyang “Dai matakot”, sinambit labi 100 na beses sa Lumang Tipan; asin 44 beses sa Bagong Tipan, an kadaklan kaini si Jesus mismo an nagsabi sa Saiyang mga disipulos.

Ano an nakua ni Jairo sa pagrani asin pagsarig ki Cristo? An buhay kan saiyang aki. Ano an nakua kan babaeng naghehelang sa halawig na panahon sa pagkapot niya sa gubing ni Cristo? Natawan siya nin bagong buhay.

Makua ta man lugod an adal kaining evangelio, orog na sa panahon na ini nin crisis asin pandemia, tanganing siring sa babaeng nagkapot sa Saiyang gubing, pasabongan kita ni Cristo: “Narahay ka kan saimong pagtubod. Mapasaimo an katoninongan asin magdanay ka sa saimong pagkarahay.”

…

GIYA SA PAGHIRAS SA SADIT NA KOMUNIDAD • Maghiras nin experiencia nin pagbalo sa satong pagtubod, asin kun haen an presencia nin Dios sa buhay mo sa panahon na idto.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Siisay Ini na Kinukuyog kan Duros asin Dagat?

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hunyo 20-26, 2021. Basahon an Evangelio gikan sa Marcos 4,35-41 (Ika-12 Domingo sa Ordinariong Panahon - B).

…

An istorya sa evangelio iyo an pagpatoninong ni Jesu Cristo kan duros sa Danao nin Galilea. May nagkapirang paagi para makua an kahulugan kaining istorya nin milagro. Saro kaini an literal o historical na pakasabot na ini sarong tunay na pangyayari. Saro pa iyo an paghiling kaini bilang alegoria, na an mga elemento sa istorya simbolo nin iba pang mga bagay.

Bilang literal o historical na pangyayari, pinapahayag kan istorya na si Cristo may kapangyarihan sa mga fuerza nin kalikasan. Kaya ngani nagharapot an mga disipulos Niya: “Siisay ini na kinukuyog kan duros asin dagat?”

Para sa mga Judío, Dios sana an may siring na kapangyarihan, siring kan ginibo Niya sa istorya kan paglalang sa Genesis 1, kan tinawan Niya nin orden an langit asin daga, asin an naghahagubuhob na kadagatan nagkaigwa nin mamaráng dagâ. Siring man kan ginibo nin Dios sa paagi ni Moises sa Exodo 14 na binangâ Niya an Dagat na Pula tanganing makaagi an Saiyang Piniling Banwaan. Dangan kan nakaabot na sinda sa ibong na pampang, binalik an dagat, asin nagkaralamós an mga taga-Egipto na boot sindang ibalik sa pagigin oripon.

Kaya an pagpatoninong ni Cristo kan duros sa danao tanda kan Saiyang pagka-Dios. Asin an Saiyang diosnon na kapangyarihan ginamit sa pagkamoot asin pagligtas sa Saiyang mga disipulos.

Bilang alegoria, an duros sa istorya nagrerepresenta kan mga bagyo sa buhay nin tawo. Sa panahon nin pandemia, an dati nang mga problema niato dinagdagan pa kan peligro nin helang asin kagadanan, kan mga pagkatakot asin iba pang mental health issues, kan pagkawara nin trabaho asin pagsara nin mga negosyo. Kaya napapanahon ining istorya.

Siring sa istorya, sa tahaw kan satong mga bagyo sa buhay, minsan dai ta namamatean an presencia nin Dios. Hapot nganì sa sikat na awit ni Gary Valenciano: “Natutulog ba ang Diyos?” Alagad an mensahe kan istorya iyo na magrani kita sa Dios asin Siya an mapatoninong kan duros asin dagat sa satong buhay. Sa pa’nong paagi Niya kita tinatabangan sa paghampang niato sa mga problema sa buhay?

