An Pasko para sa Pamilya

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Diciembre 26, 2021-Enero 1, 2022. Basahon an Evangelio gikan sa Lucas 2,41-52 (Fiesta kan Sagrada Familia).

…

Sa ebanghelyo, an Sagrada Familia ni Jesus, Maria asin Jose nagpasiring sa Jerusalem, sarong tradisyon na ginigibo ninda cada taon. An enot an Domingo sa Pasko celebracion kan Fiesta kan Sagrada Familia, na iyo an pangarogan nin mga Cristianong pamilya sa kabanalan asin kaimbodan sa kabotan nin Dios. Segun sa ladawan kan Sagrada Familia, an lambang Cristianong pamilya inaapodan nin Dios na magin Simbahan sa harong, eskwelahan nin pagkamoot, asin tanda nin paglaom.

Simbahan sa Harong. An pinakasadit na unit nin sociedad asin Simbahan iyo an pamilya, kaya ini inaapod man na Ecclesia Domestica o Simbahan sa harong. Ini naipapahiling sa pagsimba, sa pagpamibi, asin sa mga gawe nin pagtubod sa Dios.

Siring ki San Jose asin Santa Maria na dinara si Jesus sa Templo sa Jerusalem asin tinukdoan Siya kan mga tradisyon nin saindang pagtubod, an misyon nin mga magurang na Cristiano iyo na ipamidbid  sa saindang mga aki an mahal na Dios – sa pagtukdo sainda sa mga pamibi asin  doctrina kan Simbahan, sa pagpatood sainda sa mga Catolicong tradisyon, sa pagdara sainda sa mga sacramento, asin sa pagsimba sa cada Domingo asin mga aldaw nin obligasyon.

Eskwelahan nin Pagkamoot. Sa lindong ni Jose asin Maria, nakamatè si Jesus nin pagkamoot nin mga magurang sa daga. An experiencia nin mga aki nin pagkamoot sa pamilya magigin dakulang influencia sa paghiras man ninda nin pagkamoot sa luwas kan pamilya, asin kun sinda na man matogdas nin sadiring pamilya. Manunungod sa pagkamoot, lalo na sa laog nin pamilya, ini an hulit ni San Pablo sa Colosas 3,13-14: “Magpatinios-tiosan asin magpatinawad-tawadan kun an saro may hinanakit sa saro man; kun pàno an Kagurangnan nagpatawad saindo, siring man kamo. Sa ibabaw kaini gabos iyo an pagkamoot na iyo an bugkos kan kalubosan.”

Sa ngonian na panahon, marhay man na tawan nin atensyon nin mga pamilya an pagkamoot sa banwaan, na naipapahiling sa pagtabang sa komunidad, sa pagigin marhay na ciudadano, asin paghongowa na itama an mga salâ sa sociedad. Orog na kaipuhan ngonian na an lambang miembro nin pamilya – gurang asin aki man – na magsaksi sa pagsikwal sa kultura nin garadanan asin pang-aapi sa derechos humanos, sa paninindogan sa katotoohan lalo na kun may mga kapamilya na nagpapalakop nin fake news, sa dai pagpabakal nin boto, asin sa responsableng pagpili nin mga kandidato.

Tandâ nin Paglaom.  Sa Sirach 3,3-4 nasusurat: “An naggagalang sa ama naghihipno sa kasâlan, asin an nagpapamuraway sa ina siring sa nagtitipon nin kayamanan.” Ini an hararom na kahulugan kan paggalang niato sa satong mga magurang: nakatakod ini sa paglaom kan madatong na kamurawayan.

An lambang pamilya kaiba sa dakulang pamilya kan Kahadean nin Dios. Kaya mantang nabubuhay digdi sa dagâ asin nasisibot sa mga pangangaipo sa aroaldaw, an pamilya nagtuturo man sa realidad kan maabot na buhay na daing kasagkoran. Naipapahiling ini sa pag-andam sa mga aki sa buhay na daing kasagkoran; siring man sa pagrumdom asin pagpamibi sa mga miembros  kan pamilya na naenot na sa ikaduwang buhay.

…

GIYA SA PAGHIRAS SA SADIT NA KOMUNIDAD O PAMILYA • Maghiras nin mga tradisyon kan saindong pamilya sa panahon kan Pasko. Nahihiling daw sa mga ini an pagigin Simbahan sa harong, o eskwelahan nin pagkamoot, o tanda nin paglaom kan saindong pamilya?

