An Poon na Balagon asin mga Sanga

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Mayo 2-8, 2021. Basahon an Evangelio gikan sa John 15,1-8 (Ikalimang Domingo nin Pasko nin Pagkabuhay-Liwat).

Sa evangelio nagpahayag si Jesu Cristo na Siya an poon nin balagon asin kita an mga sanga. Ano an boot sabihon kaini?

Bako kitang solo kundi parte kita kan Hawak ni Cristo. Minsan sa satong buhay namamatean ta na garo solo tang pinapasan an mga problema. Ngonian na pandemia kadakul na mga tawo an napupurisaw dahil sa pagmati nin isolation. Sa mga panahon na ini nagpapagirumdom sato si Cristo: dai kita nagsosolo; dai Niya kita pinapabayaan; mahalaga kita para Saiya; nin huli ta kabtang kita kan Saiyang hawak.

Sabi sa 1 Corinto 12,12: “Si Cristo nakakaagid sa sarong hawak na may dakul na kabtang; maski kadakul kan mga kabtang, saro sanang hawak iyan.” May mga nagsasabi na dai daa kaipuhan an relihiyon, kundi si Cristo sana. Sala ining paghona. Nin huli ta an kabotan ni Cristo iyo na kita magkakasararo sa Saiya, bago magkaranya-kanya. Kadakul pa nin ibang mga sanga sa poon na iyo si Cristo, asin lambang saro inaapod sa pagmangno asin pagkamoot sa kapwa. Kaya mahalaga an Simbahan na nag-aataman kan satong pagtalubo sa buhay-pagtubod, asin pag-iriba sa paglakbay sa dalan pasiring sa Kahadean.

Si Cristo an satong kusog asin buhay. An gabos na bagay linalang sa paagi Niya. Sa saiyang pagkagadan asin pagkabuhay-liwat, binuksan para sato an pintuan nin kalangitan; asin ngonian pa sana sa lambang Misa pinapakakan Niya kita kan tinapay na nagtatao nin buhay na daing kasagkoran.

Sabi sa Filipos 4,13: “An gabos magigibo ko huli ki Cristo na nagpapakusog sako”. Bako boot kaini sabihon na an gabos puede kong gibohon ta si Cristo nagsusuporta sako. Kundi nin huli ta si Cristo inako ko bilang Kagurangnan asin paraligtas, an Saiyang tugon an giya kan sakong buhay, an Saiyang dalan an sakong linalakawan, asin an Saiyang cruz sakong pinapasan – kaya magigibo ko an gabos.

Sinugo kita ni Cristo na magbunga. An katuyuhan kan satong pagigin sanga ki Cristo, iyo na kita magbunga. Sabi Niya sa Juan 15,16: “Bako kamo an nagpili Sako; Ako an nagpili asin nagsugo saindo na maglakaw saka na magbunga kamo, patin magdanay an bunga nindong iyan.” Alagad tanganing magbunga nin dakul kaipuhan may mga puputolon sa sato, lalo na an satong kapaabaw-abawan (pride). An pagputol na ini makulog na proceso asin pinapaagi kita sa mga pagbalo.

Sabi sa Santiago 1,2-4: “Mga tugang ko, ikaogma nindo kun magkaigwa kamo nin manlaen-laen na pagbalo, huli ta aram nindo na kun an saindong pagtubod nanggagana sa mga pagbalo, an bunga kaiyan iyo an orog nindong pakatagal. Magdanay kamong maimbod sagkod sa katapusan, tanganing magkaigwa kamo nin bilog na kapanoan, banal, asin mayong kakulangan.”

Kun an kaimbodan magdadara sato sa kapanoan nin buhay, an buhay na makasalan minaputol sato tanganing isiblag kita ki Cristo. Ini an pagputol na nakakagadan, nin huli ta an sanga na tinapyas sa poon, naaalang asin daing ibang pakinabang kundi panggatong. Dai kita inapod ni Cristo tanganing isugba sa kalayo kundi tanganing magbunga nin dakul. Kaya magdanay kita ki Cristo asin magbunga.  

GIYA SA PAGHIRAS SA SADIT NA KOMUNIDAD O FAMILIA • Maghiras kun pa’no isinasabuhay an pagigin centro ni Cristo sa satong buhay.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Kagurangnan Sakong Pastor

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Abril 25 - Mayo 1, 2021. Basahon an Evangelio gikan sa John 10,11-18 (Ikaapat na Domingo nin Pasko nin Pagkabuhay-Liwat).

...

Sa evangelio nagpahayag si Jesu Cristo na Siya an Marhay na Pastor. An pagpamidbid Niyang ini pagsadol man sato sa pagtubod sa Saiya, pagsunod sa Saiyang dalan, asin pagpamibi.

Mamibi kita na magin maimbod na parasunod kan Marhay na Pastor. Sabi sa Psalmo 23,1-2: “An Kagurangnan sakong pastor, daing anoman an magkukulang sako. Pinapahingalo Niya ako sa mga berdeng sabsaban, dinadara Niya ako sa mga tubig na malinaw.” Dinadara Niya kita sa dalan pasiring sa tunay na katalingkasan asin kaogmahan, sa buhay na daing kasagkoran.

Kun bako si Cristo an satong sinusunod, ibang tawo o bagay an satong ginigibong pamayo sa buhay. Kun mawara man kita sa tamang agihan dahil sa pagsunod sa salang ambisyon, tentacion nin kayamanan o kasikatan, pagkalulong sa bisyo, o panlalanse nin salang tawo, bumalik kita sa lindong kan Marhay na Pastor.

Mamibi na padarhan kita nin mga marhay na pastores. Sabi sa Jeremias 3,15: “Tatawan ko kamo nin mga pastores susog sa Sakong puso, na papamayohan kamo na may kadunongan asin pakasabot.” Ipamibi ta an satong presenteng mga lideres sa banwaan, Simbahan, komunidad, magin sa satong pamilya, na lugod magin sindang lingkod na pamayo susog sa puso kan Marhay na Pastor.

Aram ta na marhay an sarong pamayo kun nakakaarog siya kay Cristo – nagmamangno sa pangangaipo kan kapwa, andam idusay an buhay para sa pinaglilingkodan, ginagalang an dignidad kan lambang saro, hinahanap an mga nawawara, asin inaako na an saiyang katungdan tinao kan Dios tanganing maggibo nin karahayan.

An mga maraot na pamayo, contra sa mga paarog asin katukdoan ni Cristo – makasadiri asin makuri, dai sinusorog an naaapi, daing paggalang sa buhay asin dignidad nin kapwa, naggagamit nin violencia asin pananakot, utikon asin parahabon. Kaya mag-ingat kita sa pagpili nin mga mamamayo asin maglikay sa panlalanse kan mga maraot an boot.

Mamibi na kita magtalubo na magin siring sa marhay na pastor. An satong pagsunod sa dalan kan Marhay na Pastor dinadara kita sa pagtalubo na magin siring sa Saiya. An padumanan kan satong pagsamba iyo na kita magin siring sa satong sinasamba. Sa Mateo 20,28 pigtutukdo ni Cristo na kita magin siring sa “Aki nin Tawo na dai nagdigdi tanganing paglingkodan kundi tanganing maglingkod, asin idusay an buhay sa pagtubos nin dakul na mga tawo.”

An pagdakul nin mga nag-oorganizar asin nagdodoronar sa mga community pantries sa bilog na nasyon, sarong tanda kan satong pagtalubo bilang banwaan, na sa tahaw kan pandemia, dai kita nagpadaog sa pwersa nin pagkamakasadiri asin pagkabaranga kundi sa pagkamoot asin pagtabang sa kapwa. Maliwanag an ladawan kan Marhay na Pastor sa lambang tawong nagmamakulog sa nangangaipo.