Bilang Dios Ama, tinatao Niya an satong mga pangangaipo. Balikan ta an istorya kan satong buhay asin mahihiling ta na sa kadakul na problemang nag-aragi, dai Niya kita pinabayaan. Kaya si Cristo nagtukdo sa Mateo 6,31-33: “Dai kamo magparahadit kun saen kamo makua nin kakanon o inumon o gubing. Aram kan saindong langitnon na Ama na kaipuhan nindo an mga bagay na ini. Alagad hanapa ngùna nindong enot sa gabos an Kahadean nin Dios saka an Saiyang katanosan, asin mapapasaindo man an mga bagay na ini.”

Bilang Dios Aki, iniimbitaran Niya kita sa Lucas 9,23: na “magsunod Saiya, lingawan an sadiring buhay, asin magpâsan kan cruz aroaldaw”. Pag inako ta an mga kadificilan na satong hinahampang bilang cruz, mahihiling ta kun pa’no kita kaini pinapakusog, pinapabanal, asin liniligtas. Asin kun pinapâsan ta an satong cruz, mahihiling ta na kaiba ta si Cristo sa pagpâsan kaini.

Bilang Dios Espiritu Santo, sa mga naghahanap sa Saiyang pasabóng tinatao Niya an kaliwanagan sa tahaw nin kapurisawan, asin ilaw sa madiklom na dalan. Sa Isaias 11,2 nanugà an Dios na itatao sato “an Espiritu nin kadunongan saka pakasabot, an Espiritu nin marhay na hatol saka kusog, an Espiritu nin pakaaram saka pagkatakot sa Kagurangnan.”

…

GIYA SA PAGHIRAS SA SADIT NA KOMUNIDAD • Maghiras nin bagyo sa buhay na inaagihan mo ngonian o nalampasan na, asin kun haen an Kagurangnan sa mga panahon na ini.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song kam

 

Siring sa Pisog nin Mustasa

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hunyo 13-19, 2021. Basahon an Evangelio gikan sa Marcos 4,26-34 (Ika-11 Domingo sa Ordinariong Panahon - B).

…

Sa evangelio, pigtukdo ni Jesu Cristo sa katawohan an duwang parabola manungod sa banhi. An mga parabola mga istorya ni Jesus na hale sa mga bagay asin sitwasyon nin buhay nin mga tawong naghihinanyog Saiya.

Sa mga nagdadangog nin hababaw o sa mga may ibang katuyuhan sa pagdangog ki Jesus (siring baga sa Saiyang mga kaiwal), garo ini mga istorya saná na may mapupurot na adal sa buhay. Alagad para sa mga maimbod na disipulos, tinutukdo ni Cristo sa paagi kan mga ini an mga misteryo kan Kahadean nin Dios. Ano an mensahe sato kan duwang parabolang ini?

An kamurawayan kan Kahadean yaon sa mga saradit na bagay. Si Jesus nagtukdo na an Kahadean nin Dios nakakabaing sa pisog nin mustasa, pinakasadit sa mga pisog alagad pag nagtalubo mas dakula pa kisa ibang poon nin kahoy. Sa kinaban na ini na kadakul an nagmamàwot nin kapangyarihan asin kayamanan, an Dios nagpahayag na an Saiyang kamurawayan yaon sa mga kasaradayan.

Para labanan an imperio kan Egipto asin patalingkason an Saiyang Piniling Banwaan, pinili Niya an sarong nagdulag sa sadirng banwaan, si Moises. Para labanan an higanteng si Goliath asin magin hade kan Israel, pinili Niya an sarong joven na pastor, si David. An Saiyang bogtong na Aki namundag bako sa pamilyang mayaman o makapangyarihan, kundi sa dukhang mag-agom na si Maria asin Jose. Sa mga milagro ni Jesus, an dugi ginamit Niya tanganing makahiling giraray an mga buta; an limang tinapay asin duwang sira, ginamit tanganing pakakanon an labi sa limang ribo; asin an tinapay asin alak nagigin Saiyang Hawak asin Dugo na nagtatao nin buhay na daing kasagkoran.