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Pinaorog Karahay sa mga Babae Gabos

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Diciembre 19-25, 2021. Basahon an Ebanghelyo gikan sa Lucas 1,39-45 (Ikaapat na Domingo kan Adviento - C).

…

An istorya sa ebanghelyo iyo an pagsungkô ni Virgen Maria sa saiyang pinsan na si Sta. Isabel. Midbid man ini bilang Visitacion, an ikaduwa sa mga Misteryong Maogmahon sa Santo Rosario. Ano an kahalagahan kaini sa kasaysayan nin satong kaligtasan?

Pinapahayag kaini an pagkamarahayon ni Virgen Maria. Garo baga ini pruweba na dai nanggad nasalà an Dios sa pagpili saiya na magin Ina kan Saiyang Bogtong na Aki. Kaiba sa binareta ki Virgen Maria kan angel na si Gabriel an pagbados kan saiyang pinsan na si Isabel na kaidto nasa ikaanom na bulan na. Kaya makalihis sana nin nagkapirang aldaw naglakbay si Maria sa kabubuldan kan Juda pasiring sa harong ni Zacarias asin Isabel tanganing magtabang sainda.

Kaya ngani kaidto pa man rinaranihan na si Maria nin mga henerasyon nin mga Cristiano nin huli ta aram nin kadakul na siya madudolokan sa saindang mga pangangaipo. Sinasabi na an ikaduwang kabtang kan pamibi na Tara Kagurangnan Maria dinagdag kan ika-14 siglo sa panahon kan pandemiang Black Plague. Pinapahayag kaini an Cristianong tradisyon nin paghagad kan saiyang intercesion: “Santa Maria, Ina kan Dios, kaming mga makasàlan, ipamìbì mo kami ngonian sagkod sa paghingagdan niamo.”

Alagad bako sana intercesion ni Maria an mensahe kaini, kundi ini man nagin inspirasyon sato na arogon an saiyang pagkamarahayon asin pagkamatinabang. Nasusurat sa Hebreo 13,16: “Dai kamo malingaw sa paggibo nin karahayan asin sa  pagpatarabang-tabang, huli ta iyo ini an mga sakripisyo na nakakapaogma sa Dios.” An dakulang destroso asin makuring pagsakit na dara kan bagyong Odette sa dakul na lugar sa Mindanao asin Visayas, nagtatao sato nin oportunidad ngonian na Adviento asin Pasko na isabuhay an pagtarabangan  na ini.

Pinapahayag kaini an dará ni Maria na gracia ni Jesu Cristo. An gracia nin Dios iyo an Saiyang presencia sa satong buhay. Kan si Maria nagbisita ki Isabel, ipinangidam na niya si Jesus, asin an Saiyang presencia namatean kan mag-inang Isabel asin Juan (na naglukso sa kaogmahan sa laog kan tulak  kan saiyang ina). Kaya sinabi ni Isabel an mga tataramon na nagin parte na man kan pamibi ki Maria: “Pinaorog ka karahay sa mga babae gabos, asin orog pa karahay an saimong Aking (an bunga kan saimong sinapopônan) si Jesus”.

Sa saiyang pagsungkô asin pagtabang ki Isabel, bako sana an saiyang sadiri an dará ni Maria kundi kaiba niya si Jesus. An pagigin ina kan Orog Kahalangkaw especial na privilegio ni Maria, alagad lambang saro satong mga Cristiano, sa bisa kan satong pagbonyag, dara man pirmi an Espiritu ni Cristo. Kaya pag kita naggigibo nin karahayan, o nagsasabi nin totoo, o namomoot, o nagpapasensya, o nagpapatawad sa mga nagkasala satuya – bako sana an satong sadiri an naggigibo kaini kundi kaiba ta an Espiritu Santo na nagpapabunga pang lalo kan satong mga karahayan asin naghihipno sa satong mga kakulangan.

Sa Banal na Misa, may parte na sinasadol kita na magpatinaraohan nin katoninongan. Gibohon ta man ini sa luwas kan Misa asin ihiras an Saiyang Espiritu sa paagi kan satong mga gibong karahayan asin tabang.

…

GIYA SA PAGHIRAS SA SADIT NA KOMUNIDAD O PAMILYA • Maghiras nin experiencia nin paghiras sa kapwa kan gracia nin Dios sa paagi kan satong gibong karahayan o pagtabang.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

 

Mag-ogma Kita sa Kagurangnan!

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Diciembre 12-18, 2021. Basahon an Ebanghelyo gikan sa Lucas 3,10-18 (Ikatolong Domingo kan Adviento - C)

...