... 

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun pa’no namatean an pagigin Marhay na Pastor kan satong Dios.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Si Cristo an Centro kan Satong Buhay

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Abril 18-24, 2021. Basahon an Evangelio gikan sa Lucas 24,35-48 (Ikatolong Domingo nin Pasko nin Pagkabuhay-Liwat).                                  

Sa evangelio nagpahiling si Jesu Cristo sa tahaw kan Saiyang mga disipulos asin nagpahayag: “An katoninongan mapasaindo”. Nag-iimbitar si Cristo sato na gibohon Siyang centro kan satong buhay.

Tinatao Niya an Saiyang Katoninongan. Sa Juan 14,27: sinabi Niya: “Katoninongan winawalat Ko saindo, an Sakong katoninongan itinatao Ko saindo. Bako iyan arog kan itinatao kan kinaban.” An Saiyang katoninongan iyo an Saiyang presencia, an Gracia na Siya sana an makakatao. Kaiba kaini an invitacion sa mas pusog asin hararom na pakiibahan sa Saiya.

Asin pa’no ta maaraman na pusog asin hararom na an satong relacion ki Jesu Cristo? Kun naako ta na Siya bilang satong Kagurangnan asin Paraligtas? Sabi sa 1 Juan 2,3; “Aram niato na an Dios satong namimidbid kun inuotob ta an Saiyang mga tugon”. An katoninongan ni Cristo mapapasato sa pag-otob ta kan Saiyang kabotan asin mga tugon.

Tinatao Niya an Eucaristía. Nagpoon ining kabtang kan evangelio sa duwang disipulo na pig-istorya kun pano ninda namidbidan an Kagurangnan sa “pagbaak nin tinapay”, boot sabihon sa Eucaristía. Siring man mantang nagkakaon si Jesus sa hampang ninda sigurado narumduman ninda na an huring harampangan ninda iyo sa Huring Pamanggi kun kasuarin tinogdas Niya an Eucaristía.

Sa 1 Corinto 11,24 sinabi ni Jesus: “Giboha nindo ini sa pagrumdom sa Sako.” Sa Eucaristía Siya nagigin tunay na presente sa buhay kan Saiyang mga disipulos, asin sa communion Siya nagigin parte kan mga hawak kan Saiyang mga paratubod siring na kita nagigin parte man kan Saiyang Mistikong Hawak. Kaya ining liturgía inaapod na burabod asin alituktok kan buhay Cristiano.

Tinatao Niya an Banal na Kasuratan. Nagkapirang beses sa pagpahiling ni Jesus sa Saiyang mga disipulos, “binuksan Niya an saindang mga isip” sa pakasabot kan Banal na Kasuratan manungod sa Saiya bilang Mesías. Asin kan nagsurat na man an mga pamayo kan Simbahan na tinipon asin nagin Bagong Tipan, mas pinamidbid pa sato kun siisay si Jesu Cristo.

Kaya kun boot tang magin centro kan satong buhay si Cristo, yaon an biblia para maggiya sato. Nin huli ta sabi ngani ni San Geronimo: “An daing pakaaram sa Banal na Kasuratan, daing pagkamidbid sa Dios.” Siring man tinutukdoam kita kan Kasuratan kan kabotan nin Dios para sato. Susog sa 2 Timoteo 3,16: “An gabos na Kasuratan ipinasabóng nin Dios; magagamit iyan sa pagtukdo kan katotoohan, pagtuyaw kan salâ, pagtanos nin ugali, saka pagtukdo nin matanos na pamumuhay.”

Tinatao Niya an Simbahan, an komunidad nin mga paratubod. Tinuyo ni Jesus na magpahiling sa komunidad kan Saiyang mga disipulos kan Siya nabuhay-liwat, siring na tinuyo Niyang tiponon sinda sa kapinonan, magpili nin doceng pamayo, itogdas an Simbahan sa gapo na iyo si Pedro, isubol sa misyon nin evangelizacion, asin pabanalon sa paghilig kan Espiritu Santo sa aldaw nin Pentecostes.

Hanggang sa ngonian yaon an Simbahan tanganing sarabay sa paglakbay an mga nagtutubod pasiring sa Kahadean. An tanda kan Simbahan na naka-centro ki Cristo iyo na ini boronyog sa Eucaristía, sa pagpalakop kan Marhay na Bareta, asin pagkamoot sa kapwa.

GIYA SA PAGHIRAS SA SADIT NA KOMUNIDAD O FAMILIA • Maghiras kun pa’no si Cristo centro kan satong buhay. Siring man an mga kadificilan o balaog na nakamtan nin huli sa pagsunod sa Saiyang mga tugon.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Diosnon na Pagkaherak

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Abril 11-17, 2021. Basahon an Evangelio gikan sa Juan 20,19-31 (Ikaduwang Domingo nin Pasko nin Pagkabuhay-Liwat).

An evangelio iyo an istorya ni San Juan kan banggi sa aldaw na nabuhay-liwat si Jesu Cristo.  Sa pagpahiling Niya sa Saiyang mga disipulos, pinapagirumdom sinda asin kita man kan Saiyang dakulang pagkaherak na dinaog an duwang dakulang pwersa nin kasàlan na nagpupugol sa tawo na mabuhay nin matalingkas asin tunay na maogma: an takot asin pagduwa-duwa.

Dinaog Niya an Takot asin sinalidahan nin Saiyang katoninongan. An saradong mga pintuan asin mga lanob kan pigtataguan kan mga disipulos, patin an saindang pusong napupurisaw asin natatakot, daing sinabi sa pwersa kan Saiyang pagkaherak.

An takot nagdadara man sa tawo na paorogon an sadiri asin mang-api nin kapwa. An mga makapangyarihan sa kinaban nadadara sa paggibong violencia tanganing dai mangyari an saindang pigkakatakutan na malamangan o mawaran nin kapangyarihan. Alagad an mga nagtutubod aram na an katanosan na dara kan pagkaherak nin Dios iyo sana an makakatao nin tunay na katoninongan asin kahusayan.

Sa panahon nin pandemia, napapano kita nin takot: na magkahelang, maulakitan an mga mahal sa buhay, mawaran nin hanapbuhay. An pagkaherak ni Jesu Cristo nagpaparumdom sato na magsarig Saiya, siring kan sinabi ni San Pablo sa Efeso 4,13: “Magigibo ko an gabos sa paagi ni Cristo na nagpapakusog sako.”

Dinaog Niya an Pagduwa-duwa ni Tomas asin sinalidahan nin pagtubod. Kan nagpahiling giraray si Jesus, tinawan Niya nin atencion si Tomas, bako para pasupugon kundi na mawara an saiyang pagduwa-duwa. Bilang simbag, pinahayag ni Tomas an pinakamagayon na gawe nin pagtubod: “Kagurangnan ko, asin Dios ko!”

Sa satong panahon na an fake news asin kaputikan nagbabaha na halos kita lunudon, kadakul an dai na aram kun siisay an tutubodan. An pagkaherak ni Cristo iyo na tinao sato an evangelio tanganing kita magtubod Saiya, asin sa pagtubod mapapasato an Saiyang buhay. Susog sa Efeso 2,4-5: “An Dios mayaman sa pagkaherak, asin nin huli sa dakula Niyang pagkamoot sato, maski kan gadan pa kita sa kasombikalan, binuhay Niya liwat kita kaiba ni Cristo”.

Kaya kita na naherakan, inaapod na magin maheherakon man.  Siring na si Cristo sinugo kan Ama, kita man sinusugo Niya. Kaya ngani, may tradicion kita nin mga gibong herak sa hawak asin espiritu.

