An Parabola nin Danay na Pagpamibi

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Octubre 19-25, 2025. Basahon an Evangelio gikan sa Lucas 18,1-8 (Ika-29 Domingo sa Ordinariong Panahón - C).

…

An mensahe sa Evangelio malinaw tulos sa poón pa saná. Sa Lucas 18,1, “nag-osipon si Jesús sa mga disipulos nin parábola, manungod sa pangangaipo ninda nin danay na pagpamamîbî asín tanganing daí mawâran-boót.”

Danay asín daíng ontok kitáng magpamîbî. 

Uya an saróng hukóm na daíng paniroan sa tawo ni sa Diós. Dangan uya man an saróng balo, daíng yaman asín kapangyarihan, alagad daí nanggad nagpondó hanggang makákua nin marhay na desisyon halè sa hukóm.

Sabi kan satóng Kagurangnan Jesu Cristo sa Evangelio: “Daí daw surogón nin Diós an Saiyang mga pinilì na nag-aagrangay Saiya aldaw-banggi? Mag-abala daw Siyá manungod sainda?” Dangan sinabi pa Niyá sa Mateo 7,11: “Kun kamó na maraot nganì, tataó magtaó nin mga marhay na bagay sa saindong mga akì, an Amâ pa daw nindong yaon sa langit an daí magtaó nin karahayan sa mga naghahagad Saiya?”

An parábola nasabi na, an mensahe napaabót na, kayâ pwede ta na daw isipon na tapos na an istorya? Bakô pa. Nin huli ta sa hurí, nagwalat si Jesús satô nin saróng hapót para paghoróp-horopan: “Alagad pagdigdi kan Akì nin Tawo, makákakuá daw Siyá nin pagtubód sa dagâ?” Anó an boót sabihon kainí?

Binabâgo kitá nin danay na pagpamîbî.

An katuyohán kan pamîbî bakô na makua ta pirmi an satóng hinahagad kundî na mabâgo an satóng pusò. An pagpamîbî iyó an satóng pakipagkaolay sa Diós tanganing magtalubò asín magrarom an satóng relasyon sa Saiya. Anoman na makahulugán na relasyon sa satóng buhay – magurang, ilusyon, agóm, akì, best friend, mentor – nakakapabâgo sa satô. Anó pa daw an satóng relasyon sa Diós?

An Diós daí na kaipohan magbâgo huli ta yaon na Saiya an kapanoan nin karahayan asín pagkámoot. Kitá an kaipohan magbâgo. Asín an tandâ na an satóng buhay binâgo na kan satóng relasyon sa Diós, sinabi ni Jesús sa Juán 8,31-32: “Kun magpadagos kamó sa Sakóng tataramon, tunay Ko kamóng mga disipulos; mamimidbid nindo an katotoohan asín itatalingkas kamó kan katotoohan.”

Binabâgo an kinâban nin danay na pagpamîbî.

Hararom an parábola kainíng hukóm asín balo. An balo bakô sanáng makulít kundî hinampáng niyá an saróng sistema na bakóng patas asín makatarungan sa mga arog niyá. An danay na pagpamîbî nakakapabukás man sa isip na máhilíng an realidad nin kasâlan sa kinâban – poón sa pagkamakuri nin tawo sa kapwa-tawo sagkod sa mga istruktura nin inhustisya sa sociedad.

Dangan dinadará kitá kainí sa pagsadól sató ni San Pablo sa 2 Timoteo 4,2, na “paghulit kan tataramon asín pagmaigot sa pagpahayag kaiyan, nasa panahón man o bakô napapanahón.” Nin huli ta an pagbâgo kan satóng pusò asín isip bakô pribadong kapangganahán saná, kundî iní nagbubunga nin mas maigot na pagmangno sa kapwa, asín paghingowa para sa karahayan asín pag-uswag nin pamilya, komunidad, sociedad, asín bilog na kinâban. Kayâ nganì igwa kitá kainíng pamîbî: “Madya, O Espiritu Santo, asín bâgohá an lawóg nin kinâban!”

Iní an simbag sa hapót satô ni Jesús: sa Saiyang ikaduwáng pagdatóng makákakuá Siyá nin pagtubód sa kinâban pag an satóng danay na pagpamîbî dagos kitáng binabâgo sa katanosan asín kabanalan, asín an banwaan sa katoninongan asín karahayan nin kagabsan.