An pagmukna nin Kahadean gibo nin Dios na hinihiras Niya sato. Kita siring sa paraoma sa parabola na nagsabwag nin banhi, alagad an Dios an nagpapatalubo kan mga ini sagkod sa pag-ani. Sa paghiras sa gibo nin Dios, may sinabi si Sta. Teresa de Calcutta: “Bako gabos sato kayang maggibo nin mga darakulang bagay, alagad kaya niatong maggibo nin mga saradit na bagay na may dakulang pagkamoot.”

An pagtabang kan mga aki sa mga gibo sa harong; an pagtukdo nin mga gurang sa saindang mga makuapo kan mga pamibi asin debosyon; an pag-asikaso nin mga magurang sa mga pangangaipo kan saindang pamilya aroaldaw; an mahigos asin honestong pagtrabaho nin mga empleyado; an paglingkod nin mga namamayo – gabos ini mga saradit na gibo na pag tiniripon nangyayari an mga darakulang bagay: pagkamoot, katoninongan, katanosan, pasiring sa pagmukna kan Kahadean.

Asin kun mag-abot an panahon na nakamate kita nin kagabatan sa paggibo nin marhay, o garo daing padumanan an satong mga paghigos, girumdomon an sinabi ni Jesu Cristo sa Mateo 17,20: “Kun kamo igwa nin pagtubod na arog kan pisog nin mustasa, puedeng sabihon nindo sa bulod, ‘Dumuman ka sa sarong lugar, asin maduman iyan!’ Daing magigin imposible saindo.” Bako nin huli ta sa satong sadiri kita makapangyarihan, kundi na kita yaon sa lindong nin Dios asin an satong gibo susog sa Saiyang kabotan. Sabi ngani sa Filipo 4,13: “An gabos magigibo ko huli ki Cristo na nagpapakusog sako.”

…

GIYA SA PAGHIRAS SA SADIT NA KOMUNIDAD • Maghiras nin saday na bagay na saimong nagibo o ginigibo para sa mga namomotan, sa kapwa, asin sa Kahadean nin Dios.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song kam

 

Sarong Hawak, Sarong Espiritu ki Cristo

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Hunyo 6-12, 2021. Basahon an Evangelio gikan sa Marcos 14,12-16,22-26 (Solemnidad kan Corpus Christi).

…

Sa evangelio, sinabi ni Jesus sa Saiyang mga disipulos sa Huring Pamanggi: “Akoa nindo, ini an Sakuyang hawak” dangan “Ini an Sakuyang dugo, dugo nin bagong tipan, dugo na papabuloson para sa gabos”.

Itinukdo ni Jesus an tinutubodan niatong misteryo poon pa kaidto sagkod ngonian: na Siya totoong presente sa Eucaristía asin an satong inaako sa comunion na hostia asin alak totoong Saiyang hawak asin dugo. Inaapod man ini kan Simbahan na “transubstantiation”.

Ano an Eucaristía? Sabi sa Catechism of the Catholic Church (CCC 1324) ini an “burabod asin kaitaasan kan buhay Cristiano”. Si Jesus nagtukdo sa Juan 6,54: “An minakakan kan sakuyang laman asin minainom kan sakuyang dugo igwa nin buhay na daing kasagkoran, asin bubuhayon ko sa huring aldaw”. Sabi sa Catechism for Filipino Catholics (CFC) an Eucaristía sacramento nin sacrificio, comunion, asin presencia.

An Eucaristía Sacramento nin Sacrificio nin huli ta ini “representacion asin pagrumdom kan sacrificio ni Cristo sa cruz, asin ginagamit kaini an bunga kan sacrificio sa cruz” (CFC 1690). Anoman na gibong marhay na pig-aatang sa Kagurangnan, napapabanal, nagigin sacrificio. Sa banal na Misa dinadara ta an satong mga intencion, pangangaipo, dolot na atang, asin an mismong sadiri – ini satong mga sacrificio na pinakikisumaro ta sa orog kadakulang sacrificio ni Cristo na iyo an “padi, atang, asin altar nin sacrificio”.