An mga ini an mga gibong herak sa hawak o corporal works of mercy: pakakanon an nagugutom, painumon an napapaha, gubingan an daing bado, padagoson an daing harong, magsungko sa naghehelang asin nabibilanggo, asin ilubong an gadan. An mg aini an ginibo ni Cristo na sukulan kun makakalaog kita sa kahadean nin langit, nin huli ta sabi Niya sa Mateo 25,40: “Ano man na ginibo mo sa pinakasadit kaining Sakuyang mga tugang, iyo man an ginibo mo Sako.”

Ini man an mga gibong herak sa espiritu o spiritual works of mercy:  tukdoan an daing pakaisi, pakusogon an nagduduwa-duwa, sagweon an nagkakasala, magpasencia sa nakagibong sala, magpatawad nin udok sa boot, rangahon an nagmumundo, asin magpamibi sa mga buhay asin mga gadan.

GIYA SA PAGHIRAS SA SADIT NA KOMUNIDAD O FAMILIA • Sa anong paagi niato namatean an pagkaherak kan Kagurangnan lalo na sa panahon na ini nin pandemia?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Pascua sa Panahon nin Pandemia

Giya sa Prayer-Meeting nin mga Saradit na Komunidad nin Pagtubod (SAKOP) para sa Octava kan Pasko nin Pagkabuhay-Liwat, Abril 4-10, 2021. Basahon an Evangelio gikan sa Juan 20,1-9 (Domingo de Resurreccion).

Alleluia! Si Jesu Cristo, satong Kagurangnan, nabuhay-liwat! Sabi sa Psalmo 118,24: “Ini an aldaw na ginibo nin Kagurangnan, satuyang ipag-ogma asin iparokyaw!” Kaya an enot na aldaw kan semana kun nuarin nabuhay-liwat si Cristo, pigcecelebrar na kaidto pa man kan suanoy na Simbahan bilang bagong Aldaw kan Kagurangnan; asin hanggang ngonian an cada celebracion nin Domingo, sarong sadit na celebracion kan Domingo de Resurreccion.

An Pascua kan Pagkabuhay-liwat iyo an patugmadan na misteryo kan satong kaligtasan, kaya ngani nakapagsabi si San Pablo sa 1 Corinto 15,14: “Kun si Cristo dai binuhay-liwat, sayang an samong pagtukdo, asin sayang an saindong pagtubod”.

Kan Viernes Santo, piggirumdom niato an Saiyang pagsakit, pagkagadan, asin paglubong. Kan Sabado Santo, an Saiyang paghilig sa mga gadan, kun saen dinara Niya an Saiyang liwanag asin Marhay na Bareta sa mga naenot nang nagkagaradan na mga matanos asin banal. Asin sa Saiyang pagkabuhay-liwat, binuksan Niya an pintuan nin langit para sainda asin para sato.

Ano an satong simbag kaining orog kahalangkaweng pagkamoot nin Mahal na Dios? Minakusog an satong paglaom, minabago kita kan satong pagtubod, asin minadara kita kan Marhay na Bareta.

Minakusog an satong paglaom.  Sabi ni San Pablo sa Roma 6,5: “Kun kita nakisumaro sa Saiyang kagadanan, makakabaing man kita sa Saiyang pagkabuhay-liwat.” Makakalaom kita na kita man mabubuhay-liwat huli ki Cristo. Siring man tinatawan kita nin paglaom na an satong mga inaagihan na pagsakit asin sacrificio matatapos man sa kamurawayan asin kaogmahan.

Sa panahon kaining pandemia, na kadakul an nasasakitan asin nagmumundo – an mga naghehelang asin nagadanan, an mga nawaran nin trabaho asin hanapbuhay, an mga nagpapagal na garo dai nin padumanan – an Pagkabuhay-liwat nagtatao nin paglaom na an satong mga sacrificio dai masasayang, asin an pandemiang ini matatapos man.

Minabago kita kan satong pagtubod. Sa mga Misa sa Domingo de Resurreccion, ginigibo an Pagbago kan Panuga sa Bonyag. Igwa ini nin duwang kabtang: an pagsikwal ki Satanas, sa saiyang mga padaya, asin mga gibong kasalan; asin an pagpahayag nin pagtubod sa Dios Ama, Aki, Espiritu Santo, asin mga gibo kan Espiritu, kaiba na an satong Simbahan.

Kun kita naggibo kan mga disiplina kan Cuaresma asin mga pagsa-Dios sa Semana Santa, maninigo lamang na akoon ta an gracia nin bagong buhay sa Pascua. Sabi sa Galacia 3,27: “Kamong mga binonyagan sa pakisumaro ki Cristo, nagubingan na kan buhay ni Cristo”.

Minadara kita kan Marhay na Bareta. Siring na dinara ni Maria Magdalena an bareta kan pagkabuhay-liwat ki Pedro asin sa iba pang mga disipulos, asin siring na dinara kan duwang disipulos hale sa Emmaus an istorya kan saindang encuentro ki Cristo sa mga disipulos sa Jerusalem, kita man inaapod na darhon an Marhay na Bareta sa kapwa lalo na sa panahon nin pandemia.

Si Cristo nagtaong bagong tugon sa Juan 13,34: “magkaminorootan kamo arog kan pagkamoot Ko saindo”. Kaya pinapakusog Niya an satong paglaom asin binabago an satong pagtubod, bako sana para sa satong sadiri kundi tanganing mahirasan ta man an kapwang nangangaipo nin paglaom asin pagtubod.

GIYA SA PAGHIRAS SA SADIT NA KOMUNIDAD O FAMILIA • Sa anong paagi niato ikakapahayag sa satong kapwa an Marhay na Bareta kan Pagkabuhay-liwat ngonian na panahon nin pandemia?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Pasion ni Jesu Cristong Kagurangnan

Giya sa Prayer-Meeting nin mga Saradit na Komunidad nin Pagtubod (SAKOP) para sa SEMANA SANTA, Marso 28 - Abril 3, 2021. Basahon an Evangelio gikan sa Marcos 14,1 -15,47 (Domingo nin Pasion).

An evangelio iyo an version ni San Marcos kan Pasion ni Jesu Cristo, poon sa pamanggi sa Betania hanggang sa Saiyang pagkagadan sa cruz asin paglubong. Ini an istorya kan mga aldaw sa Semana Santa. Lalo na sa paglaog ta sa Jueves Santo, satong icecelebrar an Misterio Pascual ni Jesu Cristo: an Saiyang pagsakit, pagkagadan, asin pagkabuhay-liwat.

Ano an pinakamensahe sato kan Semana Santa? Iyo na an satong Dios namoot na gayo sato asin ilinigtas kita sa kaoripnan nin kasàlan sa paagi kan sacrificio ni Cristo. Sabi sa Filipos 2,6-7: “Diosnon an kamugtakan ni Cristo, alagad dai niya ipinagpadayaw an Saiyang pagkapantay sa Dios; kundi nagpakadai Siya sa sadiri, nagin siring sa oripon, nagin siring sa tawo.”

Kenosis sa Griego an apod kaining pagpakadai sa sadiri, ining labi-labing pagpakumbaba na ginibo ni Cristo. Sa istorya kan Pasion lalo na, mahihiling ta an mga pagpakadaing ini:  an pagpasaluib ni Judas, an pagnegar ni Pedro, an pagdurulag kan mga disipulos, an  pagdakop asin pagpasakit Saiya, an mga insulto asin pasupog, an pagpasan nin cruz asin pagpako Saiya, hanggang sa maubos an Saiyang buhay duman sa cruz.