An istorya sa ebanghelyo pwedeng basahon sa contexto kan Ikatolong Domingo kan Adviento na inaapod man na Domingo nin Gaudete. An “gaudete” tataramon na Latin na an boot sabihon, “mag-ogma”. Nin huli ta an pag-andam sa Adviento sarong maogmang pag-andam.

Sa ebanghelyo, namamatean an pagkadagka asin paglaom kan mga tawong naghihinanyog sa mensahe ni San Juan Bautista.  Tinutukdo man niya kun saen niato makukua an tunay na kaogmahan.

Enot, an kaogmahan makukua sa katanosan. May tolong grupo na nagharapot saiya kun ano an saindang dapat na gibohon. Sa katawohan sinabi niya: na an may kakayahan magtabang sa kapwang nangangaipo, gibohon iyan.  Sa mga parasingil nin buwis: dai mandaya asin mangurakot. Sa mga soldados: dai mangotong asin maggamit nin dahas, asin makuntento sa sweldo.

An katanosan iyo an paglakaw sa dalan nin Dios asin pagsunod sa Saiyang kabotan. Matanos an mga matinabang sa kapwa nin huli ta nakua ninda an pagkamaheherakon nin Dios. Yaon sainda an Saiyang kaogmahan. Alagad mamundo an mga makasadiri asin maimot, an mga nagdadara nin pagtios sa kapwa nin huli sa korupsyon, asin an mga nang-aapi.

Ikaduwa, an kaogmahan yaon sa katotoohan. Tanganing mawara an mga salang paghona nin mga tawo, tulos nagpahayag si San Juan Bautista na bako siya an hinahalat na Mesias, asin sinabi pang bako siyang maninigo na maghubad kan sandalyas kan Mesias. Dai niya kaipuhan mag-utik o maghambog, kaya yaon saiya an kaogmahan nin Dios.

Si Jesus nagtukdo sa Juan 8,32: “Mamimidbidan nindo an katotoohan, asin an katotoohan an magpapatalingkas saindo”. Alagad an mga parautik asin nagpapalakop nin salang bareta, bako talingkas kundi oripon kan prinsipe nin kaputikan, si Satanas, na an dara palsong kaogmahan, mga karâtan, pagbasol, asin kamundoan.

Ikatolo, asin orog sa gabos, an kaogmahan yaon sa Kagurangnan. Sabi ni San Pablo sa Filipos 4,4-5: “Danay kamong mag-ogma sa Kagurangnan. Harani na an Kagurangnan!” Tibaad magsabi kita: may saysay daw an pag-ogma sa maabot na Pasko, kun nag-aagi ako nin krisis asin kadikloman; kun nawaran nin mahal sa buhay, o nin trabaho o negosyo; kun napapagal na ta sa haloy na panahon dai pa nakakamit an mga pangarap sa buhay?

An simbag: iyo, maninigo asin dapat na icelebrar an Pasko asin mag-ogma sa Kagurangnan. Nin huli na mismo sa satong kadikloman kaya Siya napadigdi bilang liwanag. Sa tahaw kan mga bagyo sa satong buhay, Siya an pailihan. Sa paghampang ta sa mga kadipisilan asin agyat nin buhay, Siya an masasarigan.

Giraray sabi ni San Pablo sa Filipos 4,6-7: “Dai kamo mahandal. An saindong kaipuhan ipahayag nindo sa Dios, ipamibi asin ipakimaherak, panô nin pagpasalamat. Asin an katoninongan nin Dios na dai matugkad kan isip nin tawo, magdanay sa saindong mga puso asin isip, ki Cristo Jesus.”

…

GIYA SA PAGHIRAS SA SADIT NA KOMUNIDAD O PAMILYA • Maghiras nin maogmang experiencia nin pagtabang sa kapwa, o panindogan sa katotoohan, o paglingkod sa Dios.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song

  

Andamá an Dalan nin Kagurangnan

 

Giya sa Prayer-Meeting nin mga Saradit na Komunidad nin Pagtubod (SAKOP) para sa semana kan Diciembre 5-11, 2021. Basahon an Ebanghelyo gikan sa Lucas 3,1-6 (Ikaduwang Domingo kan Adviento - C).

…

Sa ebanghelyo, si San Juan Bautista “ihinarubay an bonyag nin pagbaklî para sa kapatawaran nin mga kasalan”. An “pagbaklî” sa orihinal na Griego iyo an tataramon na “metanoia”, na an boot sabihon “pagbago nin isip” pasiring sa pagbagong-buhay. Ini an pangenot na mensahe kan panahon kan Adviento. Ano an kaipuhan niatong bàgohon asin gibohon?