Bilang satong sacrificio nin pasalamat, an Banal na Misa naghahagad kan satong “bilog, tuyo, asin aktibong (full, conscious, and active) participacion sa mga celebracion kan liturgía”, susog sa Sacronsanctum Concilium (SC 14), an Constitucion kan Banal na Liturgía hale sa Vatican II.

An Eucaristía Sacramento nin Comunion niato ki Cristo asin sa lambang saro, nin huli ta ini sacramento nin pagkamoot, tanda nin pagkasararo, bugkos nin pagmakulog, asin banquete Pascual (CFC 1702; SC 47). Sa Santa Misa sa Ikatolong Pamibi sa Eucaristía, an padi minasabi: “itugot Mo na kaming binabago kan Hawak asin Dugo kan Saimong Aki, panô kan Saiyang Espiritu Santo, maabtan man lugod na sarong hawak asin sarong espiritu ki Cristo”.

An minimum na hinahagad sato sa pag-ako ki Cristo sa comunion iyo na kita dapat nasa “estado nin gracia” o daing nacomitir na kasàlan mortal. Sa panahon nin pandemia, an satong comunion sa lambang saro sa laog kan Misa naipapahiling sa pag-observar niato kan minimum health standards tanganing dai maglakop an virus, asin sa luwas kan Misa, sa pagmangno asin pagtabang niato sa kapwang nangangaipo.

An Eucaristía Sacramento nin Presencia. “Si Cristo presente sa celebracion Eucaristico sa mga nagtitiripon sa Saiyang ngaran, sa persona kan ministro, sa Saiyang Tataramon, asin sa sa Banal na Hostia na bolanos asin dai natatapos” (CFC 1722; SC 7).

Pagkatapos kan Misa, kitang mga nagsirimba dara-dara na an presencia ni Cristo saen man kita magduman, lalo na pag kita bilang Simbahan “nangangadie, naggigibong-herak, naglalakbay pasiring sa buhay na daing kasagkoran, nagbabalangibog kan tataramon nin Dios, asin namamayo sa Banwaan nin Dios” (CFC 1721)

…

GIYA SA PAGHIRAS SA SADIT NA KOMUNIDAD • Maghiras kun ano an saimong pinakamemorableng experiencia nin pagsimba. Sa panahon nin pandemia ano an mga significanteng experiencia mo sa Eucaristía?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song kami.

 

An Dios Nagpamidbid Sato bilang Santisima Trinidad

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Mayo 3-Hunyo 5, 2021. Basahon an Evangelio gikan sa Mateo 28,16-20 (Solemnidad kan Santisima Trinidad).

…

Sarong vez sa taon nagcecelebrar asin naghorop-horop an Simbahan kan pinakahararom na misteryo nin satong pagtubod: an Santisima Trinidad. Para masabotan ini, mapoon kita sa kun ano ini bakô. Bakô ini manungod sa mathematics, ta bako man 1+1+1=1. Bakô ini falta razón, ta daing imposible sa Dios. Bakô ini gibo saná nin tawo o imbento kan Simbahan, nin huli ta dai ini nagpoon saná sa Consejo kan Nicea kan 325 AD.

Nagtutubod kita sa Santisima Trinidad nin huli ta ini an pagpamidbid nin Dios kan Saiyang sadiri.

Enot nagpamidbid sato an Ama bilang kaglalang nin gabos asin tagapagligtas sa kaoripnan kan Saiyang Piniling Banwaan. Dangan kan pagdatong ni Cristo, nag-abot an kapanoan kan Saiyang pagpamidbid. Sabi ni Jesus sa Juan 10,30: “Ako asin an Ama saro”; asin sa Juan 14,9: “An nakahiling sako, nakahiling na kan Ama”.