Sa ibong na lado, kabaligtaran nin kenosis an pinahiling kan Saiyang mga kaiwal asin parapasakit. Panò-panò sinda kan saindang sadiri: an saindang palusot para ipagadan si Jesus para sa “ikakaligtas kan banwaan” (ini an argumento ni Caifas sa Juan 11,50); an pagkaraw asin pagpasakit ki Jesus kan mga soldados na Romano asin mga tauhan kan mga poon na padi; an saindang pag-olog-olog mantang Siya naghihingagdan sa cruz.

An pangapodan sato sa Semana Santa iyo na makisumaro sa pagpakadai ni Jesus sa Saiyang sadiri. Linawon ta na sa panahon nin pandemia asin sa hampang kan kadakul na violencia, korupsyon, asin abuso sa kapangyarihan, an pagpakadai sa sadiri bako an pag-ako na normal asin dai na mababago an mga ini. Kundi an pagtubod sa Dios na nagpapangyari kan Saiyang kabôtan sa paagi kan kapakumbabaan asin katanosan kan Saiyang mga surogoon.

An babaeng nag-ula nin mahal na olor sa payo ni Jesus huli sa pagkamoot Saiya, nagrerepresentar sa mga tawong nagmamawot magpakadai siring ki Jesus sa saindang sadiring paagi. An inagihan ni Pedro – poon sa saiyang kahambogan, sa pagnegar ki Jesus, sa pagtangis sa saiyang kasàlan, hanggang sa pag-ako giraray kan misyon na pamayohan an Simbahan na winalat ni Cristo – iyo an satong pangarogan sa dalan nin kenosis.

Sa paghorop-horop niato kan Pasion ni Jesu Cristo, makisumaro kita sa Saiyang sacrificio, asin gibohon an satong sadiring mga kadificilan, paghingowa, asin pangaturogan sa buhay na satong atang sa Ama na hale sa malinig na puso asin boot. Dai lugod kita madagka sa dalan nin pagkamakasadiri asin kapangyarihan. Asin dai matakot na mag-agi sa pagsakit o kagadanan man kun para sa Kagurangnan asin sa Saiyang Kahadean.

Sabi ni San Pablo sa Roma 6,3-5: “Dai nindo aram na kitang mga binonyagan ki Cristo Jesus, binonyagan man sa Saiyang kagadanan? Kaya kita ilinobong kita kaiba ni Cristo sa paagi kan bonyag sa kagadanan, tanganing arog Saiya, na binuhay-liwat kan kapangyarihan kan Ama, kita man puedeng magkaigwa nin bagong buhay. Huli ta kun nakisumaro kita ki Cristo sa Saiyang kagadanan, siring man makikisumaro kita sa Saiyang pagkabuhay-liwat.”

GIYA SA PAGHIRAS SA SADIT NA KOMUNIDAD O FAMILIA • Sa panahon nin Semana Santa asin pandemia, anong mga pagsakit o kadificilan niato an boot tang iayon sa sacrificio na ginibo ni Jesu Cristo?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Kun an Banhi Mahulog sa Daga asin Magadan

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Marso 21-27, 2021. Basahon an Evangelio gikan sa Juan 12,22-30 (Ikalimang Domingo nin Cuaresma).

Sabi ni Jesus sa Juan 12,24: “Kun an banhi nin trigo dai mahulog sa daga asin magadan, dai mabunga; alagad kun magadan mabunga nin dakul.” Bago maglaog an Semana Santa ining evangelio pinapalaog na kita sa misteryo kan pagsakit asin pagkagadan ni Jesus.

Nata ta kaipuhan ni Jesus magadan? Nin huli ta iyo ini an binoot kan Dios Ama na sacrificio tanganing maligtas kita sa kasàlan. Bilang totoong tawo, pigrerepresentar ni Jesu Cristo an katawohan sa paghampang sa Ama. Siya an satong Halangkaw na Padi na pagultanan kan Dios asin tawo. Bilang totoong Dios, Siya an perfectong sacrificio na iyo sana an makakapara kan kasàlan nin katawohan. Sabi sa Hebreo 10,12: “Si Cristo nagdulot para sa mga kasàlan nin saro sanang sacrificio na nagdadanay sagkod pa man.”

An tradicion nin pagdulot nin sacrificio tinugon nin Dios ki Moises sa mga Libro nin mga Tugon. An mga tawo nag-aatang nin mga hayop sa Dios bilang kabayadan sa saindang kasàlan. Sa huri an tugon asin tradicion na ini makukua an pinaka-kahulugan sa sacrificio ni Cristo na nagin kabayadan sa mga kasàlan niato gabos.

Sa paagi kan Saiyang sacrificio, tinutukdoan Niya kita kun ano an tunay na pagkamoot. Sabi sa Juan 15,13: “Daing pagkamoot na mas dakula pa kisa pagkamoot nin tawong minadusay kan saiyang buhay para sa mga katood niya.” Maski an Saiyang mga kaiwal namotan Niya bilang katood. An mga nagplano kan Saiyang kagadanan asin nagpasakit Saiya, dai Niya binalsan nin pagkamakuri o violencia man, kundi kapatawadan asin pagkaherak. Kaya si Cristo an sacrificio kan Ama para sa katawohan, an pangenot na tanda asin pagirumdom sa gabos na generacion kan Saiyang pagkamoot sato.

Nata ta kaipuhan ta man magadan? Nin huli ta kita mga disipulos ni Cristo. Sinabi Niya sa Juan 12,25-26: “An dayupot sa sadiring buhay, mawawara niya iyan; an dai nagpapahalaga sa sadiring buhay, makakamtan niya iyan para sa buhay na daing katapusan. An boot na maglingkod Sako sumunod Sako, asin kun haen Ako yaon man duman an naglilingkod Sako.” An kagadanan na hinahagad ni Jesus bako an paglaag sa sadiri sa peligro kundi an pagpagadan sa satong mga kasàlan.

Magadan kita sa satong kaluyahan nin boot, asin dai pagdulagán an satong mga problema asin katongdan. Akoon ta an mga ini bilang satong cruz, asin makukua ta si Cristo na kaibahan niato sa pagpàsan. Asin kun kaiba ta Siya, sabi sa FIlipos 4,13: “An gabos magigibo ta huli ki Cristo na nagpapakusog sato”.

Magadan kita sa satong sadiring katanosan asin pagsarig sa kapangyarihan. An mga naghahade-hadean sa satong banwaan sa ngonian boot na isikwal niato an kabotan ni Cristo – dai ka maggadan, magpatawad  sa nagkasala saimo, kamotan an kaiwal, magin maboot asin mahuyo an boot – asin magtiwala daa kita sainda na nanggagadan asin nag-aabuso sa kapangyarihan. An saindang dalan pasiring sa kadikloman, asin parayô sa liwanag asin kapanoan nin buhay na tinatao ni Cristo.

Magadan kita sa pagkaara sa mga bagay na kinàbanon. Anoman na kayamanan asin karahayan digdi sa dagâ biyaya hale sa Dios asin nakakatabang pa ngani kun gamiton sa tama. Alagad kun sinda an paorogon kisa sa graciang langitnon, magigin kaolangan sinda sa buhay na daing kasagkoran. Sabi sa Mateo 16,26: “Anong pakinabang nin tawo, kun makamtan niya an bilog na kinaban alagad an saiyang buhay mawara man.”

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia nin pagpagadan niato sa satong kasàlan, asin kun pa’no namatean si Cristo na kaiba ta sa pagpàsan.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

An Dios Namoot na Gayo sa Kinaban

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Marso 14-20, 2021. Basahon an Evangelio gikan sa Juan 3,14-21 (Ikaapat na Domingo nin Cuaresma).