…

GIYA SA PAGHIRÁS | Anó an mga pinapangadyê mo sa ngonian? | GIYA SA PAGHIRÔ | Bilang saróng komunidad/pamilya, magpilì sa mga pamîbî kan mga pag-iriba asín pagtarabangan na mautób iní.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

Magpasalamat Kita sa Kagurangnan tang Dios

 

Giya sa Prayer-Meeting nin mga Saradit na Komunidad nin Pagtubód (SAKOP) para sa semana kan Octubre 12-18, 2025. Basahon an Evangelio gikan sa Lucas 17,11-19 (Ika-28 Domingo sa Ordinariong Panahón - C).

…                                                                                                                                                                 

Sa Evangelio may binolóng an satóng Kagurangnan Jesu Cristo na sampolong leproso, alagad sarô saná an nagbalík sa pagpasalamat. Kayâ napahapót Siyá: “Bakóng sampolò an nalinigan? Haen an siyám? Mayò nin nagbalík sa pagtaó nin kamurawayan sa Diós kundî an dayuhan na iní?”

Para ki Jesús maninigò asín dapat na magpasalamat kitá sa Diós. May istorya sa 2 Hade 5 dapít ki Naaman, saróng henerál kan Syria asín leproso man. Nabolóng siyá kan sinunód niyá an pagboót ni profeta Eliseo na magkarigos nin pitóng beses sa salog Jordan. Sa pagpasalamat boót niyáng magregalo sa profeta alagad nagsayuma iní. Kayâ nagsabi si Naaman: “daí na madolot an saimong sorogoón nin tinutóng-na-atang asín sacrificio sa ibáng diós kundî sa Kagurangnan.”

Bilang dolot pasalamat ni Naaman, nagpoón siyá sa pagsamba sa totoong Diós. Alagad iníng gawè nin pagpasalamat an nagdará saiya sa mas darakulà pang gracia huli kan pag-akò niyá sa Kagurangnan.

Sa Prefacio Comun IV kan Santa Misa may magayonon na pamîbî: “Huli ta minsan nganì daí Mo kaipohan an samóng pag-omaw, balaog Mo man giraray an pagpahayag mi nin utang na boót, ta minsan mayong naidadagdag Saimo an samóng mga pagharubay, pinapauswag kamí sagkod sa kaligtasan.”

Daí kaipohan nin Diós an satóng pagpasalamat, kundî idtong sarô sa sampolong narahay, na nagbalík para magpasalamat, nakamtan an pinakadakulang biyaya, na oróg pa kisa pagkarahay sa helang: an kaligtasan huli kan satóng Kagurangnan.

Pâno kitá “maninigò asín dapat na danay asín minsan saen magpasalamat sa Kagurangnan?”

Magpasalamat kitá sa paagi nin pagsamba asín pagkámoot Saiya.

Sa Exodo 20,2-11, an enot na toló sa Sampolong Tugon dapít sa tamang pagsambá sa Diós na nakipagtipan sa Saiyang banwaan Israel. “Daí kamóng ibáng Diós na sasambahón, kundî Akó saná.” “Daí pagbasangon an ngaran nin Kagurangnan.” “Pabanalón an aldaw nin Kagurangnan.” An satóng pagsimba asín pagpabanál kan aldaw kan Domingo maninigong gawè nin pasalamat na tinugon satô nin Diós. Kayâ nganì an Santa Misa ináapód man na “Eucaristía,” an kahulugán kainí “pagpasalamat.”

Magpasalamat kitá sa paagi nin paglakáw sa dalan nin katanosan asín kabanalan.

Sabi ni Jesús sa Juán 14,15: “Kun namomòtan nindo Akó, uutobón nindo an Sakuyang mga tugon.” Kun an dalan na iní an satóng agihan, dadarhon kitá kainí sa tunay na katalingkasan asín kaogmahan. Sabi pa niyá sa Juán 8,31-32: “Kun magpadagos kamó sa Sakóng tataramon, tunay Ko kamóng mga disipulos; mamimidbid nindo an katotoohan asín itatalingkas kamó kan katotoohan.”

Magpasalamat kitá sa satóng pagkámoot sa mga namomòtan nin Diós.

Sabi sa 1 Juán 4,16: “An Diós pagkámoot: an nagdadanay sa pagkámoot, nagdadanay sa Diós, asín an Diós nagdadanay saiya.” Pag kitá namómoót asín nagtatabang sa kapwang nangangaipo, kitá nagigin instrumento kan pagkaherak asín pagkámoot nin Diós sa sainda, asín sinda man dinadará sa pagpasalamat sa Diós.

