An Kahadean nin Langit siring sa Balo

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Noviembre 7-13, 2021. asahon an Ebanghelyo gikan sa Marcos 12,38-44 (Ika-32 Domingo sa Ordinariong Panahon – B ).

…                                                                                                                    

An Kahadean nin langit siring sa sarong dukhang babaeng balo na naglimos sa Templo nin sensilyo na may pinakahababang halaga. Ini gayod an boot itukdo ni Jesu Cristo, na kan sinda nasa Templo, itinurô Niya sa Saiyang mga disipulos an sarong balo asin nagsabi: “An dukhang babeng balo naglimos nin labi kan sa gabos. Huli ta an gabos naglimos kan sobra sainda; alagad ini, sa saiyang kadaihan, ilinimos gabos, gabos na kaipuhan niya tanganing mabuhay” (Marcos 12,43-44).

Kaidtong panahon an mga babaeng balo kaiba sa mga pinakadukha sa sociedad, nin huli ta dai sinda pwede magsadiri nin anuman na propriedad. Mas lalo kun sinda dati nang dukha asin may mga aki na papadakulaon. Kaya sa libro kan mga Gibo kan mga Apostoles, nasusurat na an suanoy na Simbahan nagtatabang sa mga balo asin mga ilo.

An extraordinariong gibo kaidtong balo – na kinumpara sa mga mayaman na nagtao sana kan saindang sobra, asin sa mga escribas na mapaabaw-abaw, parasagin-sagin, asin parasamsam pa kan pagsadiri nin mga dukha – pinapahayag kun ano an mahalaga sa Kahadean.

Ladawan nin disipulo ni Cristo. An pinahiling kan babaeng balo na dakulang pagsarig sa Dios na kagtao kan saiyang mga pangangaipo, tanda nin sarong tunay na disipulo. Kun kita may pagsarig sa Dios, gigibohon ta an tama asin an susog sa Saiyang kabotan maski magdulot ini sato nin kadipisilan asin kasakitan.

Sa 1 Hade 17 may istorya nin saro man na balong babae sa Zarephath (banwa sa luwas kan teritoryo kan Israel) sa panahon nin makuring taggutom, na hinirasan si profeta Elias kan huring tinapay na kakaonon kuta niya asin saiyang aki, dangan andam na sindang magadan huli ta dai nang ibang makakaon. Asin dakulang milagro an nangyari sainda pagkatapos: “an kakanon sa koron dai naubos asin an lana sa dulay dai nahubas” sagkod na matapos an panahon nin taggutom. An pagtubod niya sa Dios asin sa profetang Saiyang sinugo an nagligtas sainda.

Ladawan ni Jesu Cristo. An pag-atang kan balo nakakabaing sa pagpakadai sa sadiri ni Cristo bilang Dios na nanitawo na uminabot sagkod sa Saiyang Pasion. Susog sa Hebreo 9,26: “inatang Niya an Saiyang sadiring buhay sa pagparà kan kasàlan”. Tinurô Niya sa saiyang mga disipulo an ginibong pagsaksi kan babaeng balo na sa saiyang kadaihan tinao pa an “gabos na kaipuhan niya tanganing mabuhay”. Maabot man an panahon na si Cristo matao nin siring na pagsaksi, asin mas orog pa, sa pagdusay kan Saiyang buhay sa krus tanganing maligtas an gabos.

Ladawan kan Dios Ama. Siring sa babaeng balo, tinao man kan Dios Ama an pinakamahalaga Saiya, an Saiyang pinakanamomotan, bilang sakripisyo para sa kaligtasan nin kinaban. Sa Juan 3,16 nasusurat: “Huli ta namoot na gayo an Dios sa kinaban kaya itinao Niya an Saiyang bogtong na Aki, tanganing an siisay man na magtubod Saiya dai magadan kundi magkamit nin buhay na daing katapusan”.

An babaeng balo sa ebanghelyo padagos na nagsasaksi para sa Kahadean, lalo na sa panahon ngonian na an natatangadan asin inoomaw nin kadakul iyo an mga nag-aabuso sa kapangyarihan asin mga nagpayaman hale sa korupsyon asin hinàbasan. Pilion ta na magin siring saiya tanganing mapasato man an sinabi ni Jesus sa Mateo 5,3: “Paladan an mga dukha sa espiritu, huli ta sainda an Kahadean nin langit”.

…

GIYA SA PAGHIRAS SA SADIT NA KOMUNIDAD O PAMILYA • Maghiras nin experiencia nin pagsarig sa Dios asin pagsunod sa Saiyang kabotan minsan nagdulot nin kadipisilan o dai pagkasinabotan.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song