Dangan sa Juan 14,16-17, sinabi man Niya: “Mamimibi ako sa Ama na itao Niya saindo an saro pang Parasurog na magigin kaiba nindo sagkod pa man. Siya na Espiritu nin katotoohan...” Ini an Espiritu kan Ama asin Aki na pinadara sa kinaban asin huminilig sa mga disipulos sa Pentecostes kaya natogdas an Simbahan.

Kaya kan si Jesus nagtaong-misyon sa Saiyang mga disipulos bago Siya suminakat sa langit, sa Mateo 28,19 tinugon Niya sindang pumaduman sa mga banwaan, gibohon an mga ining disipulos Niya, asin bonyagan “sa ngaran kan Ama, asin kan Aki, asin kan Espiritu Santo”.

Naliligtas kita nin huli sa satong pagtubod sa Dios na nagpapamidbid sato.

Sabi ni Jesus sa Juan 3,16: “An Dios namoot na gayo sa kinaban, kaya tinao Niya an Saiyang Bogtong na Aki, tanganing an nagtutubod Saiya dai mawara, kundi magkamit nin buhay na daing kasagkoran.”

Alagad an pagtubod na ini bako saná pakasabot asin pag-oyon sa mga doctrina. An pag-ako ki Cristo bilang Kagurangnan asin Paraligtas, iyo an pag-arog sa Saiyang maimbod na pagsunod sa kabòtan kan Ama. Asin an satong pagsunod minadara sato na magin kabaing Niya. Nin huli ta an huring padumanan nin pagsamba iyo na kita nagigin siring sa satong pigsasamba.

Sabi sa Genesis 1,27: “linalang nin Dios an katawohan siring sa Saiyang ladawan”. Kun an Dios nagpamidbid bilang Santisima Trinidad, an misteryong ini nagtuturò sato sa pinakatotoong version kan satong sadiri.

Pag kita nagtutubod sa Ama na mamomòton asin maheherakón, matanos asin maimbod, kita man minatalubo sa pagigin mamomòton asin maheherakón, matanos asin maimbod.

Pag kita nagtutubod sa Aki, kita minatalubò sa tunay na pagkamoot, sa pagmangno sa kapwa, orog na sa mga nawawarà asin sa mga pinakasaradit satuyà, sa pakipag-amigo sa mga kaiwal asin pagpatawad sa mga nagkasalà satuyà, asin sa pagdusay kan sadiri para sa mga namomòtan.

Pag kita nagtutubod sa Espiritu Santo, kita minatalubò sa kabanalan asin katotoohan, asin padagos na pagbàgo sa sadiri, tanganing magin dalan nin pagbàgo kan sadiring pamilya, banwaan, asin kinàban.

Sa huri, an Santisima Trinidad sarong misteryo bako nin huli ta dai ta ini masasabotan, kundi nin huli ta an Dios nagpamidbid sato kan Saiyang sadiri, asin sa satong pagtubod, kita maligtas asin makamit an buhay.

…

GIYA SA PAGHIRAS SA SADIT NA KOMUNIDAD • Maghiras kun ano an saimong pakasabot sa Santisima Trinidad, asin nin experiencia kun pàno mo nasasabuhay an pagtubod sa Dios Ama, Aki, asin Espiritu Santo

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song kami.

Sarong Hawak asin Sarong Espiritu ki Cristo

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Mayo 23-29, 2021. Basahon an Evangelio gikan sa Juan 20,19-23 (Solemnidad nin Pentecostes).

…

An evangelio iyo an version ni San Juan kan paghilig kan Espiritu na nangyari sa banggi kan aldaw na si Jesus nabuhay-liwat asin nagpahiling sa Saiyang mga disipulos. Alagad an istorya kan Pentecostes yaon sa ikaduwang capitolo kan mga Gibo kan mga Apostoles.

An Pentecostes tataramon na Griego na boot sabihon ika-50 aldaw. Para sa mga Judio, ika-50 aldaw poon sa Pascua, na fiesta nin pag-ani asin pagrumdom kan pagtao nin Dios kan Tugon sa Saiyang Piniling Banwaan duman sa bulod kan Sinai. Para sa mga Cristiano, ika-aldaw poon sa Domingo de Resurreccion asin celebracion kan paghilig kan Espiritu Santo asin pagkamundag kan Simbahan. Kadakul an gibo kan Espiritu sa Simbahan, matutok kita sa toló.