Bàgohon an satong mga saláng kaisipan. Lalo na an satong pagkaarà sa kapangyarihan asin kayamanan. An istorya sa ebanghelyo nagpoon sa pagpamidbid sa pitong pinakamakapangyarihan na mga tawo kaidtong panahon: si Tiberio Cesar, emperador kan Roma; si Poncio Pilato, gobernador kan Judea; an mga tetrarcas na si Herodes, Felipe, asin Lisanias; asin an duwang halangkaw na padi, si Anas asin Caiafas.

Alagad kan dumatong an tataramon nin Dios, dai itinao sa mga ini kundi ki Juan, aki ni Zacarias. An pagkakaiba ni Juan sainda, tinuyo tanganing ipahiling an kasaditan asin kababawan kan saindang kapangyarihan kumpara sa kadakulaan asin kahalagahan kan mensahe nin kaligtasan na dara ni Juan para sa bilog na kinaban.

Kaipuhan na salidahan an satong lumang kaisipan tanganing maako an Marhay na Bareta. Kun an tentacion panlalansé tanganing an tawo magkasalà, an Marhay na Bareta iyo an katotoohan na maligtas sa tawo sa kaoripnan nin kasàlan.

Iayon an isip asin boot sa kabôtan nin Dios. An satong Dios nanitawo para sato, nin huli sa pagkamoot Niya sato. Sabi ni San Pablo sa Roma 5,8: “Ipinahiling nin Dios an Saiyang dakulang pagkamoot sato kan si Jesus nagadan para sato kan kita mga parakasala pa!”

Mismo an profesía kan “tingog na nagkukurahaw sa desierto” sa Isaias 40,3, tanda nin Dios na dai pinabayaan an Saiyang banwaan. Ini sinurat kan mga panahon na kadakul na Judío an nabibihag asin nasa destierro (exile) sa Babilonia, kaya an marhay na bareta kan saindang katalingkasan mahale sa desierto bako na sa Jerusalem. Nagkatotoo ini kan buminagsak an Babilonia sa kamot kan imperiong Persia, asin an bagong hade tinugotan sindang makabalik sa Israel.

Kan sa Bagong Tipan sinabi na an profesíang ini nangyari an kapanoan ki Juan Bautista, bako na ini manunungod sa mga kinabanon na paraligtas laban sa mga kinabanon na kaiwal, kundi sa pagligtas kan gabos na linalang ni Jesu Cristong Aki kan Dios. Kaya an pag-andam kan dalan nin Kagurangnan asin pagtanos kan Saiyang agihan iyo an pag-ako niato sa satong Paraligtas nin bilog na puso, isip, kalag, asin boot.

Akoon an bagong buhay ki Cristo. Ano an mangyayari kun satong sikwalon an kasàlan asin akoon an kaligtasan? Makakamtan niato an bagong buhay ki Cristo. Giraray sabi sa profesía (Lucas 3,5-6; Isaias 40,4-5): “an lambang ampas papanoon, an gabos na bukid saka bulod papantayon, an mga tikong dalan tatanoson, asin an mga lubak-lubak papantayon”.

Bako ini manunungod sa literal na mga ampas, bulod, asin dalan, kundi sa bunga kan kaligtasan ni Cristo sa satong buhay. Itataas Niya kita sa satong pagkabagsak, rurumpagon Niya an satong kapaabaw-abawan, tatanoson Niya an satong buhay – tanganing magin kitang maninigo na magcelebrar kan Pasko kan Saiyang Pagkamundag, asin maako kita sa Saiyang Kahadean sa aldaw kan paghukom.  

Sabi ni San Pablo sa Filipos 1,6: "Aram ko na an nagpoon kan marhay na gibo saindo, iyo man an matapos kaiyan sa aldaw na dumatong si Cristo Jesus".

…

GIYA SA PAGHIRAS SA SADIT NA KOMUNIDAD O PAMILYA • Maghiras nin experiencia kun pâno binâgo nin Dios an satong saláng kaisipan manungod sa satong sadiri, o sa kapwa, o sa Saiya, o sa Saiyang kabotan.

PASUNOD-SUNOD KAN WEEKLY SAKOP/FAMILY PRAYER-MEETING • Kumustahan/Pamiridbidan • Disposition to Prayer / Silence • Gathering Song • Opening Prayer • Gospel Reading • Reflection • Sharing • Scripture Response • Closing Prayer (Spontaneous and Our Father) • Closing Song