An Anunciación ki San José

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 21-27, 2025. Basahon an Evangelio gikan sa Mateo 1,18-24 (Ikaapát na Domingo kan Adviento - A)

…

Sa Evangelio pig-iistorya an pagbaretà kan angel ki San José. Sa Evangelio ni San Lucas an anunciación nangyarì ki Santa María, alagad sa Evangelio ni San Mateo, iní nangyarì ki San José. May ibá pang anunciación sa laóg kan dakulang istorya kan pagkamundag ni Jesús: ki San Zacarías, sa mga pastores, asín sa mga mago.

Anó an itinutukdò satô kan anunciación ki San José?

Enot, an Diós an naenot na námoót asín nagraní sa tawo.

Igwa nin dakulang plano an Diós para sa katawohan: na ihâwas kitá sa kasâlan asín darhón sa Saiyang Kahadean. Sa sadiring kakayahan daí ta kayang iligtas an satóng sadiri sa kasâlan asín kagadanan, sa sadiring kaisipan daí ta maabót saboton an misterio kan Kahadean. Kayâ – siring ki San José na nariribongan kun anó an dapat na gibohon sa baretà saiya ni Sta. María na iní badós na asín an akì bakô gikan saiya – an Diós na mismo an nagráraní para itukdô satô an Kagurangnan Jesu Cristo, an Saiyang pagkamoot na nanitawo para sa katawohan. 

Sabi sa 1 Juán 4,19: “Kitá namómoót, huli ta Siyá enot Niyá kitáng namòtan.”

Ikaduwá, huli ki San José nautób an mga profesía dapít sa Mesías na madatong.

Sinabi saiya kan angel na nautób ki Sta. María an nasusurat sa Isaías 7,14: “Uya, an virgen mangingidam asín mangangakì nin lalaki, na aapodón Emmanuel.” Dangan sa pag-akò ni San José ki Sta. María bilang agóm asín kan aking nasa popònan bilang saiyang akì, nautób an panugâ nin Diós ki Hadeng Davíd sa 2 Samuel 7,12-13: “Gigibohon kong hadè an sarô kan saimong mga aking lalaki asín papakusogón Ko an saiyang kahadean. Siya an matugdok nin Templo para Sakô, asín papagdanayon ko an Saiyang trono sagkod pa man.”

Sa Mateo 1,1-17 nakalista an mga ngaran nin mga kapag-arakian poón ki Abrahám sagkod ki Hadeng Davíd, sagkod ki San José asín ki Jesu Cristo.

Ikatoló, nagsasaksi iníng istorya sa kadakulaan kan pusò ni San José.

Sa tahaw kan saiyang kapurisawan, pinilì niyang mámoót. Habô niyang ipasupog si Sta. María, ni iosip sa autoridád tanganing patawan nin padusa. Sa pasabóng kan angel, pinilì niyáng magtubód asín tulos sunodón an kabôtan nin Diós. Pakagimatá, tulos ginibo an ipinapagibo saiya kan angel: inakò si María bilang agóm, asín nagi siyang marhay na padre de familia.

Si Papa Francisco, sa saiyang Surat Apostolico Patris Corde (May Pusò nin Amâ), nagsabi dapít ki San José: “Maski sa tahaw nin mga takot ni José, nagtatrabaho an kabôtan, kasaysaysan, asín plano nin Diós. Kayâ tinutokdoán kitá ni José na kaiba sa pagtubód sa Diós iyó an pagtubód man na may mahahaman Siyá sa paagi niatò maski kadakul an satóng mga natatakotan asín kaluyahan. Tinutokdoán man niyá kitá na, sa tahaw nin mga bagyo sa satóng buhay, daí nanggad kitá matakot na pilíon an Diós na iyó an magiya satô.”

Siring ki San José, pirmi ta man lugód mahiling asín mamatean an pagkamoot nin Diós sa satóng buhay tanganing danay na hanapon an Saiyang kadonongan asín kabôtan, asín pakákuá kan mga iní, maogma tang sunodón asín isabuhay.

…

GIYA SA PAGHIRÁS | Maghirás nin experiencia kun pâno ka inapód nin Diós na magsarig Saiya asín gibohon an Saiyang kabôtan, sa tahaw nin mga katibaadan. | GIYA SA PAGHIRÔ | Bilang sararóng komunidad/pamilya, magpilì nin sarô o nagkapira sa komunidad para tabangan o pagíanon an inaagihan sa buhay.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

Naghahalat kan Maogmang Paglaom

Giya sa Prayer-Meeting nin mga Saradit na Komunidad nin Pagtubód (SAKOP) para sa semana kan Diciembre 14-20, 2025. Basahon an Evangelio gikan sa Mateo 11,2-11 (Ikatolóng Domingo kan Adviento - A).

…

An Ikatolóng Domingo kan Adviento ináapód Domingo de Gaudete. Halè iní sa Latín kan Filipo 4,4: “Gaudete in Domino semper: iterum dico gaudete” (Danay kamóng mag-ogma sa Kagurangnan: giraray sinasabi ko, mag-ogma kamó), na iyó an Antifona sa Pagpoón kan Misa sa Domingong iní. Natà ta mag-oogma kitá? Huli “ta an Kagurangnan haraní na” (Filipos 4,5).

Anó an mga nagdadará satô nin kaogmahan sa Pasko? An mga regalo para sa kaakian? An Christmas bonus asín 13th month pay nin mga nagtatrabaho? An masulong na benta sa negosyo? An mga dekorasyon asín pailaw sa Pasko, poón sa mga haróng sagkod sa mga pampublikong lugár? An mga pagtiripon nin mga mahál sa buhay? Pâno kun mawarà an mga iní, maogma pa daw an satuyang Pasko?