Sa evangelio, sa istoryahan ni Jesu Cristo asin ni Nicodemo, sarong Fariseo asin poon nin banwaan, pigpaliwanag ni Jesus an misteryo nin Dios na namoot sa sato. Nin huli ta namotan kita nin Dios, an satong paghorop-horop sa pagsakit asin pagkagadan ni Cristo sa Cuaresma, aram niato na dai matatapos sa trahedya kundi sa panggana, sa kamurawayan kan pagkabuhay-liwat, asin sa satong kaligtasan.

Kaya an Ikaapat na Domingo nin Cuaresma inaapod na Domingo de Laetare (boot sabihon “mag-ogma”) nin huli ta an pagsakit asin kamunduan minaagi sana, alagad an kaogmahan asin pagkamoot nin Dios magdadanay sagkod pa man. Ano an pinaliwanag ni Cristo sa misteryo kan pagkamoot nin Dios?

An pagkamoot nin Dios maimbod asin dai nagsusuko sato. Para sa mga naghohona na nin huli sa saindang kasalan, dai na nin pag-asa, ini an simbag nin Cristo: sabi sa Juan 3,16, “An Dios namoot na gayo sa kinaban, kaya tinao Niya an Saiyang bogtong na Aki, tanganing an nagtutubod Saiya dai mawara, kundi magkamit nin buhay na daing kasagkoran”. Siring man sa Efeso 2,4-5: “An Dios mayaman sa pagkaherak nin huli sa kaniguan na gayong pagkamoot Niya sato; an kan kita gadan huli kan satong mga kasalan, binuhay Niya kita ki Cristo.”

Kaya kun kita haloy na panahon nang narayo sa Kagurangnan, dai nakapagsimba ni makapangadie lamang; kun an satong buhay naraot nin kasalan o nahulog sa addiction sa bisyo; girumdumon na may Dios na dai nag-oontok sa pagkamoot sato.

An satong kaligtasan itinao nin Dios ki Cristo. Para sa mga naghohona man na an saindang katanosan tama na para sa Kahadean nin langit, pinapagirumdom na sa paagi sana ni Cristo makakamtan an kaligtasan. Sa Juan 3,14, si Jesus nagsabi ki Nicodemo: “Duman sa lantad an halas initaas ni Moises; siring man an Aki nin Tawo iitaas, tanganing an gabos na nagtutubod Saiya, magkaigwa nin buhay na daing kasagkoran.

An pigtutukoy ni Jesus na halas iyo an bronzeng halas sa libro nin mga Numero 21,6-9, na pinagibo nin Dios ki Moises tanganing iitaas sa tukon asin an mga Israelita na nakahiling kaini nabulong asin dai nagkagaradan. An mensahe iyo na ining mga Israelitang nagrebelde sa Dios dai man kayang iligtas an saindang sadiri kundi an Dios an nagapadara kan saindang kaligtasan. Siring man, daing siisay – gurano man katanos, kadunong, o kabanal – an kayang palaogon an sadiri sa langit, kundi an gracia nin Dios an nagligtas sato. Sa Juan 14,6, sinabi ni Cristo na Siya “an dalan, an katotoohan, an buhay”.

An kaligtasan naghahagad kan satong pagbagong-buhay.  Sa mga naghohona man na an pag-ako ki Cristo basang sana asin dai naghahagad nin pagbago kan sadiri, pinapagirumdom na Siya duminatong bilang ilaw na minapara sa kadikloman nin kasalan. Sabi sa Juan 3,20: “An siisay man na naggigibo nin maraot naoongis sa ilaw. Dai siya minadulok sa liwanag tanganing dai mailawan an saiyang maraot na gibo.”

Sa mga nagtutubod alagad dai pa sinisikwal an kasalan, may patanid si Cristo sa Mateo 7,21: “Bako gabos na nagkukurahaw nin ‘Kagurangnan, Kagurangnan!’, makakalaog sa Kahadean nin langit kundi idtong nag-ootob kan kabotan kan sakong Ama sa langit.” Asin sa 1 Juan 3,23 sinabi: “An tugon Niya iyo ini, magtubod kita sa Saiyang Aki si Jesu Cristo, asin magkaminoroot-mootan kita, siring sa pinagboot sato ni Cristo”.

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun pa’no namatean an pagkamoot asin pagkaherak nin Kagurangnan?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Si Jesu Cristo asin an Templo

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Marso 7-13, 2021. Basahon an Evangelio gikan sa Juan 2,13-25 (Ikatolong Domingo nin Cuaresma).

Sa evangelio, garo ibang klaseng Jesus an pig-iistorya.  Garo bako Siya su pig-aawit na “O heart of Jesus, meek and mild”.  Nadagit Siya, nambadol gamit an binugkos na pisì, tinuwal an mga lamesa kan mga pararibay nin cuarta, asin pinaharale an mga paratinda kaiba an mga hayop na pigpapabakal ninda sa lugar kan Templo sa Jerusalem. Ano an mensahe kan istoryang ini?

Si Jesu Cristo an kapanoan kan Kasuratan. Bako sana na kan mahiling kan mga disipulos an ginibo ni Jesus narumduman ninda an profesía sa Psalmo 69,9: “An pagkamoot ko sa Saimong Templo minalaad siring sa kalayo”. Kundi pinapakarhay Niya an saláng pakasabot nin mga tawo sa kabòtan nin Dios sa Kasuratan.

Susog sa Ley ni Moises, maninigo na magdolot nin sacrificio para magpasalamat sa Kagurangnan asin maghagad nin kapatawadan. Alagad sa pag-agi nin panahon may mga saláng gawè an nadagdag sa tugon na ini, siring baga kan pagribay nin cuarta na dapat iatang sa Templo ta dai daa puede an ordinariong cuarta nin huli ta ini maatî. Sa negosyo nin pagribay may mga nangyayaring dayaan. O an pagpabakal sa laog kan Templo mismo nin mga hayop na maninigong iatang, na monopolyo kan poon nin mga kapadian.

Sa satong Simbahan man sa Pilipinas, dai pa nahaloy nagpaluwas nin pastoral letter an satong mga obispo sa CBCP, na sinda nanunugà na hahaleon na an sistemang arancel, o an bayad sa lambang pagcelebrar nin sacramento. Sinabi ninda na ini nakakaulang sa tamang pakasabot kan mga sacramento, asin nakakaulang sa mga dukha sa pag-ako kan mga ini. Kaya an tema para sa celebracion kan ika-500 na aniversario nin Cristianismo sa Pilipinas hale sa Mateo 10,8: “Nag-ako kamo nin daing bayad, kaya magtao man kamo nin daing bayad.” Padagos hanggang ngonian an pasabong kan Espiritu sa danay na pagpakarhay kan Simbahan.

Ano an kabòtan nin Dios sa pagdulot nin atang? An simbag sinabi na nin nagkapirang beses sa Psalmo asin nin mga profetas. Sabi sa Psalmo 51,16-17: “Dai mo minamàwot an mga sacrificio; maski magdulot ako nin tinutong na atang dai Mo mawiwilihan. O Dios, espiritung nagsusolsol an sakong atang; mapakumbaba asin nagsusolsol na puso dai mo isisikwal.”

Si Jesu Cristo an presencia nin Dios sa kinàban. Sa evangelio pigkumpara ni Jesus an Saiyang sadiri sa Templo. “Gabaa nindo an Templong ini asin papatindogon ko liwat  sa tolong aldaw.” Sabi sa Juan 2,21: “An Templong boot sabihon ni Jesus iyo an sadiri Niyang hawak.” Mahalaga an Templo sa Jerusalem para sa mga Judío nin huli ta ini an tanda o simbolo kan presencia nin Dios sa Saiyang pniling  banwaan. Sa laog kan Templo yaon an Arka nin Tipan, an tableta kun saen  nakasurat an mga  Tugon na tinao nin Dios mismo ki Moises. Alagad daing sinabi an tanda o simbolo kun an mismong Dios na nanitawo na an nasa tahaw ninda. Sayang nin huli ta Siya sinikwal ninda.

