Mabalik sa Paghukom sa mga Buhay asin mga Gadan

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Noviembre 14-20, 2021. Basahon an Ebanghelyo gikan sa Marcos 13,24-32 (Ika-33 na Domingo sa Ordinariong Panahon – B ).

…                                                                                      

An ebanghelyo manunungod sa katapusan kan panahon, sa Ikaduwang Pagdatong ni Jesu Cristo. An mga imahe na katakod kaini – mga darakulang calamidad, mga paghiro nin mga bagay sa kalangitan, an Huring Paghukom – nagin parte na kan imahinasyon nin mga Cristiano sa gabos na panahon.

Malà nganì, dakul na mga simbahan na Cristiano, na bakong Catolico asin literal an pagsabot sa Biblia, para ipaliwanag an saindang imahinasyon kan huring panahon, minagamit nin mga tataramon siring kan “rapture”, “Armaggedon”, “anti-Cristo”, asin iba pa.

Siring man, paminsan-minsan may minabutwâ na profesía daa nin kun siisay na parahulâ o pamayó nin relihiyon na nagpapatubod na aram daa ninda an eksaktong petsa kun nuarin matatapos an kinaban.

Alagad bako siring kan mga ini an tradisyon nin pagtubod niatong mga Catolico. Enot, kaidto pa man, dai pig-iinterpretar nin literal nin mga pamayo asin paratukdo kan satong Simbahan an mga nakasurat sa Biblia manunungod sa huring panahon. Ikaduwa, tinutungkosan kan Simbahan an mga tataramon mismo ni Jesu Cristo sa Marcos 13,32: “Dapit sa aldaw asin sa oras, dai nin nakakaaram, ni an mga angeles sa langit, ni an Aki, kundi an Ama sana.”

Ano an katukdoan kan Simbahan manunungod sa huring panahon asin Ikaduwang Pagdatong?

Nagtutubod kita sa huring panahon bilang articulo nin pagtubod. Pinapahayag niato sa pagpamibi kan Credo na si Cristo “mabalik sa paghukom sa mga buhay asin mga gadan”. Sa Banal na Misa, sinasambit niato ini bilang “misteryo kan pagtubod”: “An pagkagadan Mo, Kagurangnan, ipinapamareta niamo; an pagkabuhay Mo liwat, ipinapahayag; sagkod na Ika magdatong.”

Hinahalat niato an Ikaduwang Pagdatong na panô nin paglaom. Hinahagad niato sa Ama Niamo na “magdatong an Kahadean Mo”. Sa Daniel 12,3, nasusurat na ini an mangyayari sa pagdatong kan Kagurangnan: “An mga may pakasabot magliliwanag siring sa kalangitan, asin idtong mga nagtukdo mom kabanalan sa dakul na tawo, magigin siring sa mga bitoon sa panahon na daing kasagkoran.”

Sa ebanghelyo ginamit ni Jesus an ladawan kan pagsupling kan mga sanga kan poon nin higuera, tanda kan papaabot na maogmang panahon nin tigbungahan. An Ikaduwang Pagdatong iyo an mabalaog na panahon nin kapanoan kan Kahadean, an pagkabuhay-liwat nin mga gadan, an pagtiripon giraray nin mga mahal sa buhay na naseparar nin kagadanan asin panahon.

Alagad an paghukom ni Cristong Hade nagdadara nin kahandalan. Nin huli ta siisay man nanggad an perpekto sa mata nin Dios? Gabos kita makasâlan asin may mga pagkukulang sa Kagurangnan asin sa kapwa. Kaya…

An maninigong pag-andam sa huring panahon iyo an pagsabuhay kan pagkamoot sa ngonian na panahon.  Sa Juan 13,35, si Jesus nagsabi: “maaaraman kan gabos na kamo mga disipulos Ko, kun magkaminorootan kamo.” Sa huring parabola sa Ebanghelyo ni San Mateo (25,31-46), huhukuman kita kun ano an satong ginibo (o dai ginibo) sa mga pinakasadit niatong tugang ki Cristo, nin huli ta iyo man an ginibo ta Saiya.

Sa 1 Corinto 13,13, nasusurat: “Tolo ining nagdadanay: pagtubod, paglaom, saka pagkamoot; alagad an pinakadakula sa mga ini iyo an pagkamoot.”

…

GIYA SA PAGHIRAS SA SADIT NA KOMUNIDAD O PAMILYA • Maghiras kun ano pa an kaipuhan mong gibohon o haleon sa saimong buhay tanganing magin andam sa panahon nin Paghukom asin Ikaduwang Pagdatong.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song