Sa istorya sa Evangelio nasa bilanggoan si San Juán Bautista. Bakô maogma an mapreso, mas lalò kun bakóng makatarungan. Iní gayód an nasa isip ni Hadeng Herodes kan pinadakóp niyá si Juán huli ta daí niyá nagustohán an sinabi kan profeta dapít sa paggibo niyáng sambay kan agóm kan saiyang tugang. An daí maisip kan mga siring ki Herodes iyó na mas hararom an burabod nin kaogmahan asín paglaom kan mga siring ki Juán na nagsasarig sa Kagurangnan. Nin huli ta, oróg sa gabós, an tunay na kaogmahan yaon sa satóng Kagurangnan Jesu Cristo.

Si Cristo an nagtátaóng kahulugán sa satóng buhay.

Kan nadangog ni Juán an simbag ni Jesús sa mga sinugò niyá, narumdoman niyá an mga tataramon sa mga profesía, sa Isaías 35,5-6: “mamumuklat an mga matá nin mga butá, asín mabubuksan an mga talinga nin mga bungóg. Dangan maglulukso siring sa osá an mga piláy, asín maawit an mga dilà nin mga púla.” An misyon ni Juán iyó na andamón an mga tawo sa pag-abót kan Mesías. Kan madangog niyá an mga sinabi kan mga disipulos, naogma siyáng maaraman na nautób na an saiyang misyon.

Kun an satóng mga gibo nagpapahilíng nin pakisumarò sa misyon ni Cristo bilang pading nagdadará sa kapwa parani sa Diós, profetang nagsasaksi sa katotoohan, asín hadeng naglilingkod – may kahulugán an satóng mga paghingowa, may kaogmahan an satóng mga pagpagál.

Si Cristo an satóng paglaom.

Sa Embolismo o an halabang Amen pagkatapos kan Amâ Niamò sa Misa, sinasambit na kitá nagháhalát “kan maogmang paglaom asín pagdatóng kan satóng Paraligtas, na si Jesu Cristo.” Gurâno man kakusóg an mga tentación na satóng hinahampang sa pagsunód sa Saiyang kabôtan, sigurado an kapangganahan kun kitá nasa lindong Niyá, huli ta sigurado man an Saiyang mamuraway na pagdatóng.

An mga kaogmahan na kaiba sa celebración kan Adviento asín Pasko, mga kinâbanon asín minalipas saná. An mga iní nagtátaó nin patanâ asín anino kan daí masukol na kaogmahan na naghahalát satô sa pagdatóng kan kapanoan kan Kahadean.

Si Cristo an satóng kalakbay sa dalan.

Bakô saná an madatong na kamurawayan an satóng kaogmahan, kundî ngonian pa saná, sa paglakaw ta sa Saiyang dalan, kaiba ta na Siyá. Huli ta an pigprofesía sa Mateo 1,23 na “Emmanuel, Diós na uya satô,” sa Mateo 28,20 nanugâ sa mga sinugò Niyá sa pagmisyon: “Uya kaiba nindo Akó gabós na aldaw, sagkod sa kataposan kan kinâban.”

Sabi nganì sa awit Pamasko kan Apo Hiking Society: “Ngunit kahit na anóng mangyari, ang pag-ibig sana’y magharì, sapát nang si Jesús ang kasama mo, tulóy na tulóy pa rin an Pasko.”

…

GIYA SA PAGHIRÁS | Anó an mga nagtatao saimo nin kaogmahan asín kahulugan sa buhay ngonian na panahon nin Adviento asín Pasko. | GIYA SA PAGHIRÔ | Bilang sararóng komunidad/pamilya, anó an pwede tang pagtarabangan tanganing maihiras an maogmang paglaom kan Adviento asín celebracion kan Pasko?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

Tingog na Nagkukurahaw sa Desierto

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Diciembre 7-13, 2025. Basahon an Evangelio gikan sa Mateo 3,1-12 (Ikaduwáng Domingo kan Adviento -A).

…

Sa Evangelio madadangog niatò an mensahe ni San Juán Bautista: “Magbaraklê kamó; ta haraní na an Kahadean kan langit!” Siyá an nasusurat sa profesía sa Isaías 40,3 na “tingog na nagkukurahaw sa desierto: ‘Andamá an dalan kan Kagurangnan, patanosa an Saiyang mga agihán’.”

Sinabi niyá iní sa saiyang mga kapwa Judío bilang pag-andam sainda – bakô na sa pagkamundag ni Jesús nin huli ta sa panahón na idto pareho na sindang magpinsan gayód mga nasa 30 años na – kundi sa máabót na pagpamidbid ni Jesús sa Saiyang ministerio publico.

Sa satóng panahón an pangapodan ni San Juán mas pa sa pag-andam sa Ikaduwáng Pagdatóng kan Kagurangnan sa paghukóm sa mga buháy asín mga gadán. Huli ta an Adviento panahón nin pag-andam sa duwáng pagdatóng ni Jesús: an enot Niyáng pagdatóng na sinecelebrár sa Pasko kan Pagkamundag, asín an ikaduwá Niyáng pagdatóng sa huríng panahón.

Sabi ni San Juán sa Mateo 3,12, an Kagurangnan mádatóng “kapót Niyá an pantahóp, lilinigan an Saiyang giníkan, titiponon an Saiyang mga trigo sa tambobong, alagad an apá susuloón sa kalayong daí masisigbo.” Anó an dapat niatong gibohon tanganing magkanigong mag-andam sa Saiyang Ikaduwáng Pagdatóng?

Daí pagpaorogón an sadiring kabôtan.

Sa Griego an tataramon na ginagamit sa pagbaklê iyó an “metanoite”, na an boót sabihon, pagbâgo nin isip, o susog ki San Juán, pagbâgong-buhay. Nasusurat sa Proverbio 3,5-6: “Magtiwalà ka sa Kagurangnan sa bilog mong pusò, asín sa sadiri mong pakasabot daí ka magsandig. Sa gabós mong gawè midbidon mo Siyá, asín papatanoson Niyá an saimong mga agihán.” An tamang dalan iyó an pag-ayon kan satóng isip, boót, asín mga gibo, sa kabôtan nin Diós.

Daí maghonang ligtas na kitá maski daí magbaklê.