Kita man, inaako ta daw si Cristo sa bilog niatong isip asin puso? Natatàwan ta daw nin magkakanigong pagpahalaga an Saiyang presencia sa lambang tabernaculo sa mga simbahan niato? Namomòtan ta daw an Saiyang namomòtan? Naoongis daw kita sa mga bagay na Saiyang kinakaongisan? Nin huli ta minsan an satong mga kinakaongisan tanda kan satong mga pinapahalagahan asin namomòtan. Mag-ayon kita ki Cristo asin dai kita mawawara sa tamang dalan.

GIYA SA PAGHIRAS SA SADIT NA KOMUNIDAD O FAMILIA • Maghiras nin mga bagay na saimong kinakaongisan nin huli ta ini contra sa Cristianong pagtubod o katanosan. Ano an ginibo mo manungod kaini?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Transfiguracion kan Kagurangnan

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Pebrero 28-Marso 6, 2021. Basahon an Evangelio gikan sa Marcos 9,2-10 (Ikaduwang Domingo nin Cuaresma).

Sa evangelio, pig-istorya an Transfiguracion ni Jesus sa halangkaw na bukid, kaiba an tolong pinakaugos Niyang disipulos, si Pedro, Santiago, asin Juan. Ini an ikaapat sa mga Misterio nin Liwanag sa Santo Rosario. Ano an kahulugan kan Transfiguracion kan Kagurangnan?

Revelacion. An pangyayaring ini pagpadagos kan pagpamidbid kan mahal na Dios sa paagi ni Jesu Cristo. An presencia ni Moises asin Elias na nakikipag-olay ki Jesus nagtutukdo kaini. Si Jesu Cristo an kapanoan kan mga Kasuratan – si Moises an kagibo kan mga Libro nin Batas (an enot na limang libro sa Biblia), asin si Elias nagrerepresentar sa mga profetas. Sa dikit na paagi, an Dios nagpamidbid man kan Saiyang sadiri ki Moises sa bulod nin Horeb sa Exodo 3, asin ki Elias sa bulod nin Carmel sa 1 Hade 19.  Alagad an kapanoan yaon ki Jesus. Nagsabi Siya sa Juan 14,9: “An nakahiling na sako, nakahiling na sa Ama.”

An mga katukdoan ni Jesus manungod sa Kahadean, an Saiyang mga pagbulong asin mga milagro, asin an Saiyang pagtipon nin mga disipulos – gabos ini nagpapamidbid sa Dios asin sa Saiyang plano. Sa paagi Niya nasasabotan niato an bilog na biblia. Nasusurat sa Hebreo 1,1: “Kaidtong panahon, sa kadakul na beses asin sa manlaen-laen na paagi, nagtaram an Dios sa satong mga kamagurangan huli kan mga profeta. Alagad sa mga huring aldaw na ini nagtaram Siya sato huli sa Saiyang Aki.”

Sacrificio. An Transfiguracion natapos sa tingog kan Ama hale sa panganoron na nagsabi, “Ini an Sakong namomotan na Aki. Himatea nindo Siya.” Sa Mateo 16,21, mahihimate niato ki Jesus an boot sabihon kan Saiyang pagigin Cristo o Mesías: na kaipuhan mag-agi Siya nin pagsakit, pagkagadan, asin pagkabuhay-liwat. 

Igwa pa nin sarong persona sa Lumang Tipan na katakod kan Transfiguracion: si Abraham na binalô nin Dios kun isasacrificio an saiyang aking si Isaac susog sa istorya sa Genesis 22. An kinatapusan kan istorya iyo an dai pagtugot nin Dios na gadanon ni Abraham si Isaac bilang sacrificio sa altar. An kinatapusan kan istorya iyo si Jesus na ginibong sacrificio kan Dios Ama para sato. Pagkatapos kan Transfiguracion, mababa sa bulod si Jesus asin mga pag-iriba, malakbay sinda pasiring sa Jerusalem kun saen Siya aarestohon, papasakitan, asin ipapako sa cruz. Sabi ni San Pablo sa Roma 8,32: “Dai pinagkanugonan kan Dios an Saiyang sadiring Aki, kundi itinao Niya sato gabos”.

Resurreccion. Tinugon ni Jesus an tolong disipulos na kaiba Niya na dai ipagsabi an saindang nasaksihan sagkod na “an Aki nin Tawo mabuhay-liwat sa mga gadan”. Dai ninda tulos nasabotan ining tugon ni Jesus alagad nasabotan man giraray ninda ngapit: na an Transfiguracion pasabong kan kamurawayan kan Resurreccion. Alagad maagi nguna sinda sa diklom kan pagsakit asin pagkagadan ni Cristo.

Sa panahon nin crisis asin pandemia, an Transfiguracion sarong giya asin tanda nin paglaom sa maabot na panahon nin satong kaligtasan asin kapangganahan. Kaya maimbod na iayon ta an satong mga kadificilan asin sacrificio sa pagsakit asin sacrificio ni Cristo, asin dai magpadaog sa tentacion nin mga kaogmahan na mababaw asin minaagi saná. Sabi ni San Pablo sa Roma 8,17: “Kun kaiba kita ngonian sa kasakitan ni Cristo, makakaiba man kita sa Saiyang kamurawayan”.

 

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun pa’no an Dios nagtatao saimo nin paglaom sa panahon na ini nin crisis asin pandemia.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

 

An Kahulugan asin Katuyuhan kan Cuaresma

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Pebrero 21-27, 2021. Basahon an Evangelio gikan sa Marcos 1,12-15 (Enot na Domingo nin Cuaresma).

Sa evangelio, pig-istorya an pagtener ni Jesus sa kadlagan o disierto sa laog nin cuarentang aldaw. Sa paglaog niato sa Cuaresma, magayon ining istorya na magin patugmadan sa paghorop-horop kan kahulugan asin katuyuhan kaining mabalaog na panahon.

An kahulugan kan Cuaresma iyo an satong pakisumaro ki Cristo. An tataramon na Cuaresma hale sa “cuarenta”. Siring na si Cristo nag-agi nin cuarentang aldaw nin pamibi asin pag-ayuno, kita man minaagi nin cuarentang aldaw na maigot na pagrani sa Dios asin pagtalikod sa sadiri o sa mga kaogmahan nin lawas. Sa satong pakisumaro ki Cristo matatagbuan ta an Dios na haloy nang nakikisumaro sato – alagad kita an dai nakakatao nin magkanigong atencion sa Saiyang presencia asin gracia.

Sa panahon nin pandemia garo man sana kita nag-aagi nin halawig na Cuaresma. Malà nganì an sarong paagi para makalikay sa paglakop kaining virus, an quarantina, siring sa Cuaresma, hale man sa parehong ugat o numero “cuarenta”. An pandemia asin quarantina nagdulot nin kadakul na problema sa katawohan – helang asin kagadanan, pagkawara nin hanapbuhay, kapurisawan sa isip, asin iba pa. Sa panahon na ini orog na kaipuhan an satong pakisumaro sa Kagurangnan na nanuga sa Mateo 28,20, na Siya danay niatong kaiba sagkod sa katapusan nin panahon.