1. Espiritu nin Kapatawadan. Sabi ni Jesus sa Juan 20,22-23: “Akoon nindo an Espiritu Santo. An kiisay man na kasàlan na saindong patawadon, napapatawad; an kiisay man na kasàlan na dai nindo patawadon, dai napapatawad.” Tinao ni Cristo sa Simbahan an katongdan na magpatawad sa kapangyarihan kan Espiritu. Ini ginigibo kan Simbahan sa mga sacramento nin Pagbonyag asin Reconciliacion.

An kapatawadan nin Dios constant, dai nagbabago. Kita an paburobago. Minsan dai kita nag-aako nin kasàlan, o habo magbago nin saláng gawe. Alagad kun maghagad kita nin tawad sa Dios asin magmàwot na magbâgo, an kapangganahan sa kasàlan asin kagadanan itatao sato.

2. Espiritu nin Katotoohan. Nanugâ si Jesus sa Juan 16,13: “Pag-abot kan Espiritu nin katotoohan, tatabangan Niya kamo na masabotan an gabos na katooohan”. An katotoohan na ini daing iba kundi an Evangelio ni Cristo – an Marhay na Bareta na an Dios namomoot sato, asin linigtas kita sa kasàlan, na hanggang sa ngonian pinapabanal kita.

Sa istorya kan Pentecostes sa mga Gibo kan mga Apostoles, kan an mga disipulos nagpahayag kan Marhay na Bareta, nagkangaralas an mga tawo na hale pa sa manlaen-laen na lugar, nin huli ta nasabotan ninda an sinasabi nin mga disipulos maski iba-iba an saindang lenguaje. Ini nin huli ta an katotoohan kan Evangelio universal, para sa gabos. Ini an plano kan Dios susog sa 1 Timoteo 2,4: “An Dios boot na an gabos maligtas, saka makamidbid kan katotoohan”.

Sa panahon na talamak an urotikan asin an mga naghahade-hadean piglalanse an banwaan, orog na kaipuhan an mga Cristiano na naninindogan sa katotoohan. An Cristianong naninindogan sa katotoohan, liwanag sa diklom ngonyan na panahon; an saiyang ilaw daing iba kundi an Espiritu.

3. Espiritu nin Pagkasararo. Sabi ni San Pablo sa 1 Corinto 12,4: “Manlaen-laen an mga balaog alagad saro sanang Espiritu; manlaen-laen na paglingkod alagad saro sanang Kagurangnan”. An Espiritu Santo an nagboboronyog kan Simbahan. Siya an nagtutukdo sato sa pamibi, an nagcoconsagrar sa Eucaristía kan Hawak asin Dugo ni Cristo, tanganing kita magin sarong hawak, sarong Espiritu ki Cristo.

Sa satong parokya asin diocesis, igwa kita nin walong ministerio (Worship, Christian Education, Social Concerns, Temporalities, Ecclesial Communities, Family and Life, Youth, Clergy and Consecrated Life) na nagtatarabang sa pagmukna kan sararong komunidad nin pagtubod. Darhon man lugod kita kan Espiritu sa paglingkod sa arin man sa mga ministeriong ini.

...

GIYA SA PAGHIRAS SA SADIT NA KOMUNIDAD • Maghiras nin experiencia nin ministerio o paglingkod sa Simbahan na pinakusog, pinauswag, o pinabunga kan Espiritu.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song kami.