Sa Evangelio, pigsagwè ni San Juán an mga Fariseos asín Saduceos na yaraon kaiba sa mga nagdadarangóg asín boót man gayód magpabonyag, alagad daíng planong magbâgong-buhay, nin huli ta naghoronà na ligtas na sinda sa padusa sa bisa kan pagigi nindang mga akì ni Abrahám asín kabilang sa Piniling Banwaan. Minuda sinda ni San Juán: “mga ugbon nin mga rimoranon!”

Kun buháy pa si San Juán ngonian asín máhilíng niyá an sitwasyon ta – an mga autoridád na nag-aabuso kan saindang kapangyarihan, an mga pulitiko asín saindang mga kasabwat na naghahàbas sa kabán nin banwaan, an mga ginibong negosyo an pagpalakop nin disinformación, mantang kadakul an nagtitios asín turubodon sa saindang mga idolong utikón – mumudahon man niyá an mga iní asín aapodón: “mga ugbon nin mga rimoranon!”

May pagiromdom satô si Jesús, lalò na sa mga naghohonà na daí na daá kaipohan magbaklê asín magbâgo huli sa saltóng pagtubód na an Diós na mamomôton daí mátaóng paghukóm. Sinabi Niyá sa Mateo 7,21: “Bakô gabós na nagsasabi Sakô: ‘Kagurangnan, Kagurangnan,’ makákalaóg sa Kahadean kan langit, kundî an naggigibo kan boót kan Amá Kong yaon sa langit.”

Daí pagpahaloyón an pagbâgong-buhay.

Huli ta sabi nganì ni San Pablo sa 1 Tesalonica 5,2: “Ta aram nindong marhay na máabót an aldaw kan Kagurangnan siring sa parahâbon, banggi.” Bakô saná na dapat kitáng matakot sa padusa huli kan satóng mga kasâlan, na daí ta aram kun nuarín máabót, kundî an pagbâgong-buhay pagtamà asín pagpakarhay kan satóng buhay. Kun boót tang makatalingkás sa kaoripnán nin kasâlan, maglakáw na kitá tulos ngonian sa dalan nin Kagurangnan.

…

GIYA SA PAGHIRÁS | Maghirás kun arín sa saimong buhay an kaipohan mong pondohón, po’nan, asín padagoson tanganing magbâgong-buhay sa Kagurangnan. | GIYA SA PAGHIRÔ | Bilang sararóng komunidad/pamilya, pâno kitá magsusuroportahan sa kanya-kanya niatong paghingowang magbâgo?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

Buksan Ta asin Linigan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Noviembre 30-Diciembre 6, 2025. Basahon an Evangelio gikan sa Mateo 24,37-44 (Enot na Domingo kan Adviento - A).

…

An Adviento halè sa adventus, tataramon na Latín na boót sabihon “pagdatóng.” An panahón kan Adviento, panahón nin pag-andam sa pagdatóng kan satóng Kagurangnan Jesu Cristo – sa duwá Niyáng pagdatóng. An enot na pagdatóng iyó kan Siyá ipinangidam ni Virgen María asín namundag sa kinâban. An ikaduwá Niyáng pagdatóng iyó an sa huríng panahón nin paghukóm sa mga buháy asín mga gadán asín kapanoan kan Saiyang Kahadean.

Sa Santa Misa, iní an sinasabi sa enot na Prefacio kan Adviento: “Sa enot na pagdatóng sa kapakumbabaan kan inakong lamán, inutób Niyá an katongdan kan daan na patakarán, asín binuksan para samô an dalan nin kaligtasan na daíng kasagkoran; tanganing sa ikaduwá Niyáng pagdatóng sa kamurawayan kan Saiyang kamahalan, ikapahilíng na gayo an nahamán Niyáng gibo, makamtan mi an panugâ na ngonian sa pagbantay, pinapangahasán ming halatón.”

Kayâ an Adviento nabábangâ sa duwáng kabtang. An enot na kabtang, na minápoón sa enot na Domingo hanggang Diciembre 16, iyó an pag-andam sa ikaduwáng pagdatóng ni Cristo. An ikaduwáng kabtang, sa Diciembre 17 hanggang 24, iyó an pag-andam sa Pasko kan Saiyang Pagkamundag.

Sa Pilipinas, an preparasyon sa Pasko minápoón sa Diciembre 16, sa mga Misa novenario na ináapód na Misa Aguinaldo, o Misa de Gallo, o Simbang Gabi.

Anó an tamà asín maninigong pag-andam niatò sa pagdatóng kan Kagurangnan? May saróng awit sa Adviento na pwedeng makatabang magsimbag: “Buksan ta asín linigan pusong may kakundían, ta máabót na si Cristo satuyang Kagurangnan.”

Buksan an Pusò

An pusong bukás, pusong namómoót. An pusong sarado, dai namómoót kundî pinapaoróg an sadiri. Kun minsan sarado an pusò huli ta nakulgan dati asín takót nang makulgan giraray. Alagad kun panô nin pagkamakasadiri asín takot an pusò, pâno iní mabubuksan asín mag-akò ki Jesús?

Sabi sa Kapahayagan 3,20: “Uya, nakatindog Akó sa may pintoan asín nagtututoktok. Kun igwa nin makádangóg sa Sakóng tingog asín magbukás kan pintoan, makikidagos Akó asín makikipamanggi, Akó Saiya asín siyá Sakô.” Sa tahaw kan Saiyang enot asín ikaduwáng pagdatóng, ngonian mismo nagtutoktok si Jesús sa satóng pusò na palaogón ta Siyá tanganing makamtan ta an gracia kan Saiyang presencia.

Linigan an Pusò

Siring na linilinig ta an haróng tanganing marhay pag-estaran asín presentable sa mga bisita, iyó man an dapat sa pusò na nagmamàwot sa Diós. Si San Pablo nagtukdô sa Roma 13,13: “Siring kun aldaw, maglakáw kitá susog sa dapat, bakô sa maatíng hurolnakan asín bururatan, bakô sa kaóragan asín karigsokán, bakô sa padaraóg-daogan asín irinoman.”