Siring man, sa evangelio sinasabi na kaiba ni Jesus an mga hayop sa kadlagan asin mga angeles na naglilingkod Saiya. Kaidto pa man kadakul an ginigibo ining alegoria o simbolo: an mga hayop nagrerepresenta kan mga kaluyahan asin karigsokan nin tawo, asin an mga angeles, kan danay na pagtabang nin Dios sa buhay nin tawo. Boot sabihon si Jesus nakikisumaro sa kabilogan kan satong pagkatawo, kaiba na an mga kaluyahan asin kadificilan nin buhay, fuera  sa kasàlan. Sabi sa Hebreo 4,15: “An satong Halangkaw na Padi bako idtong dai nakakamate kan satong mga kaluyahan, huli ta Siya mismo nagtios nin gabos na klase nin sugot arog sato, alagad dai Siya nagkasala”.

An katuyuhan kan Cuaresma iyo an satong pakihiras sa kamurawayan kan Pagkabuhay-liwat. Pagkatapos kan Saiyang cuarentang aldaw sa kadlagan, nagpoon na si Jesus sa Saiyang ministerio publico na nagtapos sa Misterio Pascual, an misterio kan Saiyang pagsakit, pagkagadan, asin pagkabuhay-liwat. Siring man, an katuyuhan kan Cuaresma mahihiling sa katapusan kaini: an celebracion kan Misterio Pascual. Sabi sa Roma 6,15: “Kun kita makisumaro ki Cristo sa kagadanan, makikisumaro man kita sa Saiyang pagkabuhay-liwat”.

Tanganing magkanigò kitang magcelebrar kan pagkabuhay-liwat, tinatao sato bilang giya an mga disiplina kan Cuaresma: pagpamibi, pag-ayuno, asin pagtabang sa kapwa, asin an hulit sa Mateo 1,15, na sinasambit man sa Miercoles de Ceniza: “Magsolsol asin magtubod sa Marhay na Bareta”. An siring na mensahe yaon man sa Domingo de Resurreccion, sa Pagbago kan Panuga sa Bonyag, kun saen hinahagad an satong pagsikwal ki Satanas asin sa saiyang mga padaya, asin pagpahayag kan satong pagtubod sa Dios Ama, Aki, asin Espiritu Santo na namomoot sato.

Boot sabihon an gabos na gawe asin ritual sa Cuaresma nagpapagirumdom sato kan mga dapat na gibohon tanganing makamit an kaligtasan na tinatao ni Cristo: magbàgo kita nin buhay asin talikdan an kasàlan.

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun pa’no nag-agi man kita nin sadiring “panahon sa disierto” – puedeng espiritual na gawe o panahon nin kadificilan asin pagbalô.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

An Kapangyarihan nin Pagkaherak

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Pebrero 14-20, 2021. Basahon an Evangelio gikan sa Marcos 1,40-45 (Ikaanom na Domingo sa Ordinariong Panahon).

Sa evangelio, binulong ni Jesus an sarong daoton (may ketong) na nakimaherak Saiya: “Kun boot mo, malilinigan ako.” Ano an napapanahon na mensahe sato kan istoryang ini?

An Kapangyarihan nin Dios.  Enot, na an Dios makapangyarihan. An daot o ketong iyo an pinakakinakatakutan na helang sa haloy na panahon. An may helang kaini minaagi nin halawig asin makuring pagsakit, asin makusog ining makaulakit. Kaya kan binulong ni Jesus an lalaking daoton, dai Niya sana binulong an sarong helang kundi tinawan Niya ini nin bagong buhay.

Kun an Dios makapangyarihan, pinapahiling man kaini an kaluyahan nin tawo. Sa halawig na panahon dai nin solusyon sa daot, dai pa nahaloy kan nagkaigwa nin masasarigan na combinacion nin mga bulong para sa helang na ini. Hanggang sa ngonian kadakul pa man giraray nin mga helang na daing siguradong bulong. Ining pandemia dulot kan COVID-19, nagpagirumdom sato kan satong kaluyahan sa hampang nin mga darakulang problema asin misteryo nin kinaban.

Alagad igwa kita nin Dios na mas makapangyarihan sa anuman na helang, problema, o makuring kasàlan. Sabi ni Cristo sa Marcos 10,27: “Sa tawo imposible iyan, alagad sa Dios bako, huli ta an gabos posible Saiya”. An satong Dios masasarigan.

An Pagkaherak nin Dios. Ikaduwa, an kapangyarihan nin Dios mas namamatean nin tawo nin huli kan Saiyang pagkaherak. Kun si Jesus an kapanoan kan pagpamidbid kan Ama, an ipinapamidbid Niya sarong Dios na mayaman sa pagkaherak. Kan nakimaherak an lalaking daoton tulos naherakan siya ni Jesus. Kan nagrani saiya an mga parakasala, pinapatawad Niya sinda. Pag nahihiling Niya an katawohan na gutom sa mga Tataramon nin Dios, naheherakan Niya sinda siring sa pag-ataman nin pastor sa saiyang kawan.

Kun an Dios maheherakon, pinapagirumdom man kita kan kakulangan kan satong pagkaherak. Sa Levitico 13 nasusurat kun ano an magkakanigong simbag sa mga tawong naghehelang nin daot: isiblag sa katawohan, mag-erok sa luwas kan banwa, magbadò nin sa may helang, asin magkurahaw na maati sinda kun may magrani. Bakong siring man kaini an ginigibo pag may helang na COVID-19? Quarantine, isolation, lockdown.

Alagad aram niato na minsan ginigibo ini tanganing dai makaulakit sa mas dakulang populacion, nasa-sacrificio man an kamugtakan kan may helang asin nagka-causa man an mga gaweng ini nin iba pang problema sa mga maluluya, mga gurang, asin mga may pig-aagihan na issue sa mental health.

Siring na an satong Dios maheherakon, pagkaherak man an pangapodan sato sa mga panahon nin crisis; pagkaherak bako pagsikwal sa kapwa na dulot nin takot o pagkamakasadiri.

Sabi ni Cristo sa Mateo 9,13: “Pagkaherak an mawot ko, bakong atang. Dai ako nagdigdi sa pag-apod kan mga banal kundi kan mga parakasalà.” Kitang mga naherakan, makaukod man lugod magin mas maheherakon, asin dai paurogon an sadiring katanosan kundi an kadunongan na hale sa maheherakon na puso nin Dios.

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun pa’no namatean an pagkaherak nin Dios, o kun pa’no kita man nagin istrumento nin pagkaherak sa kapwa.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

An Evangelio nin Pagkamoot

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Pebrero 7-13, 2021. Basahon an Evangelio gikan sa Marcos 1,29-39 (Ikalimang Domingo sa Ordinariong Panahon).

Sa evangelio, matapos magbulong nin kadakul na may helang asin magpaluwas nin mga demonio, sinabi ni Jesus an katuyuhan kan Saiyang pagpadigdi sa kinaban: an magtukdo kan Marhay na Bareta sa katawohan. Ini man an sinabi ni San Pablo sa 1 Corinto 9,16: “Herak man sako kun dai ko irokyaw an Evangelio!”

Ano ining Marhay na Bareta? Na igwa kitang Dios na namomoot sato, na maski kita parakasala dai kita pinabayaan kundi pinadarhan pa ngani nin Paraligtas nin satong kasàlan, asin tinàwan nin buhay na panô asin daing kasagkoran sa kaibahan Niya.

Sa evangelio, pig-istorya man kun pa’no pigsabuhay ni Jesus ining Marhay na Bareta sa pagtao Niya nin prioridad sa tolong lado – tanganing magin pangarogan niato. Nin huli ta sabi ni Jesus sa Juan 20,21: “Siring na ako sinugo kan Ama, kamo man sinusugo Ko.”