 

Paduman sa Bilog na Kinaban

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Mayo 16-22, 2021. Basahon an Evangelio gikan sa Marcos 16,15-20 (Solemnidad kan Pagsakat sa Langit)

 

Sa evangelio pig-istorya an pagsakat ni Jesu Cristo sa langit. Ini an sinasambit niato sa Nagtutubod, na Siya “suminakat sa kalangitan, nagtutukaw sa too kan Dios Amang makakamhan”. Sa Santo Rosario, ini an ikaduwang Misteryong Mamurawayon. Ano an boot sabihon kan misteryong ini?

Enot, an Ascencion, tanda kan panugang kalangitan. Siring na si Cristo suminakat sa langit, an mga maimbod na nagtutubod Saiya makakalaog man sa langit. Sa Prefacio sa Ascencion sa Misal Romano o libro sa Pagmisa, sinasabi na suminakat Siya sa langit “bako tanganing talikdan an hamak ming kamugtakan kundi tanganing magsarig kaming mga kabtang Niya na masunod duman, kun saen Siya nag-enot, samong pamayo asin ginikanan”.

Ikaduwa, bako ini pagbaya sato kundi pagwaras kan Saiyang Espiritu. Sa Mateo 28,20, nanuga si Jesus: “Danay akong kaiba nindo sagkod sa katapusan kan panahon”. Siring man sa Juan 14,16-17, sinabi Niya: “Mamimibi ako sa Ama na itao Niya saindo an saro pang Parasurog na magigin kaiba nindo sagkod pa man. Siya an Espiritu nin katotoohan.”

Ikatolo, ini paghiras kan misyon. Bago nanggad Siya suminakat sa langit, hiniras ni Jesus an Saiyang misyon (sa Ingles, commission) sa Saiyang mga disipulos. Sa Marcos 16,15, “Sinabihan Niya sinda, ‘Paduman kamo sa bilog na kinaban; ihulit nindo an Marhay na Bareta sa gabos na tawo.” May tolong elemento digdi na marhay paghorop-horopan: misyon, mensahe, asin mensahero.

Misyon. Nasa plano nin Dios na kita an magpadagos kan misyon ni Cristo. Sa Juan 20,21, sinabi Niya: “Siring na ako sinugo kan Ama kamo man sinusugo ko”. Dai minatapos an satong pagigin Cristiano sa pagsamba asin pagsimba, kundi sa pagdara kan satong nakua sa pamibi asin Misa sa satong kapwa sa mga lugar kun saen yaon kita asin kun saen pinapadara kita kan Espiritu. Ini man an tema kan celebracion kan ika-500 na aniversario nin Cristianismo sa Pilipinas na “Biniyayaan tanganing Magtao” (Gifted to Give).

Mensahe. Ini an Marhay na Bareta. Alagad bako sana an istorya ni Jesu Cristo susog sa apat na Evangelio kundi an mabalaog na encuentro asin hararom na pakipag-ibahan niato Saiya na bunga kan pamibi asin pag-adal kan Biblia. An Marhay na Bareta iyo na an Dios namoot sato asin linigtas kita sa kagadanan nin kasàlan – ini an mensaheng pinapahayag niato.

Mensahero. Ini kita asin an lambang Cristiano. Sabi ni Cristo sa Gibo 1,8: “An Espiritu Santo mahilig saindo tanganing kamo magin sakong mga saksi”. Bilang mga saksi ni Cristo, bako sana kitang mga tagapagbareta kundi sa satong sadiring tataramon, gibo, asin buhay mismo namimidbidan si Cristo asin an Saiyang Marhay na Bareta – pag sinasabuhay ta an pagtubod, pag naninindugan kita sa katotoohan asin justicia, pag naglalakaw kita sa dalan nin katanosan, asin pag pinapamate ta an pagkamoot sa kapwa, orog na sa mga nangangaipo asin sinisikwal nin sociedad.

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun sa anong paagi niato nagigibo an misyon na ibalangibog an Marhay na Bareta.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Magkaminorootan Kamo

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Mayo 9-15, 2021. Basahon an Evangelio gikan sa John 15,9-17 (Ikaanom na Domingo nin Pasko nin Pagkabuhay-Liwat).