Natà kaipohan na malinig an satóng pusò? Nin huli ta kun panô iní nin atî nin kasâlan, pâno ta pa maaakò an gracia kan Kagurangnan kun daí nang lugár sa satóng pusò para Saiya? Sa satóng paglakbay sa Adviento, an satong mga pusong binuksan asín lininigan, magtalubò lugod sa gracia asín pagkamoot nin Diós.

…

GIYA SA PAGHIRÁS | Pâno mo bubuksan asín lilinigan an saimong pusò sa pag-andam sa Pasko kan Pagkamundag asín sa Ikaduwáng Pagdatóng kan Kagurangnan? | GIYA SA PAGHIRÔ | Bilang sararóng komunidad/pamilya anóng gawè nin espirituál na pag-andam an boót nindong gibohon sa laóg kainíng Adviento?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

Dai Kitang Ibang Hade, si Cristo Saná

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Noviembre 23-29, 2025. Basahon an Evangelio gikan sa Lucas 23,35-43 (Solemnidad ni Cristong Hadè - C).

…

Ngonian na taón sinecelebrar an ika-100 na aniversario kan pagtogdas kan Solemnidad kan Satóng Kagurangnan Jesu Cristo, Hadè kan Gabós na Linaláng, o mas midbid sa Solemnidad kan Cristo Rey. An fiestang iní tinogdas ni Papa Pio XI kan taón 1925, panahón sa Europa kun kasuarín nagpopoón na an pagkusóg kan mga ideolohiyang sinisikwal an Diós asín pinapaoróg an mga kaisipán nin tawo asín kinâbanon na kapangyarihan, siring kan secularismo, comunismo, asín fascismo.

Sinabi ni Papa Pio XI sa saiyang surat na Quas Primas (33): “Kaipohan maghadè Siyá sa satóng isip sa pagtubód sa mga katotoohan asín katukdoán ni Cristo. Maghadè Siyá sa satóng boót sa pagsunód sa mga tugon asín kabôtan nin Diós. Maghadè Siyá sa satóng pusò sa pagkamoot sa Diós oróg sa gabós asín pakisumarò sa Saiya saná. Maghadè Siyá sa satóng hawak sa pagigin instrumento para sa kabanalan asín hustisya nin Diós.”

Natà ta kaipohan maghadè si Jesu Cristo sa satóng isip, pusò, boót, asín hawak? Huli ta yaon Saiya saná an kaligtasan asín kapanoan nin buhay. Sabi ni San Pablo sa Colosas 1,14: “sa kahadean kan Aking namomòtan, igwa kitá nin katubosán, kapatawarán nin mga kasâlan.”

Magpasakop kitá sa satóng Hadè.  

An pinakatandâ na inaakò ta si Cristo bilang satóng hadè iyó na sinúsunód ta an Saiyang kabôtan, bakô an satóng sadiring kagustohan. Sinabi Niyá sa Lucas 5,32: “Daí akó nagdigdi sa pag-apód kan mga suripot, kundî kan mga parakasalà para magbaklî.” An sinasabi Niyáng mga suripot iyó idtong mga matanos sa saindang sadiring paghonà, alagad bakô sa matá nin Diós.

Kun bakô si Cristo an nakakasakop satô, may ibang tinutugotan kitáng sakopon an satóng sadiri – pwedeng an satóng mga ambisyon, mga bisyo, mga minalipas na kaogmahan, pwede nganing mga mahál sa buhay, o mga makapangyarihan sa kinâban. Iníng mga imbwelto sa presenteng eskandalo nin kurapsyon, iyó nanggad an halimbawà nin mga nagpasakop bakô ki Cristo, kundî sa mga diós-diosan nin kayamanan asín kapangyarihan. Herak man saindang nagsusunód sa mga diós-diosan na iní, huli ta an kaligtasan makúkuá ki Cristo saná. Susog sa Gibo 4,12: “mayò kiísay pa man an kaligtasan, ta mayong ibáng ngaran sa sirong kan langit na itinaó sa mga tawo, na kaipohan para kitá makaligtas.”

Maglakáw kitá sa dalan kan Hadè.

Sa Juán 14,6, an satóng Hadè nagsabi: “Akó an dalan, an katotoohan, asín an buhay.” Sa Fiesta kan Cristong Hadè an Evangelio iyo an pagtuyâ-tuyâ ki Cristo – mantang naghihingagdan Siyá sa cruz – kan mga pamayó kan banwaan, mga soldados, patin kan sarô sa mga kaiba Niyáng nakapakò man. An dalan kan cruz iyó an dalan ni Cristong Hadè.

Sa panahón na an mga naghahadê-hadean na dinastiya sa satóng nacion, asín saindang mga kampon, nag-iiriwal para sa pansadiring interes, romdomón na igwa kitá nin Hadè na nagsabi sa Marcos 10,45 na Siyá “daí nagdigdi nganing paglingkodán, kundî nganing maglingkod asín itaó an buhay Niyáng pantubós para sa dakûl.”

Kadakul an namómoót sa kapangyarihan, alagad si Jesús ipinahilíng an kapangyarihan nin pagkamoot. Kadakul an nagmamàwot na magyaman, alagad Siyá nagpakadukhâ asín nakisumarò sa mga dukhâ asín karadayán.

An mga nagturuyâ-tuyâ ki Jesús uro-otro sa pagtarám na iligtas Niyá an Saiyang sadiri sa cruz. Iní tandâ kan saindang saláng kaisipan dapít sa kapangyarihan. Alagad malinaw sa satóng Hadè kun natà nakapakò Siyá sa cruz: tanganing iligtas kitá gabós. Iyán an pusò nin tunay na hadè. Magin siring lugód an pusò ta. 

Viva El Cristo Rey!

…

GIYA SA PAGHIRÁS | Pâno mo masasabi na si Cristo an saimong hadè? | GIYA SA PAGHIRÔ | Anóng paglingkod o pagtabang sa kapwa an pwede nindong sararóng gibohon sa pag-utób kan saindong misyon sa pagkahadè?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

Pano Mag-andam para sa Huring Panahon?