1. Pagkamoot sa Nagkapira. Nagbisita si Jesus sa harong ni Simon Pedro asin Andres, kaibahan Niya man an magtugang na Santiago asin Juan. Duman sa harong binulong ni Jesus an panugangan na babae ni Simon Pedro na may calentura. Sa saiyang ministerio publico pinahiling ni Jesus na mahalaga Saiya an komunidad nin mga pag-iriba na tinipon Niya. Sa sainda tinukdo ni Jesus an kahulugan kan Saiyang mga parabola, asin an sadit na grupong ini kaiba Niya man sa mga darakulang misterio kan Saiyang buhay. Igwa pa si Jesus nin iba pang mga kaugos, siring kan magturugang na sinda Maria, Martha, asin Lazaro.

Kita man pinapagirumdom na an enot niatong misyon sa pagrokyaw kan Marhay na Bareta iyo na an satong pamilya, barkada, asin mga tawong harani sato. Natatawan ta daw sinda nin magkakanigong atensyon asin pagsabot sa saindang pig-aagihan? Natatawan ta daw sinda nin oras sa pakicelebrar sa saindang kaogmahan asin pagmakulog sa saindang kadificilan?

2. Pagkamoot sa Kadaklan. Kan maaraman kan mga tawo na yaon si Jesus sa harong na Simon Pedro, dinara ninda Saiya an mga may helang asin may mga demonio, asin an mga ini gabos binulong ni Jesus, an mga demonio Saiyang pinalayas. Minsan ngani banggi na asin pagal naman Siya, dai ni Jesus pinahale an mga nangangaipo kundi pinamate an Saiyang pagkaherak.

Kita man inaapodan na mamoot bako sana sa mga kaugos asin kapamilya niato kundi mamoot man sa mas dakulang komunidad asin sociedad, sa pagpaorog kan karahayan nin kagabsan asin pag-ataman sa kapalibutan, susog sa tugon ni Cristo sa Marcos 12,31: “kamòtan mo an saimong kapwa”.

Sa panahon nin pandemia, ini napapahiling sa pagsunod sa mga protocols na minalikay sa sadiri asin kapwa sa peligro kan COVID-19, siring kan pagsulot nin face mask, pag-social distancing, paghugas nin kamot, asin (dai man lugod mahaloy) pagpabakuna.

3. Pagkamoot sa Dios. Matapos an halawig na banggi nin pagbulong, pagkaaga sa pagsirang nin aldaw, tulos nagbuhat si Jesus asin nagpasiring sa lugar na daing tawo para magpamibi sa Ama. Mahalagang parte kan Saiyang buhay sa dagâ an danay Niyang pakiolay sa Ama sa pamibi, asin kita ngani tinukdoan man Niya na magrani asin magpamibi sa Ama.

Natatawan ta daw nin magkanigong panahon an Dios sa satuyang aldaw? Napapabanal ta daw an saiyang aldaw na Domingo sa pagsimba? Naghihingowa daw kita na hanapon an Saiyang kabòtan sa paagi nin paghorop-horop asin pag-adal kan Saiyang Tataramon?

GIYA SA PAGHIRAS SA SADIT NA KOMUNIDAD O FAMILIA • Maghiras nin experiencia kun pa’no natàwan nin oportunidad na ihiras an Marhay na Bareta sa sadiring pamilya o barkada, o sa mga dai kamidbid.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

Katukdoan na May Kapangyarihan

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Enero 31 - Pebrero 6, 2021. Basahon an Evangelio gikan sa Marcos 1,21-28 (Ikaapat na Domingo sa Ordinariong Panahon).

Sa evangelio, pigngalasan an paagi nin pagtukdo ni Jesus na “may kapangyarihan” asin bako siring sa mga escribas. Mas lalo pa sindang nagngalas kan pahaleon Niya an demonio sa laog nin sarong lalake sa paagi kan Saiyang tataramon.

An mga tawo kaidto dai masabotan kun anong kapangyarihan an yaon ki Jesus. Alagad kita, aram na niato: Siya an Paratukdo kan misterio kan Kahadean nin langit, an kapanoan kan pagpamidbid kan Ama.

Aki kan Dios. Sa istoria, inapod kan demonio si Jesu Cristo na “an Banal kan Dios”, boot sabihon pinapamidbid Niya kun siisay an Dios asin kun ano an Saiyang kabotan. Sa Juan 1,1-3 sinabi: “Sa kapinonan iyo an Tataramon; an Tataramon kaibahan nin Dios, asin an Tataramon Dios. Poon pa sa kapinonan an Tataramon kaibahan nan in Dios. Sa paagi Niya ginibo nin Dios an gabos; dai nin anoman na linalang na bako sa paagi Niya.” Siya an Aki nin Dios, Siya Dios na nanitawo para sato. Kaya an pagpahale nin demonio sa lawas nin tawo sarong sadit na bagay sana para Saiya na may kapangyarihan sa paglalang asin buhay.

Profeta.  Si Jesus nagtutukdo bilang profeta, susog sa tradicion nin mga profeta sa Israel na maimbod na binabalangibog an inaapod sa Hebreo na dabar Yahweh­, an Tataramon ni Yahweh. Ini an profesía ni Moises sa Deuteronomio 18,15-20. Asin an Dios mismo an masingil sa mga dai mahimate kan Saiyang tataramon sa paagi nin mga profeta. Siring sa mga profetang naenot Saiya, an buhay asin pagtukdo ni Jesus nagtatanyog sa mga makapangyarihan asin mapaabaw-abaw, alagad nagpapakusog-boot asin nagraranga sa mga mapakumbaba asin nagagabatan.

Mesias. An Saiyang pagtukdo parte kan Saiyang misyon bilang Mesias, an pinanugang Paraligtas. Si Sto. Tomas de Aquino nagsurat: “Nata ta kaipuhan kan Dios Aki na magsakit para sato? May dakulang pangangaipo na gibohon Niya ini, na maipapaliwanag sa duwang paagi: enot, sa pabulóng nin kasàlan, ikaduwa, sa pagtukdo sato kun pa’no mamoot.” Sabi sa Juan 15,13: “Daing pagkamoot na mas dakula pa kisa pagkamoot nin tawong minadusay kan saiyang buhay para sa mga katood niya”. Sa cruz itinukdo ni Cristo an tunay na pagkamoot. Siisay ining mga katood na nakamate kan pagkamoot asin pagkaherak ni Cristo? An mga dukha, parakasala, may helang, asin mga sinikwal nin sociedad.

Alagad bako gabos na nakadangog ki Jesus asin nakahiling kan Saiyang mga gibo nagturubod. Kita man ngani may mga panahon na minasuway sa Saiyang mga katukdoan. Kaya an pagirumdom kan Psalmo 95,7 angay nanggad sa gabos na panahon: “Kun ngonian madangog nindo an Saiyang tingog, hare pagpatagasa an saindong puso”.

Sa pa’anong mga paagi nagigin matagas an satong mga puso? Mahiras kita nin nagkapira. Enot, kun dai ta Siya tinatawan nin magkakanigong panahon sa pamibi asin pag-adal kan Saiyang Tataramon. Ikaduwa, kun pinapaorog ta an sadiring kabotan, o sadiring paghona nin tama asin sala, kisa Saiyang katanosan. Ikatolo, kun sa satong pagsuway, nadadara ta pa an kapwa parayo sa Dios. Sabi ni Jesus sa Mateo 9,42: “An siisay na magin dahilan nin pagkasala kan saro sa mga saradit na ini na minatubod sako, mas marhay pang gakodan an liog niya nin gapong-gilingan dangan iapon sa dagat”. Kaya kun ngonian madangog ta an Saiyang tingog, hare man lugod magmatagas an satong puso!

GIYA SA PAGHIRAS SA SADIT NA KOMUNIDAD O FAMILIA • Maghiras nin mga katukdoan ni Jesu Cristo na nakatabang sato o nagin mahalaga sa satong buhay.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song