…

GIYA SA PAGHIRÁS | Anó an ipinapasalamat mo sa Kagurangnan sa saimong buhay ngonian? | GIYA SA PAGHIRÔ | Anóng gawè nin pasalamat sa Diós an pwede nindong gibohon bilang saróng komunidad/pamilya?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

Siring sa Pisog nin Mustasa

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Octubre 5-11, 2025. Basahon an Evangelio gikan sa Lucas 17,5-10 (Ika-27 Domingo sa Ordinariong Panahón - C).

…

May parte sa katukdoán sa Evangelio kan satóng Kagurangnan Jesu Cristo na kaipuhan linawon ta ngôna: an halimbawà kan pagtrato sa saróng oripon kan saiyang amo. Bakô iní pag-oyon Niyá sa sitwasyon nin explotación o makuring pagtrato sa mga nagtatrabaho, kundî paggamit nin analohiya na nasasabotan kan Saiyang mga paradangog kaidtong panahón.

Sa katunayan tinuyaw ni Jesús an nagkapirang mga inhustisya kaidtong panahón. Sa Mateo 23,4 sinabi Niyá na daí pag-arogon an mga Fariseos na “nagbubugkos nin magagabat na darahon, masakit makarga, asín ipinapapâsan ninda iyán sa mga tawo, alagad sinda habô maghirô kaiyán, ni kan saindang murô.”

Iníng parábola nagpoón sa paghagad ki Jesús kan mga apóstoles: “Pakusogá an samóng pagtubód!” An Saiyang simbag iyó an pagtukdô dapít sa pagtubód na siring sa pisóg nin mustasa. Anó an kahulugán kainí?

Enot, an pagtubód kaipuhan mapakumbabâ.

Siring sa sadít na pisóg nin mustasa, akoon ta an satóng pagigin sadít sa hampang kan kadakulaan nin Diós. Nasusurat sa 1 Pedro 5,5: “an Diós kalaban nin mga mapaabáw-abaw, alagad nagtátaó nin gracia sa mga mapakumbabâ.” Huli ta kun panô-panò na kitá sa satóng sadiri, may lugár pa daw sa satô para akoon an gracia nin Diós?

Kayâ kun an satóng mga gibong karahayan magpadakulà kan satóng paghilíng sa sadiri o magdará satô sa paghonà na mas maninigò kitáng mabiyayaan kisa sa ibá, sabihon ta sa satóng sadiri: “Mayong pakinabang na mga oripon kamí; katongdan niamong gibohon an ginibo mi.”

Ikaduwá, an pagtubód andam magpagadán sa sadiri.

Siring sa pisóg na piglulubóng sa dagâ tanganing magtubò na tinanóm, kitá man dapat andám sa pagpagadán sa sadiri – sa satóng pagkamakasadiri, pagkaurí, asín mga kakundian – tanganing mabuhay an bâgong pagkatawo na tinátaó ni Cristo satô.

Sa Marcos 8,35-36, tinukdô Niyá: “An boót magligtas kan sadiring kalág, mawawâran kaiyán, alagad an mawâran kan sadiring kalág dahil Sakô asín sa Evangelio, saiya iyán na ililigtas. Ta anó an pakinabang nin tawo na ginana an bilog na kinâban alagad napierde an kalág?”

Ikatoló, an pagtubód nagtatalubò tanganing magbunga.

Iní an rasón kun natà kaipuhan na an satóng pagtubód nagpapakumbabâ asín nagpapagadán sa sadiri. Sabi ni Jesús sa Juán 12,24: “Kun an tipasì nin trigo na nahulog sa dagâ daí magadán, padagos na iyó saná iyán; alagad kun magadán, dakúl an ibinubunga.”

Dangan sabi ni San Pablo sa Galacia 5,22-23: “Alagad an bunga kan Espiritu pagkamoot, kaogmahan, katoninongan, pagpasencia, kabootan, karahayan, kaimbodán, kahoyoan, saká disiplina sa sadiri.”

Kun may pagtubód kitá siring sa sadít na pisóg nin mustasa, tataó man kitáng maghilíng na sa satóng kasaditan asín pagkamakasâlan, kitá nawarasan kan kadakulaan kan gracia asin pagkaherak nin Diós, tanganing magtalubò, magbunga, asín maghirás man sa kapwa kan graciang nákua ta sa Kagurangnan. Kayâ, siring sa mga Apóstoles, hagadon ta man ki Jesús na pakusogón an satóng pagtubód.

…

GIYA SA PAGHIRÁS | Maghirás nin experiencia na hinagad mo sa pamîbî na pakusogón nin Diós an saimong pagtubód? | GIYA SA PAGHIRÔ | Bilang saróng komunidad/pamilya, anó an pwede nindong pagtarabangan ngonian tanganing mapakusóg asín mapatalubò pa an pagtubód nin lambang sarô saindo?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song