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Noviembre 16-22, 2025. Basahon an Evangelio gikan sa Lucas 21,5-19 (Ika-33 na Domingo sa Ordinariong Panahón - C).

…

Sa Evangelio may nagkapirang profesía an satóng Kagurangnan Jesu Cristo dapít sa mga máabót na pangyayari: an pagkarompág kan Templo, mga ralaban, calamidád, persekusyon asín pagsakit. Lalò na an mga gyera asín persekusyon, pig-agihan nanggad kan suanoy na Simbahan. Dangan an Templo sa Jerusalem rinompág nanggad kan taón 70 AD kan mga pwersa kan Imperiong Romano. Sa katunayan, an mga iní nangyari na bâgo pa man nasurat an Evangelio ni San Lucas.

Asín an mensahe sa mga disipulos kaidto sa tahaw nin mga calamidád, naturál man asín kagibohán nin tawo: daí matakot. Kaiba ta an Diós. Siyá an satóng parasurog.

Siring man, iníng mensahe angay sa gabós na panahón. Nin huli ta an profesía ni Jesús dapít man sa mga mangyayari bâgo kan katapusan kan panahón, o sa Griego eschaton. Escatología an apód sa pag-adal dapít sa mga huríng bagay: kagadanan, paghukóm, langit, impierno, purgatorio, pagkabuhay-liwát, asín buhay na daíng kasagkoran. Sa mga huríng Domingo sa calendario liturgico kan Simbahan, iní an mga pinapahoróp-horopan satô, lalò na an dapít sa paghukóm.

Igwa nin duwáng paghukóm na aagihan an lambang sarô satô: enot, an Particulár na Paghukóm sa satóng pagkagadán. Sabi sa Hebreo 9,27: “Itinalagâ sa mga tawo na makasarô sanáng magadán, pero pakatapos kainí an paghukóm.” Dangan, an Huríng Paghukóm sa Ikaduwáng Pagdatóng ni Jesu Cristo. Sa Malakías 3,19-20 nasusurat: “Uya, an aldaw máabót na, naglalaad siring sa pugón. An gabós na mapaabáw-abaw asín gabós na paragibo nin katampalasan magigin dagami, susuloón sinda kan aldaw na máabót na.” Alagad para sa mga matanos “masirang an aldaw nin kasuripotan.”

Pâno ta man nanggad pag-andamán an huríng panahón, asín an aagihan tang paghukóm?

Magdanay kitá sa Diós.

Nagsabi si Jesús sa Lucas 21,19: “Sa saindong pagtagal makakamtan nindo an saindong mga kalág.” Kayâ magdanay kitá sa pag-utób kan Saiyang kabôtan, sa pagtalubò sa pagkamidbid asín pagkamoot Saiya, asín sa mga gibong herak sa kapwa. Nasusurat sa Santiago 2,14: “Anó an pakinabang, mga tugang ko, kun may magsabi na igwa siyá nin pagtubód alagad mayò nin gibo? Maligtas daw siyá kan pagtubód na iyán?”

Gibohon an misyon na tinugon satô ni Cristo.

An pagdatóng kan Kahadean nin Diós iyó an kapanoan kan misyon ni Cristo na winalat asín hinirás Niyá satô. Dakulang privilegio an magpadagos kan Saiyang misyon. Minsan kan nagbalík ki Jesús an mga disipulos matapos na isubol Niyá sinda sa misyon, asín maogmang pig-istorya ninda an saindang mga ginibo, sa Lucas 10,20 sinabihan Niyá sinda: “Daí kamó mag-ogma na an mga maraot na espiritu nasasakop nindo, kundî mag-ogma kamó na an saindong mga ngaran nasusurat sa langit.”

Mag-ingat sa mga nagpapatubód nin mga saláng katukdoán.

Sa panahón ngonian, mag-ingat kitá sa mga naghahasik nin disinformación; sa mga pinapaluwás na tamà an salâ, asín salâ an tamà; sa mga nag-iinfluencia sa publiko na magsuporta sa mga kurakot asín maraot na pulitiko asín negosyante.

Alagad may sarô pang mas dapat tang likayán: na kitá mismo an magdará sa kapwa sa kasâlan. Sa Lucas 17,2, nagpatanid si Jesús: “Marhay pa saiya kun, gakodán sa líog nin gapóng gilingán, na itapok na sa dagat, dai niyá lamang mapadungkal an sarô kainíng saradít.”

…

GIYA SA PAGHIRÁS | Maghirás nin experiencia kan inaagihan mong kadipisilan o tentación sa ngonian. Anó an saimong naginibo dapít kainí? | GIYA SA PAGHIRÔ | Bilang saróng komunidad/pamilya, anó an pwede nindong pagtarabangan tanganing mapagián an dinádaráng problema kan maski sarô sa saindong pag-iriba?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

Naglalaad na Pagkamoot sa Simbahan

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Noviembre 9-15, 2025. Basahon an Evangelio gikan sa Juán 2,13-22 (Dedicacion kan Basilica de San Juán de Letran).

…

An Evangelio iyó an istorya kan “paglinig” kan satóng Kagurangnan Jesu Cristo kan Templo sa Jerusalem. Iní an Evangelio sa Fiesta kan Dedicacion kan Basilica kan Oróg Kabanál na Paraligtas asín ni San Juán Bautista asín San Juán Evangelista, o mas midbid bilang Basilica de San Juán de Letran o Laterano. Iní an “ináng simbahan” kan enterong Simbahan huli ta iní an catedral kan Obispo kan Roma na iyó an Santo Papa, an presenteng kasalihid ni San Pedro. Anó an mensahe para satô kan fiestang iní?

Kamòtan ta an satóng Simbahan

Kan náhilíng kan mga disipulos an ginibo ni Jesús, naromdoman ninda an nasusurat sa Psalmo 69,9: “O Diós, an pagmakulóg Ko sa Saimong haróng, naglalaad siring sa kalayo.” Siring man daw kaiyán an pagkamoot asín paggalang ta sa simbahan na haróng nin Diós asín nin mga paratubod?