…

Sa evangelio tinao ni Jesus ining tugon: “Magkaminootan kamo siring sa pagkamoot Ko saindo.” Sa Juan 13,34, inapod Niya ini na Saiyang “bagong tugon” nin pagkamoot.

Kun may bago, igwa nin luma. Ano an lumang tugon? Sabi ni Jesus sa Mateo 5,43: “Nadangog nindo na sinabi kaidto, ‘Kamotan mo an saimong katood, kaongisan mo an saimong kaiwal’.” Masasabi man na parte pa kan lumang tugon an inaapod na “golden rule”: gibohon mo sa kapwa an boot mong gibohon man saimo; o dai mo paggibohon sa kapwa an habo mong gibohon saimo.

Ano an pagkakaiba kan bago sa luma? Sa lumang tugon an satong sadiri an patugmadan asin sukol nin pagkamoot; alagad an bagong tugon, si Cristo an patugmadan asin sukol nin pagkamoot.

Asin pa’no si Cristo namoot? Sa mga evangelio pinamidbid Niya an Dios nin pagkamoot sa Saiyang mga tataramon asin gibo, tanganing satuyang gibohon na pangarogan.

Si Cristo an naenot namoot. Sa evangelio sinabi Niya: “dai nindo Ako pinili; kamo an pinili ko”. Kun kita maenot na mamoot pwede kitang isikwal o dai akoon siring na si Jesus sinikwal nin kadakul kan Siya napadigdi sa daga. Kadakul sato an natatakot isikwal asin makulogan, alagad kun nagpadaog si Jesus sa takot na ini, dai kuta nakaabot sato an kaligtasan.

An pagkamoot ni Cristo inienot an karahayan kan namomotan. Sa evangelio sinabi Niya na dai Niya inaapod an Saiyang mga disipulos na mga surugoon o oripon, kundi katood o amigo. Iniitaas Niya an saindang dignidad. Ini an kabotan kan Dios: na ibalik sato an satong dignidad, na rinaot nin kasalan. Kaya sa paagi kan bonyag, kita nagigin mga aki nin Ama, tugang ni Jesu Cristo, templo kan Espiritu Santo. Kita man nakakabaing ki Cristo kun an satong pagkamoot minamawot an karahayan kan kapwa, bako na ginagamit sinda para sa sadiring interes.

An pagkamoot ni Cristo nagpapatawad. Tinukdoan Niya kitang mamibi sa Ama na “patawadon an satong mga kasalan, siring na pinapatawad niato an mga nagkakasala satuya”. Sa Lucas 23,34, kan naghihingagdan na Siya sa cruz, saro sa Saiyang huring “siete palabras” iyo ini: “Ama, patawada sinda ta dai ninda aram an saindang ginigibo.”

An pagkamoot ni Cristo para sa gabos, maski sa kaiwal. Sinabi Niya sa Mateo 5,44: “kamotan nindo an saindong mga kaiwal, ipamibi nindo an mga nagpapasakit saindo”. An Dios na nagpapauran asin nagpapasaldang nin aldaw sa maraot asin marhay, namomoot sa gabos: katood man o kaiwal niato. Asin an lambang kaiwal, potencial na katood asin pag-iriba man sa paglakbay sa dalan pasiring sa Kahadean.

Si Cristo idinusay an buhay sa pagkamoot satuya. Sabi Niya sa Juan 15,13: “Daing pagkamoot na maorog kaini, na idulot nin tawo an saiyang buhay huli sa saiyang katood.” An pagdusay nin buhay bako sana sa paagi nin pagigin martir sa pagtubod o anoman na halangkaw na causa, kundi sa aroaldaw na pagpagadan sa satong pagkamakasadiri, pagkauri, kapaabaw-abawan, halipot na paciencia, panghuhusga, asin iba pa – tanganing mamoot siring ki Cristo.

... 

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun pa’no nasasabuhay an pagkaminoot-mootan, siring sa pagkamoot ni Cristo, sa laog nin pamilya o komunidad nin pagtubod.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song