Sa pagcelebrár ta kan Dedicacion kan Basilica Laterano sa Roma, rinoromdom ta man an biyayà kan lambang simbahan sa bilog na kinâban – kun saén kitá nagtitiripon sa Santa Misa, nag-aakò kan mga sacramento, nagpapamîbî, asín namamatean an presencia nin Diós sa satóng buhay.

Kayâ paglaóg ta sa simbahan, ginigibo ta daw an mga maninigong gawè digdi – poón sa satóng solemneng disposisyon asín silencio, aktibong partisipasyon sa liturgía, paggalang sa kapwang namimibi, disenteng pagbadò, pagmantenér kan kalinigan, sagkod sa suporta sa pag-ataman asín pagpakarhay kainí?

Si Jesús an Templo kan Amâ

Kan hinapót si Jesús kun anóng autoridád Niyá para maggibo kaidto, nagsimbag Siyá: “Gabaá nindo an Templong iní, asín papatindogón ko liwát sa laóg nin tolóng aldaw.” Alagad an Templong boót Niyáng sabihon iyó an sadiri Niyáng hawak.

Para sa mga Judío, an Templo sa Jerusalem bakô saná edificiong urgollo ninda bilang nación, kundî an mismong presencia nin Diós sa saindang banwaan. Sa pinakabanál na parte kainí yaon an Arca kan Tipan. Alagad si Jesús, oróg pa sa Templo huli ta Siyá mismo an Diós na nanitawo, “an Tataramon na nani-lamán asín nagkampo sa tahaw niatò” susog sa Juán 1,14.

Sa laóg kan satóng Cristianong simbahan, an pinakabanál na parte iyó an tunay na presencia ni Cristo sa tabernaculo, asín an pinakahalangkáw na celebracion iyó an Eucaristía kun saén an atang na tinapay asín alak nagigin hawak asín dugô ni Cristo. An katuyohán daw kan satóng pagsimba iyó an paki-comunion ta Saiya?

Kitá an Templo kan Espiritu Santo

Banál nanggad an edificio kan simbahan alagad bakô iní an kapanoan kan pagigin Simbahan, huli ta iní compuesto nin buháy na mga gapô, an Banwaan nin Diós asín Misticong Hawak ni Cristo. Dangan an lambang sarô sa satóng mga miembro kainí pinapagiromdom ni San Pablo sa 1 Corinto 3,16: “Daí nindo aram na kamó an templo kan Diós, asín an Espiritu kan Diós nag-eerok saindo?”

Si Jesús nanitawo para satô. An Espiritu Santo pinadará para pabanalón asín surogón kitá. An Simbahan sinugò ni Jesús sa pagmisyon sa katawohan. Sa satóng pagsimba, nagigi daw kitáng mas mamomôton sa kapwa? Sabi ni San Juán Crisostomo: “Kun daí nindo mamidbidan si Cristo sa makilimos sa may pintô kan simbahan, daí nindo Siyá makúkuá sa caliz.

…

GIYA SA PAGHIRÁS | Maghirás nin experiencia na namatean mo an presencia nin Diós sa pagsimba o pagpamîbî sa simbahan. | GIYA SA PAGHIRÔ | Bilang sarong komunidad/pamilya, magplano kun pâno pa pakusogón asín pataluboon an saindong pagkásararô asín misyon bilang Sadít na Komunidad nin Pagtubód (SAKOP).

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

Madya Kamo Gabos na Napapagal

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Noviembre 2-8, 2025. Basahon an Evangelio gikan sa Mateo 11,25-30 (Pagromdom kan Gabós na Gadán na Paratubod).

…

Ngonian na taón an Aldaw kan mga Gadán o Fiesta kan Pagromdom kan Gabós na Gadán na Paratubod sinecelebrar sa aldaw na Domingo. Sa dakúl na mga lugár, an pagpamîbî sa mga namomòtan niatong gadán pinapadagos pa nganì sa enterong Noviembre.

Marhay man iníng panahón para paghoróp-horopan an mga Cristianong katukdoán dapít sa kagadanan, purgatorio, asín pagpamîbî para sa mga gadán.

Kagadanan

Sabi ni San Pablo sa Roma 5,12: “luminakóp sa gabós na tawo an kagadanan kawasà nagkasalà an gabós.” An kagadanan bakô parte sa orihinál na plano nin Diós kundî consequencia nin kasâlan. Alagad huli sa Misterio Pascual – an pagsakit, pagkagadán, asín pagkabuhay-liwát – kan satóng Kagurangnan Jesu Cristo, nabâgo an kahulugán kan kagadanan.

Sa mga maimbod Saiya, bakô na padusa an kagadanan kundî kapahingaloan. Sabi Niyá sa Mateo 11,28: “Madya kamó Sakô, gabós na napápagál asín nagagabatan, asín tatàwan Ko kamó nin kapahingaloan.”

Dangan an pagkatakot sa daíng kasigurohán na kawâran sinalidahan Niyá nin panugáng paglaom. Nagtukdô si San Pablo sa Roma 6,4: “Kun kitá binonyagán sa kagadanan ni Cristo Jesús, ilinubóng kitá sa kaibahan Niyá. Kayâ siring na si Cristo binuhay-liwát sa mga gadán, sa kamurawayan kan Amâ, kitá man mabubuhay-liwát.”

Purgatorio

Pag kitá magadán, mahampang kitá sa Particulár na Paghukóm na an hatol na padumanan: langit, o impierno, o purgatorio. An purgatorio bakô padusa kundî siring sa pag-agi sa kalayo, susog ki San Pablo sa 1 Corinto 3,15, na nagbabalô asín naglilinig.

Kontrobersyal an doctrina kan purgatorio para sa dakúl na bakóng Catolico, alagad an Simbahan na tinogdas ni Cristo nagtutukdô (CCC 1030): “An gabós na nagadán sa gracia asín pakipagkatood nin Diós, alagad bakô pang bolanos na malinig, sigurado na nanggad an saindang kaligtasan na daíng kasagkoran; alagad pagkagadán maagi nin paglinig tanganing makamtan an kabanalan na kaipohan tanganing makalaóg sa kaogmahan nin langit.” Huli ta susog sa Kapahayagán 21,27: “mayong anoman na maatî na makákalaóg sa banál na ciudad, ni an mga naggigibo nin karâtan o nagtátarám nin kaputikan.”

Pagpamîbî para sa mga Gadán

Kaidto pa man an mga Cristiano nagdodolot na nin mga atang asín pamîbî para sa mga gadán. Sa Lumang Tipan, sa 2 Macabeo 12,45-46, pig-istorya na si Judas Macabeo nagdolot para sa mga nagkagaradán nindang pag-iriba: “Huli kan saiyang pusog saka diósnon na prinsipyo na an gabós na tawong maimbod sa Diós mag-aakò nin dakulang premio, kayâ ginibo niyá an pagbabayad para sa kasâlan kan mga nagadán tanganing mapatawad an saindang kasâlan.”

Susog sa Katekismo (CCC 1032): “An Simbahan dinádará an mga gadán sa pagkaherak nin Diós asín nagdodolot kan saiyang mga pamîbî, lalò na an banál na sacrificio kan Eucaristía, tanganing, nalinigan, makamtan ninda an mabalaog na pagkáhilíng sa Diós.”

Alagad bakô saná kitáng Simbahan digdi sa dagâ (Ecclesia Militans) an namimîbî para sa mga gadán sa purgatorio (Ecclesia Penitens), kundî sinda man asín an katiriponan nin mga banál sa langit (Ecclesia Triumphans) namimîbî asín naghahagad kan gracia nin Diós para satô sa Paropakinabang nin mga Santos.

…

GIYA SA PAGHIRÁS | Maghirás kan tradisyon kan saindong pamilya sa Todos los Santos, sa Aldaw nin mga Gadán, asín sa pagpamîbî para sa saindong mga gadán. | GIYA SA PAGHIRÔ | Bilang saróng komunidad/pamilya magkasararô na mag-devocion o magpamîbî para sa mga gadán ngonian na bulan kan Noviembre.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

An Parabola kan Tamang Pagpamibi

Giya sa Prayer-Meeting nin mga Saradit na Komunidad nin Pagtubód (SAKOP) para sa semana kan Octubre 26 – Noviembre 1, 2025. Basahon an Evangelio gikan sa Lucas 18,9-14 (Ika-30 Domingo sa Ordinariong Panahón - C).

…

An parábola kan Fariseo asín parasíngil nin buwís inistorya kan satóng Kagurangnan Jesu Cristo sa “mga tawong tiwalà sa sadiri huli ta sinda daa mayong salà, asín dinuduhagì an ibá.” Dangan tinapos Niyá sa kasabihán na iní: “An gabós na nagpapalangkaw ibababâ, asín an nagpapakumbabâ ilalangkaw.”

Kun isipon ta na an mga Fariseos mga mapaabáw-abaw, asín an mga parasíngil nin buwis mga biktima saná kan mga panghuhusga kan saindang mga kahimanwá, daí ta nakua an punto kan parábola. Sa katunayan, kadaklan sa mga Fariseos mga marhay na tawo, matanos, asín halangkaw an respeto sainda kan komunidad. Alagad an mga parasíngil nin buwis, midbid na mga kurakot, madayâ, asín mga traydor sa saindang banwaan huli ta sinda mga ahente kan mananakop na Imperio Romano.

Kayâ kontrobersyal iníng parábola kan panahón na pig-istorya iní ni Jesús nin huli ta binaliktad Niyá an mga papél ninda sa sociedad. Iní tanganing itukdô na may duwáng klase nin pagpamîbî, duwáng klase man nin pagsabuhay sa pagtubód. Malinaw kun arín an naooyonan nin Diós: an pamîbî na mapakumbabâ.

Sabi sa Sirach 35,21: “An pangadiê kan mapakumbabâ minatadom sa alapaap asín sagkod na makaabót dumán daí napapamugtak. Daí nanggad siyá maontok sagkod na dûngawón kan Oróg Kahalangkaw.” Kayâ sa pagpamîbî asín pagsabuhay nin pagtubód, may nagkapira kitang kaipohan na likayán.

Maglikáy na daí magín mapaabáw-abaw.

Pag halangkaw an satóng paghilíng sa sadiri asín hababâ an sa kapwa, daí ta namomòtan an kapwa siring na an lambang sarô satô namomòtan nin Diós. Dangan sa pagkumpará kan satóng sadiri sa ibá, tibaad daí ta máhilíng an pangangaipo niatò na magbâgo. Sinagwê ni Jesús an siring na kaisipán kan sinabi Niyá sa Lucas 15,7: “Magkakaigwa nin oróg kadakulang kaogmahan sa langit huli sa saróng parakasalà na nagbabaklî, kisa noventa y nueveng mayong salà na daí nagkakaipo magbaklî.”

Maglikáy na daí magín matanos sa sadiri.

Pag an satóng katanosan bakô sosog sa kabôtan nin Diós kundî sa satóng sadiring kabôtan, pâno kitá makakaligtas? Sabi ni Jesús sa Juán 14,6: “Akó an dalan, an katotoohan, asín an buhay.” An tawong matanos sa sadiri, pinipilì an sadiri niyáng dalan, nagtutubód sa sadiri niyáng katotoohan, asín naghohonà na an saiyang buhay para sa sadiri lamang. May patanid si Jesús sa Mateo 7,21: “Bakô an gabós na nagsasabi Sakô, ‘Kagurangnan, Kagurangnan’, makakalaóg sa Kahadean kan langit, kundî an naggigibo kan boót kan Amâ Kong yaon sa langit.”

Maglikáy na daí magín mababaw sa pagtubód.

Pag an satóng pamìbì mas dapit sa mga minalipas na bagay, embes na sa buhay na daíng kasagkoran, mababaw an satóng pagtubód. Mamîbî kitá bakô saná na magin maogma o nin pasil na buhay, kundî nin isog asín higós para sa makahulugán asín mabungang buhay. Tanganing makasabi kitá siring ki San Pablo sa 2 Timoteo 4,7: “An marhay na pakilaban ipinaglaban ko na, an pagdalagan pinagtapos ko na, an pagtubód pinag-ingatan.”

An mga dukhâ asín mapakumbabâ, an mga nagsasarig sa Kagurangnan, sinda an may hararom na pagtubód. Sinda an tinukdô ni Jesús sa Mateo 5,3: “Paladan an mga dukhâ sa espiritu, huli ta sainda an Kahadean kan langit.

…

GIYA SA PAGHIRÁS | Maghirás nin experiencia sa pagpamíbí na iká nagin mapaabáw-abaw, o na iká nagpakumbabâ asín naghagad nin kapatawadán. | GIYA SA PAGHIRÔ | Anóng gaweng paglingkod na mapakumbabâ an pwede nindong gibohon bilang saróng komunidad/pamilya?

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song

 

An Parabola nin Danay na Pagpamibi

 

Giya sa Prayer-Meeting nin mga Saradít na Komunidad nin Pagtubód (SAKOP) para sa semana kan Octubre 19-25, 2025. Basahon an Evangelio gikan sa Lucas 18,1-8 (Ika-29 Domingo sa Ordinariong Panahón - C).

…

An mensahe sa Evangelio malinaw tulos sa poón pa saná. Sa Lucas 18,1, “nag-osipon si Jesús sa mga disipulos nin parábola, manungod sa pangangaipo ninda nin danay na pagpamamîbî asín tanganing daí mawâran-boót.”

Danay asín daíng ontok kitáng magpamîbî. 

Uya an saróng hukóm na daíng paniroan sa tawo ni sa Diós. Dangan uya man an saróng balo, daíng yaman asín kapangyarihan, alagad daí nanggad nagpondó hanggang makákua nin marhay na desisyon halè sa hukóm.

Sabi kan satóng Kagurangnan Jesu Cristo sa Evangelio: “Daí daw surogón nin Diós an Saiyang mga pinilì na nag-aagrangay Saiya aldaw-banggi? Mag-abala daw Siyá manungod sainda?” Dangan sinabi pa Niyá sa Mateo 7,11: “Kun kamó na maraot nganì, tataó magtaó nin mga marhay na bagay sa saindong mga akì, an Amâ pa daw nindong yaon sa langit an daí magtaó nin karahayan sa mga naghahagad Saiya?”

An parábola nasabi na, an mensahe napaabót na, kayâ pwede ta na daw isipon na tapos na an istorya? Bakô pa. Nin huli ta sa hurí, nagwalat si Jesús satô nin saróng hapót para paghoróp-horopan: “Alagad pagdigdi kan Akì nin Tawo, makákakuá daw Siyá nin pagtubód sa dagâ?” Anó an boót sabihon kainí?

Binabâgo kitá nin danay na pagpamîbî.

An katuyohán kan pamîbî bakô na makua ta pirmi an satóng hinahagad kundî na mabâgo an satóng pusò. An pagpamîbî iyó an satóng pakipagkaolay sa Diós tanganing magtalubò asín magrarom an satóng relasyon sa Saiya. Anoman na makahulugán na relasyon sa satóng buhay – magurang, ilusyon, agóm, akì, best friend, mentor – nakakapabâgo sa satô. Anó pa daw an satóng relasyon sa Diós?

An Diós daí na kaipohan magbâgo huli ta yaon na Saiya an kapanoan nin karahayan asín pagkámoot. Kitá an kaipohan magbâgo. Asín an tandâ na an satóng buhay binâgo na kan satóng relasyon sa Diós, sinabi ni Jesús sa Juán 8,31-32: “Kun magpadagos kamó sa Sakóng tataramon, tunay Ko kamóng mga disipulos; mamimidbid nindo an katotoohan asín itatalingkas kamó kan katotoohan.”

Binabâgo an kinâban nin danay na pagpamîbî.

Hararom an parábola kainíng hukóm asín balo. An balo bakô sanáng makulít kundî hinampáng niyá an saróng sistema na bakóng patas asín makatarungan sa mga arog niyá. An danay na pagpamîbî nakakapabukás man sa isip na máhilíng an realidad nin kasâlan sa kinâban – poón sa pagkamakuri nin tawo sa kapwa-tawo sagkod sa mga istruktura nin inhustisya sa sociedad.

Dangan dinadará kitá kainí sa pagsadól sató ni San Pablo sa 2 Timoteo 4,2, na “paghulit kan tataramon asín pagmaigot sa pagpahayag kaiyan, nasa panahón man o bakô napapanahón.” Nin huli ta an pagbâgo kan satóng pusò asín isip bakô pribadong kapangganahán saná, kundî iní nagbubunga nin mas maigot na pagmangno sa kapwa, asín paghingowa para sa karahayan asín pag-uswag nin pamilya, komunidad, sociedad, asín bilog na kinâban. Kayâ nganì igwa kitá kainíng pamîbî: “Madya, O Espiritu Santo, asín bâgohá an lawóg nin kinâban!”

Iní an simbag sa hapót satô ni Jesús: sa Saiyang ikaduwáng pagdatóng makákakuá Siyá nin pagtubód sa kinâban pag an satóng danay na pagpamîbî dagos kitáng binabâgo sa katanosan asín kabanalan, asín an banwaan sa katoninongan asín karahayan nin kagabsan.

…

GIYA SA PAGHIRÁS | Anó an mga pinapangadyê mo sa ngonian? | GIYA SA PAGHIRÔ | Bilang saróng komunidad/pamilya, magpilì sa mga pamîbî kan mga pag-iriba asín pagtarabangan na mautób iní.

PASUNÓD-SUNÓD KAN WEEKLY SAKOP/FAMILY PRAYER-MEETING | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song